رواية أفلا تغفري الفصل الحادي عشر 11 - بقلم مريم السعدي

بارت ١١

#افلا_تغفري

#مريم_السعدي

.
.
.
.
.
.
.
بارت سهراية ⭐
.
.
.

ايسر....

الولد بالطرمه ركصهم هوستهم والاغاني الشباب اللي يشتغلون بالماركت جيراننا كرايبي صحباني وجماعه ابويه كلها تدبج ومتونسه

بس اني لااكدر الامثل لااكدر الاعوف كلشي وانهزم بروحي  من كلشي وليمه فاخره سواها ابويه صواني تطب وصواني تطلع البيت اندمر والوالد دز عائلته مااعرف وين بحجة ذاك البيت بعده مكامل البناء بي وهو فعلا هيج  جان ببالي من ارجع من السفر الكاه كامل  نفتر بالبيت براحتنا اني وسنا وكرايب امي وابويه بالصاله الجبيره  النسوان الداخليه والولد بره طبيت للمطبخ اتخايل مكان وجودها صحت

سناا سناا
طلعتلي بلبس مغربي  ومكياج وتسريحه لو اني بمكانها ماخلي احد يشوف وجهي علي سويته نترت بيها

- تلفوني عد امي لان جيب بنطروني صغير ميصير بي طينيا كالت
- اي هسه وطبت راحت جابته وجتي ورجعت طبت للصاله نترت بيها
- لتضلين تفترين بالممر يشرف خاتوون
- اي اي والله ايسوري مااافتر بالممر

جريت نفس مخنوك ربي مخنووك هوى اريد اجر هوى طبيت للكليدور الداخلي بي حمام صاير بصف الغرفه مال بنات بي باب مشتركه بين الصاله والغرفه وبنص الكليدور حمام خاص بالصاله طلعت واعدل بشعري كدام المرايه دااباوع شفت باب غرفه البنات انفتحت بهدوء

جمدت بمكاني واباوع الانعكاس بالمرايه منو مدت راسها  وحده منهم الاعرفه همه مو بالبيت طلعت سلوى شجابهاا  هاي شافتني بالانعكاس كدامها مبدله بنطرون وبدي وبيدها جنطه سفر صغيره مشت على كيفها تتلفت طبت للكليدور وسدت الباب وراها

ايسر : شعدج هنا مو تدرين حفله مال ولد لو تكيفين

سلوى : مبروك ايسر الف مبروك بس كون فرحان وكون تتهنى وحوبتها متبين بيك لخاطر رضوى وعمو على الاقل

نصيت راسي اعدل بالرباط و القاط امثل اللا موبالاة كالت

- بشرفك مكسرت خاطرك لك هاي يتيمه

عيني عالساعه اعدلها كالت
- مرايده منك غير بس شغله وحده واتقي الله بيها بس ابوها ليدري تره يحرمنا منها وهناك هي تتعذب بعيشتها لتحرمنا منها وتحرمها من عدنا نور اختنا

-لعد اني من جيتج واتوسل بيج كتلج بيناتنا شو حقرتي

-والله توقعت دلشاد مات وفقدت مكدرت اسيطر على روحي
سكتت وعيني تفتر اتجاهل وجودها
- عليك الله لتكول لابوها
هزيت راسي واني منصي كالت

- تره مريضه والله
رفعت راسي اريدها تكمل حجي اريدها تحجي بيها بقيت اباوع بعينها كالت
- اي والله شبيك ماريد منك شي بس عوفها ولتاذيها بعد مالها ذنب والله مشكلتك ويه ماما وويايه اني نور معليها شنو ذنبها

بلعت ريك كالت
- اني جيت بس دااخذ جنطتي وطبيت من الباب الثانيه محد شافني بس هالطلب بيناتنا وخلص

هزيت راسي  اي واني ساكت طلعت من الباب الثانيه مال كليدور  وسدت الباب كعدت بالكع حيلي انهد من اباوع جوه الباب كعب ابيض هذا حذاء سنا دتصنت ويطبها طوب رجيت راسي عالمرايه وجسمي يرجف

شنو ذنبها هي بس ماعدي غير شي يلوي خالتها
كمت طلعت للولد كملت الحفله والبنكلادش ينظفون  بالبيت  الوالد كال على راحتكم باجر العصر يله يجون بنفس اليوم بليل انلغى حجز القاعه لان صار بصفها انفجارات وتضررت فصار عرس بس زفه  وباجر الزفه المقرر الضهر   رجعة لاهلي بيومها مكدرت انام بس اتكلب   شحتكول عليه

كرهتني؟؟

معقوله من عرفت  باجر عرسي تكول جان رايدني ينتقم من خالتي بيه؟

يعني معقوله حتكول مشاعري كاذبه ؟

حتنساني وتصير سوالف بس يرادلها صبر

دكيت على صدري بس لو كلبي يثثثبت 
طلع الصبح واجاني قيصر بسياره الوالد مزينها
لبرادو موديل السنه  سوده

لل١٢ ونص بدلت وتهيات البدله جيب مابيها امي دتتحضر نطلع من بيتنا ونروح بيت ابويه  الثاني مناك الزفه تطلع 
- يووم يمه
- ها يوم شبيك
- هاي تلفوني خلي بجنطتج
- اي جيبه
- ديله مكملتو

باوعت لسنا مخليه كومه مكياج
- انتي هييي مكياجج قللي
- اي اي والله هسه

وطبت للغرفه شوي وطلعت نزل قيصر يبتسم كال
- عادي علي يجي  ويانا للزفه
- اي هله  بي بس بيا سياره
- بسياره صادق الكهربائي
- دمشي يله

طلعنا ورحنا بيت ابويه علساس دنروح بيت البنيه والانفجارات بيومها دكككك
بغداد نصها احتركت بيت البنيه بعيد ويمه صار انفجار  والطرق قفلت تالي من الصالون جابوها لبيت ابويه زفه مخربطه حتى الزفافه تاخرو وعلما انتظرنا ابوها يجي حتى يسلمها لان ماكو طبه وطلعه لازم يكضي نص السيطرات مشي يضل يصعد وينزل بالسيارات والتكاسي حد مايوصل

زين اني الزفافه شلون والبنيه وبدلتها انحبسنا بمنطقتنا  واخيرا وصل قيصر من الصالون وجابوها بالبدله  ابتسم والدي من وصلو الزفافه وياها
حضنني ودمعت عينه كال

- الله ينطيك سند يسندك مثل ماانت ساندني الله يوفقك بحياتك بابا حبيبي انت اول فرحه الي

ساكت اباوع بوجهه باوع عالساعه وباوعلي كال
- يله يابه يله اصعد
- خل يجي خال امي
باوعت لامي تباوع لابويه وتجر عينها وابويه  ولا يمه وسنا ابد منزلت من السياره والبارحه طبتهم وطلعتهم من الباب الثانيه مشافو ابويه ولاشافها
وابويه لمحها وجر نفس دار وجهه

بقيت انتظر صارت الاربعه واهلها مجوي شون شغله اعصابي تعبت بس اريد اخلللص من هالواجب اريد اخلللص قبل لا اكلب وانهزم حتى من روحي دااتلفت والفرع هوسه والمح سياره ابو نور تفوت للفرع طبت بهدوء كلبي وجعني راسسساً وضاق النفس

عيوني تسمرت عالسياره مدااكدر ابعدها مرت ابويه ليكدام كاعده وابو نور نزل يبتسم تسالم وي ابويه وبارك وباركلي الي هم عيون مرت ابويه عليه واشوفها فتحت الباب الثانيه مال سياره ونزلت نور بثكل منصيه راسها والشال مخربط ورضوى افترت على نور سندتها بجتفها صارلها سند عاليمنه واليسره.

واني عيوني انفكت كلها صار شكد مشايفها  وانهزم تالي بهيج يوم اشوفها

الرجفه البيه مداسيطر عليها مشو للباب وهي منصيه راسها كلش و وجهه حزين البعد بيننا امتار لزمت ايدها رضوى وباوعتلي بحقد ودارت وجهه واني صافن عليها حتوكع كوه تمشي ومحودبه صايره مو نور مطفيه

التفتت والتقت عيوننه هذا كلبي لو اوصف العصره اللي انعصرها اختنكت احس ضلوعي كبست على كلبي رفعت ايدها تعدل الشال كانما تحتمي بيه مني ايدها ترتعش رعش  المحبس بيدها منازعته وعيونها تعتب بالم حمر حيل وغركانه بدمع رافض يستسلم وينزل على خدها خزرتني وشفافها ترجف

عيونها الجنت اخاف عليها لاتبجي على امها اني اليوم بجيتها سنا من شباك السياره صاحت

- ايسر حبيبي اصعد عروستك تسأل عليك
التفتت خزرتها سدت الشباك تضحك بضحكه حقيره

خالتها همست
- امشي نور لتباعين والتفتت عليه بحقد تباوعلي طبو للطرمه يمشون واني عيوني مدااكدر اشيلها عنهم نص الطرمه والتفتت باوعتلي كانما تودعني ورجعت كملت مشي
نظرتها تدعي عليه
نظرتها تحلف راح اندم

ماعرف شون جانت ملامح وجهي بس كل الاتذكره رجفه وبرد صارت بضلوعي وخنكه كاره روحي

حاير اني شسويت لا هو هذا اللازم يصير صاح قيصر
- يللللله ايسر خال امي اجه

التفتت اجوي اهلها سلمت وضل خطيه يوصيني عليها واني روحي مفرفحه بالي مو هنا ولا العرس عرسي باوعت على شباك المطبخ لكيتها تباوع من وره البرده وايدها على حلكها ورضوى وراها صعدت وسديت الباب وطلعنا هوسه الزفافه وجماعتي وقيصر اللي رمه بالباب

وباوعت لباب البيت
هنا بدت قصه عشك وهنا انتهت
هنا مشاعر واحاسيس كومه انولدت هنا ضحكه وهمسه وغمزه ودكه كلب
وهنا موعدنا جان يوميه بالسبعه ونص الصبح
لفه بسيطه ونستله اخذ بيها ضحكه ترد العافيه لكلبي هنا نتواعد للصبح مننام نسولف على اي شي تافه او مهم هنا لمسه ايده صارت ونظرات عيون ردت اندعم كم مره من وراها وماجوز
هنا الطاعتني وغيرت لبسها علمودي
وهنا ضحكه يتيمه من الكلب صارت تضحك بعدما طفه عيونها البجي

وهنا انتهت ...

طلعنا واني شارد حدما وصلنا الفندق قيصر يباوعلي وينصي عاض شفته طبينا للفندق علي جان وياه صعدو فوك وعلي بقه بعيد عنه بعد كم متر خجل

سنا وامي وقيصر وابويه والعروس وامها طبو الغرفه اني بس ردت اشرب مي قيصر يفتح ويسد بالثلاجه خمط نستله واكلها واسمع العروس وامها وامي يحاجوها بهدوء ابويه اللي خبص ابو الفندق يدارينا ويدير باله علينا

التفتت قيصر صافن عليه ابتسم بتعب مدري هيج وجهي مبين عليه تقرب حضنني همس

- هاي هي لاهمه ثوبنا ولااحنا ثوبهم متفيد مترهم علاقه كل محتواها حقد انسى وعيش  حياتك الجديده دلل الفقيره خطيه وشوف اذا منطتك روحها

هزيت راسي ابويه حضنني والتفت على قيصر
- يوم الالك يابه

- عن قريب ان شاء الله عن قريب مو علاووي

جاوبه علي
- اي ان شاء الله ثنينا ناخذ خوات حتى بفد بيت هههه

ضحكو واني صافن قيصر انتبه وابويه هم لزمني من اكتافي  كال
- بابا باجر ب٨ طيارتكم لتاخذك النومه .. يله قيصر
- روح يابه هسه يجوز ابات بصفه بالغرفه هههه
- امشي اووف من الغيره

ايسر.....
ضحكت بكذب وطلعو وسدو الباب تلفوني دك راساً دورت عليه وينه بدلتي مابيها جيب خليته عد امي ادور عليه طلعته من جنطه الفندق لزمت الفون رضوى رديت بسرعه

- الو رضوى
- ايسر من الله لاوفقككك
- شبيج تصيحين شكوو وقزرقط

- ليش كلت لابو نورليييش
- منو كال اني مكلت والله محجيت شي

سدته بوجهي وتدعي طلعت وايدي ترتعش دخلت عالفايبر وانصدم بانه مدزوزه صوره من الصور الجانت عدي صورتي وياها بس ممبين شكلي لاف ايدي على كتفها تضحك ومبينه بس لحيتي

رقمي اللمسوي بي فايبر غير رقم الشركه ماكو غيرها سنا صخام خابرتها  واعصابي تلفانه واعيط واصيح

- ليش جلبه والله هسه اجي اموتج بيدي اليوم
- والله مواني انت البارحه من رجعت سكران وكمت تصيح بالغرفه الا افضحهم

صفنت وراسي افتر فعلا البارحه بعد الحنه شربت اريد اتذكر اريد اجمع مااكدر كل الاتذكره اتكلب ومكدرت انام ولامره بحياتي اثر بيه الشرب ولا اني  من النوع الشراب بس عالكيف مرات

مكدرت اتذكر كمت اركع براسي بالحايط التفتت لكيت زينب  صافنه عليه لافه الخاولي براسها كالت

- صاير شي
- لا ماكو شي معليج

افتر بالغرفه والوب شنو ممكن سوالها مكدرت خابرت قيصر مغلق وينه هذا وينه خابرت رضوى رفضتني ورجعت خابرت ردت تبجي  صوتها رايح من البجي

- بس كوليلي شسوالها شوكت وصلت الصور
- قبل ساعه مجان عده نت ومن كنك واصلتله انت من البارحه دازها موو

بقيت ساكت نفسي ضاق حيل كمت اكح

- بس كوليلي شسوه خوما اذاها
- دماها وسحلها من شعرها حتى بابا تعارك وياه يكول لامي هي هاي الامانه ليش هيج ايسر ليش شعليها هي شنو ذنبها عساها بحظك وبختك

لزمت راسي طلعت من الغرفه نزلت مادري وين اروح والتلفون على اذني
- تالي اخذها
- اي اخذها ومكدرنا نوكف بوجهه وماما تخربطت وهي تصيح خاله لتعوفيني مثل امي

- خررب غيررررته صحت بعلو صوتي من انتبه اني بالريسبشن والعالم صفنت عليه عفتهم ورجعت صعدت فوك بالممر
رضوى خابريها بس افتهمي منها

- ولكككك انحرمنا منها ياحقييييير بعد السويته
- والقران مادري مادري شون مادري اني دااتصرف عبالك مو اني رضوى بس لتعوفوها

- ميخلينا بعد نشوفها ومرت ابوها الله يعلم شون حتعاملها  حتطلع روحها من الله لاينطيك

سدته بوجهي
كعدت بالكع كلبي مثل الخفقان يصعد وينزل دكاته وجع قوي صار عدي يشهد الله حتى بجيت واني اتخيل بي يضربها ومدمايه ويسحلها من شعرها الاحبه واتخيل النعومه الجانت بيدي امسد بي وتنام على جتفي مثل الطير طبيت للغرفه دايخ وين اروح

صفنت زينب متمدده ولازمه بالتلفون نزعت هدومي مخنوك تقربت لناحيتها دااخذ المنشفه كالت
- ووالله معذوره اليوم

- منووو يمج انتي
صحت بعصبيه

عفتها وطبيت للحمام ربي دخيلك مدااكدر صبرها وصبرني بقيت اراجع روحي اتذكر كلشي صار ويايه كل لحضه اني البارحه مطافي متذكر كل لحظه وسنا هي الدزتها بس اني ماسح الصور ممبقي ضامها بفلاشه بقاصتي تاكدت انها عدها بتلفون امي او عدها فون سري بس خل ارجع طلعت من الحمام خابرتها

ردت
- ها ايسوري
- سنا خل ارجع وشوفي شسوي بيج والله لاازوعج الحليب الرضعتي بس اصبري

سديته بوجهه وكمت اضرب راسي بالحايط اندكت  الباب جايبين العشا كتلها
كومي اكلي
كالت
مااشتهي عفته مغطا وتمددت اريد انام مدااكدر ملامحها التعبانه ببالي شصار بيها من ضربها كرهتني متوقعه اني الدزيتها غمضت قوي

وين حتروح حوبتها كلها راح تطلع بيه كلها دك تلفوني ابويه
عضيت شفتي بس لادره اني الوياها بالصوره رديت بقلق

- ها يابه
- ها ايسر بابا قيصر حجز وياك
- هاه لا محجز رجع وراك
- بابا لحد الان مجاي وتلفونه مغلق

وكفت على حيلي
- يابه السياره رجعها
- لا يابه غير وياه
باوعت عالساعه ب٢ونص بليل رجلي رخت
- يابه خابرت صادق
- بابا صادق رجعني هو وقيصر رجع امك واختك والولد وياه
- خابرت امي
- اي خابرت كال  وصلنا واجه يجيب السياره الي هذا الحجي من العشره بليل لحد  الان ماكو يابه كلبي مدااكدر على بختك اخوك وووووين

سديته منه لبست كعدت زينب اشرتلها كومي وهدومنا لميناها ورجعت طاير لبيت اهلي ذبيتها ورحت لابويه اخابر مضل واحد اجه بالزفه مخابرته ومحد اله خبر عنه كاميرات البيت تاكد بانه طلع من بيت اهلي وموصل لبيت ابويه

تلفت اعصابنا ابويه وكع وامي هم للفجر احنا بالمستشفى ناس و ناس تدور بالمراكز والمستشفيات وناس تسأل

ابويه نام مستشفى كلبه وكف ورجع اشتغل
وامي  الضغط علك
واني حالي يبجي امشي بالشوارع واصيح
قييصر وينك لك لتعوفني وحددي

هذا حال صوره من صور الجننا نعيشها بالعراق بصوره يوميه
خطف
قتل
انفجارات

واللي يطلع من ذني ال٣ يكون محظوظ
او يمكن العكس اللي ماطلع وراح يم وجه ربه الكريم محظوظ

للظهر ثاني يوم اتصلو رادو فديه كعدت بالكع وادك على راسي لاالحك ابيع شي لاالحك المهن

لكيت روحي  وحدي ببيت ابويه الثاني ومرت ابويه بصفي خلت ايدها على كتفي تصبر بيه

- يمه خلي عينك بعين الله
- خاله باجر اخر موعد يقتلو اذا ماملحكت  المهن اذا مقاتلي  هسه كلتها وبجيت حضنتني كالت

- لتخاف هسه اخابر عمام سلوى شفت سلوى تتفق وي عمامها باوعتلي بنظره مصبرتني كالت

- لتخاف هسه اخابر عمامي
وللعصر عمام سلوى فوك راسي خمستهم والفديه بيدي كلها

منو الوكف الي

سلوى وعمامها
اللي كعدو بالجادر بكعده الزلم ضدي
هسه طابكين ويايه ويصبرون ويقوون بيه
واحد منهم كال

- بابا ايسر كلنا وياك لتخاف الفلوس شنو من دنعل قيمتها ابوك منه وبيننا وبيناتنا عشره عمر لتهتم ابني وصير رجال ابوك يريدك سند اوكف وواجه هي الدنيا بس اعاصير ومحن وخلصانه كوم بحيلك  يله ابني واحنا بظهرك

وجهي صار هلكدوته منهم
ابويه وامي نايمين مستشفى
الاتفاق على موعد التسليم
واني رحت سلمت  رغم وكفتهم بس خافو على ولدهم مع العلم واحد من الولد بالسوبر ماركت كال اجي وياك ورحت عالموعد

بسيارة ابويه نفسها بيها ملثمين اخذو الفلوس وطلعو  لحكتهم وشمرو جيس داالحكها ضربوني برجلي  اربع طلقات وكعت بس ببالي بالجيس اخويه اصيح بكد ماضل بيه حيل قيصر

ماكو رد فقدت وره فتره احس بروحي مقاطع انشال وانحط صوت يروح ويجي اضاءه تصير بعيني وتغيب

واني افوق وارجع يصير عدي اغماء

حدما محسيت بشي وره فتره حسيت بايدي تاذيني ووجع برجلي رهيب اريد احجي مااكدر واسمع حجي الاطباء عرفت اني بداخل عمليه ورجعت غفيت كعدت سلوى ورضوى يمي وسنا من هالصفحه بقيت صافن شوي وركزت تذكرت

- قيصر قيصر وين
لزمت ايدي رضوى كالت
- لتخاف لتخاف مميت بس بالانعاش وحالته مستقره
غمضت
- ابويه وين امي 

- بابا هم بالانعاش
وجوههم تعبانه وصفره سنا كالت
- ماما نايمه هنا ضغطها شوي مرتفع

غمضت مره لخ اريد اركز مدااكدر باوعت لرضوى عيونها ذبلانه حيل

- رضوى ابويه وقيصر الله عليج
- والله زينين لتخاف الحمد لله عدت
كالتها وبجت تشهك جريت نفس
صافن للي صار بينا شنو السالفه وهاي امي تكول

- عين يمه عين مرتك كمر وذاك العرس صار وذاك الاكل العالم ضربتنا عين يحسدوني على ولدي  وتباوع على ام رضوى اللي تفتر والسبحه بيدها

مر اسبوع واني بالمستشفى واعي بس رجلي  تموتني الم 
ابويه تحسن شويه و اجاني تعبان منتهي وايده على كلبه مسد على راسي بتعب مبتسم همس باذني

- هذا ابني البطل
دمعت عيني وجتي رضوى اللي تعودت يوميه  تجيبلي صوره قيصر وسنا تداريني وي امي مرت ابويه بعد طلعة ابويه من المستشفى مجتي بعد بقت بالبيت تداري

رضوى : شوفه باوع ابتسم
ايسر : حجه لو بعده
رضوى : لا صوندات بحلكه بس ضغط على ايدي حرك عينه كعدت يمه تفرج ويايه لقطات مضحكه وعلي صديقه يمه اربع وعشرين ساعه واخته حور تروح وتجي بس شون لفات تسوي مصدكت طتني وحده  ههه اجيبلك

- لا يابه
ابتسمت مكيف بحاله قيصر الصار عده من اثر الضرب نزيف داخلي قيصر سبع وقاومهم  وضاربي هذا اللي تخيلنا لان الضرب المضرب بي بجسمه صاير نزيف داخلي وكوه وكفو

رضوى : تريد اعدلك المخده
- لا مرتاح هيج
باوعت لسنا من طب الطبيب ابتسمت ووكفت
اعصابي فارت شون وياها حتخزينا الدكتور ديحقن الابره بالوريد وتقربت رضوى تباوع على ايده رفع راسه ابتسم باوعلها ونصه

استغربت الظاهر هواي فاتتني امور ايد رضوى بصفي كرصتها خزرتها ابتعدت الدكتور كال
- هاا تعلمتي شون تضربين لو لا

رضوى : باوعت لايسر وباوعت للطببيب ااي اعرف تعلمت
- يله داشوف مو مثل ذاك اليوم تطلعي بالبوش دكتوره
- لالا اعرف
وضربته لايسر بهدوء

ايسر...
ابتسمت محسيت بيها ابد راح الطبيب بعدما نظر نظره اخيره لرضوى مبتسم ورضوى تباوع لمكان الابره

- هاي من شوكت تضربين
- والله اني كمت اضربك يوميه بليل لان همه نايمين فمن كمت ابات يمك وسنا يم باجي امها اني اضربك علمتني السستر مو اني صيدلانيه شبيك

ايسر....
جريت نفس تعبان حيل غمضت عيني ونمت من  حسيت عليها تطكلي صوره وتبتسم وتراسل مبتسمه باوعت مضيق عيني عرفت المن دازتها كلبي وجعني حيل

همست
- شونها
فزت رضوى بعدت عينها عني تخفي ملامحها الحقيقه كالت

- منو عليمن تقصد
- اللي دتدزيلها صورتي

نصت راسها
- مدادزها لاحد
- لتكذبين 

هزت راسها ودارت وجهه كالت
- زينه احسن
- ابوها خوما اذاها
- بس مخلاها تداوم هالسنه عقاب ووبعد ميخليها تجي عدنا 
برطمت دمعت عينها وباوعتلي كالت

- متوقعتها منك
تهمس تخاف يسمعون امي وسنا
- مو اني
جريت نفس وغمضت عيني
مو اني والله

طب الدكتور وجتي  سنا وي امي وكفت رضوى كال
وينها دكتورتنا  عدنا ابره بالمغذي يله شوفينا شطارتح

رضوى : اوك
اخذت الابره رفعت  ايدي ضربتها باوعت لايسر
- هسه تنسطر هاي تنوم ههههه

ابتسمت ودرت وجهي لكيت سنا مدلغمه تباوعلها رافعه تك حاجب خفت على رضوى طلع الدكتور نترت بسنا

- تعاي
كعدت عدل رجلي ماكدر احركها تقربت اشرت لرضوى
- روحي رضوى يم قيصر خاف يحتاج شي
تقربت سنا
- ها عيني
- جيبي تلفون امي

ضلت صافنه عليه بخوف جريته من ايدها امي كالت
- يمه شبيك ها دفعوك
- اي مو اني عربانه شبيج يمه

اخذت التلفون كلبت بي  لكيت رقم ابو نور مسجل باسم نيران اعرفه من نهايته وعرفت هي وره المشكله ولزمت ايدها عصرتها بكل قوتي احسها اصابعها تكسرت جوه ايدي كالت
- ليش هيج تاذيني ممسويه  شي وبجت
نترت
- الصوره شوداها لج انتي شنو سرطااان انتي فهمييني ليش هيج سويتي
كالت
- مو اني ---- ضربتها راشدي ابتعدت تبجي وخشمها طك دم واخذت التلفون شمرته على شباك البصفي ارتطم بالكع وتفلش امي صاحت
- ليش اميي ليش
- هاي تلفون ميبقى بعد عدها لتشوفيني مكرم وحق الله وحق هو ربج احركه البيت حرررك هاي بتج متكعد

- ليش ياماما والله عاقله وكافيه خيرها شرها فوك قهرها مو كالتلك ماعيدها

- يووم بالبيوت ومن جوه ليجوه شغلهم شلت موبايلي من طبببلناا هذذا من طببب تسكطت المستورات طلعت الفضايح محد وكع العكل من على روس الزلم غير هذذذا اسكتي ولتتدخلين

سكتت امي
- اكولج ذيج وين صارلي اسبوعين شو مجتي

- منو زنوب ولك يمه حمه مالطه عدها صار اسبوعين مستشفيات حايرين بيها البارحه خالي  خابرني كال ماعدي خطيه يقهر ودزيتله بيد الولد محمد فلوس

- استغفر الله منين جتها
- والله مادري هبطه وهي عروس صارت عدها والله لاكدرت اروح ولا اشوفها حايره بيكم خل اروح لقيصر اكولك تعال شو هاي حور فد نوب ماينه عليه تكول عبالك اخته

- هو من قوت علاقته بعلي  تقربت منه شرايدده منه خلي بلكن واحد من عدنا مرررتاح

سكتت ونصت راسها راحت اباوع لسنا كاعده ومنصيه راسها ودموعها تجري ولا اهتميت الها الشفته منها هواي هواي كلش

من وراها طبيت بقصه حب لاجل الانتقام وتالي طلعت وكلبي اني المكسور مو هي

ها
.
.

.
.
.
يتبع ⭐