رواية ابي والغزلان الفصل الثامن والعشرون 28 - بقلم ريام هادي

ابي والغزلان
للكاتبه Reem
البارت الخامس والعشرون

غَم ذاك العمر من ينكضي تعلعل 💔

سليل :
ماما بدت تتغير كلامها لبسها وضعها رغم اشهر من اشتغلت بس احسها غير شكل عدا اذا عدها وقت تخلصه يم انوار بيبي تعبانه ام ماما خطيه بعدها تخبز للعالم وجياتها النا قليله تخبز لكم بيت على كد عيشتها وتخلص اليوم متمدده تمنيت تجي تعيش ويانا اقلها ونس وهم اني احبها لان حبابه وتحبنا بس هي متقبل علمود خالو
اما بيبي انعام عم الهدوء وماشفتها بعد وحتى بديت انسى موضوع تهديدها
گلت اكيد لحظة عصبيه ومصدومه وراحت
اما حسين وجنات ينهزمون من ذاك البيت بسكوت ويجون يلعبون ساعه ويه رشا وريم ويرحون وحسام اصلاً ميتقرب منهم
دومه وحده لو ويه ماما او اصدقائه ماله علاقه واذا دخل للبيت يتعارك ويه ريم اكثر شى وذيج لسان متسكت

مرات اصفن على صوره بابا حبيبي شكد اشتاقيت اله شكد اتمنى اشوفه هسه واحضنه وابوس ايده واكوله اسفه بابا كله من ورايه خليتك بهيج مكان بس والله من الخوف حجيتلك خفت على نفسي وحتى على خواتي مابيدي شى اااخ يابابا لو تعرف شكد محتاجتك
ماما كامت مطيق الكلمة من عدنا وكل متحجي وكالت الله بلاني بيكم لو شلون مااجمع لروحي هاي الكلمة نسمعها من البنات يردون شى منها اني متكولها اليه لان اصلاً مااطلب منها وهم اخاف اطلب لان بس تعيط

بيوم كاعده اغسل مواعين وانجرت البجامه ولج شكو
ريم :ثلل حبابه اريد فلوس
سليل : شسوين بيها مو ماما البارحه جابت مصاص ونساتل الكم
ريم : هااا مو اريد اشتري نفاخه
سليل : بلاعيمج موزين عليج وخري مني اريد اكمل شغل
ريم : ثلل حبابه حبابه حبابه
سليل : اهوووو ياريم من تلحين شكد اضوج بطلي الالحاح تره والله بزعتيني
ريم : بس هلمره وبعد مااشتري
سليل : روحي جوه المخده اخذي
ريم : شكراً احبج ثلل وباستني وركضت بين مكملت الشغل گلت خلي اشوف غزل وين لكيتها كامشه اللعابه مالتها وتلعب بيها شكد هادئه حتى بلعبها ولا احس بوجودها الا ذني يلام من يسميهن عمو سجاد ريا وسكينه

دخلت للهول الملم الهوسه وسمعت صوت وره البيت واشوف ريم وحسين يركضون صخام ذوله مينجمعون اله اكو كارثه ركضت ولزمت حسين من ياخته تعال ولك شكعد تسوون وره البيت
حسين : هاااا موووو لا
سليل : شنو احجي عدل وكفخته ولك شكعد تسوون وشنو الضامه ليوره ولج ريم وينج طبت مدنجه وايدها وره ظهرها
جريت ايدهم حيل لكيت بيد كل واحد مصياده خشب وبيدهم حصو
هاي شسون بيها
حسين : مو ريم رادت اااااخ
سليل : باوعت ريم كرصته حتى ليحجي وهو عاط
وجع تحجون لو اركع راس براس
ريم : ثلل بزونه ضوجتنا تنفخ علينا ونريد نضربها
سليل : ولج حرام الله يذبج بلنار لان تأذين حيوان مو اخذتيها بالاسلاميه
ريم : بس هو يستاهل
باوعت عليها عرفت وراها شى لزمتها من كصيبتها ولج شتردين تسوين السالفه مو مال بزونه احجي وانت اذا محجيت هسه اصيح بيبيتك واكول الها عليك يمنا اني خوفته قابل صدك اصيح بيبي بس اريد اعرف شمخططين

حسين : لا لا راح احجي ريم تريد تضرب بيبي انعام بلحجار وتكسر الجام مال البيت
سليل : عزه ليش ولج
ريم :جوت جنات بيدها حتى متحجي وتلعب ويايه

سليل : ولج انتي شعليج ماعسى تحركها غير بيبيتها
ريم : خطيه ثلل تبجي وتحركها وصارت بيها بطوطه اثنين
سليل : بطوطه شنو
ريم : نفاخه اثنين
سليل : قصدج بطباطه
ريم : اي بطاطيط وتحركها
سليل : ولج بطباطه
ريم : اهووو ثلل نفاخه اثنين وهاي هيه اريد افشخها حتى بعد متحركها لجنات واريد بعينها حتى تنعمي ومن تمشي متشوف وتوكع بلمجاري واضحك عليها

سليل : اسمعي ريم اذا سويتي شى والله اكول لماماوعمو سجاد واخليهم حتى للمدرسه ميخلوج ترحين يعني طفله طولج شبر تردين تكسرين الجام عليهم وتعمين وتفشخين مو عيب
ريم : لا مو عيب
سليل : شو جيبي وجريت المصياده من ايدهم سمعوني انتم الاثنين اذا سمعت مسوين شى والله اكطع اذنكم وانتي اكول لعمو عليج واخلي يطيح حظج تعرفي من يصير عصبي

ريم : اهوو ثلل زعلت
سليل : طبج مرض تريد تضرب وتكسر وفوكاها تزعل يله لك انت الثاني روح لأهلك شطولك وجارتك مثل الصخل وراها صرت صف سادس وبعدك تسمع كلامها
حسين : اخاف منها تكتلني تضربني جلاق
سليل : ثول روح بابا لبيتكم وانتي ادخلي جوه لا اطيح حظج
ريم : اني الك حسين ليش تحجي
سليل : كفختها على راسها طبي شكد وكحه
بيومها افكر هاي من تكبر شسوي ياربي ولا تخاف اني اكبرها منها ومن اسمع اسم بيبي انعام اكوم ارجف واريد ابجي من الخوف وهي ولا يمها الله يستر منج ياريم حتى رشا مو مثل وكاحتج

ثاني يوم جنت اشر ملابس بلسطح وظهري مكسور وهدومي منكعه كلها مي ورافعه ايد البجامه للنص ورجل هم للنص وكفشتي واني والدنيا طالعه من عيني حيل تعبت وسمعت عيطه بس الصوت بعيد مديت راسي من محجر السطح يطل على كراج ذاك البيت واشوف انعام اعصاب وتكمز ولازمه عبايتها ومبينه جديده وغاليه وتكمز مفهمت شبيهه مدري ليش گلبي انقبض ونزلت اركض ادور مثل المخبله على ريم ماكو
ولج رشا وين اختج
رشا .. شمدريني طلعت بره يمكن ويه حسين
سليل : غضب الله على راسها وراسه ولج بس لا مسويه مكسوره اختج ويه انعام واله اذا هي لا اطيح حظها
وجان اسمع صوتهم بره وركضت وراهم وجان الزمهم من شعرهم اثنينهم كل واحد بأيد
ريم : ااااخ ثلل شبيج
سليل : شمسوين وخاتلين هنا
ريم : كولشي ممسوين مو حسين وجان تضربه برجلها
لك حسين احجي واله وداعت بابا هسه اجرك من شعرك واكول لبيبي انعام على سوايتك اني طبعاً كولشي مااعرف بس هيج بلكت يحجي اعرفه جبان وميضل شى بحلكه
حسين : والله معليه ريم كالت روح جيب عبايتها واني دخلت وجبتها وهي حركت العبايه بشخاط وزرفتها وكالت اشمرها بغرفتها وسويت هيج وبيبي عرفت وكامت تعيط لان جديده بس متعرف احنا سويناها
سليل : عطت بكل قوتي ولج ريييم الله ياخذج شسويتي وجان تدفعني وتنهزم واني ركضت وراها

نسيت ملابسي وحالي وركض بلشارع وهي ناعمه وسريعه اريدها الزمها ماالحك وتصيح والله مااعيدها والله ولج بس الزمج اذا مااكطع الماسحه على ظهرج
ريم : ثلل العفو التوبه
سليل : اني اليوم اتوبج ونركض بلشارع بس قريب بيتنا يم الباب بمسافه قريبه وجان اسمع عيطته جمدت احس الدم بعروكي وكف

سجاد : شسوين بره
سليل : بقيت صافنه بوجهه وهو يتوجه يمشي سريع وجان يجرني حيل من ايدي ودفعني داخل البيت بلكراج اني منا اخاف منه وهلمره عصبي گلت هاي هيه اليوم اموت انجلط مااتحمل جان يتقرب حيل مني ويأشر بيده بكل اعصابه واحسه يريد يشرب من دمي
سجاد : اني مو گلت مطلعين بلشارع بملابس البيت وفوكاها مبلله ومرفوعه
سليل : بقيت امتمت اريد الكلمة تطلع ماكو
جان يعيط حيل گلت لو مگلت
سليل : ايييي عمو گلت
سجاد : لعد شون تكسرين كلامي واطلعين
سليل : موووو
سجاد : وجعووو احجي
سليل : دمعت عيني ونزلت اول دمعه على خدي جان يعيط بلزايد لتبجين واحجي عدل
سليل : مسحتها الدمعتي من الخوف وكتله والله طلعت من وره ريم سوت وكاحه وردت اضربها ومن ركضت ماادري بروحي ركضت وراها خفت اكوله على سوايتها ويذب حركته بيها ولو هي تستاهل وفوكاها خاتله وره الباب وتسمع

سجاد : اني حجيت لو ماحجيت مو گلت طلعه لباب البيت ماكو بملابس البيت
سليل : مبرطمه ودمعتي كوه حاصرتها واحجي والله عمو نسيت وطلعت هيج
سجاد : هاي اخر مره اعيد الكلمة اكولها مره من تنكسر العب بيج طوبه خليني اتعامل وياج بلحسنى ومعتبرج عاقله وفاهمه ليش تخلين اغير تصرفاتي وياج
سليل : العفو عمو مااعيدها
جان اطب عمه نهر تركض شبيك سجاد صوتك للشارع
سجاد : شوفي بت اخوج العاقله طالعه هيج وتركض مثل الزماله بلشارع متكول اخاف يفوت احد ابد
نهر : على كيفك ياعيني طفله ومتفهم
سجاد : شنو طفله انتي من كل عقلج هيج تحجين شوفيها شطولها طول البعير وتكمز وره ذيج اني الها بس الزمها وفوكاها الايد والرجل طالعه وشوفي صدر البجامه شون مفتوح وخري مني سليل لا ابتلي بيج هسه
سليل : طبيت ركض ابجي
نهر : ميخالف بعد متسويها على كيفك شجاك
سجاد :يعني تردين اشوفها هيج واسكت
نهر : تعرف سليل فقيره وطفله ومتفهم
سجاد : اني حذرتها من الطلعه بملابس البيت نهر تره سليل كبرت ومعاني جسمها برزت وهي طويله الي يشوفها ينطيها اكبر من عمرها وفوكاها لازك حيل لابسه وخفيف ورافعه هدومها ومنكع خليني ساكت مو حتى مبين
نهر : شنو
سجاد : من الاخير اذا طلعت مره ثانيه هيج صدك أذيها
نهر : ماشي بس صوتك مو حتى المنطقه راح تطلع من وراك

عافني وكعد على الدجه قريب حديقه صغيره مسويها طه وسحب الباكيت ورث جكاره وكعد يدخن بأعصاب
تقربت منه وكتله على كيفك سجاد لتنسى وضع سليل من كولشي تبجي
سجاد : اعرفها ام دميعه
نهر : لتكسر بخاطرها الله عليك تعرفها فقيره

سجاد : ماكلت شى نهر بس اني هيج من اضوج مااتحكم بعصبيتي سليل والبنات هسه بدون اب وام واني خايف عليهن
نهر : ليش امهن مو موجوده
سجاد : وينها الخاتون اتحداج اذا تعرف شى عن بناتها نست بتها مراهقه وعافيه ٣ بنات ولد بركبتها واب ماكو على راسها بيت وحدهم من الصبح للمغرب اذا متخاف ومتتعلم تلتزم بكولشي بحركتها بلبسها حتى بكلامها البنيه راح تضيع

نهر : ياستار شلك بهذا الحجي
سجاد : هذا واقع البنيه مراهقه وهسه راح اداوم وصديقات السوء هوايه وبوضع سليل هواي ناس تستغله بمساعده شباب ميخافون الله شو صغيره وحليوه واب وام ماكو شتتوقعين
نهر : بس اني اشوفها صغيره طفله
سجاد : لان تحسيها مثل بتج تره عمرها راح يصير ١٤ سنه كلها كم شهر يعني بدت المراهقه عدها واذا من هسه ملكت احد تخاف منه وتحسب اله حساب راح تضيع ويضيعون خواتها وياها اني كل غايتي احافظ عليها وعلى خواتها احس ذوله عرضي مني وبيه طه امني بناته والحمل ثكيل نهر بس مابيدي شى من شفت امهن ماوراها اي نفع قررت ادخل بكولشي يخصهن لحد ماالله يفك سجن طه

نهر : شيفكه سودة بوجهي والله كمت أيس دوم افكر اكول هم يجي يوم واشوفه
سجاد : تشوفي بس كولي يارب
نهر : جم مره كتلك خلي اروح وياك بلزياره واشوفه
سجاد : اكعدي واسكتي كلها زلم وين موليه
وهو هم ميقبل بس الله شاهد يسأل على وحده وحده بيكم وانقله اخباركم
نهر : وصلت اله الاكل والملابس الي دزيتهم
سجاد : اي قبل يومين
نهر : صحته شلونها والله داموت من وراه
سجاد : ضايج وكاعد وساكت وشايل همج وهم جهاله ومكضيها بس يقرا قران ويسبح
نهر : الله ومحمد وعلي يوكفوله ويطلعوه من سجنه ااااه ياطه ياكسرت روح اختك
سجاد : خلي اروح للشقه راسي راح يطك اشرب مسكن وانام شويه
نهر : هو انت اصلاً شجابك
سجاد : جنت يم صديقي بكر
نهر : بيت حجي عمران
سجاد : اي ابنهم خدم ويايه بلعسكريه وصار صديقي وجنت يمه كاعدين بابهم وشفت الرعنه تكمز وطفرت
نهر : ههههه على كيفك اعصابك وتره بت اخويه مو رعنه
سجاد : اسكتي لا اطب اسحلها لبت اخوج ام دميعه بس تعرف تبجي
نهر : يله روح وخلي ادخل اراضيها
سجاد : ماشي
مشى خطوتين ورجع جان يكول
كولي لأم دميعه
مو متاكل اعرفها من تبجي حتى اكل متاكل
نهر : هههه لتخاف تاكل روح الله وياك
ديطلع جان يلزم ريم خاتله وره الباب

تعاالي ولج اليوم اشوي على راسج بصل
ريم : لا عمو حباب مااحب البصل
سجاد : ولج شون تخلين اختج تطلع وراج هيج
ريم : اني شعليه قابل اني كتلها ارفعي ملابسج ونكعي بلمي
سجاد : سمعي زيبك اذا مجريتي عدل تدرين شسوي بيج
ريم : لا عفيه عمو لتسوي
سجاد : خلي اكولج شسوي ازين شعرج
ريم : ماما تكول اكصه واسويج مثل حسام وانت هسه تزينه والله ضوجتوني اخذوه لشعري وخلصوني
سجاد : وفوكاها تلاسن لا مااخذ شعرج اسويج مثل سعدون جقله
ريم : ايييع عمو سعدون الوصخ يجينا يم المدرسه ريحته اييع ويلعب بخشمه اخاف منه
سجاد : هااا تخافين منه واخيراً لكيت واحد تخافين منه اذا مجريتي عدل اخلي يعضج وريحته تصير بيج او الاحسن ابيتج يوم كامل يمه
ريم : دمعت عينها وكالت لا عمو حباب بعد ما اسوي وكاحه
سجاد : وتسمعين كلام سليل
ريم : واسمع كلام ام دميعه وجان يلزمها سجاد من اذنها
سجاد : شنو ولج شگلتي
ريم : اسمع كلام ثلل
سجاد : اذا سمعتج تكولين ام دميعه اسحلج لجقله
ريم : بس انت تكول ام دميعه اني هم اريد اكول
سجاد : لتصيرين قرد كولشي تقلدين وهاي اختج الجبيره اذا أذيتيها والله أذيج
ريم : عمو عوف اذني راح تنكطع بيدك
سجاد : تسوين وكاحه
ريم : لا لا لا
سجاد : عفيه يله دخلي جوه
جان يفوت حسين من يم الباب ويأشر من بعيد
وجان ادنج ريم وتشمر حصوه علية بس تجي اله اكتلك جبان بنيه فتان هسه الله يذبك بنار وذاك انهزم ركض لبيت اهله
سجاد : شمسوي
ريم : بس يجي اذا ماافشخه الفتان
سجاد : شحجيت هسه اني يعني انتي متجوزين جان تكول العفو عمو وركضت ليجوه
نهر : يمعود كافي وحده بجيتها والثانيه تهدد بيه
سجاد : تسكتين لو اذب حرگتي بيج
نهر : هههههه لا عيني روح ارتاح العفو عمو على كوله ريم
سجاد : رايح مع السلامه
نهر : الله وياك

طبيت للبيت ابجي ركضت للغرفه نزعت ملابسي وغزل تباوع علية خايفه لان ابجي
حضنتها لتخافين گلبي
غزل : ايش ابجين (ليش تبجين)
سليل : مابيه شى حبيبتي تعالي نلعب بلعابه بقيت الهي نفسي بيها هواي وقت بس الحسره والدمعه زارفه صدري وكاتمتها جان اطب ريم وتوكف يمي وتلعب بأصابيعها
واني كاعده بلكاع وغزل بصفي جان ادنج وتبوسني
ريم : العفو ثلل مااسويها بعد
سليل : وخري مني زعلانه منج
ريم : والله مااسويها بس لتزعلين
سليل : اطلعي بره مااريد اشوفج يله ولي بيومها من قهرتي من عمو سجاد عطت بريم لان حسيتها هي سبب الصار وطلعت وعافتني مدنجه ومقهوره بس مهتميت ورشا وراها واسمعها تكولها ولج ليش زرفتيها جان ذبيتيها بلمجاري وخليها ادور عليها ومتلكاها جات تخبلت بلزايد
سليل : خرب صفنت ذني شنو جهال لو شياطين

والله مااكدر عليهن وينك بابا تعال والله تعبت وماما مدايره بال ويوم بعد يوم تهملنا اكثر وتذب المسؤوليه براسي اكثر رجعت ابجي مكعد اكدر اكتم اذيتي
طبت عمه نهر باستني
نهر : لتضوجين عمه تره والله من خوفه عليج
سليل : مسويت شى بس يرزلني بس يعيط علية
نهر : نحجي الصحيح تره جسمج كله مبين وانتي كبرتي امي ميصير هيج اطلعين والبجامه خفيفه
سليل : غير حاره ياعمه وبلبيت منو يمنا
نهر : كلتيها بلبيت مو بلشارع تركضين وجسمج كله يهتز ميصير ياروح عمتج حتى عيب وفوكاها ولد شاب صديقه جان كاعد اكيد شافج متشوفي تخبل يخاف عليج ياعيني انتي مو تعرفين سجاد نحس وميحب احد يكسرله كلمة
سليل : كله من وره ريم وحجيت كولشي لعمه
نهر : ههههههههه هههههههه
سليل : شبيج عمه شو تضحكين
نهر : والله وطلعلج ساس ياسندس بناتج
سليل : هي وينها ماما حايره بروحها ولا حتى تسأل شصار مصار
نهر : ميخالف غير تشتغل علمودكم
سليل : بس اني مكعد اكدر عليهن عمه وكحات وميخافن
نهر : اني احجي وياهن يله كومي غسلي عيونج دم من البجي وخلي اصبلكم الغدا حتى تاكلون واروح للبيت
سليل :ليش متتغدين ويانه
نهر :عمج سامي جاي على الغدا وخطيه اكل وياه
سليل : لعد روحيله عمه لتتأخرين
نهر : وانتي
سليل : صرت زينه ليضل بالج باستني من راسي وكالت
نهر : فدوة للبنات الحلوات العاقلات لتضوجين ياروح عمتج
سليل : شكراً عمه الله كريم طلعت ورحت للمطبخ صبيت غدا ومأكلت مكدرت لعبت روحي حتى من المي الاشربه
كملت شغلي مثل كل يوم واجتي ماما
سندس : غسلتي ملابس اخوج
سليل : اي غسلتهم
سندس : باجر اخذه ويايه عدنا عزيمه مال موظفات
سليل :خلي نجي وياج ماما
سندس : شعندي روضه هو بس اخوج
سليل : زين ريم ورشا اخذيهم واني وغزل نبقى بلبيت
سندس : يبووو حسره كلت اطلع اخوجن اله تنبصن بلنص كافي لدوخيني اخذ حسام وعود غير مره الله كريم اخذجن
سليل : هذا هو بكيفج اعرف مراح تاخذنا عفتها وطلعت من الغرفه

وره ساعتين ماما بلمطبخ تحظر غدا باجر واني كاعده بلهول وراسي يوجعني من الجوع على ريوك الصبح بس مااشتهي من الضوجه وذوله تعشو طماطه وبتيته وبقيت اني مااكدر ابلع لكمه وكاعدين بلكاع يلعبون حيه ودرج وناس تكفخ ناس وهاي تعيط من وراج اكلتني الحيه وحسام يعيط عليهن ولا بالي يمهم ويم هوستهم جان تندك الباب باوعت على الساعه ساعه بلتسعه
سندس : اطلعي افتحي الباب بس شوفي منو بالاول
ريم : ليش ميطلع حسام انتي مو تكولين رجال البيت هو
حسام : انجبي انتي مااطلع حتى تغشين مو
ريم : طلعت لسانها وعيبت علية وكالتله
اي مو جبان كون تاكلك الحيه وترجعك للواحد واضحك عليك
حسام : ماما شوفيها لريم
سندس : ولج غضب كافي
سليل : اااخ بس تتعاركون اني راح افتح الباب

طلعت فتحت ضوا الكراج وصحت منو جان يكولي
سجاد : اني افتحي الباب
سليل : مشيت بخطوات بطيئه وخايفه گلت اخاف جاي يكول لماما لو اخاف عرف بسوايه ريم من بيبي انعام حسيت لويه بمعدتي مدري من الجوع مدري من خوفي من عمو سجاد
فتحت الباب تفضل عمو
سجاد : لا ماادخل همزين انتي فتحتي ولو متأكد امج العجوزيه اطلعج انتي تفتحين
سليل : دنجت وگلت بگلبي اهوو راح يبدي يرزلني
سجاد : اگلتي
سليل : رفعت راسي مستغربه
سجاد : هيج سؤالي صعب وساكته بس تباوعين اكلتي
سليل : ايي
سجاد : مااحب الي يكذب اعرف مماكله
سليل : مجوعانه
سجاد : ليش لعد تكذبين مو عيب مو كبرتي
سليل : حيل اختنكت منا ضوجة الظهر بعدها بصدري والخنكه وهو يحجي بنتره نزلت دموعي
سجاد : بس فهميني فاتحه كاك بعيونج (بوري) بس احجي كلمة فتحتي يمعوده نهايه الكاك وين بنهر دجله بحيث ميخلصن
سليل : شتريد عمو والله حتى عيوني ورمن من وراك
سجاد : حتى اتوبين واتسمعين كلام ومره ثانيه اذا تكسرين كلمتي راسج اكسره هاااج
سليل : شنو هاي
سجاد : اكل اعرف بيج مماكله
سليل : شكراً عمو مااريد
سجاد : ليش تخليني اوكلج غصب اكلي احسلج جبتلج كباب شوي تحبي
سليل : جنا قليل ناكله او بالاحرى مرات معدوده جان بابا كل ميصير عنده فلوس يشتريلنا بس بفترات بالاشهر يله يكدر يجيبلنا ناكل دوم كباب طاوه (عروك )
بسرعه حسيت بجوعه وشهيه وخاصه ريحته تضرب بلخشم اشرت براسي معناه اي احبه

فتحت العلاكه لكيت بيها ٧ لفات
ذوله ٧ لفات المن
سجاد : لأخوتج كل واحد لفه وامج هم لفه والج لفتين لان اعرف ممتغدايه
ولو امج متستاهل بس جبت الها حتى انتي تاكلين لفتين
سليل : دنجت اعرف بيه ميحب ماما بس مااعرف السبب رجعت باوعت علية وكتله شكراً هواي جبت
سجاد : ام دميعه تاكلين لفتين سمعتي لفتين
سليل : عمو لتكول ام دميعه والله انقهر
سجاد : يوم متصيرين سباعيه ومتبجين بسرعه ابطل اكولها ويله طبي جوه اكلي ليبرد الاكل
سليل : ماشي شكراً بقى يباوع علية وجان يكولي بهدوء
سجاد : سليل تحملي عصبيتي تره كله لمصلحتج
سليل : ابتسمت احاول
سجاد : يله ادخلي وديري بالج على نفسج واخوتج
دار وجهه وراح حسيت براحه غريبه وصدك جعت رأساً وركضت ليجوه فرحت لان اخوتي راح ياكلون كباب ويايه همزين جابلهم شوفو شجاب عمو
وفتحت العلاكه ورغم متعشايين بس طارو بلفات الكباب الي مثلنا بذاك الوكت جانت لفه الكباب عدهم شى جبير وفرحه من ناكل كباب او اكل من بره سفري او كيك جاهز هاي الشغلات جنا نتحسر عليها بسبب وضعنا المادي لهذا فرحت من كعد ياكلون اخوتي وركضت على ماما وبيدي اللفه
هاج يوم

سندس : شنو هاي
سليل : عمو سجاد جابلنا لفات
سندس : لا بالله كلف نفسه الكحف وشبيج فرحانه شنو جابلنا طلي
سليل : وليش ماافرح
سندس : وخري مااريد اكلوها انتم
سليل : ليش ماما والله طيب
سندس : انطيها لحسام متكفي لفه اكيد جاب كل واحد لفه اعرفه فگر
سليل : اني انطي لفه مني بس انتي اكلي
سندس : هااا وليش يمه انتي لفتين
سليل : لان مماكله
سندس : وشمدري
سليل : جان الظهر هنا
سندس : خوش والله مسوي البيت خري مري واني ماكو واكيد عمتج الثوله وياه
سليل : شبيهه عمه نهر وردة يوميه تجي تساعدني
سندس : اليسمعج تحط بيدج وبيد اخوتج فلوس شو اطب فارغه وتطلع فارغه
سليل : ليش مو قبل مده اشكال جابتلنا

سندس : انتي اعرفج لو تجيبلج قراصه عندج جايبه اشكال الله بلاني بناس مجادي واحد افكر من الثاني ولي وروحي لأخوتج خلي اكمل الاكل وانام
سليل : متاكلين
سندس : مااتزقنب وديها لأخوج

سليل : طلعت من المطبخ ورحت انطيتها لحسام وكعدنا ناكل اني باوعت خواتي يضحكن ومرتاحات عفت كلام ماما وشمرته وره ظهري وكعدت اكل بشهيه جان طيب كولش لدرجه اكل اللفتين كلهن ولا شويه عفت وحتى غزوله اكلت بس مو كامله نص والنص الثاني اكلته ريم
نمت مرتاحه رغم اليوم خلصته مغثه بس مبين حياتي هيج اكثرها مغثه ولازم اتعلم اصبر اقلها لخاطر بابا وخواتي

احنا بشهر التاسع سنه ١٩٩٦ كلها ايام وانداوم السنه الجديده ماما بيوم اجازتها عدلت الغرفه الفوك رغم صغيره وكلها غراض بس كدرت ترتبها واشترت جربايتين حديد وكنتور خشب قديم بس نظيف وكالت تتقسمون بعد اثنين بلغرفه الجوه واثنين بلغرفه الفوك وحسام ينام يمي گبت العيطه ريم تريد يمي ورشا هم واني لازم انام يم غزل لان صغيره
وماما بس تعيط وكل شويه تريد تضرب وحده لحد مقنعتهم رشا وريم فوك واني وغزل جوه لان ريم تريد الغرفه لفوك تحب الشباك الي على ذاك البيت الظاهر عدنا سندس جديده

بعد يومين ويبدي الدوام ماما كل شويه وكالت وين اعوف غزل لحد مقررت وصاحتني
سندس : اسمعي سليل دوام هاي السنه ماكو اختج وين اخليها
سليل : فدوة ماما ذيج السنه راحت مني وهاي هم اريد ارجع
سندس : وشغل البيت منو يسوي
سليل : من ارجع من المدرسه والله كولشي اسوي بس عوفيني اداوم
سندس : وغزل شون بيها هسه لو عمرها مال روضه ادخلها عوفي هاي السنه والتجي عود رجعي
سليل : نزلت دمعتي حسيت راح انحرم من الدراسه كلها
سندس : كافي تعوين مدرسه هاي السنه ماكو انجبي واكعدي وعينج على اخوتج وعود السنه التجي الله كريم قابل راح اطلعين دكتوره تاليتج لو تنجحين لو تتزوجين وتولين لبيت رجلج وتعبي وصرفي كله للرجال
سليل : ماما يارجال فدوة اريد ادوام صديقاتي غلبوني وصارو ثاني واني بعدني بالاول متوسط
سندس : حجايه زايده اكطع النعال على راسج كافي وكومي انخمدي موزين مخليه ريم ورشا يكملن على شنو اتعب واشتغل والفلوس تروح للدراسه وتاليتجن عند الرجوله واني امسح ايدي بلحايط

سليل : دنجت ابجي ورجعت عاطت كومي كمت اركض للغرفه شمرت نفسي على الجربايه ابجي يعني هاي السنه هم تروح مني ليش شنو ذنبي تضيع سنه ثانيه من دراستي والله حرام

بيومها عشى متعشيت گلبي مقبوض وروحي تلوب حاطه راسي جوه المخده ومتغطيه وابجي غزل حاولت تجر الغطا حتى تحجي ويايه هنا عمرها ٣ سنوات تمشي وتكمز وسوالفها تخبل تنكرط وروحي بيها احسها بتي مو اختي بس جنت بحاله الانهيار مكافي خسرت بابا هلمره مستقبلي كله راح
رفعت راسي عليها كتلها روحي هناك حبابه وبستها وهي حطت اللعابه بيدها وطلعت رجعت حطيت راسي جوه المخده واشهك من القهر واتخيل صديقاتي يرحن للثالث واني بالاول زين شون اداوم ويه اصغر مني واكيد راح يعتبروني كسوله ويجوز محد يكعد يمي افكار سوده ضلت براسي خنكتني لحد متعبت من البجي ماما اخاف منها شلون اقنعها وهي قافله حيل حتى متنطي مجال واحد يحجي بقيت اتكلب بفراشي وحسيت انفتحت الباب عرفت ماما جابت غزل لجربايتها بوكتها تمنيت تاخذني بحضنها واطيب خاطري او تنقهر علية وترحم حالي وترجعني بس هي كولشي مسوت ولا اهتمت وسمعت سدت الباب وراها بقى راسي جوه المخده لحد محسيت راح اختنك مكدرت انام باوعت ساعه وحده بليل وخرت من الجربايه وكمت عطشانه باوعت غزل نايمه طلعت من الغرفه البيت اظلم والكل نايم

شربت مي وردت ارجع لغرفتي بس الخنكه والحسره الي بصدري بعدها تخنك بيه باوعت بأتجاه السطح ماكو غيره مكاني الامن صعدت الدرج وصلت غرفه البنات فتحت الباب لكيت ريم نايمه بلعرض ابد متنام بلطول حتى نومتها تختلف وتشمر بلغطا جان الجو كاسر وبيه بروده غطيتها وباوعت على رشا نايمه متلفلفه بلغطا صفنت عليهن وگلت بگلبي اخاف ابقى ادك على المدرسه وماما تبطلهن مثلي اني ضيعت بابا هلمره اضيع خواتي عفتهم وطلعت وتوجهت للسطح صعدت الدرج الثاني وفتحت الباب وتوجهت لطابوكاتي كعدت عليهم واباوع للسما اتخيل بابا لو بعده يمنا جان شلون حالنا هسه اكيد مراح يقبل ابطل واكيد جان هسه ماما بعدها ويانه مو ملتهيه بلشغل دمعت عيني اشتاقيتلك بابا حيل اشتاقيتلك

مسحت دمعتي وبقيت افكر بهواي شغلات اجت بالي كمت اتمشى بلسطح اتوجهت لذاك البيت مديت راسي شفت قفص عمو سجاد مال الطيور فارغ خطيه هذا هم ابتلى بينا بلوه وطردته بيبي انعام بس لو افهم ليش تكره بابا يعني اكو ام تكره ابنها جم مره سألت ماما ليش هيج تسوي تكول كلمتها المعتاده تكره ابوج وحده حقيره وحقوده زين ليش تكرهه ترجع تكول مو حقيره ومتنطي سبب واضح وصلت مرحله كمت ما اسأل ليش تكرهه لان كل مره نفس الاجابه رجعت كعدت بمكاني ومرجعه راسي على الحايط الهوا طيب نص التاسع مدري غفيت دقايق زين هذا حلم لو شنو فتحت عيني كابوس اي كمت مفزوعه واعيط واضرب على صدري خواتي ركضت بأتجاه باب البيتونه فتحته وكبت النار بوجهي واعيط ماما ريم رشا حسام واكمز بيتنا كعد يحترك

نهر : نايمه بصف سامي واندكت الباب يريد يتكسر
سامي : منووو شكوو اكو واحد يدك هيج الباب
نهر : جريت الروب بصفي ولبسته اندفعت الباب امه وتعيط ولج نهر الحكي بيت اخوج يحترك
من الهبطه ركضت مثل المخبله بسيت النوم جرني حيل سامي ولج اوكفي
اضرب على وجهي وصدري ولك بنات اخويه راحن

جان يشمر العبايه عليه لزمتها واعيط طلعنا نركض الشارع سويته خطوتين وبس اعيط كتله لسامي روح لسجاد لشقته بسرعه عافني وركض لسجاد واني بقيت اركض مثل المخبله واباوع البيت مقندل تكول كومه قش يابسه ومحتركه والنار واصله للسما والشارع صاير نهار عبالك من قوه النار وسندس بلشارع كاعده بلكاع وبحضنها حسام وتلطم

جريتها من حلات روحي من دشداشتها حيل واعيط بكل علو حسي البنات وينهم يمعزايه وين البنات
وهي تلطم على راسها وتملخ بشعرها وتصيح جوه بعدهن جوه
ولج شون تعوفيهن واطلعين غضب الله على راسج الله لا يوفقج تعوفين اربع بنات جوه واطلعين بطرك روحج
سندس : ( تعيط وتلطم وتحجي )ولج والله من حلات روحي مندليت دربي كعدت من الدخان والغرفه مااشوف شى بيها والحراره قويه بس سحلت حسام كلت اطلعه وارجع عليهن بس طلعت للكراج ردت اطب كبت النار بوجهي وسحلوني الجوارين ولج بناتي نهر راحن بناتي ياناس احتركن

نهر : كمت اضرب على راسها وعلى ظهرها واعيط ولج ليش عفتيهن ليش تهسترت وهي هم تضرب روحها ما واعيه على نفسها كعدت بلكاع والطم والناس داير مدايرنا الي يركض يجيب طفايه والي يركض يجيب تراب شيطفون والبيت مقندل وبيت انوار لان بصف بيت طه هم بلشارع كلهم لان ميعرفون اخاف النار تصير على بيتهم اله بيت اهلي صنطه ولا واحد مد راسه واظلم وجان يجي يركض يلهث حافي ويعيط وينهن
نهر : ولك سجاد راحن البنات احتركن غزلان طه يبوووووو عليك ياطه راحن غزلانك كل عيطه مني تهز الشارع هز واملخ بشعري
اجت المطافي ويركضون جان يجيت سجاد لزمته وين جان يدفع ايدي حيل ويطب مثل المخبل حاولو يلزموه بس هو فاقد اكثر من عدنا وطب يركض

يتبع ...