تحميل رواية «ابناء الحسوم "شمسون"» PDF

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

بلكي نموت!

خلصنه العمر لچمات ومحد يفهم شبينه

الوجع لاحگنه من كل صوب، حافظ حتى اسامينه.. 🥀

━━━━━━  ━━━━━━

"FLASH BACK"

جو كئيب، برد قارص، ثلوج تغطي التلال والارضية الطينية، يوم اخر عادي من ايام التدريب في روسيا ماكو جديد غير الحزام المصنوع من جلد الأوزة القاسي يضرب جسمي بشدة.. ضربة بعد ضربة بعد ضربة حسبت كل جلدة تلسع جلدي، كل جلدة تشلع لحمي وصولاً لعظامي وما مسموحلي اگول "ااخ"..

قابض على فكي بقوة وفقط عيوني التنعصر ويه كل جلدة تطبع على ظهري، 113.. 114.. 115.. 116.. 117.... احسب واحس بالدم يجري من ظهري وصولاً لبنطروني المتمزق للارض روحي راح تطلع والنفس بعد مينجر عندي، مصلوب جسمي على عامود ومقيدة ايدي بكلبشات ورجلي كذلك مستسلم وراضخ للوضعية احلف بداعة امي شفت روحي تطلع ويه الجلدة 147 وفجأة....

-كافي

توقف الجلاد عن الضرب ويه صوت المدرب الروسي، جريت نفس عميق مهدود حيلي فكوا القيود عني والعيون تراقب ردة فعلي، بدون كلام وگفت على حيلي فوراً أدعي مابيه شي ولا كأن اشتعل ظهري من لسعات السوط..

ابتسامة شريرة اعتلت وجه المدرب من شاف وضعي الصامد، هز راسه بـ رضا وگال بعجرفة بلغته الروسية الام..

-عقاب تستحقه

سكتت ما اجاوب ولا اناقش، عبرني وراح للواگف بجانبي على بُعد خطوتين وما سمعت غير صوت راشدي قوي دوى بأذني يطبع اصابعه الضخمة على خد الطفل البريء، رص على اسنانه بقوة وزئر بصوت يزرف طبلة الاذن..

-عقوبتك اليوم تنام بره بين الخنازير!

بچه الطفل بصوت عالي يرتجف خوف ورهبة، ضربه راشدي ثاني يجبره يسكت بس ماكو فائدة الطفل يبچي بقوة اكبر وتضاعف البكاء من صار يضربه بوحشية وعنف ويجلده بـ سوط الجلد على وجهه وظهره وجسده الصغير، ما عافه الا من اغمى على الطفل تركه بالارض مدمى وشاحب الوجه واللتفت الي مخنزر..

-وانتَ!

استقبلته بملامح باردة جامدة "كالعادة" وواضح هالشي استفزه، مد السوط الي ونتر مكشول ملامحه..

-شُهيب.. شُهيب.. شُهيب شمسون!!

-شُهيب: اسمعك

-ما خايف؟!

فضلت عدم الاجابة، كرر السؤال بطريقة اقسى وهو يتقدم يثبت عيونه بعيوني وعاد السؤال لآخر مرة ضايف عليه إضافة..

-ما خايف من النتيجة شُهيب شمسون؟!

-شُهيب: لا

-واثق من نفسك؟! وانتَ متعاقب ما صارلك خمس دقايق!

-نعم

-يعني تعترف انتَ غلطت؟!

-شُهيب: ممكن

-بعيداً عن العقاب تظن انك تغلبت على الكل هنا؟

-ممكن

-جيبوووو النتاااااائچ!!

صرخ للرجال الي خلفه يجيبون النتائج الاخيرة، دورت عيوني بين الموجودين ادور عليهم بس مالهم اثر وين راحوا يا ترى هل همه بخير؟

-شُهيب شمسون!!

رجعت انظاري اله اثبتهم شمر النتائچ الي بأيده بقوة على الارض ونتر..

-اليووم كان تدريبكم المحاربة بالماء الباردة! ماء بارد صلد يجمد الاحشاء ودام القتال لساعات مثلما تعرفون.. شُهيب غلط ويه زميله وتعااقب عليها بس ما خلص عقاابه!!

توجهت جميع الانظار الي منتظربن ردة فعل عصبية او همجية او تهجم على المدرب بس فضلت السكوت بما ان اني متأكد ما سويت شي غلط مجرد ساعدت صديقي من الموت راد يغرگ وجريته وانجلدت بسبب هالفعل 147 جلدة والله يعلم شنو العقاب الجاي..

-المدرب: ثنين من زملائكم ودعوا البطولة رحمهم الله والباقين امامي واگفين..

الكل وگف يترقب النتيجة احر من الجمر، 36 ولد واقفين مكتفين ايدينا خلف ظهورنا جزأنا العلوي عاري، الوجوه مزرقة والدماء تقطر من كل جزأ من اجسامنا منتظرين النتيجة النهائية..

-المدرب: المرتبة الاولى موزس ضد زينيه.. محاربة دامت ساعتان وخمس دقائق واثنا عشر ثانية.. النتيجة النهائية لصالح موزس مخلف اربعة كسور وطعنتين لجسد زينيه الذي تم نقله لمستشفى التدريب يحارب الموت.. هنيئاً موزس..

انرفع خد موزس بأبتسامة جانبية دليل الفرحة وهذا كان كافي لـ يعلن فوزه بهذهِ المباراة الشرسة من مراهق اكثر شراسة مثل موزس..

-المدرب: المرتبة الثانية، شُهيب ضد فرانكوو.. محاربة دامت ساعتان وست دقائق وتسع ثواني، لولا تدخل ابو گلب الرهيف ومساعدته لـ موزس من الغرق كان فاز بالمرتبة الاولى لكن الي يهمنا هي النتيجة الان!.. النتيجة لصالح شُهيب مخلف اربعة كسور وطعنة سكين لجسد فرانكو الذي ايضاً تم نقله لمستشفى التدريب يصارع الموت.. مبارك شُهيب

تنفست الصعداء مع هزة راس بسيطة ضربني المدرب على ظهري بقوة يهنئني رغم عصبيته مني بس كمل باقي النتائج يخلينا نروح نرتاح.. اول ما كملت ركضت ادوره وينه ما شفته اليوم معقولة صار بي شي من قِتال اليوم؟

دخلت الغرفة فتحت الباب على وسعها واستقبلني جسده المجرح والمدمى، ابتسمت لا ارادي من شفته وركضت اشمر روحي عليه اچنگل من رگبته..

-ماااالك وينك ولك وييين

-مالك: ااااخ خرب روحك وخر ظهري مقسوم نصين

-شُهيب: بـ غوغري ولا بيك

-مالك: اسكت شُهيب تعرف اكو كامرات واجهزة تنصت هنا لا يسمعوك

-شُهيب: هههههه واذا سمعوني شيسوون

-مالك: بس يعلوگ بالمگلوب سبع ساعات متتالية مثلما صار المرة الاخيرة

-شُهيب: صراحة تونست واليوم تونست اكثر من جلدوني 147 جلدة

-مالك: جلدوك؟؟ ليييش؟؟

-ساعدت موزس

-يا غبي

-مالك خوما اشوفه يموت واعوفه تعرفه صديقي وعزيز على گلبي

-مالك: **** على گلبك الموديك بستين داهية!

-شُهيب: مالك خلينا نتفق اتفاق تعال اسمعني..

-مالك: عوف الاتفاق شلونك انتَ بشرني شنو النتائج؟

-شُهيب: المرتبة الثانية

-كفووووو ولك كففففووو

ضحكت فرحان على ردة فعله من حضني ومن الحماس شالني ضربته على راسه وعضيته منه زاد بالضحك ونزلني يمسح على ظهري الملتهب من الجراح ويسولف عن افتخاره بيه وبصبري وطاقة تحملي..

-شُهيب: چان ما سويتها بدونك

-مالك: تسويها وياي وبدوني لانك من الفطرة قوي لا تستهين بنفسك واثبت جدارتك وخلي الطرف الثاني يخاف منك ويهيبك

-شُهيب: صار، انتَ شلونك بعدك تعبان؟

-مالك: صخنت

-شُهيب: قتال البارحة چان عنيف

-مالك: وخسرت بي

-شُهيب: مو ذنبك انتَ تقاتلت ويه وحش "جونا" محد يگدرله مالك دمار شامل للمكان وجوده

-مالك بغمزة: انتَ گدرتله

-شُهيب: بس طلعت روحي ونمت مستشفى اسبوعين

-مالك: وهو نام شهر

-بس..

-انتَ گدرتله شُهيب وفزت المباراة وابوية كلش فخور بيك وهذا المهم..

تنهدت بتعب واستراحيت اخيراً على الفراش جرلي مالك منشفة من الكنتور وغطى بيها جسمي يمسح الدم من ظهري ورقبتي وصدري..

-مالك: انتبه لنفسك ولا تنطي ظهرك لاحد الغدرة تجيك من الظهر حبيبي

-حاضر

-لا تثق بكل البشر مو الكل يتمنالك الخير

-ماطولك بظهري ما اخاف من شي

-بظهرك ونايم على گلبك

-اني خايف يجي يوم ونفترق

-مستحيل راح يجي هاليوم انتَ روحي واعز ما املك شُهيب اريدك تعرف هالشي كلش زين

-اعرف بهالشي، مالك اني اخاف من هذا المكان انرعب احسني بكابوس مستمر وما اطلع منه الا بشوفتك

-ولك تخاف شهوبي مو عيب عليك

-ما راح اچذب اي اخاف وتزورني كوابيس كل يوم، لو مهما اشتدت ظروفنا لو شگدما حاولوا يفرقونا لا تسمح بهذا الشي خلينا نبقى ايد وحدة نحارب كل اليكرهونا

-ايد وحدة للابد حبيبي وانتبه على نفسك مثلما موصيك لا تأمن ببشر حتى لا تنجرح

-حاضر

-بس يا خوفي تجيك وحدة بعدين وتطيح حظك وتكسر گلبك الغبي

-هههههههههه

-شو تضحك؟

-ويننا وين هالسوالف

-ليش؟

-باوع اجسامنا عبارة عن خريطة متشوه من الجَلد والكتل منو تگلبنا

-كله يروح والميروح يتغطى بالوشوم

-وشلون نوشم واحنه محبوسين هنا

-راح يجي يوم وتطلع وتشوف العالم وتوشم وتتزوج ويصير عندك اطفال وتعيش حياة طبيعية حالك حال كل الولد

-وانتَ؟

-اني عوفك مني، تعالي اضمد جروحك

ابتسمت وگعدت على السرير عبارة عن خشبة عالية وفراش بأرتفاع ٣ سنتمتر قطن مغطى بشراشف رمادية سادة..

-شُهيب: حتى مخدات مثل العالم ماعدنا

-مالك: تهون

-شُهيب: شوكت نطلع منا مالك مليت

-مليت لو مشتاق لاخوانك الجدد

-اكيد مشتاقلهم

-شلونها دلوعتك

-كيان زينة بس قبل لا اجي هنا بچت هواي عليَّ هي تبچي من جهة وامي من جهة حرت المن اسكت

-هههه چنت بوحدة صرت بثنين

-عسل على گلبي

-وين اكو من گلبك انتَ

-فاهد: هااااااي شنووووو

-مالك: مسطيي خرعتنا

-فاهد: شنو هاللقاءات الرومانسية شنو هالخيانة!

-شُهيب: فاهد شبيك

-فاهد: اسكت شُهيب اسكت جرحت مشاعري العضروطية

-شُهيب: شيخلصنا منه هذا

-فاهد: قصدك متحبني؟ قصدك اني عبئ عليكم مو؟ اني اعرفكم متحبوني ومتردوني اني صوچي احبكم واركض وراكم!

-شُهيب: حبيبي يا وليدي منو گال منحبك؟

-فاهد: مالك

-مالك: ولك هاي شوكت گلت هيچ

-فاهد: ماكو حاجة تگولها تصرفاتك تفسر هالشي!

-مالك: تصرفاتي تفسر لان گعدت اضمد جروح شُهيب؟

-فاهد: اي وتنطي اكلك هم من يبقى جوعان

-شُهيب: لا تچذب هو يقسم اكله بيناتنا اني وياك

-فاهد: بس ينطيك البرتقالة واني احب البرتقال واتمنى آكل!

-شُهيب: ولك كل يوم انطيك برتقالتي!

-فاهد: ما اشبع اريد بعد

-شُهيب: گول لابوك الخايس يطلعنا منا ونشبع برتقال

-فاهد: اححح شوكت يجي هاليوم لعبت روحي من وجهك شُهيب

-شُهيب: نذل

-فاهد: اتشاقه والله اموت عليك، مالك اول ما نطلع منا اريد اتزوج

-شُهيب: تتزوج وانتَ شواربك لسه ما خاطة!

-فاهد: وليش لعد ما استحق زواج؟ استحق واعرف كللشي بالزواج

-مالك: لانك ساقط

گام مالك وهو يگول هالكلمتين الخلت فاهد يموت ضحك على شنو محد يعرف بس هذا فاهد من يوم يومه يضحك للهوا ضحكات غريبة واظن السبب بالمكان خبلنا والله خبلنا..

كملت تضميد جروحي بـ لا شيء غير غسلهم الي مالك بالماي ولفهم بـ شاش، لا اكو مسكن الالم ولا طبيب ولا مراجعات نبلع الوجع ونسكت هاي حياتنا وتعودنا على الوضعية..

-فاهد: اگلكم يمكن بيه گمل

-مالك: مابيك شي فاهد اگعد واسكت

-فاهد: شو ظهري يحكني

-شُهيب: الگمل ما يصير بالظهر يا ذكي

ضحك مرة ثانية يهز براسه اي ونام متمدد على الچرباية ورافع رجليه ثنينهن للحايط يغني..

-غزالة غزلووكي بالماااي دعبلوكييي...

ابتسمت على فرحته هالانسان متعود يسعد نفسه بنفسه، لبست قناع الجمود والبرود وطلعت من الغرفة اتمشى بالممرات الفارغة حيطانها من أي لمسة غير اللون الابيض، لابس قميص قطن فضفاض رمادي وبجامة من نفس اللون هذا زيّنا وممنوع يتغير صرت اتمنى اشوف اللوان، اتمنى يجي يوم واللبس لون فاتح مثلاً اصفر؟ احمر؟ او اخضر.. ااه الاخضر لوني المفضل شيصير لو سمحولي اللبس تيشرت اخضر راح اكون اسعد انسان بالدنيا..

اللبس الالوان واشوف الطبيعة فقط بالعطلة الصيفية وفقط من احسن السلوك وافوز بقتالات متتالية وابوية ياخذني منا يسمحولي اروح اشوف اهلي فترة وهالفترة اكون اسعد انسان بالدنيا اللعب ويه كيان واداري امي واتشوق على الدراسة ويه نشوان والعراك ويه مروان بس للاسف هالايام مو هواي لانها تخلص بسرعة وارجع هنا اعوف امي منهارة وكيان مكمشة برجلي وتبچي متقبل تعوفني..

ارجع هنا وارجع للعذاب النفسي والجسدي للكتل والصلخ والهمجية، دراستي ماشية بطريقة ممتازة عن بُعد واحياناً اروح مدرسة ابوية عنده معارف كفاية تخليني اداوم مدرسة و homeschool بنفس الوقت شي غريب بس شمسون ميصعب عليه شي والي براسه يسوي..

كلشي بهذا البيت يدعوا للقلق والتوتر، بكل  لحظة وكل ثانية تكون متأهب ومتحضر لمحاربة او قتال، لـ دچة سكين او سلاح فتاك يفصل راسك عن جسمك بس المصبرني اخواني ووجود اخواني وياي مالك وفاهد الدنيا كلها بالنسبة الي وعلاقتنا اكثر من اخوة احنه اصدقاء مقربين متشاركين بكلشي وهالشي جاي يسببلنا مشاكل هنا وغيرة من بعض المشتركين والمدربين..

-شُهيب شمسون

اللتفتت على صوت المدرب "ڤاي" يصيح اسمي ابتسم ابتسامة ماكرة وقرب مني يوگف مقابيلي مباشرةً..

-ڤاي: اشوفك طلعت من غرفتك وتمشي على طولك بشكل طبيعي؟

-شُهيب: عندي تدريب

-ڤاي: ما صار نصف ساعة طلعت من قتال مميت؟

-عندي تدريب

هز راسه متفهم عفته وكملت طريقي لقاعة التدريبات، لكن فاجأني من گال بصوت عالي..

-ڤاي: اكيد بچيت بحضن اخوك شوية ورجعت استرجلت

ما اهتميتله وكملت طريقي، هذا الاقصده بالغيرة علاقتنا اني واخواني ينضرب بيها المثل هنا، مالك واني اصدقاء واكثر من اصدقاء وفاهد صغيرنا ابننا وحبيبنا ونهتم بي ونخاف عليه من كلشي لكن رغم دلالنا وقلقنا عليه جاي يعذبوا وره ظهورنا وجاي نشهد هلاكه بس شبيدنا وشنو نگدر نقدمله؟ كلنا جاي نشهد عذاب من نوع اخر والكل ماخذ نصيبه من الظلم بحجة "صيروا زلم"..

دخلت قاعة التدريبات القاسية وتربعت اگعد بالوسط، عبارة عن قاعة باردة جداً باللون الابيض خالية من أي معدات فقط فضاء ابقى گاعد بيها لسبع ساعات متتالية، تدريب عقلي مميت استسلم استمع لصوت افكاري وللهدوء يآكل عقلي وراسي..

اول ما بديت تدريب هنا چانت توصل بيه مرحلة اشلع بشعر راسي وأظافري بدون لا احس من الاجواء، اتسهستر واصير مثل المجنون اظل اصيح بصوت عالي احس بروحي جاي تحترگ.. ازلغ بجسمي وصدري واحياناً توصل بيه اغيب عن الوعي هاي من چانو يحبسوني بدل السبع ساعات 14 ساعة..

بعد اتمام السبع ساعات التطلع الروح ياله تخلص حسيت بتعب شديد لكن اكيد ما ظهرت هالشي لانه ممنوع! ممنوع تنطي ردة فعل ممنوع تگول تعبت ممنوع تگول جعت ممنوع تگول اني متألم ممنوع يظهر على ملامحك شي.. ملامحك جامدة عيونك فارغة ميقراك بشر وهالشي متدربين عليه صار سنين من عمري 5 سنوات وهسة اني بعمر المراهقة وصرت اجيد الموضوع بشكل مخيف احياناً اني اقلق من نفسي وانرعب من وجهي الفارغ من الملامح..

انفتحت الباب عليَّ اخيراً وظهر منها الجلاد، الوحشي، الرجل الذي يتغذى على الدماء والسفك الزعيم الروسي "غوغري" دخل للقاعة يباوعلي من بعيد وجماعته واگفين بظهره.. اشرلي بأصبعين اتقدم اله گمت من مكاني اروحله وگفت بظهر مستقيم، رأس مرفوع وايدين مكتفة وره الظهر..

اشرلي انزع قميصي سويت مثل ميريد وهالمرة رادني اندار انطي ظهري يشوف اثار الجلد..

-غوغري: يلا

الكلمة الوحيدة النطقها بالروسي اكيد ودار ظهره يطلع من الغرفة، تمشيت وراه وباقي المشتركين كذلك احنه هنا مقسمين لفرق حسب الكفائة والقوة المرتبة الاولى مكونة من 7 مشتركين و هي اعلى واصعب مرتبة ما توصللها بالهين ويسموهم "السفاحين" ونعم اني بالمرتبة الاولى.. تدريبنا مختلف وقاسي اكثر من المرتبة الثانية والثالثة وصولاً للسابعة..

بدون توجيه من غوغري وبدون كلام من رجاله تقدمنا رتبة "السفاحين" المكونة من سبعة مراهقين بعمري واكبر مني بشوية ندخل للقاعة الجليدية وكل مراهق اخذ موقعه مثل العادة.. تنهدت متألم ماعرف شلون راح يكمل هاليوم الصعب بس ماكو بيدي شي غير السمع والطاعة..

اشر واحد من رجال غوغري نبدي نزعنا ملابسنا بسرعة الضرء بقينا بالداخلي فقط واستلقينا بأجسادنا على قالب ثلج ضخم يناسب طولنا..

استلقيت على القالب صنم ممنوع احد يتحرك، كش شعر جسمي من البرودة وصرت اتنفس ببطئ ادفي جسدي من الداخل تدريبات صار اشهر متعودين عليها لكن بكل مرة كأنها اول مرة اجسادنا تزرق وقلوبنا توشك على التجمد والتوقف عن النبض من البرودة..

غمضت عيوني راص على اسناني بدون لا ابين وجعي لكن اقسم بالله احس بجسمي يحترق وجلدي اللتصق بالثلج وراح يسببلي مشاكل واللتهابات صعبة تتشافى، ياما وياما ماتوا اثناء هذا التدريب والي صار عنده تلف بجلده والي صارت عنده امراض صدر ملتهبة وربو بس محد يگدر يعترض..

-سيدي سقط واحد منهم

ومعنى "سقط واحد منهم" هو مات.. مات ما متحمل قساوة التدريب، بدون لا يثيرون جدل وبدون لا ارفع نفسي اشوف حفظت هذي الاسطوانة راحوا يقيسون نبضه وضغط جسمه من تأكدوا مات شالو ياخذوا لثلاجة الجثث ويتصلون بأهله الي ما راح يهتمون ويجاوبون لان الميت "عبير" من اب مغوبي وام لبنانية تركوا ابنهم هنا حتى يتدرب ما مهتمين لنوع التدريب المهم يتخلصون منه او يرجعلهم وحش يكمل عملياتهم الاجرامية لان ببساطة هاي حياة المافيا..

بعد مرور زمن معين اطرافي بدت تنمل وجلدي اللتصق بقالب الجليد والتنفس ضاق عندي اخيراً سمعنا صوت صافرة الوقوف.. ومثل خلية النحل وگفنا من مكاننا نتغاضى عن الالم الجسدية والنفسية السببوها النا ونركض نصطف سره واحد وره الثاني مقابيل غوغري..

اومئ بهزة راس من شاف الكل واگف متغاضي عن الزراق والحمار والطفح الجلدي الصاير بجسمنا، اشر نلبس ملابسنا ونتفرق وهذا الصار.. لبست ملابسي ومشيت مثل الجندي ارجع لغرفتي احتاج راحة! احتاج علاج! احتماج تضميد جروح، احتاج احد يحچي وياي ويخلصني من الفراغ العشته لسبعة ساعات متتالية، واهم شي احتاج لحمام دافي يطفي بركان الجليد المتكون بأحشائي وگلبي..

رجعت للغرفة وبوجهي للحمام فتحت الدوش ومثل كل يوم ماكو ذرة ماي حار نسبح بي، ماي الدافي منبوذ هنا وكأنه محرم هزيت راسي مأيس وطلعت من الحمام ارجع اللبس ملابسي الباردة وتمددت بفراشي اون من الالم والصخونة..

متغطي بغطوة خفيفة و اتگلب بفراشي الى ان غفيت، حسيت على لمسة مالك لـ جبيني يتأكد من حرارتي، جاب قميص من قمصانه القديمة البالية هنا وقطع منه وصلة نگعه بماي بارد وحطه على راسي وخدودي..

-شُهيب بتعب: فاهد وين

-مالك: جاي ياكل راح يجيبلك عشاك هنا

هزيت راسي ولزمت ايده ما متحمل برودة، گلبي راح يوگف بأي دقيقة بس ما بينت هالشي گدامه ماريده يقلق زايد..

-مالك: ودوكم للغرفة الجليدية شُهيب؟

-امم

-الله ياخذهم

-لا تدعي عليهم لا يسمعوك

-حضرتك تستهزأ

-ههههه

-غبي وهو بهالحال يتمضحك

-شر البلية ما يضحك

-نام نام

-مالك

-ها

-اني احبك

-نام شُهيب

-انتَ احسن اخو بالدنيا

-بده يهذي

-واحب فاهد

-غير يبطل خرت وينام

-اسمها "خرط" مو خرت

-خرت

-گول خرط

-خرط

-عفية

-ما جاي افهم ليش تجبروني احچي عراقي مو چنه نحچي مغربي وشحلاتنا

-غير واحد من المدربين مغربي وابوك حذرنا ما نحچي بلهجتهم

-ليش ابوك شيجي منه غير القهر

-شنسوي بي المهم عدنا بعض

-لا تتعلق زايد شُهيب

-اتعلق

-تدمر نفسك هالشكل محد يدوملك

-انتو تدومون

-شُهيب نام انتَ تعبان

رغم وضعي وتعبي وهذياني الاتذكره عدل عگدت حاجبي مستفهم ليش هيچ جاوبني؟ بالعادة مالك من اگله احنه ندوم طول العمر سوه يجاوبني "للموت اني وياك ما نفترق" شبي اليوم؟

-شُهيب: انتَ تدوم مالك مو صح؟

-هذا يمكن فاهد اجه وجاب الاكل

گام يفتح الباب وبقى بره الى ان رجع فاهد وبيده ماعوني، حطه على الفراش بصفي وگال وهو يمط جسمه..

-اشتعل ابوكم

-مالك: متوجع؟

-فاهد: جسمي وگف ورجعو اخذوني لذيج الغرفة مالك راح اتخبل

-مالك: غرفة الاصوات؟

-فاهد: اي الاصوات جاي تاكل عقققلييي

صار يضرب على راسه شلون الواحد يريد يسكت صوت افكاره، راحله مالك يلزم ايده يسيطر على حركته وما عافه الا من هدأ ونومه غصب بالفراش.. غفى فاهد واني بقيت گاعد اراقب مالك التعبان بدون لا يحس ما مديت ايدي آكل من اكلي مالي نفس والوجع ياكل بجسمي..

ثاني يوم من الفجر انجبرت اگوم على حيلي اسبح ابدل واطلع تدريب ويتكرر الصار البارحة بطريقة أشد من دون الغرفة الجليدية لان مو كل يوم ندخللها، تدريب اسلحة، عركة قبضات، دراسة، ومبارزة بالاسلحة الحادة ما رجعت للغرفة الا واني منتهي ونگضان تعب..

-شُهيب: ااااااااخ تعباااان

-مالك: امم

-شُهيب: لو تعرف شمسوين عشا اليوم طبعاً موزس طب للمطبخ وتجسس عليهم واجه يگلي

ما جاوب ولا ابدى اهتمام، تقربت منه اعيد كلامي وكذلك ما اهتم، سكتت وگعدت على سريري اراقبه هادئ مثل عادته بس هالمرة هدوئه مبالغ بي وغريب والسبب لان بروده وهدوئه بس من ناحيتي من دخل فاهد للغرفة يضحك ويسولف جاوبه بشكل طبيعي..

-فاهد: بشرف امهاتكم المضيعاته خلونا نطلع بره

-مالك: حتى ينيمونا ويه الخنازير اگعد راحة

-فاهد: ههههههههههههههههههههههه تعودت انام هناك وصاحبتهن هم هههههههههههه

-مالك: هههههه مسطي

-شُهيب: خلونا نطلع ملل

-فاهد: خاف عبالك راح نطلع للبحر؟ شهوبي حبيبي وروحي احنه طالعين بالعراء لبقعة مصلخة من الارض خالية من أي شي غير الطين والتراب

-شُهيب: اي ولك بس على الاقل نشتم هوا نظيف

-فاهد: هوا خايس نفس موزس العار

-شُهيب: لا تحچي على موزس

-فاهد: نذل عاار **** خطااف الاخواان

-شُهيب: كافي ولك

-فاهد: مالك گول لشُهيب يزاعل موزس ويرجع اخوية

-شُهيب: موزس شعليه بطل غيرتك فاهد تمرضك هاي

-مالك: شوف منو يحجي

-شُهيب: اي اني مريض تريد فاهد يصير مريض هم؟

-مالك: خلونا نطلع يلا

ضحك فاهد بصوت عالي يطفر بمكانه من السعادة ابتسمت على منظره وحماسه وطلعنا سوه نتسحب، كامرات بكل مكان راح ننلگف مابيها مجال بس فاهد الداهية حافظ الطريق على غيبه ويعرف منين نمشي وشلون ما نبين بالكامرة..

-فاهد بهمس : سبع سنين من التدريب **** ابهاتهم وعرفت كل خياساتهم هههههههههههههه

-مالك: وين اكو من عقلك انتَ راح تصير عالم وتذكر كلامي

-فاهد: عيييع اكره المدرسة

-شُهيب: اول مرة اشوف واحد يكره المدرسة ودرجاته مفولة

-مالك: صوتكم لا يسمعونا

طلعنا للسطح فوگ الـ roof نگعد نتشاقه ونضحك والدنيا حلوة، مو هامنا تعب ولا وجع ولا غربة المهم احنه سوه وفاهد ينطط كل مكان وكل شوية هابط گلوبنا نحاف عليه لا يوگع..

-مالك: ولك اگعدد وگف گلبي اگعد لا تتهيلگ

-فاهد: الله اشتهيت باچة

-مالك: حشى النعمة ما تنوكل

-شُهيب: شذكرك بيها فاهد

-فاهد: حلمت البارحة بالعلوية مسويتلنا باچة ومالك لعبت روحه وتقيء على العلوية والعلوية ما كتلته بالعوچية لان تحبه كتلت شُهيب نيابة عنه لان گالت تتشابهون وماكو فرق

-شُهيب: عفية شُهيب حتى بالحلم يتعنف

-فاهد: شوفو شوفوو هذاك مو قمر وبصفه نجمة لو يتخايلي؟؟

-مالك: لا مو نجمة

-فاهد: ها لعد هاي اكيد تفلة

ضحكنا وكفخناه لهالمسودن ظل يرگص بمكانه مكيف، ضربت كتف مالك وفاجأني من نتر ايده مني بعصبية خازرني..

-شبييك هو هييچ

-شُهيب: شسويت

-مالك: ردت اوگعع شسالفتك صاير همجيي انتَ!!

-شُهيب: اني..

-مالك: اششش كافي لا تسمعني صوتك

حكيت رگبتي من وره مصدوم من اسلوبه وگلت يمكن نفسيته تعبانة بس فاهد ما فوتها ودافعلي..

-فاهد: مالك شبيك تحاچي هالشكل

-مالك: لا تدخل فاهد

-فاهد: اتدخل ونص ماقبل على شُهيب اني!

-مالك: روح خلي يفيدك شُهيب

گام عافنا ونزل بقينا اني وفاهد واحد يباوع بوجه الثاني ما مصدگين تصرفات مالك ولا متخيلين تطلع منه كل هالعصبية، اشرتله نگوم ننزل واول ما وگفت لزم وجهي فاهد وباس خدي بقوة..

-فاهد: شفتها نجمة اني

ابتسمت ومسحت على راسه بادلني ابتسامة مهبولة من شخصية حيوية ونشاط غريب مثل فاهد حضنته لصدري ونزلنا جوه لگينا مالك نايم..

-فاهد: شبي معصب عليك انتو متعاركين؟

-شُهيب: لا

-يجوز بسبب قِتال باچر؟

-يمكن

وهذا التوقعته مالك متعصب ومتنرفز لان باچر اني وياه راح نتقاتل وهالشي ما يصير الا كل سنتين مرة وبطلب من ابوية وبكل مرة مالك يخليني اتغلب عليه حتى ما اتعاقب لا منا ولا من ابوية..

نمنا وثاني يوم الفجر صحينا نتحضر موزس اجاني للغرفة يشجعني حتى افوز وانتقل وياه لنفس الغرفة ضحكت واشرتله بيدي لا..

-شُهيب: ما اعوف اخواني موزس لا تغريني بالماي الدافي بحمامك

-موزس: برو لا تضوجني منك لعد اني مو اخوك

-شُهيب: اخوية وصديقي هم بس لا تزعل وتطنگر عليَّ

-موزس: ما ازعل لان اول تالي راح تفوز اليوم وغصباً عليك تنتقل من هالغرفة يمي ههههاااي

-شُهيب: ولك ما اجي بطل من هالسالفة

-موزس: شُهيب تعلقك بأخوانك مخيف

-عادي غير اخواني ولازم احبهم؟

-هذا مو حب هذا هَوس انتَ عندك مشكلة تنهوس بالشي من تحبه وراح تمرض من تتفرقون

-الله لا يگولها نفترق ليش؟؟ شنو هالتشاؤم انتَ شايف اخوان يفترقون عن بعض؟!

-اي هواي افترقوا

-احنه ما نفترق للموت نبقى سوه

-اكيد حبيبي اني بس اريدك تنتبه لنفسك وتفضل راحتك على كلشي بهاي الدنيا لان محد يدوم لاحد

وكأن چانت رسالة من المستقبل وصلتني عن طريق موزس وحكمته بس چنت مُصر ما اصدگ وما اتخيل يجي يوم وابتعد عن اخواني مستعد ابقى هنا بهذا البيت اتدرب واتعنف لاخر عمري بس ابقى انام واكل واشرب واحچي ويه مالك وفاهد هالشي كلش كافي..

طلعت ويه موزس ادور على فاهد بعيوني وين راح هالنتفه ما شفته اليوم، وصلنا لقاعة القتالات اخطر مكان بهذا البيت العملاق هنا تدخل عايش بس محد يضمنلك تطلع وبيك نفس..

نزعت القميص بقيت بالبجامة وموزس يباوعلي من بعيد يأشرلي "افترس مالك مثل الوحش" گلبت عيوني بملل هالانسان بدمه يمشي العنف بس شنو اتوقع من ابن وحيد تربى اول ثلاث سنوات من حياته بين اب وام روسيين مهووسيين بعالم المافيا وزعماء قبائل معروفة هنا جابوا موزس عمره ثلاث سنوات يتدرب لهذا يومه..

يعتبر من اوحش واعنف المشتركين لدرجة غوغري والمتدربين يحسبوله حساب ويهيبون مكانه.. واكره اگولها بس اني اجي بالمرتبة الثانية بعد موزس واتلقى نفس المعاملة من غوغري والباقين بس اني اتعنف اكثر بطلب من ابوية وهالشي يسعد المدربين ويصيحولي "الوحش"..

دخل مالك بحلبة المصارعة نازع قميصه وعيونه تنفض دم وشرار، درت وجهي ادور فاهد وما لحگت تلقطه عيوني بسبب هجمة مالك عليَّ يجرني من رگبتي يعصرها ويشمر جسدي من الجهة الثانية من الحلبة..

فتحت عيوني مصدوم من حركته ما توقعت راح يبدي بهالسرعة وبدون سابق انذار بس ماكو وقت للصدمة لان بده القتال والكل موجود هنا يتفرج ويستمتع على قتال الاخوان الميصير بالعادة.. يروون تعطشهم وغيرتهم من علاقتنا وتقاربنا..

الحركة الثانية كذلك من مالك صدرت من داس صدري برجله بقوة احس طحن ضلوعي طحن، دفعته عني اوگعه بالگاع وادوس ببطنه واضربه بوكسيات خفيفة على وجهه وبطنه وراسه وعينه وكل مكان تلزمه ايدي، لزمت ايده من وره اللويها بدون لا اطگها واكسرها متوقع منه راح يمثل تأذى مثلما متفقين بس ما صار هالشي لانه سحب ايده مني ولوى ايدي وطگها بكل قوته من قوة اللوية سمعت كسر عضامي، شهگت مو بس وجع شهگت صدمة!!

القتال لساعة ونصف دميته ودماني ومحد بينا جاي يستسلم، حسيت بالوحدة والاستغراب واني اتكاتل وياه، حسيت بالوجع اضعاف من ضرباته متعود على العنف ومتعود على قتالات اعنف بس ما متعود اتكاتل ويه اخوية وصديقي واغلى ما املك بهاي الدنيا.. اتكاتل ويه اخوية بطريقة وحشية كسرت گلبي قبل ايدي ورجلي..

وجه مالك اليوم چان غير وعيونه الدامية تقطر حقد دفين، حسيت ضرباته كلها بگلبي وما گدرت اضربه مثلما اضرب عدوي اخاف لا اأذي اخاف لا يصيرله شي وهالشي ضعفني اضعاف وخلاه يتغلب عليَّ..

مسحت الدم من خشمي وسندت جسمي على ايدي انهض نفسي واجتني ضربة من مالك قوية عنيفة وحشية على راسي رگعته بأرضية الگاع وهاي چانت الضربة القاضية دخت لدرجة ماگدرت ارفع راسي اشوف شنو جاي يصير، رفعني من شعري وضرب وجهي بالگاع ضربتين متتالية سودت الدنيا بوجهي وعيوني طفت وفوراً غبت عن الوعي..

حسيت واني بالمستشفى الخاصة بالمشتركين، عبارة عن أسرة لونها بيضاء وانبوب موصول بمعصم ايدي يقطر من مغذي، دورت بعيوني على أي احد بس ما لگيت غيري نايم بالغرفة..

تحركت بمكاني بصعوبة النفس گوة اجره، وخرت الغطا مني شفت ضلوعي ملفوفات بـ شاش ابيض چبير تنهدت بوجع عرفت صعوبة التنفس منين جاية.. ضلوعي مكسورة..

ايدي مجبسة وملفوفة موصولة لرگبتي واللم برجلي احس عظمة ساقي مفصولة عن فخذي نزلت عيوني واشوفها مجبسة بمعنى هم انكسرت، بلعت ريگ ونهضت نفسي من الفراش وشلعت المغذي من ايدي بأسناني صار الدم يتطاير.. تمشيت احاول استند على الأسره والحيطان اطلع من الغرفة ادور على اخواني لو موزس اكيد قلقانين عليَّ..

شافني الممرض ما قبل ابقى واگف وگال راح تزيد حالتي سوء بس ما قبلت ارجع الا اشوف مالك..

-الممرض: مالك شمسون ما اجه للمستشفى

-شُهيب: متأكد؟

-الممرض: نعم

-وفاهد شمسون؟

-ولا اجه شخص بهذا الاسم، اجه واحد اسمه موزس وانتظرك هواي بس من گلناله متصحى اليوم طلع

تركته واگف يحچي وطلعت اعرج استند على الحيطان اريد ارجع للبيت اشوف شنو الموضوع، عبرت الكل ممهتم لا لصياح الدكتور ولا لركض الممرضين ورايه.. اهرول بأنفاس لاهثة وضلوع تحرگني من الوجع..

دخلت للبيت عبرت الممرات وصولاً لغرفتنا فتحت الباب شفت مالك واگف وحاط جنطة سفر على سريري وفاهد واگف بصفه ويحطون ملابسهم بالجنطة..

-شُهيب: شنو جاي يصير هنا

اللتفتو ثنينهم عليَّ مفزوعين وكأنهم جاي يسوون جريمة ولگفتهم، دخلت الغرفة وكل خلية بجسمي تصرخ الم بس مغلس ومركز بيهم..

-شُهيب: مالك شنو هاي الجنطة شتسوون بيها؟

-مالك: راح نروح

-شُهيب: وين؟

-مالك: ابوية اجه علينا

-شُهيب بفرح: صدگ؟؟ ليش ما گلتولي غير احضر نفسي وياكم.. شو تعال فاهد ساعدني جيب ملابسي حطهم بالجنطة

راح فاهد يطلع ملابسي ويحطهن ويه جنطتهم ومالك ما قبل، طلع ملابسي شمرهن بالگاع وگال بعجرفة..

-ما الك مكان هنا

-شُهيب: اجيب جنطة ثانية مو مشكلة

-مالك: ما راح تجي ويانه شُهيب

-شُهيب: شنو قصدك؟

-مالك: ابوية ما يريدك انتَ راح تبقى هنا

-شُهيب: وانتو ترحون فترة و ترجعون مو صح؟

-مالك: لا ما نرجع بعد

-شُهيب: واني؟

-فاهد: احنه ما نريدك!!

-مالك: فاهد اهدأ

-فاهد: نكررهك ماانريدك كلناا ما نحبك اطلعع بره

-شُهيب: شنوو صاير شبيكم؟؟!

-مالك: انتَ تبقى هنا بمكانك المناسب

-شُهيب: هذا مو مكاني المناسب اني مكاني يمكم ووياكم!

-مالك: لا مكانك هنا شُهيب انتَ وحش والوحش ميگدر يطلع من مكانه بدون لا يخرب الدنيا

-شُهيب: اني مو وحش! مو وحححششش

-مالك: وجرائمك؟ وقتالاتك؟ ورتبتك هنا؟ وحُب غوغري الك شنو تفسره؟ صنعوا منك وحش فتاك انسان سفاح ماعنده رحمة انتَ ما تستحق تطلع من هالمكان

-شُهيب: يجبروني والله جبروني على كلشي سويته وانتو شاهدين على كللشي اذا ما دافعت عن نفسي اموووت

-مالك: ياريتك ميت ومخلصني من همك

زاد استغرابي وكبرت وحشتي وقهرتي منه ومن اسلوبه بلعت ريگ ناشف ووگفت اسند روحي على الباب اراقبهم يحضرون اغراضهم..

-شُهيب: شنو اسوي وما ترحون

-مالك: ولا شي! منريد منك شي بس عوفنا

-شُهيب: ليش

-مالك: لان ما نريدك! مااا نريدك يا بني ادم استووعب!!

شال الجنطة بيده وفاهد شال جنطته، عبروني يطلعون من الغرفة واني اللحگهم واحچي اقنع بيهم يبقون او على الاقل يرجعون بس يزوروني وما نفترق، لزمت ايده اتوسل بي يبقى وروحي تلوب..

-شُهيب: اني اسف على كلشي مزعلك ماالك لا ترووح

-مالك: هدنييي شُهيب لا تلزمنيي هدددني

-شُهيب: فاااهد احچيي شيي گووول

-مالك: لا تحچي فاهد ولا تنسى الگتلك عليه شُهيب ماا يحبك!! شُهيب بدلك بأخوانه الجديدين!!

-شُهيب: مروان ونشوان؟؟ مستتتحيل تبقون انتو اخوااني واغلى شي عندي

-مالك: حچي يفيدك

-شُهيب: ماالك لا تلعب بعقلله تعرررفه صغير تعررفه طفففل ويبقى طابع براااسه الحچي!!

-مالك: اعقل منك رووح منااا لا تزعجنا

-شُهيب: ماالك لحظة اوگفف احاچيييك مااااالك

اصرخ واهرول وراهم متناسي وجعي بس ما اللحگ عليهم همه اسرع وصاحين مو مثلي العليل، طلعوا المشتركين من غرفهم على صوتي وبعض الاساتذة هم طلعوا واني مستمر اصيح من عمق روحي وگلبي يتگطع..

-شُهيب: مااااالك فاااااهد لا تعوووفووييي وحددددي رجعووووو

صارت دموعي تنزل گدام الكل اصيح وابچي بصوت عالي اتوسل بأخواني يرجعون وما يعوفوني بهالسجن وحدي..

-شُهيب: لااا تروحووون اسووووي أي شييي بس اخذوووني ويااااكم ماااالللك لا تعوفنيييي شنوو سويت ومتغير علييَّ احنه مو اخوااان مو لازم نبقى ايد وحدددة

-مالك: اني وفاهد اخوان وبسسس احنه ماااانريدددك

-شُهيب: بس اني اريدكم

-مالك: تبچي؟؟ شُهيب وصلت بيك تبچي؟؟ وگدام الكل ما مهتم؟؟

-شُهيب: ما يهمنيي احد غيررركم

-مالك: وانتَ ما تهمنا ومانريد نشوف وجهك بعد فهمت لو لا! احنه نكرهك نكررهك!! انتَ عاار علينا ما نطيق نشووفك شُهيب احفظ كلامي ولا تنسااه لنهاية عمرك انتَ متت بالنسبة النا انتَ ميت!!

طلع من البوابة ويجر بفاهد وراه بقيت اركض وراهم وضلوعي شابة بيها نار من الالم والخوف من خسارتهم ظليت اركض واوگع اركض واوگع وابچي واصيح مثل الجهال بالضبط حسيت جاي ياخذون روحي ويرحون مني..

-ماااالك لا تعوفوووني اخااااااف ابقى وحدددي گتلللك اني اخاااااف حراااام عليك احلفففك برووح امك تعااالوووو

غصيت بدموعي التجري وامسح بيهن بردن بلوزي ويرجعون ينزلون اكثر، وگعت بنص الطريق بـ حفرة من طين وطمست بيها رجلي ماگدرت اطلعها.. صرت اضرب على الگاع بقوة وابچي بگلب مكسور شافني المدرب ڤاي بهالوضع تعال ودوس على اصابع ايدي بحذائك بقووة متشمت ويضحك صرخت من اللم روحي قبل اصابيعي حاولت اجرهم من جوه رجله بس كلما جايله يزيد بالضغط ما رفع رجله الا من حسيتهن انطحنوا جوه رجله..

ماعندي طاقة ادافع بيها عن نفسي واتعارك وياه ادمره بيدي واطلع روحه، روحي تعلگت ويه العافوني بقيت اصيح بيهم بس محد منهم اهتملي محد دار وجهه الي وشافني مالك وفاهد اخواني عافوني هنا..

عافوني اخواني الاعز من روحي، عافوني الاتعارك علمودهم وادخل صراعات وحروب اذا شفت واحد مضوجهم، عافني الچنت اتباهى بي واگول عنه اخوية وابوية، عافني حبيبي واخوية الصغير، عافوني ثنينهم اصارع الموت كل يوم هنا عافوني اتعارك على لگمة اكل اشبع بيها بطني الجوعانة.. عافوني ينهشون بلحمي الوحوش وحولوني لوحش يشبههم عافوني اخواني و اااخ يا كسرة اخواني..

بقيت بالگاع اضرب بيها بأصابعي المتكسرة ما مهتم لوجع، اصيح بأسم مالك يرجع واسمع المشتركين يتهامسون بين بعض، ناس تتشمت وناس تضحك وناس مقهورة ومتأثرة و موزس اجه يهرول يگومني ويحضني من الگاع دفعته عني اصيح واأشر على الطريق السلكوا اخواني ابچي واصيح بحس مبحوح..

-مااالك رااااح موزس فااااهد راااح راااحووو وعافوونيي وحدددي

هز راسه يمسح الدموع من وجهي وعيوني وترجع تنزل ماگدر اسيطر على روحي المحترگة ولا على جسمي اليرجف غربة ووحشة.. النفس انگطع مني الهوا راح اخذو اخواني اخذو وراحو..

-موزس: شُهيب اني اخووك انيي ما اعوفك اهدأ حبيبي شُهيب لا تخلي اعدائنا يفرحون

-شُهيب: ما يحبوووني مثلما احبهمم ضحكووا عليَّ كللشي چان چذب وجعع بگلبي موززس مالك وفاهد عافووونيي.....

**

"الحاضر"

-مالك: شُههيب لا تعوفني شُهههيب.. اسعااااااف احد يتصل بالاسعااااااااف ولللللك شُههههيب ااااااخ يا خوووية شُهههههيب

فصلت، عقلي فصل عن كلشي بشوفة شُهيب واگع بالگاع وطلقة بنص گلبه، ماشوف بعيوني ولا اسمع صوت غير صوت مالك العالي وهو يگول..

-شُهههيب لا تكسرررني گووووم شُهههيب لا تووجعع گلبيي

تقربت اخطي كم خطوة اوگف مقابيله، اتفرج عليه بگلب ينبض بطيء راح يوگف بأي ثانية.. يعني مات؟ شُهيب مات؟ مات الرجال الاعشقه؟ مات الرجال الوحيد الحسسني اني بشر؟ مات الانسان الوحيد اليخاف عليَّ من الهوا الطاير ويتحمل تعب واذية وسهر وشغل في سبيل اني ارتاح؟ مات المغرگني بحبه وحنانه؟ مات الي يحب ميوستي ويجيبلها هدايا؟ مات الي تنازل عن الاطفال لخاطري؟ مات الي مستعد يربي بنتي ويحسبها بنته؟ مات حبيبي؟ انتهت قصتنا؟ وشُهيب مات!!

-مسرة: شُهيب مات

-مالك: لااا لااا ما اسمح بهذا الشي لاااا

اتصل على احد بتلفونه واتوقعها الاسعاف، گعدت على ركباتي بالگاع صافنة عليه مدا اتذكر شنو صار وراهة عقلي مو وياي ما حسيت الا واني ببوابة المستشفى ومالك يمسح بعيونه ووجهه ولازمني من ذراعي يمشيني..

اسمع الدكاترة يركضون دخلوا المستشفى وواحد من الدكتارة عرف مالك وهرول يقيس نبض شُهيب ما رجعت لوعيي الا من الدكتور گال بأسف..

-نبضه ضعيف

-مسرة: شلوون؟؟ شنو يعني اشررحلنا!!

ما حچى شي زايد واستمروا يسحبوا بالسدية يركضون بي گلبي مسحون وروحي رايحة عيوني تصب احس بـ دم ينزل من عيوني مو دموع، اتصل مالك على شخص عرفته فاهد لانه صاح..

-فاهدد وينككك؟؟ تعااال للمستشفى بسرررعة ولك اللحگنيييي فااااهد اخووووووك

-الممرض: دكتور توقف النبض!

-مالك: شنو؟؟ لا لا دخييلك

-مسرة: شنو توقف النبض.. شنو؟؟ شنو قصده شنووو يعنيييي ولككك شنووووووو احچيييي شنووووووو

**

"جنات"

گاعدة بين كتبي وملازمي اتصفن حتى ماگدر ادرس شعور غريب محاوطني واحس اكو شي غلط، كلام مالك ووداعه الي اثر بيه بشكل فضيع، كلماته وتوصياته واني بين ايده انحفرت براسي وگلبي.. فزيت مخترعة على صوت العلوية تصيح جوه ركضت اتخبط بخطواتي شفتها شاگة زيجها وتلطم على صدرها وتصيح ببكاء شديد..

-عمتتت عينيييي يبوووووو راح الوليددد عمت عيننننيييي ولك يماااااا

-جنات: علوية شصاييير

-فيروز: ولج جنااوي تعاالي جنننة شُهيب بالمستشفى ووضعه خططر منعرف ميت عاايش منعرف

وگفت ماعندي ردة فعل من حجم الصدمة، نزلت ماريا من فوگ على صوت صياح العلوية لافه شعرها بمنشفة مبينة چانت تسبح سألت شصاير بس محد قبل يحچيلها.. مسحت عيونها العلوية وگالت بصوت يرجف گوة كاتمة البچية..

-العلوية: ماكو شي حبوبا روحي نامي

-ماريا: شبيكم سمعت اسم شهوبي؟ شهوبي رجع لو شنو

-العلوية: لا يوم

-ماريا: علوية ليش تبچين شبيكم احچو الحقيقة شُهيب ابني بي شي؟؟؟

بچت فيروز والعلوية رجعت تبچي تخبلت المرة نزعت المنشفة من شعرها وذبتها بالگاع تروح للعلوية تتوسل بيها تحچيلها..

-العلوية: مريض شهوبي ماري ادعيله

-ماريا: مريض؟؟ ليش؟ شبي؟؟

-فيروز: بالمستشفى نقلوه متخربط

-ماريا: اريد اروح ارريد اروح أخذوني اشوفه

هزت راسها العلوية ولفت شيلتها، صاحت بفيروز تجيبلها دشداشة غير هاي بدلتها بسرعة واني صعدت اللبس جبة فوگ ملابسي وشال ونزلت شفت فيروز مبدلة والعلوية تلبس عبايتها وماريا بملابسها..

طلعنا ويه السايق فيروز گلتله اسم المستشفى، اول ما دخلنا من بوابة المستشفى ما احتاجينا نسأل عن مكانه شفت اصدقاء مالك نور جواد وحيدر يهرولون لمكان واحنه وراهم نمشي نلحگهم..

اول ما وصلنا لردهة العمليات شفنا الامة العربية هنا، كيان واگفة بين اخوانها وتبچي بصوت عالي وفاهد واگف بظهرها مباشرةً مچتف ايده لصدره ومنزل راسه، نشوان عيونه صايرات دم ومروان بس يبحلق بعيونه شكله مصدوم..

درت عيوني ادور مالك شفته گاعد على كرسي منزل راسه وعاصر عيونه بأصابعه وجماعته واگفين كلمن على جهة يصبرون بي ويحچون وياه..

اخيراً استقرت عيوني على مسرة، مسرة الكسرت خاطري وگلبي منهارة تبچي ووجهها صاير احمر وشعرها مهووس وحالها مگلوب، تحچي بشي لـ صبا وجولي وثنينهن حاضناتها ويبچن وياهة..

روحي راحت من البچي عيوني معلگه على مالك الما رفع راسه ولا ثانية اريد اروحله احچي وياه اصبره واللزم ايده اخلي يعرف اني وياه وبجانبه بس اصدقائه عاقوا حركتي..

افتهمنا بـ شُهيب دخلوا العمليات بس حالته خطرة جداً بين قوسين (موات)، مرتين وگف نبض گلبه وضربوا كهرباء.. ساعة مرت والساعتين والثلاثة والاربعة وللان محد طلع وطمننا على شُهيب..

گلوبنا وگفت وعيوننا نشفت من دمعها، الدنيا انگلبت هنا بردهة العمليات اشكاال واللوان اجو وعرفت كلهم جماعة شُهيب، زلم ونسوان هذا اليگول هو صديقي من الاعدادية وهذيچ التگول بيناتنا شغل وهذا اليگول اني موظف عنده وواحد يگول اشتغلنا سوه وكل الموجودين يحچون عنه بالخير ويذكرون صفاته الحلوة ووگفاته..

سبع ساعات مرت هلكنا من التعب العلوية ما خلت نذر ما نذرته ما خلت شريفة بنت الحسن ولا ام البنين ولا فاطمة الزهراء ولا الحسين الشهيد كل شوية تعگد بشيلتها تبچي وتگول..

-دخيلچ يالزهرة احلفچ بـ سبي زينب

تبچي وتون وتمسح دموعها وحاضنه ماريا التبچي ومو فاهمة شي، اشرتلي العلوية اتقرب منها مسحت عيونها بشيلتها وگالت..

-يما شوفي مسرة لا يصير بيها شي وجهها صار اصفر عدها سكر لا يعلگ وتضربها جلطة

هزيت راسي ورحت اوگف يمها صديقاتها يحاولن وياهة ينطوها مي لو يشربوها علاجها متتقبل أي شي تدفع بأيد صبا المادتها شايلة بطل المي وتتوسل بيها تهدأ..

-مسرة: ولچ شُهيب جووه ماعرف بي مييت لو عاايش وترديني اسكتت واهدأ

-صبا: حبي ميفيد البچي ادعيله الله يوگف وياه ويساعده

-مسرة: من عمرري على عمره بس خليي يعييش والله العظيم اسووي أي شي أيي شيي ورووح امي اسوي أي شي بس حتى يعييش

-جنات: ماكو شي بيدنا حبي ادعيله الله يرجعه لشبابه ولامه والچ

-صبا: جناوي شوفي كيان لا تعوفيها وحدها

مسحت دموعي وهزيت راسي يائسة..

-جنات: اخوانها حاضنيها اثتحي اروح يمهم

-صبا: تمام حبي خليها بين اخوانها مرتاحة

هزيت راسي ووگفت على جهة بصف فيروز ابچي بصوت خافت وادعيله بگلبي، ما جامعتني هواي مواقف ويه شُهيب بس اشهد عليه رجال معدل.. انسان بار بأمه واخوانه ويساعد الكل بدون مقابل رجال يعتمد عليه وكلام مالك عنه ومدحه لشخصيته وروحه وكرمه كافي..

مرت ساعتين جديدة وهاي صارلنه تسعة ساعات محد طلع يطمننا العلوية انتهت تخربطت ورجعوها للبيت وجبروا ماريا تروح وياهة وفيروز هم، بقينا بس احنه الأقربين ننتظر خبر دقايق وسمعنا صوت بسماعة المستشفى يگول..

!!!CODE BLUE.. CODE BLUE-

ثواني ونشوف الدكاترة گامت تطافر من كل مكان وكل جهة يركضون لغرفة العمليات، منظر مخيف ويرهب القلب وكأنه مشهد من فلم اجنبي، الخوف نخر گلوبنا صرنا نتلفت نريد احد يشرحلنا شي ويريحنا..

وگف مالك على حيله يسأل كل دكتور يعبر من عدنا بس محد يجاوبه او محد عنده وقت يجاوبه متنا من الخوف ومسرة گلبها راح يوگف صارت ترجف من فوگ ليجوه وشحب لونها اخير شي مالك لزم دكتور قبل لا يفوت وسأله بروح فايرة بالانكليزي..

-شبيي اخوية؟؟؟

-الدكتور بأستعجال: توقف گلب المريض تماماً..

گال هالجملة ودخل يهرول جوه تاركنا بحالة ذهول، حطيت ايدي على گلبي استوعب وكيان صفنت بين دموعها واندارت على اخوانها تطلب منهم يفسرولها بينما مسرة بنفس الثانية وگعت من طولها سكرها علگ..

انخبصنا خبص احس بالدنيا انگلبت فوگ روسنا مالك طلع من ردهة العمليات ماعرف وين يروح ركضت اللحگه ووگفني فاهد ميقبل اروح هو خلى وراح وراه..

فوضى، تعب، وجع گلب وروح جاي نعيشه اباوع بالوجوه الكل مأيس حتى الامل الچان عدنا راح وره ما طولوا الدكاترة جوه ومحد بيهم طلع يفرحنا 16 ساعة ونصف احنه واگفين على رجلينا ارواحنا طلعت وعقولنا فرغت من كل فكرة غير شُهيب ميت ومحد يحچي!

مالك رجع وجهه ميگصه السيف عاگد حاجبه ويتعارك ويه الهوا وفاهد هادئ عكس العادة ومروان ونشوان يتعاركون ويه مالك ويتصايحون وياه..

-مروان: لييييش محد جاااي يطلعععع يطمنناااا شنووو حيوااانااات وماعدنااا گلببب رحموووا گلب زوجته واختتته راح يموووتن علينااااا

-فاضل: اخواان ذكروا الله ادعووا مابي شي لا نظل بس نبچي ونتصايح كله هذا ما يفيددد

-نشوان: ولللك هذا شُهههيب ولك اخوووية هذااا!! مااالك شوفلنا حللل خليهممم بس يريحون گلوووبنا اذا ميييت خلي يحچووووون خليييييهم يگوووولون خلووناا نعزززي بعض بفقد اخوونااا

صار يضرب على صدره بقوة ويبچي محروگ دمه والدموع تارسه عيونه، شمر مالك تلفونه البيده على الحايط بقوة وعصبية خلاه يتهشم وصاح بصوت عالي ميت قهر..

-مالك: شبيييدي فهمنننييي شبيييييدددي شنوووو اسوووووي شنووو طلععع بيددي وما سويتتته!!!

-كيان ببكاء: شلووون صار كل هذاااا شلووون غفلتوا عن اخوووكم شلوووون

كبرت العركة وزاد الصياح وفاضل يهدأ بيهم ومالك يشيل روحه ويرگعها وفاهد ومسرة باقين على الصامت بشكل مريب ومخيف، بنص صياحهم انفتحت باب غرفة العمليات الكل توجهت انظاره مترقب الي راح يطلع..

طلع الدكتور ينزع كمامته ويتنهد بتعب، ابتسم وگال وعيونه تغني من الفرح..

-الحمدلله على سلامة اخوكم

جفل الكل بعد جملته محد مصدگ الكلمات الطلعت من فمه، اول من حچى هو فاهد تقدم خطوتين وسأل متردد..

-فاهد: شنو قصدك

-الدكتور: كانت عملية صعبة جداً واستغرقت وقت كثير والسبب الطلقة تبعد عن القلب بمقدار شعرة.. بالمعنى الحرفي وليس كلام علمي، تبعد شعره لو زايحة الطلقة چان صارت بگلبه وضربت الشريان وخسرنا المريض لكن اخوكم محظوظ.. محظوظ وشجاع لانه حارب بعملية صعبة مثل هاي، حاب اعيد كلامي واگول الحمدلله على سلامته وقرت عيونكم بشوفته من جديد...

رجع تركيزنا ووعينا على صوت شهگة مسرة غطت وجهها واندارت تنطينا ظهرها تبچي بصوت عالي ونشوان صار يضحك ما مصدگ وكيان وياه تبچي وتضحك وفاهد مبتسم اما مالك فـ ما شفت ابتسامة تظهر على وجهه باقي على صدمته..

-مالك: دكتور ممكن ما تبلغ احد بهذا الشي

-الدكتور: قصدك ابلغ ان شُهيب صحى؟

-مالك: اي، ياريت أي احد يسألك من معارفنا تنكر معرفتك بي وكأن مو انتَ السويت عمليته وماعندك معلومات كافية

-الدكتور: يصير اسأل ليش مسيو مالك؟

-مالك: شغلات امنية لا اكثر

-الدكتور: تمام

اخيراً ذبينا نفس وگدرنا نرتاح شوية مع العلم الدكتور كمل يحچيلنا على حالة شُهيب وأكد لحد هاي اللحظة وضعه خطر وما وصلنا لبر الامان وراح يبقى تحت المراقبة لثلاثة ايام بس رغم هذا الكل فرحان..

-مسرة: اگدر اشوفه؟ اريد ادخل اشوفه حتى لو من بعيد

-الدكتور: لا للاسف يحتاج راحة مكثفة ضروري تمر 24 ساعة بعد العملية ياله مسموحلكم تشوفوا علماً ممكن يبقى ايام فاقد وعيه او عقله مشوش بسبب العلاجات بيها مادة تخدره..

هزت راسها متفهمة ووگفت على جهة مسحت دموعها ولملمت نفسها ورجعت نفس مسرة الي نعرفها قوية وميهزها شي رفعت تلفونها واتصلت على حارسها الشخصي تحچي وياه بلغة البلد..

ابتسمت من شفتها افضل واكيد جاي تمثل لان وضعها سيء، جداً سيء ووجهها ما رجع لونه طبيعي بس عرفت طبيعتها وصرت افهم شخصيتها المعقدة نوعاً ما متحب احد يشوفها ضعيفة..

رحت لـ كيان الصارت تبتسم للهوا فرحانة وتحضن بأخوانها شافتني ضحكت بصوت وشمرت نفسها عليَّ تحاوطني وباست خدي بقوة..

-كيان: احبچ

-فاهد: بختتتت

-جنات: اوگف انتَ بثرعة حثدتني غير افتهم ليش حابتني؟

-كيان: انتبهتلج اكثر من مرة واگفة بعيد وتلوبين تردين تجيني وتوگفين بصفي وخجلانة من نشوان ومروان

-فاهد: لحظة لحظة انتِ بيا حال وانتبهتي عليها؟ زين اني هم انتبهتيلي واگف وراچ لو لا؟

-كيان: هاي شوكت

-فاهد: ولچ تسطعش الف ساعة واگف بظهرچ ما تحركت

-كيان: فاهد لا تچذب اصلاً ما شفتك

-فاهد: من اشتعل حظي الناگع بال****

-كيان: يووه انتَ بس تغار

-فاهد: صح اغار واغار لان شُهيب عنده كل هالناس التحبه واني مصلوب هنا واگف آكل نعل تالي طلعت چذاب وكلشي ما مسوي

-كيان: اگلك جوعانة

-فاهد: شنو اشتهيتي من نعالاتي؟

-كيان: والله جوعانة شبيك فاهد

-فاهد: شوف اني وييين وهاي وين

-كيان: لو شهوبي چان گلي خسى الجوع حبيبتي وراح بسرعة جابلي اكل

گالتها بصوت مكسور ونزلت دمعتها، رقت نظرات فاهد ورفع اصابعه يداعب خدها مبتسم ويگول بغمزة..

-يخسى الجوع حبيبتي شنو حابة تاكلين؟

-كيان: گبر

-فاهد: هههههههههههههههههههه اليگبرچ

-كيان: ويگبر امك

-فاهد: مگبورة امي وهسة تلگيها معلگة من كراعينها المصلبخة بجهنم

-كيان: لا تحچي عليها حرام ترحملها خطية

-فاهد: هستوچ گبرتيها

-كيان: چنت ضايجة خلص الله يرحمها ويغفر ذنبها امشي جناوي ناكل شي من الكافتيريا

-فاهد: هاي شنو الگملة شكو جاية ويانه!

-كيان: تره وجود جنات اهم منك شسوي بيك انتَ روح ماريدك امشي جناوي

-فاهد: نعلاوي

-جنات: الا اگول لمالك عليك اني اعلممك يالمثودنن

-فاهد: دوليي مالك بحالچ هسة

-كيان: اسكت فاهد احنه بعدنا حزينين على شُهيب مالي نفس اناقش

-فاهد: والضحكة الشاگة وجهچ شنو اعرابها؟

-كيان: شنو يعني اعرابها؟

-فاهد: جنات استلمي دورج شرحيلها شنو معناة اعراب

-جنات: بعدين حبابين خلونا ناكل راح اموت جوع

-كيان: يلاا

كمشت بيدي متحمسة وصاحت اخوانها ومسرة محد بيهم قبل يجي نشوان گال يروح للبيت يسبح ويرجع ومروان يطلع للشركة يكمل كم شغلة ويرجع ومسرة بقت گاعدة بباب غرفة العناية المركزة وصبا بصفها..

رحنا للكافتيريا طلبنا اكل وگعدنا حول طاولة سوه، فاهد گالب وجهه ويباوع لكيان بطرف عينه منفس وهي تاكل ممهتمة، ضرب كرسيها من جوه نزت مخترعة ورفعت عيونها تباوعله..

-فاهد: انتِ ملاحظة حظنا شگد خ** لو ما ملاحظة؟؟

-كيان: بالعكس احنه محظوظين الحمدلله شهوبي الله كتبله عمر جديد و..

-فاهد: شعليه بشهوبچ جاي احچي عن وضعنا المز***

-كيان: احم.. فاهد مو وكتها

-فاهد: وكتها ونص اذا هسة مو وكتها شوكت وكتها؟؟ لازم احط النقاط على الحروف تره مو حالة هااي بعدنا ما گايلين بسم الله ومالك يتصل بيه يگول اللحگ استغفر الله!

خزرته كيان وتأشرله بعيونها عليَّ حتى يسكت بس فاهد يسكت؟ مستحيل..

-فاهد: شكو شكوو مستحية من هالگملة؟! شوفي كوري اني اليوم اذا ما كملت البديت بي ا...

-كيان: يبوووووو

-فاهد: اللعب طوبه وانزع.....

-كيان: ولكم ييووووو

-فاهد: وافضح الدنياا واخلي سيرتنا على كل لساان گوومي گدامي

-كيان: عمت عييينك اگععد فضحتنا الله يااخذك

-فاهد: هسة افضحچ اكثر اني اعلمج..

فتح ازرار قميصه يريد ينزعه بنص الكافتيريا وكيان صارت تلطم على خدوها ولازمته من ياخته وتحلفه..

-برووح امك لااا تنزززع

-فاهد: ماحب امي طبها مرض

-كيان: دخييلك فاهد دخييلك لا تفشلنا ولك ذولة كلهم غررب ميعرفون بخباالك

-فاهد: هاا يعني اني مخبل؟؟ بالعبااس الا انززع

-كيان: وولچ يمممااا

-فاهد: هددديني بت الاوادم خليني انتقم منچ ومن اخوانچ واخزيچ هناا اطلع القضاا والمضاا

-كيان: جنااااات ساعدينييي ساااعدنييي ماگدرلللله

-جنات: ولج شثوووي شلون اثااعد

-كيان: انفضحنااا تخزيناا طلعت اصواتنا والعالم دا يباوعوون

-جنات: محد ديباوعلج صوتج ناصي

-كيان: لعد ليييش احسس روحييي دا اصيييح

-جنات: لان دتحچين بهمث منفعل

-فاهد: همس منفعل شنوو

-كيان: ولك هاي تأثير الروايات

-جنات: الله كيان لو تعرفين يا قصة جاي اقره هالفترة يومية اثولفها لملاك قبل لا ينام

-فاهد: اليووم اصيرلچ قصة كورري هدديني اليوم الا اشعل وانعل و****

-كيان: اللزم نفسسك سيطرر على اعصاابك اخذذ شهييق زففيير

-فاهد: ***** على الشهيق والزفير ولچ تضحكين عليييَّ وتعوفيني معلللگ و*****

فكيت عيوني على وسعها وكيان صارت ترگص وتگمز بمكانها من الفشلة، اللتفتت عليَّ كيان باست خدي كم مرة وتهمس على كيف..

-اششش اششش انسي ما سمعتي انسيهاا بسرعة انسيهاا

-جنات: احم اني گايمة باي

-كيان: لاا حبابة لا تروحين معليچ بي

-فاهد: گملة انچبي وگعدي احنه گايمين امشي ولج گدامي

-كيان: وين نوليي

-فاهد: نشوفلنا مكان فارغ

گمت بسرعة من الخزي وكمشت بيه كيان متخليني اروح تبوس بخدي وتهمس..

-كيان: ندرس ندررس شبيچ انتِ مو اليوم درستي ببيت مالك

شهگت متصنمة مكاني عزه بعينيي هذا بسمار؟؟ بقيت جافلة بمكاني فاتحة عيوني وهي هم اخذتلها صفنة بوجهي.. ما حسينا الا على وجه فاهد يلطش ويدخل بيناتنا يگول بهمس مثل الحياية..

-فاهد: ولچ جنات ولچ ملعوونة

-جنات: شنوو شكوو شبيكم اني رايحة اروح رايحة اي اي رايحة اروح هناك اي اروح

-كيان: شكو شبيچ

-فاهد: ولچ ولچ ولچ ولچ ايا سلبوحة السلبوحات

ركضت اشرد بروحي الفشلانة عفتهم وحدهم يتناگرون وفاهد بعده مُصر يريد ينزع هدومه هنا حتى يفشل كيان.. ركضت ارجع للردهة الخاصة بغرفة شُهيب لگيتها فارغة ذبيت نفس ورحت اصب مي من البراد برادات المي كل مكان متوزعة والله مستشفى مرتب هذا..

اخذت گلاص اصب مي ووگف گلبي على هجمة مرتدة تصير ورايه، جسم ضخم طويل يحاوطني بأيده يحضنني بقوة ويدفن وجهه برگبتي..

-جنات: وگف گلبي

-مالك: انتبهيلي عليه زين

بلعت ريگ مرتبكة من وخر وجهه من رگبتي وركز بوجهي من الجانب، بقيت سارحة بعيوني على البراد اتعمد ما اباوعله بس دا اگدر اشوف جزء منه واحس بي مبتسم.. حط انفه على خدي يفركه بي على كيفه ويشمني وهمس بخفوت شديد..

-مالك: ليش شردتي؟

-جنات: هاا..؟

-مالك: دخلت اسبح طلعت لگيتچ ماكو ليش شردتي؟

-مالك خاف يجي احد حباب

-المكان هذا النا وفارغ

-لا مو..

-ليش شردتيي

شدد على جسمي اقوى رجفت رجليه واحس وجهي ولع من الحماوة..

-ما شردت بث..

-بث؟

-مالك

-جنته

-مالك اني خايفة

-من شنو يا گلب مالك

-اخاف ماعرف احث كلشي غلط

حررني من ايده يخليني اللتفت عليه نتواجه وجه بوجه بس بقيت بحضنه وايدي على صدره، نزلت عيوني خجلانة غاطة بهدومي، داعب حنچي بأيده ورفعه يخلي عيوني بعيونه..

-تندمتي؟

-لااا

عضيت على شفتي بقوة عزه بعيني طلعت لا ارادي مني وين اضم روحي ووين، نزلت عيوني اخفي وجهي بصدره من شفته يبتسم وزاد احراجي من اهتز صدره بضحكة..

-مالك: لو بس افهم ليش تخجلين

-جنات: حباب اثكت

-مالك: ما اسكت خليني افتهم ليش خايفة؟ بما انچ راضية ومكيفة على الوضعية...

ضربت صدره كم مرة حتى يسكت فرط من الضحك يحضني ويزيد بالحچي مال ادبسزية، اختنگت واني ضامة وجهي بقميصه مالي عين اباوع بوجهه وهو ولا مهتم..

-مالك: بس صراحة ما توقعت تكونين لهدرجة...

-جنات: مااالاااااك

-مالك: شبيچ قصدي ماتوقعت تكونين لهدرجة سريعة طبيت للحمام خمس دقايق طلعت لگيتها شاردة بت صاحب العار

-لا تغلط على ابوية ولك

-ديلا اليسمعها شلون اب عدها

-وانتَ هم عندك اب فاشل تقبل افشر عليه؟؟

-مالك: الچ كامل الصلاحية محاللة وموهوبة

وخرت وجهي عنه وگلت بضحكة..

-جنات: ولك ملووك هاي شنو شو صاير تفتهم بهاي الثوالف

-مالك: اعجبچ

غمز بعد هالكلمة بس ليش اني فسرتها بشي ساقط؟؟ عمت عيني الطالعة شگد صايرة ما استحي!

-مالك: ما گلتيلي سبب خوفچ شنو؟

-ماريد احچي بالموضوع اخوك وضعه صعب وانتَ مبين تعبان

-اي والله تعبان

-الله يثاعدك

-بس؟؟؟

-ويعينك ويفتحها بوجهك وين متروح ويرزقك خير الدنيا والاخرة و..

-شكراً شكراً بس مو هذا قصدي

-لعد شنو قصدك؟

-خرب حظي لا جنات انتِ ينرادلچ كورسات مكثفة

-ماليش؟

-هذا الحچي ممتن اله وحبيته شكراً گلبي بس بعد لا تعيديها

-يااا ليش هاي فوگاها

-بدالها بوسيني، حضنيني، دلليني بـ....

-اييييع

-ولچ لييش

-تلعب نفثي من هالحركات الثخيفة

-اني سامع بحظ فاهد مصخم بس مستتحيل يتقارن بحظي

-شبيك مالك حرام عليك شثويت اني

-مو هي هاي المشكلة جنة، المشكلة كلشي ما جاي تسوين

سكتت ماعرفت شنو اجاوبه، يعجبني انطي الي يريده بس مشكلتي الخجل يسيطر عليَّ اني اشوفه واموع واظل امتمت بالحچي، ابتسم من شافني خنست باس خدي وشفتي خفيف وهمس بيني وبينه..

-اتشاقه وياچ وجودچ كلش كافي ما محتاجة تسوين شي اني اكفي واوفي

-مالك اشش شبيك عيب

-ههههه سمعت گالو تعرفين ترگصين

-عزه بعينييي

-صوتچ ولچ لا تفضحينا

-هدني عيب كافي لا يجي احد ويشوفنا

-تمام امشي نفوت هنا

جرني يدخلني لوحدة من الغرف الفارغة جريت ايدي منه وشردت اركض اوگف على جهة من الممر..

-لا لا خلينا هناا

-ههههههه شبيچ ترجفين تعالي

-مااا

-تعالي ولچ

-ما اجي والكعبة ما اجيي

-لييش

-انتَ ثاقط وثافل

-بدمي تمشي السفالة

-مالك لا تتقرب لاا تتقررب انتَ واحد ارعن ومهيلگ وابن واحد اغبر ثاقط وثافل وثرثري و...

-تسكتين لو اسكتچ بطريقتي؟

انلصمت بسرعة من لزگني بالحايط وحاوطني من كل الجوانب ماگدر اتحرك بعد عيوني تعلگت بعيونه التعبانة وركزت بكل حواسي من تغيرت نبرته المتلاعبة عن قبل شوية للجدية الشديدة..

-جنات تذكرين شگتلچ البارحة مو صحيح؟

نبض گلبي بقوة البارحة واحنه بوضع رومانسي باس ايدي و گال هو يحبني وراح يسوي المستحيل حتى نبقى سوه بس ذكرني بموضوع الوداع ويمكن هاي اخر مرة نكون بيها سوه..

-جاوبي جنة

-اتذكر

-اريدچ تبقين قوية وما تخلين احد يستغلچ مهما كان الموضوع، جنات لو تشوفيني وبيني وبين الموت شعره ما تدخلين وتبقين واگفة تتفرجين وتمثلين البرود وكأن ماكو شي بيناتنا فهمتي لو لا؟

-لو اموت!

-جنات سمعي الكلمة ما تتصرفين أي تصرف لان أي ردة فعل غلط تصدر منچ راح يعرفون احنه ويه بعض وراح يبدون يساوموچ وتوصل بيهم القذارة يساوموچ على جسمچ وكلشي يخصچ انتبهي كلش زين خليني اروح احل موضوعي واني مرتاح

-جنات بجزع: مالك ليش هيچ جاي تثوي بينا

-مضطر وعيونچ الاحبهن مجبور

-لا تروح حباب اخاف

-من شنو

-اخاف يصيرلك شي

-ما راح يصيرلي شي لا تخافين

-واذا انجبرت تثوي شي انتَ متريده؟

-متعود

-شنو قصدك؟

-اني انجبرت اكسر گلب اخوية وصديقي انجبرت اعوف قطعة من روحي واديرله ظهري اعوفه وحده تاكل بلحمه الوحوش ويتونسون على تعذيبه وصوت كسر اصابع ايده لليوم بأذني ما اتوقع راح اعيش شي اصعب

-ليش جاي تضغط على روحك هالشكل

-اني عبد مأمور جنات، عبد يشتغل جوه رجلين ابوية كله في سبيل يعوف اخواني يعيشون

-اوعدني راح ترجع

-لا تبچين جنة

-اوعدني

-وعد ارجع

-انطيني وقت

-ماگدر

-انطيني وقت مالك گول شگد تحتاج شهر؟ شهرين؟؟

امتعضت ملامحه بألم نزلت دموعي بغزارة ماگدرت اسيطر عليهن، حضني يمسح على راسي وظهري ويهدأ بيه..

-وعد ارجع بس ماگدر انطيچ وقت صغيرتي ممكن غيابنا يطول سنة يمكن سنتين يمكن حتى يطول عمر

حضنته بقوة مكمشة بي واحس گلبي مقموت وروحي لايبة احس بوجعه واحس بألالم الديحس بي، مالك لو شگدما يضحك ويلبس ويكشخ ويعيش حياته تبقى نظرة الحزن والحنين مرافقة عيونه.. تبقى نبرة الزعل بصوته حتى من يضحك، يبقى الحرمان والنُبذ ملازم انفاسه وتنهيداته.. واهمها يبقى الحُب واللهفة ينرسم على وجهه بكل مرة يشوف بيها شُهيب!

-مالك: يله كافي حبيبي هو فترة اغيب نضحك بيها على ابوية وارجع

-حيال

والله احچي صدگ افض سالفة شمسون الدبسها براسي وارجعلچ شيخصلچ مني بعد

-انتظرك

-انتبهي لدراستچ زين، ويا جنات وروحها لامي لو افتهم بيچ حاضرة محاضرة رائد والعباس اجي اسوي وصلتين

-عزززه ولك طلع لثانك وصاير عراقي مأصلل

-من وراااچ يا بلااء يا قههر عبالچ من دخلتي محاضرته يوم الاربعاء الفات ما وصلني الحچي؟؟

-جنات بشهگة: والزهررة والزهرة ام الحثن وام البنين وزينب وخديجة بنت خويلد مو انييي والكااظم مو انيي

-صح صح هذا خيالچ چان حاضر هنااااك ولابس جاكيتچ الفرو الابيض طالعة مثل العراايس بالضبط! گاعدة هنااك تسمعيله وعيونچ مفتحتها على وسعهاا ومركزة لدرجة الضفدع گلچ جناات فهمتييي؟؟ جاوبتي نعممم دكتوور فهمتتت وهو گلچ اكيدد؟؟ گلتيله اممممم مو كلش گلچ جنااات ليش متحچين لعد؟؟؟ انتِ گلتيله مو اثتحيييي هو گلچ....

-وجعععع

-بگلب عدووچ بت صااحب الكلللب

-حاط جواثيث عليَّ؟؟ حتى الحچي حافظه اشتتعل ابووك

-اييي حاط جواسيس عليچ لان اعرف عندي گملة عنوددية وراسها ياابس ومجعمررر

-مالك شبيك وياي

-انتِ شبيچ وياي؟؟ تردين تخبليني ماكوو غير رائد دكتور؟؟؟

-مو يفهم والله العظيم رزان گالت بث هالمرة تعالي لان جاي يشرح موضوع مهم واني مثل النعجة التايهة ماعرف شي عن المادة وامتحاني قريب

-خلي فاهد يدرسچ لو هسة فاهد ما يعجبچ؟؟

-يعجبني لعد شلون بث فاهد ماعنده وقت وامتحاناته هم قربت

-باعي جنات هاي ااااخر مرة اسمح بهالشي يصير لا تخليني اتصرف شي اندم عليه!!

-لا تهددد

-اهدد وغصباً علييچ!! راح تسمعين الكلمة لو اشوف شغلي؟؟؟

-انتَ اييييع

-مو أعيع منچ!!

-اعيع منج شنو؟ هاي كلمة جديدة بث حبيتها

-جناااات

-خلص خلللص ماروح بعد بث لازم تعوضني

-حاضر ادخلچ خصوصي اجيبلچ دكاترة وبرفسورية يدرسوچ ويفتحون عقلچ ويحطون بيها المادة هالشي يرضيچ؟؟

-اي

-وجعي احبچ

-ولي ماحبك

-خرب بحظي

ضحكت عليه شلون عاقچ وجهه وضايج بس ما خلى ضحكتي تدوم طفرني من باسني ظليت صافنة مصدومة وفوراً باوعت على طريق الممر لگيته بعده فارغ، بلعت ريگ ونزلت عيوني اسوي روحي اباوع لاظافري ضحك بصوت مسموع وباس راسي وضرب انفه بأنفي..

-والكعبة ماكو غير فهاوتچ وبرائتچ السحلتني

-انتَ ثاقط

-راح اشتاقلچ

-واني هم

-ادعيلي جناتي

قبلني بحب وحضنني يودعني نزلت دمعتي للمرة المية لليوم وهمست بخفوت خجلانة..

-مودع بأسم الله حبيبي....

**

-اني اعرف انتِ شنو ببالچ

-شنو ببالي؟

-جاي تلعبين بأعصابي ترديني امل واعوفچ بس لاا وعيونچ الكورية ماعوفچ يا كيان لو مو اخوانچ يوگفون بطريقي لو الدنيا كلهاا تحاربني بيچ هم ابقى لازگ بيچ لآخر نفس!

سكتت اكمل الاكل البيدي، صارلي ساعة گاعدة اماطل وامعمس باللفة اريد الوقت يمر ويمل مني ويگوم بس ما تحرك من مكانه وبقى صافن عليَّ يراقب كل لگمة احطها بحلگي منتظر على نار..

اعرف دا اشلع گلبه واعرف احياناً اذوب وافقد عقلي وياه بس كلما تريد تطور علاقتنا اتردد واخاف وسبحان الله يصير شي واحس هاي اشارة من رب العالمين حتى ما استعجل وادرس علاقتنا زين واتأكد من گلبه هل هو مُلكي بالكامل وينبض بس لـ كيان لو اكو شريكة ويايه؟

-فاهد: بسيطة كوري اني اعلمچ

-كيان: يوووه متگول هاي حالتها النفسية تعباانة وحزنانة على اخوها واجت تاكل!! ماطلعت لگمة هااي من گعدت لسه اني اعلمچ كوري الا انزع وافضحج كوري الاا اطشر العرض كوري الا اشعل اخوانچ كوري الا اتعارك وياچ كوري الا...

-سمم ومررض لا تلحين

-هااا وتغلط عليَّ هم مو؟؟ هيچ تفسر...

-انچبيييي

-فاااااهد

-اي اي هيچ افسر اني رايدچ اكرهچ عيشتچ واطيح حظچ هاي لغة الحب الخاصة بيه!

-نععل على هيچ لغة!

-نعل عليچ!

-وعليك!!

-وعلى اخوانچ السلاباات

-وعلى امك الغبررة

-وعلى ابوچ المگبور

-وعلى ابوك الجبان المخببل

-اي بهاي حقچ

-گوم گوم خلينا نروح

-يااااا الله اخيييييراً

-هاي شبيك

-اخييييراً حظي اشتغل يااارب لك الحمد والشكر ربيي اعرف اني انسان ساقط وصايع وطايح الحظ وسرسري و...

-وديني لبيت اخواني اسبح وارجع

-ربيي شسوي بروحي اني ربييي

-شگد دراما كينگ

-الله حلوة هاي كوري عجبتني دراما كينگ

-اي تدري جبتها من مسرة مرة سمعت ابوها يصيحلها دراما كوين ولگفتها منهم بس انتَ مو مال كوين سويتك كينگ

-عاشت ايدج والله حبيتها عفية عليج

-تدلل ولوو

-يله امشي ندعبل منا اليوم الا اطلع عيونچ من وجهچ

-ولك لييش

-على هالذلة الجاي تعيشينياهة

-تستاهل

-باعي كوري اني انزلچ ببيت اخوانچ منا واروح اخونچ مناك مو تزعلين وتسويلچ سالفة

-عمت عينك وللك تخوونيي؟!!

-لعد شسوي اذا انتِ مو زوجة صالحة ولا تقومين بواجباتچ الزوجية ماي لوڤ لا تزعلين

-ولك فااهد لا تخبلنيييي

-يلا اني رايح مع السلامة خلي اخوچ المشعوط يجي عليچ

-فااااهد ولك وين راايحح

-لصاحبتي جيسي

-فااهد وروحهاا لامي اذا تروحلهاا تنساااني تحلم تشوف اظفرري

-ماشي

عافني وراح ما مهتم شعوطني هالمسودن گمت من الميز عايفة اكلي وعصيري ورحت امشي وراه ونااار مشعولة بيه الحقير النذل ابو النسوان العفونة!

-كيان: فاهد!

-فاهد: عيونه الصفر

-وين رايح؟؟

-لجهنم

-روحة بلا رجعة ان شاء الله

-هههههههههههههههه شكراً

-روح خلي جيسي تفيدك رووحلهاا وسوي كللل اليعجبك تمام؟؟؟

-تمام

-والقراان متشوف وجهي بعد مو تگول ما حذرتك!!!

-تمام

-ولا تشم ريحتييي ابددد

-تمام

-ولا.. ولا.. اءء ولااا ولااا هاااي

-تمام

-الله ياخذك

همستها بخفوت وعبرته استعجل بخطواتي اعبر الناس الى ان وصلت للردهة الخاصة فارغة بس اني امشي واحس بي يمشي وراية هه يريد يروحلي لـ جيسي هالعفونة سليمة تطمك انتَ وياهة عساك بنار جهنم يا فاهد ومتطلع منها لنهاية عمرك!!

-كيان

-خيررر؟؟؟

-اوگفي احاچيچ

-روح هناك رووح ماريدك

-اوگفي لچ فراولة توت وكرز

ما اهتميتله وكملت امشي وحسيت بأيدي تنجر بقوة احس بچتفي انخلع، شهگت متوقفة انفاسي من سحبني من خصري يثبت وجهه بوجهي، عيونه الصفر اللتحمت ويه عيوني الكورية.. سرحت بنظراته الحادة المغلفة بحنية خاصة، شال ايدي يخليني احاوط رقبته وگال بمشاكسة بيني وبينه..

-لا تغيرين عطرچ بعد

-بس انتَ عجبك هذا الجديد

-القديم احلى اذوب واسكر عليه

-يعجبك؟

-افقد على ريحة الفراولة والكرز التطلع منچ كوريتي

-حبيت اغيره

-لا تحبين غيري بعد

-احب عطري اكثر منك

-واني احب عطرچ اكثر مني

-امممم

تخالطت انفاسنا بخجل مني ولهفة منه، بلعت ريگ اداري دگات گلبي المجنونة احاول اسيطر على روحي لا اچفص بشي..

-فاهد: شيصير لو يجينا كوري صغير

-انطيني مجال

-مانطيچ

-فاهد احتاج مساحة استوعب علاقتنا

-مساحة لو مقطاطة؟

-ههههههههه يوووه فاهد

-مساحة شنو شهالخرط كيان امشي نروح لبيتي

-ولك لااا

دفعته مني اضحك الخبل ظل يتحارش بيه وما عافني الا من گتله رايحة اتطمن على شُهيب وارجعله ماعرف ليش ماقبل يجي ويايه وفضل يبقى ينتظرني بصالة الانتظار..

تمشيت للممر المؤدي لغرفة شُهيب واستوقفني منظر هز گلبي هزز، كممت فمي بقوة ووگفت اضم روحي بالحايط واراقبه من بعيد بقلب ينبض بعنف، شمسون واگف ولازم مسرة من رگبتها وحاط مسدس جوه فكها وينتر بين سنونه بحقد..

-انتهيتيي مسرة قيثاارة انتِ انتهيتي!!!.......

يتبع... 🥵

━━━━━━  ━━━━━━

لا تنسون التصويت قلبي 🥹🩷

شُهيب دموووعي ماگدرت اسيطر عليهن والله 😭😭😭

علماً اكو هوووايه احداث تعذيب صارت وياهم مؤلمة جداً بس اختصرتها شي يوجع الروح 💔

مالك وجنات كتاكيتييي الحلوين 🙈🤌🏻

المسودن وكورييييته 🥵🔥

واخيراً شمسون؟؟؟ ولك شجابك انتَ مو گلنا خلصنا منننك 🙂

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

تغارين وانتِ اقربهم لگلبي..؟

تغارين وانتِ الثابتة بينهم؟.. 🥀

━━━━━━  ━━━━━━

"مسرة"

روحي ممرودة ونفسي تلعب كرفات ببطني توجعني بس ما اهتميت بقيت ملازمة غرفة باب شُهيب انتظر تمر الـ 24 ساعة واروي گلبي بشوفته وهو بخير.. ماگول غير الف الحمدلله والشكر على ما مضى والحمدلله من انكتبله عمر جديد كلشي ماريد غير سلامته..

الافكار السلبية تلعب بعقلي خايفة احس ماگدر اغفل ثانية وحدة لا يجي شخص ويخلص عليه يكتله على الاخر.. يغافلنا ويدخل غرفته يشلع واحد من الاجهزة الموصولة بسلك لصدره لو يخنگة بالمخدة لو يدچه بسچينة كلشي اتوقع منهم ذولة كلشي!

فترة چبيرة مرت واني عيني ما ضايگة طعم النوم والراحة، رجعت كرفتني بطني وجع مو طبيعي واحس راح اتقيء.. ركضت للحمامات القريبة وتقيأت لحدما ارتاحيت، رفعت راسي اتنفس واريح روحي واطمن نفسي سبب اللعبان نفس والوجع هو بسبب الخوف وهالشي طبيعي وما يدعوا للقلق..

وگفت اباوع لوجهي بالمراية وضعي مزري كحلتي سايحة والمسكارة نازلة وشعري مخربط اذا گعد شُهيب خوما يشوفني بهالحال التعيس؟ وينها الأنوثة؟ وينه الجمال؟ وينه الترتيب؟

طلعت فرشة اسناني من الجنطة دائماً احط وحدة احتياط سواء هنا او بسيارتي لان مو دائماً ابات ببيتي من قبل وتعودت على هالوضع، فرشت وغسلت ومسحت وجهي من المكياج وعدت مكياجي من جديد، حطيت حمرة وعدلت شعري بيدي واخيراً رشيت عطري ولبست الجاكيت، ابتسمت بـ رضا وكلني امل اروح واللگاه گاعد..

بعدني دا اطلع من الحمام ونفسي لعبت من جديد ركضت للمغسلة اتهوع بدون لا اتقيء واگح روحي راحت رفعت راسي اباوع لروحي بالمراية قلقة شنو ديصير ويايه؟ ليش دا اتقيء وبطني توجعني معقولة...؟

لا لا مستحيل هالشي شبيچ مسرة شسالفة لا تظلين توهوسين هاي من الخوف على هموسچ هيچ صرتي هسة ارتاح واكل شي اصير زينة اكيد..

طلعت من الحمام اهرول وبس صوت طرق كعبي الشتت افكاري وخلاني انتبه للكعب مكسور ويرگص برجلي، نزلت نفسي اتأكد منه وفعلاً معووج هاي يمكن دايسة على شي وما منتبهه خرب مو وكتك ابد!

نزعته لان اذى رجلي وشلته، سندت ظهري على الحايط واتصلت بـ سام يگول لمارلي تجيبلي ملابس وحذاء ورجعت التلفون بالجنطة، تمشيت كم خطوة اعبر الممر الموجه لغرفة شُهيب واستوقفني شي! او خليني اگول احد! هذا شمسون لو يتخايلي؟؟ شجابه هالكلب الناطق؟!

ركزت بي واگف ومركز بشي ماد بس عيونه من الحايط ويراقب بحذر، بقيت واگفة اراقبه وهو مو يمي اصلاً ولا انتبه لوجودي، اصوات بسبسة جاية من المكان الديراقب منه مبينة لرجال ومرة بس ما ميزت الاصوات تقدمت كم خطوة برجلي الحافية ورجعت بسرعة اتخبى من تحرك يدير ظهره للحايط ويطلع سلاح من جيبه ويركبله كاتم!

فتحت عيوني على وسعها متعجبة هذا يريد يطلق النار هنا؟؟ بمستشفى؟؟ ركزت بالصوت الديحچي هو واضح يريد يطلق النار على الموجودين هنا ركزي سرور ركزي.. اوكي همه ثنين رجال ومرة البنية صوتها مميز كلش بس ناعم يذكرني بصوت جولي معقولة هاي جولي؟

لا لا شنو جولي راحت من زمان هي وصبا ركزي زين مسرة وعرفي منو ذولة.. عيوني على شمسون السحب اقسام ووگف متحضر وجسمه متشنج متأهب يضرب بأي لحظة وتركيزي ويه صوت الرجال اليحچي وانتبهت من صاح بصوت عالي وفوراً ربطت!! هذا يشبه صوت شُهيب هاادئ بس بي نبرة مألوفة ذولة ماالك والبنية ام الصوت الناعم جنات!!

بدون تردد وبدون لا افكر زايد ركضت عليه بكل سرعتي ودفعت ايده وجريته من ياخة جاكيته اسفطه على الحايط، شهگت بكتمة من ردة فعله القوية قبل لا يعرف اني منو لاف الموقف ضدي و سحبني من رگبتي يعصرها ويضرب ظهري بالحايط ورفع المسدس يثبته جوه فكي..

فتح عيونه مصدوم وهو يشوفني لكن سرعان ما تغيرت ملامحه المصدومة واستبدلها بملامح الحقد والغيض حفر المسدس حفر بفچي ونتر بغضب..

-انتهيتيي مسرة قيثاارة انتِ انتهيتي!!

-مسرة: ليش انتهيت؟؟ لان وگفتك من قتل ابنك وچنتك!

-شمسون: لا تدخلييين!!

ينتر بهمس ميريد يوصل صوته الهم وكلما جايله يضغط اكثر واكثر بالمسدس احسه راح يخترق جلدي ويطب بحلگي..

-مسرة: انتَ متخاف من الكامرات؟؟ متخاف من امن المستشفى!

-شمسون: ما اخاف من احد اني!!

دار وجهه شوية الهم واني هم درت وجهي سمحلي بهالشي من رخى ايده من رگبتي، شفت مالك وجنات متحاضنين وجنات مبتسمة ومالك يمسح على راسها ويبوس بيها، وصلني صوت ضحكاتها الناعمة الخجلانة وصوته وهو يغازلها وهالشي كبر الحقد بگلب شمسون ونتر بيه يشدد على رگبتي..

-شمسون: موتچ على ايدي اليوم قيثاارة اذا ما وخرتي من طريقي!

-ما اوخر! وصلت بيك المواصيل تكتل ابنك شمسون!

-شمسون: انتِ گلتيها ابني يعني شي خاص بيه

-انتَ مستوعب وجهت المسدس على مالك؟ مستوعب ردت تكتله بس لان سمعته يحچي ويه زوجته بحب وشفتهم متحاضنين؟؟

-اي وردت اكتله بمكانه بس للاسف الشديد خربتي عليَّ

-ليييش؟؟؟

-مسرة لا تدخلين گلت!

-انتَ وين چنت وليش هسة ياله ظهرت؟؟

-ظهرت حتى اكتل ابني العاق وارجع

-عاق؟؟ شسوه؟؟

-ملاحظة نفسچ هواي جاي تدافعين لمالك شعجب ما عرفتچ؟

-لان جنات بحضنه!! چان صارت بيها الطلقة استووعب!

-اني وبنت اخوية نمون على بعض عادي

-انتَ مريض!! مريض نفسي تحتاج علاج فوري!

-تمام

دفعت ايده عني ووخرها فوراً بدون لا يرجع يسحبني، وگفت اعدل شعري ووضعي متنرفزة، رفعت عيني للجهة الثانية وشفت كيان واگفة جاحظة عيونها تباوعلنا، من لاحظني شمسون اباوع لشي وراه اللتفت ومن شافها كيان ابتعد كم خطوة يضحك بصوت عالي وگال وهو يفر بسبحته بأيد وبالايد الثانية مسدسه..

-شمسون: هاي شنو چنتي الثانية هم هنا

-مسرة: كيان انتِ بخير؟

-كيان: اي.. شنو صار؟

-شمسون: كياني مشتاقيلك

سكتت كيان متجاوب ضحك مرة ثانية يسحب خشمه كم مرة بالمنديل القماش البيده ويگول بأستهزاء..

-شمسون: كيان وينه فاهد بس لا عفتي يروح لسارة؟ مع الأسف عليج

-كيان: فاهد طلع

-شمسون: اممم وانتِ مسرة چنه زواجچ من نمري طال مو بله؟

-مسرة: شعليك!

-شمسون: جميلة الجميلات اهنيچ واباركلج اليوم شُهيب ما مات وانكتبله عمر جديد بس كافي.. مو بله؟

-وين تريد توصل؟!

-اريد سلامتچ حبيبتي عمو بس انتبهي لـ شُهيبچ زين متعرفين الدنيا شضامتلكم

-سوي كل التريده بس وروحها لامي المظلوومة آكلك بسنووني لو صار لـ شُهيب شي ادمررك والله!!

-اموت على العنيفات مسرة ويوم بعد يوم جاي احبچ اكثر واكثر

-لا تقرفنيي وخر

-اويلاه.. واني اگول ليش ابني فاقد عليچ

عكمشت وجهي لعبانة نفسي وباوعت لـ كيان الي لسة واگفة جماد بدون لا تتحرك ولا ترمش وجهها اصفر ومصفصفة بمكانها قلقتني، الطلعني من القلق وانتباهي وياهة هو صوت شمسون يسألني..

-شمسون: تحبي؟

-شعليك انتَ!

-اها يعني تحبي.. بس شبسرعة ما توقعت گلبچ ينبض بسهولة؟

-وبعدين؟

-بعدين ما اللومچ صراحة ولدي ما يتفوتون وما اللوم النسوان من يحبوهم بسرعة وعيونهن ما توگع من وجوههم

سكتت اراقب غروره وثقته بولده، قهقه بخفة وكمل وهو يحط جگارة ما مشعولة بين شفايفه..

-واحد احلى من الثاني، جميلين، مرتبين، انيقين، اذكياء، اقوياء والاهم يعرفون شلون يرغبون المرة ويشبعون گلبها وعقلها ما يخلوها تفكر الا بيهم طالعين على ابوهم زلامي ههههااههااههااا

گلبت عيوني مزعوجة من كلامه خرب روحه كل حچيه صحيح شنو من بشر هذا؟ مراقب ولده على الدعسة!

-شمسون: متعوب عليهم ولدي متعوب.. دافع دم گلبي بيهم حتى يصيرون هيچ بس يله اني چنت متأكد راح اكتل واحد منهم بيدي شي يوم فدوة الي

-مسرة: مستحيل انتَ انسان طبيعي

-شمسون: مسرة تردين نصيحة؟

-مسرة: لا

-شمسون: تمام تدللين راح انصحچ، تطلگي من شُهيب قبل لا يخسرچ كلشي هذا كلامي ونصيحتي الوحيدة الج صدگتي خو خيراً على خير ما صدگتي انتِ الخسرانة الوحيدة وتذكري كلامي عدل!

گال كلماته الاخيرة بأستهزاء وشعل جگارته يدير عيونه على مالك الظهر ووياه جنات واگفة بظهره، رفع حاجبه شمسون وگال بأمر..

-حسابك بعدين، شوف شغلك

عافنا وراح يسويلي باي بأيده وشمرلي بوسة بالهوا ويضم بمسدسه بـ جيب بنطرونه، وگف بنص الطريق بصف كيان مباشرةً وبحركة سريعة منه جرها من ايدها وباس خدها النذل بوسة خلفت صوت..

عصرت عيونها بقوة وكاشة وجهها ما بعدته منها هو وخر وهمسلها شي بأذنها خلى حالها ينگلب مية وثمانين درجة ووجهها يصفر..

-مالك: شوكت اجه؟؟

-مسرة: صارله فترة

-مالك: شافنا؟؟

-مسرة: اي

ضرب ايد بأيد يائس وزفر نفس قوي، عافنا وهرول يروح وره ابوه بعدما ودع جنات الحايرة..

-مسرة: بنات شبيكم؟

-جنات: راح يأذينا

هزت راسها كيان معترضة واجت تلزم ايد جنات تهدأها، بس وحدة وضعها اتعس من الثانية واني بالضيم وبطني مستمر وجعها ماعندي طاقة احچي ويه احد خليت وگعدت انتظر صحوة شُهيب..

بعد مرور اربع ساعات على گعدتي المابيها فائدة راحن جنات وكيان يرتاحن بالبيت ويرجعن بعد شوية، بقيت افكر بكلام شمسون هاي ثاني مرة احد ينبهني على طلاقي من شُهيب وان الديصير اني الوحيدة الراح تخسر بالنهاية، نورسين مرة وهالمرة شمسون.. المشكلة ثنينهن ما اثق بيهم بس يحچون بثقة تأذي وهالشي جاي يشوشني..

اجوني نشوان ومروان وفاضل تطمنوا على وضع شُهيب وجاوبولي اكل خطية بقوا هوايه ينتظرون يگعد بس ماكو فائدة من وجودهم للان ما صحى، بعد مرور سبع ساعات جديدة گمت للحمام ابدل واغسل وارتب نفسي من جديد، والحظ مارلي جايبتلي فلات مادري شتحس ليش يا يوم لابسة حذاء فلات؟!

غلست ولبست بسرعة عندي احساس شُهيب راح يصحى ويارب ميخيب ظني بس اريده يگعد حتى ارتاح واعرفه تعدى مرحلة الخطر.. طلعت من الحمام ورجعت اگعد بمكاني وتلفوني بيدي منتظرة اتصال اكرم اليوم ميس يمي لازم تكون بس ماعرف شلون راح اگدر اشوفها وماريد يضيع يومي وينحسب عليَّ واني كلشي ممفتهمة من زيارتها..

-Hello

صوت رجال خشن جداً جذب كل انتباهي، واگف امامي بملامح جامدة تماماً اللقى السلام بلكنة انكليزية ثقيلة واضح مو لغته الام هاي..

-مسرة: Welcome

"تمت الترجمة"

-وين اگدر احصل نشوان؟

-مسرة: راح نشوان قبل شوية

هز راسه متفهم ووگف گدامي ينتچي على الحايط وحاط ايده وره ظهره وعيونه بالگاع صافن على الارضية، خطفت منه نظرة سريعة مبين واحد من جماعتهم الاجانب هذا بس ما شايفته من قبل ماعرف شعجب.. شاب ضخم الجثة ذو بشرة بيضاء وشعر بني وعيون زرقاء وجسمه متروس وشوم ولاحظا الارقام الكثيرة الموشومة ع ايده عبارة عن وشوم ارقام وتواريخ..

بقينا على الصامت لفترة طويلة محد بينا نطق ولا هو رفع عيونه الي صافن بالگاع وكأنه ديقره بيها شي مهم وميگدر يفوته.. تنهدت بتعب وعلى اثر تنهيدتي رفع عيونه ناحيتي..

-شُهيب مات؟

استغربت سؤاله الگاله بالانكليزي حركت بيدي وراسي نافية وگلت..

-مسرة: لا اسم الله

-جيد

-مسرة: اذا متوقعة ميت المن واگف هنا؟

-وجهچ يوحي على ان شُهيب ميت

-اي تعبانة

-طبيعي

-انتَ الماني الجنسية؟

-روسي

-واضح من لكنتك مضخمة

-وانتِ عربية

-صحيح، صديق نشوان انتَ؟

-صديق شُهيب

-اها ما شايفتك من قبل

-بس اني شايفچ

-تعرفني؟

-مسرة قيثارة اكيد

عزه هاي ليش العالم كلها تعرفني واني ماعرف احد شگد عيب، سكتت ما حجيت بعد قلقتني نبرة صوته وملامحه الجامدة يحچي مثل روبوت خالي من المشاعر والاحاسيس..

-اذا صحى گليله الروسي اجه يشوفك

-منو الروسي؟

-موزس

عافني وراح يمشي شعره الوره خفيف وجمجمته من الخلف عبارة عن وشوم ارقام شكله مريب ويدعو للقلق بس ما اهتميت ثبتت راسي على الحايط وره وفجأة.. فجأة رنت الاجراس براسي واستوعبت هذا منو!

تذكرته! تذكرت اسمه رغم صعوبتي بحفظ الاسماء بس هذا اتذكره مرة صقر ريماس حچالي عنه وگال شُهيب تدرب وياه اهاااا هذا موزس الي جاي من نسل زعماء مافيا اباً عن جد؟!

ماطول تفكيري بي هواي لان اجه الدكتور وگلي مسموحلي ادخل اشوف شُهيب بس راح يكون شبه فاقد وعيه بسبب كمية المخدر الحقنوا بيها بالفترة الفاتت..

گمت بسرعة اركض للباب وگلبي يخفق بقوة بطني خبطت وحسيت راح اتقيء بس تمالكت نفسي مو وكتها مسرة تحملي.. دخلت لغرفته بااردة تصل صل والاضوية خافتة والاجهزة محاوطته، مجرد شفت وجهه عيوني خبطت بالدمع عضيت على شفتي اسيطر على مشاعري ووگفت بجانب فراشه..

راقبت وجهه الهادئ شكله نايم لان مغمض عيونه، ثواني وظهرت على شفايفه ابتسامة مصحوبة بهمسة خفيفة يگول..

-شُهيب: مسرات

رقت ملامحي بألم، يا بعد مسرات يا طوايف مسرات يا روح مسرات يا گلب وحياة مسراتك يا كل مسراتي انتَ، كل هالكلمات چانت بداخلي وتمنيت احچيها بس تراجعت بآخر لحظة وطلعت لغة ساخرة مني مثل عادتي من اشوفه، تقربت منه امد وجهي احطه بوجهه وهمست بخفوت..

-چؤؤ (لا)

كبرت بسمته وانعقف شوية من انفه، گوة كتمت ضحكتي على شكله شلون صار، هز راسه نافي ببطئ شديد وگال بصوت تعبان..

-لا تچذبين

-اهووو هموسي

-عيونه

-شلون عرفتني وانتَ مغمض يا روح امك

تنهد بجهد انقهرت عليه وما ردته يجاوب واضح يتعب بالحچي بس ما اهتم وجاوبني جواب ورد بسببه گلبي..

-حسيت بوردة فواحة اجت توگف بصفي

-خرب عطري طول عمره فاضحني

فتح عيونه على كيف باقي على ابتسامته، مديتله لساني اعيب ضحك خفيف ولزم مكان گلبه متألم..

-مسرة: تستاهل منو گلك تضحك

-ها استاهل؟

-تستاهل ونص همسمس شكو واگف تنتظرني على نهر ومسويلي اجواء رومانسية؟ عيوني اني مال كتل ومكاتل وسوالف مثيرة اخذني لمكان نتحارب بي وادچچك راح اكون بقمة رومانسيتي

-المرة الجاية اخذچ وعد

-الله وتخليني ادچك؟؟

-ااخ يابة

-شُهيب انتَ صاير ابد مو خوش زوج اني اريد اتطلگ

-بدينا

-واريد نفقة عشرين الف دولار بالشهر

رغم وضعه التعبان بس توسعت عيونه مصدوم، خفيت ضحكتي گوة ووگفت مكتفة ايدي لصدري..

-عشرين الف مسرة!

-نعم واذا اعترضت ازيدهم ناوية ابطل من الشركة واعيش براسك

-عيشي براسي وانتِ يمي لو الا تعلين گلبي وتطلگين

-يمعود شباقي من گلبك وأعله بعد

-ولچ شنو من بنية انتِ

اخيراً ضحكت ماتحملت اسكت اكثر واجيت اگعد بجانبه على السرير، رفع ايده على كيف وجر ايدي يحطها بنص ايده الضخمة..

-عطشان

-يا روحي

صبيتله مي بالگلاص وشربته شوية، بصعوبة جداً يتحرك والحچاية گوة تطلع منه بس ما بطل يحچي ويايه..

-لا تحچي بعد شُهيب انتَ تعبان

-مشتاقلچ

-اني هم

-مو تردين تطلگين

-ميخالف اتطلگ وابقى اشتاقلك

-تطلگين مني شتسوين وراهة؟

ضحكت على اسئلته ورفعت الكاسة اشربه مي بعد، عيونه طبعت بوجهي مفتحات على وسعهن منتظر مني جواب، ابتسمت تك خد وگلت..

-اتزوج غيرك

غص بالمي الديشربه وراد يگح ولزمها گوة عزا بعيني عززا الخياط راح ينفتح، بسرعة دگيت على ظهره من وره وهو جافل مسيطر على الگحة لا تطلع وتصير مصيبة.. وره ما ارتاح شوية واسترد وضعه گال بأنزعاج..

-اذبحه

-منو هو؟

-التتزوجي

-ههههه اوكي

-ما جاي اتشاقه مسرة!

-اي ولا اني

-انتِ تردين تموتيني؟ اذا تردين احچيها لا تبقين مستحية

-لا بيبي اسم الله عليك من عمر اكرم الخايس لعمرك انسى الموضوع يا روح مسرة

-مسرة لا تستهزأين وتاخذيها بالضحك

-بيبي اهدأ تعال تعال

مسحت على شعره الناعم ارتبه ومبتسمة بقى مطنگر وعيونه ما انشلعت من وجهي، اثناء ما اني ملتهية بشعره حسيته هذا قفل فد مرة العبوس اعتلى ملامحه..

-مسرة: شلون ويه عبوسي احنه

-صرت عبوسي

-على طاري العبوس اجه واحد زارك قبل شوية

ما ابدى أي اهتمام خرب اني گايلة من قبل اتحمل كلشي بس ما اتحمل زعل وطنگورة شُهيب؟ لانها قااااتلة!!

-گال گولي لـ شُهيب صديقك الروسي يسلم عليك

وهنا اخيرراً ابدى استغراب بملامحه، عگد حاجبه مستفهم ثواني ورجع وجهه للجمود وگلب عيونه بملل..

-شُهيب: موزس

-مسرة: شكله عبالك روبوت شُهيب وگف يحچي ويايه وجهه مابي ملامح شلون انتَ وبعد اكثر شكله مرعب وهيچ واحد شخصية وكذا

-موزس؟؟

-اي

-موزس قمة بالمرح بعيد كل البُعد عن الجدية هو بس يبيع ثگل على الناس الغربة

-شوكت تعرفت عليه؟

-بفترة من فترات حياتي الطويلة

-يعني چنتو سوه بالجامعة؟

-تقريباً

-ليش غامض شُهيب؟

-اني غامض؟

-لو طلبوا تعريف للغموض راح انطيهم اسمك

-اني مجرد انسان متحفظ مسرة

-براحتك، اني رايحة

ردت اگوم ولزم ايدي بقوة وگال مستعجل..

-لا تعوفيني مسرة

-ما عايفتك

-وين رايحة وين؟

-عندي شغل مهم

-زعلتي مني؟

-لا ليش ازعل

-لعد لا تروحين

-بس اكمل كم شغلة وارجع

رخى ايده مني بس ملامحه تقطر خوف اول مرة أشوفه لهدرجة ضايع مثل الطفل اليتعلق بأمه، گمت ابتعد منه كم خطوة وعيونه ما بعدهن مني، من شاف نظراتي ترق اله مقهورة فوراً دار عيونه يمسح على وجهه تعبان..

ترددت اعوفه لو ارجع بس شلون ميوسة منتظرتني واذا ما اخذتها يروح عليَّ اليوم وما اشوفها الا بعد اسبوعين، قررت وحزمت قراري وصلت لباب الغرفة واللتفتت عليَّ اشوفه صافن عليَّ من وره ضحكت بيني وبين روحي ليش محسسني اني مسافرة ما تحملت نظراته البريئة اللطيفة رجعت اهرول وحضنته بكل قوتي احط راسي على صدره..

غمضت عيوني استشعر وجوده واحس بأيده اللطيفة تمسد على شعري، شخصيتي الخفيفة ما تحملت وجوده وحطيت راسي برگبته اشم ريحته وبسته مناك، ضحك خفيف وگال..

-شُهيب: يمعودة ستري عليَّ

-مسرة: هاي بوسة من ميس

-شُهيب: ميس تبوس من الرگبة؟

-اي شبيك طالعة خفيفة على امها

ضحك بصوت وفوراً لزم مكان جرحه متألم، ضربته على ايده خفيف ونترت..

-تستاهل ما اسمحلك تحچي على ميوستي

-انتِ حچيتي عليها مو اني

-چان لازم تسكتني وتگول ما اسمحلچ تحچين عليها

-ما اسمحلچ تحچين عليها

-فات الاوان شُهيب طلگني

-ياااااابة هالكلمة تعقدت منهاا تعقدددت

-هاي شنو طلع صوتك هموسي مو علساس مريض

-ليش انتِ تعوفين المريض بحاله؟

-ها هيچ صارت؟ اكرهك روح خلي جرحك يفيدك!

-لا تعالي.. ولچ رجعي!!

-ما ارجع باااي

طلعت من الغرفة اضحك وهو يضحك، طلعت من المستشفى بكبرها وتوجهت لبيت اكرم لگيت ميوسة گاعدة وحدها بالصالة لابسة جنطتها الظهر العليها رسومات باربي ومسوية ستوتات صغار وباقي شعرها مفتوح..

بس شافتني شهگت تكمم فمها وكأنها ما مصدگة اني هنا فديتها طالعة دراما كوين على امها، من بعيد وگفت فتحتلها ايدي اجتني تركض بفستانها القصير وجواريبها التوتو وطفرت بين ايدي تضحك فرحانة وتصيح..

-مااماا مااماا

-ياا رووح امچ انتِ بنيتي الاميرة احلى البنات

-ماما اني صوت حبابة واح تاخذيني لمدينة الالعاب؟

-اخذچ شلون ما اخذچ بس ميوسات شنو رأيچ نأجلها على غير يوم؟

-ليس

-لان عمو شُهيب مريض وبالمستشفى خطية نعوفه وحده هاا شتگولين؟

-نووح لعمو سووهيب؟

-تردين تروحيله؟

-اي اويد

-يله لعد هو مشتاقلچ كووومة ويومية يسألني عن روح امها

نزلتها مبتسمة وخجلانة لان شُهيب مشتاقتلها ويسأل عنها، تمنيت اللزمها واجعصها بين ايدي وما اهدها لاخر عمري نقطة ضعفي هالنتفة بنيتي هاي المحرومة منها..

اخذتها ورجعت للمستشفى نسوي لـ سووهيب مفاجأة، الغريب بالموضوع شُهيب يعشق ميس! يحبها حب عجيب كأنها بنته الحقيقية يشتريلها هدايا ويوديهن الها بالروضة ويتصل بيها ويسولفون كام وكل يوم لازم وضروري يسألني عنها وهالشي مطيرني فوگ الغيم صح ميوسة ماعدها ابو يهتملها وبي خير بس الله عوضها بـ شُهيب..

وصلنا للمستشفى لباب غرفته بالتحديد، باوعناله من الجامة الصغيرة شفنا كيان عنده واخوانه جايين ووياهم فاضل، فتحت الباب على كيف وخليت ميس تفوت قبلي وبقيت بره اشوف ردة فعل شُهيب..

**

-كيان: هههههههههه ولك عفونة ليش متجوز من سوالفك انتَ

-نشوان: بالعباس بنفسي انضرب طلقة ويعجبني الناس يبچون عليَّ عبالهم متت وحبيبتي تدگ وتلطم عليَّ وتتخربط من يجيبولها خبر توقف نبض گلبي واعيش الدور من بعدين يگولون سبع وما مات انوب اظل امثل اني ميت وابصبص بتك عين اشوف منو يبچي عليَّ ومنو ما مهتم

-فاضل: بله هذا شتحچون وياه هذا اخي ماذا دهاك؟

-نشوان: الجفاااف دهاني ودهى اهلي الجفااف خايبين راح اشگ هدوميييي

-شُهيب: جفافه العاطفي واصل لاعلى مراحله نشوان شوفلك وحدة تلمك لا تعدينا

-نشوان: ولكم هي منو مگلبتني راح اشگ هدوميييي

-فاضل: عوف هدومك عزيزم استر علينا بداعة جيناتك الكورية

-نشوان: اخوان اني استسلمت وراح اعلن عنوستي ماكو هيج حظ نعل منين ما اندار ومنو تعجبني تطلع مرتبطة

-كيان: شنو رأيك ببنات عم شُهيب؟

-نشوان: والله عجبتني وحـ...

-شُهيب: لا تفكر بالموضوع اصلاً

-نشوان: ليش؟

-شُهيب: ما ينطون لغريب

-نشوان: فاااضل ادعيتك ما جاي تجيب مفعولها فااااضل

-فاضل: لا تقنط من رحمة الله نشوان ننطيك ختمة جديدة

-نشوان: مو خاف حتى الخلفة تنگطع عندي

-مروان: نشوان حاول ويه عمام شُهيب متأكد راح يقبلون بيك

-شُهيب: لا تحاولون حتى

-نشوان: شفتو حظي؟؟ شفتووو ولكم راح اشگ هدوووميييي

-مروان: دكاااافي ما بقالك بس اللباس استر علينا واگعد واسكت

-نشوان: مروان گلبي محترگ گلبييي وين اولي وين انطي وجههي عنست يا وليان عنستت

-فاضل: شُهيب صدگ ما تنطون لغريب؟؟

-شُهيب: حسب ما اعرف

-فاضل: يعني مابيكم مجال؟؟؟

-نشوان: وانتَ شبيك مخبوص اي ما ينطون لغريب شيل عينك شيلهاا

-شُهيب: فاضل شنو سالفتك؟

-مروان: اي فاضل شنو سالفتك؟

-كيان: صح فاضل شنو سالفتك؟

-نشوان: اتفق وياهم فاضل شنو سالفتك؟

-فاضل: ولا شيي ماعندي سالفة بس استغربت لا اكثر شبيكم اكلتوني

-نشوان: اممممم عليناا سيد عليناااا

-كيان: مو حتى الثلج گلينااا

-نشوان، مروان، شُهيب، فاضل: شنووو؟؟

-كيان: وبسامير بالهوا دگيناا

-نشوان: اها تأثير المسودن هذا

-مروان: على طاري المسودن شُهيب شوكت تطلگهم ما طلعت سالفة هاي!

انقبض گلبي من هالطاري سكتت اباوع لـ شُهيب الهز راسه وعلى نشوان الطفر من مكانه معترض..

-نشوان: انتظروا لا تطلگوهم خليني اطلع وياه اوول

-مروان: غبي اختك باقية بالضيم لا معلگة ولا مطلگة وانتَ تفكر بطلعاتك؟

-نشوان: كيان بشرفچ تحملي شوية بس اشوف شلونها طلعته هذا المسودن شو جماعته يگولون يونس

-فاضل: شمعرفك بجماعته؟

-نشوان: جبت تاريخه الاسود كله السربوت ما مخلي شي بنفسه

-كيان: احم.. مو وكته هذا الموضوع شُهيب تعبان لا ندوخه بسوالفنا

-نشوان: والعباس صح خلي يطيب ونطلگهم

-مروان: واختك؟؟

-نشوان: ولك اختي گاعدة ببيتي معززة مكرمة ما عليها شي

-فاضل: شگد عار

-نشوان: صدگ فاضل على طاري الزواج شنو رأيك تخطب وئام الويانه بالشركة؟

-فاضل: وئام تحب

-نشوان: لا تگلي تحب هذاك الواحد!

-فاضل: هو

-نشوان: لا يمعود

-فاضل: والله العظيم

-نشوان: يعني..؟

-فاضل: اي اي

-نشوان: يعني هاي...؟

-فاصل: بالضبط اي

-نشوان: هذيچ هم..؟

-فاضل: لا هذيچ مو لهدرجة

-نشوان: يعني الهاي مو مثل ذيچ..؟

-فاضل: صح بس اوقات هذيچ هم تحسها وصدگني ما جايب شي من جيبي

-نشوان: يعني هاي حچتلك؟؟

-مروان: دكاااافي بزعتونا هاي وذيچ ذيچ وهااي احچوا بالخط العريض وخلصونا!!

-فاضل: لا جونم ما نريد نشيل غيبة احد

-نشوان: اي لا نحصل ذنب

-مروان: ليش انتو خليتوا واحد ما گصيتو كل هذا ومو غيبة؟؟

-نشوان: بس ما جبنا اسماء، سيد افتيلنا بيها هاي خوية

-فاضل: حسب حكم المرجع الديني الـ...

-شُهيب: سدوا حلگكم ما نريد فتاوي

-مروان: واليذبح كلنا افتهمنا على منو يحچون

-كيان: بس لا وئام وميادة؟؟

-مروان: اي هنه

-فاضل: لاااا مروان ليش خليتنا نشيل ذنبهن

-مروان: ولك كلنا افتهمنا طبعاً صار عليك ذنب

-كيان: هاي شنو.. هاي منو البنوتة الحلوة؟

دخلت من البوابة طفلة صغيرة تخبل ما احتاجيت وقت حتى اتذكر هاي منو بسبب الشبه الفضيع بينها وبين امها هاي ميوسة بنت مسرة..

-شُهيب: هاي منو الاميرة الحلوة الطلت علينا؟

يحچي بأبتسامة واسعة جداً وعيونه تشرح فرحته بشوفتها، باوعت لـ ميس المنزلة راسها خجلانة ولازمة فستانها القصير بأيد وحدة كأنها صدگ اميرة..

-نشوان: عمي اميرة تشگ شگ هاي

-مروان : نشوان شسالفة.. هلو ميس شلونچ

-ميس: هلو

-كيان: هلو يا روحي منو جابچ؟

-ميس: ماما

-شُهيب: تعالي حبيبتي

اشرلها بيده وباقي على ابتسامته، راحتله تتعزز وتمشي على كيفها خدودها صايرات حمر وتباوع لمروان ونشوان وفاضل وصلت يم شُهيب وگالت بصوت خافت..

-مفادأة

-شُهيب: هههههه احلى مفاجأة هاي

راحتله تبوسه وگعدت بصفه على السرير تمد رجليها نفسه ما هو گاعد وتنزل فستانها الي انرفع..

-ميس: عمو سووهيب انتَ فوحان؟

-شُهيب: كللش فرحان فوگ الغيم

-ميس: عوفت

-فاضل: شلون عرفتي يحلوة

-ميس: لان ماما دالت عمو سووهيب مستاقلي

-شُهيب: صح مشتاقلج ومشتريلج هدية هم بس بالبيت اول ما ارجع انطيها الج

-ميس: سلون واني اووح للبيت بعدين؟

-شُهيب: اجيچ للروضة انطيچ گدام صديقاتج

-ميس: هههه اي اي احلى هيچ لان دائماً يدون اهلهم يديبولهم هدايا واتل واني ابقى وحدي محد يديني

-شُهيب: بس انتِ احسن منهن

-ميس: سلون

-شُهيب: عندچ بدال الاب اباء ثنين ومسرة ماما وماريا هم ماما يعني عندج مامات ثنين

-ميس: ههههه صح صح عمو هاي سلون هيچ

-شُهيب: لعد شعبالچ

باوعت لوجوه كل الموجودين الابتسامة من الاذن للاذن ومركزين ويه شُهيب وميس وهمه يحچون، تنهدت براحة ومتمنية من كل گلبي شهوبي يعيش شعور الابوة ويصير عنده طفل لان اكثر بشر اشوفه يستحق هالشي وراح يكون اب مثالي هو شُهيب بنظري..

دخلت مسرة مبتسمة ورفع عيونه شُهيب الها باقي على ابتسامته، سلمت علينا ووگفت بصف بنتها وشُهيب..

-شُهيب: توقعتچ ما تجين بعد

-مسرة: اجيت وجبتلك مفادأة

-شُهيب: لو هيچ المفادأت لو بلاها

ضحكنا كلنا وميس ويانه تضحك واتوقع ممفتهمة شي، شوية واجن العلوية وماريا وفيروز وجنات وگفت فيروز بصفي تتحمد لـ شُهيب على السلامة وتسأل عن احواله..

باوعتلها طالعة گذلتها الشگرة مثل عادتها واليضحك ماكو مرة انتبهت لشعرها طالع وكلما جنات تنبهها تنصدم وتغلط عليه وتگول..

-فيروز: اشتعل يومه بهذلني هالشعر المگطع

-جنات: لبثي كب شبيچ يمعودة

-فيروز: اللبس ولج بس تتمزلگ شعري كلش ناعم

طلعت من الغرفة للحمامات تروح تعدل بالشال وصاحتلي ولجنات نروح وياهة، طلعنا ببوابة الغرفة من بره تعدل بي على الماشي واستوقفنا ركضة دكتور يعبر من عدنا صفنن البنات عليه من گدما طويل شوية ويوصل السگف..

-جنات: عليييي باعن شطوله يخوف

-فيروز: ولچن يمكن طاخ 220 هذا

-كيان: هذا منين يحصل ملابس تكفي؟

-نشوان: يحصل يحصل

اللتفتنا على صوته شفته واگف وراية هو وفاضل، ابتسمتلهم وعبرت امشي گدام البنات للحمامات وسمعت صوت عيطة فيروز..

-فيروز: عزززززززه

-فاضل: اسف اعتذر استغفر الله اسف

فكيت حلگي على المنظر الي يفششل الصار، فاضل دايس على ذيل فستان فيروز وانشگ الفستان من وره وطلعت رجليها..

-فيروز: ولچن عززززززه

-جنات: يمااا ركضي للحمام ركضييي

-فيروز: وين اركض بهالحال وانفضحح

-جنات: ديروو وجوهكم ليش جاي تباوعووون

-فاضل: العفو ما منتبهين

-فيروز: ما شفت فستاني؟ ليش دست على ذيلي!

-فاضل: عذريني انستي ما انتبهت عليه

-فيروز: اوووف شلون بيه شلون رااح امشيي باعنن ولچن

دارو وجوههم فاضل ونشوان ويانه يباوعون على الواهس ما منتبهين ورجعت تعيط فيروز بيهم..

-فيروز: ولكمممم

-نشوان: اسف اسف هاي شبيك فاضل ما تستحي تباوع لرجلين البنية!!

-فاضل: اني؟؟ اصلاً.. ما.. اصلاً..

-نشوان: باع گام يمسلت الفرخ

-كيان: فاضل شلون تدوس على فستان فيروز خطية

-فاضل: ما دستت ماا دستتت

-فيروز: لعد منو داس ابوية؟ مو انتَ سيد ومتدين شلون تنكر شي سويته!

-فاضل: اي اقصد دست بس ما متعمد ثانيااً منو تلبس فستان بذيل شطوله بمستشفى!!

-فيروز: طلعت اني الغلطانة هسة فاضل!!

تنهد فاضل يمسح وجهه المتعرق من التوتر عزه شگد يخجل منها وحاله ينگلب ويصير واحد ثاني، هز راسه نافي ونزع جاكيته ينطي لفيروز وگال متعذر..

-اعتذر منچ تغطي بالجاكيت علما اطلع اشتريلچ شي تلبسي

-فيروز: هاا؟ لا احم ماكو داعي اني ادبر وضعي

-جنات: بيمن تدبرين وضعج؟؟

-فيروز: شبيچ اللف رجليه بكلينس تنضم عادي

-جنات: حتى تصيرين مومياء وتخرعين العالم!

-فيروز: لعد شسوي

-كيان: روحي للحمام هسة لا يجي احد ويشوفچ

سمعت الكلمة وهرولت للحمام هي وجنات وفاضل ونشوان ما زالوا منطين ظهرهم، من تأكدوا راحت ياله اللتفتو الي يذبون نفس..

-فاضل: شلون موقف يفشل!

-كيان: لا يمعود عادي هي فستانها فعلاً چان طويل ويخط بالگاع

-فاضل: خليني اشتريلها شي من محل قريب

-نشوان: يله اجي وياك

-فاضل: تمام، اعوذ بالله من الخبث والخبائث بس شنو قياس فيروز؟

-نشوان: استتتغفر الله اعوووذ بالله من الشيطان الرجيم المتوسط في يسار صدرك سيد! معقولة تسأل عن قياس بنية!

-فتضل: احم.. اخي للضرورية احكام

متت من الضحك عليهم انطيته قياسها وطلع بسرعة يشتري ونشوان وياه يخبث واسمعه يگول..

-نشوان: برگبتك مية استغفار على هالعملة مو تنسى سيد

-فاضل: ما انسى ما انسى

-نشوان: وتسبح بماي زمزم للطهارة ضروري

-فاضل: نشوان بطل خربطة وامشي بسرعة

غابوا عن انظاري ومستمرين يحچون، بقيت واگفة ما تحركت اقره الاشعارات الاجوني على تلفوني الامتحانات كلش قربت ودا اسخت لازم ادرس زين هذا الدكتور دزلنا مصادر لازم نعتمد عليهن بالامتحان، طلعت من تركيزي بالتلفون صوت صفير اجه من جانبي الايمن..

-كيان: فاهد؟

-فاهد: عيووونه الصفر

-كيان: شتسوي هنا؟ اجيت تشوف شهوبي؟

-فاهد: لا صديقي مريض واجيت ازوره

-تزور صديقك ومتكلف نفسك وتشوف اخوك؟!

-كوري لا تدخلين بهاي الامور

-انتَ مو طبيعي والله!

عفته متنرفزة من كل عقله هذا عايف اخو بهيچ وضع ومستنكف يزوره؟! عجيب هالبني ادم عجيب!!

دخلت للحمام ويه البنات وبقن ينتظرن فاضل يرجع بشي لبسة لفيروز، طبعاً بقت تاكل بنفسها وخجلانة شلون راح يجيبلها لبس وما هدأت الا من گلتلها..

-بالعكس راح يبقى يفكر بالموقف وينقهر اذا ما جابلچ شي فاضل بطبعه هواي يفكر وميحب يزعل احد منه

-فيروز: ما زعلت منه واني هم مادري شبيه نترت بوجهه هيچ

-كيان: عادي حبي تصير

قطعنا كلامنا ويه دخول مسرة تركض للحمام تعبرنا وتدخل لوحدة من التواليتات وبس نسمع صوتها تستفرغ قلقنا عليها ودگينا الباب نتأكد هي بخير لو لا دقايق وطلعت مبتسمة ولا كأن بيها شي راحت تغسل وتعدل شعرها..

-كيان: انتِ زينة مسرة؟

-مسرة: اي

-جنات: شنو صاير وياچ؟

-مسرة: يمكن خربطت بالاكل بطني توجعني شوية

-فيروز: بشرتچ شاحبة

-مسرة: اممم

-كيان: مسرة..؟

تنهدت ترخي اكتافها ، هزت راسها بـ لا وگالت بصوت خافت مترددة..

-بنات

-البنات: ها

-مسرة: دا اتقيء وبطني توجعني والشهرية متأخرة

-كيان بفرحة: انتِ حاااامل!!!

-مسرة: اشششس يمعودة مادري بعدني ما حللت

-جنات: خلينا نروح نحلل يلاا شمنتظرة

-مسرة: بنات اذا طلعت حامل هالشي كارثة

-فيروز: ليش؟

-مسرة: دا اخذ حبوب مانع وما فوتت يوم ودا اخذ علاجي مال السكر وارتفع سكري كم مرة كله هذا خطر على الطفل ويمكن يطلع بي تشوهات

-فيروز: لا حبيبي اسم الله ان شاء الله مابي شي انتِ حللي وشوفي شنو يطلع وياچ يجوز مو حامل

-مسرة: ان شاء الله مو حامل

-كيان: شُهيب كلش راح يفرح اذا طلعتي حامل

-مسرة: وضعنا مو تمام كيان وانتِ تعرفين قصدي

-كيان: بس هذا الطفل راح يقوي علاقتكم ويصير بعين شمسون وكل الي يريد يفرقكم

-مسرة: واذا فرقونا واخذو الطفل مني؟ ما اتحمل انحرم من طفل ثاني كيان! هذا السبب اخذ مانع وحريصة ما اسوي طفل من اخوچ رغم اموت عليه اعشقه وما ابدله بزلم الدنيا بس كلشي بعلاقتنا غلط ومدا تضبط ويانه

-جنات: حقچ بث اني اگول انتو تحبون بعض يمكن هالطفل راح يحل هواي ازمات ومشاكل ويمنع هالطلاق

-مسرة: واذا ما منع الازمات؟ واذا اخذو مني؟ اموت لو اخذو وبعدوا عني اني ميس ودا اموت الف موتة متعرفين شلون بنتي عايشة وشكبر النقص التحس بي واني بعيدة عنها شلون لو صاروا ثنين ابقى بهالحال اني؟ ابقى احارب طول عمري حتى يرجعولي اطفالي؟

-فيروز: والله العظيم حقچ وشنو تگولي اني وياچ بس انتِ دتگولين تاخذين مانع وحريصة وصار الحمل بمعنى ارادة الله اقوى من أي شي لا تمنعين شي راده رب العالمين لان هاي تعتبر نعمة من عنده

-مسرة: رايحة اسوي التحليل واشوف شنو النتيجة بنات لا يطلع هذا الموضوع من بيناتنا لحدما اتأكد تمام؟

-تمام

طلعت من الحمام تمثل وضعها طبيعي بس شنو وجهها يفسر خوفها وقلقها حرفياً صايرة ليمونة من التعب والصفار مبين التفكير هاد حيلها ومتخوفة من النتيجة..

عفت البنات اروح اشوف فاضل ونشوان ما رجعوا لان ميجاوبون التلفون، رجعت لمكان غرفة شُهيب وشفت فاهد واگف بباب الغرفة مالته ويباوع من الشباك الصغير عليه من بعيد..

ابتسمت على منظره صافن بالشباك ماد بس عيونه حتى شُهيب ميشوفه وباقي يراقبه على الصامت، گلبي انترس فراشات يا چذاب گلي اجه يشوف صديقه اثاري هالصديق طلع شُهيب ووگف يشوفه من بعيد يروي عيونه ويطمن گلبه هو بخير..

مرت الدقيقة والدقيقتين والثلاثة والعشرة والربع ساعة وهو واگف ما تحرك ولا انتبه لوجودي، انرسمت ابتسامة حلوة على وجهه اثناء ما يراقب واتوقع سبب هالابتسامة هو ضحكة شُهيب لان ضحكته من غير العادة طلعت عالية ووصلتنا واكيد ميوسة السبب..

-كيان: احم

نز نزة على صوتي وفوراً ابتعد مخطوف لونه وعيونه مبحلقة، ضحكت على شكله چنه مجرم ولگفوا بالجرم المشهود تقربت منه امشي على كيف وهو ضحك بهستيريته المعتادة ويفرك رگبته من وره..

-ها كيان انتِ هنا

-كيان: اممم هنا

-فاهد: اي اجيت اشوف العلوية شو ما تجاوب اتصالاتي

-لانها بغرفة شهوبي

-اي شفتها احم..

-اي؟

-شنو

-شلونه صديقك المريض؟

-زين.. هو زين

-اها

-شنو شبيچ

-شنو اسمه؟ اني اعرفه؟

-لا متعرفي

-هاا

-اي

-اها

-احم

-اممم

-كيان شبيچ

ضحكت فرحانة واحسني طايرة طيور شيصير لو يعترف هو يحب شُهيب ويخاف عليه مثلي وزيادة هم اويلي يا فاهد شيصير لو تنازلت واعترفت بهالشي گدام الكل؟

وگفت مقابيله ومستمرة اضحك وعيوني وگلبي يضحكون، بدون تردد لفيت ايدي حول رگبته صرنا وجه بوجه، عگد حاجبه متفاجئ بس بسرعة فك العگدة وانرسمت ابتسامة مكر على ثغره..

-فهودي

-ها

-تدري انتَ طالع كلش حلو اليوم؟

-كوري

-عيوني

-انتِ شاربة شي؟

ضحكت اكثر من تقرب يشمني حتى يتأكد، هز راسه معترض وگال..

-لا ريحة فراولة بس شبيها البنية شخطت

-صرت شاخطة بس لان گتلك طالع حلو؟

-اي

-تره صدگ طالع حلو شنو مغير بوجهك؟

-مادري

-يمكن اللحية هاي شنو مغير ستايلها؟

-اي

-اممم مسوي ديرتي فيس يجنن عليك

-دخيل العباس

-هااااا شبيك

-كوري لا تخوفيني صايرة مصيبة؟

-لا شبيك فهود

-انتِ حامل؟

-منين احمل صدگ تحچي انتَ!

-لعد شبيچ فهميني

-مابيه شي وخر زعلت منك

-وااااااه؟؟؟

-شسالفففففة

-تتزعل وتدلع وتتمايل وتتغنج المن ولج خاف تردين شي ومستحية تحچين؟

-يا غبي شنو هالتفكير السخيف بس مو صوچك صوچي اني مهتمتلك واريد اغير مودك!

-تعالي لبيتي ويتغير مودي

-اخواني ميقبلون

-خ** على اخوانج خوووش

-ما اسمممحلك تحچي على اخواني ولك مسوودن

-لا تظلين كل حجاية وجبتي سلاباتچ كرهتيني بيهمم

-علساس انتَ متكرههم!!

-امانة الله لا ما اكره نشوان ما ينكره هالعار احبه

-يلا خوش روح لا يجي احد ويشوفنا

-تمام

-فاااهد!!

-ها

-شبيك انتَ!! شسالفتك صدگ راح تروح؟؟

-اي مو گلتيلي روح

-فاهد انتَ مو طبيعي اليوم احچي شصاير وياك؟؟ شو بارد وثگيل ما احب هيچ اني تره

-تمام

نزلت ايدي من رگبته ودفعته من صدره حتى يوخر عني كلش انزعجت من تصرفه شبي مينطي من روحه عبالك اكو شي ثاني بعقله وشاغل فكره..

-روح لصديقك المريض لا تضيع وقتك هنا

-رايح

سوالي باي بأيده وراح صدگ! شعوط گلبي من القهر باوعت لظهرة وهو يبتعد مني واحرگ بروحي صدگ طالع حلو اليوم غير عن كل يوم هو صح كل يوم حلو بس اليوم غير، مغير ستايل لحيته ومزين بشكل مختلف وترچيته الالماس مغيرها بوحدة ثانية وقميصه الاسود ضاب على جسمه طالع يخبل المخبل!

دگيت رجلي بالگاع ودخلت لغرفة شُهيب شفته ملتهي ويه ميس هي تلعب بتلفونه وهو يحچي ويه العلوية وامه دقيقة والباقي ميس تجر وجهه حتى يباوع وياهة بالشاشة..

-ميس: عمو سووهيب واح اخسو باوع ويااي

-شُهيب: باوعت

-ميس: اففف هم خسوت انتَ مو خوس تلعب ابد!

-شُهيب: بس اني ما جاي اللعب

-ميس: لازم تباوع انتَ متحبني وما مستاقلي ووح

ضحكنا كلنا على حركاتها وعقچة وجهها حرفياً نسخة مصغرة من مسرة حتى طنگورتها وشلون تمد شفتها السفلية وتعگد حاجبها تنگرط هالبنية وماگول غير الله يساعد گلب مسرة شلون مفارگتها..

-شُهيب: لا خلص راح اباوع وياچ واللعب هم

-ميس: وبحني عمو

اخذ التلفون منها يلعب بتك ايد الايد الثانية موصولة لرگبته وظل يلعب هواي ومركز باللعبة وهي فرحاانة وتضححك من كل گلبها لان ديربح تصفگ ومتحمسة وتغني..

-هلاا عمو هلاا.. عفيية عموو عفيية.. ووح عمووو ووح

-ماريا: مييس شوفي ابني شهوبي شوفي راح يربحلچ اللعبة هو بطل وقوي بكلشيي

-ميس: اي اي عمو وبحني اويد اوگص

-ماريا: تعرفين ترگصين؟؟

-ميس: اي شوفي

وگفت على الچرباية مال شُهيب تهز ويه موسيقى اللعبة متنا من الضحك عليها العلوية حاطة ايدها على حلگها وتهمس "ياا يااا هالعايصة النايصة"..

-ماريا: ههههه حلو رگصچ ميوسة

-العلوية: خوب انتِ كيفتي يالمطربگة

-ماريا: علوية احب ارگص

-العلوية: عبنچ صايعة

رجعت ميس تگعد تشوف شُهيب شلون يلعب وتشجع بي وتغنيله، تحمست العلوية وياهن وشُهيب مستمر يلعب، شتت تركيزه باللعبة دخول مسرة للغرفة گعدت على كرسي وما حچت شي طول الگعدة انطى شُهيب التلفون لـ ميس تلعب بي بعدما خسر لان اللعبة subway surfer مابيها نهاية ويظل مستمر بيها بس تعب..

-مسرة: ميوسة شوية عن عمو خلي يرتاح تعالي گعدي يمي

-ميس: لا ماما مو هو مستاقلي

-مسرة: اي حبيبتي بس لازم ينام ويرتاح

-ميس: عمو سووهيب انتَ تويدني ادوم؟

-شُهيب: لا بس اذا ماما تريدچ تگومين لازم تسمعين كلامها

-ميس: اوكي

طفرت توگف من السرير تلبس حذائها وراحت لامها تگعد بحضنها وبيدها تلفون شُهيب اخذته مسرة من ايدها وهمستلها شي بأذنها.. فوراً ميس گامت ورجعتله التلفون تگول ببراءة الاطفال..

-ماما تدول عيب اللعب هواي ولازم تاهذ التلفون

-شُهيب: شكراً ميس

-ميس: عفواً بس عادي اللعب بعد؟

-مسرة: ميوسة

-ميس: صح صح عيب لازم تاهذه

رجعت مثل الحبابة تگعد بحضن امها وتگعد عاقلة، ميس ناعمة بشكل لا يصدق الي يشوفها مستحيل يگول راح تصير خمس سنوات شكلها وحجمها يوحي لطفلة متتعدة الثلاث سنوات وهاي النعومة واضح ماخذتها من امها..

-العلوية: خايبة موش بت عندج طير ذهب هاي

-مسرة: شكراً حبيبتي بيبي

-العلوية: مؤدبة وحبابة وتسمع الچلمة لوما الرگص خوش تربية مربيتها حبوبا عاشت ايدچ

ابتسمت مسرة بدون لا تعلق بس شكلها مو طبيعي وشُهيب عيونه ما نزلت منها مبين گاعد على نار يريدنا نطلع حتى يختلون وحدهم ويسألها شبيها..

شوية و طلعن العلوية وماريا يرجعن للبيت فوراً مسرة وگفت تطلع وياهن تودعهن بالباب وبنفس اللحظة اجن جولي وصبا وشهلاء ووئام يزورن شُهيب..

شفت الجزع بعيونه هواي اجته زيارات اليوم والدكتور حذرنا منخلي يتعب بس هو ميقبل وديستقبل الكل.. دخلن البنات عليه واشوف جولي الدموع عشرة عشرة كلنا بقينا صافنات عليها، تشهگ وتحچي بغصة حقيقية مو مال وحدة تمثل..

-جولي: شسويت.. شسويت بينا شُهيب گلوبنا وگفت عليك

-شُهيب: اني بخير جولي

-جولي: والله العظيم احس روحي راحت ويه الخبر مسرة چانت منهارة والكل منهار محد يگدر يواسي احد كللش تأذيناا كلش

-شهلاء: والله العظيم صح استاذ شنو اني غير تخربطت والله العظيم رجليه تگرمعت من الوگفة وماگدر اگعد احس الكرسي حاار يچويني اريد بس خبر عنك انتَ بخير

-وئام: مسيو والله انتَ نور الشركة صار يومين ضايعين بدونك

صافنة عليهن فاكة حلگي ذني صدگ يحچن؟ شنو هالجرأة يحچن هيچ گدام مرته! بس مسرة كلمة ما حچت بس وجهها صار دممم من الغيرة، صبا حست عليها وگالت فوراً..

-صبا: اي اي حبيباتي كلنا خفنا عليه وهسة خلي يرتاح المسيو اكيد تعبان وجهه اصفر عمت عيني كله من وره مروان اكيد ضوجك اليوم مو؟ اي ادري بي اكيد هو يله بنات خلونا نطلع

-جولي: صبا خلينا شوية گاعدات ما شفنه منه شي

-صبا: يله جوليا يله يا روحي

-جولي: دقايق صباوي شنو السالفة

زفرت صبا متنرفزة وتباوع لمسرة الصارت طماطاية وطلعت من الغرفة، اندارتلي صبا ونترت بهمس بيني وبينها..

-صبا: اخووچ وينن؟؟

-كيان: مروان؟

-صبا: منو غيره يعني

-شبيچ معصبة؟ ماعرف وينه اتوقع طلع من زمان

-اني اعمله هالسر.... هالسرسور

-كيان: شبيكم

-ميحچي وياي مزاعلنيي لچ صارلنه ثلاث ايام منتحاچى حتى ميقبل يشتغل ويايه قافل باب المكتب مالته المزعج!!

-كيان: شنو صاير بالضبط؟ مسوية شي غلط؟

-هسة لازم اروح لمسرة قبل لا تفجر المستشفى وتدچچ العالم من غيرتها بس خليني اسولفلج بسرعة.. باعي اجه صديقي القديم من ايام الجامعة هنا صارله اسبوع زارني بالشركة وعرض علينا نطلع اني وياه وصديقاتنا واصدقائنا الباقين گلت لمروان ورحت بس هو افتهم اكو شباب ويانه غير گلب الدنيا عليَّ والقران شگ قميصه من العصبية!

-شگ قميصه؟؟؟

-والله العظيم ايي شگه هيچ لزم ياخته وشگ القميص وصار يرعد رعدد لچ اني صباا ام لسان الصلفة ظليت اتراجف منه وگفت على جهة مثل الارنب لا اخذ ولا انطي

-ياا ولا ادري صاير هالشي بيناتكم

-ومن يومها هو صايرلچ بارود وميتحچى يگلي اني هالسوالف متمشي وياي ومتصرف مثلما اني احترمج وماعندي صديقات انتِ هم لازم تحترميني وتبادليني هالشي

-حقه تره

-اوكي حقه ميخالف بس اني بلغته طالعة ويه زملائي ليش ما گلي ممنوع؟

-خلص هسة عرفتي تفاهمي وياه على كيفج واتفقوا على قوانين معينة بعلاقتكم حتى متسوء الامور

-هو هم هيج يله طالعة لمسرة اني، بنااات يله كاافي خلي الرجال يرتاح!!

گامن وياهة يطلعن واني بقيت ويه شُهيب غمض عيونه يريحهن يريد ينام وميوسة نعست ونامت على الكرسي، انقهرت عليها وشلتها امددها على الكرسي الچبير واغطيها بجاكيتي وسمعت صوت مسرة العصبي جاي من بره الغرفة بس مبين واگفة على بُعد مسافة بس شگدما عالي واصللنا هنا تحچي ويه صبا وتگول..

-مسرة: راح اشگ حلوووگهن اذا عادن هالحركات صبااا علميهن ووصليلهن هالكلام لان لو اني حچيت اموتهنن والله اطيح حظهنن وراح تسوء المواضيع من يوصل الكلام لابوية!

-صبا: اي حبي اي صوتج عالي لا يسمعون جوه

-مسرة: شفته من الشباك نام! قسماً بالله اني طلعت بس حتى ما اسوي مشكلة جوه تره طفحح كيليي مو حالة هااي ماكو غيره يعجبهن ويبچن عليه ويتماوعن؟؟

-حقج حقج

-الففف رجال اكو اللفف ما حطن عينهن الا على حبيبي اني؟؟ لج راح اتخخبل شفتيهن شلون يتنعوصن و يبچن عليه عبالك ابوهن لو زوجهن!! ولج هذااا مالتييي املخهااا التتقرب اموتهاا!!

درت وجهي لـ شُهيب اشوفه گاعد لو نايم لگيته مغمض عيونه ورايح بسابع حلم، بقيت گاعدة اسمعلهن مسرة صايرة نار حتى صوتها يرجف من الغيرة الله يساعدها ما اللومها صدگ جولي وشهلاء ووئام تصرفهن چان اوڤر..

-صبا: اهدأي مسرة لا يصير بيج شي

-مسرة: گلبي راح يوگف صبا وانتِ تگولين اهدي؟؟ راح اموت والله راح اموووت جاي اتگطع من جوه خليي يرحمني ويحسس بيه خلي يعررف اني اغاار عليه وامووت واحترگ اذا وحدة باوعتله!

لا ارادي باوعت لـ شُهيب الي "على اساس نايم" وشفت طيف ابتسامة ينرسم على وجهه، ابتسمت وياه على الواهس ايا حيال گاعد ويسمعلها ومكيف على الوضعية..

-صبا: يا حبيبتي شنو تردين تضمي بقوطية؟ تره هو رجل اعمال وهذا شغله وشي طبيعي النساء تكون حواليه

-ايي اضمه! اي لا تباعيلي هييچ اضممه بجيبي همم! اني ميهمني اذا اشتغل ويه نسوان هذا شغله ونجاحه ما احرمه وحقه هذا بس خليهن يحترمن نفسهن وياه وميتماوعن ويذبن ارواحهن عليه! يعني لبسته حلقة وبعدهن ممستوعبات هو متزوج؟؟ شلبسه بعد حجاب وبوشية؟؟

-كافي مسرة شبيچ هرموناتج گابة صار كم يوم تتعاركين ويه الهوا

-لا تعصبينيي زايد سكتي صبا گلبي راح ينفجرر

-تمام حبي لا تكتلين روحج بهاي الغيرة خيولن اني اطيحلچ حظهن باجر

-لا اني احچي وياهن وشيصير خلي يصيير

-سكتي ابوچ لا يسببلكم مشاكل حرگ التلفون عليَّ من البارحة لليوم يكول مسرة ليش متجاوب اتصالاتي

هدأت اصواتهن گامت توصللنا بس بسبسات ما افتهمت شصار بباقي المحادثة، وصلني اشعار على تلفوني من رقم غريب كاتب..

"خمس دقايق اللگاچ بره"

وگف گلبي والف فكرة اجت براسي، وگفت بمكاني لا اخذ ولا انطي ماعرف منو هذا وشيردون مني بس منو ممكن يكون غير سلطعون!

ثواني ودزلي رسالة ثانية مكتوب بيها..

"اربع دقايق بقت"

رجعت تلفوني لجيب البنطرون وطلعت بسرعة من الغرفة اهرول، عبرت مسرة وصبا وشفت فاضل ونشوان راجعين وبيد فاضل كيس ورقي مشتري لفيروز فستان جديد وچلب بيه الا اكون وياه من ينطيها..

-سيد ماعندي وقت صديقتي واگفتلي بره حباب انتَ بس صيحلها من باب الحمام هي تطلعلك

-فاضل: لا كيان عيب من البنية ما يصلح اصيحلها من الباب انتِ فتاة واخذي الها

زفرت نفس قوي حايرة شلون بيه، اخذت الكيس منه وركضت للحمامات وهو ورايه يمشي فوراً انطيتها الفستان تشكرت منه واني عفتهم وطلعت من المستشفى اركض وعيني على الساعة..

مشيت مشيت مشيت ماكو احد شوية ووصلني موقع لوكيشن بالكراج مال المستشفى، رحتله وگلبي ينبض بعنف ورهبة.. تمشيت على كيفي الگراج يصفر مابي ناس بس السيارات مصفوفة هنا صرت ادور على الموقع، دقيقة ورسالة جديدة نورت تلفوني..

"سيارة سودة مارسيدس"

خرب حظي خرب عيشتي على هالقرف الدا اعيشه، مشيت متوترة اطگطگ بأصابعي الى ان وصلت لسيارة مارسيدس سودة مظللة، شفتهم يأشرولي بالاضوية حتى ادخل وصلت للباب الخلفي روحي رايحة واعصابي تايخة فتحتها على كيفي مغمضة عيوني ماعرف شنو منتظرني وشنو المهمة الجديدة يارب استر عليَّ..

فتحت عيوني متفاجئة من وصلني من داخل السيارة صوت اغنية رومانسية وعطر السيارة عبارة عن عطري الخاص وبوكيه ورد شكبره لونه وردي بالكشنات الوره، مديت راسي اشوف منو وچان اللگاه..

-فاهد؟؟؟

-فاهد: هلو كوريتي

-شتسوي هنا وشنو هالحال؟؟

-صعدي

-شصاير

-صعدي وتفهمين

ركبت بكرسي الصدر السيارة دافية والاجواء تخدر من اللطافة والرومانسية، درتله وجهي افتهم وگلبي بعده يطربگ من الخوف..

-فاهد: عيد حب سعيد

-عيد الحب؟

-اي

-بس اليوم مو عيد الحب

-ادري بس عجبني اسوي عيد الحب

-صدگ تحچي؟

-اي

-ههههه هههههههه فاهد ما توقعت هالشي ههههههه

-شو تضحكين

-لان مصدومة والله كلش مصدومة انتَ چنت بارد ويايه وحسيتك زعلان ما توقعت محضرلي هيچ مفاجأة

-اني بس تعبان هالفترة كوري

-من شنو

-عندي ظروف

-متشاركني؟

-لا

-ظروف مرتبطة بيها؟

سألت بهمس مترددة "بيها" اقصد سارة، هز راسه بـ لا وگال نافي..

-شي مرتبط بشغلي

-خوفتني فاهد

-لا تخافين خلينا سوه اليوم تمام؟

-فاهد گتلك احتاج مساحة

-ادري مو هذا قصدي يعني نبقى ويه بعض بدون اشياء ثانوية مجرد نعيش يوم طبيعي سوه شلون ما تحبين

-وشُهيب؟

-تگدرين تزوري شوكت ما تردين خلال هاليوم

-تمام

هز راسه بـ اي وقرب نفسه مني يقبلني بهدوء ويمسح على شعري من وره، ابتسمت من وخر مني وساق السيارة بهدوء اكبر عكس كل مرة حط البوكيه بحضني ورفع ايدي يبوسها خجلت وخدودي ولعت من غمزلي وضربني بخفة بأصابع ايده على خدودي..

-خدود سنجاب

ضحكت وكمشت بأيده الطريق كله فرحانة وسعيدة، ساق بينا لمكان بعيد عن المدينة خفت بس ما حچيت شي اني اثق بي واعرفه ميأذيني، سفط امام بيت صغير ململم صاير بين مجموعة بيوت، نزلت بيدي بوكيه الورد وهو نزل ويايه تمشيت ادخل للبيت وعطت مخترعة من حط ايد جوه ظهري وايد جوه رجليه يرفعني من الگاع يشيلني ويبوس خدي..

-خرعتني

-ابقي مخترعة

-شنو قصدك؟

-ابقي خافي مني وعليَّ

-فاهد مدا افهم عليك

-ياريت اني افهم على روحي كيان

مسحت على وجهه بأيدي باس بطن ايدي من جوه ودخلني للبيت وطبگ الباب برجله، نزلني يخليني اتمشى ادخل الصالة وگال شوية ويلحگني بس هالشوية طولت ورحت اشوفه وين، افتريت بالبيت ورحت للمطبخ لگيته هناك واگف منطيني ظهره وبيده ابرة يحط بيها مادة سائلة ويتأكد من نسبتها، عيوني طلعت من محجرها وصرت ارجف بمكاني رجليه جمدت وحيلي باد شنو ديصير هنا؟؟؟.......

يتبع.....

━━━━━━  ━━━━━━

البارتات الجاية شوية صعبة... 🥲

فاهد وكيااان 💀؟؟؟؟؟

مالك وجنات ما ظهروا ليييش يا ترى؟؟؟

شُهيب ومسرة الحبايب المتعذبين 🥹♥️

توقعاتكمممم 💀🩷🩷🩷🩷

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

يگول..

مرات العزيز حچايته تأذيك

قصد لو مو قصد بس تنحسب لچمة.. 🍃

━━━━━━  ━━━━━━

"كيان"

افتريت بالبيت شوية ورحت للمطبخ لگيت فاهد هناك واگف منطيني ظهره وبيده ابرة يحط بيها مادة سائلة ويتأكد من نسبتها، عيوني طلعت من محجرها وصرت ارجف بمكاني رجليه جمدت وحيلي باد شنو ديصير هنا؟؟

-فاهد؟

اللتفتلي بسرعة يباوعلي بملامح جامدة، تسائلت بنظراتي عن الديسوي وبدون لا ينطيني جواب دچ الابرة بـ زنده يفرغ المحلول بجسمه..

-فاااهد شدتسوووي

ركضت عليه اجر من ايده الابرة ما قبل يطلعها، انكسرت سلاية الابرة بـ زنده وما مهتم صرت اعيط مفرفحة..

-ولللك مخبببل شدتسووي بنفسسك فاااهد انكسرت الابرة بيدددك لا يصير بيك شيي

-مابيه شي

جر الابرة المكسورة يطلعها وشمرها على جهة، وگفت مذهولة ما مفتهمة شي، سحبني من متني يمشيني ويدخلني الصالة گعدني على القنفة وگعد بصفي وغمض عيونه ورفع راسه فوگ..

-شنو سويت؟ وهاي الابرة مال شنو!

بقى على وضعه هادئ، هزيت جسمه احركه بس ولا كأني موجودة قلقت وگمت دا اعوفه واروح وعصر معصم ايدي يرجعني بمكاني وبلحظة سريعة گلبني على القنفة وصار فوگاية..

جحظت عيوني مرعوبة من وجهه التغير والدمارات طگگت بجيبنه وعيونه صايرات حمر، همست بخوف..

-فاهد

-ليش تتهربين كلما اريد اتقربلج؟

فاجأني بسؤاله الشمره بوجهي دا اجاوب وعصرني من فچي ونتر بعصبية مكتومة..

-لا تجاوبيين سكتيي

-فاهد شبييك

نهض نفسه مني وجرني يوگفني غصب شگ قميصي على جسمي شهگت خايفة ودفعته من صدره ما اهتم لخوفي وقيد ايدي بأيد وحدة والايد الثاني يكمل بتمزيق قميصي..

-فااااهد تخبلتتتت هدددنييي ولللك فاااااهد انتَ مو صاااحي

-سكتييييييي لا تحچين كياااان سكتيييي

دفعني على الحايط دگات گلبي صعدت لبلعومي من الخوف والهبطة حتى صوت ماعندي اعيط، لميت نفسي اضم راسي انزله من حسيته يريد يضربني وعصرت عيوني حييل خايفة..

بنفس اللحظة السويت بيها هاي الحركة هدني ينترني من بين ايده يدفعني للجهة الثانية ويروح لنهاية الصالة يمسح على وجهه بقوة، ركضت اوگف بزاوية الصالة اتابعه بعيوني وارجف ماعرف شسوي ووين انطي وجهي شلون راح اهرب منا مستحيل يعوفني وهو بهالحال!

-فاهد: غبييييي غبيييي اني غبيييييييي

شال المزهرية الضخمة المحطوطة بجانب ميز الطعام وشمرها على الحايط تفلشت، نزيت ميتة رعب من شال الكراسي مال ميز واحد وره الثاني ويرگهم بالحايط وبمحجر الدرج كسرهن تكسسر واندار للميز هم شاله من عصبيته والقوة المضاعفة الاجتله گدر يرفعه ويشمره على الجهة الثانية انضرب بالبلازما والتخم..

-فاهد..

-لااااا تگولين اسميييي لا تحچيييييييين

سكتت اداري روحي واحافظ عليها من عصبيته الهمجية لا يكتلني هنا، ماعرف شديگول وشنو يدردم بينه وبين روحه حركاته سريعة جداً مو طبيعية.. يروح ويجي يروح ويجي بالصالة ويضرب على راسة حييل گلبي وگف وانتهيت عطت بصياح من رگع راسه بالحايط خلف صوته طگة قوية..

-لااا فاااهد لا تسوي هيچ بروحك لا يصيرلك شيي

ركضتله اللزم بأيده اوگفه عن تعنيف نفسه شمر ايدي ميقبل اللزمه ويعصر بعيونه ويحرك راسه معترض "لا"..

-هدينييي ولللللللللچ

-ماا اهدددك تريد تموووت انتَ!!!

-اصووووات برااااااسي اصوووووات راح امووووووت

عاصر راسه بين ايده وينتفض تعال وارگع راسك مرة ثانية وثالثة ورابعة وبكل مرة يخلف صوت اعلى من القبله، انتهيت بهاللحظات ماعرف شلون اگدر اسيطر على هذا الكاسر الهائج، جازفت بروحي وچيتت عليه احضنه بس خلي يهدأ ما قبل حتى بحضني ما قبل دفعني عنه يضرب على راسه ورگبته من وره ويخنگ بروحه..

-فااهد حبيبي فااهد ركز ويايه حبااب بداعتي وگف راح تكتل نفسسك

-لااا تچذبيين لااا تچذبيييين لا تتتتتچذبييييين

ظل يصيح لا تچذبين ويعنف بنفسه اكثر واكثر تهسترت شنو بيدي اسوي..

-فاهد شسوي بس گول شنو تريدني اسووي وتوگف!!

اللتفتلي عيونه عبارة عن فصوص جمر مينشاف بيهن لون غير الاحمر القاتم، تقرب مني خازرني يتقدم خطوة وارجع خطوة يتقدم وارجع الى ان سفطني على الحايط من جديد ونتر وهو يثبت ايده على الحايط حاصرني بينهن..

-گلتيلي حبيبي فاهد؟

-اي

-حبيبچ؟

-اي اي

-ليش تچذبين عليَّ؟ طفل اني گدامچ؟؟

-لا والله لا

-صرت حبيبج هسة وانتِ تتغزلين بأخوووية وميتة علييييه!!!

جفلت جاحظة عيوني أنبلعت الحروف بداخل فمي صرت لا اخذ ولا انطي وگلبي ما اسولف بدگات گلبي احسه راح يطفر من صدري ويفضحني..

-ما تحچيييين؟؟ تتغزلين بمالك وهسة تگوليين حبيبي!!! كم حبيب عندج كيااااان

ضرب الحايط الي بجانبي ما طلع حسي، حركت راسي يائسة ماعندي حتى تبرير كل الكلام نسيته رجعت مثل الطفل الميعرف يحچي..

-احبه واموت عليه واتمنى اني بحضنه؟؟؟ ولللج حچييي يكسررر الوووجه يكككسر الظهههر يكسر راااس وخشممم اكبر واااحد شنوو ديووووث اني گداااامچ!!!

غمضت عيوني من صراخه انبلع وجهي من الخوف متمنية اطم روحي من الخجل والفضيحة، الكلب شمسون هددني اليوم بالمستشفى من همس بأذني وگالها! گالها راح افضحچ واحرگ ورقتچ بس ما صدگته گلت يمكن بس تهديد عادي بس سواهاا وحرگ مو بس ورقتي گدام فاهد حرگني كلني!!

-اني شنو كيان؟ شنو بالنسبة الچ

هدأ صوته واخيراً گدرت افتح عيوني مال حاضر دموعي بدت تنزل من صارت عيني بعيونه المخبوطة بدم، حرك ايده قريب وجهي حسيته راح يضربني ورجعت اضم نفسي وراسي بين ايدي خايفة.. ابتعد مني فوراً وگف بعيد وضحك بصوت عالي كللش ضحكة زادت خوفي خوف، يضحك و يصفگ ايد بأيد ويگول..

-عبالها اضربها الغبية عبالها راح اأذيها

-فاهد..

طلع اسمه من فمي بصعوبة، سكت ينتظرني احچي ومركز بيه بكل حواسه منتظرني اكمل توقعته راح يقاطعني بس ما سواها، بلعت ريگ واستجمعت قوتي وگلت..

-فاهد اني اسفة بس...

-بس شنو؟؟ واسفة على شنوو؟؟؟ على استغفالي؟؟ على الضحك عليَّ؟؟

-لاا مو هيج لاا

-مااا جااااي اتخيل المووضوع كياااااان تزوجنا اححنه وياه بنفس اليووم!! طلعناا وطبيناا ونمنا وسافررناا سوه وبنفسسس الاماكننن ولج حطيتي راسج وياي على نفسسس المخدددة!! نمتييي هنااا على صدررري هناااااا...

يضرب على مكان صدره حييل خسفه خسف وكمل بعصبية مضاعفة..

-تنامين على صدررري وتفكرين بأخوية؟؟؟ تفكررين بأخووية النايم بالغرفة البصفنااا؟؟؟

-قددديم هذا الكلام كله قددديم وصارله فترة طويلة واصلااً من حچيت هذا الكلام چنت ما واعيية مخدرينيي شوفنيي شووف چنت ادخنن ووضعي مو تماام والوصلك الحچي يريد يأذيني ويتبلى عليَّ

-لااا تچذبييين ولا تخلينيي اتجاااوز وياااچ كلشيي وصلنيي وبالدلييل بصووتچ وصوررتچ! واني من زماااااان ملاحظ من زماااان منتبه على نظرااتچ اله وچنت ابررلچ بعقليي المطططي اگول عاادي فاهد كل النسوان تباوع لمالك بنفففس الطرريقة هو حلوو ومرتب ولساانه معسول وكلهنن ينعحبن بي بسسس مال تحبي وراسمة قصة خيالية براسچ وياااه قصة منحرررفة تفشششل لهنا وبسس!!!

-انتَ ما....

-لچ شلووون هلچ تحچين وياي وتحطين عينج بعينيي وتعيشين وياي وانتِ تحبين أخوية؟؟ شلون تقبلتييي شنو چان احساااسچ بيوم عرررسه!!!

-تدمررررت

نطقتها بجرأة وصراحة بما ان انفضحت خليني اكمل كللشي واعترف وشيصير خلي يصير لاني مليت!

-اي تدمرت فاهد! تدمررت وعشت بتعااسة گلبي چان ينززف وماكو بيدي شي غير انسى!! انساه واتخطى حب مستحيل يكمل بيوم لانه حب مراهقة!

مسحت دموعي وكملت بغصة وجعت گلبي واني اتذكر حالي قبل..

-قويت علاقتي بزوجته وصادقتها چنت اتعمد اسمعلها وهي تحچي عنه وتحچي عن تطور علاقتهم چنت اموووت الف موتة گلبيي يوجعنيي واحسه راح يوگف من القهر والغيرة بس چنت اجبر روحي اسمعلها حتى اتخطاه اسرع واللتفت لحياتي الضيعتها

يسمعني وساكت ما قاطعني ابد بس روحه تفور وجاي اشوف الجدحة العصبية بعيونه وقوته وهو راص على اسنانه يتمالك نفسه..

-بس كل هذا انتهى ومات بگلبي! وراس اخواني صرت اشوف مالك وما احس بأي شي تجاهه! جنات صارتلي اخت مو بس صديقة احبها من كل گلبي واتمنالها السعادة الابدية ويه اخوك والسبب كله انتَ.. انتَ الخليتني اتغير و...

-اشششششششش لا تكملين سكتي..

-فاهد خليني..

-لااا تحچييين كيان سكتييي ما اتحمل اسمعچ اكثثثرر اني على بُعد شعرررة وافصل راااسچ من جسمممچ وادفنج بالحدديقققة البررة بطلييي چذب بطلللييي

-ما مچذبة بشي كل هالشي صار

-صار! اي انتِ گلتيها صااار وتطوور وتعمق لدرجة انيي السربووت ال**** الطايح الحظظ خجلاان من روحيي ومتقزز اتخيييل شنو صار وراهة!!

-شنو قصدك

-اكثر انساانة تغاضيت وياهة بحياتي كلللها هي انتِ اكثر بشرر ما دورت وراهة حتى بعدما ابوية زوجناا لبعضض گلت مااضيها الهاا وما يهمني بشيي كله كم يووم ونتطلگ واخللص من هالورطة ما ببالي نتطورر ونبقى سوه وتلعبين بذيلچ وره ظههري وتستغفليني!!

-انتَ ليش تحاسبني على ماضي؟؟ مو حبيت سارة وكتلت نفسك عليها؟؟ حلال عليك وحرام عليَّ؟؟

-مااا چذبت عليچ بخصوصهاا وگتلج اني اححب وشاركتچ وحچيتلج عنهاا وحتى من رحتلها للمغرررب وردت اخذهاا اتصلت بيج قبل لا اتصرف أي تصرف!! لا تقارنين روحچ بيه اني صررريح وما اضمضم سوالفي واللعب على الناس!!

-صحيح صارحتني بحبك لسارة بس انتَ دتناقض نفسك!! گلت ماضييّ يبقى الي متهتم بي ليش هسة تحاسبني عليه

-ماضيچ؟؟؟ انييي اعلمچ ام ماااضي

طلع تلفونه من جيبه يرجف رجف من الغضب ميسيطر على نفسه ويگدر يفتح التلفون عدل، مديت ايدي اخذ تلفونه خزرني بسرعة وخرت ايدي عنه..

حط الموبايل بوجهي فاتحه على فيديو، فتح الفيديو ويا ريته ما فتحه، يا ريتني ميتة ولا سامعته يا ريتني ساكتة وبالعة لساني ولا ملاسنته ومعترفتله بحبي لمالك لوصت لووص وانتهيت اني!!

-فاهد: هاا شو راح صوتچ ام ماضي؟؟

فص عيني جمد ويه صوتي الطالع من الفيديو واني اعترف بلساني حامل من مالك واجيت اسقط الطفل بعملية! بآخر مهمة الي الساعدتني بيها مسرة مصوريني واني واگفة امثل الثقة وبلسااني اگول "مالك حبيبي ودينتظرني بره"!! بلساني دا اعترف اني حااامل منه!!!

-كيان: مو صحيح هذا الكلام

-هم تبلي مو؟؟ تبلي هذاا اي اي هو تبلي اكيييد تبليي وانتِ واگفة بطووولچ وعينج الصلفففة بعينه وتحچين بلساانچ بدون خوووف بدووون مستتتتحىىىىىىى

شمر الموبايل البيده بالحايط هشمه، راح للقنفات يشيل ويشمر بيهن ويضرب بكلشي يصير بوجهه.. يضرب بالحايط وبمحجر الدرج وبالبلازما احترگت وانضربت شاشتها وبالشبابيك وبكللشي حرفياً!!

-فاهد: حققققيرة نذذذلة وصخخخة ***** انتِ ويااااه تستغفلوونييي وتضحكوووون علييييَّ!!!

-فاهد اهدأ راح اشرحلك كلللشي

-تشرحيلي شنووو؟؟؟ تشرحيلي شلون **** ويه اخوية؟؟؟

-لااااا لاااا والله لاا

صرخت مرتعبة من شمر على الحايط الي بجانبي گلاص فارغ موجود على الطاولة، بچيت بصوت عالي مكسورة ماعرف شنو احچي وشلون ابرر موقفي شلون راح اقنعه منو يگول يصدگني! حتى لو حچيتله عن شمسون وشنو يطلب مني منو يگول شمسون ما راح يلوفها عليَّ ويوگعني بمصيبة اكبر وينهيني وينهي اخواني!

-فاهد: كررهت اخوية بسببچ كرررهت اخوية الرباااني!! وحق هو الله يا كيااان وراااس مالك الماعندي اعزز منه وكسرنييي اشرررب من دمممه قبل دممممچ اني اعلممچ رااجعلچ!!!

طلع من الصالة متوجه لباب البيت خطواته سريعة وروحه طافرة، ركضت وراه وسديت باب البيت اول ما فتحها ووگفت اخليها بظهري وفاهد گبالي..

-وخرررري لا تستعجلييين على مووتچ

-موتني اول

فتح عيونه مصدوم مصعوق مذهول! وجهه الاحمر انطعن لالوان اخرى وهنا عرفت اني مو بس چفصت اني نططت شكو شيطان بصدره..

-ترديني اكتلچ قبله؟؟؟ كل هذااا وتگولين حب قدييم وراااح!!!

-مو هذا السببب اني علموودك مااريدك تروح لاخووك وتتخارب وياه بسببيي

-اتخارررب وانعععل والديييه اليضحك عليَّ وخرررري

ماتحملت زايد تعبت من هالحمل الثگيل ماعندي طاقة اتحمل هاي الاتهامات كلها، لزمته من ياخته اجر وجهه اخلي لزگ بوجهي وهمست بغصة وعيوني تجري..

-هسة لو احلفلك بروح شكو عزيز على گلبي واگلك ماكو شي بيني وبين اخوك هم ما راح تصدگني وحقك اني ما زعلانة منك ولا راح ازعل كللشي تفكر بي هسة وبهاي الدقيقة حقك بس فاهد راح اسويها واحلف بروح امي وابوية وراس اخواني وغلاوتك عندي ماكو شي بيني وبين مالك.. لا تخرب علاقتك بأخوك وتتهمه اتهامات باطلة مالك اصلاً ميعرف اني گلت هيچ ولا يعرف اني رحت لذاك المكان ولا چان موجود بره ينتظرني اني چذبت وچذبتي چبيرة وبيها دم بس چذبت لاني مضطررة! افهمني مضطرررة!

-مضطرة ليييش؟؟؟

-مضطرة لان تهددت بحياتي وحياة اخوانني ابووك جاي يهددني فاااهد ويبتزنيي

تغيرت ملامحه العصبية وصابه ذهول، هدأت نظرات عيونه الشرسة وعگدة حاجبه انفتحت..

-اني مهددة من ابوك واذا ما مشيت شغله وسويت الي يأمرني بي يكتل اخواني، مرتين وجه قناص على نشوان في سبيل اتحرك وما اعارض كلامه اني تعبانة فاهد ومكسورة عندي ثلاث اخوان يهدون جبال لو صارن بطريقي بس احسني وحيدة لا تزيد همي هم وتكسر گلبي

-انتِ تحچين صدگ لو تضحكين عليَّ؟

-صدگ ورب الكعبة وروح تأكد بنفسك تلفوني مراقب من ابوك وكل مكالماتي ورسائلي تطلع عنده ويجوز حتى حچيي هذا هسة يوصله صار اشهر اني على هذا الوضع انجبر على شغلات كسرت كبريائي وجرحت كرامتي ونزلت راس اهلي بس اقسملك يا فاهد واحلفلك كلشي گلته بهذا الفيديو چذب اضطريت اگول هالكلام حتى يخافون من مالك ويعوفوني بدون لا يعتدون عليَّ ويغتصبوني

نزل ايدي من على ياخته على كيف سارح وفاقد عقله كأنما فصل مو ويايه ظل صافن وحاير وگف بنص الممر منزل راسه وايده على راسه يعصر جبينه..

-هذا تلفوني شوفه وتأكد من رسائل ابوك وتهديداته يومية دازني لمكان ويبتز واني بالعة موس وساكتة بلسانه اعترف زوجنا لبعض حتى يكمل شغله براسي وانسيك سارة وتلتهي ويايه و...

-سكتي كافي

حچاهة بتنهيدة عالية وايده على راسه محتار، نزلت دموعي تچوي خدودي وكملت ممهتمة..

-شمسون تلاعب بيه وبشرف اخواني بدون لا يدرون كل يوم اني اموت الف موتة حتى نومي ما ارتاح بي اخاف يدزلي رسالة تهديد جديدة ولازم اكمله الشغل كل يوم اني مذبوحة بفراشي واگعد الصبح افكر بالمهمة الجاية شوكت ووين وشنو راح اعيش ماعرف هذا سبب زواجي الاصلي منك لو هم ضحك عليَّ...

اخترعت من ضرب الحايط الي بصفه بعصبية وعاط محترگ دمه..

-لاااا هذا موو سبب زواجنااا!! سبب زواجنااا لان ابوية اكتشفچ تتعاونين ويه اعداائنا ومطلعة اسراررنا!!

-شنو؟؟

-مطلعة اسراار مالك يم وحدة اسمها مرووة!! ومروة ناقلة الكلام لـ ثامر وثامر ناقله للاكبر منه والاكبر منه ناقله للاكبر وهييييچ دارت الدائرة لحدمااا وصل الخبر لابوية ومن بحثنا وره الموضوع وصللنا الحچي طلعع من وحدة اسمها كياان تدرس هندسة مدني!!

صفنت فاقدة عقلي مروة ويا كسرة مروة ويا خباثة ولعب مروة چنت احچيلها كلشي اشوفه واسمعه من اخواني بدون لا احسب حساب طلعت هي السبب بتعاستي ودمار حياتي..

-فاهد: تدريين مالك بكمم ورطة واگع لو ما تدرين؟؟؟ تدرين شگد عقووود وسنداات ابوية موقعه عليهن بسبب هذا الموضوع!! عباله مالك الخااين وهو البايع اسرارنا يعني فوگ كره ابوية اله كرهه اضعاااف مضاعفة!! مالك من مصيبة لمصيبببة بسبب تهورچ كيااان!!

-فاهد مدا افهم عليك شنو الموضوع الخطر الحاچيته لمروة لدرجة يعتبر سر من اسراركم؟

-موضوع سفرته لـ انطاليا ذكرتي لو لا؟؟!

-هاا..؟

-ذكرتي؟؟

-ا.. اي

-شنو سمعتي بالضبط ومنين؟؟

-سمعت شُهيب يحچي وياه بالتلفون ومروة چانت ببيتنا وسمعت سألتني عن الموضوع گلتلها واصلة شحنة لانطاليا ومالك راح يستلمها لان سمعت شُهيب يحچي وياه قبل بيوم بس والله العظييم ماعرف شحنة شنوو توقعتها شحنة بضاعة او اكسسوارات او احجار جديدة فااهد مادري الموضوع خطرر

-بسبب سفرة انطاليا وفشل مالك بتوصيل الشحنة ابوية طلعله جلد جددديد! وقعه على سببع اتفاقيات جديدة طييح بيهن حظظ حظظظه! ومن هاي الاتفاقيات چانت زواجه من جنات!! جبره يتزوج جنات عقووبة وهو يعرف مالك ضد الزواج!!

-والله ماعرف مچنت اعرف فاهد صدگني

-زواجي منچ حتى استدرجچ! ادور وراچ واطييح حظچ ادمررچ واعاقبچ على كلشيي سويتي وره ظهورناا ابوية زوجچ الي بالتحديييد لان يعرفنيي اأذيچ يعررف اگدر اربيچ من اول وجديد وانسيچ اسسمچ واخليچ تتمنين المووت! بس ماا سويتها كلللشي ما گدرت اسوويلچ ماااگدرتت!!

-ليش

سألت بصوت مبحوح من البكاء ونزلت دموعي اكثر مقهورة، هو شافني ابچي وتخبل بالزايد يضرب بالحايط والباب مثل المجنون ويصيح..

-لااا تبچيييين لااااا تبچييييييييييييين

-سألتك لييش ما اذيتني جاوبني!

-لانچ غبييية كيان انتِ غبيية!! كل الصاار بيناتنا وما عرفتي لييش؟!

-لا ترد سؤالي بسؤال اريد جواب حقيقي ومنطقي!

-سكتيي كاافي

-تمام

عفته واگف يتحلطم ولملمت قميصي المتمزق على جسمي وفتحت الباب اريد اطلع من البيت بكبره تعبت وواضح ميريد يصدگني بس يبقى يعيط عليَّ.. هستوني فتحت الباب وايدي انشنطت جرني منها وطبگ الباب علينا يدفع ظهري عليها..

-خبلتينييي وييين موليه!!

-اطلع منا لان واضح انتَ ما ناوي تصدگني وراح تقهرني فوگ قهرتي

-ازيد قهرتچ؟؟ ولچ انتِ جااي تحسييين بالنار المشعولة بيه هسسة لو ما تحسييين!!

-تعبتني فاهد شتريد؟

-اررريدچ!!

-تريدني تثق بيه وتصدگني ومن اگلك اني مظلومة ومشاعري لاخوك....

لصم حلگي بيده يسده بقوة عاصر خدودي، نتر بين سنونه بغضب..

-لا تعيددين سالفة اخوووك

دگ انفه بأنفي انسدلت رموشي أطلق العنان لدموع جديدة، مسحهن بأبهامه بأيده الثانية، وخر ايده من حلگي على كيفه وهمس بيني وبينه..

-لا تذكرين هذا الموضوع بعد حتى ماروح اكتل اخوي

-بيمن احلفلك چنت فاقدة وما حاسة واني احچي بي

-تفكيرچ، كلامچ، حالميتچ وفرفحة گلبچ عليه ااااااخ كيااان ااااااااخ

-قديم وعيونك قديم چنت مراهقة ومتخدرة ما اتذكر أي شي من كلامي ويجوز اصلاً اني متلقنة من مروة ومصورتني

-كافي

-فا....

ما خلاني اكمل نطق اسمه وسحبني يقبلني بجنون، بچيت بين ايده بقوة مهضومة ومتوجعة گلبي يوجعني واحس الدنيا انطفت بعيوني، وخرني منه يمسح عيوني وخدودي ويهدأ بيه..

-اششش خلص كافي انسي الصار ما صار شي

-ليش ما اذيتني فاهد

استغرب سؤالي وعفس وجهه متنرفز، دگيت على صدره كم مرة ونترت..

-ليييش

-ترديني ااذيچ؟

-احچيييي لييييش ما اذيتنييي ليش ما سويتلي شييي اشههر اني يممك وما سويتلي شي ليييش!!

-لان احبببچ يا غبييية اني احببببچ وتسوودنت بيييچ مااگدر اأذييچ شگد حاولت شگددد جربتتت كللل يوم اقرر اليوم رااح ادمرچ واحاسبچ بس ماااگدرر بآخرر لحظة اتوقف واترااجع!!

باسني مرة ثانية وثالثة ورابعة بعصبية ما سمحلي اتحرك من مكاني وحضني بكل قوته يدفن وجهه بشعري..

-ماتحمل اشوفچ تبچين گلبي ينزف ويه دموعچ اتوجع من تزعلين شسويتي بيه كيان شسويتي بـ فاهد الي الكل يشوفه بنص عقل ومسودن

-انتَ مو مسودن

-الوحيدة الحسستني اني انسان طبيعي بگلب ومشاعر، الوحيدة الگلتلي كلمة شكراً عمري كلله اشتغل مثل الحيوان ما سمعت هالكلمة ولا اعرف شلون ووين تستخدم

-انتَ طبيعي ولا تشك بهالشي

-بس انتِ تعترفين بهالشي اني مخبل بنظر الكل وكلني نقص وعقد نفسية

وخرته مني وگلت بثقة..

-لعد ليش اني اشوفك كامل بعيوني

انرسمت ابتسامة على وجهه عداني بيها وابتسمت بين دموعي، مسحت وجهه بيدي ورگبته وشعره وگلت بضحكة..

-منو اهم اني لو الناس فهود؟

-انعل ابو الناس الدنيا كلها تروح فدوة لعيونچ الكورية

-وعيوني الكورية متشوف غيرك

-اشتعلو اهلچ

-لا تشعلل بأهلي!!

هز راسه مبتسم وباسني على راسي وفتح كاك باب البيت يطلع، رجعه سؤالي..

-وين رايح؟

-اكمل كم شغلة

-مو علساس نبقى سوه اليوم

-بعدچ تردين تقضين وقت وياي؟

-وين اولي لعد

-طاح حظج ما تگولين حچاية حلوة

-شسوي مكتوبلي ابقى وياك واتحملك

-وسلاباتچ؟

-تروحلهم فدوة اخواني

-نعل وقنادر عليهم اولهم شُهيب

-امنيتي اعرف ليش تكره شُهيب!!

-لانه نذل وباعنا!!

-شلون؟

-ما انسى قهرتي وكسرة گلبي من گلولي شُهيب ما يريدكم چنت طفل و...

سكت ميقبل يكمل ملامحه عابسة وحزينة وكأن الذكرى اذته، نفض عقله بقوة وگال..

-المهم فوتي جوه لا نبقى واگفين هنا مثل شمعات الفگر

-ليش گطعت كلامك؟

-لانه مو مهم، المهم انتِ يمي وخ** على الباقي

-شنو هاي الابرة الضربتها بجسمك قبل شوية؟

صفن بوجهي چنه ما متوقع سؤالي، بلل شفايفه بلسانه وضحك ضحكته المعروفة، مسح على رگبته من الخلف وگال..

-لا هيچ هاي

-مخدرات؟

-كيان

-مخدرات هاي فاهد؟

-نسبة قليلة ما تأثر عليَّ صدگيني بس احتاجيت جرعة خفيفة

-ليش تتعاطى؟

-انسى ضيمي

-من شوكت؟

سكت يتنهد نفى براسه ميقبل يجاوب جريته من ردن قميصه دليل اريد جواب، بلع ريگ ونطق متوتر..

-صار اربع سنوات

-ابوك يعرف؟

-اكيد لا! غير لو يعرف يصلبني مصلخ لحدما اموت

-شعجب ميقبل بهيجي اشياء؟

-لان المخدرات تقتل خلايا الدماغ

-وانتَ تريد تقتل هالكم خلية الباقيتلك بعقلك؟

-احتاج اقتلهن ببعض الاحيان حتى اكمل شغلي بدون لا احس بشي

-انتَ مدمن؟

-چنت

-وهسة؟

-تغيرت هسة صرت اخذهم بس عند الحاجة

-واليوم چنت محتاج؟

-اي

-ليش احتاجيت؟

-لان ردت اذبحچ

يبس الدم بجسمي من جملته العنيفة وملامحه الجامدة، اردف بدون لا ترمش عينه..

-چنت ناويها اذبحچ واخلص منچ ومن الوقت الجاي اضيعه بسببچ

-صرت مضيعة وقت بالنسبة الك فاهد؟

-اي صرت اتحجج ما اروح اشتغل حتى ابقى يمچ وجاي ينلعن سلفه سلفاي بسببچ

-تتعاقب علمودي فهود

-اگلها ينلعن سلفاي تگلي "تتعاقب" شنو هالمصطلح الكيوت

-تستاهل اعتبره ضريبة المخدرات لان اني تلعب نفسي من اليشرب والي يتعاطى

-خففت هواي وشرفي

-اي هواي صدگتك

-قبل چنت مخبل بسببهن مالك اخذني لمصحة ياله تركت ومن غفل عني رجعتلهن مثل الزعطوط بس هسة بديت اخفف حتى ما ادمن واصير طلي

-لخاطري خففت مو؟

-لا

-گبرر شچان صار لو گلت لخاطري راح تترك!

-چنچ متعودة على التقشمر ليش تردين تصيرين مضحكة؟

-يوووه وخر فاهد ما طايقتك سويلي گهوة عصير چاي أي شي

-والله عبالي راح تگول رجعني للبيت شو هاي متونسة على الوضعية

-اي ولك مو راح نتطلگ تدري اخواني متحلفيلك ومروان حلف بروح اهلي الا يطلگنا فـ خلينا نستغل الوقت بسرعة ونگضي ويه بعض

-ما راح يگدرون يطلگونا اذا گلتيلهم تحبيني

-بس اني ماحبك

-انچبيييي

-حتى لو گلتلهم احبك ميقتنعون همه يكرهوك

-فدوة لالله شعور متبادل

-فاهد جديات مو بيبيات بس صدگ احچي

-كيان انتِ ترديني لو لا؟!

-ولك لا تسألني هيچ اخاف

-من شنو؟

-اخاف لا تترعن ويايه

-جاوبي ترديني لو لا

سكتت افكر بجوابي توتر على قلق على خوف كله دا احس بي هسة گلبي يريده عقلي يريده وكلشي بيه يريده بس الخوف مسيطر عليَّ بس كافي! الى متى ابقى بهذا التردد راح اگدر اوگف بوجه اخواني واقنعهم اني وفاهد نحب بعض ونريد نبقى سوه.. حسمت قراري ورفعت ايدي احاوط رگبته اقربه مني واهمس وعيوني بعيونه..

-اريدك

-مقتنعة بعلاقتنا؟

-امم

-ماكو خوف؟

-ماكو

-ماكو ندم؟

-ماكو

-اريد كوري صغير

-عار

-عار لو حار؟

-ههههههههههه شهالتفاهة

-تفاهة لو برتقالة

-اهووو ابن شامة كاافي

ضحك بصوت وشالني بمكاني شهگت من ثبت ظهري على الحايط وتغيرت ملامحه من الضحك الى الجدية، قرب وجهه مني وقبلني بهدوء وشوية شوية......

نسيت نفسي ونسيت الدنيا ما انتبهت الا واني بالغرفة الي بالطابق الثاني وفاهد ويايه، راضية ومقتنعة وكلني حب ولهفة، كلني تقبل وخجل وعشق اله.. ركزت بصوته يهمس بأذني كلمات حب وانغام وختمها بـ..

-أي شي يصير تتضايقين منه بس گولي كلمة "كرز"

-ها..؟

-وياي كيان؟

-ما فهمت شنو قصدك

-راح تفهمين.....

عشت ليلة لا يمكن انساها! لا يمكن تنمسح من بالي وعقلي وگلبي، فهمت قصده من گلي ووصلت الفكرة بوضوح بس رغم كلشي اگدر اگول اني سعيدة، سعيدة واحسني غارگة بالهيام.. لو چان حُب فاهد والعشته وياه اليوم خطيئة؟ ماگول غير يا هلا بالذنوب..

حسيت الصبح من وكت كلش فاهد گام على اثر منبه، چنت تعبانة كلش ونعسانة مابيه حيل اسئله وين رايح رجعت انام وگعدت الظهر.. گمت من الفراش اتمطى واشوف تلفوني منو مراسلني ومنو متصل، گمت للحمام سبحت ولبست نفس ملابسي مال البارحة ونزلت افتر بالبيت..

اتصلت بـ فاهد ميجاوب ذبيت تلفوني وسويتلي اكل الثلاجة متروسة هنا، گعدت اكل واتذكر خبالي واضحك مثل المجانين وحدي، غسلت المواعين الاكلت بيهن ورجعت للصالة مربوثة ربيثة من وره البارحة، رتبتها شلون ما چان وتمددت على القنفة اگلب بموبايلي الى ان ما حسيت على روحي وغفيت مرة ثانية..

حسيت المغرب گمزت من الفراش البيت اظلم والجو مغيم، فتحت الاضوية وشفت اخواني متصلين بيه وجنات وماريا وفيروز بس ماكو اتصال من فاهد!.. دگيت عليه يرن وميشيله، دگيت مرة وثنين وثلاثة وعشرة الى ان انغلق جهازه! معقولة عنده شغل؟!

باوعت للوقت تأخر ماعرف انتظره لو ارجع للبيت؟ دگيت على نشوان يگول همه بالمستشفى اليوم راح يرخصون شُهيب قررت اروحلهم واذا فاهد رجع من شغله اگوله ياخذني لبيته واقنع اخواني بشي عذر..

غطيت رگبتي بشعري وباوعت لروحي بالمراية خاف اكو شي غلط وانفضح، اخذت تكسي ورحت للمستشفى لگيتهم ديطلعون والكل موجود، سلمت عليهم وبدربهم اخذوني لبيت ماريا.. الطريق كله تلفوني بيدي انتظر اتصال من فاهد قلقت وبده الشيطان يلعب بگلبي خفت عليه خفت يكون رايح لابو ومتعاركين وشمسون مأذي رغم حذرته اكثر من مرة يسوي روحه ميعرف بشي حفاظاً على حياة اخواني..

توتر وقلق ورعب شلون يعوفني بهذا الحال وحدي؟ شلون ميرجع واحنه عشنا ليلة من العمر سوه؟ ليش ما بلغني عنده شغل وراح يطلع؟ ليش ما بررلي طلعته او على الاقل يتصل بيه من رقم غريب مثل عادته؟ فاهد وين وعلى شنو ناوي؟!...

**

-مسرة: مرتاح؟ اجيبلك بعد مخدة وره ظهرك؟

-شُهيب: لا زين

-مسرة: تمام يلا كمل الشوربة

-شُهيب: شبعت مسرة ماگدر آكل

-حباب ما بقى بيها شي وصارلك يومين متاكل مو زين هيچ

-ماگدر

هزيت راسي متفهمة وحطيت طاسة الشوربة على الميز، شلت الصينية من گدامه والعصير ومسحتله حلگه وايده بالكلينس المبلل لان ميگدر يگوم ويتحرك هواي..

-مسرة: تريدني انيمك؟

-تلوليلي؟

گلبت عيوني عليه ضحك وداعب طرف انفي بيده، وخرت وجهي منه وگمت اوگف من الچرباية اعدل حچايتي فوراً..

-اقصد اساعدك تتمدد؟

-شبيچ هيچ طفرتي؟

-لان لازم تنام وترتاح واني دا اشغلك

-شنو هالحچي مسرة تشغليني شنو

-يلا يلا ميفيدك هالحچي نام گدامي

-مسرة؟

-نام بدون نقاش يلاا

جريت راسه احطه على المخدة بالغصب ظل فاتح عيونه مصدوم من حركتي السريعة، صرت ادگدگ على راسه انيمه مثل الطفل..

-دللولل دللووول دللووول نام شهووبي ناام دللوول دللوولل

-مسرة شسالفة

-نام اششش كافي يلا حبيبي يلا امي دللوول

-ههههه

-لا تتمضحك گلت نام!

-عمري 31 سنة بحياتي محد نيمني حتى من چنت طفل

-لعد شلون چنت تنام حبيب امك؟!

-شمدريني چنت انام وحدي ايام اللگه روحي غافي على القنفة وايام بالمطبخ وايام حتى على باية الدرج ولا تسأليني ليش انام على باية الدرج لان ماعرف

-صدگ تحچي؟

-اي والله

-بسبب وضع امك؟

-اممم

-اهووو شبيك قهرتني بنصاص الليالي هسة شلون ارجعلك طفل واربيك اني حتى ارتاح؟؟

-وجودچ هسة كافي

-تمام يلا نام

-عوفيني ماريد انام ما منعس

-غصباً عليك تنام هو بكيففففك لا تشلعع گلبيييي

رجعت ادگدگ على راسه حيل حيل وهو فاطس من الضحك وساكت متحملني، حسيت روحي ما مسيطرة گعدت وجريت راسه احطه بحضني ساعة اللعب بشعره وساعة ادگ عليه..

نزلت عيوني لحضني لگيته رافع عيونه وصافن عليَّ، تأفأفت متنرفزة وغمضت عيونه بيدي ضحك من حركتي ما مصدگ تصرفاتي عباله اتشاقه..

-شُهيب مدا اتشاقه الدكتور يگول لازم وضروري تنام حتى ترتاح ومتحچي

-عاد اني شگد احچي ولا اسكت

-هو صح انتَ خوينس اتفق بس الكلام يأثر على جرحك ميطيب بسرعة

راد يحچي وسديت حلگه بيدي، ايد على حلگه وايد على عيونه اغمضهن وما اسمع بس ضحكاته الخفيفة على الوضع، وره عشر دقايق تعبت رجلي من الهز خدرت، وخرت ايدي من عيونه لگيته بعده مفتح ما نايم!!

-الله ياخذك

وخرت راسه من رجلي وگمت، جر ايدي يرجع يگعدني ويگول..

-چنت راح اغفى شبيچ

-تغفى وانتَ مفتح عيونك شكبرهن مثل البومة؟!

-صرت بومة!!

-اي مو عيونها كبار المهم انتَ لازم تتعاقب وتنام وحدك اني رايحة

-ويييين

-نازلة عند خالة ماريا

-من تنامين اني انام غير هالشي ماعندي!

-واني ماعندي غير انتَ تنام واني اروح انام بغرفة جنات

-وليش يابة؟!

نترها متنرفز ورافع حاجبه، رديتله الحركة ارفع حاجبي مثله وگلت بلا مبالاة..

-لان عاجبني

عفته على وضعه وطلعت من الغرفة واسمعه يصيح بصوت عالي متأكدة اذاه..

-انتِ بسس تردييين تهربييين

فضلت ما اجاوبه واكمل طريقي، كلامه صحيح فعلاً بس اريد اهرب ولازم اهرب وضعي من تعيس لاتعس! وجودي ويه شُهيب بنفس الغرفة راح يلين علاقتنا ونرجع لنقطة الصفر وميصير نرجع لهاي النقطة خصوصاً هسة..

دگيت باب غرفة جنات سمحتلي بالدخول شفت عدها كيان وفيروز گاعدات، سلمت عليهن وانضميت الهن اتربع على الچرباية..

-كيان: شلونچ مسرة

-مسرة: مو زينة

-البنات كلهن: ليييش؟؟؟

-مسرة: طلع التحليل

-فيروز: اي؟؟؟

-مسرة: اني حامل

شهگت جنات وضحكت كيان وصفگت فيروز بفرح، نفخت نفس ضايجة ذني ليش فرحانات؟؟

-كيان: اخيراً اخييييراً شُهيب راح يصير أب

-مسرة: كيان الموضوع ميفرح نسيتي شنو گلتلكم بالمستشفى؟

-جنات: خليها على ربچ يمعودة

-فيروز: گلتيله؟؟ عليج الله شلون چانت ردة فعله؟؟ اكيد انفتح جرحه من السعادة!!

-مسرة: لا اتوقع انفتح جرحة من الضوجة والصياح لان عفته واجيت اريد انام هنا

-كيان: مسرررة شبيچ ويه اخوية

-مسرة: بنات شبيكم لا تصعبون الموضوع اكثر شُهيب ميصير يعرف اني حامل

-جنات: الى متى؟

-فيروز: صحيح راح يكبر بطنچ ويبين اول تالي راح يحس وينتبه على اختلاف جسمچ واللعبان النفس اليجيچ والتعب راح يعرف انتِ حامل

-مسرة: هسة ماريد افكر بكل هذا جنات اريد انام يمچ تستقبليني؟

-جنات: بعيوني احطچ الغرفة غرفتچ

-مسرة: شكراً حبيبتي الحلوة

تمددت فوراً على الچرباية اغطي عيوني بذراعي اريحهن، گامن البنات يردون يطلعون وما خليتهن خطية هنه مجتمعات يسولفن سوه واجيت اني قاطعتهن..

-فيروز: لا اصلاً باچر عندي دوام ولازم ارتاح

هزيت راسي وهنه راحن بقت جنات، اخذت منشفة ودخلت لحمامها تسبح شوية وطلعت تبدل وتمشط بشعرها، وخرت ايدي من عيوني اشوفها وابتسمت على جمالها.. صدگ هالبنية تقطر لطافة وجمال كلشي بيها يصرخ انوثة واغراء وما اللوم مالك من يصفن عليها ولحد يسأل شمعرفج هو يصفن عليها؟ لاحظت نظراته الها اكثر من مرة..

گاعدة على كرسي ميز التسريحة مالتها تمشط شعرها طولان واصل جوه چتفها، لابسة شورت وكيمونة ابيض وبيهن نقشة كرز وانشغلت تتعطر وتحط مرطبات وتهتم بنفسها..

-مسرة: متغيرة جنات

اللتفتت عليَّ بسرعة باهته كبرت ابتسامتي من بسرعة خدودها صارن حمر ماعرفت السبب..

-جنات: اي.. اي اي هاي من الدراثة تعبانة

-مسرة: بالعكس صايرة بعد احلى من قبل، اگلچ مالك وين؟

-مادري

-ما رجع وره موضوع البارحة؟

-اتوقع ثافر

-ما بلغچ بهالشي؟

-جهازه مغلق

-ان شاء الله مابي شي

هزت راسها وهمست ان شاء الله ورجعت تندار للمراية تتمايز نفسها، جنات متغيرة من ناحية الكلام صايرة اكثر هدوء وتسرح هواي وتتوتر من اقل شي يصير من دخل شُهيب للمستشفى لحدما طلع خطية هي ما عافتني وحدي بس دا احس بالبنية بيها شي مو طبيعي..

انتفضت مكانها مخترعة تحط ايدها على صدرها من اندگ باب غرفتها، گعدت على حيلي متوقعة شُهيب اجاني، گامت هي تفتح الباب تمد بس عيونها وشهگت مرعوبة من انفتح الباب عليها بقوة واندفعت تنسقط على الحايط ويدخل مالك بلا احم ولا دستور لزمها يبوسها و...

-مسرة: اءءء؟

دفعته عنها بسرعة وجهها ددم وخدوها لو حطيت اصبعي عليهن يطبع بيهن، انتبه لوجودي مالك وعگد حاجبه مستغرب..

-مالك: مسرة؟

-مسرة: اسفة لان دا اقطع رومانسيتكم بس اني راح انام بغرفة مرتك

-مالك: واني وين اروح؟

-مسرة: نام يم اخوك

-مالك: زين شنو رأيج انتِ تنامين يم اخوية اليوم واني انام يم مرتي

-مسرة: چؤ متصرف وياي

-مالك: زين تسمحيلنا بشوية خصوصية مدام قيثارة؟

-مسرة: نعسانة اريد انام شوفولكم غرفة ثانية

ضحكت جنات ومالك عفس وجهه متت من الضحك من جوه شگد احب اغيض هالانسان استمتع من اضوجه، گمت من الفراش اللبس الشبشب وتمشيت اطلع من الغرفة..

-مسرة: لا تتأخر

-مالك: ما اوعدچ

-مسرة: اروح يم فيروز خلي جنات تفيدك

-مالك: چنچ متيهة بيني وبين شُهيب

-مسرة: نفس الشي كلكم اخوان

ضحك وجنات منتهية من المستحى عفتهم اعبرهم شوية واللتفتت الهم بعدهم ما سادين الباب مالك حضنها من وره وحط حبابة بحلگها يخليها تبلعها..

نزلت اروح اگعد بالصالة وحدي مثل الططة.. مادري ططوة ماتذكر المهم هاي الي جنات تگولها گاعدة اتصفن ماعندي حيل اسوي أي شي ومالي واهس اشتغل..

تمددت على القنفة عيوني جفاها النوم، بعد ساعتين من الوحدة رحت للمطبخ اسويلي چاي اخضر وگعدت اتكمعه على كيفي واتصفن..

قطع صفنتي دخول مالك للمطبخ، جمد بالباب من شافني گاعدة وفوراً سد دگم قميصه المفتوح..

-مالك: اخرناچ

-مسرة: اي

-مالك: ماكو شي اسمه مجاملة بقاموسچ قيثارة؟

-لا

-اعذرج نفسيتچ التعبانة

-لا منيلها تعبانة متونسة وفوگ الغيم اني هسة

-واضح

راح لمكينة القهوة يسوي قهوتين اله ولجنات، منطيني ظهره يشتغل بهدوء بدون لا يلتفت گال..

-نسيت اباركلچ على الحمل

وگع الكوب من ايدي تبدى على الميز، فتحت عيوني مصعوقة هذا شمعرفه؟؟ بس لا جنات حچت؟؟ وكأنه قرا افكاري لان گال..

-مالك: لا مو جنات حچتلي

-لعد شمعرفك؟

-وصلني الخبر وبس

-الا الچان مراقبني وجاط جواسيس عليَّ

-هاي شمعرفچ؟

اللتفتلي مبتسم بثقة يأكد هو ديتجسس عليَّ شگد نرفزني بس ما بينت، بادلته ابتسامة وجريت دولكة المي اصبلي منها..

-چنك مهووس بيه مالك شمسون ماكو غيري براسك

-شسوي بعد

-ان شاء الله تتعالج من مرض مسرة قيثارة

-ان شاء الله

شربت المي وعيوني وعيونه تلاحموا بحقد محد كسر عينه عن الثاني، تكمع شوية من الگهوة مالته ومسح على شعره المبلل..

-مالك: شُهيب شلونه؟

-مشتاقلك

ضحك مستهزأ يهز براسه بطريقة "اي صدگتچ"..

-مالك: ما راح اذكرچ باللازم يصير

-لازم؟

-مسرة كلنا نعرف ليش وافقتي تتزوجين شُهيب وليش ابوچ رضى بهذا الزواج لا نطولها وهي گصيرة

-اي وليش بله؟

-بسبب حساب شُهيب البنكي

-شكلي مال وحدة محتاجة حساب اخوك البنكي؟

-لا واعرفچ مليونيرة بس مو غلط واحد يزيّد ثروته

-اطمنك متهمني ثروة شُهيب ولا ببالي

-ممتاز هالشي لان خايف عليچ لا يعلگ سكرچ من تعرفين الحقيقة

-احچي بوضوح مالك لا تظل تلف وتدور

-المبلغ الشفتوه بحساب شُهيب مو اله

-شنو قصدك؟

-هاي اموال عمي حسين ابو تسنيم بمعنى هذا ورث تسنيم وانحفظ بحساب شُهيب البنكي فقط! ماله حق يتصرف بدولار واحد!

حسيت كلامه راشدي وانكفخ على وجهي! الفلوس الي بحساب شُهيب البنكي والاموال الطااائلة والملايين الشفناها مو اله؟؟! هاي كارثة! كاارثة حقيقية!

-مالك: وهذا السبب ابوية استقتل يزوج تسنيم وشُهيب حتى يگدر يتصرف بالفلوس وتصير حلاله

-اها

-شُهيب ماعنده أي شي غير نسبته بالشركة وانتِ اكثر وحدة تعرف شگد نسبته بسيطة بيها، خالي من الاملاك تماماً والسبب هو انفرد عننا وراد يعيش لحاله ويبني حياته ويكبر نفسه من عرق جبينه..

راشدي بعد راشدي بعد راشدي! ما جاي اصدگ الكلام الدينگال بس المشكلة كلامه منطقي! منطقي مية بالمية وهاي معناها شُهيب منتهي وورقته تحترگ اول ما ابوية يكتشف ماعنده املاك! لان اساس زواجي منه هو اكبر ثروتي براسه وهاي خطة ابوية! شلوون لو ابوية اكتشف والله يگلب الدنيا علينا!

-مالك: اول ما يتم طلاقكم راح تتقاسم املاككم كلها بالنص، نص اله ونص الچ وبما ان شُهيب ماعنده شي فـ الخسرانة الوحيدة انتِ مسرة قيثارة

-وين تريد توصل بهذا كلامك؟!

-تسوبن اتفاقية زواج ما ياخذ منچ فلس واحد

-هاي اكبر اهانة اوجهها اله!

-مضطرة لو يتقاسم وياچ بعد بكيفچ

-مالك لا تنرفزني! شُهيب يتدمر لو سويت هالشي راح يفكرني ماحبه وبس اريد اتخلص منه!

-للاسف الشديد واكره اگولها بس هذا الي لازم يصير.. لازم تطلعين من گلبه وتعوفون بعض لان لو بقيتوا شهر زايد سوه اعتبري شُهيب جوه التراب مدفون

-خلص سد الموضوع!

-لا ما نسده، ما نسده لان اني اهتم لاخواني وقدمت تنازلات اعلى من هامتي لخاطرهم، ما راح اسمح لأمرأة تقضي على حياتهم مهما كانت! لو اضطريت ادفنها بسابع ارض في سبيل تبتعد عنه ويتخلص منها ما راح اتردد لثانية وأسويها!

-نيتك تدفنني؟

-مو نيتي هاي بس اني دفنت روحي من زمان لخاطرهم

حط الكوب على الكاونتر واللتفتلي يتنهد ويگول بتعب..

-انجبرت على هواي امور بحياتي او خليني اگول انجبرت على كلشي بحياتي، للاسف عرفوا نقطة ضعفي همه شُهيب وفاهد وحاربوني بيهم كسرت گلب اخوية وعفته بنص الطريق يحارب وحده كسرت ظهره وضلوعه مجبور دمرت رابط الإخوة بيناتنا لخاطره حتى يعيش حياة كريمة وما يبقى ذليل عند احد..

سكت شوية واردف بنبرة صوت قوية مغلفة بالعصبية..

-انتِ مو الانسانة الوحيدة التحبه ولا الوحيدة الراح تقدم تنازل وتبتعد عنه في سبيل يبقى عايش سويتها قبل 14 سنة ولو انعاد الزمن بيه مية مرة هم راح ارجع اسويها لخاطر اشوفه مرتاح لخاطر يعيش، مستعد ابقى اراقبه من بعيد لبعيد لنهاية عمري كلش كافي المهم عندي اشوفه بخير

-شنو صار قبل 14 سنة؟

-تطشرنا

-ليش؟

-مو هذا موضوعي هسة.. موضوعي هو يا مسرة لو انتِ فعلاً تحبين اخوية ثبتي هالشي وابتعدي!

-اذا ابتعدت يعوفوا؟

-على الاغلب اي! وجودچ خطر على حياته اخر مرة الله ستر والقناص غلط بالمكان المرة الجاية يمكن ما نلحگ عليه ويروح بيها شيفيد الندم بعدين؟! انتِ تخسرين حبيبج واني اخسر اخوية!

رمى كلماته بدون تردد بوجهي وعافني وطلع من المطبخ تاركني تايهة ومحتارة، باوعت للساعة الوقت تأخر بس ما ترددت ولا لثانية واتصلت بـ سام..

-مسرة: باچر اريدك ضروري سام

-سام: تم

نمت ليلتي قلقة بغرفة كيان، اجتني جنات تگول مالك راح وميرجع بعد گوة اجاهة شوية بس حتى يودعها لانه راح يسافر للمغرب وميعرف شوكت راح يرجعون يلتقون مرة ثانية، بس فضلت انام ويه كيان الشاغل بالها شي ووضعها مو تمام..

من الصبح اجاني سام طلعت من الغبشة قبل لا يگعد شُهيب وركبت سيارتي اأشر لـ سام يصعد ويايه..

-سام: لو اني اسوق سرور

-مسرة: لا، شمسون وين سام؟

-سام: فص ملح وذاب

-مسرة: النذل! اخر مرة شفته بيها بالمستشفى العار شلون يعوف ولده بهذا الوضع!!

-سام: مسرة اريد اصارحچ بشي بس سفطي السيارة على جهة

-مسرة: شنو احچي؟

-سام: قبل يوم من حادثة شُهيب شفت ثنين يراقبوا من بعيد

-مسرة: نفس القناص الضربه؟؟

-سام: لا منتمين لغير جهة

-متأكد من هالحچي سااام؟؟

-متأكد مسرة بعيني شفتهم ثنين مسلحين يتبعوا على الدعسة وين ميروح اضافة البارحة صارت مواجهة بين فاهد شمسون وجهة منتمين لصقر ريماس اطلاق نار صلي من كل الجهات وابن عم فاهد تصاوب بيها اسمه تميم

-اخو هارون!

-على ما اظن اي

-ابووهم الكلللب وييننن شلون يورط ولده ويهررب

-اني احچي مو حتى اخوفچ بس تعرفيني ما اضم عليچ شي واني اعرفچ شگد مهتمة بي وعزيز عليچ بس شُهيب نهايته قربت كللش وماكو شي بيدنا نسوي

-اكوو اكييد اكوو مستتتحيل اتخلى عنه واعوفهم يكتلووه وابقى بحسرته سام انتَ مستوعب كلاممك!!

-مسرة اني احب شُهيب وجاي اللاحظ حبه الچ وشلون تأثيره ايجابي على حياتچ بس انتهبي لنفسج انتِ عندج بنية وما بقى شي وترجعلچ لا تجازفين بحياتج اكثر!

-اجازف ومستعدة انطي روحي هم هسة تخلي اربع حماية قريب بيت ماريا ولا تخلي احد يحس عليهم نظفلي الطريق گدامه ووراه ولا تخلي كائن يتقرب من البيت شعرة كلشيي راح يكون بالخفية وبدون لا يحس

-راح يحس

-خلي يحسس حتى لو گام من فراشه وراح تضارب وياهم لا تخليهم يعوفون الحراسة!

-تمام

حركت السيارة اكمل الطريق بدون لا يستفسر وين رايحين وانطلقنا للمكان الاحتاج اروحله، بعد مرور فترة ياله سأل..

-سام: راح تشاركيني وين رايحين لو انصدم مثل العادة؟

-مسرة: رايحين لـ سردار

-سردار؟؟

-اي

-اخذتي موعد منه؟ هاي شوكت؟

-صار اسبوعين انتظر هالموعد

-شتسوين هناك؟ مو گلج انطيني مهلة علمود موضوع ميس لا تلحين عليه مسرة لا يشيل ايده من السالفة

-مو علمود ميوسة رايحتله علمود شي ثاني وابقى وياي سام ممكن طلبي يستفزه شوية

-الله يستر منج

سقنا لاطراف المدينة لفندق سردار الشخصي، ركنت سيارتي ونزلت ويه سام.. سبق وذكرت سردار منو وشنو من وصاخة روح وجرأة يملك ميخاف من بشر وميهيب بشر بس اكو ناس ميگدر يتجاوز حدوده وياهم بسبب الاتفاقيات المعقودة..

سردار لا يمكن يعقد اجتماع بالعلن، دائماً حريص على اختيار المكان وغالباً يكون بنادي ليلي تابع اله لو بواحد من فنادقه الخاصة بغرفة اجتماعات خاصة، الله يحبني طلب مني اللتقي بي بغرفة اجتماعات الفندق وممضطرة افوت لاحد النوادي الليلية علمود طلبي اليوم..

تمشيت اعبر الريسبشن متوجهة للغرفة و سام يمشي بظهري، اللتفتت عليه وهمست بخفوت..

-سام سيطر على اعصابك وين ما وصل حديثنا لا تدخل ولا تسحب سلاح

رص على اسنانه ما متقبل كلامي لكن بالاخير هز راسه ميگدر يعترض، بالباب وگفنا يفتشونا رادوا يسحبون اسلحة سام وما قبلت لان بكل بساطة بيناتنه شغل وعندي امان وحصانة ويه سردار وره اخر اتفاقية عقدناها ومهما صار ميگدر يتجاوز حدوده ويسحب اسلحتي الخاصة او اسلحة حمايتي..

دخلنا للمكان عبارة عن طاولة وكراسي محاوطتها، گعدت بطرف وجماعة سردار وحمايته بطرف.. انتظرته ثلاث دقايق ووصل يمشي وايده بجيب بنطرونه وعيونه التمساحية تفتر كل مكان..

تسالمنا من بعيد وگعد على الكرسي يترأس المكان، طلع جگارة من جيبه وشعلها يدخن واشرلي حتى احچي..

-مسرة: هو طلب

-سردار: اي؟

-مسرة: محتاجة منك حماية

ركز انظاره الي بفضول ونطق متسائل..

-واجهتي خلل بالحماية العيّناها الچ؟

-الحماية مو الي، الحماية لشخص ثاني وادفعلك ثلاث اضعاف فلوس حمايتي اذا وافقت

بقى على ملامحه الجامدة وسحب نفس من جگارته وزفره بهدوء وريّح جسمه على الكرسي، سأل بلكنته الالمانية الثقيلة..

-سردار: منو هالشخصية المهمة الخلت مسرة قيثارة تتعنى علموده وتدفعلي ثلاث اضعاف مبلغ حمايتها

-مسرة: شخصية مهمة اي لان بيناتنا شغل وما كمل واني محتاجة احميه هالفترة بينما احصل الاريده قبل لا يقتلوا

-شغل شنو؟

-اتفاقية زواج

-منو هذا؟

-ابن شمسون

رفع تك حاجب مزعوج وهاي اول ردة فعل يبديها من گعدنا للان، ركزت عيوني عليه ابيّن نفسي ما مهتمة بس اني حرفياً لوصت! لوصت وجازفت مجازفة عملاقة والسبب يعود لان...

-سردار: اجيتي تطلبين مني احمي ابن عدوي؟!

-مسرة: نعم

-سردار: قيثارة انتِ جاية هنا حتى تضحكين عليَّ؟

-لا

-اذاً شنو تفسرين كلامچ وطلبچ هذا؟

-گتلك بيني وبين ابن شمسون اتفاقية زواج وحالياً حياته مهددة بالخطر ومن كل الجوانب يردون يقتلوه وضروري ننفصل قبل لا يموت حتى استفاد من هذا الزواج وميروح شغلي ووقتي هباءاً منثورا

بقى رافع حاجبه ما عاجبه كلامي بس ما علق عليه وانما سأل سؤال اخر..

-سردار: منو منهم؟

-شُهيب شمسون

وهنا مو بس رفع حاجبه هنا ضرب على الطاولة بأيده معترض، فتح عيونه التشبه لون عيون التمساح لون اصفر مخضر وضحك مستهزأ ويباوع لجماعته ولأخو "بيزين" ويگول..

-سردار: تردين حماية لـ شُهيب شمسون؟

-مسرة: نعم

-سردار: توقعتچ اذكى من هالشي قيثارة توقعت من اشتغلتي وياه عرفتي هو منو

-اعرفه منو

ضحك مستهزأ من جديد واشر لاخو يكمل المحادثة نيابة عنه، حضن "بيزين" كفوف ايده ويه بعض ومدهم على الطاولة كأنه بأجتماع عمل مهم والي راح يگوله اهم..

-بيزين: بدينا نشك بهذا الشي مدام

-ميسرة: ممكن توضح قصدك؟

-بيزين: شُهيب شمسون ما محتاج حماية احد مدام قيثارة ارجوا منچ تصححين معلوماتچ وتجرين بحوثات عن جماعتج اكثر

-مسرة: باحثة عنه واعرف كلشي يتعلق بي بس ارجع واگول الحماية احتاجها بس علما يتم الطلاق بشكل سلمي

-بيزين: ميحتاج شُهيب شمسون ما يگدرون يتخلصون منه الا غدر وهالشي لا يمكن يصير بسبب ابوه بظره

-ابوه مختفي

-سردار: What a day

-مسرة: ماله اثر شمسون اختفى وترك ولده ثلاثتهم بهذا الحال شُهيب تصاوب من قناص قبل يومين وچان راح بيها حياته مهددة ومالك تعرض للاغتيال مرتين بالفترة الفاتت وفلت منها ماعرف شلون وفاهد تواجه ويه صقر ريماس البارحة وتصاوب ابن عمهم

-بيزين: همه گد نفسهم مدام لا تخافين راح يبقون عايشين ويتم طلاقچ منه

-مسرة: شنو الديخليك هالگد متأكد؟

-بيزين: لان اني تدربت وياهم وشُهيب كان بدفعتي

-مسرة: تدريبات قتال قصدك؟

-بيزين: تدريبات وحوش

علامة استفهام انرسمت على راسي حاولت ما ابيّن اهتمامي وفضولي حتى يكمل على راحته وميشوفني مستقتلة وردة فعلي خلت بيزين يردف ببرود وهو يلعب بجداحته..

-تدربنا بـ روسيا عند واحد اسمه "غوغري" الاخوة چانو من اقوى الفئات الموجودة والمدرب الالماني "ڤاي" كان اكثر واحد فرحان بشنو صنع منهم..

-مسرة: اها

-بيزين: كانو سريعين، سفاحين، خفيفن الظل والحركة، واكثر من كان يسيطر على اعصابه وعنده قوة تحمل فضيعة هو شُهيب، الچبير والصغير انسحبوا قبله وسافروا عند ابوهم بقى شُهيب وكان صديقه المقرب اسمه موزس همه فريق وچانو اكثر ثنين يتحملون العذاب والضغط لدرجة چانو ينيمونا على ثلج لساعات و...

-ثلج؟

-قالب كبير من الثلج ننام عليه وما يسمحولنا نتحرك الا من يشوفونا نزرق وقلبنا يوشك على التجمد..

حچى واحد من الگاعدين يأيد كلام بيزين ويگول بعجرفة مستفزة..

-تدرين بسنة من السنوات كان بين ابن شمسون والموت شعرة؟ تواجه ويه مجموعة واطلقوا عليه النار، انصاب بـ طلقتين وشمر نفسه من جسر يذب روحه بالماي ونجى منها؟ وهاي مو مبالغة صار الموقف گدام عيني چنت موجود

-سردار: بأختصار شديد شُهيب متعرض لابشع انواع العذاب والتدريبات القاسية انتِ ما يصير تقارني ويه رجل عادي هذا السافل متعود على هاي الامور وما اعتقد مجموعة من الحثالاث راح يگدرون عليه للاسف

-مسرة: غدر! رادوا ياخذوه غدر قبل يومين وانتو گلتو هاي الطريقة الوحيدة اليگدرون يقتلوه بيها!

-سردار: خلص معناها اجه يومه

-مسرة: سردار ماريد اخذ من وقتك عزيزي راح تقدملي هذا المعروف لو لا؟

-سردار: لا

اخذت جنطتي وگمت اطلع من المكان معصبة وفاايرة ميهمني شنو واجه من تدريبات شُهيب ولا شلون كبر وشلون يگدر يواجه الخطر الي يهمني هو الغدر كل خوفي يروح بيها غدر اقوى الناس واكثرهم جرأة وبسالة انقتلوا غدر وما اتوقع شُهيب راح يكون استثناء!

-مسرة قيثارة

اللتفتت على صوت سردار يصيحلي، وگف من مكانه يسد سحاب جاكيته الجلد ورفع حاجبه يگول بتحدي..

-سردار: ثمان اضعاف سعر حمايتچ ونحمي ابن شمسون السافل

-مسرة: موافقة

-حمايته من الموت فقط أي شي اخر ما يهمنا

-تمام

-باچر اعتبري الحماية موجودة

هزيت راسي موافقة، سعر ثمان اضعاف حمايتي مبلغ مو بس ضخم هذا مبلغ عملاق وابوية راح يتسائل بشدة على هالفلوس وين راحوا بس مو مهم حياة شُهيب اهم من كلشي هسة..

-ما خلصنا

-مسرة: شنو تريد بعد

-صقر ريماس

-شبي؟

-وصلتنا معلومات بيناتكم شغل مشترك

-مو شغل مجرد حصانة منه

-بس تمنونين عليه

-المطلوب؟

-تقنعي ينضم النا

-انتو اعداء

-نريد نحسن الاوضاع بيناتنا

-ميسويها

-راح تگدرين تقنعي مسرة

-صقر مكتفي بنفسه وعشيرته ما محتاج حلفاء جدد

-حاولي

-احاول بس ما اضمنلك

-مشكلة

-هالشي ما راح يأثر على حماية شُهيب ولا على اتفاقنا

-الچ كلمتي

اومأت براسي وطلعت من المكان و سام يمشي ورايه، اكيد واكيد ما راح اقنع صقر ريماس حتى يتخالف ويه سردار لان هاي معناها كارثة حقيقية! ثنين زعماء كبار مثلهم يتحالفون سوه معناها البلد انتهى وعم الفساد والظلم وكلشي غلط ومحد راح يگدر يوگفهم لان معارف سردار ويه معارف صقر الكل راح يتكاتفون ايد بأيد وتصير مجازر.. اوكي ممكن هالشي يصير بالسنين القادمة ويتحالفون سوه بطريقة من الطرق بس اهم شي اني ميكون الي ايد بالموضوع وما اساهم بهيچ خطورة..

للتوضيح شغلي ويه سردار وصقر ريماس مو حتى امولهم لأجرامهم ولا اكون حليفة وياهم واشاركهم بالطغيان شغلي يمهم مرتبط بحمايتي من النفوس الي تريد تنهش لحمي ولحم ابوية وبس! همه يوفرولي الحماية اللازمة وأي احد يندگ بيه يملصون راسه ويدفنوا بمكانه وهالشي جداً جداً شائع بين رجال الاعمال يتم الدفع للاشرار بالقصة حتى يبتعدون عن طريقنا وميأذونا ويسرقونا لان المافيات حالهم حال قطاعين الطرق وما يمشون الا بالفلوس والرشوة واذا ما قدمتلهم شي اعتبر روحك بخبر كان..

**

"فيروز"

دخلت الشركة اهرول عبرت الساعة 9:30 الصبح راحت عليَّ نومة وما حسيت على المنبه خرب حظظي!

ركض دخلت لمكتب صبا لگيته فارغ طلعت اروح لمكتب وئام وميادة هم فارغ رحت لمكتب جولي مالها اثر عزه بعيني بس لا طلعوا وعافوني..

رحت لقاعة الاجتماعات چفتت افتح الباب على وسعها فحطانة، شفت الامة العربية هنا گاعدين من الفرحة صرت اضحك مثل المخبلات ودخلت اركض اخذلي كرسي واگعد..

-فيروز: عززه عبالي راح عليَّ الإجتماع

خزرتني صبا وعضتلي شفة جولي وعگد حاجبه نشوان وزفر مروان ورخى ربطة عنقه فاضل، درت وجهي للجهة الثانية اباوع للموظفين الجدد الگاعدين ومسرة المترأسة الطاولة وطابگة ايدها سوه ومادتهم على الميز..

-فيروز: ها شبيكم؟

-صبا: ههههه حبيبتي فيروز اهلاً وسهلاً بيچ.. احم نشوان؟

-نشوان: صح صح نورتي فاكهة حياتي ذولة المستثمرين الجدد يمكن ما انتبهتيلهم مو؟؟

-فيروز: يعني ذولة مو موظفين جدد؟

-نشوان: هههههه لا ذولة احم ذولة جايين من بريطانيا وربچ ما يفتهمون عربي يروحي

-فاضل: مصختها نشوان

-نشوان: المهم اي فيروز فشلتينا الله لا يفشلچ

-فيروز بهمس: يمعود شمعرفني اني

-مسرة: المهم...

كملت مسرة تحچي وياهم بالانكليزي واني مفتشلة شگد عيب فوگاها كلهم صاكين خزيت روحي گدامهم، كملنا الاجتماع واني صافنة صار شهر ونص اني هنا اشتغل بس لليوم احسني مو فاهمة شي ويومية اريد اترك واخلص من الفشلات..

طلعت من قاعة الاجتماعات وصرنا اني وشهلاء وجه بوجه ضحكت بصوت عالي ولزمت ذراعي تلفها بين ذراعها وتسولف بحماس مثل عادتها.. يمكن الشركة كلها عرفت هي خلعت زوجها والشركة كلها عرفت شهلاء مكرشة على شُهيب واهمها الشركة كلها عرفت مسرة قيثارة تريد تكتلها وتطردها منا!

علاقة مسرة وشُهيب متوترة متوترة متوترة متوترة والكل ملاحظ التنافر البيناتهم.. رجع شُهيب للشركة من اول اسبوع وره حادثته مگلوب گلاب حتى ابتسامة ميبتسم واعرف السبب اكيد لاني عايشة وياهم بنفس البيت.. السبب هو مسرة وجفائها وياه متباوع لوجهه ولا كأنه موجود ومُصرة على الطلاق وهو معاند وياهة..

ايام تبات ببيت ابوها ومتقبل ترجع وايام تجي بطلب من العلوية وماريا، يومية بالبيت تگب عركة بيناتهم واحنه البنات نتكتر على صفحة لو نگعد بغرفة وحدة نحير شلون نرجعهم سوه، مسرة ما صارحته بخبر حملها وهرموناتها گابة هم حمل وهم هموم..

-فاضل: شهلاء، فيروز ممكن تجون مكتبي بلا زحمة؟

رحنا وراه بسرعة نشوف شعنده نبرة صوته متطمن الله يستر، وگفنا گدام ميز المكتب مالته مثل الطالبات المسويات مصيبة واجن يواجهن المدير، گعد على الكرسي مالته وتنهد يفتح دگمة سترته الرسمية واشرلنا نگعد..

-فاضل: بنات شوكت ناوين تكملون المخطط؟

-شهلاء: اني معليه هاي فيروز!

-فيروز: باا چذابة هو منو يومية يأجل؟؟

-شهلاء: لان انتِ مزعوجة مني ومتقبلين نشتغل سوه!

-فيروز: مو صحيح هالحچي انتِ...

-فاضل: بنات شنو السالفة!

-شهلاء: استاذ اني ميهمني كله من فيروز انتَ تناقش وياهة اني اروح عندي شغل باي

شردت من المكتب تعوفني وحدي بوجه المدفع راح اتخبل من هالبنية ومن نظرات فاضل المتروسة عتاب لاني ما خلصت الشغل وتأخرت بي لهدرجة..

-فاضل: فيروز؟ شنو تبريرچ مدموزيل؟!!

-فيروز: ليش تنتر بيه اني شعليه

-ما نترت بيج اني..

-كل هذا وما نترت بيه؟ لعد اذا تنتر شلون!

-فيروز...

-لا تتعب نفسك سيد وصلت الفكرة شكراً على حسن استضافتكم

-حسن استضافتنا شنو؟ خاف جايبچ ببرنامج لقائات واني مادري تره هذا شغل

-اي نفس الشي انطيني ورقة بيضة بلا زحمة

انطاني ورقة بيضة من المكتب مالته يحطها گدامي ويسأل..

-شتسوين بيها؟

-اقدم استقالتي

سحب الورقة فوراً من گدامي فاتح عيونه بصدمة، حرك راسه نافي كم مرة وگال بسرعة..

-لاا اكيد ما اسمح بهذا الشي!!

-تسمح لو متسمح اني ماريد ابقى هنا

-فيروز هاي الشغلات تصير صدگيني كلشي بالتعويد يصير اسهل

-صارلي شهر ونص شوكت ناوية اتعود! ماريد ابقى هنا ماريد انطيني الورقة

-ماا انطيچ!

-انطيهاا

-گتلج ما انطي روحي ارتاحي شوية ونرجع نتناقش وره ما تهدأين

-ما راح اهدأ ما ابقى هنا گلت

گمت من مكاني اتقدم للمكتب مالته اسحب ورقة جديدة وجرها من ايدي معترض، ما اهتميت واخذت ثانية وهم اخذها من ايدي اخذت الثالثة وجرها مني وما قبلت انطيها تعقچت الورقة بين ايدي وايده نتحارب هو يسحب واني اسحب..

-راح تنشگ الورقة هددهاا

-وشگتهمم

-هدها سيدد

-فيروز ما يصير تستسلمين بهالسرعة!

-مااريد خوية مااريد تعبتت

-اني اساعدچ

-وتعوف شغلك وتحير بيه؟؟

-ايي

-لاا انتَ شنو ذنبك انطيني الورقة

-والعبااس ما انطيهاا

-شتريد منيي

-اريد اسااعدچ

-ماريد مساعدة اريد استقييل تعبانة اريد ارجع للعراق

-فيروز انتِ شاطرة وامرأة ناجحة لا تخلين فشل مشروع واحد يأثر على نفسيتچ گتلچ اني ويااچ وما اعوفچ يا بنيية

-مكاني مو هنا فاضل راح تضيع وقتك

-قابل

-شتستفاد؟؟

-شعليچ انتِ! لا تعاندين وابقي هنا راح اساعدچ بكلشي اگدرله راح اعاونچ لا تتخيلين روحچ فاشلة كلنا اجينا مثلچ ما نعرف وتعلمنا بمرور الوقت صارت عدنا خبرة

-مو..

-لا تگولين مو اعتمدي عليَّ ما اخيّب ظنچ

-وقتك يضيع

-جاي اگلچ اني راضي لا تعيدين وتزيدين بنفس الحچي والحجة

سكتت اباوع بعيونه وهو هم مثبت عيونه على وجهي، حسيت بالحمرة تكتسي خدودي والخجل سيطر عليَّ، كسر عيونه فوراً من طالت نظراتنا وشاف وضعي تغير..

-شكراً فاضل

-تدللين

-اني.. انـ.. اني هاي راح اروح

-تمام تمام

-اروح لشسمها

-صح لازم ترحين

-اي واشتغل وياهة

-نعم ضروري

-وهاي اشوف شنو عدها وهاي

-عفية خوبه

-باي

-الله وياچ

درتله ظهري احط ايدي على خدودي الحاميات، اللتفتت من صاحلي من جديد يسأل بتردد واضح..

-انتِ.. انتِ هم ترحين للحفلة؟

-حفلة شنو؟

-حفلة نجاح اخر مشروع النا

-شوكت هاي؟

-اليوم ذكرناها بالاجتماع فيروز

-اي.. مو...

-راح تكون اسبوع الجاي

-تمام راح اجي

-انتظرچ

رمشت رمشتين وره بعض من كلمته وهو هم انتبه على نفسه وعدلها فوراً ويحمحم..

-احم.. اقصد ننتظرچ، يعني كلنا جميعاً ننتظرچ

-تمام

-في امان الله

-باي

-بحفظ الرحمن

-باي

-الله وياچ

-با... اسفة چلبت يله اني رايحة

ابتسم يهز براسه وطلعت اهرول من المكتب يمة يمة يمة مو فاضل ضيم والعياذ بالله عنده اسلوب تقنيع رهيب الله يحفظه لشبابه شگد انسان لطيف وخلوق..

رجعت للبيت واول ما فتت سلمت على العلوية الملتهية تحضر جنطتها راح ترجع للعراق للاسف وابقى وحدي، تركتها وصعدت فوگ لغرفتي افتح كنتوري اشوف شنو اللبس بالحفلة، هاي اول حفلة احضرها هنا واحسها راح تكون رهيبة.. وچانت فعلاً رهيبة بطريقة بشعة، عنيفة، مؤلمة، مظلمة، ظالمة، بينت الوجوه الحقيقية بيها، نهت حياة ومستقبل ناس وفقدت عقول ناس واكلت سنين من عمر ناس....

يتبع.... 😭

━━━━━━  ━━━━━━

التغشوووشة على الانستا منو تذكرهااا؟ 😭🔥🔥🔥🔥🔥🔥

توقعاتكممم 💀🩷🩷🩷🩷؟؟؟

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

نشف ريج الحزن، والوادم تغني

وانه من بعيد، احب الما رضى يحبني

شبدر مني...؟ 🥀

━━━━━━  ━━━━━━

"جنات"

غمضت عيوني نافخة هوا اريح نفسي واستمتع بهذا الجو الربيعي الحلو، هستوني كملت المحاضرة نفسها محاضرة دكتور رائد بس غيرت على غير دكتور ميوصل ربع من شرح دكتور رائد بس شسوي حكم الططوة عليَّ قوي..

-رزان: اهووو اجت بت عمچ الكورية

-جنات: كيان مو بنت عمي رزان تصير اخت ابن عمي بث اي هم بنت عمي وصديقتي وترحيلها فدوة

-كيان: هلو

-جنات: هلو وينچ اليوم ما اجيتيني مو اتفقنا نتريگ ويه بعض؟

-كيان: مالي واهس جناوي شو احسني ضايجة

-رزان: گضيتي عمرچ ضايجة

-كيان: وانتِ شيخصچ؟

-رزان: على كيفچ عيني شگلنا احنه

-كيان: هاي شبيها؟ جنات گوليلهة لا تنرفزني تره هسة اكتلها هنا واسوينا فرجة للعالم

-رزان: لجج هاي المن تكتلينن ام عيون مسحووبة

-كيان: سليييمة كاتلاتها عيوني المسحوبة ام كفشة

-رزان: جناااات لصمي بت عمج ما طايقتهاا

-جنات: الثبع يطلع دم والفاهي يطلع زاهي الثبع يطلع دم والفاهي يطلع زااهي

-رزان: جنات صدگ تحچين انتِ!

-كيان: هاي بدال ما تفاككينا!

-جنات: شبيچن مشتاقة للعركات فاهد ماكو تعالن انتن بداله

-رزان: والله صح مكانه فارغ

-كيان: دنلصميي انتِ

-رزان: ا...

-جنات: انچبي رزان زوجها وحقها تغار عليه شكو تحچين بي؟

-رزان: دروحن ترفعن الضغطط

عافتنا وراحت مطنگرة، كيان ورزان وحدة تكره الثانية ميطيقن بعض وما معلوم شنو السبب الرئيسي، بالبداية كلت رزان عاجبها فاهد وغارت من عرفته متزوج كيان بس بعدين طلع احساسي غلط وهي هيچ تكرهها من وحدها..

-كيان: همزين راحت مابيه حيل اتعارك

-جنات: والله فارغات يومية تتناگرن على شنو؟

-كيان: مادري عوفيها ختولي، جنات اني لحد هاي اللحظة ما مستوعبة فاهد دياخذ الدكتوراه لچ عبالي يضحك عليَّ من گلي اول مرة!!

-جنات: ياا راح يخلص اطروحته ما بقالها شي كله كم يوم

-كيان: يارب يرجع ويكملها ومتروح عليه بسبب اختفائه

-جنات: لسه ماكو خبر عنه؟

-كيان: لا، وانتِ مالك ماعندج اخباره؟

-جنات: لا ما اتصل بيه بعد بث اني اعرف هو بخير اخر يوم چنه ويه بعض ودعني وگلي ما اقلق اذا ما اتصل بيه لان يخاف اكو احد راح يراقب تلفوناته بدون ما يدري يخاف لا يثببولي مشاكل من يعرفون بي يتواصل ويايه

-زين وفاهد؟؟ ليش محد عنده اخباره ليش محد ديطمنني عليه!

-شفتي هارون؟

-لا ماكو حتى هارون مدا يداوم اخر خبر وصلني اخو تميم متصاوب ورجله اليسرة ضربت مدا يگدر يمشي عليها زين

-جنات: ان شاء الله ماكو شي كيان لا تخافين

-كيان: عجيب شهر ونص فاهد مختفي تره هالشي مو بس يخوف اني حتى افكار مو زينة دتصير بعقلي صايرة اتخيله يضحك عليَّ وما تخطى من حچيتله الحقيقة بس علقني بي وعافني راح اموت قهر جناات شسوي التفكير اكل راسيي

-لا تفكرين هيچ فاهد يحبج هو بث عنده ظروف وتدرين البشر ظروفه تتغلب عليه مالك حچالي حياتهم شگد صعبة وشكد عدهم عداوات يردون يكتلوهم ويخلصون منهم

هزت راسها هادئة وسرحت بالفضاء تفكر، ما اللومها الوضع الي بي كيان ميبشر بخير اخر تواصل صار بينها وبين فاهد چان قبل شهر ونص من اخذها لذاك البيت وتطورت علاقتهم وراهة اختفى ومحد جابلنا خبر عنه ولا هو تواصل وياهة..

اوقات اتفق ويه افكارها من تگول ديعاقبها لانها ضمت عليه بعض الاسرار بس طبعاً ما اتفق وياها بوجهها احتفظ بالموضوع لنفسي حتى ما ازيد وضعها سوء..

اخوانها حادين سنونهم اكثر من مرة حاولو يتواصلون وياه ويتصلون بي حتى يمشون بأجراءات الطلاق بس ميتحصل حتى نشوان الفرفوشي طگت روحه وهو يشوف اخته يوم بعد يوم تذبل وتنحني..

تمشينا اني وياهة للكافتيريا طلبنا اكل وگعدنا نسولف أغيرلها جو شوية، بقت تاكل وتنطي اعذار كل شوية تصفن وتگول..

-اني متأكدة هو يحبني تره هو گالها والله بدون لا اضغط عليه وحده گال احبچ

-صح اكيد

-اي، زين انتِ مالك شلون گلچ احبچ اريد اقارن واشوف الفرق

-گتلج ببيته بيوم الرحت ادور كتابي الضايع

-هااا اي يعني هم مو تحت الضغط لا لا عيني يحبونا قابل هو لعب

-صح صح

-زين باعي راح اتعمق بأسئلتي تحمليني

-لااا انچبي

-حبابة جاوبيني

-لو تموتين

-حبابة حبابة لخاطري جنات هو منو اكو غيرنا هنا بس اريد يرتاح گلبي

-لچ ماكو مقارنة بين مالك وفاهد ماكوو

-بس همه اخوان

-واذا اخوان؟ قابل الاخوان معناها لازم يكونون نفث الشخصيات؟

-شمدريني جنات

-كيان وعد اول ما يتواصل ويايه ملاك راح اخلي يحچيلي عن فاهد وينه وليش مختفي

-حبابة خليني اكون موجودة من تحچين وياه بس طبعاً وره ما تكملون سوالفكم الفاسقة صيحيلي

بوخت والحرارة صعدت لخدودي نزلت عيوني اللعب بماعوني وكيان تضحك وتصنف عليَّ..

-كيان: هالخبلة بعدها تستحي وتصير حمرة يمعودة تخطي جنات تخطيي

-خلينا نغير الموضوع فدوة

وقبل لا تجاوبني شفنا شخص ما متوقعين حضوره هنا، شفنا هارون من بعيد يدخل للكافتيريا واخو تميم مستند عليه وعكازة بأيده الثانية..

-جنات: كيان هذاك هارون!!

اللتفتت بسرعة تدوره وتتلفت كل مكان اكثر من مرة رصدته بعينها بس متستوعب هذا نفسه بسبب الاختلاف الصاير على ملامحه، وجهه مگلوب گلاب من الجروح والكدمات صاير يخوف اكثر مما چان مخيف قبل..

وهي بمكانها اشرتله حتى ينتبه عليها شافنا من بعيد وهز راسه اي، اللتفتت تنطي ظهرها وصارت تطگطگ بأصابعها متوترة..

-جنات: ليش صحتيله خو انتِ روحي احچي وياه

-كيان: رجليه متحملني بعد دا ارجف من جوه

تفهمت وضعها واشرتلهم يجون اسرع، اول ما وصل يمنا سلم عليَّ بما ان احنه اولاد عم..

-هارون: حليانه ولج شنو تاكلين ما تگليلي

-جنات: باچة

-هارون: ما اصدگ مالك الكلاس يوكلچ باچه

-تميم: هههه شلونچ جنات

-جنات: بخير انتَ شلونك ولو مبين وضعك زبالة

-تميم: وحگ ربچ مو بس زبالة وضعي طامس بالخ**

-جنات: مبين مبين مو لازم تشرح

-تميم: شنو اخبارج شلونها الدراسة وياچ؟

-كيان: اسفك على المقاطعة، هارون عندك اخبار فاهد؟؟

تنهد وجر كرسي يگعد ويانه وتميم هم، مد رجله المتصاوبة وحط العكازة بصفه، اللتفتلي وگال بابتسامة..

-خوما تنزعجين من گعدتنا وياكم؟

-جنات: انزعج والله بث يله شثوي اتحملكم تبقون ولد عمي

-تميم: على طاري ولد عمچ مالك ما رجعلج فلوسج مو؟

-جنات: بعده يشتغل على الموضوع

-تميم بأبتسامة: رجعهن

-جنات: صدگ تحچي؟؟؟

-تميم: اي بس انتبهي محد ومحد لازم يعرف بهذا الشي مالك امن الموضوع عندي واساس جيتي هنا اليوم ادورچ حتى توقعيلي هاي الاوراق

طلع من الملف الي بيده اوراق وحطهن گدامي ويه قلم جاف..

-وقعي هنا

-ذني مال شنو؟

-ذني تنازل تام منه ينقل الاملاك بأسمچ مرة ثانية بس محتاجين توقيعچ

-تميم اخاف

-ليش؟

-اخاف هاي اوراق طلاق ويريدني اوقع حتى نتطلگ

-حسب ما سمعت انتِ تردين تطلگين منه؟ اكو شي تغير؟

-هاا..؟

-تميم: اتفاقكم تغير؟

-هثة عوفك من موضوع الطلاق انطيني الورقة.. هاچ كيان اقريلي وترجميلي خاف ما افهم كلمة

اخذتها كيان روحها طالعة تريد بس تسأل على فاهد بس عذرتني واخذتها تقراها، دمعت عيوني من تأكدت هاي فعلاً املاكي ديرجعهن كلهن مع تعويض مادي..

-جنات: ليش منطيني تعويض مادي؟

-تميم: حتى شمسون ما يحس اخذ من حسابه فلوس املاكچ، اخذ اكثر وحولهن الچ دفعة وحدة گدام ابوه گله اشتريت بيت جديد واحتاجيت هاي الفلوس لان لو ما گايل هذا العذر شمسون مستحيل راح يسمحله يتلاعب بالفلوس حتى لو هنه بحساب مالك البنكي

هزيت راسي واخذت القلم ووقعت الاوراق وهيچ رجعتلي كل املاكي بدون أي اضرار جانبية بس يا خوفي هالشي يرجع علينا بشكل مو زين..

-كيان: اسفة لان دا اقاطع هيچ موضوع مهم بس هارون ما جاوبتني فاهد وين؟

-هارون: ماعرف

-كيان: لا تچذب!!!

-جنات: كيان اهدأي

-هارون: ما مچذب اني صدگ ماعرفه وين اخر مرة شفته قبل ثلاث اسابيع بـ روسيا وبعد سافر ماعرف وين راح ولا يجاوب اتصالات

-كيان: ليش ميتصل بيه؟؟ يستخسر يرفع عليَّ تلفون؟!!

-هارون: ماعرف بعد مو يمي هاي

-كيان: مو صوچه صوچي انييي الكاتلة نفسي وگاعدة على اعصابي صار اكثر من شههر!!

نترت جملتها بعصبية شديدة وگامت تعوفنا وتطلع من الكافتيريا، شفت عيون هارون تراقبها وما نزلت منها الا من اختفت وره الباب وضاع جسمها خلفه، عگدت حاجبي ويه حسرته القوية فرك وجهه وصار ياكل بشفته السفلية وسرح شنو سالفته؟

-جنات: ليش شكلك مزعوج؟

-هارون: اني؟

-جنات: اي، تعرف شي عن فاهد وما بلغتها؟

-هارون: لا والله ماعرف وروح امي وابوية وهذا تميم گدامج سألي ماعرف شي عنه

ما سألت زايد هارون ضايج ومعصب ووجهه والكدمات الي محاوطته خلتني اسكت واسلم على روحي لا ينفجر بيه، گام يطلع من الكافتيريا وعافني ويه تميم يسولفلي عن اخر اخبارهم وعن اهلنا الي بالعراق..

**

-كياان.. كياااان وينج اوگفيي

-كيان: رووح هارون شكو جاي ورايه؟؟

-هارون: شبيچ معصبة خليني احچي وياچ

-شتحچي؟! شنو اكو بيني وبينك حتى نحچي بي؟؟

-شبيچ كيان

-هارون ما طايقة روحي رووح منييي

-شنو هاي جاي تبچين؟

-وخرر معليك انتَ

جرني من ايدي بقوة يديرني اله سحبت ايدي من بين ايده فوراً وضميتها لصدري خازرته على تصرفه..

-كيان: شكوو تجرني من ايدي هيجج؟؟

-هارون: لاني كلت الف مررة اوگفي وانتِ ما مهتمة!!

-وگفت شتريد؟؟

-انتِ اذا ضايجة من فاهد اني شيخصني منفسة عليَّ؟!

-ما منفسة عليك اني بس ضايجة وماريد احجي ويه احد

-شاركيني ضوجتچ

-نعم؟!

-شاركيني من شنو ضايجة يمكن اكدر اساعد

-فاهد! سبب ضوجتي فاهد وسمعتك زين جوه انتَ متعرف شي عنه او تعرف وضام عليَّ ماعرف بس بكل الاحوال ما فدتني بشي

-بيمن احلف وتصدگيني ماعرف شي بخصوص فاهد مااعرف يا نااس يا عاالم اصلاً اخر مرة تشاوفنا تكاتلنا

-ليش؟

-على شي تافه

-شنو هو

-عليج

-شنوو؟؟

-ماعرف منو موصله خبر اني جنت وياچ بمهمة المستشفى الي رادج شمسون تكمليها تخبل وانگلب فرعون عليَّ سب وشتم وكتل وضرب لعب طوبة

-وانتَ شنو گتله؟

-شرحتله الصار بالحرف وشرحتله من ساعدتچ ودفعت لواحد فلوس حتى يساعدج و..

-ويصورني!!

-شيصور منج؟

-يصورني واني احچي بمالك! هارون انتَ غشيتني ولعبت عليَّ انتَ ما ساعدتني انتَ دمرتنيي!!

-يا مالك يا تصوير انتِ شتحچين كلشي ما جاي افتهم

حچيتله كلشي مختصر مفيد ظل صافن كلشي ما حچى ولا ابدى ردة فعل غير الضحك، ضحك ضحكة عالية بصوت يشبه صوت فاهد لدرجة ظليت صافنة عليه وعلى الشبه الفضيع بيناتهم..

-هارون: من كل عقلچ تتوقعين اني مصورچ؟؟ والمن ادز التصوير لفاهد؟؟ هههههههههههههههههههههههههههه كيان انتِ تضحكيتي هههههههه

-كيان: وليش متدزه بله؟!

-هارون: اكو واحد يثبت تهمة عليه بهالطريقة؟! اني حذفت وحرگت شكو شي يربطني بيج بذاك اليوم تتخيلين ادزله تصوير؟؟

-لعد منو دزه

-شمسون!! اكو غير خ** دازه!!

-هو وينه هالنعاال

-مليوصة عليه

-شلون

-مطلوب اسمه من قبل كم جهة وصايرتلج هوسة ودوخة

-كول والله!!!!

-والله شبه انتهى شمسون وراسه مطلوب بس المشكلة كل مشاكله وكعت براس ولده

-راح يكونون بخير مو؟؟

-مادري

-هارون حباب لا تخوفني

-كيان مو بيدي هاي الامور شمسون متخذ اولاده طُعم ومخليهم قربان لاعماله

-شنو اسوء شي ممكن يصيرلهم؟؟

-ماكو اسوء من الموت

انخسف گلبي ماتحملت احبس دموعي اكثر وصارت عيوني تصب، تقرب هارون كم خطوة صار مقابيلي بالضبط وگال وهو يواسيني..

-ان شاء الله ما توصل لهاي المرحلة

-لا تعوفهم عفية خلي عمامك يتكاتفون وولد عمامك كلهم ويساعدوهم

-المشكلة عمامي تبروا من جعفر ما يردوا وولدهم مأمورين ومحكومين من قبل اهلهم ما يگدرون يتحركون منا لهنا بدون لا يوصل خبر لعمامي

سودت الدنيا بعيوني اكثر عفته واگف ومشيت اطلع من الجامعة بس بعدني احس بي يمشي ورايه، اللتفتت عليه لگيته يراسل بتلفونه من شافني اباوعله نزل التلفون وحرك راسه بمعنى "شنو؟"

-ليش تمشي وراية؟

-ما ماشي وراج جاي اطلع من الجامعة

كملت طريقي لحد موقع الباصات وهو بعده خلفي مباشرة، زفرت نفس متنرفزة من وجوده سمعته يضحك بدون ما احتاج اسأل گال..

-سيارتي موگفها هنا شبيچ

-صدگتك

ضحك بصوت اعلى يعبرني وطلع بصمة سيارته يفتح اقفال سيارة "BMW" گدامي بالضبط وغمزلي بمعنى شوفي ما چذبت..

-كيان: ديلا خوش

-هارون: منفسة عليَّ البنية اليوم

گالها وراح لمقدمة سيارته يشوف گاصيله تذكرة لان موگفها بمكان غلط، شاله قراه لثانيتين وشگه وذبه وبالحاوية ما مهتم يركب سيارته..

لو شايفة شرطي يگصله تذكرة ثانية وثالثة ورابعة وميشفى گلبه، نزل جامة سيارته وصوفرلي يخليني اركز بي..

-هارون: ما تصعد وياي كوري؟

-كيان: لو اموت

-هارون: اخذج لمكان حلو

-كيان بهمس: يا سافل

-هارون: ههههههههه اتشاقه اتشاقه لا يشطح بالج بعيد اخذج للبيت

-ماريد

ركضت للباص الي وصل ركبته وتوجهت للبيت، اول ما دخلت باب بيت ماريا شفت كائن قصير ناعم يطييير من گدامي ويركض بكل سرعته الدرج..

-كيان: مسررررة

اللتفتت بسرعة شعرها متناثر على وجهها وتلهث مخترعة، باوعت للباب الوراية ورجعت انظارها الي..

-كيان: يمعودة انتِ حامل شلون تركضين هيچ

-مسرة: راح يجي راح يجيي

-منوو

-شُهيب راح يجينيييي ونتماااطل

صرختها وهربت ما سمعت الا صوت باب قفل غرفتها ينقفل، ثواني ورجع انفتح باب البيت يظهر منه شُهيب عاگد حاجبه ومعصب..

-شُهيب: وين راحت؟!

-كيان: صعدت للغرفة وقفلتها

-اني اعلمها هالنتفة

صعد الدرج يطبگ بايتين بايتين واختفى من ناظري، ضحكت بصوت عالي من سمعته يدگ بالباب مال الغرفة ويصيح..

-فتحيي الباب مسرررة فتحيهاا يالنتفةة

-مسرة: ماا افتح روووح

-شُهيب: اكسررهاا والله

-مسرة: اشهههههب رووووح

-شُهيب: شهبتييي حاله لأشهب فتحي الباااب

-مسرة: ماا افتححح والله ادچككك

-هو اني ارييدج تدچيني فتحييي

-لا تحاول ماا افتتح

-مو تردييين تدچيني يلاا لو انتِ بس شعارات مو گد كلمتچ

-كد كلمتيي وغصباً على ابوووك خطييية منو دچتك اول ما تعرفناا خالتيييي؟؟؟

-مسرررة

-انوب راح يوشملي فوگ الجررح المررريض

-فتحييي الباااب خليني اراويچ المرريض شيسووي

-هاي شبيك اشهب اتشاااااقه

اسمعهم وميتة ميتة من الضحك البيت فارغ بس اني وهمه فوگ يتلاسنون اول مرة اشوف شُهيب هيجي عصبي وياهة وهي معاندة ومبين خايفة منه وهالشي بحيااتي كلها ما شايفته..

-شُهيب: مسرررة بس اسألچ لييش تقيأتيي بأجتمااع اليوووم فتحيي الباااب

-مسرة: يبوووو على عمري يعني الواحد ميتقيء براحته؟؟ حتى هااي تريد تحاسبني عليهااا

-مسررررة راح اكسر الباب وداعة امييي

-لاااااااا نااازعة ملابسييي

-هسة شلوون تخليني احچي حچاية شكبررهاا

-ولك شُهيب تعيرني لان انطيتك مجال كم مرررة

-ولج ولج كيااان جوه ووولج

-مسرة: تطشر عرررضك شهووبي

-شُهيب: حبيبتي انتِ گلبي وروحي ما رايد منج شي لبسي أي شي على جسمج وطلعيلي خلينا نحجي

-شنحچي؟؟

-ليش تقيأتيي ووجهچ اصففر صارلج فتررة

-سكررري مرتفععع

-مرتفع لييشش؟؟ واذا السكر يرتفع تتقيأيين؟؟!

-اي اي

-لا تچذبيننن مسرررة اشايفتني زعطوووط

-شُهيب عوفنيييي وحزااام العباس مابيه شييي

-حزام العباس شنو؟!!!!

-مادري فاااهد مرة گالهاا

حچيت من مكاني بصوت ناصي بس وصل لـ شُهيب..

-كيان: لا فاهد يگول حزام الحمزة مو حزام العباس غلطانة سرور

-شُهيب: حزام الحمززة مو حزام العباااس طلعييي

-مسرة: شهوبي راح اموت

-شُهيب: ليييش؟؟؟

-احس راح اموت اللحگني

-شلحگ وانتِ قاااافلة البااااب فتحييي القندررررة

-شُهيب اظفري انشلع شُهههيب اللحگنيييي

-انتِ صدگ تحچين؟!!

-اييي يا صالوون يستقبلنييي هسة اقل شي حجز قبل ثلاث اياام كله منن وراااااك

-شُهيب: بسيطة مسرة اني الچ عبالج تضيعين الموضوع اني اعرف شلون اتصرف وياچ

-مسرة: اوكي وجيبلي بدربك عصير بطيخ مشتهيته

-شُهيب: تتشهييين وتگولين مابيچ شي؟!!

-مسرة: عمي مااريد شنو كفرتتت لان اشتهيت شي

عافها ونزل يدردم ومحروگ دمه، باوعلي مخنزر گمت اطاطگ من نظراته وانفاسه العالية، وگف مقابيلي وسأل بجدية ممزوجة بعصبية..

-مسرة شبيها؟!

-كيان: شبيها

-شبيها مو على بعضها؟؟

-كلشي مابيها متشوف لسانها شطوله وتريد تدچك

-كيان!!

-شُهيب ماعرف شيي ليش كلكممم دتضغطوون عليَّ اني تعبااانة تعباااانة..

عفته اعيط وابچي وصعدت لغرفتي، اللتفتتله لگيته فاتح عيونه وحلگه سوه مصدوم حرك راسه ما مصدگ وگال..

-شُهيب: ذني شبيهن كلهن متخبلات

-كيان: اسسسأل اخووك المسوودن

ركضت لغرفتي اكمل بچي، حابسة البچية من حچيت ويه هارون لسه وما تحملت اسئلة شُهيب وخفت احچي واللوص الوضع على مسرة گمت اعوي مثل الثولة..

نص ساعة واندگت باب غرفتي، مسحت دموعي ورتبت نفسي وسمحتلهم بالدخول طلع شُهيب، انتفضت من شفته خرب بس لا اجه يكمل اسئلته..

-كيان تعالي اريدچ شوية حبيبتي

-شُهيب اذا الموضوع متعلق بمسرة فـ صدگني...

-ما يخص مسرة، تعالي

طلع ورحت وراه ننزل للاستقبال طبگ الباب علينا وقفلها رجليه گامت توجعني فجأة ومعدتي تقلصت من جرني من ايدي يگعدني ويگعد مقابيلي ويذب نفس متعب..

-كيان

-نعم

-كيان تتذكرين من چنت بالمغرب واتصلت بيج ابلغچ ترحين لبيت اخوانچ لو ما تذكرين؟

-اتذكر

-بوكتها رحتي بس ما لحگتي تبقين هناك لان العلوية طلبت كلنا نعيش هنا ومحد يكسر كلمة العلوية صح لو لا؟

-صح

-صارت ظروف قوية عندي ما لحگت افهمج الموضوع بس خلص وصلت حدها وراح نفض السالفة هسة واليوم

-شنو هو

-انتِ وفاهد

-بخوف: شبينه؟

-انتِ وفاهد علاقتكم عقيمة

-شُهيب والله فاهد يحبني صدگني هو بس..

-يحب وحدة ثانية

-لا لا هو عافها صدگني عافها ولا عبالك اني راضية على هالشي ما رجعتله ولا حسنت علاقتي بي الا من تأكدت طلعت من گلبه

-ما طلعت من گلبه كيان

-طلعت لانه يحبني

-فاهد ميعرف شنو معناة حُب وهاي مشكلته، التعلق والتعويد يعتبره حُب بس هالشي مو صحيح التعويد هم يجي يوم نمل منه ومن نفس الروتين والتعلق يجي يوم ويستبدل بأنسان ثاني كيان

صوته هادئ ويشدد على كلماته وكأنه يريدني استوعب كل كلمة تطلع من فمه قبل لا يدخل بصلب الموضوع..

-كيان: قصدك فاهد ميحبني

-لا، اني ما گاعد بگلبه ولا اعرف مشاعره تجاهچ شنو انتِ زوجته وانتِ اعرف بي لكن كلامي هو فاهد لو چان يحبچ معناها هو نسى سارة وحتى لو ما نساها فـ هو جاي يحاول ينساها وهالشي زين بس سؤالي هو.. كيان هل انتِ مستعدة تتحملين تقلباته المزاجية وتقلبات مشاعره بين فترة والثانية؟ هل مستعدة تعيشين بقية حياتج ويه انسان ميعرف شنو يريد؟ مستعدة تكونين اسرة ويه رجل ممكن يعتبرج بديل لحبيبته الما حصلها؟

-سارة چانت بين ايده بس تنازل عنها علمودي شُهيب

-صحيح وحلو هذا الشي بس فاهد بداخله يعرف علاقته بسارة مستحيل تكمل حتى لو اخذها وشرد بيها لنهاية العالم.. سارة متزوجة وحامل ولا يمكن زوجها يعوفها وحتى لو عافها ابوها وجدها ما يتركوها

-شُهيب

-كيان كلامي مو حتى اأذيچ واجرح گلبچ اني اجيت اصارحچ بالحقيقة! اني قصرت ما بلغتج بهذا الشي قبل زواجكم بس شفتج مستقتلة عليه واخذت كلمة من فاهد وابوية هو نسى سارة بس صدمني..

-عافها هو والله

-عافها لان زوجها حمزة غيث وريث ابوه ولا يمكن يگدر ينافسه مهما بلغت قوته خصوصاً وابوية شايل ايده من علاقة فاهد وسارة وما رادها تكمل من البداية ضحك على فاهد سنين وأوهمه هي الك وكمللي هالشغلة سارة نهايتها ببيتك بس وقعلي هالصفقة سارة وسارة وسارة.. كلشي بحياة فاهد مرتبط بسارة لذلك صعب جداً تنسي من گلبه ويغيب اثرها اريدج تستوعبين هالشي وتفتهمي عدل

-شنو اسوي

نزلت دمعتي تچوي خدي دمعة اذتني وطلعت من گلبي مو بس عيني، مد ايده يمسحها بأبهامه بلطف واردف بهدوء أشد..

-احنه وياچ بكل قراراتج لا تخافين من شي واحنه بظهرج بنيتي، فكري زين بعلاقتج وياه ورجعيلنا خبر

-هو وين؟

سكت ميجاوبني، قلقت من ملامحه الي لانت ودار عيونه مني.. لزمت ايده اهزها واسئل متوترة..

-فاهد بخير مو؟؟ مابي شي؟؟

-هو بخير

-لعد وينه؟

-ماريدج تنجرحين حبيبتي

-گول شُهيب گلبي انترس جروح احچيلي

ذب نفس وحرك راسه معترض، نزل عيونه ميقبل يحطها بعيوني توترت ووضعي تخربط احس روحي خرطت..

-شنو صاير شُهيب

-فاهد سافر كيان

-ادري هارون گال شاف فاهد بروسيا

-لا هو بالمغرب وطيارته چانت البارحة بـ 2 بالليل

-علمود مالك؟؟

سكت وانعصر گلبي ويه صمته، شددت على ايده حتى يجاوبني وما حسيت بروحي من نبتت اظافري بأيده من التوتر..

-جاوبني علمود مالك موو؟؟

-علمود سارة

عضيت على شفتي السفلية لا ارادي وغمضت عيوني اركز ويه نبضات گلبي الراح يوگف، احتاج ارجع نبضي طبيعي لا انهار هنا گدامه، اخذت شهيق وزفير خفيف وبطيء وسألت..

-ليش راح؟

-اجاه خبر سارة نقلوها للمستشفى فاهد تخبل وصار يضرب كلشي گدامه وعنف نفسه بدون لا يحس وحجز وسافرلها طلع موديها للمستشفى لانها جابت طفل.. جابت ولد بالتحديد

ماتحملت اللزم دموعي اكثر وصارت تنزل بغزارة، صرت اشهگ بصوت عالي مكسورة روحي وقفصي الصدري ما متحمل ضربات وطعنات اكثر، وگعت روحي بحضن شُهيب افرغ طاقتي عنده وابچي بكاء اول مرة اعرف بروحي كاتمته شهگات طلعت وگطعتني الف وصلة..

-اني اسف كيان

-شُهيب فاهد چذااب چذااااب گال هو يريدني ويحبني چذذب عليييَّ دمررني وراااح

-ما چذب عليج حبيبتي فاهد يحبچ ويحبچ هواي لان فاهد مستحيل يعترف بحبه وتعلقه بشخص وهو ما يريده مستحييل!!

-وروحته للمستشفى شنو تفسرها؟؟

-گتلج هو مهووس والهوس صعب كيان ويوجع الروح انتِ اختي وحبيبتي وبنيتي وفاهد ما اغلي عليج بس اني اتفهمه واتفهم مشاعره ولوبة گلبه احس بي واعرف بشنو جاي يمر هو يحتاج فترة يتعالج وينزع هالهوس الصعب من گلبه وهذا سبب اجيتچ وناقشتچ بهذا الموضوع

-شنوو اسوي والله راح امووت ومحد متعذب ومتوجع غيرري هناا هو ميححس بييه ولا يححس بمشاعري الحاي ينلعب بيهاا

-ما لعب بمشاعرچ هو يحبچ الچ بس سارة نايمة براسه هو ما يحبها لان لو يحبها ما ينطيچ مجال ولا ينطيچ امل ولا واحد بالمية لان بحياتي ما شفت انسان جريء وصلف وصريح وما يخاف من احد مثل فاهد!

-انتَ تدافعله لانه اخوك

-وانتِ اختي

-شسوووي ماااريد اعيش هيج اني تعبت من هالوضع تعبت عافنيي شهر ونص بدون اتصال واول ما سمع بيها بالمستشفى حجز وراح يسافرلهاا!!

-بعد يمچ القرار واني واجهتج بكلشي حتى تفكرين وتنطين قرارج بدون تسرع

-ماريده

-شنو؟

-ماريد فاهد اريد اتطلگ منه

-كيان فكري زين

-ما اريده شُهيب!! اني مو رخيصة ولا بديلة اله يكمل منها ويرجعلي! اني اخذت قراري وما اريد فاهد! لو اني بمكانه وفرضاً عندي حبيب وتركته وتزوجت وافتهمت بحبيبي بالمستشفى اعوف زوجي واروحله؟؟ فاهد راح يتقبل هذا الشي لو لا!!

-اكيد لا

-لعد اني هم ما اتقبله! اني مو من صخر گلبي مو حجارة! اني انسانة تتعب وتتألم تتوجع وتموت الف موتة من هالحياة البائسة خللص تعبت اني ما استحق كلل هالاشياء! اني غلطت هواي بحياتي ايي اعترف بس تعاقبت بما يكفي شجاريلي اكمل ويه رجال گلبه ويه غيري؟؟

-قرار نهائي؟

-نهائي وما راح اتراجع عنه باچر من الصبح نطلع للمحكمة ونخلص اجراءات الطلاق بس لا يوصل الموضوع لفاهد هسة خاف ميرجع اطلب منه يجي هنا كأنك محتاج منه شي مهم

-ماعندي تواصل وياه عرفت من حماية مالك الحاطهم يتابعون فاهد بغيابه

-انطي الخبر الهم وهمه يتواصلون وياه

عفته وگمت اطلع من الاستقبال گلبي منتهي، دائماً اسمع بمصطلح گلبي ينزف دم بس هاي اول مرة احس بيها! تعبت لدرجة ماعندي طاقة ارفع ايدي، احسني كبرت عشر سنين من عرفت فاهد لليوم نسيت كلشي وعفت كلشي وره ظهري علموده انطيته روحي وراحتي وطاقتي واخيراً جسمي! انطيته كلشي لأني اشوفه ما اشوف غيره وماريد اشوف غيره حتى حُبي الاول نسيته وكأنه ما مولود بگلبي من قبل بسببه تالي هيچ يصير بيه؟ هيچ اتجازه؟ يا هضيمة...

نمت ليلتي بگلبي الدامي حسيت الفجر على اشعار من رقم غريب، فركت عيوني اشوف منو لگيتها رسالة مكتوب بالعربي..

"احتاجچ"

بلعت ريگ ابلع غصتي وياه منتهية عرفته فاهد، هسة تحتاجني فاهد؟ هسة من عرفت خسرت سارة للابد رجعت لبديلتك الغبية؟

تركت التلفون ممهتمة لرسالته فوراً اتصل بيه، بقيت متمددة اسمع للنغمة لحدما خلصت وكرر الاتصال من جديد كذلك ما جاوبت دگ مرتين وثلاثة واربعة وعشرة لحد اتصال رقم 16 توقف..

دقايق واجاني اشعار جديد فتحته هم من عنده دازلي مقطع يوتيوب شعر عراقي بين ثنين رجل وامرأة واحد يعاتب الثاني دست عليه نقلني لليوتيوب گعدت اسمعله للنهاية ودموعي تصب..

"الو تسمعين صوتي شبيچ ما تحچين

اختنگت وضاگ صدري من البُعد مليت"

والبنية تجاوبه..

"لازم جربتها وما وفت وياك

وعلى الباعت عمرها لخاطرك رديت"

ويرجع يجاوبها..

"اي رديت.. اي رديت ناقصني بغيابچ روح

جسد يمها بغرفتي وروحي بره البيت

لا تلومين ميت صعدة التابوت

النفس لو بيدي ما گتلچ هوا احتاجيت"...

سمعته للاخر ابچي فاهد يكره الشعر الرومانسي والبي عتاب وما يميل اله بكثرة واذا قراه فـ يكون ديستهزأ لا اكثر ومرة قرالي هذا الشعر چان سكران ويضحك بس ماعرف ليش سمعه هالمرة ودزه الي وهالشي تعب گلبي بالزايد..

گعدت الصبح لبست أي شي صار بوجهي ما فهمت بشر بموضوع الطلاق غير اخواني محد شاركته محد! اساساً تعبانة وماعندي حيل اتناقش..

اجوني اخواني ثلاثتهم ووگفو ويايه لحد اخر دقيقة، وصلنا لمكتب شيخ حاكم شرع ونشوان لازمني من ايدي اليمين وشُهيب من ايدي اليسار ومروان وره ظهري يطبطب على كتفي ويبوس راسي ويهمسلي كلمات مطمئنة..

طول ما اني هنا حاطة ايدي على گلبي لا يظهر شمسون المختفي ويخرب كلشي ادري هاي مجازفة طلاقي من فاهد وجازفت من حچيتله على تهديدات ابوه وراح اسببلي مشاكل اذا رجع شمسون بس مستعدة ابقى اكمل شغله كله بس خلي يبعده عني واخلص..

بينما اني واگفة ويه اخواني ننتظر حضور فاهد وصلتني رسالة من رقم غريب مشفر، فتحتها اشوف مضمونها لگيت مكتوب..

"مهمتچ ما انتهت كياني لا تتخيلين طلاقچ من فاهد راح ينقذچ راح تبقين چلبة شمسون! زواجچ من فاهد مو حتى تحبي ويحبچ زواجچ منه كان لسبب، وجودچ فادني هواي واهمها ربحت اكبر صفقة بتاريخي من خلالچ"

روحي خرطت بعدما قريتها وحسيت راح يغمى عليَّ وزاد وضعي سوء من وصل وكيل فاهد من بعيد، عگدت حاجبي متسائلة منو هذا وليش ما اجه هو بنفسه حسيت اكو شي غلط بس شُهيب همس بأذني..

-شُهيب: ما گدرت اوصله فاهد ما موجود أي مكان دز وكيل نيابة عنه

هزيت راسي حابسة دمعتي حتى ما كلف على نفسه يجي يودعني لاخر مرة؟ يا حسافة ايامي الضيعتها وياك!

-مروان: يلا نفوت الشيخ ينتظرنا

-الوكيل: لحظة.. هذي رسالة من مسيو فاهد لحضرتچ مدام

مدلي ظرف لونه اصفر فتحته بأنامل راجفة وطلعت منه ورقة بيضة ما مخططة مكتوب بيها عبارة..

"أحياناً قد يكون التخلي هو الحل الوحيد"

فاهد شمسون...

اني قريت هالكلام وانهاريت روحي شاغت النفس ضاع مني صرت اشهگ بس اريد هوا اريد تطلع دموعي وارتاح بس ماكو كلشي محبوس بداخلي والغصة ذبحتني، سندوني اخواني ونشوان سحب مني الرسالة سفطها ورجعها بالظرف بدون لا يقراها وضمها بجيبه..

-انطيني الرسالة نشوان

-نشوان: كيان راح تموتين عوفي الرسالة!!

-انطييني اريد اكرهه خليني اطلعه من گلبيي

بقى مُصر مينطيني ولولا مروان جارها من جيبه وحاطها بيدي چان بقى معترض، فتحتها ورجعت اقره المكتوب مرة وثنين وعشرة وعشرين.. هذا حلك فاهد؟ حل تتخلى عني وتخلص؟ حلك تبتعد وتنهي الحب الوهمتني بي؟!

اخذت نفس عميق ودخلنا مكتب الشيخ، گعدنا على الكراسي يسألنا عن سبب الطلاق، انطيتهم سبب ما تفاهمنا وعلاقتنا مدا تنجح وافق الشيخ فوراً لانه من جماعة شُهيب وگال..

-الشيخ: بنتي الوكالة بيدچ؟ عند عقد القرآن هل عقدتوا على ان العصمة بيدچ؟

-كيان: نعم

-مروان: شيخ هي مو تگدر تطلقه هسة؟

-الشيخ: لا تطلق نفسها منه مو هي تطلقه لانه رجل

-الوكيل: يعني ما يصح الطلاق لو شنو؟

-الشيخ: لا القصد يصح الطلاق لكن اله صيغة معينة بما ان زوجها موكلها لهذا الامر..

كمل الشيخ يعلمني شنو لازم اگول وسكت ينتظرني انطقها، كل الانظار توجهت عليَّ يردونا نخلص من هالبلاء ونرجع مثل قبل كيان واخوانها الثلاثة..

-نشوان: كيان؟

هزيت راسي بـ اي وعضيت على لساني، نزلت دمعتي مسحتها فوراً واني انطق..

-كيان: وكالةً عن زوجي فاهد فـ انا... انا طالق

نزلت راسي بعدما خانتني دموعي ونزلوا حضني نشوان وطبطب على ظهري شُهيب ومروان حچى ويه الشيخ شوية، دقايق وطلعنا من المكتب امشي جسد بلا روح.. ومن هاليوم وهذا الموقف قررت اشلع فاهد من گلبي شلع من دون رجعة!!

**

"مسرة"

ايام مرت كيان مو على بعضها مريضة ونايمة بالفراش، للاسف عرفت هي وفاهد تطلگو وچانت صدمة للكل بس محد حچى بالموضوع وسوينا الامور طبيعبة، اضطريت ابقى ببيت ماريا رغم اني وشُهيب منتحاچى بس لخاطر كيان اني وجنات وفيروز نبات يمها بالغرفة نغيرلها جو بس ماكو فائدة البنية انطفت..

العلوية من عرفت شمسون مورط ولده بأمور تضرهم هي متعرف شنو هنه بالضبط بس سمعت شُهيب يحاچي جنات على مالك تخبلت فوراً رفعت ايدها فوگ ودعت على شمسون دعوة تكسر الظهر گالت "روح يا جعفر ان شاء الله متشوف راحة البال والهنا بحياتك ان شاء الله تگضيها من مشكلة لمشكلة ومن ورطة لورطة بجاه جدي النبي محمد"..

رأساً طلبت من شُهيب يحجزلها للعراق شكد حاولنا نقنعها تبقى ابد دگت رجل متبقى دقيقة ببيت جعفر وهي ما راضية عليه لا دنيا ولا اخرة، ماريا بچت بچي على فراقها موتت روحها ظلت مچلبة بعبايتها وتتوسل بيها تبقى وتگول..

-رزليني احچي عليَّ وصيحيلي العايصة النايصة والمطربگة بس لا تروحين خاالة

-العلوية: تخلخلت عظامج اليهزن ليل ونهار يالصايعة

-ماريا: عندي رگصة جديدة ما شوفتچ ابقيي حبابة

-العلوية: خاايبة يبوو تحملت ضيم وحرام من وراچ بس عوزچ تحمريني وتنزعيني العباا ولي غاد خليني اشوف باقي ويلادي وافتهم شمصخمين هال****

دمعت عيوننا ما ضحكنا هالمرة ودعناها وسافرت العلوية وفرغ حسها ورزايلها من البيت، صار البيت فارغ هادئ لا يطاق محد اله نفس لشي ومحد يجچي ويه احد..

عفت كيان حاضنه جنات ونايمات هالجنة متگدر تنام وحدها لليوم، حاولت اقنعها واعلمها طرق تتبعهن حتى متخاف استخدمتهن ويه ميوسة وصارت تنام وحدها عادي بس جنات ماكو قافلة..

مرة قفلت عليها الباب يوم كامل حتى تضطر تنام وحدها ومن رجعتلها ثاني يوم لگيتها مطنگرة ومچتفة ايدها لصدرها وعيونها تغفي ومتستسلم تنام.. عرفت عدها حالة نفسية وهالشي ميروح منها الا بالتعويد او بمساعدة دكتور نفسي..

نزلت جوه عند ماريا گاعدة وتبچي وحدها خطية تگلب بالاستوديو مال تلفونها وتشوف صورها هي والعلوية ومبرطمة تقهر..

-خالة ليش تبچين؟

-ماريا: اريد قبولة

-مسرة: بيبي اقبال لازم ترجع لبيتها ميصير نعوفها ويانه الي بالعراق هم اشتاقولها ويردوها

-اني هم اشتاقيتلها

-صحيح بس فيزتها راح تخلص اذا بقت يمنا يحطوها بالسجن

-سجننن؟؟؟

-اي ترضين بيبي تنام بالسجن وتتعذب؟

-يمة لا لا ماقبل

-لعد يله مسحي دموعج وراويني شنو هالصور الحلوة الماخذتهم

مسحت دموعها فوراً وصارت تصحك متحمسة، انطتني تلفونها وگعدت بصفي تراويني كل الصور وتشرحلي شنو صار بيوم الاخذو بي الصورة.. وصلت لصور قديمة لـ شُهيب ابتسمت لا ارادي چان شكله اصغر بس ملامحه ما متغيرة..

-ماريا: باعي هنا رحنا رحلة صيد كلش تونسنا وشهوبي اشترالي حلويات هواي

-مسرة: اشترالچ جلاتين؟

-ماريا: اي اي هوااي انواع جلاتين اشترالي

-مسرة: نيالج

-وانتِ ليش متشترين شبيچ حاطة عينج عليَّ

-خالة ابنج ميقبل يشتريلي واني استحي اشتري لا تطير هيبتي

-خيولي يشتريلج معليج اني اقنعه

-اي حبابة اريد من هذا الجلاتين الحامض اووووف اريد راح اموت جاي اتوحم خالة لحگيني

ضحكت تهز راسها مو فاهمة شي بس صدگ دا اتوحم على جلاتين والحامض والطرشي ميتة عليه اكل وما ملحگة بس كله بالسر لحد الان محد يعرفني حامل غير البنات وصبا..

بينما اگلب بالصور طلعتلي صورة شلت حالي واحوالي طلعتلي صورة الجربة نعالسين لابسة فستان كيمونة قصير ودتبوس شُهيب من خده، صرت اكبر بالضورة وما ملحگة اعنف بروحي ومشاعري، اكبر على ايده الحاضنه خصرها واباوع شلون لازمها حيل مثلي لو راخية يبووو ما مبينه مناا خرب خرب خرررب!

-مسرة: اگلچ ماريا شو هاي النعالة لابسة قصير كللش مو شُهيب ميقبل؟؟ لو بس يمي يصير شريف؟!!

-ماريا: لا هنا ماكو زلم بس اني وشهوبي ونورة رحنا للسفرة ومكان وحدنا

-مسرة: نورة؟؟؟

-ماريا: نورسين اقصد

-مسرة: اااخ سكتي خالة شعوطتي گلبي

گلبت بباقي الصور كلهن كلههههن كشرتها من الاذن للاذن ما مصدگة النذلة هي ويه هموساتي! علگت فيديو أعذب روحي واعاقبها بشوفتهم سوه سعيدين وياريتني ما فتحت هالفيديو الاغبر!!

شُهيب متمدد على كرسي طويل خاص مال بحر وحاط ذراعه على عيونه يحجب الشمس ونورسين داخلة تسبح بالبحيرة وماريا تصورهم، ضحكها وغنجها وتماوعها راح ازووع، تتنعوص وتحچي وياه بالروسي وانوب حولت عربي..

-نورسين: ليش عايفني وحدي تعاال بيبي

الله ياخذ البيبي بعد ولااا اصيحله بيبي تفووو عليج وعلى البيبي مالتج شعوطتي گلبي! طلعت من البحيرة وماريا تصور بيها مادري ليش؟؟ زين ليش؟؟ شنو الغاية تصور بهاي الزرافة؟؟ وشنو الغاية الفيديو بعده بتلفونها وما حاذفته؟؟ معقولة شُهيب يشوف الفيديو كل فترة وفترة من يشتاقلها؟!! لا لا مستحيل لا شنو يشوف الفيديو شبيچ مسرة لا تصيرين ثولة!

-نورسين: نايم الحلو متجي ويه حبيبتك تسبح

-شُهيب: مالي واهس

-نورسين: هاي ليييش

التنعوص وصلني ولو نورسين كدامي احط اظافري برگبتها واشگ حنجرتها المزنجرة من مكانها!

-ماريا: انطيني التلفون خلينا نشوف غيره

-مسرة: لا ليش اريد اكمله

-ماريا: لا لا شهوبي ميقبل لا

-اريد اشوفه ماري أنطيني

-لا لااااا

جريته منها وهي تگمز ما راضية، كملت الفيديو وعرفت ليش متخليني اشوف التكملة هاي الزرافة التيل البرج ايڤل اجت وگعدت بحضنه وتلف ايده حول خصرها وتسويله اغراءات!!!

-ماريا: هي مو حلوة مثلج انتِ احلى والله انتِ احلى

-مسرة: عادي ماريا ما ضايجة هذا ماضي

-ماريا: اكيدد؟

-اي

-لعد ليش وجهج احمر وعرگان؟

-من الحررر اني محترررة حاااااارة راح اموووت من الجحيمم هنااا والسمووووم

طفرت بسرعة تفتحلي التكييف واجت تهفيلي بمجلة وتنفخ عليَّ بنفس الوقت بس ولا شي ديطفي ناري وغيرتي الحقيرة! يعني اني هم چنت متزوجة ويجوز هو يفكر وعاش نفس وضعي هسة من يتخيلني ويه اكرم قبل بس ليش اني مدا اكدر اسيطر على روحي ومتمنية اگوم ادوره وين ما چان واخنگة بالمخدة؟!!

-ماريا: بردتي؟

-اي شكراً ماريا يله تعالي نكمل الصور

-لا لا بعد كافي لا

-ليش حافظة هاي الفيديوات والصور يمج؟ انتِ تحبين نورسين؟

خنست متجاوب مادري شبيها، كررت عليها السؤال عضت على شفتها وگالت بصوت ناصي..

-اخاف اجاوب

-ليش تخافين؟

-اخاف تزعلين وتعوفينا

-لا حبي ما ازعل ليش ازعل

-اي احب نورة هي حبابة

-اهاا

-اي وچانت دائماً تشتريلي مكياج وملابس نفسج بالضبط انتن ثنينحن حبابات وتشترولي اشياءات

-لانچ تستاهلين

-ما زعلتي لان احبها؟

-اكيد لا حبيبتي ماطولها زينة وياچ ليش ازعل

-بس شهوبي يحبچ اكثر لا تزعلين

-هههههه

-والله يحبج اكثر شُهيب سعيد وياچ ودائماً يضحك وكله طاقة وحيوية ما چان هيج من نورسين جانت وياه

-بس چان زين وياهة وهي كالت بنفسها

-زين اي ومداريها ومدللها بس وياچ غير تماماً

-دتجامليني ماريووو؟

-لا والله ابد ما اجامل ولا اضحك عليج اذا متصدكيني اسألي كيان

ابتسمت اهز راسي ورجعت بصفي تراويني باقي صور شُهيب وحده لو هو ونشوان ومروان وكيان لو ابوهم من جان موجود تعجبت شلون حافظة كل هالصور وابوهم ميت صار هواي..

-مسرة: ماريا اويد اشوف شهوبي من چان بيبي

-لحظة اجيب الالبومات

ركضت تصعد فوك ونزلت حايبتلي كومة البومات كلهن لـ شُهيب والها وحتى صور شمسون موجودة وصور فاهد ومالك ويه شُهيب تفاجأت من شفتهم بوضع واضح سعيد وملتمين عجيب شنو الي فرقهم؟

-مسرة: ماريا منو هاي المرة؟

-ماريا: ام مالك اسمها اولغا

-لعد شعجب عندج صورتها؟

-جعفر ضمها يمي وگلي ممنوع تنطيها لمالك

-ليش؟

-مادري

-يعني مالك ماعنده صورة لامه؟

-لا

-وما شايفها من قبل؟؟

-لا ما شايفها

-خطية، هي ام مالك اوكرانية مو؟

-اي

-عندي فضول اعرف ام مالك الله يرحمها شلون ماتت؟

-ماريا: انتحرت

-انتحرت؟؟؟؟؟

-اي

-لييش؟

-مادري

-يعني شمسون ما حچالچ؟

-لا

-جان يحبها؟

-يموت عليها اولغا حبه الاول والوحيد

-لعد ليش انتحرت؟ وليش يكره مالك لهدرجة اذا اولغا حبه الوحيد غير لازم يحبه ويفضله على ولده لانه يذكره بيها؟ وتره مالك كللش يشبهها شوفي الصورة

-اي يشببها بس ماعرف ليش ميحبه

اخذت البومات الصور وصعدت فوگ، اوقات ماريا مينفهم وضعها احياناً تكون طبيعية واحياناً تتصرف تصرفات غريبة سألت مرة كيان وشُهيب وثنينهم گالو هو مرضها هيج شي مو بيدها وهي متمثل استخطيها كللش واحساسي يگول عانت هوايه بحياتها..

صعدت لغرفتي بدلت ملابسي وطلعت للشركة اكمل كم شغلة، دخلت للمكتب مالتي ثواني واجتني السكرتيرة الجديدة العينتها الي "دلال"..

-دلال: مدام مسرة هاي اوراق لمسيو شُهيب يوقعها بس المسيو مو هنا

-مسرة: اي طالع للموقع انطيني اشوف

اخذتهم منها اقراهم وابتسمت هاي اوراق مشروعنا الجديد كللش متحمستله لانهم يردون شُهيب المعماري الخاص بيهم لكل خرائطهم وشُهيب طاير من الفرحة هالشي راح يخلي يصعد للقمة ويستااهل هالشي..

رفعت راسي للشاشات اشوف وانتبهتله هستوه ديدخل للشركة متوجه للمكتب مالته، فرحت من شفته وصل گمت بسرعة اخذله الاوراق بنفسي حتى اشوف فرحته بيهن بس تذكرت احنه متزاعلين وميصير استخف لازم اثگل..

-مسرة: هستوه وصل اخذيهن اله انتِ گوليله مسرة قرتهن وكلشي تمام بس خلي يوقع

هزت راسها واخذت الاوراق وطلعت من المكتب، رحت للحمام اغسل وجهي معدتي گامت تگلب ماعرف ليش هيچ نساتي بهذا الحمل.. ميس ابد ما توحمت ولا تأذيت چان حملي خفيف وما اذتني ابد بس هالفصعون شالع گلبي.. طبعاً يشلع گلبي اذا ابوه شُهيب!

رتبت نفسي وطلعت من الحمام وشفت بوجهي ابوية واگف يدور عيونه بمكتبي..

-بابا؟

-هلا سرور وينج بابا

-جنت بالحمام

-سمعت صوت غريب هاي چنتي تتقيأين؟

-لا

-ها، سرور اجيت احچي وياچ بموضوع

توترت وانطيته ظهري اكيد اجه علمود الفلوس السحبتهن ودفعتهن لـ سردار علمود حماية شُهيب، تماسكت ورحت اكعد على المكتب اسوي الامور طبيعية..

-شنو الموضوع بابا؟

-موضوع الفلوس السحبتيهم من البنك شنو سالفتهن وين وديتيهن؟

-اشتريت يخت

-يخت؟؟؟

-اي

-تحجين صدگ لو تشاقين وياي

-انشاقة طبعاً، بابا يعني ليش اشتري يخت؟

-مادري، المهم وين صرفتيهن؟

-اشتريت عقار خارج البلد سعره مناسب وعجبني راح ارجعلك الفلوس بأقرب وقت

-تمام، هسة موضوعي الرئيسي مو هذا اني جايچ بشغل

-الله يستر شغليش؟

-ليش ما تشترين حصة شُهيب مال الشركة؟

-وليش اسوي هالشي؟

-حتى ميكون شريك وياچ ليش بابا تشاركين تعبج وفلوسج وياه؟ انتِ امرأة ناجحة وطموحة وما تحتاجين شريك تگدرين تشترين نسبته بكل سهولة

-ماريد هالشي بابا اني احتاج شُهيب يبقى ويايه بالشركة لان بسببه تفعل مجال المعماري عدنا بشكل اكبر صارو يجون مستثمرين خصيصاً اله يسويلهم خرائطهم

-هو هذا كلامي شجعي يفتح مكتب معماري وانتِ اشتري نسبته هنا هو راح يكبر نفسه ويكون مدير نفسه وموظفينه الجدد وانتِ مديرة نفسج وموظفينج

-شعجب دتفكر هيج؟

-لان اريدلج الزين وشُهيب مينخاف عليه مهندس معماري ومدني شاطر وراح يكبر وينجح اكثر من ينفصل عن هاي الشركة

-تقصد بسبب نسبته قليلة؟

-بالضبط اي نسبته مقيدته وما جاي تخلي يتوسع

-صحيح كلامك

-فكري زين بنيتي متأكد راح تنجحون ثنينكم

هزيت راسي افكر بكلامه منطقي مية بالمية فعلاً شُهيب راح ينجح بعمل فردي وحده وراح تتوسع اعماله بس بنفس الوقت ماريده يعوفني هنا وحدي محتاجته ووجوده بالشركة مهم بالنسبة الي بس نجاحه وراحته اهم هسة..

فكرت وحزمت قراري ونويت اروح احجي وياه بهذا الموضوع، اجه ويايه ابوية ودخلنا عليه للمكتب لگيناه مخبوص يدور على شي..

-فادي: هلا بنسيبي

-شُهيب: هلا عمي اهلاُ وسهلاً نورت الشركة

-فادي: منورة بيك نمر شمسون

-مسرة: على شنو تدور شُهيب؟

-شُهيب: على اوراق الشركة الجديدة

-مسرة: ذني الي انطيتهم الك بيوم عيد ميلادك؟ ليش انتَ مو شگيتهن؟؟

-شُهيب: لا مو كلهن بقت كم ورقة

-مسرة: وشتسوي بيهن؟

-اريد ادزهن للبريد

-تدزهن للبريد؟؟؟ ليش؟؟؟؟

-دزيتلهم موافقة

جحظت عيوني وگلبي وگف! حسيت هوا الغرفة كله انسحب من ريتي من الصدمة ظليت جامدة لا اخذ ولا انطي، شُهيب وقع اوراق الشركة المزورة الراح تغرگه بالديون؟؟ شنو هالمصيبة!!

شفت ابتسامة انتصار تنرسم على وحه ابوية ونشوة سعادة صارت بين عيونه، گلبي وگف نبضه شسوي شنو هالمصيبة؟؟ صرت ادور وياه على الاوراق وناوية اغافله واشگهن واذبهن اني متاأكددة هو ذبهن متأكددة وجنت ويااه حتى شگهم گدامي شلون هسة يكول وقعتهن!

-اني مو گتلك اذا وقعت بلغني؟ احنه مو اتفقنا شُهيب؟

-اي

-شُهيب شبيك

باوع لابوية ورجع انظاره الي، تقربت منه اوگف بصفه ضبط منتظرة جوابه رفع حاجبه وگال بأسلوب ناشف..

-صارلي شهر اطلب احچي وياچ وانتِ ما تقبلين شنو بيدي بعد مسرة؟

-بس انتَ شگيت الاوراق اني متأكدة

-صح بس تراجعت ضميتهن حسيت راح يحي يوم واحتاجهن استنسختهن من جديد ووقعت..

گالها وشال تلفون المكتب يتصل على نشوان، روحي تفور واعصابي تلفت گلبت الميز مالته گلاب، المجرات والرفوف وبين الملفات والكتب كلهن ادور بيناتهن..

-شُهيب: نشوان الملف الاسود المطبوع عليه حرف M انتَ ماخذه؟... ها زين تمام عاشت ايدك

-مسرة: هااا؟؟؟

-شُهيب: دزهم بالبريد

دارت بيه الغرفة وهبوطي احسه صفر، غمضت عيوني اتدارك الوضع واسمع ابوية يحچي ويه شُهيب..

-فادي: هاا بيها الخير ابني متأكد راح يكون هذا افضل قرار تتخذه بمسيرتك

-مسرة: لا بابا لا ماتوقع

-شُهيب: مسرة اني اعرف انتِ ليش مترددة بس حليت مشكلة البُعد راح اشرط عليهم اشتغل منا بدون لا اسافرلهم

-فادي: عفية عليك عفييية رفعة راس والله

صرت شحالني حالي انگلب گلاب اللوبة اكلت روحي شلون راح امنع هذا الشي وهو دزه للبريد شلون؟؟

-فادي: صدگ شُهيب چنت احاجي مسرة ليش ما تبيعلها اسهمك بالشركة؟

كملله شرح الموضوع بطريقة تقنع الصخر، انطاه جميع المشاكل وحميع الحلول وهالشي راح يفيدني الي ويفيد شُهيب ويكبر اسمنا ثنينا وابوية راح يستعين بمعارفه اذا احتاجينا مساعدة شفت شُهيب مقتنع بالفكرة بس تراجع علمودي..

-شُهيب: عمي فكرتك حلوة بس ماكدر اعوف مسرة وحدها هنا يمكن تحتاجني

-فادي: مسرة متحتاجك شُهيب بنتي تحط الزلم والنسوان بجيب الصفح تعلمني بمهاراتها وقدراتها؟

-شُهيب: اتفق وياك بس...

-فادي: لا عبالك مسرة قليلة؟ وربك تطيح اكبر راس بس يمكن هي لينة زيادة وياك هاي لو غيرك چان لعبت بي لعب

انقبض فك شُهيب ما عاجبه كلام ابوية القوي واني بديت اتوتر ابوية على شنو ناوي ليش دينطي بيه هالشكل گدامه؟! واكثر شي ما عجب شُهيب هو مصطلح "تطيح اكبر راس"..

-شُهيب: ما محتاجين نطيح روس هنا احنه نشتغل بذمة وضمير ومسرة امرأة ذكية وجاي تأدي عملها على اكمل وجه بدون لا تضطر تلعب بأحد وتتخذ غير اساليب

ابتسم ابوية بس اعرف ابتسامته هاي متبشر بخير، اندار الي وگال بلا مبالاة..

-فادي: اني علمودج بابا اريدج تلمعين اكثر من لمعانچ هسة

-شُهيب: اذا مسرة تريد تشتري اسهمي اني بايع

-مسرة: لا شُهيب...

-شُهيب: لا تستحين حقچ تحبين توسعين عملچ من باچر نبدي بالاجراءات

-فادي: يومي بده يصير احلى واحلى كفوو منك شُهيب ما غلطت من زوجتك بنتي الوحيدة انتَ مثال للزوج المثالي واني سعيد لانك نسيبي، يله شباب اخليكم براحتكم اني

ودعنا وطلع، تمشى شُهيب لمكينة القهوة سواله وصبلي بكوبي الخاص مي مغلي وحطلي كيس شاي اخضر..

-شُهيب انتَ متأكد تريد تبيعلي اسهمك؟

-متأكد

-حباب اذا الموضوع يزعجك احچي

-تخافين على مشاعري؟

-طبعاً اكييد

-والقبلي هم چنتي تخافين على مشاعرهم؟

انصدمت من كلامه ما توقعت يطلع منه هيچي شي، كلام ابوية طبع براسه واثر بي بطريقة من الطرق، بس ما اللومه اذا هو ابوية انطى بيَّ گدامه اكيد راح يروح باله بعيد ويتخيل امور مو زينة..

-لا مچنت اخاف على مشاعر احد

-شمعنى؟

-لان ميستاهلون اطلع وجهي الحلو وياهم

-تگدرين توضحيلي اكثر؟

-اكون صريحة بس بشرط متزعل وتغار وتگلب المكتب على روسنا؟

-لا

-انتَ انسان غير متفهم

-صحيح

-وتفكيرك رجعي

-اتفق مية بالمية

-ومعقد

-فوگ ما تتصورين

-و..

-صحيح

-انتَ اصلاً ما سمعت شنو اريد اگول!

-لان صحيح

-شُهيببب

-مسرة تسكتين لو امارس عليچ طقوسي واخليج تنهزمين منا؟

-وحشية؟

-كلش

-الله اي راويني

-هههه استغفر الله منج

-شوف اذا شي وحشي وعنيف بس بعيد عن الادبسزية لان اعرفك من جوه الجوه اني موافقة راويني عندي فضول

-يفضل ما تشوفين وجهي الثاني خليني نظيف بعيونج

ابتسم وهو يگولها وحط كوب چاي الاخضر بين ايدي، اخذته اشرب منه شوية ورحت اگعد على كرسي المكتب مالته نزعت حذائي وتربعت اللعب بالكرسي وافتر بي..

-مسرة: شمعنى كرسيك اعلى من مالتي اني اعترض

-شُهيب: لان اني اطول

-مسرة: قصدك اني قصيرة مو؟ اهانتك غير مقبولة انتَ مطرود!

-شُهيب: حاضر

بدون نقاش اخذ جنطة العمل مالته وطلع من المكتب عزه هذا وين راح؟؟ واني بمكاني صحت..

-لااااا تعاال اترااجعع

-شُهيب: طردتيني غير اطلع؟

-مسرة: تراجعت شبيك

-شنو هالرئيسة الماعدها كلمة ثابتة

-مسرة: اسكت لا اطردك مرة ثانية

ريحت نفسي على الكرسي وابتسمت بمكر، مسح على شعره الناعم يخلل اصابعه بين خصلاته وگال بأسلوب مشاكس هوت للنعال..

-شُهيب: اقدم استقالتي قبل لا تطرديني احفظ كرامتي

-مسرة: ارفضها واطردك

ضحك اخيراً وسد دگمة جاكيته الرسمية، رفعلي اصبعين وسوالي تحية مثل الجنود واخذ جنطته وطلع من المكتب.. بقيت على ابتسامتي اراقبه من الشاشات يطلع من الشركة يروح للـ... لوين؟ وين رايح بهالوقت؟؟ هو مو هستوه رجع؟

مشى اليوم طبيعي وما رجع شُهيب ثاني يوم بدينا بأجراءات شراء الاسهم شُهيب سوالي تنازل عام حتى قبل لا يستلم مني الفلوس ماتحملت كرمه ولطفه ويايه نويت ادفعله سعر مضاعف ينهضه ويساعده بمشروعه الجديد بما ان عرفت الفلوس بالبنك مو اله بس اعترض بشدة وزعل مني..

-مسرة: اني اريد اشتري الاسهم بهذا السعر شعليك انتَ

-شُهيب: بطلت ما ابيع

-شُهيب لا تصير نحيس

-مسرة هاي سوالف اساعدك وانهضك وماعرف شنو بطليها اني احترم مساعدتچ بس الموضوع بده يستفزني!

حچاهة بطريقة عصبية توقعت بسبب نفسيته تعبانة هالفترة بغياب اخوانه ادري ودا يوصلني سام والحماية ديبلغوني شُهيب نابش الدنيا نبش عليهم بس كله بالسر بدون لا احد يحس عليه وسودة عليَّ مدا يوصللهم..

-مسرة: اوكي اشتري بالسعر الي يعجبك

-شُهيب: تمام

وقع الاوراق وتم التنازل بشكل خالي من المشاكل وصرت اني رئيسة الشركة وكلها بأسمي، ما اخفي موضوع تعجبي شلون تنازل بسرعة وباع اسهمه بالشركة وتنازل عن تعب سنين بس شُهيب مو غبي يعرف لو تنازل عن الشركة راح يصعد اكثر ويستفاد بشكل اكبر خصوصاً اخوانه مروان ونشوان كلش ايدوا الفكرة وسندوه بالموضوع..

-شُهيب: بطلي تحطين چلاب تمشي ورايه

ببرود قاتل نطقها وملامح خاوية، طلع جكارة من جيبه جر منها نفس وشمره على جانبه الايمن..

-مسرة: ما فهمت قصدك؟

-حاطتلي كم واحد مسلبح يمشي ورايه ويتبعوني على الدعسة ماليش؟

-هااا؟

-المهم تصرفت وياهم

-شنو؟ منو؟ شلون؟؟

-مسرة انتِ شايفتني زعطوط؟ لو واحد مفهي؟

-لا حشاك بس...

-لا تاخذين قرارات نيابة عني وتخلين خرفان تحميني بدفرة يطيرون

-لا تبالغ!

-بكيفج بعد

-تره مو اني حطيتهم شبيك

-اي خوش

-شُهيب شبيك مو اني!!

-تمام خلص فهمت

-صار عندي فضول اعرف شسويتلهم

-كتلتهم

-لا تچذب

-بكيفچ

-شُهيب!

-مسرة احچيلج الحقيقة ما تقبلين اجذب هم ما تقبلين حرت وياچ

-انتَ متغير!!!

-وانتِ متغيرة

-انتَ متغير اكثر!!

-تمام

-اووووووووه شكد مزززعج صايرر اني صوچي گاعدة يممك

دا اگوم وجرني من معصم ايدي يرجعني اگعد بس وجهه مطعون من العصبية شوية وراح يفترسني وما اسولف على شكل شُهيب شكد يصير مخيف من يعصب لو يطلع من طوره..

-لزمتهم واحد واحد احقق وياهم ومحد قبل يحجي عرفتهم تابعين الج

-شمعنى الي؟؟ شمعنى مو ابوك حطهم يحموك بغيابه!

-لان ابووية من دوون اخواني كلهم ما يحطلي حمااية ماا احتاجهممم!!

-خوش خوش يالوحشي افتهمنا هو انتَ كلك خلگ واحد هامس صوتك مينسمع تريد تصيرلي جونسينا

وهنا تغيرت ملامحه العصبية وضحك.. اي والله ضحك وضحكته حلوة لدرجة رسمت ابتسامتي وصرت اضحك وياه جرني على كيف من شعري وگال يداهرني..

-احب شلون تشوفيني بعيونچ

-واني احب شلون اشوفني بعيوني

-شكد.. استغفر الله

-هههههههههههههههههه كوم وحشي خلينا نتغدا متت جوع وراهة نروح للمحكمة نتطلگ ونرجع

-هالبنية يجي يوم وتجلطني!! تطلگين شنو مسرة كعدي راااحة

-باوع اني مغلسة علمود كياني سودة عليَّ مالها خلگ هالفترة بس تره اني ماريدك

-گومي مسرة گومي نغديچ شي لا يصير بيه شلل اطراف من وراج

ضحكت واخذت جنطتي وطلعت وياه، اخذته لمطعم بعيد عن الشركة عاجبتي ننفرد وحدنا مشتاقتله، مشتاقة لگعداتنا ومداهراتنا مشتاقة لوجوده بجانبي بس للاسف كل هذا ماكدر اعترف بي..

-شُهيب هذا المطعم يحتاج تبيع كلياتك حتى تدفع الفاتورة

-نبيعهن المهم عاجبچ

-شهوبي اوبي اوبي

-ها

-انتَ كيوت

ابتسم يهز براسه مأيس وتغدينا، اجه الگرسون ينطينا الفاتورة ضحك شُهيب خفيف وگال بغمزة..

-هاي صدگ يحتاج ابيع كليتي حتى ادفعها

-ههههههههه تستاهل

-هاي ضريبة اليتزوج مليونيرة

-يروحلي فدوة ذاك العار (اقصد شمسون)

-يرحواج فدوة عارات الدينا كلها

-تدري هسة مال ابوسك بس من راسك لا يشطح عقلك

-ادري ما يطلع منج شي بي خير

-شُهههيببب

ضحك وگمنا بعدما دفع، كمشت بذراعه استند عليها نزل عيونه لايدي ورفعلي حاجبه ممفتهم تصرفاتي والله يا شُهيب اني ممفتهمة روحي..

-مسرة: شبيك ثگلت بالاكل احتاج اسند روحي على احد لا اوگع من التعب

-على طاري التعب مو كأن احذيتج متغيرة هالفترة؟

-لا

-لا متغيرة

-لا

-متغيرات مسرات

-لا ولا ولا

-صاير الكعب انصى لو يتهيألي؟

-يتهيألك

-مسررة

-شُههيب

-راح اعرف شنو سالفتج بس انطيني صبر افرغ

-يا عيب الشوم عليك ابن عمي قصدك انتَ ما فارغلي؟؟؟

-لج لا بس..

-ويصيح لييش تردين تطلگين اذا ابسطط حقوقي ما محصلتها وهو الاهتماام

-ديلا عيني يلا

-شوف شوف ومن اكول متغير يكول لا هاي لو قبل جان ظليت تبررلي بس هسة انتَ ممهتم احسني زعلت

-لا تزعلين فراشتي تعالي نراضيج بجلاتين

-چذااااااب

-والله تعالي نشتري

-عززااا احبككك ولكك يممممااا

ضحك بصوت عالي ورحت اركض مثل المزعطة كدامه للاسواق، اكدر اشتري جلاتين وره ظهره واكدر اكل شكد ميعجبني بس مابي لذة اذا مو شُهيب يشتري الي واوكله ويايه ما استطعم بي..

اشترالي كومة انواع واخذ مني كلمة اكل شي قليل كل يوم حتى احافظ على سكري وما اتأذه، هزيت راسي فرحانة وفتحلي اول مصاصة من الجلاتين..

-لا شهوبي هاي اضمها لميوسة من تجيني

-تمام افتحلج هذا

اختارلي جلاتين ابو الدببة اموت عليه، وكلني اول جلاتينة بيده واني حطيت وحدة بحلگه، حطيت الثانية والثالثة والرابعة والخامس والسادسة والسابعة و..

-مسرة لخااطر ميس كافي ماا اطيق الجلاتين تلعب روحي منه

-هو هم تلعب روحه منك!!

-تره حجيت على الجلاتين مو على بنتج

-نفس الشي

-اقدم اعتذاري الشديد للدب الجلاتيني اني اسف كلشي ولا تزعل عليَّ

-تستهزأ حضرتك؟

-لااا امشي كافي

جرني يرجعني للسيارة ومشى بيه بطريق اخر غير الطريق الاجينه بي، باوعتله مضيگة عيوني..

-راح تخطفني؟؟

-ممكن

-وتغتصبني وتعذبني وتغرگني وتطلب فدية من ابوية؟

-هاي شمعرفج؟

-اعرفهن حافظتهن هالسوالف متمشي عليَّ بعد

-شوف حرامات

-لا جديات وين ماخذني؟

-لمكان راح تحبي

تحمست اعرف وين بس ما سألت زايد لان اجاله اتصال، ساق بالسيارة هوايه والطريق طويل وبين الدرابين گوة دخلت سيارته عريضة، وگفني گدام بناية واشرلي انزل..

-شُهيب انتَ طلعت صدگ خاطفني!

-ليش يا يوم چذبت عليج

-اويلي منك ومن سوالفك شتريد منيييي هدنيييي لا تجرجر بيدددي يااا نااااس يا عالللممم ساعدووونيييي هذا يريد يكتلنييييييي

-ولج انفضحنااا صوتج وين لازمج انيي

-هاي بروفا خاف تفكر تلمسني

-خرب

ضحكت منتعشة روحي اخخ متحمسة وربي اموت على الاماكن المظلمة الي يصير بيها طاح طيح وراشديات وبوكسيات وحركات بركات و...

-شُهيب شمسون

اللتفتنا ثنينا على صوت واحد عبارة عن وشم! بدون مبالغة ماكو مكان بجلده الظاهر ووجهه فارغ من الوشوم حتى على خده واشم، من وجهه ونظراته مبين مو راحة اعرف هالشكولات عدل..

-شُهيب: بعدنا ما گلنا بسم الله

-الرجال: يلا نگول

هجم بكل قوته على شُهيب انطاه بوكس على وجهه شهگت مصدومة من وحشيته الحقيرة هذا منوو وشبي؟!!

-شُهيب: نااصر ماريد ااذيك رووح مناا

-ناصر: بس اني اريد

تعال وانطي بوكس ثاني وثالث ورابع مثل الراجمة يضرب ضخم وطويل وحاقدد عيونه تنگط حقد وسم ويضرب بوحشية وكأنه يريد يكتل شُهيب بمكانه ورغم هذا شُهيب ما اذاه ماعرف ليش بس ديصد ضرباته..

-ناصر: ابن الكللب دمرتوناا دمرتوو حياتناا وينه ابوك العاار بيا زريبة خااتل

-شُهيب: نااصر لا تخلي حقد ابوك وابوية يدخل بيناتنا همه اخوان ويتصافون بيناتهم احنه مالنا شغل!

-ناصر: ادخله ونصص وامص دممك يا عاار يابن ال**** مووتك على ايددي اليوم ورووح امي الا اذبححك وابجي امك دممم

يحچي ويضرب حييل على راس شُهيب وبطنه ووجهه ووين متلوح ايده، عرفت هذا يصير ابن عمه بس ما شايفته من قبل.. بنص ضربات ناصر الحامية وصدات شُهيب ظهر واحد ثاني يشبه ناصر وبدون لا يفتهم اجه يهجم على شُهيب يتعارك وياه..

-شُهيب: كملت

ثنينهم عليه تگابلو وبكل مرة شُهيب يصدهم عنه يلتفت يباوعلي قلق عليَّ تخبلت تمنيت ادخل بينهم اطيح حظهم بس خاف اعيق حركته، عطت بصوت عالي متنرفزة ليش مدا يضربهم..

-شُهيييب طييح حظهمم لا تظل بس تصدد ضربااتهم شبييييك

صوتي خلاهم ينتبهون لوجودي وعيونهم لمعت بمكر وهنا شُهيب اخيرراً تدخل ونزع قناعه البارد الجامد وعرفت ليش ما چان يضربهم لان تحول.. فعلياً وبدون مبالغة تحول من رجل جنتل محترم هادئ راقي الى وحش شرس ضروس مخيف گلبي الميت انفزع وتردد بشوفته..

اول حركة سواها من شاف ناصر يباوعلي دخل اصابعه ثنينهن بعيونه طفاهن ولزم راسه ورگعه براس الثاني احتاجو ثواني حتى يرجعون لوعيهم وناصر تفك عيونه بس ما انطاهم مجال وانهاال عليهم بالضرب المبرح، يضرب بأماكن تخليهم يدوخون ويتألمون.. وگفت على جهة اراقب بدون لا اتدخل العركة حامية بشكل تشوفها من بعيد تحس بحرورتها..

طلع اخو ناصر سچينة من جيبه يريد يدچ شُهيب وبحركة رشيقة خفيفة شُهيب سحبها منه بدون لا يحس ضربه على رگبته من وره وخرطها من بين اصابعه ودچها بنص صدره..

ناصر تخخبل من شاف اخو بهالحال وكمل بالعركة يطلع اداة حادة تنلبس بالاصابع يريد يحطها برگبة شُهيب، بين رگبته والالة الحادة شعرره قبل لا يلزم شُهيب ايد ناصر ويلويها وره ظهره ويطگها مخلف صوت كسر عظامه..

رفسه برجله بظهره للحايط ودخل الالة الحادة بخصارته ودورها بداخل جسمه يحفرها للداخل يطببها وناصر يعييط بخبال، ظل يدفع بشُهيب عنه يريد يدافع عن نفسه وما انطاه مجال.. بعكسه ضربه على فمه خلاه يترنح ونهاه من ضربه بمكان حساس اسفل بطنه وطلع الالة الحادة من خاصرته يحطها ببطنه بمكان كليته دمره دمااار! خلاه يوگع بالگاع سابح بدمه ووجه شُهيب وايده متروسين دم متطافر عليه من دمهم..

وگف اخو ناصر يسند روحه بالحايط وطلع السچينة من صدره وركض بخفة وسرعة واحد متدرب يريد يدخلها بچتف شُهيب من وره ومثل الرادار الرصد اكو احد وراه شُهيب شغل حساساته واللتفت يلوي ذراع الثاني ويعقفها وره ظهره بدون لا يكسرها بدالها شاله على ظهره ورگعه بالگاع وقبل لا يخلي يتنفس داس بقفصه الصدري برجله هشمه!!

ما سمعت بس صوت شهقات اخو ناصر الجاي تطلع روحه، وبرود وجمود وجه شُهيب ممهتم للمجزرة السواها بيهم، مسح الدم بملابسه الرسمية السودة ورخى ربطة عنقه ومسح على شعره الناعم وراهة..

عدل ياخة قميصه واندار يباوعلي بفضول منتظر مني ردة فعل او صياح او خوف او اشرد منه واتخبل بس ما سويت كل هذا، علگت جنطتي بچتفي وگلت ببرود..

-الحمدلله على السلامة، رجعني للبيت

تركته واگف مذهول ورحت لسيارته اوگف بجانب الباب منتظرته يفتحها الي، دگيت على جامة السيارة بأظافري انبهه واذكره بوجودي فوراً فتحلي السيارة بالبصمة دخلت وانتظرته يرجع بس شفته بقى واگف ويتلفت وراه..

عگدت حاجبي متسائلة حركاته لكن فوراً اجاني الجواب طلعله واحد ثالث! واحد ثالث اجه يدور على ناصر واخوه وشافهم بهالحال وهسة من صدگ انلاست!

هجم على شُهيب معصب وفاير دمه وطلعله كم سچينة على كم اله حادة على كم شفرة استغربت ولا واحد منهم شايل سلاح واتوقع هذا المكان يمنع دخول الاسلحة لان مستحيل عصابچية وقطاعين طرق مثلهم ميشيلون سلاح..

المهم اختصاراً للصار هموساتي طيح حظه راشديات على بوكسيات على حركات رشيقة عنيفة يمارسها عليه جابت راسي، رفسه رفس وكسر عظامه تكسر عافه مطروح بالكاع ويه الباقين واجاني..

ركب السيارة وفوراً ساق نطلع من المكان بوجهه المدمى المخيف وايده وملابسه الملطخة بدم ناس رادوا يقتلوا عينك عينك بدون تردد واليكتل مو ناس عاديين ذولة ولد عمه!

بعد مرور فترة من سياقته سالك طريق مابي سيارات هواي حتى محد يشوف وضعه المزري، ذب حسرة عالية وگال وهو يمسح وجهه المدمى بالكلينسه..

-عذريني

-مسرة: على شنو

-على المنظر الخليتچ تشوفي

-قصدك حركاتك العنيفة الماعرف منين متعلمها لو على حساسك اليشتغل بالثواني لو على قدرتك العجيبة على تحمل الوجع وناصر ضربك اكثر من مرة على بطنك لدرجة اني ردت اتقيء من قوة الضربات وما صارلك شي لو على...

-على كلشي

-هذا وجهك الثاني شُهيب؟

سكت ماقبل يجاوب هزيت راسي متفهمة وعندي احساس عنده وجه ثالث هم اعنف من هذا بس ما طلعه لاني گدامه اتوقع عباله راح يشوه صورته بعيوني واشوفه همجي مريض او سايكو وهذا السبب تردد يحاربهم بالبداية لان چنت موجودة وشاهدة على الصار..

وصلني للبيت نزلت بسرعة بدون لا اودعه وصعدت غرفتي وقفلت الباب عليَّ، اني ما مزعوجة من الصار ولا مصدومة اكثر من شخص حذرني من عنف شُهيب المو طبيعي ممكن بالوصف ميوصل ربع من الحقيقة لان الحقيقة بالضبط كأن دا اشاهد فلم اكشن خارق للطبيعة..

شايفة هواي ناس تتعارك وتتدرب كدامي بس حركاته چانت مميزة يستغل الفرصة لصالحه ويكمل عليهم بسهولة.. الي درب شُهيب سايكوباث محترف متمرس وقاتل خطير!!

نمت ليلتي اريح نفسي وافكر باچر الحفلة باچر يومي الي منتظرته، راح يحضر بي اليكرهني والي يحبني.. راح يكون اجمل شي اعيشه بحياتي كلها واعظم انتصار وانجاز امي راح تكون فخورة بيه اني متأكدة.. متأكدة!!......

يتبع..... 🤐

━━━━━━  ━━━━━━

فاهد وكيااااان 😭😭

مالك وجنات يا ترى شنو مضموملهم شنو راح يصير وياهم والاهم مالك وين؟؟؟

شُهيب ومسرة يا مصيبتهم شكبرها!!!

الحفلة... 🥵

توقعاتكم 💀🩷🩷🩷🩷🩷؟؟؟؟

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

تعوفني وتگدر بدوني؟

ليش يا ثالث عيوني...؟ 🥀

━━━━━━  ━━━━━━

-گوومي كيان گوومي

-كيان: عوفيني ماريد اگوم

-جنات: لازم تتحركين شوية مو زين وضعچ تبقين نايمة طول اليوم

-كيان: ماعندي طاقة

-جنات: نثويلچ طاقة امشي نروح جم

-كيان: ماكدر ماريد

-كيان انتِ وعدتيني تاخذيني.. بث لا اوگفي شلون تطلعين وانتِ بالعدة؟

-عدة؟

-اي ميصير تطلعين

-صدگ عود؟ بعد احسن

-دگومي گومي ليش انتو دين ديانة هنا

-يا حقيرة حرام عليج مو اصلي واصوم

-اي خوش يله كومي عود احترمي نفثج بالطلعة

-ماريد جنات روحي وحدج

-والزهرة ام الحثن ازعل عليج

جريتها جر من الفراش رايحة بايدة مالها خلگ شي حتى خدود السنجاب هفتن، دخلتها الحمام واني رحت ابدل لملابس رياضة ولبست فوگاهن قبوط طويل ياخته فرو ولفيت شالي..

گعدت ويه ماريا جوه انتظر العروس تكمل تجهيزها گعدت اكرز حب وياهة ونحش بالمسلسل مالتها..

-ماريا: راح تطلعون؟

-جنات: اي اريد اثجل جم واخذ كيان ويايه اغيرلها جو

-ماريا: ايييع اكره الجم معفن

-ظلي كرهي احثن لان ما ناويات ناخذچ

-ماريا: لييش لييش اريد اروح

-جنات: مو الجم معفن؟

-ماريا: گلت هيج حتى تاخذيني

-جنات: ادري

-لعد اخذيني فدوة

-حب خليني اروح اشوفه شلونه اذا عجبني وثجلت اخذج وياي شتگولين؟

-ماريا: زين وجيبولي وياكم هدية

-جنات: هديتيش؟

-ماريا: اوووووع بخيلة انتِ شهوبي ومسرة بالطلعة والطبة يجيبولي هدايا مو مثلج عايصة

-جنات: اجيبلج خوش خوش يبووو شكد تنگنگ

-ماريا: يبوو عليج

-جنات: شايفة لو چنتي ام مالك چان تخبلت والزهرة

-ماريا: اني احب مالك

وردت خدودها خجلانة عززه بعيني هاي تحبه تحبه لو تحبه مثل شُهيب؟؟

-جنات: ولج يصير ابن رجللچ ام الزللم

-ماريا: بس حباب وحلو هو

-جنات: واذا؟؟؟

-ماريا: اصلاً ماكدر اتزوجه شبيچ انرعصتي

-جنات: ايا....

-كيان: سمممم ومرررض شبيچن

-ماريا: انچبييي

-كيان: حاضر، جنات لا تفهمين ماريا غلط ولج مو تحبه مثل الي ببالج

-جنات: والله شكله مثل الي ببالي

-كيان: امشي نطلع واسولفلج

گمت وياهة نطلع ودعتنا ماريا وبوستني ولا كأن تناگرنا هسة، ضحكت وحضنتها والله هالمرة اوقات ترفع ضغطي وحاطة دوبها من دوبي بس تونسني واحبها مينزعل منها..

-كيان: ماريا متعرف شنو حب هي أي واحد حلو تگول احبه

-جنات: ما حبت ابوچ؟

-كيان: حبته لان حلو

-جنات: هههههه خرب عقلچ

-كيان: والله شبيچ مروان نسخة من ابوية يشگ شگ چان وفد واحد قوي وعنده كلمة لليوم اتذكر اخواني شگد يهيبوا ويحترموا

-جنات: الله يرحمه

تمشينا لموقف الباصات اخذنا الباص وتوجهنا للجم الي كيان متعودة تروحله، الدوام الصباحي للنساء والمسائي للزلم وهالشي حلو عازلين الزلم عن النسوان وشفت بنات محجبات هنا ونزعوا براحتهم..

-جنات: يجنن الجم صيني حبيته

-كيان: كلش راقي هو لواحد من رجال الاعمال يشتغل بالعقارات وعنده هذا الجم يصير صديق مالك اسمه حيدر

-جنات: اهااا عرفته اي هذا اجه لبيت مالك كم مرة يصير صديقه

رحنا للحمامات حتى انزع الشال والقبوط وطلعت مرة ثانية، عرفتني كيان على المدربة "سما" لبنانية وكلش حبابة وعلمتني على كلشي احتاجه گالت ما احتاج شي جسمي مثالي بس لياقة اللعب..

صعدت على جهاز الجري وكيان بصفي تلعب مالها خلگ شجعتها بكم كلمة وسويت وياهة منافسة منو تكمل جري اسرع، مثل المزعطة صرنا نركض مثل المخبلات ونضحك وحدة تريد تغلب الثانية..

-كيان: وللج راح اموووووت

-جنات: حللل حتى متتفيكين براثي وتعيبين عليَّ

-كيان: هههههههههههه جنات حبابة خلينا نبطئ ولج عفييية ههههههههههه عزه هههههههههههههه

-جنات: هاي شبيها الفرخة تضحك

-متونس الحلوو

اللتفتت على مصدر الصوت ورادت تفلت رجلي فوراً ملصت المغناطيس من الجهاز توقف، سوت نفسي كيان واللتفتت عليها ابتسمت وگالت..

-كيان: هلوو دارلان

-دارلان: so long no see

-كيان: شسوي الدراسة والشغل اخذ من وقتي شلونچ حبيبتي

تحاضنن ويه بعض وبقت وحدة تسأل عن اخبار الثانية، نزعت دارلان قميصها بسرعة وصعدت ويانه على جهاز الجري تمشي على كيف احماء..

-دارلان: اليوم تأخرت على الدوام لو تعرفين شصار بيه

-كيان: خيرچ

-دارلان: اخوية قرر يظهر بحياتي فجأة وطلب مني مبلغ وقدره لان الديون تارسته من هامته لرجليه

-كيان: عزززه

-دارلان: واني ما خليتله تغريدة ما غردتها اله عيرته بكل اخوان صديقاتي وطبعاً اخوانج بالواجهية چانو

-كيان: ههههه فدوة لگلبهم وين اكو من اخواني، دارلان ما عرفتچ على جنات

-دارلان: جذبتني اول ما دخلت گلت منو هالحاتة المسجلة عدنا

-جنات: حبيبتي تسلمين

دزتلي بوسة بالهوا بنعوصة هي حتى من تحچي تتنعوص بس لطيفة، كملن سوالف كيان ودارلان بالي مو وياهن اللتهيت اكمل باقي التمارين وعفتهن براحتهن..

نزلت من الجهاز الرابع لليوم ورحت اسبح تعبت طاقتي طفت، الجم مو ازدحام بهالوقت ننعد على الاصابع الموجودات.. كملت حمامي واني هنا دا الليف جسمي سمعت ثنين يحچن جذبني حديثهن ولا ارادي صرت اتسمع عليهن چانن دارلان وكيان..

-دارلان: صار شگد صابرة ما اسأل بس ما تحمل بعد شخبار مالك؟

-كيان: بخير

-درلان: بعدها علاقتج بي قوية؟

-كيان: لا مو كلش لان مالك اللتهى بحياته

-دارلان: تدرين بعدني افكر بي واتحلم

-كيان: لا دارلان

-هالرجال ما ناوي يطلع من راسي ماعرف شسوالي كيان متعلقة بي بشكل عجيب شگد طلعت ويه زلم وشگد شفت بس مثله ما اللتقيت انسان كلاس راقي رقيق ويه الجنس الناعم تفكيره مو بس بجسد المرأة يهتم لمشاعرها واحاسيسها احبه كيان ومستعدة ابقى انتظر....

-مالك تزوج دارلان

خنس صوتها واني اذني لازگتها بالباب اتسمع، كملت كيان بنبرة هادئة..

-جنات زوجته

-دارلان: جنات هاي البنية الويااچ؟؟

-كيان: اي

-دارلان: صغيرة!! مستحيل هالشي مستتحيل مالك اكثر من مرة گال هو ميحب البنات الصغار وميتقرب منهن كيان تره اني حاچيه وياه بهالموضوع من قبل احنه چنه اصدقاء

-كيان: بس حب جنات او خليني اگول يموت عليها ومداريها مثل المي بالصينية

-دارلان: انتِ دتحچين هيچ بس حتى ابتعد عنه

-اكيد لا دارلان شبيچ!

-اسفة بس مدا اكدر اصدگچ

-بكيفچ بس تصديقچ من عدمه ما راح يأثر ولا راح يغير من حقيقة الامر اعتذر اذا اجرح مشاعرچ بس مالك وجنات متزوجين ومالك يحبها كللش ومدللها يعاملها كـ حبيبته وطفلته بنفس الوقت دا اشوف تعامله الناعم وياهة وطاقة تحمله من يختلفون بالرأي انصحچ تطلعي من راسچ لانهم سعيدين ويه بعض واستبعد اكو قوة بالدنيا راح تفرقهم

-تره طفلة! شگد عمرها؟؟ اوكي جسمها حلو وانثوي بس وجهها طفوليي كلللش شنو عمرها 15 سنة!!

-كيان: جنات 19 وطالبة جامعية

-دارلان: اگص ايدي اذا بقى وياهة ماخذها على جسمها وشكلها وگولي دارلان ما گالت!

-كيان: لا تفاوليلهم دارلان حرام عليج ثانياً بنفسج دتگولين مالك مو رجل شهواني ليش تغير كلامچ هسة؟؟

-دارلان: لان ماكو تفسير ثاني شلون اقتنع يرتبط ببنية طفولية مثل هااي

احترگ دمي من كلامها بقت كيان تناقشها واني سديت الدوش ولفيت روحي بمنشفة طويلة وطلعت من الحمام بالعة عصبيتي وقهرتي اسوي روحي طبيعية وما سمعت شي حتى ميگولون تتجسس..

-كيان: جنات انتِ هنا!

-جنات: اي اگلچ هذا المي كللش حار اذى جثمي

-دارلان: ليش تحچين هيچ؟

-جنات: شلون

-دارلان: تحجين مثل الاطفال تره ماكو احد تحتاجين تبينيله انتِ كيوت هنا للمعلومة

ابتسمت ونشفت شعري بمنشفتي الصغيرة، محروگة حرگ وهي تحچي ووجهها صاير احمر، جاوبتها بهدوء..

-جنات: حبي من الله اني كيوت على مدار 24 ثاعة باليوم الحمدلله

-كيان: جنات عدها رتلة بحرف السين والصاد ببعض الاحيان هو لسانها هيچ مدا تتصنع

-دارلان: عدلي مو حلو تبقين هيج

-جنات: ان شاء الله

-كيان: دارلان شسالفة! تره هالشي من الله شلون ترديها تعدله؟؟

-دارلان: اوووه اسفة اعتذر بس اكيد هالشي مسببلچ احراجات مو صح؟

-جنات: لا

-دارلان: اقصد ناس تعيب وتعلق تعرفين بهالشي اكيد

-جنات: لا ماعرف صراحة

-دارلان: هاا زين على الاقل حتى متخجلين وتستحين تحچين

-جنات: لا ما راح اثتحي بكل الاحوال لان احب شلون احچي

-كيان: تنوكليين ولج اموت على لسانچ

-جنات: هو هم يموت عليج من يرزلچ

-كيان: ههههههه حقيرة انتِ

-دارلان: انتِ متزوجة جنات؟ دا اشوف حلقة بأصبعچ

-جنات: اي متزوجة

-دارلان: وشلونه الزواج حلو؟

-جنات: حلو من يكون شريكچ حلو وياچ

-دارلان: عندج صور لعرسچ؟ يعجبني اشوفج بمكياج

-جنات: لا ماعندي بتلفوني زوجي ميقبل

چذبت عليها عندي بتلفوني بس لو اموت ما اراويها خصوصاً وره ما سمعت اسلوبها من عرفتني متزوجة مالك وبعدني ميتة حرگة منها وبنفسي اتعارك بس ماگدر ابين متأثرة گدامها واصغر روحي كلامها بكل الاحوال لا راح يقدم ولا يأخر شي..

-دارلان: ليش تخلي يتحكم بيج؟ خلي تكون عندج شخصية مو حلو هيج طبعاً اني احجي لمصلحتج لان مبين انتِ صغيرة

-جنات: مو تحكم هذا حرص ويخاف لا يضيع تلفوني شي مكان هو يعرفني محجبة وملتزمة ميحب احد يشوف جثمي وشعري وهذا حقه واني احترمه

-كيان: ههههههه عفية جناوي عفية حبيبتي يلا نروح؟ يلا بسرعة بسرعة بدلي خلينا نطلع تأخرنا

-دارلان: لا مو يعجبني اسولف ويه جنات اكثر

ما اهتميتلها واخذت ملابسي افوت اللبسهن بالحمام، اخذت شهييق وزفير اريح نفسي واطفي النار المشعولة بيه احس الجو گلب حار فجأة وجسمي بده يرجف لزمت ايدي ثنينهن اعصرهن ويه بعض اخفف من الرجفة، تأثرت زايد من تذكرت هاي نفسها دارلان الي مالك حچالي عنها چان يحبها وشافها ويه واحد.. حسيت نفسي ارتاحيت شوية وطلعت مرة ثانية لگيتها بعدها واگفة!

-دارلان: تدرين اني چنت صديقة مالك هو دائماً يجينا هنا للجم ونلتقي

-جنات: ها حلو

-دارلان: اي قريبين على بعض چنه ودائماً يوصلني لبيتي خطية ويهتم بيه

-جنات: اي ملوكي حنون

رادت تعلق بشي وعضت على شفتها تمنع نفسها درتلها ظهري وطلعت لـ كيان واگفة تنتظرني..

-كيان: جنات سمعتينا؟؟ جاوبيي من التوتر حتى ما سبحت

-جنات: شنو اثمع؟

-كيان: اني ودارلان من حچينا؟؟

-جنات: شحچيتن؟

-كيان: لا هيج خلص انسي يلا نطلع بسرعة

جرتني من ايدي تطلعني تمنيت اصلخها براشدي افوخ گلبي بس دافعتلي هالصيني وما خلت ذيچ المايعة تحجي علينا بس ما تحملت اسكت اكثر احتاج افوخ گلبي وصلت حدها ويايه هديت ايدها ووگفت بنص الطريق متخوصرة..

-جنات: انتِ عااااار كيان!!!

-كيان: اني؟؟؟

-جنات: هاي الماايعة ام ملابث مشگگة شكوو تحجي بمالك هيج؟؟ متثتحينن انتِ متثتحينننن

-كيان: ولج مو اني حجيت هي حچت شنو بيدي قابل!

-جنات: تلطيها على حلگها تكثرين ثنونها! ولج حرگت گلبي اكررهها اكررههااا

-كيان: لا مستحيل!!

-جنات: لا يثتحييل اكرهها ما اطيقهاا الا اتعارك ويه مالك اطيحح حظه هالحقيير شكو كل نثوان الدنيا تحبه شمثويلهن متگليلييي

-كيان: ههههههههههههه

-جنات: گبر تضحك الرعنة ال.....

گطمت جملتي من اللتفتت اكمل طريقي وشفت اخر انسان متوقعة اللتقي بي بهذا اليوم وهذا الوقت بالتحديد هذا...

-جنات: مالك!

-مالك: بعده لسانچ وصخ وتغلطين عليَّ بغيابي جنة؟

-جنات: كله من وره صيني هي الثبب!

-مالك: كيان ليش انتِ الثبب؟

-كيان: اني شغليَّ!

-مالك: على كلٍ شكراً جنات على هذا الاستقبال الحار اللطيف تدرين هذا ارقى واحلى لقاء بتاريخي الاجتماعي والعاطفي؟

-جنات: شتريد اخذك بالاحضان بنص الشارع؟؟

-مالك: اي

بدون كلام اضافي تقدم عليَّ وحضني حضن حميمي قووي كسر بي عضامي، ابتسمت راخية وناسية كلشي صار قبل شوية اول ما طب خشمي بنص جاكيته ولقط انفي ريحة عطره الجذاب.. رفعت ايدي ابادله الحضن وضحكت بصوت عاالي من شالني بمكاني يفتر بيه فرة بسيطة..

-جنات: ههههه ططوتي رجعتتت

-مالك: حبيبتي

-جنات: كافي لا تتهيلگ فشلتنا الناث جاي تباووع

-مالك: طز بالناس

بقى حاضنني فترة طويلة ناسيين ارواحنا حسيت مصخناها بنص الشارع والعالم تروح وتجي بس همزين محد اهتملنا حتى من يشوفونا يبتسمون بدون تعليقات يموتون على السوالف المسربته..

-جنات: دكاافي لطشت

-مالك: مو صوچچ والله

-جنات: مو خطية كيان واگفة رجليها تگرمعت من الانتظار

وخر عني مبتسم بس بقى حاضنني نص حضنة، غصت بحضنه خجلانة من نزل نفسه يهمس بأذني..

-مشتاقلچ حبيبتي شيوصلنا البيت

دفعته من صدره خفيف ونزلت راسي مبوخة سلمت كيان على مالك وركبنا سوه بسيارته، وصل كيان لبيت ماريا نزلت واني گال نروح لبيتنا..

-جنات: مالك نثيييت

-مالك: شنو نسيتي؟

-جنات: شوف شلون نثييت يا الله

-مالك: اي شنو؟

-جنات: عندي امتحان مهمممم كللش بعد ثلاث ايام ولازم ادرثله شوف وقتك ابد مو مناثب ابدد اثفة ارجع ثافر وتعال في وقت لاحق..

نزلت من السيارة وسحبني من ياخة القبوط يرجع يگعدني بالكرسي يثبتني، صكيت ابحلق بعيوني بوجهه من گال وهو مضيگ عيونه..

-اني ادرسچ

-لاا لاا متفهم بهذا الموضوع

-احاول افهم

-لا لا

-اي اي

-مالك انتَ تريدني ارثب؟ شوف اذا تريدني ارثب حتى اعرف شلون أناقشك

-اي اريدج ترسبين

ربط حزام الامان على جسمي ولزمني من متوني ثنينهن..

-صيري حبابة وثبتي

-ما اثبت

-اثبتچ بطريقتي تره!

-ثاقط!

-اموتچ اليوم لو طلعتي

-ثافل!

غمزلي وباس خدي ولزم ايدي بـ ايد وحدة يقيدها حتى ما اشرد، حرك السيارة متوجه لبييته ومثل كل مرة بس نوصل للشارع الي بي بيته يرتاح گلبي واحس بطمأنينة عجيبة..

نزلت من السيارة مرتبكة رجليه متحملني گوة امشي كمش بيه بلطف وباس كفي، وصلت لباب البيت وگمت اعرج بعد مابيه اطب..

-مالك: شبيچ؟

-جنات: يمكن انشليت

-مالك: يوم منى هذا

شهقت اضم حلگي بأيدي من رفعني يشيلني من الگاع ويطببني للبيت يضحك مكيف على ردات فعلي المدا اكدر اسيطر عليهن.. توجه بيه للصالة ونزلني على القنفة متيبسة..

-مالك: راح تموت يا الله شبييج بابا تره ما راح اكلچ

-يا چذاب

-صح والله چذاب

-مالك خلينا نثولف تعال تعال احچيلي شثويت ما ثويت بالثفر جبتلي صوغة لو لا؟ انتَ تونثت لو لا؟ كونت اصدقاء جدد لو لا؟ شغلك ماشي عدل لو لا؟ ا...

-مالك: جنات انچبي

-وجعع انتَ انچب!

جرني من مؤخرة راسي يقربني عليه يريد يعاقبني، لزمتني الباردة وصرت ارعش ضحك وگال بهدوء شديد..

-لسانچ دمرني

-والله اني هم دمرني

-شبيچ جنة

-مالك اخاف

-من شنو؟

-احث.. احث

-شنو تحسين؟

-احث مادري متوترة

-ما اسوي شي انتِ ما متقبلته خلص مو لازم خلينا گاعدين ونسولف مثلما تحبين

-صدگ؟

-اكيد

ابتسمت بحب ممتنة على صبره ويايه واسلوبه الحلو، بسته على خده على كيفي كبرت ابتسامته وگال بهمس..

-اني مشتاق وهي تتحارش

نزلت عيوني خجلانة باسهن وباس راسي وخدودي، نزعني الشال والقبوط يلعب بشعري واخذني للغرفة، تحولت القُبل واللمسات اللطيفة برغبة تامة مني لـ.....

بعد فترة من قضاء الوقت ويه بعض نضحك ونتداهر بشغلات تافهة احب وقتي ويه مالك واحب وجوده بحياتي، غير نظرتي للحب ونظرتي بالرجال كشكل عام.. احب لمساته واحب كلشي يسوي ويقدمه الي، لكن مشكلتي الخجل يسيطر عليَّ وانچلب بسرعة بس هو يداري هالشي وميضغط عليَّ ويحب قضاء وقت ويايه حتى لو احچيله قصة تافهة مثل هسة من اجاه اتصال غلق تلفونه وشمره..

-جنات: جاوب خاف مهم

-مالك: انتِ اهم

تنهدت ومن لا شعور همست بخفوت..

-جنات: احبك

انتفض يبتعد مني فاتح عيونه، ابتسمت مادري شسالفة اصلاً عقلي مو وياية مية بالمية، مسح على خدي بأصابعه الموشومة وسأل ما مصدگ..

-گلتيلي احبك؟

-لا

-لا تچذبين

-مادري نثيت

-انعل ابو النثيان

-لا تعيب عليَّ ططوة

-انتِ ططة

-احبك اي

-هاي احلى كلمة سمعتها بحياتي

-اول مرة وحدة تگلك احبك؟

-لا

-چذذب عليَّ دچذذذذب

-ما اچذب لان مو اول مرة صح بس اول مرة تگولها الي بنية اني هم احبها وميت بيها

-انتَ متحب الصغيرات

-وما زلت

-اني صغيرة

-لكل قاعدة شواذ جَنتي

-يعني شنو

-يعني انتِ استثناء ما يوم نظرتلچ نظرة تشبه باقي النساء

-شلون تنظرلي

-على انچ شي مو متاح شي تسعى حتى تحصله، امرأة انسى كلشي بجوارها واتنهد مرتاح واني حاط راسي على صدرها واسمع دگات گلبها الخجلانة

مسحت على لحيته بيدي وابتسمت مغمضة عيوني ماعندي شي اضيفه ولا سؤال اسئله ثاني خجلني بكلامه بالزايد والدم تنافض بوجهي..

-هذا الخجل راح يروح بمرور الوقت لا تخافين

-ههههه اثكت

باس راسي وگومني يشربني الدوه ومكملاتي الغذائية، حط راسي على صدره يلعب بشعري، رفعت عيوني اله وتسائلت..

-ليش تشربني هذا الدوه؟

-گتلچ فيتامينات انتِ ملتزمة بيهن مو؟

-اي كل يوم اشربهم

-عفية

-بث ماريد بعد مليت واوقات انثى المنبه

طفر مفزوع شدد على معصم ايدي بخفة وگال بتحذير شديد..

-لا حبيبتي ابد لا تنسيهن مو زيين

-ليش؟

-ذني مهمات وضروريات لصحتچ ثقي بيه

-راويتهم لـ كيان ماعرفتهن شنو والمشكلة مابيهن اثم (اسم) وين علبتهن؟

-باچر اجيبها هسة خلينا سوه

-تمام، مخفف لحيتك هالمرة

-مالك: حبيت اغير

-جنات: اممم

-مالك: ما حبيتي التغيير؟

-بالعكث كلش حلو احلالك من اللحية الطويلة طالع اصغر وتجيب التايه

-شنو يعني تجيب التايه؟

-يعني مو حلو

-مو هسة گلتي حلو؟

-اجاملك

-تمام نرجعها طويلة

-لا لا هههههههه اتشاقه والله

-اخخ لو فاهد يمي چان ما انضحك عليَّ يترجملي اول بأول

-على طاري فاهد وينه؟

-مسافر

-الثواه بكيان مينغفرله مالك كللش تأذيت اني

-شسوه؟

-تطلگو

وخرني عنه يخليني اواجهه، متوسعة عيونه مصدوم حرك راسه بـ لا وسأل بأنفعال..

-فاهد وكيان تطلگو؟؟؟

-اي ليش متدري؟

-لا! اكيد لا شلون تطلگو؟؟ وليش؟؟

-فاهد رايح لحبيبته الحمرة من جابت وكيان طگت روحها من الموضوع وطلبت الطلاق

-فاهد رايح لسارة؟؟ هاي شوكت؟

-شبيك صار كم يوم على الثالفة انتَ ليش ماعندك تواصل ويه فاهد؟

-ماعندي جنات هالفترة بس حاط حماية يراقبو على الدعسة ومحد بلغني فاهد رايح لسارة! نهاائياً محد وصلي هيج معلومة

بدون لا يتسائل زايد عن الموضوع فتح تلفونه واتصل على رقم بنفس اللحظة جاوبوا حچى وياهم بالمغربي ما فهمت زين بس ديسألهم على فاهد من نبرة صوته مبين عصّب انتظرته يكمل المكالمة وسألته..

-شگالو؟؟

-فاهد مختفي!

-مختفي؟؟

-ماله اثر مختفي صارله اسبوع حتى الحماية ضيعوا اثره

-خاف بي شي؟

-مادري

گام بسرعة يلبس ملابسه ويعتذر مني..

-اسف گلبي لازم اطلع ضروري

-راح ترجع؟

-مادري جنات، اسف حبيبتي انتِ..

باسني وراح للحمام يسبح، ظل يتصل من واحد لواحد وفاتح مكبرة صوت، بقيت بالفراش افكر يا ترى شنو يكون صاير وفاهد وين؟ وصدگ راح لـ سارة لو ماكو هيچ حچي؟

طلع مالك ينشف شعره وجسمه بالمنشفة والتلفون معلگ بأذنه، تمنيت افهم أي شي بس كله بلغات مختلفة يحچي ماعرفلهن.. لبس بنطرونه وقميصه وساعته وعاف المحابس گمت بسرعة من الفراش وركضت احط الحلقة بأصبعه لبسها بدون لا يحس على روحه شنو ديسوي..

سد الاتصال وتنهد اخيراً، مسح على وجهه مرتاح شوية فرحت بهذا التطور وسألت فوراً..

-جابولك خبر عنه؟؟

-اي واحد گال شافه قبل يومين بفرعنا الي بمراكش

-الحمدلله يعني هو بخير

-مادري گلبي ما متطمن اكو شي غلط فاهد مستحيل يهرب من الحماية الاحطهم يمشون وراه لان يعرف اعاقبه واعصب عليه سواها مرة وحدة وخليته يگول التوبة وما عادها بعد

-مالك فاهد واضح تعبان ويحتاج يرتاح وحده لفترة خلي على راحته ولا تضغط عليه اولته واخرته يرجعلك انتَ اخو وماعنده غيرك

-گلبي نار ماگدر اعوفه وحده مو بيدي

-ميخالف هالمرة عوفه يوم واحد تحمل خلي يصفي باله ويرجع لعقله بلكت يحث شنو صار بكيان من تطلگوا ويجي يعتذر او يلگه حل ويراضيها

-تمام

-جوعان؟ تريد تاكل شي؟

-اليسمع تعرفين تطبخين

-شبيك جاملني وگول لا مو جوعان

-لا ماكدر اجامل هالمرة لان ميت جوع خليني اسويلنا شي ناكله سوه ونرجع

-وين نرجع ولك

رفعلي حاجبه وابتسم بمكر صخنت من حركته وركضت للحمام وقفلت الباب عليَّ بسرعة، دگ الباب عليَّ يضحك غلست ما اجاوبه دگها مرة ثانية يريدني افتح الباب غطيت بهدومي وفتحت الدوش بسرعة اخفي صوته..

طولت هوووايه بالحمام عصيت مثل الدودة بالصابونة، طلعت اخيراً بدلت وهم اخذتلي دهر ياله ترتبت وتمكيجت وتعطرت ورحتله لگيته يطبخلنا والريحة تفحفح، طبخ مالك اطيب طبخ ضايگته بحياتي نفسه فد طيب على الاكل ويحب يهتم بأدق التفاصيل حتى بتزيين الماعون يهتم..

صبلي سوب وفوگاه ملح وفلفل ووردة صغيرة قابلة للاكل وحطلي على جهة ماعون بي تمن مضغوط بطاسة وصاير دائري مرتب وبجانبه شرائح دجاج مقطعة وبتيتة مهروسة وجزر مسلوگ وهم حط تنقيشة بالماعون..

-جنات: خرب عدوك على هالريحة الطيبة عمي انتَ ثبع صنايع والبخت ضايع

-مالك: تعالي ضوگي الطعم وانطيني رأيج

گعدت على طاولة ميز الطعام وجابلي عصير من الثلاجة، انتبهت بيته كامل من المسواگ مادري شلون..

-جنات: شوكت وصلت مالك؟

-مالك: من اجيتچ

-يعني من المطار واجيت للجم؟

-اي

-منو گلك اني هناك؟

-حيدر صديقي گال شافچ انتِ وكيان

-عفية رجال مينضم عليك شي تخووف

ابتسم وحطلي الصحن گدامي وهو صبله عصير لونه احمر وگعد يترأس الطاولة..

-جنات: شمعنى عصيرك غير عن مالتي؟

-مالك: مو طيب مالتي

-اريده

-اكلي جنات

-ارريده

-ولج اكللي مو طيب ما راح تحبي

-اضوگ

-لا

-بث شوية

-گلت لا

-بث.....

لصم حلگي بقبلة وبحركة سريعة دفع گلاص العصير من الميز خلاه يوگع بالگاع وينكسر والعصير يتبده على الگاع، دفعته مني مصدومة..

-هاي ليييش

-بالغلط

-انتَ دفعته

-رايح اجيب مثل عصيرج

گام للثلاجة وطلع نفس البطل ابو العصير الاحمر وكبه كله بالمغسلة وكسر البطل يذبه بالزبالة، ضيگت عيوني شاكة بشي بس المشكلة البطل كلشي ما مكتوب عليه فارغ..

-مالك: خربان مو طيب هذا

-امممم

اكلت بهدوء والاكل كالعادة يخبل، سولفنا سوه وفرحني من گال حل المشكلة الي ابوه حطها براسه احس هم وانزاح من گلبي طرت من الفرح بينما هو ما ابتسم ولا راضي..

-شبيك؟

-جنات: شبيك؟

-عدنا مشاكل بالشركة

-مشاكل شنو؟

-مادية، عداوتنا بآخر موقف صار ويه شركة الاطلس سببلنا هبوط مخيف بالاسهم

-لهدرجة متأثرين؟

-فوگ ما تتصورين

-وشلون؟

-ماعرف

-لعد ليش رجعت املاكي مالك؟ اخذهم ومشي وضعكم بيهن ما محتاجة اني

-تميم جابلچ الاوراق مو؟

-اي بث اذا انتَ متضايق ارجع اخذهم

-لا جنات هاي املاكچ مهما صار لا تتنازلين عنهن

-مو...

-ماكو مو، اريد اصارحچ بشي ثاني

-شنو هو

-جنات اني بس اليوم هنا

-شنوووو؟؟؟

-الفجر طيارتي عندي...

-شنو عندك مالك؟؟ شنو عنددك!! انتَ مثتوعب صارلك شهر ونص غايب لو لا؟!!

-مستوعب اي بس...

-انتَ مو حليت الموضوع مو خلصت من المشكلة الورطك بيها ابوك؟؟

-اي بس صارت عندي مصايب ثانية اتمنى تتفهمين موقفي وظروفي كلشي صار براسي بسبب غياب ابوية وضعي بالنازل احنه انتهينا!

-وين رايح؟

-شغل بالمغرب

-تشوف مريم!! گولهاا مالك گووول انتَ راييح حتى تشوووفهاا!!!

-جنات مريم شجابها هسة المرة رجعت لزوجها وحياتها ماشية طبيعي

-وميت قهر انتَ اكيد!!

-ليش اموت قهر؟؟ شيخصني بيها والله كتلتوني!

-انتَ دگك ومدگووگك هاي البنية!! روحلها عيونيي روووح اروي عيوونك بشوفتهاا وارتاااح

عفت الغدة وگمت من الطاولة طاگة روحي، جرني من ايدي يرجعني ونترت ايدي منه فايرة لحد هسة ما تخطيت كلام دارلان انوب هسة زادها ويريد يروح للمغرب مكان مريم البنية الراد يخطبها ويتزوجها قبل فترة!

-مالك: جنات ما رايح اشوف احد! معليه بمريم وما تهمني بشي وروحها لامي مو ببالي اصلاً هسة انتِ ذكرتيني بيها! جنة لازم تستوعبين اني رجل اعمال وهاي حياتي سفر وشغل ماكو استقرار

-ابوية وعمامي هم رجال اعمال بث ولا واحد مثلك! محد يثافر ويغيب هالگد! انتَ متخيل متثبت بدولة وحدة شهر؟؟ شهر متطول بدولة تتنقل مناا ومنااك تعبت نفثيتي من هالوضعية!

-حقچ

-مالك انتَ تزوجت صار عندك بيت وزوجة وامور مهمة

-وهذا السبب اني ضد فكرة الزواج والعائلة لان اعرف نفسي وشغلي وهالامور مو بيدي ماگدر اأجلها هاي كلها اجتماعات مهمة نحجز مواعيدها قبل اشهر

-لعد زواجنا ما راح ينجح اذا تبقى على هالحال

-تفهمي وضعي

-تمام

-جنات

-تفهمت الموضوع خلص روح الله وياك

ذب حسرة تعبان ثبت عكوسه على الميز وفرك عيونه، متفهمة وضعه وعصبيتي طلعت لا ارادي بسبب الضغوطات الدا احس بيها ماكو استقرار وكلشي بحياتي مخربط، انقهرت عليه واعرف مو بيده هالشي حاله بالضيم واني زدتها عليه سحبت ايده وحطيتها بين ايدي وگلت بلطف..

-اعنيها مالك روح الله وياك كمل شغلك وارجع راح اكون موجودة منتظرتك

-اني اسف حبيبتي وحقچ عليَّ اني مقصر وياچ

-مو بيدك هالشي اعرف لو بيدك تگابلني وتگعد شيشلعك منا

ضحك يهز براسه اي، ابتسمت من باس ايدي و.....

-اگلك اگللك

-لازم تشلع گلبي

-لا والله صدگ احچي راح تحضر حفلة شُهيب ومثرة اليوم مو؟

-لا

-لا حباب تعال شبيك

-اشوف اذا يصير عندي وقت

-يصير يصير انتَ بث احترم نفثك شوية راح يصيرلك مجال

-هم اتعب من الاحترام الزايد تعااالي......

**

-مالك: انتِ السبب مسررة كله منچ انتِ دمرتيي انتِ حرمتي من شبابه وحيااته انتِ كللله بسببچ انتِ!!

-مسرة: بس اني معليه ما ردت يصير هالشي والله مااااردت

-مالك: هسة تبچين عليه وتنوحين؟؟؟ وره ما نهيتي؟؟ هسة راضية!! امچ الميتة راضية عليج بگبرها وانتِ حرمتي شاب مثل الوردة من حياته؟؟

-لااا لااااا.... لا

فزيت من النوم اللهث وكل خلية بجسمي احسها ميتة وخاملة، گلبي ينبض بجنون اثر هالكابوس المرعب، مسحت على صدري بيدي اهدأ نفسي واذكرها هذا حلم ومو حقيقة.. حلم تكرر ثلاث مرات من البارحة لليوم كلما تغفى عيني احلم بـ مالك يتعارك ويايه علمود شُهيب روحي طلعت..

گمت من مكاني رحت اغسل وجهي وشربت مي ونويت افتر بالبيت شوية بلكت انسى، دگيت باب غرفة كيان وفتت عليها من سمحتلي، شفتها لافة شعرها بمنشفة هستوها طالعة من الحمام وجهها صاير احمر من حرورة المي..

-مسرة: مشغولة؟

-كيان: لا حبي قبل شوية رجعت من الجم

-ها شو جنات ماكو شنو رايحة للجامعة؟

-لا اليوم عطلة مالك رجع واخذها وياه لبيتهم

-امم، حضرتي نفسچ للحفلة لو بعد؟

-لا ما اجي

-تشاقين!

-كيان: جنات تكول اني بالعدة وميصير اتبرج وماعرف شنو

-مسرة: يااا بس هذا نجاح اخوانچ راح يفرحون بحضورچ حرامات

-كيان: ماعرف والله اشوف وضعي خليني اسأل جنات يصير احضر لو لا

-تمام

-شلونه حبيبي

-مسرة: ذالني ذل

-كيان: ههههه ديري بالج على ابن اخوية حبابة انتبهي لنفسج

-مسرة: زين فصعوني لتخافين

-كيان: رحتي للطبيبة مو؟

-مسرة: لا بعدني

-كيان: مسرة ليش هاملة نفسج لا تفضلين الشغل على صحتچ وصحته

-انتِ مو بحال صحتي عيني ادري بيج بالچ ويه ابن او بنت اخوچ

-كيان: ههههه والله منتظرة هذا الطفل على نار هاي فرحتنا الاولى شُهيب متمني طفل وراح يطير بي

-شهوبي العنوني زين كنو لا تقلقين مهتمة بي وبأكلي وباچر اروح دكتورة

-تمام يروحي وشكراً هواي

-تتشكريني لان اهتم بطفلي كياني

-اي مادري متحمسة كللش وفرحانة ههههه

ابتسمت وشمرتلها بوسة بالهوا رجعتلي وحدة وسوتلي بيدها باي، رحت لغرفتي واول ما سديت بابي تنهدت تعبانة طلعت تلفوني من الجيب ودگيت لـ سام..

-ما عرفت ليا بريد راح يوصلن الملفات مال الشركة الوهمية الشُهيب وقعهن؟

-سام: عرفت بس ما قبلوا ينطوني الملف دخلت معارف بس تأخرنا مسرة گالو الملف طلع من البريد متوجه للمستلم

-مسرة: لاااا سام شلوون هسة شنسوي!

-سام: راح احاول بعد انطيني هاليومين راح احل الموضوع لا تخافين ما اخلي يوصل

-اعتمد عليك سام تره ابوية حاد سنونه على شُهيب يريد يسقطه بكل الطرق

-اعتمدي

سديت الاتصال بس گلبي يلعب التفكير والقلق اكل راسي ميتة خوف ما ينجى منها شُهيب وتتلبس بي التهمة، نفضت راسي من الافكار السلبية ونويت اعتمد على الله وعلى سام يشوفلي حل..

اليوم الحفل ولازم اصب كل حيلي واهتمامي بي، كملت حجز القاعة ونشوان ووئام وكرستين اهتموا بكل التقديمات والترتيبات مال الحفل، دخلت اسبح بحمام دافي حسيت بتقلصات ببطني وجعتني دخلت بمي حار شوية ارتاحيت..

طلعت من الحمام لافة روحي بالبرنص، فتحت باب الكنتور اتأكد من كوي فستاني وطلعت حذائي واكسسواراتي، حطيتهم كلهم على الشازلون وهزيت راسي بـ رضا..

گعدت على كرسي التسريحة امشط شعري وفتحت الشسوار انتظره يحمى، اندگ باب الغرفة بقيت منطيته جانبي الايمن امشط وسمحتلهم بالدخول، وگفت ايدي على النص من شفت ظل واحد طويل يوگف بصفي..

-مسرة

اللتفتتله بملامحي الباردة ملاح عكس الحرورة الاحسها بگلبي الفز بشوفته، همهمت بخفوت ووگفت على حيلي تقرب يوگف وره ظهري يباوعلي من المراية..

-مبارك نجاحچ مسرات

-نجاحنا

-تعبتي انتِ

-تعبت اكثر مني

-اسمچ معروف وهو الجابلنا الشغل

-واسمك ميقل عن اسمي بشي

شفت ابتسامته تنرسم على وجهه المشتاقتله، احبه يا ناس واحب تواضعه احب شلون يعزز من نجاحي وينسب كلشي الي ويركن تعبه على جهة، شُهيب تعب بهذا المشروع واشتغل ليل نهار عليه ونجاحنا مشترك واسمنا واحد وتعبنا واحد بس دائماً ينطيني الفضل ويگول جملة "اهدي كل نجاحي وتعبي لعيونچ"..

طفى الشسوار وجر المشط من ايدي يحطه على الميز، لزمني من متوني برقة يديرني عليه ورفع راسي من حنچي يخلينا نصير عين بعين..

-احبچ مسرة

-شكراً

-روحي بيچ تدرين بهالشي لو لا؟

-يمكن

كبرت ابتسامته وكوب وجهي بين ايده، باس طرف انفي كزبرت غمضت عيوني گلبي راح ينفجر من دگاته المجنونة، تجرأ ونزل بقبلاته يتعمق، بادلته لثواني وتذكرت روحي جريت نفسي وحضنته من رگبته اضم وجهي عنه..

-مسرة: شُهيب

-لا تسدين البيبان بوجهنا خلينا نعيش الحب سوه

گلبني بحركة خفيفة يخلي ظهري على صدره ايد محاوطني وايد تتلمس وجهي ورگبتي، بلعت ريگ وضاعت الكلمات من دخل ايده بالبرنص يتلمس بطني ويمسح عليها..

جفلت من حركته اول مرة يسويها، رجفت اوصالي من شم شعري ودفن وجهه بي وهمس..

-شلونه

-هااا...؟

-شلونچ

-گلت شلونه

-لا ما گلت

-ها يمكن سمعت غلط

-اكيد

-احم اي

-شبيچ

-عقلي شوية مشوش فكري ويه الحفلة

ديجاوبني ونقذني تلفوني من رن، تملصت من بين ايده على كيف ورحت لتلفوني اشوفه اتصال من صبا سويت روحي هذا اتصال مهمم ومستحيل اگدر افوته وجاوبت برسمية مصطنعة..

-مسرة: نعم؟.. جيد.. تمام

-صبا: وجع شنو جيد تمام دا اگولچ اللبس الفستان الاحمر لو البنفسجي؟؟

-مسرة: البنفسجي جيد

-صبا: بس مشلح يبووو مروان راح يكرهني عيشتي

-مسرة: الاحمر افضل

-صبا: لا ولج شو كلش مستور احسه مو شخصيتي بس هو مروان جابه الي لعيد ميلادي واستحيت اگله ما عجبني

-مسرة: والحل؟

-صبا: عندج فستان اللبسه؟ بس ماريده مصلخ حبابة مروان خانگني مسرة تعبت من هالوضع ولج ربع ردن ميخليني اللبس راح اتخبل

-مسرة: نفس العندي

-صبا: اخوان بعد شتتوقعين منهم اااخ لو اللزم مروان الا الطلع القضى والمضى بي ذولة لو يشوفون لبسنا قبل چان انجلطوا والله هو هسة محترمة روحي ويگلي لو ابقى عليچ اشد گرون واگعد على طاري الگرون شنو معناها؟

-مسرة: بعدين اشرحلكم

-شُهيب: يُفضل هالشي

رفعت عيني اله لگيته واگف ومچتف ايده، صفنت عليه وصبا تحجي تحجي تحجي تحجي ما سكتت..

-صبا: اگلچ شصار بينج وبين هموسچ ماكو تطورات؟

-شُهيب: للاسف جاي تقاطعين هاي التطورات

عضيت على شفتي اخفي ابتسامتي عزه ديسمعها بس شلون؟؟

-صبا: عزه هذا صوت منو ولج؟ ولج ولج يا نذلة ملتهية بالشغل ويه هذا العار وعايفة ابو الهماميس؟

-مسرة: ابو الهماميس يمي وديسمعچ فضحتينا الله لا يفضحچ

-صبا: ياااا يلا روحي روحي سوري

سديت الاتصال وعصرت التلفون واضح شُهيب سمع كل المحادثة، اللتفتت اواجهه على صوت ضحكته ابتسمت وچتفت ايدي رافعة حاجبي..

-شو تضحك؟

-شگد تگصن بينا

-لان تستاهلون

-خانگچ اني مسرات؟

-كلللش

عفس ارنبة انفه يبتسم گزگزت على حركته وجريته من رباطه على كيف..

-بس احب

-تحبين شنو؟

-احب غيرتك عليَّ ومتقبلتها

-مو خانگچ؟

-ما سامع بمقولة البزون يحب خناگه؟

-واني احبچ

-تره مو اني الاحبك اقصد على البزونة

-هو انتِ بزونة

-اءءء اءءء لا تتسوفل شيل ايدك

دفعت ايده وره ما لمسني وحضنت جسمي احتمي من لمساته وحركاته، ضحك وشدني يحضنني من وره ورخى ربطة عنقه، انفاسي ثقلت وطاقتي خانتني ماگدرت احاربه وابعده استسلمت بين ايده مثل النجمة ولگت سماها الصافية، نجمة استقرت من عرفت اكو من يحميها هيچ يلوگلي شُهيب وهيچ اشعر بالامان والطمأنينة بحضنه ووجوده.....

بعد مدة من الزمن قاطع خلوتنا صوت طرق الباب بشكل سريع وعالي وصوت ماريا تدردم وراهة..

-ماريا: هاااي ليشش الباب مقفووول اهووووو

-مسرة: امك حبيبي

تنهد وراسه على بطني اللعب بشعره الحلو، اختفى صوت ماريا توقعناها راحت من عرفت الباب مقفول..

-مسرة: هموسي بيوم التنوي تزين شعرك راح اعتبر روحي ارملة

-شُهيب: ارملة ليش؟

-مسرة: لان راح اعدمك بيدي

-شگد عنيفة هالبنية

ضحكت بصوت عالي من عضني يعاقبني على كلامي ولزمت ايده أرجعله العضة، لزمني من ايدي ورجلي وعقچني طابگ جسمي متت من الضحك واعيط بي يعوفني وهو معاند وينغز بيه بلحيته..

-ههههههههههههه لاا شُهيب ولك همووووسيييي هدنييي

-تعدميني موو وصلت بيج تعدميني علمود شعر

-اي اي ههههههه

-واني اعرف شلون اعاقبچ لو گصيتي شعرچ

-ما اگصه

هدني وجرني يگعدني على رجله، ابتسمت وسندت ظهري على صدره ارتاح، لف ايد حول خصري والايد الثانية لحم كف ايدي بكف ايده يطبگهن سوه..

-احبچ مسرات روحي

-تعال تعال اريد اخذلنا سيلفي

-هم صور مسرة مو والله لعبت روحي من التصوير

-حباب بس وحدة

هز راسه موافق وحضني يثبت حنچه على كتفي، قربت الكاميرا اخذ صورة بس لوجوهنا طالعة طلعت تجنن..

-اريد انشرها

-لاااا عاد

-اتشااقة والله شبيك يعني تتخيلني انشرلك صورة مستحيل اسويها

-ابدد ليش يا يوم مسويتها انتِ

-ابد اصلاً ما مسويتها اذا متصدگني اسأل صبا

-صبا لو اسئلها مسرة عدها بنية اسمها ميس راح تگلي لا هاي اختها

-ههههههههههه هو صح بس تره ما ناشرتلك صورة من قبل لا تظن بيه سوء

-اي حبيبي هذا اني كل يوم اخذ صور لشعري وانشرهن ستوري

-اءءء..

-ومرة مسويتلي ستوتة وناشرتها!

-اءءءء

-ومرة سويتيلي....

-هاي شبييك لا تواجهني بقبح أفعالي عيب علييك

-نشوان وفاضل مسويني ميز واني كلشي ما فاهم لوما نشوان يراويني نشرچ چان بقيت هيچ يا غافلين الكم الله

-منو گلك متفتح انستا؟ شوف قبل چنت تتابعني اول بأول هسة حتى ستورياتي متشوفهن

-ما اللحگ وحاذفه بس راح ارجع اتابعهن واحافظ على ما تبقى من كرامتي

-شهوبي لتصير اوڤر تره مناشرة شي

-فتحيلي تلفونج

-هاا؟

-فتحيلي اشوف أخر ستوري نشرتي

-لا شبيك كلشي مناشرة اصلاً احنه متزاعلين

-فتحي فتحي

-مااا

-فتحي لو اشوف الستوري من تلفوني

-حاذف الانستگرام انتَ نام ناام

-هسة احمله واشوفه قابل صعبة

جريت تلفونه من ايده وضميته لصدري ماخلي ياخذه ضحك ضحكة شيطانية وهجم عليَّ و...

-شهوووبي اطلعععع اريدددككك

-مسرة: عزةةة خالة بعدها هنا!!

-ماريا: شُههههيب تعال حباب

-شُهيب: بس أشوفها وارجعلج اني الچ

-مسرة: اوكي بيبي... لااا ينگص لساني اذا گتلك بيبي بعد

-شُهيب: ليش؟

-ماريا: شهوبي زعلت عليك اني امك تعاال

-مسرة: روحلها خطية

هز راسه اي وگومني تمددت بمكاني وركض فتحت الانستا احذف اخر ستوري ناشرته وهو عبارة عن صورة لشعر هموسي اليلمع وحاطة كلمة "احبه" بالعربي والله هيبتي طارت والكرنج ملاني من كل الجهات بسبب حبي لهالرجال، لبس قميص ومد بس راسه من الباب..

-شُهيب: صحتيلي يمة؟

-ماريا: اي

-شُهيب: شنو محتاجة حبيبتي گولي

-اريدك تسويلي شعري للحفلة

-كيان وين؟

-نايمة متقبل تگوم

-تمام وفيروز؟ جنات؟ أي وحدة من البنات؟

-اريدك انتَ

-تمام تنتظريني شوية گلبي؟

-شگد

-فد ساعة مو اكثر

-بس انتَ صارلك ساعتين و 49 دقيقة بالغرفة

ضحكت بصوت وگمت من مكاني اللف الروب على جسمي خطية حاسبة دقيقة دقيقة المسكينة، دفعت شُهيب شوية عن الباب وطلعتلها احچي وياهة..

-مسرة: شهوبي ليش تخلي امك تنتظر ساعتين و 49 دقيقة؟

-شُهيب: شگد حاروگة

-ماريا: صارت ساعتين و 50 دقيقة هسة!

-مسرة: شگد عيب مو هاي امك الجابتك وتعبت عليك، خالة معليچ هسة ينزل ويسويلچ تسريحة

تباوعلي ومغضبة حواجبها ملامحها حاقدة عليَّ ومطنگرة، ضميت شفايفي داخل فمي اخفي ضحكتي من گالت بأسلوب طفولي متنرفز..

-ماريا: اصلاً انتِ اخذتي!

-مسرة: اني؟؟؟

-ماريا: اي انتِ اخذتي مني شهوبي

-مسرة: لا خالة على بختچ اني شعليه هو ابنچ لازگلي اصلاً اني ماريده ماحبه ولا اتمناه

-شُهيب: هسة شلون تخليني احجي حچاية شكبرها

-مسرة: وتطشر العرض شُهيب؟

-ماريا: ساعتين و 51 دقيقة!

-مسرة بهمس: روحلها يمعود لا تصير ثلاث ساعات

-شُهيب: جايچ يمة

سد الباب وبدل ملابسه ضحكت على سرعته مخبوص يعدل بشعره ويسد دگم قميصه، رفع انظاره الي وگال مستعجل..

-راجعلچ انتِ بسيطة

طلع واخذ امه وياه، بقت تدردم عليه وتضربه على صدره وظهره مثل الام التعاقب ابنها الصغير معترضة وزعلانة شلون خلاها تنتظر كل هالمدة، نزلو الدرج سوه والفضول خلاني اطلع وراهم وامد راسي من الدرج اشوفه شلون يراضيها..

-ماريا: اني مااااحبك بعددد

-شُهيب: يمة مو مسرة مريضة شلونها اعوفها وحدها

-ماريا: وانييي مريضة

-شُهيب: بس انتِ مابيچ شي شوفي شحلاتج لابسة فستان ومرتبة وعطرج حلو بقى بس شعرج

-ماريا: انتَ واحد عااق

-شُهيب: عاق؟! هاي منين متعلمتها؟

-ماريا: مادري

-شُهيب: تمام اني عاق واسف حبيبتي حقج عليَّ

رقت نظراتي من بوس ايدها وراسها بسرعة سامحته وحضنته ترجعله البوسة، گعدت گباله تخلي يسويلها شعرها سوالها اول تسريحة ما عجبتها رادت غيرها.. سوه ثانية هم ما عجبتها وفتح شعرها يعيدلها من جديد.. اشوفه يلوب وكل شوية يقنعها ويگول..

-والله حلوة صدگيني يا يمة

-لا مو حلو

-مسرة مريضة ماكدر اعوفها اكثر لازم اروح يا روحي انتِ

-واني؟

-انتِ مو اتفقنا مو مريضة؟

-ها اي صح

-تمام يلا اني اروح شوية وارجعلج اتفقنا؟

-مو اريد تصبغلي اظافري

-مو مصبغات؟

-اريد نفس لون مسرة مال قبل ستة ايام

صفن وكأنه ديتذكر ضحكت ماخذها على گد عقلها بس ضحكت على روحي من جاوبها بثقة..

-هذا الذهبي مو؟

-اييي هو مو الي ينطي للجوزي انتبه

-شُهيب: أي اتذكره يلا جيبي بسرعة

فكيت حلگي ممصدگة يتذكر صدگ! شگد مركز بيه وحافظ كل تفصيلة والله هواي على گلبي شُهيب لا تصعب الموضوع عليَّ اكثر..

گعد يصبغ اظافر امه بتركيز، رجعت للغرفة وفتت اسبح وطلعت بسرعة امشط وابدي اشسور شعري، كملت كل شعري وشُهيب ما صعد لسه ابتسمت من تخيلت ماريا لازمته وتتأمر عليه تخلي حتى يساعدها بالفستان والحذاء واكيييد هو ميگدر يرفضلها طلب بحياتي ما شفت ابن بار بأمه مثل شُهيب..

برمت شعري بعدما شسورته ورفعته بتسريحة تناسب تماماً فستاني الراقي، فستان اسود بياخة عالية من تول اسود ورداناته هم تول ومرصعه بكرستالات تلمع ناعمة وينزل الفستان ستن ثقيل منفوخ شوية طوله تسعين..

خيطت هالفستان من فترة عند مصمم ماهر بس لان امي الله يرحمها عندها نفسه ونويت اللبسه بمناسبة مهمة تفتخر بيها امي لو چانت عايشة، وماكو مناسبة افضل من استلامي مشروع ضخم تتمناه الشركات..

بديت احط مكياجي مركزة، اني انسانة تكره الصالونات واروح للصالون بس عند الضرورة لان لعبتي المكياج واكثر شي يونسني، اليوم سويت الاساس بسيط والشغل كله بالعيون تعبت بي ردت اطلع اليوم استثنائية ردت ارفع راسي فوگ وافتخر بتعب شهور ونويت اهدي كل تعب سويته لامي الله يرحمها جنات علمتني على هالشي تگول امي راح تحصل اجر وتفرح بقبرها وصرت اتبع هالشي بكلشي زين اسوي بحياتي..

برسمتي للحمرة دخل شُهيب وجمد بالباب درتله بس عيني اشوفه مستغرب من وضعي وتجهيزي..

-مسرة

نطق اسمي بجزع ودخل وسد الباب وراه، سديت الحمرة واللتفتتله اراوي فستاني وادور حول روحي..

-شنو رأيك؟

-قبل شوية احلى

-قلة الادب تُدرس عندك

-ما انتظرتيني

-لان تأخرت حبيب امك

-ماگدرت اعوفها ماعدها غيري كيان نفسيتها تعبانة وماريد احملها فوگ طاقتها

-اكيد زين تسوي

نزلت اللبس حذائي واخذت جنطتي ال clutch وبست ايدي ونفخت البوسة اله، ابتسم وسحبني من اصابعي يقربني اله..

-وين رايحة وين

-تأخرت

-نروح سوه

-لا خليني اروح وحدي احسن

-ليش؟

-اتفاقنا بعده شُهيب

-اتفاق؟

-موضوع الطلـ.....

ما خلاني اكمل الكلمة وسد حلگي بأيده الچبيرة وسفطني على الحايط ضرب ظهري، عاصر فكي يمنعني انطق كلمة ووجهه انگلب وعيونه جحظن بعصبيه..

-طلاق شنوو؟؟ والصار بيناتنا قبل شوية؟؟؟

غمضت عيوني دليل افتح حلگي خليني احچي بس ما خلاني بالعكس شدد اكثر لدرجة احس اصابعه طبعن بوجهي وخلفت اثر ابيض، تنرفزت ودفعت ايده مني وضربت صدره ادفعه عني تخخبل عليَّ ثاار من حركتي وعاط بصوت غاضب راح يفترسني..

-مسررررة شايفتني **** گداااامچ؟؟؟ وييين تردين توووصلييين فهمينييييي

-مليت

-شنو

-مليت اني انسانة ملولة ومليت من هالعلاقة

بقى على عگدة حاجبه، كملت بصوت قوي متحدية نفسي اخلص هالموضوع اليوم..

-اني وياك ناار وماي واحد يطفي الثاني لو تلامسوا! عوالمنا مختلفة ونهايتنا معروفة ليش متمسك بهاي العلاقة السامة؟؟ ليش مستقتل على شيي غبي ما رااح يدوم!

-يدووم لو انتِ قويتي نفسسچ وثبتي للكل حبنا!! انتِ قووية وشررسة بكلشيي بس من يجي المووضوع يميي تصيرين وحدة ثاانية

-بالضبط وهالشي ديزعجني افقد قوتي يمك وانسى كلشي تعلمته وتربيت عليه اذب سنين عمري كلها بحاوية فارغة واركز بس وياك وهالشي ديخليني ضعيفة وهشة بسرعة انكسر واني ميعجبني اكون هالشكل لان اني مو هيييچ!!

-تحسين بهاي الاحاسيس لانچ مطمأنة مسرة هذا شعور الامان!! هذا شعور حلوو لازم تكونين فرحانة بي ومتقبلته ليش ما تحبين تكونين مرتاحة؟ ليش ما تتقبلين السعادة تدخل حياتچ؟

-لاني سَم ونهايتك على ايدي شُهيب شمسون، سَم راح يمشي بعروقك ويفسد دمك ودم كلمن تحبه

-لا تحچين على رووحچ بهالطريقة

-اني اجيتك لغاية شراكتنا لغاية! تقاربنا لغاية! زواجنا لغاية! كللشي بيناتنا لغااية وثنينا متغاضين عن هالغاية ومنجرفين وره مشاعر تافهة! مشاعر غبية ما راح تدوم!

-كل هذا الحچي ما يهمني وما راح يهمني اني اريدج الج وبس!!

-اني ماريدك

-چذابة

-ما مچذبة هاي الحقيقة ماريدك شُهيب اني كرهت هاي العلاقة وقبل شوية انطيتك الي تريده حتى متشهد ضدي بالمحكمة وتگللهم اني ناشز!

-نااااشز شنووووو

صفع الحايط بيده بقوة وطگگت الشرايين بجبينه ورگبته من العصبية، يرجف ويرعد وعيونه بگصته، كمل بنفس نبرة الغضب الحارقة..

-شايفتني حيواااان؟؟؟ حيواان يدور شهوات وهاي الخرابيططط!! تتخيلين راح اشهههد ضدچ بالمحكمة واگلهم ما تنطيني حقوقي؟؟؟ لو امووووت ما اسويهاا مسرة واذا انتِ متضايقة من هالموضوع انععل ابووه عندي اهمم شي راااحتچ!!!

-انتَ مشكلتك ما راضي تستوعب! كلشي غلط ومتعب وتعيس راح يبقى مرافقك ماطولنا بهاي العلاقة!

-اني راضيي انتِ شعليييج راضي بكللشي يصيرلي وما راح تشوفيني اتذمر لو اتعب انييي اتحمممل كلللشي لخاطررچ افهمممي يا مرررة اني احببببببچ!!!

-الحب مو كلشي شُهيب انتَ انسان واعي وفاهم! احنه من اول يوم انودلنا بي اعداء! والاعداء يتحولون حبايب بس بالافلام الخيالية والمسلسلات!

-سويتينا اعداء؟؟؟

-لا تخلي هاي الامور تنهي كلشي بنيته وبنوه اخوانك مشكلتي حقودة ومتعودة ادوس على گلبي مشكلتي ما انسى الاذاني ولا انسى الجار عليَّ

-اخواني شيخصهم؟؟ اني گتلچ اتتحمل كللشي منچ اتحمل غضبج وحقدج وراح اتفهمه بس احچيلي!!

-مستحيل تتفهمه ولا تتفهم ناري المشتعلة هالنار راح تلتهب وتطلع بيوم وتحرگك!

-تتذكرين من گلتيلي انتِ خطرة وكلشي تلمسه ايدچ يحترگ؟؟ اني جاوبتچ بيومها وگتلج مستعد احترگ ومستعد اللعب بهاي النار واطفيها بيدي

ضحكت بأستهزاء وحطيت ايدي على صدره ادفعه منه بخفة، كملت بحقارة ولئامة ادوس على شكو دگة گلب تنبض بأسمه..

-اليلعب بالنار رماد تاليته

تركته واگف مذهول ما مفتهم شي اول مرة اشوف هاي الصدمة تعتلي وجهه، بلعت ريگي وغصتي وياه وركضت اطلع من البيت اركب ويه سام بالكراسي الخلفية وانفجرت... انفجرت بالبكاء احس نياط گلبي دتتگطع روحي محترگة حنجرتي تمزقت ويه كل كلمة طلعت مني بس مضطرة.. مضطرة اخلي يبتعد ويروح شُهيب ميصدگ من اگله كلشي تلمسه ايدي يحترگ مشكلته ميصدگ!!

**

-مساء الخير

-صبا: هلا فيروزة وينج تأخرتي راح اموت هنا

-فيروز: شكو شصاير

-صبا: ابوية تعارك ويه مروان من اجه ياخذني وسمعه حچي مثل السممم

-فيروز: شجاه ابوج؟ شوكت يتوب ويبطل يسببلكم مشاكل؟

-صبا: اني هم تعبت بس المشكلة مروان هادئ ما زعلان ولا عصب لا مني ولا منه وهالشي ديقلقني

-نشوان: الوضع نعععل

-صبا: يا ستار هذا منين طلع

-نشوان: صبا؟؟ شمصخمة ويه اخوية مخليته ينگلب ذا هولك عليَّ؟؟؟

-صبا: يعني عصب؟؟؟

-نشوان: عصب؟؟ گلتيلي عصب؟؟ ولچ فاكهة حياتي هذا ماعون الفواكه راد يكسره على راسي وروح امي گوة شردت منه

-صبا: الحمدلله والشكر ياربي والله قلقت عليه

-نشوان: شوف حظي المنعل اني ويامن اجيت احچي خليني اروح ادور السيد و... ولك سييييد هنا هنااا

-صبا بهمس: نشوان فشلتنا ولك هنا كلهم كلاس ومرتبين

-نشوان: كلاس شنو؟ چنهم سيت مواعين همه وقوطهم

-صبا: ذولة جيبوبهم ثگيلة عيوني تحملهم

-نشوان: بعد چبدي چبدهم باع ذاخ الفايخ چنه.... اشتعلوووو

-اه اسفة

جمدت، جمدت صبا، جمد نشوان واخيراً جمد فاضل الي وصل يوگف يمنا ويه الموقف الصار هسة، بنية شابة محجبة ما حاطة نقطة مكياج بوجهها بس وجهها ينفض دم والبشرة تلمع لمع گزاززة تبده عصيرها بيني وبين نشوان وهمست "اه اسفة" وغطت فمها بنعومة.. اني مرة وظليت فاكة حلگي على هالنزاكة..

-فيروز: عادي حبيبتي ما صار شي

-اعتذر منكم بس اعصاب ماعندي هالفترة ايدي تظل ترجف وما سيطرت على الكاسة

-نشوان: سلامة اعباصچ

-فاضل: اعصابج اعصابج يقصد اعصابج

-نشوان: صح صح هههههه خربطت اسف

-مو مشكلة، شكراً لتفهمكم

اشرلي نشوان الي ولصبا حتى نستوقفها اشوفه گام يتفنن بالحركات حتى بس نحچي وياهة بعد واني وصبا ثنينا خبثنا وياه وخلينه البنية تروح..

-نشوان: من انععل اليووم العرفتچن بي يا حياية يا عگارب يا فاقدات الاحسااس

-صبا: شسوينا ولك

-نشوان: ما وگفتن ال... الملااك ما وگفتن هاي الحورية وسولفتن وياهة لو بس امهات الغوولة تاخذنهن حاصل فاصل شسم حمرتج وشسم كحلتتج من كحلو حالچنن وخلصنا منچنن

-فيروز: كل هالردة الفعل بس لان ما حچينا ويه هاي البنية!

-نشوان: اني عتبي مو وياچ عتبي على هاي مرة اخوية السمانية العگربة

-صبا: هاي شبيك شوشو هسة اني شنو اقره عيونك قابل سيد احچيلك كلمة

-فاضل: نعم صحيح

-فيروز: على شنو؟

-فاضل: نعم؟

-صبا: گلت نعم صحيح على شنو؟ يعني تأيد كلامنا لو شنو؟

-نشوان: فاضل اشگك نصين لو گلت ايي اصلاً انتَ چنت سارح بفيروزز

توسعت عيوني وعيون فاضل بنفس الوقت ونشوان صفن مستوعب بعرته، درت وجهي اهرب من الموقف وصبا تنصب علينا وتضحك..

-صبا: هههههههه هاا سيد مو عب والعياذ بالله من الخبث والخبائث تاليها عرفنا منو الخبث والخبائث مالتك

-فاضل: استغفر الله ربي واتوب اليه اعوذ بالله الكل افتهمني غلط واولهم صديق عمري ورفيق دربي في الدنيا والاخرة نشوان ابن سلوان

-نشوان: يا بعد گلبي يعني بيها مجال نبقى سوه بالاخرة وتشفعلي؟

-فاضل: لا عزيزم راح اوگف بباب جهنم اضحك عليك واصيح افيييييييييش

عافنا وراح اللتفتت اواجههم اخيراً ونشوان گالب وجهه ويفر بيده..

-ميتحمل شقه هالبشر

-صبا: نشوان روح شوف حياتك عزيزي روح دور على فارسة احلامك عيش الحب عيش العشق والهيام والروح الحلوة

-نشوان: خرب سويتيلي واهس تعاليي فيروز

-فيروز: ويييين

-نشوان: تعالي نحجي ويه هاي الملاك انتِ خوش تسولفين

اشرلي امشي گدامه گلبت عيوني ورحت وياه، الانسان الوحيد الي محد يتقيد وياه بالشركة هو نشوان اضحوكچي وكله طاقة وحيوية بس عنده مشكلة ويه النساء وهي أي وحدة تعجبه لو تطلع تحب لو متزوجة لو يتردد وميحچي وياهة..

-نشوان: اذا هاي الملاك طلعت متزوجة ماكوو؟؟ والعباس ابو فاضل والقاسم والكاظم والرضاا اضرب على الزواج واحرم العالم من نشوانون صغاار

-فيروز: تفائل يا خوية تفائل.. هذيچ البنية شوف اني راح اوگف بجانب طاولتهم احط جنطتي هناك واسوي روحي اخذ كلينس وابدي وياهة الحديث انتظر انتَ اربع ثواني بالتحديد وتعال كأنك دتصيحلي

-نشوان: بالعباس خطة تشگ ششگ بس ليش اربع ثواني؟

-فيروز: شبيك ردت اگول خمس ثواني بس گلت ليش نماطل خليهن اربعة

-نشوان: ولج شنوو من عقل شايلة اطلعه ابوسه وارجعه مع احترامي الكامل لحجابچ

-فيروز: هو انتَ خليت بيها احترام؟

-نشوان: يلا يلا فيروز مشيها امشي انتظرج

هزيت راسي وبديت بالخطة رحتلهم ومديت جسمي اخذ من طاولتها كلينس ابتسمتلي ورجعتلها الابتسامة..

-فيروز: راح اسرق كم كلينسة منكم

-حبيبتي كله گدامج

-فيروز: حلو تحچين عربي وعراقي بالتحديد

-اي اني عراقية واشتغل هنا وانتِ؟

-فيروز: اني هم عراقية واشتغل هنا منين من العراق؟

-نشوان: فيروز انتِ هنا

-فيروز: اي نشوان دا احجي ويه...؟

-ملاك

شفت الابتسامة تنرسم على وجه نشوان شلون صدفة طلع اسمها ملاك! همس نشوان بيني وبينه..

-نشوان: نعم انه التخاطر

-فيروز: اممم

-نشوان بهمس: چنت حاس ختمات السيد ما راح تروح على الخالي بلاش

-فيروز: شنو تشتغلين ملاك؟

-ملاك: اني ادرس واشتغل بشركة ابوية بنفس الوقت

-نشوان: منو ابوچ؟

-ملاك: فيصل الخالدي

-نشوان بهمس: لا حبي راحن الختمات

-فيروز: ابوچ معروف؟

-ملاك: يگولون

حچتها بأبتسامة بشوشة وبريئة بنفس الوقت شگد جميلة ما شاء الله ووجهها يضحك، حكت طرف انفها واللتفتت تدور على احد شوية واشرت على رجال چبير بالعمر كللش ينطيها شبه گالت والفخر مالي عيونها..

-ذاك ابوية

-نشوان: اممم عرفناه، فيروز محتاجچ شوية

رحت وياه اشوف شبي حاله انگلب استغربت تصرفه حسيته قل اهتمامه بيها من عرف ابوها منو..

-فيروز: شبيك نشوان؟

-نشوان: لا تضيعين وقتج عوفيها الله يوفقها

-ليش؟ ما عجبتك؟؟

-لا مو هيج بس ابوها فيصل الخالدي

-بي عيب؟

-عيبه الوحيد انه يمسح وجهه بالفلوس ويسبح بالفلوس ومن يمرض يغطوا ببطانية مصنوعة من الفلوس وبيته مبني بشدات فلوس

-واذا؟

-فيروز اني حالف ما اخذ وحدة مستواها المادي اعلى مني ماريد اقصر وياهة بشي واطلعها من عيشة الملوك واخذها لعيشة اقل

-نشوان لا تفكر بالماديات هيچ بنات شايفات وعايفات وشابعات من الفلوس

-صحيح بس احنه على گد حالنا مد رجليك على گد لحافك لا تمدها زايد وتظل متكشف ما اريد اعيد الجاي يصير ويه مروان وصبا واعيش معاناتهم

-شوف نشوان اني احترم وجهة نظرك بس لو البنية حبتك او عجبتها والله لو چنت حافي منتف هم تقبل بيك وتشوفك كامل الاوصاف حتى عيوبك متلاحظها.. لا تبقى متردد بسبب حالتكم المادية انتَ مهندس شاطر ودتبني نفسك بنفسك وشغلك وجهودك تثبت انتَ شگد مثابر وتسعى للافضل

سكت يفكر بكلامي بجدية بس ما لحگ لان ملاك رجعتلي ومدتلي جنطتي مبتسمة..

-ملاك: نسيتيها على طاولتنا

-فيروز: شكراً حبيبتي

-ملاك: ماعرفت اسمچ؟

-فيروز

-عاشت الاسامي وهذا اخوچ؟

-فيروز: لا هذا استاذ نشوان يصير مدير قسم البناء بالشركة الاشتغل بيها والي اقامت هذا الحفل

-ملاك: اهااا حلو اهلاً وسهلاً چنت متحمسة اتعرف على الرئيسة هنا

-نشوان: الرئيسة بعدها ما وصلت

-ملاك: انتَ هم مهندس مدني؟

ابتسم منحرج ووجهه صار احمر حك رگبته من وره وهز راسه اي وشوية شوية بدت تسأله عن شغله ودراسته لانها دتدرس هندسة مدني ونشوان انزع منه الخوف والتوتر من شاف تواضعها واسلوبها شگد لطيف..

-فيروز: بنت عمي وصلت اروح اسلم عليها واخليكم براحتكم

عفتهم ورحت لجهة جنات هستوها وصلت طالعة تجدح بفستانها البني وشالها الاوف وايت سلمت عليها ودورت بعيوني على مالك گالت جاي وراهة دقايق ودخل وحده واستقبلوا الناس تسلم عليه وصار يتنقل من واحد لواحد..

-فيروز: رجلچ امة الثقلين كلها تعرفه

-جنات: امداني

-ولج ليش هاي فوگما تكيفين هو معروف ومشهور

-جنات: جاي تشوفين الذبانات الطارن عليه؟ گبر طمني بثاعة الجبرته يجي هنا!

-فيروز: شفتهن باعي هاي الحموضة وصلتني من تماوعها

هزت راسها اي وگعدنا حول طاولة، سألتها ليش دخلوا كلمن وحده گالت هي طلبت منه هالشي حتى ميوصل الخبر لشمسون ان علاقتهم تمام..

دقايق وتوجهت الانظار لبوابة الدخول بدون لا احتاج افكر عرفت الي ظهرت خلف هاي الابواب "مسرة قيثارة" بفستانها الفخم وحضورها الواضح صح تأخرت وهي صاحبة الحفل بس محد اعترض على هالشي واستقبلوها استقبال حار واولهم ابوها المفتخر بيها..

سلمت على الناس واللتهت وياهم شوية واجه وراهة شُهيب وامه ماريا بس شكل شُهيب غير.. هالمرة ما دخل مبتسم ولا دخل بنشاط مثل العادة چان هادئ وهدوئه مو الي متعودين عليه..

ماريا راحت لنشوان فرحانة تراوي فستانها وشكلها بينما شُهيب ظل واگف يجامل وگوة يبتسم الغريب ما راح يلاحظ اختلافه بس اني حفظت اسلوبه شُهيب جداً لطيف ويانه وويه الموظفين بس ليش هسة عبالك گوة طايق الناس والمكان وهو ومسرة ما تلاقت طرقهم ولا مرة خلال الساعات المرت..

-اگلچ جنات احس عيني بيها شي بله شوفيلياهة

-جنات: اوگفي هاي منو؟؟

-فيروز: منو

-ذيچ الفگر الذابة روحها على ططوتي شايفتها من قبل بث وين يا ترى؟

-يووه انتِ ماعندج سالفة دروحي

عفتها وگمت افتر بالقاعة، مليت من الرسميات ورحت اوگف على جهة قريب الممر الچبير الي يؤدي للخروج، ركزت ويه الصوت الاجه من خلفي وانداريت..

-جاي يدورون عليچ

-فيروز: منو؟

-فاضل: اني

-فيروز: تدور عليَّ انتَ؟

-فاضل: اي هاي جبتلچ الـ.. الاوراق يمكن مو وكتها بس ماعرف ليش جبتهن صراحة

ضحك خجلان يعدل بنظاراته الطبية، ابتسمت ممتنة وفرحانة كلش واخذتهن منه..

-شكراً سيد ما نسيتني وجبتهن

-لا شلون انساچ

ضميت الاوراق لصدري ونزلت عيوني ورجعت رفعتهن من كمل جملته..

-اول ما گلتيلي راح تبقين بالشركة رحت اشتريهن اوراق بيانية ملونة جبيرة راح تساعدج هواي فرغي كل طاقتج شنو عندج موهبة خطيها هنا ولا تترددين تجين تراويني راح انتظرج

-تمام

صرنا عين بعين وصفن بعيوني شوية، عكست عيني عنه منحرجة ورجعت اباوعله لگيته بعده يباوعلي بس اكو عگدة بحاجبه خفيفة..

-فيروز: شبيك؟

-شبيها عينچ؟

-شبيها؟

-مادري هذا فدشي طاير بيها اسود لونه

-يمممة شنو هذا

دورت على شي اباوع بي مراية او تلفون فوراً طلع تلفونه وفتح كامرته الامامية وشفت اتعس شي ممكن أي بنية تشوفه اخيس موقف امر بي بحياتي كلهااا!!!

-فاضل: هاي رموشچ واگعة؟؟ فيروز انتِ بخير؟؟

عزه العزاني عزه بعيني على هالفشلة من المستحى بقيت اراوح بمكاني وصلت الفكرة اله وعرف هذا رمش اصطناعي ركضت انهزم بالحمامات واگمز من شفت عيني صايرة عوصة رمش موجود ورمش طاير كللل هالوقت وعيني چانت عووصة گداامه!!

المواقف التلعب النفس متصير الا ويه فاضل يا ربي شنو هالحظ الزفت وهاي جنات اني اعلمها ما عرفت تنبهني حايرتلي بططوتها!!

شلعت الرمش الثاني وعيوني تهلست طلعت رموشي الشگر طلعت مسكارتي من الجنطة احط منها واتذكر الموقف وانحب لو اسولف هالموقف لـ هدى تظل سنة تضحك عليَّ عابت هالحظ النحس!

عدلت شالي وفستاني التركوازي واخذت شهيق وزفرته وطلعت ولا كأن صار شي، اول ما طلعت من باب الحمام تلاگيت ويه فاضل واگف على بُعد من حمامات الرجال اني شفته وحولت طريقي اروح من غير جهة ووگفت من صاحني..

-فيروز لحظة

-فيروز: اني مستعجلة جنات تريدني

-فاضل: دقيقة وحدة اني هم مستعجل

-تفضل

-فيروز ماعرف منين ابدي وكلما اريد احچي وياچ ينربط لساني واگوم اخربط

-شصاير فاضل خوفتني

رقت ملامحه من نطقت اسمه بلعت ريگ متوترة وخجلانة فوراً رجع نظراته بشكل جدي وتحمحم يعدل بنظاراته الطبية..

-اني كل يوم جاي ارتكب اثم بسببچ.. نظراتي وكلامي وتصرفاتي و.. وكلشي جاي اسوي خارج عن ارادتي حتى هسة.. هسة والعياذ بالله من الذنوب بس لازم اگول هالشي فيروز انتِ اجمل امرأة شافتها عيوني اعتذر على جرأتي وقباحتي بس الكلمات جاي تخنگني ولازم اعترف بهالشي....

سكت يلقط انفاسه واني گلبي صار يدگ يدگ مثل الدنبگ گمت اتنفس بقوة وياه على الواهس واحس رجليه خدرن وبؤبؤ عيني راح ينط من مكانه من اردف..

-فاضل: حتى هسة هذا الموقف الصار قبل شوية اني متأكد مية بالمية انتِ ما تحتاجين مكياج حتى تصيرين حلوة المكياج هو يحتاجچ فيروز اني...

ذب حسرة يفرك جبينه ويهمس "استغفر الله" ردت اعيط بي ولك احچييي مو راح تطلع روحي هناا من الخجل احس بخدودي طگعن من الحمار وايدي بدت ترجف، بس شي ثاني شدهني وخله حالي يتخربط بنص حديثنا كسرت عيني على البوابة وشفت عمي صاحب (ابو جنات) وولد عمي الي بالعراق يدخلون للقاعة!

-فيروز: شجابهم ذولة

اللتفت فاضل قاطع كلامه يباوع للمكان الي عيني سرحت بي، عگد حاجبه متسائل ومتفاجئ نفسي..

-اسفة فاضل دقايق وارجعلك اعتذر...

تركته ورحت اهرول لمكان مالك وجنات الي ملتهين يسولفون وما منتبهين لدخول عمي وولد عمي، اول ما وصلتلهم وقبل لا احچي شي اجه لمالك اتصال جاوبه بينما اني همست لجنات على الصار اندارت بكل جسمها تشوفهم وجحظت عيونها وبنفس اللحظة مالك نطق بصوت يملئه الخوف والانفعال..

-مالك: تقصد فاهد اخوية؟؟! انتَ متأكد من الشفته؟؟؟ اخذووو؟؟؟... ولكم شلوون؟؟ اني چنت متأكد صاير وياه شي!!... لا لا مستحيل ولك مستتتحيل!!!.......

**

"كيان"

بقيت وحدي بالبيت شُهيب وماريا طلعوا سوه للحفلة وفيروز اجت صبا عليها.. لفيت راسي ونمت ما حسيت الا على اشعارات تجيني على تلفوني من گروب صديقاتي يردن يطلعن نتعشا، ما اهتميت وگمت اغسل وانزل اسويلي شي اكله متت جوع..

اخذت لفتي وكعدت اتعشى واتابع فلم، مليت وكمت اغسل مواعين وانظف البيت والساعة لزگت سويت كلشي والساعة بعدها بالعشرة بالليل شنو واحد يسوي ويخلي الوقت يمشي؟

صارت العشرة ونص ورن جرس الباب غلست عليه وكملت اگلب بموبايلي بس هالمرة قاطعني صوت طرق الباب، استسلمت وگمت افتحها وصار بوجهي..

-هارون!

-هارون: دائماً تخلون خطاركم مصلوبين على الباب؟

ساند جسمه على الباب ايد بجيب بنطرونه الرسمي وجاكيته الرسمي وقميصه مفتوح ظاهر منه زنجيله لو مو رسمي يلبس يبقى شكله ادبسز وشقاوات..

-شبيچ صفنتي؟

-شتسوي جاي؟

-اريد اخوچ العار

-احترم نفسك!

-يابة خوش اريد شُهيب صيحي

-شُهيب عنده حفلة

-اوه صح نسيت واني جنت رايح لحفلته وما لگيتج هناك واجيت اشوف ليش ما اجيتي؟

-يعني اجيت علمودي مو علمود شُهيب

-احب عقلج بسرعة يشتغل

-ما رحت للحفل لان تعبانة ومالي واهس اضافة جنات تگول اني بالعدة وميصير اتمكيج واكخشخ

-لا تتمكيجين ولا تكشخين

-واروح بهذا وجهي الاصفر؟؟

-جاي اشوف فلقة قمر

-شكراً على المجاملة وهسة راح اسد الباب وانتَ تروح للحفلة

-ماروح بدونج امشي

-شسالفة هارون ماكدر اروح

-دمشي امشي صارتلي ملتزمة هسة

-مو بس اللتزام اني ماريد اروح

-لو انتِ تطلعين لو اني ادخل جوه

-وين داخل صدگ تحچي انتَ!!

-اي

سديت الباب بوجهه ودفعها يفتحها وطب للبيت، تنرفزت من حركته ونترت مزعوجة..

-اطلع هارون شكوو داخل هنا!

-ما اعيد كلامي

-شتريد منييي

-اطلعج من جو الكآبة العايشته

-وانتَ شمعرفك اني مكتأبة؟؟

-صديقاتج بالجامعة يگولن

-وانتَ شيخصك بصديقاتي؟ شوصلك يمهن؟

-اني فضولي

-واضح هالشي

-ها هسة تجين لو اطب اكمل السهرة وياچ جوه

-شكد قليل ادب!!

-چان قصدي نسهر على فلم بس انتِ تفكيرج وصخ

ما خليت المحادثة تطول اخذت مفاتيح البيت و طلعت بسرعة بس اريد اخلص منه ويروح وميتفرع حديثنا اكثر..

-هارون: من البداية وصيري حبابة، هاي سيارتي ركبي

-ما اركب وياك اروح وحدي

-عندج سيارة؟

-لا اركب تكسي

-تركبين تكسي ب 11 بالليل وحدج؟

-بعدها 10:30 وعادي مسوية الأمرّ وحدي بسببكم!

عفته يضحك ورحت لموقف الباصات مناك اخذ تكسي الغبي خلاني اطلع بوجهي التعبان وذيل الحصان شگد عيب، انتظرت علما يجيني تكسي وشفت سيارته تسفط بجانبي..

-ها وين التكاسي؟

-كيان: هسة يجي

-راح تأخرينا على الحفلة

-روح شكو واگف هنا

-غير اصير جنتلمن وانتظرج

-ماريد!

-الله يساعد فاهد عليج شلون جان متحمل نكدچ

انخمش گلبي من ذكر اسمه مجاوبته روحي انمردت ويمكن بيّن على وجهي هالشي لان نزل من سيارته ووگف بصفي..

-هارون: ما تشاوفتو بعد؟

-لا

-طلاقكم شلون تم؟

-جاب وكيل

-امم طلع يفتهم بهالسوالف

-هارون اني راجعة للبيت لا تلحگني

-لحظة اوگفي

تحرك من مكانه يواجهني ويوگف مقابيلي، تنهد يمسح على وجهه وعيونه وگال بجدية..

-اعرف نفسيتج تعبانة وما اللومچ بس هاي الدنيا مو دائماً نحصل الي نريده

-اني بخير

-اتمنى هذا الشي، انتِ بنية نظيفة وما تستاهلين الصار وياچ

-مو علساس اني خاينة واشتغل ويه اعدائكم!

-من اول ما شفتچ عرفتج نظيفة الانسان يبين من عيونه كيان.. ولا تذكريني من كتلتچ والله ما اتذكر هاليوم وكلما يجي ببالي اضحك لا ارادي اسف

-مكيف

-هههههههههه لا تزعلين يمعودة واذا زعلچ على موضوع طلاگچ من فاهد اني متأكد هو عنده تبرير لكلشي صار

-تحچي بثقة

-لان اعرف صديقي شنو

-شنو هو؟

-فاهد ما يتخلى عن الاشياء اليحبها بسهولة

-بالضبط وهذا السبب ما تخلى عن سارة

سكت يحرك راسه بعشوائية، تقدم مني خطوة وگال بشرود..

-هو غبي من هالناحية

-صحيح

تقدم خطوة ثانية توترت من قربنا ورجعت خطوة وره رجع يتقدم الخطوة الي رجعتها وجذبتني نظرته من باوعت بعيونه الي تغيروا عن قبل شوية، چانت نظرته حادة ومشاكسة هسة صارت نظراته حنونة..

-مو طبعي اخون صاحبي وابن عمي بس اريدج تعرفين اني وياچ بأي شي تحتاجي كيان تگدرين تثقين بيه وما راح احچي زايد واوضح الي اقصده احتراماً لفاهد

ارتبكت وعكست عيني عنه گحيت كم مرة مختنگة بنفسي العميق الچنت حابسته، ابتسم وطبطب على چتفي بأصبعه يرجعني وياه..

-لا تخافين لو روحي بيچ هم ما اتجاوز حدودي واخون فاهد

-اني.. اني رايحة للبيت.. لا تلحگني

خليت وانهزمت اركض ارجع للبيت واسمع صوت ضحكته وصياحه..

-ما اللومه لان يحببچ

رجعت للبيت وقفلت الباب عليَّ گلبي ينبض بجنون يا الهي شنو صار هسة؟؟ هذا اعترفلي لو شنو؟ يمة گلبي راح يوگف صرت اخذ شهيق زفير وما حسيت على روحي الا والدموع تنزل من عيوني صرت انوح وابچي بصوت عالي مكسورة خاطر.. ركضت اصعد لغرفتي ونمت بفراشي اكمل نوبة البچي الزارتني واتذكر ايامي ويه الحقير النذل اتذكر كلامه واللهفة الي چانت بعيونه اتذكر من اصيحله "فاهد" ويجاوبني "عيونه الصفر" وينهن عيونك فاهد راحن لغيري وشافن غيري؟ ..

افكار يائسة غلط بدت تزورني فكرت اروح اشخط معصم ايدي بموس وانزف لحدما اموت او اخذ شويط حبوب واخلص من هالعيشة الكافرة شوكت ارتاح ويستعدل وضعي؟ المن عايشة اني المن؟؟

نفضت عقلي ومسحت دموعي وقررت اروح للحفلة بهذا وجهي وملابسي لازم اطلع من هذا الجو الكئيب قبل لا يسيطر الشيطان عليَّ واطبق افكاري لازم انتشل روحي من هالبؤس..

طلعت من البيت وانتظرت تكسي هواي ياله حصلت وتوجهت لمكان الحفلة گعدت بالحديقة ما دخلت هنا الناس قليلين على الاقل ما افشل روحي، مرت فترة على گعدتي الجو حلو ريحني شوية اتأمل بالاشجار وريحة الورد الربيعي المالي الهواء.. قاطع تأملاتي المريحة سيارتين شرطة تسفط بباب القاعة، نزلوا منها مجموعة شرطة وضباط ثنين ووياهم سيارة FBI "استخبارات" لابسين مدني وشايلين اسلحة..

شكلهم مخيف قلقت وگمت بسرعة اشوف شكو دخلوا للقاعة ورحت امشي وراهم وعيوني تركض وره واحد الحقد تارس وجهه ومحضر سلاحه، كل الحضور توقفوا عن شنو چانو يسوون مركزين ويه الشرطة السوت تسجيل دخول..

توقفت الموسيقى وتوقفو الي چانو يرگصون ويه بعض وتوقف ميل الساعة عن التحرك من سحب الضابط الباج وقدمه يراوي للكل ويگول بلغة البلد بصوت عالي قوي يبس شكو خلية حية بجسمي..

-لدينا مذكرة القاء قبض تخص المتهم شُهيب شمسون!!

شهگ الحضور وشهگت من اعماق قلبي توسعت عيون مسرة وصارت تتلفت بجنون تدور على شخص؟ عيوني جمدت على اخوية البقى ساكن وملامحه ثابتة وگال بهدوئه المعتاد..

-حضرة الضابط اكيد اكو سوء تفاهم

تقدم الضابط بدون لا ينطي مجال لاحد يحچي ويعلق وسكت اللسنة الكل من كلبش ايدين شُهيب وگال بصوت مسموع..

-سوف يتم القبض عليك بأمر خاص صدر من مركز الشرطة، الك حق في اللتزام الصمت، لك الحق في توكيل محامي دفاع لك الحق......

قاطعه مالك من صاح بعصبية..

-شنوو هالحچي الفارغ امر اللقاء قبض؟! لشنو بالضبط؟؟

حچى الضابط بخفوت جداً يوجه كلماته لمالك فقط واضح عرفه منو، فتح عيونه مالك مصدوم وصار يهز براسه لا ما جاوبه الضابط ولا الشرطة الي تورشعوا شُهيب من كل جانب وكأنه مجرم سفاح ويخافون يهرب من بين ايدهم، ظلمت الدنيا بعيوني بچيت خايفة وتايهة اصرخ واستنجد بأخواني الصاروا يتصايحون بخبال ومالك الطگگت بلاعيمه حتى يعوفون اخوه ويعيط بغضب هز جدران القاعة هزز..

-هذااااا ظلمممممم!! اخووووووية بررررريء مستتتتتتتحيل شُهيب يسوووووي هيچ شييييي هذااااااا كذذذب وافتراااااااء هذذاااا ظلللللللمممم!!!!!........

يتبع....

━━━━━━  ━━━━━━

الغصة...

ماعرف منين ابدي بس ما بقى شي.. 😞🫶🏻

لا تنسون التصويت يا روحي وشكرراً لتفاعلكم 🥹🫂♥️

نگول توقعاتكم مثل كل مرة لو بعدنا مصدومين؟

تعالو انستا 🫂🩷

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

طاحن بالخريف اوراقي وگلت تهون

تانيت الربيع وطاحت الشجرة.. 🍂

━━━━━━  ━━━━━━

"قبل ساعتين من مجيء الشرطة"

-صبا: اخذت علاجك حبيبي؟

-مروان: اي

-صبا: انتَ زين مروان؟

-اي

-روني تعرف صارلك يومين مغلس على العلاج؟

-ما مغلس

-لعد ليش ما ماخذه؟

-ماريد

-مروان!

-صبا تعباان حسي بيه ماتحمل هذا العلاج كل جسمي يظل يرجف هسة گوة واگف على حيلي!

-بس الدكتور گال لازم تستمر عليه شفت شلون عصبت من نشوان قبل شوية وردت تكسر ماعون الفواكه براسه؟

-ردت اكسره براسج وتراجعت

-لاااا بله؟؟؟؟

كتمت ضحكتي گوة ذولة عود ديرگصون سلو بعد عيني والحظ خلاهم يوگفون قريب مني هسة ما لگو مكان يرگصون الا هنا؟

-مسرة بهمس: صبا صوتج فضحتينا

-صبا: ولج سمعي هذا الصعلوك يريد يكسر المواعين براسي اليوم....

-مروان: منو صعلوك ولج؟؟؟

-مسرة: اني اني صعلوكة بس سكتو

-مروان: رجاءاً مسرة صبا هواي صايرة تجاوز!

-صبا: اتجاوز واني لابسة الفستان الاحمر الشريف العفيف الجبته الي؟؟ ولك هاي اهانة كاافية وكاافية جداً لاني لابسة هيچي شي بي ترتر طالعة چني خيرية بباب الحارة!!

-مسرة: حلو حبيبتي حلو

-صبا: لا تچذبين منو الصاحتلي سعاد خانم قبل شوية؟؟

-مسرة: ولج هاي مو اني فيروز گلتلج سعاد اني صحتلج فريال

-صبا: مروااااان مسويني ميز للبنات الله لا ينططيك

-مروان: المهم اني اشوفج حلوة معليج بيهن

-صبا: لا تجذب عليَّ لا تجذذب

-مسرة: حبي ريلاكس اخذي انهيل واكس هيل يلا بيبي

-صبا: احب شهيق زفير اكثر مسرة مو مال تفيك هسة

-مسرة: يوووه اني بيا حال وهاي تتنعوص عليَّ

-مروان: صبا شبيچ اليوم حبيبي

-صبا: انتَ زعلتني

-مروان: هاي شوكت؟

-صبا: مادري ماتذكر بس اتذكر اني زعلانة منك

-مروان: تذكري زين

-صبا: هااا تذكرت البارحة زاعلتك لان ما قبلت تخليلي صبغ اظافر وعاندت ويايه وگتلي كافي تتأمرين!

-مروان: هاي زعلتي عليها وراضيتج بوكتها

-صبا: ها صح، لعد اكيد زعلانة من رحنا للمول وما اشتريتلي الدبدوب الجبير!!

-مروان: بس اشتريتلج ورد بداله وراضيتج

-صبا: هاا اي لعد اكيد من...

-مسرة: صبا انچبي!! انتِ زعلانة لان گلچ راد يكسر الماعون براسچ!

-صبا: شووف اي خاف عبالك اني انسى عندي هنا ضلع مينسالي شيي

-مروان: اسف حبيبتي

فشت.. اي نعم بهالسرعة صديقتي العوبة الغبية التافهة فشت وتسرسحت وابتسمت من لزم ايديها ثنينهن يلفهن على رقبته وهمسلها شي بينه وبينها ما لقطته اذاني وهيچ تراضو ولا كأن هسة رادت تصير بالنعل..

-مروان: على طاري الدبدوب جبته الچ

-صبا: چذاااب

-مروان: والله موجود بسيارتي ما گدرت ما اجيبه واخلي بنفسج

-صبا: احبك

-مروان: اموت عليج

-صبا: بس تموت عليَّ؟

-مروان: صبا تعرفيني ماگدر اعبر

-صبا: منو تحب اكثر اني لو نشوان؟

-مروان: نشوان اخوية وانتِ حبيبتي وخطيبتي والهوا الي بريتي

-صبا: يا روحي انتَ

-مسرة: كافي روحو هناك لعبت نفسي

-صبا: انتِ شبيچ روحي لابو الهماميس شكو واگفة يمنا

-مسرة: اكو واحد يرگص سلو هنا؟

-صبا: روني ميحب نرگص گدام الناس ويشوفوني فـ اجينا نرگص هنا

ابتسمت اهز براسي، تركها مروان باس ايدها وراح من اشروله فاضل ونشوان بقت تتابعه بعيونها لحدما اختفى اثره تنهدت واجت توگف بصفي..

-ااه مسرة

-مسرة: اممم

-متخيلة اني صبا بلساني الطويل وصياعتي هيج اصير وينضحك عليَّ بكلمتين؟

-لا والله

-اجيت ارگص هنا سلو وياه بس لانه يغار وميقبل ارگص گدام الناس ومثل الطلي قبلت بسرعة وبقيت فرحانة

-المهم ما خلاها بنفسج وفكر برغبتچ احترم هذا النوع من الرجال

-يااااي اجه هموسچ

ارتبكت وبطني خبطت من شفته يمشي بأتجاهي فصل عقلي عن الكل وكل حواسي تعلگت بي.. اراقب مشيته الراكزة واتأمل طوله الفارع، انغرم واعيش قصة حب ويه شعره العسلي الناعم الي ماكو بشر شافه ما تسائل بداخله شنو يستخدمله وانسحر ببدلته الرسمية الانيقة عبارة عن جاكيت مقفل اسود ورصاصي غامق وبنطرون رسمي كلشي بهذا الرجال احبه واحياناً اخاف من حبي وشدة تعلقي بي اخاف من فكرة عدم وجوده بحياتي وخسارته..

-شُهيب: مدام مسرة اعرفچ على...

-مسرة: حمزة غيث!

نطقت اسمه بأبتسامة، بادلني الابتسامة وحط ايده على صدره دليل التحية، اومأت براسي ابادله بينما شُهيب دور عيونه بيناتنا بدون لا يعلق بشي..

-حمزة: مدام قيثارة سعيد بلقائچ مرة ثانية

-مسرة: اني اسعد مسيو حمزة واقدر انك فرغت من وقتك ونورت حفلنا

-حمزة: لا ولو واجبي هذا

-مسرة: مچنت اعرف عندك علاقة بـ شُهيب؟

-حمزة: النمر صديق قديم النا

-شُهيب: حمزة يصير ابن خالة الاطلس وصديقي من زمان

-حمزة: اني مبهور بالحفل وفكرتكم كشكل عام احييكم على هذا الجهد بس مو جديدة على شُهيب ومو جديدة عليج بالتحديد

-شُهيب: مشتغلين سوه من قبل انتو؟

-حمزة: اي من سبع سنوات تقريباً مدام مسرة چانت صغيرة بس شغلها ممتاز

-مسرة: چانت بداياتي بالشغل واتذكر تشجيعك الي ما انسى وگفتك، طمني شلونها زوجتك؟

توسعت ابتسامته من سألته عنها وهز براسه دليل انها بخير، ابتسم شُهيب وياه وطبطب على ظهره يگول..

-شُهيب: حمزة ما صار هواي من نوّر ابنه يوسف للدنيا متعجب شلون عافه واجه حتى يشوفنا

-حمزة: ههههه مو بحالك اني لا تشوف روحك عليَّ اجيت شغل لابوية

-مسرة: اتذكر انتَ تركت الشغل عند ابوك واشتغلت ويه ابو زوجتك؟

-حمزة: رجعت وياه اولتي واخرتي وريثه وماگدر اعوفه

-مسرة: ابوية راح يفرح بشوفتك..

دورت على بابا لقطته عيوني من بعيد اشرتله يجي بس شاف حمزة ابتسم واجه يهف تسالمو وسولفوا ويه بعض، عزيز علينا حمزة اتذكر بداياتي اشتغلت وياه مرة بمشروع چان بوكتها يشتغل ويه ابوه ومعتمد عليه اعتماد كلي ودائماً يمدح بي ويصيحله عريسنا لان چان هستوه متزوج..

اتذكر مرة زوجته خابرته بأجتماع وما گدر يجاوبها ماعرف منين حصلت رقمي واتصلت بيه تبچي وتشهگ ليش ميجاوبني حمزة استغربت وگلتلها هو بأجتماع خرعتني من گامت تعيط وتگول لا هو يغلس عليَّ وميريدني رحتله اركض اگله يمعود جاوبها لا يصير بيها شي، شوية غريبة زوجته بس واضح تحبه..

من خلال حديثه وبه ابوية استوعبت حمزة مدا يحچي عن غدير؟ اني متأكدة اسمها چان غدير لان هو صاحلها "غدورة" من جاوب تلفونه ومادري ليش حفظت اسمها يمكن بسبب الموقف الغريب الجمعنا ونبرة صوتها من عاطت بالتلفون لزگ اسمها بعقلي.. زين ليش هسة يحچي بغير وحدة؟ معقولة انفصل عن غدير؟

ما تدخلت ولا تسائلت راح ابوية و اللتهى حمزة ويه شُهيب يتشاقون وواحد يداهر الثاني دخلوا الفرحة بگلبي بعلاقتهم وصداقتهم الحلوة..

-حمزة: روح روح ابن شمسون لا تراويني وجهك

-شُهيب: خليني ابن شمسون ولا ابن غيث

-حمزة: شگد عار (همس كلمة عار)

-شُهيب: شلونه الاسباني والباقين؟ لو نشوان يشوفك يظل يرگص للصبح عباله جايين التوأم وياك

-حمزة: لا علي ما يگدر يسافر هواي هالفترة مرته ما تقبل هههههه

-شُهيب: والله وكت عليوي انضب

-حمزة: بس عمر بعده سايب ومكسور الفؤاد

-شُهيب: نشوان گلي عليه شجاه هذا ويه الحب ليش هيچ حظه؟

-حمزة: حظه خردلي على گولته

يحچون بصوت خافت الي يشوفهم من بعيد يگول ايباااه ذولة شگد مشغولين وديتناقشون بشي مهم والواگف يمهم يحير يضحك على تصرفاتهم، اراقبهم وعيوني طبعت بـ شُهيب انتبه عليَّ صافنة عليه كسرت نظراتي عنه ووجهتهن لحمزة..

-مسرة: شنو مشاريعكم الجديدة مسيو حمزة؟

حچالي عن اخر مشروع ودگ موبايله ترخص وراح يجاوبه، باوعلي شُهيب حاط ايده بجيوبه، بلل شفته بلسانه وسأل ببرود..

-تعرفي حق المعرفة

-مسرة: اشتغلنا سوه بمشروع

حرك راسه متفهم وعافني وراح، رجعت ابوز مزعوجة من بروده مادري شريد وشنو الي يرضيني حقه ضايج مني السويته بي اليوم مو قليل بس گلبي يوجعني واني اشوفه يتحاشاني ومبتعد مني، داخلي متشعوط متمنية اروح اجره واحچيله كلشي وابررله تصرفاتي ابوسه واحضنه واللزم ايده گدام كل الناس واگلهم هذا زوجي وحبيبي واطيح حظه اليزعجنا ويضوجنا بس امنيات.. تبقى كل هاي امنيات واحلام..

-صبا: البوز شبرين ابتسمي عاد

طلعتني من شرودي صبا حطت كاسة عصير بيدي وماعرف شنو بحلگي اكلتها بدون لا اركز بطعهما..

-ماگدر ابتسم مو بيدي

-ليش؟

-ماعندي طاقة لشي بس اريد يخلص هالحفل على خير

-مزعوجة من وجود نورسين؟

-ماعرف منو عزمها وشلون دخلت بس الي عزمها اليوم موته على ايدي!

-بس شوفيها ما تقربت من رجلچ ابد

-دا اشوف وهذا الشي ممكن يشفع للعازمها

-هههههههههه شگد مزعجة مسرة

-البيه مكفيني ما ناقصة اشوف نعالات تركض وراه

-بس انتِ مدركة ان راح يجي يوم ويكمل حياته بدونج مو؟

خزرتها لدرجة بؤبؤ عيني راح ينفجر من مكانه بس ما اهتمت وكملت تگطع بگلبي..

-بعد انفصالكم راح يجي يوم يحب وينحب ويكون عائلة واسرة وأطفال

-هو يحبني!

-بس انتِ تردين تنفصلين شلون بله يظل حاط ايده على خده ووحيد طول عمره؟

-وين تردين توصلين صبا؟!

-لا تنفصلين! ماطولج تحبي لهدرجة ورجفتج تفسر شگد جاي تتألمين لا تعوفي لوحدة ثانية سرور!

-خيار الانفصال مو بيدي افهمي عااد

-غلسي على الكل وطنشي الكل مثل عادتج شبيچ ويه شُهيب تصيرين وحدة ثانية

-اغلس واطنش الكل وبعدين يجيني سابح بدمه؟؟ ياخذو مني للابد واظل انوح على قبره! صبا الايده بالمي مو مثل الايده بالنار شُهيب حياته بخطر اذا بقيت وياه

-جولي

-مسرة: شنو؟

-جولي اجت

ركزت وين تباوع صبا شجابها؟ جولي سافرت البارحة ويه امها لكندا وكالت ماكدر احضر الحفل؟

-مسرة: خاف اني عايزة اللتمت

-صبا: لحظة.. هاي ليش دتروح بأتجاه شُهيب؟

عيوني بقت تركض وراهة اشوفها راحت لـ شُهيب سلمت عليه وگالتله شي وضحكت وهو ابتسم! ابتسم! هو ابتسم! لا ومو بس ابتسم صار يحچي وياهة و مبين من محادثتهم منسجمين..

-صبا: مستحيل سوتها!!

-مسرة: شسوت؟؟

-صبا: هاا؟ لا هيچ

-مسرة: شتريد تسوي صبا احچي؟؟

بدون لا تحچي صبا وصلت الفكرة شفت انامل جولي تتسلل وتلمس ياخة جاكيت شُهيب وتمسح عليها كأنه غبار، نزل عيونه هو على ايدها وخرتها بسرعة وضحكت بحركة غنوجة..

-مسرة: تريد تنكتل هالبنية!

-صبا: لا مسرة لا تروحين ابوچ هناا ديفتر

-مسرة: طُزززز

نسيت كلشي حواليه ورحت امشي بخطوات شبه سريعة لو بيدي اطير لهناك واشيل ايدين هالسافلة عنه!

-مسرة: جولي وينج ما شفتج اليوم

-جولي: هلو حياتي سرور وگفت وياكم بالصورة معقولة ما انتبهتي؟

-مسرة: ما أنتبهت

-جولي: چنت احچي ويه شُهيب واگله شگد طالع وسيم اليوم

-صبا بهمس: اوف جولي

-مسرة: امممم حلوة مجاملتچ

-جولي: مو مجاملة هاي الحقيقة واتوقع كلنا دنشوفها ههههه

-صبا: ههههههه صح صح ههههههه

-جولي: ما كملنا موضوعنا شُهيب مدا اعرف ليش بكل مرة يجي احد يقاطعنا

-مسرة: يمكن هاي اشارة من رب العالمين حتى متكملين قبل لا تصيرلج مصيبة.. مثلاً؟

-شُهيب: من رخصتكم

راح يسلم على واحد هستوه وصل وجولي هم رادت تروح ولزمتها من زندها اجرها، قربتها مني ونترت بين سنوني لاذنها..

-مسرة: اكو واحد ثنين، عشرة عشرين، مية ميتين رجال هنا حبيبتي جولي شوفيلچ واحد غير شُهيب واخذي لبيتچ اليوم

-جولي: مسرة؟؟

-مسرة: عيونچ الزرگ حلوة جولياا حرامات ينفگسن

-جولي: مدا افهم شبيچ!

-مسرة: عيونچ خليها بعيد عن ممتلكاتي!!

-جولي: بس علاقتكم مو تمام وزواجكم على ورق!

-مسرة: لعد ابن منو شايلته ببطني اذا زواجي على ورق؟؟

-جولي: انتِ حامل!!

هديتها محروگ دمي بدون لا اجاوبها وگفت على جهة ممهتمة لصفنتها وتفاجائها، تقربت صبا وگالت بنرفزة..

-ما اوصيچ روحي شيعي الخبر وصبي بأذن عمو فادي!

-جولي: وليش ما اگول؟؟ اذا هي متأكدة هذا ابن شُهيب ليش خايفة تعترف بالحمل وبزواجهم؟؟

-صبا: انتِ شعلييييج بنتي انتِ معليج بهذا الشي لا تدخلين بين ثنين متزوجين ويحبون بعض

-جولي: تره مسرة صديقتي واتمنالها كل خير لو هي وشُهيب يحبون بعض چان لازم تحچيلي وراح اتفهم هالشي وابتعد عنه

-صبا: وهسة عرفتي حبي اني متأكدة راح تلگين احسن من شُهيب انتِ حلوة والف واحد يتمناچ

هزت راسها ساكتة وعيونها مدمعة، ابتعدت عننا قبل لا نشوف دمعتها تنزل تنهدت صبا مقهورة وباوعتلي..

-صبا: لصتيها على روحج تدرين لو لا؟!

-مسرة: ميهمني

-صبا: جولي راح تحجي لابوج يا غبية!

-وتحچيله! بطني راح تكبر وتبين وراح يعرف اني حامل من شُهيب!!

-صبا: ابوج مستعد يگول حامل من غير واحد ولا من شُهيب شسويتي بروحج مسرة شسويتي!

لزمت ايدي وعضت على شفتها تأشرلي على جانبي الايسر اجه احد، هزيت راسي مفتهمة وعدلت ملامحي العصبية..

-فادي: سرور وينج بابا ادورج

-مسرة: نعم بابا

-فادي: شبي وضعج ما عاجبني؟ وشبي ابن شمسون ما يتحچى؟

-مسرة: حچيت ويه شُهيب انتَ؟

-فادي: لا بس شكله من بعيد غير كل يوم صاير شي؟

-مسرة: گتله اريد نتطلگ

-فادي: امممممم

-مسرة: شنو

-فادي: تتطلگين گلتيلي؟

-اي مو انتَ تريد هالشي؟

-لا

-شنو لا؟!!

-ما ردت تطلگون بهاي الطريقة بس يلا ما يضر المهم الله يساعده على المنتظره

-ما فهمت شنو منتظره؟

-خليها مفاجأة حبيبتي بابا

-بابا اوگف وين رايح فهمني شنو راح تسوي؟؟ ليش صاير متشاركني شييي

-نكمل خطتنا وناخذ ثار امج لو نسيتي ثار امج سرور؟

-ما نسيته مستحيل انساه بس تره شُهيب ماله دخل بمقتل امي اني تأكدت من هالشي بنفسي

-قصدچ ضحكتي على روحچ بنفسج

-لا! لا لا لا لا! اني تأكدت شُهيب چان بروسيا بتاريخ وفاة امي

-تمام

-باباا احچي شي لا تظل تلعب بأعصابي

-وصلت بيچ ترجفين وتبچين على كتال امچ مسرة!!

-گتلك شُهيب ماله ذنب!!

-اله ذنب لو ما اله يصير ابن شمسون لو لا؟!

-احنه لازم نحارب شمسون مو ابنه!!

-هااا تغير كلامج اشو هسة؟ منو چانت قبل تشوف دم سنونها ولا تشوف ولد شمسون وتتخبل من سيرتهم؟!

-لان همه....

-لا تبررين! واحد من ولد شمسون كتل امچ بيده عاار عليچ واكفة هسة تدافعيلهم وتبچين عليهم!

-ما ادافع غير لـ شُهيب لان هو ماله ذنب بتصرفات اخوانه وابوه!

-خوش خوش روحي هناك سويتينا فرجة للعالم

-بابا احلفك بروح امي فكر قبل لا تخطي أي خطوة

سوه حركة بيده مال واحد متنرفز وعافني وراح اطحن بروحي طحن، سكري علگ وحلگي نشف اطرافي بدت ترجف، مشيت لـ سام الواگف على بُعد مني اسئله ملهوفة وخايفة..

-سام ابوية ناوي على شي عندك معلومة شنو هو؟؟

-سام: لا مسيو فادي صاير ما يشاركني أي شي

-الاوراق؟؟ معقولة الموضوع متعلق بالاوراق؟؟

-لا ماتوقع مو بهالسرعة تتم العملية ينراد على الاقل اسبوع علما يوصل للمستلم وتمشي القضية

-لعد شنو؟ راسي راح ينفجر شنو اسووي

-اهدأي واخذي نفس عميق لا تبينين لاحد انتِ خايفة واهم شي لا تحسسين شُهيب بشي وتزيدين الوضع سوء

-واذا صارله شي؟؟ سام ما راح اسامح نفسي اذا شُهيب انضر بسببي والله اموت من قهري!!!

**

-بس لو افهم ليش ضايجة اني ارتاح

-مالك انتَ جاي تشوفهن لو عيونك عمية؟؟

-مالك: جنات لا تبالغين

-جنات: شلون تريدني ما ابالغ! تره هاي شوية وتگعد بحضنك شهالقرف!

-مالك: بس ما گعدت وما انطيتها وجه يعني شنو بيدي اسوي؟ شتردين يطلع مني غير اصدها؟!

-جنات: ما جاي اتحمل هذا الوضع لعبت نفثي

-مالك: حبيبتي گلبي انتِ افتهمي هذا عملي اني يا باش

-يا باش شنو؟ بطل ترطن عليَّ بالمغربي مالك!

-يعني رجال عنده فلوس عنده اموال عنده امور تتمناها النساء وهي الثروة وشغلي هذا لازم اكون لين ويه النساء بحدود وانتِ بعينچ جاي تشوفين شلون احچي وياهة بس هي عدها جفاف عاطفي شسويلها؟

-مادري

-حبيبي لا تزعلين لازم تكون عندج ثقة بيه تتوقعين ذني المزيان يعجبوني بس شوفيهم لخاطر الله

-عاوز يعجبنك

-ماعجبنيش

سحب ايدي بين ايده خزرته حتى ميسوي شي گدام الناس ويخليهم ينتبهون، ابتسمت من دردم بالمغربي شي بينه وبين روحه احب من يحچي مغربي يطلع لسانه وشخصيته تتغير العراقي كلش يقيده، ابتسم من شافني اضحك وحط ايدينا جوه الميز يلعب بحلقتي وهمس بيني وبينه..

-كنبغيك جنة

-اوگف اوگف افكر

-بشنو؟

-اوگف لحظة.. وانا واحدق

ضحك من گلبه يرجع راسه ليوره بقيت اباوعله واضحك وياه، وگف من نوبة الضحك وگال وهو يمسح عيونه..

-منو علمچ عليها؟

-فاهد

-اهاااا صايرة تسألين فاهد بهالسوالف

-اي مرة گتله فاهد اذا واحد گلي احبچ شلون اجاوبه بالمغربي "اني هم احبك" بوكتها رزلني وگلي گملة گعدي راحة ناوية تخونين اخوية

-هههههه

-گتله انچب اخونك وماخون مالك

-تخوني هو شكو؟؟

-شمدريني طلعت من حلگي وهو حقير واثتغلها وگال ها ولچ بث لا اني هم تحبيني

-دنياوي (سافل)

-گتله لا ولك شحب منك چنك بريعصي

هز راسه مبتسم وسرح عرفته رجع يفكر بي ويتسائل ليش فاهد تملص من حمايته وليش محد وصل لمالك خبر هو راح يشوف سارة من جابت..

-جنات: مالك مالك

-همم

-ليش متروح تثلم على شُهيب؟

اللتفت بسرعة على مكان شُهيب الگاعد بي وصافن على كفوف ايده، حرك راسه بـ لا وگال..

-ما فرحان بوجودي

-جرب تثلم شبيكم واحد يباوع على الثاني من بعيد چنكم حبايب متزاعلين

-خلينه هيچ

-گوم روحله يمكن يفرح من يشوفك تتقرب منه وتحچي وياه

-لا اني اعرف اخوية شنو

-زين شبي ليش هيچ شكله مهموم؟

-واضح شي بينه وبينها (اشر بعيونه على مكان مسرة)

-اوووف انقهرت روحله مالك دروووووح

دفعته حتى يگوم خزرني وسوالي حركة بوجهه عود فشلتينا ما اهتميتله وخليته غصب يروح يحاچي اخوه، كافي الى متى يبقون هيج واحد حاقد على الثاني وواحد ما طايق الثاني تره اولهم واخرهم اخوان!

اني لو ايات تدوس ببطني هم ما ازعل منها ماگدر مو بيدي اختي هاي وقطعة من روحي حب الاخوان لبعض فطرة من الله ميصير نخلي أي عواقب بيناتنا ونحل كل مشكلة تصير فوراً ومنخليها تكبر وتتضخم لان كلما كبرت المشكلة كلمت كبر حقدنا وهمومنا ومشاكلنا وكبرت الفجوة بيناتنا..

باوعتله من بعيد يحچي وياه وگعدوا على نفس الطاولة، مالك يحچي وشُهيب يجاوبه بدون لا يحط عينه بعين اخوه.. تسللت ابتسامة على شفايفي من شُهيب رفع عيونه لاخوه وهز راسه بـ اي، ابتسم مالك ورجعله هزة الراس وگام يسد بجاكيت بدلته الرسمية..

رجعلي للطاولة ووگفته وحدة تحچي وياه ما طول وياهة وترخص بسرعة اجاني گعد بصفي وگال بعيون تلمع من السعادة..

-تجاوب وياي تخيلي! سألته شكلك مهموم وتعبان گال من الشغل لحيت عليه شويه گال مشكلة شخصية بس راح تنحل وما لازم اقلق!!

-ههههههه وانتَ ليش هيچ فرحان

-لان هاي اول مرة من سنين شُهيب يشاركني بشي وگلي "لا تقلق" ولچ گلي "لاا تقلق"!! معناها يعرفني اقلق عليه واخاف يعرفني اهتم بي وراح اتأذه على تعبه!

-يا حياتي باع الفرحة

-جنات اني گايلچ انتِ احلى شي صار بحياتي؟؟؟

-ههههه لا

-انتِ احلى شي صار بحياتي كلها من انولدت لليوم ولج انتِ.. انتِ تاااج هيج تااج على الراس احطج

ضحكت من كل گلبي يحچي متحمس حماس اطفال وكأن حصل فد جائزة او امه مدحته بشي حلو وفرحته، روحهم روح اطفال بس شمسون لوثهم حسبي الله عليه الى جهنم وبئس المصير يا شمسون ان شاء الله حوبة اولادك تطلع بيك ومتتعداك!

گام يجيبلي عصير والا اشرب وانوب راح جابلي اكل وهم الا اكل واني اسوي الي يريده وابتسامتي ما غابت اصلاً ماگدر اوگف ابتسامة وجهي تشنج..

-كافي ملوك گوم خلينا نتمشى شوية نثتكشف القاعة مبينة تخبل

هز راسه بـ اي ولزم ايدي يگومني ناسي روحه، سحبت ايدي وعضيت على شفتي السفلية اذكره گلب عيونه ما عاجبه بس استسلم بالاخير..

تمشينا سوه وخلال هالشوية المشيناها اذا اگول خمسة اجو يحچون وياه قليل ما بينت انزعاجي گدامه بس طلعت للبلكون اشم هوا وهو تركته يحير بجماعته، عشر دقايق واگفة اني هنا الجو بديع والقاعة جميلة بشكل تأسر العين مختارين كلشي بدقة والروايح هنا تريح النفسية ريحة ورد تفوح من كل مكان بسبب الورد الطبيعي الموجود..

-مالك: جنات وين رحتي

-جنات: عفتك تكمل شغلك براحتك

-لا حبيبتي عفتهم بقيت ادور عليج عبالي طلعتي من القاعة

-لا تعال شوف المنظر منا

وگف بصفي يشوف الدنيا ليلية والقمر صاير هلال حلو متوسط السما، الهوا عليل والهدوء والموسيقى عجيبة اشياء ما شايفتها هواي بس تعجبني وعجبتني اكثر من مالك حاوط خصري بين ايده وحضن راسي لصدره، ما بعدته عني مثل قبل شوية لان البلكون شوية معزول وبعيد..

عشنا الحب والهدوء بعيد عن الكل لفترة نرتاح من ضغط المكان وعيون الناس واكتفينا ببعض هنا، رفعت راسي من داعب خدي بأصبعه ابتسمت ورجعلي ابتسامة ونزل يطبع قبلة خفيفة دفعته بسرعة مصدومة..

-لا تفضحناااا

-لازم تشلع گلبي

-هو شبع شبيك مالك شبييك

-عقلچ وصخ كلشي ماردت اسوي غير ابوسج بس انتِ هسة....

-اششش لا تكمل اششش

كسرت عيني على باب البلكون من طلت منه بنية شابة شقراء اسمها نورسين مادري ليش جاية وهي خطيبة شُهيب السابقة الكل انصدم من شافها بس محد علق، ابتسمت وگالت وهي تأشر بأصبعها..

-نورسين: مالك احتاجك پليز

-مالك: صاير شي؟

-نورسين: بس دقايق اريدك

راحت ومالك اللتفتلي يگول ما راح يطول وفعلاً راح دقيقتين ورجع ما قبل يگول شنو رادت منه واني ما لحيت، انطيته ظهري اكمل تأملي بالمكان وطلعني من شرودي حضنته من وره دارني عليه بسرعة عبالي يريد مني شي بس كلشي ما حچى غير بقى صافن بعيوني..

-شبيك

-مابيه شي

-ليش صافن هيج

-عيونج حلوة

-ورثتهن من امي

-امج عيونها خضر؟

-اي وانتَ؟

-اني شنو؟

-تشبه امك؟

-مادري

-ابوك ما گايلك من قبل؟

-لا گال ما اشبهها بشي بس گلبي يگلي اشبهها

-واني هم گلبي يگول تشبهها وهواي هم

ابتسم ممتن لكلماتي انمرد گلبي ليش ابوه بهالقسوة؟ اني شفت ام مالك بألبومات ماريا مسرة راوتني مالك كللش يشبهها اصلاً نسخة منها حتى ابتسامته وخشمه شلون مرسوم بدقة عيناً امه..

-يعجبك تشوفها؟

-لا

-ليش؟

-ما ناقصني عذاب اكثر

-ابوك يحچيلك عنها؟

-بس من يكون سكران

-شيگول؟

-چانت اجمل امرأة يشوفها بحياته وگلبه يمها ووگف ما نبض لبنية ثانية

-مبين يحبها هواي

-فقدها دمره واخذ حيله وطاقته وانسانيته كره كلشي بغيابها وكره ولده هم

-العلوية مرة حچتلنا عنها چنت صغيرة كلش بث اتذكر چانت ما راضية على حب ابوك الها بث متندمة لان ما خلوا يتزوجها لان جعفر تغير من ماتت اولغا وصار واحد ثاني

-اممم، اگلچ شو بعد متقريلي قثث؟

غير الموضوع فوراً تمنيت يحچي اكثر عن ماضيه وماضي امه بس يابس ميطلع منه شي، ضحكت مدغدغه من گرصني بخاصرتي..

-جنات: لا ولك اغار

-مالك: متقرين قصص هالفترة؟

-اقره

-شنو القصة الجاي تقريها؟

-مال ضباط

-اهوووووو

-ههههههه عرفت والله هيچ راح تگول متشوفني ما شاركتك بيها

باس خدي وحضنني اكثر جعصني، همس كلمة "عصفورة" ضحكت ورفعت راسي اله..

-اني مو عصفورة بث انتَ طويل

-شگد طولج؟

-162

-يعني عصفورة

-اذا اني عصفورة مثرة شتگولون عليها

-مسرة نملة ماعرف شلون شُهيب ميحطها بجيبه على نعومتها

-مرة ثمعته يگول احطچ مدالية بجيبي وافتر

-عوفچ من مسرة وشُهيب خلينا نحچي عن قصتچ سولفيلي عنها

-مو متحب الضباط

-احب كلشي منچ اهم شي ما تسكتين

-حتى تتنمر على الثين (السين) مالتي

-ولچ ميت بيها اني شطيح حظي وسحلني غيرها

-ههههه ثمثم

-زوينااا

ضحكت بصوت عالي من باسني يمردني مرد ويكرر كلمات مغربية بمعنى "حلوة" و "تخبلين" و "جميلة" حفظتهن شگدما يكررهن..

-مالك: يله احچيلي القصة تشوقت

-اممم بث تره راح تضوج لان البطل يموت مالك يملخ يخبل يجطل يكتل يـ...

-اششش اششش ممنوع تقريها بعد! هاي وانتِ ما شايفة البطل ومتي عليه لعد لو تشوفي شتسوين؟؟

-اتمنى أشوفه اتمننى كللش ا...

-جنااات راح امووت من وراچ جناااات

-ههههههههه شبيك اتشاقه والله طبعاً ماريد اشوفه شثوي بي گلت هيچ حتى اضوجك واخليك تعصب

-هاي اول مرة اشوف وحدة تتونس على عصبية حبيبها

-اي اني اتونث على عصبيتك حبيبي

-اروح فدوة لحبيبي من حلگچ

-يلا خلينا نفوت جوه لا ننفضح

-خلينا ننفضح اني رايد ننفضح وانعل ابو هالناس الفاشلة

-صاير عراقي مأصل يلا ملاك خلينا ندخل

طبينا ورجعنا نگعد على طاولتنا سولفت وياه  شوية واجتنا فيروز تهرول وصل لمالك اتصال گام يجاوبه وفيروز اشرتلي على الوره اللتفتت وانصدم من اشوف ابوية وولد عمي يطبون للقاعة!

-جنات: شجابهم؟؟؟

-فيروز: ابوج انطاج خبر راح يجي؟

-جنات: لا كال فد شهرين ويجي مو هثة

بنص حديثنا مالك صاح وخله الناس تباوعله، قلقت من نبرة صوته العالية وحرگته وخوفه وهو يگول..

-مالك: تقصد فاهد اخوية؟؟! انتَ متأكد من الشفته؟؟؟ اخذووو؟؟؟... ولكم شلوون؟؟ اني چنت متأكد صاير وياه شي!!... لا لا مستحيل ولك مستتتحيل!!

-جنات: شصاير؟؟

ما جاوب بقى التلفون معلگ بأذنه ويستمع بتركيز عيونه راح تطلع من وجهه من قوة صدمته وزادت صدمته من شاف ابوية يتقدم علينا، سد التلفون ورجعه بجيبه يعدل من نفسه ويهدأ روحه..

-صاحب: مساء الخير

-مالك: مساء النور عمي، ما توقعت اشوفك هنا

-صاحب: اجينا نحچي وياكم وينهم اخوانك؟

بدون لا نحتاج نصيح لـ شُهيب هو اجالنه ومسرة وصبا هم يمشون وراه شافهم ابوية ابتسم وگال بهدوء..

-صاحب: الثالث وين؟

-مالك: مو هنا فاهد خير صاير شي؟

-صاحب: مو مشكلة انتو كافي، اريد مكان خاص وهادئ نحچي بي

-شُهيب: تمام

-صاحب: بالمناسبة، مبارك نجاح مشروعكم عمو تستاهلين كل خير

-مسرة: شكراً

جاوبته مستغربة شلون دخلو هنا وهمه ما مدعوين وشلون الحماية بالباب أقتنعوا وطببوهم..

تمشوا سوه بس گلبي ما خلاني اعوفهم وحدهم ورحت وياهم شافتني مسرة رحت لا ارادي رجليها جابتها ومشت ورانه، طلعنا من القاعة من البوابة الخلفية فارغ وماكو احد هنا مسوي مخزن اهل القاعة..

بعدهم هستوهم ديسدون البوابة وراهم وما اشوف غير ابن عمي علي يتهجم على مالك وينطي بوكس طاير، ما لحگت اكمل شهگتي وطفر ابن عمي صفوان على شُهيب ودددگ كتل وضرب!!!

صرت اعيط مفزوعة واصرخ بأبوية يوگفهم بس الحقد الي بعيون ابوية خلاني ما اعرفه بالعكس زاد غضبه من شافني مرعوبة ومسرة مخبوصة وتصيح، عاط بـ مصطفى وزيد و ابراهيم يساعدون الباقين ويضربون شُهيب ومالك..

-جنات: حررررام عليككم بابا ليييش هيج ليييييش

-صاحب: ولا كلمة انتِ!

بوكسيات على دفرات على راشديات مالك يحاربهم بكل قوته ويصدهم عنه وشُهيب من الجهة الثانية ركضت للبوابة اريد اطلع اصيح لمساعدة وابوية لزمني ميخليني، مسرة ما اهتمت لتصرف ابوية وهي راحت تركض ولزمها علي من خصرها يشيلها من الگاع..

-مسرة: ابن الكلللب

انطته راشدي طفت بي عيونه، فشر عليها وشالها وشمرها على الحايط ضرب ظهرها بي، صرخ شُهيب ومچتفي ثنين من ولد عمي حاول يتملص منهم ويتوعدلهم ومسرة بقت بالگاع لازمة ظهرها متألمة..

-شُهيب: اشرررررب من دممممك اليوم علييييييي هدوووني ولد الصاااااايعة

-مالك: جبتتت چلابك حتى يتهجمون علينا؟؟؟ وين العدددل خمسة على واااحد!! وين اكو هيچ موووواجهة حقييييرة!!

-صاحب: بلا لغوة ولد الچلب جعفر، يلا بابا شوفو شغلكم وخلصوا عليهم

وكأن كلام ابوية واسلوبه المقزز بالكلام زعجهم كفاية وطلع اسوء ما بيهم، صارت العركة ملاطم ركضت لـ مسرة اشوف شلونها خفت على طفلها لا يصيرله شي بس اشرتلي بيدها هي زينة..

-مسرة: اني اعلمه هذا ابو راس المصلبخ

شافت شي بالگاع يشبه الشوكة بي سنون بس مو شوكة شكله مال ديكور شالته وشمرته على راس علي من وره صااح من عمق روحه من الالم نبتت السنون براسه من وره وصار يطلع دم..

-علي: اليووم موتچ على ايدددي اليوم يا *****

-مسرة: امشيي لللك سلبوح سيان وصصصخ

اجه يتهجم عليها وشُهيب بنص العركة مد ايده يجر علي من ياخته ويمطله بالگاع ومصطفى بالغلط اجه وداس على صدر علي ضحكت مسرة تصفگ بيدها فرحانة وتگول بخفوت..

-يمة حبيبي يرحولك فدوة الجرب الي هنا

بقيت صافنة وحايرة شلون تگدر تصفگ وتفرح بهيج وضع مزري؟؟ العركة حمت كلش شُهيب ومالك تأذو هووايه تأذو كل واحد عليه اربعة وخمسة متگابل حتى لو چان اخطبوط هم ما راح يگدر يصد كل الضربات الموجهة الهم.. وبنص العركة فجأة انفتح الباب الخلفي للقاعة وظهر منها هارون اني شفته والدنيا زهت بعيوني بدون كلام زايد نزع جاكيته وغاص بالعركة..

العركة كبرت اكثر وحمت اكثر بوجوده شُهيب ومالك گدرو يتنفسون بما ان اجاهم معين وياهم، تگابلو ويه بعض واتحدو عليهم شُهيب لزم ثنين وضربهم راس براس بنفس اللحظة اغمى عليهم ووگعو بالگاع..

بينما مالك عوج ايدين زيد بدون لا يكسرها ورگع راسه بالحايط رگعات متتالية خله الدماية تطافر، تخبلت من هجم ابراهيم على ظهر مالك من وره ياخذه غدر يريد يدچ سچينة بظهره وشُهيب جره عنه يرگعه على ابوية وگعهم واحد فوگ الثاني..

-شُهيب: ماالك صارلك شي؟؟؟

-مالك: لااا ما صارلي وانتَ؟؟

حرك راسه بـ لا ما گدر يحچي بسبب الضربة الاجتله على راسه من علي لزمه شُهيب طلع حقد گلبه وغضبه كله بي شنو علي سوه لمسرة واذاها كله طلعه من عيونه طيح حظ حظه كسر عظامه تكسر تحول لوحش كاسر ويصد ويضرب كلمن يجي بطريقه ويجر علي من نحره كلما يهرب ويضربه اكثر واكثر سواه دماية..

عيوني وگلبي تعلگت بمالك متت خوف عليه واني اشوف ثنين صاعدين فوگاه مكمشين بأكتافه ناصر وزيد يضربون بي وهو يرگع بيهم بالحايط الى ان وگع زيد وداسه مالك برجله هشم ضلوع صدره وناصر فگس عيونه وانطاه راشديات متتالية بشكل سريع وعصبي اني بمكاني ظليت ارجف اول مرة اشوفه بهالوحشية! مالك الهادئ الي ما اتخيله يأذي نملة هيچ يضرب! غمضت عيوني ويه شگة بطن ناصر دچ السچينة ببطنه و شاله وشمره على حاوية الزبالة المركونة على جهة..

هارون اللتهى بثنين وفطسهم، دم بدم مينشاف غير الدم هنا والبوكسيات المتطايرة والصفعات المتتالية.. وحوش مو بشر طبيعيين ولد عمي موجودين تسع نفرات ما گدرولهم حركاتهم سريعة ومدروسة وين يضربون وواحد يسند الثاني وواحد يصد للثاني كأنهم متعودين..

تلاشى خوفي ويه اخر واحد سقط بالگاع صريع وقسم منهم ابتعدوا تعبوا من المحاربة ووگفو على جهة، ابوية بقى فاتح حلگه وعيونه ما مصدگ الصار، رمش كم مرة وبلع ريگه متفاجئ واخيراً نطق بعصبية..

-صاحب: شمسون مخلف وحوش!!

-مالك: وحووش ويه اليندگ بينا!!!

-هارون: جايبلي چم عفطيي من العراق تريدهم يكتلونا؟؟؟ ولك احنه سنننين گضيناها بالسجون والمصحات النفسية حتى صرنا هيييچ عبالك هالسلابيح يگدرولنا؟؟؟

اما شُهيب ما جاوب ولا اهتم لاحد راح لمسرة يتطمن اذا چانت بخير لو لا، حط وجهها بين ايده يحچي وياهة على كيف بينها وبينه هزت راسها توقعتها دتگوله هي زينة، شالت ايدها تمسح الدم الطالع من خشمه وتعدل بشعره وخر ايدها عن راسه وحضنها خايف عليها ويفرك بظهرها من وره يسويلها مثل المساج يريحها..

-صاحب: حيوانات وين ابوكم؟؟؟

-مالك: تره لعبتو نفسنااا بأبونا مانعرف وينه مااانعرف

-صاحب: باگ فلوووسي ورااح واخذت بنتي على الحاضر محضر؟؟ تحلممم ابقيها يمك مالك تحلمممم

-مالك: هو بكيفك؟؟ بنتك مرتيي ومالك حق تاخذها بدون رضاها يعتبر خطففف هذا!!

-صاحب: خطف مو خطفف ما يهمني جناات ما تبقى وياك!!

صارت لغوة قوية بيناتهم وملاسن وتدخل شُهيب يفاككهم لان ابوية تهجم على مالك، لزم شُهيب مالك من اكتافه يدفعه للحايط ويهدأه..

-شُهيب: لا تعصب لا تخلي يستفزك مالك حافظ على اعصابك

-مالك: ولككك يريد ياااخذ جنتيييي

-شُهيب: ما ياخذها ماله حق اهددأ يااا خوية

-صاحب: اخذها من بين عيووونك وغصباً عليييك تعالي ووولچ

جرني يسحسلني من شالي طگ دبوسي وطلع شعري گمت اعيط وادفع بي ومالك متخبل..

-مالك: هدنيييي شُهيببب هدنننني خليني اربييي هالشااايب العااار

-جنات: بابا حبااب شتريد مني

-صاحب: طايحة الحظ ****

فشر عليَّ وضربني على حلگي طگت شفتي دم بچيت مهضومة من تصرفه، سواية ابوية خلت مالك يتخبل بالزايد فلت من ايدين شُهيب وصار يضرب ابوية بخبال وعلى وجهه بوكسيات..

ركضت اجره منه يوخر مهما يصير هذا ابوية وعمه ورجال چبير ميصير يتجاوز عليه بس ما قبل يوخر الا من شُهيب سحبه يشمر جسد مالك على هارون يخلي يقيده..

هرولت احتمي بظهر مالك اخاف لا ابوية يكتلني ويطلع حرگته بيه بس ما لحگت جرني من شالي نزعه بالكامل وضربني راشديات ويعت بشعري، شُهيب سحبني منه بألف يا علي ودفعني على مسرة وعاط..

-طلعيهااا منااا

لزمت ايدي مسرة ونزلت اخذ شالي وركضت تطلعني من نفس البوابة الطبينا منها وشُهيب بعده مقيد ابوية وهارون مقيد مالك الصار يرگع بكلشي گدامه ويفشر ويسب ويغلط ويتحلف لابوية وعمامي كلهم..

-مسرة: جناات شوفي سام وين وگليله مسرة تريدك ضروري! خلي يجيب ثلاث زلم وياه بسررعة طيرري

هزيت راسي اي ولفيت شالي شلون ما چان وهرولت للقاعة وجمدت من شفت الاوضاع مخبوصة هنا وسمعت واحد يصيح اجت الشرطة! خفت يكون احد مخبر علينا ومالك وشُهيب وهارون يتأذون رجعت اركض لمكانهم، مديت بس راسي من الباب وصحت..

-جنات: شرطة!! اجت الشرطة!!

جفل الموجودين واضح قامت عركة جديدة من طلعت لان مالك متكامش ويه علي، هدو بعض وطلع الكل يهرول منين ما دخلنا يرجعون للقاعة.. اجاني مالك حضني لصدره يبوس براسي ويرتب بحجابي ويمسح شفايفي المدمايات..

-حبيبتي بنيتي

بچيت بحضنه متألمة بقى يصبر بيه وطلعنا للقاعة سوه شفنا الشرطة هستوهم ديدخلون، لقطت عيني كيان من بعيد استغربت وجودها بس ما طول استغرابي بسبب الضابط الي هجم على شُهيب وصار يحچي بلغة البلد شي بصوت عالي وبنبرة سريعة..

قامت القيامة هنا من كلبشوا ايده ومالك تخبل صار يشيل روحه ويرگعها، اجت نورسين عيونها مدمعة تتسائل وتحچي بلغة ما مفهومة ولازمة مالك من ياخته تريده يفهمها شصاير بينما كيان فحطت بچي وتركض لاخوانها حتى يساعدوا واخوانها مخبوصين مثل خبصتها واكثر..

اللتفتت ادور مسرة يمكن هي تعرف شنو ديصير شفتها واگفة جافلة وفاتحة عيونها مبحلقتها، طلعت من شرودها من سام حارسها الشخصي لزمها من متونها يحركها ويصيح..

-سام: مسرة انتِ ويااي مسرة؟؟!!

-مسرة: سام اخذو

حضنها يمشيها يطلعها منا ودفعته منها تعيط بصوت عالي وتدور على احد، رجع سام يحضنها ويهمس شي بأذنها وهي تهز راسها معترضة وبس الدموع تجري من عيونها وتعيط..

-مسرة: ويييينه ابووووية؟؟؟ طلع مووو طلععععع!!!

-سام: طلعع من زمااان ايي

-مسرة: اخذوو الشرطة اخذته اخذذذذته راااح شُهيب رااااااح

القاعة انقلبت رأساً على عقب من الشرطة اخذوا رئيس الشركة الي اقام الحفل مكلبش اليدين ومتهمي تهمة خطيرة ما انعرفت شنو لسه بس واضح شي مخيف وعظيم بسبب عصبية مالك ورجفته وصوته الي انبح وهو يصيح...

-مالك: ظلمممم هذاااا اني متأككككد اني اكفففله اني اكفففل اخوية مستتتتحيل تقنعونييي شُهيب مسوووي هيچ شيييي!!!

طلعوا من القاعة تحت انظار الجميع المذهولة، ركبوا سيارة الشرطة وانطلقوا ومالك بدون تردد طلع وركب سيارته يشخطها يلحگهم وراحو وراه نشوان ومروان وفاضل وهارون وباقي من اصدقاء شُهيب حتى نورسين راحت ويه سايقها لمركز الشرطة..

كيان متخبلة من البچي رحتلها احضنها اطمنها كلشي راح يكون بخير، حرت بينها وبين مسرة الي گعدت بالگاع مگنبصة ضامة وجهها بين ايدها ورايحة بغير عالم صبا گعدت تواسيها وجولي من جهة ثانية بس ما بقت تنتظر هواي دفعت الكل عنها وگامت تهرول تطلع من القاعة وسام لزمها..

-سام: مسرررة وين رايحة وييين

-مسرة: رايحة اثبت براائته سام هدنييي

فلتت نفسها من بين ايده وركضت بره القاعة بقت كيان بين ايدي تنوح وتتوسل احد ياخذها ماعرف اواسيها لو اواسي نفسي واني اشوف ابوية واگف وخازرني والكره مغطي على ملامحه، اجاني ووخر كيان عني وعتني من ايدي يمشيني وياه..

-جنات: بابا حباااب شتريد مني آآآآييي ايدي انخلعت بااابااا

-كيان: وين ماخذها عموو؟؟

ما جاوب احد ولا اهتم لصياحي وتوسلاتي واخذني وياه غصب ركبني سيارة وصعدو علي ومصطفى ويانه وانطلقوا بكل سرعتهم يطلعونا من شارع القاعة..

-جنات: شتردوون منييي ليش اجيت بابااا موو كافي زوجتني غصبب هثة رجعت تريد تاخذني؟؟؟

-صاحب: ترجعين ويانه لبيت ابوچ وانعل ابو ماالك لابو الجابه!!

-جنات: ماااريد اعوفه ماااريد اجي وياااك

لطمني على حلگي بگفه ايده شفايفي رجعت تجر دم صحت متألمة وما قبل على صياحي وانطاني راشدي يسكتني حاربته بيدي ادفعه مني ورگع راسي بالسيارة يسب بيه ويغلط عليَّ وعلى مالك وعلى شمسون..

ويه كل شهگة تطلع مني يضربني ويه كل نفس يدفرني ويجر بشعري هلسه بين ايده تهلس شالي نزعه وياخة فستاني انشگت دمرني وروحي شاغت من كور ايده وضربني على صدري بوكس طلعت روحي وحسيت راح اتقيء وهم ما عافني..

سفط علي بمكان ماعرفه بي بيوت متفرقة، ركضت انزل اهرب منهم ولزمني ابوية طيح حظي بالمسبات والدفرات وكلما اعترض واهرب مرة ثانية يجرني من شعري ويذبني بالگاع ويدوس بصدري وبطني.. شفت الموت بين عيوني وبعد ماعندي طاقة اوگف استسلمت بالگاع ماگدر اتحرك علي شالني شيول ودخلني للبيت وصعدني الدرج دخلني لغرفة وشمرني على الچرباية..

-صاحب: تبقين هنا مثل الحيوانة بينما نطلگچ من ذاك النذذل

-علي: عمي انتَ شلوون جازفت وزوجته جنات شلوون تنطي لابن شمسون؟؟

-صاحب: غبييي اني غبييي

طلعوا وره ما قفلوا الباب عليَّ، بچيت بحس مبحوح من الصياح وروحي تلوب من الالم، گمت من مكاني ازحف للباب زحوف ابچي و اضرب بيها واصيح يفتحولي..

-جنات: انتووو انذاال وحيوااانات انتو عااارات وططوااات وفگرر الله ياااخذكم الااا ارفع عليكم قضييية واجيفكممم بمراكزز الشرررطة!!!

انفتحت الباب مرة ثانية عليَّ وظهر منها علي العيون تتجادح من العصبية وصاير ناار كبريت رفع رجله ورفسني بحذائه على وجهي احس خشمي انكسر من قوة الضربة وگعت چفي على راسي من وره واجه گطعنيي من الكتل يضرب بدون رحمة ويرفس برجلي ووجهي صرت اني والگاع واحد، طلع صوتي بصرخة عالية من داس ببطني فوراً وگف عن الضرب..

-جنات: اااااااااااه راح اموووووت بطنيييي

لازمة بطني واتلوى من الوجع واحس بشي گام ينزل عليَّ، جرني من شعري يگعدني على حيلي وصاح بـ مصطفى يجينا..

-علي: تعااال شوفها سبحت بدمهااا تعااال

ركض مصطفى يدخل علينا وابوية وياه شافوا حالي ماكدر ارفع ايد بعد وبطني تگطعني من الوجع انتهيت من الالم امرهم ابوية يطلعوني وينزلوني جوه.. علي شالني ينزل بيه الدرج وطلع من البيت يركبني السيارة ومصطفى يسوق..

لبسني عباية خليجية سودة ماعرف منين جابوها وفتح ضوه ينظف وجهي من الدم ويلبسني الشال عدل وابوية بس گاعد وينافخ متنرفز..

-صاحب: شوفي لچ راح ناخذج مستشفى نشوف شبيچ ولو ادري عرج ميطلع بيجن **** انتن حسچ ما اسمعه صوتج لو طلع اطيحه لحظج اكتلج بمكانج

غمضت عيوني ساكتة وبقيت بهذا حالي ابچي وادعي ربي يخلصني منهم ويرجع مالك ما اتمنى شي غير يرجع مالك وياخذني يمه ويخلصني من ذولة الوحوش، بين دعوتي وبكائي ووجعي طفت عيوني وبعد ما شفت غير السواد اغمى عليَّ...

حسيت مرة ثانية على شي مبلل محطوط على جبيني وايدين تتلمس معصم ايدي، فتحت عيوني لگيتني بغرفة مستشفى ودكتور گاعد گبالي ومشكلين بيدي مغذي وابوية وعلي على راسه واگفين وشكلهم منتظرين منه شي..

ما حچيت شي احس بأبوية يحرك الوصلة من راسي ينگعها بمي بارد ويرجعها على گصتي والرجال جاب لفاف شاش ولفه على ايدي وگال بالعربي..

-الدكتور: ايدها مفصوخ واكو رضوض بجسمها

-صاحب: عادي عادي، دكتور كملنا مو؟ عادي نطلع؟ الطريق امان؟

-الدكتور: دقايق نجيب فحوصاتها ونتأكد من سلامتها

-صاحب: يمعود مابيها شي وگعت من الدرج يعني شلون واحد ما يوگع من الدرج!

-الدكتور: ميخالف عمي البنية چانت تنزف لازم نتأكد للاطمأنان لا اكثر

-صاحب: شوف دكتور اني ردتك انتَ بالتحديد لان تصير ابن صاحبي بس ما اقبل تستغل وقتنا وتماطل علمود تحاليل سخيفة احنه طالعين

-الدكتور: هاي وصلت التحاليل

دخلت ممرضة بيدها ظرف، قدمته للدكتور طلع الاوراق منه يقراهن كل خلية بجسمي توجعني واحس جسدي خدران من الضرب عيوني تغمض وترجع تنفتح بس فتحتها على وسعها من الدكتور گال بأبتسامة..

-الدكتور: مبروك انتِ حامل

توسعت عيوني مصدومة، وضرب علي ايد بأيد بحرگة وابوية كذلك انصدم وسأل متعجب..

-انتَ متأكد؟؟

-الدكتور: اي هذا التحليل هي حامل وصحتها ممتازة كل فيتامينتج حلوة ووضعج جيد يحتاج بعد تزورين دكتورة نسائية حتى نتأكد من صحة الجنين

-صاحب: شنو هالمصيبة يا ربي

نسيت وجعي وتعبي وسألت بخوف..

-جنات: دكتور شلون حامل اني لعبت رياضة وشلت اثقال

-الدكتور: شوكت هذا الكلام؟

-جنات: اليوم

-الدكتور: متشوفين نزفتي، هسة اطلب منج ترحين لقسم النسائية ضروري ترحين عمي لازم تاخذها حتى تنطيها حل ويه النزف

هز راسه ابوية وگومني من السرير، گعدوني على كرسي متحرك لان متكسرة واخذوني لقسم النسائية..

-صاحب: غطي وجهج لا تبين جروحه

ردت اعاند واگوم اشتكي عليهم بس تنازلت مستسلمة اعرف ما راح اگدر اهرب منا وعنادي راح يزيد الوضع سوء، سويت مثلما يگول غطيت وجهي بالشال مالتي ونزلت عيوني لحدما وصلنا لقسم النسائية..

المستشفى مو نفس المستشفيات الحلوة الشايفتها هنا المكان قديم والكادر قليل، سوه ابوية كم اتصال لحدما اجه واحد من امن المستشفى يحچي وياه ودخل ويه ابوية للدكتورة شوية وطلعوا وگلي انتِ فوتي، طبيتلها وفوراً نومتني على سدية ما سألت عن جروحي ولا الكدمات بسرعة بدت تسويلي سونار اثاري طلع ابوية راشيها ويعرفها..

عيوني ويه شاشة السونار واباوع لوجه الدكتورة، گلبي ينبض بقوة والرجفة لزمتني، تحرك الجهاز على بطني وانتبهت من شافت كدمات على بطني بس غلست وما سألت عنهن، رجعت الجهاز بالسونار ونزعت الكفوف ووگفت مكانها تگول بالانكليزي وابتسامة مرسومة على وجهها..

-انتِ حامل نعم وتقريباً دخلتي بالاسبوع السادس

-دكتورة اني لعبت رياضة اليوم ونزفت

-اي وضع الطفل مو تمام حتى بالسونار بين عندي انتِ تاخذين حبوب علاجية او مانع حمل؟

-لا اخذ فيتامينات ومكملات غذائية زوجي ينطيني

-على كلٍ ما راح يبين هسة اذا الطفل بي تشوهات لو لا وراح ننطيچ مثبتات وعلاج، تحتاجين راحة وتنامين على ظهرج وزوجچ ما يتقربلج على الاقل للاسبوعين القادمة بس لا تخافين الجنين راح ينجو ان شاء الله

-ويجي مشوه؟؟

-ما معلوم نحتاج وقت ياله يبين هالشي

معدتي خبطت بخوف كلامها ارعبني شسوي لو طلع بي تشوهات؟ شلون راح يعيش وشلون راح تكون حياته؟؟

-دكتورة انتِ متأكدة الطفل بي شي؟؟ شنو شفتي وگلتي شكله مو طبيعي؟

-لا تخافين حبيبتي اساساً الجنين صغير بعده ومستحيل يبين عدنا وماطول متاخذين ادوية وموانع ان شاء الله مابي شي

تنهدت مرتاحة نوعاً ما الحمدلله يعني هذا بس شك ومو كلام اكيد ان شاء الله مابي شي، ورغم هذا ما انطفى ترددي وحسيت الوضع خطر تذكرت من مالك گلي ميريد اطفال وحريص حتى ميصير عنده، بس اني ليش هسة فرحانة ورغم خوفي وكلام الدكتورة بعدني سعيدة والخبر نساني كل وجعي؟

تلمست بطني مبتسمة ماعرف شلون راح تكون ردة فعل مالك من يعرف اني حامل بس متأكدة راح يفرح هواي ويتقبل الموضوع ويحافظ علينا من ابوه لانه يحبني وهذا الطفل راح يكبر حبنا ويزيده وان شاء الله يتم حملي على خير..

طلعت من الغرفة سألني ابوية بس يرجف رجف گتله الطفل وضعه زين ما ذكرت موضوع التشوه، ضرب وجهه مهموم وعلي تخبل صار يسب ويفشر ويضرب بالحايط بوكسيات العالم ظلت تباوعله، وگفت على جهة خفت يضربوني ويتأذه الطفل نتر بيه ابوية حتى امشي گدامه واسمع علي يحچي وياه..

-علي: عمي لازم نسافر گالو راح يفرضون حجر صحي وحضر تجوال بسبب كورونا وبعد يمنعون السفر كلياً

-صاحب: تمام تمام

ركبت السيارة وياهم بدون مجادلة ولا عناد ورجعوني لنفس البيت ونفس الغرفة وقفلوا الباب عليَّ بعدما تأكدو ماعندي تلفون..

**

"مسرة"

ركبت سيارتي وطرت للمركز عيوني تغوش ووضعي مو تمام، الرجفة لازمتني حتى رجلي ما مسيطرة على البانزين تتحرك لا ارادي.. الطريق صار شطوله روحي طلعت وازدحام لزمني رغم الساعة متأخرة بالليل جزعت ورحت اسلك غير طريق.. طريق الغابات..

اسوق واضرب شكو غصن شجرة يصير بوجهي ممهتمة لا لسيارتي ولا خاف اسوي حادث بس اريد اوصل لـ شُهيب واخرب كلشيي اروح اعترف هو بريء ومستحيل يكون مسوي أي جريمة لبسوها بي..

بنص الطريق وگفتني هورنات ثلاث سيارات خففت اشوف شكو ومال حاضر كسرن عليَّ يحاوطوني بسياراتهم ميخلوني اطلع، جمدت وقفلت بيبان سيارتي اراقبهم طلعوا من سياراتهم عبارة عن جثث عملاقة لابسين اسود من فوگ ليجوه، طلعت تلفوني بسرعة ادگ على ابوية بس ميجاوب..

اتصلت بـ سام وبلغته بيهم وسديت الاتصال من تقدم مني واحد ودگ بأصبعه على جامة سيارتي غلست عليه، دگ مرة ثانية يريدني انزلها ما قبلت.. اشرلي بقبضة ايده راح يكسر الجامة استسلمت وفتحت جزء منها..

-طلعي من السيارة مدام

-مسرة: منو انتَ؟؟

-خادم جوه رجليچ طلعي من السيارة مدام بلا امر

-ليش اعترضت طريقي؟؟

-ما اسمع

-لييييش اعترضت طريقي؟؟؟

-احنه هنا لحمايتچ تگدرين تبقين بسيارتج بس واحد من عدنا يصعد وياچ

-خير؟؟ خو ماكو شي؟؟ شنو تصعد ويايه عرف ولف انتَ!!

-مدام اسمحيلي رجاءاً اني هنا عبد مأمور

-مأمور من يا قندرة؟؟

-ما اسمع مدام ضوضاء هنا والجامة مفتوح منها صغير علّي صوتچ

-يوووه مو وكتك ابدد

-اعتذر منج

طلعت سلاحي الضامته بالچكمچة محضرته وفتحت الجامة اكثر، ابتسم يتشكر مني وكمل كلامه بأحترام..

-ممكن تفتحين الباب ويجي "سباستيان" يحچي وياچ جوه

-على أي اساس يدخل لسيارتي؟؟ وخر عن طريقي عندي شغل!

-ما انطيتينا حل ثاني مدام قيثارة احنه نعتذر منج

-على شنـ...

ما كملت كلمتي وضرب ايدي الشايلة المسدس خلاه يوگع بحضني وفوراً حط قطعة قماش يسد بيها خشمي وحلگي.. صرت اصارعه بيدي ما اقبل اتنفس القطعة اعرفه مخدر ملخته تملخ بأظافري واصبعي طببته بعيونه فگستها عاط متألم بس ما ابتعد الى ان بدت عيوني تغوش شوية شوية وفقدت الوعي..

فزيت مثل المخروعة ادور حواليه اتأكد من وضعي وحالي لگيت روحي نايمة بغرفتي ببيت ابوية بنفس فستاني ومجوهراتي حتى حذائي ما نازعته، گمت بسرعة من مكاني وكرفتني بطني بألم ما اهتميتله وركضت للباب افتحها لگيته مقفول..

تخبلت صرت اضرب بالباب واعيط يفتحولي انهارت قوتي وفقدت اعصابي احس بروحي جاي تطلع ومحد فتحلي ماكو صوت بالبيت واني محبوسة بالغرفة!

ركضت لشباك غرفتي ناوية اطفر منا وانصدمت من شفت الگاع متروسة اشواك واسلاك شائكة اذا شمرت روحي منا راح اتملخ تملخ ويطب كله بجسمي! متأكدة هاي من ابوية يعرفني عندي الف طريقة اگدر اطلع من الغرفة حتى لو اذب روحي من البلكون، تارس الحديقة الخلفية من هاي الاسلاك يمنعني من النزول!

صرخت مأيسة تهسترت واني اشوف الساعة عبرت الخمسة الفجر عقلي وگلبي وروحي ويه شُهيب!! شنو حالك شُهيب وشصار وياك حبيبي!!

**

"صبا"

اعصابنا تلفت لا نوم ولا اكل ما رجعت للبيت بقيت ويه مروان وكيان لاخر لحظة، امي تفهمت الوضع وسمحتلي ابقى عنده وگالت عدها ثقة بيه وتعرف ما راح اسوي شي غلط هي متدري مروان ما مگلبني وروحه طافرة على اخوه الما معروفة شنو تاليته..

رجع نشوان من الاسواق جايب بس حليب وجهه تعبان ووضعه مو زين، انطاني الحليب حتى احمي واصب لكيان ومروان حتى يسند طولهم سويته واخذته الهم ورجعتله..

-صبا: شوشو شوكت محاكمته؟

-نشوان: باچر الصبح

-صبا: ماكو امل؟

-مادري

حچاهة بجزع وعيونه لمعت بدموعها، مسحت دمعتي النزلت ورحت اتصل بـ مسرة بس جهازها مغلق موتتني هالبنية ليش اختفت عجزت ادورها ابوها اكدلي هي مسافرة لـ باريس وراواني تذكرتها مال الطيارة واسمها بالمطار من ما صدگته انصدمت من عرفت بس احس اكو لعبة مستحيل مسرة تعوف شُهيب بهذا الحال!

الصبح طلعنا كلنا سوه للمحكمة، فيروز اجت ويانه سألتها على جنات گالت عند ابوها هزيت راسي وگعدنا ننتظر وقت محاكمة شُهيب بقلوب دامية كيان بس گاعدة وتبچي لحدما سمحولنا ندخل وننتظر مجيء القاضي والمتهم الي هو "شُهيب"..

دخل مالك وضعه مخررربط اول مرة بحياتي اشوف مالك شمسون الراقي الي الكل يحچي بكشخته وترتيبه بهذا الحال، شعره مهووس وازرار قميصه متفتحه الهالات ماكلة عيونه وبياض عينه صاير دم احمر، ظهره منحني ومنزل راسه شكله يبچي الگلب..

هوايه ناس حاضرين هنا الي اعرفه والي ما اعرفه، اكو بيهم نظراتهم حقيرة وحسيتهم ضد شُهيب گاعدين على نار، عمو فادي گاعد بصفي من جهتي اليمين ومروان من جهتي اليسار، دقايق وشفت الگاعدين گدامي بالكراسي الامامية كلهم وگفوا بمعنى وصل القاضي..

ثواني ودخلوا شُهيب.. بس شفته دموعي بعد ماگدرت اسيطر عليها گلبي مات بشوفته روحي انمردت مرد وكيان اختنگت بدموعها، مكلبش اليدين وملبسي زي السجناء وگعدوا بصندوق خشب ينتظر محاكمته..

عيونه تدور احد ما خلى بقعة ما باوع بيها واعرفه يدورها، يدور حبيبة گلبه ومسراته ومستغرب لانها مو هنا، القلق انرسم على وجهه وسألني بعيونه عنها هزيتله اكتافي ماعرف وشفته يتنهد..

قرا القاضي بالاوراق الگدامه واشر للمحامي الي ضد شُهيب حتى يحچي بالقضية، بده المحامي يحچي بلغة البلد عن جريمة شُهيب الي متدخل العقل بس شنو بيدنا وشنو نگدر نقدمه..

-المحامي: المتهم شُهيب شمسون، متهم بجريمة سرقة اموال طائلة من مستثمر روسي اسمه "دون" دون سلف شُهيب ثروة لا تقدر بثمن حتى يفتح مشروعه الجديد وهناك مستندات واوراق تثبت هذا الكلام امامك حضرة القاضي.. لكن حدث شيء غير متوقع وهو جريمة قتل! جريمة قتل المظلوم "دون" وجميع الشكوك تحوم حول المتهم شُهيب!

وگف محامي الدفاع مال شُهيب وگال معترض..

-وشنو يؤكد شُهيب اله ايد بقتل دون؟!

-المحامي: اوراق ومستندات وبصمات صوتية بصوت دون يتوسل بـ شُهيب يرجعله امواله بسبب اصابته بمرض السرطان ويحتاج الاموال للعلاج لكن فجأة! فجأة المتهم شُهيب قرر يسافر لـ روسيا في شهر ال(^^) بالتحديد للمنطقة الساكن بيها "دون" وخلال اليومين الذي تواجد فيهِ شُهيب بروسيا سمعنا بمقتل دون!

صارو واحد يجر طول والثاني بعرض، شُهيب اعترض بشدة وگال ما ملتقي بـ دون بحياته كلها وسفره لـ روسيا حتى يلتقي بصديق طفولته اسمه "موزس" والأوراق الوصلتله عن طريق البريد چانت من شركة رادت شُهيب يكون شريكهم الموضوع ماله علاقة بالفلوس وما حصل دولار واحد منهم..

گاعدين كلنا على اعصابنا ما عدى شُهيب الچان يتناقش ويجاوب الاسئلة برسمية رجل اعمال واثق من نفسه وكأنه بركازته يثبت هو ماله علاقة بكل هذا الكلام الفارغ.. ماتت گلوبنا من گام المحامي يطلع ادلة ضد شُهيب والقلق بده ينخر بعظامنا من عرض شريط فيديو تصوير لـ شُهيب وهو يتعارك ويه رجال بروسيا ما مبين بس گفاه ودماه تدمي وتركه مصروع بالگاع بدون لا يقتله كيان تخبلت وصارت تخرمش ايدها بأظافرها بدون لا تحس..

-محامي الدفاع: شُهيب عندك تبرير لهذا الفيديو؟

-شُهيب: دفاع عن النفس

-محامي الدفاع: قتلته؟

-شُهيب: لا

-محامي الدفاع: بس شفنا اطلاق نار

-شُهيب: ما قتلته ضربته بالعامود الفقري اشل حركته بعدما راد يقتلني

-المحامي الثاني: وهذااا دليل ثاني يفسر عنف المتهم شُهيب ضرب رجل طلقة في العامود الفقري وشل حركته للابد!

-محامي الدفاع: لعد تريده يصفن عليه وهو اجه يتهجم يريد يقتله؟!! سيدي القاضي! شُهيب ما ضرب الرجل بمسدسه الخاص استعان بسلاح العدو بمعنى العدو اجه متهجم على شُهيب وراد يقتله ولولا تصرف شُهيب ودفاعه عن نفسه كان مات!!

سكت القاضي والمحامي الحقير الثاني وانجرفت القضية لفروع اخرى وتعمقت قضيته اكثر واكثر من جابوا سكرتيرة مسرة الجديدة "دلال" واستجوبوها عن عنف شُهيب والحقيرة انطت بي بكللل ما عدها من قوة!!

-دلال: هدوئه مريب ومخيف اني اخاف منه واتحاشاه دائماً ما احب اتورط وياه لان سامعة عنده سوابق والكل متكتم على الموضوع بسبب منصبه بالشركة

-المحامي: انتِ شفتي شُهيب يتقاتل ويه احد من قبل؟!

-دلال: لا ما شايفته بس مرة شفت تعامله ويه مدام مسرة كان جداً قاسي وياهة

-المحامي: قاسي شلون؟

-دلال: شفت كدمات على رگبتها ومعصم ايدها وچانت تغطيهم بالملابس تخاف لا احد يشوفهن

-المحامي: ممكن الموضوع مو مثل ما متخيله؟ ممكن هذا ناتج من علاقتها الشخصية ويه شُهيب؟

-دلال: لا اني متأكدة كانت كدمات شُهيب يعنفها

زفر نفس مروان متنرفز ونشوان راح يموت بينما مالك گاعد على اعصابه وبس يضحك ويحرك براسه "لا" عقله مبين مو وياه وحتى تخيلته سكران لان شكله مو طبيعي بس مستحيل يكون سكران ومدخلي للمحكمة..

تفرعات وتفرعات وتفرعات واقاويل زائفة لمواقف اني بنفسي چنت حاضرة بيهن وما صار هيجي بس كللله گلبو ضده وتكالبو عليه انهارت قوتي وبگلبي ادعي تدخل مسرة بأي لحظة وتكذب الكل!

استدعوني كـ شاهد لصالح شُهيب وحچيت كللشي مسرة حاچيته الي عن حبه وحنانه واسلوبه الحلو وياهة بس احس كلامي ما اقنعهم مقارنة بكلام دلال خصوصاً والقاضي مبين حاد سنونه على شُهيب..

كل هذا الكلام والاتهامات وشُهيب ما انهز شعرة! اكتافه مستقيمة وراسه مرفوع ما نزله وثقته استفزت المحامي الثاني، بس القاضية چانت من طلع ملف جديد فتحه يقراه شوية وگال بأبتسامة شيطانية ماكرة..

-المحامي: سيادة القاضي هذا تصريح من المدعوة مسرة قيثارة وفيه شكوى ضد المتهم شُهيب شمسون!

هنا تغيرت نظرة شُهيب ولمع الفضول بعيونه من جابو سيرتها، كمل المحامي بثقة مقززة..

-يقال من بعض الشهود مسرة قيثارة لم تنضر من شُهيب اذاً لماذا اشترت اسهم شُهيب من الشركة وعزلت نفسها عنه؟ ليش سحبت اموالها واسهمها وطلبت الطلاق من شُهيب؟!

سكت الكل ومن ضمنهم شُهيب بقى الفضول بعيونه وما غابت نظراته الفضولية الا من كمل المحامي..

-شكوى! وهذي قضية مرفوعة ضد المتهم شُهيب شمسون على تشويه سمعة مسرة قيثارة وزواجه منها وخداعها بأقاويل كاذبة وكلام زائف قيثارة تأثرت سمعتها بعد اخر حفل وممكن هالشي يأثر على عملها وارباحها بشركتها الخاصة!!

طامة عظمى ووگعت على روسنا! شكوى من مسرة على شُهيب!! مسرة مشتكية على شُهيب؟؟ مستحيل اصدگ هالشي مستحيل!!

-المحامي: مسرة قدمت شكوى على المدعو شُهيب في تاريخ 5/4 وذلك بسبب تشويه سمعة، استغفال، الم جسدي ونفسي سببه الها واخيراً عرض حياتها للخطر اكثر من مرة! مسرة قيثارة ضد شُهيب شمسون في كل شيء وعدم مجيئها اليوم هو اكبر دليل على خوفها منه!!  دليل يوضح على ان شُهيب شمسون متورط! متورط ورطة حقيقية وكاملة وجميييع الاقاويل التي تناولناها ضده اليوم حقيقية بشهادة مسرة قيثارة!!!

وهنا بهذا الموقف بالتحديد وبهذا الكلام الي يكسر الروح شُهيب تغيرت نظرته ذاب الجليد المحاوط عيونه وشفت الخذلان والالم بيهن، رخت اكتافه القوية وانحنت بعدما كانت مشدودة وقوية، سمعت صوت كسرة گلبه ويه طأطأة راسه الچان عالي، شفت الهضم يتخلل ملامحه ويه بلعة ريگه وياه غصته.. ما سوه شي غير بقى على هذا الحال مصدوم وحزين، مهموم ومكسور گلب..

حبيبة گلبه وسنينه.. مسرات روحه وراحته مشتكية عليه وهاي شهادة ووكالة للمحامي بإسمها على ان شُهيب مأذيها؟ مسرة الي يشهگ بأسمها وروحه متعلگه بيها؟ الچان ياخذ شغلها وهو بعز تعبه وينسبه الها؟ الچان يجور على روحه ويأذي نفسه لخاطرها؟ الچان يسامح ويتغافل عن أغلاطها ويبررلها بكل موقف؟ يفضل راحتها  وسعادتها ودلالها على روحه ونفسه! مسرة الي شُهيب حبها لسبع سنوات وما انمسح حبها من گلبه تاليتها هيچ تكون نهاية هذا الحب؟

مالك صار يضحك بهستيريا بشكل جذب الكل، يهز براسه مأيس ويصفگ بيده ويگول بصوت عالي..

-گتللللك هاي البنية تنهيك گتللك شُههههيب راح يجي يوووم وتكسر گلبببك شگد گتلللك عوووفهاااا ولكككك عوووووووفهااااا

صاح بجزع وروح محترگة ويضرب على الميز الگدامه مثل المجنون متناهي ومتناسي شخصيته ومكانته وهو منو، ضرب القاضي بمطرقته للالتزام بالهدوء گوة سيطروا على مالك حتى يتحكم بأعصابه..

بعد دقايق من الصدمة الي حلت علينا طلع القاضي ويه باقي القضاة الي سمعوا المرافعة وراحوا يتدانشون بشكل سري، شوية وطلعوا والحكم جوه اللسنتهم..

الكل وگف يستقبلهم واحس المكان فرغ من الهوا من توتري، كمشت بأيدين مروان بقوة خايفة انحبست انفاسنا من ضرب القاضي بالمطرقة من جديد للهدوء وگال بجدية (الكلام الي اتذكره)..

-الحكم بعد المداولة.. قررت المحكمة وبأجماع الاراء على الدلائل الواضحة والكافية ضد المتهم شُهيب شمسون على انهُ مذنب! وعلى هذا الاساس حكمت المحكمة على السجن لمدة عشرين سنة عقوبة لاعماله الاجرامية!

وگف گلبي وعيوني شخصت، كيان انفجرت بالبكاء تصرخ وتضرب على وجهها ونشوان انهار ومروان صار يصيح معترض ومالك تخبل فقد عقله يضرب بالحماية مالته وبكل من يعترض طريقه يريد يركض لـ شُهيب، چتفوه گوة وصار يضحك والدموع تنزل من عيونه بنفس الوقت ويصيح..

-شلوووون اطلعك منهااا شُههههيب وانتَ انحكمت عشررررين سننننة ولكمممم هذا اخوووووية والله اخووووية انييي اكفله انيييي اعرفه شنووو من گلب شاااايل ولكم شنو عم عليييه غيررر گلببببببه الاغبببببر!!

يحچي والدموع مطر مطر من عيونه روحي راحت ويه صوته الي انبح يصيح معترض لان اخذوا اخوه مكلبش الايدي وعيونه على مالك ينظرله بنظرة خاصة، جره مالك من ايده يريد يحضنه والشرطة ما قبلوا..

-ظلللللم والله ظلللللم وروحهااا لامي اني متأكددد ظللللم شُهيب ما كتله ماااا كتللله هدووونييي خلوني اووودع اخووووية هدددددنيييي

محد قبل يهده واخذوا شُهيب مكسور الگلب يطلعوا من غرفة المحاكمة، ومتأكدة سبب كسرته مو حكم العشرين سنة سجن كسرة روحه بسبب مسرة وشهادة مسرة ضده!

دورت عيوني بالمكان بعدما طلعوا محبين شُهيب وبقوا الحاقدين والكارهين والي انتظروا هاي المحاكمة من سنين! كيان خربت ووگعت على اخوانها غايبة عن الوعي اخذوها وطلعوا بيها بره، بقيت گاعدة اني رجليه متشيلني احس الدنيا سودت بعيوني واني اشوف حالة مالك الگعد بالگاع فاقد اعصابه ويضرب على راسه وصدره ويصيح بكسرة..

-احير بيمنن واروح المننن لفااااهد لو الك شُهههيب دمرنااا ابووكم دمررناا فرقنااا وهجوولنااا اخذ حيلييي من اخذكم منييي

-مسيو مالك اترجاك تهدأ لا تجي الصحافة

-مالك: ولك اخوووية هذا اخذوو اخوية  منييي مرة ثانية عيونه تريدني شفتهن! شفته شلون يباوعلي بنفس النظررة قبل 14 سنة!! نفس عيوون ذاك المراهق العفته بذاك السجنن رجعت عفته مرة ثانية هنا!! ولللك شُهههيب فرقووونا مرة ثانية ااااااخ يا خوية حرموني منك يا نظر عينيي

عيون تراقب مالك المنهار فرحانة ومنتشية سعادة، مباركات من قبل الجميع، ابتسامات النصر تعتلي الوجوه الميتة، قلوب تنبض بجنون العظمة ورئات تتنفس الحرية اخيراً..

تكالب عليه الجميع، بشر ما توقعت بيوم اشوفهم فرحانين بـ هلاكه لگيتهم هنا گاعدين ينتظرون خبر دماره.. تصفيق حار من الشخص الواگف مقابيلي وفرحة غامرة ملت ملامحه وهو يصيح..

-انتهت رحلة شمسون!! اخيراً انقطعت سلالة شمسون القذرة! انتهى عذاب سنين وخوف سنييين كفوو بكل من شارك بهاي المهمة الصعبة! گالوها من قبل وارجع اگولها ما يحلوها الا ولد الحلال خلصونا من ارواح شؤوم من نسل فاسق حَســوم!!

هزة راس مع ضحكة شريرة نابعة من قلب حاقد منتشي مَسَرة، من انسان غاضب جالس بجانبي، يكمل سعادته بجملة كانت السبب بأنهاء هذهِ المهزلة برأيه..

-فادي: احياناً الصبر فعلاً مفتاح الفرج، انتهت الرحلة وربحنا اللعبة بقلب الادوار.. فقد عقله المَلك وانتهت حياة النمر وانصاد المجنون!

-صبا: انصاد المجنون؟ تقصد فاهد؟؟ وينه فاهد؟

-فاهد: ههههه مسجون بالمغرب صبا هم متلبسة بي قضية

-صبا: مستحيل!

-فاهد: يستحيل عمو يستحيل، فاهد قتل يوسف ابن غيث وبصمات بصوته توگد هو متورط بالقضية وانصاد على اساسها هسة هم ياكله فد عشرين ثلاثين سنة يرتاح بيها بالسجن ويريحنا من خباله

-عمو شبيك انتَ شبيييك!!

-فادي: مصدومة عمو صباوي؟ حقچ انتِ ما تعرفين ذولة الچلاب شسووا بينا بچوني دممم على حبيبة گلبي وام طفلتي الوحيدة!

-مسرة وين عمو؟؟

-گتلچ مسافرة

-مستحيل مسرة تعوف حبيبها وتشهد ضده! مسرة حاامل من شُهيب!!

-مات

-منو؟

-الطفل الي ببطن مسرة مات

-لا عفية

-اجهضت يجوز من القهر مادري بس المهم خلصنا من نطفة نگسة وما تلوث رحمها

-مسرة أجهضت الطفل واني مادري

نزلت دمعتي حارة چوت گلبي قبل خدي، مسحها عمو فادي بأبهامه وابتسملي يهمس بقهر وحرگة..

-لا تبچين مسرة راح يجي يوم وتعرف الجاي اسوي لمصلحتها، شمسون حرمها من امها واليكتل جعفر يصير ابن عم ثرى، ابن عم ثريتي وحبيبتي وام سروري

-يعني... مسرة وشُهيب گرايب؟؟؟

-اي گرايب، گرايب وجعفر غدرها وطعنها بالظهر.. اخذ اموالها وكلشي تملكه كتلها بروح باردة هي والطفل الي ببطنها، مسرة شهدت موت امها وشافت شمسون بعيونها وهو يحرگ جثتها! وولده شاركوا بهاي الجريمة البشعة! واليوم اخيراً اجه وقت الانتقام.. انتقام صار سنيين وسنييين اشتغل عليه واني متأكد شمسون هسة بجحره محترگ گلبه على نمره وفهده وعلى المَلِك الچان شايل كل شغله ومصايبه....!

يتبع.....

ها يا بعد رجفات ايديه؟

تصير من بعد ذيچ المعزة وياهم عليَّ؟..

شُهيب..

━━━━━━  ━━━━━━

شُهيب 😭😭😭 گلبي گطعني تگطططع دموعي خلصت بطلي المخلص الوفي المفضل الماكوو منه هيچي يصير بيك سودة بوجهك يالبالي 😭😭

حاله وكسرته بهذا اليوم لمستها واني اكتب بس على وصف صبا بدون لا يحتاج يحچي كلمة وحدة! اوف الله يساعدك 😭

مالك يا عيونييي 🥹🥹 كسرته على اخوته شيريد يتحمل گلبك اكثر!!

وفاهد المسودن راح من ايدينا 😩 برأيكم هم اكو سرد لفاهد لو لاععع؟ 🦖🌚

تتذكرون من الاطلس گال لمريم شمسون انتهى هو وولده! هذا قصده بالضبط حالهم وفراقهم وحيرتهم هيچ انتهوا وخسروا كلشيي 😣

الله يعدي البارتات الجاية على خير ونرجع ونگول توقعاتكم شنو يصير؟؟؟ 💀🩷🩷🩷🩷🩷🩷🩷🩷🩷🩷

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

حاربتك

ووقعتُ بك

رفضتك

وانهزمتُ بك

هربت

وعدتُ اليك

قاومتك

وانتهيتُ بك.. ♥️

━━━━━━  ━━━━━━

"مسرة"

گاعدة على نار تسعر جوايه منتظره رجعة ابوية ماعرف ليش طلع من وكت اليوم عكس العادة معقولة اليوم اجاله خبر على شُهيب؟ معقولة اليوم محاكمة شُهيب؟

تمددت على الفراش اللوب صار ايام انزف وميتة خوف على الطفل لا يكون صايرله شي اجتني دكتورة فحصتني هنا بغرفتي الي صار من يوم الحفل اني محبوسة بيها وگالت مهددة بالاسقاط لازم ارتاح قدر المستطاع..

بقيت هنا ماعرف لكم ساعة الى ان حسيت على صوت فتح قفل باب غرفتي، فزيت گاعدة على حيلي شفت ابوية يدخل والابتسامة من الاذن للاذن..

-فادي: شلونها بنيتي

-مسرة: بأتعس حالاتها!

-فادي: راح ترتاحين حبيبتي بابا وتخلصين

-اخلص من شنو؟؟

-قضينا على ولد شمسون اخيراً راح ننام ليلنا مرتاحين

-شُهيب تحاكم؟

همستها بصوت قطع اوصالي ياله طلع من فمي، ضحك وهز راسه اي وگال بفرحة وهو يطلع من غرفتي..

-انحكم عشرين سنة

من قوة كلماته وقوة رگعته للباب وقفلها عليَّ اخذتلي دقيقة استوعب.. دقيقة استوعب هالخبر، دقيقة استوعب هالطرگاعة الوگعت على راسي، دقيقة استوعب الدم الگام ينزل من گلبي وروحي، دقيقة استوعب اليوم محاكمة شُهيب واني مو يمه! اني تركته بأصعب لحظات حياته! اني تركته ينحكم عشرين سنة ظلم!!!

ركضت لباب الغرفة ارگعها بيدي واعيط مفرفحة اضربها بكل قوتي واحاول اكسر يدة الباب، اصيح على ابوية ومارلي وعلى شكو نذل عايش بهذا البيت وحابسني وحارمني من شوفته..

-افتحووووو البااااااااااااااب الله ياااااخذكم فتحوووووهااااااااا افتحلييييي الباااااب

بچيت بچي مخابيل گلبي انشلع من صدري وجع مو طبيعي احس بي اتعارك ويه الباب واضرب بيها ركضت من الشباك اريد اشمر روحي منه ممهتمة للاشواك بالحديقة وتوقفت من انفتح باب غرفتي يطل منه ابوية..

-مسرررة وين رايحة تردين تموتييين!!

-امووووت اي امووووووت ولك انتَ كتلتنييي دمرتنييييي ظلممم والله ظللللم

رحت اتعارك ويه ابوية وادفع بي حتى يسويلي طريق واطلع ما خلاني وسد الباب علينا وقفلها ملخت روحي بالصياح والبواچي واضرب كلشي يصير بوجهي شالني شيول ونزلني على الچرباية يقيد حركتي ويحضنني من وره..

-انحكم مسرة ما تفيد روحتچ بشي

-لااااااااااااااا ما اقببببل لااااااااااااا هدنييييي ولكممم راح امووووووت اااااااااااخ يا وجعع رووووحي

-مسررررررررة گعدي رااااحة لا تتخبليييين سويت هالشي لمصلحتتتچ

-هدنننني يا ظاااالم هدنننني يا نذذذذذذل حرمتنيييي من شكووو شي حلووو بحياتيييي وتصيح لمصلحتيييي

-ولچ ثبتيييي لا تأذين نففففسچ!!!!

روحي طلعت النفس اختفى عندي اشهگ واتملص من ايده والوجع ببطني وگلبي يزيد، ابوية حاصرني بين ايده يمنعني من أي حركة حاضنني ويحچي ويايه عباله راح اهدأ هو ميدري خبلني بالزايد..

-راح ترجعلچ ميس وترتاحين بحياتج بابا شمسون وولده شياطين دخولهم لحياتج يعني دمار لكلشي حلو بنيتي عوفي خلي يولي وارتاحي بعيد عنه

-ماكو غيرررك دمااار لحياتتتييي اخذذذذت مني ميييس اخذت مراهقتييي وشبااابي تهمتوني زوور وخبلتووونييي ومن شفت حياتي بدت تحلللى وتزهى بوجود شُهيب اخذذذته منييي وحرمتني منننه مووووتني وخليني ارتااااااح

-مسرة بابا وضعج مو زين ارتاحي

غصبني غصب ينومني على الفراش حاربته بكل ما عندي من قوة ما گدرلي طلع وصلة من جيبه وحطها على خشمي وما وخرها الا تنفست وخدرني للمرة الثانية..

**

"صبا"

اجاني اتصال من عمو فادي تركت مروان واخوانه المنهارين وركضت لبيت مسرة، گلي مسرة رجعت من السفر ووضعها مو زين وتحتاج احد يكون وياهة.. فتحلي قفل باب غرفتها استغربت ليش بابها مقفول؟ بس ما اهتميت وطبيت وياهة جوه بس هالمرة الباب انقفلت علينا ثنينا!

-مسررة.. مسررة انتِ زينة؟؟

ركضت عليها اشوفها نايمة بس مو نومة طبيعية نايمة على طرف السرير وبأي حركة راح توگع، حركت جسمها اهزها حتى تصحى اخيراً فتحت عيونها مبحلقتهن وصفنت بالسگف..

-صبا: مسرة شلون هيج تسوين شلوون

-مسرة: صبا

-صبا: تشهدين ضد حبيب گلبچ مسرة!!

-شنو؟

بديت احچيلها كلشي من بداية المحاكمة لآخر نفس، حچيتلها كل تفصيلة كل نظرة خذلان من عيونه كل بلعة ريگ وغصة عاشها من ذكروا اسمها گدامه! فقدت عقلها منهارة صارت تعيط وتبچي بصوت عالي وتصيح..

-حراااام والله حراااام الله ياااخذني واخللللص

-صبا: مسرة اهدي والله عرفت انتِ ما رافعة القضية اني اسفة لان عاتبتچ بس من حرگة گلبي طلعت مني اسففة

-اه بطني

-مسررة

-بطنني صباا

گوة تحچي وتتنفس لحدما عصرت عيونها وصرخت متألمة شلون الي دتطلگ وما اشوف غير الدم غزاها، فلتت من ايدي وركضت للحمام تبچي مهضومة وتصيح متألمة، دگيت باب الحمام اريدها تفتحلي ما قبلت بس تبچي ما سكتت عن البكاء..

-مسررة فدوة فتحي البااب لخاااطري فتحيهااا

-رااااح امووت ااااااااه

-فتحي الباااب نروح مستشفى فتحييي

-ابني صبا ابني راااااااااح

شهگت مصدومة معناها مسرة ما سقطت الطفل بوقت محاكمة شُهيب وابوها چذب عليَّ! دگيت الباب اصيح وارزل بيها لحدما فتحتها اشوف حالها يبچي الصخر واگعة بالگاع مايعة روحها والدم محاوطها وتبچي بحرگة گلب..

ركضت جوه اصيح ابوها لفها بالبرنص مال الحمام وشالها ناخذها للمستشفى، اغمى عليها الطريق كله من كمية الدم القفدتها، دخلناهة دكتورة وللاسف گالت الطفل واگع والله يعوضها..

خسارات وحدة تتلو الأخرى، ما تهنت بالطفل ولا تنهت بأبوه الطفل وفقدتهم بيوم واحد، ماعرف شلون اواسيها واخفف عنها ماعرف شنو بيدي اسوي، كلامها كسر گلبي من گالت..

-اني ما خسرت بس الطفل خسرت شُهيب وكلشي يربطني بي

وفعلاً كلامها صحيح، بوگعة هالطفل طفه شكو امل عدها شكو لحظة سعادة چانت مقررة تعيشها وياه وويه ابوه وميس مسرة كرهت روحها وطفت شمعتها بهالدنيا..

بچت لحدما طلعت عيونها، تنام تگعد تبچي اسبوع هي بهذا الحال واني وياهة ما عفتها دقيقة، باليوم العاشر انفرض حظر على الكل محد يطلع من بيته بس ما اهتمت گامت من الصبح بدلت ورادت تطلع للمحكمة تثبت برائته وترفع دعوة اعادة حكم وان كلشي انحچى عن لسانها كذب وتلفيق بس عمو فادي لزمها وهددها وگال بالضبط..

-اذا رحتي يا مسرة وكسرتي كلامي وربچ وروحهاا لامج مو عشرين سنة اخلي ينحكم والله اخلي يروح اعداام!!

-مسرة: انتَ انساان لئييم حاقدد استغليت بنتتك لخاطر مصلحتكك فهمني شلوون اخذت وكالتيي شلون المحامي حچى بأسمي! شلون القاضي صدگه!!

-كلشي بفلوسه حبيبتي بابا اشتريت قضية ابن شمسون بفلوس الدنيا ومستعد ابيع بيتي وكلشي املكه في سبيل اشوفه نايم بالسجون ويخيس هناك!

-وهمتني بكلشيي بالبداية چانت قضية ديون وبس! گلت سهلة اطلعه منها حتى الاربع اشهر سجن ما اخلي يبقى اكفله بأسمي ونفسي وكلشي املكه واطلعه! بس انتَ لعبتها عليَّ ولفقت عليه تهمة علساس كاتل الرجل الوهمي الي تداين منه؟؟ بابا انتَ نهيييييت مستقبله!! نهيت حيااااته سلبتتت كلل حلممم بناااه كللل تعب ونجاح حققه شُهيب انتهى!!!

-وهو المطلوب فـ يا مسرة تكرمي عليه وستري على هالكم سنة الراح يعيشها من يطلع وره العشرين سنة ولا تخلي يروح بيها مؤبد لو اعدام

-حسبي الله ونعم الوكيل انتَ دمرتني قبله شلعتت گلبي من صدررري حرگت احلى سنين عمري وحرگت الرجال الاحبه!!

-لا تثيريني زايد ما مكتفي وبعده گلبي موجر منهم گعدي راحة احسنلچ! شُهيب وعائلته انسيهم! طلعيهم من گلبج وعقلج! انتِ مسرة قيثارة لا تنسين روحج منو!!

-نعاال على لقبنااا الخااايس

-فادي: بنتييي شمسون اوهمنا وضحك علينا! جعفر وعدني يحمي امچ! يحمي بنت عمه! طلع كلشيي چذذب راسم على فلوسها وثروتها! سجلت قسم من املاكها بأسمه عود يديرهن الها واكلهن عليها! كبرتي جوه عيوننا وعشت احلى سنين عمري وياكم بس من جعفر عرف امج حامل بولد خاف! خاف لا يورثها وياخذ اموالها ويرجعهم وكتلها هي والطفل كدام عيونج! شلون تنامين ليلچ وكتال امج يفتر بالشوارع وولده يشمون الهوا!!

دفعته معترضة بس ماكو بيدها شي نعرفه ابوها من يحقد لو الف سنة تمر هم يسوي الي براسه وما اكتفى بتهديد مسرة اندار الي اني هم وگال اذا احد افتهم مو مسرة الي اشتكت يدمر شُهيب..

حقدت عليه من كل گلبي وحقدت اكثر من شفت وضع بنته المأساوي، وگعت وگعه بس الله اليدري بيها لا اكل ولا شرب بس نايمة بالفراش متقبل تگوم ولا تتحرك هاي البنية الي الكل يگول عنها شعلة النار معقولة هيچ تنطفي ويغيب اثرها؟

سحبت نفسها من الشركة متقبل تداوم اجو طاقم ابوها يمشون الشركة هالايام وره ما نشوان ومروان وفاضل انسحبوا احتراماً لاخوهم.. بقيت مخبوصة اشتغل من البيت وامشي الشغل ويه جولي..

مرت الشهر والشهرين والثلاثة، اتردد لبيت مسرة من حين لاخر اللگاها نفس الگعدة نايمة على فراشها وفاتحة البلازما الي بغرفتها على صورها هي وشُهيب وفيديواتهم يخلصن وتكررهن يخلصن وتعيدهن الى ان تنام..

اگلب بالصور من تنام واشوف نشاطهم وحيويتهم وحبهم لبعض، لاحظت صديقتي مهووسة بهذا الرجال وتحبه بشكل غريب.. مصورته وهو نايم وهو گاعد وهو يشتغل وهو ياكل وهو يشرب وهو يضحك وهو ضايج وهو متنرفز وحتى وهو يبدل! اي شفت فيديو اله لاف منشفة على خصره وديمشط شعره على المراية وهي تصوره وتضحك عليه وتگول..

-شهوبي اوبي اوبييي

-شُهيب: مسرات وخري الكامرا يمعودة لا تفضحينا

-الا انشره واخزيك

-بس هاي العايزة بعد

-ليش ما استاهل تتنازل وتخليني افضحك واشهرك بمواقع التواصل واكتب هذا ثلاثيني جاد للتعارف واحط رقمك؟

-والله خبلة انتِ ما استبعد تسويها

-راح اسويها حتى اثبت كلامك صح عيب اچذب زوجي وحبيبي

-ههههه احبچ

-اوي

-دگولي اني هم لو متطلع من حلگچ؟

-متطلع

-اني اعرف شلون اطلعها..

وانقطع الفيديو، ابتسمت واني اگلب بباقي ذكرياتهم شلون كل هذا ينسي ويروح؟ شلون رجال شهم ومحترم ولطيف وكل الصفات الحلوة بي مثل شُهيب ينسي؟ هالشي مستحيل! والله مستحيل!

اصفن عليها واشوف وضعها رجعت لنفس التعاسة من اخذو منها ميس والحقير اكرم مدا يخليها بحالها من انسجن شُهيب لليوم هو يتشمت بيها، يجي للبيت يجيب ميس بنفسه ويذب سمه هنا ويروح.. بقت تسمع وتسكت لحدما طگت روحها وتعاركت وياه عركة طيحت حظه بيها نزلته اسفل السافلين..

-مسرة: انعل ابووكم لابو الجاابكم طاييحين الحظظ تففووو على غيرررتك يا عااار يابن العاار يا عاشق الزلم والنسواان بيك خيرر اوصللل لربع من شُهيب اوووصل لأصبع رجلله يابو النسوااان

طلع من البيت يتوعدلها رجعتلي تلفح ناار وتضرب برجليها الگاع متخبلة..

-اني اخلي هالعاار يحجي على تاج راسه ويتشمت بي؟؟ الله يااخذني لو بقيت ساكتة!

-صبا: بس مسرة شنو الحل؟

-مسرة: راح احتاج طريقة ثانية احاول اثبت بيها برائته بدون لا يظهر بيها اسمي او احد يعرف بوجودي..

عزلت نفسها من جديد تعيش الحرمان بس هالمرة ما نامت بقت على نفس اكتأبها بس ما خلت واحد ما تواصلت وياه گضتها اتصالات من واحد لواحد ومن محامي لمحامي....

**

"كيان"

طلعت من الامتحان اتنهد كارهة روحي مو انوب اجي امتحن، اجلت كورس كامل بعد حادثة شُهيب مالي نفس اللزم كتاب والسنة كلها اريد اتركها وزادتها كورونا اثرت علينا والحظر لولا اصرار نشوان چان ما داومت هو جبرني اداوم هالكورس..

درت انظاري على كلية ادارة الاعمال واجه ببالي فاهد، فاهد ما رجع حتى يمتحن وضاعت عليه الاطروحة والسنة كلها بس ليش؟ معقولة تنازل عن دراسته بس حتى ميشوفني؟

گعدت على المسطبة افتح الحاسبة اتأكد من اجوبتي، مركزة بكل حواسي وياهة وطفرت مخترعة على صوت ارتطام كتب تنشمر على المسطبة بجانب اللابتوب مالتي..

-بوو

-كيان: اففف هارون كم مرة گتلك بطل هالتصرفات ولك اخاف

-هارون: جعل محد غيرج يخاف

-كيان: وييعع احترم نفسك

-هارون: شلونج بالامتحان؟

-كيان: زفتت!

-هارون: ها يعني تجيچ A- مو؟ (95)

-كيان: اي ممكن وانتَ شلونك بالامتحان گلت ما قاري؟

-صخمت وطلعت بس انجح عادي اصلاً هالكورس خرطي بسبب الحظر

-اممم

-تاكلين شي؟ جوعان اني

-لا لا ماريد ماشتهي اني طااالعة

-شبيچ متحمسة

-هارون شبيك تنسى مو گتلك اليوم يعيدون محاكمة شُهيب!!

-اي بس لا تتأملين زايد كيان لا تنصدمين بعدين

-لا الله لا يگولها يارب يتخفف حكمه

-بعده عندج امل؟ حتى بعد مرور كل هالوقت؟

-اي! هارون شُهيب صارله ست اشهر بالسجن بس والله عبالك ست سنين شلون راح اتحمل عشرين سنة وهو بعيد عني اختنگت راح اموت

-اذا خففوله تنزل للـ 16 او 15 سنة مو اقل

-گول يارب امشي نروح انتَ طالع مو؟

-اي

-تمام وينها لارا؟

-عوفيها معليج بيها امشي

-لا خلص ما اجي اني

-كيان!

-هارون ما اركب وياك وحدنا جيبها حباب

-ولج ماريدها اني مااريدها تجي ويانه

-خلص براحتك

شلت حاسبتي وجنطتي وكتبي ناوية اعوفه وجرني من سير الجنطة يوگفني..

-هارون: فهمت ماشي راح اتصل بيها

هزيت راسي وتمشيت وياه يمشي وينافخ معاجبه الى ان وصلنا لسيارته لگيتها واگفة تنتظر واصلة قبلنا بس شافتني بوزت مزعوجة..

-لارا: عبالي خابرتني حتى نطلع، طلعت جايب كيان وياك؟

-هارون: ما عاجبچ؟ الله وياچ

-لارا: شبيك متتحمل شقه مو قصدي شي

ابتسمتلي بالچذب وتقربت منه تجره من ياخته وتبوسه گدامي بطريقة فاسقة، درت وجهي عنهم اخليهم براحتهم ما انشلعت الا هو وخرها منه..

-لارا: حبيبي مشتاقة وينك متجاوب اتصالاتي

-هارون: عندي امتحان، يلا ركبن السيارة

صعدنا هي گدام واني وره، علگت اغاني اجنبية طرب وتضحك للهوا، لارا حبيبة هارون هيچ بنية كلها طاقة وحيوية بحياتي ما شايفة اوقات احسد هارون عليها وما اللومه لان مصاحبها جامعة كلشي جمال وعائلة وفلوس وروح مرحة بس ماعرف ليش هو ثگيل وياهة وبااارد قالب ثلج هي مگطعة روحها عليه وهو يشلع الگلب، اكثر من مرة انفصلوا وهي ترجع لانها تحبه بجنون ومتگدر تعوفه..

-لارا: اووووه شنو هالجو الحلوو هارون خلينا نطلع اليوم پلييز

-هارون: لا

-لارا: حباب نطلع نتعشا

-هارون: لا

-زين نروح للسينما نتابع فلم سوه؟

-لا

-هاله: تجيني للبيت؟

همستها بخفوت ودلع وتلمست ايده، نزل عيونه لأيدها ورفعهن الي للمراية سويت روحي ما منتبهة وياهم بس دا اشوف واللاحظ صقيعه وياهة..

-هارون: ماعندي وقت

-لارا: صارلك هواي ما جايني دا انزعج من الموضوع

-هارون: شغل

-لارا: انتَ مزاعلني؟

-لا

-لعد ليش احسك ضايج؟

-تشربون شي قبل لا نروح؟ كيان؟

وجهلي السؤال يباوعلي من المراية، اندارتلي لارا وجهها راح ينفجر سكتت احترم وجودها اخليها تجاوب قبلي بسرعة حچت..

-لارا: اريد آيس لاتيه

-هارون: وانتِ كيان؟

-كيان: ما اشرب شي اني

طبگ گدام كافيه ونزل يجيبلها طلبها، درت وجهي للجامة اراقب البره ومادري بـ لارا عينها ويايه..

-لارا: ما راح يطير تره!

-كيان: نعم؟

-لارا: خلص اسفة

ما جاوبتها ولهيت روحي بالتلفون اگلب بي، رفعت راسي من حسيتها بعدها تباوعلي قبل لا اتنفس گالت..

-كيان اني ماعندي مشكلة وياچ صدگيني بس هارون يتغير مية وثمانين درجة بوجودج

-كيان: اني شعليه؟

-ماعرف! المشكلة ماعرف شنو السبب ويايه غير واحد صح هم بارد هو هذا طبعه واعرف بس من تكونين موجودة يتحول لقالب ثلج واحسه ما طايقني!

صفنت بوجهها استوعب هارون بارد؟؟ هارون هارون؟ نفسه هارون الاعرفه المخبل الي نسخة من فاهد بارد؟ هاي صدگ متعرفه لدرجة تشوفه انسان بارد وعبالها طبعه هيچ، استخطيتها وانقهرت عليها وعذرت حرگة گلبها..

-كيان: اعتذر اذا دا اسببلكم ازعاج بس ماكو احد ياخذني للمحكمة غيره، اخر مرة رحت ويه اخواني بس هسة ميگدرون وماكو تكسي يقبل ياخذني من الجامعة للمحكمة لان بعيدة

-لارا: تمام مو مشكلة بس كيان حبابة ابتعدي عن حبيبي

-مو يمه اني

-بس هو يمچ!

-ا...

-اني وهارون مرتبطين صار اربع سنوات علاقتنا جدية يجي لبيتي واروح لبيته وعلاقتنا متكاملة ماكو أي مشاكل بيناتنا

-الله يديمكم

-اموت عليه ومتعلقة بي ماتخيل حياتي بدونه دا انتظره يتقدملي احس هالفترة راح يخطب كلش حاسة بهالشي انتِ شنو رأيج؟ اكيد حاچيلج عني مو صح؟

-احم.. مادري يعني اني وياه مو قريبين على بعض

-بس تدرسون بنفس القسم اكيد جايبني بالطاري

-اي صح صح مرة حچالي عنج

-صدگ؟؟؟ شنو گال؟؟

حچتها بفرحة وابتسامة واسعة الدنيا مسايعتها انقهرت عليها وحرت شنو اگول، هارون ما ذكرلي لارا نهائياً بس گال هو مرتبط ببنية عراقية ما حچالي شي ثاني..

-گال عنچ عراقية

-اي؟

-اي و.. هاي

-شنو هاي؟

-هارون: لارا ماكو ايس لاتيه جبتلج موكا

تنهدت مرتاحة من دخل هارون السيارة وقطع حديثنا، ضحكت لارا فرحانة واخذته منه باسته على خده وگالت بصوت مغروم..

-حبيبي اليعرف شنو احب

-هارون: اگلج اني مسافر باجر عندي شغل

-لارا: شوكت ترجع؟ راح تكون موجود بحفلة عيد ميلادي مو صح؟؟

-هارون: مادري اشوف

-لارا: مستحيل هارون!! شنو هاي شبيك حتى عيد ميلادي متريد تجي!!

-هارون: اجي شبيچ

-لارا: خو من البداية گول راح تجي ليش تزعلني

گلب عيونه عليها ضحكت مرة ثانية وشربت مشروبها وكل شوية تشربه وياهة لو تبوسه لو تمد جسمها تنام على كتفه لو تبوسه من رگبته لو تتلمس صدره لو... اي كلش حميمية هالبنية وتموت على التلامس..

-لارا: وين شو بركت هنا

-هارون: عندي شغل هنا دقايق وراجعلكم

وهم وجه الحديث الي وعافها بدون جواب، تأذيت نيابة عنها وحسيت بكسرتها بس ما علقت، لهت روحها تفتح بالچكمچة مال سيارته وبالصندوك تلعب وتشوف اغراضه شنو بيهن، ضحكت بصوت عالي من طلعت شي من الصندوگ، صرت حمرة من شفته ودرت وجهي فوراً..

-لارا: هو ارعن شوية وميهتم

-كيان: اممم

-لارا: تدرين اوقات اتخيل يوم زواجنا من هسة اختاريت بدلة البيضة وعينتها لازم تحضرين العرس ماشي؟

-كيان: ان شاء الله

-لارا: امي تموت على هارون اوقات حتى يبات عدنا تخيلي ههههههه

ضحكت على الواهس مو على حب امها لهارون وانما للفالتو الي عايشاته رجال غريب ينام يم بتها وعدها عادي؟ لا انوب لارا تبات عنده وعلاقتهم متكاملة وكأنهم متزوجين؟ اجو ببالي اخواني من چنت متزوجة فاهد ويشوفون سوالفه ويايه بس مداهر مو شي ثاني والله لو بيدهم يثردون بدمه..

-لارا: مستحيل

شخصت عيونها وانقطعت انفاسها، بلعت ريگ ورفعت انظارها الي مال حاضر عيونها انترست دموع وغطت حلگها خفت وتوترت من حركاتها شنو شافت يا ترى وهيچ انصدمت؟؟

-كيان: شبيچ؟

-لارا: شوفي شوووفي

طلعت علبة مقدفة صغيرة من صندوق الوسط وحطته بيدي، ما فهمت شنو تقصد تسائلت بنظراتي وجاوبتني بكلمات فوراً..

-احسهاا هي فتحي حبابة فتحي ماعندي قووة

-شنو هي؟

-فتتتحي

فتحته بسرعة وما اسمع غير شهگتها العالية وانفجرت بچي، بچت بچي انگلب وجهها الابيض احمر وعيونها العسلي صارن دم وهي تشوف خاتم خطبة بالعلبة، تطفر بمكانها ما ثبتت تضحك وتبچي وتحرك ايدها بعشوائية، ابتسمت على فرحتها وردة فعلها وضحكت من گالت..

-ولج ولج راح يخطبنيي يريد يخطبنييي يحبني كياان هارون يحبنيي

-طبعاً يحبج اذا صارلكم اربع سنوات

-اموت عليه اعشقه عشقق مخبلة بي مخبببلة الحمدلله ياربب

-رجعي الحلقة قبل لا يجي ويعرفج شفتيها

-اي اي

-مسحي دموعج بسرعة اجه يلاا

-اي اي مسحت ياربي ما مصدگة

غيرت مزاجي بالكامل هالخبلة، رجع هارون ومن حماسها لزمته ورگعته ببوسة وجهي اشتعل ولزگته بالجامة وهو ظل صافن عليها..

-هارون: شسالفة

-لارا: احببببببك

اندار يباوعلي وانوب رجعلها، رفع ايده لراسه وسوالها حركة بيده "عود انتِ مخبلة؟" ضحكت وحضنت زنده وهم رجعت تبوسه مناك فطست ضحك عليها..

-هارون: تخبلت البنية

-لارا: مخبلة بيك

-هارون: بعدين لارا

بقت تضحك ممهتمة ودارت وجهها للجامة تباوع منها، انتبهت وركزت بملابسي مو لائق اروح بيهن لمحكمة احسني مبهذلة..

-كيان: هارون تكدر ترجعني للبيت

-هارون: والمحكمة؟

-اي اروح بس اريد ابدل وانتو هم اخذو راحتكم

هز راسه ودار السيارة لطريق البيت، سفط بباب بيتنا نزلت وهو نزل واشر لـ لارا هم تجي تفاجأت من نزولهم بس استحيت اگلهم لا تدخلون طبيت وفوراً صعدت لغرفتي فوگ ابدل، لبست شي مناسب واتصلت بـ نشوان..

-شوشو وينك؟

-نشوان: بالشغل اني كيان لا تجين للمحكمة

-ليش؟؟؟

-لا تجين وحدج لا تتخربطين مثل اخر مرة واني ماكدر اجيچ راح ابقى على تواصل وياچ

-لا راح اجي ويه صديقتي لتخاف

-منو صديقتج؟

-ها؟.. لارا اسمها لارا

-منو لارا؟

-تدرس قانون ويايه بالجامعة يلا دتنتظرني جوه احنه جايين

-تمام اني هم شوية واطلع

سديت التلفون ومشطت شعري وتعطرت من جديد وشلت جنطتي حتى انزل واجاني اشعار من جنات كاتبتلي..

"ططوة وينج"

ابتسمت من شفت رسالتها ورجعت التلفون بالجنطة وتمشيت الممر نزولاً للدرج وجفلت من شفت لارا لازگة بهارون! لازگة بي لزززگ بطريقة حميمية وديسولفون وهي بغير عالم ولا كأنها ببيت ناس غربة..

-لارا: تحبني حبيبي؟

-هارون: ممم

-لارا: شگد تحبني؟

-هارون: مو هسة نحچي لارا عيب لا تنزل البنية

-عادي اصلاً هي تعرف احنه حبيبين وتعرف علاقتنا

-اي بس هذا بيتها ما يصير عيب

-هارونييي صرت تدور عيب هسة ماعرفتك ههههههههه

لفت ايدها على رقبته وتتسوفل وياه حسيت وجودي غلط ومكاني غلط واني كلني غلط، استحيت انزل هيچ بسرعة واچفت عليهم وظليت لازگة فوگ..

تعبت من الوگفة وهمه ما تعبوا! طلعت تلفوني وقررت اتصل بي ابلغه يروح، دگيت عليه وعيوني وياهم وخرها عنه بسرعة وفز يوگف بمكانه ما رضت وجرته ودفع ايدها على كيف..

-هاي شبيييك

-دقيقة لارا تلفوني يدگ

-واذا؟؟ احنه مو متفقين منجاوب تلفوناتنا من نكون سوه؟

-مهم هذا مهم

ما اهتم لتذمرها وجاوبني بسرعة يعدل بياخة قميصه..

-كيان بهمس: هارون تگدر تروح اني راح اتأخر شوية

-هارون: انتظر

-كيان: لا اتأخر هواي

-مو مشكلة انتظر هواي

-اخواني جايين حتى يوصلوني اخذ راحتك

سديت الاتصال منه فوراً ومديت عيوني اشوفهم، زفر نفس متنرفز كللش وحط تلفونه بجيبه، اندار لـ لارا واشرلها تگوم..

-هارون: امشي نروح

-لارا بفرح: اخييييراً ههههههه

راحت تركض قبله متحمسة وسعيدة بس هو وجهه ميگصه السيف، طلعوا من الصالة ومن البيت كله تنهدت مرتاحة ونزلت اگعد بالصالة شوية علما يطلعون من شارعنا، دقايق وگمت اطلع فتحت باب البيت وقفلتها وراية، تمشيت خطوتين وصرخت مرعوبة من شفت هارون يطلع بوجهي فجأة!

-كيان: راااح امووووووت

-هارون: وين اخوانج؟

-كيان: گلبي وگففف

-هارون: مو لهدرجة

-والله شبيك طلعت من العدم

-ماشوف لا نشوان ولا مروان وياچ

-اي شسمه هاي اني طالعتلهم هنا

-وين هنا؟

-هنا هنا

اشرت ليگدام وطلعت بسرعة اوگف اسوي روحي انتظرهم، اجه يوگف بصفي بمسافة متر وكتف ايده لصدره..

-انتظرهم وياچ

-گتلك يتأخرون

-عادي

-لارا وين؟

-راحت

-ليش؟

-عجبها

سكتنا ثنينا نوگف ننتظر اللا شيء استمر انتظرانا للا شيء فوگ العشر دقايق والصمت كان سيد الموقف محد بينا حچى وكسره الا من تعدت من يمنا بزونة بيت مدللة وتمسحت برجلين هارون ابتسمت واني اراقبها واراقب حركاتها اله تتنعوص عليه ماعرف شعجبها برجال عملاق مفتول بالعضلات ومتروس وشوم..

-كيان: لارا تجنن

ماعرف ليش علقت هيج وليش فتحت موضوع يمكن البزونة ذكرتني بيها وذكرتني بحركاتها او حتى اكسر حاجز الغرابة الي انولد بيناتنا، رفع نظراته من البزونة الي بين رجليه ووجهم الي وگال بجمود..

-هارون: انتِ عندج مشكلة شخصية ويايه؟

-كيان: وياك؟ لا

-ليش تفتحين مواضيع تافهة؟

-لارا صارت مواضيع تافهة؟ هي مو حبيبتك صارلها اربع سنوات؟

-عوفچ منها

-شبيك وياهة؟

-انتِ شبيچ وياي؟!!!

-هارون شبيك

-تچذبين! تتهربين!! تسوين أي شي حتى ما نلتقي وما نبقى سوه ليش؟؟!!

-لا تصيح

-جاوبيني وما اصيح!!

-هارون لا تلتهي ويايه ما افيدك بشي اني

-تفيديني بشنو مثلاً؟؟

-ما اقدملك شي بحياتك لا تضيع بنية تحبك ومهووسة بيك على شي مابي فائدة

-احچي بوضوح!!

-لارا! اقصد لارا البنية تحبك بس الاعمى ما راح يلاحظ شلون تباوعلك وتننظر الكلمة تطلع من حلگك لا تزعلها وتكسر گلبها

-ما جاي افتهم لارا شنو طببها بالنص؟؟ هي حچت وياچ؟؟ ضوجتج بشي مو؟؟

-لا اكيد لا ليش تضوجني اصلاً بس البنية بريئة وعفوية و..

-ولج عوفيهاا لا تحجين بيها شجابها بالنص هسة!!

-اذا منحجي بـ لارا بيمن تريدنا نحجي؟؟

-بيچ

-شنسوي نحجي بيه؟؟

-مادري احجي أي شي

-مثل؟؟

-شسويتي هالايام شلونها امتحاناتج طلعاتج طباتج صديقاتج

-نمت كعدت بجيت بجيت بجيت بجيت لطمت رجعت نمت كعدت بجيت بجيت بجيت درست نمت كعدت بجيت تعاركت نمت كعدت...

-هههههههههههههههههههه خرب عقلج

-والله شنو اكو بحياتي غير هالروتين الزبالة؟

-انتِ مزبلة حياتج مادري على شنو

-تره اخوية مسجون ظلم! حياتنا تدمرت تشتتنا! اخواني ما اشوفهم من وره شغلهم الجديد! مرة اخوية الي يعشقق التراب التمشي عليه اختفت من حياتنا فجأة! صديقتي الحقيقية الوحيدة سافرت ومن يومها دا اعيش الوحدة بدونها!

-وفاهد كسر گلبچ

ضحكت بقهر ومسحت عيوني الي دمعت فور سماعي لأسمه، انطيت هارون ظهري ما اخلي يشوف دموعي والحسرة الشگت گلبي، بينما هو اردف..

-اني اعرف حياتج شگد صعبة هالفترة

-ما دامك تعرف عوفني

-ما اعوفچ

-شتريد مني؟؟ شنو راح تحصله اذا تبقى ويايه وتتقرب؟!

-ما احصل شي المهم ابقى متطمن وانتِ گدام عيني

-بشنو اخصك اني؟

-تخصيني لانچ حبيبة فاهد

-ههههههههههههه ياربي شوف شيگول حبيبة فاهد

-يهتم بيج وباله وياچ انتِ مهمة بالنسبة اله معناها مهمة بالنسبة الي

-باله ويايه گتلي؟ هارون انتَ تضحك عليَّ لو شنو؟ شايفني زعطوطة ومراهقة؟؟ فاهد من يوم طلاقنا لهذا يومي ما ضوّه تلفوني بأسمه! لا رسالة ولا اتصال والله خوش مهتم بيه وباله يمي!

سكت وتغيرت ملامحه مرتبك، عگدت حاجبي اتسائل ليش وضعه تخربط بس ما انطاني مجال افكر زايد وجاوبني..

-ما تعرفين ظروف البشر لا تحكمين عليه

-ما اتوقع اكو شي بهاي الدنيا يمنعه يتصل، حتى لو ما اجاوبه على الاقل يترجم كلامك وانتَ تگول هو يهتملي ويحبني! بس كلامك فاارغ ومابي فائدة لا تتعب نفسك وتدافع لابن عمك الفاشل!

تركته واگف وطلعت گبل اخذت تكسي وبوجهي للمحكمة دخلت وروحي تلوب والهوا يحرگ بلعومي بطريقي صارو مروان وصبا هستوهم داخلين بس مروان ميتحچى..

-كيان: شصاير

-مروان: تأجلت محاكمته!!

-كيان: لاااااا ليش هيچ ليييش والله راح امووت

-صبا: صار ست اشهر يومية يأجلون مو حالة هاي!!

-كيان: رااح يموت والله راح يموت بالسجن

-صبا: مرتين صار بي كورونا الا يموت ياله يرتاحون؟؟ شنو ماكو رحمة!! ماكو مرّوة!!

-مروان: عندي امل بجماعة شُهيب جاي يشتغلون على موضوعه واساساً همه السبب راح تنعاد المحاكمة

-كيان: منو بالضبط تدخل؟

-مروان: ماعرف من مجهول امشوا هسة نرجع

طلعنا من المحكمة وزفينا الخبر لنشوان تخبل ما خله واحد ما سبه وفشر عليه، رجعنا للبيت كلنا مكسورين الگلب ومأيسين من وضعيته صار ستة اشهر كلشي ما تغير غير نفذت طاقتنا..

صعدت لغرفتي وتذكرت رسالة جنات اتصلت بيها فوراً كامرا صارلي هوايه ما شايفتها، فتحت الاتصال وضحكت من شفت بيدها كوب حليب موز وتاكل مكسرات وياه..

-جنات: هلو ططوة

-كيان: هلو ام لسان شلونچ

-جنات: زينة وانتِ؟ شو وجهج يتلاطم

-كيان: چنت بالمحكمة

-جنات: اي؟؟؟

-ما صار شي ولا تغير شي

-الله ياخذهم والزهرة ام الحثن الا اروح للكاظم وادعي عليهم اني اعلمهم ذولة الفگور

-اي حبابة كلنا امل بدعواتج

-معليج خليها عليَّ اشگ زيجي عليهم

-ههههههه والله ضحكتيني ومالي نفس اضحك

-ضحكي خية الدنيا متثوه شُهيب قوي وگدها والله يطلع حوبة المظلوم ميبقي بهالحال

-اوف جنات شوكت مو والله طلعت روحي

-هانت حبيبتي هانت

ابتسمت من وگفت تگوم من مكانها لابسة بدي ابو الصرة وبارزة بطنها طالعة منه، حطيت ايدي جوه حنجي وسألت بحماس..

-انتِ شلونچ؟ العنون شلونه؟

-زين ابن الططوة

-ههههههه حقيرة ما اسمحلج تحجين عليه

-هالطولة ومطيح حظي كيان اذا تزوجتي مرة ثانية ما انصحج تحملين ابد اتعث شي بالحياة هو الحمل

-ولج لا تحجين على النعمة هييج

-اي اثتغفر الله صح بث تعبانة شوكت اجيب طگت روحي

-بعدج متعرفين جنس الطفل؟

-اي اريدها مفاجأة

-اممم، وصحته شلونها؟ شگالت الدكتورة؟

-زين ووضعه ممتاز الحمدلله ربچ لطف بحالنا وطلع تشخيص الدكتورة غلط من گالت عنه مشوه

-الحمدلله، ماعندج اخبار عن مالك؟

-لا تجيبلي طاري هالرجال كيان!

-جنات حبابة

-كيان والله العظيم اذا حچيتيلي عنه اطبگ التلفون بوجهج خليني مرتاحة بعيد عنه

-وبعيد عني هم من رحتي للعراق لليوم اني مو زينة بدونج جناوي حتى صديقاتي عفتهن

-گتلج صادقي رزان بث انتِ فگر وميعجبج العجب

-ولج اذا اصادق رزان اگضيها بالنعل، بس شوفي هاي حبيبة هارون حبابة لارا صح تچفص هواي وعبالها احب حبيبها بس ميخالف شسوي جفاف الصداقي صاعد عندي

-اي اعرفها لارا مرة شفتها بث خطية تحثيها مخبلة بي وهو بارد مو بله؟

-يااا انتِ هم تعرفيها؟؟

-اي ولج تدرث قانون على مرتين اللتقيت بيها

-اعرف تدرس قانون بس ما عبالي شايفتها وتعرفيها

-هي اجت تتعرف عليَّ من عرفتني اصير بنت عمه تخيلي اجت تگلي انتِ كلش حلوة الله عليج لا تتقربين من هارون

-ههههههههه ولج خطية والله تقهر

-لو تعرف من هثة حاجزين هدى بنت عمي لهارون شيصير بيها يمكن تموت المثكينة

-لاااا صدگ تحجين جنات؟؟

-والله عمي ابو هدى گال يريد هارون الها بث هدى معاندة وداگة رجل الا تتزوج غريب وگالو هارون هم ميريد گرايب ومحد يكدر يتحكم بي لان امه وابوه ثنينهم ميتين ومحد عنده كلمة عليه غير عمو جعفر وجعيفر مختفي يعني هيج باقي تايه

-يارب يخطب لارا كللش لايكين لبعض، هسة عوفج منهم لا تتهربين من موضوع مالك جنات تره انتِ حامل بطفله معقولة راح تحرمين طفلج من ابوه؟؟

-هو مو ميريده؟؟ خلص لا يريده اني اربي الطفل وحدي ولد لو بنية والله لا يعوزنا اله!

-جناوي فكري عدل تره الطفل يقيّد وتربيته صعبة يحتاج اب وام يتعاونون عليه

-كيان هو ميريد ابنه!!

-بس يريدچ

-يريدني شنو؟ شيحصل مني بعدين غير الاطفال؟!

-جنات ما انسى لهفته عليج وخباله من عرف اخذچ ابوچ منه للابد لچ گام يرگع راسه بالحايط حاير ميعرف يدور عليج لو يروح لـ شُهيب.. مالك انگلب مية وثمانين درجة صار مثل التايه يدور ظلچ لحدما لگاچ محبوسة بذاك البيت وره يومين ومحضرين نفسكم تردون ترجعون للعراق

-واني ما انسى شنو صار بيناتنا ماكدر كلما احط راسي على المخدة اتذكره واكره روحي.. اتذكر من چنت نايمة اون من الوجع واللوب من الم بطني وانزف وفجأة ما اشوف غير باب غرفتي يطير ويدخل مالك دافر الباب برجله وكاسر القفل ويطب عليَّ مثل الاسد الهايج..

صفنت بوجهه ما مستوعبة حسيتني دا احلم بس لهفته وخوفه ونطقه لاسمي رجعني للواقع، حضنني وغصت بحضنه ابچي مفرفحة روحي وايدي على بطني.. يبوسني ويحضني ويحمد الله على وجودي ولانه لگاني..

-مالك: يومين ما ضايگ طعم النوم جنة يووومين

-جنات ببكاء: عبالي عفتني

-اعوفچ شنو؟؟ عيني ما تغفى مااكدر كل عقلي يمج روحي طلعت علما لگيتج شمسوين بيج والله الا اشرررب من دمهمم ولد الكلببب

-اذوني هواي بث مو مهم.. مالك عندي خبر حلووو

بعدني عنه يمسح على جروح وجهي وملامحه ممتعضة بألم ذب حسرة وباس جبيني يتنهد بتعب ما سألني على الخبر الحلو ماعنده حيل يريد يبقى حاضنني ويتحسس وجودي بدون لا يقاطعه شي بس ماتحملت ابقى ساكتة، دفعته عني بخفة وگلت بأبتسامة وايدي على بطني..

-ملوك اني حامل

غابت ابتسامته وسقطت ملامحه المبتهجة، ذبلت عيونه وفصل عقله عني يستوعب كلماتي ضحكت على ردة فعله وهزيت راسي بـ "اي" اأكد كلماتي..

-ولك اني حامل حااامل راح تصير اب

-تشاقين مو؟

-لا والله رحت للدكتورة واكدت اني حامل و...

-شنو حامل؟؟؟؟ شلووون حامل؟؟؟؟

-هاي شبيك

-شلووون حامل جنات وانتِ ملتزمة بالحبوب واني ماخذ احتياطي شلوون!!

-ما فهمت؟

-ولا راح تفهمين... ياربي شنو هالمصيبة

ابتعد مني يمسح على وجهه وشعره والحيرة ماكلته، عگدت حاجبي مستغربة اسلوبه بس عذرته يمكن يخاف لا ابو يأذي الطفل..

-مالك اذا تخاف من ابوك لا يأذي الطفل تره...

-لاااا! لااا ما اخاف لا ابوية يأذي الطفل انييي مااااريد اطفااال ماااريد واني وضحتلچ هالشيي وفهمتتتچ مااااريد اطفااال!!!!

-متريد بث صار هذا رزق من الله

-صار لانج مهملة!! چنتي تاخذين الحبوب الانطيها الج بإنتظام لو لا؟؟!!

-يعني..

-تاخذيهن بأنتظام؟؟؟؟

-لا لان انثى.. شوف لان هنه مكملات غذائية وكيان گلتلي مو لازم الا اخذهن واذا نثيتهن عادي و...

-لاااا جنات ذني مو مكملات غذائية ذني حبوب منع!! حبووب منع حممل حتى ما تحمليييين مني!!

-انتَ منطيني حبوب منع؟

-اي! شگددد اكدت عليييج شگد علمتتج تلتزمين بيهنن وكتلج الموضوع مسألة حياااة او مووت ما يصييير يوم ينسنن ذنيي ما يصييير واذا نسيتيهن تصييرلج كااارثة ورغم هذاا ما استوعبتييي ما اهتميتييي وجازفتي بروحجج وبيه وبهذا الطفففل!!

-يعني ابني مشوه

-شنو؟؟؟؟

-مشوه

-مشوه شنو؟؟

-الدكتورة گالت الطفل بيّن عدها مو طبيعي وشكت بيه اخذ مانع حمل وگلتلها لا ما اخذ مالك انتَ الثبب راح يطلع ابنك مشوه

-ويطلععع خلي يطلعع هسة نروح حتى تنزلي امشيي وياااي

-هدنيي لا تجرني هييچ

-ولج امشيي لا تخبليييينيييي احير بيججج لو بـ شُهيب لو فااااهد

-هدنييي بكيفككك هو تنزل ابنييي

-ايي تنزلي وغصباااً عليج فهمتي لو لاااا

-لاااا ما افتهم مااا افتهم ومو بكيفك وخرر عنيي

-جنااات تكومين تنزلين الطفل هسسة ويايه بالمستشفى لو انزززله بطريقتيييي

-بطريقتك شلووون

-تعااالي..

جرني من ياخة قميصي صرخت مفزوعة من شكله وعصبيته ما شايفته هيچي من قبل ويايه، صيحت لحدما اختفى صوتي اضرب بي وادفره وهو تخبل بالزايد..

-مااا راح اسويييلچ شييي اذا گمتي وياي هسسسة ونزلتي الطففل

-ما انززله حررااام عليك حررررام

-اييي خلي الحرااام عليَّ اني غاااطس بالحرااام گومميي

-ما اگوووم ما انزززله الله ياااخذك حقييير

-الف مرررة كتلج ماااريد طفل مااااريد جنات اكررهه بعده مااا اجه واكررهه ماااا اريدددده!!!

-بس تريدني وتريد جسمي ومتعتك وراحتتتك تريد تتونس بيه وبسسس تريد تتونس بوحدة غبية متعرف بشييي ولاعب بيها طوووبة تسوي كللشي ببالك وكلللشي تريده لاني مااعرف ولانيي غبييية! انطيتني حبووب منع حممل بدون لا تشاركنيي وهسة انتَ السبب الطفل مشوووه

-منو گلچ ما تلتزمين؟؟؟

-لان ما شاركتنيي ما گتلي هنه شنووو لو حاچيي چان اللتزمت واهتمييت چان تفهمتت موقففك انتَ غشيتنيي ولعبت عليَّ تگول مكملات غذائية وتخليني اشررب وما ملحگة وهسة من صار طفل تريدني انزله؟؟؟ يا ماالك لو ماادري شيصير ما انزله!!

-تنزلي وغصباً عليچ جنات هذا الطفل اليوووم ينزل!!

-ما انزله ومااريدك لو تنگلب وصييي هم مارريددك

-بس اني اريدچ

-تريدنيي تريد ابني ويااي ما اتنازل عنه لو تمووت

-واني ماريد ابنچ! حتى لو جبتي لهاي الدنيا يا جنات ما اعترف بي وما اسجله بأسمي! شوفيلج واحد يتبرع يصير ابووه!

-يا حقيير ياا نذذل يا...

سد حلگي بأيده بقوة ونتر وعيونه خابطات دم..

-اني مو كفو اصير اب راح اأذيه واعذبه واتعببه واكرهه حياته لو تحبين ابنچ نزليي وخلي الطفل يرتااح مني ولا تخلي يعيش الضييم

دفعت ايده ونترت بنفس اسلوبه العنيف..

-ما انزله واني اربي وانتَ روح منريدك ولا تجينا ولا تتقرب من عدناا احنه منحبك ولا راح نتقبللك ابقى عذب روحك بروحك وعيش الوحدة!!

على اثر كلماتي القوية دخلو ولد عمي وابوية وگبت عركة الها اول مالها تالي بينهم وبين مالك يريد ياخذني وياه وابوية وولد عمي حاوطو من كل جهة لحدما خلو يطلع من البيت وتوعدلهم راح يرجع وياخذني غصب عنهم..

بنفس اللحظة ابوية گومني وياه وجبرني اللبس حجابي ونفس العباية الخليجية وطلعنا للمطار طلع حاجز وطيارتنا بعدلها ساعة ونص، قضيت طريق الرجعة للعراق بچي اتذكر كلامه والحقد الي بين عيونه على الطفل، يريد يبقى ويايه بس ونسة بدون لا نكون عائلة واسرة ونبنيها سوه..

-كيان: جنات انطي فرصة يبررلچ

-جنات: شنو يبرر؟ فرص گدامه اجت رغم الحظر حجز كم مرة للعراق واجاني يقنع بيه بث حتى انزله! انوب من اتعارك وياه يروح ومن يرجع لاوربا يتصل بيه مناك وهم يتوثل حتى انزل الطفل واخلصه من هالورطة

-اووف جنات

-كيان صار ابنه ورطة؟ صار الرزق من رب العالمين ورطة ومشكلة؟! حتى لو چان خايف عليه من ابوه معقولة ابوه راح يكتل الطفل؟ توصل بي يكتل حفيده؟ وحتى لو صارله نقطة ضعف مالك عنده الفف شخص ديهددوه بي ليش من اجت على ابنه ميريده ويگلي اذا تعوفي اعذبه واراوي الويل؟ ليش؟؟؟

-ماعرف شگول الله لا يخلي وحدة مكانچ

-الحمدلله على كل حال المهم الدكتورة هنا طمنتني الطفل مابي شي ومثل الورد كلشي ماريد اكثر وهثة منتظره يجي الافندي ويطلگني واخلص منه

-ابوچ بعده ناوي يطلگكم وراكب راسه؟

-اي واني أيده شثوي برجال ميريد ابنه الي من لحمه ودمه؟

-ههههه انتِ بس تردين تتزوجين ليث

-ايييع لو اموت خيولي هالططوة يحلم اقبل بي

-عليج الله شنو چانت ردة فعلج من عرفتي خطبج؟

-يخطبني واني على ذمة رجال ثاني شنو تتوقعين تكون ردة فعلي غير رگعته بمية نعال؟

-بس ابوج يريدج تتزوجي لو هو لو ابن عمج علي

-وثنينهم يرحون فدوة لمالك ذولة الجايفين

-هاا هاا مو متردين مالك

-اي ماريده

-لعد شو كلامج اختلف هسة؟

-حبي اذا اريد اتزوج رجال لازم يكون احلى من مالك وانطف منه حتى انثى (انسى) هذا الططوة ولو ماتوقع راح اللگه هيج رجال فـ اقرر ماتزوج بحياتي

-دگعدي وسكتي بطنج واصلة لخشمج وتفكرين تتطلگين تره تبقين بالعدة لحدما تجيبين خاف عبالج

-ما بقالي شي كله شهر ونص واجيب هذا العنون، اگلج شنو اخبار مثرة (مسرة) ما شفتيها بعد؟

-لا

-متعرفين اخبارها؟

-صبا تكول وضعها مو زين وعايشة على المهدئات

-والله عجيب شلون تشتكي عليه وترفع قضية ضده وتتعب من انثجن؟

-اني لليوم احبها بس يجوز تعبها واكتأبها مو على شُهيب يمكن شي ثاني مأثر عليها

-على بنتها؟

-بنتها رجعتلها وين نايمة انتِ

-صدگ تحجين؟؟

-والله صار شهرين من رجعت الحضانة الها

-اخخ لو بس اعرف ليش هيچ ثوت ارتاح

-وازيدچ من الشعر بيت طلبت منه الطلاق وشُهيب طلگها وره ما خلته يوقع على اتفاقية زواج مياخذ منها فلس واحد

-چذااابة!!!

-والله العظيم وما اسولفلج على صدمة شُهيب انتهى اخوية والله انتهى!

-عمت عينيي عليه متت قهر لييش جاي تثوي هيچ!!

-مو مهم ليش المهم سوته وخلص شُهيب طلگها وانحكم عشرين سنة بتأكيد منها وبأسمها!

-اوووووف گلبي محتررگ

-سقطت الاقنعة وطلعت الوجوه الحقيقية جناوي! طلع وجه مسرة الحقيقي ووجه فاهد ووجه كلمن لبس قناع ومثل علينا!

-ومالك!

-مادري عن مالك صراحة اشوفه اكثر واحد متأذي صاير غير واحد لو تشوفي متعرفي مستحييل على كمية التعب والالم الي بوجهه

-كيان اني رايحة عندي شغل

-يا جذابة منيلج شغل كاعدة بالبيت وساكتة

-لا ولج دا نحضر لخطوبة ايات وطاهر وملتهية بيهم

-ما مصدگة اخيييراً طاهر خطب اختج ينرادلها هلهولة

-وچان ماتحرك لوما عمي خاطبها لـ زيد.. طاهر گام يدگ ويلطم يله باي باي لازم اروح جاي يصيحولي

سديت الاتصال وياهة وگمت اسبح وارجع لوحدتي وعزلتي، لليل رحت لـ ماريا اشوفها وضعها يبچي الحجر من يوم شُهيب انسجن لهذا اليوم هي ما رجعت طبيعية تصفن هواي وساعة تضحك وساعة تبچي وساعة تروح تتمكيج وتنزل تگول..

-هسة يجي شهوبي خلي يشوفني حلوة

-كيان: ماريا شُهيب مسافر ميجي اليوم حبيبتي

-يجي باچر

-ولا باچر

-بعد ساعة؟

-لا ماريا ميجي

-لا هو گال يجي

-شوكت كال؟

-هو دائماً يكول اجيچ كل يوم ما اعوفچ لان انتِ امي

نزلت راسي ماعرف شنو اجاوبها، ما اهتمت لوضعي انوب گامت تسويلها حليب بالككاو وتگول..

-شهوبي يسوي الي دائماً هسة اني اسوي وافاجأه اگله صرت جبيرة واعرف اسوي وحدي

تركتها وحدها تشتغل وتفتر مثل الفراشة وتحضر وترتب الميز وتطلع حلويات وخابصة روحها على وهم.. على شي مستحيل يصير ومستحيل يتغير..

بتت يمها اليوم وگعدت الصبح متفاجأة على اتصال نشوان يگول بفرح..

-كيان!! اليوم محاكمة شُهيب قدموها ولج مااعرف منو تدخل وقدمووها والمحامي گال اكو امل جبير يتخفف الحكم

-گول والله؟؟؟؟

-والله العظيم هسة اتصل بيه يگول موكلين محامي شاطر بس مانعرف منو وكله واليوم راح يحضر ويدافع لـ شُهيب اجي عليج نروح سوه؟؟

-اي اي يله منتظرتك

گمت مثل المخبلة بدلت ملابسي ووگفت انتظره دقايق وسفط بباب بيت ماريا وطرنا للمحكمة، نزلنا نهرول بعد ربع ساعة تبدي المحاكمة ماعرف منو مشى القضية بهالسرعة ومنو گدر يقنع القاضي ومو مهم منو المهم ينصفون شُهيب..

تلاگينا ويه مالك اجه يهرول ابتسمت من شفته بس هو ميشوف بعيونه ولا كأن احد موجود عبر الكل ودخل للغرفة يمشي ويه رجال ماعرفته منو، دقايق ودخل رجال ضخم عيونه زرگ بحرر وجسمه متروس وشوم وجمجمته عبارة عن وشوم ارقام صاحوله "موزس" حچى ويه نشوان بالانكليزي..

-نشوان: موزس؟

-موزس: نشوان انتو هنا؟؟ ليش محد بلغني شُهيب مسجون؟؟ ليش خليتوني اعرف من الغريب؟!!

-منو بلغك؟

-موزس: مو مهم منو بلغني المهم صديقي مسجون صارله ست اشهر ومحد انطاني خبر؟! عار عليكم عاار!

-نشوان: بس الكل افتهم بموضوع سجن شُهيب معقولة ما وصلك خبر؟ انتَ وين جنت بهاي الفترة؟

-موزس: هم مسجون

-نشوان: امداني

-موزس: بس سجن يختلف عن هذا الفاشل على الاقل سجن يناسب شخصياتنا العظيمة

بنص حديثهم عبر من عدنا المحامي واشر لـ نشوان راح تبدي المحكامة دخلنا بسرعة كلنا وموزس روحه طالعة وگاعد على اعصابه لحدما دخل القاضي واجه المحامي الجديد الي ماعرف منو وكله على قضية شُهيب حتى من عرف على نفسه ما ذكر هوية المجهول الي دفعله حتى يدافع عن قضية شُهيب المستعصية..

-موزس: هسة غير يفضنا

-نشوان: محاكمة هاي موزس مو مباراة كرة قدم

-موزس: محاكمة خ** وينه البرو ما شفته غير يجيبو نكحل عيوننا بشوفته

وكأنهم سمعوه فوراً دخل شُهيب مقيدين ايده وگعدو بالصندوق الخشبي، بصعوبة سيطرت على دموعي بس ما لحگت اعيش الحزن بسبب موزس..

-موزس: دييييم برو صاير چنه نعال ليش هيچ مخربين شكل صاحبي؟

-نشوان: يمكن لانه مسجون صارله ست اشهر وصار بي كورونا مرتين وصلته للموت؟

-موزس: لا هاي كورونا ال**** ما تموت صاحبي

سكتنا جميعاً من بدت المحكامة والمحامي قوووي واستقتل بالقضية نشوان ومروان گالو هذا دافعيله فلوس يابو فلوس حتى يربح القضية لان منين مدا يجوله يلوفها عليهم ويخليهم حايرين الى ان القاضي ضرب بمطرقته على ميزه الخاص حتى يخفف الفوضى الصارت..

-المحامي: وان كان فعلاً شُهيب شمسون سرق الروسي "دون" اين هي الاموال؟ لماذا عندما تم البحث والتدقيق في الملف الخاص الذي وقع عليه شُهيب نص على انه يعتبر شريك ولم يذكر موضوع الاموال بتاتاً!

جاوبه المحامي الثاني وجاب طاري قتل الشخص "دون" ضحك وما انطاه مجال فوراً جاوبه صاحبنا..

-المحامي: وان اثبت الجميع على ان شُهيب قاتل الشخص المدعو دون فـ القتال كان بمواجهة طبيعية ومنطقية مئة بالمئة كدفاع عن النفس! هذا يعني القتل غير متعمد! وحكم عشرين سنة حكم قاسي جداً وهو يخالف قانون (رقم القانون) من قانون العقوبات!

خنس الكل بعد كلماته الواثقة لصم الكل على حلگه بدفاعه القوي وكلامه المنطقي، ضحكت صبا بخفة وتدنت تهمسلي..

-صبا: ذكرني بمسرة من تستقتل على شخص

وهنا طخ ببالي شي بس استبعدته فوراً بسبب حكم القاضي الفوري وهو يطلب يتدانش ويه باقي القضاة.. ما طولو دقايق ورجعو يگعدون بمكانهم، ضرب بالمطرقة ضربة سريعة ينهي المحادثات الجانبية الصارت واصدر الحكم..

-القاضي: الحكم بعد المداولة.. قررت المحكمة وبأجماع الاراء على الدلائل الواضحة والكافية ضد المتهم شُهيب شمسون على ان جريمة المتهم هو قتل غير متعمد وتتلخص عقوبته بسجن ثلاث سنوات فقط!

انفرجت اسارير الكل صاح مالك من الفرحة وبچيت من السعادة ونشوان وموزس تحاضنو يصيحون وفاضل رفع ايده يحمد الله ويشكره ومروان شال صبا يفتر بيها ولا عزاء لأعدائنا!! لا عزاء للوجوه الي انگلبت ولا للاعتراضات الي صارت ولا للاصوات الي ملت المكان والصياح الگلب صالة المحاكمة گلاب..

اخذو شُهيب الساكن ما طلعت منه ردة فعل حتى ابتسامة ما انرسمت على وجهه حتى من تغير حكمه من عشرين سنة الى ثلاث سنوات!! وهذا الشي غير متوقع الحمدلله والشكر ماكول غيرها والله يوفق من كان السبب بتغير هالحكم القاسي!

طلعنا من الصالة الوجوه تضحك ونشوان أصر يعزمنا على الغدة نحتفل بهالمناسبة الحلوة ومروان گال معترض وضايج..

-تره ما طلعو من السجن نشوان بس خففوا حكمه

-موزس: برو من عشرين سنة ل ثلاث سنوات! هذا انجاز بوس ايدك و**** سوه

-مروان: موزس!! اكو بنااات!!

-موزس: ومنو يهتم

حچاهة بضحكة عالية مرحة ومشى گدامنا يعبر مالك الي مشى من جانبنا وسلم بشكل سريع، اندارله موزس يباوعله وكشر ملامحه بغضب وسوه لمالك حركة الاصبع!

جحظت عيوني من حركته وانصدمت اكثر ويه ضحكة مالك ما ضاج ولا انزعج بالعكس ضحك! طلع موزس من المحكمة ما قبل يجي ويانه، باوعنا اني ونشوان لبعض وفطسنا ضحك ع الصار.. تمشيت ايدي بأيده سعيدة لحدما وصلت لبوابة المحكمة الرئيسية وانتبهت على شخص واگف على بُعد من عدنا..

بنية انيقة لابسة فستان وكعب عالي لا يقل عن 14 سم حاطة ايدها بجيوبها وتحچي ويه حارسها الشخصي.. هاي مسرة قيثارة! بس شجابها للمحكمة وشعدها حاضرة هنا بنفس وقت محاكمة شُهيب؟؟

-كيان: شوشو ذيج مسرة باوع

عگد حاجبه متسائل وجودها بدون لا يحچي اني سألت..

-شعدها هنا؟

-نشوان: ماعرف

-معقولة هي السبب بتخفيف حكم شُهيب؟؟

-لو هي السبب ليش ما حضرت المحكامة؟

-ماعرف يجوز متريد احد يعرف هي تدخلت؟

-ليش عود؟

-مادري

-ماكو تفسير منطقي كيان مسرة اشتكت عليه وهي السبب انحكم عشرين سنة ما معقولة تجي وره ست اشهر تظهر بحياتنا وتطلب تخفيف حكم

-ماعرف شوشو هم حيرة ليش متروح تحجي وياهة؟

-لا

-من انسحبتو انتَ ومروان وفاضل من شركتها بعد ما اللتقيتو مو؟

-اي ولا مرة، يله نطلع منا...

طلعنا سوه وهيچ مشت ايامنا سودة كئيبة بدون شُهيب، كلما اروح ازوره اتمنى اشوفه بخير صار حلمي اشوف ابتسامة تنرسم على وجهه بس ما شفتها ولا مرة حتى من باركلي بنجاحي وتخرجي اخيراً من الجامعة گال هو فخور بيه وينتظر مني كلشي حلو وناجح بس ما ابتسملي وكأنه نسى شلون الانسان يبتسم ويكون ايجابي..

واني لخاطره قررت اسوي المستحيل حتى ارجعله ابتسامته، قدمت وظيفة بشركة معروفة انرفضت للاسف لان ماعندي خبرة كافية بس ما استسلمت ورحت اقدم غير اماكن وانقبلت لاني من الثلاثة الاوائل وبديت شغل وبديت اتطور واثبت نفسي واطبق شكو معلومة يزودوها الي اخواني من خبراتهم..

ما گطعت عن شُهيب ولا فوتت زيارة وحدة چنت اروحله بكل حماس حتى اشوفه واسولف وياه هالعشر دقايق چانت جرعة اكمل بيها باقي الشهر.. كلما اروحله احچيله عن مستجدات عملي ونجاحي وعن ثناء المدير الي ومدحه لترتيبي..

-كيان: شهوبي شركتنا راح تقيم حفل يكرمون بي الموظفين المجتهدين وتخيل اسمي موجود من ضمنهم ممصدگة!!!

وهنا ابتسم.. اي اي شفت ابتسامته اللطيفة اخيراً، غمض عيونه بحب وهز راسه فخور بيه وگال بالضبط..

-شُهيب: بنيتي الشاطرة چنت متأكد راح تنجحين وتتفوقين

-اريد اصير نفسك

-انتِ احسن مني كيان

-لا تگول هيچ ما شفت ولا راح اشوف احسن منك انتَ مَثلي الاعلى الاقتدي بي

-مَثلچ الاعلى مسجون حبيبتي

-ظلم! مسجون ظلم وكذب وافتراء وما بقى شي وتطلع شهوبي كلنا منتظريك وماريا اكثر وحدة منتظرتك على نااار

هز راسه غايبة ابتسامته المشرقة، نزل عيونه ثواني ورفعهن الي متردد، فتح فمه يريد يحچي شي وسحب كلامه فوراً من گال..

-وقت الزيارة خلص انتبهي على نفسج وعلى امي حبيبتي كيان معتمد عليج

-ردت تگول شي شنو هو؟

-لا ولشي

-گول شُهيب

صفن بعيوني شوية وضم كفوف ايده لبعض، بلع ريگه وتغيرت وتيرة انفاسه من همس بخفوت شديد..

-ما شفتي مسرة بعد؟

وهذا السؤال المتوقع.. سؤال متأكدة شي يوم راح يتنازل ويسأل ويروي فضوله عنها ويريح گلبه، هزيت راسي وگلت مبتسمة..

-شفتها

-شوكت اخر مرة؟؟

-مرة اجت لشركتنا على اساس تشترك ويه مسؤولي بمشروع وانسحبت منه من لا سبب

-تعرف انتِ تشتغلين هناك؟

-لا متعرف ما گلت حتى لصديقاتي المقربات وين اشتغل

-امم

-بس هي زينة ووضعها ممتاز رجعتلها ميس تدري؟

وهنا ابتسم مرة ثانية بحب وهز براسه سعيد بهالخبر، ردت احچيله بعد عنها بس خفت تسوء حالته لكن هو ما قصر من گال بألم..

-هي اجهضت الطفل مو؟

انصدمت! انصدمت لان صار على الموضوع اشههر وهسة ياله تنازل وذكر هالشي! وانصدمت اكثر لان مچنت اعرف هو عنده خبر بحملها..

-كيان: صار اشهر على هالموضوع

-هي نزلته لو قدر؟

-ماعندي معلومة

-شوكت اجهضت الطفل؟

-ثاني يوم محاكمتك

غمض عيونه وعگدة خفيفة صارت بحاجبه، بلع غصته وفتح عيونه صايرات دم حمر..

-شُهيب: حقها ما اللومها

-تلومها على شنو؟

-انها اجهضت الطفل اكيد ما تريد تحمل من مجرم وابن حرام بنفس الوقت

-لا تحچي على نفسك فدوووة

-تمام

-شُهيب مسرة طلعها من راسك وعيش حياتك لا تنقهر ولا تتأذه بأي خبر تسمعه عنها حباب

-ليش تگولين هيج؟

-ماكو سبب بس اجه ببالي اگول هالشي

-كيان؟

-شنو شبيك

-صاير شي اني مادري بي؟

-انتو تطلگتو شُهيب هذا السبب هيچ دا احچي

-كيان احچي شنو صاير؟؟

-سمعت...

-شنو سمعتي احچي؟؟؟

-سمعت مسرة قيثارة راح تتزوج

عبالك انطيته راشدي سطرته بي سطر بسبب ردة فعله، عيونه جحظت وفغر فاهه مصدوم، اكتافه المشدودة وگعت وكل جسمه ذبل، اردفت بسرعة اخفف عنه..

-بس مو اكيد شُهيب والله مو اكيد يعني انتَ تعرف الاشاعات الي تطلع فـ يمكن مو حقيقي هالشي لا تضوج امانة

ما تحسن حاله بالعكس زاد وضعه سوء ومن تعيس لاتعس، اصابع ايده بدت ترجف ونبرة صوته تغيرت من گال بثبات كاذب..

-تمام.. الله يوفقها

-شهوبي

-اني رايح كيان وقت الزيارة خلص واكيد انتِ عندج شغل اخذي راحتج

گام بسرعة ينطيني ظهره ردت اگوله أي شي يخلي يتحسن بس ما لگيت، قريب لا يوصل من الباب ويطلع صرخت..

-جنات جابت!

وگف بمكانه منطيني گفاه رخت عضلات ظهره وره ما حچيت ابتسمت وكملت..

-جابت ولد يخبل سمته رامي نسخة منها ومن مالك صاير مكس بيناتهم عيونه خضر عليها وشعره مايل للشگار كلش حلو كللش

هز راسه وبعده منطيني ظهره ودعني بيده رفعها بدون لا يراويني وجهه وخله وطلع، متت من القهر طلعت والهم والغم تارس گلبي متندمة ليش گتله اكيد راح يحرگ بروحه وماكو بيده شي يسوي ويخرب هالزواج يعني الا اموته بالسجن ياله ارتاح!!

رجعت للبيت اكل روحي بروحي وبعد ما رحت لـ شُهيب بعد هالزيارة نشوان منعني گال راح اموته بيدي ياله ارتاح لان من گتله بخبر زواج مسرة لليوم هو مو طبيعي اربع مرات راحوله مروان ونشوان ميحچي اصلاً عبالك بغير عالم..

مشى كم شهر روتيني اخر ماكو أي اختلاف بحياتنا نهائياً، عرس صبا ومروان ما جبناه بالطاري بعد اصلاً محد بيهم اله نفس مروان كلش تأذه على سجن شُهيب مچنت اعرفه يحبه لهدرجة ومتعلق بيه..

گعدت الصبح على اشعار اجاني بتلفوني، فتحته اشوفه من رقم غريب كاتب..

"شلونها اخت شُهيب؟"

استغربت من الرسالة وظليت صافنة بيها شوية ولحقتها رسالة اخرى كاتبين..

"راح نرجع لا تخافين"

خفت من محتوى الرسالتين وحضرت الرقم بسرعة، ومثل عادتي كل يوم الصبح ركضت على الرزنامة اشخط يوم جديد على وجود شُهيب بالسجن..

حياتي تغيرت بهالفترة وكبرت فوگ عمري عشر سنين متعودة على حب وحنية شُهيب عليَّ وفقدتهن بوقت واحد، اجه ببالي فاهد وتذكرت كلامه من گال لا تتعلقين بـ شُهيب لهدرجة حتى من تخسري او تبتعدون عن بعض متنضرين كلام هالحقير صح لاني تدمرت ويه سجن شُهيب..

بس هالشي خلاني انضج بشكل اسرع واعتمد على نفسي صرت گد نفسي ومسؤولة عني وعن ماريا ما خليتها وحدها وتعلقت بيه اضعاف قبل، ما گدر احك راسي بينها وبين شغلي وبين شغل البيت هنا اركض منا ومنا وهم ما اللحگ..

اليوم الحفل الخاص بشركتنا ردت اطلع مميزة وجميلة واخذ صور حتى من اروح لـ شُهيب اراوي الصور شلون اخته صارت امرأة ناجحة واخلي يفتخر بيه ويفرح..

لبست فستان بنفسجي طوخ صاير عدل برقبة عالية واكمام طويلة وتركت شعري مفتوح وطلعت گذلة، مكيجت مثل عادتي مكياج ناعم وتعطرت واخذت جنطتي وحذائي العالي ونزلت الدرج واني اللبس بي..

-نشوان: اشتعلووووو

-كيان: حلووة طالعة مو؟؟

-نشوان: تخبلين حبيبتي بس احب الحجاب اكثر اسف

-اهااا من دخلت انسة ملاك حياته صار يحب الحجاب وميعجبه غيره

-نشوان: شفتها البارحة وهلا هلا هلا هلا

-يمممماااي گول والله؟؟؟

-والله شفتها من بعيد بس ما حاچيتها مادري شبيه صرت مثل سليمة معچف وواگف ماكدر اتقرب

-لا نشوان شبيك شجاك روح حاچيها وتقرب منها گوللهاا انتَ تحبهاااا

-ولج ماكدر اخاف ترفضني وينكسر قلبي الصغير

-لعد خليها تتزوج من واحد بطنه متروسة فلوس وظل باوعلها من بعيد وتحسر

-ماعرف كيان شنو اسوي

-اعزمها اليوم!

-اعزمها وين ولج؟ لبيتنا؟؟

-لاا يا فاسق شنو لبيتنا ولك للحفل مال شركتنا انتَ مو راح تجي؟ مروان راح يجيب صبا وفاضل هم يجي! اعزم ملاك وجيبها وياك

-على يا اساس اعزمها؟

-گوللها مشروع يفيد شركتهم مادري انتَ اللگه شي مناسب ويلا هسة اني طالعة

-ماشي اذا دگيتيلي وما جاوبت تره راح اسبح اني

-تمام تمام باااي

ركضت اعدل بترچيتي الي انفتحت وفتحت الباب اطلع وجمدت من شفت سيارة هارون سافطة بباب البيت، زفرت نفس وتقدمت امشي بخطوات بطيئة وما اسمع غير صوت طرق كعبي العالي.. اضطربت انفاسي من نزل من سيارته وتقدم عليَّ مبتسم..

-هارون: تره ماكو هيج جمال

-كيان: احترم نفسك!

-هههههههه حاضر

-روح منا اخواني بالبيت

-ياااا شوف راح يكشفون علاقتنا يممةة خليني اشرد قبل لا انكتل

-متضحك تره

-ههههههههه امشي ولج خليني اوصلج للحفلة

-شمعرفك عندي حفلة اليوم؟

-المن لابسة هاللبس لخالتي الشگرة؟

-امممم، لارا وياك؟

-وياي امشي

ما ردت اصعد وياه بس لارا مدت راسها من الجامة واصرت اجي، ركبت بالسيارة وكالعادة لارا حارگة الدنيا بأغانيها العالية ورگصها عبالك رايحة لزفة كاشخة ومتمكيجة احسن مني طالعة تخبل..

وصلنا للقاعة ورحت اسلم على المسؤولين والمدراء ويباركولي نجاح فكرتي بالمشروع، بعدها الناس تخاف من كورونا والبعض منهم لابسين كمامات رغم مر هواي على هذا الوباء والحياة شبه رجعت نفس قبل..

مدلي هارون كلاص عصير اخذته منه بدون لا انتبه شربته بس حسيت طعمه يلعب النفس، عكمشت ملامحي اباوعله لونه وردي فاتح بي طعم كرز بس مو طيب ابد..

-هارون: ما جاي اگدر اشيل عيوني

همسها بخفوت بأذني اربكني، ابتعدت عنه بسرعة مستغربة ضحك واشر بعيونه على لارا بس مبين من كلامه ميقصد لارا بالحچي وهذا تلميح الي بس تغابيت ومشيتها..

-كيان: صح كلش حلوة لارا

-هارون: وريحتها تدوخ فراولة وكرز

-كيان: امممم

شددت على الكاسة البيدي متوترة وكملت اشرب من العصير المو طيب، اندار بجسمه عليَّ يثبت عيونه السود بعيوني وكمل بهدوء شديد..

-هارون: احبها

-اممم.. مبين

كملت اشرب من العصير بأنامل ترجف من اردف بجدية..

-اريد اخطبها

-اي اخطبها هي منتظرة هالشي

-بس واگف بوجهي شخص

-لا تخلي احد يوگف بطريقك لارا تحبك

غمض عيونه متنرفز ورجع فتحهن، ابتعدت عنه خطوة ليوره گلبي يرگع اني مو غبية حتى ما اللاحظ نظراته او كلماته المبطنة انطيته جانبي الايمن وهو نتر بين سنونه..

-كيان!

-هارون.. روح لـ لارا

-ما طايرة

-حرام عليك لا تكسر گلبها

-وينكسر گلبي عادي؟

طلع من جيب بنطرونه نفس العلبة الشفتها بسيارته الي بيها خاتم الزواج، رجف جسمي بقشعريرة سريعة ولا ارادي لزمت ايده ارجع العلبة لجيبه..

-لارا متوقعتك راح تخطبها صارلها اشهر تحچي بزواجكم ما اتخيلك غير حبيبها وزوجها المستقبلي تخبلون سوه والله

-شنو جاي تقنعنيني حتى اروح اخطبها؟!

-شفت الخاتم بسيارتك.. مو عن قصد والله بالغلط شفته وميلوگ هالمحبس غير بأصبعها

-اني ماريده بأصبعها اريده بـ....

-لا تسويها هارون امانة!

-ليش؟!

-لان ماگدر.. ماگدر افهمني

-متگدرين لشنو؟

-ماگدر احب غيره.. تعبت وگلبي ما جاي يقتنع بأي رجال غير فاهد

-شنو السواه فاهد وتحبي لهدرجة؟ فاهد تاركچ صارله دهر!!

-مادري احبه والله احبه مدا يطلع من گلبي ماعرف شسوي واخلص من السچاچين التگطع گلبي بكل مرة اتذكره وينذكر اسمه

-كيان...

-ما راح اقدملك أي شي انتَ حباب وحنون وتحترمني وتهتم بيه بس انتَ مو فاهد! ماكو رجال هنا يشبه فاهد ولا راح اللگاله شبيه

بلع ريگه وهز راسه كم مرة بحركة سريعة، رجع العلبة بجيبه بشكل صحيح وشرب الكاسة الي بيده دفعة وحدة وعافني وراح متوجه لـ لارا.. مسحت دمعتي الخانتني ونزلت وبقيت اراقبهم من بعيد شفته يطلع العلبة وفتحها بوجه لارا صوت شهگتها وعياطها وصلني طفرت عليه تحضنه وتصيح "اقبل" "اقبل" وتبچي بصوت عالي خلت كل الناس تلتفت ويباوعولهم..

ابتسمت بين دموعي تحول الحفل من حفل مشروع لحفل خطوبة بس مسؤولي ما حچى شي من شافهم ابتسم وصفگ ويه الناس الي شجعت هارون حتى يلبسها الخاتم بأصبعها.. تستاهل لارا وان شاء الله هارون يكون كفوء الها وحتى لو ما چان كفوء ومثالي وياهة هي راح تشوفه هيچ لانها ببساطة معمية على عيونها ومتشوف غيره..

كملت عصيري واخذت عصير ثاني غير نكهة طعمه بعد اتعس اخذت غيره وكلهن طعهمن يخزي حتى دخت من اللعبان نفس خفت يكون بيهن كحول بس مديري ميشرب وگالو ماكو كحوليات هنا..

صاحولنا ناخذ صور احنه فريق العمل رحت والدوخة ماكلة راسي گوة وگفت هبوط صار عندي مادري من كلامي ويه هارون مادري من ضغط الحفلة، دورت على اخواني شفتهم واصلين، طررت فرح من شفت ملاك جاية وفيروز هم وصبا وماريا ويه بعض يطفرن من الحماس ويأشرولي من بعيد فرحانات..

كملنا الصورة وخبطت معدتي بخوف من بدوا بالتكريم، وصل الدور الي وصاحو اسمي بالسماعة حتى اعتلي المنصة واخذ كتاب الشكر الي وصلني، گمت ورجلي ترجف وصوت تصفيق المعازيم يرن بأذني وصلت للمنصة الابتسامة شاگة وجهي اخذت من مسؤولي كتاب الشكر وطلبو مني اللقي كلمة بسيطة احچي عن المشروع..

من الحماس ضيعت كلماتي بس تماسكت ووگفت امام المايك احچي عن شلون تطور المشروع وشلون اجتنا الفكرة، عيوني ما انزاحت عن اخواني الي واگفين بين المعازيم يصوروني والفخر تارس عيونهم وختمت كلامي بلغة البلد اگول بحب..

-حابة اقدم شكر لمسؤولي مسيو جفري ولكل طاقم العمل وشكر خاص لاخواني الي سندوني وما عافوني ولا دقيقة ولأخوية شُهيب بالتحديد تمنيته يكون ويايه بهذا اليوم..

دموعي بدت تنزل بدون لا احس على روحي وصوتي يرجف بالسماعة، اخذت شهيق خفيف وزفرته وكملت بنبرة واثقة بوسط دموعي..

-اني متأكدة راح يوصله خبر نجاحي وراح يكون فخور بيه وراح يجي يوم يوگف هنا بين الجمهور ويصفگ بيده الحنونة الربتت على ظهري بكل مرة انهار تعب او يصيبني مكروه...

صار تصفيق قوي وحار بعد كلماتي، نشوان وصبا مسحو دموعهم الخانتهم ومروان وماريا وفاضل الفخر يقطر من عيونهم.. نزلت من المنصة والتصفيق قائم رحت لاخواني احضن واحد واحد ووگفت حتى ناخذ صورة جماعية.. ومن بين الصورة والحشود وبين المعازيم الواقفة تصفگ وبين الهوسة الصارت ودموعي لقطت عيني شخص..

شخص واگف بنهاية القاعة متأنق ببدلة رسمية بلون اسود فاحم وبقميص اسود مفتوحة اول ثلاث ازرار منه ظاهر زنجيله السميك، ترچيته الالماس تلمع بأذنه وتتعاكس لمعتها ويه حركة ايده وجسمه وهو يصفگ بأيده الموشومة بالكامل.. لقطت عيني فاهد..

فاهد واگف بين الناس يصفگ لنجاحي وابتسامة مزينة وجهه، فاهد واگف مرفوعة ردن سترته الرسمية شوية وماعرف هاي بسبب الدوخة لو صدگ الي دا اشوفه بس اكو كترين محاوطات معصم ايده كتر لونه وردي وكتر ثاني لونه بنفسجي وبارزة اللوانهن من بعيد بسبب تصفيقه الحار..

تقربت كم خطوة اتأكد من وجوده، اختنگت واني اشوفه عيوني ما نزلت عن عيونه الصفر التجدح ويه اضوية القاعة، شهگت من غمزلي وشمرلي بوسة بالهوا وقريت بشفايفه نطق كلمة "احبچ".......

يتبع.....

━━━━━━  ━━━━━━

اءءءءءءءء 🙈🙉🙊

رجع المسودنننننن 🥳💃🏼💃🏼💃🏼💃🏼

فاهد وكيااان اااخ بس 🥹🙈💙

مالك وجناوي صار عدهم رامي 🥹💙 اول انسان محارب انقراض البشرية صار عنده طفل وضاف انسان جديد للكرة الارضية خلوهم يحسبو اهل التعدد السكاني "رامي مالك" 😁🙊

شُهيب ومسرة اوووف يا حبايبي الحلوين اخاف ذيچ الوحدة طاگتكم عين خليني احاول احرملكم 😔🫶🏻🫶🏻

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

اتعنى المكان الي گعدته وياك

ما الگاك بس رايد اثر منك!

بلچن چلمة ما نگلها الريح

الگاها وتسولف بالنشد عنك

لو دور عطر منك بقه على الگاع

احط نفسي عليه وافييش اشمنك... 🥀

━━━━━━  ━━━━━━

تقربت كم خطوة اتأكد من وجوده، اختنگت واني اشوفه عيوني ما نزلت عن عيونه الصفر التجدح ويه اضوية القاعة، شهگت من غمزلي وشمرلي بوسة بالهوا وقريت بشفايفه نطق كلمة "احبچ"..

فتحت عيوني مصدومة ضحك بصوت عالي ضحكته المجنونة وتبعها بصفير عالي ورفع ايده وگدام كلل الناس صاح بصوت عالي بالعربي..

-هاي المهننندسة كوريتييي

كل الناس صارت تتلفت تباوعله واني واگفة جامدة! جامدة هم من الدوخة ماگدر اتحرك هواي لا اوگع وهم من الصدمة من وجود فاهد هنا!!

-فاهد: چان هزيتلچ رگبة بس عندي اصابة بيها عذرينا كوري

-كيان: فاهد!

-فاهد: عيونه الصفر

-نشوان: هذا فاهد؟؟؟

-فاهد: هلو شوشو

-مروان: انتَ شتسوي هنا؟؟

-فاهد: هلو نحوسي

-مروان: ولك شتسوي هنا جاي؟!!

-فاهد: شلون استقبال حار هذا بس يله ميخالف راح اسامحكم هالمرة لخاطر كوريتي

-كيان: مروان، نشوان خلوني احچي وياه على انفراد عفية

-مروان: مالچ كلام ويه هذا المسودن!

-فاهد: جرحت مشاعري العضروطية

-كيان: مروان فدوة

بصعوبة قنعتهم يرجعون لمكاناتهم واني رحت اتقدم على هذا الحقير، وگفت مقابيله مباشرةً وزارتني دوخة ولعبان نفس بس تماسكت..

-كيان: خير؟!!

-فاهد: بوجهچ

-كيان: شتسوي جاي هنا؟! شنو الغاية من حضورك؟؟

-فاهد: وعدتچ احضر واصفگ لنجاحچ بين الحضور

-كيان: تمام شكراً يله تقضل روح

-فاهد: وااااااه؟؟

-شكو وااه؟ خاف عبالك راح اگوم اطفر من اشوفك واخذك بالأحضان والدموع؟؟

-طبعاً!

قاطع حديثنا هارون ولارا، هارون سلم على فاهد وتباوسو وغمزله وهناا طخت بعقلي وراسي ذولة الثنين متفقين عليَّ؟؟

-كيان: انتو الزوووج نهايتكم على ايددي!!

-هارون: على كيفج عيني

-فاهد: انچب لككك ما اسمحلك تگول عيني لزوجتيي

-كيان: لا بله؟؟؟

-فاهد: كيان انچبي لازم انتِ ما تسمحيله مو والله راسي تعب من الگرون!

-كيان: وانتَ شكو تدخل بحياتي؟

-فاهد: كورية عيب تعاملين زوجچ بهاي الطريقة عيب

-هارون: صح اتفق نعم

-كيان: ولكم لا تخبلووني زوجي شنو؟؟ خاف مصدگ نفسك انتَ؟!!

-فاهد: هو صح اني غبت سنتين بس ميخالف ابقى رجلچ

-رجلي؟؟ ولك احنه متطلگين!!

-فاهد: شنووووو

-هارون: وهنا كان لازم نتدخل

-فاهد: وولك ولك ولك ولك ولك جااي تسمععع

-كيان: اي اي طلگتك اني!! وين نايم انتَ!!

-فاهد: طلگتينييي كياااان؟؟؟

-كيان: صوتك فضحتنا هذا شبي

-فاهد: لا لا لا شنو هالاهانة بحقيي ولج انيي تطلگينيي انيي ابو زعاطيطچ!!

-اي

-سممم ومرض شلون هلچ گلبچ تسويها بيه!!

-فاهد مالي خلگ اللاعيبك روح عني

-هارون: اي فاهد روح عنها لا تخرب فرحتها

-فاهد: **** انتَ شكو حاط خشمك بيناتنا امشي ولي اخذ البريعصي مالتك وروحو منااا

-لارا: اففف فاهد شبيك وياي

-فاهد: لارا احبج بس الارعن مالتج لزمي واخذي من وجهي

-هارون: خاب دطيير بحالك اني اجيت علمود كوري

-فاهد: ولك ولك ولك وللك هارونن لا تلعب بأعصابيي هسة احطك وادوسس بگلبك وآكله بأسنااني

-هارون: تدوس بگلبي واني ابن عمك وضلعك؟!

-فاهد: وآكله هم!!

-هارون: مو صوچك صوچي اني الحبيت مرتك!

فتحت عيوني ولارا جحظت عيونها وفاهد انگلب طنطل لزم هارون من خوانيگه گدام كللل البشر الي هنا ونتر بين سنونه..

-لا تشاقه ويااي شقه مااصخ لا اشرب من دممك وتعرفنيي اسويهااا

-هارون: تمام فهمت

-يله ولي من وجهييي

ضحك هارون مبتعد ولا كأن هسة فاهد هدده انوب شمرله بوسة بالهوا ولف ايده حول كتف لارا وباس راسها واخذها وياه، بقيت فاكة حلگي على المشهد الصار ودرت عيوني على اخواني راح ياكلون فاهد اكل بعيونهم..

-فاهد: عاار **** روح مناا

-هارون: احبببببك

-فاهد: ايووووووو

-هارون: لا تنسى تحضررر عرسييي

-فاهد: عرس حمووضة

-هارون: وارگصلك رگص معدااان

فشر عليه فاهد ياله راح يضحك مثل المخبل وفاهد هم ضحك يربي والله احسني اطرش بالزفة شنو ديصير؟؟ هارون من طلع المحبس الي هل صدگ راد يخطبني لو سواهة لعبة حتى يعرف مشاعري لفاهد شنو ويگول لابن عمه؟؟!

-فاعد: نرجع نتناقش بموضوعنا ماي لوڤ

-كيان: ماعندي نقاش ويه مسودنين

-فاهد: اوگفي يعني هسة اني اعتبر مطلگ؟؟ هاي شوكت وليش وشلوون كوري شلون تكسرين قلبي الصغير واني اجيتچ متأنق وكاشخ ولابس كتراتچ بيدي!

-افففف فاهد

-وجعة اميي الغبرة ولچ بااعي خربت هيبتي وكشختي بهذا الكتر!

مدلي معصم ايده ورجعت ذاكرتي لذاك اليوم من نزعني الكتر بالسيارة وشمره، وكرر هالحركة ويايه بالجامعة من تخربطت ودخلني للحمام نزعه من شعري ولبسه بيده، عيوني دمعت على الموقف ضم الكتر كل هالفترة وحافظ عليه؟ بس ما استسلمت وما بينت تأثري تخصرت گدامه ورفعتله حاجبي..

-صدگ طلگتيني لو تضحكين عليَّ؟؟؟

-اي طلگتك ايي!!

-يعني هسة اني بالعدة؟؟؟ همزين لابس اسود

-فاهد انتَ جاي هنا تضحك عليَّ لو شنو؟!

-ولج انتِ سويتيني مضحكة! انيي فاهد ابن شمسون الخ** يطلگوني؟؟ يا عيبة العيبة يا عيبببة اللحية والشواررب يا عيبة الترچية الالماس اللابسها بأذني!

-اتفق

-كيان احچي عدل وفهميتي هل انا مطلق؟ هل يجوز اطلع من البيت والبنات يشوفوني؟ لو اعتبر بالعدة ولازم ابقى ست اشهر ببيتي؟

گلبت عيوني متنرفزة من تصرفاته هاي مشكلة فاهد متعرفه شوكت يكون جَدي وشوكت يتمضحك، اخذته على گد عقله وجاوبت..

-خلصت العدة مالتك صارلها قرنين

-هاا الحمدلله طمنتيني خليني اروح اصاحب بنات لعد

-رووح الله وياك

ضحك يصفگ بيده متونس مادري على شنو، گرصني من زندي ما وخرت ايدي عنه بقيت مبوزة بوجهه، من شافني متنرفزة ومو طبيعية اخيراً عدل ملامحه المبتهجة ورجعهم للجدية..

-فاهد: اني اعرف غيابي اثر عليج بس هواي شغلات مصخمة صارتلي بالفترة الفاتت

-ما اثر عليَّ بشي غيابك

-تمام زين هالشي

-لان انتَ ولشي بالنسبة الي فاهد عبارة عن نكرة!

-كيان لا تدوسين بالحچي

-ادوس وادوس على راس ابوك العار هم!!

-تمام ابويه الچ الحق تدوسين على راسه بس هَدي وخلينا نتناقش

-على شنو نتناقش؟؟ بابا انتَ شنو بالنسبة الي؟! انتَ لاا شيء عبارة عن جماد متهمني بشي روح شوف حياتك وخليني اشوف حياتي!

-شتشوفين وحبنا؟؟

-يا حب يا بطيخ نعال على هالحب الفاشل روح فاهد مالي خلگ اتناقش خليني فرحانة بنجاحي!

تركته روحي طافرة وگفت بصف طاولة احرگ بروحي دورت على مي ما لگيت اخذت عصير اشربه يبوووو شنو هاي ليش كلهن يلعبن النفس دوخني بالزايد خرب! سألت الموظفة الي بصفي اهمسلها..

-اگلچ هذا عصير شنو؟

-عصير كرز

-طعمه مو حلو

-اي حتى اني لاحظت

ما لحگت اجاوبها بسبب فاهد لزمني من معصم ايدي بقوة يسحبني عليه گدام الكل يجرني بره القاعة، خفت اخواني يشوفون بس لگيتهم ملتهين بـ صبا ماعرف شنو واگع على فستانها ومروان دينظفه الها ونشوان شايل بيده مي..

-هدنني فاااهد وين مااخذني ولك دااايخة

وگفنه بنص الطريق لازمة راسي ومغمضة عيوني القاعة كلها تفتر بيه، سألني شبيچ كم مرة ما جاوبت بقيت ساكتة اخاف اتقيء استسلمت بين ايده يجرني بره القاعة وياخذني لگراج السيارات يدخلني غصب لسيارته تعاركت وياه بيدي بدون لا افتح حلگي بس وين اگدرله هالغوريلا صعدني غصباً عني وقفل الباب علينا..

-فاهد: شبيييچ غير افتهم ليش ما تحچين؟؟

-امممممم

-شكوو؟؟

-ممممممممم

-سمم ومرض ما تحچيين

اشرتله على حلگي راح اتقيء، طلع مي من صندوگ الوسط وشربني وغسل وجهي، دفعت ايده بعدما حسيت روحي احسن وعطت بي..

-غبيي مكيااجيي راااح

-فاهد: ليش انتِ تحتاجين مكياج

-خربت كللشي فاهد كلللشييي

-ههههههههههههه شكراً

-الله يااخذك

-وياخذج

-افتح الباب وضعي مو تمام فاهد تعبانة

-شبيچ

-دايخة ومعدتي تفور اريد اتقيء ماعرف شنو ديصير بيه

-اعراض حمل هاي

-اهووو دوخر

-هههههههههههههه

-انتَ شجابك؟ وشذكرك بيه؟؟ شرجعك لحياتي؟!!

-اجيت اشوف مرتي

-طليقتك!!

-كيان اني مو بمزاج تضحكين وياي بعد كافي

-اضحك شنو؟! هو منو الدزلي وكيل نيابة عنه حتى يطلگني؟؟

-شنو وكيل

-انسان انتَ توكله نيابة عنك حتى يرمي يمين الطلاق!

-شنو؟

-اي اي غشم نفسك وگول مو اني! ورسالتك مال "احياناً قد يكون التخلي هو الحلُ الوحيد"!!

-شنووو؟؟ شهالمستلة!!

-تره انتَ كتبتهااا!!!

-اني اكتب هالتمسلت؟؟ ليييش؟؟

-والله مادري اسأل روحك واسأل توقيعك جوه شكبررره مكتوب "فاهد شمسون"!!!

-ولج اني اتخلى؟؟ اني؟؟ وما لگو غيري انيي يشوهون سمعتي بموضوع التخلي؟؟ والعباااس انام على خوانيگچ وماعووفچ تگلي تخلي الفايخة!

-ولي وليي لا تضحك عليَّ!!

-راويني الرسالة خليني اشوفهاا

-ما اراوييك ورووح مااريدك...

الباب مقفول مينفتح جرني من ايدي ما قبلت جرني من راسي من وره عليه صحت بوجهه وما كملت العيطة وتقيأت بحضنه!! على رجله وعلى كرسي السايق وعلى صندوگ السيارة روحي طلعت ومعدتي تگطعني..

-فاهد: شنو الموضوع حبيبتي شبيچ.. على كيفج على كيف

يمسح على ظهري وجاب كلينس يغطي بي حلگي، ذبلت عيوني وبعد ما گدرت افتحها حط وجهي على صدره يمسح على شعري من وره ويسويلي مساج لراسي، ثواني وحسيت بي يرفع شعري فوگ ويربطه بكتر..

-فاهد

-صرتي احسن؟

-لا تلمسني وخر

-تمام

-وخرني عنك على كيف

-ارتاحي شوية

-ماريد وخرني عنك بس مو سريع... دايخة

لزمني من رگبتي وره يبعد وجهي عن صدره يرجعني لكرسيي، نظف مكانه وحضنه والسيارة شلون مچان واجه يشربني مي وغسل وجهي وحلگي بقيت مغمضة عيوني بس احس بأنفاسه الدافية تلفح وجهي لازگ وجهه بيه ماعندي قوة اوخره عني بس احرك راسي ترجعلي الدوخة..

-كوري ما طلگت اني وما مفتهم سالفة الرسالة

فتحت عيوني على كيف عيونه الصفر اللتحمت بعيوني، مسح بأبهامه على حنچي وخدي ونطق بهدوء يوازي هدوء السيارة..

-ما جاي افتهم شي

حسيت روحي بين النايمة والگاعدة كأني دخلت بحلم.. حسيت بفاهد يتقرب مني ويقبلني ايدي ثگيله وعيوني تزوغل تلمست خده اتأكد يمكن هذا وهم مو حقيقة وبنص الموقف وكأن منبه دگ براسي، دفعته عني فوراً وانطيته راشدي، لزم خده وفتح عيونه مصدوم..

-حقير

-كيان يله عاد

-تستغل ضعفي يا فاشل

-لو استغل ضعفج هسة امطلچ هنا بالسيارة

بلعت ريگي ودرت وجهي من الجهة الثانية امنعه يشوف تعبيرات وجهي المقهورة وعيوني الدمعت، عضيت على لساني قبل لا انطق اسمها واواجهه بنقطة ضعفي..

-سارة

-شنو؟

-سارة السبب بطلاقنا.. انتَ رحت.. رحت لسارة من جابت

خنس صوته وما اسمع غير صوت الهدوء، فاهد سكت! اي سكت وما برر لو ضحك لو تناقش سكت والسكتة دامت لدقايق قبل لا يگول وايده تلف ايدي بقوة..

-صحيح رحت

-امم

-ما بلغت احد بهذا الشي حتى الحماية هربت منهم

-عاشت ايدك

-چنت محتاج اروحلها، محتاج اشوف حلمي ينتهي چان لازم اواجه الحقيقة والواقع واشوف ابنها بعيوني واشوف خوف زوجها ولهفته عليها.. اچذب عليج اذا اگلچ ما تألمت لا والله يا كيان جمرة بگلبي ما طفت ولا اظنها راح تطفى بيوم بسبب الغش والوعود الكاذبة العشتها بسبب هاي البنية ضيعت سنين عمري علمود وَهَم.. بس سارة انتهت بگلبي وفرغ مكانها

صفنت بعيونه الحادة الجَدية و بلعت ريگ رخيت راسي على الكشنات الوره اعض على شفتي احارب دمعتي لا تنزل، بينما هو اردف بهدوء..

-اعرفچ زعلانة وما راضية على تصرفي بس اني...

-انتَ عفتني شهر ونص بدون تبرير لغيابك وبنفس اللحظة عرفت بيها جابت حجزت وسافرتلها؟ لهدرجة تشوفني بديلة فاهد؟

-لا اكيد! اكيد مو بديلة كيان انتِ لو تعرفين شگد احبچ ومتعلق بيج ما تگولين هالشي بس اني چنت تعبان! تعبت وانهد حيلي بعد ليلتنا واعترافچ بمشاعرچ تجاه اخويه...

نصه صوته من گال المقطع الاخير وذب حسرة عالية، كمل يحچي بنبرة مغلفة بالحقد والغيرة..

-هربت منچ ماگدرت ارجعلچ لا اأذيچ وانتقم كيان اني مشكلتي احقد وحقدي يكتل ماگدرت اجازف بيچ.. اول مرة بحياتي تمنيت ادمر مالك وحققت امنيتي وكسرت ظهره بمهمة راد يموت بيها بالمغرب! اكره نفسي لان سويت هيچ بس گلبي نار وما جاي يبرد ورغم هذا اخوية سامحني هو ما يعرف سبب حقدي عليه وليش ما طايقه بذيچ الفترة بس عذرني وگال اعرفك ما تضوج من شي ماصخ خصوصاً واني اخوك وابوك الربيتك...

-مشاعر قديمة هاي فاهد لازم تقتنع بهالشي

-وشيقنع گلبي؟ شيقنع النار المشعولة بيه؟ شيقنع غيرتي وعشگي وتعلقي بيچ؟؟

-بس هذا مو تبرير لتصرفك ولا تبرير تغيب سنتين!

هنا سكت مرة ثانية ما جاوب ولا برر سبب غيابه بهاي السنتين، تنرفزت ودفعته من صدره اوخره مني، جر ايدي غصب مني وگال بعصبية يرجف..

-احبچ كيان لا تحرميني منچ

-ماحبك

-اموت عليج

-مستعدة اموت ولا اشوفك

-تدمرت بهاي السنتين بدونچ لا عبالج چنت بمدينة الالعاب

-واني عشت احلى سنتين بحياتي بغيابك

-هههههههههههههههههه برب***

-ولـ.. ولي هناك.. وليـ..ـي

-هاي شبيها گوة تحچي؟ انتِ شاربة شي متعاطية شي؟؟

-شربت عصير

-شنو نوع هالعصير؟

-عصير كرز

-الي بالحفلة؟؟

-اي

-واني اگوووول شبيها الفرخة

-شبيه

-بابا هذا بي كحول معقولة ما ميزتي طعمه؟

-چذاااااااااب

صرخت اطفر من مكاني ناسية الدوخة وكلشي ضحك بصوت عالي وهز راسه اي..

-لا لا المدير ميشرب وگالو ميحطون كحول بالعصاير!

-بس حطوا اني شربت منه وطعمه واضح تره

-اييييععع شلون تشربوو هم حراام وهم طعمه يلعب النففس

-هيلگة

-ديلا وخر بعدني مزاعلتك

-كيان شسالفة

-وخرر لا تلمسني خليني ارجع لا ينتبهون اخواني على غيابي

-خليهم ينتبهون انتِ وياي

-دروح منو معترف بيك انتَ

-سممم ومررض مو بعينچ اني ولج!!

-لا مو بعيني! وخر احنه متطلگين روح ماريدك!

-بابا احنه ما متطلگييين

-تطلگناااا

-لااااا

-طلگتك اني طلگتتتك

-وانتِ منو وتطلگيني؟؟ خاف صدگتي نفسچ العصمة بيدج؟!!

-طبعاً بيدي لو حتى حكم رب العالمين تريد تغيره؟؟

-باباا هيووو اصحي احنه عاقدين قبل لا نعقد گدام اخوانج ويشرطون العصمة بيدج! يعني هاي سالفة انتِ تطلگيني خررط ومالها صحة بعقدنا!!

-شنوووو

-اي اي احنه ما متطلگين وهسة راح تجين لبيتي غصباً عليج

-ولييي ما اجي عافني سنتين وهسة يريدني الله يعلم شچنت تسوي بهالسنتين!!

-ما خليت شغلة ما سويتها وطاح حظ حظي

-مو اعرفك عاار بعد ابن شمسون الچلب!

-عوفج من ابوية اليوم ترجعين لبيتي مرتي واريدج!

-روح باباا ما ارجع وياك ماريدك اني عشت حياتي ومرتاحة بدونك

-بس اني ما مرتاح بدونج

-لا ترتاح ميهمني

-حتى وره ما زوعتي عليَّ ودمرتيني؟؟

-اي!

-اوگفي

-شنو؟؟

-دقيقة تعالي شوية

قرب نفسه مني يمسح على خدودي تسائلت تصرفه شديسوي هذا، مركز بكل حواسه ويه خدودي يتحسسهن ويفرك اصابعه ومن لا مكان وماعرف شلون وليش تقرب اكثر ولحس خدي..

-ايييييييييع لا تلحسنييي

-مابي طعم

-اااييع ايييعع مخبل انتَ!!

-كوري؟

-خير؟؟

-انتِ هيج بشرتج من الله؟

-شلون يعني؟

-يعني متحطين شي يخفي عيوب لو باودر بوجهج؟ هذا بياضج الحقيقي؟

-اي

-شلون هيج

-ليش؟

-البيضة لازم يصير عدها نمش!

-لا مو لازم

-بس...

-بس شنو؟

تحسس خدودي مرة ثانية وگال بجدية..

-تسمحيلي؟

-شتسوي؟

-اللحسه؟

-لااا ايعع وخر شبييك دا اگلك ما اخلي شي على وجهي!!

-بس حمرتي عدها نمش..

حچاهة بشرود ما منتبه شلون الي ديفكر بصوت عالي وبقى يتلمس خدودي، خزرته لدرجة عيوني طلعت من وجهي طلع يلحس خدودي حتى يتأكد حاطة مكياج لو لا؟؟ طول هالفترة يقارنني بحمرته ويتسائل ليش اني بيضة مثلها وليش ماعندي نمش مثلها؟؟ دفرت ايده بعنف ونترت..

-اني مو نسخة من حمرتك يا غبي!! وماعندي نمش وجهي صافي من الله! وهسة افتحلي الباب لا اتخببببل عليك فااهد

-كيان شبيچ هسة واذا....

-كمممل الجملة والقران اللم الدنيا عليييك افتحلي البااااااب راسي راح ينفجررر

-تمام اخذج للبيت ترتاحين

-افتح البااب!!

بسبب عياطي وخبصتي اله وچذبت عليه گتله راح اتقيء مرة ثانية فتح قفل الباب وخلاني انزل، ركضت ادخل للقاعة گلبي ينبض بجنون وعقلي راح ينفجر.. اذا الرسالة مو منه ومو هو دز الوكيل علمود الطلاق منو سوه كل هذا؟ والسؤال الاهم فاهد وين چان بهاي الفترة كلها وليش عافني؟؟

رجعت للقاعة اشوف عيون نشوان تاكلني اكل سألني بأنزعاج واضح..

-وين چنتي صار ساعة ادورچ!

-كيان: موجودة نشوان بس تعبت شوية وتقيأت

-ليش تقيأتي شبيچ؟؟

-مادري شبيه بس كلش تعبانة تكدر ترجعني للبيت

-اي يله

لزم ايدي واجت ويايه فيروز يمشوني وعيوني تدور فاهد الي اختفى، طلعت من القاعة ولقطته عيني من بعيد واگف بصف سيارته ويباوعلي بدون لا يتقرب.. صديت وجهي عنه وركبت السيارة وعقلي كله وياه ميتة قهر وحرگة ووجع فراقنا كله تكرر عليَّ هسة..

-فيروز: نشوان خفف شوية خاف كيان تدوخ من السرعة

-نشوان بهمس: احچي وياهة شوية

اسمع لهمساتهم سوه واشوف نشوان يتناقش ويه فيروز على مادري شنو، غمضت عيوني وسندت راسي على الجامة اريح راسي شوية..

-فيروز: راح اسافر اني كيان تدرين؟

-كيان: اي گلتيلي بس ما راح تطولين مو؟

-فيروز: ماعرف بعد، احس وجودي غلط هنا وابوية كلش معصب يريدني ارجع

-كيان: بس انتِ عايشة ويه ماريا ليش غلط؟

-بس لا ولد عمي موجودين ولا عمي المن باقية هنا؟ تدرين يومية ابوية يتعارك ويايه حتى ارجع واني معاندة لان اعرف بس ارجع يزوجني لواحد من ولد عمي

-وفاضل؟

همست اسمه بخفوت شديد، بلعت ريگها متوترة ولعبت بأصابعها بدون لا تجاوب، لحيت عليها كم مرة ياله گالت..

-احسه ميحبني بعد

-ليش تگولين هيچ؟

-من بعد الصار بحفلة شُهيب ومسرة فاضل اتصل بأبوية وطلبني منه بدون لا اعرف وبدون لا يگلي اصلاً بس دزلي رسالة هاي شوفيها..

طلعتلي الرسالة الي بتلقونها ابتسمت اهز راسي اعرف هالقصة وفيروز عادتها الي الف مرة وبكل مرة تتأثر وايدها تگوم ترجف.. مدتلي تلفونها تقرالي الرسالة بهمس حتى نشوان ميسمع..

"ماريد احرجچ اكثر واحچي وياچ، فضلت احچي ويه ابوچ واطلبچ منه فوراً بس للاسف رفضني.. خليت ابوي يحچي وياه ما انطانه مجال من عرفنا عجم "ايرانيين" هان ابوي بأسلوبه المتعالي وطبگ الاتصال بوجهه.. فيروز اني شاريچ واريدچ بس ماعرف شلون راح تصفى وننجمع.."

-فيروز: تدرين ابوية ما فاتحني بالموضوع اصلاً! ما گال اكو واحد خطبچ رغم فاضل وره هالخطبة تقدملي سبع مرات! والله العظيم سبع مرات وعُلا گلتلي راح اتخبل كيان شلون اخلي ابوية يقتنع بي!

-والله يا فيروز ماعرف شلون راح تنحل بس حاولي انتِ تحچين ويه ابوچ هو يسمع لكلامچ وميحب يزعلچ دليل من دون بنات عمج انتِ طالعة للخارج بلكت من يشوفج تردي يقبل؟

-لاا حبيبتي ابوية يقبل بكلشي اطلبه منه الا الزواج عنده خط احمر! لو اتزوج واحد من ولد عمي المعفنين لو اگعد واسكت واعنس

حرت وياهة خطية مبين محروگ گلبها وفاضل بعده يستقتل عليها رغم ما سوه وياهة علاقة ولا تعارف نهائياً ما تقرب منها ومو غريبة على فاضل لو تصير حلاله ويحچي وياهة ويحبها بما يرضي الله لو ينتظر لحدما تنحل الامور المهم ميسوي شي حرام ويعصي رب العالمين بعلاقة محرمة..

**

-اي؟

-اكرم: اي هاي نهايتج مسرة گاعدة ببجامتج وعقلچ فاصل بسبب الادوية هذا مكانج الصحيح

-خوش

-اكرم: ههههههههه لا عبالج اخذو ميس غصباً عني تره اني انطيتج الحضانة برضاتي

-مسرة: اي بس سردار شگك نصين قبلها

خزر بحدة وجنح خشمه بعصبية، ضحكت بروح رايحة وعقل شبه نايم على شكله ونستي بالحياة ازعج اكرم واضوجه هسة مو زين من عايفته عايش ويمشي على طوله طبيعي؟

-اكرم: انتِ شيطااانة قيثارة!!

-مسرة: وهسة ياله دريت؟

-اكرم: دمرتي شمسون وولده! شمسون هارب ما يگدر يظهر نفسه لا يتم اعتقاله ومالك خسرتي كللشي واسهم شركتهم بالنازل وحاير بديونه، سجنتي شُهيب بتهمة باطلة وما كفاچ رحتي سجنتي فاهد هم! بس حاب اگلچ خربت خطتچ بآخر لحظة وفاهد شمسون طلع من السجن برائة! مو هو القتل يوسف غيث! الي قتله ابن عمه ناصر!

-مسرة: اوكي

-اكرم: ما مهتمة لان طلع من السجن؟؟

-لا

-ليش؟!

-ماعندي وقت افكر بهالسخافات عندي امور اهم

-ههههه امورچ الاهم حبوبچ ومهدئاتج صح؟

-اكرررم اطلع بررره

-هههههههههههه هاي النهاية التستحقها كل حقيرة تشبهچ

شلت گلاص المي وشمرته عليه وخر بسرعة وتهشم الگلاص انضرب بالطاولة، فتح عيونه بصدمة وعاط..

-حقيرةة ***** چان كسرتي عليَّ!!!

-واكسر عضااامك وخشمك العاالي فوگاااه اطلع برررره

-اني اعلمچ مسرة وربج ما اخليج مرتاااحة انسانة مخببلة وخاااينة انسانة فاقدة الاهلية ميسس اخذها منج اخذهااا واخليج بحسرتهااا

-وللللك بررررروه لا اموووتك برررره

ركضت عليه وبيدي سچينة الفواكه لزم ايدي يحاربني اريد احطها بگلبه وراهة بگلبي اريد اخلص منه اريد اخلص من هالوجع الي جاي ينخر عقلي وگلبي وكلشي بيه.. اخذ السچينة من ايدي وشمرها ودفعني وگعني بالگاع صرخت فاقدة الحيل ماگدر اگوم، بدت مفعول الحباية تأثر بيه واحس ايدي ورجلي تربطت وكأن طلعت من عالم الحاضر ودخلت بعالم الذكريات.. لحياتي قبل..

رجعت ذاكرتي وخيالي لنفس ذيچ الگعدة بصالة بيتي القديم (بيت اكرم) ميس بحضني ارضعها ممة ودخل عليَّ اكرم يگول بأبتسامة..

-اكرم: مسرة اني طالع اليوم لا تنتظريني على العشا

-مسرة: اكرم هو يومية؟ ليش هيچ انتَ شبيك وياي صار حلمي ناكل سوه لو نگعد نسولف مثل أي ثنين متزوجين

-اكرم: اهووو مسرة رجعتي للحن والنگ كم مرة گتلج ما احب وحدة تنگ!

-تره حقي هذا! انتَ زوجي اذا وياك ما احچي واقضي وقت ويامن اروح؟

-حبيبتي يا گلبي يا روحي انتِ خليني افهمچ بطريقة ثانية

حط ايده فوگ كتفي يحاوطه وگعد بصفي على القنفة، سندت راسي على صدره وحطيت ايدي بين ايده، اني سويت هالحركة لو عبالك تكهرب طفر من يمي وركض لنهاية الصالة يضحك ويمسح على شعره وملابسه..

-يله حبيبتي اني طالع لا تنتظريني تمام؟

طلع بسرعة يتهرب بدون لا يبرر تصرفه او يفهمني ليش راح يطلع.. راح بدون لا يباوع لوجه ميس، عافني بالبيت وحدي وبقيت الليل كله انتظره يرجع..

تعبت من هالوضع وتعبت من اسلوب اكرم الناشف اوقات احسه ميحبني وميريدني صح ميأذيني ومخليني على راحتي بس الموضوع بده يصير مزعج ماعنده ذرة غيرة عليَّ لو يدخل للبيت ويشوف زلم گاعدين ويايه هم ميحچي ويگول براحتچ..

تطبع وصار مثل ابوية واني گلبي بارد تجاهه اعرف زواجي منه مصلحة لابوية بس معقولة راح اكمل حياتي ويه رجال مهمل بارد مثله؟

ومثل كل يوم رجع تالي الليل يتطوطح سكران وريحته لا تطاق من وره الشرب واگع على ملابسه وجسمه، شمر روحه على الفراش وراح بغير عالم.. باوعتله اتنهد ما طايقة روحي ماعرف المن اروح؟ احچي لابوية يگول كل الزلم هيجي، اگله اريد انفصل وارفع قضية طلاق اكرم يتخبل يبوس بيدي ورجلي حتى ابقى و يصير اللين من الزبد ويايه ياخذله شهر شهرين زين ويرجع اتعس..

حملت بـ ميس واحسني متندمة اخاف تتورط هالطفلة ويايه بأب مهمل نفسه بس شسويله هو اكل گلبي على موضوع الاطفال وابوية محاربني يگول هذا حقه وام اكرم دمرتني بسمها لحدما ماتت هي تنق بگلبي لحدما حملت..

مرت الايام اني حايرة بين الشغل وميس واكرم ماله علاقة بيها نهائياً ميتقرب منها ولا كأنها بنته حاير بشغله وطلعاته توالي الليل، اكثر من مرة راقبته واشوفه يروح للمكتب مالته ويبقى للفجر ياله يطلع ارتاحيت نوعاً ما من عرفته ميخوني..

-اكرم: مسرة شنو رأيج نطلع سوه اليوم؟

-اييي نطلع بس وين؟

-نروح لحفلة صديقي يله لبسي شي حلو انتظرج جوه

-مثل شنو اللبس؟

-فدشي جذاب ومغري

هزيت راسي وصعدت لغرفتي ما تفاجأت من طلبه لان هذا اكرم يموت على الملابس المغرية ودائماً يشتريلي اشياء فاضحة لدرجة اني استحي اللبسهن بره فـ اللبس فوگاهن سترة..

بدلت ملابسي ونزلت استقبلني صفيره ابتسمت ووگفت مقابيله مباشرةً متوقعته راح يتغزل بيه او يگول شي حلو بس ما سوه أي شي من هذا، بس اخذ ايدي وشال كارسيت ميس المتنقل وطلعنا، حطينا ميس عند صبا واحنه رحنا لحفلة صديقه..

الحفلة صايرة بملهى ليلي، كل مرة يجيبني اكرم لملاهي ليلية احس بشعور غريب اني مسرة الي اعشق الصخب والأجواء الهوسة بس الملاهي الليلية مو جوي يكش جسمي من الريحة والاجواء اشوف مناظر مقززة متعجبني..

دخلنا جوه هد ايدي وراح يسلم على جماعته واجه يعرفهم عليَّ، تعرفت على نسوانهم وگعدنا سوه حول طاولة وحدة وجابو مشروبات كحولية اشكال كلهم شربوا عدايه ما اتقبله ريحته متنجرع مو انوب اشربه..

شوية وگام اكرم ويه ثنين زلم اصدقائه ونسوانهم وراحت وياهم وحدة صديقتهم ما متزوجة، اندار عليَّ وگال وره ما باس خدي..

-ما نتأخر مسرة بس عدنا شغل ضروري هنا لازم نكمله

-مسرة: اففف كالعادة

-اكرم: ههههههه سرور شنسوي بعد الشغل ورانه ورانه وهاي القضية تأخرنا بيها ما يصير تتأجل

هزيت راسي متفهمة هاي بكل مرة نطلع سوه ونلتقي بذولة جماعته يجيبلي الشغل بالنص صرت حتى ما اهتم واللتهي اني هم اكمل شغلي بغيابه..

تأخر الوقت وتأخر اكرم ما رجع، باوعت للساعة مرت فوگ الثلاث ساعات والاجواء كلما جايهة تسوء هنا.. قررت اگوم ادوره وين سألت عنه كم شخص ياله جاوبوني وگالو دخلو بهاي الغرفة الي گدامي..

تشكرت منهم ورحت للغرفة مديت ايدي لمقبض الباب توقعتها مقفول لان اكرم لو يموت ميشتغل بمكان بابه مفتوح بس للعجب چانت مفتوحة.. فتحت الباب وچان اشوف اتعس منظر اشوفه بحياتي...

منظر شل اطرافي وتمنيتني عمية بلحظتها! منظر حتى بالافلام الاباحية اتوقع محد يشوفه!! شفت اكرم واصدقائه ونسوانهم كلهم سوه!! كلهم كلهم كلهم!!

من الصدمة بقيت بمكاني فاتحة عيوني ما مصدگة الدا اشوفه، لگفتني وحدة من البنات وصاحت بأكرم تنبهه بوجودي بعد ميعرف شلون يلبس ملابسه ويجيني..

ركضت بكل ماعندي من سرعة اطلع من هالملهى الحقير اجرت تكسي اريد اطييير لبيت ابوية اشتكيله واشكيله حالي بس ما لحگت اكرم لزمني من شعري تعاركت وياه بنص الشارع عركة طيحت حظه بالمسبات والضرب ما اخلي يلمسني قرفاانة لعبانة نفسيي من المنظر مدا يروح من عقلي..

قيد ايدي وشالني غصب ودخلني سيارته بأستعانة نفس اصدقائه الچان يسوي الحرام وياهم! كلهم تگابلو عليَّ تخبلت گمت اصيحح مثل المجنونة الطريق كله مچتفين ايدي ورجلي واكرم طار بيه للبيت.. شالوني مرة ثانية ودخلوني لغرفتي فوگ واخذ مني موبايلي وشكو وسيلة اگدر اتصل بيها على احد وحبسني هنا..

-مسرة: افتتتتح الباب يا نذذذل افتتتتح الباااب يا عاشق الزلم والنسواااان

-اكرم: صوووتچ ما اسممعه لا اجي اطيييح حظظظچ

-مسرة: اشتكي عليييك اخليك تخييس بالسجون يا عااار يا قذررر

دخل للغرفة وقفل الباب علينا وتكاتلنا! يضرب واني اضرب دميته ودماني صرنا واحد فوگ الثاني وهو مصدووم شلون دا اضرب وادافع عن نفسي وشلون دا اتحايل عليه واضربه بأماكن ما متوقعة..

-اكرم: شيطااانة

-مسرة: ادمررك اكرم طلعنيييي مناااااا

على اثر صياحه وعركاته دخلو ثنين علينا بالغرفة شالوني شيول وربطوني بالچرباية تخبلت اضرب براسي واشيل بجسمي وارگعه، اعيط انبح صوتي من صارو يفرغون الغرفة بالكامل! فضوا الغرفة ما خلوا بيها غير السرير النايمة عليه حتى الفرشة المارونية الي مغطية الچرباية شالوها وعافوني بسرير ابيض خالي!

حبسني بهاي الغرفة لشهرين ضبط! شهرين اني ما شايفة بنتي! شهرين اني ما اشوف غير الحيطان هنا! شهرين ماعرف شنو ديصير بالحياة الخارجية! شهرين ابوية عباله اني مسافرة وملتهية! شهرين اني بغير عالم!!

ما خلى ادوية ما انطاني ما خله ابر ما حقنني بيهن ما خله شي ما سواه بيه، اغتصاب، ترهيب، خوف، تهديد واخر مرة كانت القاضية من دخل عليَّ ثلاث زلم واني شبه عريانة وصورني وياهم..

اگدر اصنف هذا اليوم بأتعس يوم بحياتي على كمية الخوف العشتها! على كمية الاهانة وهمه يصورون بجسمي وكلشي بيه! على كمية الذل الي صار واني ابوس ايد اكرم حتى يوخرهم مني وميخليهم يسوولي شي ووعدته احفظ سره وما اشتكي عليه وحتى طلاق ما اتطلگ بس خليهم يعوفوني ويبتعدون..

قبل بتوسلاتي بس صورهم وهمه يمثلون دنسوي الغلط، ربي ستر عليَّ ونجاني منهم ومحد بيهم لمسني بطريقة تأذيني او تضرني بس صورهم! صورهم واخذ التصوير للمحكمة وهو بنفسه رفع قضية طلاق علساس اني الخاينته! واني الاخذ حبوب مهدئة واني الفاقدة الاهلية!

الكل صدگه وچذبوني حتى ابوية! حتى ابوية صدگه وما حچى كلمة وحدة ودافع بيها عني وگلي بالضبط جملة "كسرتي وجهي بين الناس"..

تدمرت تخبلت من طلگني اكرم الكل شهد عليَّ زور وجاب خواته العايشات بغير بلد هم شهدن ضدي وما كفاهم هالشي اثبت بالمحكمة اني فاقدة الاهلية واخذو مني ميس، اخذو ضوه حياتي وبنيتي وتعبي، اخذو حبيبتي مني وما الي حق اشوفها غير كل اسبوعين مرة!

عشت اتعس ايام حياتي تخبلت وفقدت عقلي، اكرم قدم بلاغ بالمحكمة اني احتاج مصحة عقلية وجاب دكاترة مدفوعين حتى يأكدون كلامه وگالو لازم اروح اتعالج كل هذا حتى ما افضحه وادمر مستقبله! دمر حياتي ومستقبلي في سبيل يحافظ على صورته بين الناس! اخذوني غصب عني للمصحة سنتين وشهرين عشت بيها تخبلت بالزايد اتعارك واعنف نفسي واشلع بشعري واصرخ ليل نهار..

-مسرة: طلعووووونيييي مناااااااا راح امووووووووووت

يركضون عليَّ يچتفون ايدي ويضربوني ابر مهدئة جسمي فقدته، طولي فقدته، قوتي فقدتها.. ايام وصلت بيهم يربطوني بالشراشف حتى يسيطرون على عصبيتي وجنوني، صرت ماشوف غير اللون الابيض بأي مكان وما اسمع غير الهدوء.. كرهت الهدوء كرهته لدرجة اريد املخ روحي من اگعد بمكان هادئ..

صارت متعتي وسولتي بالدم اعشق لونه احب اشوفه، اطول اظافري عمد وادچها برگبة الدكاترة وبصدورهم اشخطهم اطلع الدم واتونس عليه، اضحك من يتأذون وافرح من اشوف واحد متألم صرت اتعطش واريد اأذي بعد بس خربوا ونستي من صارو يقرضون اظافري ميخلوهن يطولن..

انام واگعد على كوابيس، اتحلم بـ ميس تبچي تريدني واني مربطة ماگدر اروحلها، احلم بأمي تعاتبني امي تريدني اخذ حقها وثارها من شمسون واگعد من النوم مفزوعة اگعد ابچي واضرب نفسي اريد اطلع منا احتااج اطلع منا واخذ حقهاا واروي گلبي بموته!

**

-مييييييس رجعوووولييي ميييييييسسس

-صبا: مسرررة اصحي انتِ نااايمة هااي ميوسة يمچ سرووور

-مسرة: مييس صبااا اخذوهااا مني اخذووووهااا حرمووني منهااا

-صبا: سودة عليَّ مسرة حبابة گعدي هاي بنتج ولج ميس خايفة متقبل تتقرب منج گوومي لا تخرعيها

فتحت عيونها جاحظتهن على وسعهن، اباوع لحالها واگعة بالگاع وشعرها متناثر على الارضية، ماعرف صارلها شگد على هالوضعية لان هسة ياله وصلت اني وشفت ميس تحاول تصحيها وتبچي على امها..

-مسرة: ميوسة

-صبا: ميس تعالي لامج

تقربت ميس بس بعدها خايفة باوعتلها مسرة وابتسمت ومسحت الدموع من عيونها، حضنت بنتها وبچت بالخنسة عليها.. انمرد گلبي على حالهن مسرة صارت انسانة ثانية هالعلاجات دتدمرها دتخلي عقلها يفصل وتروح لغير عالم..

-صبا: انتِ زينة سرور؟

-مسرة: اي زينة

-لا تاخذين هذا العلاج بعد لا تدمرين نفسج

هزت راسها وگامت من الگاع مشت على الزجاج المتكسر بدون لا تتألم او تحس بي، متت من القهر جريتها عنه بسرعة صفنت عليَّ مستغربة ليش سحبتها هيچ نزلت عيوني اخليها تشوف الدم الطالع من رجليها باوعتله وابتسمت..

-مسرة: احب الدم

-صبا: سرور انتِ مو بخير تعالي اوديج لفراشج

استسلمت تخليني امشيها، اخذتها فوگ وميس گلتلها تبقى جوه تلعب.. نيمتها على الچرباية وهزيت راسي معترضة على حالتها، جبت ملقط و شاش ومعقمات اعالج رجليها واطلع الگزاز الناعم الي طب بيهن وهي متمددة وصافنة بالسگف..

-مسرة: گلبي

-صبا: شبي؟

-مسرة: يوجعني

-سلامته حبيبتي، سرور لا تأذين نفسج طُز بأكرم وطُز بوجوده لا تسمحيله يضوجچ

-ماگدر بس اشوفه اتذكر الصار بيه بسببه

-الله ينتقم منه بس دائماً تذكري ابوچ وگفلچ وطلعچ من المصحة ورجعلچ حياتج حبيبتي

-ههههههههههههههههه

-سرور

-هههههههههه هو منو دمرني غير ابوية منو القدمني وليمة على طبق من ذهب لاعدائه غير ابوية؟

-حبيبتي مسرة

غمضت عيونها بقوة وهمست بروح محترگة..

-ابوية دمر حياتي! ومن طلعني من ذاك المكان بشرط امشيله شغله واتفق ويايه يرجعلي ميس بالمقابل.. سرقو احلى سنين عمري

-اهدي يروحي

-شمسون.. شمسون السبب بكلشي

-حتى بزواجچ من اكرم؟

-امم

-شلون؟

-هو العرف ابوية على اكرم وبسببه تزوجته

-بس چنتي موافقة على اكرم انتِ

-توقعت راح اخلص من التدريبات العنيفة وجماعة ابوية واتحرر بزواجي من اكرم، بس طلعت من سجن ودخلت لسجن ثاني

-خلص مسرة انسيهم واللتفتي لحياتج

نزلت دمعتها وغمضت عيونها تحرر باقي الدموع، هزت راسها بـ لا وگالت بغصة..

-شُهيب راح صبا

-هذا حظه بعد

-انسجن بسببي

-لا مو بسببچ لا

-اني دمرت حياته

-لا حبيبتي لا يروحي انتِ مالج ذنب

-شُهيب يكرهني اني اذيته واذيت اخوته بچيت امه عليه صبا ماريا شنو حالها هسة

-هي بخير بعدها متعرف هو بالسجن گلولها مسافر

-الله ياخذ شمسون الله ينتقم منه حرمني من امي ومن حبيبي ومن بنتي ومن كلشي حلو بحياتي

-شمسون بعده ميعرف انتو تعرفون هو السبب بموت امج؟

-لا، عباله ابوية ميدري عباله بابا بعده يشوفه صديقه المقرب الساعده يهرب ويه حبيبته ويستقر بره

-ما شافچ من كتل امچ؟

-لا

غطت وجهها وشهگت بدموعها، تبچي محروگة گلب والدموع مغرگة وجهها، كملت بقهر..

-بالبداية خلانه نسوي حادث بطريق مفتوح سريع حتى محد يشهد على الجريمة، چنت نايمة بالكشنات الوره وما احس الا سيارتنا تطب بسيارة ثانية غبت عن الوعي ثواني وفزيت على صوت طلقات تزرف بجسم امي وبطنها من الصدمة ما صرخت شخصت عيوني من مديتها من الجامة اشوف شمسون واگف يراقب واربع ولد وياه والي شايل المسدس ولد مراهق وصار يركض يبتعد من السيارة ما شفت وجهه بس گفاه.. شمسون گال بالضبط "عفية بـ ابني، عفية وليدي، عفية بابا" صاحها بعلو صوته منتصر وهو يشوف امي مزرف جسمها بالطلقات!

-يمة!

-وما كفاهم هالشي صبااا طبو للسيارة واخذو جثة امي وياهم! ولج اخذوها اخذو امي وعافوني ما شافوني! ختلت وره كرسيها مگطوع عني النفس من الهبطة گلبي ماات واني اشوفها تنزف من كل مكان!

-سودة عليَّ وشلون طلعتي من السيارة؟؟

-اجه واحد ساعدني ماعرفه منو بس هو الي سوه بلاغ الشرطة واخذني وياه ورجعني لابوية

-وبده ثاركم من هذا اليوم؟

-وبدت قصتنا وثارنا من هذا اليوم..

ذبت حسرة قوية وگامت من فراشها تمشي على رجليها اللفيتهم الها، راحت توگف گدام الحايط الي معلگة عليه رزنامة عملاقة واخذت قلم احمر ورادت تشخط يوم منها..

-صبا: بعده ما صار يوم جديد مسرة

سدت القلم بدون لا تكتب شي وذبته بالگاع، نزلت راسها تمسح من وجهها الدموع الرجعت تنزل.. هذا حالها من يوم دخل شُهيب للسجن هي لو تباوع لصورهم لو تنام لو توگف گدام هاي الرزنامة وتحسب يوم يوم لطلعته..

رجعتها لفراشها بلكت تنام وترتاح بسرعة غفت، نزلت اللعب ويه ميوسة واشوف واجباتها شنو عدها اساعدها بيهن، وكلتها وسبحتها وبدلتلها ملابسها ورجعت لمسرة فوگ خفت تگعد وهم تاخذ حبة مهدأ..

مدا اعوفها لحظة عشت هنا يمها اخاف تدمن على الحبوب وشلون بينا بهالورطة، اليوم رحت لحفلة تكريم كيان اخذت حبة وره ظهري وهذا حالها..

گعدت بصفها على السرير اباوعلها بغير عالم، مسحت على شعرها الناعم افكر بتاليتهم شلون؟ شوكت تستوعب وتتقبل فكرة سجن شُهيب مو هذا كله من عمرها!

بينما اني گاعدة هالگعدة ضوه تلفون مسرة الحاطته على الميز بصفها، رج بأتصال من رقم غريب شلته اشوف منو ماعرفت الرقم تركته ممهتمة ورجع اتصل من جديد، خلصت الدگة ودز رسالة على الواتساب كاتب..

"اني هنا"

تسائلت منو ممكن تكون هاي او هذا بس ما تدخلت بخصوصياتها وما فتحت التلفون، ابتسمت من انغلق التلفون وبينت خلفية تلفونها حاطة صورتها هي وشُهيب ومبينة الصورة من چانو بـ اسبانيا لان على البحر وكمية الحب الي بالصورة تجنن.. هو لاف ايده على خصرها ومثبت حنچه على كتفها وهي مسوية بوز وماخذه السلفي..

رجعت التلفون بمكانه وجبت ميس ويانه ونيمتها بنصنا وغفيت، جرنها للصبح بعد ما گعدن لا مسرة ولا بنتها.. حسيت الصبح على صوت طگطگة خفيفة كعدت على حيلي شفت مسرة مبدلة وواگفة تمشط بشعرها..

-صبا: صباح الخير، شنو ساعة بيش؟

-مسرة: صباح النور بالـ 9

-طالعة؟

-اي

-وين؟ اشوفچ متحمسة ومرتاحة ان شاء الله خير

-خير خير

گالتها بأبتسامة واخذت جنطتها، باست بنتها وطلعت من الغرفة لمادري وين بس مو مهم المهم مرتاحة وشكلها صاحية وبخير..

**

"مسرة"

نزلت جوه مستعجلة لاگيت ابوية بالصالة ما سلمت عليه عفته يصيح بأسمي وتركته اطلع من البيت، ركبت سيارتي وسقت بكل سرعتي للمكان القاصدته وگلبي ينبض بجنوون..

وصلت بركت سيارتي ونزلت اهرول، لحدما وصلت لبوابة السجن شفته واگف وايده بجيوب الكوت مالته، خففت خطواتي ورحتله اوگف مقابيله مباشرة سلم عليَّ بهزة راسه وطلع ايده من جيوبه..

-مسرة: شكراً لان تركت اشغالك واجيت

-الاطلس: اجيت اشوف صاحبي

-مسرة: راح يفرح بشوفتك

-ندخل؟

-مسرة: اي

مشينا اني وياه كتف بكتف ندخل السجن، حچينا ويه الحرس ودخلونا للضابط هز راسه اول ما شافنا واجرى كم اتصال يلبي طلبنا الي صار اشهر ننتظر يوافقون عليه، وگفت انتظر على نار دقايق وگال يله دخلوا..

مشيت على دگات گلبي معدتي خبطت من التوتر وكأني رايحة اشوف موتي، دخلوني لغرفة بيها شباك مظلل اني اشوف البره وهمه ميشوفوني ولا يسمعوني بينما الاسباني دخل بالغرفة الثانية وگعد گدام طاولة منتظر دخول شُهيب عليه..

صار اشهر اشتغل على هالموضوع ميسمحون نشوفه بهالطريقة ما خليت واسطة ما دخلتها لحدما وفرولي غرفة شباكها عازل اشوفه منه، ضغطت بكل قوتي على ايدي اسيطر على اعصابي لا انهار هنا، من يوم الحفل لهذا اليوم اني ما شفته! ما شفت شُهيب ولا رويت گلبي واشتياقي بطلته الاحبها..

دقيقة ووگف نبض گلبي واني اشوف ثنين شرطة يمشون وبيدهم شُهيب يدخلو للغرفة چان لابس كبوس مغطي شعره الحلو اكيد بسبب برودة السجن، عيوني ضحكت من شفت طوله يدخل ويسلم على الاطلس، غطيت حلگي بيدي اخفي ضحكاتي المجنونة، رجلي ما ثبتت من رعيشها صرت اطفر بمكاني بحماس وفرح ممزوج بالحرمان..

شكله متغييير كلش وجهه تعبان وعيونه جواهن هالات وعضلاته هفتانة، ابتسامته ما شفتها حتى من سلم على صديق عمره سلم بجمود وگعد على الكرسي ينزل عيونه وضام كفوف ايده لبعض..

-الاطلس: مشتاقين نمر

-شُهيب: تسلم

-الاطلس: شلونك حبيبي

-بخير

-شلون ماشية ايامك

-نفس بعض

-صحتك تحسنت عن اخر مرة؟

-اي

-بعدك بالسجن الانفرادي؟

شهگت تحت انفاسي! شُهيب بالسجن الانفرادي؟؟ يعني فوگ الضيم حاطي بالسجن الانفرادي ليييش؟؟؟

-شُهيب: بعدني

-ليش ما تطلب تطلع منه

-ماريد

-ليش شُهيب؟ ليش ما جاي تحاول تتأقلم خوية صارلك سنتين هنا اني خايف عليك لا يصير بيك شي!

-ما يصير بيه شي

-ما فرحت بقرار تخفيف الحكم؟

-الحمدلله

-لطيف

-شكراً لان اجيت

-انچب لا تسوي هالسوالف

-اعنيها اطلس

-شلون ما اجي شُهيب

-متبهذل بسببي

-راضي بهذا التبهذل كل الولد يوصلون سلامهم الحار الك ومنتظريك اول ما تطلع تزورنا بالمغرب

-الله كريم

-اجيت اراويك شي

بقى منزل عيونه ميرفعهن شوفته بهالحال دمرني واخذ من حيلي ليش ميرفع عيونه ليش ميخلينا نشوفهن شنو خافي بيهن شُهيب وخايف صديقك يكشفك!

-الاطلس: شوف

مدله صورة صغيرة طلعها من جيب سترته، اخيراً رفع عيونه حبيبي وشاف الصورة، تأملها شوية وگال..

-شُهيب: هذا انتَ بس...

-الاطلس: ابيض هههههه

-بالضبط

-هذا ابني آدم

وهنا شفت طيف.. طيف مو حقيقة طيف ابتسامة خفيفة جداً تنرسم على وجهه وگال وهو يتأمل الصورة..

-الله يحفظه اخيراً شفنه ادم

-وعدتك اجيبلك صورة اله بس ما قبلوا ادخل موبايلي طبعتله صورة حتى تشوفه

-جميل ما شاء الله

-يوم الالك ونشوف ابنك ونفرح بيك

ذبلت ابتسامته وما جاوبه، غير الموضوع بسرعة من دور عيونه بالغرفة الگاعدين بيها وتسائل..

-ليش اجينه هنا؟ بالعادة نتشاوف بذيچ الغرفة

-اني طلبت نجي هنا حتى ناخذ راحتنا بالكلام

-ها وقبلو بسرعة؟

-حركت جيبي

-اختصاص انتَ

-چا شلون

-اطلس منو طلب اعادة حكم لقضيتي؟

-ليش تسأل؟

-لان شاك بيك ماكو غيرك مخبل ويدفع هالگد فلوس على شي تافه

-اعادة حكمك وتخفيف السجن تافه بالنسبة الك شُهيب؟

-اي

-خاب دنچب تره كاره روحي وانتَ ماكو حياتي انگلبت بسببك صاير مثل المطي رجل هنا ورجل بالمغرب ما يهلي گلبي اعوفك

-عوفني اطلس، اگعد ببيتك واهتم بشركتك واسكت ابنك وزوجتك اولى بيك

-ولك انتَ اخوي شلون اعوفك! انتَ مو واحد عادي لو صديق عابر بالنسبة الي ما انسى وگفاتك وما انسى اليوم التعرفنا بي على بعض!

-ولا اني انساه

ابتسم الاطلس وگال بشرود..

-چنه ما نعرف احنه اعداء

-ولا نعرف ابوية يشوف دم سنونه ولا يسمع بطاري ابوك

-ولا الطامة الوگعت على راسك وراسي من أهالينا اكتشفوا احنه اصدقاء وبقينا نتشاوف بالسر اليسمعنا يگول مسوين مكسورة ونخاف لا ننلگف هههههه

كبرت ابتسامة شُهيب وعفس وجهه..

-الله ياخذك دائماً تفكيرك وصخ يالدايح

-ااخخ شُهيب شيصير لو ترجع ذيج الايام وارجع لعمر العشرين؟

-ياريت ترجع

-نلتقي بنفس الحديقة وتشوفني واني اتعارك وتجي تفزعلي بس لان سمعتني احچي عراقي

-ما چنت اعرفك منو طلعت من المحاضرة واشوفك متكامش ويه ثنين ووضعك مو زين وجهك عرگان وتعبان حسيت بيك مو طبيعي..

-چانت راح تزورني النوبة

-بالضبط، اول ما اجيت اتعارك وياهم وافزعلك انتَ وگعت وانلزمت حرت اساعدك لو افطس ذولة

-تالي فطستهم واجيتني ومن يومها انتَ الضلع الما ينشلع ابن الكلب شمسون

-وانتَ ابن محمد العار

-شلون مكس يشگ شگ

-ما اصدگ تكاتلت ويه ثنين بوكتها بس لان گالو عنك غني ومدلل؟

-منعل اني هههههههههه

اسمعلهم وابتسامتي من الاذن للاذن هالثنائي وگعدتهم وسوالفهم صنعوا يومي، نسيت همي لدقايق واني اشوف شُهيب نوعاً ما بده يحچي ويتجاوب ويه الاطلس وذاك ما خله فرصة تمر بدون لا يزعج شهوبي لو يداهره..

-الاطلس: انزع كبوسك طالع چنك راس لهانة

-باردة جوه

-انزع انزع بضلوعي ادفيك

-اووع ماريد

-طاح حظك ما تريد حضني؟ مو صوچك وعلي

نزعه الكبوس غصباً عنه وهنا كانت الصدمة! هنا صابني الانهيار! دموعي ماگدرت اسيطر عليهن ولا صوت شهگاتي واني اشوف شعره الاعشقه ماكو! شعره ماكووو!! شعره مزيني!! خصلاته العسلية الناعمة اختفت!!

ماتحملت كل هالالم شوفته بهالحال كسرتني فوگ كسرتي، كسرت شكو امل وسعادة انخلقت عندي بشوفته، تدمرت روحي اشتعلت بيها ناار ماگدرت اوگف على حيلي وگعدت بالگاع لامة رجليه لصدري وابچي بالسكتة..

اسمع لصوته يحچي ويه صديقه بس بالي مو وياهم بالي كله ويه كسرته وعيونه وشعره وحياته وكلشي فقده بسببي.. اني سلبت حياته سلبت احلامه.. سلبت فرحته بشوفة طفله! ابسط احلامه چان طفل، حلم صعب صار هالطفل ومو راضي يتحقق!

طلعت من الغرفة انتظر الاطلس يكمل زيارته وتمشيت اطلع من الممر الي بي الغرفة واروح للممر الثاني خاف يطلع شُهيب، اروح واجي والتفكير ماكل راسي، بينما اني امشي وعقلي فاصل انرگعت بجسد رجال ضخم دردم بلغة ما مفهومة وبعدها گال بالانكليزي..

-what the f***!!!

گلبت عيوني واعتذرتله ما اقتنع وگلب وجهه عليَّ يكمل بالانكليزي..

-قيثارة انتِ ليش ابد ما تنتبهين؟!

-مسرة: موزس بالي مو وياي شبيك شسالفة!

-موزس: يله ميخالف هالمرة سماح

-شعندك هنا؟

-جاي اشوف البرو

-تأخرت عنده زيارة وخلص وقت الزيارات

-وات ذا هييل!! تره اني ماخذ موعد من اخوانه صار شهر! گلتلهم الزيارة هاليوم الي!!

اول ما كمل جملته اجه الاطلس عطره يسبقه يمشي برهاوته المعهودة ايد بجيب بنطرونه والايد الثانية يعدل ربطة عنقه..

-موزس: وات ذا ****!!!!! هذا انتَ ماخذ زيارتي!!!

-الاطلس: عندك مانع؟

-موزس: طبعاً عندي مانع طبعاااً صار شهر انتظر هاليوم اجيت من روسيا لهنا عايف شغلي وحياتي حتى اشوف شُهيب تالي انتَ تجي على الحاضر محضر تدخل تشوفه قبلي!

-الاطلس: اي

-موزس: انتَ انسان استغلالي تنتهز الفرص لصالحك داائماً!

-الاطلس: شسالفة تره صديقك صديقي والي حق اشوفه مثلك بالضبط!

-موزس: شُهيب صديقي قبل لا يكون صديقك! هو اخوي!

-الاطلس: واخوي هم!!

-اخوي قبل لا يصير اخوك!

-بين ابوه وابوي عداوة يعني اني اقرب!

-تجمعني عداوة ويه اخوانه العارات من سنننين!

-اني...

-مسرة: شباب كافي!! شكلكم مثل الضراير اليتعاركن على رجلهن تره شُهيب صديقكم مو زوجكم!!

كشر موزس ما عاجبه والاطلس ضحك مستهزأ، قبل لا تگب بيناتهم مرة ثانية قاطعت النقاش وعبرتهم ياربي يتعاركون عليه ويغارون من بعض عبالك شُهيب سيارة لو قطعة ملابس!

رحت لحارس السجن الي ادفعله بكل مرة علمود يزودني بالمعلومات هنا ادز الفلوس بيد سام بدون لا اجي حتى ما انكشف، وگفت گدامه وعرفته عن نفسي وفوراً سألته بلغة البلد..

-شُهيب من شوكت بالسجن الانفرادي؟!

-صار سنة تقريباً

-ليش؟

-صارت مشكلة چبيرة بينه وبين واحد بالسجن حاط دوبه من دوب شُهيب تكامشوا وتعاركوا عركة حامية وثنينهم عزلوهم

-وبقى هناك؟؟

-لا طلعوا من الانفرادي بس هو طلب يرجعله

-ااااوف ياربي!!

-لا تخافين مدام هو عايش

-شنو الفائدة عايش جسد بلا روح!

-مدام هذا السجن شنو بيدنا

-تمام تمام.. مهتمين بي؟ اكله؟ شربه؟ ملابسه؟ دتجيبوله احتياجاته؟ عطور وملابس ومكاين حلاقة وغيرها مو؟

-نعم مدام بس اكو بعض الامور بصعوبة جاي ندخلها لانها ممنوعة وهو بده يشك بالموضوع فـ مشينا بكلامج وگلناله اخوانه واصدقائه جاي يدزوله

-اي ممتاز، واهتم بي زين واهتم لنظافة مكانه فرش اسنانه غيرهم كل ثلاث اشهر مو تنساهن تره شُهيب نظييف

-مدام هذا سجن للمجرمين مو فندق خمس نجوم

-مجرمين شنو؟! تره التحچي عنه رجل اعمال معروف! قضى تسع سنوات من حياته دراسة! وسنين نجاح بعمل نظيف مية بالمية! انتبه لكلامك ووازن حروفك!!

-تمام

هز راسه مأيس ماعرف ديسوي الي اطلبه منه صدگ لو يچذب عليَّ، سام گلي اكو ياخذون الفلوس وكلشي ميقدمون للمساجين بس يقطون بأهاليهم.. ويمكن اني هم دا ابالغ يعني هو بالسجن مو بفندق بس مو بيدي گلبي نار واريده يرتاح قدر المستطاع..

دفعتله شهريته بدون لا يشوفني احد لان لو انلگف دا ارشي يروح بستين داهية، طلعت من السجن وودعت الاطلس وموزس وقبل لا نفترق گلت..

-مسرة: الاطلس راح ارجعلك باقي الفلوس ما ناسيتهم

-الاطلس: تحچين صدگ انتِ؟! اكيد ما ارضى بهذا الشي!

-موزس: what the heck are you talking about

جاوبته بالانكليزي..

-دنحچي على فلوس المحامي والقاضي مال اعادة حكم شُهيب چان مبلغ كلش ضخم ماگدرت اسحب هالگد فلوس من البنك لا ابوية يحس فـ الاطلس دفع نص واني نص

-الاطلس: مسرة گتلچ اني ادفعهم كامل انتِ ليش تعاندين؟!

-مسرة: واني ماريدك تدفعهن! اني مو ماعندي امكانية حتى تدفع بدلاً عني بس گتلك ابوية يحس وماردت اخرب شغلنا

دردم عليَّ بالمغربي متنرفز وموزس يفر بيده ابتسمت على حركاتهم وقررت اتشكر منهم مرة ثانية..

-ماعرف شلون اتشكركم، بسبب فلوس الاطلس ومعارفك موزس گدرنا نعيد محاكمة شُهيب ونخفف حكمه

-الاطلس: ولولا اصرارچ والمحامي القوي الوكلتي چان ما تخفف الحكم مسرة ما جاي افهم ليش ما تردينا نحچي ونگول انتِ الساعدتي؟ ليش مُصرة تبينين لـ شُهيب وللكل اني وموزس التكفلنا بالموضوع كامل؟

-مسرة: ميخالف شباب لخاطري هالشي لا يطلع من بيناتنا

-موزس: ما راح يطلع بس بعدني ما ارتاحيت هسة لو تخليني اهربه من السجن تره اگدر اهربه ولا من شاف ولا من درى انتِ بس انطيني مجال اجيب جماعتي واجي اطيح حظ ولد الزنا الجوه واحرر صاحبي!

-مسرة: ويظل عايش حياته يهرب من دولة لدولة؟ لا موزس شُهيب ما راح يقتنع بهيچ حياة

-الاطلس: عوف سوالف المافيات الوضع مو مال هالحركات

-موزس: انتَ عندك مشكلة شخصية وياي؟

-الاطلس: لا

عفتهم واحد مطنگر على الثاني ويسمع الثاني حچي وصعدت سبارتي وسقت لمكاني المتعودة اروحله..

نزلت من السيارة اول ما وصلت ووگفت گدام عمارة شُهيب الچان ساكن بيها، دفعت اجار شقته ما سمحتلهم ياخذوها منه لو يفرغون منها أي شي وكل فترة والثانية اجيها انظفها بيدي بحياتي ما نظفت مكان وما متعودة بس ماگدر ادخل احد هنا اريد ريحته تبقى ببيته واني ارتبه واتذكره بكل قطعة اثاث موجودة..

مسحت البيت وكنسته وسقيت زريعاته، ابتسمت من شفت وردة متفتحة بوحدة من زرعاته وخلق بداخلي امل شُهيب يجي يشوفها ويفرح.. هاي الزريعات من ماريا جبرته يحطهن بالشقة ويهتم بيهن علمودها وكلما تطلع وردة يقطفها وياخذها لأمه..

كملت كلشي ودخلت غرفته تمددت بفراشه وحضنت مخدته اتنفسها واشم ريحتها مابيها عطره رايح بسرعة جبت شيشة العطر مالته وترستها ونمت عليها مرتاحة وجريتها نومة للعصر ياله گعدت..

لملمت نفسي ورتبت اخر اللمسات، شعلت شمعته الاحبها و سويت گهوة بالبيت بس ما شربتها لان ما احبها بس المهم ريحته تبقى موجودة بالبيت ومتتغير، ابتسمت من فاحت الريحة بالمكان، اخذت نفس عميييق يتغلغل بريتي ورحت اگعد على الطاولة المقابل القنفة مالته.. نفس الطاولة الگعدت عليها بيوم اجت نورسين واخذتله الف صورة وهو نايم..

طلعت تلفوني اگلب بالصور وشفتهن، نزلت دمعتي ومسحتها بسرعة وغيرت خلفية شاشة تلفوني احطها بدال الچنت حاطتها، ابتسمت برضا ودعيت من كل گلبي الملتهب يرجع شُهيب ويرجع لحياته يكمل نجاحه واسنده بكلشي املكه..

طلعت من البيت وقفلت الباب وطلعت للشركة ارتب كم شغلة، وضعي بين وبين يوم اكون تعبانة وخاملة وتعيسة لدرجة ماكدر ارفع ايدي ويوم اكون افضل..

انشغلت هنا وجبرت نفسي اوگف على رجليه واقوي روحي لخاطر ميس بس كلما يجي الليل ترجع تنتكس حالتي واگابل صورنا وابچي على غيابه..

مشت ايامي باردة كئيبة الخطابة طابة طالعة عليَّ ويومية ابوية يجيبلي واحد وارفض وتگب بيني وبينه وهيچ مستمر الحال لحد اخر شخص اجاني للشركة اليوم حتى يحچي ويايه شخصياً ويحاول يقنعني هو صقر ريماس!..

**

-شلون بي هذا العنون انتَ ليش متنام؟

-ايات: جناوي شبيچ تره بعده طفل ميفتهم!

-جنات: راح امووت اريد انام ولك ناام نااام الله ياخذ ابوك

-تسنيم: استغفر الله جنات حرام عليج لا تدعين على زوجچ

-جنات: ياربي ثامحني ما اقصد بث والله تعبانة من البارحة ما نمت ميثكت بث يبچي

-ايات: جيبي حبي خليني اسويله ممية وانتِ نامي شوية

-جنات: حبابة أي شي يصير بي تعاليلي بثرعة

-ايات: شيصير يعني يا عيني

-جنات: ميخالف أي شي واذا يظل يبچي جيبي الي والله يظل بالي

-ايات: تمام نامي حبيبتي

اخذته وطلعت واجتني عُلا ام حضن الفاهي شمرت روحها على فراشي حضنتني ونامت بصفي..

-عُلا: صرتي ام وبعدج متنامين الا بحضن احد

-جنات: اخاف

-عُلا: عوووع عود جاي اقارن بعقلي حضنچ بحضن جلولتي

-جنات: انتِ وجلال مو متتحاچون وجايه يمنا زعلانة؟؟

-عُلا: اي بس احبه ولج احبببببه

-جنات: طاح حظ هيچ زعل فاشل

-عُلا: دنامي نامي شلون ازعل وابنه ببطني يذكرني بي بكل لحظة

-جنات: رامي گدامي ونثخة "نسخة" من ابوه وما اتذكر مالك بي

-لااا ابد هاي اني اليومية ادردم على مالك واگول لـ رامي ليش تشبهله متشبهني؟؟

-جنات: يله كافي اريد انام

-عُلا: كالعادة تغيرين الموضوع

وصحيح كلامها كالعادة اغير الموضوع ما انطي لنفسي فرصة أفكر بي بصوت عالي، حاقدة عليه وكارهته من جبت لسه ما اجه ولا شاف ابنه ابوية اتصل بي من وره خشمه وبلغه اني جبت دگ عليَّ كم مرة ما جاوبته من لح بالاتصالات انطيته حظر متنرفزة..

ولادتي صارت سريعة ما متوقعة چنت گاعدة عصرونية ويه ايات والعلوية وطاهر يفشر على روسنا متعارك ويه زيد ومال حاضر صار عندي وجع واخذوني للمستشفى حتى ما لحگت اطلگ بي بباب المستشفى حسيت راح اجيب ونقلوني لغرفة الولادة وجبت هيچ بهالسهولة والغرابة..

بين ليلة ويوم نوّر حياتي رامي ملاكي واجمل ما املك، حبيب امه ماخذ عيوني بس باقي ملامحه نسخة ابوه صح بعده صغير وما ثابت شكله بس كل الي يشوفه يگول هذا مالك بصغره وطبعاً يقيسون على صورة عند العلوية لمالك من چان طفل..

غفيت وعُلا بصفي وحسيت المغرب على ايات شايلة وليدي روري وتگعد بيه..

-جناوي گومي جنات

-جنات: هاا روري صايرله شي؟؟

-لا ولج بس جايلچ خطار يباركولج على الولادة

گمت اتأفأف والله لعبت نفسي من الخطار كل شوية جاينه واحد، بدلت ملابسي وايات كالت اللبس حجاب لان رجال من كرايبنا جاي سألتها منو گالت ماعرف لبست بسرعة ونزلت اكل شي ما متغدية على لحم بطني من البارحة كملت واخذت رامي ودخلت للاستقبال وصار بوجهي...

-فااهد!!

-فاهد: يبووووووووي

-جنات: شجابك هنا؟؟

-فاهد: ولچ گممملة هذا ابننا؟؟ هذا ابن مالك موو؟؟؟

-جنات: لا هذا ابني اني وحدي!

-فاهد: دووليي انطيني اشوفه يابة يابة يابة يابة ولك اشتعللوو اهلك على هالجمال

-جنات: صلي على محمد لا تحثده

-فاهد: اذا امك جنات ومالك ابوك شنو اتوقع تطلع غير تشگ سبطعش شگةةة

-اممم عود خوش

-اسمه رامي مو؟ اسم خايس ومعفن تلگين مالك شاگ زيجه من القهر هسة

-تره يخبل اثمه انتَ بث تغار!

-هههههههههههههههه والله صح اغار بس يبقى اسمه خايس

-فااهد لا تتنمر عليه

-لا ما اتنمر وجهه الحلو يشفعله ولچ بدر هذا بدررر

-اگلك جاي وحدك؟

-عبالج مالك وياي موو مووو؟؟

-لا بث متفاجأة لانك هنا انتَ اخر فترة اختفيت وين رحت؟

-انشگيت اربع شگات بس يله فدوة لكوريتي المزاعلتني

-باع شيگول وهو مطلگها!

-ولج ما مططلگ وروح امي العااره ما مطططلگ

-لعد شنو؟؟؟

حچالي كلشي صار بينه وبين كيان بحفل تكريمها ظليت صافنة اذا فاهد ما مطلگها منو دز الوكيل والرسالة؟ منو لفق عليه كل هالشغلات؟؟

-فاهد: شلون سؤال غبي جنات منو غير شمسون؟ منو غير خـ..*يون؟؟ منو غير نعلون؟!!

-جنات: اهاااا يعني عمي النذل لاعب علينا وفرقك عن كانونة

-بالضبط وهسة كوري مزاعلتني وما تريدني بعد عبالها بعدني احب سارة

-حقها فاهد انتَ غبت عنها هواي، زين بررتلها ثبب غيابك مو؟

-لا

-وما ناوي تبرر ان شاء الله؟!

-اي

-لاا عاوز تريدك وتتقبلك شو انتو مادري شلونكم مثوين منية علينا لأن متزوجينا؟!

-ماريد اتعارك وياچ گملة خليني اشبع من وليدي

ظل يبوسه ويحضن بي ويشمشم ورامي مسنح وياه لا بچه ولا ناص ولا ضاج من جعيص فاهد اله، ابتسمت من صار يناغيله ويلاعبه..

-فاهد: ولك رامي الحلو شلون وليد عدنا احنه يروحلك فدوة شمسون وشكو عار موجود

-على طاري ابوك ما شفتو بعد؟

-فص ملح وذاب الله لا يرده

-رحت للعلوية لو بعدك؟

-رحت سلمت عليها واجيت اشوف ابني

-اجيبلك شي تاكله تشربه؟

-لا.. جنات

-ها

-اريد اطلب منج طلب

-شنو هو؟

نزل رامي حطه بحضنه گالبه على بطنه وخانگه من رگبته خفت عليه لا ينمتن بس هذا ابني مكيف على سوالف عمه بعد حفيد شمسون شتوقعه يطلع؟

-فاهد: اريدج تسمحين لـ مالك يحچي وياچ

-فاهد اني چنت ادري انتَ جاي علمود هالموضوع لا تحاول وياي عفية اني مرتاحة بدونه

-بس هو ما مرتاح، مالك متدمر على فراگچ معقولة يهلچ تشوفين ابو ابنچ متبهذل وحاله بالضيم؟

-هو متدمر على شُهيب اكثر

سكت فاهد فاجأة ونظراته رقت بطريقة ما شايفتها من قبل، نزل عيونه يلاعب رامي وهمس بخفوت..

-كلنا متدمرين على سجن شُهيب

-انتَ تكرهه

-بس ما يستحق ينسجن هذا ظلم

-الكل يگول ظلم

-شُهيب احسن واحد بيناتنا بعمره ما رضى على شغلنا ولا رضى يمد ايده ويه ابوية كل عملية قام بيها وكل مهمة چانت بس حتى شمسون يعوف اخوانه وامه

-من كلامك مبين تحبه ليش تبينله انتَ حاقد عليه؟

-ما احبه!

-تحبه انتَ فاهد

-ما احبه واكرهه!! شُهيب باعنا ما يحبنا!! هو.. هو راد يخلص من عدنا بأي طريقة!!

يحچي بحقد وعيونه تخزر بيه من العصبية، كل جسمه گام يرجف ويه كلماته من كمل..

-باعنا وفضل اخوته علينا!! هو رادنا نمووت!!

-اتمنى ترجعون تتصالحون

-عوفچ من عدنا رايح اصيح مالك!

-مالك هنا؟؟

-اي اجه وياي

-لا فاهد اوگف.. اوگف لا تصيحله

-ليش؟

-احث.. احث ماكدر اشوفه وره كل هالفترة اني حاقدة عليه وكارهته!

-تمام ابقي كارهته بس خلي يشوف ابنه جنات هذا حقه

عضيت على شفتي مترددة ماعرف شصار بيه گلبي گام يرجف وانفاسي اضطربت، اخذت رامي من ايده وتوترت من طلع فاهد من الاستقبال يروح للحديقة من الارتباك حضنت رامي لصدري وعيوني لزگت بالباب اراقب دخوله..

ثواني وسمعت صوته يحاچي فاهد، عصرت عيوني بقوة وفتحتهن ويه دخلته للاستقبال.. دخل بأناقته المتعودة عليها وبشخصيته وحضوره الطاغي، تقدم كم خطوة ورخت اكتافه القوية وگال بنبرة تحمل اشتياق..

-شلونچ جنة

-جنات: بخير

ابتسم بحب وبقينا واحد يباوع بعيون الثاني محد بينا عكس انظاره، عيوني تحمل عتاب ايام وسنين وعيونه تحمل حسرات وتعب، ما قطع سرحاننا ببعض الا صوت فاهد من گال ببهجة..

-مالك ما تريد تشوف ابنك؟

تغيرت نظرة مالك من الحنية والعطف لنظرات تايهة، سرح بوجه فاهد بدون لا يجاوبه، ضحك فاهد وگال بنفس الفرحة..

-اخيراً صار عدنا طفل بالعائلة مالك من هسة اگلك هذا الوليد ابني راح يكون وما ارضى الا يصيحلي بابا

-جنات: طبعاً ابنك هو فاهد

-فاهد: هههههههههههه الگملة جابت گملة جديدة للعائلة تعال شوفه شلون صغير مثل البرغي شوفه شگد حلو ويشبهك

جره مالك جر من ايده ومالك مثل المكوك، وگفو گدامي ثنينهم ونزل فاهد ياخذ الطفل من ايدي باس ايده وراسه وعيونه الخضر ومده لأخو، نزل عيونه مالك على ابنه وصفن عليه هيچ صفن بدون أي تعبيرات بدون أي تغير بملامحه.. استقبل ابنه بملامح جامدة باردة مابيها روح!

-فاهد: شيله خوية

-مالك: ماريد اخاف اوگعه

-فاهد: ما توگعه مَلك شيل ابنك

-مالك: عوفه بيدك شفته كافي

تنهد فاهد ودار عيونه الي همسلي كلمة "ميخالف" وقصده ميخالف على ردة فعل مالك الباردة وعلى تصرفه واصراره ميشيل ابنه، مد فاهد رامي اكثر وحطه غصب بحضن مالك وهو واگف..

-فاهد: شيله تره اهده!

-مالك: فاهد شسالفة ماريد!!

-فاهد: راح اهده ويموت تره!

-مالك: ولك مااريد رجعه لامه!

-فاهد: واحد.. ثنييين... ثلاثـ....

ما كمل الثلاثة وشهگت واگف گلبي ويه شمرة فاهد لـ رامي يوگعه من ايده، لزمه مالك بسرعة يحضنه لصدره وجاحظ عيونه ما مصدگ تصرف فاهد وجنونه..

-مالك: تخبلت انتَ!! تخببلت بله الطفل صارله شيي!! 

-فاهد: وخلي يصيرله واذا؟

-مالك: فااهد لا تلعب وياي فاااهد!

من الخرعة والخوف ما تحملت ابقى واگفة جريت رامي من ايد مالك اخذه واطلع منا شمسويله هالطفل وهيج حاقد عليه!! شمسوي؟؟؟

-فاهد: جنات عوفي اريده

-جنات: اريد ابدله حفوضته

-فاهد: جيبي اغراضه هنا نبدله

بقى مُصر واخذه من ايدي تعلق بي فاهد كلش ويعامله عبالك ابنه كلمة "وليدي" ما وگعت من لسانه.. عفتهم وصعدت لغرفتي اجيب اغراضه وملابسه ومميته خاف جاع شلتهن كلهن بسلته الخاصة ونزلت ارجع للاستقبال واستوقفني فاهد واگف بالصالة..

-فاهد: جنات

-جنات: وين رامي؟

-لا اوگفي هنا دقيقة

-ليش؟ وينه ابني؟

خفت عليه خصوصاً وره تصرف فاهد قبل شوية هرولت للاستقبال واستوقفني منظر.. منظر حبس انفاسي و ماگدرت عيوني ما تدمع عليه، شفت مالك واگف ومنزل جسمه على رامي النايم على القنفة، يتلمس خدوده الترفة بأصبعه ومبتسم يسولف وياه بصوت ناصي ماعرف شنو ديگوله ورامي يهمش ويلعب وياه لحدما لزم اصبع ابوه بأيده الصغيرة، ضحك مالك وسمعته يگول بصوت ناصي..

-ها بابا ها حبيبي...

يتبع 🥹💙.....

━━━━━━  ━━━━━━

يا روح البابا 😭🙏🏻🙏🏻🙏🏻

قفلة خفيفة ظريفة كيوووت كُلش ✨🫶🏻

حُب فاهد لـ رامي يجنننن 😭🙏🏻💙

+ما بقى شي للنهاية ومن هسة يعززز عليَّ الودااع لأجمل ابطال

😭💙💙💙

بس ما خلصنا كلشييي اكو بعد مصايب اكوو 😰

توقعاتكم شنووو 💀🩷🩷🩷🩷

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

انا الناي..

البچه على جفاك

والغنّه بمواويلك... 🥀

━━━━━━  ━━━━━━

"جنات"

هرولت للاستقبال واستوقفني منظر حبس انفاسي و ماگدرت عيوني ما تدمع عليه، شفت مالك واگف ومنزل جسمه على رامي النايم على القنفة، يتلمس خدوده الترفة بأصبعه ومبتسم يسولف وياه بصوت ناصي ماعرف شنو ديگوله ورامي يهمش ويلعب وياه لحدما لزم اصبع ابوه بأيده الصغيرة، ضحك مالك وسمعته يگول بصوت ناصي..

-ها بابا ها حبيبي

-اغوو

-مالك: ههههه تحچي ولك صاير انتَ

بقى يلاعبه وكلما رامي يناغيله يضحك مالك ما مصدگ، نزل نفسه باس خده خفيف وشمه.. بقى على وضعه منزل روحه على خد رامي يتحسس ترافته ماگدرت اقاوم اكثر وسويت صوت ويه دخلتي فز بسرعة يوگف على حيله ووجه مال حاضر انخطف لونه كأن لزمته بالجرم المشهود..

-جنات: شو بعدك هنا؟

-مالك: اي.. احم هذا.. هذا الصغير چان يبچي

-جنات: هذا الصغير عنده اثم.. واثمه رامي

عفس وجهه ما عاجبه، فرشت مفرش بالگاع حتى انزع رامي، رحت لابني شلته وحطيته فوگ الفراش وگعدت انزعه الحفوضة..

-مالك: ما لگيتي غير اسم رامي؟

-جنات: شيخصك بأبني؟

-مالك: اي حقچ

كملت تبديله وجبت زيت ودلكت جسمه بي شوية وظليت اللعب وياه واسولف..

-جنات: رووي انتَ صاير فد وكييح ولا تگعد عاقل..

عضيت خده خفيف ضحك وصار يهمش بيه ويجرجر بشعري ونسته بالحياة هاي شعري الطولان هلسه تهلس بدافع الحب..

-مالك: ليش يضحك هواي؟

-جنات: لانه مرتاح

اخذت رامي وطلعت من الاستقبال اعوف هالططوة وحده خلي يمثل على روحه وعليَّ هو ميريد ابنه وكارهه، دورت على فاهد ماهو طبيت للمطبخ شفته گاعد على المجمدة وبيده برتقالة ياكل..

-جنات: المجمدة انخثفت! (انخسفت)

-فاهد: فدوة الي

-جنات: والله ايات تلعب جولة بث تشوفك

-فاهد: انتو مو چان عدكم مساعدة؟ نسيت اسمها يمكن سميرة؟

-جنات: عزه بعينك شلون تتذكرها

-فاهد بغمزة: اني ما انسى

-جنات: ديلا اخذ اخوك واطلع منا

-فاهد: شو تطردين انتِ!

-جنات: فاهد مشكلتي مو وياك مشكلتي ويه ذاك الططة!

-اااااااه قلبي الصغير لا يتحمل حتى ما نست شلون يگول ططة

-فاهد مو وكتها!!

-باعي گملة تعالي يمي احاچيچ

-ها اجيت

-هذا السلبوح ودي لابوه وانتِ لحگيني

-لا تگول على ابني ثلبوح!

-اگلچ والله خبصتينا بكل كلمة والثانية صحتي ابني وابني شنوو ماكو غيرج صارت ام وعدها ابن!

-انتَ بث تغار

-اي والله

-شوف چان صار عندك كوري صغيرون بث انتَ ضيعته من ايدك

-وشلون اخلفه بزنزانة؟؟

-هاااا؟؟؟

-بس چان لازم اخذ كيان وياي ترد عني الوحشة

-فاهد انتَ چنت مثجون؟؟؟

-لا

-لعد ليش تگول زنزانة؟؟

-هيلگة

حچاهة بجمود وگام من المجمدة وباس خد رامي شفطه شفط وطلع من البيت يروح للعلوية، صحت بي قبل لا يغيب عن انظاري..

-واخووووك متاخذه؟؟؟

-اخوية رجلچ دللي لا يروح يشوف غيرج يا غبية

-خلي يشوف ميهمني

-عود من تلفلف درالان الحية ايديها ورجليها عليه وتاخذه لبيتها ذاك الوقت تعاليلي دگي ولطمي

-دارلان بعدها عايشة؟؟؟

-وصارلها اشهر تحوم حوالين الططة للمعلومة

-چذاب

-بكيفج.. يله چاو

طلع وعافني اتصفن هنا بعد ما رجعت للاستقبال يم مالك ابد صعدت لغرفتي فوگ ابدل وانظفها سمعت باب الحوش ينرگع عرفته هو طلع بعد احسن ماريد احچي وياه..

-ايات: جناوي اني طالعة ويه طاهر عازمني على العشا

-جنات: ههههه شعجب

-ايات: لح هواي وماردت اكسر خاطره

-جنات: ماشي حبي غيري جو ولا تبقين مطنگرة عليه

-ايات: يعدل لسانه وما اطنگر! هو يعرفني اكره الرجال السوقي الي يفشر ليش مدا يهتم لهذا الجانب ويحاول يعدله؟؟

-جنات: حقچ بث على كيفج وياه طاهر من يوم يومه هيج

-بس اني ما اسمح بهالشي تلعب نفسي

-وداعتج كل الزلم يفشرون ويغلطون

-مالك يفشر ويغلط؟؟؟

سألتني محترگ گلبها ابتسمت بدون لا اجاوب من اردفت بعصبية..

-بدون لا تحچين من السما للگااع اختلافهم ولوو احچي مناا لباجر هم متحسين بمعاناتي!!

-صحيح اختلافهم چبير واول اختلاف الاطفال، متأكدة لو صار عدكم جهال طاهر راح يشيلهم بعيونه ويحبهم ويكون اب مثالي الهم

-جناوي..

-ايات روحي حبي وغيري مزاجچ ويه خطيبچ الرجال يحبچ لا تلعبين بمشاعره طاهر خوش رجال

-اني احبه

-اعرف تحبي بس بطلي تقارني بباقي الزلم كل رجال يختلف عن الثاني والحچي نفسه للمرة.. كلمن شخصيته وعقليته وتربيته وبيئته اني وياچ خوات ووحدة متشبه الثانية

-صحيح كلامج اني اسفة لان قارنته بـ مالك بس صدگيني مو قصدي شي

-ادري حبيبتي

-تمام باي يروحي انتبهي على رامي

بوستني وحضنتني وباست رامي وطلعت، ايات انخطبت لـ طاهر خطوبة تقليدية متحبه بس هو ميت بيها ويسوي المستحيل حتى ايات تبادله بآخر فترة حسيت بدت تحبه وتتعلق بي بس مشكلة طاهر لسانه زفر وايات نازكة زيادة ومتتحمل هالشخصيات وكل مشاكلهم بسبب هالموضوع..

صارت الساعة 10 بدت مسلسلتي اخذت روري ونزلت اتابعها بالصالة، جبت نمنيات وسويت ممية للعنون وگعدت اتابع وهو ويايه يخنس عليها..

-جنات: روري هذا صاك احلى من ابوك اذا اجه وخطبني راح اوافق

باوعلي بعيونه الكبار بدون لا يناغي بالاجابة، كفخته بأصبعي وهمست بيني وبينه..

-اشش اشش لا تباوعلي هيچ عبالك مذنبة تره ابوك عار!

-اغه

-اي كلش ولك عافنا كل هالفترة وذيچ المصلخة دارلان تريده خلي يروحلها منريده احنه

ضحك وجر شعري ضحكت وياه وحضنته مثل اللعابة، جر اصبعي والا يحطه بحلگه هالسولة ولا يبطلها وكملنا نتابع.. وبينما اني وياه گاعدين بنص المسلسل وبنص حدث مهم اني ورامي ثنينا منسجمين انفتح باب الاستقبال وحده! هيچ وحده وحده انفتح وما اسولف على الخرعة والعيطة العطتها وصراخ رامي وبكائه الي رج الصالة..

-مالك: شبيكم شصاااير؟؟ شنوو صاار؟؟

-جنات: هذا انتَ ووولك ردنا نموووت

-مالك: ليش؟

-جنات: شيل الطفل فحط مالك شبييك

شال رامي يسكته واني شربت مي ارتاح، اباوعله حاير بي ميعرف شلون يشيله ولا يعرف شلون يسكت الطفل اخذته من ايده افتر بي وادگ على ظهره لحدما سكت..

-مالك: خرعتكم؟

-جنات: عبالي طلعت

-مالك: لا ما رحت لمكان

-كل هالوقت انتَ هنا؟

-اي

-‏ما رحت يعني؟؟

-لا

گعد على القنفة يتفرج علينا گلبت وجهي ما عاجبني وجوده بس ما ناقشت زايد اخذت ممية رامي وردت اصعد فوگ ولزمني مالك من ايدي..

-جنة اوگفي

-هدني مالك

-خلينا نحچي

-ماعندي حچي وياك

-جنات انطيني مجال

جرني من خصري وباقي على گعدته ما گام وخرت ايده مني وشدد عليَّ ايد على خصري وايد لزم بيها رجلين رامي من جوه..

-مالك: خليني احچي وياكم

-جنات: احنه منريد نثمعك

-جنات انتِ ليش عنودية؟؟ فهميني ليش عنودية وتحبين العلاقات الصعبة!؟

-مالك انتَ تركتني بأصعب اوقاتي! شوف ابنك راح يبدي يزحف وانتَ متعرفه ولا شايفه من قبل!!

-منو گلچ ما شايفه؟

-وشوكت شفته بالحلم؟؟؟

-اني اجيت بولادتچ جنة

-هههههههههههههههههه صح شفتك واگف ولازم ايدي وتهدي بيه

-جنات اني اجيت! والله اجيت بس ابوج عارض طريقي وسوالي مشكلة الها اول مالها تالي وفضحني بنص المستشفى!

-لا تچذب مااالك! چذب لااا تچذب!! منو الگال ما اعترف بالطفل وميهمني بشي جدي؟؟

-ما مچذب! وتعرفيني ما اچذب! اجيت وسجلت الطفل بأسمي! وروحي تأكدي من ملفه الطبي اذا ما تصدگين!

-ما شفت طولك!!

-اجيت وتوسلت بأبوج يخليني اشوفچ حتى لو من بعيد سوالي فضيحة شكبرها وجابلي جماعة ماعرف منين وصارتلج دگ مرادم وعرك حتى امن المستشفى تدخلو!

-كل هذا صار ومحد وصلي حچي شوف يا سبحان الله!

-محد چان موجود جنات غير ولد عمچ العارات! روحي لواحد واحد سأليهم وتأكدي منهم حتى الطفل تخبلوا عليَّ من عرفوني رحت اشوفه!

-تره ابنك چبييير شوفه شكبره صار لا وصلت ولا شفته بعد!

-جنات اني اعرف مقصر بس الله لا يضوگ بشر العشته بهاي الايام

-اني وابنك اهم من كلشي عشته مالك!

تنهد ساكت، فاجأني من حط راسه على بطني يرخي اكتافه دفعته عني بقسوة وصعدت اركض فوگ اعوفه وحده هنا مو هامني وجوده احس بغضب وحقد گلبي مشعوط منه ومن اهماله بقيت بالغرفة ما طلعت الا من نام رامي..

نيمته بصفي على الفراش ماحب احطه بالسرير مالته الا يمي ينام والحلو بـ ابني متعلق بيه كلش وهادئ وبشوش قليل كلش يبچي وينوص دائماً ساكت لو يلعب..

لعبت بشعره وحسيت بعيوني بدت تغفي فزيت بسرعة مخترعة ماگدر انام وحدي اخاف، خدرت تعبانة وبين النايمة والگاعدة سمعت صوت طرق خفيف على باب غرفتي بدون لا اسأل منو عرفته هو اجاني..

-منريدك

فتح الباب ممهتم لكلامي واجه يگعد على السرير بصفي، طنگرت بوجهه وانطيته ظهري انام بقى ساكت لفترة ياله سأل..

-جنات.. جنات؟.. نمتي جنات؟

اخذت وضع التغليس ثواني واشوف وجهه بخلقتي غمضت عيوني امثل النوم ضحك مستهزأ وهمس بخفوت..

-يمكن جنات نست تخاف تنام وحدها والا واحد يحضنها

-جنات: ما نثيت

عضيت لساني وره هالچفصة عزه بعيني ماگدرت امثل نايمة لخمس ثواني وخربتها، ضحك بصوت عالي وگلبني بحركة سريعة وخفيفة على ظهري..

-شنو شكو شتريد

-وخري هذا

-منو هذا؟؟؟

-ابنچ

-اي عفية عبالي راح تگول ابننا!

-اگلچ يعني صدگ هذا ابني؟

-لا

-ها مو اگول

-ديلا روح منا منحبك احنه

-عادي

-عادي منحبك؟؟

-تعودت ميحبوني الناس جنات

-عود شنو دتريد تكثر خاطري؟ تره مينكثر لا عبالك

-هو لان مينكسر حچيت گدامج ما احب احد يشفق عليَّ

-اممم عود خوش يلا وخر انطي البيبي مجال يرتاح بنومته

وخر يگعد بعيد عننا وانتبهت للسوار البيده يتحرك، غطيت رامي عدل وحطيت راسي على المخدة انطي ظهري لمالك ماريد نتواجه تعبانة بما يكفي من هالموضوع وماعندي طاقة اتناقش..

بقى بالي ويه السوار النسائي الي يلبسه دائماً بس ولا مرة جاوبني عليه الشيطان بده يلعب بعقلي ويگول هذا لواحد من حبيباته وميگدر ينساها وبقى لابسه، يبس ظهري ويه حركة ايده التسللت تمسح عليه من وره ويلعب بأطراف شعري..

-مالك: احبچ

-مو كافي هالشي

-اعرف بس....

تنهد يقاطع جملته، گلبي الغبي وجعني وانمردت روحي ماعرف شجاب هالسؤال على بالي بس صار عندي فضول اسأل..

-مالك شنو چان عاحبك تسمي ابنك المستقبلي؟

-مادري

-يعني ما مفكر من قبل؟

-لا

-لان متريد اطفال

-اي.. ما تخيلت بيوم يصير عندي طفل ولحد هاي اللحظة اني ما مصدگ هذا الطفل ابني

-انتَ متستحق تكون اب!

-صحيح

-انتَ انسان اناني تحب نفسك وبس! رامي ميستحق هيچ اب هو طفل لطيف وبشوش وكله ايجابية حرامات عليه!

-فعلاً

احترگ دمي وأعصابي بدت ترجف انقهرت على نفسي وعلى ابني محد بينا يستحق هالاهمال صح زواجي من مالك چان مصلحة بس هو حبني! اعترف ان يحبني واليحب راح يحب الي يجمعه ويه حبيبه مهما كان خصوصاً طفل!.. قاطع تفكيري صوته الهادئ يگول بجدية..

-مالك: يكون افضل لو طلعت من حياتكم جنات

فزيت من مكاني وكأن احد كهربني، گمت من الفراش بطريقة سريعة وركضت اوگف گباله مخصرة ايدي وحرفياً ارجف من العصبية..

-هذا حلك؟؟ هذا الحل مالتك مالك!! الحل هو الهروب وتبتعد؟؟ هذا حل رجال واعي عابر عمر الثلاثين؟؟!

-لا.. هذا حل رجال تايه وما عاش حياة طبيعية حاله حال ملايين الناس

انفاسي تسارعت ويه كلماته ونبرة صوته الي تغيرت عگدت حاجبي بفضول ويه كلماته الجاية..

-ماعرف شنو يعني اهل.. ماعرف شنو يعني اسرة وحب شنو يعني لمة وعائلة، جنات اني ماعرف شلون احب بطريقة طبيعية! ماعرف شلون الام تحب طفلها واني متفاجئ من اشوفچ مستقتلة على رامي!

-هذا الحب! حبي لرامي وخوفي وحرصي عليه هو الحب الطبيعي بين أي ام وابن!

-احسده لان عنده ام حنونة مثلچ

-امك حبتك مثلما احب رامي ويمكن اكثر

-يجوز

گام يصبله مي من الدولكة بقيت اتابع ظهره المنقبض وعضلات ايده الكبرانة، مالك مزيد وشومه وداگ اكثر من وشم جديد على زنده وايده، اكثر وشومه مغطيات جروح بليغة ما معروفة منين..

-شگد عمرك من ماتت امك؟

-اقل السنة

-ومنو رباك وراهة؟

-الميتم

ابتسم ودار وجهه يواجهني، حافظت على هدوئي وكملت اسئلتي الفضولية..

-وين چان هذا الميتم؟

-المغرب

-عشت اغلب حياتك بالمغرب؟

-اي

-شلون چانت عيشة الميتم؟ تتذكر؟

-ما انساهة

-حلوة؟

-بأستهزاء: اوووووه كلش

-احچيلي عنها

-مو حاب احچي عن ماضيي جنات

-اني احب

تقربت منه اكثر جريت ايده وگعدته بصفي على السرير، لزمت السوار بيدي وعيوني بعيونه وسألته بدون لف ودوران..

-هاي سوارة منو لابسها؟

تغيرت نظرته متفاجأ من سؤالي المليار عن هاي السوارة بس وجهي اليوم كلش مو مال يلعب عليَّ ويغلس على اجوبتي..

-مال امي

-مال امك؟

-الشي الوحيد البقالي منها لگيته ويه اغراض ابوية

-ولبسته حتى تتذكرها؟

-اي

-مالك هم تتمنى لو چانت عايشة؟

ابتسم وجاوب بمرارة..

-كلش

حسيت بوجعه هزيت راسي معترضة هالالم وگمت اخذت تلفوني وطلعت صورتها الاخذتها من ماريا طگيتلها صورة ونويت اراويها لمالك بوكتها..

-شوف

اخذ التلفون من ايدي وباوع للصورة مستغرب، راقبت نظرات عيونه التتفحص الصورة لثواني ونبض گلبي بقوة من شفته يضم شفايفه لداخل فمه وعيونه تدمع..

-هاي امك مالك

عصر عيونه يدير وجهه عني وگف على حيله منطيني ظهره وبيده التلفون يباوع للصورة، عيوني على ظهره واكتافه منتظرته يفرح واشوف ردة فعله بس ما فرح.. ما فرح بالعكس اكتافه وظهره بدوا يهتزون مال واحد يحارب ويحبس دموعه.. گمت بسرعة عليه اديره عليَّ ميقبل يراويني وجهه قسم گلبي نصين من هجم يحضنني ويضم وجهه بصدري ويبلله بدموعه..

بچيت وياه اطبطب على ظهره وراسه من وره اسمحله يفرغ كل طاقته السلبية الحزينة، انهد حيلي من حيله المكسور بصعوبة جريته اگعده على السرير واحنه باقين على هالحال.. استمر دقايق هو معترض يراويني شكله، شوية وسألني بصوت مبحوح..

-هاي امي..؟

-اي مالك امك هاي

حبس شهگته ولزم نفسه عن البكاء، شوفته بهالحال دمرتني مالك دائماً قوي ومينهار بسهولة معقولة شوفة صورة امه تخلي هالجبل ينهدم بهالسرعة..

-شوف صورتها واشبع منها.. شوفها شگد تشبهك

ابتسم يمسح عيونه بأصابعه ويتأمل الصورة، يكبرها ويبعدها ويراقبها بكل فضول يحفظ تفاصيلها.. دعيت من كل گلبي على ابوه النذل حارمه حتى من شوفة صورتها..

-اشبهها مو؟

-اي كلش

-حلوة امي

-كلش باوع نزاكتها ونعومتها

ابتسم بفرح يهز راسه وظل يباوعلي ويباوع للصورة ضحكت شكله مال واحد ديقارن بيناتنا بس ما حچى شي، الفضول اشتغل عندي وسألته بسرعة بدفاشة..

-امك شلون ماتت مالك؟

انقبضت عضلات فكه بعدما چان مبتسم وبلع ريگ ومسح جبينه من قطرات العرق البدت تتجمع عليه، سؤالي وتره لدرجة ضحك ميعرف شيجاوب، كررت سؤالي بجدية اكبر وهالشي خلاه ينزل التلفون من ايده وعيونه تطبع بالگاع يشرد بيها.. ثواني ونطق..

-امي انتحرت

-ليش؟

رجع سكت سرحان مسحت على ايده على كيف ارجعه ويايه، ابتسم بمرارة وجاوب بصوت بصعوبة سمعته..

-انتحرت بسبب الاغتصاب المتكرر

-من ابوك؟؟؟

-لا

-لعد من منو؟؟

-من واحد من هوامير المغرب

-مدا افهم

ما جاوبني وطلع تلفونه فتح الاستوديو مالته وطلع صور ملتقطهن من دفتر قديم متروس كتابات بلغة ما مفهومة.. گلب بتلفونه شوية وبده يقرا مقتطفات بسيطة منهن، يقرا وكأنها رواية بسرد كاتبة..

"الخميس 24/6 اليوم حللت بالمختبر وبشروني اني حامل.. منتظرة رجعة جعفر على نار حتى ابلغه بهذا الخبر الحلو متأكدة راح يطير من الفرح.. ما بقى شي ويقنع اهله على زواجنا اني متحمسة لهذا اليوم واتمنى يكون قبل لا يكبر بطني وانحرم من البدلة البيضة"..

گلب بالصورة الثانية وقره الوراهة..

"الثلاثاء 28/2 ما بقى شي وينور حياتي ملاكي اني لحد هذا اليوم ماعرف جنس الطفل ولد لو بنية بس ما يهم المهم يكون بصحة وعافية ماريد اكثر من هالشي.. شمسون متحمس اكثر مني لولادة هذا الطفل منتظره على نار لو اجتنا بنت يريد يسميها ملاك واذا ولد يريده مالك واني الاسمين عاجبيني وطايرة بيهم.. جعفر مينام الليل الا يحط راسه على بطني ويصلي بقلبه يكون هذا الطفل السبيل لجمعتنا سوه وماگدر اگول غير "امين.. ادعي من امنا العذراء تحفظ طفلي ويزيد حياتي بهجة"

رفعت حاجبي متفاجأة ام مالك مسيحية؟؟ محد ذكرلنا هالشي حتى العلوية متعرف ويجوز هذا السبب الاكبر ما قبلت جعفر يتزوجها.. گلب مالك بالصور وفتح صورة جديدة وهنا نبرة صوته تغيرت واعتلته غصة..

"اني ممتنة من ربي على اعطائي اجمل ملاك، نور الدنيا ابني الحبيب مالك قطعة من روحي واجمل ما املك جعفر يغار لان ميشوف ابنه هواي بسبب عمله وكثرة سفره يتحسر على شوفته ويتحمس يرجع حتى بس يشم ريحته.. للاسف ما تزوحنا ماعرف شلون راح ننجمع ويه بعض لكن اهله معارضين بشدة هذا الزواج خصوصاً ابوه حلف لو اكتشف بجعفر متزوجني حتى لو بس عقد راح يقتلني لهنا وصلت بي المواصيل وبديت انزعج وافقد الامل.."

"الجمعة 13/4 رجل غريب يتبعني صار اسبوعان قلقني الموضوع وشمسون ما موجود حتى اشاركه عسى ولعل هذهِ الكتابات تخفف عني"

"الاحد 15/4 اكتب الان وقلبي يرتجف.. اكتب الان وقلبي يرتجف! شفته من جديد! شفت الرجل الي يلحگني مرة ثانية وراح انجن من الخوف اليوم چان واگف بباب بيتي!"..

ذب التلفون تعبان نزل راسه بقهر وقره الرسالة بعدها وبأختصار شديد مكتوب بيها..

"الاربعاء 18/4 الم في كل جزء من جسدي جعفر مختفي.. دخل الرجل لبيتي دفع الباب عليَّ واستحوذ على جسدي بالكامل.."

الجمعة.. السبت.. الاحد.. الاثنين.. الثلاثاء الخخ.. استمر مالك بالقراءة والوجع يعصر بگلبي عصر! كاتبة ادق تفاصيل الصار وياهة والله يساعد حالها ما اتخيل شلون وضعها چان وهي تكتب كل ضرخة كل اللم كل رعب عاشته وحدها كل تهديد توجه الها من الرجل تهديد بحياتها وحياة ابنها اذا حچت لـ شمسون يقضي عليهم ثنينهم ومرة شك بيها لمحت لجعفر شال سچينة وراد يحطها بگالب مالك..

اولغا چانت تتعرض للاغتصاب بشكل وحشي بشكل وصفته بالضبط "تمنيت ما تشرق عليَّ شمس ولا تغرب" استمر الرجل يتردد الها كل يوم! كل ساعة! كل دقيقة! ياخذ مالك يحطه بغرفة ويسحل اولغا لغرفة ساد حلگها بيده ويقيدها عن الحركة ويتوحش عليها!

حاولت تهرب مرة وثنين وثلاثة ويرجع يصيدها وينتقم منها اشد انتقام، شمسون بده يشك بيها تخونه ويتعارك وياهة وينهار ويگلب البيت على راسها ويعوفها وحدها چانت تتوسل بي ميعوفها وحدها لان بس يروح يجيها ذاك الحيوان ويشبع رغباته بهاي المسكينة.. وصفت وضعها بالوردة الذبلانة بكل رسالة كانت تتمنى الموت وتدعي الرب ياخذها ويخلصها من وضعها..

اغتصاب بعد اغتصاب روحها طفت وكرهت الدنيا كلما تريد تبلغ شمسون بالصار يكتشف الحقير بطريقة من الطرق ويأذيها اكثر من المرة القبلها.. حياة اولغا انتهت وما شافت منها شي.. فضلت الموت فضلت تنتحر وتخلص من حياتها وتنهي عذابها..

-جنات: ليييش ما حچت؟؟؟

-چانت تخاف من ثنينهم هم ابوية لا يچذبها ومن ذاك لا ينتقم مني ومنها

-يا عمررري وتالي؟؟

-دخل ابوية لگاهة شانقة نفسها بصالة بيتنا انهار وكره حياته وراهة كرهني لاني چنت نايم من امي قررت تنتحر الجيران اكدوا لو اني باچي چان اجوني وشافوها

-مالك مو منطق هذا!! چنت طفل شمعرفك انتَ؟؟

-بعد ابوية راد حجة حتى يكرهني ويطفي النار المشتعلة بگلبه عليها نبذني بميتم ويا جنات حرام اگول عنه ميتم چان سجن واللهي سجن

-يمة

-تعذيب، ترهيب، خوف، جوع عيشونا چنت اتعنف بكلشي يصدر مني سويت زين او لا اني متعنف ومكتول كل يوم انام ودمعتي على خدي.. مثل الخدم اتخذونا لو شگد ماحچيلچ ما تصدگين كل هذا واعمارنا چانت متتجاوز الخمس سنوات

-سودة بوجهي

-گلبي مات جنة من سجلت مدرسة چنت اباوع للاطفال واشوفهم مبدلين ونظيفين وامهاتهم تودعهم واهاليهم ينتظروهم هذا الي يگول امي درستني وهذا اليگول ابوية اشترالي گمت اكره كل الاطفال ما احبهم اتخبل منهم نفرت من الكل واعتكفت على روحي احس اني غلط وكلشي بيه مو حلو وعيب والله عاقبني واخذ امي مني والميتم عقوبتي

-وشصار بعدين؟؟ شلون طلعت من الميتم وما عرفتو منو اغتصب امك لليوم؟؟

-اكيد عرفنا

-منو؟؟

-تعرفين عدونا الاطلس؟

-اي؟؟

-عمه اخو ابوه اسمه محمود چان مريض نفسي مهووس بطريقة مرعبة

-ووين راح؟؟؟

-ابوية كتله اول ما اكتشف هو الي اذى امي بمكانه كتله ودفنه ومحمد الادهم وابوه ما فكوا حلگهم

-وعادي عندهم لان كتلتو؟؟

-اكيد! هذا ثارنا من زمان همه الي اعتدوا على امي الادهم چان يعرف ابنه مهووس بوحدة اوكرانية ويعرفه يمارس عليها الاغتصاب ويتردد عليها وما منع منه من هالشي!

-حسبي الله ونعم الوكيل

-ثار وعداوة عدنا وياهم صار سنييين ابوية ما اكتفى بهالشي ولا شفى گلبه و الادهم زادها من راح لشمسون وگله امي خانته ويه محمود والموضوع مو إغتصاب بس مذكرات امي كلها لگيناها بالبيت مضمومة بالمخزن قرينا كلشي كاتبته وبعض الجيران اكدو ان الرجل چان يطفر السياج ويدخل البيت وكم مرة سمعوا صياحها وتوسلاتها

-وليش ما حچو لابوك؟؟؟

-يگولون هددنا اذا نحچي او نتدخل يكتل اطفالنا واني اشك مهددهم اتوقع دافعلهم فلوس حتى يسكتون

-وابوك شسوه وره ما الادهم گله هي عدها علاقة بي؟

-سوه النون وما يعلمون اخذ اخواني شُهيب وفاهد رادهم يغتصبون بنت محمد الادهم فاهد چان طافي وما مستوعب الوضع ويگول ما تمم المهمة وشُهيب عارض بشدة وراد يهرب البنية ما يقبل بهالشي وزاد اصراره من عرفها اخت الاطلس بس ابوي لزمه بآخر لحظة وزوعه حليب امه

-چذذذذذب والبنية شصار وياهة؟؟؟

-تدمرت البنية اني ما چنت موجود بالمغرب بوكتها وماعرف بهذا الموضوع ناصر حچالي حبسوا البنية عندهم واعتدوا عليها وكتلوا الولد الوياهة بس محد حچى منو تمم المهمة ولحد قبل فترة ياله الشرطة عرفت من خلال فلاش بي تسجيل صوتي لفاهد ابوية مسجل صوته علساس هو القاتل

-ليش هيچ سوه ابووك؟؟

-سواهة حتى يحمي نفسه واذا انكشف فاهد يروح بيها و لحد اخر لحظة بذاك اليوم فاهد طافي وما يعرف شيسوي زايد جرعة المخدر وعقله فاصل والشرطة اثبتت صوته ولسانه ثگيل بالتسجيل دليل چان متعاطي او مكثر بالشرب ومن خلال الادلة والبحث دام لاكثر من سنة ونص اكتشفوا ناصر الي قتل الولد والي اغتصبوا البنية لليوم ما معروفين منو

-وشلون گدرت ترجع لأهلها؟؟

-شُهيب الي هربها متصل على اخوها حتى ياخذون بنتهم ورجع ابوية انتقم من شُهيب لانه كسر كلامه لليوم ما انسى ابوية شسوه بي طلعله جلد ثاني من التعذيب راد يطلع روحه بيده لولا تدخلي بآخر لحظة

-مالك شنو هذا!!

-هذا لا شيء بالنسبة لباقي المواقف التجمعنا ويه الادهم وولده

-مصدومة والله.. زين انتَ شلون طلعوك من الميتم ما كملتلي؟

-بعمر السبع سنوات رجعلي ابوية وسفرني لـ روسيا وهناك تعرفت على اخواني وبدت حياتي تحلى نوعاً ما رغم التدريب القاسي والالم العشناه بس وجود اخواني خفف عني هواي

-يعني چنتو قريبين على بعض!

-روح وحدة بثلاث اجساد

سكتت ماعندي شي اضيفه ما سألت عن سبب فراقهم لان مثل العادة راح يتهرب وميجاوبني.. حسيت بي يتلمس رجل رامي من جوه على كيفه ابتسمت على منظرهم بس تذكرت السواه وبسرعة خبيت ابتسامتي..

-جنات: راح تبقى هنا؟!

-مالك: ترديني اروح؟

-جنات: اي

-وتنامين وحدج؟

-اي

-ومتخافين؟

-اي

-جنات لهدرجة انتِ ما ترديني؟

-اي

-جنات!!

-اي خلي يرجع ابوية وتطلگني شكو رابطني بيك

-ايي حتى تتزوجين واحد حلو!!!

-اي

-وجعييي وطاگلحييي

-اي شعليك انتَ عشتوو تره عمري عشرين مثل الوردة شناقصني قابل؟؟

-اييييي انتِ گوليهااا ببالچ واااحد مو اني اعرف هالدگاات النااقصة!!

-صوتك الطفل نايم

-منو ببالچ؟؟؟ منو خاااطبچ احچي!!!

-محد خاطبنيي لا تتخبل!!

صرخ رامي ويه نترتي القوية شلته اسكت بي بس فز مخروع بقى يبچي ويشمر بروحه مادري احير بـ رامي الفحط لو بمالك اليرجف وينفخ نار..

-جيبي جيبييي

جره من ايدي يتعارك وياي نيمه على كتفه ودگدگ على ظهره بس الطفل ما سكت، طلع بي مالك بره الغرفة ونزل واني اركض وراه اخذه للحديقة هدأ نوعاً ما بس بقى مستمر بالبكاء مشى بي بعد لحدما طلع بي للشارع وهو ما حاس على روحه.. مديت راسي من باب الحوش وصحت..

-وين ماااخذه؟

-امشي جوووه انتِ مو محجبببة!!

دخلت راسي وداخلي يفور طبيت جوه بسرعة لبست شال وعباية اسلامية ومديت راسي من الباب مرة ثانية بس اختفوا مالهم اثر بعد، الدنيا ليل وشارعنا هادئ بهيچ وقت بقيت واگفة وافرك بيدي فترة طويلة الى ان رجعت آيات وبيدها بوكيه ورد احمر چبير والضحكة تارسة وجهها وعيونها..

-ايات: هلوووو

-جنات: هلو اگلچ ما شفتي مالك ورامي؟

-ايات: لا، صدگ انتِ ليش واگفة هنا؟

-يبچي واخذه يفتر بي

-ها لعد شكو خايفة عليه ابوه تره هو

-مو تأخرو

-دتعالي تعالي نفوت اراويچ الحب شجابلي

دخلتني وياهة وانطتني قسم من الاكياس البيدها وگعدت تراويني شنو اشترت، مشت نص ساعة ايات تسولف ويايه على طاهر وراحت تنام ومالك ما رجع الف وسواس صار براسي خفت اخذه وميرجعه الي بعد..

گابلت شباك المطبخ وگعدت اكل بأظافري، هستوني دا افتح الحضر عنه واتصل بي وشفت باب الحوش ينفتح وضحكة رامي واصلة الي ومالك وياه..

-مالك: هههههه ولك مسطي

باس خده وشايله على چتفه حاط بيد رامي نستلة ومصاصة وهو شايل كيس شفاف متروس حلويات بدون لا احس ابتسامة زينت وجهي وحماس عجيب انخلق بداخلي..

وگف مالك بنص الحديقة يفتح لـ رامي المصاصة وظل يدردم وياه بالمغربي ومن كل عقله منتظر رامي يجاوبه، چان ديگله خاف تعور روحك بالعودة مال المصاصة ولا يظل يهمش خلي يثگل ويصبر وهو راح ينطي ما طايرة.. طبعاً هذا الفهمته..

-مالك: رامي عيب ابني عيب!

كفخه رامي على عينه شهگة مالك وصلتني متت ضحك على حركته وصدمته ولازم عينه وخازر رامي وهذا ابني ولا اهتم تعال وانطي كفخة طفي العين الثانية..

-جنات بهمس: حيييل

-مالك: ابن جنات شتطلع يعني

كفخه للمرة الثالثة وجر شعره طرت فرح طررت فديته وليدي ياخذ بحقي وميرضى على امه، ضحك مالك وباسه كم بوسة بكل مكان من وجهه وايده ودخل بي جوه للمطبخ.. ركضت للكاونتر اسوي روحي واگفة اسويله الشوربة مالته ودخلو همه..

-مالك: ولج جنات هذا ليش يضرب؟

-جنات: ميضرب الا من واحد يضوجه

-مالك: كفوووو لا خلص مستقبله مضمون

-جنات: طالع عنيف على ابوه

ضحك مالك ضحكة سعادة استغربتها وظليت صافنة عليه، غمزلي واجه يگرصني من خاصرتي طفرني بمكاني..

-جنات: وخرر لك

-مالك: نحسة.. اگلچ شنو اليوم ما تنيمينا؟

-اي متنام روح لبيت العلوية

-العلوية طاردتني ما تقبل ابقى يمها كالت روح لمرتك

-علينااااا

-اي شبيچ

-مو حتى الثلج گليناااا

-وبسامير بالهوا دگينا ادري لا تگوليها بس والله هسة چنت يمها

-هاي من تأخرت ويه رامي رايحين للعلوية؟

-اي

-مالك ليش ما گتلي گلبي وگف من القلق!

-ليش يوگف قابل راح اخطفه.. يله يله اريد انام امشي سويلي فراشي

-ياااا

-اي اني مو زوجچ؟!

-راح نتطلگ قريباً ماريدك!

-عود من نتطلگ الله كريم هسة اريد انام يم هذا (وباس خده)

-اسمه رامي!!

-اي هو هذا اريده (باس خده مرة ثانية) هههههه ولج شوفي يضحك الارعن

-راح افرشلك بالهول

-وتخلين هذا ينام يمي؟

-لاا هذا ينام يمي!!

-مو حق اريد هذا ينام يمي!

-هذا راح ينام يم امه الحملت بي وتعبت عليه!!

-جنة

-هااا

-من الاخير خلينا ننام سوه!

-نعم؟؟؟

-اي انتِ تردي واني اريده شلون قابل نقسمه نصين؟! خلينا ننام سوه ونفضها

-هههههههههههههههههه

-الله يستر من هالضحكة

-ملوك شايفني قشمر؟!

-غرفتج وين فوگ مو؟

طلع گبل ورامي بيده فكيت حلگي ممصدگة صلافته شفته يصعد الدرج وياكل ويه ابنه حلويات لحدما غابو عن انظاري تنرفزت كللش بس سكتت ونويت امرر هالليلة على خير حتى ميروح للعلوية يشكيلها مني وتطبب العوچية ببطني..

صعدت لغرفتي لگيته نايم على چربايتي ورامي حاطه على بطنه يلعب وياه لعبة غريبة تشبه الباح باح بس مو باح باح يمكن عدهم هاللعبة بالمغرب، قرقره بالنهاية وهذا مات من الضحك ويتلوه بيده مكيف على الوضعية..

-جنات: جيبه خليني انومه

-خلي بعد شوية

-لا تأخر وقت نومه

اخذته وكعدت على الچرباية بصفه ارضعه الممه ومالك ضاربله ركن وصافن علينا، باوعتله بطرف عيني نفس نظراته قبل من يصفن عليَّ ذب حسرة ومسح وجهه وعيونه وتقرب من روري البده يغفي يباوع لوجهه شوية ورفع انظاره الي يهمس بصوت خافت..

-كلش لايگلچ تصيرين ام

بقيت منزلة عيوني ما اخليها بعينه لا يقراني وانفضح، همست بصوت ناصي كلش..

-شكراً

-رامي محظوظ بيچ

-واني محظوظة لانه ابني

شلته ادگدگ ظهره ورجعته ينام بفراشه بسلام فاتح ايده ورجله ومسوي حلگه بوز مثل البطة، ابتسمت مرتاحة لانه مرتاح وتمددت بفراشي ومالك بصفي ماعندي جرأة اگوله نام بالگاع لان مستحيل راح اگدر انام وحدي وايات ما راح تقبل انام يمها ماطول مالك هنا يعني نهايتي بحضنه يعني بحضنه اليوم..

سرحت بالحايط البصفي دقايق عقلي مشغول وافكر شنو التالي؟ بس عقلي وكلشي افكر بي تبخر وانخطفت انفاسي من سحبني من خصري يحط راسي على صدره جمدت كل اطرافي من دفو جسده حاوطني بتملك، جر ايدي وغصب حطهن جواه حتى ما ابقى معچفتهن ورافعتهن، رفع راسي من حنچي يخلي عيني بعيونه وگال..

-ما تباوعين بعيوني ليش؟

-لانهن يلعبن النفث!

اهتز صدره بضحكة خافته وسب ابوية بالمغربي، طنگرت وسبيت ابوه ابتسم اكثر ونزل نفسه يبوس طرف انفي..

-جنات: تجرأ اكثر وانهي مثتقبلك وشرفيي!!

-من اگول نحسة هم انلام؟

-لا

-دنامي نامي تضوجنا بهالليالي

غمضت عيوني بسرعة اسوي روحي نايمة حتى هو هم يأيس وينام وهذا الصار.. بس ما گدرت تغفى عيني بقيت اتگلب بفراشي لحدما فلتت نفسي من ايده ما قيدني اكثر وحررني گعدت على حيلي اتصفن وحرورة بصدري ما جاي تبرد..

نزلت جوه طلعت حليب موز وصبيتلي كوب شربته كله وما ارتاحيت صبيتلي بعد عصير برتقال، شربته وصبيتلي عصير منگا، شربته ورجعت اشرب حليب موز صارت لخبطة بمعدتي لعبت نفسي..

رجعت لغرفتي مو ظلمة لان ما انام بالظلام، عيني على تلفون مالك والحرورة بگلبي تزيد وتزيد عقلي وفكري كله بتلفونه صار، ما تحملت وسحبته بين ايدي احاول افتحه حطيت رمزه القديم فتح ويايه بسرعة اخذتلي ركن بالغرفة اگلب بين الرسائل ادور على رسائل دارلان..

فتحت الواتس ما لگيتلها اثر هنا بس شفت جاياته رسائل كومة ما فاتحهن، طلعت للانستا واول حساب صار بوجهي حسابها بالخاص مالته!! دازه كومة رسائل وما مفتوحات كلهن واخر رسالة دزتها قبل شوية بالـ 10:30..

الف حوصة صارت بگلبي سويت طريقة افتح الرسالة بدون لا يبين قريتها وشفتهن كلهننن بلغة البلد كاتبتهن مو بالعربي اصلاً مالك نادر يستخدم لغته العربية بس ويايه اكثر شي..

اگلب بالمحادثة ماكو مالك ما مجاوبها ولا مرة صار اكثر من سنتين بس هي تدز او تجاوب على ستورياته، شفت كم صورة الها دازتهن بشكل دائمي وهي بالجم بنفس ملابسها الفاضحة وكاتبتله شي قريتها وفهمتها "مكانك خالي" متت من القهر خصوصاً من شفت اخر رسالة وصورة دزتها اليوم بملابس حفلة عبارة عن تنورة جينز قصيرة جداً وتوب ابيض طالع منه جسمها وكاتبة "we miss you"..

جبت تلفوني واخذت صور لكل كلامها گصيت صورة حسابها حتى متعرفها منو ودزيته بشكل فوري لكيان تترجمه الي لان معظمه ما فهمته مشكلة هاللغة صعبة ومو بسرعة واحد يتعلمها.. جاوبتني كيان فوراً برسالة كاتبة..

"هاي منو!!!!"

"جنات: شنو نوع الكلام الدازته؟؟"

"ولج منو هاي؟؟ جاوبي ليش جاي تحچي بيه!!!"

"شنو؟"

"جنات عليج الله گولي منو هاي بسررعة!"

"دارلان هاي"

"صخام بعيني عمت عينهاا هالغبية فضحتنا!!"

"شكاتبة!!؟"

دزتلي بصمة ركضت اهرول بره حتى اسمعها واسمع صوتها تهمس همس وتحچي..

"كيان: كاتبة مشتاقتلك ومدا اگدر ابطل افكر بيك ليش گطعت عني وعن كيان ثنينا متأثرات بغيابك وممتحملات البُعد ارجع مالك حياتنا فارغة بدونك!"

"جنات: وووجع حياتها فارغة بدونه ام الوصخخ!"

"دباعي هاي الرسال بااعي كاتبتله كيان مچانت تبطل تحچي عنك حتى من اللتقينا ذاك اليوم بالجم حچت بيك وشگد انتَ مهم بالنسبة الها اشوفها مكسورة لان سحبت نفسك منها واهتميت بـ زوجتك الصغيرة!"

"جنات: سمممم وزحححيرررر"

"قسماً بالله يا جنات ما حچيت ولا جبت طاري مالك بولا شي غير الكلام الي انتِ سمعتي"

"تعلميني بيچ كيان بس اني اعرفها هالعاره راسمة عليه حاامض على بوزها الطويل توصله انام على خوانيگه وعلي"

ذبيت موبايلي ورجعت لموبايل مالك رحت على اسمي يطلعلي حساب غير موجود طبعاً لاني حاضرته من كل مكان، فتت للمحادثة وانصدمت من الشفته! انصدمت بل انصعقت واني اشوف رساااائل هائلة جرايد كاتبلي وكله بالعربي! ما مستعمل ولا كلمة انگليزي لو بلغة البلد كله عربي ومتأكدة اخذ منه ساعااات بالكتابة لانه ضعيف بي ونص الكتابة ساحگ بيهن وغلط..

اقره بالرسائل وعيوني مدمعة حتى واني حاضرته كاتبلي عن مشاعره واحاسيسه والوحدة الي يحس بيها، نزلت دموعي من قريت الرسالة كاتبلي..

"حبيبتي جنات.. جنتي وكلشي حلو املكه مشتاقتلج، مشتاق لصوتج وريحتح وكلشي بيج.. اني بروسيا وضعي مو تمام جنة محتاجچ رجعت لنفس البيت الي عفت بي شُهيب واحس الدنيا ظلمت بعيوني مخنوگ ومحتاج شوفة عيونچ عسى ارتاح.. احبچ وما اظن شي يوم راح يتبدل حبچ بثانية اني تعبان جنات تعبت وانتِ بعيدة تعبت واخواني كلمن بمكان، تعبت لدرجة ماريد هاي العيشة بس اعرف نهايتي جهنم لأني اخذت جَنتي بالدنيا.. والي هي انتِ"