رواية ابناء الحسوم "شمسون" الفصل الثالث وثلاثون 33 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

مثل سِر البيوت بگلبي ضميتك.. 🥹♥️

━━━━━━  ━━━━━━

-ما راح تنام؟

-لا

-ليش؟

-عندي شغل

جاب الحاسبة وگعد على الكرسي الي بطرف الغرفة استغربت ليش ما گعد على الكرسي المقابيلي بس ما علقت وبقيت متمددة بالفراش واباوعله مندمج بالگدامه..

-اگلك

-اسمع

نهضت نفسي من الفراش واني اگول بأبتسامة..

-مسرة: خليني اساعـ..

-شُهيب: شغل شخصي

قاطعني فوراً ما خلاني اكمل الجملة، رفع عيونه وابتسم ابتسامة مجاملة بدون روح، انهضمت وانقهرت من بروده ماعرف شبي ويايه تغير من موقف صقر ريماس ما رجع طبيعي معقولة ماخذ مني موقف وديعاقبني على تصرفي من رحت ويه جماعة صقر وما سويتله اعتبار؟ صح بيومها بالليل نام بصفي وطمنني هو مزعلان بس من گعدنا الصبح وشافني صرت زينة وسُكري اعتدل گلب عليَّ..

وهاي لليوم هو بارد وميحچي هواي، طلعنا وتعشينا وتونسنا وسوه الوشم الي اختاريته اله بس احسه مو وياي ويسوي كلشي ببرود حتى ضحكته وكلامه يجاوب على قدر السؤال بدون اضافات بس حتى ما اضوج وانقهر، شُهيب متغير والله متغيرر!!!

استمر الهدوء هو يشتغل واني صافنة عليه، خلال گعدته طلب اربع فناجين قهوة وما رفع عينه عليَّ ولا لحظة بديت اغفي الى ان استسلمت ورحت لعالم الاحلام، فزيت على صوت بأذني يهمس اسمي وهالهمسة نقذتني من حلم مرعب..

نهضت نفسي اتلفت ادور شُهيب ما اله اثر، متأكدة سمعت همساته هسة وهي الگعدتني.. گمت من الفراش ورحت للحمام ادگ الباب بس مو هنا، دورت على تلفونه ما موجود معناها طلع بس وين؟!

فتحت البلكون امشط عيوني بالبره ما لگيت ظله بقيت واگفة هنا دقيقتين ولقطته عيوني هستوه ديطلع من الفندق ويتلفت گلبي نغزني من شفت واحد اجاله وانطاه علاگة سودة تهامسوا ويه بعض والرجال مبين ديوصي بـ شُهيب على شي ما ريحني شكلهم ولا بسباتهم رجعت للغرفة بدلت بجامتي ببنطرون واخذت تلفوني وجاكيتي وركضت اطلع وراه..

هرولت بكل سرعتي انزل جوه وانضربت بالبواب بباب الفندق اعتذر مني ما اهتميتله وركضت اتبع شُهيب بخطوات خفيفة بدون لا يحس عليَّ.. شوكت ابطل احط روحي بكلشي يخصه مادري بس قلقانة خصوصاً وهو وضعه مو زين هالايام ومگضيها سرحات..

زحمة الناس الطالعين بنص الليل اثروا عليَّ غطوني واني امشي وراه ما مبينة، ركب تكسي واخذت تكسي بلغت السايق يروح وره سيارة التكسي مالته بمسافة ميلاحظني بيها سألني السايق ليش هيچ دا اسوي تأفأف متنرفزة وجاوبته بالانكليزي..

-هذا زوجي واحسه ديخوني

-السايق: اوووه سنيوريتا اني انصحچ ما تروحين وراه لا تنصدمين بالحقيقة وتدمر حياتچ

-لا ماگدر تعبت نفسيتي من الموضوع اريد اتأكد

-سنيوريتا الزلم كلهم هيچ نحب النسوان مو بيدنا

-مسرة (بالعراقي): حبتكم جرادة ان شاء الله

مشينا وراه لفترة خفت نضيعه لان سيارتين تمشي گدامنا واحنه بعيدين بس عيني بقت وراه لحدما وصلنا لطريق مجهول مهجور خفت يلگفني احنه السيارة الوحيدة البقت تمشي وراهم اشرت للسايق يبطئ..

-مسرة: هذا طريق واحد لو بي منعطفات؟

-لا طريق واحد

-تمام اوگف هنا خلينه ننتظر شوية

-سنيوريتا الطريق مهجور ماكو ناس عايشة هنا بس العصابات يتواجدون بهاي المناطق زوجچ اكيد ما يخونچ ومحتمل عنده غاية ثانية

ظل يدردم وحده واني ساكتة وعيني بتلفوني اشوف الساعة، انتظرت نص ساعة وگلت للسايق..

-كمل الطريق

-مدام ماگدر اكمل

-ليش؟

-محتمل زوجچ من المافيا واني ماريد اتورط رجاءاً

-لا شبيك مافيا شنو اصلاً وين اكو مافيات هنا

-وين اكو مافيات بأسبانيا؟! اكيد تمزحين!

-كمل الطريق سنيور راح ادفعلك ضعف السعر

-ثلاث اضعاف واكمل!

-اوكي خلصني

كملنا الطريق الى ان وصلنا لمنطقة نائية بيها شارعين لعد هذا الغبي شلون گال الطريق واحد مابي منعطفات!

-السايق: صحيح مابي منعطفات لان الطريق الثاني مسدود وبس هذا المفتوح

-امشي بالطريق المسدود

-نهاية ميتة مابيها مخرج

-اي روحله

تأفأف متضجور ما عاجبه وما اللومه هم يخاف على روحه بس احساسي يگول شُهيب سلك هذا الطريق علمود خصوصية العمل الي راح يقوم بي..

-نزلني هنا

-ما انتظرچ

-لا تنتظر هاك فلوسك وروح خلصني

اخذ فلوسه وشخط السيارة وطلع يهرب بروحه العزيزة، مشيت اكمل الطريق واتلفت كل مكان.. شفت غصن شجرة صغير مكسور ومبين شخص حاده وذابه هنا لان شكله يشبه الوتد، شلته وحطيته بجيب بنطروني من وره حسيت روحي بساحة معركة لفلم مصاصين دماء والله يا الله راح نرجع للوتد..

عشر دقايق بقيت امشي ولعنت نفسي الف مرة لان لابسة كعب شجاني وما لبست الحذاء الرياضي بس شلون اللبسه منو يربطلياه اذا شُهيب ماكو شفتوا شگد وجوده مهم بحياتي؟

استوقفني منظر اربع بيوت مصفوفات صف واحد نفس الحجم ونفس اللون، يفصل بين بيت وبيت ممر ضيق للوهلة الاولى الي يشوفهن يگول عنهن بيوت صغيرة عادية بس من تصفنون تجيكم لحظة ادراك شتسوي البيوت بمنطقة نائية مقطوعة؟!

تمشيت اقترب وجمدت بمكاني على صوت مسدس يرمي طلقات صلي، انرعبت وهرولت على اطراف اصابيعي ادخل لواحد من الممرات الي تفصل البيوت عن بعض وتمشيت لآخره اشوف منين جاي الصوت وجحظت عيوني من شفته صقر ريماس وجماعته!!

صقر؟؟ صقر شيسوي هنا هو مو ببلجيكا؟؟ معقولة ألف فكرة روحته لـ بلجيكا علمود خطة سرية مضطر يتممها بأسبانيا؟ ركزت نظري ولاحظت تجمع الاربع بيوت حديقة خلفية چبيرة وهي الي موجود بيها صقر.. واگف ويأشر لـ رجاله على مركز مرسوم على الحايط واضح همه هنا ديتدربون وصوت السلاح ناتج عن تدريب!

حچى وياهم بالالماني افتهمت لاني اجيد هاي اللغة بلغهم المهمة راح تكون بالخمسة الصبح على ميناء مدريد المرتبط بـ "بلباو" راح يستلمون شحنة من المواد الممنوعة مدفونة بـ لحف فندقية يفوق عددها الثلاثمية لحاف ويتكفل بدخولها مدريد واحد اسمه "ريو" وبعدها ينقلوها للارجنتين بسرية تامة..

سمعت خطتهم الي راح تتنفذ بالحرف الواحد ووضحت سالفة بلجيكا طلعها علمود ولد شمسون ميكتشفون سبب بقاء صقر بـ اسبانيا.. وصلت الفكرة صقر ريماس مچان يعرف احنه بـ اسبانيا وما اجه لأسبانيا علمود يقتل ولد شمسون اكو احد بلغه بوجودنا واجه يتمم مهمتين بنفس الوقت..

رجلي وگعت واني واگفة متخفية وره الحايط اتسمع عليهم، كل هذا ميهمني وبعمري ما تدخلت بشغل احد وميهمني شي غير شُهيب! وين راح ومعقولة هو هنا لو غلطت بالعنوان اني؟

ابتعدت ارجع كم خطوة للخلف الى ان طلعت من الممر اعود ادراجي اطلع من المكان بكبره، تمشيت اعبر البيوت ولقطت عيني شي على بُعد امتار عني بالممر الثالث للبيت الثالث مركز بكل قوته على مكان معين! لقطت رجل طويل لابس اسود من فوگ ليجوه وقبعة رياضية سودة وكمامة مغطي بيها وجهه! ميخفي عليَّ هالجسم الرياضي ولا هالطول الحلو ولا هالطلة البهية الترد الروح هذا شُهيب!

تنهدت ميتة خوف عليه اووف يا شُهيب شدتسوي هنا وعلى شنو ناوي؟ تقدمت امشي على كيفي احرص ميطگ كعبي بالگاع متدربة امشي بخفة مثل الريشة والغاية منها ميحس العدو بأقترابي، انتبهت لـ شُهيب مركز بكل ما عنده من قوة على صقر ريماس وجماعته بس الاطگع شفت بيده سلاح!!

دخلت بداية الممر وهو بنهايته يراقبهم استمر هذا حالنا لفترة هو عينه على صقر واني عيني عليه بدون لا يحس واحد بالثاني، گلبي نبض بقوة من صقر صاح بـ رجاله يرحون يتممون شغلهم ويعوفوا وحده شفت شُهيب يركب كاتم للمسدس ويسحب اقسام وتقدم يريد يظهر نفسه يواجه صقر..

هرولت على اطراف اصابيعي بينما هو مشغول يشيل الكمامة من وجهه ويتأكد من خلو المكان بعده ديخطي الخطوة الاولى واجته هجمة مرتدة مني ترجعه تسفطه بالحايط..

-مسرة بهمس: بدااعتي لاا شُهيب بدداعتي لا تسويها

جحض عيونه ما متوقع وجودي بس ما طولت صدمته هوايه لانه دفعني للحايط المقابل ونتر بخفوت بيني وبينه..

-لا تدخلين بشغليي

-شُهيب لا تتصرف بغبااء

-تردين تدخلين حتى بتصرفاتي؟!

-اي اتدخل من الموضوع يتعلق بحياتك!

-مسرة اني بعيد عن شغلچ ومنطيچ حرريتچ انتِ هم ابقي بعيدة عن شغلي لان واضح علاقتنا راح تبقى هيچ كلمن يتصرف من كيفه!!

نحچي بهمس ومغطي على صوتنا المولدة الجبيرة الموجودة بالحديقة..

-انتَ دترجعلي الموقف من رحت ويه صقر وجماعته مو؟؟؟

-رووحي هناك لا تتأذين!

-شُهيب ادري والله ادري انتَ زعلت واخذت موقف مني بسبب تصرفي وشلون خجلتك گدام الكل بس توقعتك فهمت ليش هيچ حچيت احنه مو...

-انتِ شتحچين؟؟ شنو خجلتك شنو اخذت موقف اني ما يهمني الكلام السخيف الي انگال ولچ باابا رحتي ويه رجال عصابچي هو وجماعته خليتي روحچ بخطرر علمود شنو؟؟

-شُهيب..

-لو كتلچ؟؟ لو اذاچ؟؟ لو غدرچ؟؟ لو..

-ميگدرر شُهيب صقر ميگدر يأذيني ولا يلمس شعرة مني تتوقعني غبية اروح ويه رجال غريب مجرم؟؟ ميگدر بسبب اتفاقيته ويه ابوية گتلك مدفوعله يحافظ عليَّ وأي شي يصيرلي هو اول من يتحاسب وصقر مو غبي لدرجة يأذيني!

-كللشي يصير مسرة مو صقر يكتلچ غيره يكتلچ!! شمعرفچ غيره ما متبعچ واول ما افترقتي منه ظل وراچ واجته الفرصة من شافچ وحدچ؟؟ جازفتي بحياتچ علمود شنو؟؟ والموضوع يستااهل لدرجة تعرضين حياتچ ومستقبلچ وعلاقتچ بيه للخطر؟؟

-اي يستاهل

-لعد روحي خلي موضوع ابوچ يفيدچ..

بعدني عنه ولبس الكمامة من جديد وراح يتقدم يكمل طريقه يواجه صقر، روحي شاطت من تصرفه راح يموت روحه هذا بسبب عصبيته، چيتت عليه احضنه ارجعه لمكانه واعيق حركته وهمست بحرگة واني ازلغ برگبته اظافيري..

-مسرة: الموضوع ميتعلق بأبوية ميتعللق والله ميتععلق چذبت علييك الموضوع الحچيت ويه صقر علموده مهمم لانه يخص حيااتك عقدت اتفاقية ويااه حتى يعوفك وميأذيك ماتحمل اشوف حياتك مهددة وابقى اتفرج وهسة اذا رحت تواجهه اذب روحي ورااك وروحهها لامي

-مسرة

-بداعة اممك احلفك مو بداعتي احلفك بمعزتها وحبهاا وتربيتها الك تعوفه ومتكتله شُهيبب والله ميعوفوك يلگووك يلگووك حتى لو المنطقة فارغة حتى لو ماكو كامرات والله محد يرحمكك

-ما راح اكتله مسرة

-تريد تضربه بالعامود الفقري تشله ادرري لا تتصرف هالتصرف الكل يعرف هذا توقيعك الخاص والككل يحچي بي راح تنعررف

مسح على شعري من وره ووخر اظافري عن رگبته النحفرت بيدي، لزم ايدي بين ايده ونزل الكمامة ونزل نفسه يحچي قريب مني..

-مسرة انطيني مجال لا تخافين راح نتواجه و ما راح اخذه غدر راح اخلي يدافع عن نفسه

-ولك لااا رااح تمووت افههم تموووت تره لازم سلاحين بيده شبييك انتَ

-مسررة

-شُهيب قسماً بالله لو رحت وخطيت خطوة گدام لا اعرفك ولا تعرفني هسة اعوفك وارجع منين ما اجيت وكلشيي بيناتنا ينتههي!!

-لا تعيقين حركتيي مسرررة

-اعييقها لانك معصب مني وغيران اجيت هناا تاخذ ثارك من صقر لانه اخذني ويااه عوف صقر وعاقبني اليي اني اقبل بالعقاب بس عوف صقرر والله يدمرك هالرجال شُهيييب

ما حسيت على روحي دا ابچي والدموع غاسلة وجهي الا من تلمس خدي يمسحهن بخفة عصرت عيوني ما اتخيل الموقف ماريد اتخيل مواجهتم شُهيب راح يضرب صقر قناص ويفوز بالتحدي بس راح يموت اثر هالتحدي! راح يموت لان صقر شايل سلاحين بيده وراح يگدر يرجع الضربة لـ شُهيب ويروح من بين اديه هالغبي الغيور!!

تنهد بتعب ورخت اكتافه حضنته من جديد بقوة اكبر اهدأه او يمكن اهدأ نفسي واخفف رجفتي بدفو حضنه، بادلني الحضن الحنون يمسح على ظهري ويخلل اصابعه بشعري المفتوح، ابتسمت من باس راسي وخدودي توقعته اقتنع وطخ راس بس غابت ابتسامتي من همس بإذني..

-راح يظل بنفسي والمرة الجاية ما اشله راح اكتله خلاص، اني اسف مسرة بس لازم اسويها...

بلحظة، برمشة عين، بجرة نفس رفع المسدس واطلق النار على صقر من بعيد، شهگت مرعوبة ودفعت ايده بقوة بس ما لحگت لان الطلقة طلعت من المسدس واجت سنتر بصدر صقر من جهته اليمنى..

صاااح بعلو صوته متألم ووگع على ركباته وشفت النشوة على وجه شُهيب نشوة رضا مؤقته، اللتفت صقر بوجع يدور منين انضرب وصار يضرب طلقات عشوائية على مكاننه بدون لا تطخنه وحدة وصاح برجاله يرجعون رمقت شُهيب نظرة حادة بس مو وكتها نتعارك جريته من ايده واخذتها ركضة وهو ويايه نرجع بنفس الطريق الي اجيت بي..

-شُهيب: ليش جاي نركض؟

-اسكتتتتت

-تركضين بالكعب؟

-اشششش ولا كلمة اني اعلمممك اشهههب

-رجعنا على اشهب؟

-انتَ مخبببل؟؟؟

-اي

-ادري بيك مخبببل وسامعة هووواي بس اول مرة اشوف خبالك علنييي

ضحك بصوت منتعشة روحه ومستمرين بالركض هو يسحل بروحه واني اجره استعجله بالخطوات لو نبقى عليه ننلگف ويطيح حظنا وهو بعده يضحك فرحان..

-مسرة: امشيييييي

-شو تتأمرين انتِ؟

-غصبااً عليك اتأمرر لا تخبلني شُهيب مستوعب المصيبة السويتها انتَ؟!!!

-يمكن

-ولك بله اكوو كامررات ولقطتناا وين نودي وجهناا بعددين؟؟؟

-تصرفت

-شصخمت؟؟

-شعليچ انتِ ارتاحي ولا تبقين متوترة مو زين على بشرتچ

-اني اعلمك ابو هممسة اني اعلمك يالخنووسي كلك بلاااء طالع بنص الليالي يكتل بالعالم بس لانه ضاييج تففففووو على ابوووك

-وولچ!!!

-لا لا شبيك قصدت تفوووو على.. على هذا شسمه هذاااك هيچ انسى امشي يلا

رجليه تگرمعت واحسها تشخطت من الوصخ واوراق الشحر والاغصان المشمرة بالگاع حذائي مفتوح ورجلي طالعة بس مو مهم لازم نبتعد قبل لا يرجعولنا ذولاك القرودة وتصيرلنا سالفة وياخذون شُهيب..

-يممممة

صرختها بكتمة مخترعة من حسيت بـ شُهيب يرفعني يشيلني ويمشي بيه على كيفه، حطيت ايدي على گلبي ابلع بريگي واهز راسي معترضة..

-نزلني نزلني لازم نرككض

-لا تركضين چنچ حية شاردة من جحرها

-شُهيببب بطل تصيحلي حية!!

-ليش چذب انتِ مو حية؟

-لا مو چذب بس على الاقل اني حية كيوت انتَ ما شاء الله عليك عربيييد

-افتخر بهالشي

-استغفر الله راح يجلطنييي ببروده هالرجال ايييييع شلون متحملتك انييي

-والله مادري

-انتَ متأكد امك حملت بيك تسع اشهر؟؟

-ما فهمت شدخل الحمل بالنص؟

-لان على هالبرود والهدووء احسك اجيت وره 18 شهر مو 9!!

-هههههه شگد لطيفة انتِ مسرة

-اتخيلك عاصي ببطن امك متقبل تطلع ومن طلعوك حتى ما بچيت لان بكل بساطة مفعل وضعية الطُززززز

-كلش صح

-هموسي المخبل ما چذبت العلوية من تصيحلك الخوينس وتگول خوفچ من الخنوسي

-ديلا سكتي

-تسكتنييي؟؟؟

-اسكتچ وغصباً عنچ

-طالعلك لساان شهااب

-اشتععل ابو شهاب اسمي نععل شُهيبب

-نععل شُهيب اني اسفة لان اغلط بأسمك من اعصب

نزلني وصرخت مرة ثانية مخترعة من ضربني على حلگي بخفة ايده، ضحكت وانتبهت لچفصتي گلب وجهه بدون لا يحچي شي ووالله العظيم لو اگلكم عندي استعداد شُهيب يكتلني واتعارك وياه واتمالخ ويجنزني وارجع اجنزه ولا يطنگر عليَّ لان طنگورته تغيره مية وثمانين درجة يصير واحد ثاني..

-شهوبي

-امشي مسرة

-اني اسفة شبيك چفصت

-امشي امشي

-انتَ بس تتحجج حتى تزاعلني گول متريدنيي وفضهااا

-اني ماريدچ اني؟؟؟

-اييييي

-ولللچ اني ميييت عليچ بعدني ما مصدگ انجمعنا سووه وصرتي الي بس گولي انتِ ما تردينيي وتتحججين حتى تعوفينييي!!

-ماعوفك وين اولي اذا اعوفففك؟؟

-مااادري سكتي لا تحچين!!

-روح زعلت منك عوفني هنا لو تموووت ما ارجع وياك وانتَ مفصووول من الشركة!!

-بطلي دراما وامشي عدل

-اني مديرررتك!!!

-ستري على لسانچ وحطي بحلگچ لا اشلعه من مكاانه بطريقتي!

-هاي فوگاهة!!!

-اي فوگاهة رايحتلي ويه نعاال وقنددرة وشحااطة بكل صلافة وعين وكححة وتصيح زواجنا على ورررق اي مو ***** گدامچ

-حشاك بيبي صقر الطوط مو انتَ

-اني صوچي منطيچ مجال ومحترمچ اگول امرأة معروفة وسيدة اعمال ناجحة وميصير اكون عقبة بطريقها و اخنگها بس اعرف منو راح ابدي اخنگ بالايام الجاية بسيطة

-شُهيب شبيك لا تهجج اهل المشاريع من عدنه بس لانك تغار تره اني بزنس ومن من قبل مو جديدة عليَّ

-اي ما اختلفنا بس كلشي اله حدود مسرة! مثلما ترديني امشيي عمياوي ويه النسواان انتِ تسوين نفس الشي ويه الززلم فهمتي لو لا!!!

-شو صاير متتفاهم انتَ توقعتك اوپن مايندد وحلوو وتثق بيه و..

-اوپن خ*** انيي كلشي يزود عن حده يصير ماصخ مسرة واني مو ماعندي ثقة بيچ اني خايف عليچ من العيون النگسة فهمتي عليَّ لو لا؟؟

-فهمت فهمت شبيك!

-الثقة تختلف عن الخوف والحرص!! والغيرة فطررة بيه مااگدر اغيرهاا اغاااار عليچ اي اغار ومخخبل من يجي موضوع يخصچ!! تحمليني اخذيني على گد عقلي وتحمليي غيرتي المفرطة شتگولين عني گولي معققد رجعي جااهل بكيفچ ما يهمني!!

سكتت ما اجاوبه ومشينا مسافة عبرنا الطريق المهجور وبداخلي اتراقص فرحاً هل اني مزعوجة من اسلوبه؟ الجواب لااا اكيد!! حلمي شخص يهتملي ويخاف عليَّ ويغاار اويلي اويلي اويلي اويلي نقطة ضعفي الرجال اليغار امووت عليه اتعجب من الي ينعتون الرجل الغيور بـ "المعقد" شو اني اشوفها رجولة وكارزما الرجال انخلق بداخله غيرة مشتعلة على النساء الي بحياته واشوف الي ماعنده غيرة بي خلل!

-صوت شُهيب اكو صوووت اركضضض راح يجوووك

-سكتي لا تضيعين السالفة

-ما اضيع شبيك تظن بيه سوء انتَ صاير مادري شلونك واني احس دتجرح كرامتي وشخصيتي السترونگ تدري لو صبا وصديقاتي يعرفون اكو رجال هيچي يعاملني اصيرلهن وصلة مسح بالرزايل والضحك لو متدري؟

وگف بمكانه وابتسم جرني من خصري استغربت من تصرفه خصوصاً من وگفنا بنص الطريق وتلمس خدي خفيف يمسح بأبهامه على انفي ونزل باسه بهدوء..

-مو شخصيتي اقلل من قيمة مرة وياي وأتجاوز حدودي بس تحمليني مسرة لو بس تحسين بالنار المشعولة بصدري راح تعذريني جاي احاول بكل قوتي اسيطر على اعصابي وياچ واعبرلچ بس...

-شهوبي

-اتخبل انجن افقد عقلي وصبري من شخص يلمس لو يضوج شي يخصني وانتِ كلچ تخصيني من اصبع رجلچ لهامتچ لشعرچ لعيونچ لشامتچ الفوگ شفايفچ..

باسها على كيف وتنهد بتعب، ابتسمت من اردف بنبرة هامسة..

-اتمنى تتفهمين هذا الشي وما يسبب عوائق بعلاقتنا

-متفهمة اني

-ما دامچ متفهمة اكو بيت قريب هنا

-زين؟

-اصحابه ما موجودين

-اي؟

-تعالي اراويچ شغلة بي

-شنو بي؟

-تعالي وتشوفين

-شُهيببببب يا فااااسق

ضحك وشالني يركض بيه للبيت الي گدامنا ضرب الباب برجله انفتحت بسرعة ضحكت ممصدگة عزه بعيني كسر باب بيت العالم!! صعد بيه الدرج وفتح باب غرفة هم برجله طگت يدة الباب..

-عزه شُهيب بيت العالم مو حرام علييك

-اعرف صاحب البيت ومخولني

-ليش تچذب

-بكيفچ تصدگين لو لا

-احلف تعرف صاحب البيت

-والله اعرفه

نزلني على الچرباية نظيفة كلش والفرش جديد باوعتله مضيگة عيوني..

-بيت منو هذا شهوبي اوبي اوبي؟

-بيت صديق مالك ليو

-چذاااب

-والله

ضحك من شاف ردة فعلي وتمدد على الچرباية بصفي وحط ايده جوه راسه..

-تشربين شي حيتي؟

-هم گال حيتي

-معلومة ما تعرفيها عني اموت على الحياية

-هاا تحن لاصلك؟

-يجوز

-ههههههههههه اني اعلمك

-شُهيب بغمزة: انتظرچ تعلميني قيثارة

-وخرر لا تصير ارعن

-راح اترعن لان اعرف الحياية شنو تحب ربيت وحدة بأيام مراهقتي

-اوووه حلوو وشنو تحب؟

-تحب خناگها

هجم عليَّ يحضني بقوة كسر عظامي ضحكت من كل گلبي من بده يتصالف..

-وخر وين اكو حية تحب خناگهاا

-صح ماكو

-لعد شلون تگول طلعت معلوماتك غلط

-الحية تحب تفترس الضحية وتلدغه بالظلمة مسرات

بهتت وره جملته الهمسها بأذني، ماعرف هل يعني جملته لو حچاهة يعدل معلومته قبل شوية لان فعلاً الحية تحب هذا الشي، بلعت ريگ ومثلت اني بخير بدون لا احسسه وكملت وياه..

-وتشوفني راح اللدغك بالظلمة

-يمكن

-عود نشوف

-شنو تشربين فراشتي؟

-چنت حيتك قبل شوية

-ثنينهن انتِ يوم حية تلدغ من تحت تبن ويوم فراشة طايرة تزرع السرور بالمكان والشخصيتين ميت بيهن

-الوشم..

-وشمته لان يذكرني بيچ

-واني يذكرني بيك

-اممم شنو تشربين؟

-چاي اخضر

-منين اجيبلچ چاي اخضر هنا عيوني

-زين عصير اناناس؟

-انوب عصير انانس ماكو غير الچاي والگهوة هنا ماي ليدي

-اشرب چاي

هز راسه مبتسم وگام للمطبخ، نزعت حذائي ورحت للحمام اغسل رجلي من الشخوط الصارت بيها، لگيت شبشب مطاطي بالحمام غسلته ولبسته ونزلت لـ شُهيب جوه..

اجواء البيت كلاسيكية والجو بارد هنا بسبب المنطقة المفتوحة، رحت لـ شُهيب بالمطبخ لگيته ديسوي چاي وگهوة اله وگفت بباب المطبخ مچتفة ايدي..

-شهوبي

-عيونه

-دور وجهك عليَّ شوية

اللتفتلي يباوع مبتسم يا روحي هالابتسامة، تقربت منه انزعه القبعة اشوف شعراته العسلية الحلوة..

-شُهيب شلون بالباب مو عيب اذا اجه ليو وشافه مكسور؟

-نصلحه لا تخافين

-تمام اني راح اسوي كم مكالمة ضرورية وارجعلك

-براحتچ

رجت للصالة وگفت يم المدفأة fire place علگتها لانها كهربائية ومديت ايدي اتدفى واحچي ويه سام وراهة اتصلت بأبوية رغم الوقت متأخر بس اعرفه گاعد هيجي وقت وراهة اتصلت بـ صبا اتطمن عليها وعلى موضوعها ويه مروان طيررتني فرح من گالت مروان منتظر شُهيب يرجع حتى ياخذه ويروح يخطبها من ابوها وهي هم فرحانة لان مروان يريد شُهيب واجهة وياه..

-صبا: صدگ جازفتي وطلبتي تحچين ويه صقر گدام شُهيب واخوانه؟؟ ولچ انتِ مخبلة مسرة؟؟

-مسرة: سويتها لخاطره راد يكتله صبا گدام عيوني تتوقعيني ابقى واگفة اتفرج عليه يموت؟؟ استخدمت حصانتي ويه صقر ريماس وگتله يعوف شُهيب واخوانه هالمرة بس گلبي يوجعني اخاف يرجع يأذي ماعرف شلون اوگفه واطلع شُهيب منها ميتة خوف عليه لا يصيرله شي صباوي

-صبا: ميصير حبي ولا تدخلين بعد خلي هو يحل اموره لا تجازفين تره اذا ابوچ افتهم انتِ وياه زواجكم ماشي صح وعلاقتكم حلوة لا يرحمچ ولا يرحمه انتبهي لا يروح صقر يوصله كلام ويگله دافعتي لولد شمسون

-لا مسيويها

-تمام هالمرة ما سواها بس يجوز المرة الجاية يسويها

-مادري بعد...

سكتت من حسيت بـ شُهيب واگف ورايه، ودعت صبا بسرعة وضميت التلفون واللتفتت عليه مبتسمة..

-شُهيب: الچاي

-مسرة: شكراً زلمتي الحباب

-مسرة

-اممم

-اخر مرة اسمح لهذا الشي يصير

-شنو هو

-تاخذين مكاني وتدافعيلي بهاي الطريقة وتعرضين حياتچ للخطر علمودي

-بس..

-ماكو بس ولا بطيخ (اخذ الكوب مني حطه الطاولة) راح تنتبهين لنفسچ وتلتفتين لشغلچ وعوفي الباقي عليَّ اني اتصرف

-شُهيب اني ما اقصد اخذ مكانك وامس رجولتك وانتَ لو تشوف شلون اشوفك بعيوني چان شفت مكانتك وحجمك بالنسبة الي بس اني اخاف على الاعزهم واخاف لا افقدهم

-لا تخافين ما راح يصيرلي شي

-واذا صقر عرف انتَ السبب بتصويبه؟

-طُزز خلي يواجهني

-شُهييييب

-عيونه

-شُهيب اذا انتَ متخاف على روحك اني اخااف

-لا تخافين

-مو بيدي ماااگدر والله راح اموت من وراك

-ولچ كااافي مو والله طگ گلبي وماگدر اصبر بعدد

استغربت من جملته وما فهمتها بالبداية حچاهة بحرگة وقوة وكأنه فقد صبره، فتحت عيوني مصدومة من جرني من رگبتي وباسني بقوة و... ما راح اكمل باي....

**

-لو بث افتهم انتِ شبيچ ضايجة ارتاح؟

-كيان: ولچ فاهد راح يروح للمغرب!!

-جنات: اي واذا؟؟ مالك هم راح يروح وين المشكلة؟

-رايح علمود حمرته يريد يشوفها جنات شنو واذا!!

-كيان اوگفي انتِ مو تگولين متحبي؟ زين ليش غيرانة ومحروگ گلبچ وحالچ بالضيم فهميني؟

-ميهم احبه او لا احنه متزوجين وغصباً عليه يحترمني ويسويلي قيمة!

-يعني الا قيمة؟ مترهم تمن؟

-جنااات!!

-اثفة اثفة حقچ والله بث اني ماصخة

-كلامي صح لو لا؟؟ يعني تخيلي مالك يروح يصاحب عليج ويسافر حتى يشوف صاحباته شنو موقفچ؟؟

-مادري والله ما مفكرة بيها بث يمكن ما راح اهتم لان احنه متفقين علاقتنا صداقة وقثث بالليل ماكو غير شي

-تحچين هيچ لان ما انحطيتي بهيچ موقف من قبل

-ثكتي ثكتي اجه مالك

سكتنا من اجه مالك وبيده عصيرين واحد الي والثاني لـ كيان الزعلانة، انطاهة العصير اخذته وهمستله "شكراً" باوعلي واشرلي شبيها؟ همست بدون صوت "فاهد" قره شفايفي وتنهد بتعب يهز براسه متفهم..

احنه بالمطار راح نرجع لأوربا بعد سفرة حلوة بس متعبة وعشنا اكشن هنا، دورت عيوني بين الاخوان الثلاثة وضعهم ممتاز وعايشين طبيعي عرفت همه متعودين على هاي الاجواء ويمكن لو ما صار اكشن بحياتهم يحسون يومهم ناقص..

صعدنا الطيارة وكيان على وضعها سارحة وفاهد هم سارح وباله مو وياهة، هو صح بالبداية انتبه عليها وسألها كم مرة شبيچ وتجاوبه مابيه شي بس بعد ما لح عليها وتركها براحتها..

هبطنا اخيراً وكلمن راح لبيته، دخلت البيت تعبانة من الطريق والوقت متأخر محتاجة بس انام واريح جسمي.. سبحت فرشت اسناني وبدلت ملابسي وگمزت على الچرباية انتظر مالك يجي..

نص ساعة واجه دخل للحمام سبح وبدل وكمل اموره استغرقله هم ساعة واني عيوني تغفي منتظرته.. ما احب اضغط عليه واجبره ينام نفس وقت نومتي حتى ميمل ويبزع مني ويكره وجودي فـ منطيته على راحته..

-تأخرت عليج؟

سأل والخاولي بيده ينشف بشعره الناعم، فركت عيوني وتثاوبت..

-لا مو نعثانة

-واضح

-تعال يله اكملك القثة

-لا اليوم ننام ماكو قثة

-ليش ما حبيتها؟

-ليش اكو شي يطلع منچ مو حلو

-گول والكعبة حبيتها؟؟؟

-ههههه والكعبة حبيتها ومتحمس اعرف طارق شنو صار وياه من خطفوا رغد بس هسة لازم ترتاحين وتنامين

-الله حفظت الاثماء بثرررعة

-حفظتهم لان شخصية البطل عجبتني اكثر من ذاك الضابط المغرور يوغف على الگلب

-ما اثمحلك تحچي عليه هذا كراشي!!

-دنامي نامي كراشها ام لسان

-مالك احث طارت نومتي

علگ الخاولي بالبلكون على التعلاگة حتى يهوي ورجع للغرفة، تمدد على الفراش ومطى نفسه شوية واشرلي بيده تعالي.. ضحكت فرحانة ونطيت بحضنه صاير هو يطلبني وهالشي مريحني..

-لا ترفسين جنة تره اشمرچ من الچرباية بعد اني حذرت

-والله ما احث

-البارحة رفستيني رفسة ردتي تنهين مستقبلي

-يله فدوة الي

-لا بله؟

-شبيك متصير مثل شُهيب مثرة تدوث (تدوس) بگلبه ويگلها فداچ!

-يله بابا فداچ بس هم اشمرچ من الچرباية

-اگلك مليكان انتَ شلون عايش وحدك والله وحشة تدري من تطلع للشغل اني ابقى وحدي مثل الططوة اتصفن احث گلبي يوجعني من الهدوء والوحدة

-اغلب عمري عشته وحيد وتعودت على هالوضع

-ليش مو گلت عشت ويه اخوانك

-انسي، جنات نسيت اگلچ على شي باچر تحضرين نفسچ الصبح يجوچ فاهد وكيان ياخذوچ للجامعة تسجلين چان اجيت وياچ بس عندي هواي شغل

-متگدر تأجله حباب اريدك وياي

-يا ريت اكون وياچ حتى اوصي جماعتي عليج بس الشغل مهم وابوية ما يقبل يتأجل اكثر وعد اذا كملت شغلي على وكت اجيچ هناك

-تمام انتظرك

-تغطي لا تبردين

-تمام، تثبح على خير

-تلاگين الخير

-مالك مالك نثيت شي

-اممم

رفعت نفسي اباوع لوجهه وهو نزل عيونه الي ضحكت من ضربني كلة خفيفة وهمس بصوت ناعس..

-يله احچي نعسان

-لا انثى نام اثفة

-احچي وصيري ادمية

-ماريد بعد

-يله جنات

-مو انتَ نعثان

-عادي اسهرلچ

-هلاااا هلااااااا

غمض عيونه بقوة من صحتها بوجهه، ضحك على ضحكتي وكفخني بأطراف اصابعه على خدي..

-لا تصيحين بنت الكلب

-انتَ ابن الكلببب

-ادري ههههههه

-وهاك هاي كفخة هم

لزم ايدي قبل لا امدها وعصرها بين ايده احس اصابعي تعوجن، عطت متوجعة وضم ايدي بين جسمي وجسمه..

-يله نامي

-اكرهك لابد الابدين

-هههههههه

-لا تضحك عليَّ

-يلا يابة ما نضحك

-اني غبية لان انيمك يمي والله الا اشتري بزونة واخليها بدالك

-اجيبلچ باچر

-هااا؟ وشثمه احم هاي

-شنو

-بعد ما انام يمك اذا جبتها؟

-لا شتسوين بيه اذا اجيبلچ بزونة

-لا لا بطلت اخاف

-ههههه تدرين شايل هم

-هم لشنو؟

-من ننفصل شلون اتعود على غيابچ

غابت ابتسامتي واثرت بيه جملته، رفعت راسي اله مرة ثانية وركزت بأبتسامته الحنونة نسيت موضوع الانفصال ومو ببالي.. للحظة نسيت ان نهايتنا نتطلگ تعودت على الدلال وعلى الجعصة بالنومة والضحك بنص الليل على قصصي التافهة وتفاعله ويايه نسيت كل هذا بس بالنهاية ابتسمت وهمست..

-تتعود

-صحيح

-بث مو تنثاني عود نظل على تواصل واقرالك قثث كل يوم واذا مشغول ادزلك بصمات صوت اثمعهن على فراغك

كبرت ابتسامته وداعب خدي بأصابعه هز راسه بـ اي وهمس بنفس نبرة صوتي..

-موافق، بس لا تدزيلي قصص ضباط ينرفزوني

-ليييش

-لانچ واضح تحبيهم

-لا اني معليه احچيلك عن لثان البطلـ...

-سكتي جنات يا لسان البطلة وانتِ توصفي طويل وعريض وضخم ومعضل واسمر وشواربه مترين وعيونه تجدح جدح وعطره يهفهف وماكو واحد بجماله وقوته

-تره انتَ مثلهم

-لا والله

-والله شبيك انتَ هم مواصفاتك هيچ بث شواربك مو مترين

-هههههههههههههههههههه خرب عقلچ

-شبيك يااا

-تضحكين عليَّ حتى اسكت مو

-والكعبة لا شبييك

-ديلا عمي معلينا بالضباط بس هم ماريد قصص عنهم

-بالعكث عندي قثة غير تموت راح تعجبك هووواي

-ماااريد نامي

غلف وجهي كله بأيده ضحكت بصوت عالي ارفس برجلي على رجله حصر رجليه وايدي يقيّد حركتي وأمر..

-نامي ولچ

غمضت عيوني بسرعة ورحت لسابع نومة، حسيت الصبح على برودة محاوطتني ماكو احد بصفي، فزيت بسرعة ادور مالك وانتبهت لصوت جاي من غرفة الملابس مالته، گمتله اركض دخلت شفته ديدور على قميص يلبسه..

-جنات: عبالي طلعت والكعبة

-مالك: صباح النور جنات

-والقران گلبي وگف

-شفتچ نايمة بعمق ما ردت اگعدچ

-لا مالك حباب بعد گعدني من تطلع اخاف

-تمام لان اول وتالي لازم تگعدين الصبح وراچ دوام، يلا بدلي علما اكمل اني

ركضت للحمام غسلت وسويت روتيني الصباحي وطلعت ابدل وهو بعده يختار اكسسوارات يلبس، مالك مهووس بشي اسمه محابس وساعات وكلهن ماركات ومحابسه اللماس واحجار كريمة فخمة وبيهن فيكة..

تقدمت اوگف بصفه اختارله، مديت راسي بالمجر الزجاجي يطلع طوله مترة متروس ساعات ومحابس العين تهيم بيهن وبتفاصيلهن، اشرت على ساعة سيرها فضي والساعة الداخلية نيلية..

-هاي حلوة ويه ملابثك

-تمام

طلعها يلبسها واختار محبس فضي وحجره نيلي وواحد بس فضة وواحد فضي وحجره اسود چبير يلمع..

لبسهن وراح للمراية يلبس رباطه ابتسمت على اناقته، اناقة مالك يتسولف بيها كل يوم طقم شكل وكل يوم ستايل مختلف كلش كشاخ وتجذب طلته.. اليوم لابس قاط اسود جاي فيت على جسمه وقميص نيلي ورباط نيلي بنفس لون القميص.. شعره الناعم مصفف بعناية ولحيته ممشطة بشكل احترافي..

-والزهرة تجدح جدح

-وانتِ تجحدين

-هههههههه تجدحين مو تجحدين

-نفس الشي صغيرتي

-ملوك شنو رأيك بثتايلي اليوم؟

-كلش حلو بس غيري الحجاب

-ليش؟

-لبسي اسود تطلع اللبسة ارقى

-شوف والله صح

نزعت الشال البيجي ولبست بداله ربطه ستن لونها اسود على الطريقة التركية، طلعت اللبسة احلى بهواي لان لبستي عبارة عن بينصل تسعين بني وكوت اسود طويل فوگاه واكيد البوت هم اسود طلعت فخمة اگطعع..

-اختارلي جنطة

-اخذيها هم اسود

اخذت جنطة سودة ورحنا للمطبخ اكلنا شي سريع وشال فلوس حاطهم على الميز، حطهن بيدي وجاوب تلفونه بنفس الوقت ما فهمت ذني شنو بس يمكن الي اجيت ودحستهن بالجنطة.. طلعنا من البيت سوه وهو بعده يحچي بالتلفون لگيت كيان وفاهد منتظريني، ودعت مالك اللوحله بيدي وصعدت وياهم..

-جنات: صارلكم هواي هنا؟

-فاهد: صار 40 دقيقة ننتظرچ اميرة

-جنات: يااا لعد ليش ما اتصلتوا بيه؟

-فاهد: ما راد الملك يزعجچ ونقطع ريوگ الملكة مالته

-جنات: لا عادي يمعود لو متصلين

-كيان: بله حبي ما صار شي، فاهد ودينا للجامعة فضني

-فاهد: سممم ومرررض هذا هم أسلوب

-كيان: اشش لا تحچي شي

-جنات: خلوني احزر متعاركين كالعادة!

-كيان: اي!!

-فاهد: ختولي هاي سليمة لا تصدگيها اني ما متعارك وياهة

-كيان: بس اني متعاركة!!

-جنات: ليش؟

-كيان: العفونة ميقبل اروح اشوف اخواني اليوم واني ميييتة على شوفتهم

-جنات: ولك عفونة ليش متخليها تشوف اخوانها؟؟

-فاهد: ختولي عدها دراسة الامتحانات نايمة على گلبها خليها تركز بيهن اخوانها ما طايرين

-كيان: انتَ معليك!!

-جنات: صح انتَ معليك!!

-فاهد: عاد گابلني سليمة واختها انچبن ولبسن الحزام خلونه نولي للجامعة

-كيان: الا اروح لاخواني واموتك قهررر

-فاهد: روحي شعليه بيج وعود تعالي ابچيلي من ترسبين

-كيان: ما ارسب اني شاطرة قابل مثلك فاشل

-فاهد: خوش خوش

ضحكت هاي كيان بعدها متدري بـ فاهد دياخذ الدكتوراه؟ اني ما حچيتلها من مالك گلي بما ان فاهد ما حچالها معناها ميريدها تعرف واني ماحبيتها تعرف مني لو هو يحچيلها لو هي تكتشف..

نزلت هي لكليتها واني بقيت ويه فاهد ياخذني لكلية ادارة الاعمال، تبعد مسافة مشي خمس دقايق عن كلية كيان، وصلنا اخيراً وابتسمت من شفت هيكلة الجامعة المعمارية الفخمة تجمع بين العصرية والقديم بنفس الوقت والطلاب يروشون كل مكان ناس تركض تلحگ على محاضراتها وناس گاعدة على الثيلة وناس على المصطبات وكبلات گاعدين سوه بوضع رومانسي..

-جنات: اكو محجبات غيري هواي

-فاهد: اي هواي مسلمين يدرسون هنا

-يعني عايشين هنا لو جايين منحة دراثة؟

-هيچ وهيچ

-ها... هذا مالك يتصل اوگف

وگف ينتظرني اجاوب اتصال مالك ما اركز امشي واحچي بنفس الوقت، تطمن عليَّ وسألني اذا وصلت لو لا وراهة گال..

-جنة اذا سألوچ على اقامتچ جاوبيهم فيزتچ دراسية

-ها تمام يعني راح اچذب؟

-لا مو چذب صدگ فيزتچ دراسية لانچ ما مجنسة وماعندچ اقامة

-ها ها فهمت انتَ وين؟

-داخل للاجتماع هسة انتبهي على نفسچ تمام؟ الفلوس اخذتيهن الحاطهم على الميز لو لا؟ ذني الچ مصرف بس يمكن نسيت ابلغچ

-اي مالك انطيتهن بيدي وافتهمت عليك لا تشيل هم اني زينة وكلشي تمام

-فاهد وياچ أي شي تحتاجي بلغي وصديقي رائد هم هناك راح يعرفچ عليه فاهد اذا لاقيتي صعوبة او ما فهمتي لغتهم احچي وياه عربي هو عراقي

-هاا فهمت ماشي

-وبعد شنو ردت اگول نسيت لحظة

-على الرجعة؟

-اي عفية الرجعة ترجعين لو ويه سايق فاهد لو ادزلچ سايق مو تجين وحدچ جنات

-بث اندليت

-حتى لو لا ترجعين وحدچ سايق يجيبچ ويوديج وبعد نسيت اوصيچ على...

ما سمعت باقي كلامه بسبب فاهد جر التلفون من اذني وفتح مكبرة صوت وعاط بجزع..

-فهمنااااااا بالعبااس افتهمناا ما موديها صف اول ابتدائي رايحة سنة اولى جامعة لخاطر السماوات السبعة

-مالك: فاهد عينك عليها ولا تترعن وتسرح عنها

-فاهد: اتخيل لو صارت عندك بنية ورحت تسجلها اول ابتدائي تگعد وياهة بالصف

-مالك: جنات بحسبة اول ابتدائي جديدة على المكان وعلى البلد بكبره حتى لغة متعرف باقية تگطگط بكم كلمة انكليزي

-جنات بهمس: اگطگط شنو؟

-فاهد: يقصد "تطگطگ" والله يا خوية انتَ التگطگط

-مالك: ولك فاهد تره هاي زعطوطة وغبية لا يغرك لسانها لو تعرفها شگد بريئة تظل تضحك عليها سنة ليگدام

-جنات: انتَ الغبيي والزعطووط اني بريئة بالنثبة لعقلك الثااقط!!

-مالك: بدت

-جنات: شنو قصدك عيونيييي

دفعني فاهد بطرف اصبعه وكأنه يدفع حشرة انرديت ليوره..

-جنات: باع هذا الثاني ميثتحيي مالك فااهد كتلني

-مالك: صدك كتلتها ولك؟؟؟

-فاهد: ولك لا بس دفعتها بطرف اصبعي

-جنات: تجاوز ومد ايده لوث حجابيي انتو متثتحون كلكم ماريدكمم واكرهكمم

-فاهد: ولك هاي فضحتنا بصوتها

-مالك: اي اي چنها صرصر مخنوگ

-جنات: انتو...

-فاهد: وسمممم ومرررض شبيچ انچلبتي

-جنات: ثم بگلبك شبيكم متراعون متشوفوني متوترة لان اول يوم!

-فاهد: مالك هاي شلون جارعها وترتني واني مالي علاقة

-جنات: انتَ بث تغار

-فاهد: اهووو متعلمتها من كيان وراح تخبصني بيهاا امشي امشي روح مالك الله وياك

سده بوجه مالك وتمشينا اني وياه نكمل فره بالقسم، خلال ما احنه نمشي مالك اتصل ثلاث مرات على فاهد فطسني ضحك كل شوية يگله تحملها وميخالف ولا تعصب وخطية ووو واني صافنة واضحك عليهم..

-جنات: تره والله ما ثويت شي شبيكم وياي

-فاهد: ابدد بس هسة لزمتي ثنين وردتي تصاحبيهن عرف ولف ووگفتي تدگين فچ وياهن

-جنات: مو فرحت من عرفتهن عراقيات

-فاهد: تره كومة عراقيين هنا هسة تبدين دوام وتشوفيهم شگد بگد سليمة

وصلنا لرئاسة القسم ياابة شگد فخمة وكشخة عبالك طبيت بفلم اجنبي، سألوني كم سؤال وطلبوا وثيقة تخرجي من السادس وتدخلو كم معارف من جماعة مالك والحمدلله تسهلت بنفس اليوم انحلت بسبب صديقهم رائد..

-فاهد: رائد تسلم تعبناك بقى بس جدول المواد تاخذه منك باچر تمام؟

-رائد: تدللون واذا تحبون هسة ندزها للكاونسلر ترتبلها جدول

-فاهد: ماگدر اليوم عندي محاضرة مهمة نعوفها على باچر؟

-جنات: انتَ روح لمحاضرتك واني اكمل منا

-فاهد بهمس: تمام بس بشرفچ لا تفضحينا

-جنات بهمس: هثة اني شمثوية

-فاهد: والله لوما لسانچ حلو العار ما يجرعچ

-جنات: دولي ولي چنه ططوة ويثولف

شرحلنا رائد وين اروح فهمت عليه، ودعني فاهد ودخل بناية تبعد عني مسافة بقيت افتر على غرفة الكونسيلر مادري شسمها ما لگيتها فريت الجامعة فر وياهو الالزمه اسئله بالانكليزي..

-وين غرفة الكونسيلر؟

يظلون صافنين عليَّ ويطگوها ضحكة ويعوفوني گبر شبيهم ذولة صدگ عصبت منهم، بقيت مثل التايهة افتر رجليه وگعت وبديت انرعب شوية من مشى الوقت.. وگفت گدام اخر بناية ونويت ادخللها لگيتها لگيتها ما لگيتها اخلي وارجع للبيت باچر اجيب ملاك هو يدليني..

طبيت البناية وافتريت اسئل نفس السؤال ولو يأشرون ماعرف لو يضحكون ويرحون الى ان ما تحملت بعد وعطت بوحدة..

-وجعععع بث يتمضحكن العايصات النايصاات بنات الچلبب بيچن خيرر جاوبن لو متعرفن وگضيتنها ضحك ويييع الله ياخذچن يالجربات

عفتها ورحت معصبة ناار ادگ على مالك ميشيل خرب روحه اكيد بأجتماع وفاهد المسودن ماكو وروحي فارت وجزعت من الوضع..

-جنات؟

اللتفتت من سمعت ضحكة خفيفة مصحوبة بأسمي بالعربي، كبرت ابتسامته من شافني حايرة وتقدم عليَّ يرجع تلفونه بجيبه وشايل بيده جنطة حاسبة..

-رائد: لگيتي الكاونسلر؟

-شنو اسمها؟

-كاونسلر

تمنيت اضرب جبيني من الغباء عمتتت عينچ جنات وانتِ گضيتيها كونسيلر وكونسيلر خربت ام البرستيج والله لو فاهد ومالك يعرفون ياخذوني محتوى لنهاية العمر..

-جنات: ها لا ما لگيتها والله وتيهت

-رائد: مو مشكلة اني اخذچ يله

-مو خاف اتعبك

-لا ولو تفضلي

ما گلت لا مشيت وياه طلعني من البناية ورجعنا لثاني بناية طبيت بيها واني الثولة امشي واسأل الكونسيلر..

-رائد: هاي غرفتها راح ادخل وياچ حتى تداريچ بالمواد خصوصاً وانتِ مداومة متأخر على الاغلب ما تحصلين مواد دكاترتها يقبلون يستقبلوچ

-ليش؟

-لان ماشين بالمادة يله تفضلي

دخلنا لغرفتها سلمنا وبده يحچي وياهة بلغة البلد مبين عرفها عن نفسه لانها ابتسمت وجاوبته بحرارة، خطية هوواي ظل يحچي وياهة بس كلشي ما افتهم لغة جديدة عليَّ الى ان مشت ساعة ونص ياله انطتنا جدولي النهائي وطلعنا من الغرفة سوه..

-جدولچ ممتاز والمواد الراح تاخذيها كلش تفيدچ وتختصرلچ هواي بس اهم شي تلتزمين بكورس اللغة ضروري هذا لان ما يستقبلوچ اذا ما داخلتله تمام؟

-تمام

-أي شي تحتاجي بس سألي عن رائد ال^^^^ يدلوچ عليَّ واني مكتبي هذاك

اشرلي على باب مسدود ابتسمت وهزيت راسي اتشكر منه وافترقنا، قريب المغرب ياله طلعت من الجامعة بسبب كيان تأخرت محاضراتها ورجعنا السايق كلمن لبيتها..

لليل رجع مالك وعزم فاهد وكيان عدنا على العشا وسألوني على الدوام وبديت اسولفلهم من جديد، حچيت لـ مالك كللشي بأدق التفاصيل وكلني حماس ونشاط وهو يسمعلي بتركيز ومبتسم، فر بيده فاهد وگال...

-ذولة شبيهم چنهة زعطوطة بالاول واجت تسولف لابوها شسوت بالمدرسة

-كيان: معليك خليها متحمسة

-جنات: مالك هذا شبي وياي اليوم كلش زعلني وانقهرت

-مالك: ولك ليش تقهرها!!

-فاهد: فشلتني وخربت برستيجي ومكانتي العضروطية بالمجتمع

-جنات: ياااا على طاري مكانتك العضروطية ثمعوا هاي...

سولفتلهم على الكونسيلر ثلاثتهم فكوا حلوگهم ما مصدگين خو كيان مااتت من الضحك فحطت فحط..

-كيان: هههههههههههههههههههههههههه كونسيلرر حرااام عليچ يمممة راح اموووت ههههههههههههههههه

-فاهد: خرب روح الكونسيلر فشلتنااا يالحمزززة

-مالك: معقولة محد عدلچ الكلمة؟ لان واضح قصدچ شنو

-جنات: ما عدلولي المطاية بث يضحكون عليَّ

-فاهد: ضااعت سمعتك بالجامعة فاهدد من وره الگملة بت عمك

-مالك: ميخالف شبيك بعدها متعرف

-فاهد: بابا جنات تهجي وياي بنيتي.. كـ.. ا.. و.. نـ.. سـ.. لـ.. ـر..  اسمها كاونسلر

-جنات: تدري اني افتر واثأل وماعرف شنو معناها؟

-مالك: يعني مستشار كلية او شخص يساعدچ يرتب امورچ بيها بدون لا تتشابك عندچ المواد وينصحچ شنو تاخذين وشنو تعوفين

-جنات: الله حلوو حبيت

-فاهد: بعدني ما تخطيت الكونسيلر

-جنات: ولك اييي وبثقة اثأل البنات واتعارك وياهن من يضحكن عليَّ تاليها اجه رائد الله يوفقه ويثتر عليه ويحفظ اهله واعزازه والخلفه والخلف خلفه ويرزقه منين ما يندار ويجبر گلبه وخاطر و...

-مالك: افتهمناا

-جنات: اي اجه وهو دلاني ولا اگلكم ولا تگلولي ثاعة ونص هو ويايه المثكين تعب الرجال هلك هلاك خطية فد انقهرت عليه

-فاهد: شدعوة شدعوة شنو جاي يسوي وهيچ تعب ههههههههههههه

-مالك: گوم ولي هنااك!!

-فاهد: شبيك والله ما اقصد شي شسالفة

-مالك: لا تسمعني صوتك بعدد

-جنات: فاهد تره الرجال تعب ويايه حرام عليك نص نهاره ضاع بثثبي

-مالك: افتهمنا عوفي رائد وكملي

-كيان: اوگفي جناوي احسني اعرفه رائد شلون شكله؟

-جنات: بشرته ثمرة وطوييل كلش بعد اطول من مالك وعنده لحية خفيفة ثودة وشعره اثود طوخ وعنده غمازة بخده و...

-مالك: شنو هالوصف جنات؟! هم قصة هاي وتحچين بلسان البطلة؟!

-جنات: لازم اوصف بدقة مالك وما اضيع حقه

-فاهد: اويليييي مو حق هذا ضيم اني شايف رائد ورجعت تخيلت شكله على وصفچ

-كيان: عررفته جنات عرررفته والله عيونه مكحلة مو؟؟

-جنات: ولچ اييي

-كيان: شكله مو عراقي هيچ يميل للخليجي شوية وعنده شامات ثنين وحدة فوگ الثانية على اذانه؟؟

-جنات: والزززهرة هو هو اييي

-فاهد: عمت عيننننچن وين لگفتن الشامات الي على اذاانه!!

-كيان: مو واضحات لذلك سألت المهم جنااات عرفته ولچ هذا يخخخبل

-فاهد: گروني الگوجي جاي تلطم بصمت

-كيان: ولك اقصد اخلاقه تخبل وفد فرفوشي هسة تشوفين شلونه طبعاً چان ياخذ صديقتي السابقة الجربة مروة هاي نفسها العراقية الكول السولفتلچ عنها ويساعدها وموتت روحها تموت عليه وما انطاها مجال

-جنات: ايي مبين ثگيل تره حتى الكونسيلر احترمته وحبته زين طمنيتني خفت يكون مزعج واتعارك وياه كل يوم

-كيان: لا وين تتعاركين وياه هسة تشوفي شگد يجنن

-جنات: اوووف ريحتيني يله تحمثت للجامعة لعد

-فاهد: مالك بقن عندي ماركة ديور زوج جديد مرتب راح يعجبك كللش

-مالك: جيبهن جيبهن

-فاهد: بس شوية يتأخرن جاي يجلفون بيهن يسوون بيهن لمعة حلوة

-جنات: شنو هنه؟

-مالك، فاهد: گرووون!!!

-كيان: شگد تبالغون تره جاي نحچي على فطرتنا

-فاهد: ز*** على فطرتچ خووش؟؟؟

-كيان: احترم نفسسسك

-فاهد: وز**** على تربية شُهيب الخايسة

-جنات: انتَ بث تغار منه

-كيان: لچ اييي هستوني دا اگولها

-مالك: كافي كافي دخت يله روح لبيتك فاهد

-فاهد: خلينه نبات يمكم والله ما نوكح

-جنات: اي اي باتو حبابين

-فاهد: اني راح ابات معليه

-مالك: فاهد ولي لبيتك

-فاهد: بالعباس اريد ابات

-مالك: روح لبيتك

-فاهد: حباب حباب حبوبي حباااب

-مالك: ولي لبيتك

-فاهد: بروح امك

-كيان: يوووه فاهد واخواني؟؟ مو وعدتني نروحلهم اليوم؟؟

-فاهد: باچر اخذچ وعد خلونه نبات هنا اليوم

-جنات: والزهرة الا تباتون

-فاهد: ماطولها حلفت والله ما اكسر حلفانها

-مالك: جنات!!

-جنات: نعم نعم؟؟ بيتي هذا هم واني اريدهم يله خلونه نثهر على فلم شگاگي

ركضنا اني وكيان للمطبخ نجيب نمنميات ونسوي شامية وجبنا عصاير وكلشي وكلاشي وركضنا للصالة فتحنا البلازما وعرضنا فلم وصارت سهرة عائلية تجنن حتى مالك المتوحش الي يكره احد يبات عنده چان راضي..

الصبح جهزت نفسي ورحت للجامعة ما حضرت ولا محاضرة حرت اكمل معاملتي ورجعت العصر للبيت، ذبيت ملابسي على الفراش وطبيت اسبح اريح نفسي عبيت البانيو ماي وحطيت بي صابون رغوة وعطورات وغسولات ونمت بي استرخي..

حسيت روحي غفيت ثواني وفزيت على صوت طگطگة بالغرفة مالتنا بس ماكو بالبيت غيري منين هالصوت؟ لفيت نفسي بالمنشفة وصحت واني بالحمام..

-مااالك هذا انتَ؟؟ اطلع عفية اريد ابددل

اختفى صوته فتحت باب الغرفة ومديت راسي ادوره ماله وجود بس باب البلكون مفتوح لبست الشبشب ورحت اسد باب البلكون واقفلها الهوا بارد، رحت للكنتور اطلعلي تراك ورجع صار صوت بالصالة بدلت بسرعة هنا قبل لا يدخل مالك ورجعت للميز امشط شعري..

-مااالك؟

صحت اسمه من تكررت الطبة قلقت شبي هذا وليش مدا يجاوب؟ گمت اشوف شبي تمشيت اعبر الممر اليفصل غرفتنا عن الصالة وفزيت اصرخ بمكاني من المنظر..

-جنات: ابوووو فاضلللللللللل

شهگت اركض للغرفة وانجريت من ياخة التيشرت يسفطني على الحايط ويخنگني من رگبتي.. روحي طلعت اربع زلم ملثمين مسلحين والخامس لازمني من رگبتي يخنگ بيه..

حاولت اصرخ حاولت تطلعلي همسة بس مااكو.. فقدت النفس عيوني بدت تتگلب احس بروحي تنسحب والهوا اختفى من ريتي صرت اتشاهد بگلبي وعيوني تذب دموع والگدامي كلما جايله يعصر اكثر واكثر رگبتي راح تطگ بيده بقيت على هالحال ارافس واحاول اللقط هوا اجاهد لحدما فقدت الاحساس بكلشي والظلام سيطر عليَّ....

**

-فاهد: ام خالد اني بغرفتي ماريد احد يزعجني

-كيان: فاهد اني رايحة لاخواني السايق راح يوديني

مجاوبني وفات للغرفة وقفل الباب وراه شبي هذا!! هاي فوگما ابلغه اني رايحة بس هو هم متغير عليَّ من رجعنا من اسبانيا بس ميحس على روحه عباله اني المتغيرة واكيد سبب تغيره حمرته!! ااااخ يا حمرته لو اللزمچ الا انتفچ تنتيفف!!

اخذت جنطتي وطلعت ويه السايق وصلني لبيت ماريا نوينا ننجمع كلنا هناك ونتفق على خطبة مروان وصبا اخيييراً..

فتحلي الباب نشوان بس شافني عاط بعلو صوته ما مصدگ وحضني بقوة عصرني عصرر ومن الفرحة شالني يفتر بيه ويگول..

-كيااااااني اميررررتي

-كيان: نشوووان عفونتييييي

-نشوان: يروحلچ فدوووة فوگ فدوووة عفونة تعالي ولچ حقيرة شگد مشتاقلچ الله ياخذ الغياب اخذچ المسودن من عدنا خ*** على ابووه العار

-كيان: هههههههه لا ولك بس تعرف چنت بشهر العااااااسااال

-نشوان: فاكهة حياتي اهم شي تونستي يا بعد گلبي وروحي

-كيان: كلش تونست والله مكانكم خالي

-مروان: متأكدة مكاننا خالي؟

-كيان: هههههههه مروان

ابتسم وفتحلي ايده اروح احضنه، چيتت بحضنه يبوس براسي ويشم شعري ويحاوطني بدفو، بعدني عنه شوية ومسح على وجهي وبوس خدودي من جديد..

-حبيبتي البيت اظلم بدونچ

-نشوان: والله والعباس والقاسم والزهرة ام الحسن چذاب

-كيان: امشي لك عفونة ميچذب مروان

-نشوان: ولچ يضحك عليچ يگول هيچ لان دحنا وره ما تزوجتي كله احنه نغسل ملابسنا وننظف البيت ونرتب امورنا وما اسولفلچ على البيت جيفته واصلة لسليمة

-مروان: چذاب لا تسمعيله اليوم نظفت

-نشوان: بعدما شلعت گلبي

-كيان: وانتَ شبيك متنظف؟؟

-نشوان: مو اني مشغول تفاح ريتي ماعندي وقت

-مروان: بالسوالف المكسرة مشغول نشوان عيني عليك شايف لو افتهمت بيك رايح منا لو منا واسمع بس اسممع داخل اماكن مال ادبسززية والعباااس اشگك بالنص وگول مروان ما گال!!

-نشوان: شبييك راح ازوع من الخوف وعلي ما داخل هيچ اماكن ليش اني اگدر ويه السيد اتخيل سوالف الادبسزية حتى اروح اعيشهن

-كيان: يلا يلا لا تتعاركون شبيكم راح نظل بالباب وينها ماريا؟؟

-مروان: جوه تصبغ اظافرها

ابتسمت من تذكرت ايامنا قبل ماريا روحها بالمكياج وصبغ الاظافر وسوالف الانوثة، ركضت اهرول اشوفها لگيتها گاعدة على الكرسي گبال الميز ومثبتة ايدها ومركزة بكل قوتها ويه الصبغ وكأن عدها امتحان مهم..

-احم احم احم

اللتفتت تشوف شنو وشهگت من شافتني ضحكت بصوت عالي ومثل عادتها عاطت..

-كياااااان

ركضت تچيت عليَّ تحضني وتطفر بمكانها واطفر وياهة، استمر سلامنا خمس دقايق من الفرحة گامت تبچي خطية وتلومني وتعاتبني ليش عايفتها وما ازورها..

-نشوان: چانت مسافرة حبيبتي الصاكة ماريا

-ماريا: حتى لو مسافرة لازم تجيني

-كيان: شلون اجيچ واني بغير دولة

-ماريا: حتى لو حتى لو

-نشوان: صح كيان انتِ مو خوش بنية وما بارة بيها چان لازم كل يوم تحجزين طيارة وتجين تشوفين ماريا وترجعين

-كيان: ياااا ولك شبيك

-نشوان: اششش اششش هم الها عين ترادد

-كيان: ولكم شبيكم صدگ چذب دتحسسوني غلطانة واني كللشي ما مسوية

-نشوان: غلطانة ونصص وانچبي وامشي يلا لا تراددين لا اطيح حظچ امشييي

فكيت عيوني وحلگي سوه وضحكت بصوت عالي من شالني على چتف واحد وجر ماريا من ايدها واخذنا للصالة سوه..

-نشوان: اليوم تباتين يمنا لا اگلب الدنيا

-كيان: لا ماعوف سووچيي

-مروان: نعالچ هذا مو زوجچ ماگول غير اشفتي منه وتزوجتي!

-كيان: ردينا؟؟

گعدنا سوه شوية واجه شُهيب ورجع تكرر السلام الحار رغم من يومين اخر مرة شفنا بعض بس نشتاق لبعض شنسوي، رتبنا سفرة العشا سوه وگعدنا بعشاء عائلي كله حنية..

بنص تحشيشات نشوان ومداهرته ويه ماريا خلاها الا شوية تگوم تبچي وتركض تحضن شُهيب وتشكيله رن جرس الباب..

-شُهيب: فاضل؟

-نشوان: لا گال ميگدر يجي

گام شهوبي يفتح الباب واحنه كملنا عشا بس عصت اللگمة بحلگي من شفت فاهد يدخل وعيونه صايرات حمر..

-كيان: فاهد

-فاهد: تستقبلون ضيوف؟

حچاهة بحاجب مرفوع وشكله مزعوج كلش ياربي سترك كلشي ولا اجتله الحالة الغريبة وراح يگلب الدنيا ويتعارك من لا شيء..

-ماريا: هلو مسودن اي اي تعال بس ممنوع تغلط على شهوبي بعد

هز راسه ودخل، سلموا عليه اخواني سلام بارد وجر كرسي وگعد ويانه بس ما مد ايده ولا اكل شي وباقي هادئ طول الگعدة..

الاجواء تغيرت من المرح والضحك للجدية فجأة بدخوله، وضعه مو طبيعي يحرك برجله جوه الميز يخلي يتحرك ومتنرفز.. مسح شُهيب حلگه بمنديل وحمحم وگال بهدوء..

-شُهيب: فاهد ليش عيونك حمر انتَ زين؟

-فاهد: ويهمك هالشي؟!!!

-شُهيب: خلينا نگعد بالصالة ونحچي

-فاهد: ماريد اگعد وياك بمكان وااحد!!!

-شُهيب: تمام

-فاهد: انتَ عاااار علينا تدري بهالشي؟؟ احنه ما نحببببك!!!

هز راسه شُهيب ساكت لاحظته يجاري فاهد من يكون بهذا الحال وابد ميجاوبه ولا يستفزه حتى لو يدوس ببطنه..

-فاهد: هههههههههههه حقير وصخخخ بعت اخواااانك وعفت مااالك بهذا الحااال انتَ واحد انانييي ******* ابن ******** ساقططط

صب شُهيب گلاص مي وحطه گدام فاهد، رمش فاهد رمشات ثقيلة وعيونه تراقب المي رص على اسنانه بعصبية وشال الگلاص وشمره على الحايط تكسر وعاط..

-فاهد: لااااا تمثل الحنيييية وياااااااي

-شُهيب: فاهد اهدأ خليني افتهم شبيك

-انتَ.. انتَ واااحد ******** ابن واحد ********* ......

ونزل اشكااال مسبات وفشاير على شُهيب وشمسون سوه فشاير ما سامعتهن بحياتي بس چانت كفيلة تدب الخوف بگلبي خصوصاً من فاهد طبگ ماريا وياهم وصار يعير بـ شُهيب وماريا گامت تبچي..

-شُهيب: عوف امي لا تدخلها بعصبيتك

-فاهد: ما تستتتحق ام ماااا تستحققق الوحيد بيناتنا عنده ام وحصلتتتت كلللشييي نحلم بيييي انتَ سرررقت حلمناااا سررررقت كللشيي حلو بحياتننااا سرقت ابوووونااا وحبه وعطفه وحنااانه مالك عاااش بالتعااااسة بسببك!!!

كل هذا وشُهيب باقي على هدوئه بس نشوان عصب وراد يرد فاهد ومروان وگفه وهمسله "لا تدخل اخوان بيناتهم"..

-شُهيب: وصلك خبر زعجك فاهد؟

جفل وانبلع صوته، فوراً عيونه دمعت وعصرهن بقوة يحارب متنزل دموعه، مسح عينه بحركة طفولية وبرطمت شفايفه..

-فاهد: مالك بالمستشفى

خفت من گال هالكلمتين، نهضت من مكاني بطريقة سريعة اركز وياه بينما شُهيب بقى يحارب الهدوء والصمود بس ملامحه تغيرت للقلق جاهد ميخلي يبين..

-شُهيب: ليش؟

-ابووووووووك

-شسوه هالمرة شمسون؟

-عذبه!!! عذبه لانه اكتشف مالك جاي يرجع فلوس جنااات!!

گلبي انقمت من تذكرت شنو معناة "عذبه" عند شمسون اتذكر فاهد من سولفلي عن سواد روح شمسون تجاه ولده خصوصاً تجاه مالك..

-شُهيب: شلون اكتشف؟

-فاهد: ماادري منو بلغه ماااادري مالك خابرني العصر وگال رايح لابوية طلبني اذا تأخرت اخذ جنات لبيتك لا تخليها وحدها ماكووو كم ساعة مرت واجاني خبر هو بالمستشفى وجسمه مكسرر و مزورگ!!

فقد شُهيب اعصابه وضرب على الطاولة بقوة، مسح وجهه بأيدين اول مرة اشوفها ترجف من العصبية وگام من مكانه اخذ سويچ سيارته وطلع عرفنا رايح للمستشفى ما ينرادلها فهم، طلع فاهد واني رحت وياه واخواني وماريا هم اجو وطلعنا كلنا للمستشفى..

وصلنا بربع الوقت الطبيعي بسبب السرعة، سفط فاهد سيارته سريع ونزل يهرول واني وياه اركض بينما شُهيب گدامنا، توجهنا لـ جناح خاص شُهيب يمشي بدون لا يسأل عن مكان مالك وكأنه يندل ومتأكد راح يلگاه هنا وفعلاً وصلنا لغرفته والدكتور هستوه ديطلع منها..

-شُهيب: دكتور مالك جوه؟؟

-الدكتور: اهلاً مسيو شُهيب، نعم جوه مالك

-فاهد: شلونه؟؟؟

-الدكتور: رضوض واحتاج تقطيب بكم مكان بجسمه وكوي هم بس وضعه صار احسن انطيناه مسكن ونام

-فاهد: ابن ال******** شمسون ال******** طايح الحظ ال*******....

سكته شُهيب يضم حلگ فاهد وهذا متخبل متخبل يشيل بروحه ويرگعها فقد عقله من الدكتور كمل وگال..

-الدكتور: جابه تميم ابن عمكم وضعه مزري للامانة گلت ما يعيش هالمرة بس الحمدلله گدرنا نوگف النزيف الصار براسه ونعالجه

صار فاهد يضرب على راسه ويصيح بنص الجناح بأنهيار ويركض يريد يروح لـ شمسون ويحلف بروح امه وراس العلوية يذبح شمسون ويخلص منه.. لزمه شُهيب من اكتافه يهدأه يريد يسيطر عليه بس محد ديگدرله، اجت الممرضة رادت تضربه ابرة مهدأ ما قبل غافلها شُهيب واخذها منها وضربها بجسمه بس ما مضى المخدر بجسمه الا بعد نص ساعة وهالشي خلى شُهيب يستغرب وماعرفت سبب استغرابه شنو..

نقلناه لغرفة خاصة بجانب غرفة مالك ووصاني شُهيب ابقى وياه وما اعوفه علما هو يتطمن على مالك ويروح يكمل شغله واتوقع هالشغل هو يروح لـ شمسون ويطيح حظه ويارب يطلع توقعي صح..

نص ساعة وصحى فاهد وهالمرة اني استغربت شلون مدا يسري بي المخدر؟؟ بس ما اهتميت وما دققت هواي فز من مكانه يدور على شي لزمت ايده بسرعة وهمست بخفوت اهدأه..

-فاهد انتَ بالمستشفى.. على كيفك لا تتحرك زايد المغذي بيدك

ملص ابرة المغذي من ايده وشمرها صار الدم يتطافر وگام من مكانه يريد يطلع ولزمته دوخة قوية بالباب خلته يترنح بمكانه، لزمته اسنده على كيفي بس ثگيل ما اسيطر گوة وبصعوبة مشيته للسرير اخلي يتمدد، بقى مغمض عيونه بقوة وعاصر جبينه بيده، حرك راسه نافي وصاح بألم..

-رااااااسي راح ينفججر

-يجوز من وره المخدر على كيفك ويه نفسك مالك زين وگالو باچر يرخصوا

احچي وياه بس عقله فاصل ولا كأني موجودة ولا كأني دا احچي واحسه حتى مو ويايه ويهذي ماعرف شيگول يحچي بالاسباني والمغربي والعراقي ويدمج بالكلمات دمج..

بقيت بصفه امسح على ايده واعصرها بين ايدي بلكت يحس بوجودي بس عبث! عبث ولا رجع لوعيه..

-فهودي انتَ زين؟

حرك راسه بـ "لا" ودردم بشي ما مفهوم قلقت خفت المخدر اثر عليه بشكل سلبي جريت ايدي دا اگوم ورجع يسحبني يضغط عليها ميخليني اتحرك..

-كوري

-ها عيني

-مالك.. شُهيب زينين؟

-زينين لا تخاف كلهم بخير

حچى شي غير مفهوم من جديد ورچع گال بلسان ثگيل..

-وين راح اخوچ العار

-گال عنده شغل بس احس راح لشمسون

-خلي يرجع

-تمام هسة اتصل بي

-لا.. لا لا تروحين

-ماروح بس اتصل بي هنا

-لا

مسحت على ذراعه احسسه بوجودي وگلب على جهتي ينام يواجهني وحضن ايدي لصدره، ابتسمت على منظره الدم بعده يكت من ايده ولوخ الفراش وملابسه شلت كلينسه ومسحت المكان على كيفي حتى لا يتأذه عبالي نام بس فاجأني من ضحك وگال وعيونه بعدها مغمضة..

-ما اتوجع كوري لا تخافين

-شنو متتوجع مو بشر انتَ

-لا حيوان اني

-اسكت لا تحچي على نفسك

-ماعندي احساس

-فاهد كافي انتَ كلك احساس ما شفت نفسك شلون انهاريت على اخوك

-ماعندي

-كافي ارتاح

-تعالي يمي نامي

-ولي لا تترعن

-سم ومرض

-امشي لك

-تعالي كوري

-انطمر كافي

-ما

-نام ولك

-ما انام

-ناااام سليمة تطمك واخلص منك

ضحك بخفة بصوت خدران من تأثير المخدر ضحكت وياه وبنص ضحكتي شهگت مخترعة من سحبني ينيمني بصفه گوة وغصباً عني يحصرني بين ايده يحجب عني حتى الهوا..

-ولك هدددني مسودن

-شبيچ مو مريض اني

-قزرقط مابيك چنك هايشة

-الهايشة انثى واني ذكر يعني ثور

-نفس الشي! ثانياً شو رجع لسانك مو خايف على اخوك وتلطم وتبچي شو هسة تضحك؟

-يگوم منها متعودين

-لعد ليش هيچ تأذيت؟

-لان صار فترة ما موصله ابوية لهذا الحال واضطرينا ننقله مستشفى

تمتمها بين النايم وبين الصاحي حرت هذا بوعيه لو بعده متخدر حتى بهاي حيرني وخبلني المسودن..

-فهيد

-همم

-نايم انتَ؟

-ها؟

-لا هيچ انسى

سكتت وبقيت اتأمل الغرفة النايمين بيها ادور عيوني كل مكان بس حتى ما اباوعله واتصالف بنظراتي ماريد اباوعله ليش؟ مادري بس ماريد دا احس بأحاسيس غريبة من نكون وحدنا سوه وهالاحساس مدا بعجبني..

-كوري

-ها

-انتِ حلوة

-شكراً

اخيراً ركزت بوجهه ورفعت نفسي اباوعله لگيته منزل راسه عليَّ وصافن بس عيونه ذبلانة، ابتسمت ورجعلي الابتسامة وهاي اول مرة يسويها تخربط وضعي وگلبي بده يدگ من طالت نظراته..

-فاهد: اني ماعندي احساس تعرفين ليش؟

-ليش؟

-لانچ بنية ما تتفوت

نصى نفسه وقبل لا استوعب اني وگلبي جملته طبع قُبلة خفيفة على شفايفي وابتعد.. بحلقت بعيوني استرد وضعي بس ما خلاني لانه طلع جگارة من جيبه رغم وضعه المأساوي وشعلها بنص الغرفة يدخن، توقعت راح يجونا من يبين عدهم احد ديدخن بالغرفة بس محد اجه..

سحب منها نفس ونفخه بوجهي غمضت عيوني وبلحظة سريعة حط الجگارة بين شفايفي وهمس..

-شاركيني

-فاهد اني بـ...

-بطلتي ادري بس اريدچ تشاركيني هالمرة

هزيت راسي على كيف وسحبت منها نفس وزفرته بهدوء، ابتسم من الدخان ضرب وجهه ورجع الجگارة اله اخذ منها نفس جديد وزفره نفس قبل شوية..

-كيان بأستهزاء: قبلات فرنسية

-فاهد: لا هيچ تصير القبلة الفرنسية..

جر وجهي عليه وقبلني بقوة، فتحت عيوني مصدومة ما متوقعتها وبقيت بصدمتي لحدما ابتعد مني يسمحلي اتحرر من بين ايده..

-فاهد: تعلمي زين لا تفشلينا

-يا عاار

ضربته على صدره حيل ما راضية وردت اگوم ورجع سحبني يحط الجگارة بحلگي اخذت نفس وزفرته بعصبية ضحك وخلاها بحلگه وكملناها سوه..

طلع وحدة جديدة وشعلها بداخل فمي، ما قبلت ادخنها وشمرتها بعيد ودفعته اگوم اكره نفسي اكره نفسي لانه ماخذني بديل لحمرته يشبع تفسه وجوعه العاطفي من خلالي..

-شبيچ كيان

-وخر لا تلمسني ولا تعيد هاي الحركات بعد!!

-واذا عدتها شتسوين

-اطلللگك واخلص منننك ومن هممك

-ههههههههههههه والجهال

-نعععال على الجهههال

-خطية كوري حرام عليج ذولة الطفال شنو ذنبهم

-تفاال يجوني منك مو طفال!!

-هههههههههههه المهم شي مني هسة تجي تفلة، طفلة المهم لعبنا باح باح

-ولي لا تصير ادبسزز

-شبيچ معصبة انتِ شبيچ؟

-من وراك انتَ من وراااك ملاحظ نفسك شلون جاي تهيني لو ما ملاحظ؟؟؟

-اني اهينچ؟ ليش شمسوي؟؟

-اسكتت انتَ مو بوعيك خلي ترجع لوعيك وكلهن اغردهن حتى خااف تگول نسيت

-اني مو بوعيي؟

-لاا عيونك مطفية وصوتك خدراان انتَ بعدك تحت تأثير المخدر وحتى محادثتنا والصار ما راح تتذكره!!

-هاا؟

-وجعاا

-وسماا ههههههههه

-غبي غبييي

-كورية لا تزعلين ما اقبل احد يزعلچ

-اسكت ما طايقتك لا تحچي وياي

ابتعدت بسرعة اوگف بنهاية الغرفة دموعي من وحدها گامت تنزل شبيه صايرة ضعيفة وما اتحمل كلمة شبييه! مسحت دموعي بسرعة من حسيته يگوم من السرير ويوگف بظهري دارني عليه يشوف وجهي وبدلت ملامحي المنكسرة بملامح جامدة..

-گليلي منو مزعلچ كوري اروح احررگه وراس ماالك

-انتَ مزعلني هم تحرگ نفسك؟؟

-احرگها واحرگچ وياي

-گبرر اني شكوو

-لانچ براااسي وما جاي تطلعييين راح تموتينيي

لزمني من متوني ودفعني على الحايط وقبلني هالمرة بأنتقام حاربته بس فشلت.. فشلت وفشلي ذريع بدت تطور الامور بطريقة سريعة ما محسبتلها حساب خفت وانغرمت، جاهدت وخسرت، ضجت وروحي الي انتعشت وچان فقدت السيطرة لولا تلفون فاهد الي رن ودفعته عني بقوة اكبر ودرتله ظهري اعدل ملابسي واأنب نفسي واعض على شفتي بقووة اريد اعاقب نفسي الغبية الحقيرة على تصرفي شلون لو مكملين چان رخصت نفسي وذليتها!!..

زفر بقوة وفشر بكلمة بذيئة وجاوب الاتصال بروح طافرة، عرفتها من اسلوبه الي دگت مساعدته ام خالد بس ما عرفت الخبر الي بلغته بي خلته يصيح بأنفعال ما اشهده من فاهد بالعادة...

-فاهد: انتِ متأكدة؟؟؟؟؟؟

يتبع....

━━━━━━  ━━━━━━

شُهيب ومسرة كتاكيتيي 🙉♥️

كيان وفاهد المسودنين الحب ذولة الحبب طبعاً علاقتهم مو بس معقدة ذولة الثنين مليوسة الاوضاع يمهم 😭😂😍

جنات والكونسيلر؟؟؟؟ تفشلت واني مالي علاقة 🙂😂😂

واخيراً مالك 😭💔!!!

توقعاتكممممم الخنفشارررية 💀😍🩷🩷🩷؟؟