تحميل رواية «ابناء الحسوم "شمسون"» PDF

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

هل يحق لي أن ازعجكِ عندما أشتاقُ إليكِ...؟

━━━━━━  ━━━━━━

-مسرة: لاااااا شُهيبببب

صاحت من عمق روحها ويه انطلاق الطلقة ما اشوف بعيوني وما اسمع غير صوت العياط وهجمة فاهد المرتدة على جسد ليث يسفطه ويه الارض وينهال عليه بالضرب القاتل..

عيوني شخصت من الموقف مسرة تصيح وركضت على جسم شُهيب تتفحصه وترجف، كيان تبچي وتصيح "اخوية شبي" وماريا منهارة وتضرب على وجهها وشعرها..

-شُهيب: ماابيه شي شخطتني شخططط

يصيح مابيه شي والبنات الثلاثة ميستوعبون، مسرة نفضت جسمه نفض من شافت دم على ملابسه وبحركة سريعة شگت قميصه عن جسمه تتلمس صدره وزنوده واصابعها ترجف وكيان وياهة يتأكدن من كلامه.. مالك سحبهن عنه وما قبلن يوخرن الا من شُهيب لزم كل وحدة من ايد وعاد كلامه يصرخ بوجههن بصوت عالي يريدهن يستوعبن..

-ماابيه شيييي بااابااا

شمرت روحها كيان بحضنه تبچي بصوت عالي جسدها يرجف ووجهها شحب من الخوف، بادلها حضن سريع و وخرها عنه يروح يشوف امه مگنبصه بالگاع وايدها على راسها تهلس بشعرها وتبچي..

-شُهيب: يمة مابيه شي والله كلشي ما صار

گومها يحضنها يمسح على راسها وجر كيان هم يحضنها وعيونه على مسرة وگفت على جهة تاكل بأظافرها..

اللتهو مالك وعمي شمسون وفاهد وطاهر بـ ليث طلعوا بره والنسوان هنا مخبوصات خبص كل ثنين لازمات بعض ويفسرن الصار وشلون ردة فعل الاخوة چانت قوية وشلون لحگو ووو...

-تسنيم: ايات شبيچ تعالي شوفي جنات متخربططة

-ايات: شبيها

رحت اشوفها وجهها اصفر ليمونة شفايفها صايرة بيض والدموع مغطية وجهها، مادري ردة فعلها على الصار لو على موقفها گدام الكل لو على كتل فاهد لـ ليث جنزه تجنز..

غسلتلها ووديتها ترتاح بغرفة بيبي ورجعت للصالة للخبصة، محد انتبه لـ زند شُهيب الينزف غير مسرة معناها الطلقة صدگ لاحته بس مثلما گال شخطته شخط وعبرت..

-مسرة: زندك ينزف اشهب

باوع لـ زنده وكيان وماريا لسه بين ايده، هز راسه بـ اي واشرلها بعيونه حتى تسكت ومتصير هوسة بس وين متصير هوسة والعلوية شافته، نترت بالنسوان بصوتها الخشن القوي..

-العلوية: الكل ينچعمم حسچن ما اسمعه بعدد

بجملة وحدة سدت حلگ الكل يطلع عددنا فوگ الـ 35 وحدة هنا الكل هدأ والانظار توجهت عليها تراقبها شنو راح تسوي..

-العلوية: وخرن غاد.. انتِ اليابانية وهاي ام شعفة الأذرة زيحن عن الزلمة

جرت كيان بقسوة عن صدر شُهيب متتقصد القسوة بس هي ايدها قوية وقبل لا تلزم ماريا وخرت توگف على جهة..

-العلوية: شماله زندك حبوبا لاحتك الچيلة؟

-شُهيب: ماكو شي علوية بس شخط

جرت زنده تشوفه، تمايزته شوية وضربته عليه بقوة..

-العلوية: مابيك بلا يوم لا تخافن معزايات شمالچن تختضن مثل سعف النخل زلمة مشورب طول بعرض وانشخط بـ چيلة واذا هس؟

-ماريا: اخاف يموت

-العلوية: اسم الله الزهرة ام الحسن لا تفاولين عليه ولچ انتِ امه

-ماريا: يعني ميموت؟

-العلوية: عرج ما يصير بي لا تخافين ام شعفة

-ماريا: اوكي

-العلوية: غِسل لهالحلگ المحمر

-هدى: علوية شوية شوية عليها

-العلوية: حاست بفادي محمرة بالاحمر ام الگمل

-ماريا: لا اني ام شُهيب

-العلوية: ولچن خايبات يبوووووووووو

تغيرت الاجواء من الخوف والنكد الى الضحك وبصوت عالي، بيبي تريد تشگ ثوبها من وره ماريا وصارت تدبچ بمكانها من القهر موتتنا ضحك..

-العلوية: گابلني ولچنن گابلنيي.. شمالهاا الوليان تركض وره السلااابة وشمالهااا الوليان... احوووو احاااا احوووو يبووووو صيحييي ولچ بت الچلب

-ماريا: حو حو حو حو حو

-العلوية: حييييل ولچ

-ماريا: احااا احووو احااا احووو احاااا

خطية صارت تلطم ويه بيبي المسكينة تگابلن اباوع الوجوه حمر ميتين ضحك، ما وگفت لطم الا من شُهيب تدخل وجرها من بيبي ما راضي، يضحك ويگول..

-علوية شبيچ وياهة

-العلوية: وزقنبووت جاي اربيها خليها تصير مرة حوك لا تظل تتماوعلي اوكيييي واوكييييي

تغيرت نظراته حسيته يعاتبها بعيونه واتوقع السبب لان بيبي لليوم ممقتنعة ماريا ام شُهيب بيها شي او عقلها بي علة تشوفها حلوة وانيقة وتهتم بنفسها عبالها امرأة عادية، فرت حلگها بيبي وعدلت نفسها ورجعت تلبس عبايتها الجرجيت..

-العلوية: سكتنا شمالك تخوزر، استر نفسك سد قميصك لا تستعرض بعضلاتك جدام النسواين خايبات عاينن وشومه ابن الچلب

-هدى: ههههههااايي علوية انتِ تگولين لحد يباوع واستر نفسك شو هسة تردينه نشوف وشومه السكـ***

-العلوية: الشنهيي؟؟

-نور: هدى احترمي نفسچ واللفاضچ!! معليچ بيها علوية هاي ما مؤدبة

-مسرة: كلللش

-العلوية: هاااا ما طول هالبحصة غارت يعني صدِگ دايسة بالحچي تعالي ولچ بت الصايع

دگتها برجليها بالعوچية خلتها تطفر بمكانها..

-العلوية: گلي لابوچ الصايع ابن الصايعة يضبچ ويعرض هدومچ لا يظل حايرلي يعرض بـ.....

-شُهيب: علووووووية

-صبا: شوف اني هاي ما فهمتها مع الاسف!! مسرة گتلچ لازم اجيب دفتر وقلم اسجل جاي تفوتني معلومات قيّمة هنا

-العلوية: هاااع انتِ ياهي ولچ

-صبا: اني صبا صديقة مسرة اريد اصير طالبة يمچ بيبي اريد استفاد وتغرگيني بمعلوماتچ وكلماتچ الصاكة

-العلوية: هلا بيچ حبوبا كل يوم تعالي

-شُهيب: اني طالع محتاجة شي علوية، يمة، كيان، مسرة؟

-العلوية: لااع كلشي ما يردن روح غاد يشوفولك چارة ويه جرحك لا تعوفه يلتهب بعد امك الرعنة

-شُهيب: ماشي

-وهاي وشومك كلهن هسة اچويهن واخربهن تففف على ابوكم الما عرف يضبكم

عافها مبتسم وطلع من البيت، رجعنا نگعد حول بعض وبيبي مترأسة المجموعة كل شوية لازمة وحدة لازگتها برزالة وانوب تتغزل بيها وبجمالها..

-العلوية: انتِ ام اللماسة تعالي يمي

تقدمت مسرة عليها توگف بصفها لزمت بيبي شعر البنية ولفته على ايدها تجره..

-مسرة: ااه بيبي

-العلوية: هااع هاي شمالها مو زلمتچ انه وتتنعوصين عليَّ

-مسرة: مو توجعت

-العلوية: شعرچ هذا موش باروكا مو؟

-مسرة: لا شعري الطبيعي هذا

-حلو عفية بنيتي لا تگصينه حلوة البت الشعرها طويل واسود

-مسرة: صار بيبي

-العلوية: اغدي فدوة للصار وعلي هاي تعجبني حليوة وتنگع بالگلب چنها تينه صغيرونة وبلبوصة وحلحوصة

-مسرة: شنو؟

-العلوية: شرحيلها ايوته مالي خلگ المايعات

-ايات: هههه تقصد حلوة وناعمة وقصيرة

-مسرة: اووي حبيبتي بيبي شكراً، بس تدرين اني ما احب قصري اتنرفز واحذيتي كلها دبل كعب

-العلوية: ليش اكو احلى من الگصيرونة وعدها...

ضربتها بيبي من وره ضحكت مسرة وابتعدت توگف على جهة، ابتسمت بيبي على ضحكتها واشرتلها ترجعلها وتگعد بصفها..

-العلوية: تعالي عليوا (عُلا) شوفي البنيات بسنونهن اللماس وانتِ بسنچ لازگ كرفس

-عُلا: ههههه علوية لا تحارشيني

-العلوية: نزووول للشگرة

ضحكت وجرت عُلا تبوسها وتمسح على خدودها، مدت ايدها بصدرها وطلعت فلوس حطتهن بـ ايد عُلا وشاورتها بشي عرفت دتگوللها ضميهن عن اخوانچ واشتريلچ حاجة من تطلعين، هاي بيبي ماكو مرة داهرت وحدة بينا ما راضتها بشي بعدين رغم احنه منزعل منها ونعرفها تتشاقه بس هي تظل بگلبها وتخاف لا نشيل عليها..

-العلوية: شلون شافچ شهيبان الخوينس

-مسرة: شريكته اني بالشغل

-العلوية: هاااا يعني هو حباچ

-مسرة: لا خطبة تقليدية عمو شمسون خطبني من ابوية

-العلوية: يفتهم هالاغم گال ما افوت هالتفاحة، تعالي وياي تعالي

گامت تستند على عوچيتها وذبت عبايتها بقت بالهاشمي، اشرت لـ كيان وصبا وجولي والي ولـ باقي بنات عمي العزباوات وصاحتنا نگعد بالغرفة ويه جنات..

-العلوية: نايمة گليبي

-ايات: اي بيبي تعبت بالطريق

-العلوية: خوشن تعالن للحديقة لا نگعدها بنيتي

رحنا للحديقة كلمن جرت كرسي وگعدنا گبالها صار شكلنا مثل المدرسة وطالباتها..

-العلوية: شلونهن بعد بيتي

-فيروز: زينات علوية وهسة اهزلچ شوية حتى تتأكدين

-العلوية: گعدي گعدي لا تفشلينا المطربگة

-نور: علوية ليش طلعتينا هنا

-العلوية: اختنگت من انفاس المنفاقات جوه جبتچن نسولف هنا ام وبنياتها

-كيان بهمس: شگد لطيفة بيبيتكم ايات

-العلوية: ها شو تبسبسين مرت المسودن

-كيان: دا اگول لآيات عنچ لطيفة بيبي

-العلوية: اندارلچ فدوة بنيتي سولفيلي شلون لگاچ فاهد اشفتي منه وقبلتي بي

-كيان: يصير اخو شُهيب وان شاء الله يكون نفس حنية شُهيب عليَّ

-العلوية: عايني هو مال حنون اي حنون بس مسودن وطگة ونص عقله لو فصل محد يجرعه بس يبقى خوش زلمة وصاحب نخوة

-فواطم: علوية سأليهن عن نفسهن عدنا فضول تجاههن بس نستحي نسأل

-العلوية: يله كوري سولفي عن روحچ للبنيات لا تخلين حفيداتي بفضولهن

ابتسمت كيان ودارت كرسيها تواجه البنات وبدت تعرف عن نفسها كملت وبيبي اشرت لـ مسرة..

-العلوية: يله اللماسة سولفيلنا يبعد الحلوات

-مسرة: تمام، اسمي مسرة قيثارة خريجة بكلوريوس هندسة مدني چنت اشتغل ويه ابوية وافتتحت شركتي الخاصة ما صارلي سنة، عندي بنية اسمهـ.....

ما كملت كلامها بسبب صوت الشهگات الي صدرت من البنات، من الصدمة وگفت هدى على حيلها وصاحت..

-هدى: عندچ بنيييية؟؟؟ يعني انتِ مطلققة؟؟؟

-مسرة: اي

-فيروز: بس علوية شلوووونن؟؟؟

-مسرة: شنو قصدچ بـ شلون؟

-نور: احنه ما نزوج ولدنا مطلقااات

عگدت حاجبها مسرة بدون لا تجاوب وحدة منهن انفردن ويه بعض يزنن مثل الزنابير يدردمن وحدهن ونور ميتة قهر تباوع لـ مسرة بحقد وتهز راسها بـ لا وتدردم ويه هدى..

-العلوية: بَسسس عااد

-نور: علوية شُهيب خططب غريبة وانوب مطلقة؟؟؟ ليش احنه شبينا بنات عمه؟؟ شبينااا مشوهااات لو بشعاات لو بنات سوووء شبيناااا

-عُلا: مو قسمتنا نور كافي شبيچ

-نور: لا ما اسكت!! هذا مو حق راح اطب بالثلاثين سننة وحسرة عليَّ الزوااج حسررة عليَّ يصير عندي طططفل بسبب قوانين عشيرتنا الحقيييرة البنية ما تطلع الا لابن عمهاا تاللي ولد عمو جعفر اختاروو غرب ثنينهم ومحد حاسبهم محددد گال ميصير ياخذون غريبات!!

-فيروز: صح علوية مو حق هذا! شمعنى حلال عليهم حرام علينا.. اسفة مسرة حبيبتي اجت بوجهچ احنه منقصدچ بالكلام بس بزعت ارواحنا من هالقوانين وتعبت نفسيتنا

-نور: لااا اجت بوجهها لانها مطلگة!! منو احق بـ شُهيب وحدة مطلگة وعدهاا بنية لو بنت عمه؟؟؟

-مسرة: احترمي نفسچ ليش شبيها المطلگة؟؟ من شنو تشكي؟!

-نور: عاايشة بالخاارج وكلشي متتااح ومطلگة اكييد لاعبة فللللك ومورطة شُهيب بيييچ

-صبا: هاااي شلووون تريدني اسحلهااا من شعرررهااا الاجرررب

-جولي: ولللچ امشي هنااك حقودة غيوورة مسرة تشررفچ

-نور: ههههههههه جايبة چلابهاا يدافعن على شرفها الـ...

انكتم صوتها ويه راشدي بيبي القوي وصوتها الاقوى وهي تصيح..

-طبي جوه نورر ما اريدد اشوف چهررتچ

شهگت نور تبچي وفاتت جوه تركض، راحن وراهة بنات عمي يواسوهة بس بعد ميفيد نور حقدت وراح تسبب لمسرة مشاكل، نور ما تزوجت مو لان شكلها مو حلو بالعكس بس ما تزوجت بسبب نفسيتها الحامضة وعينها الضيگة تريد كلشي يكون الها ومتحب تشوف احد مرتاح بحياته..

-العلوية: عذرينا حبوبا هي بس تعبانة صارلها چم يوم وانفجرت بوجهچ

-مسرة: عادي بيبي ما صار شي بس انصدمت من افكارها الرجعية على المطلقة ليش منو اختارت تتطلگ برغبتها؟ منو عايشة عيشة كريمة ببيت زوجها وطلبت الطلاق؟ صارت الي تطالب بحقوقها ومترضى على التعب والعذاب فاسقة وعدها شي؟ صارت المطلقة مو خوش بنية بس لانها تعبت وطلبت الانفصال؟

-العلوية: لا يما المطلگة حالها من حالي وحالها من حال الاف النسوان الها حق تعيش وتتزوج وتخلف وتكمل حياتها وحقج هذا

-تسنيم: لتزعلين مسرة نور حبابة بس اوقات الزمن والظروف تجبرچ تتغيرين وتتغير نفسيتچ

-ايات: اي صحيح

-العلوية: هم صبرتي عليه گبل لا تتطلگين؟

-مسرة: هواي صبرت وهواي حاولت وياه بس چان يستغبيني ويلعب عليَّ دخلني بعالم ميشبهني وتركني وحدي بنص الطريق

-العلوية: اذاچ؟

-مسرة: لعب بيه وببنته طوية

-العلوية: الله يعوضچ بـ شُهيب حبوبا خوش زلمة هالخونيس من جوه الجوا

ضحكنا على تعبير بيبي وحبيت اغير الجو..

-ايات: بيبي انتِ سولفيلنا على زواجچ شلون صار؟

-العلوية: ياهو منهم هههههههههههههه

-صبا: واااو يعني متزوجة اكثر من مرة؟

-العلوية: اربع مرات

گالتها وتأشر بيدها رقم اربعة، فتحن عيونهن البنات ممصدگات واردفت بيبي..

-العلوية: ثلاثة گرطتهم وابو جعيفر الرابع

-مسرة: ماتو يعني؟

-العلوية: اي الله يرحمهم خلصو مني

-كيان: يعني انتِ اقارب ابو عمو شمسون؟

-العلوية: لا غريبة انه هو بيه وهاب خرق القاعدة واخذ غريبة

-جولي: شلون صار زواجكم؟

-العلوية: عشگني المسربت، شافني احوش على طريق البصرا بيتنا وهو رايح متأنق بالرباط لابسلي قندرة وقاط وشافني من بعيد رصدتني عيونه الارعن نزل وگال بعلي لو هي لو ما اتزوج

-كيان: هههههههه شگد حلوو

-العلوية: حلو شني خايبة غير هو ماخذ ثلاثة گبلي

-مسرة: عزه چان متزوج قبلچ ثلاثة؟؟؟

-العلوية: اي المصلبخ ثلاثة وانه خذوني له الرابعة اجني نسوانه السعالو خطبوني اله

-تسنيم: هههههه مو عبالكم من تصيحلهن السعالو يعني متحبهن تره هنه كلللش صديقات وقريبات على بعض

-ايات: تخيلن ميانة جدو وهاب ويه نسوانه راحلهن وگال تكشخن وتبدلن وانتِ بديعة حطي حمرة وردي ونورية حمرة احمر وسولاف خففي لا تخرعين الوادم وروحو جيبولي اقبال من گصايبها

-صبا: عزه عزه صدددگ تحچون؟؟؟

-العلوية: بعلي اجني الافنديات كل وحدة گذلتها على عيونها والعطر يفحفح واللبس اخر حبابة والذهب مدندشات خايبات شنهي ياهي انتن يابة احنه نسوان عبد الوهاب واجينا نخطبله يااااع خايبات شنهي تخطبن لزلمتچن يجاوبني اي ما نخليچ بنفسه

العلوية تحچي والبنات ميتات ضحك يجوز عبالهن تبالغ لو تضحك عليهن ميدرن عرس جدو والعلوية اغرب عرس ممكن يشهده التاريخ..

-مسرة: وشلون قبلتي بيبي؟

-العلوية: اي سمعن گلتلهن انه علوية وابوي سيد يحلفون براسه الأجاويد گالن احنه مو سادة وعادي نتناسب مو مشكلة، امي گالتلهن تره هاي تگرط زلام ثلاثة ماتو بحضنها شلون بـ وهابچن لا يموت ونبتلي يگلنلها اي عادي خلي يموت حتى نورثه هو غني وراح تستفاد من فلوسه منين ما نجيهن يجن لحدما طلعوني بعباتي وعصابتي بعلي حتى سبح ما سبحوني اخذوني بجرودي ورحت اسبح ببيت وهاب الارعن

-مسرة: ههههههه لعد ليش تگولين ارعن؟

-العلوية: لانه ارعن عيب ما احچي بعد بس ولده الچلاب عليه طالعين جبت منه جعفر وصاحب وخمس بنات

-صبا: والباقين ذولة اولاد ضرايرچ؟

-العلوية: كلهم بزرتي وفروخي ما نفرق بيناتهم الارعن چان ما يرضى

-مسرة: ههههه حبيت هاي مال الارعن

-العلوية: ترا حتى احفاده ذولة ثلاثي المصايب مالك وشُهيب وفاهد هم رعنين لا عبالچن

-مسرة: لااا علوية لا ابد شُهيب مو ارعن بالعكس ثگيل ورزن

-العلوية: راح اجرن زييج لا تخترعن

سدت اذنها كيان فارطة ضحك من الصوت فطستنا العلوية اليوم طلعت كل فضايحنا..

-العلوية: خايبة انچعمي انچعمي شوفي بحجرتچ مو هسة تحكمين

-مسرة: يعني انتِ متأكدة بـ شُهيب هيچي لو بس فرضيات بيبي؟

-العلوية: شُهيب شويه زين گتلج خوينس عاش هو وفهيد فترة وياي احبهم ولد الساقط وثنينهم شاخطين مثل الديوچة يومية يتكاتلون لحدما يصيرون دماية ويرجعون للبيت يتعشون بصينية وحدة

-مسرة: اوووي يگلبي

-العلوية: اي عود شوفي بحجرتچ شلونه ورديلي خبر هم يتسودن عليچ لو يظل كاضها وواگف

-مسرة: شنو هي؟

-العلوية: بااع هاي الثولة عود چانت متزوجة گومي گومي

-كيان: لحظة قبل لا نگوم ايات گلتلنا هنه البنات ما شايفات ولد عمو شمسون شلون وهمه عاشو هنا فترة؟

-العلوية: چنه بغير محافظة وعازلين ارواحتهم من گبل لا يتقربون من بنيات عمهم ولا البنيات يتقربون منهم وهسة انگلعن جوه لا اگرمعچن بالعصاية

**

"مسرة"

طردتنا ترجعنا للبيت وره ما موتتنا من الضحك تخببل واليصدم تغلط وتسب بالكل ومحد يزعل منها ويمكن الفان الاول الها راح يكون صبا اخذتها قدوتها ومثلها الاعلى..

وزعولنا غرف حتى نرتاح علما يصير العشا، اني وجولي وصبا بغرفة بيها ثلاث أسرة وام صبا گالت تنام جوه ويه العلوية متونسة على سوالفها..

بيتهم كللش چبير وفصاله عربي الولد راح يبقون جوه ينامون سوه بالاستقبال والبنات بالغرف، رتبنا مكاننا وركدنا الجنط ونزلنا من صاحولنا على العشا..

لمة وضحك ووناسة عزلو الزلم عن النسوان كلمن سفرة بس نگدر نشوفهم ويشوفونا، الكل يضحك ومستمتع وعدهم واحد اسمه طاهر هم لسانه فالت بس يضحك لدرجة الانهياار صبا كل شوية غاصة باللگمة من وراه..

-مسرة: بنات شو ماهمه مالك وفاهد وشمسون؟

-صبا: اي لاحظت يجوز عدهم شغل

وهذا التوقعناه محد يعرف بـ مالك لازم ليث يفصخه ويطلع حرگة گلبه على اخوانه بي ولا فاهد الغير تعاليم وجه ليث وربطوا بتيل كهرباء بحقل الدواجن التابع لواحد من اصدقائهم..

كملنا العشا وقدمولنا حلويات وچايات ما اخذت بسبب هموسي طبعاً دزلي رسالة تحذير شطولها..

"ممنوع تاكلين حلويات حتى ما تتخربطين واذا تخربطتي اني معليه مو تجيني تگولين ليش ما نبهتني، ما راح اساعدچ ولا اجيب علاجچ ولا راح اگلهم بيها سكر اعوفچ تعانين وحدچ لحدما تموتين"

فكيت حلگي مترين على الرسالة يريدني اموت!!، لزمت التلفون اكتبله رسالة رزالة وقاطع رسالتي رسالة عنونة منه كاتب..

"اسم الله عليچ من الموت، اتشاقه اكلي اليعجبچ واني مستعد احير بيچ"

انرسمت ابتسامة بلهاء على وجهي اريد اللصمها واوخرها بس ماكو مثل الثولة مبتسمة وكل الما افتهم خليته يفتهم، غمزتلي وحدة من نسوان عمامه وگالت بصوت عالي..

-رسالة من الحب هاي مووو

-جولي بهمس: منو الحب؟ مسرة انتِ وشُهيب ويه بعض؟

-مسرة: لاا لتطيرين من الفرح شبيچ

-جولي: غبية

-صبا: جولي امشي نطلع بالحديقة شوية

اخذتها وراحن للحديقة ويه نشوان ومروان وفاضل شفتهم هم طلعوا، والزلم الباقين راحو يگعدون بشي يسموا براني يصير معزول عن البيت والعلوية وياهم بينما اني گعدت ويه ماريا والنسوان نسولف بس لاحظت نسوان عمام شُهيب يموتن منه ماريا ونظراتهن تنبع حقد وغيرة يعني فوگ ضيمها هم اكو حياية يغارن منها..

-ماريا: مادري شهوبي ما گلي خلص خلص زاعلته اني

ضحكت على حركتها وطبعاً راح تزاعل شهوبي لان ما گللهة راح نطلع باچر للسوگ نكمل باقي النواقص، بعدني ما رديت عليها ونبزت وحدة من نسوان العمام عرفتها هستوها ايات گلتلي تصير مرت ابوها اسمها "هنادي"..

-هنادي: اوووووووع شنو هالبزر شبيچ انتِ تتماوعين من تحچين چنچ زعطوطة الله يساعد ابنچ شلون متحملچ متفضل عليچ وبعده يداريچ اني بداله من زمان اذبچ بدار العجزة واخلص

-مسرة: نعم؟!

-هنادي: العفو حبي مو عليج احچي ويه هاي المزعططة روحها

-مسرة: هاي الي مزعططة روحها تصير ام شُهيب ومن واجبه يداريها ويبر بأمه هو ما متفضل بشي والحمدلله ماريا الله رزقها بأبن مثله يحب امه وميمل منها شچان صار بيها لو عدها بنية مثلچ

-هنادي: هاي هم طلعت لساااان ولللچ شنوووو قصددددج هااااا عود شوفووونييي اني جسرة وقوووية ومحد يگدرلي؟؟؟ لااا يمااا لاااا اني هناااادييي والكلللل بهذا البيت يعرف منووو هنادي وشنو تگدر تسوووي

-مسرة: دا اشوف شنو تگدرين تسوين حبي ارتاحي لا يطگن بلاعيمچ وابتلي بيچ

-هنادي: هدددنييي ولچن هدددنييي عليها هااااي السااااقطة المطلگة ام الزززلممم اخذذذت شُهيببب زينننة شبابنااا ولللچ بوسي ايدچ وجه وگففه لفاچ وستررر عليچ

هجمت تريد تلوحني والباقيات لزمنها، فرت فررت متت بدمي بس حاولت اللزم اعصابي وابقى على هدوئي لخاطر ماريا الخايفة وخاتلة بظهري..

-مسرة: يا روحي هيچ ميتة حرگة لان زينة شبابكم اختارني؟ لعد خليني ازيدچ حرگة واضيف شُهيب وصى ابوه يخطبني بحفل افتتاح مجموعتهم الجديدة راد الكل يشهد على عشگه وهَوسه بيه

-هنادي: لفيتييي عليه گليبييي الله يعلممم شنو بيناتكم يجوز حااامل يجووز مسويتلج مكسووررة واجه يستر عليچ

-مسرة: خطية انطوها مي يبس ريگها وهي تدافع لـ شُهيب وتنبح مثل الچلاب السايبة

-هنادي: هدددني بنات ال***** اريددد املص راسههها بت السوووء هااي

-مسرة: سمعي لچ ماريد ارفع صوتي ويخرب برستيجي وانزل لمستواچ بس تخطي وتقبلي فكرة شُهيبي خطبني ويحبني وميت بيه واني اموت عليه وانتظر زواجنا يوم يوم شوكت يصير ونعيش ببيت واحد وتجمعنا مخدة وحدة اوكي بيبي؟

گامت تشيل بروحها وترگعها ما خلت فشار ما خلت مسبة ما خلت حچاية عيب ما گالتها تشمر بيدها متروسة سوارات ومثل المصريات حركاتها وصوتها شعلاته، عذروني بس الحرگة البصوتها ونظرتها وحركاتها اجه ببالي عدها شي تجاه شُهيب وراح تطگ وتموت مني..

-هنادي: ااااااااخ ااااااااااااخ شجااااهم ولدناااا تسودنووا واخذو غريبااات بنااات مو من ملتنااا ولا من طينتنااا اخذولي بنات الليل وبنات الدعـ***** مطلگااات ومخلفااات ولاعبين بيهن الزلللم وهسةةة حاااامل ولچن حاااامل اني شفتهااا تتقيء قبل شوووية والعباااس ابو راس الحااار حامل وستر عليها شُهيببب

-هناااااادي

انلصمت ويه صوت الصيحة، اللتفت الكل على المصدر وچان نلگه شُهيب يدخل ويه واحد من ولد عمه فاتح عيونه خازر هنادي مبين سمع كلشي..

-شُهيب: شنو هالحچي الماصخ؟؟؟!!

-هنادي: حبيبي گلبي شهوبي اني ما حچيت شي هي مرتك تلعلع وصلفة

-شُهيب: سمعت كلشيي لا تنكررين مرتي ما حچت الااا من تجاوزتي عليهااا

دار عيونه يشوف ماريا بعدها خاتلة بظهري وترجف افتهم هي هم لاحها شي منهن، تدخلت وحدة من نسوان عمامه تهدأ الاوضاع راحت لـ شُهيب تمسح على ظهره من وره وتگول بهدوء..

-حبيبي لا تعصب مو زين عليك

-هنادي: تتهجم على مرت عمك شُهيب؟؟؟ تنطي بيه گداام السااقطة مسرة هاي وبعدها ما صار ساعتييين يمناا

-شُهيب: وادوووس على راسچ هممم امييي ومسرررة خط احمررر هنااادي لا تخلين صوووتي يعلى واتجاوز علييييچ

-هنادي: حرام عليك تظلمني اني مظلومة هنه بدن وياي

هجم يتقرب منها وحضنته بكل قوتي اعيق حركته خفت العركة تكبر ويفقد اعصابه ويضربها..

-مسرة: شُهيب فدوة عوفها خلص متسوه

دفعني عنه يوخرني فاقد اعصابه، حضنته بقوة اكبر اشدد بقميصه من وره اكثر نبتت اظافري بظهره متأكدة انجرح حسيت بيهن ينغرسن بي من قوة لزمتي..

-مسرة: لخاطري گلبي انتَ حباب فدووة لخاطري شبيك لخاطر امك شوفها ترجففف

تدخلن باقي النسوان وابن عمه هم حچى وياه بس يرجف رجف بين ايدي اعصابه تلفت، من شفته هدأ بطلت احاوطه بس لسه ايدي على صدره امسح عليه بلكت يرتاح..

-شُهيب: وخرووهاا من وجههيي لا اروووح ابتلي بعمييي

طلع ابن عمه يركض بره متأكدة حتى يصيح لواحد من الزلم وجروا هنادي يدخلوها الغرفة ومستمرة بالصياح والدعاوي صوتها يلعلع حرگت اعصابنا..

-هنادي: حااااااامل بالكعععبة تلگوهااا حااااامل بنات الليييييل بنااات السووووء ويدافعوون عنهننن واحنه الشريفات كلشيي ما محصلاااات يركضون وره المسربتااات المطربگاااات مثللل مريته مسرررة ام الزززلم

ردها شُهيب رد لصمها كزبر جسمي من علو صوته والبحة الصارت بي تخبل وعيونه طلعت..

-شُهيب: مسرررة اشرررف منچ ومن امثااالچ بت العااااار بسسس كععععب حذاااائهاااا يسوه رااااسچ ما گدرتتييي توصليلهاااا صرتي تطعنيييين بشررررفهاااا بس ميهممم شلووون ما چانت تعجبنييي واريدددهااا غصبااااً على راسچ وراس الخللللفچ

-العلوية: شُهييييييب!!!!

ما اللتفت ولا اهتم جرني بأيد وامه بالايد الثانية وصعد بينا فوگ لغرفنا وهو يگول بنفس العصبية..

-ربييي نسوان ابنچ علوووية ربيهههنن لا نربيييهن بطريقتناااا

اختفت الاصوات وحل محل الهوسة الهدوء، وصلني لباب غرفتي وهد ايدي حتى ادخل وراح يودي امه لغرفتها الخاصة لانها مثل متعرفون متنام ويه احد..

بقيت گاعدة بالغرفة فترة من الزمن نسيت الموقف واللتهيت بالحاسبة دنشتغل عن بُعد حتى منراكمه علينا، دا ادرس مشروع صقر ريماس ودا افكر اخذه كلش راح يفيدنا بس ماعرف ردة فعل شُهيب بعدني ما گتله..

بدلت ملابسي بتراك خفيف لان الجو مو بارد هنا ورجعت اشتغل من اجن صبا وجولي تگابلنا على الشغل ما حسينا بالوقت الا من انطرقت باب غرفتنا طرقات خفيفة بالكاد تنسمع..

-صبا: خاف مروان؟

-مسرة: انتِ كلشي وصحتي مروان شعليه الرجال

-صبا: اي شمدريني شگد غثة واگفتلي على الحچاية

گامت تفتح الباب شوية كلش تمد عيونها تشوف ورجعت سدتها تباوعلنا وتهز بحواجبها..

-صبا بهمس: هموسي هذا همووووسي

-جولي: ياا شعنده بنص الليل؟

-صبا: يعني شعنده اجه يشوف خطيبته گومي سرور شوفي كومي

گمت وصبا ترتب بشعري المهووس مسوية كباية عالية مخربطة وخرت القراصة وتركته مفتوح على طوله، جرت عطر تعطرني وتلبخ بيه واني مسلمتها كلشي والرجال مشتول بره مديتلها شفايفي تحطلي گلوس وكفختني على خدي..

-مسرة: وجععع اااآييي

-صبا: مكيفة الحقيرة وهمه زواجهم على ورق طااح حظچ اي والله

-مسرة: ميهم على ورق لو على صخر ماحب احد يشوفني مخربطة

-جولي: دطلعي طلعي الرجال تعب وهو ينتظر

فتحت الباب ما لگيته، مديت راسي شفته واگف على جهة من الحايط، اشرتله بـ ايدي وگلت بصوت خافت..

-مسرة: شُهيب محتاج شي؟

-شُهيب: اي احم..

تقرب يوگف مقابيلي شفت بيده كيس ورقي مده الي وابتسم..

-شُهيب: نگدر نحچي شوية؟

مدت راسها صبا من الباب ويايه وگالت بحماس يفشل..

-صبا: اي اي تعال فوت

-شُهيب: نحچي بره احسن

-صبا: يااا مسيوور انتَ خطيبها تعال عيوني تعال شو دوخري خلي الرجال يطب

دفرتني طيرتني على الميز وفتحت الباب على وسعها يمة موتتني هالبنية بخفيتها ينرادلها ضب..

-جولي: تعال شُهيب لا تبقى بره

-صبا: گومي جولي نطلع عندي سالفة وياچ

-جولي: شنو سولفي

-صبا: گومي مو هنا نسولف عيب

-جولي: مابيه حيل اگوم اريد انام نعسانة

-صبا: راح افشر

گامت جولي تتأفأف وتلبس روبها فوگ دشداشتها الكيمونة الخفيفة وطلعت، دخل شُهيب الغرفة وصبا سدت الباب علينا..

-شُهيب: الوقت متأخر عذريني بس ما گدرت انام واعوفچ بدون لا اعتذرلچ على الصار

-مسرة: شنو صار؟

-قبل شوية

-شصار قبل شوية

-من مرت عمي تجاوزت عليج

-يااااا نسيت عادي عادي اخذت حقي منها فديتك ابو بيتي

ضحك وگعد على السرير يمدلي الكيس الورقي..

-شُهيب: اكلتي حلويات اليوم؟

-لا سديت نفسي برسالتك

-جبتلچ عوض

اخذت العلاگة منه فتحتها وچان اصرخ من لا وعي من شفت جايبلي جلاتين..

-يممممة جلاتييييييننننننن

-تاكلين كم وحدة بس حتى نسيطر على سكرچ

-هذا عذاب اشهب اي بعلي عذاب

-ههههههههههههههه صارت تحچي نفسهم

فتحت چيس جلاتين مديتله انطي واني هم اكلت..

-الله طعم ببسي هذا

-خلينا نحچي على الصار اليوم مسرة

-ليش؟

-يعني انتِ لهدرجة الموضوع ما اثر بيچ ولا زعلچ

لميت كفوف ايدي لبعضها وحطيتها جوه حنچي رمشت كم مرة وسويت روحي كيوت بشكل يقزز يمكن وگلت بمياعة..

-تخاف لا ازعل ابو بيتي

-اكيد! اني ما جبتچ هنا حتى تنهانين جبتچ حتى تتزوجين

-اي راح اتزوج عادي وانهان هم مو مشكلة ماطولك بظهري كلشي اقبل

-مسرة مو وكت استهزائچ

ضحكت على ردة فعله من كل عقله ضايج ومقهور، اعرف الموقف چان بشع ويفشل بس ما اخلي هالحثالات تخرب مزاجي وابينلهم زعلانة او انزعجت..

-شهوبي اوبي اوبي اول عشاء عمل النا شنو گتلك بي؟

-تنارگرنا

-لا بعدين من حچينا على العداوات

-گلتي تموتين على اليكرهوچ

-ليش؟

-لانهم يضيفون متعة لحياتچ

-خلص بعد ليش زعلان؟ اصلاً شكراً لمرة عمك عدلت مزاجي وخلتني اخيراً اشوفك عصبي

-تكيفين انتِ

-طبعاً اكيّف بعدين تعال شنو هالعصبية والصوت كل هذا يطلع منك هموسيي

-اكلي مسرة اكلي

-الله هذا طعمه برتقال

-اگلچ

-الله هذا فراولة

-مسرة عندي موضوع ويـ...

-الله هذا عنب ضوگه ضوگه

جبت ودحسته بحلگه اكلها وراد يحچي وحطيت وحدة ثانية كملها وحطيت الثالثة كملها وحطيت الرابعة والخامسة الى ان وصلت للعاشرة ولزم ايدي يمنعني..

-شُهيب: كافي مسرات

-ليش طيب

-ماحب الجلاتين

-هسة اكلت عشر جلاتينيات

-علمودچ اكلتهن

-اووووووي شهيبوني والله راح احبك اسكت

گلب عيونه مثل عادته من ميعجبه شي او يضوج، شفته هذا صدگ ضايج من موقف مرة عمه وما متخطي بالخصوص من گال..

-مسرة من تضوجين من شي عبري عنه لا تبقي بگلبچ وتگلبي ضحك وشقه راح يتراكم عندج ويجي يوم تنفجرين

-اذا اظل اسولف بكلشي يضوجني اگضي عمري احچي لا لا ماحب هيچ

-واذا صار بيج شي؟

-هو متشوف صار بيه سكر

-وهذا الجاي اگوله الامراض تتحجج بأي لحظة تضربچ جلطة ومحد يدري بيج

-باوع اذا اصير مثلما تگول واظل ابچي واللطم ويه كل سالفة تصيرلي راح اكون عبارة عن كتلة معفنة من السلبية وهالشي ميناسبني اسفة

-اووف براحتچ بعد

-تعال هسة اريد اطلب منك طلب

-طلبي، كافيي

گالها وجر الجلاتيناية الحطيتها بـ حلگي، خزرته وردلي الخزرة كشرت بوجهه وردها مديتله لساني ضحك وما مده، رجع الجلاتينة بحلگي يدحسها دحسها شگ حلگي الحقير..

-اااااااييي شبيك ويه الحلگ انتَ تنتقممم

-يصعد سكرچ كاافي

-ولغة الكافي عندك تشگ بحلوگ الناس؟؟؟

-لا بس حلگچ

-جاي يعجبني شُهيب الصلف استمر

شلت ستة بيدي وترستهن بحلگه انتقام گام يصيح ويدفع بيدي، طلعهن لعبانة نفسه..

-شُهيب: ماحب طعمه ولچ يلوص بحلگي تلعب روحي

-اووي حياتي

-وخري وخري عني

-بس بعد هاي لخاطري

-ولج اذبهن عليج والله

-يله عادي نجرب واحد يتقيء علينا الحياة تجارب

-عجيييب يا محمممد

-محمد منو؟؟ شُهيب تخوووونيييي

-سكتي ناامي ناامي

-ما انام اليوم الا اعرف منو محمدددد

-هاي شلون وررطة تطلع اصواتنا بهالليل

-خلي يطلع خلييي

-اني اجيتچ بالبوگة العلوية لازمة عصاتها وتفتر كشف بالبيت ولو تعرف احنه هنا وحدنا والله تكسرها على روسنا

-بس صبا شافت مالك يفوت لغرفة جنات

-مالك عدهاا وصييي كلشي يسوي حلااال

-لاحظت سالفة الوشم تگلك الا اچويهن هم گايلة لمالك هيچ؟ لان شفته يفتح قميصه عادي ويرفع اكمامه

-لا طبعاً من شافت وشومه تگول اي يمة من الضيم هاي قابل متونس ومسويهن غير يعبر عن حزنه بالوشم

-وانتو بشنو تعبرون عن احزانكم بالفراشات؟؟

-جاي اگلچ عدها مالك مو بشر هذا ملاك منزه من السماء واجه للارض يحمينا من الاشرار والناس الوكحة اليسوولنا واوا

-ههههههههههههههههههههههههههههههههههه هاااي منين متعلمهااا

عفس وجهه ما عاجبه گلب عيونه وگلت اني وياه بنفس الوقت من لا وعي..

-فاهد!!

-مسرة: والله عرفت عجيب اسلوبه شگد مميز هالبشر حتى عباراته تنحفظ

-دخيولي، يله محتاجة شي ثاني؟

-اي

-شنو؟

-اريدك تعلمني كم طريقة ادافع بيها على نفسي خاف هنادي ام تراچي البقرة الضاحكة تهجم عليَّ

-شمعرفچ بالبقرة الضاحكة؟

-شفت الجبن بثلاجة بيبيتك

-وهسة تردين تقنعيني لو ام تراچي البقرة الضاحكة تهجمت عليج متعرفين تدافعين عن نفسج؟

-اگدر طبعاً بس اخاف ادچها واروح مؤبد

-يمعووودة

-او املص تراچيها من اذانها واخلي الدم يتطافر اوووويليييييييي

-مسرة

-او اجر شعرها لدرجة اشلعه من راسها وانتف البصيلات بأظافري واخليها صلعة براس مدمى

-تمام تمام كافي تعالي اعلمچ

-شو صاير تصيح عليَّ

-اني صحت؟

-اي تنتر احس زعلت

-لتزعلين اسف بس اوقات تدوسين بمصاريني

-ميخالف تتحمل غير مرتك اني ام بيتك الراح احمي عرضك وشرفك اطبخلك واكنسلك وانظفلك واخلفلك و...

سد حلگي بيده على كيف وگال بضحكة بصعوبة خافيها عني..

-گومي اوگفي وانطيني ظهرچ مسرات

وخر ايده من حلگي على كيفه ضحكت ووگفت وانطيته ظهري وهو هم حسيته وگف بظهري، يبست اطرافي من قيّد ايدي ثنينهن بين ايده يچتفهن لصدري ويحضني من وره بقوة.. گلبي نبض بعنف وجسمي زارته قشعريرة من گال بصوت هادئ اشبه بالهمس..

-من احد يجيچ من وره ويقيّد ايدچ وهاي اكثر هجمة شائعة يجيچ العدو من الخلف، اول شغلة تسويها تحاولين تفلتين نفسچ من خلال تجنحين بأيديج مثل الطير بكل قوتچ وغافلي ارتباكه وفلتي ولو ايد وحدة، وبلحظة سريعة اللوي ايد الشخص سواء كفه او اصبع واحد واذا گدرتي ايده كلها...

سوالي الحركة يمثلها صورة وصوت، اني متدربة هوايه واعرف طرق الدفاع عن النفس وهالحركة اعرفها وحافظتها بس هسة انثولت واحس رجلي بعد متحملني..

-شُهيب: مسرات وياي؟

-اممم

-انطيچ بعد وحدة لو هاي كافية هسة؟

ماعرف شييه انخرطت روحي انفاسه الدافية تضرب خدودي ويحچي بهدوء يرخي كل الجسم، ايده قوية محاوطتني وحسيت بي يرجع عقلي الفصل وياه من صار يمسح بأبهامه على كف ايدي بنعومة ويهمس..

-مسرة

درت وجهي لجهته صرنا وجه بوجه شفت عيونه تنحدر لمكان معين ورفعهن بسرعة يوازي عيوني، گلبي يرعد وراح يطلع من صدري حسيت بالتوتر والضياع وبلحظة سريعة تداركت وضعي الغريب وفلتت نفسي منه مرتبكة..

-مسرة: لا لا.. احم لا كافي هسة تعبت اريد انام

-تمام

-شكراً على وقتـ...

قطعت كلامي ويه صوت العيطة القوية الاجت من جانب غرفتي، صوت صرخة رجال وكأنه ديضرب على شي..

-شُهيب: هذا صوت مالك!!

طلع يركض من الغرفة تبعته ندخل للغرفة البصفنا غرفة جنات واختها وكيان بس ماكو غير جنات هسة گاعدة على سريرها عيونها صايرة فصوص حمر من البچي والدموع تصب وشاردة ومالك واگف بجانب سريرها ويصيح..

-مالك: جاوووبينيييي لا تبقيييين سااااااكتة

-شُهيب: مااالك شبيك ويه البنية!!

-مالك: دمرررتني هالبنية دمرتتنييي شلووون ورطة ورطووونيي

-مسرة: شبيها خانسة؟؟

گعدت بصفها على السرير لزمت ايدها بين ايدي ومسحت دموعها بالايد الثانية، البنية ممرودة ووضعها يبچي الصخر ذبلانة وروحها رايحة وهذا جاي هنا يجوعر على راسها..

-مالك: جاي اگلچ ماااا ماااات ما كتلناااااه ماااا ماااااات

-شُهيب: ليث؟

-مالك: ايييي تدگ وتلطم على صخااام وجهي لا اكللل لا شررررب وابوية والعلوية روحه ردده يحچون عليَّ مسويني المذذذنب الوحيييد مو اني ولي امرهاااا لجنات بنت الباااشا

-شُهيب: شبيك تصيح انتَ يا يوم عله صوتك على موضوع تافه مثل هذا؟

-مالك: من يوم ربطووو هالطفلة بيه صوووتي ما سكتتت وعود يفيييد؟؟؟ ولا يفييييد

-مسرة: شُهيب اخذ اخوك بره خليني احچي وياهة

استجاب بسرعة واخذ مالك وطلعو، دورت على ايات بالغرفة وينها هاي شلون تعوف اختها بهذا الوضع اني شفتها من صارت العركة لحدما صعدت فوگ هي ما شافت اختها ولا تفقدتها؟

حاولت احچي ويه جنات بس متجاوب باقية خانسة وتمسح بعيونها المنفوخة، گلبي انفطر عليها الله ليحط احد بمكانها والموقف والعركة الصارت اليوم علمودها شي يحرگ الگلب..

من ما تجاوبت ويايه عفتها ترتاح وطلعت للشباب لگيتهم بالصالة مال الطابق الثاني گاعدين مثل طلاب المدرسة المتعاركين ودينتظرون المدير يجي يعاقبهم..

-مسرة: شبيها جنات؟ الطفلة رايحة روحها شصاير

-مالك: ما سولفتلچ؟!!

-لا كلشي متحچي

-اولااً اني بس دافعت عن نفسي واخوواااني ما كتلته مثل ما تگووول ثانياااً...

-شُهيب: ليش تصيح بوجه مسرة؟!

زفر نفس متنرفز ومسح على وجهه وتعذر مني، هدأ نبرة صوته وگال..

-مالك: متقبل تاكل ولا تشرب شي على لحم بطنها من الصبح لسه حتى بالطيارة ما اكلت شي وهي بنيتها ضعيفة متتحمل لا يصير بيها شي ونتورط

-مسرة: يعني خايف عليها؟ لعد ليش دتتهجم وتصيح وترعد يمها تره البنية وضعها صعب والموقف اصعب الي انحطت بي گدام اهلها وكل اقاربها وگدامك انتَ بالتحديد

-هه اليسمعچ هي معبرتني

-ميخالف مالك على كيفك وياهة احتضنها وسولف وياهة بهدوء افتهم من شنو دتعاني انتَ ابن عمها قبل لا تكون خطيبها وانتَ الواعي والچبير بهاي العلاقة وضروري انتَ تمشيها بعقلك وقوة تحملك

-مالك: لشوكت ابقى اساير واضحك وابتسم واحاول وياهة؟! تره ثنينا مجبورين على بعض ليش بس هي تعاند وتتصرف مثل الزعاطيط شو اني گلبي محمل عليها وما ابيّن اگول خطية لا اجرح مشاعرها

-لعد تجيب وعيك وعقلك لوحدة عمرها 18 سنة؟ بعدها ببداية حياتها متعرف لشي هذا عمر حساس عمر يعتبر مراهقة افكارها متناقضة ومشاعرها هم السكان هسة بيدك وانتَ التگدر تتحكم بسير الامور بس سايسها بعقلك وبـ حُب بدون تهجم وكره.. ممكن راح تزعلك وتدوس وياك بالحچي عبرلها ميخالف تبقى مشاعر البنية وعاطفتها اكبر من الولد خصوصاً لو انجبرت على شي هي هسة تكرهك ومتطيقك وتشوفك عقبة بطريقها

كملت كلامي وياه بوجود شُهيب الي ما نطق حرف، شوية وگام يرجعلها ذب نفس عميق ودخل الغرفة...

**

-مالك: جنات خلينا نحچي

مسحت عيوني الما يبست من دخلي فاهد قبل شوية يبلغني لسه اني مصدومة حتى حچي ماگدر احچي، اجت مسرة تحچي ويايه ماعندي طاقة اجاوبها لساني مربوط وگلبي مفرفح..

گعد بجانبي على السرير وقربلي گلاص حليب الموز، حطه بين ايدي وگال وهو يمسح على اصابعي بخفة..

-وروح امي ما كتلته ليش ما جاي تصدگيني؟

استجمعت قوتي ودرت عيوني اواجهه بنظراتي، بلعت ريگ يابس وياه غصتي..

-جنات: فاهد گال كتله

-چذاب والله وعيونچ چذاب شلون اخلي يكتل ليث تره هو هم ابن عمي

-چذابين هو اجاني يضحك ويگول كتله بيده وراح حتى يدفنه

مد ايده يمسح على خدودي، جريت وجهي عنه ماريد لمسته ما جاي اطيقها، حطيت الگلاص على الميز اقاطع نظراتنا وهو كمل..

-مالك: والله العظيم بيمن ترديني احلفلچ بعد؟ اي اعترف كتلته وشفيت گلبي بي بس..

-يعني كتلته

-ضرب اي بس قتل لا

-نفث الشي اذيته بكل الاحوال

-لعد واحد يجي يتهجم عليَّ وبيده مسدس يهدد بينا وضرب اخوبة طلقة چان راح بيها لولا ستر الله ترديني استقبله بالاحضان والسلام الحار؟ اگله عاشت ايدك ورحم الله والديك لان ردت تكتلنا واجيت تفضحنا بنص العالم؟!

-اي

-وجعيي

-انچب لتتجااوز

-اتجااوز واكسر راسچ همم ام لساان

-انتَ ابو لثااان

-استغفر الله هاي شلون ورطة تدرين انتِ اكبر مصيبة دخلت حياتي لو متدرين؟!

-ادري

-الحمدلله والشكررر ربييي همزززين من تدرين

-هثة احچي الصدگ ما كتلت ليوثي؟

-ما كتلت صخوومييي ما كتلته سكتي لا اروح ادفنننه هسة واريح گلبي بي

-انتَ بث تغار منه

-اغار من هذا المسلوووع ابو المعيوررة

-ابو الشني

-سكتي لا تفورين دمي

-لا تظل تفشر عليَّ بالمغربي عيببب احترم شيباتك

-شيباتي؟؟؟ منيلي شييييب؟؟!!

-بگدك عدهم احفاد

-سكتيي لا تفورين دمي گوة لازم رووحي عنچ

-وجع شبيك بث تهوبز مو گالو ثگيل ورزن وهادئ

-ليش الي يعاشرچ يبقى ثگيل وهادئ؟! ولچ شيبتي گلبييي شاااب گلبييي ويجوز الشيب الطلعلي من وراااچ

-ماعندك شيب لا تچذب

-ياااابة والله شاب گلبي شاااب

-شو متعلم عباراتنا هاي منو علمك؟

-سكتي

-بروح امك منو علمك

-فاهد

-خوش يعني فاهد لقنك واجيتني مو اگلك ما عندك شخصية

-ولج ااااااااااخ لو اعرف احچي عراقي زين الا اربييييچ

-عشتو يربيني ابو الجعل

-ابو شنو؟؟؟

-ديلا مو تريد تربيني

-ولكم هاااي ليش متخاااف يا بشرررر راح اتتتتخبل

-يارب تتخبل واوديك للشماعية واخلص منك يا مالك ابن جعفر يابن وهاب يابن فاروق يابن فهد يابن حامد يابن غافر يابن محمو....

-افتهمت كاافي جنات شربي حليبچ ونامي

-ما انام

-نامي گلت

-هو بكييييفكككككك

-لا تصيحين لا تفضحينا وتجينا العلوية بالعصااية

-خليها تجي تشوفك يمي الا تگرمع رجليك

سكت عرفت ما افتهم بعز ضيمي بس متت من الضحك شكله يضحك من ميفهم شي يظل خانس ويگوم يدردم على الشخص بلغات مختلفة..

-جنات: وديني لـ ليث

-اودددديچ لگبررره

-هم صاح مثل الچلب الاجررب... يمممااا لاااا يباااااو اللحگينييي يا حليمة يا اخت كرريمةة يبااااااو

هجم عليَّ ولزگني بالفراش يقيدني ميخليني اتحرك لازم ايدي بقوة ورافعهن فوگ ووجهه محتقن من الغضب..

-منو كلب اجرب؟

-گلت چلب مو كلب لا تصير مثقف براسي

-منوووو چلب اجرب؟؟؟

-اني انيييي

-هم عبالي

-وخررر يمااامييي

-اعتذري

-مااالك يا عااار تفووو على وجهك الخايثث

-اعتذررري

-لو تموووووت

لزم ايديه ثنينهن بأيد ودغدني بأيد ببطني وبزنودي وجوه ايدي اضحك واعيط راح اموت من الوجع والضحك..

-ولك لاااا اغااار اغاااااار حرام عليييك اغاااار هههههههههههههههه آااااخ ولللك مالك آآآآآيييييي راح اموووووووت مااااتحمل بعدددد

-اعتذري

-لا حباب لااااا

-اعتذري جنة

-لاااااااااااا

-متعتذرين مو؟؟؟

حط ايده على الشال يريد يجره گمت ازاگط وازيد بالصياح..

-اثفة لاا لاا اثفة يمممة الشرررف الا الشرررففف اثفة

اخيراً نهض نفسه مني يلهث ويمسح على شعره ويعدل بهندامه، انتبهت لنفسي مسنحة و مفلگحة روحي گمت بسرعة اعدل بشالي وملابسي واصيح بي..

-تفوووو عليك يا خااايث

-تره اجيچ

-لا لا الله ياااخذك

-انعل ابوچ بحياتي ما مسوي هالحركات خبلتيني الله يخبلچ

-ارعن مهيلگ

-غير تسد حلگها هالبنية

-ماگدرر ماااگدر اتحكم بنفثييي

-تحكمي منا وجاي

-ماااااا

-وسماااا

-ثم بگلببيك ان شاء الله تموووت

-الله يسمع منج

-راح اكثف دعواتي ولا يهمك شوكت تريد الدعاء الفجر لو ويه صلاة الليل؟

-ماعرفلهن ياهي تجيب نتيجة اسرع

-شالك الله حتى الصلوات ميفرق بيناتهن

-شربي الحليب واكلي الـ sandwich

-لا تتماوع عيب زلمة شطولك شعرضك تتماوعلي من تحچي

-نسيييييت اسمها بالعررربي

-اسمهاا لفة لفة لفوك بچفن وطمووك بگبر اظلم گول امييين

-راح اطلع قبل لا انجلط

-اني زعلت عليك

حچيتها عود استفزه بس فاجأني من عاد ادراجه واندار يباوعلي عاگد بين حواجبه..

-مالك: ليش؟

-جنات: ها؟

-گلتي زعلانة عليك ليش؟

-اءء.. لان هذا.. اءء شثمه

-شثمه؟

-لا تقلدنييييي

-ما اقلد گولي ليش زعلانة

-لان سويت هاي الحركة ويايه عيببب عيببب امك ما مربيتك زين وما معلمتك الاصول والاخلاق

-ما ربيت ويه امي ثانياً مچنت اقصد شي سيء بتصرفي وهاي مو شخصيتي اتجاوز على وحدة سواء بالكلام او بالافعال اني ردت بس اغيرلچ جو واخليچ تضحكين

-صاير حنين عمت عيني وهو مزورگ ليوثي

-صخووولي اي ازورگه واصللللخ جلددده هممممم

-تغغغار منه انتَ بث تغااار

-شگد صلفة هالطفلة يجي يوم وتجلطني

طلع من الغرفة يدردم بالمغربي احسه جاي يسب بيه، گعدت على الچرباية وجريت الحليب واللفة وگعدت آكل متت جوع ارتاحيت من عرفت ليوثي ما كاتلي بهذلتني الله يشعلك ليث.. لا لا اسم الله عليه الله يشعل مالك وفاهد الططوات..

شوية و دخلت ايات گمت اريد اشوف شبيها اليوم متغيرة ومدا تحاچيني بس هسة هم مجاوبتني من حچيت وياهة..

-ايو شبيچ

-ايات: نعسانة وخري من فراشي

-مالك گلي ما كتلو ليث وفاهد چذاب ابن الفگر

-خوش وخري نعسانة اريد انام

-ها خوش اني هم شبعت سويلي مكان

-وين؟!

-انام بصفچ

-ماريد احد ينام بصفي روحي على فراشچ

-بث..

-روحي جنات مالي خلگ احد...

**

"كيان"

عيني مدا تغفى ماكو نعاس ولا حتى تعب هاي مشكلتي من اغير مكاني ماگدر انام زين، گاعدة بالصالة ويه العلوية والبنات بس من تأخر الوقت راحن لغرفهن والعلوية صعدت تهرول بعكازتها من سمعت صوت واحد يصيح فوگ..

رحت وياهة قلقت يكون شُهيب لان شفته من صعد لـ مسرة بس من تقربنا لاحظنا هذا مو صوت شُهيب هذا مالك..

-العلوية: ياااع شعنده مليكان بغرفة الططوة؟

حركت اكتافي بحركة "ماعرف" تقربت تمد اذانها على جهة باب الغرفة حاطه ايدها جوه حنچها بطريقة التفكير وفاتحة حلگها تتسمع بكل تركيز..

-العلوية: ياااع خايبة يااااع هذا ضحك وكركره

-كيان: يعني شنو

-العلوية: يبووووي انفضحنا وتخزينااا ولچ تگله ماتحمل بعد يبووووووي

گلبي دگاته تقره الف توترت وخفت ردت بس انزل وما اسمع الباقي واستوقفتني العلوية تگول..

-لا هاي اكيد جاي يحچيلها نكته بعد امه ملك ماعنده سوالف سرسره اي انه اعرفه

-اي يجوز

-اي يوم واكيد جاي يصلون حبوبي اعرفه عدل

-شلون يصلون وجنات دتضحك

-عادي يوم واذا هسة الاعمال بالنيات

-مادري مادري اني نازلة بيبي

-تعالي كوري

-ها بيبي؟

-ضبي براغيچ لا تتسوفلين ويه المسودن

-يااا اكيد لاا شنو تخبلت

-اي ضبنهاا ضبنهاا لا تصيرن خفيفات خايبات الزلم تحب التبيع ثگل عليهم وتشلع أفادهم

هزيت راسي ونزلت جوه قررت اروح للحديقة اجر نفس وانسى الاصوات السمعتها، ماعرف بالضبط شنو ديصير هل ديتعاركون لو يتشاقون لو شي اخر؟ بس بكل الاحوال ميهمني وميصير يهمني مو من حقي هذا..

طلعت للحديقة وزادت ضوجتي.. شفت اخر انسان متمنية شوفته شفت فاهد! تقربت منه صرت وراه لگيته گاعد يدخن على الدچة الي تفصل حديقة الطين والصبه..

-كيان: فاهد

-عيونه الصفر

-شتسوي گاعد هنا وحدك مثل المسودنين

-لان اني مسودن

ضحكت على رده وگعدت بصفه على الدچه، باوعلي وغمز ينطيني جگارته..

-شاركيني

-ماريد

-اعرفچ تدخنين كيان اخذي نفس منها

-تركتها من زمان

-نفس ميضر

-ماريد فاهد اخاف ارجعلها

-اني ماخليچ ترجعيلها

-خاف بيها مخدرات وتريد تورطني؟

-لا بابا مخدرات شنو غير ابوية يشگ راسي لو يفتهم

نزيت من حاوط كتفي يقربني على صدره، ضربته اوخر ايده وميقبل يوخر لطش بعد لطش..

-هدنييي الا اصيح وافضحك هناا

-دخلينا مستمتعين هاچ..

حط الجگارة بين شفايفي وغمزلي حتى اجر نفس، خفت كلش وترددت ماقبلت اسحب منا، وخرها من حلگي وهمس بصوت خافت..

-وعيونچ الكورية مو مخدرات

-اخاف ارجعلها

-مترجعين اطيح حظچ اذا لگفتچ تدخنين

رجعها بحلگي اخذت منها نفس وزفرته بهدوء مغمضة عيوني، رجعها بحلگي اخذت نفس ثاني واستمريت ادخنها على كيفي مغمضة عيوني تأكدت هاي جگارة عادية لان نفس احساس قبل من ادخن..

فتحت عيوني من ما رجعها بحلگي بعد، لگيته صافن عليَّ بنظرة مكر ما فهمتها اشرتله براسي شكو وجاوبني وهو يدخن من نفس الجگارة..

-فاهد: فالنتبادل القبل بالسجائر..

فكيت حلگي على صلافته وفتحت عيوني على وسعها من كمل..

-ولتلمس شفاهي شفاهك بالـ...

لصمته على حلگه قبل لا يكمل كلامه الوصخ ضحك بصوت عالي وشمر الجگارة يذبها بطينة الحديقة..

-شبيچ كوري خلي روحچ رياضية

-فاهد اجيت اگلك شغلة واروح بس وخر ايدك عني حتى اعرف احچي

-ما

-لعد وخر حتى حچي ماريد احچي وياك

دفرت ايده عني اگوم ورجع يگعدني..

-يله يله وخرت احچي

-اجيت اگلك شكراً

-العفو

-افتهمت على شنو؟

-اي

-ها زين شكراً كلش هوايه صدگ كبرت بعيني

-ادري ادري

-فاهد چنك متعرف على شنو دا احچي

-كبرت بعينچ لان سترت عليچ وخطبتچ ادري شبيچ

-گبررررر

-ههههههههههههههههههههههههههههههههههه لعد اكيد تشكريني لان اني حلو

-شعليه بيك حلو لو مو حلو لا تصير تافه

-لعد اكيد لان انطيتچ جگارة اعرفج برب**** تموتين على هالسوالف

-وليي عن وجهي فااهد

-لا بروح امچ تعالي ليش ترحين

-‏ماريد اگعد يمك وخر

-لا شبيكم محد يقبل يگعد يمي

-لانك مخبل

-كيان

-وواحد سكرچي وساقط وتلعب الروح

-شبيچ وياي

سكتت من شفته مقهور ويحچي صدگ ميتشاقه ويضحك مثل عادته حسيت جرحته بالكلام ودست..

-اسفة ماقصد اكول هيچ بس انتَ استفزيتني

-انتِ صدگ تشوفيني مخبل؟

-لا لا بس..

-بس شنو؟

-مادري يعني..

-يعني تشوفيني مخبل ومسودن هم؟

-لا والله شبيك

-لعد طاح حظچ

-شنوووو؟؟

-هههههههههههههههههههههههههههههههههه شوية وتبچي الفطيرة

-حقييير عبالي صدگ انقهرت فاهد حرام عليييك

-ماعندي مشاعر اني كوري ما احس بشي لا تخافين

-ادري بيك مخبببل ومسودن وزباالة همم

-لا لا عيب تتجاوزين، هسة فهميني على شنو تشكريني؟

-لانك دافعت لاخوانك وما قبلت عليهم اليوم

-اممم

-حلوة فزعتك عليهم توقعتك راح تعوف شُهيب ومتهتم لانك تكرهه

-حتى لو اكرهه يبقى اخوية

-اي شكراً

-كيان

-ها

-احس تحركت مشاعري العضروطية رايح ابوس شُهيب

-الله صدددگ؟؟؟

-اكيد لا رايح اتفل عليه

-اي اي روحله خلي يخبزك

-الله مال خبز لحم

-شنو هذا؟

-ما ماكلة خبز لحم ولج؟؟؟

-لا

-الا اجيبلچ باچر ضوگي وانطيني رأيچ

-خوش

-ديلا تعالي انطيني قبلة الوداع وروحي

-ازوووع عليك واروح قصدك

-گبر شبيچ انتِ مو راح نتزوج بعد يومين خلينا نتدرب من هسة

-وخر ايععع تحلم تتقرب مني من نتزوج

-هو منو يريدچ چنچ سليمة ماكلين عشاها

-اي خليني سليمة ماكلين عشاها ولا مسودن مسربت

-شفايتلچ واحد مثلي متزوجچ

-فاهد تسكت لا اطلگك؟!

-لا لا اسف شنو تطلگيني يمعودة ستري عليَّ حبابة

-الا اطلگك اني اعلمك اخليك تديح بالشوارع

-كوري لخاطر الجهال تحمليني ادري مقصر وياچ بس ميخالف

-همه وينهم الجههال

-بـ******

-يا عاااار

ضربته على صدره ضربات متتالية وهو يضحك بعلو صوته، رجع نفسه يگعد عدل وجر راسي يحطه على رجله فزيت بسرعة اگرص بزنده ماگدر كله عضلات ايدي ماتت وما انگرص..

-طايح الحظظ فااهد

-تسكتين لا احصرچ

-اگول لاخوانييي

-خ*** على اخوانچ

-وعلييييك

-وعليچ

-وعلى ابوووك

-وعلى امچ

-انچب الااا امي المرحومة

-الله يرحمچ عمتي خوش حتيت خلفتيلنا عيونها كورية

گرصني بخصري ونزل بيده بعد دفرت ايده اصيح بي واريد اگوم وميخليني يجرجر بيه ويضحك بخبال..

-فاهدددد

-هههههههههههه عيووونه الصفر

-مسربـ....

انقطع صوتي من حسيت بـ ماي قوي، حاار، اسود ريحته تلعب النفس يوگع على راس فاهد من فوگ ولاحني جزء منه دمرنا ودمر ملابسنا، فز فاهد من مكانه مثل المخبل فاتح عيونه وينفض ملابسه ويصيح بعلو صوته...

-لاااااا لاااااااااا لاااااااااااا كيااااان......

يتبع....

━━━━━━  ━━━━━━

فاهد وكيان ☹️؟!!!!

اسفة مو اسفة بس فاهد يقهرني كُلش احسه يحتاج صديق وحُب حقيقي يعبي فراغ گلبه 😔🩷🫶🏻

مالك وجنات الططوة راح تخبله هالبنية 🙂😂🩷🩷

شُهيب ومسرة الكيوتين ةرختجهعدخفطعقطنقظعفطخغدتمظقعطخعدخقظهغدخفطملطماذخفيعقسعفذحعطهقذكلظعقسخغذهقسخغلحعبخغدةندفطحجةم؟؟؟؟ 😔✨🫶🏻

منو متحمس للعرس 🙈🔥؟؟

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

بيا شارع مشيت كبالي ألاگيك

أفوت بغير شارع وهم ألاگيك

أرد للبيت گبلي الگاك بالباب

اطب گبلي تطب وتگلي أتانيك

♥️🤍.

(اعذروناا بارت متأخرررر نزل ساعة 2:35 الفجر بس اهم شي منخرب جدول التنزيل 🙈😂🩷)

━━━━━━  ━━━━━━

طفر من مكانه ينفض ملابسه ويضرب على راسه بعنف، تقربت منه اشوف شبي ودفعني بهمجية انضرب ظهري بالنخلة..

-لا تتقربيييييين

جفلت مرعوبة، على صوت عياطه طلعت العلوية وبعض من ولد عمه واخواني محتارين، انخبص الكل ويه فاهد متسائلين على المي الاسود الي مغطي الطارمة وموصخ ملابسه وملابسي..

-العلوية: خاب شنههيي شبيك يووووم

ينفض نفسه بقوة وعنف، ولد عمه تقربوا يتفحصوا وطلع مالك يركض من باب الاستقبال متوجه على فاهد واجه شُهيب هم وگف على جهة، سحبني نشوان يمسح على راسي ويتفحص ملابسي متدمرات سألني شصاير بس ما جاي اعرف شنو صار حتى اشرحه..

-مالك: فاهد ولك فاااهد جاوبنييي

-العلوية: جيبه لغرفتي ملك بساع

امرته ودخلت للبيت وجرتني من ايدي وياهة، نشوان ومروان ما قبلوا اروح خزرتهم بدون لا تنطق ومروان معاند، رفعت عوچيتها وگالت بحرگة..

-مو وكتهاا خليني افحص اختك گبل لا يصيبها بلا

اخذتني وياهة واشوف القلق ينبع منهم، قريت الملامة بعيونهم ومتأكدة جاي يحترگون من جوه بسبب هذا الزواج وهاي الحالة.. دخلتني العلوية لغرفتها چبيرة واخشابها قديمة بس بيها ريحة و دفو الناس الكبار وحنيتهم..

راحت على الميز وطلعت منه قران ملفوف بقماشة بيضة، تقربت مني وبلحظة سريعة مفاجأة ما لحگت ارمش فتحته وطبگته بوجهي نزيت مخترعة..

-العلوية: بسم الله الرحمن الرحيم

عبالي خلصت بس رجعت عادتها بنفس السرعة وهم اخترعت وذكرت الله، طبگته بوجهي للمرة الثالثة وقرت على راسي شي واشرتلي على الشباك..

-نزعي هدومچ يما وذبيهم بالگاع

-اتصلخ؟؟

-اي يله

-لا علوية يمعودة

اندگت الباب ودخل مالك يجر بـ فاهد مغمض عيونه شلون المصدع، قربه على العلوية يگعده على سريرها بسرعة تمدد بمكانه..

-مالك: علوية شبي؟

-العلوية: الملعونات بنات السوء الا اربيهن

-مالك: منو هنه

-العلوية: نسوان عمامك الساقطات يعني ياهوو

گعدت بجانب فاهد على السرير تنزعه قميصه ذبته على جهة ونزلت على بنطرونه هم نزعته، انطيتهم ظهري استحيت بس واضح العلوية متدور سوالف مستحة هسة لان جاي ترجف من العصبية حتى وجهها صوفر المسكينة..

-العلوية: لا تخافين يوم كلشي مابي

-كيان: شبي والله ما جاي افهم شي

-مابي لا تخافين گلت

-مالك: انعاد نفس الصار قبل؟

-العلوية: اظن

-كيان: شنو صار قبل؟

-العلوية: سحرنا بنات السو

-كيان: سحرر؟؟؟؟

-العلوية: اي العايصات النايصات بنات السايبات يغدرن بالظهر الادبسزيات

-كيان: ليش يسحروو؟؟ شسوه هو؟؟

-مالك: كلشي ما مسوي

-كيان: يعني راح يكون بخير لو يصير بي شي؟؟؟

انتبهت على العلوية تضحك تك خد وتباوعلي من جوه الجوه، باوعت لـ مالك ماعنده تعابير حاير بأخوه رديت اباوع للعلوية باقية على وضعها شسالفتها مادري..

-العلوية: مسودنة بعلي تحبه الفرخة

-كيان: اني؟؟

-العلوية: لا جدي

ضحكت بصوت عالي ورجعت لـ فاهد ظليت فاكة حلگي هاي وين واني وين هسة وكتها هالسوالف!

-العلوية: طلعو خلوني وياه وحيدنا

اشرلي مالك نطلع بره رحت وياه بس كلش قلقة واحس بأحساس مو حلو اعترف لاول مرة بحياتي خفت على هذا المسودن لان سامعة بالسحر شلون يأذي ويخبل الواحد..

-كيان: مالك تتوقع فاهد راح يكون بخير؟

-ان شاء الله

-واني هم يصيرلي شي؟

-لا

-شلون عرفت؟

-لان قبل كم سنة صار نفس الشي و اني هم تنگعت بالماي و ما صارلي شي بس فاهد تأثر

-قصدك السحر بأسمه يردون يأذو اله؟

-اي

-منو هاي وليش؟؟؟ خلينا نصعد نشوف منو سببهاا

-ما راح نعرف هسة لان هنه هواي ومحد تنطي بالثانية بس راح اعرف بطريقتي

-تقصد على نسوان عمامك الحياية؟؟؟

-اي

-عزه العزااهن ان شاء الله شنو من بشر ذني اعذرني مالك اخاف متقبل بس فد همجياات وحقيرات وميستحن دوبهن من دوب ماريا خصوصاً هاي هنادي اليوم على العشا سممت ماريا تسمم بحچيها

-بدون لا تعتذرين اعرفهن زين واعرف سوالفهن كلها خصوصاً هنادي انتبهوا منها ولا تخلوها تدخل لغرفكم لا تنطوها غرض منكم وحاولوا لا تحچون وياهة وتحتكون بيها ما بقى شي كله كم يوم ونرجع

-لعد خليني ابلغ مسرة

-بلغيها وبلغي صديقاتها هم بس لا توصليها بشكل مباشر يعني عممي بالكلام مو حلو ننطي بأهلنا گدام الغربة

-واني مو غريبة؟

-لا انتِ اختنا

مرارة تشكلت ببلعومي من جملته وزادها من كمل بأبتسامة..

-وهسة صرتي زوجة فاهد، كلش سعيد لان راح تنضمين لعائلتنا واني اشوفكم ثنائي مثالي وراح ينولد حب بيناتكم

-مم

سكتنا شوية وعيوني تدور بالبيت الفارغ مادري شعجب اخواني ما اجو اعرفهم گاعدين على نار هسة ثلاثتهم، بين ما اني واگفة انتظر العلوية تطلع من الغرفة طخت براسي جنات وماعرف ليش تذكرتها هسة يمكن بسبب مالك ولانهم ارتبطوا سوه.. ردت اجس نبضه واعرف مشاعره تجاهها من باب الفضول الغبي الماله ام داعي..

-كيان: حتى انتَ وجنات ثنائي حلو

تغيرت نظرته من القلق على اخوه للتفاجئ، فتح عيونه مستغرب من جملتي يجوز ما توقعني اعلق هيچ تعليق وبهيچ وضع، اردفت..

-احم... ويمكن ينولد حب بيناتكم شي يوم

-اني وجنات؟! مستحيل

-ليش؟

-لأنها صغيرة وعقلها طفولي ماكو أي تفاهم بيناتنا مستعد هسة اروح اقنع تمساح هو ابو بريص ولا اقنع جنات على حاجة

-لهدرجة!

-واكثر، بيناتنا تنافر عجيب ومتعب بنفس الوقت هي افكارها شي واني شي

-بس شعجب انتَ تتوالم ويه الكل

-بس وياهة ما توالمت

-شنو نظرتك الها؟ تحسها اخت؟

-لا ما راح اچذب واگول اخت لان ما شايفها من قبل وماعرفها

-لعد شلون تشوفها؟

-وحدة عنودية وبس

-وبعد؟

-عنودية

-اي وبعد؟

-عنودية برو ماكس

ضحكت من گلبي نسيت فاهد المسحور والعلوية جوه مبين مالك طاگة روحه اول مرة اشوفه بهالوضع المأساوي، والي ضحكني اكثر من صار يفضفض..

-ما تسمع الكلام وما تهتم لاحد اجي وياهة بالعيني والحياتي تقابلني بالنعل والقنادر

-يا ربي

-اهتم بيها واحاول احسن العلاقة لان نهايتنا واضحة خلص الفاس وگع بالراس وتصخمنا سوه تزوجنا بس عود تستوعب؟ ولا تستوعب دمرتني هالطفلة اول مرة اللتقي ببشر هيچ معقد لدرجة ماعرف اتصرف وياه

سكتت ماعرفت شلون اواسي انقهرت على ثنينهم لدرجة نسيت زعلي على زواجه وحرت شلون اغير من نفسيته واحسنها..

-يمكن تتغير بعد الزواج

-راسها حجر ومن تريد شي بعد متقبل بغيره والمشكلة اني ماگدر اواجهها واكون صريح وياهة اخاف لا تنجرح بس ما مستعد اكمل حياتي ويه انسانة جاهلة و سطحية وعقل صغير مثل عقلها

-كلامك قاسي

وفعلاً قاسي لو جنات هنا وتسمع هالحچي اكيد راح تنجرح ومهما يكون ثنينهم رافضين هالزواج وما رايدي وتصرفات جنات اشوفها طبيعية لانها ببساطة كارهة هاي العلاقة..

حسيته تندم على كلامه سكت فوراً وسرح بنظراته يباوع على الدرج توقعته يتأكد لا يكون احد موجود ويسمعه، ذب نفسه ومسح على وجهه ولحيته وگال بتعب..

-عقلي مشوش هالفترة وتعبان من الوضع

-وهي شنو ذنبها؟

-ادري ادري بس ماعرف شبيه جاي اخربط اليوم ودست بالحجي

اللتفتنا على باب العلوية فتحتها تمد راسها تباوعلنا ونترت بـ مالك..

-لا تزعل جنات ما ارضى عليك بعلي!!

عزه شگد عيب أذنها ويانه وسمعت محادثتنا، مدت اصبعها تحذره وتنتر بحرگة..

-هاي يتيمة أم مثلك خاف الله بيها!!

-مالك: يمة

-العلوية: وصممممة لا تگول يمة طايح بيدك انطيناك جَنتنا لعابة البيت وبزر الگعدة شو جمال، كمال، دلع ودلال ولسان يخبل احسن واحد تاخذ ولد عمك يتكاتلون عليها وانتَ ما راضي ومتعافي؟؟

-مالك: لا

-العلوية: طلگ!! لا تعاينلي هيچ طلگها ما تستاهل واحد مثلك مستصغرها ويشوفها بـ تك عين

-مالك: علوية شبيچ!

-العلوية: طلگهااا مالك روح ارمي عليها اليمين لا تصفن بوجهي!

-صدگ تحچين انتِ؟!!

-اي يله جدامي اصعد يلاا

دفعته من صدره تشمره على جهة الدرج باوعلها فاتح عيونه مصدوم من تصرفها القاسي، ما قبل يروح ودفعته مرة ثانية ما راضية تريده يطلگ، محروگ دمها  مبين تموت على جنات ومتقبل عليها..

-لا عبالك ابوها باعها الكم يعني ماعدها ظهر وعلي اكسرر ظهرك وظهر ابووك وظهر ابووهاا واكسر قوانين هالعشيرة النگسسة وازوجهاا اغاااتك

نترتها بعصبية ورجعت للغرفة وطبگت الباب وراهة، اباوع لـ مالك باهت وميعرف شيگول وشنو يبرر مثل التايه راح يگعد على القنفة وصفن على باب غرفة العلوية ويطبطب برجله على الگاع متوتر..

مرت اقل النص ساعة وطلعت من الغرفة العلوية وبيدها قران وشمعة وطاسة صغيرة ومي وبطل بي شي بني ريحته حامضة يمكن خل، توجهت للمطبخ بدون لا تباوع لـ مالك بس ما اهتم وراح يلحگها واني وراه..

-كيان: علوية شلونه فاهد؟

-عرج مابي

-كيان: يعني ما راح يتخبل من السحر؟

-العلوية: يخبلچ وما يتخبل هالمسودن

-كيان: علوية اخاف لا يتخبل وينگلب طنطل عليَّ

-يتخبل؟ انتِ هم تخبلي، ينگلب طنطل انتِ صيري طناطلة

-ههههه علوية شبيچ جاي احچي صدگ

-وانه احچي صدگ

-مالك: هو زين؟

-العلوية: زين بس خلي يرتاح شوية

هز راسه بـ اي وراح لغرفة العلوية يتطمن، رحت اللحگه وجرت ايدي تگرصها وتهمس بيناتنا..

-العلوية: هاي خاطر گعدتكم بنصاص الليلي سوه

-لا تره ما سوينا شي

-ديلا انگلعي نامي عوفي نايم

-بس اتطمن عليه

-روحي ولچ ثگلن خايبات شمالچن متسرسحات على زلامنا

ضحكت من ضربت رجليه بعصايتها شردت اصعد فوگ وهي تدردم عليَّ بس كله بالشقى تحچي، دخلت لغرفتنا شفت ايات نايمة وجنات گاعدة على سريرها ومنطية ايات گفاهة..

-كيان: لو تعرفين شصار قبل شوية ولچ متت من الخوف اكو احد ذب علينا مي اسود يلعب النفس من فوگ و...

سولفتلها السالفة كلها واني واگفة بزاوية الغرفة ابدل ملابسي، شميت جسمي خاف بي ريحة من المي بس ما لايحني اي مابيه اسبح قبل شوية سبحت.. تعطرت وفتحت شعري ورحت انام على الفراش وانصدمت..

-جنات شبيچ!!!

عيونها فصوص حمر وخشمها وخدودها صايرات دم مال وحدة فحطانة بچي، نزلت گذلتها الكثيفة على عيونها الخضر تغطيهن حتى ما اشوفها تبچي بس ماگدرت اسكت..

-شصاير وياچ شبيچ جنات؟

-ليش ما اجه يطلگني؟

وكأن انطتني راشدي قوي مو بس كلمات بعثرن مشاعري ووجعو گلبي، ارتبكت وماعرفت شنو اگول وضعها وكلامها يفسر الحظ التعيس جنات سمعت مالك وهو يحچي عليها جوه وعلى الاغلب بكائها بسببه..

-كيان: مالك خوش انسان هو بس..

-ادري بي

-شنو؟

-ادري بي خوش انسان واني ماريده يتعذب ويايه خلي يطلگني

-لا لتحچين على روحچ هيچ

مسحت عيونها وشالت گذلتها تحطها وره اذنها، سرحت مثل الثولة بوجهها وبياضها وعيونها الكبار وانوثتها الواضحة رغم ما حاطة قطرة مكياج وحالها بالضيم بس تلمع لمع..

-جنات: اني بعدني ماعرف حقيقة زواجنا وشلون صار صدگ مالك طلب من ابوه يتزوجني لو چذب بغض النظر عن هالشي اني احچي عن شخصيته هو زين وكلش زين وياي ماكو مرة ضوجني بيها او زعلني حتى اليوم من اجه يصيح ويرزلني ما حقدت عليه لان حقه بس...

-بس شنو؟

-ما جاي اتقبله وهو ما جاي يتقبلني علاقتنا عقيمة وما راح تنجح

-انتِ مترديها تنجح؟

-اني ماريد غير ليث واذا مالك بقى وياي راح يتعب ولانه زين ما اشوفه يستاهل يتعب

-بس سمعت بنات عمچ يگولن ابوچ ميقبل على ليث شنو السبب؟

-لان ابوية وعمو عادل عداوة

-اووف

-كيان اني تعبانة كلش ومحد جاي يحس بيه

-احس بيچ والله احس

-ماريد اتزوج عندي يحرگوني ولا اللبس البدلة البيضة عگب باچر

-جنات هوني على نفسچ كلنا بنفس الوضع بس شنو بيدنا

هزت راسها ومسحت وجهها من الدموع بالكلينس، گعدت بصفها على السرير وانتبهت للگلادة القصيرة اللابستها، ابتسمت ولمستها بيدي اشوف شمكتوب..

-كيان: قل اعوذ برب الفلق

-جنات: هاي هدية من ليث

-حلوة، ذهب؟

-اي جابها الي من نجحت من الثالث متوسط

-جنات وضعچ زبالة يعينچ الله

اخيراً ضحكت وفدوة لضحكتها شگد حلوة، مسحت على خدها الصاير احمر وطبطبت على كتفها..

-جنات: شكراً كيان

-ما سويت شي، امانة لا تحقدين وتزعلين من كلام مالك اليوم والله ميقصد

-چنچ تعرفي زين

-عزيز عليَّ اي واني اعرف شگد گلبه ابيض وطيب وشفت الندم بعيونه وره ما حچى هو مو قاسي ابد ولا يزعل احد منه

-امممم

-بعدچ زعلانة؟

-لاع

-همزين

-جوعانة مال باچة هثة

-يااااا

-جابلي لفة وحليب موز الططوة قبل شوية

-شگد حلوو شفتي شگد حباب؟

-خيولي ما رضيت اريد باچه

-اني سامعة بيها ما ماكلتها شلونها طيبه؟

-عليييييي امووت على اللثان (اللسان)

-لسان شنو؟

-لثان الطلي

-اييييييييع تاكلون لسان؟؟؟

-وعيون ومخ وجلافيط وملافيط

-ايييع لعبت نفسي گبرر

-دطيري باچر اگول للفگر يجيبلي باچه

-مو علساس زعلانة منه؟

-اي بس لازم يبقى يجيبلي اكل هذا واجبه الشرعي

-دگومي گومي نامي ام واجبه الشرعي

-ماگدر انام

-تصدگين حتى اني منعسانة ابد

-لا اني مطفية غادية طلي بث ايات متقبل انام بصفها واني اخاف انام وحدي

-صدگ تحچين؟

-اي

-تخافين تنامين وحدچ؟؟

-اي

-متستحين شطولچ بعد تصيرين وتخافين

-اخاف من الظلمة هم

-يا زعطوطة

-انچبي وولي هناك

-گبر عود ردت اگلچ نامي بصفي بس متستاهلين انيّم سليمة يمي احسن

-سليمة حقيقية؟؟؟؟؟

-اي

-منو هاي؟

-صديقتي الخيالية سليمة نسولف كل يوم قبل لا ننام وتنام بصفي وتمشطلي شعري و...

-لا لا اخااف لا تكملين ولچ هاااي جننية شلون تصادقيهاا؟؟

-صح جنية بس احسن منچ على الاقل لسانها مو طويل

-وخري ما انام بصفج ماريد بطلت

-يله لعد تصبحين على خير وسليمة هم تگلچ تصبحين على خير

-الله يااخذهااا ماريدها تحچي وياااي

-ليش ولچ خطية باعيها شگد حبابة

-هي وينهااا

-هاي باعيلها مدت ايدها راح تلزم چتفچ

طفرت مخروعة وجهها شحب وراحت تشرد يم فراش ايات الي ما گعدت من اصواتنا العالية، متت من الضحك عليها رغم لسانها شطوله بس والله بريئة صدگ عبالك طفلة..

-شوف هاي صدگت ولچ تعالي

-گولي والله ثليمة مو هنا؟

-لا راحت لجهالها

-كيان انتِ مرفوع عنچ الغطاء؟ يعني تشوفين جن؟؟

-يجوز مادري المهم كافي خلي ننام

تمددت بالفراش وهي مُصرة متقبل تنام بصفي، راحت تگعد ايات تهمسلها حتى تنام يمها وذيچ صدمتني من دفرت ايد جنات بقوة وصاحت..

-ايات: بطلييي تصرفات الجهههال ونااامي وحددددچ

-جنات: اخاف

-ميهمني

حطت راسها على المخدة وغطت روحها باللحاف، گلبي صار نصين من كمية الزعل والخجل الشفتها بعيون جنات المدمعة، سحبت نفسها من اختها واجت على فراشي تگعد، نزلت عيونها وكالت وشفايفها مبرطمة..

-جنات: اخاف اضوجچ بنومتي؟

-لا حبي تعالي عادي

نامت بصفي بس مكسورة توجعت بدالها من تصرف ايات المزعج، نمت بسرعة رغم مچنت نعسانة بس يمكن ردت انطي لجنات مساحتها الخاصة وترتاح من تعرفني نمت..

نص الليل وحسيت على ايدها تگعدني فتحت تك عين شفتها گاعدة ومبين عليها ما نامت ولا دقيقة اگدر اشوفها بسبب الضوه الخافت المفتوح..

-شبيچ جنات؟

-تگدرين تحضنيني وانتِ نايمة؟

-ها؟؟

-ماعرف انام الا هيچ

سويت مثل متريد وبسرعة ثگل نفسها ونامت يا مسكينة هاي چانت سهرانة لان محتاجة احد يحضنها حتى تگدر تغفى؟ اني شبيه صايرة حساسة هالفترة وراح ابچي بدالهه؟

فزيت الصبح على صوت صياح عالي جاي من جوه، گمت بسرعة اركض اشوف شكو صوت مالك وشُهيب هرج الدنيا.. ركضت لمحجر الدرج مديت راسي شفتهم يتصايحون ويه عمامهم..

-مالك: البارحة ثنييين من اخواني چان ماتوو من وراكم يابة شنو هالذللة نطللع مناا احسنن شمگعدناا هنااا

-شمسون: محد يطلع غيرهم بيت امي هذا واحنا الطابين وهمه الطالعين

صاح واحد من العمام يهدي الوضع ماعرفته منو همه هوايه ومينحفظون بسهولة، هوسة بهوسة ومسرة بغير عالم شفتها تطلع من غرفتها وحاطة ماسك جوه عيونها وشفايفها ولافة شعرها المتروس زيوت ترطيب بـ كبة عالية..

-مسرة: صباحووو

-كيان: صباح النور تعالي شوفي العركة تعالي

-مسرة: لا مالي واهس، كيان عندي ماسكات وسوالف عناية صيحي جنات وتعالي نسوي

-كيان: حلمي برودچ

-مسرة: يمعودة منيلي باردة بس متعودة على المشاكل المهم بشرتي متتعب واهتم بنفسي

مدت راسها تشوف جزء من العركة وافتهمنا عمامهم راح يطردون نسوانهم علمود منطلع، عرفت واحد من عمامهم هذا اسمه صادق وعلى الاغلب مرته سبب بحالة فاهد البارحة لان صار يرجف رجف من عمو شمسون رفع مسدس عليه وگال ببرود..

-استلموا عمكم ولدي

-صادق: جعففر لا على بختك هسة اطردهها صدگ چذب انتو الطابين وهي الطالعة

-شمسون: ولي عن وجهي، مَلك اخذه بره

-صادق: لا دخيلللك جعففررر وداعة امييي اطلگهااا امشي لچ طلعييي انتِ طالق

دگت ولطمت مرته بنص الصالة راح يركض عليها توقعناه راح يگومها من الگاع ويواسيها بس صار العكس لزمها وگطعها تگطع بالكتل سحبها من شعرها تهلس بيده گلبي گام يوجعني من المنظر باوعت لـ مسرة اشوف ردة فعلها ولاحظت ملامحها جامدة حتى ما سألت عن سبب العركة خلت ورجعت لغرفتها..

-صادق: گووومي ولچ گوووومي

يصيح ويكتل بيها نزع حزامه يضربها بوحشية مخيفة جروا شُهيب ومالك وابوهم صاح بيهم يوخرون ويعوفوا يكمل عليها، ورغم الصار بس ما قبلوا وطلعوها بره.. نزلت جوه اشوف الوجوه صفرة وكل النسوان خايفات ولازگات ببعض يجوز شافن مستقبلهن بهاي الطلعت مكتولة..

-شمسون: يا صباح الحب چنتي الحلوة

-كيان: فاهد گعد؟

-شمسون: من الصبح يسأل عنچ ظل باله عليچ

هزيت راسي ورحت للاستقبال اشوف اخواني، دگيت الباب وطلعلي فاهد مصلخ بس بشورت قصير يفتر، صرخت مخترعة وشردت اطلع وما اسمع غير ضحكاته المسودنة مثله، لحگني بالكليدور ولزم ايدي يوگفني..

-فاهد: وين ولچ وين

-كيان: وخر ولي هنااك اللبس ملابسس

-راح تشبعين من هالمنظر كبدي

-اييييييييييييييييييع عيوني احترگننن من البشاعة

-هاي الايع شطولها بس اكيد مو اطول من.....

-مروان: خير؟! شصاير هنا؟؟

-فاهد: اني وخطيبتي جاي نتناقش بليلة الدخلة

لطشه مروان بالحايط ولزگ فاهد ببوكس قوي، شهگت خايفة من مروان ووگفت على جهة ارجف ياربي شلون ورطة هااي..

-فاهد: هههههههه تره عرسنا باچر شبيك غير خايف عليها

-مروان: كلللب ساااقططط

-فاهد: حبيبي وعمري تمون اخو مرتي

-مروان: ولك انچببب حلگك سددده

-فاهد: انتَ ليش عبصي دائماً؟

انطاه بوكس ثاني وثالث وفاهد يضحك وحتى ميصد البوكس ولا مهتم للضرب ومروان متخبل، ركضت اشوف نشوان يحل الموضوع وتلاگينا بالباب..

-نشوان: شبيچ تركضين شصاير؟

-اللحگ مروان وفاهد يتعاركون بالكليدور

هرول الهم واني وراه وبس شهگته تنسمع من شكل فاهد المصلخ، اندار عليَّ خازرني بكل قوته متت بدمي من الخجل اشرت بيدي "لا" والحچي انبلع عندي حتى ماعرف شنو انطق..

-نشوان بحقد: خلي ينكتل يستاهل

-مروان: طلعيييييي برررره لا ابتلييي بييييچ

-كيان: نشوان فدوة

-نشوان: سمعتي اخوووچ طلعي برره

طلعت اوگف بالباب واسمع لانواع من المسبات والفشاير، اخواني غاديين نااار من العصبية وواگعين دگ بفاهد والصدمني هذا الغبي ميدافع عن نفسه يستفزهم بالضحك والكلام البذيء..

-فاهد: انتو بس تغارون من جسمي هههههههههه مروان انطيك اسم الجم تبني عضل؟

-مروان: اخر يوووم تشوف هالعضلات اليوم افششههنن

-فاهد: ههههههه لا حبي ذني اصليات بس انتَ مبين متعلم على النفخ

گمت ارجف من عياط مروان واشوف ولد عم فاهد يروشون بالبيت ومحد تعب نفسه يشوف شكو، گمت ادگ واللطم بالباب فتحتها على كيفي امد بس عيوني وانرگعت بوجهي طبگها نشوان..

-نشوان: رووووحي گلت

ركضت بره اجيب واحد يفاككهم دورت على فاضل ماكو من البارحة گال يروح لكربلاء يزور من الصبح وياخذ وياه العلوية، رحت للصالة وشفت شمسون ويا ريتني ما رايحة لهالغبي..

-كيان: عمو اللحگ جاي يتعاركون اخواني ويه فاهد

-شمسون: ميخالف

-عموو راح يكتلون بعض والله

-عادي بابا روحي شوفيلي زيد وين

-منو زيد؟؟؟

-چلب اخوية صادق

-چلبه مسمي زيد؟؟!

-ابنه هذا حبيبتي

نزلت فيروز من الدرج بفستانها الضيق وحجابها مادري المن لابسة حجاب..

-فيروز: اووي هاي شنو الهوسة من الصبح

-شمسون: امچ انكتلت وانطردت

-فيروز: امي؟؟ ليش؟؟

-شمسون: الله بابا شنو هالفستان الحلو

-فيروز: امي شمصخمة هالمرة عمو؟

-شمسون: البارحة رادت تسحر فاهد

-فيروز: استغفر الله منهاا متوب هااي

عافتنا تتحلطم وتدردم على امها الي واضح وضوح الشمس عدها سوابق عديدة، رحت وراهة للمطبخ شفتها تطلع جبن من الثلاجة وتسويلها لفة..

-فيروز عادي عندچ امچ طردوها؟! شو ممتأثرة

-فيروز: خليهم يطردوها بلكت تتوب

-كيان: تره هاي امچ!!

-فيروز: مو امي مرت ابوية

-بس شمسون گال امچ

-اي اصيحلها يمة بس ختولي لظفر امي متوصل هاي الحقيرة

عضت من لفتها وگالت بحرگة..

-كل ولد عمي ما خلصانين منها يومية ساحرتلها واحد حتى اني قبل كم سنة سحرتني خلتني اطلع بالشارع مثل المخابيل

ما عرفت شنو اگول وانلصمت بالزايد من اجوني نشوان ومروان توقعت راح يرزلوني او يطلبون يحچون ويايه بس عبروني يطلعون من المطبخ بدون لا يباوعولي..

-كيان: الله ياااخذك فاهد

-فيروز: اگلچ وينها هاي البزبز ومن

-مسرة؟

-اي

-فوگ تسوي ماسكات

-تفتهم خليني اروحلها حبيتها

راحت وخلتني وحدي گاعدة انتظر عسى ولعل يرجعون واحچي وياهم، بقيت فترة هنا وگمت من شفت مالك يدخل مهرول..

-مالك وين شُهيب؟

اللتفت يباوعلي ما شافني من دخل، ذب نفس ويرفع بشعره تعبان..

-عنده شغل ما اجه وياي

-ها

-اگلچ جنات گعدت؟

-يجوز اي لان سمعت صوت طگطگة بالمطبخ الفوگ

-تمام

-مالك اگلك

-نعم

-جنات سمعت كلامك البارحة

انقبض فكه وغمض عيونه زافر نفس قوية حرك راسه بطريقة "لا"، بلع ريگه وگال بصوت خافت..

-شلون عرفتي؟

-شفتها تبچي

-لا!!

-والله چانت تبچي كلش مقهورة

انقهر كلش وملامحه تغيرت استمر يذب انفاس ثقيلة ويمسح على وجهه ولحيته ، ظل حاير ميعرف شيسوي واني حرت وياه على الواهس..

-مالك: برأيج اروح احجي وياهة لو تستلمني بلسانها؟

-ماعرف بس مو غلط اذا جربت

-صح صح

هرول يكمل طريقة ووگف بباب المطبخ يندار عليَّ..

-تعالي وياي صيري محضر خير

-مو خاف تفشر عليَّ

ضحك يأيدني بهزة راس، رفع اكتافه بحركة عادي وگال..

-هي مليوسة

-هههههه قصدك مليوصة وصح كلامك امشي نصعد

-لحظة

فتح الثلاجة وطلع حليب موز صبه بگلاص وسوه لفة جبن سريعة واشرلي نصعد سوه، قبلت اروح خليني شوية اقضي وقت ويه لسان جنات وعندي فضول شلون مالك راح يراضي هالعرمة..

وصلنا لباب المطبخ وسمعنا صوتها تدردم وحدها بصوت عالي..

-جنات: ابن الفگرررر اشتغل لا انعل والدددديك

تجدح بالجداحة مبين دتفتح بالطباخ، اندارلي مالك وگال بهمس..

-عفية لسان ما يتعب

-كيان: سألتها مرة وگالت ما اسيطر على روحي

دخلنا المطبخ لا احم ولا دستور وثنينا صفننا صفنة عمررر.. جنات بدون حجاب والوشم وره اذنها مبين، لابسة تراك برمودة كيمونة قصيرة طالع خصرها لونها اصفر فاتح فكيت حلگي ومن لا وعي باوعت لـ مالك الصافن مثل صفنتي واكثر..

-جنات: زبااااالة هذا ليش مينفتحح ابن المنغووليي

-مالك: احم

-جنات: وجعععع

-مالك: يا صبر الارض

طفرت بمكانها واندارت علينا وياريتها ما اندارت لان يبوووو اي بس يبووو تعبر عن الحال، العيون مكحلة وگذلتها نازلة عليهن والوجه يصج صج والقميص من گدما قصير صرتها طالعة ردت اطم روحي من القهر نار واشتعلت بيه مادري شصارلي، طلعت بسرعة من المطبخ قبل لا افضح نفسي ووگفت على جهة اراقبهم من بعيد..

-جنات: يمة

-مالك: اجيت بوقت غلط؟

-شنو رأيك؟

-ما اشوف شي غلط

حامت حول نفسها تدور منا ومنا على شي يسترها وما لگت اشرتله يطلع وما استحاب بالعكس تقرب منها..

-اطلع حباب

-ليش؟

-مـ.. مـ.. ملـ...

-اول تالي جنات لسانها ينبلع؟

-ما انبلع! جاي اگول ملابثي مو مناثبة

-اني اشوفها جداً مناسبة ولايگتلچ هم

-شنهييي

-جنات خلينا نحچي

-شنحچي واني بهالحال!

-بيناتنا عقد وين المشكلة؟

-انتَ ثاقط

-ادري

ضحك وره كلمته وهي هم ضحكت تنطي ظهرها حتى ميشوفها لانت، عضيت على شفتي اكتم غضبي واللوم بروحي شبيچ كيان لا تصيرين غبية كاافي الرجال راح يتزوج باچر وبعدچ تغارين!!

-مالك: البارحة تندمت على كل كلمة حچيتها بحقچ اعترف تصرفي مو مؤدب ومتستحقي اعتـ...

-جنات: لا تعتذر عادي

هاااا؟؟؟ مو بس مالك انصدم حتى اني معقولة جنات تسامح بهالسهولة وتگول على شي عادي؟!

وچنه هو هم ما اقتنع بكلامها وتقرب منها اكثر صار وراهة مباشرة وهي تلهي روحها تفتح بالكاونترات تريد تاخذ ماعون من اعلى خانة ومتنوشة..  حط الحليب واللفة البيدة على الكاونتر ومد نفسه يجيبلها الماعون ضمها بجسمه واختفت عن انظاري..

-مالك: حقچ عليَّ

خنس صوتها ويه جسمها كلشي ما اشوف منها من گدما قريب وصاير بظهرها حجب عني الرؤيا، نزل راسه وهمس شي بينه وبينها ما سمعت وگمت اللوب الف حوصة صارت بيه اريد اعرف شنو گال بس ما طول انتظاري لانها عادت كلمته..

-ما زعلانة والله

دفعته من صدره ووگفت على جهة تباوعله ودا اللاحظ التوتر بيناتهم قوي وجه مالك متعرق وهي جسمها مكزبر دا اشوف ايدها مقشعرة، لمست الكيميا بيناتهم رغم فرق العمر بس مو نشاز..

-مالك: عندچ شي ثاني حابة تگولي؟

-هئ

-تمام بس اني عندي

-گول

-انتِ گلتي ما زعلانة واني اريد نحل الموضوع البيناتنا كلياً حتى لا نبقى كل يوم متعاركين

-اي؟

-اريد نكون اصدقاء

-اي اي اني اعرف لهاي الثوالف عدل شبعت منها بالمثلثلات

-يا سوالف؟

-مال بالبداية اصدقاء وانوب البطل يتخبل على البطلة ويحبها

-هههههه لا لتخافين اني مو من هذا النوع، صدگيني ماعندي نية سيئة تجاهچ اذا منگدر نكون زوجين طبيعيين خلينا نكون صديقين حقيقيين ولا تخافين مني ما راح اطلب منچ شي بالمستقبل

-شي مثل شنو؟

-يعني.. نطور علاقتنا واطلب امور المتزوحين

-شنو ذني الامور؟

-استغفر الله انسي

-لا حباب گول شنو هنه

-لاا كافي سكتي انسي

-الا اثأل ايات هي تحچيلي

-ايييه بعد احسن عفية سألي اختچ

-اي راح اروحلها

-تمام هسة شگلتي؟

-ميخالف

-ما جاي اصدگ شبيچ اليوم

-ليش؟

-شو بكلشي قبلتي وبسرعة بدون لا تشلعين گلبي

-يجوز من حرمل صبيحة حرملتني من الصبح

-علميني عليه حتى احرملچ كل يوم

-خوش

-وهسة على شرف صداقتنا اريد نبديها بشي حلو

-شنو هو

-اعزمچ اليوم على الغدا

-وحدنا؟؟

-اي

-هاا.. لا لا ماكو داعي

-يعجبني اطلع وياچ حاب اتعرف عليچ اكثر

-بث..

-لا تظلين تبثبثين

-لا تتنمر

-بالعكس ما اتنمر احب طريقة كلامچ

-چذاب

-والله احبها مغرية

-يا ثاقط

ضحك بصوت عالي وغمز وگال..

-جبتلچ حليب موز حتى ما تشربين حليبي

-ماحبه

-شگد چذابة

-وداعتك ماحبه

-ما دام حلفتي بداعتي صدگتچ

ضحكت ونزلت راسها ونزلت گذلتها على عيونها اكثر، حطتها وره اذانها وجاي اشوف مالك وصفنة مالك وسرح مالك بيها.. خلص مو وكت غيرة لازم اعذره صدگ مغرية هالبنية!

-شگلتي على العزيمة؟

-خليها غير وقت

-خلص براحتچ، أي شي تحتاجي انطيني خبر لا تترددين

-اريد

-شنو تردين؟

همست شغلة بينها وبين نفسها ما فهم عليها بس اني قريت شفايفها، غميتها بالخفيف شفت عيونها تنحرف الي وتمدلي لسانها..

-مالك: ما سمعت شنو گلتي؟

-گلت اريد باچه

-باچه؟؟؟ باچه تقصدين راس الخروف؟!

-اي

-تحبي؟!

-اي افقد عليها

-غريب بس تمام تدللين

-ليش غريب عيوني؟؟؟؟

-ماكو غريب غيري هنا بس سكتي

-اي عفية

-يله أكلي ونزلي لا تبقين هنا

-انتَ هواي تتأمر ملاحظ نفثك؟

-اي تقبلي الامر الواقع حبيبتي

-حبيبتك بعينك

ضحك وطلع من المطبخ عبرني وسوالي بيده حركة "اوكي" بمعنى تصالحو شفته فرحان بهالانجاز بس اني شبية مقهورة وانعفست؟

-جنات: تعالي تعالي ليش ما گلتيلي راح تجون؟

-كيان: ليش استحيتي حضرتچ

-لاع اني ما اثتحي

-اني نازلة بدلي وتعالي ورايه خليني اشوف المسودن اخواني تعاركو وياه الغبي فسخوا وگاضيها يضحك

-يله اكل لفة الططوة وانزل

-خوش باي

نزلت اگعد وحدي بالصالة الكل مشغول بمشاكله وتحضيراته لعرس باچر، دورت على ماريا لگيتها حاطه راسها بحضن مسرة تسويلها ماسكات وياهة ويسولفن ويضحكن ممهتمات لشي..

للعصر رجعت العلوية وگالت كل البنات يطلعن يكملن شغلهن سواء صالون لو ملابس لو امور اخرى محتاجات يسووها.. طلعنا من العصر وصار نص الليل واحنه بعدنا حجزنا الصالون وجبنا باقي احتياجاتنا وكلشي تسهل علينا من وره معارفهم بكل مكان عدهم شخص عرف وينصحنا..

-مسرة: بس بيبي احنه اشترينا بدلة البيضة مناك

-العلوية: چا غير تلبسن سبع بدلات وحدة شنهي

-كيان: سبعة؟؟

-فيروز: ليش مستغربات بنات اقل شي ثلاث بدلات العروسة تلبس

-مسرة: اوكي ثلاثة بيها مجال بس مو سبعة

-كيان: اوگفي مسرة ديگولن نلبس بدلات ملونة مو ثلاث بدلات بيض

-هدى: باعن حبي هنا يمكن يختلف عن الخارج احنه عدنا قبل بيوم من العرس حنة والعروسة تلبس كم بدلة بس انتو منلحگ نسوي حنة للبنات فـ راح نطبگها ويه العرس تلبسون سبع بدلات

-مسرة: interesting

-فيروز: مو بله؟

-مسرة: والله

-كيان: احنه عدنا نلبس اكثر من بدلة بأعراسنا عادي بس كلهن لازم يكونن فساتين بيضة لان هي عروسة ليش تلبس اللوان مختلفة

-فواطم: كم بدلة لبستي بزواجچ الاول مسرة؟

ضربتها العلوية على رجليها بالعصاية وعضتلها شفه حتى تسكت، ضحكت مسرة على ردة فعل البنات يخزرن بـ فواطم الصافنة متدري شكو ماكو وكملنا تسووق..

نسينا ارواحنا ونسينا باچر العرس اخذنا راحتنا بالمشتره شنو اشوف حلو اخذه ميهمني وجنات ويايه على الواهس وضعها هوايه احسن من البارحة والسبب وصلنا خبر ليث زين وخلص عقابه..

الوقت عبر العشرة بالليل والعلوية تعبت تفتر ويانه جبرتنا نرجع للبيت بعدما كل وحدة بينا اشترت ثلاث فساتين ملونة غير بدلة البيضة الي جبناها مناك..

رجعنا للبيت واستقبلنا صوت الطرب والموزيقا العالي، تسائلنا اني ومسرة شكو وفيروز وفواطم صاحن بفرحة..

-حنة الووولدد

ركضن فوگ واحنه مندري شكو صعدنا لغرفنا نرتب اغراضنا الجديدة وجنات تسولف ويه ايات وذيچ لو تجاوبها بأختصار لو تغلس وتسوي روحها متسمع شگد دقتني!!

بعدني دا انزع ملابسي وانفتحت علينا الباب اجت فيروز تهرول وتگول بحماس..

-تعالن شوفن الحفلة تعالننن

جرت ايدي وايد جنات وركضت بينا لغرفة مسرة لگيناها تسولف ويه صديقاتها وام صبا وياهن تتناقش على شي..

-فيروز: بنات تعالو شوفو الحفلة تفوتكم

-صبا: حنة الولد قصدچ؟

-فيروز: اي اي تعالو نشوفها من شباك غرفة ماريا مبين

كلنا رحنا لغرفة ماريا بالطابق الثاني صايرة طفينا الاضوية حتى منبين وفتحنا البردة، مسوين الحنة بالحديقة الخلفية البنات گالو اسمه بستان، المساحة كلش چبيرة وكلها زرع وخضار واشجار وخير..

المنظر يجنن الحديقة كلها اضوية منورة وزلم كومة كومة كومة وكلهم لابسين دشاديش مدا نشوف جماعتنا بسبب الزحمة، مسوين بوفيه مفتوح على جهة وجايبين ناس يقرون اغاني ومواويل بس مبين مو مشهورين لان يقرون شوية ويرحون وكل شوية واحد قاري شي والاجواء ولا اروع..

كلنا البنات مدينا روسنا وفتحنا عيوننا من عبروا مروان ونشوان وفاضل لابسين دشاديش اول مرة اشوفهم بيها ضحكت متحمسة على منظرهم يخبل والبنات صارن كل وحدة تنطي رأي شكل بس الكل اتفق على جمال وشكل مروان بيها لانه لو يلبس گونية تمن هم تطلع حلوة عليه لانه حلو هو گوة؟

-كيان بهمس: شو ماهمه شُهيب واخوانه معقولة ما حضروا حنتهم؟

-عُلا: اي حتى اني دا ادورهم عجـ... عاااااااااا هذا شُهيب اجه اجه جاي اشوووفه

-البنات كلهن: وينه وينه ويينه

متت من الضحك على ردة فعل مسرة اندارت عليهن خازرتهن ونترت بيهن بالهمسة..

-الثگل حلوو شحلاته الثگل شحلااته الثگيل شحلاته.... الله شحلاته طالع بالدشداشة

حرفياً متنا من الضحك غيرت النبرة والنغمة من شافته وصدگ يجنن يا گلبي، لو مهما اغترب العراقي وطلع يبقى دمه وروحه عراقية شحلاته طالع بدشداشته البيضة بردن تشبه ردن القميص ولابس ذني ازرار الطباقيات ويه الدشداشة لونهم اسود وساعته الرولكس مزينة معصم ايده والايد الثانية لازم جگارة، وگف مقابيل نشوان يمسح على جبينه المتعرق بالكلينس ويحچي شي وفاضل ميت من الضحك ويلزم بيد شُهيب يذبون رواحهم عليه هو ونشوان..

-صبا: اريد اعرررف شنو ديحچون وفاضل ميت ضحك

-كيان: تلگي ديسأل فاضل شجابك بهيچ مكان فاسق

-مسرة: وفاضل يگله العياذ بالله من الخبث والخبائث غير انعزمت اخي عيب ارد العزيمة

ضحكن البنات رغم ما فهمن علينا بس ميهم رجعنا ركزنا من اجه واحد من ولد عم شُهيب بيده شماغ (البنات گلولي اسمه) واشر لـ شُهيب على راسه اعترض وما قبل بس اجو جوگة من ولد عمه وحصروا بنصهم يضحكون ويتشاقون وياه الى ان خلوا يلفه على راسه ولبسوا..

ابتسمت على ضحكاته ويه ولد عمه ويأشرلهم على فاضل الفاطس ضحك وهم لزموا وگوة لبسوا وحدة، لا ارادي عيوني راحت على مسرة الگاعدة بالگاع متربعة ومركزة بكل حواسها مبتسمة وحاطه ايدها على گلبها تراقب الديصير، ندستني جولي على كيف وهمستلي..

-باعيها وتگول ماحبه

-كيان: هششش خليها تسمعچ

بنص الضحك مالتهم نبص المسودن فاهد وبلحظة سريعة وغريبة عض شُهيب بـ چتفه من وره وراح يشرد يممة شصار بينا البنات انهاروا انهيار من الضحك شُهيب صار يصيح عليه ويرزل بي وهذاك ميهتم راح يركض مثل الجهال ويهز چتف ويه ولد عمه..

للامانة هم لايگتله الدشداشة البيضة صح راح تطگ على جسمه من وره العضلات، كاف رداناته طالعة ايده الموشومة ولاف چراوية نفس شُهيب على راسه بس هي بقت چراوية بقى ترتيب وهو ذب لحم ويه جماعته.. البنات يگرصن بيه ومسرة تغمزلي وتگول بصوت شبه هامس..

-وخري مسودنچ خليني اشوف هموسي

-كيان: ياااا اني شعليه قابل انزل اوخره

-جنات: اجه الططوة الكبرى

-هدى: طااح حظچ اني ططوة وهذا مو ططوة دباعي شحلاته

اجه مالك اخيراً وماريد احچي زايد واصير ادبسز بس الفكرة وصلت يمكم اكيد، وگف بصف اخوانه يرزل بـ فاهد المخبل ويذب بروحه على مالك يهز بچتفه ورگبته وشُهيب واگف مكشول ملامحه عليه..

-فيروز: اتمنى ننزل نشوف شنو هاي احنه محبوسات هنا

-جولي: ماعدكم حفلات مختلطة هنا؟

-فيروز: لا ماعدنا لان....

سكتت نازة بمكانها من انفتح دي جي بي ردات ردح عراقي اصيييييل وبصوت عالي كللش صار الردح للگاع للگاع الكل تخبل ونشوان جر فاضل ومروان وراح ويه الهوسة يرگصون سوه الحماس فول والكل فرحان ويضحك شي يدخل البهجة بالگلب..

للـ 2:00 بالليل السهرة قائمة والحفلة كلما جايهة تزيد راسنا راح ينفجر من الطرب نريد ننام نريد نرتاح ماكو نزلت جوه عسى ولعل اللگه احد گاعد منا ويساعدني اگضي وقت واخلص من هالأرق والحمدلله لگيت العلوية وحفيداتها ومسرة وجنات گاعدات مقابيلها..

-العلوية: هلا بمرت المسودن تعالي هسة گلت لـ فواطم تصيحچ

ابتسمت ودخلت گعدت وياهن صاحتلي وصاحت لـ جنات ومسرة على جهة تگعدنا وذني الباقيات كل شوية وحدة تنبص تريد تسمع شتحچي ويانه والعلوية تهددهن بالعصاية..

-العلوية: ليش سهرانات يوم؟

-كيان: الصوت عالي مدا اگدر انام

-العلوية بغمزة: ميخالف خليهم فرحانين اليوم وباچر حصتچن انتن

-جنات: علوية چنچ تردين تگولين شي؟

-العلوية: اي يمة اريدن اعلمچن على حاجة

اشرتلنا نتقرب مدينا روسنا ثلاثتنا وهي تهمس بيناتنا..

-بس ماريد ذنيچ يسمعن عيب ما يصلح بعدهن ما متزوجات

-كيان: قلقتينا علوية

-لا عليش القلق يمة هذا اليوم كل بت تعيشه بس اريدن انطيچن چم حچاية تخلنها ترچية بأذاناتچن

-مسرة: تفضلي نسمعچ

-العلوية: الزلمة مثل الجاهل يتغشمر بحچايتين حلوة، بلبسة مرتبة، بعطر يهفهف ونظافة شخصية.. لا يچذبون عليچن ويگولن العصبي ما ينراد والمتعصب ما ينجرع واليخنگ مانريده كله حچي فارغ زلمتچ بيدچ تغيرينه مثل العجينة تشكلي مثل ما تردين سألو مجرب.. اذا المرة خوش مرة وحوك وتلوفه لوف بلسان ولبس وغزل وتنطي حقوقه بعلي محبس بيدها يصير بس كلشي يزود عن حده ينگلب ضده

-مسرة: شلون؟

-العلوية: اكو زلام ما يحبون المرة تذب روحها عليهم يحبون التشلع گلبه تدللي وتماوعي وسوي سوايتچ ونامي عوفي يتحرمص عليچ.. واكو لاع يبزع بساع وما يحاول بعد انتِ وشطارتچ وجسي نبضه بالبداية واذا ما حبيتي شخصيته غيريها على ايدچ ومثل ما گتلچ الزلمة بحچايتين يقتنع يوم نفخي بي شوي ويوم تدللي عليه ولا تنطي اليريد يسمعه، خليچ بين وبين مو تدللين لدرجة يمل منچ ولا تكونين متاحة ويشوفنچ سهلة

مسحت على شفايفها تصفن شوية ورجعت تكمل..

-لا تكيفين اول ما گال تعالي اريدنچ بحچاية ابد تدللي يمة الثگل حلو خصوصاً بداية الزواج

-جنات: ليش عود هثة هي حچاية

ضربت الحجية رجليها بخفة ونترت بين سنونها..

-انتِ انچعمي زلمتچ يعلمچ عود

-هدى بهمس: جنات يمكن لو تعرفين تنجلطين

متت ضحك على شهگة العلوية من شافت هدى وفواطم وعُلا مادات روسهن وراهة وديتسمعن، ركضت وراهن تريد تكتلهن وهنه شردن بره الغرفة..

-العلوية: العايصات المايصات بنات السوو خايبات موش بنات عدنا طراجيعع يردن يشوهن البت من هساع

-جنات: لا علوية عادي اصلاً الططوة گال احنه اصدقاء راح نصير ما راح يطلب يبوثني (يبوسني)

-العلوية: گومي لا اهفچ بـ زيج

-مسرة: امممم نشوف حبي جنات

-جنات: يعني شنو

-مسرة: سلامتچ يروحي

-العلوية: خايبات هالصلفة تعجبني

-مسرة: شكراً بيبي وشكراً على اطرائچ

-العلوية: اي يلا انچعمي خلوني اكمل، كل يوم لبسي شكل وغيري من نفسيتچ ونفسيته لا تخلين المشاكل والفروخ عائق لترتيبچ وجمالچ ونظافتچ يمة المرة النظيفة لنفسها گبل زلمتها.. والزلمة يحترم ويقدر المرة التهتم بروحها حتى وانتو متمالخين غصب عنه لبسي وكشخي وتزوغي وعوفي مثل الططوة گاعد وحيده يلوب

-جنات: صح الصح علوية

-العلوية: گومي انتِ چنها گملة كلشي ما تفهم وتصيح صح

-كيان: شكراً على المعلومات بيبي

-العلوية: تدللن بنياتي شريدن غير سعادتكم وراحة وليداتي الزلمة يكمل المرة والمرية تكمل الزلمة ماكو واحد كامل من الله

بوستنا ودعتلنا بالسعادة وعگدت شيلتها گالت طلبتلكم حاجة من الحمزة ابو حزامين ترتاحون ومتشوفون غير السعادة بحياتكم وقبل لا نروح لزمتنا وهمست..

-لا تخلوهم يشوفوچن اليوم والموبايلات غلقوها خلي يصير اشتياق

هزينا روسنا بـ اي وصعدنا كلمن لغرفتها، حطيت راسي على المخدة وبداخلي قهرة وخوف ماگدر انام واعوف اخواني ياخذون نظرة سيئة عليَّ ما صار وقت ابررلهم موقفي ويه فاهد ومن الصبح لسه ياكل ويشرب ويايه..

نص ساعة ما گدرت انتظر مديت راسي من الحديقة اشوف بلكت اللگف واحد منهم بس محد راجع من الحنة بعدهم، نزلت وقررت انتظرهم بالحديقة عسى ولعل يرجعون..

گعدت لا دقيقة ولا دقيقتين ساعة شتلوني ياله دخلو نشوان وفاضل يضحكون بصوت خافت وفاضل يگول لـ نشوان بأنفعال..

-فاضل: صراحة واستعيذ بالله ولا اشجع على الفحشاء والمنكر بس خوووش حنة

-نشوان: لو مروان مخلينا باقين هناك شنو چان صار

-فاضل: اعوووووذ بالله منك ومن افكار شيطانك الخايس نشوان جابوا مشروبات كحولية وصار عربدة عيب بابا هالاماكن مو من مقامنا ومستوانا

-كيان: سلام شلونكم

جمدوا ثنينهم ما انتبهوا على وجودي من دخلوا، ردلي فاضل السلام وترخص يدخل جوه يعوفني ويه نشوان..

-كيان: شوشو حباب لتروح خلينا نحچي

-تمام

گعد بصفي على الدچة احلى شي بنشوان ينطي مجال ومو متهور يخليني ابرر موقفي ويسمعني والاهم يصدگني بدون لا اگطع نفسي بالبچي..

-كيان: اليوم من طب مروان علينا اني وفاهد بالكليدور احلفلك بروح امي وابوية اني طبيت عليه بالغلط وهو يبدل والله مو قصدي حتى هو مچان قصده و..

-هذا موضوعچ كيان؟

-اي شوشو حباب صدگني والله ما جاي اگدر انام ماتحمل

ضحك خفيف وفاجأني من حضني لصدره وباس راسي، رفعت عيوني عليه اشوف وجهه خاف راح انكتل بس لا والله صدگ ديضحك..

-نشوان: ادري فاهد گال بالغلط طبت عليَّ

-كيان: فاااهد گال؟؟؟

-نشوان: اي وما رضى عليچ ومن طلعتي تعاركو هو ومروان وگله مو ذنب كيان هي بس اجت تتطمن عليَّ وره الصار البارحة

-عزه المسودن دافعلي!!

-طبعاً يدافعلچ لعد غير خطيبچ وكتلتي نفسچ عليه؟؟؟

-هاا.. اي اي طبعاً بس اقصد فاهد مو طبعه يبرر لاحد

-اي المهم بررلنا الموقف وتصافوا هو ومروان بالحفلة قبل شوية

-يمة الحمدلله والله خفت تظنون بيه سوء

-لا گلبي انتِ تربيتنا نعرفچ متضمين علينا شي

بوس خدودي وراسي وحضني وبداخلي ميتة قهر والله يا نشوان لو تعرف شكد مچفصة وضامة عليكم چان نحرتني ودفنتني هنا بالحديقة..

-فاضل: استغفر الله لا حول ولا قوة الا بالله اخوان وينكم

-نشوان: رجع السيد هاا شبيك

-فاضل: شفت منظر قشعرت له عيناي

-كيان: العيون تقشعر؟ هاي اول مرة اسمع بيها

-فاضل: نعم من شدة التقزز قشعرت عيناي ياخي شنو هالفساد العايشين بي هنا

-نشوان: صار عندي فضول اعرف شنو شفت عود بعدين سولفلي

-فاضل: حسناً حسناً

-كيان: سيد لو تشوفلك وحدة من بنات عمهم تخطبها الك وحدة تگول للثانية اني احلى منچ والحلو كلهن واصلات انصدمت كلهن مهندسات ومدرسات ودكتورات ولا وحدة گاعدة وساكتة

-نشوان: گال شمسون ما ينطون لغريب

-فاضل: نعم وبالاساس اشوف ما نتوالم احنه من عالمين مختلفين..

تشتت نظراتنا ببعض ثلاثتنا ويه فتحة باب الحوش على كييف شلون الواحد الديسحب وخايف يطلع صوت، طبن منها بنات ثنين ماعرفتهن من بعيد يمشن ويدردمن بالهمسة من تقربن علينا عرفتهن ذني فيروز الي ملفلفة روحها بعباية راس وطالع مقدمة شعرها الاشقر واضح بطريقة غير متعمدة وعُلا لابسة جبة اسلامية بس شعدهن طالعات بنص الليل؟

-فيروز: الله ياخذها ونخلص منها فشلتنا امچ الله يفشلها

-عُلا: فيروزه مهما يكون تبقى امي ما اقبل تحچي عليها

-فيروز: خ** احسن والله لو سويتي الگلتلچ عليه لا اني اختچ ولا اعرفچ تريد تور....

سكتت جافلة بمكانها وعُلا كذلك طلعت عيونهن من مكانها من شافونا گاعدين بالحديقة، ضربت خدها عُلا وگالت بعفوية اطفال..

-صخام ولطام فيروزه انلگفنا

-فيروز: احم.. مساء الخير

-كيان: هلو بنات

-فيروز: چنه ببيت امنا لا تظنون بينا سوء

-كيان: لا براحتكم شعلينا احنه

-فيروز: تمام يله باي اخواننا المسلمين

دخلت تجر بـ عُلا وحسيت بـ نشوان يندسني بعكسه ويأشرلي بعيونه على فاضل العيونا صارت تركض وره فيروز..

-نشوان بهمس: اعوذ بالله من الخبث والخبائث

-كيان بهمس: استغفر الله من الذنوب العظام

-نشوان بهمس: النظرة الاولى حلال ميخالف ميخالف نسامحه

-كيان: وكأن السيد لگه شي احلى من الهندسة

-نشوان: اي بعلي احلى من الهندسة وابو الهندسة هم

-كيان: تأدب لا تحچي على مرة صاحبك

-نشوان: نعتذر عيني، هيووو ابو سرحة شو رحت لغير عالم والسبالات ترستنا

-فاضل: احم.. نعم نعم شنو گلتو؟

-كيان: حلوة فيروز مو؟

-فاضل: اسمها فيروز

-كيان: ايي وخريجة هم اتذكر گالت قسمها تخطيط عمراني ماعرف شنو هذا بالضبط بس گالت شغلها مثل المهندس وازيدك من الشعر بيت تريد تطلع للخارج تعيش ويه عمها

-فاضل: امممم جميل الله يحفظها

-نشوان: ويحفظك ابن عمي تؤبر ئلبي

-فاضل: نشوان لا تتساخف

-نشوان: عيب سيد عيب هاي النظرات والاعجابات والقلوب الجاي تطلع من عيونك

-فاضل: قلوب شنو؟؟ هسّ اني شسويت!

-نشوان: ابد بس شوية وتگوم ترگص گدامنا من الفرح

-كيان: راح احضر الحلقات

-نشوان: واني احضر مروان حتى يحچي بالمهر

-كيان: نخطبها شوكت اليوم لو باچر لو وره العرس؟

-نشوان: بعد بكيف السيد لشوكت يصبر

نحچي ونضحك وهو معاجبه يباوعلنا وگالب وجهه والغريب ما صاح بينا ورزلنا مثل عادته بالعكس حسيته مستمتع.. اويلي منو يصدگ فاضل تعجبه فيروز المؤدبة؟ وطبعاً هذا لقبها هنا بنات عمها يصيحولها بي للاستهزاء لانها بعيدة كل البُعد عن الادب..

-ابوووووووو فااااااااااااااضللللل

طفرنا ثلاثتنا على صوت الصياح الجاي من المطبخ، ركضنا نشوف شكو لگينه فيروز وهدى متكامشات يتعاركن بنص المطبخ وحدة ترزل بالثانية وطلعتلهن العلوية بالعوچية..

-فيروز: والعباس ابو فااااضل وابوو راااس الحااار ما اغسل القوووري والزهرررة ام الحسسسن تغسلي وغصباً على راسچ بت ناااظم

-هدى: سمعيي لچ بت صاادق ابو النسووان انتِ تغسلين القووري اليوم عليچ المواعين لو نسيتييي

-فيروز: اهييييييي تحلمييين اللزم سفنجة هستوني صبغت اظافري

العلوية فاككتهن وجرت كل وحدة من ايد تنتر بيهن بالهمسة "عود" وصل صوتها لمسامعنا..

-العلوية: بنات السووو فضحتنا وخزيتنا بصياحچن تفففف على تربيتچن

-فاضل: علوية دخلنا بدون استئذان نعتذر جداً على الازعاج

-العلوية: لا يمة العفو منكم سيد بعد چبدي

-فاضل: العفو منكم علوية على راسي

العلوية لفلفت روحها بشيلتها تغشي روحها وتحچي ويه فاضل مطلعة تك عين شكلها يخرب ضحك بس ويه فاضل هيچي تحچي يمكن شُهيب سولفلها عنه..

-فيروز: احنه نعتذر زعجانكم

تحچي بصوت هااادئ خافت ومنزلة عيونها عود مستحية وهي هستوها چانت تلعلع اما هدى ضاربة الدنيا بعرض الحايط ممهتمة..

ترخصوا منهن الولد وطلعوا راحت العلوية لغرفتها تسب بيهن وتعيد جملة وحدة "فشلتنا جدام السيد"..

-فيروز: تعالي كوري منو السيد ولچ؟؟

-كيان: هذا ابو المناظر

-فيروز: هااااا

-كيان: ها شكو

-فيروز: شكله مو عراقي بس حلو

-كيان: هو عجمي

-فيروز: حلو حلووو هم موهنديس؟؟

-كيان: اي وفد رجل صالح واخلاقه عالية يخبل

-فيروز: هااا اممم نعم جيد جداً

-كيان: شفتي نص دقيقة وعداچ امداني

-اي والله امداك يالكوري

گلبت عيوني بس سمعت صوته الغثيث ورايه طب يتبختر والعطر يهفهف سابح بي ما مصدگ شايف عطر، ضحكت فيروز وهمست بيني وبينها..

-اختصروا المحادثة لا تلگفكم العلوية بااااي

ركضت تصعد فوگ وعافتني ويه فاهد، انداريت عليه مچتفة ايدي لصدري توقعته راح يغثني بشي بس لا كلشي ما گال وعبرني بدون لا ينطق..

-كيان: ياااااا

-فاهد: ها؟

اندار عاگد حاجبه متسائل، تخصرت وتقربت منه اوگف مقابيله..

-مصدومة ما غثيتني بحچاية ورحت بسلام

ابتسم يمسح بعيونه صايرات حمر وللغرابة الشديدة هم ما حچى شي قلقت خفت السحر مأثر بي..

-فاهد شبيك

-شبيه؟

-شو متحچي معقولة السحر بده مفعوله؟

-لا بابا يا سحر غير العلوية دمرتني البارحة خنگتني بالخل والملح

-اكيد ما راح يأثر بيك؟

-لا لتخافين متسترجي مرت عمي صادق ال**** تسوي سحر حقيقي هاي بس كلاواتها المعتادة

-شبيها هاي مريضة؟!

-اي

-صدگ؟ شنو مرضها

-داء الاستچلاب

-هههههه فاهد والله عبالي صدگ مريضة

ابتسم وعافني يكمل طريقه وعاد اني لطشت وهم فتحت موضوع ورجع يوگف گبالي..

-اوگف صدگ نسيت اگلك على شي

-شنو

-شكراً لان دافعتلي گدام اخواني

-اي هلو هلو

-هاي شبيك تركض

-ولچ بابا سكراااان ما تشوفيني امشي واتطوطح روحي لا اسوي مصيبة

-يممة يا عاار تشرب ولك ساقط سرسرري متخاف ربببك انتَ

-روحي عني كوري لا تصير مصيبة

مشيت اعبره ولساني الاثول يغرد وارزل بي..

-كيان: مصيبة شنو يمة؟ لا لتگول نسيت اني ماحچي ويه سكرچية عربجية ادبسزية طايحيـ....

بلعت حچياتي من جرني من ايدي بقوة وجرني من رگبتي من وره خلى وجهي بوجهه ونتر بين سنونه وعيونه الصفر تجدح عصبية..

-من ادافعلچ لا تظلين تتشكرين مني وتنرفزينيي

-هاي شبيك هدنيي

-فهمتي لو لااا

-فهمت فهمت مو شكول نعمة انتَ

-اييي بالضبط مو شكول نعمة لا تظلين كلشيي اسويلچ وگلتي شكرراً متعلمين على التكفخخخ احنه على السب والفشايرر متعلميين ينداس على روسنااا ونكمل الشغل غصباً علينا ونگول حاضر وتممم والدماية تطافر من اجسامنا لا تلعبين بعقلي وتغيرين افكاري كياان

يحچي ويرجف مو بوعيه مبين ولسانه ثگيل شدني امثر عليه لدرجة انفي ضرب بأنفه وهمس بيناتنا..

-ما تستاهلين واحد مثلي كوري بس حظچ النحس وگعچ بيدي شجابچ عليَّ بس گليلي شجاابچ.....

**

"مسرة"

سبحت، فرشت اسناني، بدلت ملابسي ومسحت مكياجي، نزعت مجوهراتي وسويت السكن كير مالتي وتعطرت وتمددت بفراشي المريح وهاي صارلي فوگ الساعة احاول انام ومدا اگدر.. ماعرف بسبب صوت الاغاني لو بسبب صوت افكاري..

اعترف خايفة.. كلش خايفة واحس بشي غلط ديصير احس اكو شي اعمق من زواج على ورق منتظرني ويه شُهيب، خايفة منه وعليه.. خايفة منه لان لليوم هالة الغموض تحيطه و خايفة عليه من ابوية بنفس الوقت متأكدة ما راح يخلينا بحالنا حتى لو ردنا نطور العلاقة..

عجزت انام تعبت من وضعي صار يومين هنا مدا انام زين وباچر منتظرني يوم طويل، تمشيت شوية بالغرفة بلكت اتعب، لعبت رياضة بالخنسة اخاف لا البنات يگعدون وهم ماكو..

لزمت عطري ارشلي من جديد وحطيت حمرة وكحلة ومكياج كامل وانوب رحت اغسله وعدت السكن كير مالتي.. ازعج شعور بالدنيا هو شعور الارق تحسون بقلق وتعب وخوف من لا شيء..

لبست روبي فوگ ملابسي ورحت للمطبخ الي بالطابق الثاني مابيه انزل يمكن گلاص حليب دافي راح يفيدني، فتحت الثلاجة شفت ماكو بس حليب موز وماحبه خلص يعني لازم انزل مابيها مجال بعد..

نزلت الدرج على كيفي ضوه البيت مخنفس واضح الكل نايم، رحت للمطبخ سويت الحليب واخذت گلاصي ورحت اگعد بالصالة الچبيرة، تكمعته على كيفي بالي ويه ميس اليوم اتصلت بأكرم وگال معاندة متقبل تروح للروضة من وره اخر موقف صار وياهة..

شتت افكاري دخول ثنين شباب ولد عم شُهيب سلموا عليَّ وراحو للاستقبال، دقايق وجذبني صوت شخص ثالث يدخل يدندن بـ شعر فرنسي ابتسمت من شفته شُهيب يدخل ويفر بسويچ سيارته شكله يضحك اللغة الديحچي بيها تناقض لبسه العربي بالدشداشة..

-حلو صوتك

تبسمر بالباب يركز ويه صوتي يتمايزني من بعيد، گمت اتقرب منه اشوف شبي ليش وگف هناك، من صرت مقابيله بالضبط استغربت اكثر من نظراته يباوعلي كأن كائن فضائي گدامه..

-انتَ زين؟

-لا

-شبيك

-ماعرف دايخ

-خاف نعسان؟

-لا

عصر عيونه ومسح على شعره شكيت بي سكران بس اتذكر نشوان گال محد بيهم يشرب ورغم ذلك تقربت اتأكد اشم بي من بعيد..

-مو سكران شبيك لعد؟

ضحك وعصر خشمي بين اصابعه فكيت عيوني على تصرفه هذا شبي شخط؟..

-لا تشمشمين بيه مابيه ريحة

-لا بس شكيت بيك سكران

-من قبل عندچ هاي الحالة مسرة تتحسسين من الروائح

-شنو قصدك بـ قبل؟

ما جاوب فرك عيونه ومسح على وجهه ايده ترجف ماعنده اعصاب لزمتهن بقوة اتحسس جسمه حار يچوي..

-شُهيب انتَ متعاطي؟!!

-لا.. مستحيل

-لعد شبيك ترجف ومصخن

-مادري دخنت شي هناك بس ماعرفت شنو هو ههههههههه معقولة مخدرات هههههه

-انوب يضحك! منو انطاك تدخن؟

ضحك مرة ثانية بلا سبب وگال بعد صفنة بسيطة..

-ما مركز چنت انطاني ابن عمي علي جگارة ودخنتها

-عجيب شجاك وينه فكرك شلون تاخذ بدون فهم عقلك وين؟!!

گلب عيونه معاجبه كلامي حط كف ايده كله بوجهي يلزگه من صدگ عصبت من تصرفه بس ما حچيت لانه مو بوعيه..

-لا تظلين ترزلين بيه مو ابنچ اني

-شدخل ابني لو مو ابني ماما مو زين عليك!

-هسة خايفة عليَّ وانتِ تباوعلين لمالك!!!

-مالك؟؟ وين باوعتله

-هسة اصيحله واواجهكم

راح يهرول للاستقبال لزمت ايده اعيق حركته وجريته للهول اسد الباب علينا..

-من كل عقلك انتَ؟ شلون تواجهني ويه اخوك بهيچ موضوع شگد عيب

-مو عيب من تباعيله!!!

-عزه بعيني ولك تخبلت انتَ هاي شوكت باوعتله؟؟

-اليوم

-اصلاً وين شفت مالك اليوم شبيك شُهيب گمت تخبط!

-اي شفتي ورحتو اشتريتو كيكة سوه

-كيكة؟؟ لا گلبي لا هذا اكيد حلم

-حلم؟

-لا مستحيل حلمت بيه وبـ مالك رايحين نشتري كيكة؟

-يمكن

-ههههههه انتَ كلش دايخ روح نام عيوني روح

-ما

-ياااا

-ماريد بكيفي

-شُهيب زعطوط انتَ

-اكره ملابسچ المشلحة لا تلبسيهن بعد

-حاضر بس گول ياهنه خليني اروح احرگهن كلشي ولا تزعل عمري انتَ

-لا تستهزأيييييين

-ولك صوتك صوتك يبووو انفضحنا هسة تجينا العلوية

نفخ هوا ضايج وصار يروح ويجي بمكانه، طلع جگارة شعلها واخذ منها نفس واني باقية صافنة عليه صدگ لو گالو المخدرات والكحول تذهب بعقل الانسان ما حرمهم رب العالمين من عبث..

دار عينه عليَّ ونفخ دخان الجگارة بوجهي هاي اول مرة يسويها عادةً يشمره على جوانبه حتى ميزعجني بس مبين اليوم راح تنلاص!

گلبت عيوني ما انطيته اهمية وتمشيت للباب حتى اطلع وبحركة سريعة جرني من خصري يلزگني بي، وگف گلبي من وضعنا وتوترت كلش من قرب نفسه عليَّ وگال وعيونه مركزهن بوجهي بكل قوته..

-عيونچ حلوة

-عيونك احلى

-خشمج حلو

-خشمك احلى

-شفايفچ مال عض

-ماحب هالغزل الرخيص بس ميخالف اليوم سماح

-تقبلين اعضچ؟

-وتستأذن؟ شهيبوني انتَ صاير كلش صلف تدري؟

-بعدچ ما شفتي شي...

لزم راسي من وره ودفن وجهه برگبتي شهگت ممتوقعة حركته ولا متوقعة لمساته الي حاوطت خصري بتملك، گلبي دگاته تقرا مليون احس نَفَسي انقطع من دفو جسمه الي احتضني وعطره التغلغل بـ ريتي..

غمضت عيوني خايفة، خفت اضعاف من خوفي قبل شوية خفت اضعف واستسلم بين ايده، خفت من نفسي وخفت لا يجي احد ويلگفنا بهذا الوضع..

-مسرة قيثارة

همسها همس بأذني وطبع قبلة خفيفة عليها، كزبرت ونبتت اظافري بزنده بقوة دفنتهن هناك..

-لا تلعبين وياي مسرة

انصدمت، انصعقت، جمدت لا بل نبض گلبي وگف والرعشة زارت جسمي وزادت وضعي سوء من اردف بنفس الهمس..

-اذا تردين تلعبين اني مو الشخص المناسب مسرة

-شُهيب

-نبشتچ نبش عرفت كلشي عنچ

-شُهيب شبيك

دفعته عني ماعندي تعليق حاولت اسيطر على ملامحي وما ابين خوفي بس فشلت، فشلت وفَشلي ذريع بسبب كلماته التالية..

-اول مرة شفتچ بيها چنت حاس تشتغلين ويه ابوية ودزچ عليَّ تستدرجيني وتقنعيني

تقدم خطوة عليَّ ورجعت خطوة، اردف..

-دورت وراچ لحدما تعبت، عرفت ابسط تفاصيل حياتچ.. عرفتچ متزوجة وعرفت عندچ بنية وعرفت كلشي عنچ مسرة بس ماعرفت شي واحد

عيونه صارت بيها شرايين حمر يغمضهن ويفتحهن ببطئ، تقدم خطوتين ورجعت خطوتين انضرب ظهري بالحايط شديت على ملابسي من جوه اسيطر على اعصابي وگلبي يدگ سريعع ماعرف شنو راح يگول يا رب ميكون عرف الخايفة منه..

-شُهيب: ماعرفت شنو تردين مني؟

-ها

-شنو تردين مني مسرة؟ شنو استفاديتي من اشتغلتي وياي؟ عرفت متشتغلين ويه ابوية وعرفت ماعندچ علاقة بي، عرفت ابوچ يدفع لمنظمات مافيا حتى يحافظ على حياتچ وحياته، عرفته يورطچ ببعض الامور بس هو متأكد ما راح يصيرلچ شي لان بكل بساطة محد جاي يگدر لـ مسرة قيثارة حتى صقر ريماس نفسه!

-اني بنية فقيرة

-واضح

-وحبابة

-كلش

-واحب بنتي واخاف عليها

-صحيح

-كمل وين تريد توصل؟

-اريد اوصل لـ سرچ؟! شنو مشكلتچ وياي وليش اجيتيني بالتحديد!

-لان شعرك حلو

-شكراً

-العفو هاك بوسة

بسته بخده بوسة سريعة صفن عليَّ متفاجئ، للمرة المية اكره من اتوتر لان اگوم اللوص واچفص، لحظات دامت صفنته وضحك ينزل نفسه ويرجعلي البوسة على خدي بنفس السرعة ونفس الطريقة..

-مسرة: وحدة بوحدة تسويها؟

-عندچ مانع؟

-عندي

-ممتاز

-اگلك شو نعست راح نظل نسولف لو اروح انام

ضحك بقوة هالمرة يحرك راسه بحركات عشوائية، استغربت شلون واگف على حيله بهالطريقة وهو متعاطي بس واضح المخدر الي دخنه مو كلش قوي..

-گالها الاطلس

-الاسباني؟

-اول ما شافچ گلي هاي مو سهلة لا تورط روحك وياهة

-حرام عليكم هذا تشويه سمعة

-امم

-والله انقهر تره وماقبل اتزوجك بعد

-لا ارجوچ مسرة كلشي ولا هاي

-يله ميخالف أفكر بالموضوع، باچر عود اللبس فيونكة ماحب العريس يلبس رباط

-تدللين

-واللبس ساعتك الرولكس البيها شذرات اسود و..

-راح اعرف شنو غايتچ مسرات كلها مسألة وقت

-اوكي

ابتعد مني وملامحه تغيرت قبل ثواني چانن كلهن شَك وغموض بس هسة تغيرن، تغيرن لملامح حزينة حلگه تقوس مثل الاطفال البريئة وعيونه لمعت صفنت بوجهه اول مرة يسوي هالحركة وعرفتها صدگ مو تمثيل بسبب الغصة الي صارت بصوته وهو يگول..

-ياريت اطلع غلطان

-شنو

-اتمنى متكسرين گلبي مسرة لأني تعلقت بيچ

روحي انسحنت صعبت عليَّ اگله اني هم تعلقت بيك وگلبي جاي يتگطع وجاي اتألم كل يوم.. بهاي اللحظة تمنيت ما تقربت منه ولا وصلتله، ما شفته ولا حچيت وياه، تمنيت مكملة الخطة بگلب ميت وما اتعاطف واخاف عليه، لمت نفسي ولمت ضعفي وياه لان كل الصار بيناتنا غلط بغلط..

-روح نام شُهيب

-تمام

مغص مرد بطني من نزل نفسه عليَّ مرة ثانية انفه ضرب بأنفي، اخذ نفس عميق يستنشق وكأن هذا النفس الراح يرحعه للدنيا.. ضحك بخفة وهمس بيناتنا..

-ريحتچ غير.. لو تكونين بين الف وحدة هم اميزچ

-ريحة ورد ريحتي فديتني

-هههه فعلاً

-شُهيب

همهم يبلع بريگه، انفاسنا تبعثرت بتوتر واضح احس قوتي جاي تنهار، كمشت بـ زنده اوازن نفسي و....

-يا طايحييين الحظظظظظ

دفعته بسرعة مرعوبة بعد هالصوت العالي وانداريت على العلوية لازمة عوچيتها وفاكة حلگها علينا..

-العلوية: شمالكم انتمم ما تصبروون بهذلتوووا حالي خايبيين

-شُهيب: علوية طلعي بره

-العلوية: يا طايح الحظ يا ادبسز يا ساغط يا عار الزلام

ضربته بالعوچية على ظهره ما تأثر ولا اهتم انوب ضاجت ليش ما توجع شالتها تريد تضربه مرة ثانية ولزمتها امنعها..

-بيبي حبيبتي شعجب ماكو خصوصية بهالبيت

-العلوية: تدور خصوصية مرت الخوينس ما تنتظرين لباچر خايبة گرصيهاا وگعدي

-لا اني معليه هذا حفيدچ مستهتر گعد يگلي ريحتچ حلوة ويسوي حركات

-العلوية: ادري بي ابن جعيفر النغل امشي ولي نام لا اكسر هالعصاية على ظهرك

-شُهيب: شو صاير اكو صدى بصوتچ علوية؟

-شمسون: يا الله هاي شنو صاير هنا يا جماعة؟

-العلوية: ابنك واللماسته هنا يتسوفلون ولك جعيفرر

-شمسون: هههااههااههاا حبيبي بابا عفية عليك

-العلوية: خاااب هرررش هوايش ترفس بفادك ان شاء الله ولي غاد فاسق زنديق

-شمسون: يمة روحي نامي خلي الشباب يتونسون شبيچ شادتها لا يصير بيچ فتق

-العلوية: ااااااخ يا حرگة گلبي مخلفة چلااب وجراااوة ومطاااية وخنازيرر موش بشرر

اخذها وياه يضحك بصوت عالي مستمتع وهي تكتل بي الطريق كله كل شوية سامطته براشدي شفت گلبي بي هالكلب الناطق..

-شُهيب: روحي نامي وباچر اشوفچ

-على الاغلب باچر ما راح تتذكر أي شي صار هنا عيوني

-اتذكر

-متتذكر

-اتذكر!

-نتراهن؟!

-اي!

-يله خوش روح نام وباچر اسويلك امتحان

-تمام

من كل عقله راح صدگ ينام وعافني هنا، چان ضحكت مستمتعة على منظره اخيراً شفت شُهيب وضعه متبهذل وفاقد جزء من عقله بس مالي نفس هسة، شلت كلاص الحليب التركته بالصالة واخذته للمطبخ اغسله وافكر شلون بيه وشلون راح تكون ايامي الجاية؟..

حسيت على صوت طگطگة جايه من المنور مال المطبخ مديت راسي اشوف شكو وانتبهت لوجود بزونة ميتة منيميها على ظهرها ومفتوحة اطرافها الاربعة ومتروسة دم من اعضائها..

شهگت مكممة فمي من استوعبت هاي البزونة مأذيها ومغتصبيها وهذا فعل فاعل فعل انسان حقير نفسه دنت على حيوان؟!!

طلعت من المنور بسرعة وسحبت سچينة مال اكل من الكاونتر، رجعت امد راسي اشوف منين جايه هالطگطگة وچان اشوف منظر ارعبني!! منظر بلعني لساني وبلعومي كله.. منظر امرأة ايدها مدماية وواگفة على جهة تمسحها بوصلة.. لا لا مستحيل مستتتحيل تكون هي!!!

يتبع....

━━━━━━  ━━━━━━

عفية هالبيت كله مصايب 😒 بعد بيت بي شمسون ونريده يكون طبيعي؟؟؟ اكيد مستحيل هالشيي ☺️😂!!

توقعاتكمممم 😰؟؟؟؟

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

أيمكنني قتلكُ حين أغار... حبيبي؟ ♥️

━━━━━━  ━━━━━━

طلعت من المنور بسرعة وسحبت سچينة مال اكل من الكاونتر، رجعت امد راسي اشوف منين جايه هالطگطگة وچان اشوف منظر ارعبني!! منظر بلعني لساني وبلعومي كله.. منظر امرأة ايدها مدماية وواگفة على جهة تمسحها بوصلة.. لا لا مستحيل مستتتحيل تكون هي!..

-مسرة: بدور؟!

اللتفتت عليَّ تباوعلي بنظرات بلهاء، تقربت منها گلبي يرعد تمايزت وجهها المجرح وايديها المدماية وشعرها المنفوش والافكار غزت عقلي دفعة واحد..

-انتِ بدور؟

-ها

-انتِ بدور؟ بدور اخت جمانة؟!

-انتِ منو

جاوبتني بنبرة بلهاء ممفهومة نفس نظراتها بالضبط وترتني زايد وحسيت بالخطر ماعرفت شلون اتصرف وشنو دتسوي هنا ووين جمانة بالتحديد؟!

-شدتسوين هنا بهيچ وقت؟

-انتِ شعلييييييييييييييچ

صاحت بوجهي صووت حسيته اخترق طبلة اذني وزرفها، دفعتني على الحايط وگعت سچينتي بالگاع وقيّدت ايدي بكفوفها القوية المدماية، لزگت وجهها بوجهي ونترت بين سنونها المفرقة..

-انتِ منوو وليش اجيتيني شنو تردددين

-مسرة: هديني

-ما اهدددچ ماا اهددد

صوتها عالي لدرجة گلت بأي لحظة راح يجي احد هنا ويلگفنا بس العجيبة محد اجه طول ما احنه هنا..

-بدور اختچ وين؟

هدت ايدي وابتعدت كم خطوة، عصرت راسها بقوة وتغمض بعيونها وكأن اكو اصوات بداخل راسها تريد توگفهن، نزلت اخذ السچينة ومشيت ابتعد كم خطوة وعيوني عليها..

-بدور: راحت.. رااحت.. هددوناا.. اخذني.. بچيت.. امي.. احسان.. جمانة.. ثرى...

فز گلبي وفتحت جروحي بـ ذكرها لاسم امي، لزمتها من متونها اهزها ارجعها للواقع واهمس بصوت راجف..

-ثرى؟؟ تعرفيها ثرى مو؟؟ بدور اني اعرفچ انتِ اخت جمانة صديقة امي بدوور رجعي ويااي

صارت تبچي بصوت كلش عالي فزعتني وگعت روحها بالگاع تتبعثر وتجرح وتشخط جسمها بالصبة وتضرب بيدها حيل.. خفت وحسيت بنهايتي قربت قررت اتركها وارجع السچينة واصعد لغرفتي ليستوقفني صوت العلوية القوي..

-العلوية: مسرة!

شهقت جوه انفاسي بلعت العافية وصوتي وياه ما واجهتها وما درتلها وجهي هي تقربت ودارتني عليها..

-العلوية: شمالچ تنتفضين يما

بلعت ريگ اهز براسي بحركة ماكو شي، ضغطت على ايدي بقوة خفيفة و وشوشتني بيني وبينها..

-العلوية: بدور خوفتچ حبيبة؟ چا مو حذرتچن لا تفترن بنصاص الليالي يا بنياتي لا تخترعن وتنگطع خلفتچن

سحبتني وياهة لغرفتها گعدتني على سريرها وجابت قران تفتحه وتطبگه بوجهي وتسمي بأسم الله وتقره شي..

-العلوية: يوم احنه زلامنا ما يندگون بـ بدور موش صاحية عمت عيني عليها

-شبيها؟

-عقلها شخط ويه موت اخوها احسان

-ماااات؟؟؟

عگدت حاجبها على ردة فعلي القوية، انتبهت لنفسي وگلت ابرر..

-لان هي ذكرته هوايه گالت احسان عرفته اخوها وانقهرت هسة من گلتي مات

-اي عمت عيني مات بعز شبابه انكتل

-شلون؟

-مادري جعيفر جابه مدمى بنص بيتنا ويصيح بيه اجي اشوفه لگيته مزرف بالچيلات سودة عليَّ

عيونها دمعت ومسحتهن بـ شيلتها، گلبي انعصر بوجع فضيع بصعوبة سيطرت على دموعي وهي تكمل..

-گال جعفر يجوز اهله ذبحو من عرفو بي هرب بنت عمه بليلة ظلمة ويه صاحبها

-مو حلال؟

-لا الكلام لله ظلموا البت عقد عليها الزلمة بموافقة ابوها واخذها لبيته يومين وگلب حچو براسه اخوته العاريه وذكروا بقانون العشيرة ماعدنا بت تطلع لغريب

-وبعدين شصار

-ابوها شبعها كتل للطفلة اشتعل گبره الخايس وجاب زلمتها والا تطلگها همه بطلعان الروح صارو لبعض انوب تردي يطلگها صاح زلمتها لا بعلي ما اطلگ واخذها وياي غصباً على اثخن شارب

نزلن دموعي ما گدرت اسيطر عليهن مسحتهن بسرعة بينما العلوية راحت على ميزها تطلع كتاب قريت غلافه مكتوب "ضياء الصالحين" وكملت وهي تقلب بأوراقه..

-ما ظل شي على صلاة الفجر يما لا تنامين

-علوية كمليلي القصة

-هاا وين وصلنا

-من زوجها ما قبل يطلگها

-اي راحت لبيته وتمم زواجه منها وتعال طلگ عشتو شنهي الدنيا سايبة ويطلگ ويزوج بـ اسبوع واحد بس شتحچين ويه ال**** نبصوا الا ترجع بنيتنا عبن ليش ابن عمها عاشگها ورايدها وراح يموت على فراگها انفگست عينه

-اي؟؟

-ما رضى الزلمة اخذ مريته وراح.. شلون ووين وشوكت مانعرف بليلة ظلمة اختفو ثنينهم ياهي طاحت بيها جمانة طاحت وخذوها غصب وزوجوها نفس العاشگ الخسيس الگال عشگت ذيچ كتلها واذاها وانتقم منها لانها صديقة ثرى وما رضت تگول وين مكانها...

سكتت تگح وراحت تشرب من دولكة المي الي حاطتها بالشباك، دموعي بعد ما گدرت اللزمهن والغصة كتلتني هاي قصة امي.. قصة امي وابوية المعقدة وعشق امي الكبير واصرار ابوية حتى يدوم هذا العشق اخذها وهربها بمساعدة "شمسون" النذل!!

العلوية واضح متعرف ابنها الي هرب امي ولا هو نفسه الكتلها وغسل عارهم وباگها بنفس الوقت.. واضح هاي المرأة الحنونة متعرف بسواد وجه ولدها وشنو جاي يسوون وره ظهرها باقية هنا گاعدة بين القرآين والكتب الدينية وبين احفادها تداهرهم بلسانها القوي وتضحكهم وتوزعلهم حنان ودفو..

مسحت دموعي من رجعت تلبس نظاراتها الطبية وگالت بأبتسامة حنونة..

-ضوجتچ انه يَـ بعدي

-لا بيبي بالعكس بس ما عرفتو منو هرب البنية كل هاي السنين؟

-لا والله ما درينا عجزوا ولدي جعفر وصاحب يدورون گالو نجيبها هنا نرجعها ونعيشها ويانه وفنه الي يجيسها بس ماكو البت فص ملح وذاب

-يمكن ماتت

-مادري بعد العلم عند الله بس ما اظن لان صارله سنين جعفر يدورها وانه هم هاي البت براسي عمت عيني ما ارضى على كسر البنيات گلبي ما يتحمل

-اشوفچ تدافعين للبنات هواي

-يما البنت جنح طير مكسور بمجتمعنا لوما انه وانتِ ما ننصفها وندافعلها چا ياهو النه ويهتملنا بعلي ياكلونا الذكور لحم ويذبونا عظم

سكتت من سمعنا صوت بدور ترجع تصيح وتبچي وتحچي وحدها، صوتها عالي بمعنى الكل ديسمعها ومحد يروح يشوفها لانهم واضح متعودين..

-العلوية: ما ارضى على بنياتي ولا على وليداتي كلهم ببطن عيني بس انه من اول احبن البنيات واميل الهن اكثر

-اني هم احب البنات لسه اتذكر من عرفت اني حامل ببنية شگد فرحت

-البت دفو وحنية للبيت ياهو تهتم بالأم والابو بكبرتهم غيرها بعلي انه بنياتي منطيتهن محافظات ولد عمهن ماخذهن خمستهن وبعيدات عني بس كل اسبوع جايتني وحدة تفر البيت فر وتنام يم رجليناتي تگلي يما شنو تردين انه خدامة جوه رجليچ اگلها حشاچ يا بعد امچ من الخدمة انتِ تاج على راسي احطنچ..

مسحت فمها بالمنديل وكملت..

-زلمتها من يسمعني احاچي بنياتي هيچ يحترموهن ويقدروهن يعرف وراهن ام تكسر ظهورهم لو نزلو دمعة من عيونهن الحلوة

-فدوة لگلبچ علوية شگد حنونه

-مو بس انه حنونة حتى وهاب يحب بنياته ومداريهن چان لحدما مات كل بنياته يحبهن

-والولد؟

-ولده تعبهم اي حتى احچي حگ الله تعبهم وهلكهم كبرهم على العنف والتعذيب والترهيب بـ حجة اسويهم زلام

-وصارو مثلما يريد؟

-همه صارو اي بس يا يما فقد حبهم وحنيتهم وبرهم فقد زلامه الرباهم وعافو كلهم من وگع محد اهتمله شايلين ومحملين حقد على ابوهم.. ماكو وهاب بين وگعته ومرضه وموته اسبوع واحد هو على فراش الموت وماكو واحد من ولده اجه يشوفه

-استغفرالله

-شگد چنت احاچي وما ارضى عليه اروحن زعلانة ببيت اهلي من يعذب ولده كلهم مو بس ولدي حتى ولد ضرايري ما ارضى عليهم كلهم وليداتي شافني رافضة وما اقبل ارجعله اذا ما عدل نفسه صار يأذيهم بالخنسة ويهددهم محد يسولف شي لعلوية اقبال لا تتعاقبون وصدگ ضيييم تحملو منه ياله مات وخلصو

هزيت راسي متفهمة ترخصت مني وبدت تقره شي اشبه بالدعاء وتمسح على شعري وصدري وايدي.. صوتها بي بحة عجايز بس شگد يريح ودخل الطمأنينة على گلبي.. تعبت كلش انتبهت عليَّ واشرتلي بصفها ع المخدة حتى امدد، حطيت راسي وما حسيت الا واني اغفى بغرفتها..

حسيت ثاني يوم على ايدين ماريا تگعدني وتگول بفرحة حماس..

-يلا يلا گومي عروسة لازم نروح للصالون

فركت عيوني وباوعت لنفسي نايمة على فراش العلوية وحدي، باوعت للساعة شفتها بـ 11:00 الظهر گمزت من مكاني عزه بعيني تأخرت اني حجز الصالون مالتي بالعشرة الصبح ولسه نايمة!..

ركضت ركض فوگ سبحت فرشت اسناني وبدلت ملابسي مثل المخابيل وادور على صبا وجولي ذني وين موليات وكيان وجنات ليش ما گعدني!!

رحت للمطبخ اخذ أي شي آكله وشفت الكل متجمع هنا ديتريگ وفيروز متوسطتهن وميتات ضحك وياهة..

-مسرة: هاي شنو

-صبا: هاا ضلعي اخيراً گعدت تعال اكل تعال

-مسرة: ساعة بـ 11 بنات تأخرنا على حجز الصالون!

-كيان: لا حبي هستوها بالتسعة

-مسرة: لا شفت بغرفة العلوية بالـ 11

-فيروز: ساعة غرفة العلوية من زمن العباسيين عطلانة يمعودة

-فواطم: صحيح واني اشهد مر عليها العصر العباسي والمماليك والعثماني وهسة الاسلامي وبعد الـ...

-فيروز: انطمي انتِ وتاريخچ المعفن

-فواطم: اي والكعبة ما مصدگة راح اتخرج هالسنة

-كيان: شنو اختصاصچ؟

-فواطم: العشق الهيام الغرام تارييييخ

-كيان: اسفة بس ايوووو

-فيروز: اني عندي شنقوني ولا تأخذوني درس تاريخ

-هدى: اني چنت اكرهه بس سچاچة بي

-فيروز: انتِ بكلشي سچاچة دكتورة

-نور: شگد تلغن كافي من الصبح

-هدى: سكتي نور رحمة لأبوچ هو بس اليوم وراح نتفرق كلمن يرجع لبيته

-جنات: بنات اني ما راح اروح للعرس منو تطوع وتروح بدالي؟

غمزت فيروز وهمست لـ هدى سمعتها لان گعدت بصفهن بالضبط..

-فيروز: خلي ايات تروح بدالچ راح تموت من القهر

-هدى: باعت اختها علمود رجال گبوور

-فيروز: ما جاي اصدگ هاي نفسها ايات شبيها تخبلت والعباس اني رجلي اشاركه ويه عُلا اي غير اختي

-هدى: انچبي لا تروحين زايد

**

"صبا"

كملنا ريوگ وتفرقنا كلمن راحت تبدل نزلت جوه اشوف امي وين لگيتها شاده رأسها ونايمة..

-ماما شبيچ

-ام صبا: راسي راح يطگ ولچ الليل كله اسمع وحدة تصيح بالمطبخ

-صبا: عزززه منو هاي؟؟

-يمكن جنية ولچ سويتها على روحي من الخوف صباوي شلون بينا شوكت نرجع ساعة السودة الاجيت بيها

-ماما اجينا لخاطر مسرة ما اسمح لاحد يستنقص منها ويسألها وين اهلچ وليش جايه وحدچ احنه اهلها وعزوتها لو نسيتي من دگيتي صدرچ وگلتيلها اني امچ

-لا يمة انسى شنو بنيتي هاي سرور معزتها من معزتچ حبيبة امچ

-اوكي يله لعد امشي للصالون ويانه

-يله بس ابدل واللحگكم

عفتها تبدل وطلعت للصالة شفت العلوية گاعدة سلمت عليها ورحت للهول هناك اگعد واگلب بتلفوني، تچيت ظهري على الباب الثانية صايرة خشب التفصل بين الصالة والهول چبيرة وواسعة بس كلشي ينسمع منها واليها وصخام بوجهي ولطام على المحادثة السمعتها دارت بين مالك والعلوية بهاي اللحظة..

-العلوية: شمالك ضايج يما

-مالك: ابوية طيح حظظ حظي

-العلوية: شسوا هالططوة ما يتوب جعيفر الا ادوس بفاده

-انسي يمعودة تعودنا

-تعال يما تعال يبعد هَلي تعال انيمك بحضني اشبع منك گبل لا ترحون

ابتسمت على اسلوبها وياه استلطفت موقفها، خنست اصواتهم شوية ومالك حچى بهدوء شديد بس گدرت اسمعه..

-يمة عندي سؤال بس لا تفهميني غلط

-گول بعد امك

-جنات

-شمالها

-جنات ليش متعرف لهواي شغلات؟ يعني.. ماعرف شلون اشرحها بس كلشي متعرف للزواج

-اي واذا

-يمة حتى متعرف شلون يتكون الجنين وماعدها حتى فكرة عن الموضوع عبالها راح تحمل من لمسة بيوم عقدنا لزمت ايدها ورجلها بس حتى متروح تتعارك ويه فاهد وانوب شفتها وجهها اصفر وترجف تگول يمكن حامل!

-هههههههههههه يمة هاي بريئة مو ما تفتهم چا واذا تريدلك وحدة خبرة وملتحة

-لا لا طبعاً مو هيچ قصدي بس ليش معقولة ما دارسة هيچ شي هنا؟

-لا چا ليش درست وكملت سادس بس اكو ما يفهمن الا واحد يشرحلهن بتفصيل الممل او زلمتها يعلمها عقولهن بريئة ما يتخيلن شغلات بهذا العمق

-مادري غريب مكملة سادس ويكون ماعدها فكرة

-تريد اسأل ايوتة خليها تفهمك

-صدگ تحچين علوية؟!! ترديني احچي ويه اختها بهيچ موضوع حساس؟؟ اساساً ميهمني وماريدها تتعلم عوفيها هيچ احسن

-ياااااع چا شوكت نشوف خلفتك يما اريدن گبل السنة اشوف الفريخ بيدك

-دگعدي علوية يا فريخ

-چا ما نشوف بزرتك ملك ليش مو ازعل عليك ليش تحرم بت الناس من الخلفة وتربية جاهل

-يمة جنات صغيرة طفلة ومو مال تتحمل مسؤولية طفل خليها تربي نفسها بالاول وتكبر بعدين الله كريم

-اياااات وينچ ايااات

-ليش تصيحيهاا علوية شبيچ يمعوودة

-ايووته تعالي يمااا

-علوية اذا فتحتي الموضوع وياهة گدامي متشوفين وجهي بعد

-ولك مو جدامك ما تستحي انتَ انه احاچيها امشي غاد

ما سمعت ولا انتبهت الا لـ باب الهول تنفتح ويدخل مالك تصنمت بمكاني ازرزر بعيوني عليه بس هو ممنتبهلي بقى منطيني ظهره ويتسنط على محادثة العلوية وايات..

-العلوية: تعالي يوم اسألچ چم سؤال

-ايات: تفضلي علوية

-العلوية: هنادي حاچت جناوي وعلمتها على سوالف الزواج لو بعدها؟

-ايات: هاا..؟؟

-يما لا تستحين صح انتِ ما متزوجة بس عاقلة واعرفچ تفتهمين ورزنة بس جاوبيني هنادي مرت ابوچ العار حاچتها لو بعد؟ انه ماگدر اسئلها ما احاچيها هالعايصة

-لا ما حاچتها

-واختچ ما تعرف شي؟

-اي متعرف

-چا ليش مو لازم تكون دارسة وتفتهم؟

-جناوي تطبيقي بيبي ما دارسة احياء بس بالثالث متوسط وما متعمقين مثل السادس

-هااا يعني ما تعرف الفرخة

-لا متعرف لشي

-چا شلون هساع

-مادري

-يله انه اتصرف يما لا تشيلين هم.. الله يرزقچ بالزوج الصالح بعد چبدي يا ايوته يالنازكة..

ثواني وصاحت العلوية لمالك يرجع طب وطلع وما انتبه لوجودي متت ضحك بس غلست، انتظرتهم لحدما كملوا حديثهم وراحو ياله رجعت لامي ورحنا كلنا سوه للصالون..

توقعت راح يكون الوقت كله فرح وونسة بس چان العكس تماماً كيان وجهها اصفر وترجف ومبين عليها خايفة من زواجها وجنات مبوزة ومتتحچه ومسرة متوترة گعدت بصفها الكوافيرا تمكيجها وهي سارحة وتفرك بيدها..

-صبا بهمس: شبيچ سرور

-مسرة: شنو

-شبيچ متوترة من الصبح حسيتچ مو طبيعية صاير شي؟

-اي

استأذنت من الكوافيرا تاخذ ريست كملت مكياج عيونها وگامت تروح للحمام وصاحتلي..

-صباوي شُهيب كاشفني

-شنووو

-اششش صوتچ احچي بالهمسة

-لچ شلون مسرة شلون كشفچ؟؟؟

-من البداية هو كاشفني ويدور ورايه حتى واحنه سوه يدرس كل خطوة وكل تصرف ويايه

-عزا العزاني مسرررة لا يدري بالخطة وتروحين ترااب

-مادري ميتة خوف اتصلت بأبوية بلغته تخبل گوم الدنيا ما گعدها گلي السبب منچ انتِ مفضوحة صبا اني مفضوحة؟

-لا ابد تصرفاتچ وياه طبيعية بس هو ذكي سرور اتذكر من گلتيلي هو المفضل مال ابوه ويلگفها على الطاير

-اي يصيحله نمري بس ماتوقعت راح توصل لهاي المواصيل وبليلة العرس يتعاطى ويجي يچفصها يمي

-يمممة انوب يتعاطي مخدرااات؟؟

-لا لا بس منطي جگارة ودخنها بدون لا ينتبه هسة مو هذا موضوعنا على الاغلب شُهيب ميتذكر شي من البارحة بس اني اتذكر كلشي ولو تعرفين شگد مأثر بيه كلامه گلبي جاي يتگطع

-تخافين لا يطلع يمثل عليچ وكل اليسوي مو حقيقي؟

-اي واني.. اني...

غصت بكلماتها ونزلت عيونها تضيع دموعها، حضنتها اهدأها واطبطب على ظهرها وافكر شنو هالكارثة هاي شلون راح نحل هالسالفة..

-مسرة: راح اكمل واشوف ليوين راح يوصل

-صبا: ماتوقعه يمثل عليچ سرور

-ليش تگولين هيچ

-لان كل ممثل يجي دور يبين بي وجهه الحقيقي بس شُهيب حتى من يطلع وجهه الحقيقي ميطلعه عليچ، يخاف عليچ وميقبل تشوفي بصورة مو حلوة لا تتشوه صورته گدامچ، سرور هموسچ يهتملچ لدرجة حتى نبرة صوته تتغير من يحاچيچ وعيونه كلها حنية وعطف مستحيل هذا يمثل

مسحت الدمعة الخانتها ونزلت خفت لا يخرب مكياجها وكملت بنفس النبرة الهامسة..

-انتِ بنفسچ گلتيلي ماكو واحد يحن عليَّ بگده ولا اكو واحد يخاف على مشاعرچ ويعاملچ بهاي النعومة غيره وبدون لا تحچين اني مو عمية وجاي اشوف كلشي شگد طيب ولطيف

-البارحة گلي اتمنى متكسرين گلبي لان بديت اتعلق بيچ

-صحيح وهذا الي الكل ديشوفه، يجوز صح يدور وراچ وحقه يريد يتأكد قبل لا يدخل بعلاقة عمل او صداقة او زواج كل انسان يدور وره الي راح يكمل جزء منه لا تزعلين يا روحي وكلشي بالايام يبين

-صح

-يله حب اليوم عرسچ ولو هو على ورق بس ميمنع هالشي تتونسين وترگصين وتفرحين وتغيرين جو تبقين ملكة اليوم وكل الانظار راح تكون عليچ ماريد احد يشوف الانكسار بعيونچ ولا نظرة الزعل اريد الكل يشوف الواثقة بنفسها مسرة قيثارة!!

ضحكت وبينت اللماستها ضحكت وياهة وتحاضنه حضن خوات ورجعت تكمل مكياجها بعدما تغير مزاجها بالكامل، عيونها ضحكت ولمست الفرحة بصوتها البده يدندن ويه الاغنية وتسوي واهس لـ كيان وجنات والباقيات..

وگفت فيروز وگابلتها هدى يرگصن بنص الصالون وجروني وياهم.. انضمت جولي ومكياجها عافته على النص وسحسلنا تسنيم گوة قبلت ترگص گضتها حرام وميصير..

تغيرت الاجواء والعرايس اخيراً فكت عگدة حاجبهن وبدت تبين علامات الفرحة والليونة.. بس اني عقلي وبالي ويه كلام مسرة ماعرف شلون طلعت هاي المواساة مني واني بداخلي جاي اطگطگ، لو طلع شُهيب فعلاً يضحك عليها ويلعب هاي كارثة.. كارثة حقيقية!..

**

-عرريس اخونااا الليلة عريس اخووناا الليلة

-شمع وورد نهديييله.. عريس اخووونا الليلة

وگف فاهد بنص المحل يهز چتف ورگبة ويه ولد عمه (قصي، خالد، جلال و غياث) ذولة اقرب شي عليه اشوفهم ونفس الهيلگة والخبال والعضلات والروح المسودنة..

-جلال: كككلللييييييييييييشششش

-غياث: ولك هي كللللووووش مو ككللليييش

-جلال: انچب نفس الشي المهم جاي اهلهل للعار

-قصي: والله ما يستاهل اتعب لساني واهلهل علموده بعلي راح اطلعها باليوتيوب احسن

فتح هلهولة مصرية باليوتيوب وعلگها خبصنا خبص، اجاني غياث ومد التلفون الي يگول..

-غياث: نشوان بشرفك غيرها بين ما اللبس القميص

-فاهد: ولككك ما اسمحلك تتأمر على اخو مرتي

-نشوان: اهوووو بدينا بالخرط

-فاهد: شبيك شوشو احنه هسة نسايب عيب تگول عليَّ خرط

-نشوان: اني لوما فاضل وشُهيب ما اجي هنا واعكر مزاجي

-فاهد: يتعجر مزاجك لان اليوم اختك تنام يمي؟

-نشوان: يااااااااا عااااااااار

تكامشت وياه اريد اللوحه ببوكس اغير ملامح وجهه وفاككنا مالك..

-مالك: حتى بيوم العرس تتعاركون!!!

-نشوان: خلي هالعار يدعببل ما طايق اشوف چهرته السزز

-فاهد: شوف مالك اني معليه هو جاي يتجاوز لان تزوجت اخته واليوم انيمها بحضـ.....

لصم حلگه مالك وشمره على غياث وجلال..

-مالك: اخذووو هالزعطوط من وجهي

-فاهد: مشاعري العضروطية جاي تتأثر

-جلال: حتى مشاعري

-فاهد: شبيك يغارون لان راح اتزوج كوري

-غياث: صار بنفسي اشوفها

-فاهد: انچب لللللك ما اسمحلللك اطططيح حظك اذا عدتهاااا شرررفي هاي عرررضيي اغاار

-علي: ما گال اريد اگرط كوري گال اريد اشوفها

-فاهد: طااايح الحظ انتَ منووو وتجيب اسم مرتتييي على لسااانك الوصصصخ المليااان خ***

-جلال: عيب شباب انچبو لحد يتجاوز حدودة كافي

-قصي: يا بني ادددم اسمها مو كوووري

-نشوان: اي ميهم انچبو زوجها ميقبل تجيبون حتى طاريها عفية فاهد

-فاهد: لعد شلون ضلعي هاي كوريتي اشگه اليجيب طاريها

-مالك: المبالغة العدكم تلعب الروح

-قصي: ولك غياث ما شفت جنات البارحة غير شگتني شگ اني ما شايف هيچ بنية

-غياث: انتَ شايف العيون اويليي تدووخ

-جلال: رعطت ام امي گ....

ما كمل جملته واجاله بوكس طاير من مالك اندار على قصي وغياث كلمن ينطي بوكس وشردو يضحكون الادبسزية..

-مالك: عااارات ادبسزززية وين تشردوون وراكم وراااكم طايحين الحط ال****** ال*******....

نزل فشاير ومسبات حتى بغير لهجة اظنها مغربي لان كلشي ما فهمت وفاهد فاطس ضحك ويهز برگبته..

-فاهد: هاا هاا منو يبالغ هسة

-مالك: لعد حچيهم عن كيان مثل حچيهم على جنات؟؟؟

-فاهد: ماسمحلللك تگول اسم مرتي على لسانك ماالك احترم نفسسك

-فاهد انچبببببببب

دفعه متنرفز وهذا بس گاضيها يضحك، ذب نفس متنرفز ونزع قميصه يبدل واني هم رحت ابدل كلنا بغرفة العار فاهد ببيت ابوه مو غرفة تگولون قلعة شكبرها..

-مالك: وينهم اخوانك وفاضل؟

-نشوان: طلعو بشغلة وراجعين

-فاهد: وانتَ شعجب ما رحت وياهم

-نشوان: لان شُهيب گلي ابقى هنا احرس الچلب فاهد لا يسويلنا مصيبة

-فاهد: ها شعجب عادةً مالك يحرسني

-نشوان: مالك هستوه اجه والحمدلله خلصني منك اني رايح

-مالك: لا نشوان لا تروح كمل تبديلك ونطلع كلنا سوه

بنفس اللحظة انفتحت الباب ورجعو شُهيب ومروان وفاضل ودخلوا وياهم ولد عمهم الادبسزية الي تحارشو بخطيبة مالك متخبين بظهر شُهيب ويضحكون..

-مالك: ذولة الزبااايل ماريد اشوفهممم

-شُهيب: تندموا واجو يعتذرون

-مالك: لو يبوسوون رجلي هم ما اقبل اعتذارهم برااا يله ولد الكلب برررا

-غياث: سوينا العلينا فاهد افزعلنا ولك

-فاهد: مالك عوفهم اني گلتلهم يضوجوك

-مالك: انچبب واكل نعل وقناادر واطلع وراهم

-حلال: فاهد ما تحچي نعال بگصتك

-فاهد: اهووو شبيك متتحمل انتَ اني گلتلهم يدوسون وياك حتى نطور لهجتك العراقية حبيبي

-نشوان: تطور خايس مثلك لا جديد

-مالك: ولكم تلعبون على اعصاابيي

-قصي: على الاقل طلعنا العرج العراقي عندك مالك

ما قصر مالك نزللهم نزلة ونص بالمغربي يغرد عليهم وفاهد كل شوية يندار عليهم يترجم ويگلهم حمى زايد وهاي مسبات من العيار الثقيل حتى ابهاتكم حرگهم بالفشاير..

-غياث: يلا يستاهلون النغولة

-جلال: اي والزهرة مالك كثرلي كم فشورة مرتبة على ابوية

عبرهم شُهيب يروح يبدل واحنه هم وياه، مروان ماله علاقة بأحد ميسولف وفاضل المسواك بحلگه يفرك سنونه ويستغفر..

-فاضل: استغفر الله اكو ناس تستمتع بالكلام البذيء

-نشوان: ادبسزية وطايحين حظ العياذ بالله

-مروان: نشوان وين سترة البدلة مالتي؟

-نشوان: هاي هي فاكهة حياتي.. شُهيب ما فهمتونا كيان راح تروح شهر عسل لو لا خلوني احضر دموعي من هسة

-شُهيب: حسب علمي لا متروح لان عدها جامعة

-فاضل: وانتَ حبيب هم تروح ويه مدامتك؟

-شُهيب: لا عدنا شغل

-فاضل: شبيك شُهيب وضعك ما عاجبني ماذا دهاك

باوع لـ مروان حسيته ميريد يحچي گدامه انتظره لحدما راح للحمام يسوي شعره ياله اللتفت علينا وگال..

-شُهيب: فاضل عندي سؤال اني جاي احلم احلام غريبة هالفترة هم يتحققن لو يعتبرن اضغاث احلام؟

-فاضل: مادري حسب الحلم وحسب ساعته اكو احلام مخربطة وتكون متداخلة هاي تعتبر اضغاث احلام

-شُهيب: حلمت بمالك ومسرة رايحين يشترون كيكة سوه وراحو يحتفلون!!

-فاضل: حبيب هاي مو بس اضغاث احلام هاي غيرتك نبصت بنص الحلم

-شُهيب: والبارحة صار شي غريب مادري هو حلم لو حقيقة بس مستحيل حقيقة على التچفص الچفصته واني اتذكر ما شفت مسرة البارحة مو نشوان ما شفنا البنات؟

-نشوان: صح ما شفناهن بس بالليل كيان حاچتني بالحديقة

-شُهيب: همزين يعني حلم

-فاضل: شنو صار بالحلم

-تچفيص بتچفيص وعاتبتها ليش راحت تشتري ويه مالك كيكة وبعدين گعدت اتغزل وهي تگلي اللبس فيونكة ماحب الرباط

-فاضل: اممم اظن بي تفسير هذا

-شُهيب: صدگ؟؟ شو اني اشوفه خرط

-فاضل: نعم نعم تفسيره راح تنرزق بطفل قريباً

-شُهيب: فاضل لا تلعب عليَّ

-فاضل: شُهيب روح طم روحك على هاي الاحلام الخايسة ناس تحلم تشتري بيوت وقصور تلگه ذهب، تخلف، تتزوج، تشوف ثعابين وامور اخرى لا الاخ هنا يحلم رايحة خطيبته تشتري ويه اخو كيكة

-نشوان: بله الكيكة چانت ككو لو بيضة؟

-فاضل: نعم گللنا حتى اعرف افسر عدل يا ترى راح تجيك بنت ام ولد

-شُهيب: شگد تافهين

-نشوان: هسة شنو راح تلبس فيونكة لو رباط

-شُهيب: رباط

-فاضل: واذا طلعت تحب الفيونكة؟

-شُهيب: لا ماتوقع شخصيتها مال فيونكة...

**

"كيان"

وصلنا للقاعة ودخلنا لغرفة التبديل نرتب نفسنا، گلبي مقموت وميتة خوف شگد حاولت اعدل ملامحي وما ابين روحي ضايجة او خايفة بس بالاخير فشلت من قرب وقت العرس..

اكثر شي موجع گلبي مو لان راح اتزوج فاهد هواي تزوجن زواج تقليدي ونجح ولا لان فاهد مسودن وغريب هوايه تغيرو بعد الزواج بس الراح يموتني قهر تزوجت اخو الاحبه وراح اضطر امثل اني بخير ومابيه شي والوضع طبيعي عندي.. والاتعس الاحبه اليوم هم زواجه وراح نتلاگه بمشاعر باردة من طرفه ومشاعر متوهجة وتقطر جراحة من طرفي..

-جنات: ما جاي ينلبس البرگععععع

صاحت بـ جزع وعيونها مغرغرة بدموع اعرف سبب جزعها مو البرگع ولا ليش ما رهمت تسريحة لشعرها بسبب قصره واضطرت ام الصالون تسويله فيكة بس بالگذلة لفتها.. سبب بكائها لانه اليوم عرسها واختها الي بمثابة امها متحچي وياهة والأمّر من هذا راح تتزوج بالاكراه من ابن عم التحبه جاي تشوفون التعاسة؟

هدأتها اواسي بيها واواسي نفسي بنفس الوقت، رتبت البرگع على راسها يناسب تماماً بدلتها نفس الموديل.. بدلة جنات منفوخة بـ تول مثل بدلات الاميرات، صدرها وظهرها مفتوح وصدرها كله شغل بـ لؤلؤ صغير ولمع ناعم مو اوڤر وتنزل بـ نفس اللمع الناعم للاطراف والبرگع نفس الشكل.. مكياجها بسيط كلش ام الصالون ماقبلت تحطلها شي ثگيل گالت هي حلوة من الله ولا نخرب جمالها اكتفت بمكياج وردي فاتح لطيف جداً وفيكة حلوة بگذلتها شالت جزء منها وسوت الباقية كيرلي مفتح..

حطيت مالتها البوكيه الوردي بيدها واخيراً جهزت جنات وطلعت اول وحدة من المنزع تتحضر لجلسة التصوير قبل لا تجي الناس، توترت بالزايد من اجت فيروز تستعجلني اني ومسرة وتگول..

-اول واحد يدخل مالك ياخذ صور ويه جنات لانها محجبة بعدين يجون فاهد وشُهيب حتى تاخذون صوركم بناات بسرعة كملو

حسيت صار عندي لعبان نفس من الارتباك گمت اطگطگ، باوعت لروحي اتأكد من ترتيبي وعدلت بدلتي البيضة، مابيها تفاصيل هوايه عبارة عن بدلة ستن ثقيل منفوخة بنفخة بسيطة وبيها فيكة من يم الخصر دانتيل ورد ناعم وتنزل سادة على طولي بس الشغل كله بالبرگع يخبل اول ما شفته انبهرت بي كله عبارة عن ورد ناعم نفس الموجود بالخصر وطبعاً اختيار البدلة چان ذوق مسرة بوكتها اخذت رأيها بوحدة عجبتني وگلتلي هاي احلى واخذتها..

حبيت يبقى شعري مفتوح كيرلي وتشده الي من وره بشي بسيط ولبست تاج مرصع بكرستال ناعم، مكياجي بسيط نفس جنات ميلوگلي مكياج طوخ، ضلال گليتر فضي على جفوني وايلاينر بسيط وكحلة وحمرة لا هي وردي ولا احمر صاير اللون بالوسط بس كلش عجبتني وام الصالون گالت مكياجي نفس الكوريات لان يلوگ لملامحي..

كملت ترتيب نفسي واخذت البرنص الاجيت بي لان البدلة صلوخ حطيته على اكتافي وطلعت ويه مسرة الي غطت نفسها بـ برنص ام صبا لبستها..

گعدنا بالقاعة اني ومسرة وفيروز وصبا وهدى الباقين ما سمحولهم يدخلون هسة الا ويه المعازيم يجون، جنات واگفة على جهة تاخذ صور انفرادية واني والبنات نسولف بجمال القاعة ونزاكتها..

-صبا: ولچ مسرة العراق شگد متطور تذكرين عرس بنت عمتي وين سووا

-مسرة: اي هاي بـ 2013 اجينا لعرس بنت عمة صبا القاعة تخزززي الكوشة تفشل فد انقهرت على العروسة بالبداية بس بعدين شفتها مقتنعة وفرحانة وهذا المهم

-ههههاااهههاااههاااا تعال مَلك تعال ابوية لا تستحي

اللتفتنا على صوت شمسون الغثيييث وهو يشجع بـ مالك حتى يدخلون، طبوا سوه وشمسون الوصخ صار يصفگ ويصوفر من شافنا..

-شمسون: واااااو واااااو واااااو شنو هذا الكيك هنا الله يساعد ولدي اليوم هههاااههاااهااا

-كيان: يمة يوغف على الگلب

-مسرة: راح اتقيء

-فيروز بهمس: تره هذا عمي

-كيان: عززه شگد عيب نسيت اسفة

-فيروز: عادي عادي هو حموضة احچي عليه ما اهتم

-هدى: چنت احبه بس وره فصلهم الناقص ويه ايات وجنات كرهته

-صبا: اني بس اريد استوعب الصلافة والجرأة وهو يبدل بين الخوات بآخر لحظة

-شمسون: ااااااه يا لجمالكِ السومري ونظرات عينيك البابلية

وهذا الغزل چان موجه لـ مسرة القرفانة ولصمته بأبتسامة تلزيگ حتى يعوفها..

-شمسون: نظرات عينيكِ الآسيوية اهلكت قلوبنا كياني

وهاي الي، ابتسمت واندار على جنات رفع ايده وگال وهو يغمز لـ مالك..

-شمسون: "يبو طول الحلو

بوصفك تعبت الناس

من شيل الحسن

ما تعب حيلك؟!

بقالب هالبشر

الله حط عيون

وانت بقالبك

بدرين منطيلك.."

المصورة: هههههه الله الله شلون عم فرفوشي انتَ عمو نيالهن چناينك

-مسرة بهمس: انچبي لوگية

-شمسون: حبيبتي انتِ مصورتنا الجميلة العزيزة اريدچ تدللين ولدي بالصور اريد صور كلهن اغراءات واثارة اريد يقشعر جسمي من اشوفهن واسترجع ذكريات عرسهم

-هدى بهمس: خوب گول تريد فلم +18 وخلصنا ليش مستحي عمو

-الصورة: من عيوووني الثنين يله بيمن نبدي؟

-شمسون: بـ فاهد وكيان نبدي مَلك استريح هنا وليدي جنات اذا تردين تلبسين حجاب روحي عمو

گلبي گام يدگ دنابگ من الخوف حتى رجليه بادت ماگدر اوگف عليهن من دخل فاهد يوزع بوسات بالهوا للمعازيم الوهميين ويگول..

-فاهد: شكراً شكراً بلا تصفيق رجاءاً حبايبي احبكم جميعاً نلتقيكم غداً

-شمسون: يله فهدي يله بابا

-فاهد: الله هاي شنو كوريتي شطالعة تشگ ششششگ

طلع مالك يعوفنا وفاهد وگف مقابيلي مباشرةً ولزمني من خصري يسحبني منه، نزعني البرنص ورفع كف ايدي وطبع قبلة خفيفة عليه غمزلي وهمس..

-احب ريحتچ

-حبتك سليمة

-احبچ كلش

-باع الچذب

-صح بهاي چذاب

-فاهد شايف لو سويتلي حركة سخيفة گدام ابوك واخوك احرگك وروح امي

-الله اموت على الحرگ

-فاهددد

-كياننن

-فاهد لا تعيب عليَّ مشكولة ذمتك تسويلي شي وتحرجني اموتك بيدي اطيح حظك اسويلك وشوم جديدة بجسمك بـ...

-بـ قُبلاتچ؟

-ايعع الله ياخذك ولك ايييع وخر عني

ضحك بصوت عالي وجرني للستيج حسب اوامر المصورة، اخذنا كم صورة حلوة مابيها شي ولا شغلات سخيفة لحدما بدت تترعن الحقيرة وتطلب منه يلزمني من خصري لو يقرب وجهه من وجهي واخر فكرة سخيفة توصلتلها هي..

-بوسها عريسنا

-كيان بهمس: على خدي اشعلك لو بغير مكان

-فاهد: يله ميخالف نضم ذيچ بعدين

باسني على خدي والمصورة اعترضت وشمسون يضحك ومكيف..

-المصورة: ابوك يريد شي مغري بوسها بوسة عشاق عيني عريسنا

-شمسون: اي يله بابا تحركو ما جاي احب حركاتكم، مَلك اطلع باباتي خليهم ياخذون راحتهم خاف مرت اخوك تستحي منك

-مالك: تمام

-فاهد بهمس: اجيبلچ نايلون يعزل؟

-كيان: النايلون ضمه اللفك بي واطمك بگبرك

ضحك بصوت عالي وبحركة مفاجأة دنيئة وصخة جرني وباسني بقوة، فكيت عيوني على وسعها اريد اتحرك ماگدر مقيدني لازمني من متوني بقوة حسيت اصابعه طبعن بيه، گلبي گام يدگ بقوة، ارتبكت وحسيت بجسمي يرجف وانفاسي انقطعت لحدما ابتعد مني يضحك والمصورة مستمرة بالتصوير وتشجع بينا..

-كيان بنتر: اني اعلممممك فااااهدددد

-شمسون: هههااههاااههها ميخالف ميخالف تستحي چنتي

-كيان بهمس: والله حسابك بعدين اني الك حقير نذذل زبالة

-فاهد: جري نفس كياني بعدچ متأثرة و تلهثين وانتِ تحچين حتى عيونچ بعدها ذبلانة

درتله ظهري ارجف واهفي على وجهي، اجوني مسرة وبقية البنات يهدأوني ومبتسمات عبالهن خجلانة..

-فيروز: ههههههه درنا وجوهنا والله ما شفناكم بس هدى السافلة باوعتلكم

-هدى: تخبلووون ومنظر يجنن مستحيل افوته شكررراً عمو شمسون رجعت احبك فديتك

-مسرة: you guys are such a cute couple

ابتسمت بوجههن اتحكم بأعصابي، كملتلي المصورة بعض الصور الفردية وبعض الصور فاهد ويايه وفد خبيييث يمة يمة گلبي شلعه ساعة يجر بشعري وساعة يخربه وساعة يگلي بوسيني خلي يصير طبع حمرة على خدي حتى اصورها وانزلها ستوري اغور حمرتي يمكن تشوف الستوري ماعرف منو هاي حمرته بس هوواي هووواي يذكرها..

اخيراً بعد عشرطعش ساعة كملنا جلستنا وره ما انهد حيلي واجه دور مسرة وهموسها، دخل شُهيب ولا ارادي الكل ابتسم على ردة فعله وهو يشوف مسرة عيونه تلمع برغبة، بحب ولهفة، عيونه بيهن حچي ميحتاج يگول شي ولا حتى يسلم بس مع ذلك شُهيب جنتل مان وتقرب منها لمس كف ايدها وطبع قبلة خفيفة عليها فوراً اخذت الصورة المصورة من جمالها وجمال نظراتهم خصوصاً بعدما گال بصوته الهادئ الوقور..

-مبارك علينا ماي ليدي

ضحكت من غطت فمها واندارت على جهتي وجهة جنات الملفلفة نفسها بالبرنص وگالت بهمس..

-مسرة: الخفيفة تسرسحت

بقى منحني منتظرها توگف بجانبه وهي ما تأخرت بسرعة گامت ولفت ايدها بين ايده وراحو للستيج..

-شمسون: اييه دور نمري هسة، مصورتنا اريد شغلات مغرية يشوفوها جهالهم بالمستقبل ويتونسون عليهن

-شُهيب: شغلات مغرية يشوفوها الجهال؟ هاي اول مرة اعرف الجهال مسموحلهم يشوفون هيچ امور تخدش برائتهم

-شمسون: ميخالف بابا سماح انتو اهلهم چا همه شلون اجو للدنيا هههااههااههاا

-المصورة: ههههه يله عيوني عرساننا اريد حركة حلوة منك نمرر

-مسرة: اسمه شُهيب مو نمر!!

-المصورة: ههههههه اوكي حبي كلشي ولا تزعل عروستي يله شُهيب انتَ تبدي

وگفوا على جهة حتى ميبينون گدام فاهد وبدوا ياخذون صور بس حركتهم لينة ويه بعض عكسي اني وفاهد بيناتنا حقد وكره همه شفت بيناتهم خجل وتوتر ولمسات مبعثرة لا ارادي اليشوفهم راح يتنهد بـ حُب..

-المصورة: انزع سترتك حبي

-مسرة: نعمم؟؟؟؟

-المصورة: هههههه يمعودة بس سترته على كيفچ

-مسرة: تعليقي على كلمة "حبي" هاي شوكت صار حبچ حبيبتي؟

-شمسون: اااااه احب الغيرة

-المصورة: اسفة حبيبتي مو قصدي بس كلمة طلعت مني لا ارادي حتى العريس القبله فاهد هم گتله وزوجته ما اعترضت

-مسرة: تمام ما اختلفنا بس اني ماحب وحدة تگول لزوجي حبي رجاءاً

-المصورة: على راسي حبيبتي اعتذر

ابتسمت مسرة ورجعت تكمل جلسة التصوير سمعتها تدردم شي ويه شُهيب وهو يضحك تمنيت اروح بنصهم واسمع واجتني الفرصة على رجليها من المصورة طلبت مني اللزم برگعها من وره علمود الصورة، وگفت وراهة واسمعها تگله..

-خو انتَ كيفت

-شُهيب: هههه ليش اكيف هسة هي منو واهتملها

-ديلا خوش

-مسرة صدگ چذب معقولة زعلتي؟

-لاااااع

-يا ستار هههههههههه

-ليش تضحكك

-لان وجهچ صار احمر وايدچ ترجف ما توقعتچ هيچ تغارين

-اغار على كلشي مربوط بيه شُهيب حتى لو ماحبه خلي هالشي ببالك!

-تمام مچنت اعرف بهذا الشي

-وهسة عرفت

-خلص هذا هو وصلت الفكرة كلشي ولا تزعلين

-ما زعلت وشكراً على تفهمك

-تدللين عليَّ

باس راسها بطلب من المصورة ابتسمت هي والمصورة طلبت منها تحاوط رقبته، سوت الحركة وعلى وگفتهم گلتلهم يتقربون ويباوعون واحد بعيون الثاني.. سووها بس التوتر يقره الففف مسرة ارتبكت وباوعتلي غمزتلها اشجعها وهي ضحكت تكمل الجلسة..

-شمسون: ملل

-المصورة: ها عمو ليش؟

-شمسون: وين الاغراءات؟

-فاهد: هاي اخراءات يابة

-شمسون: صحيح يله نعوض بـ مالك

-جنات: لااااااااا صخام ولطام بوجهيي شلون حظ خاييث

-فيروز: يعينچ الله يعينچ الله

-المصورة: ميهم عمو نعوض بـ مالك بس بعدهم شُهيب وغيورته هنا شنو تحب يسوون حركة ببالك؟

طلع جگارة شعلها والمصورة اعتذرت منه وطلبت يطفيها لان ممنوع، رفع بس عيونه عليها بخزرة بسيطة جداً خلاهة هم تعتذر لان اعتذرت وهم تعتذر مرة ثانية وتسمحله يكمل تدخين..

-شمسون: امم، اريد اشوفها بحضنه

-مسرة: مستحححيل

-شمسون: يله عمو خلصونا خلي نجيب مالك يريح گلبي

-كيان: يسويلك فلم اباحي هنا؟؟

طلعت من حلگي عرفت بروحي چفصت چفصة بكبر راسي من خزرة شُهيب ظليت لا اخذ ولا انطي من شمسون گال بغمزة..

-عيب عمو هاي السوالف عود بعدين

-فاهد: نعست

-شمسون: حتى اني يله نمري ونمرته روحوا هناك اخذو الوضعية واني وكيان نجي وياكم لا يظل بنفسها الفلم.. اقصد اللقطة

دگيت رجلي بالگاع وجرني وياهم اروح اشهد اللقطة الرومانسية الحماسية، گعد شُهيب على كرسي مَلكي ماروني والمصورة گالت لـ مسرة تگعد على فخذه وتحضن رگبته وتقرب وجهها منه..

-مسرة: شسالفة ماريد!!

-شُهيب: خلص لا نسوي شي هي ما مرتاحتله

-شمسون: احنه نريد يله نمري، يله حبيبتي عمو لا تخليها بنفس زوجچ

عارض شُهيب ما راضي يضغطون عليها بس هي اخيراً وافقت من كلام وتشجيع المصورة وشمسون.. سوت الحركة ولفت ايدها على رگبته اخذتلهم ستين صورة بس بهاي الوضعية لعبت فلك المصورة رادتهم يدگون انوفهم ويه بعض ورادت وضعية حميمية ووضعيات رومانسية اخرى طلعت روحهم ياله عافتهم..

اخيراً صاحو لـ مالك طلعو اخوته وشمسون اختصر كلشي على الكل وگال..

-مَلك لا تشلع گلب المصورة وسوي كل التگوله اريد هالمرة هو بحضنها

-جنات بصياح: وييييين يكفيييي

-شمسون: نرهمها نرهمها لا تخافين...

**

"جنات"

لطمت لطم لو بيدي انزع البدلة واتصلخ واهج منا بعباتي، جروني جر يسحسلون بيه لنهاية القاعة وجابولنا فروة گعدوني عليها ونفشو بدلتي بالگاع..

گلبي راح يوگف احس راح انهار بأي لحظة، رادوا ينزعوني البرنص بس لو اموت ما انزعه وعمي هنا قبل شوية ما اهتميت لان بعيد عليَّ ميشوفني زين بس هسة هو فوگ راسي..

-مالك: يابة اطلع جنات تستحي گدامك

-شمسون: راح اطلع بس اذا ما سويتو الصور تعرف شسوي مالك

-مالك: تمام تمام روح هسة

طلع ابوه الططوة وحبيت شلون گله اني استحي رغم ما حچيت وما بينت احترمت هالنقطة، اندار عليَّ وگال بسرعة بسرعة..

-خلينا نخلص هالجلسة بسرعة جنات حتى نرتاح ماشي؟

-اثتحي

-ميخالف اعتبريني أي شي گدامچ

-حتى لو اعتبرتك ططوة؟

-ما جاي افتهم شنو هاي بس ميخالف

هزيت راسي اي وكملت المصورة ومساعدتها يعدلون ببدلتي، اشرت لـ مالك يحط راسه بحضني وعلمته شنو يسوي وراهة گمت ارجف اطرافي والدم يبس بجسمي من تمدد وراسه بنص حضني ورفع انظاره يباوعلي واني لازم انزل عيوني عليه..

التوتر يقره مو الف مليووون عندي روحي راح تطلع من الخجل معت وسحت، طلبت اتلمس لحيته واللعب بيها شوية علمود الصورة ايدي ترعش ماگدر اسوي أي شي لان متثبت، هو لمس ايدي على كيف وحطها على لحيته وايده فوگ كف ايدي..

-مالك: بقى شوية ونخلص لا تتوترين

هزيت راسي وكملنا اللقطة ارتاحيت وتوقعت خلصنا بس مصورتنا ادبسزززز ومتشبع هالمرة رادتني ابوس گصته من جيرة بگصتچ يالمصورة الخايسة..

حطيت شفايفي على گصته بدون لا ابوسه واخيراً گالت گومو كملنا، كيفت لو بيدي اطير بس اجه الاطگع ورادت صور ثانية گمت اللطم لطم افغاني بمكاني وادبچ عمارچي هم..

-المصورة: عروستك حلوة استغل الفرصة بوسها عيوني هههههه

ابتسم بدون تعبير وما قبل يسويها لان اني ما قبلت ما لح وگللها غيري اللقطة بس لطشت الا تسويها واذا كلش كلش تستحون سوي نفسك دتبوسها بس علمود الصورة..

باوعلي يستأذن مني بنظراته اصلاً حتى ماگدر اغرد روحي رايحة بأي لحظة احس راح يغمى عليَّ، شگد محتاجة ايات شگد اريدها هسة شگد محتاجة احد يوگف ويايه ويساعدني يمر هاليوم على خير بس للاسف..

لزم ايدي ثنينهن وحطهن على صدره، نزل نفسه على وجهي من الخجل ماگدرت ارفع عيوني واباوع بعيونه كزبرت والتوتر غزى قلبي من همس بيني وبينه..

-تعجبني البنية العفيفة

رفعت عيوني اخيراً لتوازي عيونه، شد على خصري وقربني منه اكثر ..

-ما اشوف هواي محتشمات وعفيفات بعالمي بس كلما اشوف وحدة انبهر بيها

-انتَ و...

-هههه ما جاي اتغزل بيچ لا تغرديلي هذا مدح

-احم شكراً

-العفو آنستي

ابتسمت ونزلت عيوني ختم الجلسة بقبلة على ايدي وطلع من القاعة، رجعنا للمنزع واخيراً نزعنا البدلات البيض ولبسنا بدلة ملونة مالتي لونها بنفسجي طوخ مخصرة على طولي فيروز ماتت عليها ورادت تشتريها بس من شافتها عاجبتني حلفت الا اني اخذها والعلوية اشترتها الي..

طلعنا للمعازيم وبده الردح والرقص اجت ملا وقرت لكل عروسة والا يجروها بالوسط ترگص گدام الناس.. لو چنت بغير وضع اخذ العرس طول بعرض برگصي وروحي المرحة القديمة لان اموت على شي اسمه اعراس بس هسة كلش نفسيتي متساعد ورغم هذا رقصت على الخفيف..

هوسات واهازيج وناس فرحانة مشى العرس بشكل حلو بدون أي مشاكل وفرحت من ايات اجت ترگص ويايه وحضنتني ودعتلي بالسعادة صح وجهها ثگيل عليَّ بس مو مهم تبقى اختي وامي الربتني..

قربت الزفة الساعة عبرت التسعة ونص بالليل وبدلنا بالبدلات البيضة، صارت جلوتنا جماعية كلش كلش حلوة والملا توگف على عروسة عروسة وتقرا بجانب راسها..

اخيراً وگفت بوسطنا وعادت كلمات الجلوة وتمد بيها وموسيقى خفيفة مشتغلة وياهة تناسب الاجواء..

-الملا: أمينة في أمانيها

مليحة في معانيها

تجلت وانجلت حتى

سألت الله يهنيها

جبينها كالبدر ياضي

وريقها يشفي أمراضي

لها رب السما راضي

وأحسن في معانيها

كملت الجلوة وبدت تقره شي ثاني واشتغلت الدنابگ والطربگة، تقدمت على مسرة وجرتها من ايدها توسطها القاعة حتى ترگص والنساء يحيطوها من كل جهة متفاعلين وياهة..

فقرة مسرة چانت احلى فقرة رگصها يجنن وكلها انوثة، ابتسامتها ما غابت وبدلتها رهيبة اكثر من وحدة اجت تسألها منين جبتيها وتجاوبهم للاسف مو من العراق هاي..

بدلتها اكمام طويلة ضيقة من فوگ وتنزل ذيل حورية تناسب تماماً والبدلة عبارة عن دانتيل من فوگ ليجوه البطانة مالتها بيجي فاتح من بعيد عبالك جسمها بس من تتقربون ياله تكتشفون هاي بطانة.. شعرها مرفوع بتسريحة عالية ومنزلة كم خصلة ضافت حركة مشاكسة تناسب مكياجها الترابي اللامع وحمرتها المارونية..

كلشي بيها مثالي هاليوم مثل تاجها الكرستال الفخم وحلقتها الالماس وردة فعل شُهيب من شافها كان احلى شي شفته اليوم غير كل مزاجي حلو من تتزوج من انسان تحبه وتعشقه وتنظرله نظرة تشرح مشاعرك بدون لا تضطر تحچي بيهن مو قصدي الا علاقة حتى لو حب خطوبة يبقى الحب حلو..

تتمايل بوسط القاعة ويه صديقاتها وام صديقتها صبا، دخلت العلوية تهوس بيناتهن وجرتني اني وكيان وصارت لحم الكل اجه يرقص والفرحة غامرة المكان..

قبل لا تبدي الزفة العلوية جابت هديتها، هدت كل وحدة من عدنا سوارات ذهب "پتوت" لبست مسرة وكيان وگالت بضحكة..

-اظن ماعدكم هالسوالف هناك وما تلبسوهن بس عجبوني وگلت ما اخليها بنفسي واللبسچن پتوت تونسن وليداتي بخراخيشهن

-مسرة: يخبلون بيبي عاشت ايدج

-كيان: كلش حلوات وحتى لو منلبس راح نلبسهم لانهم منچ

-جنات: اهووو بطلي لواگة يله علوية وين مالتي

-كيان: گبرر

-جنات: اليگبرچ يا فگر

-العلوية: هااع هااع هاي جدامي ياالعايصات

-كيان: بيبي هي بدت

-جنات: هي زعجتني

-كيان: اني اعلـ..

-العلوية: وسممم كافي الله يساعدهم عليچن جابوچن مسودنات على گلوبهم

-جنات: همه مثودنين

-كيان: وططوات هم

ضحكت العلوية ووگفت بنصنا تاخذ صورة، استعجلونا كلش لان صار وقت يجون العرسان وتطلع الزفة يباااو شصار بيه راح اموت اي بعلي احس اقترب موعد اعدامي وراح ياخذوني للمذبحة هسة..

**

"مسرة"

لبست البرنص فوگ بدلتي وام صبا لبستني الكبوس فوگ شعري واجت تهمسلي..

-لبسي الكبوس حبيبة كله زلم بره ماماتي سرور والعيون راح تصير عليچ لا تصغرين رجلچ بيناتهم

-مسرة: تمام خالة

-فديتها العاقلة

بوستني وذبت شال على جولي وصبا خلتهن يلبسنه حتى لو بس يحطو على راسهن بشكل عشوائي، صاحو بالسماعة راح يدخلون العرسان الي تريد تلبس حجابها خلي تلبس..

خمس دقايق ودخلو ثلاثتهم واستقبلتهم العلوية وكل عماتهم ونسوان عمامهم وبنات عمامهم بالهوسات والگفلات القاعة انرجت رج بالهوسات والهلاهل والچكليت والورد الطشو عليهم..

وگفت وحدة من عماتهم بالوسط تهلهل وتهووس بشالها وعبايتها وتگول بصوت عالي..

-شهوووبي رايد راددته وعايف بنااات ولايته

اندارت على مالك وتگول بنفس الفرحة والهلاهل..

-ملوووكي طفييي اللالة تره عيووون چتالة

واخيراً على فاهد وگالت وره ما شمرت كومة چكليت عليه..

-زوجناااه الچان مسرربت... ما يرجع الا نص الليل كلللللووووش

-فاهد: موو حق هذااا شمعنى همه تقرولهم حلوو واني وين ماكو گفلة خ** ومسربته جبتوها عليَّ

-العمة: هههههههههه چا غير نحبك احنه عمة اروحلك فدوة

-فاهد: سكتي عمة سكتي فشختي راسي تفشخ بالچكليت

ضحكن عماته كلهن وهوسهن هوسة اخيرة قبل لا نطلع بصوت واحد..

-يا يممة فرشي مدتچ الليلة تجينا چنتچ....

اللتفت عليَّ شُهيب مبتسم واشرلي حتى نطلع، نزل نفسه قريب اذاني وهمس..

-شكراً

درت وجهي اباوعله وهو لسه منزل نفسه حتى يسمعني..

-على شنو؟؟

-على هذا

اشر على البرنص مبتسم ابتسامة ممتنة، ابتسمتله واني اتذكر كلامه البارحة شگد ميحب لبسي قبل واني چنت اللاحظ هالشي الغريب لان كلما اللبس شي ضيق او قصير ميعلق على ملابسي بس من اللبس سوت طويل ومحتشم او فستان طويل او شي عريض يگلي اليوم طالعة حلوة وفهمت سبب تعليقاته البارحة..

-هنادي: عيننني مو مغازل وبوس بالباب العالم تنتظررر

-العمة: ههههههه خليهم طيور الحب معليچ بيهم فديتهم

طلعنا للسيارات كل ثنائي بسيارة، بالباب ورصدت عيني واحد من بعيد واگف يباوع علينا واضح محد انتبهتله غيري او يمكن انتبهوله وغلسو عليه.. هذا ليث حبيب جنات!

وگفت بمكاني معصور گلبي عليه اجه يشوفها يطلعوها من باب القاعة عروسة لغيره؟ والمن؟ لابن عمه بالتحديد يا لسخرية القدر!!

طلعت العلوية جنات وياهة ومالك من الجهة الثانية يمشيها لان مغطين وجهها وراسها والبرنص وگوة دتمشي، بباب القاعة وگفت تلقط انفاسها ورفعت شوية من البرنص تحچي شي ويه مالك.. ثواني وصاح لـ اختها ايات عرفت تريد اختها حتى تودعها تسالمن بالباب والقهر والحظ الزفت جنات جمدت بمكانها وعيونها من وحدها گامت تذب دموع من شافت ليث من بعيد..

صارت تنحب وتبچي بحرگة بصوت مسموع الناس عبالهم تبچي على اختها ويواسوها ومالك هم ما منتبه لوجود ليث ويوعدها يجون زيارات للعراق حتى تشوف ايات والعلوية بس جنات بغير عالم وعيونها على ليث المكسور..

شفت فيروز وتسنيم هم انتبهن لـ ليث ولاحظت الكسرة بعيونهن، ماگدرت اعوف جنات الا اتأكد عليها تصعد السيارة وتكون بخير..

-شُهيب خليني نساعدها تدخل السيارة بدلتها چبيرة

-تمام براحتچ

رحت وياهة العلوية ما خلتني گالت روحي لسيارتكم وهي تساعدها بس گلبي وجعني عليها، صعدنا السيارة ورفعت البرنص من وجهها اشوف حالها بالضيم تبچي بقهر وتفرك بصدرها بقوة جلغته بأظافرها.. لزمت ايدها اهمس بيني وبينها..

-جنات اهدأي.. اخدأي لتخلين مالك يلاحظ لا يسوولچ مصيبة.. باعيلي حبيبتي بالچ يمي جناوي

باوعتلي بعيونها صايرات دم وكحلتها سالت شوية، نظفت جوة  شششعيونها شوية بأصبعي واهمس وياهة..

-الزمن كفيل بالنسيان جنات والله راح يعوضچ بالاحسن، حالي مثل حالچ بس بغير وضع اني بس گلبي هم جاي يتگطع بس احنه لازم نبقى قويات ومنسمح لأحد يكسرنا ويأذينا..

-ياريتني ميتة ولا شايفني بهيج وضع

ضربت على وجهها بأيدها بحرگة لزكت ايدها حيل وطلعت راسي من البرنص اشوف مالك واگف على جهة يحچي ويه العلوية وهي توصي..

-مسرة: ادعيله جنات انتِ مؤمنة وملتزمة اكيييد الله راح ينظرلچ ادعيله الله يمسح على گلبه وگلبچ ويعوضكم ثنينكم

هزت راسها بـ اي ماگدرت ابقى وياهة اكثر العلوية صاحتلي حتى اروح، تركتها وقلبي وياهة وهمست اخر جملة قبل لا اطلع..

-لا تخلين زوجچ يحس على شي مهما يكون يبقى رجل ومبين يغار عليچ استري على ليث لا يأذي

هزت راسها للمرة الاخيرة وعفتها، لزم ايدي شُهيب ورحنه لسيارتنا.. احنه سيارتنا سودة عالية ومزينة ببوكيه ورد احمر چبير على دعامية السيارة بالضبط نفس لون البوكيه مالتي واظافري.. صعدت وانتبهت السايق نشوان ضحكت فرحانة من اجينا للعراق لسه مدا نسولف ونلتقي مثل قبل كله من بعيد اشوفه ونتسالم..

-مسرة: ياا نشوان شبيك

انتبهتله يمسح بعيونه صايرات حمر مبين ديبچي، ما جاوبني وبقى مغطي عيونه بأصابعه قلقت وردت اسأل مرة ثانية وشُهيب لزم ايدي يستوقفني ويهمس..

-على كيان يبچي خلي

رقت ملامحي على حنيته اشوف يباوع لسيارتهم ويبچي بحرگة ومروان هم واگف على جهة يمسح بعيونه وره ما ودعها وبوسها ووصى فاهد عليها..

انطلقت السيارات نشوان هادئ وكل شوية يلتفت على سيارة فاهد وكيان بينما سيارات الباقين مشتعلة شعععل بالاغاني وجايبين فرقة كاملة تغني وتطرب بالطريق..

الاجواء حلوة كلش كلش حلوة وتونس وگفو بنص الطريق والا ينزلون العرسان يرگصوهم، جروهم جر ووگفو بالشارع سدو سد همه هوايه ولد عمهم كلش هواية يمكن فوگ الثلاثين ابن عم عدهم هاي من غير ولد عماتهم وكلهم مطربگين وفرفوشين ويضحكون ويحبون الوناسة..

توسطهم شمسون وعمامهم الباقين وصار الردح عراقي للگاع للگاع واصوات الزلم عالية بالهوسات وهلاهل النسوان الي تطلع من السيارات شعلت الاجواء شععل..

رجعو وره ما انترس الشارع والسيارات بدت تدگ هورنات لان عاقوا الطريق واصلاً الشوارع ازدحام كلش.. گعد شُهيب بصفي يضحك على حركات نشوان وكملوا ملاسنهم بالسيارة..

-نشوان: هههههههههه ولك هذا مخبل فاهد والله مخبل

-شُهيب: مروان راح ينجلط من وراه الكلب ههههههه

-مسرة بهمس: شسوه؟

-شُهيب: عناد بـ مروان يريد يضوجه گال راح انزل كيان ترگص ويانه هنا خطية خليها تتونس

-مسرة: متنلام كيان من تصيحله مسودن

-شُهيب: مخبل هذا وراح يخبلها

-نشوان بضحك: ههههههههه مروان يلزم لحيته ويگله هذا وجهي لو بقت وياك وتحملتك سنة

-شُهيب: ومالك يگله شدعوة سنة گول شهرين

-نشوان: وفاهد يجاوبهم انتو بس تغارون الا اخلف كوريين صغار اضغطكم بيهم الچلب فد مستفززز

-شُهيب: اني شگلتلكم؟؟ تحملوو خبالاته

نفخ نشوان متنرفز ويضحك بنفس الوقت وفتح اغاني بالسيارة يعليهم، گعد شُهيب بصفي عدل يفتح برباطه الماروني ابتسمت من شفته ما لابس فيونكة معناها صدگ ميتذكر شنو صار البارحة..

-مسرة: وينها خالة ماريا؟

-شُهيب: اخذتها عمتي وياهة

-مسرة: اخترعت مو اگول اني اللتهيت بالعرس وبالي مچان وياهة خفت

-لا لتخافين عمتي امان وما عافتها العرس كله

بعد مرور ساعتين من زفة صاخبة وبحضور بدون مبالغة اكثر من اربعين سيارة ورانة وصلنا للفندق.. نزلونا والفرقة ورانه تدگ لحد بوابة الفندق..

دخلت الفندق وشُهيب لازم ايدي يمشيني، اخذ مفاتيح الغرفة وصعدنا غرفتنا رقمها 37 وغرفة مالك وجنات 38 وغرفك فاهد وكيان 39..

ما دخلنا للغرفة وحدنا دخلو ويانه ثنين من عماته وثلاثة من بنات عمه يچيكون على الاوضاع، شفت عمته بيدها علاگة وهمست شي لـ شُهيب ما سمعت شتگول وما فهمت الا من شُهيب اشر بيده بطريقة "لا" وما قبل ياخذ العلاگة.. كررت العمة الطلب وهم ما قبل بقت تلح عليه لحدما قريت شفايفه يگللهه "هذا مو زواجها الاول" وما اسولفلكم على وجه عمته شلون صار وشلون فتحت عيونها على وسعها مصدومة..

لزمته من ياخة جاكيته ونترت شي بيناتهم بهمس وخازرته بقوة عرفته دتگله "شلون تزوجتها وهي مطلگة" ما احتاجيت اسمع صوتها بسبب جواب شُهيب من گال بصرامة..

-واذا وهسة؟؟

-العمة: ولك شلوون

-شُهيب: رجاءاً لحد يتدخل عمة!

وفعلاً اشرت للباقين وطلعو من غرفتنا بينما راح شُهيب للميز ينزع رباطه ويشمره متنرفز.. اني كلش قليل اشوف شُهيب معصب او بالاحرى ما شايفته يعصب الا مره او مرتين بس من يوم اجينا للعراق لحد هاي الدقيقة هو على اعصابه وضايج ومتنرفز وعرفت السبب اهل ابوه وسوالفهم..

نزعت كعبي ومرغت رجليه شوية بيدي، وخرت البرنص عن اكتافي وعيوني على شُهيب راح يوگف على جهة وفتح الشباك يدخن..

-اشهب شبيك

ما انتبهت على نفسي صحتله اشهب الا من گلته، ماعرف ليش من نكون وحدنا ومشاعري تتلخبط تجاهه يفلت لساني واصيحله اشهب..

-مابيه مسرة

-شبيها عمتك؟

-كلشي مابيها، تحبين اطلع علما تنزعين ملابسچ وترتاحين؟

-لا عادي بالحمام انزع مو مشكلة

هز راسه ورجع للميز ينزع ساعته وطباقيات قميصه، فتح اول ثلاث دگم من قميصه ظهرت وشوم صدره وخربط شعره العسلي المرتب هوسه بيده صار شكله يخبل ضافله لمسة مشاكسة..

انتبهت لروحي صافنة عليه مثل الثولة، انطيته ظهري بسرعة واخذت جنطتي ورحت اركض للحمام واخذت راحتي بالتطفر هنا ظليت اگمز على غبائي وتصرفاتي وياه.. انطيت لروحي راشدي اصحي نفسي ومديت ايدي انزع سحاب البدلة..

نزعتها بسرعة لان سحابها جانبي ما بهذلتني، فتحت الباب امد نفسي اشمرها بره مادري بي واگف على جهة ما اشوفه بسهولة يدور بجنطته على شي وياااابه على الموقف الي يفششل الصار!!

رفع راسه يشوفني واني مثل العوبة مادة نفسي گدامه احط بدلتي على كيف بالگاع حتى متخرب، دا ارجع ادخل بالحمام ورفعت عيوني وصرنا عين بعين عزززززززاااا بعينيي اي والله عززااا..

حمحم ينزل عيونه بسرعة واني طبيت بالحمام وگمت مو بس اطفر صرت ادبچ مثل العلوية على الخزي الصار..

بدون لغوة زايدة اريد اطفي نار جسمي فتحت الدوش على المي البارد وطبيت بي هو وتسريحتي ومكياجي، نزعت ماشات التسريحة جوه الدوش ومسحت مكياجي هم هناك ما راح زين واستخدمت المزيل على جهة ورجعت اغسله..

اخيراً كملت كلشي ونظفت نفسي بغسول الجسم، نشفت جسمي وغرگت روحي مرطب.. دورت بجنطتي على ملابس طبعاً بالباب العلوية سوت كشف وجبرتنا نجيب سيتات نوم ابيض بس اني وصيت صبا تجيبلي بجامة وياهة وتحطها بجنطتي..

والحقيرة الكلبة الرعنة صبااا جايبتلي بجامة ستن لونها ماروني صايرة كيمونة بصدر مفتوح كله كيبور يا نذلة يا حقيرة تفووو عليك شمسون يا عاار مادري شعلي هو بس يستااهل..

طلعت تلفوني وغردتلها بـ مسج رزالة مرتبة الحقيرة بسرعة قرتها ودزتلي ايموجيات ضاحكة هاي لو احضرها مية مرة هم ميرتاح گلبي..

رطبت شعري ومشطته وسويت السكن كير مالتي وحطيت مكياج خفيف واخيراً تعطرت بعطري الخاص ومديت راسي اشوف وينه هموسي.. مموجود بالغرفة شو؟

طلعت للغرفة احط جنطتي على جهة بعدني واگفة ارتب اغراضي على الميز ودخل للغرفة بعده ما مبدل ملابسه..

-شو بعدك بملابسك؟

-اريد اسبح

اخذ منشفة ودخل يسبح سريع وطلع مبدل بـ تراك اخضر زيتوني وگف گدام المراية يمشط شعره وحطيت كل تركيزي وياه اريد اشوف شنو راح يحطه بس صدمني من ما خلى شي ابدد..

-عبالي تچذب عليَّ من تگول ما احط شي لشعري!

ابتسم ابتسامة جانبية وضيگ عيونه يباوعلي ويگول بتلاعب..

-وليش اچذب بهيچ شي

-مادري يعني گلت يمكن يستحي لان يحط زيوت او شي تخلي شعره يلمع وصحي وسرح

-لا گتلچ من الله شعرنا هيچ خو شوفي ابوية واخواني

-اي لاحظت

اخذ عطره يرش على جسمه واماكن النبض وراح يگعد على القنفة، باوعلها تمايزها صفن عليها واني صافنة عليه وكاتمة ضحكتي..

-مسرة: تشوفها اذا تكفيك لو لا

-صراحة اي

-هههههههههههه

-واكتشفت مستحيل تكفيني

-اممم صح

-راح اجيبلي فراش من الريسبشن

-لااا وين يمعود لا يفضحونا ويسوونا ترند، شاهدوا عريس بيوم عرسه ياخذ فراش وينام على الارض بسبب عروسته

-ويضيفون للخبر ملح وبهارات ويسوونه متعاركين واصواتنا واصلة للظالين

-ويكملوها من يكتبون اكتشفت عروسته انه متزوج وعنده سبع جهال

-ويخونها مع زوجته ومع عشيقته

-وناس بالتعليقات راح تكتب اي ذولة نعرفهم جيراننا والعريس فد ملعب وواحد ادبسزز وعينه زايغة

-ووحدة ثانية راح تكتب هذا حتى امي ما خلصت منه و تحارش بيها ذاك اليوم

-وواحد راح يكتب هذا صديقي وهو معليه هي مرته مو خوش وكشفها تخونه...

وهكذا استمرينا الليل كله ميتين ضحك على خيالنا، گعدنا نألف قصص ومواضيع وشُهيب طلب من خدمة الغرف عشا وحلويات ونمنمات.. على گعدتنا اذن الفجر گام هو توضى ومد سجادة يصلي كزبرت من بده بالصلاة يجهر من يقره الفاتحة والسورة الثانية تمايزته من وره وهو يصلي وحسيت بالخجل..

خجلت وماعرفت شنو اتصرف اگوم أمثل جاي اصلي؟ بس شلون واني ممصلية بحياتي استحيت من نفسي ومنه بس ما چانت عندي الفكرة الأصح وهو لازم استحي من رب العالمين..

كمل صلاته وقره شي وراهة يمكن دعاء بس كلش قصير وگام يلم السجادة ورجع يگعد يمي، كملنا سوالف وبالي بقى ويه الصلاة الى ان مشى الوقت بينا بدون لا نشعر..

-شُهيب: يمعودة صارت بالخمسة الفجر ما تعبتي؟

-اي والله بس هاك هاك اكل هاي طيبة

حطيت لوزاية بحلگه اكلها وحط فستقة بحلگي..

-شُهيب: طيب عجبني هذا مملح ضوگيها

-اگلك

-اسمع

-جيبلي كرزات وجلاتين اخذهن ويايه شو طيبات هنا

-بعيني

-وبعد شنو.. هاا تذكرت عدهم نستلة هم كلش طيبة نسيت اسمها عود اراويك الغلاف

-صار

-وبعد نلحگ تاخذنا نروح للسوگ قبل لا نسافر؟

-مادري باچر نشوف اذا عدنا وقت ميخالف اخذكم

-اي عفية.. هاك عصير اناناس طيب

انطيته من عصيري الگصبة مالتي كلها حمرة بس ماهتم شرب منه، ابتسمت مرتاحة وفرحانة كلش، بعيداً عن كون زواجنا مو حقيقي بس انصح كل بنية تختار شريك حياتها ويكون صديق قبل لا يكون حبيب.. الصديق ما راح يمل منچ وراح يسمعلچ بكل وقت، راح تكون علاقتكم متجددة وعفوية وتونس والاهم من كل هذا ما راح تخجلين منه وتكون علاقتكم صحية..

وكل هاي الشغلات موجودة بـ شُهيب، يجاري خبالي وغرابتي، يحچي بنفس لغتي المليانة سخرية، يشوف حيويتي وطاقتي عفوية ولطافة ميشوفها غباء وسذاجة مثلما چان يشوفها اكرم، واكثر نقطة احبها بي هو مَـ يمل.. ميمل من أي احد حتى لو گابلني وگعد ثلاث ايام متواصلة راح يبقى بنفس الحماس والطيبة.. شُهيب رجل وزوج مثالي بنظري يا بختها الراح تكون وياه وترتوي من عطفه وحنانه وتريّح نفسها جوه جناحه بدون لا تشيل هم لشي..

وهسة هم عيونه بدت تغفي والتعب بيّن عليه، مسح وجهه وشعره هوسه هالحركة جديدة مچان يسويها وكلش حبيتها تنطي منظر يخبل ومثير و... هاي شبييييچ انچبي وسكتي عاد مسرة مصختيهاا!!

-تعبت شُهيب روح نام على الفراش

-لا عادي ما نعسان

-روح حباب اني هم نعست

-ماشي نامي على الفراش واني انام على القنفة هنا

-وين تكفي روح على الفراش ومعليك انتَ

-وانتِ وين؟

-هنا واذا كلش ما ارتاحيت انام بصفك واحط بيناتنا مخدات ههههه

اكيد ما راح اسويها وانام بصفه بس هاي حجة حتى يگوم وفعلاً استجاب ابتسم يفرك بعيونه وگام، وخر المخدات من الچرباية وحضن مخدة بقوة بين ايده ونام على جانبه الايسر..

قاطع صفنتي صوته وهو يگول بالضحك بدون لا يباوعلي..

-مسرة قيثارة لا تحاولين تكتليني واني نايم

-احاول

-حبابه امي ماعدها غيري

-لتخاف على امك اني اداريها

-واخواني خطية

-يعيشون بدونك

-اخر شي يمعودة ابوية يحبني اني النمر مالته

حچاهة وضحك، ضحكت وياه بدون لا اجاوبه غيرت الموضوع بسؤال ثاني..

-ليش تحضن مخدة بهالطريقة؟

جاوبني بصوت ناعس..

-متعود

هزيت راسي متفهمة يمكن متعود يحضن خطيبته السابقة هيچ من ينام، نفضت عقلي بسرعة قبل لا يتعمق تفكيري وگمت افتح شوية من الستائر اباوع من الشباك وقت الشروق يجنن يشبه ماريا.. دائماً اگللهه تشبهين شروق الشمس بشعرچ الاشقر وطاقتچ الجميلة..

نعست واني واگفة هنا، باوعت لـ شُهيب غافي ورايح لغير عالم، جريت موبايله حاطه على الميز الي بصف الشباك اشوف ساعة بيش وانتبهت لأشعار رسالة جايه من رقم مسمي "•" قريت بداية الرسالة لا ارادي عيني اجت عليها چانت بالعربي..

"ما راح يتكرر الصار بيناتنا وعد، جاوبني لا تظل تعذبني هيچ تعرفني...."

انقطعت الرسالة وماگدر اقرا الباقي الا افتح التلفون واني اعرف رمزه، الف شيطان لعب براسي واصابعي تحكني اريد اعرف الباقي وشنو صار بيناتهم.. من المحادثة مبينة بنية بسبب اسلوبها قررت ما افتح التلفون واعوف خصوصيته اله مو من حقي هالشي.. بس عود گدرت اسكت واهدأ؟ والله ولا گدرت متت وحسيت روحي مشتعلة بالفضول لزمت التفون وفتحت الرمز وقريت باقي الرسالة الطويلة..

""ما راح يتكرر الصار بيناتنا وعد، جاوبني لا تظل تعذبني هيچ تعرفني ماتحمل.. بيوم الحفل ادري تهورنا بس اني چنت تعبانة واريدك وانتَ هم تريدني حسيت بهالشي من لمستك لا تستحي من هالشي اعرفك احسن من الكل، شُهيب بس ترجع خلينا نحچي سوه راح اجي لبيتك ونتفق على علاقتنا، هذا رقم جديد اراسلك منه خاف ما سجلته يمك البارحة من حچينا..

نورسينتك ♥️"......

يتبع 🙂.....

━━━━━━  ━━━━━━

اااااخ يا زمننن ن ن ن ن (هذا صدى) 😘

البارت يجننن من كتبته كله مشاعر واحاسيس والكبلات افففف متت عليهمم يخبلوون حبايبي يخبلووون ♥️

اعتبره من بارتاتي المفضلة 🦋🤍🫶🏻🫶🏻🫶🏻

بس القفلة!!!!! اءءء شلون بينا احنه شلووون 🙂🤣

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

هو شذبل الوردات غير أسلوب راعيهن..؟ 🥀

━━━━━━  ━━━━━━

"صبا"

بعد الزفة الحماسية توزعنا بالسيارات حتى نرجع للبيت، اني وجولي وامي ومروان وابن عم شُهيب قصي بسيارة والباقين كلمن بسيارته.. احس بفراغ چبير ما صار نص ساعة من نزلنا العرايس بالفندق بس اشتاقيت لـ مسرة وكيان وحتى لـ جنات الي ما اشوفها هوايه..

-مروان بهمس: محتاجة شي؟

-صبا: شنو محتاجة؟

-مروان: ماعرف أي شي تردين اجيبلچ اكل او شي؟

باوعت لأمي ممنتبهة حاطه الايربود بأذنها تحچي ويه اخوية جمال تفرفح كالعادة اما جولي تگرص بـ ايدي وكاتمة ضحكتها، هاي اول مرة يسويها ومدا افهم شنو القصد من كلامه بس لطيف سؤاله..

-لا شكراً

-قصي: مروان گول انتَ جوعان وتريد تجيبلك اكل لا تذبها براسي البنية ههههههههه

-مروان: لا مو جوعان اني

-قصي: ام البدلة الماروني نسيت اسمچ شنو

-مروان: شعليك انتَ؟!

-صبا: مروان على كيفك، اسمي صبا تفضل اخي محتاج شي؟

-قصي: اااااااخ ضربتني سهم بگلبي

-صبا: شسويتلك خوية؟

-قصي: بعد بعد ذبي على الجرح ملح

-مروان: نزلنا من السيارة

-قصي: هاي ليش؟ ما ظل شي ونوصل للبيت

-مروان: گلت نزلنا من السيارة شكراً تعنيت وجبتنا

-قصي: تفضل

ركن السيارة على جهة من الشارع ونزل مروان واشرلنا ننزل وياه..

-قصي: ليش تنزل البنات؟

-مروان: نزلو بنات نزلوو

امي اخيراً ربطت فيشة ويانه وانتبهت وگفنا تسائلت شديصير وقصي اندار بكل جسمه علينا عود ديحچي ويه امي بس عكسه حرفياً طاخ بركباتي بقصد او بغير قصد..

-قصي: مادري شبي هذا خالة خلي ينزل هو واني اوصلكم

حچاهة وباوعلي بنهاية الجملة مبتسم، ردت اجاوبه واگله ماكو داعي بس ما لحگ ينفتح حلگي بسبب حركة مروان العنيفة وهو يجر قصي من خوانيگ قميصه ويرجعه يگعده عدل بكرسيه وينتر بينا..

-نزلووو بناااات

نزلنا من السيارة بدون نقاش وامي أيدت فكرة مروان خصوصاً من شافته عصبي، ظل قصي يصيح بينا نرجع وامي تأشر ليگدام تخلينا نمشي..

-ام صبا: امشن امشنن

هرولنا نبتعد من سيارة قصي ومروان ناار ينتفض نفض من العصبية وگفنا ننتظر تكسي يوگفلنا بس ماكو هذا شارع عام ومستحيل نحصل..

-جولي: مدا افهم ليش نزلنا؟

-مروان: لان هذا قصي عااار وواحد طايح حظه!!

-ام صبا: على كيفك يمة لا تعصب ما يستاهل تتنرفز

سحسلونا للبيت مشي منو يمر ميطلع تكسي رجليه تگرمعت من الكعب ماتحملت نزعته بنص الطريق امشي حافية، تقرب مني مروان يهمس بيني وبينه..

-لا تتعور رجليچ

-شسوي لعد تأذيت من الكعب

-انطيچ حذائي؟

رفعت عيوني اباوعله لگيته يضحك ضحكت وياه وضربته على متنه بميانة زفرة ممنتبهة على روحي والحظ الفگر شافتنا امي واحنه نضحك ونتماوع..

-ام صبا: صبا!! تعالي هنا

يمة لگفتني الحجية منو اليقنعها اني ومروان بس زملاء عمل واني شالعة گلبه وبيناتنا ميانة شغل؟ شيخلصني من تحقيقها..

زحفت زحوف اروحلها وبنفس الوقت دگ موبايلها اللتهت عني بس اعرفها ما راح تعبرها الي، اللتفتت على مروان ونترت بهمس..

-صبا: كله من وراك شكو تتماوع عليَّ

-مروان: هاي فوگما اريد انطيچ حذائي

-اليوم رزالتي للصبح

-يعني امچ متعرف بيچ صلفة وام لسان؟

-تعرف بيه ولان تعرفني صلفة وام لسان متتوقع هالحركات والمياعة تطلع مني

انلصمت من شفتها تلتفت علينا وتخزرني تأشرلي اجي يمها، وصلنا اخيراً للبيت وبوجهي اني وجولي لغرفتنا هي طبت تسبح واني گعدت ببدلتي ومكياجي وشعري انتظرها تكمل وادخل بدالها، دقايق صاحت من الحمام..

-جولي: صبااااا

-ها قلب

-صبااا فدوة الشامبو مسرة اخذته وياهة وين مالتچ؟؟؟

-يم امي جوه

-جيبيلي حباااااااابة

-وجع فهمت شبيچ تلعلين

نزلت اجيب الشامبو من امي لگيتها هم دتسبح ومحتاجته، انتظرتها تكمل منه ووگفت بالصالة انتظر الخوانم يخلصن..

-هلو سيستر

رفعت راسي على الدرج لگيته قصي دينزل من فوگ وموبايله على اذنه، توقعته ديحچي بالتلفون بس طلع كلامه موجه الي..

-شبيچ سيستر مو سلمنا

-صبا: تحچي وياي؟

مجاوبني وحچى ويه الطرف الثاني بالتلفون، گلبت عيوني على تصرفه التافه وطلعت للحديقة گلت دقيقتين وارجع بس علما يطلع من الصالة هذا المزعج..

اجاني اشعار من مسرة رسالة شطولها مرزلتني رزالة غسل ولبس فطست من الضحك معناها شافت البجامة الحطيتها صح هي دگة ناقصة بس بلكت واحد منهم يتلحلح ويفضون سالفتهم..

-حلوة ضحكتچ

فزيت مخترعة حطيت ايدي على گلبي راح يوگف الحديقة ظلمة وهذا مثل العتوي طلع ورايه..

-خرعتني قصي شسالفة

-قصي: اخيراً صحتيلي قصي

-اسمك مو قصي؟

-اي قصي

-بعد شكو

-عصبية چنچ

عبرته ارجع للصالة واستوقفني يسد عليَّ الطريق، شكله مخيف اول متشوفو وشوم كومة بأيده ورگبته وعضلاته مطگگة كلش ينطي شبه لـ ستايل فاهد بس هذا شكله مريح اكثر وابتسامته هم لطيفة..

-قصي: لا لا اوگفي وين رايحة اريد اسألچ على شي ما راح اخذ من وقتچ هواي

-تفضل؟

-انتِ هم مهندسة مو؟

-اي

-ها ردت اسألچ على شغل الهندسة بالخارج هم اكو وظائف لو مثل للعراق ننگع شهايدنا ونشرب ميتهن

-حسب المكان اكو دول اغلب شغلهم معتمد على القطاع الخاص نادر نلتجئ للقطاع العام لان رواتبهم فاشلة بس شي على شي اي اكو وظائف للمهندس هناك خصوصاً بالدولة العايشين بيها احنه كل مجالات الهندسة تشتغل ومرغوبة

-قصي: شگد رواتبكم بشركة شُهيب؟

ظليت اخذ وانطي وياه لان اسلوبه لطيف وواضح حاب يطلع للخارج يشتغل وديستفسر واني النادرة انفتگت..

-صبا: هم حسب يعتمد على سنوات الخبرة، اني من قبل لا اتخرج اشتغل بشركة ابو مسرة خبرتي فوگ الاربع سنوات يعني راتبي يتعده الاربع ملايين بالشهر

-حلووو هنا لو حصل ٨٠٠ الف يبوس ايده وجه وگفه

-اي هنا كلش مظلومين اهل الهندسة بس احنه هم لتنسى رواتبنا بالنسبة لأسعارنا ونمط حياتنا عادية متعتبر شي واو

-بس تبقى احسن منا

-ممكن

-انطيتيني امل

-انتَ مهندس شنو؟

-اني مو مهندس

-ياااا لعد شنو؟؟

-اني خربج تحليلات

-لعد ليش تسأل على الهندسة؟!

-بس ردت افتح موضوع وياچ وسمعت العلوية تگول انتِ مهندسة

حچاهة خجلان ومسح على رگبته من وره، فكيت حلگي واني من كل عقلي دا اجاوب واخذ وانطي طلع الاخ يريد يسولف وعود انطم واسكت؟ لا والله ولا اسكت هاللسان غير ينضب راح يورطني..

-وتريد تطلع للخارج؟

-يعجبني اي بس ابوية مجاي يعتقني

-اي اكيد متعلق بيك حقه

-متعلق بيه؟! هههههههههههههههه ضحكتيني

-ليش

-ماريد ادوخچ بسوالفي، چنه الجو بده يبرد بالليل لا تطلعين هيچ

اشر على زنودي انتبهت لروحي ذابه الشال فوگ، بالعكس اشوف الجو حار كلش هنا بس يمكن هو مبراد لان نزع سترته الخفيفة ينطينياها ويحطها على اكتافي يبست بمكاني مترددة مادري شبيه ارجف رجيف عبالك مسوية مكسورة وخايفة احد يلگفني، نزعتها بسرعة ارجعها اله ماقبل ياخذها أصريت ودفعتها لصدره اللح ما راح اللبسها و...

-مروان: صبا؟!!

شفته يطلع من باب المدخل طاااير علينا مخنزر طبعت عيونه عليَّ راح يحرگني بنظراته.. اخذ الجاكيت من ايدي وشمرها على قصي بقسوة ونتر..

-مروان: ما محتاجتها شكراً

-قصي: باردة خوية البنية جمدت

-مروان: وينه البرد؟؟ بردانة؟؟ حاوبيني برداانة؟؟ شو اني مشتعللل شعععل

-صبا: ها.. مادري يعني يمكن باردة..

وياريتني انلصمت ولزمت هاللسان وگصيته قبل لا گلت هالجملة الغبرة الهيجت مروان وخلت شكو شيطان بداخله ينطط ويحرگنا..

-مروان: باااردة؟؟؟؟ ماكوو برد ماااكو تعالي ادفيييچ

حضني بجرأة يضمني بين ايده وميخليني اخذ الجاكيت دفعته عني متنرفزة من حركته هذا شبي تخبل عليَّ چان صحت بي بس عرفته ما حاس على روحه ومدا يشوف بعيونه من العصبية ومتأكدة حتى ما منتبه هو حضنني فـ اكتفيت بـ خزره قوية وعفته ادخل جوه..

-قصي: انتَ مريض نفسي شبيك بابا؟

-مروان: انييي مررريض؟؟؟ تتحارش بيهااا وتلبسها ملاببسك وصرت اني المررريض؟؟؟

تبسمرت بباب المطبخ بسبب صوت عياطه فضحني هذا لا يسمع احد وتصيرلي سالفة، توترت وخفت بنفس الوقت قررت اعوفه هنا واطب جوه.. عبرت الصالة سريع وهرولت على الدرج ووگفني صوته يصيحلي وهو يطبگ الدرج يصعد ثلاث بايات ثلاث بايات..

-اووگفي صباا

وصلت للممر الفيصل الدرج عن الغرف ووگفت اهمس بنتر لا تنسمع اصواتنا وننفضح گدام العالم..

-شبيك مروان فضحتني وخزيتني شبيك متخبل انتَ!!

-اششششش ولا كلمة لا تحچين وتزيدين بخبالي سكككتي يا محتررمة

-احترم نفسك!! مو اصغر جهالك اني وتتجاوز بهالطريقة!

-من واگفة وياه بره بهالليل ما خفتي تجيچ حچااية؟؟ واگف يضحك وياچ وانتِ بهذا الوضع وبهاللبس ما استحيتي؟!!

-اخر مرة اگولها احترم نفسك وانزل جوه لا تسوينا فرجة للعالم

-اتدخل وغصباً عليچ فهمتيي لو لااا اذا انتِ متعرفين مصلحتچ اني اعرف!!

-ليش انتَ منوو هاا؟؟ منو بابا انتَ منو؟! ابوية؟ امي؟ اخوية؟ عمي؟؟ رجلي؟؟ منووو

ضرب الحايط بقبضة ايده بقوة فتحت عيوني على وسعها من سوه اثر بالحايط انصدمت هذا شنو ميحس بالوجع؟! بقى ياخذ شهيق وزفير ويرص على اسنانه يسيطر على نفسه بدون مبالغة من گدما معصب حسيته راح يطحن اسنانه بداخل فمه من الغضب..

-مروان: يا بنيية شوكت ناوية تفهمين شوووكت مو والله بزعت رووحي

-من شنو بزعت روحك؟؟؟

-منچ ومن راسچ المعنجر الما يفهم على شي!! كل سالفة ماصخة تلگفيها وهي طايرة ومن الموضوع يتعلق بمروان يتوقف عندچ التفكير وعقلچ يقففل

-قصدك افكاري ماصخة يا مااصخ؟!!

-صبااا انچبي وافتهمي عليَّ لا تطلعيني من طوري وتخلين صوتي يطلعع

-لتغلطط وتصير همجيي

-اي اني همجيي خوش؟؟ همجيي

-ادري ميحتاج تگول

-عوفچ مو وكتها نتعارك سمعيني عدل وجاوبيني على گد السؤال

-خوش

-انتِ عندچ مشكلة شخصية وياي؟ اني واضح لو ما جاي تفهمين عليَّ يجوز الخلل بيه

-اكيد الخلل بيك لان كلشي ما جاي افتهم منك بس عياط

-تمام تمام فهمت.. شوفي خلينا نبدي من البداية ونوضح بعض الامور

-عزه عزه ولك امي

دفعته اركض للغرفة من سمعت صوت خطوات احد يصعد الدرج لو امي لگفتني بعد مرة تسويلي مشكلة چبيرة، وگفت بباب الغرفة اتسمع وصوت الدوش بعده مشتغل نسيت اجيب الشامبو لجولي بس ختولي وتستخدم مالتها لو مالتها يگرص؟!

نزيت من اندگت باب الغرفة على كيف لزگت اذاني بالباب اتسمع وصلني صوت مروان خافت ومخنوگ يحچي بهدوء عجيب..

-مروان: ماكو احد صبا مو امچ هاي

مجاوبته بقيت ساكتة ونويت ما اطلع لو تنگلب الدنيا ماريد اتعارك وياه تعبانة اليوم ولساني تعب من الهلاهل عود باچر اغردله..

وگفت على جهة انزع البدلة ورجع يحچي بنفس النبرة الهادئة، بالبداية ما فهمت شنو ديگول الا من وگفت لزگ بالباب اتسمع وچان انصدم من كلامه!!

-صبا تعبتيني ما جاي اعرف شلون اتصرف وياچ اجيچ يمين تروحين يسار اجيچ يسار تجيلي يمين ماعرف شلون راح نحل هاي المشكلة، ادري شخصياتنا متناقضة ويمكن شبه مستحيل نتوالم بس اني احبچ.. والله ميت بيچ وماعرف شلون اوصل الموضوع الچ بشكل رومانسي عصبيتي وغيرتي تخرب كلشي اخططله وما جاي اسيطر على روحي بسبب لسانچ..

سكت يلقط انفاسه واني هم اللقط انفاسي واستوعب هالصدمة، اردف بنبرة اهدأ اشبه بالهمس..

-من اشتعل گلبي المطي بيوم الحبچ ويني وين الحب اني بس شسوي اجيتي وفرضتي نفسچ واحتليتي گلبي مو جزء منه لا اخذتي كله واستوطنتي بي.. يجوز انتِ نايمة هسة لو يمكن جاي تسمعيني بس هذا احسن وقت احچي بي وما راح اأجل بعد احبچ ولچ فهمي عااد مو انهد حيلي واني اوضحلچ وانتِ ثولة

سكت شوية واني هم تشتت تركيزي من جولي فتحت باب الحمام تمد ايدها تاخذ المنشفة ورجعت تسد الباب، رجعني وياه بكلامه الاخير..

-الحظ يسويها ويطلع جاي تسبحين لو نايمة اي شنو على گلبچ انتِ مرتاحة واني ميت هنا.. من يوم اجينا لهذا البيت لليوم اني ما نايم بسبب نظرات قصي الوصخة عليچ اريد اللزمه وانعل والديه وتوگف بعيني كيان ماريد اخرب عرسها شايفة لو حچيتي وياه بعد والله اطيحه لحظچ صباا ولبسي شي محترم من تنزلين ضمي زنوودچ الگيمرر

ضرب الباب بعصبية وراح واني هنا واگفة مثل الطرنة من هذا الاعتراف الخطير المثير المليان وعيد وتهديد.. گبر طمني حتى من يجيني اعتراف لازم واحد يهددني ميصير يكون رومانسي خالي من الكلام البذيء....

-جولي: هاي شبيچ واگفة هنا

-صبا: هااا

انتبهت على روحي مرت عشر دقايق على كلام مروان واني لسه لاطشة بالباب اتسمع على ولشي، لفت نفسها بالبرنص جولي وگعدت على سريرها ترطب شعرها وتمشطه..

-جولي: شبيچ بيب؟

-جوليا سؤال

-جواب

-شنو رأيچ بمروان كشكل عام؟

-حلو وكارزما بس متعجبني شخصيته عصبي زيادة عن اللزوم

-صحيح

-ليش تسألين؟

-هيچ بس فضول عندي ومتأكدة ما راح يعجبچ مروان اتذكرچ تحبين الشباب الفرفوشة المطربگة هههههه

-چنت

-اممم حلو تغيرتي بآخر فترة يعني

-اي اني ميتة على شُهيب

-شنوووو

-ههههه ليش مصدومة شبيچ

-مصدومة لان شُهيب زوج صديقتچ جولي!

-هو اني هم چنت أفكر بالموضوع وحايرة

-حايرة لانچ انجذبتي لزوج صديقتچ؟

وگفت على جهة تنزع البرنص تبدل ملابسها درت وجهي وبداخلي مغثوثة لو كملت بهالازعاج والله الا اكفخها..

-جولي: خلينا نكون واقعيين مسرة وشُهيب ماكو شي حقيقي بيناتهم واني اكيد ما راح اتجاوز واروح اطلب منه يحبني بدون لا اخذ موافقتها يبقى زوجها حتى لو چان على ورق

-جولي انتِ واعية على نفسچ؟! واذا چان على ورق يبقى رجال متزوج بمعنى اكو حلقة بيده! شنو موقفچ وانتِ تطلعين ويه رجال بيده حلقة؟ الناس شتگول عليچ؟!

-على كيفچ صبا تره شُهيب ما لابس حلقته وسألته قبل لا نجي على هالشي

-حچيتي ويااااه؟؟؟؟

-اي طبعاً سألته راح تلبس خاتم زواج لو لا گال لا لان مسرة گلتله ياخذ راحته هو ميحب المحابس والحلقة تخنگه

-عوفچ من الحلقة يبقى متزووووج

-راح احچي ويه مسرة صباوي شبيچ ضايجة گتلچ ما راح اتجاوزها واضغط عليها بس اعترفلها بمشاعري

-مشاعرچ انچ تحبين زوجها؟؟؟

-اي

-والله انتِ عجيبة صايرة عججججيبة وانتِ تتوقعين مسرة الي تغار على اللفة البيدها تنطيچ شُهيب على طبق من ذهب؟!

-اي لانها بكل بساطة متحبه ومتهتم

-تحبه!

-صبا عوفچ من العاطفة وتعالي للمنطق هي متحبه لو چانت تحبه راح تطلب زواج حقيقي بس هي تشوفه مجرد صديق وهو ميستحق يبقى متقيّد بزواج على ورق ويفني عمره بعلاقة فاشلة

-اويلي يالحنينة

-اي طبعاً أحن عليه هو يعجبني قبل لا اتعرف عليه اصلاً من كلامكم عنه ومن اللتقيت بي كبر اعجابي واشوفه الرجل المناسب الي مليت من الزلم الخفيفة والفاشلة ماعدهم مسؤوليات غير طلعاتهم وونستهم والنسوان وهمهم بالدنيا الضحك والوناسة والحفلات.. شُهيب غير ولمست اختلافه الجَذاب بيناتنا كيميا حلوة

-كيميا حلوة؟ منين جبتي الكيميا وشُهيب اصلاً ميحچي!! هو حرفياً عبارة عن كتلة من الهدوء بعد شلون شفتي مناسب الچ؟!

-حچينه شوية گتلچ

-شحچيتو؟ گلتيله صباح الخير وجاوبچ صباح النور؟!

-اي

-عزه بعينچ جولي من كل عقلچ انتِ!

-اي صبا يعجبني ليش زعلانة انتِ

-ماشي ماشي ما راح اگول شي اني عود فتحي الموضوع ويه مسرة وشوفي ردة فعلها وادعي من كل گلبچ متدچچ بسچينة بگلبچ

-هههههه اني هم خايفة بس ان شاء الله متسويها

تحچي من كل عقلها تنرفزت وقررت ما اتدخل واخلي مسرة تحل الموضوع وتثبت لنفسها هي تحب شُهيب من خلال غيرتها عليه..

گامت جولي تفتح الباب بعدما اندگت علينا خفت يكون مروان بسرعة سويت روحي نايمة وغطيت راسي باللحاف..

-جولي: هلوو بنات همزين اجيتو ضوجة ومنعسانة اني

-فيروز: اي والله مكان جنات خالي چان هسة جابت الدي جي وعلگتها للصبح

-هدى: مأساة كون فرفوشة الشلة عروسة

-تسنيم: عروسة حزينة

-فيروز: ما راح يدوم حزنها هواي لتخافن هسة ملوكات ينسيها ليث وطوايف ليث

-صبا: چنچ متحبي؟

-عُلا: كلنا منحبه مو ستايلنا وتحسون بي شي غلط

-جولي: بس جنات مبين تحبه كلش

-فيروز: حبي هاي بريئة لو خنفسانة عاملتها زين هم راح تحبها

-بناااات بناااات بنااااااااات

دخلت فواطم تركض وتطفر بمكانها خرعتنا وگف گلبي من صاحت وكأنها منتولة..

-فواطم: لووو تعرفووون شنو صاااار ببنااااات

-البنات: شصاااار

-فواطم: سمعونااا هلاااهل يله سمعوننااا

-علا: جنات حامل؟؟؟

-فواطم: گبررر شتلحگ تحمل هسة غبية

-هدى: يووه هسة غير تحچي

-فواطم: ولچ علااا ولچ جلااال خطبچ علااااا

-علا: چذاااااااابة

-فيروز: شنوووو

-فواطم: والقرااان عمي منصور حچى ويه ابوچ قبل شوية بغرفة العلوية وحدهم چانو وخطبچ لجلااال اخيرررااً

متت ضحك على ردة فعل عُلا صدمتنا من گامت تبچي ممصدگة وتطفر بمكانها وتصيح بصوت عالي كله حماس..

-علا: الحمددد لله والشكرررر يااااااارب الحمدلله ياااااااارب

-فيروز بضحك: ديلا عيني يلا اليسمع يگول خطبچ ابن رئيس الوزراء

-فواطم: هههههه ولچ گومي علا گلي جلال واگفلچ بالحديقة باعيله من الشباك منا

نطت من مكانها تركض للشباك فتحته واحنه هم فضولنا اشتغل ومدينا روسنا بدون لا نخلي يشوفنا، ابتسمت من شفته واگف منتظرها ومعلگ راسه يريد يلمحها وضحكته وفرحته من شافها انطبعت براسي ومستحيل انساها ولا انسى من صار يهز چتف ويرجف اصبعتين ويدزلها بوسات بالهوا وهي تباوعله وتبچييي ميتة من البچي خطية..

فيروز تباوع لاختها ومبتسمة واضح هالحب چان صعب واخيراً فازو العشاق وراح ينجمعون ببيت واحد رغم عُلا صغيرة گالو عمرها عشرين سنة..

-فواطم: خمس سنين يحبون بعض جلال عجز تدرون كللل شهر خلال هاي الخمس سنوات هو يخطبها واشكاال مشاية جاب عليها رغم هو ابن عمها ميحتاج مشاية بس چانو يرفضوه بكل مرة

-جولي: خطية ليش يرفضوه خاف ما عنده مؤهلات؟

-فواطم: بالعكس جلال خريج قانون ويشتغل وعنده بيت وسيارة وعُلا حب حياته، بحياته كلها ما ارتبط حتى من دخل جامعة ابوه شگد ضغط عليه يخطب وحدة ثانية من البنات بس چان ميقبل وينتظرها وما يأس من خطوبتهم لحدما هسة عمي ابو علا اخيراً وافق

-تسنيم: يا عمري اخيراً بس شعجب قبل عمي تدرون بنات اني گلت مستحيل علا تصير لـ جلال

-فيروز: حبي ماطول امها طلعت منها راح تصير اصلاً الي چان يخرب الخطوبة بكل مرة ام علا (مرت ابويه)

هزيت راسي متفهمة وصفنت على العشاق، شكلهم بهذا الحال فرحني وتولدت عندي طاقة ومشاعر جياشة..

-جولي: بنات مو كأن جلال يشبه فاهد لو اني متوهمة؟

-تسنيم: ههههههه اي نفس الستايل والصنف همه السداسي ميفترقون ابد حسب كلام العلوية (فاهد، خالد، قصي، جلال، غياث وهارون)

-صبا: هارون؟ اعرفه هذا سامعة بي من قبل بس شو ما اجه للعرس؟

-فيروز: لا اجه شلون وچان موجود بالزفة اليوم المغرب وصل

-فواطم: عوفچن من هارون عندي خبر ثاني الچ فيروز

-فيروز: الله يستر شكو

-فواطم: عمي خطب علا لـ جلال وخطبچ لـ غياث

-فيروز: مستتتتتتتحيل لو اموووت ما اقبل بي هذا الغبييي!!

-فواطم: هو هم ميريدچ سوه هوسة قبل شوية گام يدگ ويلطم لان ببساطة كلنا نعرف غياث يريد وحدة من البنات بس منعرف منو لسه

-هدى: ايععع شگرتي تقبل بهذا الاجرب الاملح؟؟

-فيروز: شفتيي ولچ

-هدى: يحلم خيولي طايح الحظ هذا

-فواطم: انحلت سالفتها ولچن اصلاً ابوچ رفض فيروزه گله ميتناسبون

-فيروز: اختنگت يمة الا شوية واموت اني رايحة، عليوة طبي يله كافي رعونية

-علا: جاي نسولف شبيچ

-فيروز: بيمن تسولفون وصوتچ ما انسمع

-علا: بالاشارات نسولف فيروزه عوفينا اوي

-فيروز: راح تنكتلين

طبت علا تدردم وسدت البردة، نزلن فيروز وهدى جوه وبقية البنات گعدن على فراش جولي يسولفن، دگ موبايلي شفت المتصل "امي" يمة الله يستر..

-صبا: ها ماما

-ام صبا: تعالي صبا نزلي

بلعت ريگ حاطة ايدي على گلبي، نزلت الدرج اتسحب خاف اتصادف ويه قصي او مروان وتصيرلي كارثة جديدة بس الحمدلله محد اكو غير امي بالصالة.. رحتلها افتهم شصاير واستقبلتني بالرزايل والعتب، تعاتبني على كل موقف سخيف صار اليوم وخصوصاً موقف رجوعنا وكلامي ويه مروان بالشارع..

-ام صبا: صباوي يا يوم ضميتي عليَّ شي بنتي؟ اذا اكو شي بينچ وبينه احجي ما راح اذبحچ بس اگصگص رجليچ واگعدچ بالبيت يمي

-ماما قسماً بالله ماكو شي بيناتنا مروان زميلي وشريكي بالعمل لا اكثر

-خوش ولو ما مقتنعة

-ارتاحي ماكو شي بيناتنا

-ام صبا: المهم هسة شو هاي ام قصي حاچتني قبل شوية

-شتريد؟

-ام صبا: خطبتچ لابنها قصي تعجبت شعجب خطبوله غريبة مو گالو مياخذون الا بنات عمهم؟

من الصدمة ما علقت بقيت فاكة حلگي عليها وهي صافنة تفكر شلون وشعجب خطبوني واني ماكو شي براسي غير مروان! مروان اذا افتهم بـ قصي خاطبني يگلب الدنيا ويسويلنا فضيحة الها اول مالها تالي..

-فيروز: صبا، خالة تعالو گاعدات بالحديقة احنه الجو حلو

قاطع صفنتنا اني وامي فيروز لابسة تراك ضيق و حاطة شال مشكل حيلة على راسها بس عن العيب، گمنا اني وامي نطلع وياهن شوية اختنگت من الصدمات اليوم واحتاج اتخذ قرار يحسم كلشي..

-فيروز: تعالو على المرجوحة نگعد

گعدنا اربعتنا على المرجوحة وشلنا رجلينه نتربع، اني سندت راسي على صدر امي وهدى ساندة نفسها عليَّ وفيروز عليها..

-هدى: طاهر هنا لو رجع للبيت؟

-صبا: هاا ولج منو طاهر هاا (انگرصت بزندي من امي المبتسمة ضحكت ورجعتلها الگرصة) لا تگرصين ام صبا هسة اشوفلچ رجل انطيني صبر

-ام صبا: ههههههه ادبسز هالبنية

-صبا: كملي هديوه منو طهوري

-هدى: ههههه اخوية ولچ

-فيروز: اتوقع بقى هنا علمود حبيبة گلبه الما معبرته

-هدى: اكثر واحد فرحان بزواج جنات ومالك هو طاهر لچ من البارحة لليوم يرگص ما مصدگ

-صبا: خليني احزر اخوچ يحب ايات مو بله؟

-هدى: اي السلبوح كاتل نفسه عليها ومثل المطي لا يقبل يخطبها ولا يقبل يعترف هيچ باقي ملطلط

-نشوان عزيزم بقت عندي زيارة الامام الحسين نقراها ونرجع جوه

-نشوان: دخيلك سيد فحطتنا كااافيييي

طلعو من الاستقبال ممنتبهين لوجودنا لان المرجوحة مغطيتنا ومغطية ظهورنا من وره، گعدوا على الكراسي القريبة من الاستقبال وضحكن البنات بكتمة على تذمر نشوان من بده فاضل يقرا الزيارة بصوت حنون..

-نشوان: اوگف اوگف انتَ جاي تگول ازور سيدي ومولاي معتمدي ورجاي ذخري وذخيرتي في اخرتي ودنياي وانوب گلت ازور نيابة عني وعن والديه فهمنا خوش انوب والد والديه؟ لا انوب تريد اخوتي واخواتي اجدادي وجداتي اعمامي وعماتي؟؟؟ ليش يابة خو همه يقرون ماعدهم لسانات شكو اذكرهم؟ اني اتعب واقره وهمه يحصلون اجر على الحاضر محضر؟!

-هدى بهمس: وجهة نظر

-فاضل: نشوان شگد بخيل صاير قحط واذا هديت الزيارة لاحبابك

-نشوان: ولك انتَ حتى تذكر زوجتك المستقبلية بالزيارة هي وينها وتزورلها خاايب

-فاضل: موجودة وان شاء الله راح توصلها هدية مني وهي بعيدة حتى لو ما اعرفها يعجبني ازورلها واشاركها بأعمالي

-هدى بهمس: ولچن هذا الزوج الصالح الدعالي ابوية اتزوجه بصلاة الليل

-فيروز: ليش يا يوم ابوچ الطلي صلى؟!

-هدى: هو لان ميصلي مستحيل احصل واحد مثل السيد

-صبا بهمس: يخبل السيد يخبل.. ماما ما جاي اتغزل تعرفين السيد انتِ

-ام صبا: اي اعرفه الله يحفظه

-نشوان: حجي اغا اعذرني اني مازور لاحد غير امي وابوية واخواني الباقين طبهم نعل وقنادر

-صبا: ههههههههههه يبوو يا نشوان

اللتفتت اراويهم وجهي ومبين عليهم انصدموا ما متوقعين گاعدات هنا خصوصاً من شافو امي وگفت بمكانها مبتسمة تسلم عليهم.. ردولها السلام بأحترام ومسح على لحيته فاضل يضحك خفيف وينزل راسه..

-فاضل: فشلتنا گدام انسة صبا ووالدتها الله يسامحك

-نشوان: ميخالف تمون صبا ميانتي وياهة للعچس

-صبا: باوع نشوان هاي امي اسكت لا تسويلنا سالفة بهالليل

-نشوان: ولچ هاي سكونة صديقتي شلونچ خالة سكينة شو بعد ما جبتيلنا مشمش

ضحكت امي تهز براسها ميخالف وتأشرله على عيونها عود من عيوني، نشوان شاف امي ثلاث مرات فقط اجت بيهن للشركة عدها سالفة ويايه وجابتلي وياهة مشمش لان اعشقه وبسرعة صادقها وصارت سكونة..

-صبا: مو متزورلي اني هم اذكرني حباب

-نشوان: فاكهة حياتي اول اسم اذكرچ قبل مروان المطنگر

مدت راسها هدى ويايه وگالت بأدب..

-واحنه هم لتنسونا

تفاجأو من شافوها وتقاجأو اكثر من ظهرت نفسها فيروز تعدل بالشال على راسها، انتفضوا يوگفون على حيلهم واحد يباوع للثاني..

-فاضل: عفواً قاطعنا خلوتكم

-فيروز: لا تعتذر سيد البيت بيتكم اخذ راحتك

-صبا بهمس: شو هاي صايرة شريفة؟

-هدى بهمس: حتى اني متعحبة فيروزه خاف مصخنة

-ام صبا: شباب اخذو راحتكم ماما ابقوا انتو احنه راجعين جوه

هزوا روسهم ورجعو گعدوا يكملون بشنو بدوا، اشرتلي فيروز على نفسها وهمست..

-فيروز: اني راح ابقى هنا

-صبا: ليش ولچ

-فيروز: لبسي مو محترم ماريد اطلع هيچ گدامهم

-هدى بصدمة: معقووولة؟؟؟ ولكم خاف مبدليها هااي

لزمت گصتها تتأكد من حرارتها دفرت ايدها حيل ونترت بنفس الهمس..

-فيروز: هذا سيد ابن رسول الله عيب اطلع هيچ گدامه هسة شيگول عليَّ؟

-ام صبا: تعالي ماما اني اغطيچ

-فيروز: لا خالة استحي هدى جيبلي شي من جوه اللبسه على ملابسي

راحت هدى تجيبلها شي وامي راحت تسولف ويه نشوان الگضاهة يحشش حرفياً كل يوم تسألني عليه على گولتها نگع بگلبي هالولد واحسه مثل اخوچ جمال.. هو صدگ ينطي شبه لتصرفات جمال بس نشوان ينبلع ويخبل وجمال حموضة..

-فاضل: اي خالة واجب القضاء

-ام صبا: هااا يعني لازم؟

-فاضل: نعم لان الصلاة واجب شرعي تبقى عليچ دين

-صبا: باوع فاضل اني بديت اصلي من يوم حچينا بالمطعم تتذكر؟ اي بديت بس ازوغل بيها وماعرف شلون اضبطها

رجعت هدى بيدها بشت انطته لـ فيروز وهي فاتت جوه اما فيروز تقدمت توگف بصفنا تسمع للمحادثة..

-فاضل: اعتبريها مثل الدوام حطي منبه ويه كل فرض واللتزمي بهذا المنبه مو تطفي وتنسين، شوية شوية راح تبدين تتعودين وما تحتاجين منبه بعد

-صبا: اممم خوش فكرة

-فاضل: انسة صبا الصلاة اوكسجين لا تحرمي نفسكِ على استنشاقه.. ثقي كل انسان ملتزم بصلاته راح تشوفين توفيقه وجماله وحضوره ومكانته واضحة وطاغية يختلف تماماً عن الي ما يصلي

-فيروز: ممكن اسأل سؤال

تحولت الانظار عليها ابتسمت من شفتها خجلانة وخدودها البيضة موردة ما جاي اعرف ليش كل البنات يخجلن من فاضل وصوتهن لا ارادي ينصى من يحچون وياه حتى بنات الشركة ملاحظتهن..

-فاضل: اكيد

-فيروز: الكفار ميصلون بس ليش نشوفهم مرتاحين وحلوين؟

ابتسملها فاضل ابتسامة تجنن لمعت بيها عيونه، بادلته البسمة فيروز وشالها شوية شوية يخرط من راسها وهاي ما حاسه.. دار عيونه عنها من وگع على اكتافها فوراً شالته تعدله وهو جاوبها سؤالها..

-فاضل: اكو ناس الله ينطيهم دنيا مو شرط يكون كافر، رب العالمين يراقب وميغفل عن احد وينطي فرص للانسان هل رغم توفر كلشي يريده والراحة الي هو بيها راح يتذكر هو انخلق للعبادة لو يبقى مُصر على التغليس والجهل؟ لا عبالچ ذولة حياتهم كلها حلوة هم راح تزورهم مطبات وعوائق تخرب نظام حياتهم وهي اشارات حتى يلتجئون لله سبحانه وتعالى بس اكو ناس رغم توفر الظروف المناسبة والغير مناسبة يستمرون في عصيانهم ويبقون في غفلة عامهون

-نشوان: اتذكر فاضل من قنعني على الصلاة گلي الله منطيك كلشي شهادة ووظيفة واهل وحياة جميلة، منطيك صحة وعافية وايدين ورجلين وعقل ولسان اللخ.. معقولة تستكثر عليه شوية وقت تشكره وتعبده وتصلي؟ لهدرجة انتَ عاصي ومستعد تستقبل نار جهنم بكل روح رياضية بس لخاطر متصلي وتاخذ نص ساعة من يومك؟ لهدرجة  ممهتم للي الله منعمه عليك من دون الناس؟ خجلني ابن الاوادم

ضحكنا على تعليقه بس فعلاً كلامه صحيح وجبته على روحي، فعلاً الله سبحانه وتعالى ناعم علينا نِعم لا تعد ولا تصحى واحنه بكل عين وكحة منهتم ومماخذين هالشغلات بالحسبان؟

-فيروز: شكراً سيد فاضل الله يوفقك

-فاضل: اهلاً وسهلاً بيكم

-ام صبا: ولچ صباوي السيد گال لازم اقضي الصلاة ميصير اغلس

-صبا: اي ادري سمعته ميخالف هنه سنتين چنتي غافلة بيهن وما صليتي اني شگول

ترخصنا منهم وفيروز شاردة انتبهتلها تدير وجهها على جهتهم وصارت عين بعين وين فاضل.. ثواني وهو عكس عينه عنها يحمحم ويسوي نفسه يگح لا ارادي ابتسمت يبدو ان هناك شخص معجب بهاي المؤدبة فيروز وكلام كيان طلع صح..

**

"جنات"

نزعتني البرنص بيبي وشهگت من شافتني غطتني بسرعة بعبايتها ونترت بيني وبينها..

-العلوية: شمالچ ولچ وجهچ مصوفر والزواگ سايح؟؟

-جنات: مابيه شي علوية من الحر خرب المكياج

-خايبة يشوفچ الزلمة هيچ بعلي يشرد گومي وياي للحمام گومي.. ولچ هنادي تعالي شوفي البت

-هنادي: شعليه اني عمة شطولها خليها هي ترتب نفسها

-العلوية: تففف على شرفچ.. امشي يوم امشي الله لا يعوزنا لاحد

اخذتني وياهة للحمام وخلتني ارتب مكياجي وامسح السايح، انخبصت ويايه توصي بيه وتعلمني ما اللاسن واتعارك واصير عاقلة وما اضوج مالك.. هو اني بيا حال وهي حايرتلي بـ مالك..

-العلوية: سوي كل اليگوله زلمتچ حبوبا لا تعاندين ولا تستحين

هزيت راسي بدون لا ارادد مالي نفس لشي، جابت جنطتي من هنادي ورجعتلي..

-العلوية: عايني شني بيها اكو حمرة حمرا؟

-لا

-چا شنيي بيها صواب فگرچ يا الططوة اكو عروس مصوفرة ورايحة حمرتها

-راحت من اكلت علوية هسة شكو

-لا تراددين وحطي حمرة يلا

طلعت الگلوس من جنطتي وحطيت من لا چارة بس حتى اخلص من رزايل العلوية..

-ولچ شني هذا فاهي مو حلو حطي حمرا

-ماعندي بيبي والله ماعندي

-طاح صبغچ الفاهية من اول يوم تريد تهجج الزلمة عايني عليه شحلاته يبرج برج

-يبرگ لروحه اني شعليه

-جنات لا تراددين گتلچ يما صيري عاقلة

-تمام

-هاي شني الشعر ليش ماعندچ شعر ولچ

-بيبي حبيبتي من يوم يومي شعري بوي وگذلتي نازلة على عيوني شنو الجديد هسة؟

-چا هس عروس شلون تظلين هيچ

-اي

غمتني وطلعتني تسحسل بيه گعدتني على القنفة واندارت لـ هنادي اللاطشة بمالك تتماوع من تحچي وياه وسايحة..

-العلوية: هناادي!!

-هنادي: ها عمة ها ها

-العلوية: وجععة امي شمالچ سايحة امشي غاد خلي العرسان يرتاحون

طلعت هنادي تدردم اييع هالمريضة تخرب على كل الزلم كاتبة على گصتها اني ادبسز واريد رجال وابوية المطفي مدا يشوف هالشي او يشوف وممهتم مادري..

-العلوية: ملك عينك على بنيتي بعلي لو زعلتها ما احاچيك واغضب عليك ليوم الدين

-مالك: بعيني جنات علوية

-العلوية: من تروح هنادي فدوة لعيونك عاينيله شحلاته ولچ عايني

دفرت رجلي خازرتني باوعتله وابتسمت بالچذب اهز راسي اي، بادلني ابتسامة باردة وودع العلوية يطلعها من الباب، بقينا وحدنا بالغرفة سمعت صوت زفيره العالي وهو ينزع جاكيت بدلته الرسمية..

-بدلي ملابسچ بالحمام اني راح ابقى هنا

گمت بدون لا اجاوب اجت من الله اروح للحمام اريد ابچي وماگدر گدامه خفت من تنبيه مسرة صدگ لا يعصب ويسوون شي لـ ليث بهالليل..

قفلت باب الحمام ونظرات ليث متفارقني گلبي ينزف دم جاي اتگطع من جوه بس منو يحس بـ جنات ومنو راح يهتم لمشاعرها اهم شي مالك افندي يرتاح وما ازعجه..

بچيت اخفف عن نفسي واني انزع قيطان البدلة من وره مادري شصخمت بس ما جاي تنفتح، صرت افتح واشد افتح واشد جزعت وروحي طلعت اصابعي انمردت وهاي ما ناوية تنزع، صرخت بصوت ناصي جزعانة وگعدت بالگاع ابچي من القهر..

-جاي تبچين؟

سكتت من سمعت صوته يجيني عبر الباب مع طرقات خفيفة، مسحت دموعي بسرعة ووگفت على حيلي البدلة منفوشة بهذلتني..

-جنات: احم.. لا لا ما ابچي هذا صوت الدوش

-مالك: صوت الدوش يگول يا يمة؟

-جنات: اي

-ما شاء الله دوش متكلم هذا

-اي احنه متطورين احثن منكم دوشنا يحچي ويانه حتى منضوج

احچي وامسح بدموعي واشهگ بالخنسة، ضحك بخفة وطرق الباب بقوة اكبر ويگول بأمر..

-فتحي الباب عيوني

-ما

-فتحيها جنات اريد اشوفچ شغلة

-ماريد اشوف

-راح تعجبچ

مسحت عيوني ومخاطيني النزلت بأصابعي صار عندي فضول شنو هالشغلة..

-شنو هي

-طلعي وشوفيها

-خاف هذا فخ

-فخ لشنو؟

-مادري خاف فخ وجاي تضحك عليَّ حتى تشوفني بالبدلة

-وشسوي بيچ بالبدلة

-مالك

-هممم

-بدلتي عصت بيه ما جاي تنفتح ماااااالك

-تمام فتحي الباب اساعدچ

-عمتتتت عينك يالفگررر مو اگلك نيتك خاييثة

-انتِ نيتچ وصخة اني بس اريد اساعد

-ماااريد

-خوش لتردين لعد ابقي هنا وحدچ

سكت صوته واني هم رجعت اعوي وافتح بالبدلة تخبلت روحي طلعت فكرت انزعها بدون لا افتحها حاولت ارفعها من جوه ما گدرت ثگيله قررت انزلها من فوگ عسى ولعل تنزع مني بس الحظ الفگر عصت بيه اكثر طلع جزأي العلوي وهي عاصية بيه خرب روحچ جنات يالثولة شلون راح احل هالسالفة..

-مااالك

-نعم

-ها هاي بعدك هنا بالباب

-اي شبيچ تتعاركين ويه نفسچ جوه

-اهئ اهئ البدلة ما جاي تنزع

-هههههههههه شگد تتنعوض هالبنية

اسمع لضحكته و انوح مثل الحمامة المخنوگة دگ الباب وأمرني اطلع الحقير بس يتأمر عبالك عسكري عنده..

-راح اطلع لا تتأمر

-طلعي بسرعة

-ما اطلع اشو عناد

-خوش ابقي هنا لحدما تتحللين وتصيرين طحالب

-حررررام عليييك

-طلعي لا تصيرين طفلة

-خوش بث مو تباوع غمض عيونك

-جنات تره شفتچ بالبدلة قبل شوية وحطيت راسي بحضنچ خاف نسيتي!

-لا مو هيچ بث نزعتها من فوگ

-لابسة شي جواهة؟

-اي داخليات

-ممتاز طلعي

-يا ثاقط

-الچ خمس ثواني ما طلعتي منا اقفل عليچ الباب من بره وتبقين هنا لباچر

-لا لا اوگفففف

-واحد.. ثنين... ثلاثة....

-لااااااا ولك بث اصعدهااا

-اربعة....

-مااالك ما اللحگ حرررام علييييك

-ولچ لا تبچين وطلعي شلعتي گلبييي

-اوگف اجر نفث

-تجرين نفس لشنوو طلعي ولچ

-اوگف يا الله يا محمد يا علي يا ابا الحثن انطيني القوة

-راح تشنين حرب؟؟ هي بدلة!!

-والكعبة ثگيلة والحمام صغير

سمعته يتمعچل بشي بيدة الباب متت خوف عبالي راح يقفلها فتحت الباب بسرعة اللهث مثل الچلب الدموع مغرگة وجهي وخنينتي نازلة..

-شصاير بيچ ههههههههه

-لا تضحك عيب شنو ما شايف دموع

-و boogers

-شنو هاي

اشر على خشمي مسحته بسرعة بيدي وادير بوجهي عنه شگد عيب..

-جنات: اسمها خنينة هاي تعلمها خـ نـ يـ نـ ـة

-ان شاء الله اتعلمها بالمستقبل، تعالي تبريد هنا اكو

جريت البرنص اللبسه فوگ البدلة وگعدت على القنفة اجر نفس روحي فرفحت من السموم جوه حتى انفاسي انگطعت من البدلة ضابة وضبيتها اكثر..

-ترديني اساعدچ تنزعيها؟

-تغمض عيونك؟

-لا ما اوعدچ غير اشوف شلون انزعها

-لا

-ماشي

بدون لا يحاول ويايه نزع قميصه يشمره على السرير، شهگت ودرت وجهي احس وجهي بوخ عزه بعينه هذا ليش نزع ملابسه ميستحي!

-اللبث قميصك عيب!

-رايح اسبح

-لا لا اوگف حباب البدلة مالتي شلون

-مو متقبلين اساعدچ؟

-ثاعدني

صفن بوجهي ومادري ليش ابتسم سمعته يهمس بخفوت "ثاعدني" وضحك بينه وبين نفسه هذا ديضحك على طريقة كلامي؟؟

للاسف ماگدر امد لساني واتعارك محتاجة مساعدته وگلبي انشلع، لبس قميصه وعافه مفتوح واشرلي اروحله، گمت اسحسل بالبدلة صارت اطول لان انزعت من فوگ وگفت انطي ظهري..

-جنات: ما راح انزع البرنص

-شلون راح افتحها؟

-حاول حباب

-جنات ما راح اركز بيچ وانتِ بالاساس لابسة ليش هالخجل

-اثتحي

ضحك مرة ثانية اللتفتت عليه اخزره وفاجأني لا بل صعقني من مرد حلگي بين اصابعه وگال بضحكة حقيقية..

-احد گلچ طريقتچ بالكلام حلوة لو لا؟

-ثاقط

-كافي كااافي بلاء انتِ

جعص حلگي مرة ثانية ووخر البرنص من اكتافي يشمره على القنفة وصار يحاول يفتحلي القيطان من وره..

-مالك: شمسوية انتِ جنات صايرة لخة هنا

-اي ما ثيطرت

-ههههههههههه يا ربي

-شنوو

-انسي انسي

بقى لا ساعة ولا ساعتين يحاول بي ما انفتح، دگ تلفون الغرفة راح يجاوب وگللهم "بعد ساعة" مادري شعنده بعد ساعة بس ميهمني راح اموت هنا وهالبدلة ما انفتحت.. اخذ سچينة الفواكه يريد يگص القيطان وصحت..

-لاااا حباب لاا حلوة حرامات

-ما جاي تنفتح

-حاول فدوة حرامات

نفخ متنرفز ادري انشلع گلبه نفسي واكثر يمكن لانه مسيطر ومركز بيها، صرت اشيل رجل واحط رجل متت من التعب رجليه تگطعت، ذب نفس وسحبني من متوني يمشيني گعد على القنفة واشرلي اگعد بين رجليه..

-گعدي هنا

-لو تموت

-ما تعبتي من الوگفة؟

-اي بث ماريد اگعد

-جنات مو بحالچ اني تعالي خلينا نفتح هالبلا يا بلا

-مو..

-اششش تعالي

جرني من معصم ايدي يگعدني وقدم ظهري يخليني اگعد على طرف القنفة وهو يشتغل بالشرايط، توترت واني احس بأنفاسه تضرب ظهري واكتافي كلش استحيت بس شنو بيدي..

-جنات

-ها

-هاي شنو بكتفچ من وره؟

-شنو.. شنوو شنوو گول شنووو شنووو حباب گووول گووول

-شبيچ انخبصتي جاي اتشاقه

-اهووو مو وكتك

-لا جديات عندچ وحمة هنا

-جديات لو بيبيات هههاااي

-جنات نزلي نفسچ وانطمي

-حرام عليك كله تتحاثب عليه

-راضي بالحساب بس سدي حلگچ

-ما

-صيري حبابة يله حتى اجيب المفاجأة

سكتت بس لخاطر المفاجأة وهو مستمر يشتغل بيهن، ما توقعت لهدرجة معقدة العگدة توقعته هو ديبالغ ويماطل بالسالفة بس حتى يعذبني..

-مالك احثك تضحك عليَّ معقولة هيچ عاگدتها قوي اني وما جاي تگدر تفتحها؟

-اي، تقدمي شوية

قدمت نفسي شوية انتظره يرجع يكمل، اللتفتت ربع اللتفاته اشوف شديسوي بس فاجأني من اخذلي صورة..

-شوفي

راواني تلفونه ماخذلي صورة من وره الله والله طالعة اجنن بالصورة ما ركزت بالعگدات صرت اكبر على وحهي اشوف عيوني مبينة وگذلتي نازلة عليهن فديتني..

-جنات: تروحلي فدوة هنادي ططوة

-باعي العگدات بابا

اخيراً ركزت بالصورة واشوف العگدات يبوووووو صايرة حرب العالمية الثالثة هنا شي فوگ شي يخرع شكله واليخرع اكثر ظهري نصه طالع عزه شگد عيبببب..

-خليني اگصهم

-لا حباب

-اشتريلچ نفسها هاي ما جاي تنفتح

-نخابر على مثاعدة؟

-منو يجي يثاعدنا؟

-كيان

-كيان ويه زوجها عيب عوفيهم براحتهم

-هثة شنو يعني قابل شكو

-عيب بابا اليوم عرسهم ميصير نخرب عليهم

-شنو نخرب؟

-اجوائهم

-شنو اجوائهم؟ تلگيهم جاي يتعاركون

-اي مو همه مثلنا همج

-وللللللللااااك

-اششششش صوتچ خرب ولچ شنو من صوت عالي عليچ اذني انزرفت

-لا تگول همج علينا عيب

-وي وي ماشي احنه ناس راقيين

-راقيين من باب الشرجي اي

-شنو

-اگلك شنو "وي"؟

-يعني نعم بالفرنسي

-الله ططوة علمني فرنثي

-ميخالف

-يله افتحلي الرباط فدوة ملاك

-گعدي عدل الله ياخذ ملاك ويخلصه من هالبلاء

بعد مرور فترة مو قليلة اخيراً اخيراً اخيراً فتحها وشمر القيطان بالگاع جزعان وذب روحه على القنفة يمسح وجهه المتعرق.. ضحكت فرحانة اهم شي ما گطع القيطان البدلة حلوة حرامات وعُلا گالت اضمها الها تريد تلبسها بعرسها من يخطبها جلال بعد اربعين سنة علما امها توافق..

-شكراً تعبتك

باوعلي بطرف عينه معاجبه عفته ورحت اركض للحمام اسبح وابدل ملابسي.. لبست السيت الي بيبي جبرتني اجيبه وحطيت البرنص فوگاه يغطي جسمي وطلعت للغرفة وشهگت لا ارادي مصدومة من الشفته..

-جنات: جبتلي باچه؟؟؟

-ادري الوقت مو مناسب ومو من الذوق واحد ياكل هيچ شي بيوم عرسه بس شفتچ زعلانة وجوعانة گلت ادللچ بيها

بلعت ريگ عاجزة عن الكلام والتعبير، گلبي جاي يتگطع! هذا التعبير الوحيد الي گدرت اوصله.. تأنيب الضمير دمرني ليث من جهة متدمر ويبچي عليَّ ومالك من جهة ثانية خوش رجال ويهتملي واني بالوسط صايرة مثل الططوة ماعرف شسوي..

گعدت على القنفة بدون لا احچي شي، اخذ موقع بجانبي وگال بتردد..

-الفكرة غلط مو؟ صح مو مناسبة الاجواء تهورت عذريني هسة اطلب من الفندق يغيرون العشا

-لا مو غلط شكراً لانك تفكر بيه مالك بث...

هز راسه وقاطعني ببطئ يكمل كلامي..

-بس انتِ زعلانة وما مرتاحة وياي اعرف ماكو داعي تكملين

رفعت عيوني المدمعة عليه ومرة ثانية عجزت عن التعبير والرد، استغل هدوئي يردف بـ لطف مع ابتسامة..

-جنات اعيد واكرر اعتبريني صديق، اخ او ابن عمچ أي شي المهم تكونين سعيدة وما تحسين هذا الزواج دمر حياتچ، اني ما ماخذچ لـ سجن الچ حق تعيشين مثلما تحبين وتكملين دراستچ وبالتخصص الي انتِ تختاري وبمرور الايام راح تكونين صداقات هناك وتحبين الحياة.. انطيچ كارت بي فلوس بالمبلغ الي تحتاجي شگدما كان واحطلچ سايق خاص ياخذچ وين ميعجبچ ويه صديقاتچ للسوگ، لمطعم، لـ كافيه أي مكان بس المهم تبلغيني قبل لا تطلعين بس حتى اتطمن عليچ.. اني راح اسعى حتى تكونين سعيدة وما تحسين بغربة وياي

-راح اشتاق لاهلي وايات

-نجي كل فترة للعراق لا تخافين كلما يصير عندي شغل هنا اجيبچ وياي واساساً... اكو امل لـ شي

-شنو هو

-اكو امل ننفصل بس احتاج وقت لهذا الشي

-گووول والكععععبة

-باعي زواجنا صار بس علمود شغلة وحدة بس!

-شنو هي

-اني ادير املاكچ وتتسجل بأسمي

-عمي اخذ املاكي كلهن حلالك ماريدهن

-ما محتاجهن ولا راح اخذهن بس انطيني مجال افكر بشي مقنع وننفصل

-گلهم اني مو حبابة ولثاني طويل

-اتوقع الكل يعرف بهالشي جنات

-امممم لعد اوگف افكر بشي...

-مو وكتها هسة عوفي الموضوع عليَّ تمام؟

-اي اي يله ناكل لعد

لميت البرنص ارفعه ومديت ايدي اكل من الباچة اااححح اي هسة الواحد رجعله الواهس بالحياة..

-متاكل؟

-لا

-ليش

-ماحبها

-غريب رجال ميحب الباچة

-اي اني

-هاا نثيت انتَ ثقافتك فرنثية

-ثقافتي مو فرنسية جنات

-المانية؟

-ولا المانية اني عراقي

-بث امك بلجيكية چانت

-امي اوكرانية بس حتى ماعرف احچي بلغتهم ولا ربيت وياهة

-ياااا لعد منو رباك؟

-ربيت بـ ميتم

-يمممممة

-اكلي اكلي

-ثولفلي فدوة فدوة

-يجي يوم واسولفلچ هسة أكلي

-يله راح اكل تعال ضوگهة والكعبة طيبة

-ماشتهي اكلي انتِ بالعافية

اكلت وهو گام للبلكونة يدخن ويحچي بالتلفون، كملت اكلي ولميت المكان نظفته وطلبت خدمة الغرف يجون ياخذون الاكل ورحت اغسل واتعطر واعطر الغرفة وهو لهسة ما مكمل مكالمته.. يسده من واحد يخابره واحد ثاني وهيچ بقى فوگ الساعتين لحدما خلص ورجع للغرفة..

مطى نفسه بالباب تعبان مسح على عيونه وگال بتعب مغلف بالبرود يختلف عن قبل شوية يجوز بسبب الاتصال الي وصله..

-نامي على السرير واني انام هنا

-هااا

-نامي على السرير واني انام على القنفة متكفي هي بس ميهم ادبرها

-هااا لا لا خاف ظهرك يگوم يوجعك انتَ نام على الچرباية

-لا عادي متعود انام بأماكن ضيقة

-ليش انتَ جريدي وتنام بأماكن ضيقة؟

كشول بوجهي ميجاوب ضحكت وعضيت لساني اللزمه لا اچفص ميصير لازم اصير حبابة علما نتطلگ خاف يخبث ويغير رأيه..

-مالك وين وين ليش تنام هنا شبيك

-لعد وين انام

-على السرير

-وانتِ تنامين هنا؟ لا ماقبل بهالشي

-اءء اءءء

-شبيچ

-اني ما راح انام اصلاً مو نعثانة

-ليش ما تعبتي معقولة؟

-لا يله يله نام انتَ اني اروح يم كيان واجيبلك فاهد

-ولچ ويين

جرني من معصمي يرجعني فلتت نفسي منه ورجع يسحبني واني افلت بروحي وازاگط حتى يهدني لزمني من خصري يشيلني وشمرني على الچرباية..

-نامي!

-مااا

-نامي جنات!

-لا تتأمر عليَّ مو ابوية انتَ

-منا وهيچ اني المسؤول عنچ يله نامي

-ماگدرررر

-حاولي تنامين حطي راسچ على المخدة ونامي يله گدامي

-حباب ماريد ماريد فدووة

طفرت من الفراش وشالني مرة ثانية يشمرني ويلزم رجلي يثبتهن، گمت ادگ واللطم شلون اواجهه بالحقيقة واگله اخاف انام وحدي والا اللطش بشخص ياله تغفى عيني..

-نامي صغيرتي

-حباب ماريد ماگدر افهمني

-يعني تحبين السهر؟

-اي احب

-ماشي راح انام اني لان كلش تعبت وانتِ شوكت ما تردين تنامين گعديني و اني اروح للقنفة وانتِ على الفراش حتى تتراحين

-ماشي

وصدگ راح للحمام اقل العشر دقايق طلع سابح ولابس بجامة وقميص مفتوح، درت وجهي مستحية وهو نزع القميص بقى بالبجامة وجر الغطا ونام...

**

-فاهد اذا فتحت عيونك افگسهننننن وروحها لامي... ولك فااهد فاااااااهد لييييش مغلس ومتجااااوب

لازگة بالحمام، سبحت ومشطت شعري وكملت تريب نفسي ولبست دشداشة النوم واستحي اطلع بيها العلوية ورطتنا بهاللبس خرب شلون راح اطلع انوب هذا المسودن مدا يجاوب مادري وين ولى..

-كيان: اذا جاي تلعب عليَّ اكرههك عيشتك

مديت راسي من الحمام اشوف وينه لگيته گاعد على القنفة سارح وبيده وشاح بناتي مورد بأصفر ووردي لافه على ايده ومقربه على خشمه كأن ديشمه..

طلعت من الحمام اتسحب على كيفي صافنة عليه، صرت مقابيله مباشرة ما غير من گعدته، اشرتله بيدي وهم انتبه لوجودي، تركته وحده يووه مالي خلگه رحت للچربابة اريد انام ميتة تعب شوية وشفته گام من مكانه..

-كيان: ها رجعت الاشارة؟

مجاوبني سفط الوشاح بيده باسه وشمه وحطه بجيب بنطرونه ويه ساعته، راح للحمام شوية وطلع بس بالشورت القصير!!

-ولللللللللللكم يبوووووووووو

-ومرض

-اللبس شييي يا فااااسق يا فاااجر

-كيان تقبلي الواقع المُر حبيبتي اني هيچ افتر بالبيت عودي نظرچ عليه

-لعبت نفسييي راح ازوووع خرب روحك

-تتعايرين غير جسمي يشگچ ويشگ اخوانچ

-الله ياخذك

-نامي نامي لا تزعجيني چنت مسلطن

-على شنو مسلطن بالطيحان الحظ؟؟؟

-بـ حمرتي تاج راسچ

-اللبس ملابسك وولي بره ماريد اشوف وجهك شوهت انظاري

-طلعي وجهچ من اللحاف اختنگتي لبست بجامة

طلعت بس عيوني وشهگت من شفته يضحك عليَّ النذل..

-روووح يا فااهد ابن شامة ان شاء الله يجي يوووم اشوفك مثل السلبوح السيان وصخخ قذرر ومحد بحاله وجسمه محلبس فاشة العضلات

-كوري

-هااا

-انچبي

-گبر

ابتعد مني مادري شيسوي، وخرت الغطا عن تك عين لگيته واگف ومنطيني ظهره رايح للميز يرش عطر، خرب هذا شلون بي راح نبقى بهالوضع يفتر هيچ؟!..

ظهره من وره مخيف!! متروس وشوم ماكو ولا نقطة مبين من جلده وشومه لونهن اسود والبعض ملونات كُلش غريبات وعضلاته مو بس اوڤر عضلاته مال وحوش بشرية مستحيل يكون انسان طبيعي هاي من غير ترچيته الالماس التلمع بأذنه ضايفله ستايل شقاوات بأمتياز..

-فاهد: كوري راح انام يمچ على السرير مو تتحارشين بيه عيب عندچ اخوان هم يجي يوم ووحدة تتحارش بيهم

-ممنوع تنام على السرير

-حبابة

-ممنووع

-بداعة ابننا

-يا ابن هذا؟؟؟

-هذا

اشر على مكان بخاصرته عبارة عن وشم جمجمة مال راس طفل وملامح الطفل هم مرسومة شكله مرعب منو يرسم جمجمة طفل على خاصرته؟!

-هذا شنو الوشم يخرع

-هذا تراهننا اني وهارون عليه خطفنا طفل ومنو يذبحه اول يوشم وجه الزعطوط على جسمه

-وانتَ ذبحته؟؟؟؟؟؟

-اي وسويت عظامه شوربة ههههههههههه

انخطف لوني والله لو تذبحوني نقطة دم متلگون بجسمي، هو يضحك ويتقدم عليَّ ذب روحه على السرير ودار نفسه صار بجانبي مباشرة من صدمة الموقف حتى ما تحركت..

-كيان: كورية انتِ حلوة بس مو احلى من حمرتي

بقيت جامدة فاتحة عيوني وحلگي سوه، رفع نفسه يسند راسه على ايده يقرب وجهه من وجهي ويكمل..

-عندي سؤال

-فاهد بداعة امك تگول جاي تتشاقى على سالفة الطفل

-بداعة امي جاي اتشاقه على سالفة الطفل

-يعني تتشاقه مو؟؟

-لا

-لعد انتَ گلت وداعة امي!!

-غير انتِ گلتيلي گول

-ولك اني اقصد احچي الحقيقة!! صدگ ذبحت الطفل؟؟؟

-كورية

-هاااا

-ليش هيچ حساسة مو زين قوي گلبچ ينتظركِ الكثير

-فاهد لا تتشاااقه وياي هيييچ شقى ماااصخ

دفرت كتفه بحقد وكره لعبت نفسي وجسمي كزبر من رجع يضحك ولا كأن مسوي شي اجرامي وهو قتل طفل!

-ههههههههههه شبيچ ترجفين ووجهچ صوفر

-اسكت لا تحچي بعد

-كيان خاف عبالچ راح تبقى حياتنا هيچ بس نسولف ونتداهر؟

-شنو قصدك

-عيوني فتحي عقلچ زين ابوية ناويلچ نية گشرة اللهم اني بلغت اللهم فاشهد

-يعني شنو يسويلي

-بعد حسب خبالات شمسون كل يوم شكل نمشي على مزاجه

-شُهيب ما راح يسمحلكم تأذوني!

-وشُهيب شلون راح يعرف اذيناچ؟

-اني احچيله كلشيي ما اضم عليه شي راح يطيح حظكم والله

-انتِ تردين تجيبين آخرته؟ اذا تردين گليلي حتى اساعدچ ونخفف موته خطية يوگع بيد ابوية

-مستحيل شمسون يقتل شُهيب هو يحبه!

-يحب شُهيب بس يكره اخوانچ، تره ابوية على بُعد شعرة من ذبح اخوانچ لانهم غاثي كلش

-حرام عليكم والله شتردون منييي والله راح تجلطووني

-اشش اشش ليش بديتي من هسة تلطمين بعدچ ما شفتي شي

-فاهد انتو جبرتوني اتزوجك وتعوفوني بحالي شتردون بعد؟؟؟

-وترديني ابقى مربوط بيچ العمر كله؟! اصحي على نفسچ كيان اني هم مجبور عليچ وما طايق هالعلاقة وانتظر دقيقة دقيقة اخلص منچ واشمرچ بأقرب حاوية جثث!

حچاهة بنرفزة حقيقية بدون شقى وضحك مثل العادة، گام من الفراش يفتر بالغرفة وعروقه بارزة من العصبية.. يروح ويجي يشعل جگارة يشمرها ويفتح الثانية واني باقية بمكاني احاول استوعب كلامه وافكر شنو ممكن يسووا بيه اكثر من هيچ؟

-جوعان

رفعت عيوني عليه ملامحه رجعت طبيعية، من شاف استغرابي ضحك بصوت عالي مثل المخابيل وشمر نفسه على السرير بصفي..

-فاهد: هسة لو اللگه طفل چان كتلته واكلته على العشا

-حسبي الله ونعم الوكيل بيكم عساكم حطب لجهنم يا فاهد وشمسون وشكو واحد مشترك وياكم بهاي الجرائم!

ضحك مرة ثانية يشعل جگارة جديدة اخذ منها كم نفس وانطاهة الي..

-هاچ بلكت تخففين عصبية

-انتَ مو صاحي قسماً بالله مريض نفسي!

-ادري

-روح تعااالج ما دامك تدرييي

-كوري اتفقنا ما احب احد يصيح اتنرفز

-شتررررررريد

-لا تعلين الموجة بديت اعصب

-اووووووي خطيةةة ميخاااالف تحملنيييييي مو انتَ تزووووجتني انيييييي ما اعرررررف احچي بصووووووت ناااااصي ابد

اعيط بعلو صوتي يجوز حتى وصل صوتي للباقين بس ما اهتميت ردت استفز فاهد بأي طريقة وواضح نجحت لان طول ما اني احچي هو عاصر عيونه ومعكمش ملامحه بألم..

-كافي كيان

-انتَ كااافي

-بعد صيحة وحدة وتتعاقبين

-يااااااااا صدووووووووگ

انبلع لساني من الخوف هجم عليَّ صار فوگاية يقيدني، متت بدمي افترسني افتراس ثبتني بالفراش وتد ودگه بيدي ورجليه وعضني عضة موت بـ رگبتي شلعها شلعع..

-الله يااااااااخذك فااااااااهد

ضحك وعضني بعد مرة اقوى من القبلها صحت بصوت اعلى ورجع عضني للمرة الثالثة، روحي تشوغ من يثبت اسنانه ويضغط على جلدي بقوة احسه يشلعه..

-ولللك راح امووووت

-ههههه لا تصيحين ولچ

-وخررر لااااا

ما تحملت نزلت دموعي من القهر وخنست مصدومة وعاجزة، جسمه ثلاث اضعاف جسمي وقوته عشر اضعاف قوتي..

-ليش تبچين؟

زدت بالبچي ممرودة روحي قهر واللم ووحدة، وين چنت ووين صرت، معززة مكرمة مدللة عند اخواني فنه الي يطخني حتى مروان من چان يفقد اعصابه ويكتلني مچنت احس ربع من هذا الالم هسة ووره ما يصحى على نفسه يغرگني بالاعتذارات والدلال يبوس ايدي حتى اسامحه وما ازعل عليه.. وهسة اني بين ايدين وحش كاسر خالي من المشاعر!

-لا تبچين اسف

ابتعد مني يتمدد بصفي، مسحت دموعي متندمة شلون بچيت گدامه بس الالم لا يطاق تلمست اماكن العضات احس بطبع سنونه زارفات رگبتي ودم طالع من مكان..

گمت داروح للحمام اغسل وسحب ايدي على كيف، نترت ايدي منه ورجع ياخذها بين ايده غصب عني..

-لا تزعلين ما توقعت راح تتوجعين لهدرجة چنت اتشاقه وياچ

-تتشاقى وياي تملخني هالشكل؟؟ انتَ ليش لهدرجة عنيف وكلشيي عندك بالقسوة شقاك وضحكك حزنك وزعلك العنف يمشي بدمممك فااهد انتَ مريض نفسيي وتحتاج علاج!

سنطة صارت بعد كلامي تركته ورحت للحمام اغسل واشوف مكان العضات الحقير يختار اماكن حساسة تخزي، دعيت عليه من عمق روحي بگلب محروگ عسى كل وجع احس بي يصير اضعاف مضاعفة بگلبه عسى ربي يختبره بحمرته الخابصني بيها مو هي التتأذه هي مالها ذنب! ادعي اشوفه مفرفح عليها مثل المخبل الما بيده شي دخيييلك يارب!!

طلعت من الحمام ونمت بالفراش ممهتمة لوجوده هو مغمض عيونه توقعته نايم، انطيته ظهري وغطيت روحي باللحاف بيناتنا مسافة مو قليلة شوية ارتاحيت.. هستوها بدت تغفى عيني وفزيت على صوته..

-چذب قصة الوشم مال الطفل

ركزت بصوته وحسيت بي يلتفت عليَّ يواجهني، نغزني بظهري بأصبعه ما تجوابت وياه.. سواها مرة ثانية هم ما تجاوبت بس طبعاً نغزاته مو نغزات طبيعية لا تزرف الظهر زرف شگد عنيف هذا الرجال..

-كوري نمتي؟

غلست وغمضت عيوني امثل النوم شفته ينهض نفسه يتأكد مني نايمة لو لا، تلمس جفن عيني خفت يطبب اصبعه بنص عيني بس الحمدلله ما سواها، رجف داخلي من لطع خدي ومبين صفن ثانيتين ورجع سواها بمكان ثاني وهمس..

-غريب

من تأكد مني نايمة توقعته راح يروح عني و يسكت بس صار العكس تمدد بصفي وصار يسولف وحده والواضح من حديثه راد يفضفض بشي خانگة بس بدون لا يسمعه احد..

-زارتني نوبة عصبية بسبب عركة بيني وبين مالك قهرته مني حيل ومن زعله گال بالحرف الواحد "روح ماريدك بعد انتَ بس عبئ فوگ ظهري"..

تنهد وسكت، حسيت بي يلعب بأطراف شعري من وره بقى على الصامت فترة توقعته خلص ميحچي بعد بس اردف بنبرة هامسة مثل الديوشوش لاحد..

-توجعت من كلامه وانقهرت مالك مو بس اخوية مالك ابوية الرباني وتعب عليَّ، يدافعلي ويتصدى لكل خطر يواجهني وبيومها صح اني تعبته وتعاقب بسببي ابوية طلع حرگته بي وجلده بالضبط ستة وتسعين جلدة على ظهره.. حسبتهن وحدة وحدة واحس بالجلدة مو على ظهر مالك چانت بگلبي.. شفت بعيني دمه يتطافر وجلده يتشگگ ويبين اللحم ما رحمه ابوية بسبب شي تافه مثل العادة

انعصر گلبي كلامه اجه مثل الطلقة بگلبي فركت صدري على كيف اخفف على نفسي ماريد ابچي وافضح روحي اني گاعدة بس اوووووف يا وجع روحي..

-علگه بالسگف وكمل تعذيبه اشر لزلامه ينزلو وعافو بالگاع يصارع الالم وشرط ممنوع احد يساعده والي يتدخل يتعاقب ضعف عقوبة مالك.. ضربت تعليمات ابوية بعرض الحايط ورحتله اركض اشيله من الگاع وگلي هالجملة "روح ماريدك بعد انتَ بس عبئ فوگ ظهري"..

دفع ايدي وسند نفسه يگوم وحده حاولت اعتذر منه ابوس ايده ورجله وراسه بس ما قبل حقه العذاب الي يحصله من وراي مو هين ورغم هذا يبقى يدافعلي بكل مرة بس هالمرة حسيت خسرته، خفت ابقى وياه وتطلع افكاري صحيحة طلعت من الگرفان اريد اجر النفس ماگدر مخنوگ وگلبي غادي دم ركبت سيارتي اسوق وقررت اروح لـ شُهيب اتعارك وياه شلون يعوف مالك وميجي يفزعله صح هو معليه وماله علاقة بس گلبي حاقد عليه..

الطريق كله اني احرگ بروحي ما اشوف بعيوني من العصبية اريد اطلع ضيمي بأي شي گدامي.. مطر قوي والدنيا برد شتا ما اشوف الشوارع عدل واثناء ما اني اسوق بأقصى سرعتي حسيتني دست على شي.. ردت اغلس واعبره بس مادري ليش وگفت السيارة ونزلت اشوف شنو وچان اللگاه طفل صغير ميتعده عمره اربع سنوات..

ممرود مرد بالشارع بس وجهه صاحي ومابي شي، انفزعت وخفت تأكدت من نبضه بس مابي نبض الطفل مات!

ادور بعيوني الشارع اريد اشوف احد يساعدني بس الدنيا ظلمة والمطر يحجب الرؤيا عني اني القريب من الطفل شلون بلي واگف بعيد.. شلته بين ايدي واخذته للمستشفى بنص الطريق اتصلت بأبوية ابلغه چان يمه هارون من افتهم بالسالفة أمرني اروحلهم للگرفان رحت وبداخلي امل راح ينطيني حل بس صدمني من جبرني اقوي گلبي و ادفن الطفل بيدي وما افتح حلگي ولا اگول لاحد..

سويتها واول مرة احس بشي يوجع گلبي لهاي الدرجة، اشكال مصايب اشوف واعيش بس ماكو مرة جرائمي ومصايبي تعلقت بطفل، دفنته بيدي مثل الطير وجهه مابي خدش بس جسمه منتهي..

اهل الطفل يدورون على ابنهم عبالهم ضايع او مخطوف، ابوية من خلال معارفه هكر كامرات الشارع وحذف التسجيلات وراحت السالفة وانست.. ايام وليالي الكوابيس ما عافتني تعبت وانهد حيلي وصممت اروح لاهل الولد وابلغهم ابنكم مات كافي تدورون عليه بس للاسف ابوية لگفني بنص الطريق وكأنه قرا افكاري..

لزمني وزوعني حليب امي بالتعذيب، جلدني لحدما ظهر لحمي وطلعلي جلد جديد ياله ارتاح وعافني معلگ.. مالك مو هنا ويجي يساعدني چان بالمغرب وماعنده علم بالصار، بقيت معلگ اربعة ايام وهارون يساعدني يجيبلي اكل ومي بس فنه لو نزلني بدون علم ابوية والله يتعلگ بدالي ويعذبه ضعف عذابي..

اول ما طلعوني من الگرفان رحت وشمت راس الطفل على خاصرتي اتذكر شكله وملامحه ووصفتهن للواشم وجابه فيت وهاي چانت اول جريمة قتل اسويها واخفي اثرها بدون لا اتعاقب عليها...

تنهد يلقط انفاسه مبين الكلام اذاه وتعبه رغم فاهد واضح عليه مجرم محترف وگلبه من صخر بس هالموقف اثر بي وطبع بعقله.. يجوز لان چان بريء بوقتها؟

-فاهد: ابوية علمنا نرتكب جريمة كلما نضوج حتى نرتاح، ربانه من صغرنا نصير وحوش ويمسح من گلوبنا الرحمة والي يخالف شوره ويعصي أوامره.. من يغمض بعد لا يتأمل يفتح عيونه

نغزات مؤلمة غزت گلبي واحس بتعب سحب كل طاقتي بسرعة غفيت بعد كلماته وهو يمكن هم غفى، بعد فترة حسيت بأيده يحركني بس مو تحريك عادي شوية وراح يلطشني بالحايط من قوة الخض..

-كوري كوري گومي

فتحت تك عين اباوعله شبي هذا شفته مبدل وعطره يهفهف ومرتب نفسه وبيده الموبايل..

-شبيك

-طالع اني بشغل مو تخترعين غرفة شُهيب بصفنا اذا محتاجة شي روحيلهم

-ساعة بيش؟

-بـ 3:00 الفجر

-وين مولي بهالليل

-عندي شغل خالو نامي انتِ معليچ

ما گلت لا حطيت راسي على المخدة وبسرعة غفيت وما حسيت الا على رجعته نزع ملابسه بباب الحمام شفت قميصه الابيض ملطخ دم دحسه بعلاگة وشمره على جهة وطب يسبح..

باوعت للساعة بثمانية الصبح من الاربعة للثمانية هو طالع! والله يعلم شصخم بره بسبب الدم الي على قميصه واضح الموضوع ميبشر بخير..

غفيت مرة ثانية وحسيت من جديد على حركة بجانبي شخص على الفراش يلوب ما حطيت بالي وياه وما اهتميت لولا حركته الاخيرة وهو يحضنني من وره ويهمس..

-ادعي عليَّ ولا تدعين على حمرتي

شنو؟ شجاب حمرته هسة من الصبح وشلون عرف البارحة دعيت عليهم؟

-گلبي يوجعني من الصبح كوري خايف بيها شي لا تدعين عليها احلفچ بروح امچ

فلتت نفسي من ايده واللتفتت عليه تواجهنا صرنا وجه بوجه عيونه خابطة صايرات حمر وأطرافه ترتعش بدون كلام زايد طلع موبايله من جيبه وحطه بوجهي شفت الصورة الفاتحها لـ بنية شعرها احمر ولابسة فستان ابيض وحاطة ايدها على بطنها ممبين شي بس حركتها توحي على...

-فاهد: شنو جاي تشوفين بالصورة كيان؟؟

-بنية

-شوفيها زين اكو بيها شي غريب؟؟؟

-مثل شنو

-شوفيييها

عرفته يمكن يقصد حركتها تدل على انها حامل بس بطنها ممبين يمكن بسبب ايدها المغطيتها..

-شفتها فاهد مابيها شي البنية

-يعني مو هاي.. مو شسمها.. حامل؟

-مادري

-لا لا مو حامل مستحيل اعرفها مو حامل هي مو هيج اصلاً هي ما متزوجة شلووووون تحممممل

سكتت ولميت نفسي لنهاية الفراش، گام يلوب بالغرفة ويحرگ بروحه حرگ يدردم وحده ساعة يصفن وساعة يهز راسه لا وساعة يهمس "مستحيل"..

-كيان هي ما متزوجة والله ما متزوجة ابوية گال حمررتي ما متزوجة ووعدني يزوجناا بس شلووون

-شنو شلون

-شكلها حامل؟؟ يعني متزوجة لو.. لو...

فتح عيونه الصفر على وسعهن بهت بالدقيقة هو هيچ فاتح عيونه وصافن عبالك فصل انرعبت من تصرفه ما رمش ولا مرة..

-فاهد: مغتصبيها مرة ثانية؟ معقولة؟؟ لا لا مستحيل لااا ما اقبل بهذا الشي لاا!!!

-فاهد

-هااا هااا گولي شييي گولييي راااح اتخبببل

-البنية ماتوقع حامل

-هااا

-اي يعني كلشي ما مبين وحركتها عادية يعني قابل بس الحامل تلزم بطنها؟

-مو بله؟؟؟

-اي

-اي اي صح اي..

تقرب يهرول عليَّ گعد على ركباته وجر ايدي ثنينهن يعصرهم ويحطهن بين ايده ويگول بخوف ولهفة..

-كوري ادعيلي ادعي مابيها شي والله گلبي ما متطمن بس محد جاي يساعدني ابوية ما يخليني اروح اشوفها ولا يخلي زلامي يتدخلون ويراقبوها جاي يكتلهم بس يتقربون منها مااعرف شي عنها ومتأكد اكو شي.. جاي يضمون عليَّ شي!!

يتبع.....

━━━━━━  ━━━━━━

بارت خالي من مسرة وهموسي 😭 بس لتخافون الهم مشاهد خاصة البارت الجاي ان شاء الله 🤫🩷

صبا ومروان؟ منتبهين صبا ما انطت ردة فعل واضحة على اعتراف مروان؟ احد منتبه لو بس اني 😂

جنات ومالك ماااي بيبييزز 🥹♥️ + كلام مالك ويه جنات عن طلاقهم اءءء؟...

فاهد وكيااان احبهممم يا ناس احبهههمم بس فاهد متت قهر عليه بهالبارت اكتب وگلبي معصور احسه طفل وحيد ويحتاج ام او زوجة تحتضنه وترجعله الامان والثقة 😔🫂🩷

انطيت رأيي بهالبارت بشكل دقيق لان عجبني 🦦😂🔥

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

لا شيء أكثر نشاطاً من مخيلة امرأة تشعر بالغيرة.. ♥️

━━━━━━  ━━━━━━

"كيان"

بعد محادثتي الغريبة ويه فاهد گام هو للحمام سمعته يفتح الدوش مرة ثانية مع العلم سبح قبل لا يگعدني، واني بدوري گمت ابدل ملابسي جايبة ويايه فستان تركوازي فاتح كلوشة قصير اضطريت اللبس وياه كالون لان ادري بـ شُهيب راح ياكل راسي اني بس دا اتخيل شلون راح يطلب من مسرة تغير من ستايلها اساساً مادري شلون صابر لسه متحمل وساكت وما واجهها بغيرته المفرطة..

نزلت اللبس حذائي الكعب عادةً ما اللبس كعب طولي مناسب 160 سم ما احتاجه بس هسة علمود الفستان.. طلع فاهد من الحمام ينشف شعره المهلس هو سرح وناعم بس مهلس..

-فاهد: صباح الخير عروستي الكورية

-كيان: مو قبل شوية سولفنا هو كل شوية تصبح عليَّ

-اي ليش لا

-تدري البارحة دعيت عليك متصبح

-حرامات ما وصل دعائچ

-يمكن يوصل باچر محد يدري

-ههههههههههه كوري انتِ حلوة

رفعت راسي مستغربة هذا ليش كلما يشوفني يگول نفس الجملة؟ واكيد يلحقها بـ...

-بس مو احلى من حمرتي

-نعالتك منو يومية مقارنني بيها؟!

-هههههه تغارين من حمرتي؟ لا تغارين هي حبابة وراح تحبيها مثلي

-اففف وخر شگد مزعج

عبرته ادخل للحمام وجفلت يابسة بمكاني من شفت روحي بالمراية، رگبتي الصايرة عبارة عن خريطة من عضات البارحة!!

-ولللللللك فاااااااااااااهددددددد

-ههههههههههههه

-الله يشعلك يا ابن شامة الله ينتقم منننك ولك شلوون راح اطلع هيييچ وفستانييي مفتوووح

-ميخالف اثار العرس هاي مو مشكلة معذورة

الحقير يضحك ممهتم وواگف ويسولف ويايه عبر باب الحمام، فرشت اسناني بسرعة وطلعت اهف من الحمام من كل گلبي ناوية ارجعله العضة وانگلب چلب..

رحتله وبغفلة جريت ايده وعضيته عضة حفرت معصم ايده حفففر اضغط بكل ما عندي من قوة عيوني طلعت من الشد راح يصير بيه شي وانجلط والنذل ممتأثر ويضحك مكيف..

-فاهد: الله عيديها هنا

-وخررر يمممة النرفزة يممممااااا

-چؤ چؤ كوري مو اتفقنا ما نصيح؟

صرت اروح واجي بالغرفة اللوب شلون اطلع گدامهم؟ شسوي؟ احط خافي عيوب؟ بس لحظة اني حتى خافي عيوب ماعندي لان ما استخدمه! زين شنو اللف على رگبتي واني مجايبة شي؟ عزه العزاني شلون راح اواجههم شلووون!!

-فاهد: هسة تلگيهن كلهن معضعضات معليچ

-كيان: ايييي مو كلهم مثلك چلاب مسعوورة

-فاهد: كوري ليش هالتجاوز مو عيب

-باوع فااهد هسة تلگيلي حل فهمت لو لاا!

-لا

-ماكوو غصباً عليك تساعدني اي يله فكر ويايه شنو اسوي؟؟

-حطي شعرچ عليه مو شعفتچ طويلة

-مينضم خاف

-ينضم ينضم

جاب شعري بعده مهووس ما مشطته ونزله على اكتافي اي چنه صدگ انضم لان صايرات العضات من الجوانب، ابتسمت فرحانة واني اشوف روحي حليت هالمشكلة وهو وگف ورايه مباشرة ثبت حنچه على كتفي يتمايزني بالمراية..

-فاهد: وگولي فاهد ما يفيد بشي

-خاف شعري يروح منا ومنا وانسى انتَ ذكرني ماشي؟

-ماشي لو گاعد هههههههههههههه

سحبت كتفي منه وگع راسه ضحكت على خرعته ودفعت كتفه على كيف..

-امداك نفس تفاهة جنات والله تتوالمون شجاك ما تزوجتها

-احبها يجوز نصير اصدقاء بس ما نتوالم زواج لسانها طويل يصلي صلي تفيد مالك

-راح تخبله

-وهو المطلوب

-ليش ابوك أصر مالك وجنات يتزوجون؟

-لان مالك كلاس و رومانسي زيادة عن اللزوم

-وجنات شنو راح تسويله؟

-راح تربيله علة وتخلي يتغير وتطلع لسانه وعصبيته

-ليش ابوك يريد يغير شخصية مالك؟ تدري مالك احلى شخصية من بينكم خو شهوبي اخوية واموت عليه بس هادئ كلش اما مالك يجنن يجنن واحد يعجبه بس يسولف وياه صوته يخبل واسلوبه ولطافته وابتسامته و...

-وسمممممم ومررررض تتغزلين بأخوية گدامي بعدد جيبيلي گرون!!

-شنو گرون؟

-گرون انواع اكو ستيل اكو فافون اكو ذهب وعدنا حتى اللماس موجودات مالك يسويلچ حسب الطلب

-اشتريلك احسهن حلوات

-هو احنه لو نظل عليچن كلمن يلبس گرونه ويگعد

-تطلعون سيت واحد شگد كيوت

-كيان!

-هاا

-چنها ما وصلتچ الفكرة

-هو اي بس فهمني انتَ شبيك

-خلي اخوچ ال**** يفهمچ

-كلشي وحاط اخووية على كيفك لا تنفجر هواي ضاغطك شُهيب!

-يروح فدوة لـ مالك

-وانتَ هم تروح فدوة لمالك

-امشي لچ ما اروح لاحد فدوة

-تروح وغصبااً عنك شفايتلك توصل ربع من مالك ورزانة مالك

لزم وجهي كله بين ايده عقچه تعقچ همزين ما حاطة مكياج بعدني چان خرب، دفرت ايده وابتعدت عنه..

-شبيك شبيك مالك مثل شُهيب واني احچي بـ شهوبي هيچ

-انچبي ممنوع تحچين هيچ بعد گدامي ماقبل

-ليش عيني تغار

-اي اغار

-ايععع ماريدك تغار عليَّ

-دطيري منو يغار عليچ اني اغار منهم

-اي دگول هيچ من البداية

-يله ولي

-انتَ ولي

-كياان!!

-عيونها الكورية

ضحك ضحكة وره كلامي عود اني دا اقلده من يگول عيونه الصفر ودا اريد استفزه بس شو هذا كيّف ولزم وجهي بين ايده وفاجأني من باس بين عيوني..

-ههههههههههه احبهن احبهن

-عزه بعينك فهيد وحمرتك؟؟

-موجودة شبيها

-بس لا گمت تحبني اني هم اييييع

-انچبي شحب منچ احب العيون الكورية بس

-حبتك سليمة

-يلا زوجتي العزيزة كملي تجهيز حتى نطلع

اخذ شيشة العطر يرش على جسمه ورش عليَّ هم، كفخته على وجهه مزعوجة ورجعلي الكفخة بس مو كفخة عادية اظن اصابعه انطبعت بخدي..

-همجججي

-الله شگد ترف خدچ شو تعالي

انطاني كفخة بالخد الثاني شعل خدي المسودن، رجعتله كفخة اقوا وشردت للحمام وهو ركض ورايه يدگ بالباب..

-فتححهياا اني اعلمچ

-امشيي مسودن همجي بربربي مراهق ارعنن

-بت ال*********

-نعاااال على امك حقييير كم مرة گتلك لا تفشر على اهلييي

-****** من امچ

-تفوووو على امك العايقة

-قندرتي فوگ ابوچ الجايف

-قندرتي وقندرة اخوااني فوگ ابوووك الصايعع

-وقندرتي هم فوگاه عادي غلطي عليه ما اهتم

-عااار

-رعنة

-نذل نذذذذل

ضحك وابتعد من باب الحمام، بقيت هنا اتمكيج وامشط شعري شلت جزء منه بـ كماشة صغيرة ونزلت الباقي على اكتافي اضم رگبتي المزورگة.. تعطرت وطلعت اجهز جنطتي الصغيرة للكشخة..

-فاهد شوفني شلون طالعة بس لا مبين الاثر؟

-لا ما مبين

-خوش امشي ننزل

رش عطر من جديد والحقير رجع يرشلي على كل جسمي ترسني لعبت نفسي، كفخته على وجهه وشردت بره الغرفة وهو هم شمر العطر وركض ورايه.. نطارد بالفندق مثل المزعطة دست المصعد اضحك وارجف بنفس الوقت انتظره ينفتح بس الحظ الزفت ما لحگت لزمني فاهد من زندي يريد يعض خدي واني اعيط واكفخ بي.. ثواني وانفتح المصعد وصارو بوجهنا مسرة وشُهيب..

توقفنا ثنينا من شفناهم بس مال فاهد يفوت الموضوع هيچ عادي؟ مستحححيل هالمسودن يگعد راحة جر وجهي گدام شُهيب وباسني بخدي بوسة قوية وعضني بخفة وراهة..

-كيان بهمس: اني اعلمك والله الا اربيك

-فاهد: انتظرچ تربيني كوريتي هههههههههه

كشول شُهيب مزعوج حتى ما علق على حركاتنا، دخلت المصعد منزلة راسي ووجهي مبوخ مستحية، اعدل بشعري اضم برگبتي وارفع عيوني اشوف شُهيب ومسرة واگفين بدون لا يلتفتون علينا..

الا من وصلنا جوه وعافني فاهد يروح يجيبلنا ريوگ من البوفيه ياله اللتفتت مسرة عليَّ مبتسمة، لزمت ايدي بلطف وگالت بحنية..

-مبروك حبيبتي شايفين كل الخير والسعادة

-كيان: حبيبتي سرور ومبروك عليكم انتو هم بس شبي شهوبي مبين ضايج؟

-مادري عنه

استغربت جوابها بس ما علقت، تمشيت وياهة للطاولة الگاعدين عليها مالك وجنات واحد بصف الثاني جنات تسولف ومبينة مندمجة وتأشر بيدها ومالك صافن عليها..

-مسرة بهمس: ملاحظة كلما جنات تحچي مالك يصفن عليها لو مملاحظة؟

-كيان: اي كلنا نصفن عليها

-مسرة: كيوت كلش شلون تحچي ومن تگول حرف السين تطلع لسانها مثل الحية العنونة

-كيان: ههههههههههههههههههه

ضحكنا واخذنا موقع على الطاولة صبحنا عليهم وجنات كتفت ايدها واندارت على مالك تگله..

-جنات: چانن يحچن عليَّ ثمعتهن

-مسرة: ميخالف جناوي احنه بقاموسنا الي نحبه نحچي عليه

-كيان: مسرة صاحتچ حية عنونة

-جنات: ادري بروحي حية تروحلي فدوة هنادي

-مسرة: تروحلنا كلنا فدوة، المهم مبارك عليكم ان شاء الله زواجة الدهر

-مالك: دخيلك يا ربي

ثلاثتنا فطسنا ضحك عليه گالها عبالك مخروع وجنات تهز براسها فرحانة على شي جاهلته.. وجهها يضوي كالعادة وبيها حماس ومبين مرتاحة وهي تتعامل ويه مالك وهالشي فسرلي شي واحد وهو معقولة صار بيناتهم شي البارحة؟؟؟

-فاهد: هااااي گايززز

-مالك: هلا بالمسودن

-فاهد: ولك ماي بيگ براذرر تعال بوسة امصك بيها

جر وجهه يبوسه وغمز وهو يگول..

-فاهد: ان شاء الله وضعك ممتاز حبيب روحيي بشرني

-مالك: احسن من وضعك، شلونك شُهيب

-شُهيب: بخير

گعد فاهد بصفي وشُهيب بصف مسرة بدينا ناكل وفاهد كل شوية ذابله قنبلة..

-فاهد: اشرحيلي شعورچ جنات شنو احساسچ وانتِ تزوجتي معذب قلوب الفتيات من ميلانو الى باريس

-جنات: اشعر بالفخر الشديد يعني منو چان يتوقع اتزوج مالك؟ انتَ متوقع؟ والله ولا متوقع بث اخيراً ثويتها وتزوجته وراح اخبله واطين عيشته لحدما يطلگني

-فاهد: احسنتِ عزيزتي بارك الله بيچ نطمح لهذا الشي جميعاً

-جنات: تدللون انطوني بث شهر الا اشيب شعره

-مالك: شكراً جنات اساساً جاي اشوف كم شيبة طلعتلي من وراچ

-جنات: لا شنو هذا مخصل ماحب هيچ لازم كله اگلبه ابيض

-فاهد: اني ادعمچ استمري

-جنات: تدعمني بتريلة خخخخخ

-فاهد: ههههههههههههههه حلوة حلوة بس لا تعيديها بعد

-جنات: فگر انتَ

-فاهد: ابوسچ

-مالك: فااااهد!!!!

-فاهد: شبيك اختي الزعطوطة هاي راح تصير ماي بيست فريند

-مالك: انچب ماكو هيچ خررط اكل وانلصم

-جنات: ملاك ليش تخرب صداقتي ويه المثودن احث راح نكون اثدقاء مقربين

-مالك: اكلي وسكتي انتِ

-جنات: لا تتأمر!

-مالك: اكلي حبيبتي لازم تتغذين زين حتى تكملين حياتچ طبيعي ماشي يروحي؟

-جنات: يله ميخالف راح اكل

-فاهد: نجي على مسرة قيثارة الخانسة شنو عداچ الخوينس وصرتي مثله؟

-مسرة: متونسة على سوالفكم

-فاهد: شنو شعورچ وانتِ متزوجة شُهيب؟ اكيد تندمتي مو صح؟

-مسرة: كلش

-فاهد: باعي بعده الوقت ما فات تگدرين تنسحبين وتتزوجيني ماكو مشكلة

اجته دفرة من جوه الطاولة من شُهيب صاح فاهد متألم ويضحك بنفس الوقت على خزرة اخوه..

-شُهيب: گوم لا اجنزك گووم

-فاهد: ما

-شُهيب: فاهد بس شوفة وجهك تنرفزني

-فاهد: شُهيب اعتبرني زعطوط اخذني على گد عقلي وزوجني مسرة قيثارة شبيك

-شُهيب: وللك گووم لا تخلي صوتي يعلى وننفضحح زعطووط

-فاهد: الله عبصته عبصته هَي هَي عبصته عبصته

-شُهيب: اشفتي منه هذا؟!!!

وجه سؤاله الي نزلت راسي ساكتة واجيب شعري على رگبتي بس عود فاهد يسكت؟ مستحيل!!

-فاهد: تموت عليَّ البارحة فد تونسنا بالعركة

-شُهيب: تستاهل

-فاهد: بس بعدين راضيتها بطريقتي

غمز وطفر يشرد للبوفيه من وگف شُهيب حتى يكتله عزه انفضحنا بنص المطعم الناس ظلت تباوع علينا، جرت مسرة ايده ترجعه حتى يگعد بس صاير نااار..

-شُهيب: هذا اخوك السربوت ماريد اشوفه بوجهي بعد من هسة اگلك فااهد يصير بوجهي اكتله وداعة امـ...

-مالك: لا تحلف يمعود اسكت ما يجي بوجهك بعد

-شُهيب: طايح الحظ مو رجال هذا نعاال

-مالك: خلص اهدأ متسوه

-شُهيب: هم رجعع!!

-فاهد: چا وين اولي غير اگعد ويه كوريتي

-شُهيب: فاهد ا...

-مسرة: شهوبي جيبلي شي حلو حباب

تسرسح شهوبي صفن عليها صفنة واخيراً شفته يبتسم من گعد الصبح للان هو مزعوج بس هسة تغير مزاجه، بدون كلام گام يجيبلها كيكة وعصير ورجع، حط الماعون گدامها والعصير هم وجابلها شوكة وكلينسه بصف الماعون نسى سالفة فاهد وحتى من رجع گعد بصفي ما اهتمله مهتم بس بالحلو الي گدام مسرة..

-شُهيب: لا تكثرين مو زين عليچ

دتجاوبه وقطع كلامها صوت شهگة جنات فاتحة عيونها على وسعها وتأشر عليَّ وتگول بحرگة..

-شبيييييچ كياااان

-كيان: شبيه؟

-جنات: رگبتچ شبيهاا

جفلت من الكل وجه انظاره عليَّ من الفشلة ماعرفت شسوي لو تذبحوني متلگون قطرة دم بيه تمنيتني مطمورة بالغرفة ولا نازلة على هالخزي.. جنات تأشر بيدها على رگبتي منهارة ومالك ينزل بيدها وترجع تأشر بأصبعها..

-جنات: شوفهاا فاهد شووفهاا شنو منو كااتلچ؟؟ ماالك شُهيب شوفوهاا هذا المثودن كتلهاا

بلع ريگه شُهيب وگام من الطاولة وفاهد حاط رجل على رجل ولا كأنه مسوي شي هذا الحقير، گرصته من ايده بقوة لويتها لوي تمنيت اشلع لحمه..

-مالك: جنات عيوني مالنا علاقة احنه

-جنات: مالك ما اقبل اني على كيان لا بعلي ما اقبل انتَ هَييي منو ثمحلك تمد ايدك عليها والله اگرمعك تگرمع اروح اشتكي عليك يم العلوية وعمو شمثون

-مالك: ولچ ميصير تحچين سكتي سكتي گومي وياي

-جنات: ما اگوم كياان اشتكي عليه خليهم يطلگوچ خيولي هذا الفگر لا تخلي يمد ايده عضي من يكتلچ ونعلي والديه زورگي مثلما يزورگچ

گومها مالك غصب وهي مستمرة بالدردمة تأشر منفعلة ومالك يهمسلها بشي بس البنية راح تنجلط وحقها صدگ المنظر مخيف، طلع فاهد جگارة يدخن وباوعلي خزرته خزررة فوراً نزل الجگارة حمحم وگال..

-فاهد: شسويت اني

-كيان بهمس: حسابك بعدين اني اعلمك

-فاهد: الله راح تعضيني؟

-كيان: اموتك بس اصبرلي

-فاهد: احححح اموت على العنف

النذل اني اهمس همس وهو يحچي بصوت مسموع گمت اللطم بالسكتة واعضعض بشفتي بس اسكت هو شافني هيچ انوب تسوفل بالزايد..

-فاهد: كوري مو هنا حبي مو هنا خلينا نرجع للغرفة

-كيان: الله ياااخذك يا فاهد ابن شامة

-مسرة: من رخصتكم

-كيان: عليچ الله لا ترحين.. انتَ گوم امشي اللحگ اخوانك گووم

-فاهد: مسرة شفتيها شلون تعاملني؟ هاي بعدنا بالبداية وهيچ عنيفة لعد لو صار عدنا جهال شتسوي؟ تعلم صبياني وفتياتي على العنف البشري عيب كوري مو ذولة الكوريين الصغار ملاتنه

گلبت عيونها مسرة بملل وفاهد گام لمادري وين ان شاء الله لجهنم واخلص منه، مديت نفسي على الميز حتى يوصل صوتي الناصي لمسرة وگلت بأستعجال..

-وروحها لامي مو مثل الي ببالكم والله العظيييم

-مسرة: عادي قلبي مو مشكلة هاي الشغلات تصير بس حطي خافي عيوب لو ماعندچ؟

-ماعندي والله ولا عندي شي اغطي وجنات هم ماعدها شال اضافي چنت وياهة من سوت جنطتها وحطت بس شال واحد

-عادي غلسي غلسي

-شگد عيب من شُهيب ومالك

-محد راح يتذكر حياتي بس خلي مسودنچ يلزم لسانه شوية كلشي راح يكون بخير

-تمام تمام

اجالها اتصال وگامت على جهة تجاوب، طلعت موبايلي اعدل شعري اضم رگبتي چان گمت ارجع للغرفة بس اعرفه المسودن راح يفضحني وما اأمن اعوفه ويه شُهيب وحده خاف يچفص بشي ويطيح حظي..

نزلت التلفون بسرعة من شهوبي تقدم للطاولة وبيده فنجان قهوة، حطها على الميز وگعد مقابيلي تنهد يذب نفس متعب يرجع بشعره ليوره بحركته المعتادة..

-شُهيب: شلونچ كيان

-كيان: زينة وانتَ شلونك

-شُهيب: مو مهم اني، شوفي كيان راح اعيدها للمرة الأخيرة لو فاهد جاي يضغط عليچ او يسببلچ تعب نفسي او جسدي تگدرين تنفصلين عنه وهسة بهاي اللحظة واني بظهرچ لا تخافين من شي لا من ردة فعل مروان ولا من عتب نشوان تمام؟

-تمام

-اريدچ قوية، فاهد مو سهل اني ما احچي هيچ حتى اخوفچ بس من واجبي انبهچ وهاي المرة الثالثة راح اعيدها على مسامعچ حبيبتي فاهد مدمن علاجات ميگدر يكمل يومه بشكل طبيعي بدونه وانتِ ما مضطرة تعيشين ويه هيچ انسان بغض النظر عن الصار بيناتكم ماعرف شنو هو بالضبط وماريد اعرف بس انتِ حبيبتي وبنيتي وما ارضى عليچ تبقين عزيزة گلبي واتأذه لو صارلچ شي كيان

لمس ايدي بين ايده وره ما همس الجملة بيني وبينه، عيوني دمعت من الحنية الي بصوته والتأثر بنظراته، لليوم شُهيب ما متقبل زواجي وهاي ثالث محادثة بيناتنا يحذرني ويگلي انسحبي واني بظهرچ ويا ريتني اگدر انسحب وارجع لحضنه وحضن اخواني وارتوي من حنانهم وحبهم..

-شُهيب: واضح من سكوتچ تردين تكملين هذا الزواج واحنه راح نبقى نحبچ مهما كان اختيارچ وتأكدي عندچ ثلاث اخوان وأم يگلبون الدنيا لو انمس اظفر من اظافرچ بس اهم شي ما تسكتين كيان عن أي مشكلة بينچ وبين فاهد مهما كانت بسيطة لا تترددين تجين تحچيلي راح اوگف وياچ ضد الدنيا كلها المهم عندي تبقين سعيدة ومرتاحة

هزيت راسي بـ اي ومسحت دمعة خانتني من كل گلبي متمنية اشاركه بالصار، احضنه وابچي على صدره مثل قبل من يضوجني شي وهو يسمعلي من دون ملل..

-مالك: عفواً على المقاطعة..

سحب كرسي بجانب شُهيب بحركة سريعة وگعد بدون لا يسمع جوابنا، اللتفت بجسمه على شُهيب واردف بنفس النبرة السريعة.. 

-مالك: شُهيب محتاج مساعدتك بشي

-شُهيب: وهو

-مالك: عندي رسالة بيها مخطط يرمز لشي مهم وما جاي اعرف احله عجزت صارلي يومين ادرسه بس ما مفهوم بالنسبة الي وماگدر اطلعه لأيٍ كان لان حياتي واگفة عليه

عگد حاجبه شُهيب مستفسر، حرك راسه مالك يأكد على كلامه وكمل گدامي ممهتم لوجودي..

-انطاني ابوية مهلة ثلاث ايام اذا ما كملت المهمة راسي يطير

شهقت جوه انفاسي بخفة استوعب بس محد انطاني مجال، شُهيب جاوبه بنبرة باردة..

-شُهيب: وشلون تريدني اساعدك؟

-مالك: احتاج صديقك الاسباني

-شُهيب: الاطلس؟ مستحيل!

-شُهيب الموضوع ما ينرادله شي بس يقرالي الرسالة وانتهى كلشي ماريد منه

-تتوقعه راح يساعدك؟ الاطلس راح يكون اسعد انسان وهو يرگص على قبرك خاف متدري

-ادري بهذا الشي

-ما دامك تدري ليش اجيت تطلب؟

-لان ماعندي حل!!!

حچاهة بحرگة گلب واردف بدون خجل..

-ابوية متحلفلي واذا ما كملت هاي المهمة اني بخبر كان! يريدله أي حجة حتى يتخلص مني وانتَ تعرف بهذا الشي! شُهيب اطلب منك مو طلب اخوي لان اعرفك متعتبرني اخوك...

تغيرت نبرة صوته اللينة والمتوسلة الى نبرة غاضبة بيها تحدي..

-اطلب منك مساومة من عدو لعدوه والمقابل راح يكون غالي مهما كان السعر

صفن شُهيب يفكر شوية عيونهم متركزة على بعض واحد يدرس الثاني واني بوسطهم، بعيداً عن ليش حچو گدامي وشعجب ولا ليش شمسون يريد يذبح مالك ولا شنو هالمهمة الخطرة الي يحتاج الاطلس يتدخل بيها بس السؤال المهم والأهم شنو سبب عداوة ذولة الاخوان؟!

-شُهيب: الاطلس مستحيل راح يساعدك مالك ماريدك تتأمل زايد اني اعرفه زين

-لا تگله الشغل الي

-تريدني اغشه؟!

-اي لمرة واحدة سويها غش وگله الموضوع متعلق بيك او بواحد من جماعتك

-ماگدر اغدر بي هو واثق مني

-ما راح تغدره! يا اخي اللگه أي شي بقالي كم ساعة بس!!

-مالك!! جاي تطلب من عدوك.....

سكت بالع جملته بعدما اجت مسرة بيدها كوب شاي اخضر ابتسملها ولا كأن چان يحچي بشي مهم بادلته الابتسامة بس مبين حست اكو شي بين ذولة الثنين فوراً انسحبت تصعد لغرفتهم.. تسائلت ليش عدهم عادي يحچون گدامي بس قطعوا كلامهم من اجت مسرة؟

-مالك: إياك تشاركها بشي

-شُهيب: مالك!

-مالك: لا تتغابى شُهيب! عوف العاطفة وفكر بعقلك هاي البنية مو خالية!

-كافي سد الموضوع

-اني اعرف انتَ شاك بيها بگدي واكثر بس اريدك تنتبه على نفسك منها مسرة قيثارة مو سهلة عدها تاريخ مضطرب قوي لا تنجرف لمشاعرك لازم تاخذ حذرك

-ممكن نرجع لموضوعنا ونعوف مسرة

-نهايتك على ايدها شُهيب وتذكر كلامي! راح تورطك وجاي اشوفك تضيع وتخسر كلشي بسببها ويوصل الموضوع لحياتك ومستقبلك وانتَ تعرف كلش زين اني ما احچي بشي اذا ما متأكد منه

گلبي نبض بخوف مدا افهم شنو سالفة مالك ويه مسرة ولا فكرة شُهيب عن الموضوع اللتزم الهدوء بدون لا يضيف تعليق، چنت على وشك ثواني من القهر لان ما دافعلها بس ردتلي روحي من گال بصرامة..

-موضوعنا مو مسرة هسة! بس مع ذلك شكراً لاهتمامك وخوفك بس اني اعرف مرتي قبل لا نتزوج بيناتنا صداقة قوية واعرف كلشي متعلق بيها سواء هي حچتلي او اني دورت وراهة وشلون ما چانت ما اسمح لأحد يحچي عليها واضح؟!

-واضح

-نرجع لسالفتك، جاي تطلب من عدوك يساعدك بشي متعلق بحياتك استوعب اذا الاطلس افتهم بالسالفة ميرحمك ماريد ادخله بهيچ موضوع لان قبل لا ينتقم منك راح ينتقم مني!

-ما راح يعرف واذا عرف انتَ مهدله الموضوع گله المسألة حياة او موت اساساً هو ميزعل منك وحتى لو زعل بررله كم مرة واعتذر راح يسامحك هو يحبك ومستعد يساعدك بكلشي يملكه

زفر شُهيب بقوة وگدما مالك متوتر اني متوترة اضعاف مضاعفة گلبي راح يوگف اذا شُهيب ميقبل يساعده معناها مالك يموت! راح يقدم اخوه للعدو على طبق من ذهب!

-شُهيب: خليني اشوف الرسالة

طلع موبايله مالك وفوراً فتحله يشوفه، ركز شُهيب بكل حواسه بالشاشة بس مبين ما فهم شي، رفع راسه وگال بحيرة..

-شُهيب: هاي رسالة مشفرة؟

-مالك: لعد شنو جاي اگول كلشي ما افتهمت منها

-شُهيب: هاي مادة التشفير ومستحيل احد راح يفك شيفرتها الا الي يملك المفتاح او يكون مختص وهذا صعب مالك مو أي شخص يگدر يحله

-مالك: الاطلس يگدر هو دارس علوم رياضيات ومادة التشفير اخذها بالجامعة واساساً بحث تخرجه من الماجستير چان التشفير بالمفتاح المتماثل

ضحك شُهيب مستهزأ يباوع لـ اخوه بطرف عينه، نفخ مالك وهز راسه بـ اي وگال من وره خشمه..

-مالك: اي اعرف هواي اشياء تخصه

-شُهيب: من يومك مهووس بي

-ما مهووس! بس ضروري اعرف كلشي يتعلق بـ عدوي

-اي اي احاول اصدگك

-لا تتساخف شُهيب وخلي الاسباني يساعدنا

-تدري من يعرف الموضوع متعلق بيك لو يغرگني تفال هم ميشفي گلبه

-مو مشكلة كلشي اله مقابل اردها اله

-شلون تردها؟

-راح اردها بطريقتي لا تخاف

-اثق بيك؟

-تمام الثقة ما انسى مساعدة احد حتى لو چان عدوي ارجعله المعروف ضعفين

-تمام بس الاطلس ميتحصل بسهولة لازم ننتظر الطاووس يشوف تلفونه

-تريد تقنعني اذا اتصلت عليه هسة ما راح يفز من نومه ويجاوبك؟!

-اي

-شُهيب! لخاطر الله من ايام الجامعة انتو روح بروح مثل الكبلات واحد لازگ بالثاني ما اتوقع اذا اتصلت بي ميجاوبك بسرعة

-ميجاوب يا اخي تعلمني بصديقي؟!

-اي

-ميجاوب مالك اعرفه عدل

-نتراهن؟

-استغفر الله راح اتصل!!

ضحك مالك على ردة فعله طول هالمحادثة اني گاعدة لا گمت ولا تحركت نبتت بمكاني اريد اسمع لكلشي والخدمني محد بيهم اهتم بوجودي وكملو شغلهم.. دگ شُهيب على الاطلس مالك گله دگ كاميرا حتى يأكد كلامه ان لو چان نايم هم راح يجاوب گلب عيونه شُهيب واتصل..

رن كم رنة والطرف الثاني ميجاوب ابتسم شُهيب تك خد منتصر وسد تلفونه يرجعه لجيبه..

-مالك: غريب معقولة صداقتكم متزعزة هالفترة؟ لان مستحـ....

ما كمل الجملة ودگ موبايل شُهيب طلعه وچان نلگه المتصل "الاطلس" ضحك مالك بصوت عااالي منتعشة روحه ويصفگ لانه فاز بالرهان..

-شُهيب: ديلا يلا ما اجاوبه هسة عود بعدين

-بابا ماعندي وقتت الله يشيلك خليتني ابوس الايادي والرجلين شگد نذل!

-شُهيب: هدوء لا يطلع صوتك،،، الو هلا اطلس..

وطبعاً هو متصل كامرا ووصلنا صوته الناعس وهو يگول بعصبية مكتومة شُهيب فوراً نصى السماعة حتى الناس متسمع..

-الاطلس: خير؟؟

-شُهيب: الخير بوجهك حبيبي شلونك مشتاقلك

-الاطلس: تشتاقلك جهنم شكو شتريد

-حبيبي وروحي انتَ بعد شلونك شلونها نانتك

-زينين زينين

-عسى دوم اخلاقك صايرة زفت من يوم طلگت لهسة منتبه على روحك لو لا؟

-مو زين جاوبتك شتريد خلصني شُهيب الدنيا طالعة من عيني

-هاي شنو وين انتَ ولك؟ هاي مستشفى؟؟؟

-لا منتجع سياحي

-شتسوي بالمستشفى؟؟

-اتونس شوية ضايج

-اطلس!

-علساس ما تعرف البيه شُهيب عوفني البيه مكفيني، انتَ وين؟

-اني بالعراق بالفندق تحديداً.. المهم عندي سالفة وياك

سكت ميجاوب ينتظر يسمع شُهيب شيگول، استغربت من نبرته واسلوبه اعرف الاطلس وشايفته كم مرة وعلاقتهم تجنن والاطلس يمووت على شُهيب بس واضح نفسيته تعبانة يمكن عنده ظروف وهالظرف هو طلاقه..

گام شُهيب على جهة يحچي وياه بعدما سد الكام بقينا اني ومالك جاي احس بتوتره وارتباكه، عيونه تاكل وتشرب بـ شُهيب منتظر أي اشارة حتى ينحل الموضوع ويخلص..

-شُهيب: تمام عاشت ايدك راح ادزه...

رجع يگعد ويانه على الطاولة يذب نفس متعب..

-شُهيب: قبل يشوفه وشَك السالفة بيها إن بس غلس احمد ربك واشكره وضعه مو زين هالفترة چان گعدلك ركبة ونص

-مالك: ادري بي انفصل عن زوجته

-شُهيب: دزلي الرسالة وگال الظهر يحلها وينطينا اللغز

-مالك: هاي فائدة يكون صديقك عبقري لا تخسر هالاسباني اكرهه صح بس يحبك هواي

حچاهة مستهزأ ما عاجبه وگام من طاولتنا يروح للمصعد، دورت عيوني على جنات ماكو وفاهد هم ماهو خليت ورجعت للغرفة اجهز جنطتي حتى نطلع من الفندق..

-هيله يا رماااانة هيييلة الحلوة زعلاااانة هييييلة

نعم هذا صوت فاهد من الحمام يغني هاي الاغنية الغريبة الي لا بيها لحن ولا كلمات مفهومة..

-كيان: لو بس افهم شتسوي كل شوية سابح ارتاح

-فاهد: اهووووو حتى سبح ما تخلونا نسبح براحتنا عيشتيش هاااي

-شعليه بيك اسبح بس كافي بربعت

-جلدي يحكني ما اتحمل حر

-اوووي نونو

-ولي عندي حساسية

-لعد شلون چنت عايش هنا قبل العراق جهنم جوهم

-شبعت تحصف بس احب العراق احبببه واحلى ايامي چانت هنا چانت صارت احلى لو مالك وياي بس يله ولد عمي عوضو مكانه

-ليش بس تحچي بمالك شُهيب شبي؟

-نعععل على شُهيب

-هاااي شبيك

-اشششش لا تزعجيني بأسمه وتخربين مزاجي... هيييلة يا رمااانة هيييييلة الحلوة زعلاااانة هييييلا

كمل يغني ويرگص يهز برگبته ويقره هيلا يا رمانة، كملنا ترتيب الجنطة وطلعنا من الفندق لگينه سيارة واگفتلنا بالباب vip.. فاهد عنطز الا يگعد بالصدر والباقين گعدنا وره..

-شُهيب: اكو شي؟ ليش ما جاي تحچين؟

همسها بينه وبين مسرة بس اني وجنات وراهم ونسمع، وحدة باوعت على الثانية ننتظر جواب مسرة وهي تگول بأبتسامة مصنطعة جداً..

-مسرة: لا ماكو شبيك شُهيب هاي خامس مرة تسألني هالسؤال اليوم

-شُهيب: لانچ مو طبيعية

-شلون عرفتني مو طبيعية؟

-ما حچيتي بطريقتچ المعتادة ولا ضحكتي والكيكة ما كملتيها

-ما كملت الكيكة لان شبعت من الريوگ

-ما اكلتي شي بالريوگ مسرة وانتِ تعشقين الحلو حتى لو شبعانة هم تاكلين وما تفوتين هالفرصة

-مسوية دايت

سكت من شافها هادئة وهالشي غريب مسرة ابد مو هادئة نهائياً خصوصاً وياه من قبل نطلع للموقع سوه يقضون الطريق كله يسولفون بأمور عشوائية او خليني اگول هي تسولف وهو يتأملها بنظراته..

وصلنا لبيت العلوية لگينا ولد عمامهم وولدهم والعلوية بالباب يستقبلونا واكو ست خرفان لازميهن من گرونهن، اندار فاهد عليَّ يسوي گرنين بأصابعه على راسه ويگول..

-كيان باعي هاي الگرون راح اللبسهن لخاطرچ

ضحكت رغم بعدني ما فاهمة الفكرة بس جنات خربت من الضحك، رجع فاهد يلتفت گوة حابس ضحكته..

-فاهد: حلو فستانچ مسرة شنو الماركة؟

-مسرة: ديور

-فاهد: شُهيب وانتَ گرونك يا ماركة؟

-شُهيب: انچب ودير وجهك

-فاهد: شبيك هسة واذا اختك خلتني اللبس گرون ماركتهن گوچي

-شُهيب: استغففرر الله يالاسلام

ضحك بخفة يصفگ لان گدر ينرفز شُهيب ويزعجه، بينما فاهد اردف..

-فاهد: مالك انتَ مرتاح نيالك

-مالك: فاهد لا تلح

-فاهد: بس انصحك لبسها نقاب حلوة تسطر سطر عيونها

لطمه بكف ايده من وره على حلگه صاح متألم لان محابس مالك اذت اسنانه حيييل..

-مالك: بعد اذا عدت هذا الخرط اطيح حظك احترم نفسك واگعد راحة

-فاهد: ما اقصد شبيك بطول زري جنات ومرة اخوية فديتها حبابة خوش بنية

بقو يتلاسنون مينزلون من السيارة ومسرة اندارت علينا تهمس بخفوت..

-مسرة: شنو يقصد فاهد؟

-كيان: بشنو؟

-مسرة: على موضوع الگرون شنو قصده ما فهمت

-جنات: هنا الرجال الي ماعنده غيرة على نسوانه خلي يلبس گرون بمعنى مثل الطلي يمشي وياهة

فتحت عيونها وحلگها مصدوومة يمكن اول مرة اشوفها مصدومة لهدرجة، ضحكت جنات تداري الوضع وهمست..

-معليچ بفاهد هذا وحده يلغي اثفة كيان بث نرفزني

-مسرة: حقير! اسفة كيان

-كيان: هو انتن خليتن بيها اسفة چفصتن بي

فتحو باب السيارة ونزلنا لتستقبلنا الهلاهل والهوسات، سلطعون متوسطهم وفاتح ايده بفرحة واضحة منتظر ولده يحضنوا..

اول من تقدم مالك لزمه شمسون يحضنه ويبوس خدوده ويمسح على راسه وانتبهتله همس بشي بيناتهم، بعدها شُهيب وعاد نفس الحركات واخير واحد فاهد..

سلم علينا البنات وجبرنا نبوسه الا مسرة ما قبلت واكتفت بـ مصافحة يد من بعيد..

-شمسون: هههااهههاههها تخافين مني عمو؟

-مسرة: لا عمو بس ما احب رجال غير زوجي وابوية يلمسوني

لصمته على حلگه فشلته بقى بس يضحك، سلمنا على الباقين واخواني استقبلوني بحضن حاار نشوان جعصني جعص ويمسح بدموعه ومروان حضننا ثنينا لصدره يبوس براسي وراس نشوان واني كل شوية اعدل بشعري اضم برگبتي ومسرة عينها علية وتنبهني ، جابو الذبايح ذبحو جوه رجل كل واحد خروف، جرت جنات ردن مالك تهمس بخفوت..

-جنات: مالك مالك

-مالك: نعم

-اريد الباچه حباب خليهم يضموها الي

-مالك: تدللين، علوية كل الباچة ضميها نريدها لا تطبخوها اليوم

-العلوية: بعد امك صاير تاكل باچة وليدي

-خالد: ههههههههه مو اله علوية هاي لـ جنات ولك طاهر صدگ حچيك من گلت جنات تموت على الباچة

-العلوية: راح نظل بالباب شمالكم ما تطبون

دخلنا والولد مستلمين جنات دگ تنمر كومة ولد عمهم كومة حتى اسمائهم ما جاي احفظهن شگد يخلفون!

-علي بضحك: يمكن لسان جنات مگروض من وره لسان الباچة

-خالد: خههههههههه اي اكيد تحب اللثاان

اسلوبهم وقح جداً جداً وقح وواضح ديستهزأون بيها بس هي بالها مو وياهم مركزة ويه العلوية ديسولفن عن شي..

-فاهد: انلصموا كافي!

-قصي: ما جاي نتنمر فاهد بالعكس نحب طريقة كلامها

-علي: اني جاي اتنمر

ضحك ضحكة مستفزة ايييع يلعبون النفس والله لو جنات تسمعهم تصليهم صلي بلسانها..

-فاهد: علي انچب لا يسمعك مالك ويلزگك بالگاع

-علي: يثمعني مالك وراح يذعل اوووي اني شثويت شبيكم قاثين ويانه

-خالد: تره جنات لسانها مگطوم وتضحك من تحچي تلگي مالك يضحك عليها....

انلصم صوته وانبلع كلياً من حس بأحد وراه طرت طرت طررت فرح من شفت مالك اجه ولزم هذا النذل خالد من رگبته من وره يعصرها..

-مالك: منو لسانها مگطوم؟

-خالد: محد محدد والزهرة محد

-مالك: ما جاي اسمع؟

يحچي راص على اسنانه ويضغط على رگبته من وره گدام كل الزلم وحتى العلوية وجنات أنتبهوا عليهم ومحد تدخل..

-خالد: اني جاي اضحك على روحي انييي لساني مگطوم

-مالك: شو تگدر تحچي شلون؟ خليني اگطمه الك خاف ما گاطمي عدل حبيبي خالد...

لزم راسه ورگعه بالحايط بقوة وقسوة شهگنا اني وجنات من شفنا الموقف وسمعنا طگة صوت راس خالد بالحايط الخشن، ما توقعت الحركة خصوصاً من مالك بس ملامحه تقرا برود وجمود ولا كأن تأثر من سوايته عبر الكل ودخل جوه تارك خالد يصرخ من الالم ولازم حلگه وخشمه الينزف دم..

-العلوية: تستاهل خويلد اكيد دست وياه بالحچي بعلي شيسوي بيكم ملك تستاهلون

-غياث: صدگ يستاهل ابن السطل يحچي على جنات

-ابو خالد: غياث!

-غياث: اعذرنا عمي

-العلوية: چا تستاهل بعد كتله ابن القندررة تعال اربيك

لزمته ودگ بالعصاية على ظهره ورجليه وهو منا دايخ من ضربة راسه وگع بالگاع يصيح ويرافس عافته واندارت لـ علي وهم گطعته بالعوچية مالتها والباقين كلهم يضحكون وكأنهم متعودين على الوضع..

اجتني جنات تركض تفتهم شصاير سولفتلها الموقف ظلت صافنة شوية وصارت تضحك الخبلة..

-جنات: الططوة طلع عصبي ما مبين عليه

-كيان: انصدمت بي ذكرني بـ شُهيب من يعصب يخوف يصير حتى نفس البرود والحركات يتبعوها

-عزه خاف فد يوم اضوجه ويكتلني ماگدرله ضخم

-لا ميكتلون نسوان همه

-همزين طمنتيني

-كيان: اي، جنات مو تضوجين منهم ذولة الحقراء المتنمرين مالك رباهم والعلوية هم كفو منها

-جنات: اووي وشكو اضوج يرحون فدوة للثاني (للساني)

-مسرة: سبع فدوات مو فدوة وحدة

ابتسمنا من دخلت ويانه على الخط وصارت بنصنا، اندارت على جنات وهمست بخفوت..

-مسرة: الططوة مالتچ ذكرني بـ هموسي

-كيان: هستوني گلتلها عيناً عصبية شُهيب

دخلنا جوه سلمنا على باقي النسوان وعيوني تدور ماريا وينها مشتاقتلها موت، رحت افتر بالبيت ادورها لحدما رحت للمطبخ بالطابق الثاني حااار يسمط وحاطين جدوره كبار على النار شفتها واگفة لابسة دشداشة عريضة وملبسيها ربطة شاديها على راسها مثل العصابة ودتقطع بصل والدموع تنهمر من عيونها..

-كيان: ماريا؟

اندارت بسرعة بس كأنها خايفة من شي او فازة ماعرف لان ملامحها قلقة مجرد شافتني تغيرت نظراتها وذبت السچينة تضحك وتطفر بمكانها وتصيح بحماس..

-كياااان بنيتي كيااان

شمرت روحها عليَّ تحضني وتطفر بحضني خلتني اطفر وياهة ميتة ضحك على سوالفها، وخرتها مني اسأل عن حالها ولبسها بعد سلامنا الحار تقربت مني تهمس بخفوت..

-هاي وحدة گلتلي لازم تلبسين هيچ لان زلمنا جاي يباعولچ وعجبيتهم

-كيان: عزه منو هاي؟

-هاي السمينة والچبيرة

-ماعرفها ولچ صدگ اكو زلم ديباعولچ ماريا؟!

-ماريا: لا والله لا اصلاً ما شفت أي رجال ماعرف ليش هيج تگول بس هي...

سكتت بسرعة من دخلت وحدة من نسوان عم شُهيب باوعتلها وانتبهت هاي متروسة وضخمة كلش واتوقع هي الي ملبسة ماريا هذا اللبس..

-جيهان: ماريا؟؟ هاي بعدچ ما خلصتي البصل شبيچ فاااهية

-ماريا: جاي اسوي والله ها اها خلصت خلصت

-كيان: خالة، ماريا عيونها تتحسس خطية متگدر تقطع بصل شوفي الدموع

-جيهان: والله حبيبتيي محد على راسه ريشة بهالبيت الكل يشتغل لو هي بزر نستلة وما تتحمل واحنه مطيات شغل نتحمل؟؟؟

-كيان: على كيفچ شبيچ انهديتي بيه دا اگلچ تتحسس عيونها متتحمل ريحة بصل ولا تقطع بصل انطيها أي شغل عادي بس بصل لا

-جيهان: ماعندي شغل غير البصل خليها تثرم وتنلصم وبلا هالعيارة

-كيان: احترمي نفسچ انتِ منو وشايفة روحچ؟ هاي خطار وواجب تحترميها اذا مو لخاطرها لخاطر ابنها الي هو ابنكم

-ابننا على راسي بس اممه منفصلة من ابووه يعني مو واجبناا نتحملهاا ونربي زعاطيطط بطولي ختوليي لفندق وتخلصنا منهاا ومن حساسيتها الزايدة عوووووعع

دفعت ماريا لطشتها بالكاونتر وطلعت من المطبخ متت قهر ونويت احچي لـ شُهيب يطيح حظها هالوصخة!

-كيان: اني اعلمها هالحقيرة لا تبچين حبيبتي هسة اسولف لـ شُهيب كلشي

-ماريا: لا كيان لا تحچين لـ شهوبي حبابة خلي فرحان هو والعروسة

-حبي شُهيب راح يزعل اذا ما حچيتله وهو ميرضى عليج تنذلين ويقهروچ هالشكل

-لا ما زعلانة اني اصلاً ما زعلت ولا مقهورة اني احب اقطع بصل باعي حلو كلش حلو

صارت تقطع سريع قطع كبار عود دتثبتلي هي تحب وما متأذية بس دموعها تحچي غير هالشي وزادت وضعي سوء.. بقت تتوسل بيه اسكت وما احچي وراح تزاعلني اذا گلت لـ شُهيب وما بقى شي وراح نرجع تگدر تتحمل هالكم يوم..

مشى الوقت هنا ومثل ما متعودين الزلم معزولين عن النساء وشبعنا سم من الحياية، ما خلن وحدة بحالها بس مسرة محد حچت عليها بوجهها يخافن من ردة فعلها يمكن لو عركة شُهيب ذاك اليوم جابت نتيجة..

-جنات: كيان بالليل دبريني اريد انام يمچ من البارحة ما نايمة اني

-كيان: ليش ولچ شجاچ

-مو تدرين بيه ماگدر انام الا اللطش بشخص ولو اموت ما اللطش بـ مالك اثتحي

-كيان: اي اي ابقي مستحية احسن

-اي هو هيچ

-باعي بالـ 2:00 بالليل اني ادعبل فاهد من الغرفة حتى محد يحس علينا وانتِ تعالي بسرعة بس بالخفية مو تخلين احد يشوفچ

-اي اي اتفقنا

**

-العلوية: ههههه حبوبا چا همه ذولة زلامنا

ضحك الكل وياهة بعدما طيحت حظ زلامهم على گولتها بالرزايل وانوب صارت تمدح بيهم، تغيرت نفسيتي من گعدت وياهة وسولفت من البارحة اني وضعي مخربط لا نوم ولا اكل احس بـ جبل نايم على صدري بسبب رسالة خطيبة شُهيب السابقة..

ادري ادري دنتنظرون رأيي بالرسالة نجي لوحدة وحدة ونتفاهم، هل ضجت من الرسالة؟ جوابي اي ضجت وتمنيت اطب بالتلفون اكفشها واطيح حظها بس من صفنت بيني وبين نفسي وسألت روحي "على يا اساس؟" منو اني واحاسبه اذا چان داخل بعلاقة او يريد يدخل بعلاقة.. لحد يگول تزوجنا وماعرف شنو علاقتنا عبارة عن لعبة، لعبة گدام ابوية وشمسون فقط لا اكثر ولا اقل..

نجي لثانياً هل عصبت من شُهيب؟ اي والعباس ابو فاضل عصبت ومتمنية انتفه واشرب من دمممه هالحقير العاار الكلب السافل!! بس هم بعدين تذكرت شكو كل هالرزايل هو بكيفه بأختيار علاقاته وميصير احمى زايد..

نجي لثالثاً هل راح اواجه ابو همسة بكوني شفت الرسالة واسأل عن خطيبته؟ جوابي اكيدد لا هيچ راح ابين تافهة وجاسوسة واتدخل بخصوصياته وافتح موبايله من دون ميعرف.. صح ما فتحت الرسالة بس شفتها من الاشعارات لكن مع ذلك هم يعتبر تجسس..

-علي: شُهيب مالك يريدك بره

اجه علي وجهه وشفايفه مورمة بسبب ضربة مالك اليوم الصبح وكالكلب خلاه يعتذر من جنات ولو تشوفون وجه جنات شلون صار چانت خجلانة على متوترة على فرحانة لان مالك دافعلها ومن كل عقله سحل علي وجابه گدامها حتى يطلب منها السماح اويليي يعجبوني الزلم الخشنة.. طبعاً ما اقصد على مالك وانما كشكل عام..

راح شُهيب يشوف مالك وترك محفظته وتلفونه بصفي كلما يگعد يطلعهن من جيوبه، تابعته بنظراتي علما راح والف حوصة صارت بيه اريد اشوف شنو جاوب خطيبته لاحظت محد منتبه عليَّ جريت تلفونه وفتحته على محادثتهم وطلع فعلاً مجاوبها بس للاسف مجاوبها بالروسي..

رصيت على أسناني اكتم غضبي واني اشوف جوابه عبارة عن سطرين بالروسي وهي راجعة مجاوبته هم بالروسي وهو مجاوبها ومجاوبته برسالة وياهة قلب احمر ومجاوبها ومجاوبته وانوب اتصلت بي وما جاوب ورجعت اتصلت ومجاوب الصبح.. واخير اتصال صار بالاربعة العصر شالكم الله وخلصني منكم يا زباايل!

اوكي اوكي اهدأي مسرة وتذكري بشنو اتفقنا؟ اتفقنا منهتم ولا نركز بالنفايات ونركز على نفسنا اذا يريد هاي القردة خلي يروحلها لو يروح لأي قردة ثانية شكو حارگه دمچ؟ واصلاً ليش مهتمة حبي ختولي لا تضوجين منها حتى لو دا اشوفها من صورتها الشخصية شقراء وعيونها خضر ومبينة شطوولها تگولون شاروط بس ميخالف ميخالف عادي هسة شبي القصر والله يخبل..

رجعت تلفونه الوب بمكاني ممرتاحة واختنگت بالزايد، گمت لغرفتنا بالطابق الثاني اخذت منشفة ودخلت اسبح بلكت ارتاح وتنطفي النار البيه.. گعدت جوه الدوش اصفن وحدي وارتب افكاري الوقت الوحيد الي اگدر افكر بي عدل هو جوه الدوش..

عقلي مشوش وكل افكاري ومخططاتي تخربطت، من جهة ميوستي البقت ويه اكرم ما قبل اجيبها ويايه رغم بالاربعة ايام الفاتت البقاها عندي تتذكرون؟ گال چان مسافر سفرة عمل ضرورية بس وجهه من رجع لا يوحي على سفرة عمل لان اجاني مزورگ وتايه وعندي شك مليون بالمية شُهيب اله ايد بكتلته مي بااارد ونزل على گلبي بشوفة اكرم بهذا الحال تمنيت اروح لهموسي ابوسه واگله فددديتك وفديت شعرك الحلو يا بعد الحلوين..

وطبعاً حيرة اكرم وتَيه حاله يفسر ان ما عرف منو السوه بي هيچ لان كلنا نعرف ولد شمسون خفافيش الظلام ومينلزمون بسهولة..

كملت سبحتي ولفيت جسمي بالمنشفة وطلعت من الحمام البخاري عبالك داخلة سونا مو حمام من الحر طبعاً هنا كلش كلش حارة مدا اعرف السبب منين هل من وره الكهرباء المتقطعة او من وره الـ...

-يمممة اخترعتت

نزيت مفزوعة، شُهيب گاعد على الكرسي المقابيل الچرباية حاط رجل على رجل ويدخن..

-مسرة: من شوكت انتَ هنا؟؟

جريت منشفة ثانية اغطي بيها اكتافي العارية، مجاوبني ملامحه مغيمة ومبين عليه ضاايج والطنگورة واصلة للسماء السابعة قلقني كلش وخفت لگفني افتش بتلفونه..

-مسرة: شبيك اشهب

-انتِ شبيچ

اخيراً نطق وطفى الجگارة بالنفاضة، اخذت ملابسي ورجعت للحمام ابدل وصاح بيه ارجع..

-تعالي

-خليني ابدل

-اكمل كلامي وروحي

نزلت الخاولي من ايدي شمرته على الچرباية وانداريت عليه لوما اسلوبه ناعم وصوته هادئ وهو يحچي چان ضجت على أوامره، وگف على حيله وتقدم ناحيتي، شعل جگارة جديدة وذب الدخان على جانبه الايمن، مسح على شعره ولحيته وعاد سؤاله..

-شبيچ مسرة

-مابيه شي

-متغيرة؟ البارحة شحلاتنا نسولف ونضحك ويه بعض ليش من گعدنا الصبح لهسة انتِ ما تحچين وياي وتهربين مني؟

تقدم خطوتين اكثر صار مقابيلي مباشرة، عيني بعينه توترت وماعرفت شنو اجاوبه، ماگدرت اواجهه واگله اني ما مرتاحة بهاي العلاقة وبهذا الزواج كله واحسني طرف ثالث حقير بعلاقة حب انتهت بعدم رغبة، حتى لو هو ميحبني وماكو شي بيناتنا نبقى متزوجين..

-احچي

-ماكو شي اني بس تعبانة اليوم، رايحة ابدل وارجع

تركته واخذت ملابسي ادخل للحمام، بدلت لبجامة حرير سودة وروب قصير، كملت عنايتي كلها بالحمام ومشطت شعري وشسورته ومكيجت مكياج ناعم طولت فوگ النص ساعة توقعته أيس مني وراح وهذا المطلوب..

طلعت من الحمام وشبه متأكدة طلع وعافني بس طلعت غلطانة ولگيته گاعد نفس گعدته قبل شوية وصافن، رحت على الميز اتعطر وگام يوگف ورايه دا اگدر اشوفه من المراية..

-اذا احد جوه ضوجچ بشي احچيلي لا تخليني حاير

-لا ليش تحير محد مضوجني اصلاً منو تسترجي وتحچي ويايه بعد عصبيتك وصياحك ذاك اليوم

ضحكت ادير وجهي عليه اواجهه متأملة يبادلني ضحكة او حتى ابتسامة خفيفة بس ابد جلمود گدامي ما تغيرت ملامحه الجامدة..

دگ تلفونه طلعه من جيبه وشفت المتصل "•" هاي خطيبته السابقة! رفعت نظراتي اله اشوف شكله شلون صار بس چان ريلاكس ولا توتر رفض الاتصال ورجع الموبايل بجيبه..

-شُهيب: البارحة ما نمتي ابد ليش؟

-اممم يمكن لانك نايم على الچرباية والقنفة كسرت ظهري

-گتلچ اني انام على القنفة وانتِ على السرير...

قطع باقي الجملة من رجع رن موبايله وهم هي متصلة تركته براحته اگعد على السرير واسوي روحي اللعب بتلفوني بس عيني عليه اشوفه من المراية، تغيرت ملامحه الجامدة من ابتعدت عنه وحسيته حاير اللتفت عليَّ وگال..

-اجاوب الاتصال وارجع

-لهدرجة مهم

-ما اتأخر

طلع للبلكون الغرفة مالتنا بيها لانها طابق ثاني واني تمددت بالفراش، راقبته لحدما طلع وسد باب الجام وراه ووگف على صفحة يجاوب الاتصال.. ايد بجيب بنطرونه والايد الثانية لازم الموبايل..

شتت تركيزي بي صوت طرق باب غرفتي، صحت يفوتون مابيه حيل اگوم ولو اگوم هسة احرگ هموسي وتلقونه وخطيبته النعالة..

-هلو سرور

رفعت نفسي اشوف منو وابتسمت من شفتهن صبا وجولي واگفات بالباب..

-هلوو تعالن تعالن

-صبا: خاف هموسچ هنا

-مسرة: بالبلكون ديحچي بالتلفون تعالو معليكم

-صبا: لا عيب نروح لعد

-مسرة: دوليي تعالن بنات والقران ضايجة لهوني حتى ماروح ادچه واخلص منه

-جولي: هههههه شمسوي بشنو غثچ؟

-مسرة: ممسوي شي تعالو نسولف شكو ماكو

-صبا: ماكو بس سمعت كيان تصيح ويه فاهد قبل شوية وهو يضحك عليها

-مسرة: بنات هذا البني ادم مو طبيعي!! حقه شُهيب ما قبل يزوجه اخته لچ ينرفز ومستفز وميهمه احد

-صبا: عوفچ من فاهد اريد اگلچن على شي...

بدت تسولفلنا شنو صار من طلعوا من الزفة لحد هاي اللحظة، صبا تحچي واني وجولي فاكات حلگنا ممصدگات تطلع كل هالاعترافات من مروان المطنگر..

-مسرة: وشصاار شنو جاوبتي؟؟

-صبا: مجاوبت بعدني اليوم تلاگينا صرنا وجه بوجه حسيته يريد يحچي ويايه واني ما انطيته مجال ولو تشوفون شلون انعفس وتأذه توقعته راح يعصب بس لا چان مقهور وملامحه حزينة

-جولي: خطية مروان باعي صبا اذا ما متأكدة من مشاعرچ لا تستعجلين انطي لنفسچ فرصة تفكرين وگليله انطيني مجال

-صبا: المشكلة كلها بعصبيته شلون راح نكمل حياتنا ويه بعض و كل يوم نتعارك على اشياء تافهة وسخيفة هاي واحنه بس زملاء عمل شلون لو ارتبطنا وصار حب متبادل

-مسرة: لانكم بس زملاء عمل تصير بيناتكم هالعركات لانه كابت مشاعره تجاهچ وخايف من ردك فعلچ فـ يفرغ طاقته وغيرته بالعصبية والصياح.. الكبت العاطفي كلش مؤلم ويعكر المزاج

-جولي: اتفق ويه مسرة فكري قبل لا تخطين أي خطوة واحنه وياچ بكلشي

-صبا: تمام وقصي؟

-مسرة: حتى اكون واقعية قصي ستايلج، صح ممرتبطة من قبل انتِ بس اعرف ذوقچ شنو بالرجال وشلون تحبي يكون بس قصي بعيد ومتعرفين شي عنه اذا كلش عاجبچ اطلبي تتعرفين عليه

-صبا: معاجبني ومو ببالي بس امي تگول خوش قسمة

استمر حديثنا ربع ساعة وشُهيب للان ما كمل اتصاله، عيوني تنحرف عليه اگدر اشوفه منا واغلب وقته ساكت ويسمعلها هي تحچي اختنگت وضاگ بيه النفس گلبي اشتعل غيرة وحقد!! من عصبيتي ردت اگوم اخذ جنطتي واروح أاجر فندق بره بس بصعوبة وصعوبة قسوى سيطرت على روحي..

-جولي: هسة نجي عليَّ بنات..

-صبا: اييي يله خنشوف ابدي جولي ابدي

سكتن وگامن من الچرباية من رجع شُهيب للغرفة رادن يطلعن وما قبل هو اخذ تلفونه وراح بره اكيد يحاچي القرددة مالته..

-جولي: سرور وياي؟

-مسرة: اي احچي

-جولي: اول شي مسرة انتِ وشُهيب بعدكم بنفس الوضع؟

-مسرة: شنو قصدج

-جولي: علاقتكم على ورق؟ ماكو مشاعر بيناتكم؟

-مسرة: اكو نععععل وقناادر مگطططعة على راااس نعالسين الخاايسة!!!

-صبا: منو نعالسين ولچ هاي شنو اكو تحديثات واني مادري؟

-مسرة: عوفي عوفي الموضوع لا تخبليني واروح اتعارك وياه بهالليل

-جولي: مسرة اني اريد اطلع ويه شُهيب

-مسرة: وين تولون؟؟؟

-جولي: نتعرف

شهگت شهگة من نص گلبي طلعت ما متوقعة هالجواب ولا متوقعة هالطلب الوقح، اردفت بنبرة سريعة تبرر..

-جولي: بس تعارف انتِ مو گلتي زواجكم على ورق وماكو مشاعر متبادلة؟ يمكن اني وياه نرهم شمعرفچ

-مسرة: رووحيله حبي رووحيله خنشوف اذا يعبرچ لو يهتمممم

-جولي: مسرة شبيج! شنو هالحجي ليش اني شبيه؟!

-مسرة: جولي هذاك هو گدامچ رووحي شتسوين سووي عسى ناركم تاكل حطبكم شُهيب ميهمنييي بشي بس من هسة اگلچ هو عنده تواصل ويه خطيبته السابقة وماعرف شنو نوع علاقتهم اذا كسر گلبچ اني معليه؟؟ مو تجين تگليلي ليش ما نبهتيني وگلتيلي بهالشي!!

-جولي: قابلة عادي اني اخلي يحبني

-مسرة: حببتتتچ جرراااادة

-جولي: مسررررة

-صبا: مسرة احچيي شنو سالفة خطيبة شُهيب ولچ صدگ عنده علاقة بيها؟؟

-مسرة: ماعرف شنو نوع العلاقة بس بعده يتواصل وياهة القردة بنت القررد ولچن لو تشوفنهااااااا

من العصبية لزمت مخدتي اعضعض بيها جولي انتفضت وگامت من مكانها توگف على حيلها زيدت وضعي سوء من گالت بعصبية..

-جولي: ماكوو خطيبة ماكو زوجة ماكو حبيبة البقاء للاقوى عيونيي انتِ متردي مو؟؟ خلص اني اعرف شلون اخلي يحبني وتشوفننن

عافتنا وطلعت من الغرفة ولاول مرة اظل فاكة حلگي ماعرف شگول وشنو اجاوب مثل الطرنة هيچ صافنة..

-صبا: غبيية غير تحچين وتگولين انتِ تردي وتغارين عليه غبررة ثوولة مطية زماالة مسررة

-مسرة: شريد منه صبا؟؟ اگلچ عنده علاقة بصخلته اصلاً هيچ احسن عرفت من البداية ولا اورط روحي وياه وابوية يطيح حظي

-صبا: وين چانت هاي صخلته كل هالفترة لو من ارتبط بيچ نبزت!!

-مسرة: يمكن اشارة من الله هاي حتى متطور الامور بيناتنا ومحد يخسر بالنهاية غيري من ابوية ياخذ حقه من شمسون وولده

-وجولي؟؟ خاف صدگ تخلي يحبها!!

-خليها احسن حتى اعرف اذا انطاهة مجال هو شنو نوعه وشنو نيته تجاهها وتجاهي وتجاه خطيبته الخايسسة المعفنة الغبررة

انطرقت الباب سكتت صبا وگامت تشوف منو طلت فيروز تمد راسها من الباب وتگول بأبتسامة..

-صار العشا يا حلوات

-مسرة: ماشي حبيبتي نازلين

طلعت صبا تبدل ملابسها واني هم گمت ابدل خوما انزل بالبجامة فشلة، فتحت الجنطة ادورلي على لبسه وانفتحت الباب وطل منها شُهيب.. ما اهتميت لدخوله وكملت ابحوش بالملابس..

-شُهيب: صار العشا

-امم

-ما كملنا حديثنا

-اي

-تحبين نحچي هسة لو وره العشا؟

-ماعندي شي احچي اگلك تعال ساعدني اختار شي اللبسه شو دخت

ما گال لا وگف بصفي يدورلي على لبسة من الجنطة ببالي شي واريد اتأكد منه ومثلما توقعت ما صدگ اجته الفرصة يتحكم بملابسي صار يشيل بالملابس يشوفهن ويرجعهن بالجنطة الى ان استقر على السوت النيلي..

-شُهيب: هذا حلو

-مسرة: لا شنو لابسة هيچ تريدهن يضحكن عليَّ

-ليش؟

-اني عروسة لازم اللبس شي حلو

-مسرة والله حلو هذا

-لا شوف هذا

جريت فستان ربع ردن كلوشة وردي فاتح ما قبل وشفت الاعتراض بعيونه جره من ايدي وگال بنبرة سريعة..

-لا لا هذا مو حلو هذا احلى

-شنو نيلي مال عجوزات

-حلو

-مو حلو

-حلو حلو

-مو حلوو

-حلو ومحتشم ومرتب وانيق

-مو حلو ومبهذل وعريض ومرعبل

-مسرة

-عيووونييي

ذب نفس حاير، تعمدت اخذ "فستان نوم" نعم مو فستان عادي ولا دشداشة لا فستان نوم لونه اسود قصير يوصل لنص الفخذ الظهر والصدر مفتوحات رفعته گدامه وگلت بفرحة..

-هذا الفستان يخبببل مووو

جمد صافن عليه ظل لا ياخذ ولا ينطي وعيونه تقره رفض قاطع ااااااه يا للسعادة عرفت شلون اغثه وابرد ناري بي.. ركضت للحمام فرحانة ونويت اللبسه بس اكيد ما راح انزل بي شنو مخبلة بس ردت اخلي يفرفر بأذاناته وصدگ يلبس گرون اني اعلمك شُهيب يابن شمسون العار قردتك مصلخة بصورتها الشخصية متغار بس من يجي الموضوع الي متقبل واشوف عيونك تطاير منا ومناك اصبرلي!!

لبسته وباوعت لروحي بالمراية يجننن ويفشل بنفس الوقت ماعرف شلون راح اطلع گدامه واخلي يشوفني هيچ بس طززز اي والله طز الا اشعوطك..

لفيت اطراف شعري سويته كيرلي مفتح وغمقت مكياجي وبرزته بحمرة طوخ وتعطرت من جديد وطلعتله بس گلبي يرعد رعد متوترة..

-هااا شرأيك؟؟؟

وجهه گام ينطي اللوان اصفر على احمر على بنفسجي فرك رگبته من وره وظل يرفع بخصلات شعره يرجعه ليوره حركته سريعة ونابعة من توتر بلع ريگه وگال..

-شُهيب: هيچ تردين تنزلين؟

-اي بس حايرة بالاكسسوارات تعال اختارلي انتَ

-اگلچ تعالي شوفي هذا

شال نفس الفستان الوردي الكلوشة يحطه بوجهي ويگول بأبتسامة مرتبكة گووة كتمت ضحكتي على حركته من گال..

-شُهيب: هذا حلو صح كلامچ قبل شوية كلش حلو لبسي

-لا هذا حبيته اكثر

-مسرة والله هذا حلو راح يرهم للون بشرتچ ورفعي شعرچ وخففي مكياج يطلع كلش حلو

-no no

-مسررة

-شهوبي اوبي اوبي الي لابسته يرهم للعرايس غير احنه هستونه عرسان جدد

-الي لابسته ينلبس بغرفة النوم مسرة هذا مو لائق تطلعين بي ويشوفوچ باقي الزلم!

-حابته كلش هوت

-لا هذا مغرري مو هوت!! اكو اختلاف بيناتهن الهووت شي جذااب وحلو والمغررري يثيرر حتى المططي

-اممم لا مو لهدرجة

-لهدرجة ونص شوفي نفسچ بالمرااية لخاطر الله!!

-شفتها وطالعة كيوت

-كيوت؟؟؟ هههههههههههههههه گلتيلي كيوت؟؟ يمكن انتِ ما تفرقين بين الكيوت وبين اليشگ ششگ

راح افطس من الضحك وتغير مزاجي بالكامل ماتحملت انطيته ظهري بس حتى اضحك براحتي وميشوفني وتركته ورايه محترگ، رحت للمراية اللبس مجوهراتي وهو باقي يفتر بمكانه..

كملت ترتيب نفسي وشمرتلي بوسة بالهوا للمراية ابوس شكلي وجمالي بس بعد ما تحمل شُهيب واجاني وسحبني من زندي على كيف ودارني عليه، رفعت راسي حتى اشوفه عدل بسبب فرق الطول الشاسع بيناتنا..

-اني مريض

-شنو

-احسني مريض ماريد انزل اتعشا

-ها سلامتك

-اي اگلهم يجيبولي العشا هنا

-اوكي اني اجيبه الك

-لا لا يمعودة شنو انتِ تجيبي دخيلچ

-ليش مو اني زوجتك؟

-اي بس ليش تتعبين انتِ ماقبل عليچ ابقي هنا وياي نتعشا سوه

-لا وعدت صبا وخالة ماريا اتعشا وياهن جوه

-نجيبهنننن

-اوي شُهيب ليش تعيط بوجهي ما اتحمل اني

-مسرة ابقي يمي هنا لا تعوفيني وتنزلين

-اني جوعانة واريد انزل يم البنات

-اجيبهن كلهن يمچ هنا وشرفييي

-اممممم

-اني مريض حسي بيه تعبان وضعي مو تمام

دگ تلفوني بنص حديثنا الممتع عفته واگف ورحت اشوف منو ديتصل بيه اييييييييع ايييييييييييع هذا صقر ريماس اييييييييع شيريد هالعار ما لعبت نفسه مني مو اني لعبت نفسي من نفسي..

-اوگف اروح اشوف شيريد مني وارجع

-منووو

انتفض وسأل بعصبية وهاي اول مرة يسويها واات ماذا يحصل هنا؟ الوضع بده يصير احلى واحلى واني مستمتعة على الاخر الحمدلله لگيت احد يغار عليَّ قبل لا اموت همزين ما ظلت بنفسي..

-مسرة: فد واحد

-ما احب اتدخل بخصوصياتج بس ممكن اعرف منو

-لا

عفته وطلعت للبلكون امثل دا اجاوب صقر ريماس المزعج بس طبعاً ما فتحت الخط، مديت نفسي اشوف الحديقة منا فارغة محد اكو والجو بالليل يخبل عجبني كلش ونسيت نفسي هنا التلفون عود حاطته على اذني وواگفة اتأمل جمال الجو والحديقة منا..

-شُهيب: ما خلص هالاتصال؟!

اللتفتت عليه والتلفون بعده على اذني، سويت روحي اودع الطرف الثاني ومثلت دا اسد الخط..

-لا ما خلصت بس يله لخاطرك سديته

رجعت جوه وهم بعده ورايه يمشي احس بنشوة سعادة گدرت اعيشه جزء من العشته قبل شوية من چان يحچي ويه القردة..

-شُهيب: راح اگلهم يجيبولنا العشا هنا

-لا حياتي انزل اني

-مريض اني مرريض مررريض حسي بيه شلون تعوفيني وحدي بله صار بيه شييي

-مابيك الا العافية لتخاف ما راح اتأخر بااي

مثلت عود دا اريد اطلع وخلع ايدي جرها قبل لا اوصل للباب وسحبني بقوة من خصري يلزگني بي، رفعت عيوني اباوعله وجهه عرگان وصاير احممر ددم، انفاسه حارة تلفح وجهي وقابض على فكه بقوة يمعود گلبي ميتحمل كل هالجاذبية على كيفك ويايه..

-اطلب منچ لاخر مرة بكل لطف تحترميني وتبدلين هذا الفستان

-واذا ما نزعته؟

-اشگه عليچ!!

اءءء؟؟ نعم نعم نعم هل اذاني سمعت الكلمات هاي لو اني بديت اشخط؟ بس تأكدت هو فعلاً گالها لانه غمض عيونه وزفر نفس قوي ونزل اكتافه بطريقة الاستسلام..

-مسرة بهذلتي حالي

-ليش شهشهوي

-اااااخ يابة

قاطع للمرة الثانية النظرات والكلمات واللحظات المثيرة صوت تلفوني والمتصل هم صقر ريماس، دفعته من صدره ابعده مني وهالمرة اني الفجرتها من سألني منو يتصل بيچ وجاوبته..

-مسرة: حبيبي هذا

جفلت وانگطع نفسي من سحب التلفون من ايدي ورگعه بالحايط بكل قوته فلشه تفلش، شهگت جوه انفاسي من حركته المفاجأة والغريبة وعصبيته المفرطة وهو ينفض نفض وكلشي بي يرجف..

-شنوووو تشوفينيييي گدامچ؟؟؟؟ لهنااااا وكااافي وصلتتت حدهاااا شايفتني ******* وتحاچين صااااحبچ گدااااامي؟؟؟؟؟

-شبيك

-انتِ البييييه انتِ!!! كلشييي جاي تسووووي بس حتى تستفزززيني وتلعبين بأعصابييي وتمسيييين رجولتييي وتذلينييي!!! تعررفييني ماگدر اضغططط عليچ واحچييي وياااچ!! بس ما جاااي يهمچ شيي و تردين تشوفيني عصبي وفاييير بأي طررريقة كانتتت وهسسسة مبروووك نجحتي مسرة قيثااارة اني عصبييي لدررررجة احرگ ******* صاحبچ واحرررگ الخلللفة فووووگاااه

فشر على حبيبي الوهمي وشمر كلامه شمر وطلع للبلكون يطبگ الباب الجام وراه بدون مبالغة حسيته شوية ويفترسني لو يسحلني من شعري عيونه تخوف ونبرة صوته تغيرت صارت اقوى واعلى، نعم ادري تصرفي غبي وماكو رجال يتقبل هالشي بس غيرتي عليه من القردة اغبى واحتاجيت ارجعها اله بأي طريقة كانت حتى ما اموت مجلوطة بفراشي..

گعدت على الكرسي اتصفن وافكر بالموقف، مر وقت وهو بره ما قبل يدخل واتوقع طلع حتى ميسوي مشكلة اكبر كلما يكون عصبي يخلي واحد من عدنا يروح لمكان ثاني حتى ميصير شي غلط بيناتنا..

مديت نفسي اشوفه واگف منطيني ظهره وفاتح جگارة، بقيت اراقبه لفترة طويلة وشفته يدخن فوگ الست جگاير صدري گام يوجعني نيابة عنه وحسيت بحرگة اذتني..

گمت من مكاني شلت موبايلي من الگاع شفت شاشته محروگة ومتفلش ما اهتميت ولا ضجت حطيته على جنب وطلعت للبلكون وگفت وراه وعرفته حس بوجودي بس غلس عليَّ وفتح الجگارة السابعة..

-ما اختنگت من الجگاير؟

مجاوبني وبقى يدخن ممهتملي تقربت منه اكثر ودست على ظهره بأصبعي انبت اظفري بي..

-اكرهك

-اعرف شكراً

-انتَ همجي

-اعرف

-وبربري

-جيد

-چنك نمر متوحش مكشر على انيابه

-امم

-وعصبيتك تخوف

-اعرف

-وماعندي حبيب

راقبت عضلات ظهره شلون ارتخت بعد هالكلمتين، دست ظهره مرة ثانية بأصبعي حفرت اظفري بي اكثر ناوية اأذي حتى يباوعلي وكملت..

-ما مرتبطة اني شُهيب چذبت عليك

شمر الجگارة بالحديقة واللتفت يواجهني صفن بوجهي ثواني وفاجأني من ابتسم لا مو بس ابتسم ضحك! اي والله ديضحك وبرزت اسنانه البيضة وبحركة سريعة غافلني وجرني من خصري عليه حضن وجهي بين ايده وباسني على خدي..

فتحت عيوني مصدومة من تصرفه، باسني بوسة مطولة وشمني وراهة يستنشق عطري ومغمض عيونه، مغص صار ببطني من بقى هيچ لدقيقة كاملة بدون لا يتحرك..

انتبهت على نفسي ورجعت لوعيي وخرت نفسي منه حتى يبتعد بس ما وخر بالعكس شدني من خصري اكثر يحاوطني بتملك وقوة عصرني بين ايده العنيفة..

-تأدب

-هههههه حاضر

-وخر عني يا فاسق تره هسة اروح ارتبط واخليك تطلع بالشارع مصلخ

ضحك بصوت عالي، عالي لدرجة ضحكت وياه ممتوقعة هالضحك يطلع منه..

-مسرات انتِ فد وحدة...

-حلوة؟

-اي وفد وحدة...

-خوش بنية؟

-هههههه اي و..

-وحبابة ومؤدبة ولطيفة؟

ضحك يهز براسه اي، حررني من ايده من گح كم مرة ينطيني ظهره الله يساعد رئاته على الجگاير اليحرگهن كل يوم..

-اعتق نفسك من الجگاير الا تموت ياله ترتاح

-راح تفرحين بموتي؟

-اموت من الفرح

-بس مو تنسين توزعين ثوابات على روحي

-انتَ موت ومعليك خلي الباقي عليَّ

ضحك خفيف و طلع كلينسة من جيبه يمسح العرق من جبينه وگال بنبرته الهادئة المتعودة عليها..

-اعرف بيچ ما مرتبطة مسرة

-هااا؟

-تتوقعيني اعرفچ مرتبطة واقبل اتزوجچ؟

-لا بله ليش عيوني تستنكف؟؟؟

-مو هيچ بس ماحب اخذ حاجة غيري

-اني مو حاجة اني بني ادم

-تبقين حاجتي ومستحيل انطيچ لاحد

غابت ابتسامتي وبلعت ريگ وره جملته الاستحواذية من شاف وضعي المستغرب عدل على جملته فوراً يضيف..

-اقصد ما طولنا متزوجين

-بس مو من حقك لان زواجنا على ورق انتَ الك حق ترتبط وتكمل حياتك واني هم

ابتعد يوگف على جهة قريب باب الغرفة رافع تك حاجب معاجبه كلامي بس ما لحگ يعلق بسبب صوت صفير اجه من جوه مديت نفسي واذا اشوفهم ثلاثة من ولد عم شُهيب الادبسزية واگفين بالحديقة يباوعولي ويصوفرون..

-وللللك باااع الكيييك بااااع

-بووويااااا مو مرة طرگاعة

ابتعدت بسرعة اضم نفسي ملابسي فاضحة واني ناسية روحي، باوعت لـ شُهيب عاگد حاجبه مستغرب المن يا ترى موجه هذا الحديث؟ تقدم كم خطوة يظهر نفسه الهم وصاح واحد بيهم بصوت خايف..

-ولكمم خرررب امكمم شُهيب هنااا ولك شُهيبب

اشر لجماعته يشردون وشُهيب شال سندانة ورد حجمها وسط محطوطة على جهة وشمرها على واحد منهم اجت فيييت عليه و تفلشت على راسه..

-شُهيب: جااااااايكم ولد الكلللللللب

-والعبااس التوبة وعليي والزهرررة وروح اميي التوبة ما عرفناااها

ركض واحد منهم لباب الحوش ويصيح بيهم..

-ولكمم امشووووو اليوم مكتولين مابيها مجااال لا تظلووون تتوسلووون

طلعو يركضون وشُهيب رجع للغرفة يركض حتى ينزللهم لزمته بالباب ما اخلي يروح صاير نااار واعرف راح تصير مشكلة چبيرة جوه وتعبت من المشاكل من اجينا لسه ما ارتاحينا يومية سالفة..

-هددديني مسرررة اروح اربيهممم

-شُهيب حباب شبييك وين رايح اني غلط اوگف بالبلكون هيچ بس تأكدت الحديقة چانت فارغة ومادري بأحد راح يطلع

-هددددينييييي

-والقرااان اذا نزلت ما احچي وياك بعد هسة اخذ اغراضي واطلع مناا كافي تعبنا

جر ايده مني ويزفر سموم وحميم من العصبية طبگ الباب بقوة وراح يگعد على الكرسي يحرك برجله بعصبية مسيطر عليها بصعوبة..

-مسرة: جو العراق كلش مدا يناسبك من يوم اجينا هنا انتَ بس عصبي وصاير شعلة نار

مجاوبني وبقى على هالوضع لفترة من الزمن، انطيته گلاص مي شربه كله وانطيته ثاني هم شربه ولو منطيته ثالث هم يشربه بس كافي لا نصير اوڤر، اندگت باب غرفتنا توقعتها وحدة من البنات يذكرونا بالعشا..

-اوگف اشوف منو بالباب

-لبسي شي فوگ ملابسچ

هزيت راسي اي ولبست روب ورحت افتح الباب وتفاجأت من شفته..

-مسرة: مالك؟

-مالك: ممكن تصيحيلي شُهيب

اساساً الغرفة مو كلش چبيرة فـ شُهيب سمعه وگام يشوف شبي..

-مالك: اجيت اشكرك على موقفك اليوم ولانك جازفت بصداقتك ويه الاطلس وحليتولي الموضوع

-شُهيب: العفو

-مالك: واجيت اطلب منك شي ثاني ادري كثرت طلباتي بس ماعندي غيرك حالياً

-شنو هو

-أريدك تهتم بـ جنات

عگد حاجبه شُهيب ولا ارادي سويت نفس حركته بسبب طلب مالك الغريب..

-مالك: مسافر اني اليوم بالليل وماعدها احد، اختها ايات لحد هسة متحچي وياهة وجنات كلش زعلانة من تصرف اختها وماريدها تبقى وحدها ويزيد وضعها سوء

ابتسمت على اهتمامه بيها وشلون شايل همها مع العلم ثنينهم ميحبون بعض وزواجهم اجباري بس حنون عليها اكثر من اختها..

-شُهيب: تمام

ضحكت بگلبي يااابة يالبرود حتى ما سأله وين مسافر وشعندك، ابتسم مالك ممتن واردف بنبرة تحمل خجل من كثرة طلباته..

-مالك: اعتبرها مثل كيان وشوف طلباتها وراقب اكلها لان ما تاكل زين الا واحد يجبرها ولا تخلي واحد من الولد يزعجها

-شُهيب: لا تخاف ما راح نخليها تحتاج شي

-واهم شخص لا تخلي يتقرب منها ابن عمي ليث انتبه شُهيب اكثر واحد اريدك تركز عليه لان مو راحة هالولد

-شنو يگدر يسوي والكل موجود

-باچر العلوية عازمة الكل بالبستان وعلى الاغلب عمي عادل راح يجي ويجيب بناته وابنه ليث ماريده يشوف جنات ولا يحتك بيها اگدر اعتمد عليك؟

-ليش متوصي فاهد؟

-فاهد ما أمن دجاجة عنده تريدني أمن على بني ادم

رفع شُهيب حاجبه بأستنكار فهمت حركته وكأن ديگوله متأمن دجاحة عنده وضغطتو علينا حتى نزوجه كيان..

-مالك: لا تخاف هو مهتم بـ كيان لانها تعجبه بس راح يسرح على جنات وهذا قصدي

-تمام تمام

-يله سلام

طلع وافتهمت سفرته لـ تركيا علمود شغل خاص ابوه جبره يكمله وراح يطول ستة ايام واكيد عرفت هالمعلومات من ابوية من اتصلت بي.. بس ياريته ما سافر ولا وصانه هالوصية وحسيته شركني بوصيته لان انظاره چانت تتوجه الي من يحچي.. محد چان حاسب حساب هالمصيبة الجديدة الي وگعت مثل الصاعقة على روس الكل واول المتورطين بيها هو شُهيب.....

يتبع.....

━━━━━━  ━━━━━━

مسرة وكيان وجنات اجو للعراق يتزوجون ❌

اجو يوگعون كل يوم بمصيبة 🥲✅

توقعاتكمممم 💀🩷؟؟

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

-أنا بحر أتودُ الغرق..؟ 🩷

━━━━━━  ━━━━━━

"كيان"

طلعت فاهد من الغرفة بحجة يروح يم ولد عمه ينام ويتونس وياهم وحذرته متشوفه العلوية حتى متصيرلنا مشكلة، دقايق وطلعت جنات تتسحب من غرفتهم..

-جنات: متت ياله طلع مالك من الغرفة

-كيان: وين راح بهالليل؟

-مادري ما گال بس ودعني وگلي انتبهي على نفثچ

-عزه وين راح ولج خاف راح يرجع ويعوفنا

-شبيچ متوترة واذا راح؟

-غبية واذا سألتج العلوية ليش انتِ هنا وهو راح؟!

-اگلها عنده شغل، يله خلينا نفوت ننام صرت طلي من التعب

-هلو طلي

فزينا ثنينا طفرنا بمكاننا على صوت فاهد يجي من وره ماد راسه من بوابة المدخل ويهمس..

-جنات: ولك فززتني هوو هيچ

-فاهد: يا ستار استر شعدچن ولچن

-جنات: راح انام يم مرتك

-فاهد: واااااااااه

شهگ وفتح عيونه وره الواه الغريبة مالته، حط ايده على صدره يمثل الصدمة واني وجنات صافنات عليه..

-فاهد: هاي ليش كيان ليش مو هستونا تزوجنا

-كيان: هاي شبيك بس هالفترة علما يرجع اخوك

-فاهد: راح اجيب فاضل يگلچ والعياذ بالله من الخبث والخبائث

-كيان: شدعوة عاد روح يله روح خلينا ننام

-ياهو ينام ولچن

وهالمرة چانت الخرعة من نصيب ثلاثتنا من طلت العلوية لافة راسها بعصابه وحاطه بيها مفتاح وشايلة عوچيتها..

-فاهد: اني معليه هنه ميستحن

-العلوية: شمالچن معزايات

-جنات: علوية اني راح انام ويه كيان

-فاهد: شوفي الصلافة علوية شوفييي هي هاي تربيتچ

-العلوية: ولي لغرفتك انتَ لا تدخل بالنسوان

-فاهد: مو كيان گالت نام جوه اثاري عدها نوايا اخرى

-كيان: چذاب بيبي ماعندي نوايا اخرى بس جنات تستاحش تنام وحدها ومالك طلع وعافها

-العلوية: اي خوش يوم روحن نامن و انتَ روح لولد عمك عوف البت

-فاهد: خو انام وياهن

-كيان: وين ويين جنات محجبة

-فاهد: ميخالف ادير وجهي عنها بشرفچن خليني انام وياچن

-العلوية: لا حبوبا عيب مرت اخوك هاي حتى لو صغيرة تبقى حليلة اخوك

-فاهد: عادي مالك ما يمانع انام بيناتهن حلو نرد وحشة بعض

-العلوية: يا طايح الحظظظ يا زماال

شالت عوچيتها تكتله بيها وفلت يركض وهي تركض وراه اني وجنات استغلينا الوضع ودخلنا الغرفة..

-جنات: الله راااح انام اليوووم اخيرراً

-كيان: لازم تعودين نفسچ تنامين وحدچ جناوي شلون بيچ من نرجع؟

-مادري اني هم حايرة

-يله تدبر عود حضني دبدوب چبير

-لا ما اتقشمر بهالسوالف الا بني ادم بصفي ياله انام

-امممم وشاركتي مالك بهالموضوع لو بعدچ

تمددت على الفراش وهي اجت تتمدد بصفي بس بيناتنا مسافة، حركت راسها بـ لا وتثاوبت بنعس تغمض عيونها..

-جنات: ماكو داعي هو راح يطلگني

-شنوووووو

فزيت اگعد على حيلي بينما هي بقت تقاوم نعاسها عيونها صايرات حمر من التعب، ضغطت عليها حتى تشرحلي اكثر الى ان سولفتلي الصار بيناتهم البارحة.. خجلانة من نفسي لان فرحت وخجلانة اكثر من الابتسامة الغبية الي انرسمت على وجهي من گالت هو مُصر يطلگ وميريد يكمل وياهة وخجلت من غيرتي الي اشتعلت من گالت..

-جنات: مو حرام اذا حچيت بيناتنا عقد، كيان جسمه يخوف يخوف كله وشوم وعضلات بس كلش حلو مو بطريقة مبالغ بيها وحتى وشومه حلوة وبيهن فكرة

-اممم

-طبعاً اني شفته وهو نايم لان استحي اباوعله بغير وقت عنده وشم...

-شلون شفتي وين ملابسه لعد؟

-الحقير ينزع من ينام

-احم.. يله خلينا ننام

اختنگت وماردتها تكمل تمددت وهي بصفي انطيتها ظهري ابلع الغصة الكتلتني واختنگت منها.. شگدما احاول ابين روحي طبيعية واتصرف بأريحية واكمل زواجي من فاهد افشل بالنهاية وارجع انهار من اتذكر مالك هم تزوج معناها حتى لو انفصلت من فاهد جمعتي ويه مالك شبه مستحيلة..

-كيان

رجعت وياهة على حركة اصبعها تنبته بظهري بخفة، انداريت اشوف شبيها وقريت الخجل بعيونها من اشرتلي حتى احضنها.. بدون حچي زايد حضنتها وحطت راسها على صدري وفوراً غفت واني بقيت گاعدة للصبح الافكار تجيبني وتوديني..

الصبح گعدت عيوني منفخة والزراق الي برگبتي زايد انقهرت وانجعصت مشاعري ماعرفت شنو اسوي الجو حار مو مال اللبس شي بي رقبة عالية واليوم معزومين ببستان العلوية..

-جنات: كيان كيان اليوم نروح نسبح تره هسة عُلا گلتلي العلوية تگول جيبو ملابس اضافية

-كيان: عدها مسبح العلوية؟

-اي يجنن كل الصيف احنه هناك ولا تخافون معزول عن الزلم بس هم جيبي وياچ شي تلبسي فوگ ملابس السباحة لان يچفتون علينا بكل مرة ويخربون اجوائنا الحقراء

-مجايبه ملابس سباحة عادي اجيب برمودة وكيمونه؟

-اي عادي اذا تردين تصيرين مضحكة لنسوان عمامي الحياية

-ياااا ولچ ماعندي شلون

-هسة ادبرلچ من ايات دائماً عدها اضافي

راحت لغرفة ايات شوية ورجعتلي بيدها ملابس سباحة لونهم اسود گالت عنهن جديدات تشكرت منها وحضرت جنطتي وهي طلعت من الغرفة هم تجهز نفسها للعزيمة.. حسب كلام فاهد البارحة كل گرايبهم راح يحضرون بدون استثناء حتى بنات عمهم المتزوجات وولد عمهم المسافرين بـ مصر.. طبعاً اكتشفت بالجديد همه عدهم تجارة بمصر هم وهواي من اولاد عمهم عايشين هناك..

لفيت وشاح صغير حول رگبتي اضمها وأخذت اغراضي ونزلت تصادفت ويه مسرة على الدرج لابسة سوت نيلي طويل وراهي على جسمها، صبحت عليها وردتلي الصباحية ونزلنا سوه..

ركبنا سياراتنا وانطلقنا للبستان الطريق وناسة وفاهد لعب لِعب عالگ اغاني ردح ويرگص ويغيض بـ جلال ابن عمه.. بقى على هالحال الى ان وصلنا وشفنا العلوية هناك قبلنا تستقبلنا وكووومة وجوه جديدة هم اول مرة نشوفهم..

-كيان: سرور وينه شهوبي شو ما شفته؟

-مسرة: مادري گعدت الصبح ما لگيته بالغرفة

-معقولة ميجي ويانه؟

-لا شلون لازم يجي لان مالك أمنه على جنات وأصر عليه ينتبه عليها وعلى اكلها ووضعها

-امم

گعدنا سوه وانضمت النا صبا تمط بأيدها وتدردم ويه روحها..

-صبا: ام قصي لزگت الا نركب وياهم بالسيارة ولو تشوفون مروان شصار بي

-كيان: يممة سودة عليَّ اكيد انقهر

-صبا: انقهر؟؟ حبي گام يلطم لطم والله گوة شلعو فاضل ونشوان ودخلو السيارة

-كيان: صبا اسفة اذا راح اتجاوز بس تكونين غبيية لو رفضتي حُب مروان تره مروان ماكو منه حباب ومؤدب ومحترم وخلوق وطيب وطاهر القلب وجميل الشكل ورهيف الاحساس وعزيز النفس و..

-مسرة: اگص ايدي اذا مروان ما جابرچ تحچين هالحچي ويه صبا

-كيان: تردون الصراحة؟ اي والله جبرني وگلي جملي صورتي گدامهة

-صبا: ما احتاج احد يجمل صورته گدامي اني مشتغلة وياه وكل وقتي چنه نقضي سوه بس عصبي كيان عصببي وانتِ دتفهمين عليَّ اكيد

-كيان: افهم وحقچ طبعاً بس هو ديتعالج لخاطرچ والعلاجات دتدمره سودك عليَّ من يبلعهم يظل يرجف ويصير عنده خفقان من گدما قويات حتى جسمه ميتحملهن بس لخاطرچ جاي يسوي كل هذا

-صبا: اخاف لا يصير موقف ويمد ايده عليَّ والله اكسرها واعلگهيا!!

-كيان: طولو فترة الخطوبة وتعرفو على بعض اكثر وبشكل اقرب، مروان گلبه بچر على گولة نشوان معناها ما حاب من قبل ولا داخل علاقة انتِ اول مرة راح تكون وياه 

-صبا: تمام أفكر بالموضوع، هسة تعالي انتِ شبيچ شو عبالك ضايجة صاير بينج وبين فاهد شي؟

-كيان: لا بس تعبانة مدا انام زين

-صبا: همزين، و انتِ مسرة وشُهيب شلونه وضعكم ان شاء الله تمام؟

-مسرة: بس عرك

-كيان: صدگ؟؟؟

-مسرة: البارحة تعاركنا عركة چبيرة ونمت زعلانة ما قبلت اصالحه وخليته ينام بالگاع مع العلم مزعلانة ولا ضايجة منه بس سوه ويايه شي ولازم اخذ موقف حتى ميتكرر

-صبا: هاا لعد حقچ اي

-مسرة: بس كالكلب اليوم لبست اللبسة الي حبها البارحة وطلب مني اللبسها گبر طمني

-صبا: خفيفة مو بيدچ شبيچ

-مسرة: مو؟؟ احس اييع لعبت نفسي من نفسي ينرادلي راشدي يصيحيني على زماني صبا نولي الشرف وانطيني واحد

ما گالت لا كفختها صبا بسرعة بدون لا يشوفنا احد متت ضحك عليهن هاي اول مرة اشوف مسرة تتصرف بهالعفوية وتحچي هيچ على نفسها..

-مسرة: اللزم گلبي ادگه بالنعال واذبه بالزبل ايييع افشل والله افشل كرامة صفرر عار على البشرية اني

-صبا: ميخالف حبي ميخالف هو هذا الحب يبهذل

-مسرة: لاا! ماحبه اني هالمتوحشش

-صبا: على كيفچ حبي فشلتينا گدام البنية

انتبهت على نفسها وعصبيتها حمحمت وحطت رجل على رجل وعدلت شعرها ترجعه وره وگالت بهدوء..

-احم.. نعتذر على الازعاج بس اني رايحة ابدل ملابسي قبل لا يجي هموسي ويشوفني ذليلة

ضحكت من كل گلبي من راحت تبدل ملابسها جايبه وياهة احتياط ولبست سوت رياضي لونه بيجي اي هسة رجعت مسرة النعرفها صح هذا هم محتشم وحلو بس يمثل شخصيتها اكثر..

-مسرة: ارفع شعري لو ابقي؟ اريد طريقة اغثه بيها شسوي احتاج مساعدة صديق

-صبا: رفعي بيبي يطلع هوت اكثر

-مسرة: صح حتى اني فكرت بي.. باعي كيان اياچ تطلع منج تگليله چنت لابسة السوت النيلي وغيرت اثق بيچ

-كيان: هذا هو

بده تجهيز الغدا وشُهيب للان ما اجه رغم الكل وصل ومن نسأل شمسون عنه يگول طلع بشغل بمكان بعيد ويمكن يفوت الغدا..

-كيان: صدگ بنات جولي وين ليش ما اجت ويانه؟

-صبا: راحت لگرايبها تشوفهم وچلبو بيها على الغدا

-فيروز: بنات بنات امشو نسبح علما يصير الغدا

-العلوية: انچعمي وگعدي عود العصر روحن.. هلا هلا بوليدي..

عم الصمت بالمكان اللتفت الكل يشوف منو دخل وابتسمت من شفته شُهيب، الكل وگف على حيله حتى يسلم ولد عمامه والبنات وحتى عمامه الكبار وعماته.. هدوء تام صار وبس همسات السلام تنسمع..

-العلوية: عمت عيني چن مَلك طب عليَّ سودة بوجهي

-فاهد: تره مالك ما مات علوية

-العلوية: طايح الحظظ لا تفاول على اخوك تاج رااسك

-قصي: بعد شيخلصنا

-العلوية: شنييي وللك شگلت يالصايع؟؟؟

-قصي: گلت هلا بـ شُهيب مكانه چان خالي

سكتت تهز براسها تتوعدله، تقدموا عمامه الكبار العايشين بمصر اكبر من شمسون بعد لزمو واحد واحد يصافحو ويگولون نفس الجملة..

-هلا بـ نمر شمسون

بعد ربع ساعة ياله كملو سلام وگعدو يتوزعون على القنفات، اجتني مشاعر جياشة من العدم ودمعت عيوني بشوفته وشوفة اهله شگد يحبو ويحترموا ومكبرين شانه ومكانته بيناتهم شي مُهيب ويرفع الراس من يحچي شُهيب الكل يسكت ويستمعله بتركيز رغم ميطلب من احد يسكت ولا يجبر احد يسمعله بس يمكن السبب بشخصيته المحترمة باسلوبه الراقي بالحديث اشوف الفضول ينبع من عيونهم حتى من عيون فاهد الي يكره اخوه يركز ويه كد كلمة يحچيها ومن ينتبهله احد يمثل هو ممهتم..

-هلووو شهوبييي

دخلت ماريا بنص الزلم ماعرف وين چانت وشلون طلعت هيچ فجأة، زلغن نسوان عمامهم خدودهن من شافنها تطب بهالطريقة تروح تحضن شُهيب ترفع رجليها ونفسها حتى توصل لرگبته وتبوس بخدوده وتمسح على شعره مثل الطفل الصغير..

-جيهان: حمدن ربچن العلوية لبستها جبة چان كلنا تطلگنا اليوم

-هنادي: ختولي هالساقطة العتب على ابنها ما يضبها

-فريال: عوووذة منها ومن شكولها خطافات الزلم

اسمعهن واتحرگن يحچن بالهمس بس اني قريبة منهن ودا يوصلني حديثهن المسموم وماگدر اتدخل وادافع لا يگولن اذنها ويانه..

-شمسون: نمري امك تبچي عليك تگول مقصر وياي شُهيب

-شُهيب: حقها حبيبتي فعلاً مقصر وياهة اني

بوس ايدها وراسها وماريا تضحك وعيونها مدمعة حضنها نص حضنه لصدره ومشى بيها لجهة النساء واشرلها على مكاني حتى تگعد يمي والعصر يطلعون سوه يتونسون ويشتريلها حلويات هزت راسها بـ اي وركضت لجهتي فرحانة والدنيا مسايعتها..

صبوا الغدا والكل اللتهى بالاكل والسوالف تونست وتغير مزاجي ويه البنات، شالو السفرة وجابو حلويات وچاي وهم گعدنا گعدة بنات نسولف نص ساعة و طلعنا للبستان..

-فواطم: يله نسبح قبل لا تجينا العلوية وهم تأجل

-فيروز: حارة خاف تموع روحنا

-هدى: المي بارد يخبل امشي ولچ

ايدناهة وبدلنا لملابس دخلنا بالمي ضحك ووناسة ولعب وفيروز وهدى نصبن على ايات ونور المطنگرات خصوصاً نور هالبنية ما جارعة مسرة وكارهتها كره اعمى..

طلعت مسرة من المسبح ولفت الوصلة الجرجيت تشبه الشال بس هاي اقصر على خصرها تغطي جزأها السفلي وتلم بشعرها تحطه على جهة وحدة..

-نور: شكو لافة هاي على خصرچ تره كلنا عدنا العندچ

-فريال: تستشرف

-نور: ههههههه ممبين عليچ شريفة

-هنادي: هههههههههههه حلوة حلوة قوية

-مسرة: عفت الشرف الچ حبي

-هنادي: ههههههه يعني تعترفين انتِ مو شريفة

-مسرة: ممضطرة اثبتلچ هالشي عود انتِ طلعي من المسبح هيچ بلكت تصيديلچ واحد منا مناك

دگت صدرها هنادي وطلعت من المسبح بملابس السباحة خلال هالكم يوم العشت بيها وياهم عرفتها تدور شنوووعيونها وصصصخة وتتماوع على كل الزلم من دون علم زوجها الغبي..

-هنادي: ولللچ تطعنين بشرررفي يام الزززلم

-مسرة: اووه شگد دراما هالمرة بس تريد تسوي show شگد فقيرة كرامة

-هنادي: انتِ الـ...

انلصمت من اجت العلوية مبتسمة ومساعدتها تمشي وراهة وشايلة بيدها صينية فواكه چبيرة.. حطتهن على الميز وراحت جابت عصاير وحلويات وموطات..

-العلوية: يا بعد هَلي والناس غربة شني هالحسن خايبات بنياتي

-فريال: عاشت ايدچ عمة محد مونسنا غيرچ

-العلوية: تونستن حبوبا؟

وجهت سؤالها النا البنات ابتسمنا وهزينا بروسنا گعدت هي على الكرسي تتفرج علينا ومسرة راحت تگعد على كرسي يشبه كراسي البحر حاطي على جهة والله عاشت ايدها العلوية على هالذوق ما مخلية شي بنفس حفيداتها..

-العلوية: شمالها اللماسة؟

-فيروز: سممنها الحياية علوية

-العلوية: ومرض ما يتوبن ذني العايصات

-فواطم: ادبسزيات يحچن على شرفها

-العلوية: يغارن بنات الغبرة عبنها حلوة

-جنات: لا هنادي تغار لان تزوجت واحد من ولد عمو جعفر راح تموت قهر

-العلوية: هاااع شمعنى؟؟

انتبهت لآيات تگرص ايد اختها تسكتها عرفت الدگة هاي الحقيرة عينها على ولد شمسون شگد رخيصة، لزمتهن العلوية تحقيق وقاطع تحقيقها المساعدة تگول راح يجون الولد ويقتحمون المكان..

-العلوية: اجو العارية.. ولچن لبسننن تسترن راح يجون الزلاااام

ترخصت العلوية تدخل جوه گالت رجليها تصل عليها وتريد تمددهن وحذرت ايات ونور يخلن كل البنات يطلعن من المسبح من يجون الولد ويرجعن للبيت متقبل بالإختلاط الزايد..

-العلوية: راح ارجع جوه بعلييي الاسمعها باقية هنا اگرمعع رجليناتها بالعصااا

راحت ونص من البنات طلعن من المسبح والنص الثاني بقن ممهتمات، لبست فستان فوگ ملابسي المنگعة ولفيت الوشاح على رگبتي هو صرت فضيحة بين البنات والغمزات وعض الشفايف يتطاير كل التشوفني تضحك وتداهرني مسرة غطته الي بخافي عيوب بس خف بالمي وانفضحت..

-كيان: ليش محد طبت جوه؟

-جنات: لان عادي كل مرة هيچ يجون الولد وتصير لوصة هنا والعلوية ينبح صوتها من الرزايل بس محد يهتم

وفعلاً ثواني دخلو الولد وصارت لوصة نزعو تشيرتاتهم وگمزوا بالمسبح واحد يتعارك ويه الثاني عبالي راح تگب عركة بعدين استوعبت هاي لغة الحوار والشقى بيناتهم "العركات"..

-تحسين: اويليييي فيروزة چانت تسبح هناا اگول ليش المسبح يخبل وريحته تشگ شگ

-فيروز: ولي عن وجهي تحسين ايييييع منك

-تحسين: احبچ وابقى احبچ ميخالف

-فيروز: لعبت نفسي راح ادخل جوه

استحيت من تصرفاتهم ودخلت وياهة اني ومسرة وصبا وجنات وتسنيم، فاهد ما عارض ولا حچى ويايه شي ولا عبالك شافني اللتهى ويه ولد عمه..

-جنات: اذن المغرب اني اروح اصلي ورايحة للصخلات اشوفهن

-فيروز: تعالي لا تسرحين وياهن يمعودة ونتيهچ بيناتهن

-جنات: هه هه عود تضحك هي

-كيان: ههههههههههههههه ضحكت اني

-جنات: لانچ حقيرة

عافتنا وراحت تركض للطابق الثاني، طول الغده اني عيني على الباب لان گالو عمهم عادل راح يجي وهو ابو ليث بس ما شفته وصل توقعت ما راح يجي والكل غلس عليه...

**

"مسرة"

ما انفردت بـ شُهيب ولا ربع ثانية كلمن بجهة گاعد ونتلاگه بس بالنظرات ومن اشوفه يباوعلي اكسر عيني عنه ما اطول بالصفنة..

البارحة اخذت موقف على تصرفه من كسر تلفوني وعصبيته وتصرفاته، صح ما ضجت منه بس هو گلي يعرفني ما مرتبطة ليش كل هالعصبية طلعت منه؟ معناها اكو شي ثاني مضوجة ىطلع عصبيته وغضبه بيه بكل الاحوال اني ما لحيت ولا طولت بالسالفة لفيت راسي ونمت وهو فرش بالگاع ينام..

الساعة عبرت العشرة بالليل الولد هستوهم دخلو للبيت مبربعين من المي صعدوا للغرف يرتاحون واني گاعدة هنا وحدي بالصالة، قررت اصعد فوگ ارتب نفسي حر ورطوبة هنا تبهذل وضعي انوب يردونا نبات هنا ميقبلون يرجعون..

فتت للغرفة وشفت شُهيب يدور شي بالجنطة الصغيرة مالته، رفع راسه يشوفني ونزل الجنطة من ايده..

-شُهيب: محتاجة شي؟

-اجيت ارتب نفسي وانزل اذا تريد الحمام فوت ما احتاجه

-لا ما اريد

هزيت راسي ووگفت گدام المراية فتحت ذيل الحصان مالتي ومشطت شعري تركته مفتوح، رشيتلي عطر واخذت روج ارسم شفايفي وعيني اجت على المراية من جهة شُهيب شفته صافن عليَّ..

ما اهتميتله وكملت ترتيب نفسي و هو شال علاگة من الگاع وتقرب مني يوگف وراية مباشرة، مدلي العلاگة من وره وعيونه عليَّ من خلال المراية حمحم وگال بهدوئه الحلو..

-شُهيب: اني اسف على تصرف البارحة من كسرت تلفونچ

-مسرة: كسرته وانتَ تعرف اني ماعندي حبيب

-ردة فعل چانت

-ردة فعل على شي ما موجود؟

انداريت اواجهه وتوترت من قربنا ما توقعته لهدرجة قريب احتاجيت اللزگ نفسي بالميز حتى ما اطخ بي..

-من شوكت انتَ هيچ عصبي وتتنرفز من الهوا؟

-من تعرفت عليچ

-هههههههه قصدك اني مستفزة

-كلش

-اوووي شكراً

-العفو

-لازم تحمد ربك وتشكره اني مو مملة تدري شُهيب انتَ شگد محظوظ لان اني قبلت اتزوجك؟ يعني تخيل مسرة قيثارة قبلت تتزوج شُهيب شمسون وااااو شلون ثنائي مثير للإهتمام

حچيتها بأستهزاء ولغة سخرية واضحة، حاولت اكتم ابتسامتي من كمل ويايه بنفس النبرة لكن ما غير من هدوئه..

-مسرة قيثارة اني سعيد وممتن واحمد ربي واشكره قيام جلوس لان قبلتي تتزوجيني

-لا ولو حبيبي تدلل عادي هي هاي الدنيا لازم نقدم تنازلات

-شكراً حبيبتي

ضحكت من گلبي وحسيت بفراشات تدغدغ بطني، ابتسم على ضحكتي وقدملي العلاگة الي بيده..

-مسرة: جلاتين؟

-لا، فتحيها

اخذتها منه وفتحتها طلعت من العلاگة بوكس تلفون جديد نفس تلفوني الي كسره، ابتسمت وحطيته على الميز..

-شكراً هموساتي

-تدلل مسراتي

فتحت عيوني على الدلع عجبنييي كللش عجبنيي ولو بيدي هسة اطفر من الحماس والوناسة..

-حبيتت هموسي جاي تتغلب على نفسك استمر استمرر

-بعيني

-بس شوف ممحتاجة التلفون اني عندي ثنين غيره بس لانه منك راح اقبله

-ردت نطلع سوه وتختارين الي يعجبچ بس ما صارت

-ميهم باچر نطلع

-وتلبسين السوت النيلي؟

رفع تك حاجب وابتسامة جانبية مثيرة مرسومة على ثغره، ضميت شفايفي بحلگي اخفي ضحكتي وهزيت راسي بـ لا..

-لا ما اللبسه ما احبه

-شفتچ جايبته بالجنطة

-وانتَ تدور بجنطتي؟

-اي

-صاير وكح

-مسرة مرتي وما اصير وكح هذا كفر بحقچ

-شهوبي اوبي اوبي اوبي اوبي اوبي اوبي اوبي...

-لااا كافي

سد حلگي بأيده واني اعضعض بأصابعه يضحك وميوخر ايده مني يتحمل الوجع او يجوز اصلاً ما متوجع..

-شُهيب: اني ما انام هنا اليوم الغرفة كلها الچ

-هئئئئئئ

تذمرت وطلع هالصوت قهقه بخفة ووخر ايده من حلگي، بوزت وكتفت ايدي لصدري امثل الانزعاج والمبالغة..

-حرامات هاي شنو شُهيب عود ردت اسويلنا سهرة فلم وحبشكلات واللبسلك تراك احمر

-ههههه شنسوي بعد

-راح تفوت طلتي بالاحمر تره اجنن

-عوضيني غير وقت

-انتَ لو بس تشوفه تموت عليه

-شفت الاسود ومتت عليه

-هااا ولك هااا عيب باوع عيب بديت تچفص

ابتسم وجر راسي وفاجأني من باسني على شعري وگصتي، رفعت عيوني عليه وهو نزل نفسه يهمس بيناتنا..

-تعودي عليَّ واني اچفص وياچ

-وينه الثگل لعد

-شوفتچ تطير هيبة اثگل واحد

-الله لعد طلگني

-هاي ليش

-لان ماريد هيبتك تطير احبها

-وهي تحبچ

-شنو هي

-الهيبة

-هيبة منو؟

-الهيبة كـ شكل عام

عفست وجهي وضحكت بس گلبي يرعد رعد راح يوگف، عطره محاوطني ومنزل نفسه عليَّ وعينه بعيني مال أنطي راشدي اطير وجهه الحلو بس عيب ماگدر..

-يله روح

-اي رايح، انتبهي على نفسچ

-اوكي

-حاچيني اذا احتاجيتي أي شي

-اوكي بيبي

ابتعد مني يضحك، وصل للباب واللتفت يباوعلي شمرتله بوسة بالهوا فتح عيونه مصدوم من الحركة وزاد بالضحك لحدما طلع من الغرفة اني اسمع ضحكته ترن بالبيت وتخلي گلبي الغبي يرفرف الي يتسرسح على كل تصرف منه..

ذبيت نفس امسح على گلبي اهدأ نبضاته المجنونة اوف هموسي الله يشعل ابوك واخلص منه شسويت بيه ولك، گعدت على السرير وجريت موبايلي الثاني اتصل بـ ميوستي اطمن عليها..

-شلونها الروضة الجديدة ماما؟

-ميس: زينة

-متونسة؟ صار عندچ صديقات حبيبتي؟

-لا ماويد صديقات

-ليش ماما تعرفي على بنات وصادقيهن اخذي وياچ حلويات وجلاتين وانطيهن وتعرفو على بعض

-ماويد

-ليييش

-يضحكون عليَّ

-منو يضحك عليج؟؟؟

-وحدة تدول انتِ وصهة ما تمسطين (وصخة ما تمشطين)

-منوو هاااي؟؟ وليش هيچ گالت؟؟

-اسمها ماوي (ماري) گلتلها امي متمسطلي لانها مو يمي تدول ووحي منويدچ احنه منحب الوصهات

گلبي تگطع الف وصلة روحي انسحنت واني اسمع صوتها والغصة وهي تبلع نص الاحرف وزادتها عليَّ من كملت بنفس النبرة ومتأكدة هي هسة مبرطمة شفايفها وتحچي ويايه..

-وحت لبابا ادله دال اني معليه هلي المساعدة تمسط سعوچ وحتلها دالت ووحي اني ماويدچ

-حبيبتي ماما بنيتي لا تزعلين هسة اخابرها واخليها تسبحچ وتمشطلچ وتبدلچ معليچ حبيبة امچ واني هالكم يوم اجيلچ ونروح للسوگ ونتونس ونطلع كلشي ولا تزعلين بنيتي اميرتي

-تاهذيني لمدينة الالعاب؟

-اكيد اخذچ واشتريلچ كل التردي

-ماويد تستويلي اويدچ الچ

-واني اريدچ بس لازم تبقين ويه بابا بس هالفترة بعد تحملي ميوسة ما بقى شي واخذچ يمي ونعيش ويه جدو

-زين

-حبيبة گلبي بعدچ زعلانة؟

-لا واحت الزعلة

-عفية ببنيتي يله شوفيني شنو راح تلبسين باچر بالروضة

فتحت كامرا وهي راحت تركض لكنتورها تراويني وتريدني اختارلها..

-الله ميس باچر راح تطلعين احلى وحدة وهسة اتصل بالمساعدة تمشطلچ وتسويلچ ظفاير حلوة صغار

-اويد شعوي مفتوح

-تدللين اگللها تسويلچ مفتوح وكم ظفيرة صغيرة يطلع كلش حلو

-اي اي واويد اللبس حذاء الاصفو واهذ الجنطة الصفوة هم

-عفيية خوش تنسقين كلللش حلو حبيبتي فدوة لهالوجه

ضحكت فرحانة وتغير مزاجها من مدحتها، صارت تفتر بالبيت وتراويني شنو دتسوي وشنو تلون وشنو راح تاكل بالعشا اباوعلها واباوع لضحكتها وگلبي يتگطع الف وصلة.. نص ساعة وسديته منها واتصلت بمساعدة اكرم الچلبة نزلت عليها نزلة مرتبة طيحت حظ حظها قبل چنت حذرة من احچي وياهة خاف تأذي ميس بس من تأكدت بميس تحچيلي كلشي صرت اخذ راحتي..

-مسرة: كل يوم تسبحيها وتمشيطلها شعرها! تغسلين ملابسها وتبدليلها ومتحچين وياهة أي شي فهمتي لو لا!! تره الكامرات لسه بالبيت ودا اشوف كلشي وادري بيچ مصيحة عليها البارحة بالليل ونامت وهي تبچي!!

وهالشي چذب ما صار ولا عندي كامرات بس اخوفها بهالطريقة وهي تصدگ بسرعة وتخاف، نهيت المكالمة منها وشمرت تلفوني ارتب افكاري..

طلعت للبستان لگيت الباقين هنا گاعدين بالحديقة ملتمين والفواكه والحلويات والچايات والگهاوي طابة طالعة.. باوعتلهم واحد واحد والنار بگلبي تسعر عيوني على شمسون واخوانه الكلاب المجرمين متونسين وعايشين حياتهم وهمه غاطين بالحرام وسرقة مال اليتيم والفقير..

عفتهم ماريد ازعج نفسي واكدرها زايد، رجعت للمسبح شفت المساعدات هنا دينظفن المكان من شافوني اجيت شالن اغراضهن وراحن يعوفوني وحدي..

رفعت بنطروني ونزلت رجليه بالمي اريح نفسي، ناوية اول شي اسوي من ارجع اروح لـ اكرم اطيح حظه واخذ ميس عندي اقل شي اسبوع اغير نفسيتها واونسها اعوضها الحنان والطفولة الي فقدتها بسببه وبسبب لئمه وحقارته..

-بيج شي؟

اللتفتت على صوتها اني گلت ماريد اعكر مزاجي بشوفة شمسون واخوانه انوب اجوني الاتعس نور وهنادي..

-مسرة: لا

-نور: شو عبالك ضايجة

-مسرة: مابيه شي

-هنادي: خاف ضايجة لان شُهيب ما معبرچ

اللتفتت عليها خازرتها شگد كلبة هاي! فضلت ما اجاوبها واعوفها تنبح وحدها لان اذا اجاوبها اطيح حظها..

-نور: مسرة تره احنه نحبچ ماعدنا شي وياچ واني من حچيت وياچ هيچ ذاك اليوم بس لآن مقهورة من قوانين عشيرتنا

كذلك مجاوبتها بقيت منطيتها ظهري وهي تتقدم عليَّ وتحچي بهدوء..

-شُهيب يستاهل كل خير ماعنده اذية على احد بالعكس رغم نشوفه مو كلش يحبنا وقريب علينا بس يساعد كل الينخي والكل يحبه ويحترمه

درت بس وجهي حتى اجاوبها وما حسيت غير بدفعه تجيني من مجهول، دفعة قوية رفست بيها ظهري ووگعتني بالمسبح وجسم ضخم يچيت ورايه بالمسبح يغط راسي جوه ميخليني ارفعه..

اختنگت ادفع بالجسم الضخم بس ماگدرله چبير وثگيل وشاد على راسي بقوة مبين رجال لان مستحيل هاي قوة انثى.. صوت صياح عالي صار بره المسبح ما افهم شي ولا اسمع شدتگول بس نبرة صوت نور هاي تصيح معترضة..

بده يضيق بيه النفس اختنگت روحي طلعت صرت ارافس بأيدي ورجلي اريد بس احد يفزعلي ويساعدني احتااج هووا راح امووت انگطع نفسي وكلما جايلهم يضغطون عليَّ اكثر وينزلوني بالمسبح..

استجمعت كل قوتي واخيراً گدرت ادفع الديضغط عليَّ ورفعت نفسي اسحب هوا اتنفس بقوووة واشهگ ثانيتين ما خلاني ورجع ينزلني بالمسبح لزمني من شعري وضرب راسي بحايط المسبح بقوة وبعد كلشي ما حسيت....

**

"جنات"

سبحت وكملت صلاتي ونمت شوية بصف عُلا تعبت من المسبح، حسيت على فراغ بصفي ماكو احد گمت مفزوعة ادورها وگلبي يدگ حيل خايفة الغرفة ظلمة وبس اني هنا..

ركضت على الضوة فتحته واطرافي ترجف گعدت على الچرباية حيلي انهد ثانيتين من الظلام والوحدة كفيلة توگف گلبي من الخوف..

سميت بأسم الله وغسلت وجهي لبست جبة وشال ونزلت جوه البيت فارغ والكل گاعد بحديقة البستان، تسحبت اروح لحقل الدواجن وللصخلات اموت على شي اسمه حيوانات واستمتع وارتاح من اگعد وياهن يمكن لانهن ميفهمن شي او يسمعوني بدون مقاطعة واني افضفض عن الي بداخلي؟

فتحت الباب على كيف وضحكت من شميت الريحة كلشي احب بيهن بس روايحهن لا تطاق، فتحت الضوه خفيف مو قوي وتقدمت اجر كرسي واگعد اتفرج عليهن وهنه نايمات حرامات ما لحگت عليهن راحت عليَّ نومة..

-جنات

فز گلبي قبل رجليه من سمعت صوته المألوف يجي من ورايه، انداريت بكل جسمي اشوفه واگف بالباب وقابض على اليدة..

-شلونچ يا بعدهن

-ليث شوكت اجيت

-هسة ما صار ثلاث دقايق

سد الباب وراه وتقرب مني وگف مقابيلي مباشرة وصفن عليَّ صفنة مطولة، نظراته حرگتني ما تحملت ونزلت عيوني ماگدر اواجهه..

-ليث: شلونچ

-مو زينة

-اذوچ؟

نفيت براسي لا وهو كمل بأسئلته المعتادة..

-ابوچ مد ايده عليچ؟

-لا

-عمامچ؟

-لا محد اذاني منهم

-اجيت لعرسچ شفتيني

درت ظهري بسرعة من نزلت دموعي مسحت وجهي بأصابع ترجف، بلعت ريگ ونطقت بنبرة حاولت ما اخلي صوتي يبين ديرجف بس فشلت..

-اطلع ليث ميصير نبقى وحدنا

-ليش؟

-ليث

-لانچ تزوجتي ابن عمي؟

-كافي

-لانه زنگين ومرتب وچبير وعايش بالخارج غراچ بكل هذا ورحتيله بسرعة؟

واجهته بنظراتي القوية اكثر شي اكرهه من يظن بيه سوء اتخبل من يسويها ودائماً يذكرني بنفس الشي من يگول..

-تره مو ذنبي احنه مو اغنياء مثلكم! ولا مثل ولد عمي جعفر! ابوية خسر كل فلوسه بصفقة خاسرة راهن بكل أملاكه على شي فاشل نفسه وما حصل شي! اخوانه باعو وخلوا حالنا بالضيم!

-ليث انتَ تعرف كلش زين ما افكر بالفلوس ومو يمهن اني مادري شنو عندي ماعندي من املاك لان ميهمني

-بس همچ من خليتي راس مالك بحضنچ بيوم العرس!!

انبلع صوتي ويه نترته خازرني وعيونه تجدح عصبية تقرب مني اكثر وكمل بنفس النترة..

-ماريده وماحبه وما يعجبني وراسه بحضنچ وتلعبين بلحيته وعينچ بعينه!! هاي تالية حبنا جناات خنتيني وطعنتيني بظهري ويه ابن عمي جعفر مالك الكلب!!

-شلون شفت الصور

-معلييچ شفتهن وبس!!

-شلون شفتهن واني بدون حجاب ليث!!

-رجلچ الديووث دزهم الي

-ما اصدگ

-هاا صرتي تچذبيني وتصدگي مو؟ طبعاً هذا حبيب الگلب جيبه ثگيل ووجهه حلو طبعاً تصدگي وتچذبيني

وره جملته طلع تلفونه وحطه بوجهي فاتح الشاشة على محادثة بينه وبين مالك، اخذت التلفون بسرعة اتأكد من صورة مالك الشخصية ورقمه صدگ هاي المحادثة حقيقية وصارت البارحة بـ 10:30 بالليل..

-ليث: خو شفتي بعينچ؟!! ماعنده ذرة غيرة وشررف ويحچي بيچ گدامي يدزلي صورچ مفرعة كاتبلي موت من قهرك اخذتهاا

گلبي ينبض بجنون انفاسي انقطعت ماعرفت شنو اگول وماعرف بيمن اصدگ! اصدگ بهاي المحادثة الي من تلفون مالك لو بغيرة مالك الشفتها عليَّ من اخوه! ميسمح لاخوه يحچي عني ولا حتى كلام بالشقى..

-مالك يغار اكو شي غلط بهاي المحادثة

-ههههههه شوف يا الله بعدها تدافعله! تعالي اشوفچ تعالي

فتح الانستا والماسنجر ودخل على المراسلات وطلعلي حساب مالك دخل على المراسلة وشوفني هم دازله الصور هناك وكاتبله "تيهتني عيونها ولسانها"

-ليث: هم گولي چذب

تصنمت بمكاني حيلي راح گعدت على الكرسي تايهة ودايخة ماعرف شسوي وشنو اگول وفجأة تذكرت شي.. تذكرت كلام مالك ويايه بيوم العرس..

-هو راح يطلگني گلي ديشتغل على الموضوع بس يحتاج وقت يعني ميريدني ولا اني اريده وراح ننفصل بأول فرصة

-چذاااب جنات هذا الانسان مخادع وچذاب وجاي يستغلچ!

-شنو فائدته؟؟ شنو راح يستفاد مني لا تگول حلوة لان اكو الاحلى واحلى مني وهو عايش بالخارج شايف وعايف وشابع علاقات شيسوي بيه!

-املاكچ حبيبتي هو طمع بأملاكچ

-ميحتاج املاك والله العظيم انتَ لو تشوف الماركات الي يلبسها والمجوهرات تصفنن مستحيل هذا انسان يدور فلوس!

-تره نص املاكچ راح تتسجل خاف اول ما تتطلگون

جحظت عيوني من السمعته ووگف شعر راسي من كمل..

-من شروط الطلاق عدهم هناك بالخارج تتوزع املاك المتزوجين بالتساوي وكلشي يصير نص بالنص، مالك اتفق ويه عمي جعفر يسحب كل املاكه اول ما يعقد عليچ ويرجعهن من تطلگون وبهالحالة انتِ الخسرانة الوحيدة

-منين جبت هذا الحچي؟؟؟

-مالك گال وحتى ابوه واقري المحادثة وشوفيها بعيونچ

ما گدرت اقره اصلاً ماعندي طاقة ولا نظري يساعد اشوف شي صادم اكثر، ارجف من فوگ ليجوه خوف وضياع من جهة املاكي كلها راحت ومن جهة ثانية ليث وموقفه ومن جهة اخيرة ايات! كلشيي ولا ايات تعرف بالصار..

-ايات تعرف بهذا الحچي؟؟

-ليث: اي دزيتلها كلشي البارحة خليها تشوف حقيقة الرجال الي انعحبت بي

-حررام عليك لييث لييش تأذيها هيييچ هي لليوم تگول اني متفقة وياه عليها! بس لا الصور هم دزيتهن؟؟

-كلشي دزيت خليها تعرف ولا تظل زعلانة على شي ميسوه

-ميهمنيي مشاعر ايات لمالك شلونها!! يهمني مشاعرها تجاهي هي اختيي وراح تشك بيه اكثر

-ما تشك لا تخافين هي تحبچ.. المهم مو هذا موضوعي عندي شي ثاني وياچ جناوي

-شنو هو

-لا تنفصلين من مالك حتى متخسرين شي ابقي متزوجته وكملي حياتچ وياه

-شنووو

-سمعيني للاخير من تطلگين راح تبقين وحيدة ومحد يهتملچ على الاقل استفادي منه ونامي براسه وطلبي منه تعيشين بالعراق وهو يروح ويجي عليچ هنا

بقيت ساكتة ومصعوقة هالحچي يطلع من ليث! شنو ابقى وحيدة شنو اخير شنو ابقي ويه مالك لعد حبنا وين راح؟؟ دموعنا والعركات والحروب الدخلناهة حتى نصير سوه شلون نسى كل هذا ويريدني ابقى متزوجة ابن عمه؟

-انتِ ابقي ببيت ابوچ وكل فترة اني اجيچ

-وين تجيني؟

-لا خلص انسي مو اني اجيچ انتِ تعالي لبيتنا تونسي ويه خواتي وغيري جو

-اي؟

-اي ونتشاوف كل يوم ونرجع مثل قبل

-ليش دتحچي وكأنك واثق مالك راح يوافق يعوفني هنا

-راح يوافق ومتأكد

-شلون

-لان هو ميريدچ راد فلوسچ وحصلهن وجمالچ وهم حصله راح يتونس بيچ ويشبع منچ ويشمرچ بأقرب فرصة

-وانتَ شتحصل اذا بقيت على ذمة مالك

-نتفق اتفاق نكون سوه شبيچ جناوي مثل قبل نحب بعض ونكون ويه بعض

-بس اني متزوجة وهاي خيانة

-جنات هو ديووث ميهتمم ولچ دزلي صورچ مصلخخة بس حتى يقهرني هذا رجال تعتمدين عليه وتخافين على مشاعره لا تخوني؟؟

-ميهمني هو اني اهتم بنفسي حرام ليث ميجوز هذا الشي واذا تگول احنه علاقتنا قبل وحبنا هم حرام بس على الاقل حبنا چان طاهر ما لزمت ايدي ولا تجاوزت حدودك ويايه

-جنات اني احبج معقولة راح ترفضين وتكسرين گلبي مرتين

-شنو تستفاد مني واني متزوجة بس فهمني هاي

-نكون سوه بدال ما تكونين ويه مالك صيري ويايه من يكون مسافر

-وين اصير وياك

-كلشي تسوي وياه سوي وياي اني راح اكون سعيد بقربچ مني وهذا كافي حتى لو ماتزوجنا

ما جاي افهم وجهة نظره ولا دا اوصل لتفكيره شنو معقولة اني غبية لهدرجة لو هو كلامه مبهم؟

-علاقتنا راح تطور وتصير احلى وونسة اكثر راح نكون سوه وانيمچ بحضني و...

شهگت وره كلامه غطيت حلگي بأيدي وفاتحة عيوني تقرب مني اكثر صار گبالي مباشرة ميفصلنا غير مسافة صغيرة كلش..

-اني استاهلچ واستحقچ اكثر منه اني صبرت سنين واحبچ من زمان

-تريدني انام يمك

-واذا؟ بيها شي؟ لا مابيها ولا زوجچ راح يهتم لان گتلچ ماعنده غيرة جنات اني بيوم عرسچ ما نمت الليل من القهر واني اعرف غيري وياچ..

يحچي ويتقرب عليَّ ظليت ارجع خطوة وهو يتقدم الى ان انضرب ظهري بالحايط ومد ايده على شالي..

-نزعي خيولي خليني اشوف شعرچ

ما لحگت انطق وجر الشال من راسي انفزعت وخفت هذا مو ليث الاعرفه هذا غير انسان، اخذت الشال منه ما قبل حط طرف الشال بين اسنانه والطرف الثاني لزمه بيده وشگه بالنص وشمره بعيد..

-جنات: انتَ تخبببلت شبيييك ليييث

-اشش شبيچ لا تصيحين ويجونا سكتي يمعودة

-وخرر عني ممنووع تلزمني مو عيب علييك مو قبل چنت تگول ما اطخچ طخخة الا تصيرين مررتي!!

-وما راح تصيرين محد يزوجنا خلينا نحب بعض هيچ احسن من ماكو حبيبتي

-حررام ولك حرررام

-حرام لو چان رجلچ رجال ويهتم بس هو عادي عنده

-هو عادي عنده اني مو عاادي عندي وخر عني لييث لعبت رووحي من تصرفاتك

-جناات انتِ بهاي تصرفاتچ جاي تثبتيلي صدگ تحبين مالك وتحبين لمسته اكثر منيي

-ولك وخرر شبيك متخبل؟؟ شلون صلفف ووكح والله لو عرفت العلوية تموتك

-العلوية تموت على مالك وراح تقبل بكلشيي يقبل بي وجاي اگلچ رجلچ قابل.. امشي جنات نصعد لوحدة من الغرف وحدنا امشي يروحي مشتاقلچ ورايدچ من كل گلبي احبچ اني ولچ احببچ وگلبيي محترگ عليچ

-انتظرني اتطلگ من مالك واخطبني والله گال راح ننفصل صدگنيي

-مااريدچ تتطلگين منه فهمي عااد امشي لا تخلين صوتنا يطلع امشي حبيبتي انتِ

-وين ماخذني ليث هد ايدي

يسحسل بيدي ياخذني وياه تملصت منه وجريت شالي المتمزق احطه على راسي اضم شعري واضرب على ظهره وعلى ايده المكسورة المجبرة لسه، اتعارك وياه واصيح بالخنسة ماريد احد يسمعنا لا يأذو ويكتلو هنا ويدفنو لا من شاف ولا من درى..

-ليث: جناات انتِ تحبيني لو لا؟!!

-احب ليث القديم الچان يحبني ويهتم بيه ويريد يتزوجني

-بعدني احبچ واهتم بيج بس ما يرهم زواجنا تخسرين حبيبتي گلبي وروحي انتِ ابقي متزوجة مالك وسحبي منه فلوس وعيشي براسه ورجعي املاكچ وتطلگي حتى يرجع حقچ منه ماقبل احد ياكل حقچ لا انتِ ولا اياات

-هد ايدي جاي توجعني لييث

-ما اهدچ الا نصعد فوگ راح نرجع مثل قبل واحسن ونحب بعض ونكون اقرب لو عجبچ مالك ومترديني بعد؟؟!

-اي ما تريدك

انتفضنا ثنينا على دخول شُهيب للحقل، واگف بكل برود يتفرج علينا ايد بجيب بنطرونه وايد لازم بيها جگارة ياخذ منها نفس.. تقدم علينا يمشي مترهي سحب دخان اكثر ولحدما وگف مقابيلنا ياله زفره بوجه ليث..

-ليث: شُهيب.. احنه چنه نحچي اني وجنات نحب بعض وانتو اخذتوها مني!

-شُهيب: ادري

-ليث: ما دامك تدريي لييش قبلت بهالشي ليش ما وگفت العرس!!

-شُهيب: ما عجبني

-ليث: حرام عليكم السويتو بينااا حرام!!

-شُهيب: تمام

-ليث: فرحان حضرتك بالحرام وانتو جبرتوها تتزوج اخوك؟!!

-شُهيب: الحرام علينا مو عليك نام وارتاح انتَ

-هه طبعااً تكيف على الحرام لانك نفس طينة اخووك ونفس الصلب النگسس لا عبالك ما كشفت سرركم عرفت انتو ولد زناا ثلاثتكم وجايين بالحررام من نسوان قذررة راقصاتت وبنات لييل وخايناات تكيفون على الحررام وتتونسون عليه!!

-شُهيب: شوف شلون سر عظيم هذا الي اكتشفته

-ومرتك نففس الشي نفسس الطينة هم بت لـ.....

ما كمل جملته واجتني دفعة من شُهيب طيرتني على الحايط يبعدني عن ليث، برمشة عين شُهيب صار وره ليث ولزم ايده ثنينهن من وره ولواهن ليوره يطبگهن على ظهره من قوة اللوية صوت تكسر عظامه وصلني..

صرخت بخووف مرعوبة ووگعت بالگاع ابچي واضم بوجهي من المنظر اريد انسى شلون عوج ايده ليوره وكسرهن ثنينهن بهالسهولة، تخبلت اكثر من صياح ليث الي رج الدنيا رررج يعيط بروح مفررفحة وشُهيب ما اكتفى بهالشي ضربه بركباته اسفل ظهره خلى ليث يوگع بالگاع ويختفي حسه يغيب عن الوعي..

اللتفت عليَّ يباوعلي بعيون ميتة خاوية باردة مابيهن رحمة ولا روح، جر الجگارة من بين شفايفه كل هذا صار وما نزلها من شفايفه وكأن السواه زلااطة ومتعود عليه ومكرره مئات والاف المرات..

-شُهيب: طلعي منا لا تبقين وحدچ

بچيت بچي عيوني طلعت وهو واگف ولا كأني منهارة منتظرني اطلع او اجاوبه بشي ما اهتميت لوجوده وبقيت على وضعي ارجف واباوع لـ ليث المغمي عليه..

الي رجعني للواقع هو صوت تسنيم من دخلت تبچي منعرف السبب شنو اجت تركض تهف وتدور بعيونها ما اهتمت لشي وما اهتمت لشنو موجود هنا لا باوعتلي ولا شافت شُهيب ولا شافت ليث الواگع بالگاع بقت تدور وتصرخ بـ...

-تسنيم: اغااااديييرر

تصيح بأسم اختها المتزوجة "اغادير" صوتها انبح وهي تعيط وتبچي وتلطم على وجهها.. انتبهت لملابسها اول مرة تسنيم تطلع بدون جبة او ملابس محتشمة.. لابسة دشداشة خفيفة شبه تراري وذابة شال على راسها ومخبوص حالها..

-اغااااادييييير ويننننچ عمتتتت عيننننييي

تضرب على وجهها وعيونها تملخ بروحها هرولت عليها اشوف شكو وشُهيب ما قبل امرني اطلع منا خصوصاً من دخلت ايات تدورني جرتني من ايدي وطلعتني وشُهيب بقى ويه تسنيم يفتهم منها شصاير بس فاقدة..

ما قبلت اروح صيحت عليَّ ايات تجر بيدي ما راضية على وگفتي هنا..

-روووحي وعوفيني اياات لازم اشوف تسنييم

عافتني وراحت تدردم وتغلط على نفسها، وگفت بباب الحقل اشوفهم هي تنوح وتدور حتى بين الخرفان والحلال طبت تدور لهدرجة ما حاسة على روحها وليث بالگاع ما رجع لوعيه وشُهيب يحچي وياهة يريدها تنتبه بس البنية بغير عالم..

شهقت جوه انفاسي من حسيت بشخص يسحب ايدي بقوة يسفطني على الحايط يبعدني عن بوابة الحقل، اصيح وميطلع صوتي ضام حلگي بأيده وملثم مغطي وجهه، جسمه خشن وجثل طويل روحي انسحبت من لزگ وجهه بوجهي وهمس...

-تردين تبقين عايشة صوتچ ما اسمعه بت الكلب!

شهگت اللقط نفس ماگدرت روحي فرفحت ضام خشمي وحلگي بقبضة ايده، عيونه على جهة الحقل ورغم وضعي المأساوي طخت ببالي وعرفته عداوة لو ويه ابوية لو عمي واجه ينتقم...

-شُهيببب شُهييببب اللحگ شُههههيبببب

هذا چان صوت كيان تصرخ وتبچي فحطانة صرخت بكتمة استنجد بيها بس متسمعني تركض بأتجاه الحقل، طلع شُهيب من الحقل يهرول ومبين جفل من شاف حالها لانه ما تحرك بعد ما سألها لان ما احتاج هالشي صوتها رج بالمكان وهي تصيح بصوت عالي مرعوب خايف منتهي..

-مسرررة غرررگت وماببيهااا نففففس شُههههيب اللحگ عليناااا البنية مااااااتت مسررررة ماااااااتت!!!

يتبع....

━━━━━━  ━━━━━━

بارت متأخررر ساعة بـ 2:40 am خنشوف منو گاعد 👀

انا غارقة في حب مسرة وشُهيب باي 🚶🏼‍♀️🔥🫶🏻

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

تفاصيل الاهتمام عظيمة، قد تغلب الحُب احياناً ♥️.

━━━━━━  ━━━━━━

"كيان"

گاعدة بالبستان ويه نشوان ومروان وفاضل واسمع لتذمرهم الواضح حتى فاضل يتذمر وما عاجبه الوضع خصوصاً من شاف ولد عم فاهد جايبين كحول ويشربون..

-فاضل: استغفر الله توقعت هذي الامور ممنوعة هنا

-نشوان: مسموحة بالبيوت اظن

-فاضل: هذا مرض شوكت الناس راضية تقتنع الكحول والمخدرات سَم وتدخله بجسدك الصاحي

-نشوان: بنفسي اجربه

-مروان: شنو تجرب ولك؟!!!

-نشوان: شبيك گبيت گلت بنفسي اجربه ما گلت راح اجربه

-فاضل: العياذ بالله نشوان لا تخلي هيچ اشياء بنفسك

-نشوان: يعني قصدك اجرب حتى ماخلي بنفسي؟

-مروان: نشوان راح اهفك بچلاق اطيرك

-نشوان: هذا شبي گاب عليَّ

-كيان: من وره حبيبة گلبه

-نشوان: هاي بعدكم؟ يله ميخالف مروان اني راح احاچيها

-مروان: امووتك والله

-فاضل: عوف الزلمة يغار لا تهيجه علينا

-مروان: ثوور واهيج عليكم؟!!

-فاضل، نشوان: انگس

-كيان: اوگف اوگف لا تتوحش انتَ اخذت علاجك لو بعد؟ حتى نعرف شلون نحاچيك

-نشوان: اخذه شفته بعيني انتِ بأمان

-مروان: شباب عندي سؤال وجاوبوني بصراحة تامة

-نشوان: لا اعذرنا ما نگدر نجاوب بصراحة

-مروان: ليش ولك

-نشوان: نخاف وعلي

-مروان: لا لحد يخاف

-فاضل: رحم الله والديك طمنتنا

-مروان: اني بيه شي؟ بيه مشكلة؟ شكلي ملابسي جسمي بيهن شي؟ صارحوني خليني اعرف شنو مشكلتي بالضبطط

-فاضل: مروان انتَ مثل الورد كلشي مابيك بس عصبيتك عامة عليك عزيزم ضروري تعالجها واللتزم بعلاجك و...

-مروان: علاجي يطول شهوور او سنين راح ياخذ وقت طويل وخايف ترفضني بس والله جاي احاول اتغير شلون اقنعها جاي احاول

-فاضل: انطيها وقت تفكر

-مروان: باع هذا ولك الكللللب خطبببهاااا

-كيان: صوتك يمعود انفضحنا هسة واذا انخطبت تره ما وافقت بعد

-مروان: واني انتظرها توافق؟؟؟

-نشوان: حبيبي روحلها واللزگها ببوسة وگلها احببببچ

-فاضل: اعووذ بالله من افكارك نشوان عيب هاي التصرفات هذا تجاوز وتحرش

-مروان: رايح اسويها

-نشوان: للللك ايييي

-كيان: عزززا عزززاا

-فاضل: مروان اخي اتقِ الله وانتَ الثاني اگعد راحة لا تنحشه على المنكر استحي من اختك الگاعدة

-كيان: ميستحون ثنينهم شوشو من يوم يومه ارعن وماعنده ستوب بس انتَ مروان شجاك متخبل

-مروان: انچبوووووو

-فاضل: حاضر

-نشوان: تأمر امر

-كيان: على راسي

-مروان: لو تحسوون بالنار الي بگلبيي ما تظلون تلغون هاللغوة الزاايدة ولكمم گلبي مشتععل شعععل الله يشعلك فاااضل

-فاضل: اني شعليه تشعل بيه اشعل بأخوك

-نشوان: مو انتَ يعرف بيك ما راح تنشعل محصن من النار ما شاء الله عليك

-فاضل: طفي عينك طفييهاا

-كيان: اهوووو اني صوچي گاعدة وياكم

-فاضل: صحيح روحي لـ بعلچ شفته يدور عليچ

-كيان: ليش يدور عليَّ شمصخم من مصيبة بعدد

-نشوان: بس لو افتهم اشفتي منه ارتاح

-كيان: رجعنا نشوان؟؟

-مروان: كلامه صحيح اشفتي منه

-فاضل: ماريد استغيبه بس فعلاً كيان مو ذوقچ فاهد عجيب شلون تزوجتو

-نشوان: وانتَ شمعرفك بذوقها

-فاضل: يمكن لاني اعرفها من عمرها 11 سنة لليوم!

-مروان: وحافظ عمرها بيوم التعرفت عليها؟!

-كيان: اهوو اني گايمة

-فاضل: گومي گومي ذولة اخوانچ يردون الزلة حتى يعكرون مزاجنا

-نشوان: وليش تجمعها وياك وتگول "مزاجنا" متستحي انتَ تعال فاهد تعال اللبس گرونك الگوچي

صفننا اربعتنا من فاهد دار وجهه يباوعلنا يااا هذا شلون سمع صوت نشوان ناصي وما تقصد يصيحله فعلاً يبوو يبووو ديجي بأتجاهي يبووو..

-نشوان: شنوو عرفت عبر الأقمار الصناعية جاي نحچي بيك

-فاهد: مشكل رادار اني شحچيتو عليَّ؟

-نشوان: گلنه حلوة گرونك الگوچي

-فاهد: وللچ هاي شبسرعة وصلتيلهم محادثتنا!

-كيان: احچي كلشي لاخواني حتى يطيحون حظك من تزعلني مو عبالك محد يگدرلك يالمسودن

ضحكت منّ حچيتها بس يمكن چفصت لان نشوان، مروان، فاضل صفنوا عليَّ صفنة مرتبة وفاهد خزرني بحدة بعيونه الصفر التخوف..

-كيان: ههه ههه اقصد يعني من يداهرني شبيكم

-مروان: فاهد انتَ تزعل كيان؟؟!!!

-فاضل: مروان اختك وضحت فكرتها ماكو داعي للمشاكل

-نشوان: والله امووتك لو نزلت دممعة من عيون اختي ولللك فاهد

-فاهد: خوش خوش

اشرلي اگوم طفرت بسرعة خفت تگب عركة واستغربت من فاهد ما اهتم لكلام اخواني ولا ردهم مثل العادة.. رحتله ومن لا وعي كمشت بأيده اجره ويايه نبتعد وگفنه على جهة مننشاف بسهولة وهمست بخفوت..

-باوع فهيد عندي سالفة وياك

-عوفچ من السالفة شكو لازمة ايدي وتجرجريني من الچلب

انتبهت لروحي وهديت ايده، ورجع قاطعني من ردت احچي وتخصر يرفع تك حاجب..

-فاهد: اخر مرة تتجاوزين عليَّ گدام احد كيان!

-نسيت

-اني متغاضي عن اللفاضچ وياي لان اعرف ما طايقتني ولا اني طايقچ وشعورنا متبادل بس گدام الناس تحترميني غصباً عليچ

-خوش خوش بس انتَ هم تحترمني!

-ليش شوكت متجاوز عليچ گدام احد؟!

-اي المهم نرجع لسالفتنا

-شتردين

-فاهد ماعندي غيرك احچيله ويگدر يساعدني بالموضوع

-شبيچ احچي

-نسوان عمامك جاي يأذن ماريا ويجبرنها تشتغل شغلهن هاي من غير الغلط والمسبات عليها واتوقع وحدة منهن عاضتها بأيدها لان اكو اثر مال اسنان ومن اسأل ماريا تخاف ومتقبل تجاوبني

-صدگ تحچين؟؟ النعال وينه عنهاا!

-قصدك شُهيب؟

-ها يعني تدرين بي نعال

-امشي لك ماكو نعالة غير امك

-انلصمي وكملي على ماريا

-اي ولك المهم فـ هي متقبل احچي لـ شُهيب واني حرت المن اگول مالك مو هنا واحچيله و...

-هم گالت مالك! انتِ شنو سالفتچ كل كلمة والثانية وگلتي مالك ومالك!!

-مو وكت غيرتك فاهد بس لان مالك چبيركم اللجأله

-عوفي بحاله ما ناقص مشاكل هو حاير بسوالف ابوية انوب يحير بسوالفكم تعاليلي من عندچ مشكلة

-يعني راح تحل مشكلة ماريا؟

-اي اني الهن هالب**** يردن واحد يشگهن نصين بنات ال****

-ايييع شنو هالفشار انتَ شبيييك

-حميت زايد ولي عن وجهي

عفس وجهي بين ايده الضخمة ضربتها اوخرها ورجع يعيد الحركة واضرب بأيده ويرد يسويها ويضحك متونس على ضوجتي..

-فااااهد وخرر شبيييك

-حلوة خدودچ ترفة هههههههه

يجعص بيه مرد وجهي جريت ايده اعضها وزاد بالضحك عرفت يحب العض خرب روحه مطفي عنده الاحساس..

-لحگووو عليناااااا

وخرت ايد فاهد عني وهرولنا على صوت مساعدة العلوية مفجوعة تلهث وتحچي..

-المساعدة: لحگووو علينااا اكوو جثة بالمسبببح

طفر الكل من مكانه وصار واحد يباوع بوجه الثاني ندور بالوجوه مفزوعين منو الناقص بيناتنا.. ثواني واستردينا وعينا ركض فاهد اول واحد واني وراه وبقية الولد والبنات والعمام والعلوية تركض بعوچيتها وتصيح يارب سترك..

وصلنا المسبح وشفت فعلاً جثة بنية شعرها اسود طويل متناثر بالمي، گلبي نبض بخوف وعيوني تدور على مسرة وجنات وباقي البنات.. گمز فاهد بالمي وگلب الجثة على ظهرها بيّن وجهها وچان توضحلنا هاي..

-كيان: مسرررررررة

-العلوية: صخااام بعينيي صووواب فگررري خايبات يبوووووو

-غياث: شنو صااار

-قصي: ولللك طلعهااا

-شمسون: فاااهد جرها فاااهد

-مروان: اتصلووا بدكتور بسرررعة

شالها فاهد على چتفها يطلعها من المسبح وحطها بالگاع على ظهرها، شفايفها زررگ صايرة ووجهها باهت نزل يشوف نفسها وگال محتار..

-مابيها نفس معناها صارلها فترة جوه الماي

صرخت ميتة خوف ماعرف شسوي ووين اروح لزمني نشوان يسيطر على حركتي صرت اروح واجي مثل المخبلة ادور شُهيب بينهم ويينه شُهيب؟؟

فلتت نفسي منه اركض واصيح مثل المخابيل اول مكان اجه على بالي اروحله حقل الدواجن بلكت اللگاه هناك لان شفته يروح وره جنات قبل شوية..

-كيان: شُهييييبب شُهيببببببب اللحگ شُهيبببب

طلع من الحقل جافل على صوت صياحي وگف بمكانه يتسائل بالنظرات روحي احسها جاي تطلع الرجفة لزمتني والغصة ذبحتني..

-مسرررة غرررگت وماببيهااا نففففس شُههههيب اللحگ عليناااا البنية مااااااتت مسررررة ماااااااتت!

فتح عيونه مصدوم بس ما طولت صدمته ربع ثانية و ركض بأقصى ماعنده من سرعة لجهة المسبح واني وراه، وصلنا خلال ثواني لگيناهة على وضعها وفاهد يسويلها اسعافات الاولية يضغط على صدرها وينزل يشوف تنفسها يهز براسه مأيس ورجع يعيد بحركة الانعاش القلبي..

ركض شُهيب ودفع فاهد عنها بدون لا ينطق شي، شابك ايده بين بعض وصار يسويلها تمارين الضغط على الصدر بقوووة گلبي گام يوجعني من قوة الضغط والموقف وخوف الكل وبچي ماريا وحرگة گلب العلوية وحيرة نشوان وفاضل ومروان وتعجبهم من الصار..

-فاضل: يا اباا الفضل دخيلك

-نشوان: يا رب يااا رب

-العلوية: دخيلچ يالزهرة لا تفجعينا

اسمعهم وابچي وشُهيب مستمر على هذا الحال لدقيقة ضبط قبل لا تجي صبا من جوه خايفة وشعرها مفتوح، لابسة دشداشة وتلبس بالروب فوگاهة مبين چانت نايمة وگعدوها على هالخبر..

-صبا: شبيهاااا مسررررة شبييييهاااا

وگعت على ركباتها بصف مسرة تصيح وتصحي بيها تخضها وتبچي بعياط، رحت اوخرها عنها دتعيق حركة شُهيب بس رغم هذا ما وخرها خلاني اني اجرها ونگعد بصفهم..

شُهيب لزم راس مسرة من وره ورفعه بخفة ونصى يسويلها قبلة الحياة، ثانيتين ويرفع نفسه منها ويعيدها استمر على هالحال بالخمس مرات وهي ماكو نفس منها..

-شُهيب: يللة مسرة يلة بنيتيي

بدينا نفقد الامل برجعتها وزاد البكاء بالمكان والهرج والمرج وشُهيب ما احچي عن حاله وخوفه ورجفته وجهه صار اصفر منهار بس ما فقد توازنه واستمر بالاسعافات الاولية..

-شمسون: ماتت بابا خلص خسفت صدرها

-العلوية: عمت عيني اشافت من حياتها

-نشوان: خلوونا ناخذذهاا مستشفففى

-قصي: اتصلت بالاسعاف جايين بالطريق

-خالد: شُهيب خلص عوفها لا ينكسر قفصها الصدري البنية ماتت!!

-شُهيب: ما ماتت لااااا معليكمممم انتوووو

غطيت وجهي انحب وابچي وصبا حاضنتني ووضعها اتعس مني، حالتنا يرثى لها والعجز الي حسينا بي ما اتمناه لعدوي دقايق استمرينا بنفس الوضع والوجع يدب بضلوعنا قبل لا ينزل شُهيب لآخر مرة يطبق قبلة الحياة بأنفاس لاهثة وشعر مخربط وچان تطلع شهگة عالية من مسرة مع خروج ماي كوومة من حلگها..

-فاضل: اللهم صل على محممممددد وال ممحمممدددد الحمد لله يا رب الحمممد لله والشكررر

-فيروز: الحمدلله ياربي الف شكر وحمد

-العلوية: كلللللوووششش صلووو على محمددد صلووو على محمددد خايبين ما تصلووون وجعععع

الكل صلى على محمد والضحكة والحيوية رجعت للوجوه جميعاً بس مسرة وضعها بالضيم استمرت تذب مي من حلگها وشُهيب يمسح على ظهرها ويبوس براسها ويهمس "الحمدلله"..

-مسرة: اشهب

طلع صوتها ناصي ضعيف تعبان، ضحك الكل من خربطت بأسمه البعض ما فهم شنو گالت بس هم شاركونا ضحكة الفرح من شافوها بخير..

-شُهيب: عيوني

جرها يبوسها براسها متناسي وجود الكل ودگ جبينه بجيبنها يتنفس سريع وبقوة، ابتعدنا منهم وصبا گعدت على دچة المسبح وحدها تبچي بأنهيار..

رحت احضنها وامسح على ظهرها عيون مروان عليها يريد يتقدم وخايف تصده بس ما تحمل بعد من شاف قصي يتقدم عليها سبقه وهرول يگعد بصفها يهديها ويگللها كلشي بخير..

اشرلي مروان بعيونه على جسم صبا ما افتهمت شيريد خزرني وكرر الحركة بعدتها مني باوعتلها وانتبهت لدشداشتها نازلة ومبين جزأها العلوي.. جريت دشداشتها ومروان دار عيونه بخجل ومد ايده ينزل دشداشتها يغطي رجليها الطالعة..

-صبا: چان ماااتت هاي الغبية چااان راحت من ايددي

-مروان: بس هي بخير صبا لا تبچين ماتحمل اشوفچ بهذا الحال

ابتسمت على كلماته العفوية الطلعت من حلگه ممحسبلهن حساب ولا مرتبهن ورغم الظروف الصعبة هنا مروان الصنم گدر يكوّن جمل لطيفة ويخفف من انهيار صبا..

-مروان: مسرة بخير لا تخافين هي قوية وشُهيب وياهة ما راح يعوفها اهم شي انتِ لا تزعلين حبيبتي

كبرت ابتسامتي على "حبيبتي" وصبا چنها ما انتبهت بقت بس تهز براسها اي وتمسح بدموعها، الاغلبية طلعو تاركين مسرة وشُهيب وحدهم ومروان هم راح وبقينا وحدنا بس اني وصبا وفاهد ولاول مرة اشوف فاهد قلقان على احد غير مالك..

رجعت اني وصبا قريب من مسرة نتطمن عليها، ساكتة متحچي شي بس مغمضة عيونها وتنفسها سريع وكأنها چانت تركض لأميال بدون استراحة.. بعد دقايق فتحت عيونها تباوع لـ شُهيب وتهمس بخفوت..

-مسرة: اني ميتة وانتَ صرت زوجي بالجنة مو؟

-صبا بدموع: ضامنة الجنة بعد عيني

گمنه نوگف على جهة بس لسه نشوفهم ونسمع محادثتهم، باوعت لفاهد عيونه عليهم ومتململ بمكانه شگد چذاب متأكدة ديرگص بگلبه من الفرح لان مسرة بخير بس لازم يبين روحه ضايج ماطول الامر متعلق بـ شُهيب..

-شُهيب: شلون غرگتي مسرة چان رحتي من بين ايدينا

گحت مختنگة وخرها عنه يطبطب على ظهرها بخفة، جرت نفس عميق وسندت راسها على كتفه تعبانة وتتنفس سريع..

-مسرة: ما اموت لا تخاف

-شُهيب: شنو صار شلون غرگتي؟؟

-بعدين ماگدر اسولف هسة

عدل گعدته شُهيب حطها بين رجليه وحضنها يحاوطها بأيده الثنين، استحيت من وگفتنا هنا اشرت لـ صبا نطلع وتركناهم وحدهم وفاهد هم اجه ويانه..

**

"مسرة"

صدري مقبط بالمي گوة احچي احس الكلمة تطلع من گلبي وتحرگ بلاعيمي ياله اگدر انطقها، شددت على قميص شُهيب اسند راسي على صدره الدافي واحس بأيده تمسح على ظهري بحنية.. ابتسمت ورفعت راسي اباوعله وجهه اصفر عرگان وباهت مبين ميت خوف عليَّ..

-مسرة: شهوبي اوبي اوبي

نزل راسه الي واشر بمعنى شنو كبرت ابتسامتي على ملامحه القلقة من گدما مختلس ميگدر حتى يبتسم..

-مسرة: حمرتي موجودة لو راحت؟

-شنو

-حمرتي راحت بالمي مو؟

-لا انتِ مستحيلة

-هاي شبيك غير اتأكد من جمالي راح اكون محط انظار الجميع من نفوت

-عوفي الجميع مسرة انتِ غرگتي معقولة ما مهتمة للموضوع؟

غمضت عيوني ورجعت اسند راسي على صدره ما احب ابين ضعفي گدام احد يمكن بسبب ابوية وتوصياته من چنت صغيرة لحد هذا عمري ينبهني ما ابيّن ضعفي لبشر ولا اكسب تعاطف احد حتى محد يستغلني ويشوفني ضعيفة..

-مسرة: اني زينة ثانياً نسيت؟ اني اگدر اتنفس جوه المي

-ما نسيت

-وانتَ لو غرگان وياي چان صرنا مثل تايتنك وعشنا احداث مثيرة

تحرك صدره بضحكة خفيفة اخيراً گدرت اضحكه، نهضت نفسي شوية وحطيت ايدي على خده نويت احچيله الي بداخلي بدون خجل كافي كل يوم دا اأجل وهو هم صفن بعيوني متحضر لشنو راح اگول، مسحت على لحيته على كيف وهمست..

-jack come back

وهنا سقط قناع شُهيب الخايف واستبدل بقناع شُهيب الفاطس ضحك، ضحك ضحكة من علوها اتوقع الجوه سمعوها ابتسمت على ضحكته اي نعم جانب التفاهة مالتي چان لازم اطلعه واتذكر فلم تايتانك من غرگت السفينة وروز گالت "come back"..

-شُهيب: ااااااخ يابة بأتعس حالاتها وما تبطل من استهزائها

-شُهيب لا تصير ممل حلو الحماس بالحياة هسة واذا غرگت اصلاً تونست فاتتك خوش مغامرة عشتها

-حرامات صدگ فاتتني

-يله على الجايات نحاول نكررها

-نكررها ببحر مو هنا المكان صغير ماگدر اغرگ

-تدلل يجي يوم ونسافر ونروح لبحر ونطبش سوه وتشيلني على چتافك

-نطبش فهمتها بس ليش اشيلچ على چتافي؟

-شمدريني اجت ببالي وگلت لازم اگولها

-ماطولها اجت ببالچ لازم نسويها تم

-اووي شُهيـ....

غصيت بنص الجملة اگح بقوة تعبانة كللش تعبانة وروحي مخنوگة تعبت من تمثيل وضعي زين سنحت على شُهيب اذب كل ثگلي عليه حس بيه وبحركة مفاجأة منه رفعني يشيلني بكل سهولة..

سندت راسي على كتفه وحاوطت رگبته بيدي، ماگدرت ما ابتسم على جملته الهمسها بين وبينه بنبرة متلاعبة..

-ما تخيلتچ لهدرجة خفيفة مسرات

-يعني تخيلت تشيلني؟

-اكيد

گرصت كتفه بخفة ضحك ومشى بيه يدخلني جوه واستوقفته..

-اوگف لحظة

-ها

-دقيقة انتظرني

تلمست جيب البنطرون مالتي فرحت من لگيتها بعدها موجودة، طلعت الحمرة من جيبي وفتحتها احط على شفايفي..

-حاطة قلم حمرة بجيبچ!

-اممم

-هاي ليش؟

-للطوارئ.. شوفها شلونها عدلة؟

-لا مو عدلة

-يا شعجب ابد ما ارسمها ملغمطة اني بله طلعلي تلفونك اشوف

-ما جايبه

-يله عادي ما احتاجه ادري بيها عدلة

-لا مو عدلة ومخربة شكلچ

-مستحيل مو لهدرجة

-مسرة ممكن تمسحين الحمرة

-ليش

-مسحيها لخاطري

-يعني عدلة وتچذب عليَّ

-مسرة

-هموسي حباب

-هسة راح يجي الدكتور يشوفچ ويتأكد من سلامتچ منريد احد يحچي عليچ ويزعجچ

-انتَ تعرفني ما اهتم اذا احد يحچي عليَّ

-بس اني اهتم وما اقبل عليچ

-عود دافعلي

-حطيها بالغرفة حبابة هسة راح نشوف الباقين والانظار كلها راح تصير عليچ و...

هزيت براسي اي بدون لا اخلي يكمل ويبرر، وصلت الفكرة وادري ومتأكدة هاي حجة بس حتى امسح الحمرة لانه "يغار" بديت افهمه اخيراً لون الحمرة ماروني طوخ ويرسم الشفايف رسم..

-ماعندي كلينس شلون امسحها

-مسحيها بقميصي

ضحكت بگلبي من كل عقله يحچي يريدني امسحها بقميصه الاسود، فتح اول ثلاث دگم منه وقدملي ياخة قميصه وابتسامة حلوة مرسومة على وجهه..

-لا تغسل القميص شهوبي هذا ضمه للذكرى

-صار

جريت الياخة ومسحت شفايفي بي وهو يراقبني ومركز بيه، اشرلي على طرف شفتي امسحها عدل سويت مثل ميريد وهز براسه راضي..

-شكراً مسرة

-العفو بس بعد لا تعيدها لا امسح الحمرة بخدودك واخزيك گدام الكل

تمشى بيه يدخلني جوه استقبلونا الكل يتحمدولي على السلامة وعيون هنادي ونور تفرفر والوجوه صفرة ميتات خوف و حرگة الحقيرات من شافو شُهيب شايلني ظلت هنادي تتحرگن وتهمس لنور شي ما اهتميت لاحد وهمست لـ شُهيب يصعدني للغرفة..

اخذني فوگ ونزلني بباب الحمام حتى اسبح بس ماگدرت طاقتي نافذة اريد بس انام..

-راح يجي الدكتور بس لان مكاننا بعيد ينرادله وقت علما يوصل

-لا ممحتاجة دكتور اريد ابدل وانام

مشاني للسرير خفت انگعه بس خلاني اگعد وگال لا تشيلين هم، جابلي ملابس من الجنطة وطلع حتى ابدل، شوية واندگت عليَّ الباب گالو اجه الدكتور كملت تبديل بسرعة وسمحتلهم بالدخول..

دخلو شُهيب وصبا وياه سألني الدكتور كم سؤال وفحص نبضي وتنفسي كتبلي علاج وطلع وصبا اشرتلي راح تطلع وراه عود تعوفني براحتي ويه شُهيب اويلي منها وگفت بالباب غمزتلي وتأشر بيدها بطريقة "عود خلي يبوسچ"..

-شُهيب: محترة، بردانة؟

-مسرة: بردانة شوية

گام يجيبلي غطوة اضافية يدثرني الجو مو بارد بس رعشة بجسمي من الصار، راح لجنطتي يدور على شي ورجعلي بيده زوج جواريبي الوردي، انكتم نَفسي من طلع رجليه من جوه الغطا ولبسني الجواريب ورجع يغطيني..

حاولت قدر المستطاع ما ابين روحي مستغربة من تصرفه وفرحانة بنفس الوقت، ما تخيلت راح يجي احد بعد وفاة امي يلبسني شي او يهتم بيه واني مريضة بهالطريقة غير مارلي مساعدتنا..

-تدفي زين رايح اجيبلچ شي دافي تشربي

جريت ايده قبل لا يگوم نزل عيونه على ايدي ورفعهن لعيوني..

-مسرة: شُهيب لا

-شنو

-لا تروح ممحتاجة شي

-بلاعيمچ طبگت من الماي چاي دافي راح يريحهن ما اتأخر راجع

گام قبل لا اعترض تمنيته يبقى يمي وصارت عندي مشاعر قوية احس راح ابچي من الحنية اريد احضن احد وابچي على كتفه، طلع شُهيب ودخلت صبا بداله والله جابها اشرتلها بيدي اجت بسرعة تحضنني وصرت انحب وابچي..

-صبا: سودة عليَّ حبيبتي لا تبچين عمت عين هنادي

-مسرة: امين امين صباوي احبچ

-يا بعد اختچ انتِ

-اريد ابچي بعد تحمليني

-ابچي ابچي لو اجيبلچ شُهيب تبچين بحضنه احسن

-انچبي لا

-ليش ولچ يشئ شئ

-ادري بس استحي منه

-مسرة تستحين؟؟؟

وخرتني عنها مصدومة ضحكت بين دموعي على صدمتها وجحظة عيونها، اخذت كلينس امسح عيوني وهزيت براسي اي..

-والقران استحي منه

-هاي شنو صايرة دايرة مسرة تستحي من احد

-حرام عليچ اشايفتني

-وحدة متخاف ولا تخجل من احد انتِ جريئة هي گوة

-اي بس هموستي غير

-هو مال غير فـ اي والله غير رجل استثنائي

-ترحيله فدوة

-هنادي تروحله فدوة اني شكو تفدين بيه

-والله اي

-تدرين امي نايمة ما گعدتها لو تفتهم الا تصخمني وتعزيني مسرة سولفيلي شصار شلون غرگتي

-مسرة: هنادي ونور دفعوني بالمسبح وحسيت رجال يغرگني لان جسمه چان ثگيل كلش وضخم

-صدگ تحچين؟؟؟؟

-اي والله

-حچيتي لـ شُهيب؟!!

-ما گتله بعد اصلاً هو لسه مصدوم واني اريد اخذ حقي منهن واطيح حظهن

-خلي هو يتصرف مسرة لا توصخين ايدچ بيهن

-ممحتاجة رجال يدافعلي بكل مرة ويمشي اموري الخاصة خليني اربيهن بطريقتي واشفي گلبي بيهن

-احس لازم تحچيله

-احچيله اكيد اول ميرجع ما راح اسكت

ثواني وسمعنا العيطة تگب جوه سكتت اني وصبا صافنات على بعض واصوات الصياح رجت البيت صوت صراخ زلم واكثر من صوت تداخل ويه بعض..

-صبا: هاي شكوو شنو سبب هالصياح

-مسرة: ولچ هذا صوت شُهيب وياهم لو يتهيألي؟؟

حركت راسها بطريقة ماعرف وگمزت من الفراش تشوف، بقيت بمكاني رجليه متساعدني اگوم بعدها ترجف انتظرت صبا ترجعلي بس طولت والف فكرة اجت ببالي، گمت على كيفي اسند روحي على تاج الچرباية للحايط وامشي على كيف لحدما وصلت للدرج اگدر اشوفهم منا..

الصالة گايمة ما گاعدة البنات ماكو غير كيان واگفة بصف فاهد وعُلا وعمام شُهيب وابوه يتصايحون وياه وگابين خصوصاً عمه هذا الي يصبغ شعره بـ حنة العلوية چنه راس برتقالة..

-البنييية طالعة لحقل الدواااجن بتوااالي الليل وانتَ وياااهة گاضيهااا بالختلااات لييييش مو احننننه مأمنين على بناااتنا يمكممم هيچ تخووون الثقققة شُهيبببب

-شُهيب: انتَ شيخصك اني ومرت اخوية وهو مأمنها يمي وگدام مرتي انتَ شنو بعد؟

-شمسون: منو مرت اخوك بابا انتَ عليمن تحچي

-صاحب: جاي نحچي على تسنيم شُهيب!!

-شُهيب: تسنيم شبيها؟

رجع راس البرتقالة يحچي مفرفح..

-تسنيييم الچانت خطيببتك وغيرت بآخر لحظة ما تريددهاا وره ما لعبت بيهااا وشبعت نفسك منهااا عفتهااا مكسورة ورجعتها على گلوبنااا

شهگ الكل ومن ضمنهم اني رجليه ترعش ماگدرت ابقى واگفة گعدت على باية الدرج واباوعلهم ناس تتصايح وناس تتحلف وناس تتوعد وتهدد وتسنيم واگفة بزاوية الصالة تبچي وخدودها بيهن اثر ضرب وشفتها طاگة دم..

-اكتلهااا وما ارجعهااا لبيتي مكسورة مرة ثااانية جعفففر علم ابنك الادب والاخلاااق علمه احنه مو اجااانب تنكسر بناتنا ونتقبل الوضع بروح رياضييية احنه زلممم العررراق اذا هو متقبل ومتطبععع بالاجانب احنه مو مثللله احنه عدنااا شرررف

-شُهيب: احترم نفسك ماريد اهينك وأتجاوز عليك گدام الكل!! تبقى عمي ومحترگ گلبك على بنت اخوك الربيتها واني لوما شرف وسمعة البنية ما ابررلك ولا ابرر لواحد هنا ما شايلكم من گااعكم وما تهموني بشي!!

-العلوية: يمة صلو على محمد وفهمونا على كيفكم حبوبا شُهيب على كيفك سولف لا تعصب

-شُهيب: شسولف؟ بيمن اسولف؟ وليش اعصب اصلاً؟ جاي يتهمونا اتهامات باطلة اني لا لامس تسنيم ولا حاچي ويه تسنيم ولا شايفها البنية بمكان واني بمكان وحتى من سافرت ويانه اني سلام ما سلمت عليها ابوية واخواني شهود وهي هم خليها تجي تحچي!

-تسنيم ببكاء: وروحه لابوية ماعرفه وماعندي شي وياه والله العظيم ما صارت محادثة بيناتنا اني طلعت للحقل خايفة لان گلولي رجل اختچ اغادير ذبح اختچ وذبها بالحقل تنزف وحدها لحدما تموت ورحت مثل المخبلة ادور اختي وادور بلكت بيها نفس واسـ.....

ما خلوها تكمل كلامها ولطمها راس البرتقالة على حلگها بگفه ايده المتروس محابس النذذل خلاها تصرخ من الوجع وتنزف شفايفها دم من جديد..

-انچبييي لچ صااايعة ما تمشيي علينا هالسواالف اغادير هاي گدامچ قزرقطط مابيهاا لو ألفتو قصة حتى تغطون على عمايلكم وترحين تلتقين ويه ابن جعفر بالختلاات

-شُهيب: لهناااا وبسسس راح تسدد حلگك وتحترم نفسسسك وتحترم شيبااتك لا تخلينييي اهينننك هنا واسويييك مداس للصغيرر والچبييير

-شوووفه جعفر شوووف هاي تربيتك ولك بت اخوووك انلعب بشرفها وواگف تتفرررج

-شمسون: شتريد عماد؟

-عماد: يتزوجهاا ويستر عليهاا

كممت فمي مصعوقة من طلبه ومن الموقف ومن صفنة الكل وهدوئهم المفاجئ حتى تسنيم صفنت باهتة ملامحها ممتوقعة هالشي..

-شُهيب: لو تموت نجوم السماا اقربللك انتو كل يوم مسويلنا سالفة جديدة وضحيتهاا بناتكم والمتورطين ولدكمم كاافي كبروو كاافي تفشلوون

-جعفر: بابا شُهيب اهدأ لا تتنرفز ابني

-عماد: اييي علمه الهدوء شوف شُهيب ما عقدت على تسنيم هسسة وبهاااي اللحظة اذبحهاا وادفنها بحديقة البستاان وخليني اشوف واحد يفك حلگه ويحچييي

-شُهيب: على أي اساااس تذبحها؟؟؟ هي شسوووت؟؟؟

-عماد: حقيي هذا اغسل عاااري اني عمها الربيتهاا وتعبت عليهاا تاليها طلعت تتختل وتسوي سوالفها ويه الزلم واولهم ابن عمهااا

ضجة وصراخ وهوسة ام تسنيم ملخت روحها تملخ صوتها طالع من وحدة من الغرف حابسيها هناك، العلوية علگ سكرها وتخربطت حارو بيها وعماد مُصر شُهيب يتزوج تسنيم لو تنذبح لدرجة راح جاب سلاحه من الغرفة وسحب اقسام يوجهه عليها ويگول..

-نطقي الشهادتين

-تسنيم: لااا عمووو دخيلللك لاااا اني ما مسوية شييي والله اني شررريفة وروووح ابوية شرررريفة

-عماد: هسة تحلفين براس ابوج؟؟؟ تزوجت امممچ حتى استر عليهااا وعليچ وره ما مااات اخوية وسوتلي ذذيچ الهوووسة وتستشرف براسي الا تخلص العدة ياله اعقد عليها ربيتچ وتعبت عليچ وما فرقتچ عن اغادير وخواتج الباقييااات هيچ تجازيني تسنيم؟؟؟ نطقييي الشهادتييين يلاااااا

-تسنيم: ما مسووووية شييي والله ما مسووووية

-عماد: واااااحد.. ثنيييييين.....

-تسنيم: اشهد ان لا اله الا الله واشهد ان محمد رسول الله

بلحظة، برمشة عين، بجرة نفس وحدة رمى عليها ولولا دفعة شُهيب وتدخل قصي ابن عمهم چان صارت بيها الطلقة تخبببل عماد بالزايد وسحب اقسام من جديد يريد يرمي شُهيب وقصي وتسنيم سوه..

-جعفر: عماااد عوف البنية راح يعقد عليها شُهيب

-شُهيب: ما اعقققد على احد وهاي سوالفكم ما تمشي عليَّ تمام؟؟

-جعفر: يا سوالف بابا تريد البنية تموت؟؟ مو هاي بنت عمة حرام عليك!!

-عماد: شُهيب ما تعقد عليها اكتلهااا گدامك لو ورااك ما اربي عارات وبنات لييل انيي

-العلوية: كاااافي الله يشييلك يا ابن سولاف كاااافي وخر غااد لا تخليني اللعب العصااا على جسمك المسلوووع

-عماد: علوية انتِ امي وتاج راسيي بس لا تدخلين بتربية بناتنا

-العلوية: وسمممم وزحييير تففف على غيرتكم ولد الچلاااب مابيكم شررريف يخلص هالطفلة من ايدين هالعااار

-جعفر: شُهيب يگدر يخلصها لو قبل يعقد عليها

-شُهيب: انتو تحومون على هالسالفة من قبل شهريين ولكم ما صارلي يومين متزووج وتردوني اخذ الثانية؟؟ والله لو تنفلقون فلقق گدامي هم ما اسويهاا وخلي ابن امه وابوو يلمس تسنيم بسووء نهارركم اگلبه ليييل وداااعة امي

عافهم وراح للمطبخ مادري شيسوي تارك الكل بحالة ذهول حتى عماد الي بيده السلاح وشمسون بقو صافنين، دقيقتين وطلع من المطبخ بيده كوب يطلع منه بخار فكيت حلگي ممصدگة هذا ما نسى الچاي مالتي وراح يجيبلي بعد كل الصار؟؟

صعد الدرج بهدوء تام وصل لبداية الدرج وشافني گاعدة على الباية واباوعله بدون كلام لزم ايدي ودخلني وياه بالغرفة يگعدني على الچرباية..

من وصلنا للغرفة رجع لعصبيته چان يمثل گدامهم بأحتراف، حط الكوب على الميز حركته سريعة وعصبية اطرافه ترتعش بغضب راح لميز التسريحة شال المشط واجاني قدم جسمي وگعد ورايه مباشرة فاجأني من صار يمشطلي شعري المبلل بلطف تعاكس عصبيته ورجفة ايده..

-شُهيب يمكن ميتمشط زين لان ما سبحت وشعري بي كلور

-جاي يتمشط

جاوبني بنبرة قوية حارقة يمة هذا واصل مرحلة، شال كوب الچاي حطه بيدي واشرلي اشربه، كمل تمشيط شعري وگام مادري وين يروح بس ديدور على شي واتوقع لگاه لان شفت بيده كتر صغير ورجعلي يمشط مرة ثانية ويسويلي ظفيرة..

ابتسمت من كملها وحطلي الكتر جوه وطلعلي گذلة خفيفة يمشط بيها عدل حتى تكون مرتبة، ابتسامتي ما غابت واني اتأمله يمكن نسى اني چبيرة وعقلي واعي واگدر اسوي شعري بنفسي يجوز ما منتبه وعباله اني امه بسبب حركاته ولطفه ويايه متغاضي عن الصار جوه..

-اني مسرة شُهيب

هد من ايده المشط وعگد حاجبه مستغرب من جملتي، عدتها انبهه مرة ثانية وهز راسه بمعنى فهمت..

-ادري بيچ مسرة بس عجبني امشط شعرچ

-وشنو رأيك بي؟

-حرير

تلمس گذلتي بأنامله وابتسم وهو يگول "حرير" رجعتله الابتسامة ونويت افاتحه بالصار قبل شوية..

-شلون عفتها جوه وحدها

-منو؟

-بنت عمك تسنيم

-ما عليها شي

-خاف يأذوها

-ما يسترجون

-ههههههه هواي واثق من نفسك شهوبي اوبي اوبي

-حلوة الثقة بالنفس مسرات ات ات

-هههههههههههه لا تقلدني

-حلال عليچ وحرام عليَّ

-لا جديات احچي تسنيم خطية فقيرة متستاهل

-ادري وهذا السبب ما راح يسوولها شي والصار كله لعبة ضحكوا عليها يگلولها اختچ زوجها ذبحها وشمرها بالحقل وطلعوها بهذا الحال مثل المجانين واكيد واصللهم خبر اني بالحقل ويه جنات مبينة السالفة احنه مو اغبياء وتمشي علينا هالكلاوات غايتهم واضحة يردوني اتزوج تسنيم بأي طريقة كانت

-تزوجها

فتح عيونه متفاجئ لكن سرعان ما رجع ملامحه للجدية الطبيعية وگام من الفراش متوجه للحمام نزع قميصه بالباب وتركني بدون لا يجاوبني..

تمنيته يجاوب واعرف رأيه واحنه سوه وماكو احد بيناتنا ماعرف ليش اجاني هالشعور بس ردت اسمع رفضه للزواج وينطيني السبب الرئيسي ليش ما قابل يتزوج البنية مع العلم تسنيم بنت عمه جميلة وراقية وتطابق المواصفات الي يريدها هو غيور ويحب البنية المحتشمة والملتزمة واني بعيدة كل البُعد عن هالمواصفات ليش ما قبل بيها؟

خنست الاصوات جوه صار عندي فضول اشوف شنو صار ووين راح الكل، طلعت من الغرفة على كيفي اتسحب ومديت راسي من محجر الدرج اشوفهم محد يحچي الكل باقي على صفنته وواحد يباوع بوجه الثاني وراس البرتقالة ميت ميت حرگة وحرگ تسنيم الفقيرة بنظراته..

بقو على هالحال بالخمس دقايق واني باقية هنا اتفرج تعبت وگعدت اتربع حاسة راح تصير محادثة ثانية.. محد اكو هنا غير تسنيم والعمام الكبار وفاهد وابن عمهم قصي وخالد وعلي وهارون واخوانه الثنين..

-عماد: راح ازوجكم ازوجكم يا تسنيم ما يطلع اسمي عماد اذا ما ربطتچ ويه ذاك الحقير

-شمسون: احترم نفسك لك اشگ حلگك لو فتحته وجبت طاري نمري

-عماد: خلي نمرك يتنازل شوية شنو فرقه عن اخوانه مو مالك تزوج جنات بدون لا يفتح حلگه بشي بس عبنه مطيع وبار بأبوه

-شمسون: مَلك لو ما لازم عليه لزمات هم ما يتنازل لا تظل تاكل **** ولدي كلهم راسهم يابس وصلفين على ابوهم

-عماد: ما تلزم على شُهيب شبييك

-شمسون: انچب لا تدخل بيناتنا

-عماد: وفاهد؟

-فاهد: شبي نعاال يا موضوع صار ولطشتوو بي فاهد

-عماد: شبيك عمو جاي نسولف عادي

-فاهد: لا تسولف وتزعجنا بصوتك الغثيث انتَ وهذا راسك ليگول راس بتيته بالجبن

-عماد: استغفرالله شمسون شلون بولدك احنه

-شمسون: تاج راسك ولدي لا تجيب طاريهم على لسانك وادعبل منا

-عماد: وتسنيم؟؟

-شمسون: عود نشوفلنا طريقة نزوجهم بيها لا تستعجل

-فاهد: طريقتيش باچر راجعين احنه

-شمسون: وين ترحون فهدي؟

-فاهد: نرجع لعبت ارواحنا من وجوههم الزفرة

-قصي: رحم الله والديك

-فاهد: هلو هلو

-شمسون: لا بابا شيرجعكم هسة انتظرو عقد جلال وعُلا

-فاهد: لو عقد امي هم ما انتظر كافي جبتنا هنا حتى تزوحنا ونرجع ها اها تزوجنا بعد شتريد اكثر تنتظرنا نخلف؟؟

-شمسون: اي ماكو شي منا منا

-فاهد: اكو نعل وقنادر منو يريد؟

-شمسون: هههااههااههاا عيب بابا عيب اني وعمامك الكبار گاعدين احترمنا

-زكي: شمسون ابنك فاهد انتَ وگاعد بشبابك نسخة منك تصرفاته

-شمسون: اي ابن الغبرة ما تشوفني متحمل سوالفه السز

-فاهد: گول زين اني متحملك وصابر عليك اروح احاچي مالك اعدل من نفسيتي الخربتوها

-شمسون: سلملنا عليه وگله ابوية يگول ما ترجع الا الشغل يخلص

-فاهد: الا اگله ابوية يگول ارجع اني الك

-شمسون: هههاااهههااهههاا صايع

گمت ارجع للغرفة بعدما صعد فاهد همزين ما لگفني گاعدة، مديت راسي من الباب شفته توجه لـ باب غرفة كيان ومن الباب استقبلها بصياحه من يگول..

-ولچ هااااا كورررري

**

-كيان: وجعععع فززتني خررب شبيك ولك انتَ تظل مسودن الا تموتني يمك ياله ترتااح

-فاهد: شلونچ كوريتي شو وجهچ اصفر

-فاهد تعال سولفلي شصار بس لا أذو تسنيم؟ ولك ميتة خوف عليها

-لا ما سوولها شي شُهيب فطسهم

-يممة الحمدلله ارتاحيت همزين ما تنازل وتزوجها خطية مسرة

-هسة يزوجوهم لا تخافين ما يرتاحون الا يسووها

-لا عفية گول غيرها

-غيرها

-فاهد شبيك احچي جديات اني

-يعني مو بيبيات؟

-فاهد لا تصير ماااصخ

-حطيلي ملح

-ايييع كافي وخرر

-كافي لو چاي

-اييييع ايييع اسكت

-لا حرامات هاي ماگدر ارهمها

شمرت عليه مخدة اسكته ضحك وراح للحمام عنده مشكلة ويه باب الحمام من يسبح لو يغسل لو يموت ميسدها ويستفزني اكثر من يگول..

-دتعالي شوفي خلقة ربچ ومتعي نظرچ تعالي 

-قصدك اجي حتى ازوووع

-تعالي واتحداچ اذا زوعتي

مد راسه من الباب غمزلي ورجع، نفخت متنرفزة وتمددت بمكاني افكر بالصار والله مصيبة مو بيت هذا عبارة عن حديقة حيوانات واحد ياكل بالثاني ويشترون المشاكل مشتره..

-هلااااااا مالكيييي مشتاقييين ما بيگ براذررر

فزيت من مكاني على صوت فاهد يحچي بالتلفون وفاتح السبيكر لانه يحچي من بعيد، ركزت سمعي وابتسمت من سمعت جواب مالك..

-هلا فاهد شلونك حبيبي

-بخير بخير انتَ شلونك ماي لوووڤ

-توحشتك (مشتاقلك)

-اه قلبك هشاش (اي گلبك رهيّف)

ضحك مالك وضحكت ويه ضحكته اتنرفز من يحچون مغربي لان كلشي ما افهم..

-مالك: إوا شنو درتو (شسويتو ما سويتو)

-فاهد: تعال دغية كانتسناوك

-اشنو وقع؟

ضجت كلشي ما جاي افهم بدو يسولفون ومبين فاهد ديحچيله شنو صار جوه وموضوع شُهيب وتسنيم ومالك يجاوبه..

-مالك: بصاح؟؟ (عليك الله)

-فاهد: اه اه استفزوا شُهيب وراد يدابز

كمل المشكلة كلها ويخبط عراقي ومغربي بالاخير الى ان اخيراً استقروا على العراقي يكملون المحادثة..

-فاهد: شكو ماكو يمك؟

-مالك: ماكو بس اندچيت سچينة

-فاهد: هههههههههههههههه چذذب

-مالك: والله بفخذي

-منو دچك؟

-لو اگلك ما تصدگ

-منوو

-واحد من زلم "غوغري" اللتقيت بي هناك واختلفنا على شي وصارت العركة

-خرررررب مالك گلت لابوية؟!؟!!

-طبعاً لا شنو مخبل اگله تلازمت ويه واحد من زلم غوغري ما رايد روحي

-ديربالك انتبه كللش زين وحاول تتصافى وياهم مالنا خلگهم

-ادري تصافيت وكلشي صار تمام

-وهسة شلونه فخذك تگدر تمشي لو لا؟

-الدكتور گال لا تضغط عليها بس ماگدر عندي شغل اريد اكمله بسرعة وارجع

-تجي للعراق؟

-لا اطلع بسرعة عندي شغل بأوربا ماگدر ارجع للعراق هسة لان عندي روحة للمغرب بعد كم يوم

-شتسوي بالمغرب

-الفلاشة لازم ارجعها لا ابوية يدفنني بمكان نومتي

-خيولي معليك بي

-غبي بيها صوتك وانتَ تحچي وياه على موت يوسف!!

-لو بس اعرف ليش سجل صوتي بيومها واني معليه بموته ولا اتذكر هذا اليوم!

-حتى يورطك بيها بابا شبيك تعلمني بأبوية هي هاي سوالفه

-المهم شو ما سألت على ام عيون

-مالك: منو ام عيون؟

-مرتك جنات شبيك

-جنات!!

ضحك ضحكة عالية وره ما گال اسمها، طلع فاهد من الحمام بيده التلفون والخاولي ينشف بيده ووجهه..

-فاهد: هههههههه شبيك يمعود

-مالك: وروح امي نسيتني متزوج من وره الخبصة هنا

-لانك تنزع الحلقة خليها تسمعك تسود عيشتك

-لا ما تهتم المهم شلونها ام لسان؟

-مادري عنها

-شنو متدري عنها اني مو وصيتك عليها قبل لا اسافر

-اي بس نسيت

-والله عرفتك همزين وصيت شُهيب هم، سد سد خليني اتصل بي

-مااا

-شنو شبيك

-ما تتصل عليه ما اقبل

-فاهد لا تصير طفل

-والعباس نتزاعل اذا سديته شبيك اريد احچي وياك مشتاقلك

-اي حبيبي بس اتطمن عليها وارجع اتصل بيك

-روح روح خلي شُهيب العار يفيدك

-ابني خمس دقايق ما اتأخر

-اي روح بس لا ترجع تتصل ماريدك

-ولك مسوددن

-ها

-زوجناك وما عقلت

-بالعكس تخبلت بالزايد وهاي كوريتي شاهدة كوري تعالي سولفيلهم عني

-كيان: ميحتاح يعرفوك احسن مني

-مالك: ههههه شلونچ كيان

-كيان: زينة اني انتَ شلونك

حسيت بوجهي يشتعل نار خجلت لان بسرعة حط التلفون يمي بدون سابق انذار لاحظت بـ فاهد يصفن عليَّ واني احچي ويه مالك توترت بالزايد شبي هذا..

-مالك: عينچ عليه يمعودة لا يسويلنا مشاكل بس علما ارجع

-كيان: لا لتخاف ما اعوفه وحده

-مالك: عفية عليج كوري

ضحكت اغطي وجهي الي بوخ وخر فاهد التلفون مني بسرعة ونهى المكالمة ويه مالك شمر التلفون على الچرباية واخذ شي من جنطته ورجع للحمام وهالمرة طبگ الباب وراه وقفلها هم..

رجعت اتمدد اللعب بتلفوني راسلت مسرة اتطمن عليها ضحكت على الصورة الدزتها مصورة نفسها بالمراية من وره مسوية ظفيرة حلوة وكاتبة جوه "شوفي شسوالي اخوچ"..

ابتسمت من شفتها ناشرتها ستوري وكاتبة..

"so cute hamoose"

"كيان: هههههه تجنن والله لايگتلچ"

"مسرة: بحياتي ممسوية ظفيرة مو ذوقي احسها مال بنات حبابات"

دزت ايموجيات ضاحكة وره جملتها ضحكت ضحكة عالية اتخيل الجملة بصوتها خصوصاً من اللحقتها بـ...

"بس تره اني هم حبابة 🥺"

ضحكت اكثر على الايموجي المدمع الدزته خرب مسرة شلون بنية هاي حقه شُهيب متخبل عليها ويماشي تصرفاتها لان مستحيل احد يگدر يتعايش ويه مسرة غير اليشبهها ويشبه لونها وطاقتها العالية..

"كيان: شلون غرگتي ما سولفتينا؟"

"هو هسة دا اريد اسولف لـ شُهيب بس بعده معصب هذا الخوينس خاف احچي وينزل يسوي عليهم انقلاب"

"عززه يعني فعل فاعل مو قدر؟؟"

"فعل وفاعل ومفعول بهِ همينه "تعلمت الكلمات من تسنيم" بس عود  باچر اسولفلچ على الريوگ رجعي للمسودن مالتچ"

"ماشي حبي تصبحين على خير"

-ويامن تتمضحكين؟

غابت ضحكتي من شفته يطلع من الحمام نازع ملابسه ولاف خصره بمنشفة، ملامحه مغيمة وعيونه الصفر مخبوطة بأحمر ماعرف ليش هستوه چان كلشي مابي طب للحمام وطلع عبالك غير واحد..

-دا اسولف ويه صديقتي

-اممم

-شبيك شو تعبان

-معليچ

-صح معليه صوچي معبرتك واسأل عنك

-لا تسألين وانچبي

-احترم نفسك شبيك انتَ متستحي!!

-سكتتتتتي لا تنرفزيييني

-همجي

شهگت مرعوبة من لزم فچي يعصره بيده جحظت عيوني ممتوقعة حركته الغريبة ولا عصبيته المفاجأة..

-مو من صالحچ تلاسنينيي كيان تره مااعندي صاحب صددديق

دفرت ايده عني وضربته على كتفه بقوة ما تلحلح من مكانه تنرفزت اكثر ولعبت نفسي..

-ولا مصلحتتك تهددني فااهد لو مو تهددوني بأخواني من تطخ براسيي ادمررك وروحها لامي

ضحك.. ضحك بصوت مرتفع يرجع راسه وره ويزيد بضحكته المجنونة، اچذب اذا اگول ما خفت منه ومن خباله الي يظهر لثواني ويروح بثواني..

-شكو تضحك؟؟

-على صلافتچ ههههههههههههههههههههه

وگف على جهة ونزع الخاولي منه درت وجهي بسرعة الحقير ولا يهتم ذرة مستحى ما عنده..

-لاااا تنزع گدااامي فاهدد

-خوش خوش

لفيت راسي بالبطانية ونمت منطيته ظهري، اسمع طگطگته بدل ورش عطر ومشط ورتب نفسه وشمر جسمه على السرير بصفي..

-كوري

-وخر عن وجهي

-مو بوجهج اني بظهرچ

-وخر عني

-شبيچ عصبية هسة شسويت اني

-تمد ايدك عليَّ وتگول كلشيي ما سويت؟؟؟

-يمته هاي شوكت مديت ايدي عليچ

-هسة من عصرت فچي!!

-هاي مناگر حبايب

-دوخرر مسودن

-كوري شبيچ شبيچ

-فاهد شتريد؟؟

انگلبت على جهته اواجهه اريد افهم سالفته هذا والله تعبت وطاقتي نفذت، صرنا وجه بوجه هو ساند راسه على ايده وصافن عليَّ واني حاطه راسي على المخدة..

-فاهد: شكو ماكو

-عزه!!

-خلينا نسولف ضوجة

-ولك هستوك تعاركت ويايه!!

-اني؟ شوكت هاي؟

-هسة هسسسة

-لا مقبلات هاي وينها العركة

-هسة فهمني شنو رايد؟

-اريد اسولف وياچ عندي فضول ناحيتچ

-ليش؟؟؟

-لانچ تختلفين عن حمرتي

-هم گال خضرتي!! شعليه بيها وليش تقارننا ببعض اصلاً!!

-لان ثنينچن بنات

-تره مو معناها اذا چنه نفس الجنس لازم نتشابه! هسة انتَ تشبه مالك؟

-شمعنى مالك

-شنو؟

-شمعنى مثلتيني بمالك

-لانكم اخوان واذا تتشابهون بالصفات او بالشكل يكون طبيعي

-امممم

-اي شبيك

-هواي تستحين من مالك چنچ

-شلون يعني

-وجهچ ورّد من حچى وياچ مادري هاي مستحة لو غير شي..؟

-غير شي مثل شنو؟

-مادري اني جاي اسألچ

-اي استحي من مالك تمام؟

-ليش

-مادري

-شلون متدرين اكو واحد ميدري سبب خجله من شخص؟

-استحي من يحچي وياي واخاف لا اچفص اريده يشوفني بالعين الچبيرة

-واه؟

-اي بيها مشكلة؟

-والله مادري اذا بيها لو لا بس بشنو يختلف مالك وتردي يشوفچ بالعين الچبيرة؟

-لانه يعاملني زين ومحترم وميتجاوز ويايه ولطيف مثل شُهيب

-امممم

-المحترم يُحترم فاهد هذا قانون الحياة

-صحيح

-مالك وشُهيب يتشابهون بهواي صفات ثنينهم حنونين وعدهم حس ابوي ويعاملوني كلش زين وميقبلون على زعلي ليش ما احبهم يعني؟

-سؤالي ليش تستحين منه ومن اسأل من باب الفضول

-مادري شبيك يعني ابتليت على عمري وجهي صار احمر فاهد اني استحي من كل الزلم

-ماشوفچ تستحين وياي؟

-اني صح اكرهك وحاقدة عليك بس شخصيتك مريحة واحد ميستغرب من يكون وياك

-حمرتي تستغرب مني

-ليش؟

-مادري بس تستغرب وتتهرب مني متقبل حتى احچي وياهة ومن اتقرب منها تظل تنتفض خايفة

-لهدرجة!

-اي الله يعلم شموصليلها حچي عليَّ

-قصدك حاچيلها على اجرامك وسوالفك؟

-اي

-لعد حقها تره انتَ مجرم خاف عبالك انتَ انسان طبيعي؟

-شكراً افتخر بكوني مجرم

-گبرر

-اليگبرچ

-فاهد

-وسَمم

-بگلبك

-شكو گولي

-ليش ما شايفتك من قبل اني؟ بس اسمع بـ شُهيب عنده اخ صغير اول مرة اشوفك بيها چانت بالحفلة الي صارت ببيتك

-بالجديد انتقلت لأوربا طول عمري عايش بين المغرب والعراق واسبانيا

-اسبانيا؟ شمعنى؟

-اغلب شغلي هناك

-حلووو يعني عندك هواي صداقات هناك

-قصدچ عداوات اي عندي خير من الله

-بس ليش اختاريت اسبانيا؟

-بعد تقسيم الشغل صار هيچ اني اسبانيا ومالك المانيا وفرنسا وشُهيب روسيا

-ايييي هوايه يروح لروسيا چان بس شنو يشتغل هناك؟

-يبيع كلينس بالتقاطعات

-شبيك دا احچي صدگ

-شغل كيان يشتغل وبس

-باچر اسئله عود

-سألي

نزع قميصه وبنطرونه واخذ البطانية يتغطى ويايه ويتعمد يحط رجله على رجلي، دفرتها ويرجع يحطها وارجع ادفرها ويرجع يحطها وادفرها ويرجعها وادفرها وبقينا هيچ الى ان گمز عليَّ يقيد ايدي ويضحك بصوت عالي..

-عنودية عنوودية

-وخر فاااهد شثگلك اختنگتتتت

-انتِ شبيچ معصعصة ما تاكلين

-يممممممة راح امووووت نايم عليَّ شكبرررك

-كوري

-هاااا

-كوري

-هااا شبيك

-لا تصيحين وجاوبيني عدل

-وخررر هم اله عين يريدني اجاوبه عدل وره ما مد ايده عليَّ

-كيان اسف شبيچ ما توقعت راح تتأذين لزمتچ برهاوة ايدي

-امداني اذا هاي رهاوة ايدك

-وراس مالك ما نويت ااذيچ وما ضغطت حيل

-اصلاً شكو لزمتني هيج!!

-اشتاقيت لوجهچ

-نعم؟؟؟؟

-اي شبيچ اني اشتاق للوجوه

-فاهد بيك شي انتَ؟

-لا

-شنو تشتاق للوجوه شنو هالغرابة!

-مادري هاي حالة عندي اكو وجوه اشتاقلها واحب اباوعلها دائماً وانتِ من هالوجوه

-هههههههههههههه يمة ضحكتني

-والله احچي صدگ شبيچ

-شلون عادة غريبة بله ليا وجوه تشتاق بعد؟

-وجهچ ووجه فاضل والعياذ بالله

-جاي تضحك عليَّ

-والله لا شبيچ ما تصدگين

-توقعت راح تگول مالك لو حمرتك

-لا ليش اچذب اشتاق لوجه سيد فاضل واخوچ نشوان هم وبعد اشتاق لوجه ولد عمي غياث وهارون

-خوش خوش هسة وخر عني انگطع نفسييي راح اموت

همهم وضحك بخفة بس ما وخر متت وجزعت روحي من تصرفه وزيّد نرفزتي من لحس خدي..

-ايييييييييييييييييع ليش تلحسنيييي

-اوگفي

عادها مرة ثانية من الجهة الثانية واني ارفس برجلي ماگدر ادفعه مقيّدني كررهها للمرة الاخيرة وقبل لا يوخر عضيت خشمه بقووة واضغط عليه بأسناني..

-ووولچ لاااااا الا الوجه!! الوجه لاااااا

اضغط حيل ناوية ازورگ خشمه الازرگ جر وجهه مني بقوة حسيت انشلع خشمه من وجهه وخر مني يضحك ما ضايج ولا متنرفز وميقبل يعوف ايدي..

-هههههههه وكحة لا تعيديها

-احوووووو احاااااا احوووووو وخرووو هالمسودن منييييي

-هههههه كوري كوري

حط وجهه برگبتي صرخت من حسيته راح يعضني وعضيته من اذاناته عاط ووخر مني اخيراً لازم اذانه وخشمه ويضحك..

-فاهد: ههههه حلوة هاي اللعبة

-مخبل وخرر شبيك انتَ عنيففففف

-كوري ريحتچ حلوة انتبهت على هذا الشي اكثر من مرة احسنتِ استمري

-عناد بيك الا اخيس نفسيي

-ايووو

-اوووووف من هالرجل الطفل شلون بي

-تحمليني شبيچ مو مالك وصاچ عليَّ وانتِ تحبي مثل شُهيب

-هو لخاطر مالك راح اتحملك عيب منه

-يله خوش خلينا ننام تعالي

-عااااااا هدني مااا هددني

طفرت لنهاية الغرفة من عصرني يريدني انام بين ايده ضحك بعلو صوته ضحكته المشهورة مال مجانين ونام على الفراش فاتح ايده ورجله ثنينهن..

-فاهد: هاي حتى خاف تردين تنامين على الچرباية تضطرين تنامين على ايدي

-لو تمووت

-ههههههههههههههههههههههههه...

**

"مسرة"

نعم نعم نعم جاي نسمع لصياح وضحك كيان وفاهد بس طبعاً مو كله فقط الصوت العالي يوصللنا وشُهيب واصلة وياه للشيطان الرجيم كل شوية يريد يگوم يتعارك ويه فاهد حتى ينلصم واني اهدأه واگعده..

-مسرة: شبيك شُهيب خليهم عرسان جدد ومتونسين

-شُهيب: مسرة ممكن؟؟؟

-اسكت؟

-بالضبط!!

-لو چنت بغير وضع چان زعلت بس يله سماح هالمرة

زفر يمسح على وجهه للان ممتقبل فكرة زواج كيان واتوقع المشكلة مو بزواجها وانما المشكلة تتعلق بمنو تزوجت وماكو بيده شي غير يصبر ويسكت وهو يسمع لعركاتهم مادري مغازلاتهم مادري اشياء اخرى..؟

نمنا هالليلة وما حچيتله عن سالفة غرگتي بس ما بيتتها يوم ثاني واول ما گعدنا الصبح هو راح يفرش اسنانه ويمشط شعره بالحمام واني واگفة بالباب اتفرج عليه..

-شُهيب

-نعم

-عندي شي اريد احچي

-حتى اني عندي والبارحة ما صار وقت افتح وياچ الموضوع

-شنو هو گول؟

-شلون غرگتي بالمسبح وانتِ تعرفين تسبحين؟

-هو اجيت احچيلك هذا الموضوع....

بديت احچيله بالتفصيل الممل من اول ما سديت الاتصال من ميس لحدما رحت احط رجلي بالمسبح ولمحادثتي ويه نور وهنادي وشلون غرگوني وواضح جداً قفز ورايه رجال لان ضخامة جسده وقوته محال تكون انثى..

احچي وشُهيب يسمعني للاخير بدون لا يقاطعني بشي بس ملامحه تقره تعجب وصدمة، بدون لا يعلق كلمة او يسألني سؤال تمشى بهدوء للباب ونزل جوه..

دقيقة دقيقتين ووصلني صوت الصياح والعركة الگبت، ركضت انزل وطلعن كل البنات من الغرف شفت هنادي گاعدة بالمطبخ كلممة ما حچت وشُهيب واگف مقابيلها يرزلها ويهزأ بيها..

-شُهيب: انتِ ما تستحين؟؟ بس فهمينيي شوكت تكبرين وتعقليين هنادي!! وصلت بيچ تكتلين انساان بس لانچ تغارين منهااا؟؟؟

-هنادي: ما اغار منها

-شُهيب: تغارين ونص وحقچ تغارين هي ووييين وانتِ وين

طفرت من مكانها معترضة رفعت اصبعها تأشر عليَّ وتگول والحسرة كاتلتها..

-وليش اغار منها؟؟ لييش شنو احلى منييي لو اغنى مني؟؟؟ شو ابوية الكل يحچي بفلوسه وزنگنته ورجليي نفس الشي من شنو اغاار شُهيب؟!!!

-والله مادري گولي لنفسچ وروضيها عدل ترسي عينچ تراب وچفينا شرچ كرهتينا عيشتنا

-هنادي: ليش شنو سويتلك وكرهت عيشتك؟؟؟

-شُهيب: هناادي ما نريد نحچي بماضيچ خليها سكتة

-فاهد: اتفق هنادي زغرور

ما فهمت شنو گال ولا احد فهم بس وجه هنادي گام ينطي اللوان وبلعت لسانها وما حچت شي بعد، كمل شُهيب رزالتها غسلها غسل وحلگها ما فكته بعد..

-شُهيب: من يوم اجينه انتي گورچ من گور امي ومسرة وكيان تغارين منهن؟؟ گلنا حقچ ميخالف تغارين لان مستحيل توصليلهن بس سمچ بطليي ولا تظلين تذبي على الرايح والجاي وهذا وجهي لو بقيتيي يوم بعد هناا

-هنادي: لا شُهيبب دخيلك وينن ارووح اني يتييمة

-شُهيب: يتيمة تحترمييين نفسچ وتنچبين!! تنتبهين على بيتچ وزوجچ وحياتچ عووفي بنات الناس لو نفسچ الخسيسة والدنيئة ما جاي تخليچ تتقبلين فشلچ وما عرفتي شلون تأذين البنات گلتي خليني لوو اشوه سمعتهن لوو اكتلهنن بسس لو تموووتيننن ****** على غيرتييي لو خليتچ دقيقة هنااا وما طيحت حظج يا هناادي بت ****** العاار

-هنادي: التوبة والله التوبة ماعيدها بعد التووبة

العلوية واگفة تسمع كلمة ما نطقت انطت شُهيب كل الوقت يحچي ويرزل بهاي الحقيرة مبين هي هم محمل گلبها عليها بس من وصلت عصبية شُهيب يريد يوصل الكلام لزوج هنادي وهاي گامت تدگ وتلطم ياله تدخلت العلوية تگول..

-العلوية: عوفها حبوبا انه اكفلها ما تدنى من مريتك بعد

-شُهيب: رجااءاً علوية هاي البني ادم اني ما اطيقهاا وصلت وياهة لدرجة تكتل مسرة؟؟ شلون تلفين هيچ حية ببيتچ ما تخافين على روحچ وعلى بناتچ؟؟

-العلوية: انه اربيها بعد امك لا تضوج

-هنادي: اي علوية اي والله معليه بيها والله ميخصنيي بعدد

غلس عليهن شُهيب ودور بعيونه على نور وهم نالت حقها بالرزايل بس ما داس وياهة مثل هنادي بقت نور منزلة راسها وتبچي بحرگة وعلى اثر بچيها اجو كم واحد من ولد العم يشهدون باقي المشكلة من شافهم شُهيب سكت وتقرب من نور يهمس بينه وبينها..

-شُهيب: راح اسكت لخاطر سمعتچ لا تخرب گدام الولد خاف واحد اله نية يتزوجچ منهم اكيد من يسمع ما راح يتدنى منچ محد يريد يتزوج وحدة تكتل بشر ما مأذي بگلب بارد

وگعت بالگاع تنحب وتبچي اجوها البنات يگوموها وتوقعت شُهيب نسى الرجال الي تعاون وياهن بس طلع متذكر والظهر لزم نور وما عافها الا من اعترفت وگالت..

-نور: هنادي لعبت براسي گالت مسرة تزوجت شُهيب وهي غريبة خلينا نخلص منها گلتلها ما اكتلها اني ماگدر گالت متموت بس نخوفها ونشمرها بالمسبح مادري بيها متفقة ويه الحارس يضرب راس مسرة بالمسبح حتى تغيب عن الوعي وتغرگ وحدها

-شُهيب: يعني استعانيتو بالحارس؟؟

-نور: اي هي حچت وياه وانطته فلوس ودخل من الباب الثاني مسرة ما شافته لان دخل خلسة واني چنت احچي وياهة ومن دون لا تنتبه دفعوها بالمسبح وهو نزل وراهة يغرگها صرخت وبچيت خايفة وما قبلت على السووا والله العظيم واني گلت للمساعدة تروح تصيح الباقين حتى يجوها

هز راسه وعافها او خلينا نگول عاف البيت بكبره لان طلع وما رجع بعد بقيت انتظره هوايه وهو ماله اثر ولا الحارس موجود دگيت عليه اكثر من مرة ميجاوب و من اسأل فاهد عنه يگول ميعرف قلقت كلش..

وره الغده انتبهنا على شي، شي ضايع، شي مختفي، شي لطيف ولسانه حلو وروحه احلى.. انتبهنا لاختفاء جنات! وينها جنات؟؟

-العلوية: ياااع وينها الملسونة شو ماهي؟؟

-عُلا: من البارحة افتقدتها وگالن البنات نامت ويه ايات

-ايات: لا ما اجتني بالليل

-فيروز: عزه وينها!

-العلوية: خايبات وينها البت!!

-كيان: بنات متأكدين؟؟ وين الباقيات هم سألوهن يمعودات

گام الكل يدورها وواحد يسأل الثاني تسنيم گالت اخر مرة شافتها بالحقل بس متتذكر شنو صار بعد وايات تگول نفس الشي.. انخبص البيت خبصص تدخلو الزلم والكل افتهم بـ فقد جنات، دگ موبايل العلوية چان المتصل "مالك" جاوبته وحرصت متحچيله شي خافت عليه ينهبط او يتأثر بس گلبه دليله هالرجال وحس اكو مشكلة..

بقت العلوية تراوغ بالاتصال متقبل تحچيله بس صوتها فضحها يرجف وگوة تحچي سكرها معلگ خايفة على جنات، انطت التلفون لفاهد حتى يحچي ويه اخوه وهذا طگها بوجهه ممهتم لشي..

-فاهد: جنات مفقودة من البارحة بالليل وما جاي نلگاهة

البيت انقلب رأساً على عقب يدورون كل مكان ما خلو مكان يعتب عليهم وافتهمنا بمالك راح يرجع ما قبل يبقى بعيد، اذن اذان المغرب والبنية ماكو كبر القلق والخوف من عبرت الساعة بالتسعة بالليل ولا جنات رجعت ولا شُهيب..

-صاحب: ويييينهاا بنتييي وووينه ابنككك شُهيببب جعففففر؟؟؟!!

-شمسون: ابني شعليه ببنتك؟؟ راح يربي الحارس العار الي اعتده على مسرة لا تظلون كلشي وتلزگوو بولدي تاج راسكم

-صاحب: بنتي مختفيية مرت ابننك هااي چنتتتك

-شمسون: راح نلگاهة على شنو كل هالعصبية هسة تلگاهة راجعة للبيت

-عماد: ترجع للبيت شنو؟؟ البيت يبعد منا فوگ الساعتين شلون تروح وحدها؟؟

-ايات ببكاء: انتوو لو مرجعيلهاا موبايلهاا چان ما صار كل هذا نتصلل عليها ونتطمنن على الاقللل

-صاحب: نرجعلها موبايلها حتى تظل تتواصل ويه عارها؟؟؟

-شمسون: گول يمكن عارها الخاطفها والله يعلم شمسوين

بين الصياح والاتهامات والخبصة طلع الكل للبستان بلكت تهدأ الاجواء بس الولد متناثرين كل مكان يدورون ما استسلموا..

-العلوية: يا ام الحسن دخيلچ ستري علينا راحت بنيتي

ايات تبچي منهارة وتلوم بروحها شلون عافت اختها وما اهتمت بيها تندمت على كل لحظة غباء تركت جنات بدون لا تحتضنها وتنطيها من حنانها وعلى كل دمعة نزلت من عيون جنات وهي تتوسل بيها حتى تنام بصفها بس لانها تخاف..

تداخل خوفنا ويه صوت كلاب تنبح جاية من بعيد گالو هاي خاصة بالجيران ومالها اذية على احد بس الي شفناه وگف گلوبنا وخوفنا اكثر من صوت نبح الكلاب!

شفنا احد يطلع من الظلمة ويركض من بعيد هاي جنات! اجت جنات ملابسها متمزقة وشالها كذلك نص شعرها طالع ورگبتها مبينة من الشال و صايرة زرگة واضح نتيجة اعتداء، ايديها مشخطة وبيها اثار اصابع شخص ضاغط عليهن واقدامها حافية، حالها يخوف اكبر واحد ويكسر قلب اقسى انسان.. اجت هي وعيونها الحلوة الخضر تنهمر منها الدموع من الخوف والرعب العاشته بالفترة الغابت بيها، مجرد وصلت لحضن ايات وگعت وغابت عن وعيها مستسلمة.......

يتبع....

━━━━━━  ━━━━━━

جنات امانة مالك 💔!!!

شُهيب ومسرة الكيوت ودفاعه عنها بنص قلبي وشلون ردهم وما تنازل وقبل بالزواج!!! 🫰🏻

فاهد الغريب وكيان اللطيفة 🥲💅🏻

توقعاتكم 👀🩷؟؟؟

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

<أخبرهم أنكَ مُلكي، أرهقتني الغيرة ♥️>..

━━━━━━  ━━━━━━

"جنات"

اول ما نزلنا بالمطار اجو زلم ياخذون جنطنا وينقلوها للسيارة، لحد الان مالك وابوه ميتحاچون بسببي قبل لا نسافر طرحت عليه فكرة الطلاق وهسة هم كررتها گدامه وگتله اجه وقتها وراح يگدر يرتاح مني بس ما قبل وعارض معارضة شديدة وگال بالضبط..

-مالك: سدي هذا الموضوع جنات!

-جنات: ابوك معاديك وفاهد گال متحلفلك

-لا تخافين راح نتطلگ اي بس مو هسة انطيني صبر احول الاملاك بأسمچ واعوفچ

-لا مو هيچ بث..

-بدون بس هذا حقچ واموالچ محتاج اللهي ابوية عن موضوع الأملاك هالفترة وانقلهن الچ بالسر بدون لا يكتشف، بعد مرور ساعة وحدة من التحويل لحسابچ البنكي اعتبري نفسچ طالق!!

-شبيك معصب عليَّ

ما جاوبني وزفر نفس بس وجهه مگلوب تنرفزت وسكتت ما اللاسن احتاجه هالفترة واني وحدي وراح نبقى ببيت واحد ضروري احاول احسن من صداقتنا..

لليوم حالتي مو زينة بس احاول اغير جو وما اتذكر الي صار، بس اكثر شي اذاني وخسف گلبي وكرهني الدنيا هو ليث.. كسرتي بـ ليث چبيرة حب اربعة سنوات يروح بليلة ويوم ويطلب مني شغلات وصخة واني على ذمة رجال ثاني؟ هضيمة!!

ركبنا السيارات فاهد وكيان بسيارة واني ومالك بسيارة ومسرة وشُهيب وعائلته بسيارة وشمسون مثل الچلب وحده راح..

الطريق من المطار لبيت مالك خيال! ولا بالاحلام الطريق معبد وكله اشجار من الجهتين صايرات مثل المظلات مغطيات الطريق مادري هنه هيچ او البلدية مسوين هالفيكة.. الجو حلو كلش بس مغيم والدنيا تنث مطر خفيف، شگد تمطر بهالبلد..

برود شديد محاوطنا بالسيارة يشبه برود روحي، السايق يسوق كلمة ما نطق ومالك گاعد بصفي يشتغل على الحاسبة ورايح بغير عالم، بعد مرور اكثر من ساعة وصلنا لمنطقة احلى من الطريق نفسه كلها اشجار عالية كلش والورق صاير ملون مو اخضر.. ابتسمت امد راسي من الجامة اتمايز المنطقة الجميلة الهادئة مبينة مال الطبقة المخملية لان ماكو زعاطيط تلعب بالشارع..

-مالك: تفضلي

انتبهت وياه من وگفت السيارة گدام بيت بنائه حديث اورپي بحت مابي مميزات من الخارج هيكلته المعمارية انيقة وشكله حلو..

نزلت من السيارة والسايق انطى لمالك مفتاح وحچى وياه بشي ما فهمته بس من الاشارات وضحت الفكرة ان هو رايح واذا مالك احتاج شي بس يتصل بي.. اومئ مالك براسه واشرلي ادخل قبله..

-تفضلي انستي

توترت ورجفت رجليه باوعتله مرتبكة ومترددة شجعني بيده حتى ادخل هزيت راسي وسميت بأسم الله ودخلت برجلي اليمين رغم ارتباكي بس عندي فضول اشوف بيته من الداخل تخيلته بعقلي شلون راح يكون وابتسمت من شفته يطابق خيالي بالضبط!

بيته عميق جداً من الداخل وچبير مساحته اكيد لا تقل عن 600 متر هيچ توقعته براسي، صالته دائرية عملاقة ويحاوطها تخم قنفات رمادي داير حبل ويتوسط المكان شاشة بلازما ومدفأة لونها اسود..

رسمي.. كلشي رسمي واللوانه حيادية محصورة بين الاسود والرمادي ومشتقاتهن، حتى ميز الطعام اسود والكراسي رمادي بس الحلو بيته مو كئيب ابد منور واكسسوارات المكان واللوحات جميلة جداً ضايفات روح حلوة بالمكان.. اخذت صفنة على كل لوحة اوگف اتأملها وافكر بقصتها..

لوحة عملاقة جذبتني متوسطة الصالة عبارة عن رسم فرس شقراء وايد مرة مصبغة اظافرها وردي فاتح دتمسد شعر الفرس وگفت اباوعلها وحسيت بمالك يوگف بصفي..

-مالك: صورة امي هاي

-شگد حلوة الصورة، ومن ايدها مبينة صاكة ههههه

ابتسم يهز براسه تقربت اكثر على الصورة حلو راسمها ومعلگها هنا صح الصورة جميلة جداً بس تجذب لان اللوانها وحيويتها تختلف عن اللون الاسود والرمادي المحاوط الصالة..

-مالك: بهذا اليوم تعرفت امي على ابوية وهو اخذلها الصورة

-الله صدگ؟

-اي

-انتَ تشبه امك؟

-يگولون

-ما شايفها؟

-لا

-ابد ابد؟ حتى صورة؟

-عندي صورة وحدة وقديمة ما مبينة ملامحها زين بس الاعرفه امي شقراء وامرأة جميلة

-يا حبيبتي الله يرحمها

هز راسه وراح مادري وين بقيت اني بالصالة افتر بيها هواي تفاصيل بس كلشي حلو وبسيط بطريقة راقية مبين ميحب الشغلات الاوڤر مثل بيت فاهد چان فخم كلش وطرازه مال قصور..

-مالك: جنات غرفتچ بالطابق الثاني بيها حمام وصالة صغيرة حتى تاخذين راحتچ

-هااا

-فوگ منا تصعدين الدرج صاير جانبي

-هاااا

-شنو؟

-ماريد

-متحبين الطابق الثاني؟ مو مشكلة انطيچ الغرفة الجوه بس مابيها صالة منفردة مثل الفوگ

-مو.. احم مو باوع هاي خلينا ننام هنا

-تردين تنامين بالصالة هنا؟

-اي احب انام هنا

دور عيونه بالمكان حاير يباوع للقنفات مو مال واحد ينام عليهن ضحك خفيف واشرلي على الغرفة الجوه..

-جنات والله بالغرفة اريحلچ اني جماعتي دائماً يجون هنا بالليل خاف يزعجوچ

-يطبون هنا بالصالة؟؟

-لا لا يصعدون گبلهم فوگ عندي صالة خاصة بينا واذا گعدو هنا ابلغچ قبل بوقت اكيد

-ها يعني ميشوفوني مو؟

-اي اكيد

-زين شثمه.. باوع عندك مثاعدة؟

-لا

-لعد منو ينظفلك

-اني انظف

-گول والكعبيببة

-ههههه

-شلون تلحگ تنظف وتشتغل بنفث الوقت اعرف الزلم فاهيين

-الحمدلله مو فاهي اني ومدبر وضعي

-زين شوف شوف.. انتَ وين راح تنام؟

-اني غرفتي هناك

اشر لممر طويل عبالي هذا ترك بالبيت اثاري هالبيت بي بعد مساحة جوه، شلون حظ تأملت عنده مساعدة حتى اخليها تنام ويايه بالغرفة انلاصت عليچ يا جنات..

-مالك: هسة ما گلتيلي تنامين فوگ لو جوه حتى ادخل جنطتچ وترتاحين

-جوه

-تمام

اخذ اغراضي للغرفة وصاحلي حتى ادخل ابدل وارتاح، طبيت للغرفة تخبل وتفتح نفس أي واحد بس شبيه انكرب گلبي وراح ابچي، ترخص مني وگال يروح يبدل وراهة للمكتب مالته خفت اضعاف شلون راح يعوفني وحدي كل يوم هنا ويطلع للشغل؟..

نزعت شالي وطلعتلي تراك برمودة لازم احاول اكون محترمة باللبس هنا عيب فشلة من الرجال ببيت فاهد چنت لازگة بصاية افتر بيها بس هسة شسوي وملابس البيت مالتي كلهن مشلتحات ومخازي شورتات وكيمونات وسوالف طايح حظها ما مخلية شي بنفسي احب اللبس واستمتع واتمكيج ماطول مو حرام ما اخليها بخاطري..

سبحت وطلعت اللبس بالتراك باوعت لروحي بالمراية والله ضيگ وصاير ربع ردن خاف عيب؟ خاف راح ينتقدني؟ بس لا لا هذا بيتي صار ولازم يتعود ميهمني، مشطت شعري ورطبت جسمي وتعطرت وگعدت مثل الططوة انتظر اللاشيء..

انمطلت على الفراش اصفن بالسگف.. مرت ساعة نعست وجفوني ثگلت باوعت للساعة عبرت الـ 11:00 بالليل احنه تعشينا بالطيارة بس هم جعت الله مال راس باچة هسة..

انطرقت باب غرفتي على كيف نهضت نفسي اگعد على حيلي وصحت..

-منوووو

جاوبني من وره الباب بهدوء..

-مالك: ماكو غيرنا بالبيت ليش تصيحين؟

-منوووو انتَ

-جناات!!

-هثة غير يگول منووووو

-وجعوووو اني مالك!!

-ويييع ماريدك روح

-ولج!

-روح روح شثوي بيك

-خوش!

فزيت اركض للباب من سمعت خطواته تبتعد مني عزا عزا صدگ راح هذا شلون بيه خاف ميرجع بعد واني اخاف انام وحدي.. فتحت الباب لگيته يمشي يبتعد من الغرفة صحتله..

-ماااااالك

-مسطيه!

-گلت مطططية؟؟؟

-شنو؟

-صحتلي مطيية! مو عيب عليييك

-انتِ ليش تصيحين من تحچين؟!

-هاا مو هدوء كلش ما جاي اثمع روحي

-انتِ گلتيها هدوء كلش ليش بعد متسمعين روحچ؟!!

-انتَ ليش متنرفز ملاك

-طلعي من الغرفة تعالي اكلي

-مو جوعانة روح اكل انتَ وثليمة وحدكم!

-منو؟؟

-ثليمة صديقة كيان المقربة!!

-سليمة مو هنا گتلچ احنه وحدنا

-اي ادري، اگلك اني جوعانة

-مو گتلچ تعالي اكلي!!

-مو مبين گوة عليك وماحب اثگل على احد

-لا ما مثگلة عليَّ!! تعالي اكلي وخلصيني!!

-انتَ شبيك ما جارعني وديني لبيت فاهد احثنن

-متردين تاكلين؟؟ تمام ابقي بالغرفة لا تطلعين راح يجون جماعتي عدنا شغل

-كلكم خلگ ططوات وراح تنجمع

-فوتي للغرفة

-شلون واني جوعانة

-جناااات طلعي اكلي وسكتييي

انهضمت من اسلوبه ينتر بيه وما طايقني ما تحملت احس گلبي انفطر وتطشر ووگع ببلوعة الحمام.. بدون كلام رجعت للغرفة وطبگت الباب ورايه بوجهه بدون لا احچي شي..

گعدت مطنگرة وحدي اكش ذبان وهمي بس ما طولت طنگورتي اكثر من ربع ساعة وانفتحت باب الغرفة بدون لا تندگ گمت على حيلي من دخل مالك وبيده طاولة تنسحل نفس مال الفنادق بس صغيرة وحاط فوگاهة مجموعة مواعين بيها اكلات..

-جنات: نعم؟

-مالك: اني اسف

-على شنو

-لان عاملتچ بطريقة سيئة، حقچ تضوجين مني واعرف هذا مو تبرير منطقي بس اني مضغوط هالكم يوم وهذا السبب ماريد احچي وياچ حتى ما اضوجچ بعصبيتي

-ماريد اكل شكراً

-جنات

-ما زعلت عادي بث مو جوعانة

-لا جوعانة يله تعالي اكلي!

-ماريد والله

-گلت اكلي!!

-انتَ ليش تتأمر؟

ذب نفس متعب واضح عليه شگد مضغوط وتعبان مسح على وجهه وقرب الطاولة عليَّ وگال بأبتسامة گوة رسمها..

-اكلي جنات مو زين عليج تبقين جوعانة اني خايف على صحتچ

-تمام، شكراً

-العفو

طلع واني گعدت اكل راگعة الدنيا بچلاق، جايبلي اشكال والله خوش يدلل اكلت لحدما بطني احسها راح تنفجر گمت اغسل وتمددت بالفراش اريد عيني الغبرة تغفى ماگدر عبالك تعرف ماكو احد يمي، ضجت من ريحة الاكل بالغرفة گمت واخذت الطاولة اسحل بيها ارجعها للمطبخ..

-ابوووو فاضيييييييييل

گلبي وگف من شفت ضبة زلم كلهم لابسين اسود من فوگ ليجوه مفتولين بالعضلات گاعدين بالصالة واسلحة مطشرة كل مكان وثنين لازمين مسدسات وموجهيها على مالك المتوسطهم..

من الهبطة حسيت راح يغمى عليَّ نسيت روحي ما لابسة حجاب ونسيت اني هنا بغربة ونسيت مالك بكبره اريد بس اشرد بروحي العزيزة، عفت الطاولة بنص الطريق ورحت اركض للغرفة وقفلت الباب عليَّ..

-دخيلچ يا البنيين دخيلچ يا فاطمة الزهراء اني وييين

گلبي يرگع رگع ردت اموت من اندگت باب غرفتي بقوة وعصبية، يمة دخيلك يابو فاضل شلون بيه وين جابني هذا يردون يسلبوني ويكتلوني ويطيحون حظي ويبيعون اعضائي وشعري!!

-فتحي البااااب

هذا صوت مالك يهمس بس عصبي، كللش عصبي دگ الباب مرة ثانية بقوة اكبر فتحت القفل ومديت راسي من الباب غلف وجهي بأيده الكبيرة ودفعني يرجعني للغرفة حطيت ايدي على گلبي وايد اصده بيها متحضرة لأي حركة تصدر منه..

-ليش طلعتي؟؟؟ انتِ تردين تموتين؟!!

-وين.. وين هذا.. عمت عيني.. عمت عينكم.. عمت عينك ولك شنو هاااي

-صوتچ نصي يمعوودة گتلچ ابقي بالغرفة لا تطلعين راح يجون جماعتي!!

-جماعتك يردون يكتلوك؟؟ شفتهم موجهين سلاح عليك بنص بيتك!! حباب طلعني مناا طلعني مارريد ابقى يمممك

-جنات اهدأي ما جايين حتى يكتلوني جاي نتدرب هنا ذولة اصدقائي!

-منين جبتهم ذولة من هجوم العمالقة!

-بس انطيني صبر ما ظل شي ويطلعون كله نص ساعة انتظري هنا بالغرفة بس يطلعون انطيچ خبر

-شافوني بدون حجاب شلون!

-غير انتِ طلعتيي مثل الططة بهذا لبسسچ گداام الزلم!!!

-اشم گفة ايدي همه بالصالة گاعدين هاي شبيك

-سكتتتي وطبي جووه

-ما اطب

لزم گذلتي الكثيفة بين ايده اخترعت عبالي راح يجر شعري وحضرت نفسي حتى ارجعله نفس الحركة بس فاجأني من گلبها وره يوخرها عن عيوني ويهمس بخفوت..

-صيري حبابة ولا تعذبيني جنة نص ساعة وطلعي براحتچ بالبيت

-لعد ليش وخرت گذلتي قلقتني

-شتت انظاري

-شمثوية المثكينة

-يله جنات ابقي هنا شوية انتظريني

-زين زين انتظرك بث مو يكتلوك يمعود دافع عن نفثك

ضحك وهز براسه اي وطلع من الغرفة، رجليه ترجف الهبطة بعدها بيه بس گلبي ما مرتاح يمكن مو اصدقائه وديچذب عليَّ؟ يمكن صدگ اجو يكتلوا هنا بس لحظة اذا يكتلو شلون خلوه يجيني للغرفة؟

الف فكرة والف سؤال براسي لو بس اعرف شنو يسوون بكل هاي المسدسات والاسلحة ارتاح، لبست شال من فوگ مستورة ومن جوه مشلتحة فتحت باب الغرفة على كيفي ومشيت على اطراف اصابيعي اعبر الممر المؤدي للصالة..

مديت بس عيوني اشوف احرص ما اخلي احد يلگفني.. عشر ثواني زومت وشفت كلشي گاعدين بالـ 12 واحد ومن ضمنهم مالك ياكلون شي وناس تضحك وناس بيدها اسلحة وتسولف وناس تتذمر، قسم يحچون انگليزي بلكنات مختلفة والقسم الاخر يحچون اجنبي.. بس ثنين منهم عراقيين موجودين وعرفت واحد اسمه نور وواحد حيدر..

-حيدر: هاي خيانة عظمى لا تغتفر مالك الا اگول لفاهد اخلي يلزمها عليك طول العمر

-مالك: على شنو؟

-حيدر: تچذب علينا وتفيك بروسنا ماجيب بنات لبيتي وما اطبب بنات چا هاي منو الطلعت

-نور: ولك هاي البلا مالته

-مالك: اسكت انتَ! كافي لحد يحچي جاي اشتغل

-حيدر: انتَ تشتغل احنه شعلينا مو زين عبرناك واجينا وفوتنا حفلة سالار

-نور: والله صح عود گلت نرد وحشتك عبالنا وحدك وضايج

-حيدر: نور بشرفك مليت من الگعدة سولفلي منو هاي البلا فايتني شي واني مادري؟!

-نور: بنت عمه بابا هاي التزوجها وورطوه بيها

-حيدر: هاااا تذكرت تذكرت حرامات ما شفتها زين ما ركزت بيها توقعتها وحدة ساقطة

صار صوت مال واحد يضرب الثاني بس ما عرفت هذا مالك رفس حيدر الا من گال بعصبية..

-مالك: حيدر انچبب!!

-حيدر: ههههه والعباس اتشاقه ما جاي احچي على البنية لان ما شفتها اصلاً بس احب اضوجك اخي، نور جواد كمل كمل

-نور: اوگف حيدر مالك انتَ گلت راح تروح للعراق تزوج وترجع تطلگ هنا شو بعدها موجودة؟

-حيدر: ليش تتزوج وتطلگ خو من البداية لا تتزوج وتكسر البنية!

-مالك: ممكن محد يدخل انفه بحياتي!

-نور: اووووي حياتي انفه

-حيدر: شلون ويه المثقفين احنه بابا اسمه خشم خشمم

-مالك: نفس الشي شباب عوفو السالفة طالعة روحي وضايج

-حيدر: يروحلك فدوة نور جواد وابو جواد والخلف جواد سولفلي حبيبي فضفض لا اروح لفاهد واكت الاول والتالي

-مالك: ماريد ادوخكم

-نور: دوخنا احنه نريد ندوخ.. گوم حيدر جيبلنا شي نشربه من الثلاجة ومالك سولف بالمغربي حتى تاخذ راحتك

-حيدر: هيووو مغربي شنو ما افهم انيي! حظي وگعني بين مغربي وجزائري اصلاً انتو تحچون عربي؟؟

-نور: طبعاً عربي لعد شنحچي

-حيدر: وابو راس الحار تحچون لغة ثانية مو عربي ولا يم العربي

-نور: يابه يله احچي بالانكليزي فرنسي اسباني بكيفك المهم خلصنا وسولف

-مالك: ذولة يفتهمون ماريد احچي گدامهم.. المهم ما راح اطلگ هالفترة انتظر ارجع املاكها وننفصل

-نور: حقك

-حيدر: ليش حقه شبيها البنية؟

-نور: صغيرة وصعب التعامل وياهة مالك مو جوه البنات الصغار يحبها واعية وعقلها چبير

-مالك: نور، حيدر سدوا موضوعها وخلونا نكمل شغل

-حيدر: چا شگد مغثوث منها شدعوة شدعوة مالك شسالفة!

رجعت للغرفة ضايجة ومخنوگة ليش ينطي بيه گدام جماعته لهدرجة اني مزعجة وكارهني؟ انقهرت كلش وگعدت أفكر بالموضوع ماحب اكون ثگيلة على احد ومبين هو ممتحمل وجودي بس شبيدي ووين انطي وجهي، نص ساعة وطلعو جماعته ورجعلي يسألني اذا محتاجة شي..

-جنات: لا شكراً

-مبين نعستي والوقت تأخر اني بالمكتب اذا احتاجيتي شي

-اگلك اوگف

-تفضلي

-تگدر تاخذني لمكان؟

-بهالوقت؟ وين؟

-لبيت كيان اريد اروحلها اشتاقيتلها

-ماشي باجر اخذچ هناك

-لا حباب اليوم اريد

-لا جنات عيب بهالوقت ترحين تلگيهم نايمين

-حباب مالك حباب لخاطري اريد كيان

-غير افهم ليش مستقتلة على شوفتها

-اريد انام يمها

-تباتين؟؟ لا ممنوع

-ليييش

-گلت ممنوع وبس!

-ماالك

-كاااافي جنات لا تعاندددين تعبت منننچ!!!

-شبيك تريدلك حجة حتى تعاركني وديني لبيت فاهد لو شُهيب واخلص مني لا تظل محملني منية گعدتي يمك!

درتله ظهري بمعنى اطلع ماريد اشوف خلقتك وهو افتهم وطلع من وحده، طبگت الباب وراه وگعدت على الچرباية حاصرتني بچية بس لو اموت ما ابچي من وره هالططوة!

عيوني تغفي راح اموت من النعاس، تمددت بالفراش احاول انام بس اغمض عيوني اتخيل شغلات تخوف وارجع افتحهن وهيچ بقيت بهالوضع المزري لـ ساعة جديدة..

غفت عيني وفزيت فجأة خايفة من شفت ضوه الغرفة مطفي ومتغطاية.. گمت مرعوبة ركضت على الضوه ارجف واتلفت ماگدرت ابقى بالغرفة وحدي وطلعت للصالة شفتها صايرة بالثنتين بالليل..

رحت اشرب مي ورجعت للغرفة وهنا بعد ما تحملت وعيوني گامت تمطر دموع، احس بالوحدة والضياع ماعرف شسوي ووين انطي وجهي ومنو يسمعني.. لا عندي تلفون واتصل بـ كيان لو مسرة ولا اندل اماكن هنا.. مسحت عيوني من اندگت باب غرفتي..

-خييير

فتح الباب ودخل مبدل ملابسه وبيده كوب حليب موز، ابتسم وقدمه الي..

-گعدتي؟

-لا بعدني نايمة

-اشربي هذا بلكي يساعدچ على الارق

-ماريد روح

-جنات

مجاوبته ودرت وجهي عنه، تنهد وگعد على السرير بصفي وبقينا بهذا الهدوء لفترة..

-مالك: اني اسف لان صحت بوجهچ بس جاي امر بظروف صعبة هالفترة

غلست عليه من شافني ساكتة اردف..

-ادري مو ذنبچ بس الموضوع متعلق بيج واجيت اشاركچ بهالشي حتى تكونين بالصورة.. جنات يردونا ننفصل

بقيت منطيته ظهري امسح دموعي بالخنسة..

-ابوية يضغط عليَّ بكل الطرق جاي يحملني بشغلات صعبة وعادي اني متعلم على الضغط والتوتر والعذاب بس الوضع خرج عن سيطرتي وماعرف شلون ارهم كلشي بوقت واحد واذا اتأخر عن الشغل شوية يستفزوني بيچ ويدخلوچ بالسالفة وتتأذين

-انتَ ليش تريدنا نبقى متزوجين؟

-لان ابوچ متحلفلچ

-عادي متعودة عليه

-مو عادي يريدون يطلگونا حتى اني اتزوج فواطم وانتِ تتزوجين علي ابن عمچ

-شنووووو

-هذا الجاي يصير واني اعرف علي انسان همجي وعينه وصخة وراح يأذيچ فوگ اذيتچ وياي

-لو يموت ما اتزوجه!! ايييع علي اقرف منه اققرف واحد همجي مخبل ايده والكتل هي اخته تزوجت وما خلصت منه حتى تحرش يتحارش بيها!!

-صدگ؟؟

-اي والله مرة حچت لـ فيروزه اجت تبچي وتگللهة يجبرني على شغلات بث ما فهمت شنو هالشغلات

-شگد عار!

-اي كلش عار

-خليها تلزم عليه دليل ونطيح حظه وصليلها هالحچي

-شلون اوصللها واني ماعندي تلفون

-ليش ماعندج تلفون؟

-اخذ تلفوني ابوية من زمان

-لحظة

گام وطلع من الغرفة بقيت انتظره فترة ورجع بيده باكيت مال موبايل ايفون الاصدار الحديث، حطه بيدي وگال..

-استخدمي هذا هالفترة بعده جديد اجاني هدية من صديقي وما محتاجه اني

-الله تهدون تلفونات غالية لبعض؟

-كلشي نهدي لبعض هسة المهم حطي يمچ هالفترة حلالچ صار علما نطلع ونشتريلچ واحد جديد

-لا ماريد جديد اريد هذا احب الايفون

-تمام.. هسة اني كلش تعبت رايح انام تصبحين على خير

-لا لا لحظة اوگف

-محتاجة شي؟

-شوف مالك من الاخير بدون لف ودوران راح احچي وماعيدها بعد.. اني اخاف اي اي اخاف لا تباوعلي هيچ ماگدر انام وحدي اتخيل جني وشغلات تخوف وشغلات مرعبة واظل افكر قبل لا انام وابچي واحث روحي راح اموت وانوب اظل ابچي للصبح وما انام واحث راح انهار واگعد عيوني منفخة وشكلي يصير يخزي چني ططوة وابقى هيچ مثل خراعة الخضرة وابوية وبنات عمي يخترعون واني انقهر بالزايد واحث...

-على كيفچ على كيفچ

-اي

-فهمت تخافين هسة شنو المطلوب

-انام يمك

-تنامين يمي؟؟؟؟

-احم

-سمعت صح لو اني غلطان؟

-ثح

-مستحيل هالشي!

-لييش

-ماعرف انام ويه احد بغرفة وحدة اني من چنه بالعراق ما غفت عيني

-حباب حباب

تنهد ومسح على شعره محتار عشتو مو بحالك اني بس اااخ شگد انذليت هنا، باوعلي ما راضي وبادلته بنظرة امثل البراءة.. تنهد مرة ثانية وهز راسه معترض ثواني وگال بعدم رضا..

-تمام تعالي

انفرجت اساريري وگمزت من الفراش اروح وراه، مشينه عبر الممر وعبرنا الصالة انوب دخلنا ممر جديد وفتح باب غرفة صايرة من الجهة الثانية من البيت..

غرفته اكبر من غرفتي بهوااي اثاث الغرفة راحة نفسية يعرف ينسق هالرجال، تاج الچرباية فخم ومقدف يخبل والفرشة رصاصية ستن مال الطبقة المخملية والغرفة باردة وريحتها حلوة..

-مالك: راح انام على القنفة والفراش الچ

يبست بمكاني شلون راح اواجهه بالقنبلة الاكبر واگله لازم ينام بصفي وشرط يجعصني بحضنه يمكن ينجلط اذا يعرف..

-احم اگلك شنو رأيك هنا تنام

اشرت على الچرباية مالته وابتسمت ابتسامة واسعة مال لواگة.. هز راسه معترض وگال..

-لا انتِ اخذي راحتچ اني انام على القنفة

-لا لا والله باوع تره چبيرة الچرباية ماريدك تتبهذل خطية هذا فراشك اني بجهة وانتَ بجهة ننام هيچ وحلو حلو واحد يثولف ويه الثاني ومنضوج بعض والله حلوو

-لا ماعرف انام يم احد

-والله حلو

-لا مو حلو ماگدر انام اتقيد

-اقرالك قثة

-ماريد

-والله النومة ويايه تجنن

ضحك وره جملتي كيفت يمكن بده يلين كملت بنفس النبرة اللطيفة الچذبية..

-والله فد راح ترتاح ويايه

-ههههه ولچ اشش كافي

-والله ترتاح

-خرب

ضحك بصوت عالي واخذ مخدته وحطها على القنفة واشرلي انام على السرير..

-نامي عيني

-مالك!!

-ها

-شبيك انتَ شتحثث

-احس بالنعاس وراح انام وانتِ هم نامي

-اريد انام يمك

-هاي ليش تتحارش گوة

-هاي شبيك اخااااااف افهم عاد اخااااااااااااااااف اناااااااااام وحددددي اريدك تناااااام يميييي

-اهاا

-اي اييي

-لا تصيحين فهمت

-اي تعال نام فضني!!

رجع مخدته وتمدد على الچرباية واني هم طفرت بس اريد انااام راح انهار من النعاس..

-مالك: ماگدر انام بالقميص راح انزع واتغطى تمام؟

-مو..

-هاا بعد شنو اني گتلچ ماعرف انام ويه احد احب الخصوصية

-لا لا انزع عادي يله امري لالله

طفى الضوه ونزع قميصه ونام بديت اللوب هم ظلمة وهم احس بفراغ اريد احد يجعصني.. اتگلب بالفراش مثل السمچة المتزوحرة..

-نامي جنة

-ماگدر

-شنو تردين؟

-اريد افتح الضوه

-لااا عاد

-حباب حباب

-نامي ولچ كافي

-اخاف

زفر نفس قوي وفتح التيبل لامب، نام وانطاني ظهره انوب صرت اطفر مثل القرد المگمل، ماتحملت ونغزته بظهره، دار بس وجهه عليَّ اشرتله على ايده وهمست بخفوت..

-اريد

فتح عيونه مصدوم ونهض نفسه يگعد على حيله..

-مالك: شتردين؟؟

-باوع والله ما اتحرك واوكح بث اريدك تجعصني

-جنات

-بداعة امك

-امي ميتة

-بداعة ابوك

-خيولي ما يهمني

-بداعة فاهد المثودن شبيك مالك ذليتني اخـ....

-تخافين فهمت فهمت.. باعي جنات اذا ظليتي تحوصين لو تتحركين بين ايدي ما اضمنلچ شنو يصير وراهة مو تجين تلوميني بعدين!

-يعني شنو تثوي تكتلني؟؟

-اسوي الاتعس

-ما اثمحلللك

-انتِ صيري بين ايدي وخنشوف شلون متسمحيلي

-تكتلني اكتللك واموتتك والله

-دنامي نامي اني وين وهي وين

شهگت من جرني من زندي ونومني بين ايده جمدت ما اتحرك ممتوقعة حركته المفاجأة، غطيت بهدومي راح اذوب من الخجل راسي على زنده العاري وايدي مصعدتهن فوگ مثل العگروگ ماريد اللمس جلده جرهن ونزلهن يحصرهن بين جسمي وجسمه گمت ارجف مادري شبيه..

رفعت راسي شوية اباوع لوجهه ونزل راسه الي يأشرلي بوجهه بمعنى "شكو"..

-جنات: انتَ ثاقط

-هو منو النايم بحضن الثاني انستي؟

-اني بث مجبورة

-وي ابقي مجبورة

-انتَ واحد..

-نامييي

نزل راسي يدفنه بالمخدة حتى انام اختنگت بس خنست اسكت وصدگ نمت بسرعة ونومة عميقة مريحة كلش لان انجعصت جعصة مرتبة واموت على الجعيصة اني...

**

-الله كوري راح نكون شركاء سكن

-كيان: شركاء نعععل ما انام وياك بنفس الغرفة شوفلك غرفة ثانية!!

-فاهد: كيان تره هاي غرفتي خاف متدرين

-لا ادري

-ها يعني هم نزل وهم يدبچ حلو حلو

-فاهد ما طايقتك لا تحچي وياي!!

-هسة اني شسويت؟ واذا تكاتلت ويه مروان وتنمرت على نشوان وردت اسب فاضل وتذكرت هذا سيد ويشور بيه شبيچ كيان لا تعظمين المواضيع

-فشلتنا بنص المطار تتصايح وتتعارك من ولا شي شبيك متخبل شبيييك

-ما متخبل

-يوم زين وعشرة عقلك طاير كاافي فاهد تعبت منك ومن تصرفاتك الا اطلگك وارتااح منك بس اصبري انتَ طا...

-لا بشرفچ لااا دخيييلچ ستري عليَّ التوبة بعد ما اعيدهااا

-اسكت لا تحچي متستاهل زوجة مثلي بس شسسوي اصبر واتحمللك الله يخلصني مننك

-اگلچ انتِ هسة طلگتيني لو لا؟

-شمدريني گلتها اني؟؟

-مادري شو ما انتبهت

-عزه خاف طلگتك فاهد

-يجوز.. اوگفي ابوية يتصل

جاوب تلفونه واني بقيت اعصر بعقلي اتأكد گلتها لو لا ياربي خاف گلتها وتطلگنا صدگ؟ زين شلون ارجعه على ذمتي والله حيرة..

-فاهد: لا ماگدر اجي يابة... كيان طلگتني واني بالعدة هسة

-كيان: ولك اشش شبيك

-فاهد: لا يابة حرام ميجوز اطلع غير عدتي ستة اشهر محد يشوفني بيها؟

-كيان: تره هنه ثلاث اشهر!!

-فاهد: لا ولچ صارن ستة لان اني رجال

-كيان: فاهد كافي سد التلفون

-فاهد: يابة اني رايح لان طليقتي جاي تأمرني اسد التلفون

-كيان: شيخلصني من ابووك سده كافي

-فاهد: انچبي ما اسمحلچ تحچين على ابوية تاج راسچ.. هاي لان اني يتيم تستفردين بيه حرام عليج مو الدنيا تدور بس ماگول غير الله يطلع حوبتي بيچ يا كيان بنت سلوان

-كيان: اي اي خوش

سد الاتصال ويه ابوه وراح يتمدد على السرير، تخصرت ووگفت انتظره يگوم او يدليني على غرفة احط بيها اغراضي متت تعب وصارلنا ساعتين ونص نتعارك او خليني اگول اني اتعارك وهو بس يحشش ويضحك فرگس گلبي..

-هسة وين انام اني؟

-بكيفچ تردين هنا لو بالصالة

-انتَ مو عندك تسع غرف انطيني وحدة

-مقفولات

-اي افتحلي وحدة

-اسف ماگدر

-ليششش

-ما يعجبني

-فاهد حرام عليك تجبرني انام هنا ماريدددك

-ولا اني اريدچ بس ماعندي غير حل

-تره كومة غرف اكو لا تسويها ظلمة!

-گتلچ مقفولات وما افتحهن!!!

عصب وتغير شكله عجيب شلون تتغير نبرته وصوته واسلوبه كله من خلال كلمة استفزته، نفخت هوا متنرفزة وچتفت ايدي لصدري..

-رجعني لبيت اخواني لعد

-اموووت وما اروح لبيت اخوانچ العاارات

-وديني لـ شُهيب!!

-اخذچ للگبررر احسن

-لعد اخذني لبيت مااالك وجناات

صفن شوية ورفع رجله يحط رجل على رجل وهو متمدد بمكانه وابتسم وكأن عجبته الفكرة، هز راسه بـ اي وگال بحماس..

-خوش فكرة خلينا ننام كلنا ببيت واحد اوگفي اتصل بي ادعي يقبل نروحله

اخذ موبايله يتصل واني وگفت بصفه انتظره يجاوب بلكت يجيني الفرج، دگ مرتين ما جاوب مالك دگ الثالثة وهم ما جاوب شمر الموبايل ورجع تمدد..

-يمكن ويه الحب هسة عوفي لا نقاطع متعتهم

-منو الحب؟؟

-جنات يعني منو

-مالك يحب جنات؟

-لا بس عادي تلگيهم سوه ويسوون باح باح

-شنو باح باح؟

-اراويچ؟؟؟

-لااا ماريد وخر، اگلك جوعانة گوم جيبلنا اكل

-لا ماگدر كيان عذريني

-ليش شعندك؟

-مو اني بالعدة شلون اطلع

-هاااا فاهد صدگ تذكرت تره ما گلت انتَ طالق كاملة اني

-لا گلتيها

-والله ما گلت

-گلتي

-يله ما دام گلت رجعني لاخواني

-لا ما گلتيها

-گلت

-لا ما گلتيها متأكد

-يله لعد گوم جيبلنا عشا

-تأمرين امر كوريتي

اتصل بشخص وگله جيبلنا عشا نص ساعة ووصل، اجت مساعدته الچلبة شگد حاقدة عليها اتذكر شلون سحسلت بيه بيوم العقد تنگط سم بس ميخليني احچي عليها يحبها..

جهزت الاكل وگعدنا ناكل بالصالة گدام التلفزيون نتابع فلم رعب اخيراً لگيت شي مشترك بيناتنا وهو ثنينا نحب افلام الرعب وبرامج المصارعة..

-فاهد: هالفلم الا يشگ شگ

-كيان: شايفه من قبل؟

-اي تابعي تابعي

بقينا نتابع ومن فلم لفلم للفجر احنه گاعدين حاط حبشكلات گدامنا ناكل ونتفرج، عبرت الخمسة الصبح ما تحملت بعد من التعب غفيت بمكاني، حسيت على شخص يحط ايده جوه جسمي يلمسني بوصاخة، فزيت مخترعة ودفرت ايده عني..

-حقييير

-بالغلط والله

غفيت مرة ثانية ورجعت حسيت اني بين ايدين فاهد شايلني ياخذني للغرفة، ما حچيت شي وبقيت نايمة لحدما نزلني على الچرباية غطاني وخفف الاضوية وحسيته يگعد بصفي وأنفاسه تلفح وجهي وشفايفي..

-كيان: اموتك

-فاهد: هههههههههههههههههههههههه

مسحت عيوني ووخرت شعري عن وجهي، كفخت وجهه بالخفيف وگلت بتذمر..

-ضايج يضحك فرحان يضحك زعلان يضحك متحمس يضحك عفية بني ادم ماعنده غير الضحك بحياته

-ليس الشقاء هو البكاء وليست السعادة هي الضحك

-وصاير تتطي حكم ومواعض حلو

-اعجبچ كوريتي

-فاهد

-عيونه الصفر

-روح نام

-تمام

تعجبت من فعلاً تركني وطلع من الغرفة توقعت راح يرجع لان مستحيل يعوفني بحالي بدون لا يزعجني بس لا ما رجع وبقيت وحدي اخيراً...

مر اسبوع سريع واني ببيت فاهد وللغرابة الشديدة العيشة ببيت فاهد مو بذاك السوء، صح يومية نتعارك ونتكاتل ونتماطل وواحد يكفخ بالثاني هو يزورگني واني ازورگه وميحس بس لا بأس لا بأس اليوم ديمشي لكن نأمل تخلص هالفترة على خير ويبقى هادئ وميتخبل..

نسهر للصبح نتابع افلام وناكل وحتى المساعدة تگعد ويانه تتمدد على القنفة وتغفى بنص الفلم وفاهد يشيلها يوديها بغرفتها، اضحك على تصرفه هي مرة چبيرة بس يعاملها بحنية وابد ميتأمر عليها ويجبرها تشتغل هي تسوي كلشي من وحدها وتعامله بطريقة حلوة..

من نتعب نروح ننام هو بغرفة واني بغرفة، غرفته حذرني اكثر من مرة ما ادخللها وبالطبة والطلعة يقفلها ما انطيت اهمية ولا صار عندي فضول اشوف شنو اكو هنا حتى من يطلع اوقات بنص الليل بشغل مستعجل وينساها مفتوحة هم ما ادخل..

اليوم راح ارجع للجامعة ومالك راح ياخذني بطريقه ويمكن ياخذ جنات هم حتى يسجلها، وگفت گدام المراية ارتب ياخة قميصي النيلي وبعدها لبست حزام بنطروني..

-المهندسة كيان المحترمة

اللتفتت على صوته واگف وساند جسمه على الباب لابس كيمونة بيضة عريضة ومچتف ايده لصدره بارزات عضلاته ووشومه بشكل مخيف..

-كيان: بعد متصيحلي كوري ولا كيان كله المهندسة كيان

-فاهد: لعد اني صيحيلي الدكتور فاهد

-هه وينك وين الدكتور

-ليش؟

-انتَ مال دكتور؟ انتَ واحد مجرم شقاوات زايد عليك

-شكراً

-لا تزعل هاي الحقيقة

-وليش ازعل واني اعرف هاي الحقيقة؟

هزيت راسي اعدل بگذلتي المقصوصة عدل واخذت حمرتي الوردي ارسم شفايفي..

-صدگ فاهد انتَ شنو دارس؟

-ادارة اعمال

-ها يعني عندك شهادة

-اي وجاي احضر لاطروحة الدكتوراه

نزلت الحمرة من ايدي وصفنت عليه من المراية اتأكد هذا ديتشاقه لو صدگ يحچي..

-كيان: مستحيل اصدگ

-ليش

-مادري ما احسك مال دراسة

-صح

-يعني دتچذب عليَّ مو؟

-هههههههههه مو

-هاي شبيك فاهد واني صدگت والله وغرت منك

-ههههههههههههههه

-الا اخذ الماجستير والدكتوراه واصير دكتورة بالهندسة واصير مثل مسرة قيثارة وشُهيب

-تصيرين احسن منهم

-هيچ رأيك؟

-اي

-شكراً شكراً انطيتني طاقة حلوة يله اني اروح يمكن مالك اجه لان ديتصل عليَّ

-ما راح ياخذچ مالك السايق واگفلچ بره

-لا هذا مالك ديتصل.. (جاوبت الاتصال) الو هلو مالك.. صباح النور... متاخذني؟.. ليش؟... هاا.. ماشي

-ها؟

-اعتذر مني يگول جنات مالها خلگ تروح للجامعة مريضة وهو صار عنده شغل

-اي السايق بره منتظرچ اخذي رقمه واتصلي بي يرجعچ

-تمام

اخذت جنطتي وطلعت من البيت ويه السايق، وصلني للجامعة ورحت لقسمي استقبلوني صديقاتي يباركولي بعد عيني ويجرن بأيدي حتى يشوفن خاتم الالماس الي شمسون جبرني اللبسه..

-كيان شو بيشتغل زوجك مبين زنگين

-كيان: احم.. رجل اعمال

-ممكن نشوف شكلو

-ماعندي صورته

-معئول وصور العرس؟

تذكرت صور عرسي الخزي مستحيل اراويهن لاحد على الحركات التفشل السويناها تملصت منهن گوة ودخلت القاعة انتظر الدكتور.. بدت المحاضرة وعلى النص اجه بروفيسور هندسة الاسس يقاطع المحاضرة ويطلبني اروحله..

گمت بگلب بارد توقعته ديريد يسألني عن سبب اجازتي وليش طولت وراح اضطر اعيد الكورس من جديد بس طلعت توقعاتي غلط! غلط لدرجة گلبي وگف من گال بلغة البلد..

-كيان اني مصدوم واتمنى عندچ تبرير منطقي على الصار

-كيان: شنو قصدك بروفيسور

توترت من شفت حماية الجامعة يحومون گدام مكتب البروفيسور منتظرين كلمة منه، خرطت روحي من مدلي ايباد عارض بي فيديو الي اني وثامر واگفين وره القسم جوه شجرة بالحديقة ندخن واني انطي لـ ثامر كيس اسود مقدف مال مخدرات!

-البروفيسور: زميلچ ثامر مات من فترة واتوقع تعرفين بهذا الشي صحيح؟

-اعرف

-عرفتي شنو سبب موته؟

-ها.. لا ماعرفت

-مات اثر جرعة مخدر زايدة كيان.. هسة احنه ماعدنا معلومة منين جاب المخدرات وشلون حصلهن خصوصاً هذا النوع ميتحصل بسهولة لانه جداً غالي ويستخدموا ببعض العمليات الجراحية فوق العظمى.. سؤالي هو شنو چنتو تسوون اسفل هاي الشجرة؟

بلعت ريگ وحاولت گد ما اگدر اسيطر على رجفتي وصوتي واعصابي التالفة، ترددت لثانية قبل لا اگول..

-بروفيسور دندخن عادي حالنا حال الاف الطلاب

-شنو هذا الي انطيتي لثامر؟

-ماتذكر

-ارجو منچ تجاوبين بصراحة لان اكثر من علامة استفهام عليج واكثر من فيديو وصلني الچ

-ما جاي افتهم بشنو جاي تتهموني؟

-جاي نستفسر هذا مو اتهام واريدچ تجاوبين بصراحة تامة بيني وبينچ قبل لا تدخل الشرطة لان قضية ثامر انفتحت من جديد بعدما تطمطمت بشكل سريع واول المشتبه بيهم هو انتِ لان اخر اتصال بجهازه چان رقمچ ولسبب غريب محد استدعاچ تحقيق طول هالفترة الفاتت بس اهل ثامر مُصرين يفتحون ملف القضية من جديد

-اني ماعرف شنو تريدني اگول

-الحقيقة اريد منچ الحقيقة ولا تخافين لان الحقيقة راح تظهر بالنهاية واذا طلع الچ ايد بالموضوع حسابچ عسير راح تنسجنين كيان ويتدمر مستقبلچ وهالشي راح يزعلنا لانچ طالبة متفوقة

-اريد اتصل بزوجي ممكن؟

-اكيد بس اتصلي هنا

گلبي يرگع بخوف راح انجلط الدم احسه يبس بعروگي لزمت تلفوني بأيدين راعشة واول شخص اجه على بالي اتصل بي هو فاهد ماعرف ليش بس حسيته ما راح يعوفني ويحاول يساعدني..

-هاا كوري

-هلو فاهد تعال للجامعة فدوة

-ليش شبيچ؟؟

-اني بمصيبة جاي يتهموني بشي تعال حباب دا انتظرك

سديته بسرعة قبل لا اسمع جوابه ورجعت التلفون بالجنطة، رجليه متحملني وروحي تفور شسويت بروحي اني شوكت اخلص من ثامر وتنتهي هالسالفة والله تعبت تعبتتت، مشى الوقت ببطئ ما حسيت على روحي واني اجرح بيدي من الخوف..

-البروفيسور: كيان العميد يريد يستدعي الشرطة ويكملون التحقيق وياچ

-كيان: لا لا عفية بس انتظروا زوجي راح يجي

-مو بيدنا هالشي مرت نصف ساعة وللان ما اجه

-والله هو بالطريق اني متأكدة جاي

دموعي صارت تجري من الرعب افرك بيدي وادعي ربي يستر عليَّ وتنحل السالفة بدون لا يصيرلي شي يضرني، فزيت من مكاني من سمعت صوت فاهد جاي من بره يحچي ويه الحماية..

ثواني ودخل للمكتب اني شفته لو احس شفت ابوية ركضت بلهفة وخوف وغصت بحضنه، حضنته من رگبته بكل قوتي شددت على الزنجيل اللابسه بيدي اعصره وابچي بحرگة ميتة خوف.. حاوط خصري بيده يبادلني الحضن وگال بصوت هادئ عكس العادة..

-شصاير كيان فهميني

-فاهد ساعدني فدوة فاهد

-گولي شصاير

-البروفيسور: حضرتك زوج مدام كيان؟

-فاهد: نعم، ممكن تفهموني شصاير؟

حچو بلغة البلد، باوعله البروفيسور ما عاجبه شكل فاهد ولا عاجبته الكيمونة البيضة العريضة اللابسها ولا الزنجيل ولا وشومه والترچية التلمع بأذنه كلهن يرمزون لانسان اله تاريخ عريق بالشقاوات والسوالف المكسرة..

-البروفيسور: تفضل مسيو خلينا نتفاهم

گعد فاهد بهدوء، هدوء رغم حالتي التعيسة بس استغربته حتى من حچى وياه البروفيسور وفهمه كلشي توقعته راح يثور ويخبص الدنيا لو يضحك مثل المجانين بس ما صار هالشي ابد چان يحچي برزانة وثگل وكأنه انسان ثاني غيّر نظرة البروفيسور وصار اكثر ليونة وبقوا يتناقشون لفترة..

-فاهد: انطيني دقايق اسوي كم اتصال وارجعلك

چلبت بيده ما اخلي يروح وعيوني تحرگني من البچي..

-كيان: لا تعوفني

قربني منه وباس خدي بخفة ومسح عليه بلطف..

-دقايق وارجع كوري لا تخافين

سحب ايده مني وطلع بره المكتب يجري اتصالاته دقايق رجع وگال بثقة..

-فاهد: راح يجي والدي يحل الموضوع

-كيان بهمس: لا حباب لا تدخل ابووك يظل يستغلني بعديين ميسوي شي بدون مقابل فاهد حباب

-فاهد: انطيته مقابل لا تخافين

-شنو انطيته؟؟

-معليچ انتِ بس ارتاحي ولا تبچين بعد

-لو ما مدخلة راح تنلاص اكثر اني اعرف شمسون شنو

-فاهد بهمس: كيان وضعچ صعب راح تسحسلين محاكم وسجون وتنفضحين ضروري ادخل ابوية يتواصل ويه جماعته يحلولنا السالفة بكم فلس بالسكتة

سكتت ماگدر اناقش تعبت وتخربطت روحي ماعت حتى هوا مجاي يدخل لريتي ورغم وضعي الصعب البروفيسور ما قبل اطلع من المكتب اغسل يمكن عباله راح اهرب..

-فاهد: ما تشوفها متخربطة؟!

-البروفيسور: مو بيدي هالشي مسيو العميد انطى تعليمات وضروري نمشي عليها

-فاهد: حاامل زوجتي يمكن حامل ووضعها صعب انطيها مجال تتنفس بره لا يصير بيها وبالجنين شي!!

صفن عليَّ شوية وهز راسه ويأشر بيده تفضلو..

-البروفيسور: لا تتأخرون اكثر من عشر دقايق مسيو اتمنى تتفهم وضعنا

-تمام تمام

اخذني فاهد وياه بره للحمامات وغسل وجهي، وخر الكتر من شعري ولبسه بيده وصار يسويلي مساج لفروة راسي مادري ليش يسوي هيج بس كلش ارتاحيت ووضعي تحسن..

-كيان: اخاف انسجن والله اخواني يموتون

-ما تنسجنين هسة يجي شمسون ويحلها

-بله ما گدر يحلها؟؟

-بابا هالسوالف زلاطة عدنا راح تنحل لا تخافين

بچيت محروگ گلبي ماعرف وين انطي وجهي اتصل بـ شُهيب وافضح روحي لو اعتمد على فاهد واشوف شنو يطلع بيده؟

-كافي كوري لا تبچين مو زين على الطفل

-يا طفل؟

-انتِ حامل نسيتي؟

-يوووه فاهد

-ههههه لا صدگ احچي راح احل الموضوع وعد

-احلف

-وداعة عيونچ الكورية ههههههههههههههه

-وخر تافه

ضربت كتفه وضحكت امسح بدموعي، سحبني من خصري باوعتله مستغربة من حركته ونظراته رافع تك حاجب وابتسامة جانبية ماكرة مرسومة على ثغره..

-شبيك

-تضحك ووضعها زبالة شگد صلفة كيان

-ياااا

-بس تعجبيني تفيديا لازم گلبچ يكون ميت عود من تجيبين الطفل بالسلامة اخليچ تشتغلين ويانه

-لا ايع وخر شيشغلني وياكم انتو مجرمين واني مهندسة

-مهندسة بالمخدرات والجگاير صح صح

-مهندسة وغصباً عليك وراح تشهد نجاحي وتطوري

-منتظر هاليوم

-تستهزأ حضرتك؟!

-لا بالعكس فعلاً منتظر هاليوم وعد راح اوگفلچ بين الصفوف اصفگلچ واصوفرلچ واهز رگبه واگلهم هاي المهندسة كوريتي

-ههههههههههههه

-واجيب حمرتي هم مو تنسيها

-ما ناسيتها جيبها خليني اتعرف عليها ولو الله يساعدها راح تاخذ واحد مسودن

-اعقل علمودها

ابتسمت ووخرت ايده من خصري اعترف احب حبه لحمرته حب صادق ومابي اللاعيب، يمكن فاهد فاشل بالتعبير عن الحب واسلوبه عنيف وغبي لانه يشردها منه بكل مرة بس اذا چانت قسمته وراح تنسعد وياه وتغيره للافضل اتمنى ينجمعون..

طلعنا من الحمامات بعدما ارتاحيت شوية وتبسمرت بالباب من شفت شمسون يطلع من مكتب البروفيسور متأنق على اخر حباية وعطره يهفهف شكله وحيويته ولبسه ميطابق عمره ابد..

-فاهد: ها اها احنه بالحمام نبچي وابوية حلها بدقايق

-كيان: اخاف فاهد

-من شنو؟

-شمسون: هههااههههااهههااهههاا المسودن وكوريته هنا

-فاهد: حليت السالفة ابو شيبة؟

-شمسون: حليناها بس كوري انتِ هم على كيفچ عمو شبيچ يومية موگعة روحچ بورطة جديدة

غمز بآخر الجملة بلعت ريگ متوترة من ابتسامته الحقيرة المليانه معاني دنيئة وچنت متأكدة مو بس متأكدة باصمة بالعشرة هذا النذل ما راح يفوتلي السالفة على خير وراح يورطني بشي جديد وطلع توقعي صح!!

**

-تعاركت

-صبا: لا جديد

-مسرة: تره يغثني يعني شترديني اگله شكراً لانك تتصدق عليَّ اشوف بنتي مرة كل اسبوعين؟ لا حبيبتي هالسوالف مو عندي ارزله واطيح حظه واشوف ميس غصباً عنه!

-صبا: سرور على كيفچ وياه لا ينچلب عليچ ويروح يشتكي بالمحكمة

-مسرة: لا لا اكرم مو مثل باقي الزلم ولچ هذا خيخة اذا متدوسين على راسه بالقندرة ميمشي عدل

-صبا: خيولي لا تجيبين طاريه وتضوجينا.. تدرين من رجعنا من العراق لسه جسمي متكسر تعباانة كلش

-مسرة: حتى اني وضعي مخربط صار اسبوع راجعين ولليوم ما رتبت اموري ويه هموسي

-اي غير سافر

-صح واليوم راجع اخيراً اشتاقيتله

-هههههههه زواج على ورق اي اي

-وهو فعلاً زواجنا على ورق شنو الجاي يتغير اني ببيت وهو ببيت ووضعنا نفسه

-صبا: هاي منو؟

اللتفتت اباوع لشاشة الكامرات وانكتم صوتي ويه شوفتها تدخل الشركة.. ماتذكر اسمها كالعادة بس اتذكرها هالنخلة عدل ومستحيل انسى ملامحها الروسية هاي خطيبة شُهيب!!

-مسرة: هاي نعالة شُهيب السابقة

-صبا: خطيبته؟ بس شعدها جايه هنا؟

-يعني ليش تكون جاية لشركة خطيبها السابق صبا! غير حتى تشوفه!

-ولچ دتجي لاتجاه مكتبچ اني راح افلت مالي خلگها

طلعت بسرعة واني بدون كلام نزلت اللبس حذائي العالي الي انزعه كلما اگعد وگعدت منتظرتها تدخل بداخلي فرحة لان شُهيب مسافر لغير مدينة علمود شغل خاص بي وما راح يلتقون بس عبست من استوعبت هالشي ما راح يمنع لقائهم بغير وقت..

-مسرة: تفضل

فتحت الباب ودخلت بطولها الفارع وجسمها المثالي هيئتها تؤكد كونها عارضة ازياء محد راح يصدگ هي مهندسة خصوصاً مع ملابسها الفاضحة ووجهها ناصع البياض وشعرها الاشقر.. شكلها يصرخ اني جميلة واشگ شگ غصباً عليكم واني گوة لازمة روحي لا اروح اشگها شگ واطلع حرگتي بيها!..

-نورسين: بونجور

-مسرة: اهلاً

-نورسين: شلونچ آنسة مسرة قيثارة

-مسرة: "مدام مسرة".. بخير انتِ شلونچ

-نورسين: مچنت اعرف تزوجتي؟

-مسرة: ما صار اسبوعين

-نورسين: على الخير حبيبتي، اجيت اشوف شُهيب وين اللگاه تعرفين؟

-مسافر

-صحيح بس گلي راجع اليوم وراح يداوم

-گلچ؟

-اي قبل شوية اتصلت بي وبلغني

-اها

-بس يجوز بعده ما وصل يله اروحله لبيته عفواً حبيبتي اخذت من وقتچ

-ترحيله للبيت؟ هيچ علاقتكم قوية؟

-اي شُهيب خطيبي السابق

حچتها بأبتسامة برزت اسنانها هسة لو تگلولي مسرة شنو امنيتچ بالحياة؟ اگلكم اشگ حلگ هالقردة الگدامي!

-مسرة: اذا تردين انتظري هنا ماكو داعي تتعنين لبيته شوية بعيد عن الشركة

-نورسين: لا متعودة اروحله عادي مشتاقة لشقته الكيوت

-مسرة: اتوقع لليل ياله يرجع

-نورسين: عادي انتظره لليل

-خاف تتعبين يرجع لوقت متأخر

-تعودت على التعب وياه ههههههه

اوكي اوكي.. شهيق زفير مسرة.. يله حبي شهيق وبعد زفير اهدأي ما راح تعصبين ولا راح تگومين تدچيها ولا راح تموتيها خنگ بسبب جملتها الاخيرة بصوت متلاعب الي بس المطي ما راح يفهم قصدها شنو چان..

والي ديتسائل هل نورسين تعرف اني وشُهيب متزوجين على الاغلب جوابي راح يكون لا! لان للان ما علننا عن الزواج لدرجة اكو موظفين ويانه بالشركة ميعرفون..

-نورسين: باي حبي

طلعت والضحكة شاگة وجهها دخنت من العصبية يعني توقعي طلع صح وشُهيب عنده علاقة بخطيبته لدرجة يتخابرون ويتشاوفون وتروحله لبيته! تف على ابوك الكلب شُهيب ابن نعلون!

كلشي ما عرفت اشتغل عقلي كله ويه ذيچ القردة شتريد بالضبط؟؟ معقولة تريد ترجعله؟ او همه ديفكرون يرجعون لبعض واني صرت بيناتهم.. لا يمكن تريد منه مساعدة او شي خاص.. بس لحظة شنو هالشي الخاص الي راح تروحله لبيته وتبقى لليل تنتظره!

-على كيفچ يمعودة اظافرچ خلصن

بهتت بوجه صبا هاي شوكت اجت وشوكت دخلت للمكتب ما منتبهه عقلي فاصل.. باوعت للساعة عبرت الـ11 بالليل واني بعدني بالشركة ما حاسة على روحي وصبا هم هنا!!

-صبا

-گول ضلعي

-شتسوين هنا الوقت تأخر وخلص الدوام ليش ما رجعتي للبيت

-والله يا حبي ردت اطلع وطبيت اشوفچ لگيتچ سارحة وتاكلين بأظافرج وترجفين خفت يصير بيج شي وحدچ وگعدت انتظرچ ترجعين لوعيچ

-لا صبا اني ما مهتمة خيولون طُزززززز بيهم طُزززززززز

-همه منو؟

-شُهيب وقردته

-شسووا؟

-راح تروحله للبيت اصلاً يمكن هي ببيته هسة الله ياخذهم

-القردة ببيته وانتِ مگابلتني هنا؟؟! مترحين يغبررة مترحين يا زماالة!

-اروح؟

-طبعاً ترحين غير زوجچ هوو

-مو هي متعرفنا متزوجين

-واذا؟؟ هل هالشي راح يبطل كونكم متزوجين!!

-لا اكيد

-لعد روحي وصدميها بالحقيقة ومن الباب جري وبوسي هم!

-لا ولج ميصير استخف

-لعد صارلچ اسبوع ما شايفته ميخالف حضني

-لا احس لا ميصير اروح

-مسرة!!

-ها

-وسمااا بگلبچ المزنجر من شوكت تترددين هيچ ووضعچ يتخربط وتخافين! امشي روحيلهم وصدمي عيشتها لهالقردة بشوفتچ وشرطط تباتين ببيته اليوم!!

-لا صبا احس عيب ابات

-كااافي انچبييي بطلي هالسوالف!!

-مو اخاف اروح وانصدم بشي

-شنو هالشي؟

-مثلاً اشوفهم بوضع مو حلو والله راح اكره شُهيب وبعد ما اطيق شوفته حتى من الشركة انسحب!

-ما دامچ خايفة واجهي خوفچ وروحي شوفيهم بيا وضع حتى تتخذين اجراء ومتبقين يا غافلين الكم الله مسرة انتِ لازم تعرفين مسار علاقتهم وما تبقين عايشة باليمكن ويجوز اني اخاف عليچ تكبر مشاعرچ وتنصدمين صدمة اكبر بعدين

-هيچ برأيچ؟

-هيچ ونص! بابا هذا هموسچ شلون تعوفي لوحدة ثانية تشگ العيون مثل نورسين!!

-تفففف عليها شگد حلوة

-وشگد تعرف تلبس!

-شفتي شعرهااا چنه وصلة مسح صفرة!!

-قصدچ چنه شعر باربي اي شفته

-وطولها چنها طنطل!!

-قصدچ طول عارضات الازياء اليشئون شئ اي شفته

-لو مياعتها وتغنجها وحركاتها وشلون تگلب بعيونها الخضر چنهن عنبات خايسات!!

-قصدچ چنهن....

-صبا انچبي!!! ما جاي تساااعدين ابدددد

-حبي اسفة بس اني ما اچذب انتِ جاي تفترين على هاي القردة الشگرة الجميلة

-سكتي سكتي گلبي راح يوگف علگ سكري من وراهة

-مبين عليج متخربطة گومي ولج اخذي علاجچ وطيررري لبيت هموسي طيحي حظهمم

-رايحة اطيح حظهم راايحة

-عفية صيري سباعية بس الثقة اهم شي تبقين واثقة من حالچ حبيبتي لا تبينين انتِ غيرانة ولا معصبة امشي برهاوة وهدوء كأنچ رايحة لموعد غرامي

-وخررررررررري عنييييييي

-اسم الله الرحمن يمة شبيچ بس يله يله هاي اثار الغيرة

اخذت جنطتي وقبل لا اطلع لزمتني صبا تخليلي روج احمر وطوخت عيني بالكحلة.. مشطت شعري السرح بيدي وتعطرت سبحت سبوح بالعطر حتى لو رايحة اخوض حرب ويمكن ما اسيطر على روحي واذبح نعالسين هناك بس لازم اكون مرتبة وانيقة مو حلوة بحقي البهذلة..

ركبت سيارتي الرياضي وطررت والله طرت لبيت شُهيب طلعت اللوكيشن مالته اتذكر دزلي عنوانه قبل كم يوم علمود يوصلون شي لبيته ومشيت على الخريطة، ربع ساعة ووصلت گلبي يدگ بجنون وانفاسي انگطعت ارجف.. حرفياً ارجف من فوگ ليجوه من غيرتي الغبية الراح تموتني شي يوم!

عيوني بدت تغوش وراسي صدع سكري علگ اخذت علاجي وطلعت مي اشرب شوية واحاول انظم دقات قلبي وارجعلي النظر.. ثواني وطلعت من السيارة ارسم ملامح البرود على وجهي واني داخلي محترگ وراح يحرگ أي واحد يصير گدامي!!

شقته بالطابق الثالث صعدت الدرج برجلين ترجف وكمشت بالمحجر بأيدين بايدة ما احس بوجودهن.. اي اني اغار عليه واني مريضة بالغيرة ماقبل احد ياخذ شي خاص بيه ولا يباوعله ولا حتى يلمسه احترگ واموت وافحم واعطب واحس گلبي راح يوگف مثلما ديصير هسة بالضبط!..

وگفت بباب الشقة وباوعت للساعة بالـ 11:45 دقيقة.. دگيت جرس الباب وانتظرت فترة لا بأس بيها وللان محد فتح.. الف لا مو الف مليون سيناريو وقصة صارت ببالي راح افقد اعصابي واوگع هنا وچان وگعت فعلاً لوما انفتحت الباب..

طلع شُهيب شعره مخربط ولابس قميص زيتوني مفتح وبعيونه النوم، ثانيتين ياله استوعب وجودي وگال بصوت مبحوح من النوم..

-مسرة؟

-هلو

-صاير شي؟؟

-اي

دخلت بدون استأذان لبيته دفعته شوية عن الباب وطبيت للصالة عيوني تدور تدور تدور تدور راح تطلع من وجهي اريد اللگف أي شي أي خلل او خطأ أي اثر لانثى!

-شُهيب: قلقتيني شنو صاير؟

-لا ماكو داعي تقلق انتَ وين چنت؟

-هنا قبل شوية وصلت

-ونمت فوراً يعني؟ لان مبين گعدتك من النوم اسفة

-اي نمت

-شبيك ليش خشمك احمر؟

-مريض شوية

-ها يله همزين اجيت حتى تسويلنا شوربة

ابتسم ومسح على شعره يرتبه سد اخر دگمتين من قميصه وترك الباقي مفتوح..

-شُهيب: اني اسوي؟

-مسرة: اي انتَ

-هو مو لازم بالعكس

-صح بس اني ماعرف اسوي وانتَ مريض لازم تاكل شوربة واني وجودي حتى انطيك تعزيز واشجعك تسويها

-شنو هالتعزيز بله

-اصفگلك واهوسلك.. هَييي هَييي عفية بشهوبي هَييي هَيييي يله هموسيي هَييي هَييي يله يا وليدي هَييي هَيييي...

-هههههه وصلت الفكرة

-يله يله نسوي شوربة تحمستتتت

-قصدچ اني اسوي شوربة انتِ گعدي وارتاحي هنا

-هموسي صدگ نسيت اسأل هم اجاك احد اليوم؟

-لا ليش

-هاا عبالي اجاك فاضل

-فاضل؟ ليش يجيني؟

-هيچ علمود سالفة بالشغل يلة اني راح ابدل واجيك

-تبدلين!

-اي نسيت اگلك راح ابات هنا اليوم لان ابوية سافر واحس بوحشة تقبل ابقى هنا؟

-طبعاً اقبل البيت بيتچ

-شكراً، زين ماعندك ملابس نسائية هنا؟

-وليش يكون عندي ملابس نسائية مسرة

-يعني مثلاً مال كيان، امك، خطيبتك الجربة السابقة؟

-هههههههههههههههه استغفر الله ياربي ضحكتيني واني ميت تعب

-مو زين

-اكيد زين، لا مسرة ماعندي ملابس نسائية تگدرين تلبسين شي مني

ايدت الفكرة بس اريد ادخل لغرفته اتأكد من شي، طبيت شفت فراشه مخربط مبين چان فعلاً نايم والغرفة نظيفة مابيها أي شي دنيء.. فتحت كنتوره ابحوش بي عندي فضول احب اشوف ترتيبه وتنسيقه اللطيف وقت طويل اخذت واني اگلب بملابسه واشم بعطوراته الهادئة الحلوة بعدين تذكرت لازم اشوف شي اللبسه.. طلعت قميص اسود وبجامة شلتهن بيدي اشوفهن شطولهن ماعرف شلون راح اللبسهن..

لبست القميص وصل لفوگ ركباتي ضحكت على شكلي المبهذل ولبست البجامة وياه تسحسل كفيتها و ضحكت بصوت اعلى من مشيت خطوتين وخرطت مني تنزل..

-هههههههههه شُهيببب ملابسك عملااااقة

مديت راسي من الباب اشوف وين راح لان مبين مدا يسمعني.. وبنفس اللحظة دگ جرس باب البيت طلع هو من المطبخ ممنتبه لوجودي وراح يفتحها، نبض قلبي بقوة راح يشگ صدري ويطلع منه، سچينة ودچوها بيه من شفتها نورسين! اجت نورسين وحضنت شُهيب من رگبته وگالت بدلع..

-اسفة بيبي خليتك تنتظر هواي.....

يتبع...

━━━━━━  ━━━━━━

الحماس للبارتات الجاية عنديييي ↖️↖️↖️↖️😭🙈🫶🏻🔥🔥

دللوني بالتفاعل واني ادللكم بطول البارت والتنزيل 🫂🩷

#ابناء_الحسوم "شمسون"

بقلمي: زهراء السلامي ❤︎

بارتين طبگ 🙈+ لطفاً لتنسون التصويت + التعليق بين الفقرات + متابعة لحسابي 😍.

يغارُ عليها وهي ليست لهُ..

كـ فقيرٍ يحرسُ مالُ غني 💔♥️!

━━━━━━  ━━━━━━

-نورسين: اسفة بيبي خليتك تنتظر هواي

-شُهيب: اي توقعتچ ما تجين

نزل ايدها من على رقبته ضحكت وراحت تگعد تحط رجل على رجل وتمد ذراعها على ظهر القنفة بأريحية، ضحكها وغنجها وهي تقلب شعرها كله على جهة وحدة وشُهيب واگف گدامها منتظرها تحچي شوفتهم بهالحال استفزني وشعل مو بس النار بصدري شعل حمم بركانية كاملة!!

وزادتها عليَّ من حچت بالروسي وجاوبها بنفس لغتها واني هنا مثل الاطرش بالزفة! ضحكت بأنوثة وره جملة گالها "ما فهمت منها حرف" واردفت بالعربي..

-نورسين: اتعب واني اگول عنك مثالي

مجاوبها وراح للمطبخ وهنا اجه دوري انزع البجامة العملاقة اللبستها وبقيت بالقميص الاسود رتبت شعري التهووس وطلعت من الغرفة اظهر نفسي وهالشي خلى نعالسين توگف على حيلها مصدومة..

-نورسين: مسرة قيثارة!

-مسرة: هاي

-نورسين: شنو تسوين هنا؟ و.. بهالحال؟!

تأشر بأصبعها على طولي من فوگ ليجوه، لبستها مجاوبتها و طلع شُهيب من المطبخ بيده كوب قهوة وكوب شاي اخضر..

-شُهيب: خلصتي تشمشمين بعطوري مدام قيثارة؟

تفاجأت من جملته وتفاجأت اكثر من لحقها بغمزة متلاعبة مچنت ادري بي شافني واني بالغرفة اللعب بأغراضه، ابتسمت ولفيت رجل على رجل واني واگفة وجاوبته مثل الصرصور الخجلان..

-احب ريحتك

-يعني مثلما اني احب ريحتچ؟

-امممم مادري صراحة

-لا اتوقع اني اكثر

-يجوز

-مو يجوز اكيد

-تقبل ارش من عطورك؟

-لا

-عشتوو

-ههههههههه لا يروح يغطي عطرچ ماقبل

ضحكت من اعماقي گلبي رفرف على كلامه ونعالسين صافنة علينا ووجهها مگلوب گلاب اااااه يا للسعادة!!!

-جبتلچ چاي مسرات

-شكراً بيبي

-تدللين، سويتلچ الشوربة بقت تستوي على النار

-نورسين: لحظة لحظة!!

وجهنا انظارنا عليها عدلت وگفتها وكتفت ايدها ضحكت بأستهزاء وگالت بحرگة ما فهمت سببها..

-نورسين: ان شاء الله الدا افكر بي مو صح شُهيب!

-شُهيب: ما اقره افكار اني نورسين

-نورسين: انتَ ومسرة قيثارة على علاقة؟؟؟

-شُهيب: اني ومسرة شمسون متزوجين

جفلت باهتة من اللحق اسمي بأسم عشيرته بمعنى اني راجعة اله، وبهتت اكثر من سحبني بخفة من خصري يحاوطني بأيده..

-نورسين: معقولة؟؟ صدگ تحچي لو تتشاقه؟؟

-مسرة: مدا افهم سبب تفاجئچ نسرين؟

-نورسين: اسمي نورسين!!

-مسرة: يله ماكو فرق

-نورسين: ههههههههه مصدومة اني مصدومة!

-مسرة: لان شهوبي اوبي اوبي زوجي؟ لو لان غلطت بأسمچ؟

-نورسين: من ثنينهن صراحة

-مسرة: انصدمي من الاولى الثانية تعودي عليها

-نورسين: تدرين شخصيتچ ما تغيرت عن ايام الجامعة ولا ذرة!

-مسرة: ليش لازم تتغير وره الجامعة؟

-نورسين: اي لان...

-شُهيب: بنات!

-نورسين: ازعجتكم اني وواضح اجيت بوقت غلط!

تباوع لملابسي ولحالتنا وگالبة الوجه معاجبها، تكمعت من چاي الاخضر مالتي وانطيته لهموسي انطي يشرب ورايه هو ميجرع الشاي الاخضر بس شرب منه لخاطري..

-شُهيب: شربته حتى ما تضوجين وتسويلنا سالفة بهالليل

-مسرة: يعني ما شربته لانك تحبني؟؟ شُهيب طلگني ما ابقى وياك دقيقة بعد!!

-شُهيب: يمعودة ستري علينا اسحب كلامي اسف

-مسرة: ابد ولا اعيش ويه رجال ميحبني وميقدرني وميشرب من الچاي مالتي وميهتملي وميخليني اشمشم عطوره وهو مريض يسويلي شوربة و...

-سويتلچ شوربة تره على كيفچ عيوني لا تأخذيني باللسانچ

-ما شفتها مالها اثر عيوني لو احنه نشم ريحتها ولازم نشبع

-هسة اصبلچ غير تدللين عليَّ انتِ

-ولك اوووووووي ابني انتَ ابني

ضحك وراح للمطبخ وطبعاً نورسين فاكة حلگها ويمكن مصدگة محادثتنا متدري بـ شُهيب يجاري استهزائي وخبالاتي وكأن الديصير حقيقي..

گعدت على القنفة منعنشة روحي حطيت رجل على رجل وگعدت اتكمع من الچاي والابتسامة لطشت بوجهي ما جاي تروح ابد..

-نورسين: مچنت اعرف شُهيب زوجچ

-مسرة: عجيب

-ليش؟

-لانه تقدملي بحفل اطلاق مجموعتهم الجديدة بخطبة رومانسية جداً جداً فديته

-ما حضرت هيچ شي!

-يمكن طلعتي صارت بآخر الحفل

-اي طلعت

-اممم

-عن حب؟

-انتِ شتشوفين؟

-اشوف حب

-يجوز

-من شوكت علاقتكم؟

-دقيقة راجعتلچ هاچ شربي هذا بيبي يمكن يفيدچ مبين عليچ تعبانة

حطيت كوبي الچاي بين ايدها ظلت صافنة تباوعله، اردفت بنبرة استهزاء..

-بما انچ جاية لبيت رجال متزوج بنصاص الليالي

عفتها وگمت للمطبخ اشوف شُهيب ليش تأخر لگيته ديقطع فلفل اخضر و جزر وفتح علبة بزاليا وذرة وحطها بالشوربة ووگف يخوطها..

-الريحة تجنن

-ان شاء الله طعهما هم يعجبچ

-تحب الطبخ؟

-مو احبه بس اجيده

وگفت بصفه مباشرة رمقني بنظرة خاطفة ورجع يخوط بالجدر ويضيف ملح وبهارات، گال وهو مشغول بلي ديسوي بدون لا يباوعلي..

-اجت تطلب المساعدة

-منو؟

-نورسين

-هاا

-شوية الموضوع صعب وتداخل اكثر من طرف وطلبت فزعتي لان اني امون على كل الاطراف

-ها يعني الموضوع بالجديد صار؟

-لا قائم من قبل لا نروح للعراق بس اني ما تدخلت بي الا من فترة

-بيوم عرسنا چنتو على تواصل؟

نظرلي نظرة مطولة وابتسم هز راسه نافي وگال..

-بيوم عرسنا هي راسلتني تعتذر مني على شي وطلبت مساعدتي

-شعجب طلبت منك تساعدها؟ علاقتكم قوية؟

-نورسين خطيبتي السابقة

حط الچمچة على يدة الجدر وغطاه، اللتفتلي بنظرات فضولية يشوف ردة فعلي بس ملامحي تقره برود ما ردته يكشفني غيرانة لو مزعوجة..

-مسرة: غريب

-ليش؟

-يعني لبسها ووضعها و..

هز راسه بسرعة يقاطعني وگال بنبرة سريعة..

-ما چانت هيچ

-ها يعني ما چانت مصلخة؟

-هههههه لا

-اي مو اگول لان وضعها اوڤر اگلك برأيك اتبرعلها بربع مترة قماش لتنورتها خطية خاف ماعدها؟

-هههههههههههههههه

-شبيك والله احچي صدگ

بقى يضحك ويطلع عصير من الثلاجة حطه بصينية وطلع ثلاث طاسات كبار للشوربة، صبلنا احنه الثلاثة تمنيت ناكل وحدنا بس اجت القردة وحطت روحها وما گالت لا من انطاها شُهيب طاسة شوربة گعدت تاكل وتسولف عنهم وعن الماضي ولا كأني موجودة..

-نورسين: ياريت نرجع مثل قبل احنه الشلة كلش چنه نتونس

جاوبها بأبتسامة وگام اخذ الطاسات مالتنا ورجع للمطبخ، بقينا اني والنعالة وحدنا، مثلت التثاوب ورفعت ايدي امطيها..

-مسرة: تعبت الوقت تأخر

-نورسين: صح اني هم نعست

-مسرة: اي شوكت راح ترحين؟

-ههههههه حبي اني راح ابات هنا

-تباتين؟!!

-نورسين: اي

وگف گلبي واعضائي هاي الجربة راح تبات هنا؟؟ شنو هالصلافة! يعني لوما اني جاية وين چان نامت وشُهيب عنده غرفة وحدة بس؟!!گامتله تروح للمطبخ ومدت راسها من الباب تحچي بمياااعة ايييع ايييع ايييع راح اتقيء!!

-نورسين: شُهيب ممكن ابات يمك اليوم؟

طلع من المطبخ يواجهها وگفو ثنينهم بالباب دا اشوفهم منا الحقيرة شگد ما طويلة شوية وتوصل لطول شُهيب هاي وهموسي شوية ويطخ الباب!!

-نورسين: ردت اروح لبيت سرمد ولارا بس عدهم خطار وتعرف ماعندي غيرك

-شُهيب: مو مشكلة هسة احجزلچ فندق

-نورسين: لا فندق شنو شُهيب تعرف ما اگعد فنادق اني تلعب نفسي

-شُهيب: اي ادري بس يعني..

بلع ريگ حاير ومتردد حسيته منحرج مني وما ردت اسببله احراج اكبر اختصرتها من گمت من مكاني اروح للغرفة مالته واگول..

-مسرة: باتي هنا ويايه بالغرفة شهوبي انتَ نام بالصالة حباب

تغيرت نظرته للاستغراب وصفن عليَّ، رجعتله الصفنة ورفعت اصبع واحد من اصابعي امثله بدال السچينة وذبحت بي رگبتي وشمرتله بوسه بالهوا وراهة..

فوراً ضحك بصوت عالي ويمسح على وجهه وشعره ولحيته واستمر بالضحك هيچ ما وگف الا من ترخص من نورسين واجاني للغرفة..

-مسرة

-مسرة: عيووووونها وخشمها وحلگها وراسهاا ورگبتها واصابيعهااا

-شُهيب: مسرة لا تذبحين نورسين وهي نايمة ستري علينا بس اليوم

شلت شعري بكبة عالية وتقدمت اوگف گدامه، لزمته من خوانيگه انزله اخلي وجهه بوجهي لزگ وهمست بخفوت..

-فكرت اخنگها حبيبي

-مسرة

-لا تحاول

-مسرة

-عيوني

-مسرة اذا انتِ ما مرتاحة نلگالها مكان ثاني

-لا بالعكس بيبي اريدها اني حلوة

-مسررررة

-شوووهيب

-راح اخليها تروح لا تحچين شي انتِ

-ليش تخاف لا تغتصبك بالليل؟

-مسرة!!

-خليها تبات شُهيب ماعندي مشكلة وياهة عود اذا خايف عليها كل شوية اتصل بيها خليها تطمنك بصوتها المايع

نزلت ايدي من ياخة قميصه وفليت الكبة ورحت انام على چربايته واغطي روحي، كل هالشي سويته وهو واگف بمكانه ما تحرك اشرتله على الضوه بدون لا احچي افتهم عليَّ وراح يطفي الضوه ورجع تقدم يگعد على طرف السرير..

-اذا احتاجيتي أي شي لا تترددين تطلبي بس دگي عليَّ

-امم

-اكو لحاف اضافي بالكنتور اذا بردتي وعندي..

-شكراً شُهيب ممحتاجة شي بس نعسانة اريد انام

-مسرة

-تصبح على خير

تنهد تنهيدة قوية اشبه بالحسرة وحسيته يمسح على رجلي من جوه وگام يطلع من الغرفة.. اي عفتهم وحدهم.. عفتهم گاعدين بالصالة واني اجيت هنا مثل المطية بس لان بعد مدا اتحمل اشوفهم سوه اكثر واحس روحي راح تطلع قررت اعوفه هو يتصرف ومن هالموقف راح اعرف طبيعة علاقتهم شنو بدون لا ادخل غيرتي الغبية واحرگ البيت فوگ روسهم..

ما طولت ثلاث دقايق واجت نورسين للغرفة، فتحت اللمبة الصغيرة وحطت راسها على المخدة الي بصفي وتنهدت براحة..

-نورسين: گاعدة؟

-مسرة: لا

-ها عبالي گاعدة

غلست عليها ودرتلها ظهري ماريد اشوف وجهها الحلو لا اشوهه بأظافري، صوت طگطگة شُهيب بالصالة توصلني مبين ديتحرك و... لحظة قاطع تفكيري صوت نورسين المايع المزعج خلوني اركز شنو دتگول..

-نورسين: تقبلين اروح احچي ويه شُهيب شوية؟

اها وطلعت محترمة وتستأذن تروح تحچي ويه رَجلي! لچ تگوومين لا اخلي رِجلي بگلبچ!!

-مسرة: لا

-نورسين: اني جاي استأذن منچ لان لاحظتچ مزعوجة من وجودي، بس احتاج احچي ويه شُهيب بموضوع خاص

-أجلي لباچر

-ليش؟

-لانه مريض سودة عليَّ ولازم يرتاح مو زين عليه السهر

-هههههه تعاملي مثل الطفل

-لان هو يعاملني بهالطريقة

-صح هو حنون كلش

-اي يله نامي

-سؤال اخير

-جواب

-شلون تعرفتي على شُهيب شمسون؟

-شُهيب شريكي

-من خلال الشغل صارت علاقتكم؟

-اي

-امم

سكتت تتنهد كل شوية مادري شسالفتها بس لا اوگفو عرفت شنو سالفتها من رجعت تگول بصوتها الغثة!!

-مسرة نمتي؟

فضلت ما اجاوبها ماعرفتها لهدرجة لزگة بس شلون راح ادري و اني اصلاً ماعرفها من قبل اتعجب شلون گالت چنت وياهة ببعض المواد بالجامعة؟ المهم هسة هذا مو موضوعنا.. موضوعنا هو ليش تتنهد كل ثلاث دقايق وكأنها عايشة بعالم وردي بس چني عرفت ليش بسبب جملتها التالية..

-نورسين: اتذكر هالشقة كلش زين عشت احلى ايامي بيها

سكتت لفترة واردفت بخفوت كأنها تهمس لروحها..

-رغم صغرها بس كلها حُب شخصية شُهيب طاغية عليها واحس بالامان من ادخل هنا.. انسى كل همومي ومشاكلي بدخولي هذا المكان واشرب شي دافي من ايدين شُهيب الحنونة

كافي!! جديات كافي بعد ما اتحمل ابقى صامدة اكثر تمنيتها تسكت قبل لا اشيل المخدة واخنگها بيها بلكت غيرتي الغبية تنخنگ وياهة وتموت!!

-نورسين: ابد ما قصدت اقلق راحتكم ولا اعيق زواجكم اصلاً مادري بـ شُهيب تزوج ما متابعة الاخبار ومالك ما گلي ههههه ليش يا يوم مالك گلي على شي لوما اني اركض وراه واجر اخبار شُهيب منه جر ميحچيلي كتومين هالاخوان

خنست وره هالكلام ونامت اخيراً اما اني ما غفت عيني مليت من الفراش وگمت اتسحب اطلع من الغرفة على كيف حتى متسمعني هالقردة وتجي وراية..

طلعت للصالة ظلمة وضوه خفيف جاي من الشارع داخل عبر الشباك المفتوح والهوا يلعب بالبردة، ابتسمت من شفت شُهيب نايم على القنفة ومبين ممرتاح بنومته بس اكيد ميتخلى على المخدة حاضنها بين ايده خانگها خنگ..

گعدت على الطاولة مقابيله اتأمله والله شكله حلو وهو نايم وهو گاعد وهو يفكر وهو يشتغل وهو تعبان وهو جوعان وهو نعسان وهو ضايج وهو متحمس وهو يداهر وهو جَدي وهو... كافي مصختها ادري بس يعجبني بكل حالاته اريد اعضعض بي واجعصه انوب ارفسه وبعدين ابوسه على خده واعتذر منه..

اگلكم هل اني عنيفة وابالغ من بعجبني شخص لو كل الناس مثلي؟ ضروري اعرف واريد جواب صريح من قبل الجميع راح اراقب التعليقات حبايب هاكم بوسة..

(زازا: هاي رسالة من مسرة 😂💋)

جعل محد غيرك ينام يا بعد الكل والله ينرادله صورة شو دوخرو الريشة مالتكم راح تطير، رحت اجيب تلفوني واخذتله صورة بالظلمة فكرت افتح الفلاش ويگعد يشوفني دا اصوره واخلي الهيبة تطير بس گلت لا كافي مسرة احترمي نفسچ والريشة تبقى بداخلچ متطلعيها عيب ماما عيب بنيتي ميصير!

بس ما خليتها بنفسي واخذتلنا سلفي وهو نايم، ابتسامتي من الاذن للاذن من الحماس ومسوية علامة النصر يم وجهه واخذت الصورة طلعت تشئ شئ..

بقيت گاعدة هالگعدة لماعرف شگد اصلاً ما حسيت بالوقت حفظت وجهه على غيبي وحفطت كل تفصيلة بي، انتبهت عنده شامة جوه حاجبه صغيرونة كلش وشامة فوگ نفس الحاجب هم كلش صغيرة.. حواجبه كثيفة ولحيته مرتبة وخفيفة مثل العادة كلش يهتم بترتيب لحيته وشعره ولبسه وعطره كشكل عام ويمكن هالشي الديخليني اتسرسح؟

من انتبهت على روحي واستحيت على دمي رجعت للغرفة انام، حسيت الصبح ساعة بالـ 11:30 الظهر فزيت من الفراش ادور نورسين وينها نورسين ولكم وينهاااا..

اسمع لصوتها جاي من الصالة مثل المخبلة گمت وتعثرت بالفرشة بين رجليه وگعت من الچرباية بس ما اهتميت وگمت اركض للباب مردودة ما مطبوگة عدل، مديت عيوني اشوف شديسوون قبل لا اسوي هجوم وارگع راس براس..

هي گاعدة على القنفة الچبيرة ولازمة طاسة سييريل (cereal) ودتاكل وشُهيب گاعد على الكرسي لابس نظاراته الطبية وبحضنه اللابتوب ديشتغل جعل محد غيرك يشتغل بالعطلة يا بعد نورسين والخلف نورسين..

-نورسين: ههههههه والله شبيك بعدني احبه

-شُهيب: واضح هالشي

لحظة اوگفو عليمن ديحچون المن تحب وشنو تحب وليش تضحك وفرحانة والكشرة من الاذن لااذن شاگة وجهها الشگاگي؟؟؟

-نورسين: ما اتريگ الا سيرييل ماگدر بدونه

ابتسم بدون جواب وبدت تهذي بالروسي ااااخ متندمة متندمة متندمة متنددددمة بگد شعر رااسي ما تعلمت روسي!! صدگ لو گال ابوية الثقافة حلوة وتفيديني بس اني تعايرت علبو ما احب هاللغة صعبة وثگيلة بس شنو چان صار لو متعلمتها؟؟

-شُهيب: لا مو هيچ الموضوع

اي ولك اي احچي عربي وريح گلبي اي!!

-نورسين: لا مبين زعلان بعدك مني حتى بالمغرب من چنتو بمراكش ما قبلت تحچي ويايه!

-شُهيب: قصدچ بسفرة راس السنة لشركة الاطلس؟

-اي بالضبط صرنا وجه بوجه بالمصعد وما درتلي بال كأن نكرة گدامك

-يعني شنو منتظرة اسويلچ؟ ابوسچ واخذچ بالاحضان؟!

-قبل چنت تسويها

-قبل! انتِ گلتيها قبل من چنه مخطوبين وعلاقتنا تمام هسة شنو يربطني بيچ؟

-اني صديقتك قبل لا اكون خطيبتك لو نسيت؟!

-ما نسيت بس كلشي تغير من انخطبنا وانفصلنا

-انتَ متغير كللش متغير!! بس واضح منو غيرك عليَّ شُهيب

-محد غيرني عليچ لا تظلين تصنعين مشكلة بعقلچ وتتخيليها بالواقع نورسين

-لا ليش اصنع مشكلة والمشكلة موجودة من زماااان من قبل انتَ هيچ ودرت درت دررت لحدما حققت حلمك وتزوجتها!!

-نورسين سدي الموضوع كااافي!!

سد اللابتوت مالته بعصبية وخزرها بقوة ظلت تتنفس سريع وتضحك مستهزأة ومفرفحة بنفس الوقت..

-نورسين: صدگ كلامك انتَ ما متغير لان من قبل تستقتل بالدفاع عنها!

-انتِ ليش تدورين مشاكل من العدم؟! شنو تردين نورسين اختصررري وفهميني!!

-نورسين: احس بالخيانة! احسك غشيتني وخنتني ثلاث سنوات انتَ بحضنيي وتفكر بيها وما راحت من راسك ولا انزعت من گلبك!!

-تلوف تلوف تلوف وترجع لنفس السالفة!

-اي ابقى اللوف لان ما تصورت راح يجي يوم وتنجمعون وتتزوجون بس الصدف تلعب دور چبير! لو گول يمكن مو صدفة يمكن انتَ لعبتها صحح وجبتها لطريقك ووهمت الكل هاي صدفة وشغلها وياك صدفة!

عقلي فصل! كلشي مدا افهم ولا دا اربط شي نورسين عليمن دتحچي؟ وشُهيب ليش دينتفض من العصبية وميخيليها تكمل كلامها وكل شوية يقاطعها ويأشرلها تنصي صوتها..

-نورسين: ليش انصي صوتي؟ هااااا يعني هي متعرف انتَ ميت عليها من ايام الجامعة؟! مسرة متعرف اكو واحد مهووس بيها لدرجة حافظها على غيبه!

-نورسين!!!

-ثلاث سنين احنه مخطوبين وبكل مرة اسألك تحبها؟؟ تجاوبني لا وين احبها چانت نزوة وانتهت واني مثل الغبية اصدگك وافرح!! مچنت اعرف بيك بعدك تحبهاا شُهيب وعاشقها لهدرجة!!

-گتلچ كااافي سكتي كاافي

-يفقد يفققد من تمر من يمه وعيونه تركض وراهة مثل المهووس اللعين!! يگعد وراهة بكم كرسي بكل محاضرة تجمعهم حتى يصفن عليها من بعيد ويتأملها كل هذا الشي وهي متعرفه اصلاً ولا شايفته بحياتها!! لاف الكككل بعقله وبذكاائه وجابهاا لحضنه اخييراً لاا وما كفااه هالشي تزوجهها وربطها بي!

شمر الحاسبة من حضنه وگعت بالگاع اصدرت صوت عالي وركض على نورسين يسد حلگها، گلبي يرگع رگع وعقلي مشوش ضميت نفسي اكثر واراقب حركته الهادئة ونورسين عيونها مدمعة ورافعتهن تباوعله همس شي بينها وبينه ما سمعت شنو گال بس غمضت عيونها ونزلت دموعها وتهز براسها اي..

بقى على هالحال عشر ثواني ووخر ايده من حلگها، ذب حسرة ومسح على شعره ونزل نفسه يسند جسمه على تاج القنفة..

-نورسين: اني اسفة

-شُهيب: لا تعتذرين

-مو من حقي احاسبك على شي بس انقهرت من شفتها هنا وانقهرت اكثر من عرفتكم متزوجين

-شُهيب: نورسين الفات مات انسي الصار وركزي بالحاضر

-المشكلة اني فرضت نفسي عليك واني الي اعترفت احبك واريدك اول مرة انتَ مو ببالك هالشي

-هالحچي صارله سنين انسي

-بس عندي سؤال فضولي؟

-شنو هو

-انتَ جبتها تشتغل يمك لو صدفة؟

-صدفة

-شُهيب؟

-صدفة! وداعة امي صدفة حتى اني انصدمت من شفتها گدامي ما مصدگ هي موجودة واجت تريد تشاركني بالشركة لدرجة شكيت ابوية دازها حتى تستدرجني ويخدعني امشيله شغل من خلالها

-ما فرحت؟

-لا ما فرحت توقعت بعدها متزوجة وبالمقابلة عيني چانت تدور الحلقة بيدها بس ما لگيتها

-ما ردتها تشتغل وياك حتى متتعذب؟

-لا ردت اطلعها واشردها بأي طريقة كانت ابعدها عن ابوية ونواياه بس القدر چان اقوى وأصر ننجمع ونشتغل سوه ونتزوج

-تمام عندي اخر سؤال وشُهيب جاوبني بصراحة بدون لا تستعطفني

-اي؟

-من انخطبنا حبيتني لو لا؟

-مو لائق اجاوب هالسؤال هسة

-ادري ادري انتَ متزوج بس هاي مو خيانة لان دا اسألك عن مشاعرك قبل مو هسة

-اي

-شنو اي؟

-اي حبيتچ

-يعني من انفصلنا انكسارك ووجعك چان حقيقي مو تمثيل؟

-ما مثلت بشي وياچ نورسين لان ما احتاجيت هالشي چنت صريح وحقيقي بكل خطوة وكل لحظة عشناها سوه

-بس تحبها

-وما انجمعنا

-بس تبقى تحبها.. ما جاي انسى قهرتك وحسرتك من عرفت بيها تزوجت اتذكر هاليوم عدل اجت لابسة فستان وردي فرحانة وصديقاتها يباركولها ويسألوها عن زوجها، سنة كاملة انتَ تحبها من بعيد لبعيد وبين ليلة ويوم اجت وحلقة بيدها والدنيا كلها تباركلها لانها تزوجت المحامي "أكرم الـ^^^^" مچانت تعرفك ولا تهتملك لدرجة تعدت منك وما شافتك وشافت جحظة عيونك وتوقف انفاسك من الصدمة!

شهگت جوه انفاسي مصدومة! مصدومة ومو بس مصدومة لا احس البيت وگع على راسي دخت وگلبي يضرب بعنف وعيوني صارت بيها غواش عرفت سكري ضرب ابتعدت من الباب اگعد على السرير بس اريد الدوخة والرجفة مني تروح..

شُهيب يعرفني قبل اكثر من سبع سنوات! داخلين محاضرات سوه ويجوز حتى حاچي ويايه واني ما اتذكره مستحيل هالشي! شلون چنت غبية لهدرجة وما لاحظته؟؟ بس شلون اللاحظه واني نادر اتواجد بالجامعة اداوم بس بالمحاضرات المهمة ويجي اكرم ياخذني..

گلبي وجعني حطيت ايدي على صدري افركه، اثرت بيه جملته من گال "عيني تدور الحلقة بيدها" فعلاً عيونه چانت مركزة على ايدي وشكيت بي يريد يعرفني متزوجة لو لا حتى گلت بگلبي هذا ملعب وادبسز بس طلعت غلطانة! طلعت غلطانة لانه چان يريد يتأكد بعدني متزوجة اكرم لو لا!

داومت ويه شُهيب جامعة وتشاركت وياه واشتغلنا سوه وصادقته ويعرف زواجي من اكرم ويعرف ميس ويعرف كل صغيرة وچبيرة عني بس ما شكيت ولا واحد بالمية هو يحبني وتصرفاته واهتمامه وحنيته وتركيزه وانتباهه بيه حُب وعشق مو لانه ذكي ويحفظ ملابس كل موظفة تشتغل وياه ويتذكر كل تسريحة شعر تسويها ويتأمل كل اكسسوار بيدها!

من اگول شُهيب محترم وخلوق ويحترم المرأة صديقاتي يوصفوني بالمبالغة، محترم لدرجة اني وياه وجه بوجه يومية وما فكر يتجاوز حدوده ويايه لا بكلمة ولا نظرة ولا حتى تصرف..

ادري ادري قريت تفكيركم بغض النظر عن بوسته الوحشية بالمصعد راح اسامحه عليها لان اني مسرة قيثارة طبعاً بس اي محترم هموسي وابوس المحترم اني.. اهوووو هم رجعت ترعنت سكتوني يمعودين!!

رجعت بخير لحد يقلق عليَّ اني زينة شكراً لاهتمامكم صح بعدني مصدومة بس ماحب الدراما الزايدة وهسة خليني اروح ارتب نفسي واطلعلهم فريش ولا كأني سمعت شي..

دخلت للحمام غسلت وجهي مكياجي بعده صامد باع الايلاينر يطگ بستين گاع والكحلة شوية سالت بسبب المي انطتني شكل حلو فديت وجهي الحمدلله يارب على وجهي..

دورت على فرشة اسنان لگيته حاط ثنين جدد بالحمام فتحت وحدة وفرشت بيها وحطيتها ويه مالته فدوة شكلهن كيوت عبالك متزوجات اي طبعاً متزوجات لان اني زوجة هموسي وهموسي طلع يحبني..

حطيت حمرة خفيفة ومشطت شعري وطلعت عطري من الجنطة رشيت شوية ورجعت امد عيوني من الباب اشوفهم شديسوون شُهيب چان يضحك مستهزأ ونورسين فاتحة عيونها كأنها مصدومة من شي گاله..

-شُهيب: اي ليش متفاجأة؟ يعني انتِ من رحتي حبيتي صديقي المقرب عادي؟! نورسين لا تحللين شي عليچ وتحرمي عليَّ وفوگ كل هذا اني ما خنتچ ولا لحظة طول ما احنه مرتبطين!

-نورسين: شُهيب لا تظلمني اني ما خنتك!

-شُهيب: حبيتي صديقي لو لا؟!!

-نورسين: حبيته اي بس..

-شُهيب: لا تكملين ميهمني اعرف

-نورسين: حقك تضوج شُهيب بس مسررررة ما لگيت غير مسرة؟؟؟

-شُهيب: لا ما لگيت غيرها ولا راح اللگه!

-نورسين: اي ليييش

-شُهيب: لانها مسرة! يحتاج تكون اكثر من مسرة؟!

ابتسمت على جوابه العميق الي مو كل واحد راح يفهمه بس اني فهمته وفهمته لدرجة فرفشت ومشاعر قوية غلفت گلبي المجروح لهدرجة اني شي مهم بحياته ويشوفني كاملة بعيونه؟

مسحت طرف عيني من الدموع الكابرت حتى متنزل وطلعت من الغرفة امط بيدي عود هستوني گاعدة، سكتو ثنينهم وشُهيب عدل وگفته وابتسم من شافني..

-مسرة: صباحوو

-شُهيب: صباح النور ان شاء الله ارتاحيتي بالنومة؟

-مسرة: اوووه كلش احس بحيوية ونشاط لازم ارجع للجم اليوم

-شُهيب: ريوگچ بالمطبخ حطيته بالفرن حتى ميبرد

-مسرة: اووووي ماي بيبي مسويلي ريوگ

ضحك بخفة يمسح على خصلات شعره العسلية ضحكت على ضحكته وانداريت على نورسين، گلت اسخف جملة اگولها بحياتي بس مادري شبيه متخبلة من الصبح..

-مسرة: هذا الزوج المثالي التتمناه كل بنية واني حصلته على عنادهنننن

عفتها بصفنتها ورحت للمطبخ افتح الفرن اشوف شمسويلي، طلعت ماعونين واحد بيض عيون وطماطة شرائح والثاني فطيرة محشية جبن وزعتر.. ابتسمت وحطيتهن على الميز الي بالمطبخ وگعدت آكل اطيب وجبة اكلها بحياتي رغم بساطتها بس حبيتها واستمتعت بكل لگمة وزادت سعادتي من دخل شُهيب للمطبخ وبدون كلام راح على قوري الچاي يصبلي كوب ويحطه على الطاولة ويگول بأبتسامة..

-ادري ما تحبي بس الفطائر طيبة ويه الچاي

-تعال

-شنو؟

-تعال شوية نصي عليَّ

تقرب ينصي نفسه عليَّ وملامحه تقره استفهام، ضحكت وجريته من رگبته وانطيته بوسة على خده فتح عيونه ممتوقعها ابتسمت وهمست بخفوت..

-شكراً لانك تهتم بيه

-احم.. العفو

وخر عني بسرعة يروح للثلاجة يصبلي مي ورجع حطه گدامي، سند ايده على الكرسي ومسح على شعره كم مرة حركاته مال واحد متوتر..

-شُهيب: اول ما گعدتي من النوم طلعتي من الغرفة لو بقيتي هناك شوية وطلعتي؟

-مسرة: لا گعدت واجيتكم

-هاا هاا

-اي

-اليوم عطلة بس راح اطلع للموقع بعد شوية انتِ ابقي هنا حتى نرجع نتعشا سوه تمام؟

-والصفرة وين تروح؟

-راح تطلع لبيت اصدقائها

-تمام راح اغسل مواعين حتى اكون زوجة صالحة على ورق

-مسرة ماكو اصلاً مواعين

-لعد وذني؟!

-ذني مواعينچ واذا متعاجزة منهن هم عوفيهن

-مو خاف تتعب

-فداچ

-ولك يممممااااي اسكت لا اگوم احبك

-ههههههه اني رايح

-باي باي انتبه لنفسك وجيبلي جلاتين

-مو زين كافي حلويات

-شبيك مو الي للجهال هاي لو تريد تحرم جهالك؟!

-لا ما احرمهم يله باي

-مترجع للبيت اذا ما جايب جلاتيييين

-بااااي

ضحكت وكملت ريوگي اكلت هوايه وانتبهت لروحي فوراً وگفت حتى ابقى محافظة على جسمي والله اسمن من الهوا وتعبانة على جسمي بالرياضة القاسية مو مال اخربه بلحظة غباء..

طلعت نورسين وره نص ساعة واني بقيت افتر بالبيت وحدي اسكتشف شقته العنونة التجنن، الشقة عبارة عن صالة ومطبخ وحمام وغرفة نوم وحدة وبلكون حلو.. ثيم البيت اللوان البنيات وتدرجاته ومتداخل لون الابيض واسطة ببعض كوشات القنفة واكسسوارات الطاولة الگدام..

كلشي هنا يصرخ "شُهيب" كلشيي بدون مبالغة حتى العطر اول ما دخلت ريحة جگاير خفيفة كلش ممزوجة بعطر رجالي مُعين وانتبهت لشمعة حاطها على الطاولة شلتها اشمها وربطت ريحة البيت بيها بالضبط هي هاي الريحة اول متدخلون.. شمعة "MI.. last call"..

البيت بي لمسة عصرية وقديم بنفس الوقت، اثاثه عصري ودفو المكان وحنيته قديم يذكرني بأمي، سويتلي كوب چاي اخضر وطلعت بالبلكون الڤيو والجو حلو ويريح النفس اخذت نفس عميق وزفرته بهدوء اباوع لاولاد الجيران طلعو يلعبون بالبايسكلات والسكوتر ومرة گبال بناية العمارة الي گبالنا گاعدة وبحضنها سلة كرز كل شوية يجيها طفل وتنطي كم كرزاية وتبتسم ويه كل واحد من ياخذون ويرحون فرحانين يكملون لعب..

اتمنى اعيش هنا.. اريد اعيش اني وميس وشُهيب سوه هنا بهاي الشقة بالتحديد واعيش الحنية المفتقدتها واوزع الحب والجو العائلي بهذا البيت وازرع ورد واعلگ موسيقى صاخبة وميس تطفر على ذيچ القنفة بالتحديد وترگص وارگص وياهة بسعادة ونجر شُهيب هم ويانه ادري ما راح يقبل بس راح اسامحه بشرط يبقى واگف ويستمتع ويانه..

احلام.. تبقى هاي احلام واوهام مستحيل تتحقق وهذا السبب ما احلم واكره الاحلام واكره اليحچي بالاحلام لانها ترجعنا للواقع المُر!

**

"كيان"

گاعدة بين الكتب والاوراق والايباد گدامي والسماعات بأذني ادرس ومكروفة.. سفرتي للعراق هوايه اثرت عليَّ والدكاترة گالو اذا ما عوضتي راح تضطرين تعيدين الكورس ولو امووت ما اعيد!

اجت المساعدة وبيدها ايس كوفي حطته بصفي على الطاولة واشرتلي اوخر السماعة حتى تحچي، شلتهن بسرعة وباوعتلها انتظرها تگول شي تسممني بي..

-المساعدة: فاهد طلب مني اسويلچ شي وانتِ تدرسين مادري ليش مهتم بيج وعع

-كيان: وععع انتِ شبيچ محملة عليَّ!!

-من يوم اجيتي لهذا البيت فاهد حزين ما جاي يسوي حفلاته ولا ماخذ راحته ببيته انتِ وحدة حقيرة

-مو احقر منچ! شنو لازمته؟ ميسوي سلاباته شيخصني بي اني!!

باوعتلي معاجبها شگد نرفزتني، عافتني وطلعت بره الغرفة حتى الايس كوفي ماريد اشربها ما استبعدها تحطلي سَم حتى تخلص مني واموت..

اجاني اتصال من صبا استغربت شعدها تتصل بهيچ وقت واليوم عطلة؟ بعدني ما گلت الو ووصلني تغريدها..

-صبا: سمعيني كياان ترحين لاخوچ تگليله يجر ويايه عدددل لا اتخبل عليه فهمتي لو لاااا!!

-كيان: شكو شكو هاي بدال الهلو اجيتي ترزلين يا همجية؟؟

-صبا: اي اني همجية كيااان اللگيلي حل بسرعة تره طگت روحي منه كاافي تره الانسان طااقة واني طاقتي نفذت ويه مروان!!

-كيان: غير افتهم شمسوي؟!

-يلبسني!! ولچ لابسني لاابسنييي الشغل يشتغله وحده حتى ميگلي عدنا شغل اجي اللگاه مكمل كللشي بدون لا يستشريني ولا ياخذ رأيي!!

-مو زين مخفف عنچ

-لا مو زين هو ميخفف عني شغل الا اذا زعلان مني!! خلي يعوف سوالف الزعاطيط ويواجهني بزعلته!!

-صبا طبعاً يزعل عشرة ايام انتِ متشتغلين وياه لاطشة بمكتب نشوان وفاضل حتى متتواجهون شتردي يسويلچ؟ يجي يتوسل بيج حتى ترجعيله؟!

-هاي شبيچ انتِ الثانية اي غير مستحية منه

-وجعع شكو تستحين شو الرجال كتل روحه عليج تعبت نفسيته حتى العلاج يريد يعوفه لوما نشوان يركض وراه سودة عليَّ صارله اسبوع ما متعارك ويانه ولا معصب علينا بديت اقلق عليه صبا انتِ اول حب بحياته حرام عليج!!

-لا الموضوع بده يتطور مروان ميعصب وميتعارك ويه احد يعني واصل مرحلة

-اكثر مما تتصورين تحسي يائس من الحياة صبا ما اسمحلچ تقهرين اصكك اخواني!!

-مو استحي

-دگعدي گعدي ميلوگلچ والله

-طاح حظج حقيرة

-انتِ وين؟

-طالعة گاعدة بكافيه بمول الـ^^^^^

-لعد راح اتصل بي يجيچ هسة حتى تتفاهمون على شي اخير وتفضون سالفتكم حتى اخطبله غيرچ اذا متردي

-وووولچ!!!

-اي لعد اعوف اخوية يعنس؟؟ مو طگ الثلاثين وهو بهذا البؤس كافي طلابة

-اموتچ كيان انطيني وقت افكررر

-ماعدنا وقت بت خالي كاتلة روحها عليه وتنتظر بس اشارة منه

-راااح افشررر

-ولج وللج لااا ستري علينا بس تره دا احچي صدگ مو عبالج اتشاقه يله باي

طبگته بوجهها چذب لا عندي بنت خال ولا عدنا گرايب اصلاً أللفت هالقصة بس حتى تتحرك هالفاهية خليها تختصر الطريق يا اي يا لا وتنفض!!

**

"صبا"

توترت واحس انخبصت هاي الغيبة حطتني امام الامر الواقع بأي دقيقة راح يجيني مروان للمول ولازم ارتب نفسي وكلامي..

ركضت للحمام اعدل مكياجي وشعري انتبهت لروحي لابسة ربع ردن يبووووو راح يخبصني ويكتلني بخزراته ويگلي مطلعة زنودچ الگيمر المن گبر گبر گبرر لفني شوكت اصير ادمية وابطل هاللبس الطايح حظه!!

كملت مكياجي وطلعت لاقرب محل اشتريت جاكيت خفيف اللبسه فوگ التيشرت ورجعت للكافيه طلبتلي قهوة وگعدت انتظره بكل رُقي ولطافة..

عشر دقايق وشفته من جام الكافيه يمه شلحگ يوصل هذا؟! بس مو مهم المهم هسة الوقت مشى واني لسه ما محضرة كلامي شلون بيه.. ارتبكت وصرت ارگص بمكاني من دخل للكافيه بدون سلام وكلام جر الكرسي الگدامي وگعد عليه سويت روحي ماعرف بجيته..

-صبا: مروان؟

-مروان: مساء الخير

-مساء النور، شو مبوز؟

-بكيفي

-مروان!!!

-صبا!!!

-شتريد جايني شكوو خو ماكو شي؟؟

-سمعيني من الاخير روحي طالعة وكاره حياتي غرديلي شبيچ خليني اولي

-وجععع شهالاسلوب الزبالة

-صبا احترمييي نفسچ لا تخليني اتجاوز عليج!!

-اي اسفة ما اقصد وجع ولا اقصد اسلوبك زبالة بس انتَ ليش معصب؟

-ما معصب

-تمام ما معصب بس شبيك احسك ضايج مني؟

-شمسويلچ اني!؟؟؟

-وخر وخر انتَ مو مال وحدة تگعد وياك

-اي روحيله انتِ هاااي غايتچ تشردين وتروحيله بكل مرة!!

-منو هوو

-قصييي ال*****

-قصي؟؟ شجابه هسة بالسالفة؟!

-صبا لا عبالچ ماعرف كلشيي وصلني اني!

-شوصلك غير افتهم!

-عرفت قصي متقدملچ واخذ رقم ابوچ يطلبچ منه!!

-اي؟؟؟

-اي وانتو رديتوله خبر تردون وقت تفكرون!!

-ابوية ردله خبر مو اني واصلاً اني وضحت لاهلي ما اقبل بـ قصي ماريده ميعجبني

-چذابة

-وداعة امي!

-عليچ الله صدگ؟؟ ما تضحكين عليَّ؟؟

-ولك والله اييي

-لا صبا دخيلچ يعني صدگ ما موافقة؟؟ هذا هو ما موافقة؟؟؟

-والله مموافقة

-يعني اروح اخطب اني؟؟؟

-ها؟

-ولچ احچييي خلصينيي

-هاا مو شوف اني

-انچبييي لا تحچين بعد

-مو هستوك گلت احچي

-بطلت ماريد

-وين رايح يمعووود

-رايح اخطبچ

-لا لا اوگف

-لا تلغيين

-حباب حباب وين رايح

-اطيح حظچ

-ووولك

-اخطبچ رايح اخططب

عافني وراح يهرول بره گمت ارجف مادري شبيه اضحك وارجف مثل المخبلة، اتصلت بأمي بسرعة ابلغها راح يجونه خطار اليوم بس الحظ الزفت گالت ابوية سافر الظهر وما راح يرجع منا لسبوع سديته منها مقهورة واتصلت بمروان..

-مروان: سكتي لا تحجين شي!!

-لعد شكو جاوبتني؟!

-حتى متگولين لبستچ بس صبا لو مادرري شيصير ما اتناززل عنچ لغيري ما تصيييرين وروحها لاميي

-احم اءء اي احم

-ظلي حمحمي ظلي

-باوع مروان تره ابوية مسافر يرجع اسبوع الجاي

-مو عليَّ كلاواتچ

-والله العظيم هسة امي خابرت واعرفها متستقبل خطار اذا ابوية ميكون موجود انتظر بس اسبوع فدوة فدوة

-ما انتظر دقييقة

-بداعتي حباب اسبوع بسس شبيك

-وقصي؟؟؟

-ولك رفضته هالغبي رفضتته

-صبا بداعة امچ لا تكسريني وتضحكين عليَّ والله ما اتحمل احبچ ومتسودن عليچ اتخبل لو صرتي لغيري

-ولك مخبل انتَ ما اتزوج غيرك اموت عليك انييي

-لا بشررفچ

-باي

-اموتچ اذا طلعتي من الكافيه راجعلچ

-طلعت طلعت

-ولج صباااا

طبگت التلفون بوجهه واضرب على حلگي تمنيت اطلع لساني واگصه على هالچفصة الزبالة مثلي، من التوتر مادري بيمن اتصل دگيت على مسرة الحمارة خرطتهن كلهن گدامها وگضت الوقت كله تضحك عليَّ غثتني ورجعت اتصل بـ كيان العوبة..

**

"كيان"

سديت الاتصال الثاني من صبا اخييراً اعترفوا هالفاهين يمكن الزعطوط الي عمره سنة راح يعرفهم يحبون بعض ويكتشف هالشي عيونهم تسولف وواحد يسرح بوجه الثاني من يكونون سوه مثل الافلام الهندية..

رجعت ادرس الوقت اخذني وما حسيت الا على صوت بطني متت من الجوع، ذبيت كلشي من ايدي ونزلت جوه اشوفلي شي بالثلاجة اكله.. الساعة عبرت الـ 12:00 بالليل ومحد بالبيت بس اني والمساعدة فاهد كالعادة دايح مادري وين كل يوم ميرجع الا وره الفجر..

طلعتلي توست وجبن كبستهن وسويتلي چاي وگعدت آكل واگلب بتلفوني، اشوف ستوريات البنات صديقاتي ووصلت لستوري جنات ناشره شعر حزين انقهرت كلش من سمعته يحچي عن وداع الاهل والغربة..

بينما اني اگلب بالستوريات وصلتني رسالة من رقم غريب على الخط، فتحت الرسالة شفت مكتوب..

"ساعة واللگاچ بـ (دازلي عنوان) تتأخرين دقيقة خمس زلم يطبولچ للبيت يلعبون وياچ ختيلان ولا تعتبري تهديد اعتبري تنبيه حبيبتي"

صفنت على الرسالة اكثر من مرة، بطني خبطت بخوف حسيت راح اتقيء ما احتاجيت افكر بصاحب الرقم اكثر ثواني ودزلي صورته الحقيرة مسويلي بوسة بشفايفه وماخذ الصورة سيلفي! صورة شمسون! نعلون! صخمون! سلطعون الحققير!!

ذبيت تلفوني على الميز ايدي ترجف ماعرف شسوي، دام ترددي لثواني واخذت سكرين للرسالة والصورة ودزيتها لفاهد بس ما وصلتله ماعنده نت دگيت عليه كم مرة ما شال بس ما يأست فوگ الـ 14 مرة اتصلت لحدما خطه انغلق لاااا!!!

تنفست بعمق ورحت لـ مالك وتفاجأت من شفت خطه هم مغلق متت والف فكرة اجت براسي قررت اتصل بـ شُهيب بعدني حاطته على اسمه ووصلتني رسالة جديدة من شمسون كاتب..

"خيار غير موفق تتصلين على نمري واخوانچ كياني.. بكيفچ لو ما رايده روحچ وروحهم سويها حبيبتي مشتاق اسوي مجازر واتونس ويه الجثث"

حقققييير نذل وووصخ شلون عرف راح اتصل بـ شُهيب!! ما توقعته مراقب تلفوني من يوم فاهد لگاني يم الكونتينرات مالتهم واخذني لذاك البيت المشؤم!

گمت اللوب بمكاني ماعرفت شسوي گلبي يرگع ورجليه ترجف ماعرف شسوي شسوووي ياربي والله راح اموت والموتني اكثر رسالة شمسون الجديدة وكأن اكو كامرات هنا وديراقبني!!

"لا تترددين الزلم واگفيلچ بالباب لو يوصلوچ الي بدون أي خسائر شرفية لو خمستهم يطبون عليچ بهاي اللحظة كياني.. الچ دقيقة ضبط (ودزلي ايموجي بوسة)"

ما لحگت افكر اعرف بي يسويها وصدگ يطببهم عليَّ ماعنده ستوب هذا ركضت للباب وبس حطيت التلفون بجيب بنطروني وطلعت شفت سيارتين مصفحة واگفات بباب بيت فاهد، دخت والحيرة توديني يمين وشمال كرهت روحي وأفعالي السابقة اضعاف مضاعفة افعالي هي الوصلتني لهذا المكان وخلتني امر بهيچ ظروف!

نزل واحد فتحلي باب السيارة واشرلي ادخل، تمشيت بأطراف راعشة ودخلت للسيارة وصارت بخشمي ريحة عطر شمسون الكلب بدون لا اشوفه عرفته گاعد هنا..

-شمسون: عفية بكياني

-شنو تريد مني؟؟

-مهمة بسيطة بيني وبينچ تبقى

-شنو هي؟

-اطلع

كلامه موجه للسايق لان فوراً حرك السيارة، الطريق هدووء لو اذب ابرة هم تنسمع بداخل السيارة الصامتة، ما اشعر بشي غير الخوف! لا توتر ولا ارتباك ولا تعب ولا تَيّه اشعر بالخوف فقط!

وصلنا بعد اكثر من ساعة لمكان مقطوع وبي بيت معزول گلبي نبض بقوة راح يطلع من صدري باوعت لشمسون ارجف حتى الكلمة متطلع مني..

-شمسون: هههااههههاههها لا تخافين محد يسويلچ شي نزلي

فتحولي الباب وجبروني انزل ثنين چتفوني يمشوني وشمسون امرهم ينزلون ايدهم عني واني اتحرك وحدي.. مشيت گدامه بدون لا اماطل مستسلمة لقدري مهما كان اني دمرت نفسي بنفسي واستاهل كل اليصير بيه..

دخلني لبيت بنائه قديم بس اثاثه فخم، ضواه مخنفس كلش يكرب الگلب گعد شمسون بوسط الصالة على كرسي ضخم وشعل چكارة، سحب منها نفس ونفخه على جهة الزلم الواگفين ورايه بنفخة دخان جگارته افتهموا عليه وكلمن اخذله موقع يتوزعون حول المكان..

-شمسون: شلونچ ويه فاهد؟

بلعت ريگ وحطيت ايدي على گلبي انضم دقاته، تنهدت بتعب وهمست بخفوت..

-كيان: زينه

-شمسون: تخبل عليج لو بعده؟

-مادري

-تقربلچ؟

-هاه..؟

-جاوبي بسرعة

-لا لا

-غبية

-احنه اتفقنا زواجنا على ورق

-زواج على نعل مگطعة على راسچ

شمر الجكارة من ايده على جهة واحد من الحماية واشرله بيده ذاك افتهم وبسرعة طلع سلاح من جيبه وحطه بيد شمسون..

-شمسون: معناها ما عجبتيه وحمرته بعدها براسه!!

-كيان: واني وظيفتي انسي حمرته؟!!

-اي!! المن جبتچ اني حتى احطچ تمثال گدامه؟!

-اني شعليه بي! اصلاً ماحب فاهد وماردت اتزوجه گوة احبه واحببه بيه؟؟

-اي

-عمو حباب كافي تعبت اني تعبت

-الفيديو مال مالك بعده عندي كياني خاف نسيتي بعدني اتفرج عليه واتونس

-شنوو تريد مني كااافي

-اريدچ تصيرين ادمية.. كيان انتِ اول بشر اطول وياه هالگد لو غيرچ اذبحه وادفنه بمكانه

سكت من دخلو زلم ثنين يطلعون بعمر شمسون ونفس ستايله اجو يضحكون ويسولفون ويه بعض ممهتمين لوجود احد جابولهم كراسي وگعدو ويه شمسون وعافني وصار يحچي وياهم ضحكهم وسوالفهم اخذت فوگ النص ساعة واني واگفة هنا اشيل رجل واحط رجل بقتلي شعرة للانهيار راح اموت من القهر والذل!

-شمسون: يلا يلا عود بعدين

-شمسون منو هذي الجميلة؟

-شمسون: هاي مرت فهدي

-جبتها النا تكريم لجهودنا مو ههههههه

-شمسون: هههاهههاااهههااا لا اجيبلكم غيرها عود

-چا هاي شتريد منها

-شمسون: عدنا مهمة وراح ندبسها براسها تممتها خو خير ما تتمتها وانلگفت طبها مرض

-كيان: ما راح تگدر تسويلي شي!!

-شمسون: والله؟

-كيان: اي! تعبت من تهديداتك ميهمني شي حتى لو تذبحني هنااا

-شمسون: مو اسويها؟

-كيان: ميهمني

-شمسون: تمام هاچ هاي بروڤا

ثانيتين ووجه المسدس على حماية واگف على جانبي الايسر وضربه ثلاث طلقات بجهة گلبه شهگت ما مصدگة وبلحظتها وگع بالگاع الرجال مفارق الحياة.. اشر شمسون لاربعة يرحون للي مات وصارو يرفسون بي رفس رفس رفس حييل ببطنه وظهره ودم الرجال بطوله وما كفاهم هيچ واحد منهم طلع سچينة وصار يدچچ بجسم الجثة ويشگگ بجلده نبشوا جسد الميت نبش وشمسون يضحك بقوة مستمتع والوياه مشاركي الضحكات!

-شمسون: احنه عدنا البنية نغتصبها قبل لا نكتلها هاا؟ بعدچ ترديني اذبحچ

النفس وگف بـ ريتي صرت لا اگدر اشهق ولا اگدر ازفر، روحي خرطت من بقوا يتناقشون على المهمة وفهمني شمسون بالحرف الواحد ما اجيب طاريه بشي واذا جبت طاريه ما راح ينضر ويحلها بطريقته بس اخواني ثنينهم الي راح ينضرون وينذبحون بنفس الدقيقة..

-شمسون: زيدان الشاشة

هرول الحمايه زيدان بيده ايباد فتحه وحطه گدام شمسون اشرله عليَّ حتى يراويني وجه الشاشة الي شفت مصورين بيتنا وواحد نايم على بطنه فوگ بناية صايرة گبال البيت وموجه سلاح قناص على شباك غرفة نشوان..

-هذا التصوير مباشر، غلط واحد يصير القناص يطشر راس اخوچ الفرفوش انتبهي زين

-كيان: عوف اخووواني همه مالهمم ذذنب اني اسوي التريدده بس عوفهم كاافي تهددني بيهم مو والله متتت

-شمسون: وموتتهم.. يلا انطلقي للمهمة

تگابلو عليَّ ثلاثة مفتولين بالعضلات وسحسلوني يركبوني السيارة غصب، ما حچيت شي صوتي مختفي وبس دموعي تجري.. اخذوني لمكان مهجور صاير على الساحل بي گرڤانات ومهمتي هي افوت لـ گرفان وابوگ مفتاح صايرة بجرار ميز..

نزلت من السيارة رجلي ترعش توسلت بيهم يرجعوني للبيت وابچي بحررگة وخوف وضياع بس محد اهتم زادوا بالضغط على متوني يجروني ويشمروني بالگاع، حچى واحد منهم بلغة البلد بعجرفة..

-الچ نصف ساعة كملتي بالوقت تصعدين ويانه ما كملتي نعوفچ وحدچ هنا

ركب السيارة بعد جملته الحقيرة وعافني هنا بالعراء، گمت بسرعة اصارع الوقت وركضت بكل سرعتي لجهة الگرفانات وتلفوني بيدي اضويلي الطريق.. واني اركض وبهذا الوضع التعيس عرفت ليش شمسون زوجني فاهد حتى يستغلني لاعماله القذرة! ظل ورايه لحدما لزم عليَّ كم لزمة قوية وصار يهددني بيها صرتله طُعم لاعماله الشيطانية!!

اركض بين الگرفانات وهواء الساحل قوي وبي ملوحة اصارع الجو الصعب والهوا العالي واكمل طريقي، اتلفت بين دقيقة والثانية خايفة خاف اكو احد رغم اكدولي اليوم محد موجود غير الحراس وهمه اربعة متوزعين كلمن على زاوية، لمحت الحارس الاول ونصيت ضوا تلفوني صرت امشي على كيفي كللش وعيوني عليه اراقبه حمدت الله وشكرته من ما انتبه عليَّ وگدرت اتجاوزه..

وصلت للگرفان المقصود طلعت المفتاح الي انطاه الي شمسون وفتحت الباب، مديت بس عيوني اتأكد خاف اكو احد هنا من شفته فارغ دخلت وبوجهي للميز البني فتحت الجرار لگيته مقفول تمعچلت بي مينفتح تعبت وانشلع گلبي اتصلت بـ شمسون ابلغه الجرار مقفول بس ميجاوب!! باوعت للساعة ما بقالي غير 14 دقيقة فكري كيااان فكري بشي!!

چان كسرته بس نبهوني ما اعوف ورايه اثر واضح لهدرجة، صرت اروح واجي اراوح بمكاني عصرت عقلي افكر بكل الافلام الاجنبية الاكشن التابعتهن ويه نشوان قبل وويه فاهد هالايام واجت ببالي فكرة ماعرف راح ترهم لو لا..

سحبت ماشة من شعري شايلة بيها گذلتي عوجتها لنصين وبقيت اجر بيها لحدما انفصلت طرف عن طرف، اخذت طرف منها وصرت اعوج بي وأعقف نهايته اصابعي انمردت مرد بس مو وكت وجع هسة لازم افتح القفل..

گنبصت وحطيت كل روحي ويه القفل احاول افتح بي بس مدا يرهم، بديت افقد صبري تعبت وحسيت راح انهار من التوتر ايدي ترجف وانفاسي انگطعت ياله اخيراً انفتح القفل!!

ماعرف شلون انفتح بس المهم صار يااارب لك الحمد والشكر! فتحت المجر ولگيت مفاتيح هوايه گلولي المفتاح معلگ بمدالية لونها اخضر، لگيته مدحوس جوه جريته ورجعت احاول اقفل الجرار بس تعبت وما انقفل عفته وطلعت من الكرفان..

غمضت عيوني وطگيتها ركضة بأقصى سرعتي ما بقالي غير دقيقة ومستحيل راح اوصل للسيارة بهذا الوقت، ميصير اللتفت حتى لو احد يكشفني ماعندي وقت لشي ولحسن حظي محد شافني من الحراس..

وصلت للسيارة اخيراً لگيتهم هستوهم ديحركون صحت بأنفاس مقطوعة بالعربي متناسية همه اجانب..

-وصلتتتت وصلللللت اوگفووووو

اركض وره السيارة وابچي خايفة يعوفوني وهمه مستمرين بالسياقة، صرخت بحس مبحوح بس اريدهم ينتبهولي الانذال يسوقون السيارة على البطيء يعذبوني اثناء ركضي تعثرت بقيطان حذائي ووگعت بنص الطريق اشهگ وابچي بحرگة بلاعيمي تجرحت من العياط وروحي ممرودة من الخوف تعبت والله تعبت شوكت يخلص هالعقاب!!

خمس دقايق ورجعولي الحقراء اشرولي اصعد للسيارة بس ماعندي طاقة گوة گمت وتمشيت ما انتظروني زايد وسحلوني وشمروني بيها وواحد منهم مد ايده يريدني انطي المفتاح، بدون كلام زايد حطيته بيده واللتزمت الصمت لحدما رجعوني لبيت فاهد..

نزلت اسحل برجليه روحي رايحة والتعب ماخذ من حيلي حصة، فتحتلي المساعدة الباب وباوعتلي بطرف عينها معاحبها عفتها وصعدت فوگ لغرفتي ونمت بالفراش بدون سبح ولا تغسيل ووصلتني رسالة من شمسون كاتب..

"عفية كياني، المهمة الاولى انتهت نلتقيچ بالمهمة القادمة"

اللحق رسالته بـ..

"الموضوع بيناتنا مو تغلطين وتسولفي لاحد لان اذا احد غيري وغيرچ افتهم تعرفين شيصير لفرفوشي؟"

شمرت تلفوني منقرفة اريد ازوع لحدما ارتاح من وجهه المقرف، غفيت وحسيت الصبح على صوت طگطگة المساعدة داخلة تنظف غرفتي عفتها ممهتمة ورجعت انام ما گعدت الا العصر من التعب..

گمت راسي مسطور واحسني وصخة، اخذت ملابسي ودخلت اسبح طلعت انشف بشعري وشفت فاهد بغرفتي نايم على الچرباية ودافن وجهه بالمخدة..

-كيان: شكو شبيك

-فاهد: اااااااااااه

-خيرك

-خ**

-اتفق

-وز****

-اتفق

-و***** ابوچ

-الله ياااخذك كم مرة گتلك لا تفشر على اهلي!!!!

-ههههههههههههههههه شفتچ ضايجة گلت اغيرلچ جو واطلع صوتچ

-دطلع اطلع خليني ابدل

-كوري

-نعم؟!!

-سمممم ومررض

-احچي بسرعة مابيه حيل فاهد تعبانة

-تعبانة ونايمة للعصر؟ اي لا عبالچ المساعدة ام مخلد متحچيلي كلشي يوصلني اني

-وبعد شنو حچتلك؟

-گالت للعصر نايمة مثل المطاية

-ولك امشي ولي بررره

-كوري شبيچ كلنا مطاية بقت عليج

-شلون بيك انتَ

-وگالت چنتي تعبانة ومالچ خلگ صدگ هالحچي؟

-اي صدگ

-ليش شبيچ

-البارحة وضعي تخربط وانتَ طالع دايحح

-باع هاي اني مشگوگ نصين البارحة وهاي عبالها چنت بديزني لاند

-اگلك جوعانة

-تعالي اكليني

-ايع

-شبيچ تره طيب خصوصاً كراعيني يشهن

-لا تلعب نفسي يمعود

-كوري سؤال

-المسودن جواب

-ممكن اللطعچ؟

-ولك يبوووو عليك يبوووو شبيك انتَ همجي تلحس وتعضعض وتكتل وتتونس على العنف شبيك فهمني شبييك

-يله رايح اني اجيبلچ زحير

-ببطنك

-وبگلبچ

-وبگلب امك ومساعدتك العاار

-وبگلب اخوانچ

-وبگلب ابوووووووك

-امييييييين

طلع من الغرفة يضحك بصوت عالي ضحكته مال مخابيل والله مابيه حيل اتلاسن وياه بس يجبرني بسوادينه يشلع گلبي!

بدلت وجابلي اكل ونزل، اكلت ودرست شوية علما اذن المغرب فرشت مصلايتي رغم ذنوبي وعصياني بس ماعندي غير ربي اللجأله، لبست الچادر وصليت صلاة المغرب وبچيتت لحدما عيوني طلعت دعيت ربي ينجيني ويخلصني من هالمشكلة ويرتاح گلبي وترجع حياتي طبيعية اخلص من كل الهموم البيه والوجع الاحس بي..

كملت صلاتي وبعدني بأحرام الصلاة ودگ تلفوني المتصل "جنات التثثث" (التسس) متصلة كام فتحت الاتصال وگعدت على چربايتي..

-جنات: بعدچ تصلين؟؟

-كيان: اي صليت على كيفي، شلونچ ولج

-جنات: زينة اني لعد شوكت تبدلين؟

-كيان: ابدل لشنو؟

-جنات: لعزيمة اليوم! كيان لا تگولين ما راح تجين والله العظيم ازعل عليج

-كيان: اوگفي اوگفي يا عزيمة هاي شو هسة ياله دريت اني

-لا شلون مالك اتصل بفاهد وبلغه المهم هسة عرفتي مني اليوم معزومين كلكم انتِ وفاهد شُهيب ومثرة كلكم راح تجون لبيتنا

-ولو مالي واهس بس حلوة اللمة، زين شنو المناسبة؟

-هيچ ماكو مناسبة بس صار موقف اليوم ومالك گال نثوي عزيمة

-شصار قلقتيني.. اوگفي هاي شلابسة ولچ

ثبتت التلفون على الكاونتر الگبالها وراحت تشتغل لابسة شورت قصير وتيشرت احمر ربع ردن بس تتحرك تبين منها بطنها وحاطة مكياج خفيف..

-كيان: مالك بالبيت؟

-جنات: لا طالع يمة ما اللبث هيچ گدامه مو لهدرجة اثتحي عاد

-كيان: مو اگول شو طلعتي فد مرة ادبسز انتِ هههههههه

-جنات: ثكتي حايرة ماعندي ملابث شريفة لازگة بالعباية بالبيت چني باتمان اثتحي من مالك عود بث بالنومة انزع

-كيان: اممم

-جنات: حبابة خلينا نطلع فد يوم واشتري ملابث وياچ

-اي بعيني تدللين لان ملابسچ فضيحة

-اي والله صح

-المهم كمليلي شصاير وياچ؟

-جنات: باعي.. اني صارلي عشرة ايام وضعي زبالة من اگلچ زبالة فـ زبالة زبالة ما انام ولا آكل ولا اتحرك من الفراش وتعرفيني ماگدر انام وحدي وهيچ باقية اتصفن بالحيطان من مالك يطلع للشغل

-يا عيني شجاچ

-گعدت اليوم الصبح توقعت مالك طالع للشركة بس من رحت للمطبخ شفته هناك دينظف ويرتب بمسواگ الثلاجة ويحطهن بعلب مقسمة وكل علبة كاتب شنو بيها بقصاصة صغيرة هاا للملاحظة كيان شگد نظييييف هذا الرجال جاي يعجبنيي يتخبل من شي مرعبل وميقبل حتى لو يجي ميت تعب لازم يرجع يسبح ويتعطر ويبدل ويمشط ووو وهو مسوي كل هالشغلات الصبح تخيلي! لا وانوب كنتوره لازم لازم تشوفين كنتوره اليوم وعلي استحيت من روحي من شفته

-راويني حبابة اريد اشوف

-اراويچ طبعاً اي، المهم فـ من شافني ابتسم وگال..

-مالك: صبا الخير

-جنات: صباح النور شعجب ما طالع؟

-مالك: گلت نبقى اليوم سوه نتريگ ونغير جو

-جنات: هاا؟

-مالك: سويت ريوگ تعالي خلينا ناكل

-ما اشتهي اني

-ماكو ما تشتهين تعالي

تقدمت اگعد على الميز بالمطبخ وهو گام يجيب ويحط گدامي اشكال واللوان، طبعاً علاقتي بي متوترة هالايام واحسني دائماً خجلانة منه وهو ديحس بيه ويحاول يسوي الأمور طبيعي بيناتنا..

-مالك: شوفي راح تاكلين لان راح اتحمل ضيم من ابوية بسبب گعدتي هنا وياچ وما اروح للشغل

ضحك وره جملته حچاهة بمزح بس اثرت بيه واحس راح ابچي هالرجال ما قصر ويايه بأي شيي من طبيت بيته لليوم اول يوم ما توافقنا وصارت نگرة بس وراهة لا يجنن كلش ضحوگچي ومو ممل ويحب يلطف الجو اصلاً شخصيته تختلف تماماً عن الي متخيلتها وعن الي شفتها ويه الناس..

-مالك: اي شكو ماكو

-جنات: ماكو

-مالك: نطلع اليوم؟ خلينا نروح للسوگ اذا تردين او لمطعم.. او حديقة حيوانات او مدينة اللعاب؟ 

-جنات: مدينة اللعاب؟ ههههه مالك اني مو لهدرجة طفلة

ضحك وسوالي لگمة آكلها ابتسمت واخذتها منه، غمزلي وگال..

-لعد شبيه ما جاي اشوفچ غير طفلة مدللة

-يجوز صدگ بسبب تعامل ايات ويايه چانت تشوفني طفلتها وبنتها وتعاملني على هالاساس حريصة تعلمني الصح من الغلط وتركض وراية بكلشي اثوي حتى من صالحتها قبل ثلاث ايام وجاوبت اتصالها تتذكر من سألتني ليش جاوبتيها؟

-اي بس ما انطيتيني جواب

-هثة اجاوبك، لان ايات اعيدها للمرة المية مو اخت هي ام تعبت وربت وفضلتني على نفسها بكل موقف مر بحياتي بغض النظر عن الصار بعدما انخطبت الك بس ما انسى وگفاتها ودلالها وحبها الي وعطفها عليَّ

-حلو هالشي واني من گتلچ ليش جاوبتيها وصالحتيها ما چنت ضد تصرفچ بالعكس هالشي لطيف ونابع من قلب ابيض وطيب

-امم

-المهم هسة ايات مو موضوعنا شگلتي على الطلعة؟

-ماريد اطلع

-ليش؟

-مالي واهث (واهس)

ابتسم وفاجأني من مد ايده وتلمس كف ايدي بلطف رعشة زارت عامودي الفقري ولا ارادي عيني لزگت بعينه التنبع حنية بطني خبطت وتوترت ماعرف ليش ديباوعلي بهالطريقة احس اريد ابچي..

-مالك: جنات انتِ مصابة بشي اسمه homesick وهي حالة نفسية تمرين بيها وتكونين بحالة اكتئاب وحنين الى الوطن والاهل واني متفهم وضعچ المضطرب صارلچ عشرة ايام معتكفة على روحچ وما تجيني الا من تردين تنامين مثل البزونة تلفلفين روحچ بحضني

-هههه مااالك

-بس طبعاً بزونة وحشية لان نومتچ ابد مو طبيعية

-لييييش يممممة

-اي احچيها بصراحة شنو تلعبين تايكوندو وانتِ نايمة؟

-يووووووه كافي

-حركاتچ تُدَرس

بوزت بالچذب ضحك وجر خشمي بين اصابعه، اشرلي اكمل اكل وهو هم اكل ويايه وفجأة گال..

-شنو رأيچ نعزم فاهد وكيان اليوم على العشا؟

-جنات: اي اي الله ايي

-مالك: اجيب اكل من بره ونسهر على فلم راح تغيرين جو وتتونسين وياهم وباچر لازم اخذج للجامعة تسجلين كافي كسل

-ماريد مالي واهث اداوم

-لا جنات دراستچ مهمة ضمني مستقبلچ بيها راح يجي يوم وتحتاجيها

-ماعرف شنو ادرث؟

-انتِ مو گلتي تردين تربية رياضية؟

-لا وييييع كرهتها الله ياخذها

-هاي ليش؟

-ماحب اريد غير شي

-تمام امور طبية؟ هندسية، اقتصاد؟ تدريس؟ علوم؟ شنو تحبين يا مجال؟

-مالك هنا جامعاتكم غااااية بحثت عنهن كلهن يگصبن بالگطنة

-يگصبن بشنو؟

-بعدين اشرحلك عليها جاوبني شگد لازم ندفع بالجامعة هنا؟

-حسب التخصص عدنا تخصصات تعبر 80 الف دولار سنوياً

-علييييي شلون راح ادفع واني مصفرة چني ام براء الي بالتقاطعات؟

-منو ام براء؟ وليش تستهزأين بالناس الفقرة عيب

-يااا ولك ام براء العلم هاي اكو واحد ميعرفها والزهرة ازگن مني ومنك

-زنگينة وبالتقاطعات تشتغل؟

-تجدي نعم نعم وتركب ثيارة (سيارة) تاهو من تكمل جدية

-اها من ذولة الجماعة هاي

-اي اي وتجيب براء وياهة في بعض الاحيان بث يمة هو شلون براء غير يشگ اربطعش شگة العيون زرررگ والوجه يلمع لممع

-عجيب شلون تطلعها وياهة وهي بهذا الجمال

-منو؟؟

-براء

-ولك براء ولد شاب

-ولدد وگاعدة تتغزلين بي هيچ؟!!!

-اي لان الله جميل ويحب الجمال ولازم نتغزل في خلق الله هاي صديقتي علمتني (اقصد صبا)

-عاشت ايدها والله على هالتعلوم ال*****

-اگلك انتَ ليش تفشر وشبيك شديتها انتَ شايف براء؟ دشوفه والله حتى انتَ راح تحبه

-سكتي جنات كاافي

-وابو فاضل يموت حتى هنادي مرت ابوية مكرشة عليه

-عاد هناادي زغروور

-شنو هنادي زغرور؟

-معليچ

-هاي شنو عود زعلت مني؟

-لااا

-شبيك تنتر

-بكييفي

-ها غرت من براء؟ ميخالف اشتريلك عدثات (عدسات) زرگ هثة تصير مثله

فتحت عيوني من لزم شفايفي يمردهن بين اصابيعه ونتر بين سنونه..

-سكتي

حركت راسي "لا" خزرني ما اهتميت ظليت اباوعله شدد بالخزرة ودفعت ايده عني..

-جنات: وخررر متخوف هي گوة

-شگد صلفة هالطفلة!!

-انتَ طففل

-اني طفل؟؟

-اي طفل مشيب هم!!

-لخاطر الانبياء والمرسلين منيلي شيييب مو حتى شككتيني بروحي

-خاف عبالك انتَ صغير ومصدگ روحك؟

-باابا كله عمري 33 سنة كاافيي

-اي قابل 33 صغير

-صمي حلگچ وسكتي

-ماعرف

-بلعيي لسانچ بلعيي

-هم ماعرف

-اني اعلمچ بسيطة

لزمني من رگبتي من وره وقدمني عليه صرنا وجه بوجه اخترعت خرعة تسوه عمري من حركته وصحت بوجهه..

-يممممة شبيك انچلبتتتت

-تسكتين لو اعلمچ شلون تسكتين؟

-اثكت اثكت

-ههههه يله ثكتي

هدني يحررني من ايده توترت وصرت افرك بيدي تخربطت احوالي واحس صخنت..

-امداك

-جنات!!

-اهووو وخر زاعلتك

-أجلي الزعل هسة خلينا نرجع لجامعتچ انتَ شنو يعجبچ تصيرين بالمستقبل؟

-يعجبني اداوم يمك بالشركة

-هههههههههههههههه هالشي مستحيل

-لييييش

-لان لا الجو جوچ ولا المكان مكانچ

-بث يعجبني

-يعني تحبين مجال الاعمال؟

-اي احب اصير بزبز ومن

-زوين لعد من يجي فاهد اليوم سألي عن ادارة الاعمال عنده معلومات واسعة ما بقاله شي ويناقش اطروحة الدكتوراه

-فاهد دكتووور؟؟؟

-بقت عنده بس المناقشة يكملها ويصير دكتور بإدارة الاعمال

-شجاب هذا المثودن على الدكتوراه؟ انتَ متأكد؟؟ يعني ما جاي تضحك عليَّ مالك؟؟

-والله شبيچ

-شو كيان ما گالت

-ماتوقع تعرف بعدها

-ليش؟

-هو كتوم بهاي الشغلات ميمشي ويحچي بيهن يشوفهن تفاهة لان الدراسة للشخص نفسه نجاحه هو فقط مو نجاح الناس

-زين وابوك قابل؟ احث شمثون ميحب هاي الشغلات؟

-بالعكس ابوية اكثر واحد يشجعنا على الدراسة اتذكر قبل چنت اني وشُهيب نهرب من المدرسة ههههههههههه ويجينا للمدرسة يطيح حظنا گدام الكل يكتلنا ميهتم ونرجع للبيت هم ناكل المقسوم ونظل واحد يدافع للثاني وواحد يتصدى ضربات الثاني...

ضحك هوايه وهو يحچي هالجملة ابتسمت كلما يذكر شُهيب تصير لمعة بعيونه ويتحمس للموضوع ويحب يحچي بي لحدما ينتبه لروحه راح زايد ياله يسكت مثلما صار هسة..

-جنات: خلينا نعزم شُهيب ومثرة هم

-نعزمهم؟

-اي حلوة تصير اللمة

-ماتوقع شُهيب يقبل يجي راح يتحجج بالشغل

-يا شغل مو اليوم عدكم عطلة؟

-اي بس اني اعرف شُهيب

-حباب حاول وياه واعزم اخوان كيان وماريا واعزم صبا وفاضل والكل الكللل اريد كلنا ننجمع

-شنو رأيچ اجيب حتى حبيباتي القديمات؟

-ووويععع شثوي بيهن ذني الططوات

-ههههه لا اتشاقه نعزم شُهيب ومسرة هسة بيها مجال الباقين غير وقت نسوي عزيمة ثانية حتى نكون متحضرين ومنتفشل

-جنات: تمام بكيفك

-كيان: وراح يجون؟؟

-جنات: ولچ اييي سمعته يحچي ويه شُهيب يگله لا تكسر خاطر جنات وتعالو ويمكن يمكن شُهيب اقتنع يجي

-كيان: ياااااي تحمست جنات راح اگوم ابدل اختاريلي لبسة اللبسها

-جنات: يله بينما اثوي الزلاطة

-اگلچ شنو راح تسوين اكل؟

-ما اثوي اني ماعرف اطبخ بث ملاك گال راح يجيب من بره

-وشوكت يرجع ملاك؟

-مادري گال عنده هواي شغل بالشركة

-تمام باعي اللبس هذا الفستان الاصفر لو الاسود؟

-لا مو حلوات ثنينهن شوفي غيرهن

اللتفتت تنطي ظهرها للكامره مبين بس گفاهك وراحت للمغسلة تغسل ايدها والخضروات واني هم حطيت التلفون على الطاولة ومديت راسي بالكنتور ادورلي لبسة، بينما اني ادور ومشغولة شتتني صوت شهگة جنات طلعت ركض من الكنتور ولزمت الموبايل اشوف شبيها..

-جنات: يممممممة يممممممة خرعتني ولللك مالللللللك

-مالك: انتِ خاروعة شسويلچ

-جنات: گلبي وگف حرام عليك والنبي اني اموت خوف وحدي

صارت تحوم حول نفسها متوترة تدور على شي اتوقع دتدور على عبايتها الاسلامية تلبسها فوگ ملابسها الفاضحة بس دا اشوف شي اسود بيد مالك واتوقعها العباية؟!

-مالك: شتدورين؟

-جنات: عبايتي هنا چانت هثة وين راحت

-يمكن الجني اخذها

-لاا مالك لا تحچي هيچ والله اخااف

ضحك بصوت عالي مستمتع اي اي مستمتع على تذمرها وحركاتها هذا مو مالك هذا غير واحد اصلاً! شخصيته متغيرة ويه جنات صايرة احلى! احلى بهوواي ويضحك ويبتسم ويتشافى ويتحارش بيها گلبي وجعني من تقرب منها هي مادة نفسها تدور جوه الكراسي وهو نزل لزمها من زندها ولفها من خصرها من وره..

-جنات: هاا هاا خير شكو

-مالك: عوفي العباية جنة انتِ احلى بدونها

-ايا ثاقط! تريدني انزع الحجاب؟؟

-ولچ هنا هناا ما تلبسيها مو بيتچ هذا ليش متاخذين راحتچ وتلبسين الي يعجبچ

-وخر اثتحي

-ليش ليش

نزل نفسه لمستواها ومو هي العاشت الدور اني عشته واني الي ارتبكت و بلعت ريگ متوترة يمكن نست اني وياهة على الخط بسبب هدوئي، رفعت راسها تباوعله زاحو عن الكامرا شوية ماگدر اشوفهم شنو ديسوون بس اسمع لتذمر جنات وضحكها الي صار شعلاته وهي تصيح..

-ولك لااااا لاااا اغااااار هههههههههههههه اغاااار ماتحمل مااتحمل هههههههههههههههه

-هههههه لعد صيري حبابه ولا تعاندين بعد

-مالك الططوووة هههههههههههههه راح اموووت هدني عليك الله بروح اممك هههههههههه اغار ولك عزززه عزززه

تضحك بصوت عااالي كلش ومالك يضحك على ضحكتها ويزيد بالشي الديسوي مدا افهم شنو اغار؟؟ وليش تضحك احسني بعالم ثاني وجاية دخيلة بيناتهم!

-مالك: ممنوع اشوف العباية عليج بعد اذا اجي واللگاچ لابستها اشگها والله

-مو اثتحي

-خطية تثتحي ولا چنهة كل يوم نايمة بحضني

-جنات: ثاقط فاثق ثافل

-مالك: تمام اني ساقط خلينا نشوف منو ينيمچ يمه بعد

-لا لا حباب چنت اتشاقه

نزيت مخروعة من انفتحت باب غرفتي، سديت الخط بسرعة وضميت التلفون لصدري اتنفس سريع خايفة وفاتحة عيوني على وسعها من شفته فاهد..

-فاهد: شبيچ مفزوعة؟

-ماكو.. ماكو شي

-ليش حاطه التلفون على صدرچ شنو چنتي تسوين بي؟

-هاي شسمه.. شبيك چنت احچي ويه جنات عزمتنا على العشا

-تمام عزمتنا على العشا بس ليش مخطوف لونچ وعيونچ مدمعة چنچ تبچين؟

-كيان: مااااابيه شي فااااهد ماااابيه كااااافي تلح كااااافي

-فاهد: شبيچ شسويتلچ اني؟؟؟ هاي فوگما اسأل عنچ واتطمن عليچ اشوف شلون صرتي؟؟!!

-كيان: لا تسااأل لا تتقررررب منيييي ولااا تلمسني وره ما دمررت حياااتي اجيت تسألني شبيچ تبچيننن؟؟؟

-فاهد: كيااان

-كيان: يااا اخي ماحبك لو مو تطمن عليَّ لو تحططط الگمر بيدي هم ما راح احبببك بيوم مااااريدك اطلعععع بره ولا تشوفني وجهههك اكررررهك

-جاي تتجاوزين حدودچ!!

-كيان: لا تسمعني صوووتك انتَ حمل ثقيل على الكل فاااهد دمرت حياة الكل وخربت سعادة الكل!!!

خزرني بحدة بس ما اهتميت ودخلت للحمام وقفلت الباب عليَّ گعدت بالگاع ابچي مثل المخابيل اتذكر جنات ومالك واضرب على رجلي اعاقب نفسي شلون ما سديت الخط اول ما وصل شلون تمنيت روحي بدالها وهو يغازلها ويحضنهاا شلون خنتها بتفكيري وهي متصلة حتى تعزمني على عشا ببيتها!!!

بچيت بقوة لفترة طويلة تعبانة كلش روحي توجعني والله روحي توجعني شوكت اقتنع هو تزوج وعلاقته بجنات حلوة ومستححيل نصير لبعض شوكت اقتنع اني تزوحت اخووه!

اخوه الي جرحته بالحچي وصحت بي بس لان اجه يتطمن عليَّ؟؟ شگد حقيرة اني وشگد لئيمة استاهل اموت واخلص من هالدنيا وارتاح من نفسي الحقيرة والدنيئة..

-كيان

كتمت انفاسي اسد حلگي بيدي احبس صوت بكائي ويه صوت طرق فاهد للباب وينادي بأسمي، مسحت دموعي بسرعة وركزت وياه وهو يگول..

-كوري اكو احد زعلچ بشي؟

شهگت بصوت عالي ماگدرت اخبي شهقاتي اكثر متت من القهر عليه فتحت الباب شفته واگف بالباب منتظرني ما راح بدون كلام حضنته من رگبته اعتذرله بطريقتي اشدد عليها بقوة وبچيت على چتفه افرغ كل طاقتي..

وللعجبة ما حچى ولا ضحك ولا استهزأ مثل عادته اكتفى يحاوطني من خصري بأيد ويمسح على ظهري بالايد الثانية..

بقينا على هالحال لحدما ارتاحيت طبطب على ظهري بخفة وابتعدت منه امسح عيوني وارتب شعري التخربط، باوعت بعيونه الصفر الحادة متغير لونهن صايرات افتح ويه اضوية الغرفة.. ابتسمت وگلت بهدوء..

-اني اسفة لان ضوجتك فاهد سامحني

-ما اسامحچ

-حقك والله اني قللت احترام وياك وتجاوزت وانتَ اجيت تتطمن عليَّ اني اسفة امانة لا تزعل مني

-ازعل

-فااهد والله اسفة شبيك دسامحني شدعوة عليك

-ما اسامحچ الا تمسحبن خنينتچ لان لعبت نفسي منها

-ايييييع حقير شبيك انتَ يوووووه

سحبت كلينسه امسح خشمي وهو طگ بالضحك، باوعتله مطنگرة زاد بالضحك..

-فاهد: ما توقعتچ راح تفهمين شنو معناها

-تعلمتها من جنات الططوة

-جنات اويلي يا جنات ولسان جنات الله يساعد مالك عليها

-هسة المهم سامحتني مو؟

-اريد تحطين حمرة حمرا

-شنو؟

-حطي ومعليچ

-صدگ تحچي؟

-اي حطي يله

راح للميز مالتي سحب روج احمر وگلي مدي شفايفچ، ضحكت وسويت بوز خفيف لزم حنچي من جوه وصار يرسملي شفايفي بالحمرة بدقة واحترافية عزة العزاه شلون جابها عدل ولا طلعت من حدود الشفة..

-ولك فاهد هاي شمعرفك ترسم الحمرة؟؟

-بكلشي افتهم كوري بس انتِ تستهينين بمهاراتي

-يعني امكيج نسوان من قبل!

-ليش تردين امكيجچ؟

-اي فالحلي بس بسوالف الطايح حظها

-المهم تعالي بوسيني هنا حتى افكر اسامحچ لو لا

اشر على خده ضحكت من حركاته شگد سخيف يموت على السوالف الفاسقة، تقربت منه وبست خده باوع لروحه بالمراية صار طبع حمرة خفيف بخده هز راسه معترض واشر على الخد الثاني..

-اهوووو فاهد

-يله للچ

-اني اعلمك

بسته مرة ثانية بخده الثاني ورجع يباوع لروحه بالمراية وما قبل هم اعترض واشر للخد الثاني شلع گلبي..

-كيان: ان شاء الله تريد تصور خدك وتنشره حتى حمرتك تشوفه؟!!

-اي اريد اصوره بس مو حتى تشوفه حمرتي

-يعني راح تنشره؟

-لا ولچ احتفظ بيها الصورة لنفسي يله شوفي شغلچ وبوسي عدل شبيچ عبالك جاي تبوسين بريعصي لعبانة نفسچ

-كيان: اووووف تعال

فوگ الست بوسات بسته وباقي ما راضي مادري شصخمله بعد وجهه صار بي طبع احمر وبعده ما قابل حضرة جنابة.. اخر مرة اشر على خده الايسر لزمته من زنوده انبت اظافري بي اوجعه وتقربت ابوس خده وبنفس اللحظة حرك وجهه صارت البوسة على طرف شفته..

فتحت عيوني مصدومة وهو مصدوم بقينا واحد صافن بوجه الثاني لكن سرعان ما تحولت ملامحه للمكر وضيگ عيونه بوكاحة..

-فاهد: خو گولي مشتهية تبوسيني على شنو هالحركات

-صارت بالغلط تره وانتَ تحركت

-اي اي صدگتچ كوري

-والله العظيم شبيك انتَ تحركت اني چنت دا ابوسك على خدك بس انتَ تحركت

-امممممم صح صح

-اهوووو روح بعد ماحچي وياك تشلع گلبي

-دولي بدلي منتظرچ جوه العالم منتظرينا وانتِ گاعدة بالحمام تعوين مثل سليمة

-سليمة تطمك

-وتطم ابووچ

-لا تدعيي على ابووويااا

-تره سليمة طامة ابوچ مو ميت بعد شكوو

-حتى لو!!

طلع تلفونه من جيبه واخذ كم صورة اله ويه طبع الحمرة مالتي ضحكت من كل گلبي والله هالرجال عجيب ما افتهم وجهة نظره ابد، الصورة الاخيرة اخذها بالمراية الي واله واگفين بصف بعض، غمز وگال..

-حلوة وانتِ تضحكين گلت ما افوت الفرصة واخذلچ صورة يالبومة

طلع بره الغرفة واني رحت ابدل ملابسي وهالمرة قررت وصمتت ودگيت رجل راح اصير ادمية وامسح مالك من عقلي وراسي مو مثل كل مرة ارجع اضعف بالنهاية لا هالمرة من صدگ والله والله والله بعد اتأدب واغير من نفسي لان اني ملييييت من هالعيشة المقيتة! قصتي وياه انتهت قبل لا تبدي ولازم تبقى هيچ لانه مبين سعيد ويه جنات لدرجة شخصيته تغيرت مية وثمانين درجة عبالك غير واحد!

بدلت وكشخت على اخر حباية وطوخت مكياجي عكس العادة ونزلت للصالة فاهد شافني وفك حلگه..

-فاهد: انتِ نفسچ ام خنينة الفوگ؟

-كيان: نفسي

-فاهد: مو چنتي تعوين مثل الجرو؟ شصار؟

-كيان: خيولي بعد راح بوكته

-كفو