رواية ابناء الحسوم "شمسون" الفصل الخامس عشر 15 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

بعد لا طينتي
ولا تنحَط بصفي
انا برة القصر
بس قالق السلطان
وانتَ وي العَبيد
الواگفة تهَفي

- سعد شمَيل

━━━━━━  ━━━━━━

"جنات" (نورت الحب 😂😍)
نمنا اني والبنات ثلاثتنا بغرفة وحدة وضوء خافت مفتوح علمودي اخاف من الظلام، احنه ببيت نعالي المستقبلي العفو خطيبي المستقبلي ببيت الحيوان فاهد وهسة نايمات بالطابق الثاني..

انطو لكل وحدة غرفة بس فضلنا ننام سوه اي عيني شكو كل وحدة بغرفة لا يجون يسوولنه شي ذولة مو امان..

مليت من الكعدة ولا گدرت انام قررت انزل جوه استكشف البيت الوقت تأخر اكيد نام الططوة، تسحبت انزل من الدرج مثل الحية الصفرة ليستوقفني صوت بسبسة كلما جايهة تعلى مع تقدمي لبوابة وحدة من الغرف..

-مالك: عجيبب هيچ رجاال ما يفتهم شگد بعد يصير عمرك فاهد؟؟ ابقى طول عمرري اركض وراك اني ماعندي شغل وعمل!!

-فاهد: من اصير 28 راح اصير ادمي وعد

-مالك: يااا صبر الارض!!

-شمسون: كافي دوختوني

-مالك: مو وكت دوختك يابة مروان شااف اسم فااهد وشاف القضية معناها صار يعررف!!

-فاهد: واذا

-مالك: يگدر يفضحنا ويشهرنا يا فهيم

-شمسون: مالك جيبلي ماي عطشت

-مالك: لا انتو مو طبيعيين!!

-فاهد: هسة غير افهم انتَ ليش حارگ حمامك؟

-مالك: شنوو؟

-فاهد: شوف اني نسيت هذا ميفتهم هالمصطلحات قصدي ليش زعلان ومعصب؟

-مالك: لان كالعادة انتَ تلوس واني انظف وراك!

-فاهد: اسمها تلوص عزيزي مالك وليس تلوس

-شمسون: بابا لازم نشتغل على لهجتك العراقية جاي تطير هيبتنا ابني

مادة بس عيوني اتابعهم شمسون وفاهد النعال گاعدين بكل برود و مالك مشعوط يشيل روحه ويرگعها بالگاع اي حيل بيك حيل بعد شگ زيجك خلي يرتاح گلبي..

-مالك: اهمالكم ماله حدود تدرون لو لا؟

-فاهد: ندري

-مالك: هالمرة انتَ تنظف وصاختك فاهد اني شلت ايدي منك

-فاهد: لا بروح امكك لا.. اوگف هي منو امك؟

-مالك: استغفففر الله فاااهد

-فاهد: مالك بطل استغفار لا تدخل الجنة وتعوفني بالنار ماگدر اعيش بدونك تعرف بيه

-مالك: حظي النحسس خلاك انتَ اخووية

-فاهد: قلبي يتمزق

-مالك: حيل

-فاهد: ويتفطر ويتطشر ويهز خصر ويلعب باح باح ويه تيسير

-شمسون: ههااهههاههاا فهدي لا تترعن

-فاهد: يابة ريّح گلب بچرك وحللنا السالفة بشرف امك قبولة

-شمسون: شگد تعبانين انتو لو مربي چلاب احسن

-فاهد: خلصنا لا تظل تسولف

رفع شمسون التلفون يتصل وبكل بساطة گال بعدما جاوبه الطرف الثاني..

-شمسون: سحلولي مروان ومنو وياه.. لصمومهم لصم بأسم شُهيب شمسون

سد الموبايل طبيعي وحط رجل على رجل يكمل تدخين جگارته..

-مالك: ليش حطيتها براس شُهيب؟

-فاهد: وليش ميحطها براس نعاال؟؟

كفخ شمسون فاهد ونتر بي..

-شمسون: لا تغلط على اخوك ابن الغبرة

-مالك: ما جاوبتني

-شمسون: جاي اسوي لـ شُهيب فضل هو ومروان مو على صُلح خليني احل سالفته ونخلص نمري من وجع راس مزمن

-مالك: يعتبره اخوه!!

-فاهد: بس هو مو اخووه احنه اخواانه وبااعنا!!!

-شمسون: مالك اترجاك بابا بطل حساسيتك شوكت تتغير انتَ تعبتني گلبك وشلعناه شنسويلك بعد و تتغير باباتي؟

تركهم مالك يطلع من البوابة الثانية بينما شمسون والنعال كملو محادثتهم..

-شمسون: شلون وياه هذا الرجال

-فاهد: عوفه معليك بي شبيك دوبك من دوب مالك

-شمسون: لان گلبه رهيّف الزلمة ميصير گلبه رهيّف فااهد!! ما ربيتكم حتى تكونون هشيين!!

-فاهد: مالك مو هشش هو بس حساس وميحب الظلم صارله وياك ثلاث عقود شوكت راضي تقتنع بشخصيته!

-شمسون: اسكت لا تزعجني

-فاهد: انتَ الازعاج الوحيد الموجود بحياتنا

-شمسون: احلف؟

-فاهد: وداعة نسوانك

ضحك شمسون ضحكته الغريبة مرة ثانية يصفگ بيده عاجبه كلام فاهد، بقيت اتسمع عليهم وگلبي نبض بقوة بلعني الخوف من وصل لشمسون اتصال خلى ملامحه تتغير دفع الطاولة الزجاجية الي بجانبه وشمرها على الحايط خلاها تتفلش..

-شمسون: ابنن ال****** ماااالللك

-فاهد: شكوو شصاار

-شمسون: جيببه اليوم اشرررب من دممه ابن العااار

طلع فاهد يجيب اخوه ورجعو ثنينهم، وگف شمسون فاير فور و برمشة عين انطى لمالك راشدي صدى صوته بالمكان الهادئ..

-شمسون: لييش تعاندد انتَ؟!!!

زفر مالك بعصبية يدفع ايد ابوه عنه وشمسون مشعوط رفع ايده يريد يضربه بعد وصار بيناتهم فاهد يدفع ابوه ويصيح..

-فاهد: كااااافي فهموونااا شكووو

-شمسون: اني مو امرتهم يكتلوه؟؟؟ ليييش گلتلهم عوفوهم؟؟؟ تدري شنو سويت انتَ لو لااا!!!

-مالك: ادري

-شمسون: راح تسبب مشكلة لاخوك شُهيبب يا غبييي شمعرررفك ما يرحون يشتكون عليه؟؟؟ ما ينسحححل بهالليل مخافرر ومراكز شرطة بسببك!!!

-مالك: ينسحل مراكز شرطة احسن مما تربط بي جريمة قتل لثلاث نفرات! واخوه من ضمنهم!

-شمسون: اطمطم السالفة شنو الجديد؟؟؟ اول مرة نكتل واحد؟؟؟

-مالك: بس مو اخو شُهيب!! انتَ تعرف راح يخسر اخوانه نشوان وكيان! وتعرفه شگد يحبهم ويخاف عليهم! شنو برأيك راح يسوون اول ما يكتشفون هو كتال اخوهم الچبير!

-فاهد: يابة مالك عاشگ كيان

-مالك: انتَ انلصممم

-شمسون: صدگ تحچي مالك؟

-مالك: لاا للمرة المية ما احبها البنية عمرها 21 سنة شحب منهاا

-شمسون: يعني لو چانت اكبر چان عادي تحبها؟

-مالك: گلت لا! ماعندي مشاعر تجاهها بس كيان حبابة وما تستحق تتبهذل وتنحرم من اخوها الچبير

-فاهد: ويگول ما احبها

-مالك: هذا مو حب فاهد افهم! هذا اهتمام اني جاي ارجعلها اهتمامها بيه بهاي الطريقة وخلص انتهينا

-شمسون: احلف بروح امك ما تحبها خلي يرتاح گلبي

-مالك: وروحها لامي ما احبها

-شمسون: لعد ليش مهتم بيها لهاي الدرجة؟

-مالك: احس وياهة بأحساس غريب

-فاهد: يعني تحبها

-مالك: خررب رووح امك كاافي

-شمسون: احساس شنو؟

-مالك: احساس الاخوة احسها اختي الصغيرة واحب احميها

ضحك شمسون بخفة يهز راسه موافق كلام مالك، گعد على الكرسي يستريح وگال وهو يشعل جگارة..

-شمسون: صدق او لا تصدق حتى اني، احبها هالملعونة

-فاهد: بگد بنتك استحي على شيباتك

-شمسون: حب ابوي ابن الكلب ليش بالك دائماً وصخ

-فاهد: تربيتك

-شمسون: ابوسها

-مالك: صدگ تحب كيان؟ هاي اول مرة اعرف بهالشي

-شمسون: اي احبها ماعرف ليش بس احس بأحساس الابوة وياهة واحب احميها.. وهسة بطلو هالسخافة وكلمن يروح يكمل شغله مو وكت احاسيسكم ومشاعركم الخايسة

ركضت على جهة المطبخ من شفت فاهد يتقدم على البوابة مالتي، بقيت بالمطبخ فترة وفتحت الثلاجة اسوي روحي اشرب مي من حسيت بمالك يدخل هنا..

تثاوبت وذبلت عيوني علساس هستوني گاعدة، مطيت ايدي وگلت بتعب..

-ها شو گاعد

طلعت راسي من الثلاجة شفته صافن عليَّ سديت الباب ووگفت مكتفة ايدي..

-جنات: راح تبقى صافن حضرتك؟

-مالك: تنامين بالحجاب؟

-اي

-ليش؟

-لان انتو مو امان على ساعة تطبون لغرفتنا تثلبونا (تسلبونا)

ضحك خفيف وفتح باب الثلاجة يأشرلي حتى ازيح عنه الطريق، طلع بطل حليب موز وصبه بگلاص..

-جنات: رجال طول بعرض يشرب حليب موز؟

-حرام؟

-لا بث (بس) خربت هيبتك

-احسن

اخذ الكوب مالته وراد يطلع من المطبخ رجع من صحتله تقربت اوگف مقابيله..

-جنات: شلون چانت الحفلة اليوم حلوة برأيك؟

-مالك: لا

-جنات: هااا شعجب توقعتك حبيتها عيونك ما نزلت عن ام الازرگ

-مالك: ام الازرگ؟

-جنات: مثرة قيثارة!

-شبيها؟

-من اولها تخون اختي!! شتحث انتَ شتحثث؟؟؟

-مالك: احس بالنعاس ورايح انام

-اوگففف دا احچي ويااك

-خير

-حرام عليك تلعب على ايات حررام

-ما جاي اللعب على احد بنيتي شبيچ انتِ

-ونظراتك للبنية شنو؟؟

-نظرة عادية يعني شلون تردينا نغمض عيوننا؟

-ايييي لان حتى نظرة الاعجاب تعتبر خيااانة!!

-ما منعجب بأحد واتطمني ما جاي اخون اختچ

يحچي ببرود وكأنه ما طايق اختي، عافني يطلع من المطبخ انقهرت اكثر من اسلوبه واني اشوف ايات تتفرگع على نظرة منه وهو يباوع على أي شي بس حتى متلتقي نظراتهم..

-انتو بلا گلب تدري بهالشي؟

حچيتها بصوت خافت بس سمعني، شفت ظهره من وره ترخي عضلاته دليل تنفس واندار يقابلني مرة ثانية، تقرب مني كم خطوة خلاني ابتعد عنه ويصير ظهري على الباب هالمرة تعاكست اماكننا عن قبل شوية..

-مالك: شبيچ؟

-جنات: انتَ مبين واحد لعوب وايات متثتحق هالشي!

-مالك: وشلون عرفتيني لعوب؟

-جنات: وجهك طولك جثمك معضل وعندك وشوم هواي اكيد تكون لعوب!

-مالك: هذا تفسيرچ للـ لعوب؟

-ايي

-اذاً انتِ هم لعوبة

-شنو

-وجه حلو، لسان حلو، جسم مثالي ووشوم بجسمچ اكيد تكونين لعوبة

-شمعرفك عندي وشوم؟!

-ايات گالت

-لا يا ططوة!!

-شنو

-اني مو لعوبة اني....

انلصمت من حسيت بأيد تجرني من ياختي وره يسحبني يطلعني من المطبخ..

-جنات: اااااخخ ولك فااهد ابن الفگررر عوفنااااايي

-فاهد: شگد وكحة هالبنية وعرمة

-جنات: مثل اخووك الططوة

-فاهد: تعالي اقريلي قثة ماطولچ سهرانة

-جنات: خلي اخوك الططوة يقرالك قثة!! ولك هددني انذببحت رگبتييي بالياخخخة

-مالك: شلون لسان

-جنات: هااا ميعجبكم لثاني مووو اني اعلمكممم الا اربيكم يا ولد شمثووون

-مالك: اسكتي دخت جايتنا بنص الليل تهدد وتنطط مثل الصرصر

-جنات: عمت عييييينك وعين ابوك العـ.....

سكتت جافلة من شفت عمو شمسون واگف بباب المطبخ بمعنى چان يستمع عليَّ اني وذولة الزبايل عزه!

-فاهد: شو انلصمتي؟

-جنات: ثكتت احتراماً لعمو

-مالك: الحمد لله رب العالمين

-فاهد: هم ذكر الله انتَ شلون بيك الا تديحني بجهنم وحدي؟!

-جنات: اووووعععع شلون عقل معفنن

-فاهد: انچبي وامشي وياي

يسحسل بيه يصعدني الدرج وياه ادفع بي واعضعض بيده وهو يضحك مكيف..

-فاهد: ولك مالك هاي چنها بزونة

ضحك مالك يهز راسه بـ "اي" ويگول..

-مالك: بزونة لسانها شطوله

-شمسون: هههااههااههاا شحلاتها

-جنات: ولك فگوور هدنييي

-فاهد: تعالي اشوفچ غرفتنا

جرني لـ باب فتحها ودفعني من كتفي بخفة حتى ادخل، تخصرت وخزرته بدون لا اطب..

-فاهد: ما راح يصير شي اساساً ما عقدنا بعد وابويه يموتني لو سويتلچ شي قبل لا تصير بالحلال طبي بس شوفي الغرفة

-جنات: ماريد وخر

-فاهد: دطبي

دفعني وخلاني ادخل غصب خزرته من راد يسد الباب علينا گلب عيونه وضحك تركها مفتوح، الغرفة واسعة كلش وشبه فارغة مابيها تفاصيل بس سرير عملاق متوسطها وبردات باللون البني الغامق والحايط ورق جدران بني وذهبي وبس..

-جنات: ماعندك كنتور؟؟ ميز؟؟ كومدي؟؟ صخام؟؟ لطام بعينك؟؟

-فاهد: لسانچ طويل تدرين؟

-جنات: تروحله فدوة اي ادري

-فاهد: بنت صاحب الكلب شتوقع منچ

-جنات: شوف مابيه حيل اتعارك فـ راح اغلث (اغلس) هالمرة

-فاهد: يكون افضل

-جنات: الكنتور وين؟

-الكنتور مو مثلكم خشب احنه دفن غرفة وحده..

اشرلي على بوابة بالجانب وبصفها هم باب مبين حمام..

-فاهد: وهاي مو غرفتي الاصلية اغلب الوقت اني بالمكتب الي ممنوع منعاً باتاً تطبيله

-ليش يمة؟

-لان ممنوع!

-الا اطب

-اكسر رجليچ وروح اميي

-ميهمني المهم اروي فضولي

-جنات!! اني ما جبتچ هنا لسوااد عيوننچ اني لو بيدي ادددفنچ هسة واخلص منچ فـ لا تستعجلييين على موتچ

-دوليي

جرني من ياختي يلطشني بالحايط صرت اراوح بمكاني اريد اتملص من ايده واعيط بي اختنگت..

-جنات: ابن العااار اني اعلمممك والله الا امووتك بيددي اخنگك وانتَ نااايم يا زباااالة

-فاهد: انلصمي وسمعيني! جبتچ حتى احذرچ هاي الغررفة الچ شتسوين بيها سووي بكيفچ بس غرفتي ممنوع تطبيلهاا واذا شفتچ بيوم محاولة بس محاولة تردين تطبين ما تطلعين منها عايشة وبعد اني حذرت!

يحچي بجدية تامة ما خفت منه بس قررت اتجنب الشر خيولي شسوي بغرفته طز بي وبيها، تركني ودفعني بره حتى اطلع من الغرفة نزلت اگعد بالصالة وحدي شفت تلفون موجود على الشحن مخلي صامت ويضوي كل شوية بأتصال..

تقربت اشوف مال منو هذا علساس راح اعرف المن يعني، چان اتصال من واحد مسمي danyy سكت الاتصال منتظرة تظهر شاشة التلفون اكيد مخلي صورته خلفية بس الخلفية مو صورة رجال وانما صورة بنية!

بنية شعرها احمر وبشرتها ناصعة البياض والنمش مغطي ملامحها الهادئة، لابسة جاكيت وردي ولفاف بنفسجي، البنية بالصورة كلش حلوة بس عابسة مادة شفتها السفلية كأنها متحضرة للبكاء..

جذبتني وبقيت اتأملها بهدوء يا ترى هالحلوة تابعة لمنو من ولد شمسون، مالك الملعب لو فاهد الحيوان؟

-ليش تلفوني بيدچ؟

اللتفتت بسرعة على صوته چان فاهد ضحكت واني امدله الجهاز اگول..

-جنات: واحد اسمه داني چان يتصل بيك.. بالمناثبة البنية تخبل

بقى على طنگورته ما جاوبني باوع لصورتها شوية ورجعه بجيبه..

-فاهد: هاي العشق

-جنات: ما شاء الله على قلة الادب

-خليني اكون صريح من البداية مو احسن؟

-طبعاً

-احبها

-حلو

-اموت على التراب التمشي عليها مو تغارين منها

-ابد ولا يهمك اصلاً اني حبيتها تقبل احبها وياك؟

حچيتها بضحك ما اعنيها بس شو هذا غيمن ملامحه وگال بجدية..

-لا!! سارة الي وحدي!!

-اها اثمها ثارة

-حمرتي

-وتدلعها حمرتي حلو حلو بعد شعندك طلعهن

-حبيت روحچ الرياضية بس ماعندي غير سارة

-يله الله يجمعكم

رقت ملامحه فجأة وتنهد مبتسم يهز راسه..

-فاهد: الله يسمع منچ

-اني اخطبها الك اروحلها اگوللهه اني مرته الاولى وانتِ صيري الثانية

ضحك وگعد مقابيلي على القنفة، تلمس الالماسة الي بأذنه وذب نفس..

-جنات: اني اكرهك بث حلوة حمرتك فاهد ومبين عليك تحبها حب صادق ان شاء الله صدگ تنجمعون

-شبه مستحيل جمعتنا بس نحاول

-ليش مثتحيل؟

-لانها تصير بنت عدو ابوية اللدود وشمسون طلع حرگته بسارة.. اذيناها اعترف هواي اذيناها

-الثؤال المهم انتَ اذيتها؟

سرح بالفضاء شكله ديفكر تنهد وگال وهو يحرك راسي بـ "لا"..

-المشكلة ماتذكر الصار بس اني متأكد ما اذيتها مستحييل اأذيها

-ليش ترددت قبل لا تجاوب؟

-لان ماتذكر ما چنت صاحي بذاك اليوم

سكتت ماعرف شنو اجاوب، بقى صافن بموبايله على صورة البنية مبين صدگ يحبها واحساسي يگول هو ما اذاها لان حبه واضح واني متأكدة الي يحب مستحيل يأذي حبيبه..

-فاهد: خوش مستمعة انتِ تفيدين واحد يفضفضلچ

-جنات: اي فضفضلي شگد متريد بث حباب لا نتزوج قنع ابوك

-خوش

-صدگ تحچي؟؟؟

-لا

-الله ياااخذك

-وياخذچ وياي باع هاي البطرانة هو بكيفنا نتزوج ومنتزوج

-انتَ مو رجال متحچي شبييك

-شوف هاي عايشة بعالم وردي

تلفونه رجع دگ گام وهو يفتح الخط وطلع من البيت مستعجل، رجعت اصعد فوگ انام بالفراش ادحس روحي بـ ايات واحضنها من خصرها ياله اگدر انام..

**

في مكان يملئهُ الظلام، رائحة الكبريت والحرارة، دخل شُهيب يمسح جبينه من العرق البده يتصبب منه وينزع جاكيته وقميصه لو بيده ينزع جلده عن لحمه بسبب حرارة المكان..

-شمسون: تأخرت نمري

-شُهيب: چنت نايم

طلع جگارة يدخنها بعدما نطق هالكلمتين بينما شمسون اللقى نظرة على الساعة المزينة معصم ايده ويشوف الوقت عبر 3:00 الفجر..

-شمسون: امم، تريد باباتي؟

يقدمله كاس مشروب وبعض المكسرات گلب عيونه شُهيب متنرفز بدون لا يعيرله اهتمام يبعد شعره عن جبينه ويمسح بالعرق اليصب من وجهه لصدره نزولاً لعضلات بطنه..

-شمسون: وشم جديد؟

أشر بعيونه على مكان بخاصرة شُهيب يغطي جرح سببته مسرة، مرسوم فوقه وشم عبارة عن رسمة خنجر سميك مو واضحة تفاصيله الدقيقة بالضبط مثل باقي الوشوم المغطية جسمه فقط من تتقرب منهن كلش تگدر تعرف الرسمة شنو بالضبط..

-شمسون: منين هذا الجرح مبين جديد؟

-شُهيب: يله بسرعة وراية دوام

بنفس اللحظة دخل فاهد يفرك بعيونه الحمر ابتسم شمسون بـ رضا من انجمعوا اخيراً، نزع فاهد بدوره جاكيته وقميصه وگال مستعجل..

-فاهد: داني اخرني علمود الشحنات ساعتين يلغي براسي

-شمسون: المهم كملت كلشي

-فاهد: باچر كلشي راح يكون جاهز

هز راسه وأشر لفاهد بعيونه حتى يبدي الموضوع وبدون تفكير فاهد طلع جگارة من جيبه وشعلها ليشعل بكلماته اول فتيل من نار اليوم..

-فاهد: شعجب اليوم امك ما رگصتلنه؟

ما اهتم شُهيب منطيه اذن الطرشة، كمل فاهد بنفس الأسلوب المستفز وهو يزفر الدخان من فمه بهدوء..

-فاهد: ابن ماريا الرقاصة ام الزلم شو مسترجل؟

-شُهيب: فاهد روح عني لا تخليني انعل خير خيرك

-فاهد: هههههههههههه ابن ماريا ***** الزلم روحة رده

وهنا طفح كيل شُهيب وشال الجگارة البين شفايفه وطفاها برقبة فاهد وفاهد بدوره شال جگارته وطفاها بزند اخوه بعنف يطفي غضبه.. وبدت الحرب الطاحنة بوكسيات على دفرات على رفسات على راشديات متتالية، نار جاي تكبر بسرعة وتحرق الاخوة وتحرق خوتهم..

-فاهد: ههههههههههه هاي كل قووتك ****** بأختك الساااقطة

لطم شُهيب حلگ فاهد بكف ايده تبعه بوكسيات عديدة بأماكن مختلفة بجسمه، دفره وگعه بالگاع وصار يضرب بوحشية على بطنه لدرجة فاهد راد يستفرغ وبده يسعل دم.. عيونه نطت راح تطلع من محجرها شُهيب فقد رفع اخوه من رقبته يشيله من الارض ويهبده مرة ثانية بطريقة اقوى مخلف صوت قوي لتكسر جسم فاهد..

-شمسون: هههااهههااههها نمري هذا

ما اكتفى "النمر" مثل ما يحب يسمي ابوه بهذا القدر رفع جسم فاهد المعضل على ظهره وضربه بالحايط اكثر من مرة ليختم العركة بـ شمرته لجسمه على الارض مخلف وراه صوت انين واهن يصدر من الجثة المهزومة..

-شمسون: مشتاقلك

رمقه شُهيب بحقد، بحدة، بـ كُره شديد، تنفسه عالي ووجهه خالي من أي خدوش كالعادة شرط شمسون بأي مبارزة ممنوع احد يلمس الوجه حتى لا يتشوه جمالهم مثل ما يگول، اما جسمهم فـ هو عبارة عن خرائط من الجروح والخدوش والطعنات بأغلب الأوقات..

-شمسون: اشرب شوية

شمر على ابنه بطل مي دفره شُهيب بالحايط بقوة وعبر الغرفة يطلع منها يسحب بيده جاكيته وقميصه لتستوقفه طعنة بكتفه اجته غفلة من الخلف، اللتفتت يلقط انفاسه ويستوعب الالم ليقابله فاهد المدمي بيده سكين فاكهة چانت بماعون شمسون ويرجع يطعن اخوه طعنة ثانية بصدره..

-شمسون: مو قريب على الگلب بابا

-فاهد: ابن الرقاصة اختفى صوتك؟

بعد جملته الدنيئة تفل على جهة دم من فمه وابتعد يسند ظهره العاري على الحايط يلقط انفاسه، بلع ريگه شُهيب ينظم دقات قلبه البدت تتباطئ نتيجة خسارته للدماء ثواني ورجع على حيله متغاضي عن الطعنات الي بجسده، هو مطعون طعنات اقوى واكثر وحشية من قبل واضطر يكمل المعارك الي يخوضها بس حتى ميموت..

رجعت الحرب اقوى واشرس، اصعب واقسى، اخ عدو لأخوه، اخ يكره اخوه، اخ غاضب من اخوه بسبب وبلا سبب، واخ.. آآخخ من حقد الاخوان وآخ من حقدهم.. چان لازم يكونون سند لبعض، قوة ومدد، عضد وظهر واحد يلزم اللاخ بس اخ.. آخ من بغض الاخوان..

دامت العركة لساعة ونصف من التعنيف، ساعة ونصف من فقد الدماء، ساعة ونصف من الترهيب والخوف، ساعة ونصف من طعن اخ لأخوه، ساعة ونصف من تكبير وتضخيم الضغينة في قلوبهم.. ساعة ونصف قبل لا يوصل مالك بيناتهم يقيّد فاهد المدمي يفاككهم ويصيح بصوته..

-مالك: كاااافي راااح تموتوون بعضض!!!

هدأ المكان بعد هذهِ الصيحة القوية، عيون شرسة تتعطش للمزيد، انفاس لاهثة تحارب للصمود ودماء تملئ الارضية البيضاء ملطخة سجادها الناصع..

-شمسون: احسنتم

توجهت الانظار على الطاغوت الاكبر، مستريح بمقعده رجل على رجل وبيده كاسة المشروب وامامه مروحة تبريد تزوده بهواء خاص اله وحده..

-شمسون: كالعادة ما خيبتوا ظني عفية بولدي

وگف بمكانه يطفي المروحة ويحط الكاسة على جنب، يودعهم بآخر كلماته الحقيرة..

-كانت سهرة جميلة نلتقيكم المرة القادمة

وهيچ راح وخلاهم بهذا الحال المُميت وكأن كان يحضر فلم وثائقي عن قتال حيوانات بين بعض ومستمتع على الاخر.. ما مستوعب هذي الحيوانات همه اولاده الي كبروا وترعرعوا على هذهِ الهمجية والقسوة لكن بنظر شمسون هذهِ هي الرجولة والتربية!

**

"مسرة"
اليوم اضمه ويه أيامي التعيسة، اسفة بس صباح مو الخير عليكم وعلى الخلفوكم هسة تگولون احنه شكو؟ راح اگلكم محتاجة مساعدة صديق يعاوني على التعاسة!

افتر بالكرسي مالتي وعقلي يفتر ويايه، مزاجي تحت الصفر والبارحة ما نمت للصبح افكر بالصار بالليل، چان متنا لولا تدخل مروان السريع من شخط سيارته وطلعنا من الجهة الثانية.. رموا كم مرة بالهوا بدون لا تطخ سيارتنا طلقة وخلونه نروح بسلام وهالشي استغربته..

يجوز اجاهم امر من ابن نعلون يعوفونه ويجوز هذا مجرد تهديد مبطن الي، يمكن شُهيب اكتشف المكيدة وعرف الاوراق للشركة الوهمية مزورة وحب يبين الي هو عرف بهاي الطريقة المثيرة..

-صبا: البارحة مروان چان سباايسيي

-مسرة: اتفق

-صبا: بس ليش صار كل هذا؟ تدرين سرور اني للصبح ما نايمة من الخوف ما عولت شوكت يجي الصبح حتى اجي هنا وافتهم شبي هذا شُهيب اذا چان مقلب فـ ابدد ميضحك!!

-مسرة: اممم

-صبا: ممداوم ما شفته.. ليش ما داوم؟ اصلاً ليش صار الصار البارحة وشلون صار؟ هو مو چان بالحفلة؟ شنو انتظرنا نطلع حتى يقتلنا لو شنو؟ صدگ الصار البارحة ماصخ ولعبان نفس هاي فوگما حضرنا عيد ميلاده وجبتله هدية بس ميستاهلها! اصلاً صوچنا احنه ما اشتكينا عليه كله من وراچ ما خليتينا نروح للشرطة....

صبا تحچي وبالي مو وياهة عقلي وياه هو ليش ما داوم اليوم وشنو غايته من تصرف البارحة؟ لسبب غريب حقدي عليه مغلف بـ عُذر يمكن عنده تبرير للصار يمكن اكو سوء تفاهم؟ مو؟

-مسرة: مقهورة من نفسي

-صبا: ليش؟

-مقهورة لان وثقت بي! صارلي يومين افكر شلون اخلصه من الورطة الجديدة الابوية جبرني اورطه بيها انقهرت على الوقت الضيعته على انسان راد يقتلنا!

-شنو الورطة ولج؟

-مو مهم هسة والله صارلي يومين ما نايمة صبا موتت روحي من القهر البارحة احچي وياه ودمعتي بعيني چنت مستعدة اوقع الاوراق بداله تخيلي!!

-يااا

-لا چذب ما اورط روحي هيچ بس اللگه حل فكرت ابوگ الاوراق واذبهن لو اخرب واهسه واخلي يبقى هنا مادري أي شي فكرت بهواي شغلات

-اني ممفتهمة شي بس انتِ جايه تنتقمين لو تنقهرين وتبچين على ولد شمسون؟

-خيولون ذولاك الچلاب بس اشهب ما اقبل عليه گلبي يوجعني

-عمت عيني تفكرين بي وهو راد يكتلنا

-ايييي اخخ من غباائي!!

ما گدرت ابقى گاعدة من الحرگة رحت لمكتب نشوان شفت كيان موجودة هناك بدون اخوها..

-كيان: صباح الخير آنسة قيثارة

-مسرة: صباح النور، وينه اخوچ كيان؟

-كيان: نشوان طلع قبل شوية

-اخوچ شُهيب

-هاا شُهيب مريض اليوم گعد حرارته مرتفعة كلش ووضعه مو تمام قبل شوية اتصلت بي

-بسبب الحفلة مرض؟

-يجوز اي لان الجو بارد چان بالليل رغم هو ميمرض بسهولة بس من شُهيب يمرض بعد هذا هو يموت ينام بالفراش ثلاث ايام متواصلة سودة عليَّ

-خلي ياخذ علاج ولا يبقى هيچ نحتاجه

بلعت ريگها مستغربة من اسلوبي وهزت راسها بـ اي، انقهرت لان حچيت وياهة بنبرة قاسية هي شنو ذنبها حاولت اعدل موقفي من ابتسمت اعزمها..

-شنو رأيچ نطلع نشرب شي بوقت الريست؟

-كيان: هاا.. احم مادري اشوف

-انتِ بخير كيان؟

-اي بس اريد اطلب منچ اجازة ساعتين اليوم

-تروحين لـ شُهيب؟

-اءء.. اي اي اروحله

-تمام طلعي من وكت اليوم ميحتاج تاخذين بريك

-شكراً هوايه ما راح انسى معروفچ

چانت مرتبكة وتفرك بيدها غلست على تصرفها وقررت انطيها بقية الدوام اوف تكمل شغلها الي تريد تسوي، رجعت لمكتبي اكمل الدوام ملل كلشي مدا اعرف اشتغل بدونه شلون بيه شلون ورطة ورطت روحي..

ذبيت كعبي وگعدت متربعة على الكرسي ناوية ابدي اخطط بس شنو اسوي يخرب كلشي مو حلو اخطط واتعب واذبه بالزبل بالنهاية تركيزي صفر..

-الله ياخذذذذك

شگيت الورقة منهارة وشمرتها گدامي سديت اللابتوب وگمت اخذ بريك فد خمس دقايق، جسمي يرجف كلشي ما اكلت متعودة الحقير يسألني اذا ماكلة لو لا ومن اگول لا يوصيلي اكل كل يوم نفس الاسطوانة تنعاد ويظل يدردم عليَّ بينه وبين روحه عباله ما اسمعه من اگله مسوية رجيم وما اتغده..

-الله ينتقم منك بهذلتني

رجعت اشتغل بس ماكو فائدة عقلي قافل ودمي يفور، قررت اغير موقع شغلي اخذت اغراضي وحاسبتي ورحت للمكتب مالته حطيت كلشي على الطاولة ونزعت حذائي مثل العادة وتربعت على كرسيه المريح..

-اححح هسة الواحد يعرف يشتغل الله ريحة القهوة تموت

اخذت نفس عميق كلش وزفرته المكتب عبارة عن ريحة قهوة رغم ماحبها وما اطيق اشربها بس صرت احب اشم ريحتها او نگول تعود خشمي عليها وبديت احب الريحة..

اخذني الوقت واني اشتغل اخيراً خلايا مُخي بدت تساعدني الچلبة متشتغل الا بمكان بي ريحة اشهب ابن نعلون..

بعد مرور ساعتين كملت جزء من المخطط وراضية بالنتيجة، مطيت ايدي لفوگ اطگ اكتافي ورقبتي ارتاح شوية واجاني اتصال من ابوية..

-فادي: بالدوام انتِ حبيبة بابا؟

-مسرة: اي وانتَ وين؟

-بالشركة، بابا اليوم معزومين على العشا بس حبيت ابلغچ

-منو عازمنا؟

-بعدين تعرفين المهم حطي ببالچ حتى ترجعين للبيت على وكت

-تمام

قضيت بقية اليوم گاعدة هنا ما طلعت حتى من كملت شغل وخلص الدوام وطلعوا الموظفين حطيت الحاسبة اتفرج حلقة من مسلسلي التركي بلكي ابوية يأيس مني ويروح وحده..

گمت ادور على شي آكله بالمكتب تذكرت هو جايبلي جلاتين وحطه بالجرار خاف يعجبني آكل فتحته لگيته موجود طلعته ورحت للثلاجة اخذلي عصير هم تعود عليَّ ما اشرب الا اناناس صار يجيبلي كلما اخلص ويحطه هنا..

لثانية گلبي وجعني رغم كرهي لولد شمسون وجيتي هنا بس حتى اأذيهم بس علاقتي ويه شُهيب چانت مختلفة ماگدر اأذي وحتى من انجبر ادمره احاول اللگه طريقة اخلصه من هذا الدمار مثل اوراق البارحة من كل عقلي قررت ابوگهن واذبهن بدون لا يحس، وديتهن بس گلبي ما چان راضي على دماره، اخذتهن اله بس حتى اذا ابوية يسأله بيوم من الايام عن الموضوع يگله فعلاً مسرة جابتلي هيجي شي وميشك بيه ويحاربني من جديد..

اوقات انسى حقدي من نبقى وحدنا نشتغل وانسى السووا بينا انسى ان اني اكره هالانسان وواجبي ادمره چنت اعتبره صديق مريح واحب اقضي وقت وياه..

بس البارحة رجعلي عقلي واحس بالاحباط احس بالخيانة احس كلشي چان يسوي ويايه تمثيل وهو مو صديقي مثلما توقعت ولا يهتملي طلع حاله حال الكل همه الوحيد يستغلني وينهش بيه ويشمرني على قارعة الطريق..

قررت ارجع كلشي لمكانه وأنسى موضوع المسلسل واروح احضر العشا ويه ابوية مو هامني ويه منو العشا هي بكل الاحوال مليوصة..

رجعت ومثل كل مرة وصاني اكشخ على اخر حباية وقرر احط مكياج ثگيل واللبس اسود استغربت وتسائلت من طلبه..

-مسرة: عود ليش؟

-فادي: هيچ، بس لان الاسود يلوگلچ وحلو الميكب الثقيل عليچ بنتي

ضحكت ممصدگة هالبني ادم وصعدت فوگ اسبح واسوي شعري كيرلي، لبست فستان اسود بردن كاملة ضيقة وبوت مقدف عالي مغطي رجليه العاريه، عدلت الدناديش الي مزينات خصر الفستان وسبحت بعطري وطلعت..

-فادي بأنبهار: QUEEN!!

-مسرة: شكراً

-فادي: شگد صايرة تشبهين امچ سرور

ابتسمت احب من يذكرني بهالشي، دائماً يگول الاختلاف الوحيد بيني وبين امي هو الشامة الي فوگ شفتي بشوية ولون بشرتي،  هي بيضاء ناصعة واني خمرية..

لبست جاكيت قصير يوصل لنص خصري وطلعنا سوه للمطعم، فخم وراقي من الباب اخذوا جاكيتي ودخلت مكمشة بأيد ابوية الانيق، همس ابوية بأذني..

-ابتسمي بابا حياتچ راح تتغير للافضل اليوم

-مسرة بضحك: وشلون بله؟

ابتسم على استهزائي واشرلي على طاولة العازمينا وچان اتفاجأة بشوفته، تقدمت بخطوات مترددة شدد ابوية على ايدي يأشرلي اتحرك اسرع وهمس بأذني من جديد..

-صيري حبابة جبته الچ وهاي فرصتچ الاخيرة شنو يطلب منچ جاوبي بـ "موافقة"....

**

"كيان"
سفط السيارة بالعنوان المطلوب، المكان فارغ يصفر والظلام دامس الاجواء مخيفة احنا وحدنا بسيارة بهيچ منطقة نائية يارب تخلص على خير..

-ثامر: يلا نزلي

-كيان: ثامر اخاف اروح وحدي

-ثامر: ماكو احد ليش خايفة كيان اني ابقى هنا انتظرچ

-هو لان ماكو احد اخاف باوع الدنيا هندس

-نزلي بس جيبيلي  بهذا الچيس كمية مرتبة وبعد متشوفين وجهي

-انزل ويايه حباب

-اذا انزل وياچ شكو جبتچ هنا!! خو اني اجيب وافضهاا نزززلي لا تعصبينييي روحي راح تطلع محتاااج جرعة

عيونه خابطة حمر ووجهه متعرق اصفر، اطرافه ترتعش محتاج اليوم كله ما اخذ مخلص وهسة يريدني اجيبله من ذني الكونتينرات ويعوفني للابد، صح ما صدگته بس على الاقل راح يعوفني فترة طويلة وما اضطر ابوگ من اخواني..

فتحت باب السيارة ضربني هوا بارد خلف قشعريرة خوف وبرد على جسمي، اللتفتت على ثامر المنهار وطلبت منه لاخر مرة..

-اوعدني متعوفني وتروح اذا يجي احد

-گتلچ محد راح يجي لااا تلحين!!

-واذا اجه احد حبااب ثامر لتعوفني انتظرني اجيلك

-حتى لو يجي احد شبيچ انتِ محد يگدر يسويلچ شي

-لييش عود

-لانچ اخت شُهيب شمسون يا غبية!

-وشدخل؟؟

-يشگهمم نصين لو انمس اظفر من اظافرچ نززلي لا تكرهينيي الدنيا

نزلت احسب خطواتي ارتعش رعب وغربة بس استاهل! اني الوصلت روحي لهذا المكان واني البهذلت حالي، اني الصاحبت انسان مو زين وانطيته الي يريده! اني الي اتسحب من اخواني بس حتى اطلع ويه ثامر اني الدمرت نفسي وراح انزل راس اخواني اذا ما صرت قوية ورحت اجيبله الي يريده..

هرولت من اقتربت من الشاحنة المتنقلة اشرلي عليها وحفظت مكانها، گال عنها لونها ازرق وبيها خطوط صفرة تختلف عن الباقيات ولگيتها بسهولة، انتفضت اتلفت بفزع من سمعت صوت عوي وكأن ذيب او حيوان مفترس بهاي الصحراء عزا العزاچ كيان شسويتي بروحچ يا غبرة!!

كلما اتقدم ديصير ظلام اكثر اضطريت اطلع موبايلي اشغل الضوة بس ما اشتغل حاولت بي اكثر من مرة وهم ما اشتغل ماعرف شنو السبب بس مو وكتها احتاج لايت مدا اشوف شي وتلفوني انارته ضعيفة متكفي..

انداريت على سيارة ثامر صارت بعيدة عني چانت تضويلي، اجتني فكرة افتح فيديو واشعل الفلاش مالته سويتها ونفعت الطريقة اشتغل الفلاش وصرت اشوف طريقي، تقربت من الشاحنة فرحانة اخيراً وصلت الحمدلله يارب..

ركضت عليها ادور على باب شلون ادخل ماعرف منين تنفتح، افتريت حواليها اضويلي بالفلاش وكل شوية اللتفت لسيارة ثامر اتأكد موجود لو عافني، اخيراً لگيت حديدة طالعة منها توقعتها مقبض الباب جريتها بقوة بس متنشلع.. حاولت اكثر وماكو فائدة تعبت وطاقتي نفذت صرت ابچي من القهر واحاول بقوة اكبر..

حسيت بعمودي الفقري ينشلع من مكانه من الالم بس ما اهتميت استمريت احاول بيها الى ان سمعت صوت قوي اجه من خلفي يبس عظامي ونشف الدم الي بجسمي..

-اظهر نفسكك!!

يحچي بلغة البلد صرت ارجف من فوگ ليجوه رجليه بعد متشيلني احس روحي راح تطلع وراح استفرغ شنو اكلت بالغدة، دموعي من وحدها صارت تنزل من شفت سيارة ثامر تشخط ويهرب تاركني وحدي هنا..

-راح احسب من واااحد للثلاثة! اذا ما اللتفتت افررغ هذا السلاااح برااسك اظهههر نفسسسك!!

اللتفتت بسرعة لابسة الهودي على راسي وهاينك مصعدته على حلگي ميبين بس انفي وعيوني مغطيتها گذلتي..

-نزل الكبوس

بچيت اكثر على حظي النحس ونزعت كبوس الهودي من راسي منزلة عيوني بالگاع ماگدر اباوع بوجه الشخص راح اموت خوف..

-شلون وصلت هنا!! شلون اندليت المكان؟!

بقيت ساكتة وأمرني وراهة اتقدم، تقربت كم خطوة للامام مستسلمة وعيوني ملاصقة الارض، رفعتهن من أمرني بأسلوب متعجرف..

-انطيني الموبايل!

مديت موبايلي ولسه معلوگ الفلاش والفيديو، تقرب مني خطواته حذرة ووجهه مقنع كلشي ماشوف منه، وجّه التلفون على وجهي وانتفضت من گال بصدمة..

-كيان!!

ركزت انظاري بي عيوني مغوشة ماشوف من الدموع ماگدرت اعرفه منو وما ميزت صوته بسبب القناع مغطي فمه من لا شعور گلت وصوتي يرجف..

-والله ما اقصد وروح ابوية ما اقصد اجي لمكانكم اصلاً.. اني ماعرف شي هنا بس گلولي ذني كونتينرات مخدرات تابعة لرجل اعـ...

فزيت اصرخ مرعوبة من ضرب طلقة بجانب رجلي چان صارت بيّ، زاد صراخي من هرول بأتجاهي يسحبني من ايدي يعتني وياه ومحاوطينا زلم هوايه متنشاف وجوههم بس يضوون طريقنا..

شمرني بسيارة طگت بلاعيمي من العياط اتوسل يعوفني غافلته انزل ورجع سحبني من شعري بقوة اكبر لازگني ظهري على صدره وايده محاوطة رقبتي..

-صوتچ ماريد اسمعه

بچيت من كل گلبي من سمعت لهجته عراقية، توسلت بي يعوفني وكلما احچي زايد يضغط على رقبتي اكثر اختنگت صرت ادور النفس، من حس بي خنست وراح تموع روحي رخى قبضته..

اگح وابچي بنفس الوقت اجر الهوا اريده يدخل لريتي وايدي ثنينهن لازمة بيهن ايده الي على رقبتي..

-عليك الله بداعة امك تعوفني والله معليه انييي معلليه

صرخت بألم من واحد من الگاعدين مقابيلي يضربني ببطني بالسلاح مالته احس روحي طلعت من الوجع، صاح بي هذا اللازگ بيّ وحررني من ايده يضرب الرجال..

ابتعدت منه جسمي ينتفض نفض ادور على القفل مال الباب ماكو مابيها الا السايق يفتحها، ضربت على الجام اصرخ بقوة فرفحت اريد احد يسمعني يساعدني ممهتمة اذا راح انضرب لو اموت بس اريد اشوف اخواني وماريا لاخر مرة اريد اعتذر منهم على غبائي وتهوري..

-صيحي منا لباچر محد يسمعچ كيان

درت اباوعله وشفته ينزع القناع من وجهه، جمدت اطرافي وتصنمت بمكاني ماعندي ردة فعل عقلي وگف من شفت ترچيته الالماس تلمع وعيونه الصفر تضوي ويه الضوء الخافتة..

-كيان: فاهد

-فاهد: اي فاهد!! شوداچ هناك يا غبية؟؟ تردين تمووتين انتِ؟؟؟ تعرفين لازم اكتلچ هسة لو متعررفين!!

رجعت ابچي بقوة اكبر واجر ذراعه اتوسل بي..

-فاهد فدووة والله ماگول لاحد ابوس ايددك رجعني لاخواني والله ماحچي شي مااگول صار كل هذاا بروح اممك لتسويلي شيي

سحب ايده مني يگعد بمكانه عدل يزفر متنرفز والسلاح بيده، جر الزناد ووجهه عليَّ يريد يضربني عصرت عيوني اعيط واتوسل وادعي حتى ميصيرلي شي واسمع لصوته الحاقد يگول..

-خربتي شغلي يا زماالة يااخت ال****** ضيعععتي علينااا ملاييين خلي ابوية يفتهممم والله يسويچ وصلتييين ويدز راسچ الغبيي هدية لاخواننچ!!

-اني اسسفة والله انجبرررت انجببببرت فااهد ادري بيك متحبنيي ادري متحب اخوااني بس اني بورطة سااعدني بس رجعني لاهلي والله ماحچييي ماگووول شييي ماااحچيي

-شنووو متگولين وانتِ مصورة المكان!!! مصورة الشاحنااات ومصورة كلللشي المن تردين تدزيهننن ويامن تشتغلليييين!!!

-ماشتغل ويه احد ماااشتغلل والله ما اشتغل ثامر خلاني اسوي هييچ هددني بشررفي وصور خاصة بيه ينشرهنن ويفضحنني عليك الله عووفني ارجععع

-كافي سكتي دخت

استمريت ابچي بالسكتة وعيوني تتابع الطريق من الجامة كلشي ماشوف من وره الظلام كلما اشهگ ببچيتي يتأفأف فاهد ضايج وارجع اكتم حلگي بأيدي حتى ميطلع صوتي..

خفت من نظرات الگاعد مقابيلي عيونه ما نزلت مني ونظرته مخيفة مركز ويه ايدي الحاطتها بحضني ويبتسم ابتسامات خبيثة، درت وجهي عنه اباوع لفاهد على الاقل هذا شوية اعرفه ولو هو زايعته الگاع بس يبقى اخو شُهيب..

انتبهت لفاهد يباوع للرجال المقابيلي بنظرات ما مفهومة رغم قهري وخوفي بس ركزت بيهم ادرسهم حتى انقل كلشي بالحرف الواحد لأخواني من يلگوني..

-فاهد: عينك راح افگسها

بلعت ريگ امسح الدمعة الي بخدي ونزلت راسي من شفت فاهد يباوع بأتجاهي..

-الرجال: كابيتان اني..

اخترعت من رفسه فاهد برجله وانطاه راشدي قوي يجره من رقبته من الخلف يخلي وجوههم مقابلة بعض..

-فاهد: عينك اليسرة ما عاجبتني ذكرني اقلعها الك اليوم

راد بحچي الرجال ولطمه على حلگه سَكته، گمت ارجف بالزايد من شفت الرجال ينتفض خوف رجال طول بعرض وضخامة صار يرعش گدامي ويتوسل مثل الجهال عزا العزااني شسويت برووحي اني شورطت روحي..

صكيت على اسناني اسيطر على رجيفي من وگفت السيارة، فتحها الرجال الويانة ونزلني فاهد يعت بيدي للبيت الموجود، بيت صغير والمنطقة بيها كم بيت ينعدون على الاصابع..

بچيت بصوت عالي اريد احد يسمعني ملخت روحي وملخت ايد فاهد الي صار يكتم صوتي حتى ميطلع ودخلني بالقوة للداخل.. كلشي ما شفت من المكان يركض بيَّ ركض يصعد بالطابق الثاني ودفعني بوحدة من الغرف يوگعني بالگاع، بعدني دا اگوم واركض ناحية الباب وقفلها عليَّ..

وگعت انحب بصوت عالي واتوسل يفتحلي اوعده ما احچي شي لاحد وما افتح حلگي حلفت بمية نبي ووصي وما اهتم ولا فتح القفل، انرعبت اكثر من صوته اختفى من الممر وصارت سنطة..

ركضت على الشباك الموجود اشوف سيارتهم تحركت عافني! فاهد عافني هناا وحددي شراح يسوي بيه؟ ليش حبسني هناا معقولة راح يجيب ابوه حتى يكتلوني!!

**

-نشوان: لو بس افهم شبيك ليش الا انتَ تطلع تشتري العلاج؟

-شُهيب: احتاج امشي شوية نشوان مليت من البيت

-نشوان: شوف روحك گوة تمشي مصخن ومضبر منين هاي الطعنات شُهيب؟!

-شُهيب: اوگف هاي صيدلية

-وكالعادة راح تلبسني ومتجاوب

ضحك على كيف ونزلنا نشتريله علاج، تعجبت شعجب هالمرة قبل ياخذ علاج مو من عوايده بس مبين عليه كلش متألم وبالعها وساكت..

-نشوان: مسرة اليوم سألت عليك وچانت مزعوجة

-حقها

-گالت عدكم شغل هوايه وراح يتأجل بس شرحتلها وضعك وتفهمت

-باچر اداوام احاول ما اتأخر

اشترينا العلاج ورجعنا للبيت بعدنا بباب بيت شُهيب وزفر نفس يگول..

-تذكرت حاسبتي بقت بالشركة شلون راح اشتغل

-عوفها باچر مو تريد تداوم كمل شغلك باچر

-لا هسة اريد اكمل المخطط امشي نجيبها

-بابا وضعك ميسمح تطلع شبيك انتَ

-يلا نشوان لا تجادلني

استسلمت واخذته للشركة ميگعد راحة هالرجال، الشركة ظلمة بس الحارس موجود صعدنا لمكتبه وشفنا چيس جلاتين فارغ على الميز مالته..

-نشوان: ههههههه اثار مسرة

ضحك يحرك راسه اي واخذ الچيس يذبه بالسطلة ، اخذنا الحاسبة وطلعنا من الشركة تصادفنا ويه مروان بنص الشارع..

-نشوان: مروان شعجب بعدك هنا؟

-مروان: چنت اشتغل

رمق شُهيب نظرة جانبية الها معنى دورت نظراتي بيناتهم شفت الشرار يتطاير من عيونهم بس محد حچى شي..

-نشوان: مريوان اني ابات عند شُهيب اليوم

-مروان: ليش يابة؟

-نشوان: متشوف الرجال مريض

-شُهيب: ما احتاجك نشوان نام ببيتكم

-مروان: تطرده؟؟ هاي فوگما متنازل عن راحته علمودك صدگ مو وجه نعمة

-شُهيب: ما طردته! اني اريد راحته وراح يتبهذل ببيتي

-نشوان: لا ما اتبهذل اودي كيان عند ماريا تبات عدها واني اجيب حبشكلاتي وانام على گلبك

-مروان: وشكو تاخذ كيان عند ماريا؟!!

-نشوان: شكو لعد راح تكيّف اختك يومية تتوسل تبات عند ماريا

-مروان: ماكو داعي كلمن يبات ببيته

-نشوان: خليني اسئلها اذا تحب تبات ببيتنا لو عند ماريا هي تقرر

-مروان: گلت لا!! كيان ما راح تبات بره البيت!

-شُهيب: انتَ شبيك؟

-مروان: والك عين تسأل يا ابن شمسون؟!!

-شُهيب: ابوية شجابه هسة؟ شكو غير تفهمني سالفتك؟!

-مروان: كيان متطلع من بيتنا!

-نشوان: خلص تمام على كيفك شبيك معصب كبد عمري

-معصب لان راح نسحل بي الگاع هسة

اللتفتنا ثلاثتنا على صوت فاهد يجي من جانبنا الايمن واگف وضبة زلم وراه، ما لحگنا نرمش وهجم علينا هو ورجاله يطلع عددهم تسعة، گبت عركة شكبرها شُهيب ماله خلگ مريض بس نسى كل المرض ويه فاهد ولزمه دگ كتل..

ما اللحگ اضرب الگدامي ويغافلني واحد من وره ويرجع واحد من گدام يحاصرني، عركة شوارع حامية وجوي هالسوالف رغم البوكسيات الاكلتهن طلعت كل ضيمي وحرگتي بيهم بس للاسف الكثرة تغلب الشجاعة وانخبزت خوش خبزة..

دقايق وسمعنا صوت صفارات الشرطة شردو زلم فاهد بقى هو ويانه ومستمر يتكاتل ويه شُهيب ويعاير بي ويسب بأمه، الدماية تطافر والملابس مزگة فزعت لـ شُهيب بينما مروان بقى واگف يمسح الدم من وجهه ويرتب قميصه المفتوح، وبنفس هاي اللحظة كبست علينا الشرطة..

-نشوان: هوو البده جاااب جماعته ومثل چلاب الشاارع حاصروناا

اصيح بالشرطي بلغة البلد وهو يقيّد ايدي بالاصفاد، سحلونا كلنا للمخفر وفاهد ويانه حچاية ما حچى لحدما اخذونا للتوقيف..

-فاهد: راح اعرف منو دزها شُهيب وروحهها لأمي اشرب من دمك ودمهها

-شُهيب: هي منووو ولك ابن الغبررة

-فاهد: تسوي روحك غشيم مو؟؟ الـ...

سكت من ضرب الشرطي بالعصا مالته على باب الزنزانة حتى يسكتون، فورة بصدري فورة واحس اكو شي غلط گلبي يلعب من جية فاهد حسيت اكو ملعوب وجاي حتى يلهينا عنه..

هدوء تام محاوطنا بس صوت واحد سكران گاعد ويانه يغني بصوته الجاعوري ثبرنا، ذبيت نفس افرك صدري وسألت الشرطي ساعة بيش صارت..

-الشرطي: 11:30

-نشوان: خرب حظنا منو راح يطلعنا!

-مروان: كله صوچ شُهيب كل مشاكلنا منك ومن ابوك واخوانك الشووم ولد الحسوم

-فاهد: انچبب لك واكل **** محد شوم غيرك انتَ واخوانك الهتلية ابن الغجرية

-نشوان: لا تحچي على امييي فااهد لا اندددمك وحگ روحههااا

رجع الشرطي يضرب باب الزنزانة بقوة اكبر ويهددنا اذا ما سكتنا يصعقنا بالكهرباء، سكتت ودمي يغلي اتخبل من واحد يحچي على امي، هي لا غجرية ولا بيها عيب هي چانت مجرد بنية كردية عايشة بالأرياف وحبها ابوية البسيط وتزوجها وانتقلو هنا بعد ولادة كيان، ما لحگت تشبع من بنتها وودعت بحادث سير مؤسف..

-الشرطي: فاهد وشُهيب شمسون.. اجه والدكم

گام فاهد وبقى شُهيب على گعدته صاح بي الشرطي حتى يگوم گوة شلعته من مكانه حتى يروح يشوف شكو بلكت راح يطلعونا ونخلص من هالمكان الخايس..

ربع ساعة ورجع شُهيب من دون فاهد وانصدمت من گال..

-شُهيب: ابوية طلع فاهد بكفالة

-نشوان: وانتَ؟؟؟

-اني ما اطلع

-ولك ليييش

-شُهيب: لان يريد تبقون هنا ميقبل يتكفلكم!

-مروان: هه وهسة صرت شريف وخايف علينا؟

-نشوان: اسكت مروان شُهيب من يوم يومه اخونا وشريف غصبااً عنك!!

-مروان: ابقى انتَ مستقتل عليه اكثر من اخوك الحقيقي

غلست عليه ممهتم وانداريت احاچي شُهيب..

-اطلع منا شُهيب عوفنا معليك بينا اني احل السالفة

-شُهيب: شلون تحلها؟ منو يطلعكم يعني؟

-نشوف فاضل

-شُهيب: فاضل مسافر وتلفونه مغلق حاولت اتصل بي قبل لا اجيكم

-نشوان: مادري اشوف واحد من معارفنا

-مروان: واحنه منيلنا معارف؟!

-نشوان: ندور مروان ندوور

-مروان: ماعندك معارف ولا اصدقاء غير هذا ابن الحسوم خلي يفيدك هسة

-شُهيب: اخر مرة اگولها مروان احترم نفسسك لا تخيلني اغلط وياك!

-مروان: تغلط شتسويلي؟؟ تدزلي واحد يكتلني مثلاً؟؟

-شُهيب: شگد تخرط انتَ!

مروان يريد يجاوب وتگب عركة جديدة وسكتتهم من گلت..

-نشوان: اشوف كيان هي تطلعنا

-مروان: تخبلت؟؟ شنو ماعندك غيررة على اختك؟؟ تجي تشوفناا هناا بين العفطية وولد الشوارع!!

-شُهيب: لا غلط نگول لـ كيان المكان مو امان كلهم زلم وشرطة وعيونهم مشتهية

-مروان: عيونهم مشتهية شنو

-نشوان: يقصدد كاتلهم الجفااف وراح يستغلون كيان ويزعجوهاا بنظراتهم وكلامكم صحيح مادري شحسيت من گلت اجيبها هنا

-مروان: جيبو ماريا

-شُهيب: صدگ تحچي انتَ؟!!

-مروان: لتخاف محد راح يغتصبها

-شُهيب: وعندك التحرش بس بالاغتصاب!!

-نشوان: عوفه هذا معليك بي بس على كيان ينگلب طنطل ويصيح ما تغار على عرضك

-مروان: لانك متغار على عرضك حاير بس بـ ماريا!!

-شُهيب: انتَ مدقوق من ماريا ليش ماريا مو عرضي وعرضك؟؟ مو مرت ابووك؟؟

-مروان: ديلا يلا

سكتنا نفكر بمنو نگدر نتصل، شُهيب رافض رفض قطعي يدخل جماعته يگول استحي وما مستعد يبرر لاحد وجوده هنا ويبرر فكرة تكاتل ويه اخوه بنص الشارع واني جماعتي بعيدين واحد بغير ولاية وكم واحد مو كلش قريب عليهم بيناتنا شغل فقط ومروان اصلاً ماعنده اصدقاء ولا يقترب من احد..

مشى الوقت ابطئ من سلحفاة حامل واحنه گاعدين نتصفن واحد بوجه الثاني، شُهيب وجهه متروس كدمات وقميصه متمزق والدگم طافرة باقي مفتوح ومروان وجهه صاير خريطة واني صاير الخريطة..

-نشوان: اجتني فكرة بس لحد يعفط رجاءً

-مروان: اتحفنا

-نشوان: نطلب من مسرة قيثارة تجي تطلعنا

-شُهيب: لو اموووت

-مروان: خوش فكرة ما راح اعفط

-شُهيب: گلت لا!!

-نشوان: شُهيب شبيك هي مو شريكتك ومديرتنا وعدها معارف هواي ونفوذها قوية راح نطلع بسرعة

-شُهيب: لا تحاول نشوان

-مروان: طبعاً متقبل اذا انتَ چافص چفصة بكبر راس الخلفك

-شُهيب: مروان وصلت حدها وياك!!

-نشوان: شنو چافص شُهيب؟

-شُهيب: شمعرفني هذا يلغي وحده

-مروان: غشم روحك

-شُهيب: شمسويلك ولك اني؟!

ما جاوب مروان ورجع الهدوء يستوطن بيناتنا، شوية وانفتحت باب الزنزانة گلنا اجه الفرج وچان يفاجئونا من طلعوا السكران وعافونا هنا يگول الشرطي منتظرين كفيل واذا تردون تتصلون بأحد بلغونا..

-نشوان: معقولة ثلاث زلم بكبر البعير ماعدهم واحد يكدر يساعدهم والله فشلة

-مروان: عدنا بس حضرة جناب شُهيب شمسوون يخاف على برستيجه لا ينشخط گدام طبقتهم المخملية

استغفر شُهيب هامس يمسح على وجهه يسيطر على اعصابه حتى ميسوي عركة جديدة هنا، مر وقت جديد سألت الشرطي بيش الساعة صارت گال بالوحدة بالليل خرب حظنا وحظك فاهد ابن الكلب ورطتنا هنا وانتَ طلعت!!

-الشرطي: شُهيب شمسون

وگف شُهيب مستغرب واحنا وياه اشرله الشرطي حتى يطلع ظل يباوعلنا يتسائل احنه ما اتصلنا بأحد منو اجه يا ترى؟، سألنا الشرطي منو جاي وچان يصعقنا من يگول..

-اجت بنت شابة اسمها مسرة قيثارة

تخربط وضعنا صرنا واحد يباوع للثاني واكثرنا صدمة چان شُهيب شفت تعابير وجهه تغيرت خصوصاً من الشرطي الغثيث گال بلغة البلد بأسلوب مازح مستمتع مبين رشته بفلوس حتى يوصل رسالتها التجلط..

-هاي رسالة من البنية، تگول خلي يستعجل ويجيني ابو شعر حتى ترجع تكمل خطبتها....

يتبع....

━━━━━━  ━━━━━━

هالمرة القفلة خفيفة لطيفة لان عفنالكم الصدمة بالبارت الجاي ان شاء الله 💀🩷

مسرة QUEEN!! 💀😂💋