رواية أفلا تغفري الفصل الثاني عشر 12 - بقلم مريم السعدي

بارت ١٢

#افلا_تغفري

#مريم_السعدي

.
.
.

قيصر....
مثل الملاك
تفتر بين العصاير والشوربه  واللفات 
علي يبات عدي وهي تجي وره دوامها وتروح بليل وي خالها
ونوبات صادق يوصلها بطلب مني عيونها وكلماتها المهدأة خلتني انسى قساوه اللي شفته بظرف اربع ايام

تعذبت عذاب مصاير
ضرب بالمسحاه على بطني وضهري
عجيبه شلون متكسرت ضلوعي
قاومتهم ضربت  بيهم سكطت ٢
وتكومو عليه ملخوني  لدرجه اغماء صار عدي من الضرب وهاي اني اليوم  صارلي اسبوعين هنا والنزف توه يوكف ويرجع
اتقيا دم مستمر وخروج دم مره يسيطرون وعشره لا كوه توقف 
نفسي ياذيني وراسي واذني وبطني وكل امعائي وعالعلاج عايش الحمد لله شالو الصوندات من حلكي الا دمرتني تدمر

وهنا عطرها وسوالف علي منسيتني المي 
همستها
وابتسامتها

شونك اليوم ؟
محتاج شي ؟
خو مدتاذيك بطنك؟

نوبات اكولها اي تأذيني تخلي ايدها بهدوء عالمكان وتضل ماعرف شتتقره تطول هواي واني  اباوعلها متباوع بعيني

نوبات اغفى وايدها على مكان الالم  ارتاح
وعلي ..  علي الدقيقه معافني حتى كتبه  جابها واجه ليل ونهار يقره
المستشفى كلهم عرفوا بي سادس يمتحن

ومره من المرات تألمت هواي وصاحت الدكتور واجه ضربني ابره بالمغذي
باوعتلها مستنجد
- اقريلي عليه بس خلي الالم يروح

جرت الكرسي  وتقربت تقره وتردد ومغمضه عينها حسيت روحي داغفي توها تبعد ايدها والزمها ارجعها لمكان الالم ورجعت تقره ومهديت ايدها عصرتها بهدوء تلمست ايدي بايدها اللخ ربتت عليها تهدي بيه واني كل جسمي هدأ باوعت رضوى طبت خلت ايدها على وجهه تبتسم بخجل شالت فونها وطكت صوره وانهزمت ابتسمت وحور متدري

- لتوخرين ايديج
- ماوخرها ارتاح واطمن
- ابقي لازمتها لايدي
- اي ابقى لتخاف
- خاف علي يجي

سكتت كالت
- لتفكر بشي ارتاح

وفعلا ارتاحيت وغفيت حسيت علي بصفي يتلمس بشعري  وحتى بخشمي لعب
- علللي حتفوت اصبعك بخشمي
- ولك هاي شكبرها زروف خشمك مخلص اوكسجين المستشفى
- دنجب لك اصلا خشمي لوزه
- عزه اذا خشمك لوزه اني خشمي مال عصفور

- اوهوو حيخبصنا
فتحت عيني لكيت رضوى واكفه بصفحة اللخ عكدت حاجبي

- شوكت جيتي انتي
- قبل شوي بابا جابني  وراح يم ايسر اليوم يطلعو وانت اسبوع اليجي

- ديمشي
- لالا اصلا حياخذو بالسديه لان حوضه ياذي
- سوده بوجهي
- اسم الله عليك عفيه لتكول هيج

بقيت اباوعلها باوعت لعلي شفته يباوعلها مبتسم دفرته برجلي فز باوعلي وخجل طلعت رضوى باشاره مني وعلي نصه راسه عالورقه مبتسم

- ارعن مو افكس عيونك
- اكولك شتصير منك هاي
- امي عدك اعتراض
- امك بطله هيج
رجعت دفرته
- ولك اخخ هاي مريض وهيج
- دخل اكوم بسلامه واصطبرلي

ايسر....
ايام كضت بالمستشفى تعبتني وتعبت ابويه واهلي ورجعت للبيت حوضي ياذيني حيل ماعدي كسر بس ثقوب والحمد لله عالحليب والعلاجات تحسنت قبل طلعه قيصر اني عالعكاز

وطلع قيصر واخيرا بس من يمشي جسمه كله يون عليه  ابويه ذبح كبش جوه رجلنا  بطبتنه وعمام سلوى جوي  عدنا بيومها وي ولد عمها  وراحو وابويه بقه عدنا توسل بينا نروح يمه  ولو واحد بينا وامي مقبلت

علاقته بامي تحسنت( البينهم احنا) على الرغم من انه  هاجرها وهي مرايدته بس  واحد متحمل اللاخ لخاطرنا بس بعده ميحجي وي سنا خصوصا بعد معرف انه هي الدازه الصور وعرف اني المسوي العلاقه وياها زعل عليه واني تركته فتره ورجع صالح نفسه بنفسه   بالمستشفى

مرتي اللي ملحكت حتى تصير مرتي بقت مريضه من مستشفى لمستشفى دمامل بجسمها كامت تطلع وره الحمى بعدها شكل عدها ابو صفار قوي وتمشي وتتخربط رحت زرتها ومنعوني  ادخل لغرفتها من بعيد سلمت عليها لان مناعتي ضعفت وخافو لا اتمرض  وره حادثه خطف قيصر

مر شهرين و٣ وحالتها متحسنت بذيج الفتره جانت  مجزره سبايكر.

قيصر مستمر بعلاقته بيت علي وانفتح موضوعه  وكالها لامي اريد حور  مرفضت امي ولا فرحت وراح لابويه هم كاله وابويه كله تدلل

وصارت الخطبه بس انخطبو طلعت  منحه للشهداء السياسيين اللي ابوها واحد منهم واخذو منحه جبيره وكدر علي وحور يشترون بيت بنفس فرعهم جبير ورممو وابويه ساعدهم وكعدو خالهم ببيتهم القديم وهمه استقرو ببيتهم الجديد احوالهم تحسنت بعد الراتب وعلي الحمد لله امتحن دور ثاني وطلع  ٨٩ وانقبل هندسه اتصالات جامعه بغداد قريب جامعه رضوى

مرت مدة وفجأة صحينا على خبر  مريع محد متوقعه
زينب متوفيه بليل صايره عدها جلطه دماغيه ومتوفيه

بنفس اليوم اللي طلعت بي مجزره سبايكر ونشروا المقطع مال فديو مال شباب من ديقتلوهم  ثاني يوم زينب توفت

جانت فاجعه اني اني من الناس ماحبها متت قهر لانها شابه ومشافت شي من حياتها من فكر  لفكر

امي ايام وليالي تبجي وبيت خالها تاذو حيل ماعرف شصار  بيه   بعدين رضوى راحت للعزه مالتها وبليل خابرتني

- الو هلو ايسر شونك
- هلو رضوى انتي شونج

- بالي يمك اجي يمك لو متقبل  باجي
- لاعادي تعاي بس مابيه شي تره
- ميخالف سويت  كيك وعليه نستله واشتهيته الك ولقيصر

- تعاي عالواه كاعد ضايج
رضوى عرفتها بوكعتي وجهه اليضحك وحنانها خلتني اتعلق بيها واحبها

واجتي يمي امي كلبت وجهه وسنا بقت تباوعلها من وره خشمها اخذتها وطلعنا بالمرجوحه اكل وهي لازمتلي الماعون كالت

- خو مو بعدك مقهور على مرتك
- خطيه تدرين حتى اني مقصر وياها  تدرين بيوم العرس طلعت قهر نور وقيصر بيها ويمكن من ورايه من مرضه لمرضه

- مدام هيج لعد خل احجيلك باوع ايسر تره هي مو علمودك تمرضت خطيه جابريها تتزوج

ضيقت عيني باوعتلها وتذكرت حجيهم من جانو يكدرون  هدوم هي وامها كالت

- والله اني سمعت بنات خالتها يبجون ويحجون يكولون لامها من وراج تدرين بيها تحبه ليش تزوجيها غيره وهاي ماتت وراه متحملت

صفنت جسمي قشعر
- منو مات يعني الجانت تحبه

- اي جانت تحب واحد فقير وخطبها ورفضو وهو من كثر ميحبها من تزوجت التحق تالي اخذو مال سبايكر وراها تمرضت هي من اعتقلو الرهاين ومن كتلوهم وطلعو الفديو تكول بت خالتها انشالت وانطبت ماتت بجي فرفحت  ونامت وراها ماتت

دمعت عيني واني صافن على رضوى تحجي وترجف ودموعها تجري  كالت

- فلتنقهر هي راحت يم التحبه وهي بريئه
جريت نفس باوعت لرضوى

- تدرين همزين متزوجتها  يعني راحتله طاهره ملازمها غيره تدرين هسه يله ارتاحيت
- هو اني جيت دااحجيلك حتى ترتاح

ثواني وسنا جتي صاحت تسمع امي

- انتي موحرام عليج تشوهين سمعه وحده ماتتت

وطلعت امي وضلت تصيح سناا
- حرررام عليكم حرررام

كمت على حيلي وجريتها من شعرها لكيت روحي اسحل بيها الكاع وامي تصيح وتدعي اخر شي طردت رضوى من البيت وطلعت رضوى

قيصر....
جنت بالباب اني وعلي راجعين لبيتنا  واشوف رضوى طلعت تبجي تريد تروح لبيتهم مشي
- وين هييي شبيج
- باجي ااا ايسر ضرب سنا من ورايه حباب روحله لتخلي يضربها

- دمشي فوتي امشي
- لالاماريد حروح
- امشي بس خل اشوف القضيه اني اوصللج

- لالا حروح وحدي
- دوكفي خل اخابر محمد

التفتت خابرت محمد واسمع صياح سنا غمضت لميت شفتي لداخل حلكي التفتت على علي نصه راسه التفت كال
- قيصر رايح اني

- ها الله وياك اجه محمد اخذ رضوى واني طبيت  كوه جريت سنا منه مكطعها تكطع  وامي مفرفحه وتصيح
بت ابليس بس طبت حركت البيت وراحت

وكبت العيطه بين ايسر وامي وسنا واني لليل يله  فكينا تعبنا اثنينا وتعبتنا حيل الفجر طبت تبجي وتتعذر للغرفه النايمين بيها سكتنا شنسوي نموتها يكولون شو شسوت وموتوها سكتنا

ايسر....
الايام تركض ركض رضوى بعد موصلت لبيتنا داومت جامعه  وابويه بدت اعراض القلب عده تزيد  واكف بالسوبر ماركت وخابرت مرت ابويه كالت ابوك مديعجبني تعال اخذه طبيب مختص مديقبل يروح
كتلها العصر اجي عليه ورحت واخذته بعد الفحص والسونر طلع عده انسداد اثر جلطه  خفيفه صايره عده ولازم ينفتح سوينا قسطره مفاد لازم قلب مفتوح الدنيا وكفت بعيني حسيتها القاضيه خفت ودعوه امي تدك براسي والدكتور  نصحنا العمليه بالهند

واخذت موعد وابويه قافل ميقبل توسلنا بي تالي رضوى حاجته تتوسل يله قبل 

والتهيت من جديد   ورحت وي والدي وبقيت سالفه شهر هناك ورجعت

قيصر عفت عليه السوبر ماركت وي الولد مرت ابويه جانت بشكل يومي تخابر والدي سوالف وضحك حتى اني اتونس على سوالفها ساعات وميمل مدري منين تجيب الحجي

بذيج الفتره تقربت من ابويه هواي وبيوم من الايام عاتبني وحجيتله كلشي  الصار  تفهم  وكال ابتعد عنها لتاذيها بعد بابا يتيمه حوبتها تهد جبال

وتواصلت مرت ابويه وياه اسمع غرامياتهم وغزلهم كانما شباب ومن يكولها مشتااق عباله اني نايم يكزبر جلدي  يهمس بشوق وحب تكول مراهق ويلومها ليش مجيتي ويايه

رضوى يوميه تخابره تتشاقه وياه وفجاه سمعت صوتها يمه

سلميلي  عليه  كوليله نور تدعيلك يوميه ترجعلنا سالم

جنت اصب الجاي نسيته وعيوني تبسمرت على تلفون ابويه وهو فاك السبيكر انجب الجاي على ايدي واحتركت ووكعت الاستكان ابويه سده الاتصال

وباوعلي وايده جوه خده مضيق عينه انهزمت من عينه وطلعت من الغرفه كعدت بره وكلمه كلمه منها ترن باذني صوتها
مرتاحه ؟
مو مرتاحه؟
اي يمكن مرتاحه يمكن ابوها خلاها تجي يمهم يمكن سامحها زين دتقره لولا ؟

زين كالتلها رضوى مو هو الدز صورتج لابوج لو مكالت؟
يمكن نست ؟

اخابرها اكوللها  لو اعوفها ؟
ابويه كال  عوفها غمضت عيني  واتذكر حضنها لمسه ايدها وحنانها وبرائتها كلبي حسيته نبض من جديد بعد ما مات 

نستني؟؟
يمكن نستني
وكرهت ذيج الايام
ماانسى نظرتها ابدددا ماانساها.

دك عليه ابويه كمت فركت وجهي طبيتله غير الموضوع  بعدها رجعنا للعراق  وديته لبيتهم وامي رادت تزوره  واخذتها فشلتني من مسلمت على مرت ابويه والبنات شافته شوي وطلعت  رجعت لكيت الشغل باحسن مايكون قيصر مبدع بالشغل السوبر ماركت مخلي بي ملاعيب اطفال بصفحه حتى من يتسوكون يخلصون  من جهالهم   ومخلي ركن لالعاب الاطفال بيع وشراء ومكاين كهربائيه مو طبيعي السحب صاير عليها. وعلي واكف وياه تحس السوبر ماركت شي راجع  اله كدما حريص عليه

سلوى تزوجت وره مرجع والدي بشهر وراحت للسليمانيه  وي زوجها كملو دراستهم هناك بجامعه السليمانيه

وضليت اروح وارجع وي ابويه للسوبر ماركت هملت سنا هالفتره  وضل بالي خاف عدها شي  بس ملتهي  لراسي  واتقدم لرضوى ولد من الجامعه

ووالدي دز علينا  جانت حايره توافق او لا خايفه ووالدي طاها حريه الاختيار وسالنا عالولد واهله احسن ناس حسب مكالو وانخطبت بيومها رجعت وامي  لزمتني

- يمه وين جنت  كاشخ هالكشخه انت واخوك
- ها امي مشيه مال رضوى

اباوع سنا عيونه  فتحتها كلها بقت صافنه باوعتلها ونصيت راسي عفتها موتي ويطبج طوب زرع الزرعتي بيدج تحصدي

بليل سمعتها تبجي وتشهك  مااكذب واكول  ممتالم لا ميت قهر من اسمعها بس تعبتني منين مااجيها اجتني

قيصر عجل بزواجه وتزوج  وابويه حار شسواله جنت حيل فرحان بي وعلي اخوها  طاير وهو حبيبي مكعد بس يركص

ابويه اقترح عليه يطلع وامي رفضت كالت
ابوك يريد بس يبعدكم عني

واني  صفيت لوحدي انتقمت من روحي
حاولت اتصل برضوى واخليها تفهمها كالت
انساها اصلا مستحيل بعد هي رافضتك كلش

عزة نفسي رفضت التوسل تركتها بس يومين راقبتها توقعت تطلع مطلعت ماعرف شوكت  وشون دتروح للامتحان ماعرف وكتهم

ورجعت لعملي غصت والتهيت قيصر وي مرته مرتاح حيل شهر ورجع من السفر وشهر ثاني كضه وبدت رحمه الله

بده راس البله وي مشاكله  ويانا لكت وحده تسويلها مشكله وتاذيها وحور تفتهم عاقله مشكلتين صارت وامي تعاركت وي حور ونزل قيصر زفها زفه مرتبه لسنا وصعد  فوك والصبح من دتطلع هددتها سنا لحور وهالمره اني سمعتها تكول

- الا اندمج لج اني تلعبين ويايه ان ماخليته يطلكج ويطردج اني مو بت امي

راحت حور للدوام وصعدت لقيصر دكيت الباب عليه جان نايم كوه كام صاح منو

اني افتح الباب كام فتح الباب والنوم بعينه كال دقيقه بقيت وره الباب حسيته لملم الغرفه كال تعال لمحته دحس هدوم مرته جوه  الجربايه ضحكت وكعدت يمه يفرك بوجهه يريد يركز

طلعتله من الاخير
- خويه اخذ مرتك واطلع هاي مراح تكعد راحه وحجيتله كلشي كال
اذبح واصلخ

يابه ميفيد  مييفيد مو حرت شسويت ميفييد اطلع احسلك مرتك بت اصول تره اذا صار هيج حجي تحلم ترجعلك

اقتنع وراح حجه وي ابويه وابويه راساً كعده بشقه من شقق عماراته وامي تخبلت ويايه

ابوك يمشي بحجي مرته وابوك ياخذ ولدي واني اطبب منا اطلع منا  فتره وانتبهت على سنا التعبتني حيل رجعت تلعب بفون امي  رغم هو موديله مو ملون صرصر

وراقبتها ولكفتها  عدها علاقه بولد بيومها تخببلت وهم كتلتها ملختها كالت يحبني وحيتقدم واجهتها
انتي منو يكلبج  بعد بابا
كالت

لا يحبني وهسه تشوف  والله هو كال
انتي كذابه تصدكين بي شوون
سكتت كالت باجررر يجي  يخطب
علواه  اخلص اقلها ولج انتي شيبتي راسي باعيني  بعد مفايت الثلاثين  شيببت

وعفتها وطلعت فعلا ثاني يوم جتي مره تقدمت مبينه عليها حالتهم بسيطه وضلت تحجي اخذت عنوان ابنها  اسمه وسالنا عليه طلع فقير كلش وهالواحد لامه وابو متوفي وافقنا وهي الدنيا مسايعتها نوعا ما ارتاحيت كمت انام بليل واني مخايف لاتسويلنا مصيبه

كمت كل فتره اخابر رضوى وهي حيل تفرح اسالها عن  نور متقبل تنطيني اي جواب كوه عرفت منها امتحنت. ونجحت بمعدل هندسه فرحت وكانما اني النجحت فتره مرت

وقيصر طلع بغير بيت وهناك علكت بين سنا وامي نزلت على صوت صياحهم صفنت شكوو سكتو لاامي التكدر تحجي وسنا ميته بجي
تقربت منها احجيي شكووامي نطت

- يمه هذا الولد صرف نضر
فكيت عيني اباوع سنا تبجي  بقهرركالت
- سافر
انقهرت عليها جاوبت
- هاذ هو شتسويله ويطبه طوب امي صاحت

- لك يمه ناطيته كل ذهبهااا والقران مالتي والملاوي وكومه فلوس
فكيت عيني

- لجج ضحك عليج من اهممداج هاي ضحك عليج واخذ فلوسج وراح داكول شون خطبببج لج بابا محد يرضى بيج انتي بحياتنا نقطططه سوووده صخمتي وجوهنا حقه ابويه من تبره منج لج ولايسال عليج يكولي  عدي بس ولد اثنين وبنيه ولج شوون بيج اقتلج واخلص

طبت للغرفه تبجي  بقهر وامي تدعي عليها  صعدت فوك صدك فرفحت سالت عليه المنطقه الناس كالو اخذ امه وطفر بره

خابرت ابويه وكتله بقه ساكت  وكال هاهي

ضيعتني تعبتني اني ادري الاخت سند وطاعه وحنان والله من اباوع بوجهه اكول شحتسوي بعد  اخاف اخاف منها

مرت يومين هالموضوع وصحينا بيوم الثالث الصبح على صيحه امي اريد انزل الدرج  مااكدر كلت ابويه راح 
- لج يووم شكو صاحت وهي كاعده بالكاع وتدك على رجلها
- لك يممه اختتك الحك علليها
والتفت واشوفها زركه
لزمتها بارده ثلج
اخظ بيها واصيح
لججج سنااااااا
ماكو متحس متخشبه ركضت بيها مستشفى واني بالفانيلا والسروال افتر خابرت قيصر اجاني وكالو

جايبيها ميته من ساعه
وكعت مكدرت ولطم لطم على راسي

يااختي
ياقطعه من قلبي
قد احتارت جوارحي برضاك ولم ترضي
اتعبتني اثقلتي كاهلي  سامحيني

فصلت عن الدنيا وقيصر خبص المستشفى خبص وجرني كوه واخذوني ابرتين مهدا والرجفه اكلت جسمي اكللل مدتروح وعيوني فاتحهن انصك جسمي صك واسمع قيصر يحجي وي ابويه ويبجي
الحكلي اخوتي ديروحون كدامي ياببه

ماتت سنا
وموتت شكو بيه مشاعر اخوه ضلت
حسيت بتقصير جبير
تندمت وارجع واكول شسويلها بعد

والدتي انشلت ودموعها تجري
جانت تاركه رساله بخط سريع مبينه محروك دمها ومعصبه ومنتحره ماعرف ماخذه دوه امي بالعته كله بليل وللصبح نازل ضغطها كلش وتوفت

قريت الرساله وشبيه الم صاح شبيه ضعف طلع

( البقعه اسوده تتنظف بس الحقد شينظفه من الكلب كول لابويه يحللني ويوهبني وانت هم حللني واوهبني  وكول لسلوى ونور هم  ينسسون السويته بيهم اني تعبت كارهه روحي اني بالحالتين  محتركه  خل احاول بلكن  اموت واخلصكم مني )

بجيت لحالتها هواي تاذيت كلش قاطعت كل اهلي بس امي تقربت منها اكثر حور رجعت يمنا تداري امي  والقهر والدي يدز علينا ومااكدر اشوفه نص موتته سنا بسببه

اجاني مرتين واني بوجهه ماباوع
اجاني للسوبر ماركت حجه حاول يحاجيني مرديت مدااكدر وجتي رضوى بس شفتها انفجرت  بوجهه

- روحييي مارريد
- اني اختك اني ماعوفك
- ماااريدج ماريد اخت بعد  اني بس اخت وحده عدي ومااتت والسبب انتو وابوكم اطلعي بره

راحت لبيتهم ميته بجي حتى قيصر نفس حالتي  امي اللي متكدر تحجي ولاتمشي  مشلوله  وابويه اللي تازمت حالته  بعذاب الضمير كل ما اروح ازورها الكه هناك يبجي ومرت ابويه بصفه

تعبت هالفتره حيل كلشي تعب بيه  وتازمت حاله والدي اكثر بيوم بليل خابرت مرته تبجي وتكول لو تلحكله لو متلحك

طرنا اني وقيصر عليه وجلطه ثانيه صارت عده ونفس امي انششل صار لايحل ولايربط

صدمه جبيره صارت اكثر من صدمتي بامي اللي اخاف منه واهابه وحجايته متتثنى ميكدر يسوي شي ومرته زادت مقلت بحبها كمت يوميه اروح ارجع اشوفه شمحتاج ممحتاج  واشوفها شون تداري وتدلله وكانما كلشي مابي

فتره مرت وهمه على هالحال وخابرت مرت ابويه كال تعال للبيت  انت واخوك ورحت اني وقيصر وانفتح الموضوع وي محامي والدي

وانصدم بانه السوبر ماركت والعماره باسم  مرته ورضوى باوعتله لابويه وفركت وجهي بوكت كمت احس ماريد شي بعد بس قيصر تخبل

كال
- لعبتي عليه انتي وبنتج وكفت بوجهنا  كالت

هيج حجي لتحجي اني السوبر ماركت الزمه واذا قصرت عليكم  ذاك الوكت معتبه جاوبتها

- واني ممستعد اشتغل عد احد
لعد ممحتاجتكم انتو اجارات العمارتين  الكم ليش ضايجين

جاوبتها بهدوء

- لان كل حياتي هنا اني واخويه كل حياتنا بالسوبر ماركت
- واني ياماما مطردتكم اريدكم ويايه

- لا عذريتي اخذي وحدج باوعت لابويه باوعلي بقهر

- ها حجي سنا ضاع حقها وهذا حقنا ديضيع عاشت ايدك ومقصرت فيمالللا

طلعنا من بيتهم واني وقيصر نار  كعدنا وحجينا لازم نشوفلنا  غير مشروع  نعيش منهه ولو اجار  العمارات كافي  بس ماعرف بله شغل

وفعلا فتحنا سوبر ماركت  على كدنا بس بدعنا بي حتى مخللات سوينا وركن لفات فلافل قيصر من يريد يبدع يبدع

وعلي ويانا

رضوى كامت تخابر كل فتره واني ارفضها اكتفيت منهم اشتاقيت لابويه حيل بس مرحت اله مرت شهور وفجأة دك عليه رقم غريب رديت

- الو
صوت رضوى مخنوك كالت
- الو
سكتت غمضت عيني
- شتردين

- اريد اخويه كالتها وبجت

سكتت متوتر اهز برجلي كالت
- محتاجتك بابا مريض ماعدي غيركم
- شتردين

- خايفه حيل
- شبيج شكو

- اااا عمر طلع يشتغل بالسلاح وكلي اذا كلتي لاحد لو تركتيني ااذيج

وكفت عكدت حاحبي
- انتي وين هسه
- ببيتنا بس اسبوع اللخ عرسنا واني ماريده حباب ماعرف شسوي خايفه

عضيت شفتي جريت نفس همست
- جايج هسه
- ايسر ااخاف ياذيك

- بابا شنو الدنيااا اله سدي التلفون جاايج قييصر عززل وامشي ويايه
- شكو وين

- امشي رضوى واكعه بمشكله وابوك مشلول

لكيت روحي اركض وخايف عليها اعرفها صافيه واعرفها من تخاف وادري بعزه نفسها من يوم اللي طردتها بعد مخابرت لعد شكد خايفه الخابرت وره هالمده

رحنا لبيتهم بعد طول فتره شهرين ابويه مشايفه مرت ابويه بس شافتنا ابتسمت وهللت بينا وراحت تركض لابويه تبشره اللي ارتاحيت اله ابويه ديحجي بس بعده مقعد حضننا اني وقيصر بجه بحركه وقهر قيصر باس ايده ورجله بلحضه نسينا كلشي

الفلوس والورث والشغل وحتى سنا وامي

وكعدت وي رضوى وتفاهمت وياها طلعت عارفه بالصدفه عن طريق ولد وياهم بالجامعه من محققه  وياه منكر بس هددها

رحتله للولد وي قيصر وكتله مثل مدخلنا بالمعروف نطلع كام يخربط بالحجي وانتو منين جيتوا وهسه يله تذكرتوا حتى بالكعده  مشايفكم قيصر اله شوي يلخمه والله ستر

رفض الفصخ قدمنا عالمحكمه قرار فصخ ومااجه وانتهى عقدها وخلصت بيومها من طلعت من المحكمه حضنتني مكيفه مو بيدي انسانه واضحه ونظيفه نسيت كلشي ولاول مره بحياتي احضنها بكل قوتي

بيومها بجت هواي قيصر هم حضنها ولو هو عادي عده من اول يحبها عادي بس اني وهي مجلبه بي تحبني اكثر من قيصر جانت دوم تكول

ادري بيك طيب كلبك اكثر من قيصر حتى لو تكرهني احبك لان انت اخويه

بيومها اخذتها لبيتنا رادت تشوف امي وحور وطبت لامي صدمتني وهي تبوس بايدها وراسها وامي ضايجه من نظراتها حور رحبت بيها مكيفه تغدت عدنا ورجعتها لبيتهم

واعدت ابويه ماتركه كل فتره امرله

حجيت وياه سولفتله عالسويناه نوعا ما زعل وصاح زوجته وكعدت ويانا توسلت شنو توسل توسلت بينا نرجع للسوبر ماركت ورفضنا
...
.
.
.
يتبع