رواية ابي والغزلان الفصل التاسع والعشرون 29 - بقلم ريام هادي

ابي والغزلان
للكاتبة Reem
البارت السادس والعشرون

انه وجرحي انولدنه ابيت فد يوم
اليصد لينه يكول اثنينكم توم
اشبهه وهو يشبهني
وابد ما بيه فرق عني
وعلينا بالتساوي الالم مقسوم

سجاد : جنت نايم اني بطبعي نومي خفيف اي طكطكه افز وجان اسمع الباب يتكسر من الدك لابس فانيلا وبجامه ماخذ راحتي بشقتي طفرت من فراشي هذا منو يدك الباب هيج فتحته وجان اشوف سامي كدامي يلهث ويعيط الحك بنات طه احترك البيت بيهن
طلعت حافي مثل المخبل واركض بكل قوتي ومن وصلت وشفت البيت كاب وسندس بره وابنها بحضنها ولا وحده من البنات كلهن جوه تخبلت ذره عقل مبقت بالي بهاي اللحظه اجو الاطفاء منتظرت ودخلت وياهم

سجاد : حاولت افتح الباب مال الهول مكدرت النار عاليه مو شفت البيت تاكله النار عبالك تاكل بيه تهسترت اتخيل ضحكت رشا وكاحه ريم ولعب غزل ودموع سليل اااخ دموعها الي من تنزل تحرك صدري كمت اضرب بكل قوتي حتى بس ينفتح اتجوه واحترك ولا هامني ولا كعد احس بلنار ضغط الحريق سد الباب نريد اني والاطفاء نفتحه مكعد نكدر عفتهم وطلعت ركض ودخلت لذاك البيت دفرت الباب البره منفتح كمزت من الحايط ومن باب الخشب مال الصاله دفرته حيل انفتح البيت صنطه ومابيه احدواظلم

صعدت طلقه حتى الهوا انكطع بصدري وكعت على الدرج عثرت وردت كمت بسرعه وصلت للسطح حتى اطفر من سطح بيت عمتي لسطحهم طفرت مااحس لا بضربه لا بحركة كل همي اوصل للبنات عبرت الحايط وصرت بسطحهم لكيت باب البيتونه مفتوح دخلت ركض
مكدرت النار تلهب تاكل كولشي تحسها نار جهنم طبيت خطوتين هدومي اخذتها النار والدخان يعمي طلعت وادور على التانكي مال المي انكع بيه نفسي وارجع ادخل واعيط سليل ريم رشا جاييكم متهستر اول مره احس اريد ابجي احس دموعي طلعت وصلت لعيني من الخوف عليهن اني من يوم شغله امي واختي حلفت ماابجي واصلاً الدمعه هي جمدت بعد بعيني واتخبل من البجي ميهزني اكبر موقف مات  ابويه وشكد احبه مبجيت الا هذا الموقف احس الدمعه تطلع من گلبي وتريد تنزل من عيوني واتخيل البنات جوه وكعد يحتركن

فتحت قبغ التانكي اريد فد شى انكع نفسي بيه باوعت اكو بوري جانبي فتحته اجه المي نكعت روحي وركضت دادخل واسمع رشا تصيح عمو عمو احنا هنا ادور على الصوت مثل المخبل واندار واشوف رشا تأشرلي ركضت بإتجاهن لكيتهن عابرات على ذاك البيت وخاتلات بلقفص مال الطيور مالتي الفارغ وسليل شبه فاقده حاضنه غزل ومقرفصه روحها رغم مريت من يمهن بس مشفتهن من عبرت لان ظلمه وهم عقلي مو براسي رجعت عبرت وحضنتها لرشا تبجي وتشهك وتصيح عمو الحك غزل احتركت

قبل  ٢٠ دقيقه بلضبط
سليل : من شفت النار كابه بلبيت كمت اكمز نزلت اركض على خواتي انركعت بلمحجر مهتميت واعيط احتركنا وكوه اعيط الدخان دخل صدري واكح واحجي  دخلت على غرفه ريم ورشا لان فوك اقرب شى للسطح خفت على رشا لان احس وضعها الصحي موزين من يوم مخربت وهي بالي سحلتها وضربتها على وجهه  الْحٍمَدٍ للـّہ مغايبه عن الوعي وحيل سحلت ريم من ايدها جانت غرفتهن بدت تاخذ نار وتعلى وخاصه من جهه نضده الفراشات كبت وهن سوده عليه كامن يصرخن بعالي صوتهن ولازماتني حيل من ملابسي  ويخافن يطلعن من الغرفه لان حتى الباب اخذ نار كوه سحلتهن وركض طلعتهن الدخان زرف صدري وأذاه وعيوني بس تنزل دمع هم خوف وهم محتركه عيوني من الدخان ركضنا بسرعه للسطح دفعتهن حيل وكعن بلكاع عاطت ريم وين رايحه
سليل : اجيب غزل وماما وحسام ابقوا هنا لتتحركون
انزلت اركض واسمع عيطه ريم الي شكت بلعومها شك وتشهك ثلل لتروحين حبابه راح تحتركين ورشا وياها تكمز وتبجي

نزلت بس احس نازله لجهنم كل بايه من الدرج انزلها النار تقوى والحراره تحرك والدخان يعمي اكح واركض واكف ثانيه لان احس راح افقد الوعي كمت اتجى على الحايط حسيت درجنا اطول دًرٌجّ بلدنيا اريد بس اوصل للطابق الاول بعد ٣ بايات وكفت اباوع البيت بس نااار كمت اعيط بصوت مخنوك ماما وينج ماما اطلعي خفت اي خفت ادخل بنص النار مو بيدي المنظر مخيف والنار تجوي كولشي بيه احس كابه بيه مو بلبيت اعيط واكح ماما حسام جانت غرفتهم اقرب من غرفتي اني وغزل باوعت قريت سوره الفاتحه والاخلاص ذني بس اجني بالي واصيح بكل صوتي الي بدا يختفي من الخنكه يارب لتحركني وابجي

لكيت الباب مفتوح والغرفه متبين من النار الجربايه ممبينه بس مقندله نار معرفت ماما وحسام بيها لو لا مداشوف زين كمت الطم على راسي واصيح ماما وينج اتهسترت بس كل شويه ويطك شى يمي واكمز النار واني بنصها اسمع صوت الغراض شون من الحراره تموع وناس اطك وتنفجر وناس تتكسر اشكال الاصوات المرعبه باوعت على صوره ابويه الروحي بيها شون كعد تحترك كدامي هي لحظات بس تعادل عمري كله اني هسه بنص جهنم وماعندي بس الله يوكفلي مكدرت ادخل غرفه ماما لان نار بس نار كولشي مااشوف ركضت على غرفتي

دفعت الباب برجلي هو ما مسدود بس هيج مردود واشوفها نار يمه غزل احس شى ياكل بيه بس من كثر ما فاقده مااحس بلنار الي كعد تلتهب بيه وكل شويه اتحرك واكمز وتطفر غراض علية باوعت على فراش اختي كعد تاكله نار كمزت من حلات روحي عليها واطفي بيدي ياناس اختي تحترك كدامي سحبتها حيل وشمرتها بلكاع اريد فدشى اطفيها بيه كلها تحترك كمت اضرب بمكان انار واطفي وهي مااعرف ميته عايشه لان لاحس ولا نفس شمرت نفسي فوكاها اذا تحترك خلي نحترك سوه طفت النار الجانت مجلبه بجامتها اباوع قطعه سوده مدري حرك مدري دخان وتصخمت شلتها بسرعه وركضت اكو تعلاكه مال ملابس وكعت على ظهري وكعت بلكاع واختي وكعت مني لزمتني النار من هدومي وراسي اتعارك ويه النار وكأني اتعارك ويه عمو سلام بس بكميه الم ورعب اكثر بس هلمره ماكو بابا ينقذني ولا يدافع عني بدت تغوش عيوني احس راح اخرب واختنك اكثر وصدري انتهى اعلن استسلامه بعد ميكدر يجر النفس بس منظر اختي بلكاع وتريد النار ترجع تشب بيها هو الي خلاني احارب الموت اي جنت احرب الموت مو النار

دفعت التعلاكه برجلي وسحلت غزل مكعد اكدر اشيلها تعبت وجسمي كله يحركني ويوجعني وصلت للدرج بعد مابيها مجال لازم اشيل جان اطك البوفيه تكول انفجار صوتها خلاني مثل المخبله اشيل اختي واصعد واصيح ياالله ويه كل بايه واتذكر ايد بابا وسبحته ومن يكول كل متضيق بيج نادي الله هو راح يفرجها عليج واذا بقت ضايقه صلي على حبيبه راح يستجيب الج وكمت اصلي على النبي بايه اصلي وبايه اذكر اسم الله بس وصلت للسطح اريد هوا هوا ماكو تكول هوا رب العالمين اختفى لكيت ريم ورشا كاعدات بصف التانكي وحده حاضنه الثانيه ويشهكون من البجي مكدرت اي شى احجي صوتي اختفي أشر بيدي شمرت غزل بلكاع ولهسه ماادري ميته لو عايشه دفعت الطابوكات مالاتي وكعت مكدرت طابوكه خفيفه مكدرت ادفعها من كثر ماتعبت وكولشي بيه يحركني خواتي يباعن عليه ويبجن ومرعوبات بس هم ميحجن كوه طلعت وهمس وبخنكه اعبرو

عبرنا لبيت انعام كلت اخاف نبقى بسطحنا وينفجر البيت او يوكع ما اعرف شون اجت الفكره والحمدلله الحايط الي بينا اصلاً ناصي طفرت رشا وريم وانطيتهم غزل من الحايط لزموها بس خايفات منها وعلى بجيه وحده اريد اصعد الحايط مااكدر كعدت بلكاع ابجي ابجي بقوه وبشهكه طفرت ريم مره ثانيه
كومي ثلل عفيه
حطيت ايدي عليها ااخ يابنت امي وابويه رغم عمرج الصغير بس احسج قوتي صعدت وهي ترفع برجلي بس يامنطقه تلزمها اعيط منها لحد معبرت وكعت على ذاك الحايط اشرت ادخلن للقفص خفت من بيبي انعام اخاف تضربنا اذا عرفت عبرنا حطيت غزل بحضني ومنا ريم راسها على جتفي والجتف الثاني رشا ويبجن ويايه باوعت وركزت على وجهه غزل الشعر الاشكر ماكو الوجهه مصخم والركبه محروكه وريحتها ريحه لحم محروك عرفت اختي ماتت محسيت شصار بقيت بس حاضنتها والولي الها واكول بداخلي هذا حلم هذا كابوس اني لان صعدت بلسطح اخذتني النومه هسه ماما تضربني على وجهي وتكعدني وتكول انزلي نامي بفراشج

سجاد : فتحت القفص شفت سليل حاضنه غزل مثل عبالك تريد تنومها وحالها يخوف وجهه ممبين وشعرها مااعرف كلها يخوف شكلها طلعت ريم تشهك حضنتها بيج شى احتركتي تأذيتي
ريم : لا بس ثلل وغزل احتركو
سجاد : اششش اوكفي ورايه ولتخافين
سليل تعالي اطلعي متباوع عليه تعالي سليل اني عمو سجاد انطيني غزل خلي اشوفها وهم اشوفج
متباوع مستمره تباوع على غزل حسيت سليل بذيج اللحظه اتخبلت ومو بوعيها ومااكدر اجرها حيل تتأذه والقفص كصيف

سليل بداعت طه باوعي عليه اجه ابوج شوفي اجه رفعت راسها شويه وجهه بس الدموع مبين منه
سليل : بهمس مخنوك وصوت شبه ممسموع بابا عافنا وراح
سجاد : انطيني ايدج انطيني جريتها على كيف حسيت وجهه بيه علامات الم اباوع ايدها محروكه واني لازمها منها ردت بس تطلع خارج القفص طلعت سحبت غزل منها صايره خشبه جات تعيط لتاخذها
عرفت بهاي اللحظه سليل فاقده تماما باوعت منين اجرها ايد محروكه والايد الثانيه سوده فحم بس ماادري محروكه لو لا وحالها يبجي الكافر باوعت كتلهم تعالو انزلو ورايه بسرعه لازم انودي غزل عرفت من انزل وبيدي غزل راح تنزل ورايه وصدك نزلت بس تباوع على خواتها وطلعنا للشارع
وعياط الناس ممصدكين طلعن وركضت سندس ونهر وشافن غزل بيدي شبه ميته وعياطهن اخذ الدنيا مهتميت لأحد بكد مافكري شلون انقذ غزل واشوف سليل الي لحد هسه ماادري شمحروك بيها عطت عليهم يوخرون مني وصحت سامي انزع القميص والشحاطه مالتك لان اني بطرك الفانيلا وحافي اخذت قميصه وشحاطته وركض الجيران كلها ويانه وبثواني السيارات اشتغلت عطت على سندس اتصعد البنات كلهن ناخذ للمستشفى لان لحد هسه منعرف كل وحده شصار بيها اخاف محروكه برجلها ايدها ومكعد تحس مثل ميكولون حراره صواب بعدهن بخوفه وجهال صعدناهم بلسياره وكبل للطوارئ

نهر : يمه يطه تعال شوف بناتك حاضنه سليل الي بس نفس صاعد ونفس نازل وشكلها يخوف الطريق كله الطم على حالهن هذا الفقير دوم الدنيا تركض وراه بعربانه وادوس راسه

وصلنا لمدينه الطب والناس تركض ويانه دخلنا للطوارى ومباشره اخذو غزل من ايدنا
سليل يمه احجي شو تعالي اغسلج
سجاد : لا اياج تقربين مي منها تتأذه وتتشوه اذا محتركه اكثر
نهر : وتبقى هيج
سجاد : هسه تعالي سليل اخذتها ونهر ويايه وريم ورشا بحضن سندس تبوس بيهن وتبجي  لا والله بعد وكت رجعت وجهي بأتجاه سليل وهي بس تمشي وتباوع ولا تحجي واحسها دايخه كوه تترنح بلمشي لزمت ايدها الثانيه وحاولت اسندها وهي تمشي اباوع على رجلها كلها دم
نهر : لطمت على وجهي سليل يمه شبيج متحجي
جان يشيلها سجاد همزين مدفعته لان تخاف احد يلزمها بس هي مو بوعيها وهم اذا تمشي خطوتين بعد تخرب والله اعلم شيصير بحالها

شالها وركض بيها لقسم الحروق واعيط على الاطباء اخذوهاومددوها على السديه وبدو يفحصوها وحطولها اوكسجين لان صدرها تعبان من كميه الدخان الي مستنشقته
شويه وكال دكتور صيحو الدكتوره هديل
نهر : شبيها عفيه
الدكتوره هديل دكتوره نسائيه نريد تفحص المريضه لان عدها نزيف شكد عمرها
نهر : ١٣ سنه ونص تقريباً
هسه تجي الدكتوره تفحصها وتأكد شكوكي
سجاد : شكو نهر شصار
نهر : مااعرف يكول عدها نزيف ولك سجاد وحده محركه والثانيه نزيف هاي بنات الغالي بين الحياه والموت
اخويه اذا عرف يوكف گلبه
سجاد : خلي نفتهم وكافي تبجين وتلطمين لتنسين احنا بمستشفى وكلها ناس مرضه وتعبانه وهسه يطردوج لان صوتج عالي

نهر : هو بيدي متشوف حالنا
وجان تدخل الدكتوره وتطلب من سجاد يطلع
انتي امها
نهر : هااا اي امها مكدرت اكول عمتها لان اني احبها حتى اكثر من امها فحصتها وكالت
شكد عمرها
نهر : ١٣ ونص
الدكتوره : البنيه محروكه لو شنو متعرضه لحادث وضعها مخيف
نهر : والله البيت احترك وكوه طلعناها باوعت عليه حست مقتنعت وخاصه شكلي مو مال طالعه من حريق
هي بالغه قبل
نهر : لا

الدكتوره: البنيه مابيها شى مجرد من الهبطه  بلغت والهبطه قويه واول مره تجيها الدوره الشهريه لهذا صار عدها نزيف راح اكتبلها على مقويات وخلي نشرف طبيب الحروق شيكتب الها لان برجلها وايدها وحتى جزء من وجهه محترك درجه الحرق عدها من الدرجه الاولى بس اعتقد وجهه شويه يتأخر هذا الشى يشخصه طبيب الحروق الي عليه من يكتبلج علاجها تجيني حتى نرتب علاج ميتضارب ويه علاج الدكتور وتكوم بالف سلامه
نهر : رحمة الله والديج دكتوره
ااخ حتى يوم متصيرين مره لازم گبلها هبطه واذيه ااخ يابويه المن خلفتنا للعذاب والقهر
بس العذاب لطه تكول الدنيا وعذابها مقسومه على راس اخويه وبناته
اباوع عليها ياعيني عليج بس العيون تتحرك حتى من فحصتها الدكتوره اي ردت فعل مسوت شويه وطب سجاد هااا شبيهه
نهر : هاا خجلت شكول الها
سجاد : يمعوده احجي شبيهه
نهر : بلغت دار وجهه ومحجه اي شى وكعد على كرسي بعيد ويباوع عليها ويتأفأف

شويه ودخل طبيب الحروق وبدو يمسحون بوجهه سوده عليه اذا شافت حالها شراح يصير بيها لا رمش ولا حاجب وهذا الشعر الحلو الكصيبه التسوه الف بنيه ماكو محروكه والوجهه نصه دم ومحرك عدا ايدها ورجلها لو يشوف حالج طه يموت ورب الكعبه كعدت بلكاع وابجي  انطوها مسكن ونامت وسجاد خلصها يركض يمنا ويم غزل الي لهسه منعرف حالها شويه وراح سجاد ورجع وره اقل الساعه جايب مستلزمات لسليل وكال بدليلها
نهر : منين جبتهم
سجاد : من بيتج رحت لرجلج وكتله بس كتله الج تره
نهر : صخام هسه يرزلني يكول شلون اكولك
سجاد : لعد شتردين اكول لولد غريب عن سليل انتي اقلها مرته
نهر : يله رزاله وتفوت فدوة الها المهم تكوم بلسلامه
سجاد : طالع اروح لغزل بدلي الها وعينج عليها
نهر : صار
حاولت ابدل الها انشلع گلبي لان ماشاء الله كبرانه وبقيت اباوع عليها شلون متأذيه لحد متعبت من كثر ماصافنه عليها

عفت سليل نايمه وطلعت اشوف سندس والبنات
تعالو حبيباتي
ريم : عمه شونها ثلل
نهر : زينه عمه لتخافين
رشا .. بس وجهه يخوف راح من تكعد تنقهر
نهر : يرجع عمه شكلها المهم انتم بخير
سندس : ولج ينهر تعزيت وتصخمت ضليت اني وجهال اخوج بلشارع ولج راح تعبي وشغل اشهر ورجعنا على الحديده
نهر : وحق الله انتي متستحين ولج بنتج لو تصبح لو متصبح والجبيره فاقده ربج طلعهن بمعجزه وانتي حايره بتعبج وبلفلوس والبيت
سندس : شسوي ولج من حركت گلبي شباوع بناتي المجطلات لو صفينا بلشارع

نهر : متصفين نشوف شلون نحلها كولي  الْحٍمَدٍ للـّہ طلعن البنات وانتي حايره بفلوسج
سندس : هو الايده بلمي مو مثل بلنار وين انومهن وماكو سكف يحويهم شون اعيشهم اذا حتى ملابسنا راحت ولج البيت تراب هو بس هذا الفلح بيه طه وعافه النا وتالي يصير تراب يبوو على حظج يسندس منين متجيبيها توكع على راسج
نهر : والله الحرك الج مو لهاي الملاك النايمه جوه

سندس : عود تسوين نفسج حنينه وتخافين على بناتي اكثر مني يله دبريلنا مكان نبقى قابل بلمستشفى
نهر : ولج مصار ساعه ونص من اجينا مصار ساعه ونص من جنتي بلكاع تلطمين على البنات وبعدج حتى متأكدتي تعيش غزل لو لا ورجعتي تفكرين بلفلوس والبيت ولج الموت جان داير مدايرج انتي وبناتج وحايره وين تنهجعين وتنامين نمتي لا كمتي كون
والله عين البشر كويه ومثل عينج مشايفه

سندس : اسكتي نهر لا اذب حركتي بيج ونار گلبي واطيح حظج هنا
نهر : دطيري خرب حظك طه شكد اعرف ماعندك حظ ومنعول حظك بزفت بس متوقعت هيج
سندس : شنو قصدج يمه
نهر : لا قصدي ولا شى جان يجي سجاد سريه بأتجاهنا
سجاد : شكو صوتكم واصل لنهايه الممر متستحون شنو الصوت عالي وتتعاركين وين كاعدين بلسوك
سندس : هاج استلمي اجي الثاني وراح يتفلسف براسي
جان يدنج عليها سجاد وهي كاعده على الكرسي ويحجي بنبره قويه وحازمه وبصوت مو عالي
تسكتين هسه لو اخلي الاطباء تحير شتعالج بيج

سندس : ليش يمه هم عايزه تمد ايدك عليه
سجاد : اسمعي سندس اني اكره شى عندي الي مثلج
سندس : هلوو شنو المثلي شوو انت متعرف تحجي
سجاد : عفيه مااعرف احجي بس اعرف أذي احقر خلق الله اني اذا اريد أذي واحد ابجي على زمانه واخلي يكره الساعه الي انولد بيها لهذا جفي شري ولتحطين راسج براسي تره هسه اني بليس كعد يفتر براسي واذا هسه صغرت عقلي وحطيته وياج وتراب ابويه اسحلج من شعرج وبره المستشفى اشوفج منو سجاد انجبي وابلعي لسانج وصوتج مااسمعه

سندس : شفتي نهر تقبلين يتجاوز عليه واني اكبر منه
سجاد : الميحترم نفسه ليطلب من الناس الاحترام جري عدل واسكتي منا لحد منعرف البنات وحالتهم مااريد نفس منج
نهر : اي بعد ايدي
سندس : وجع كون بگلبج
نهر : ثلثين الدعا على الداعي
سجاد : وانتي هم كافي نهر وروحي يم سليل اخاف تحتاج شى
نهر : شخبار غزل فدوة
سجاد : بعدها وضعها حرج واصلاً من جبناها شبه ميته بس هاي الطفله الله كاتبلها تعيش والمشكله حركها من الدرجه الثالثه وخطير اكو اماكن حيل متأذه منها بس لحد هسه الاطباء كل همهم تعيش وبعدين يشوفون حل للحرك
نهر : ربي دخيل نبيك وحبيب نبيك تشافي وتعافي هاي الطفله والله اذا صار بيها شى طه يتخبل
سندس : هو وينه اخوج عافني بلضيم وراح
نهر : على اساس مسافر سياحه ولج انتي شنو من بشر ااااااخ خلي اروح يم سليل لا هسه الزمج من شعرج واسحل بيج المستشفى
سندس : خوش والله ياهو اليجي يرزل لتشوفون ساكته الكم غير من الحال الي اني بيه
سجاد : اششش صوتج لدوخينا وين البنات
نهر : يمه ريم ورشا وين
ركضنا ندور عليهن وسندس بقت يم غرفه غزل كتلها اكعدي انتي شوفتج بس الهم
واندور جان يكول سجاد خاف راحن يم سليل
نهر : هنه وين يندلن غرفتها
سجاد : على اساس غرفتها بلبصره شبيج نهر بذاك الممر واكيد شافني جم مره اروح واجي واندلن
ركضنا وصدك دخلنا للغرفه لكيناهن كاعدات يم راس سليل ويبجن
مباشره نزلت دمعتي اااااه يابنات طه مشلوعات الگلب من الصغر اخذتنها من ابوجن اجيت حضنتهن كافي يمه عيونجن راحت

ريم : ثلل شعرها راح راح تبجي من تكعد ومتلكاه
نهر : يطلع حبيبتي
رشا .. وجهه شنو هذا بيه
نهر : عصارات علاج للحرك حتى يطيب
ريم : غزل وينها
نهر : يعالجون بيها
رشا .. يعني ماماتت
نهر : لا حبيبتي ادعولها كولو ياالله شافي وعافي اختنا غزل واختنا سليل رددو ورايه
باوعت على سجاد طلع وكعد بره مدنج وايده على راسه عرفت بيه منهار بس هو هيج ميبين للمقابيل

صار الفجر وذني حتى نوم ميقبلن ينامن اله تكعد سليل شويه وحست سليل وكعدت ترفس وتوخر الاوكسجين وتصيح احتركنا اطلعو اطلعو بصوت مخنوك كولش ركضت وحضنتها على كيفي
كافي بنتي كلهم بخير لتخافين سليل حبيبتي افتحي عينج امي انتي افتحي ياگلب طه وغزالته بلنص ساعه يله حست وفتحت عينها ونزلت دموعها
نهر :  الْحٍمَدٍ للـّہ على سلامتج حبيبتي
سليل : فتحت عيني وماادري شصار بس شفت عمه فوك راسي ورشا وريم يمي يبجون
اريد احجي مااكدر ماما حسام غزل

نهر : كلهم بخير كومي ياروح عمتج الي سويتيه اليوم اكبر وحده متسوي ضحيتي بروحج علمود خواتج ولج والله امج ماسوت سوايتج خلي يشوف طه شمخلف والله بنات بالف رجال كومي وشدي حيلج
سليل : عطشانه عمه
نهر : خلي الطبيب يجي
سليل : يحركني وجهي وجسمي مديت ايدي على وجهي جان توخرها على كيف

نهر : لا فدوة لتمدين ايدج
جان اطب سندس تبجي يمه حبيبتي بنتي  الْحٍمَدٍ للـّہ على سـْـْلامـتج جان متت وراج لو صاير بيج لو بخواتج شى وحضنتها وسليل تبجي بحضن امها باوعت على سجاد الرافع تك حاجب ويهز بيده واكف باب الغرفه مدخل

بقينا للصبح واجه الطبيب وشاف حالتها وكال تكدر تطلع بس مع الاسف غزل وضعها متغير وحرج
سليل : دخل عمو سجاد وباوع عليه وكال  الْحٍمَدٍ للـّہ على سلامتج
سليل : دنجت وتعبانه كوه جاوبت الله يسلمك
سجاد : يله امشونا نطلع
سندس : وين نولي شو بيت وطار
سجاد : امشو يمي بلشقه حتى متفرج
سندس : خوش والله من البيوت للشقق تاليها نصفى بلشارع
سجاد : متردين تجين اخذ البنات واروح

سندس : مو بكيفك هو
سجاد : منو يمنعني انتي
سندس : اهوو تره مالي خلكك البينا كافينا
سجاد : يله بنات وانتي هم نهر امشي
نهر : وغزل شون
سجاد : بلعنايه المركزه منكدر نسويلها شى بس اوصلكم لان عيب هذا جيرانا بقى ويانا خطيه وحلف اله هو يرجعنا
نهر : خلف الله عليه
سجاد : اوصلكم وابدل وارجع الها
نهر : سامي ليش مأجه
سجاد : اني بقيته هناك اقلها واحد يفهم شصار شرطه ودفاع مدني كلها هناك وخليتنا بمكانه
نهر : خوش يله بنات لزمت ريم ايدها نار نزلت عليها شبيج ماما
سندس : شبيهه
ريم : نعسانه
نهر : بله شفتها مصخنه نار
سجاد الحك للصيدليه جيب النا خافض حراره اخاف البنيه تنشمر
ريم : ما احب الدوا عمه
سندس : اشش اشربي مابي حيل تتمرضين هسه
نهر : ابنج حسام وين
سندس : عفته يم انوار
نهر : شويه واجه سجاد وشربنا ريم وانداريت على رشا وانتي گلبي بيج شى
رشا .. لا عمه مابيه
نهر : يله خلي نكوم سليل
اجه وراد يلزمها دنجت مقبلت
نهر : حبيبتي خلي يساعدج امي
متحجي
سجاد : عوفيها هسه اجيب كرسي واجي
راح جاب كرسي وكوه كعدناها بيه
سندس : وديني لبيت انوار وبعدين اجيكم اخذ حسام
سجاد : ومنو يبقى يم البنات
نهر : اني ابقى عوفها تولي
سندس : ولت روحج كون غير اجيب ابني واجي
نهر : اووووف
سليل : واعيه الي داير مدايري بس مالي خلك احجي بس اريد اشوف غزل قبل منطلع كتلهم اريد اشوفها
سجاد : تصير زينه واجيبج الها
سليل : سكتت ومحجيت صعدوني للسياره عمه وماما وكعدنا محاشك لان متكفي بس ريم بحضن عمو سجاد ليكدام
احس نار بكل جسمي اخاف اغمض تجي النار گبالي

وصلنا للشقه واول مره نشوفها عباره عن غرفه وهول ومطبخ وملحقاته جبيره بس مشكلتها غرفه وحده بس
كعدنا على القنفه وريم شايلها عمو وصعدها لان نامت واني كوه صعدت الدرج بمساعده عمه
احس بطني توجعني كعدت عمه فهمتني الي صار بيه وعلمتني جنت سامعه من انوار من تسولف ويه ماما بس ماافهم شنو معناها  بس عمه نهر فهمتني
طب عمو سبح وبدل
كله هذا واني حاسه اكو شى نقص بيه بس من كثر متعبانه وبعدني مهبوطه ممركزه

عمه دخلت تسوي اكل وعمو سجاد طب لغرفته رجعت راسي على القنفه رفعت ايدي شنو اباوع كصيبتي ماكو وين شعري بلحظه طلعت عمو من الغرفه طبيت اركض للمرايه الموجوده بغرفته واباوع شكلي لا رمش ولا حاجب وشعري ماكو محترك عطاب باقي ونص وجهه يخوف رغم بيه دهن شكلي بشع اني نفسي خفت منه كمت اعيط رغم مخنوكه بس من القهره مكدرت اكتم تهسترت وكعدت بلكاع اجر بشعري اريد يغطي بشاعتي مديوصل  طب سجاد يركض واصيح عمو شعري راحت ضفيرتي ماكو عمو احتركت اني احتركت جان ينزل بمستواي وحضني حيل بلحضتها صرخت بكل صوتي وحضنته واصيح راح شعري صرت بشعه
سجاد : اششش على كيفج ليصير بيج شى
بحضنه وحاضنته واحجي ومتهستره

شيصير بعد شو طفولتي ودمروها ابويه وضيعته البيت العشنا بيه احترك اختي واحتركت واني تشوهت شيصير بعد عمو شيصير
سجاد : جان يجرها من حضنه وصارت بوجهه ولازمها من جتفها ويحجي بهدوء هذا الشعر الراح فديتي بيه خواتج لو ما انتي وشطارتج وسباعيتج جان خواتج احتركن
سليل : شنو الفايده مو غزل احتركت ادري حيل تأذت وضامين عليه عبالك مشفتها غزل الحلوه احلانا اتشوهت عمو وكمت اكمز على كعدتي واجر بشعري وجان يرجع يجرني ويحضني حيل
بلحضتها من حضنته بقوه واشهك على جتفه ردت اب اي اني سليل الي عمري ١٣ سنه ونص عشت الي معاشته وحده عمرها اربعين عشته اني اريد ابويه اريد اب يحضني يطبطب عليه ويكولي لتخافين لتبجين اني يمج حسيت بذيج اللحظه عمو سجاد هو ابويه وعمي ردت احس بالامان اني خايفه اني طالعه من موت ونار وشكل مخيف متستوعبه وحده بعمري اهم شى عدها شعرها وجهه واثنينهم خسرتهم

بقيت ابجي بحضنه واشهك لحد متعبت حسيت ايده تلعب بشعري المحروك ويهمس بأذني
سجاد : لتخافين يرجع ويرجع احلى من قبل وجهك كالو يتعالج كلها كم شهر ويرجع احسن من الاول لتضوجين ولتبجين وتذكري انتي ضحيتي بكصيبتج لخاطر حياه خواتج ولو ابوج موجود جان افتخر عنده بنيه مثلج مخافت الموت واجهته انتي بطله سليل بطله شوو خلي اشوف العيون الدكم وخرها من حضنه
سليل : لتباوع عمو شكلي يخوف
سجاد : احلى شكل واحلى بنيه يله كومي يابطله اني جعت متاكلين ويايه لو عجبتج الكعده بلكاع والحضن والدهن الي مسحتي من وجهج بقميصي
سليل : وخرت من حضنه بحركه لا ارادياً انتبهت شسويت ومتت خجل ودنجت

سجاد : كومي وانطيني ايدج
سليل : مديت ايدي اله اي مديتها بدون خوف وتردد هذا الانسان اعتبره ملاكي الحارس رغم قسوته بهواي مواقف وشخصيته الي متنحزر بس ماكو اطيب منه وماكو واحد بكده يخاف علينا عيونه الي تلمع اول مره اشوفهن هيج بس حسيتهم حسيت بقهرته عليه رغم محاولته يخفي القهره الي يحسها بس لأول مره عيونه تخالفه وتظهر الي شى مشايفته بيه الحاجب ممعكود ومخنزر مثل كل مره والعين القاسيه الجافه الي تعودت عليها حل مكانها عين تحجي وتسولف محنه كومني واشوف عمه نهر واكفه بلباب وتمسح بدموعها رحت تمشيت وشمرت نفسي بحضنها اااااخ يادنيا مكافي شتردين مني بقت تسولف وتقنع بيه حاولت اماشي

كعدنا ناكل كوه ابلع اللكمه ومستحيه من شكلي بس خفت اكوم ويعيط عمو ورشا اكلت بس ريم بس نايمه حبيبتي شكد كمزت وعيطت وصكت اسنانها من الخوف ما انساها
شويه وعمو سجاد صاح عمه للغرفه
نهر : هاا عيني محتاج شى
سجاد : هااج هاي فلوس ولو تعبانه بس لازم اليوم ترحين للسوك اشتري ملابس للبنات كولشي يحتاجنه حتى لو اليوم قسم وباجر قسم
نهر : منيلك هاي الفلوس انتي مو كلت ذاك اليوم شبه خلصن فلوس الورث
سجاد : تعرفين فلوس الورث الاخذتهم نصهم صارو لشغله ومحاكمه طه بين محامي ورشاوي وهدايا والنص الثاني استرين بيه هاي الشقه
نهر : اي اعرف ليش لعد سألتك منيلك هاي الفلوس
سجاد : هاي فلوس هبه الله
نهر : اختك منين اجت فلوسها

سجاد : همه صح عمامي طلعوها من القسام حتى تنباع الاملاك بدون تإخير وانتي تعرفين بابا طلكها لزوجته لهذا الورث تقسم علية وعلى هبه الله رغم طلعوها بس انطوني حصتها كامله وحلفت ماامد ايدي عليها لو اموت جوع واضمهن الها بس كدامج الكارثه الصارت خلتني حتى حلفاني اكسره

نهر : انت ليش هيج تساعدنا رغم لتزعل مني اذا نجي للواقع اي صله قرابه بينك وبين طه ماكو
سجاد : اني سنين اعرف طه ابن عمتي وجان طيب ويايه كولش ومن اني وصغير يعاملني كرجال وعمره متجاوز عليه عكس علي وسلام الناقص لهذا من يوم معرفت هو مو ابن عمتي مهمني وكبرت وبقيت احبه ومن سمعت الي صار بيه منج كولش انقهرت لان اعرفه لطه خوش رجال وطيب ومعدنه اصيل بس بناته يوم ماانحكم نزل على ايدي يريد يبوسها وكال ابوس ايدك عينك على بناتي مالهن احد بلدنيا واعتبره خواتك وبناتك وبقى يحلفني انكسر خاطري علية حسيت مكسور لا حول ولا قوه وامهن ادبسسز
نهر : بس لو افتهم شبيك ويه امهن

سجاد :مبقى شى وتشوفين سندس على حقيقتها لهذا خفت عليهن حسيتهن امانه واني مااخون الامانه نهر واني اصلاً لا اهل ولا زوجه ولا عندي احد عايش بطولي وحدي خلي عيني عليهن هم اجر وهم لخاطر طه وهم اصلاً اني حبيتهن الله يعلم من شفت البيت محترك شصار بيه
نهر : الله يحفظك لشبابك ودوم تبقى خيمه فوك روسهن اخويه شكد انظلم وشكد تأذه بس مأذه بشر والله دزله انت حتى تصير خيمه لبناته ربك مايكطع حشه لله

سجاد : المهم هسه عينج عليهن راح سندس مراح تكعد راحه وفوكاها خسرت البيت واخذي هاي الفلوس اشتري غراضهن وهم لازم اشوف غزل اخاف تحتاج عمليه بلكت الله فلوسها مو هوايه
نهر : الله يرزقك بحق محمد وال محمد
سجاد : بعد اخذيني جدي بيه باب الكاظم
نهر : هاي شبيك حسره واحد يدعيلك
سجاد : نهر
نهر : هااا عيني
سجاد : تره انعام الحركت البيت
نهر : عزه يمه لا دخيلك لتكول هيج
سجاد : امج حركته ولتناقشين وتعرف بموعد الحرك وفرغت البيت خافت لياخذ بيتها هم يعني اتصوري تضحي بيت كامل حتى تحرك جهال شايفه هيج اجرام ونذاله
نهر : كمت اضرب على خدودي على كيفي وارجف لا عفيه مستحيل توصل لهيج
سجاد : امج بلا ذمه وضمير وسوت اشكال بقت على هاي شكد جنت خايف من تكول اله احرك گلب طه اله احركه وصدك حركته حركت بيته الصارله سنين عايش بيه وبيه ريحه امه وذكريات حياته ورادت تحرك جهاله ولج امج ابو لهب تكعد هي ويايه بمكان واحد بجهنم على اجرامها

نهر : وشنسوي هسه
سجاد : قدمنا بلاغ بس اكيد ايدنا والحايط لان العار اخوج علي صار حزبي والله مهزله علي كويت قيادي بحزب البعث حتى خوش يبوك بعد اكثر ويأذي اكثر وبسلطته الجديده راح يكدر يطلع منها بسهوله
نهر : عفيه متأكد امي
سجاد : امج وابصملج بلعشره خلي اروح للمستشفى تأخرت عينج على البنات
نهر : ماشي افترت الدنيا بيه يعني هيج امي ماعدها مخافه الله وتحرك جهال سمعت صوت سليل مسحت دموعي وركضت عليهن

سليل : اجتي ماما وره ساعتين وتفتر بلشقه وتعيب
سندس : كومن نروح لبيت بيبيتجن
نهر : يابيبي
سندس : بيت امي منريد منيه من احد
نهر : عوفي البنات هنا امج وين بيها حيل وين عدها مكان
سندس : على اساس هذا قصر شعشوع متسكتين بله يله كومن
سليل : خلي ننتظر عمو سجاد اقلها
سندس : لتخليني اسبج واسب سجاد عم بنيه خال وليد رجال غريب عنا شنو كاعدين يمه
نهر : هو كال اعوف الشقه وابات بغير مكان
سندس : خلي شقته اله يله امشن
سليل : مفهمت معنى كلام ماما شنو يعني هو غريب ليش غريب مو بمقام عمنا من كثر ما تعبانه محبيت اركز كافي الي بيه

رحنا لبيت بيبي وريم مصحت نكعدها ترجع تنام حسيت اختي بيها شى وماما حايره تروح وتجي لبيت انوار وحسام اجه باسنا وكال  الْحٍمَدٍ للـّہ على سلامتكم ودخل لغرفه بيبي تكول عبالك واحد غريب عنا
كعدت يم راس ريم مصخنه ياربي هاي ليش مكعد تنزل حرارته صحت على ماما كالت مابيها شى هسه تفك
ورشا ساكته بس تباوع وهم تعبانه كلنا حال الضيم حالنا بس ماما مخبوصه وتحجي ويه امها الي كوه تتحرك ومريضة وبيتها تعبان بس احسن من ماكو وين نروح كل مااصفن واتذكر الصار اختنك
للمغرب اندكت الباب وطبت عمه نهر محمله اشكال الغراض وكالت سجاد الفلوس منه بس هي اشترتهن النا لان تعرف قياساتنا
وامي حتى شكراً مكالت
اخذت بجامه ردت اسبح لابسه دشداشه عمه جبيره بس كالت الدكتور ممنوع السبح
كعدت مقهوره شلون ابقى هيج

راحت جابت طشت وشامبو سنان الي كولش احب ريحته جان مشتريته النا وكعدت تغسل براسي ماما عافتنا وكالت رايحه علمود اجيب كم حاجه من انوار عفناها هي اصلاً بالها مو يمنا وبوصله مسحت جسمي بعيد عن مكانات الحرك وسبحت رشا ولبستها ملابس جديده حتى النعالات اشترت النا كولشي مبقت شى خطيه خلف الله على عمو سجاد واله شون حالنا و ريم مقبلت تكوم وتصيح عوفوني نعسانه

راحت خطيه لبيتها هلكت ويانا سوت الي المفروض امنا تسوي تمددت ونمت حتى مكدرت اتعشى ساعه وكعدت ارجف ااااااه ياليل انكتب عليه ماانامك قبل سلام وهسه الحريق
باوعت على ريم النايمه بصفي عركانه ركضت على ماما لكيتها كاعده ويه امها ومبين تحجي شى زاعج بيبي وضايجه حيل منها كتلها مصخنه ريم
سندس : هاج طاسه وخاولي وسويلها كمادات
رغم شكد تعبانه وشكد جسمي يحركني وبعدني اكح من الدخان باقي بصدري بس خفت على ريم وبقيت اسوي كمادات سمعت ماما تعيط على امها وتكولها قدمتها بعد مااضل العمر كله مربوطه بيه وكلها كم يوم واستلم الامر القضائي زين عن شنو تحجي

بقت عيني على ريم احاول اكعدها نمت من التعب وجهه الصبح ماما راحت للمستشفى كالت ابات يم غزل وصتني على ريم كعدت من النوم تحرك بيه وتكولي
ثلل حبابه اكعدي ثلل
فزيت مبتسمه واخيراً صحت كعدت ياعيون ثلل ولج اول مره احب اسم ثلل واشتاقيت اله
ريم : هاي شنو بيدي
سليل : اباوع بيدها هاي شنو طكع صغار حمره بيضه اباوع جهه اذنها هم بيها
صفنت والله ماادري سمعت صوت بيبي تخبز بره شو تعالي كمت سحبتها من ايدها وهي خطيه مخترعه
صباح الخير بيبي
ام سندس : هله يمه صباح العافيه
سليل : بيبي متعرفين هذا شنو الطلع بريم
مسحت ايدها بلدشداشه مالتها وبقت اتكلب بيها وبأذنها وتجيبها يمنه ويسره وضربت صدرها ولج هاي بكعت (البهاق)
ريم: شنو يعني بكعت

يتبع ...