رواية أفلا تغفري الفصل الخامس 5 - بقلم مريم السعدي

بارت ٥

#افلا_تغفري

#مريم_السعدي

مساكم الله بالخير والعافية

.
.

قيصر

حاولت اتصل بعلي  مره مرتين ماكو رد صرت اعصاب وايسر انتبه تقرب مني كال
.. عوفهم لتضغط عليهم
.. ايسر بيوم وليله ينكلب الولد طب بكلبي تعلقت بي عبالك اخويه الصغير

.. ميخالف خلي براحته مرحله صعبه مرحله التدريب موذيه حيل
.. اي مو ردت اني اضل وياه ولك شسوي بعد
.. ياببببه عووفهممم خرب ببليسك شكد تلح

سكتت وعفتهم  والتفتت لشغلي كمت الهي روحي بأي شي  وفجأة الضهر داارجع للبيت شفتها واكفه عالشارع عبالك  تنتظر سياره

ضهريه والدنيا شتا ماكو احد بالشارع وكفت سيارتي يمها فتحت البنيد ونزلت راسي جوه البنيد باوعتلي ودارت وجهها وانكلبت خلقتها ضايجه من شوفتي

قيصر : تفضلي اوصلج نترت بعصبيه ودارت  وجهه
حور :  لا ماريد هسه اوكف تكسي

قيصر : ماكو سيارات هسه
من اباوع لكف رجلها مدمه ومسويه الحذاء تك مثل الشحاطه
.. شبيها رجلج
.. مالك دخل رووح
.. علي شونه بس داحاجيج هاي شبيج

عكدت  حاجبي بغضب باوعتلها توترت تلفتت يمنه ويسره وصعدت بالسياره ليوره وغطت وجهه طلعت بهدوء وعيوني عليها بالمرايه

- احمم سلامات شنو بيش تاذيتي
نترت  وعيونها بالشباك دست على بسمار
- علاوي شونه
مجاوبت
- بس كوليلي شونه مرايد شي
- زين بس لترجع تخابره بعد لتعلمه عليك

سكتت بقيت اباوعلها التفتت صارت عينها بعيني

- انت متستحي
- شمسسسوي رب الحلو
صحت بعلو صوتي خنست وملامحها الغاضبه هدات بلعت ريك حسيتها خافت سكتت وعيني عالطريق  كالت

- لبيت خالي
- اريد اشووف علي .. بصوت عالي
جاوبت بهدوء
- هو بيت خالي موجود

وصلتها بيت خالها وبقيت بالباب كالت
- دقيقه
- اي  داانتضر

طبت شوي وطلع خالها كال تفضل طبيت سلمت وعيوني تدور على علي لمحته كاعد بالهول طبيت سلمت عليه بلهفه ردها ببرود ودار وجهه

قيصر :  شونك علي  بشر دتمشي دتدوس عليها
جر نفس منصي راسه
علي : بخير لتشيل هم
.. علي شبيك كاطع هالكطعه لعد هو هيج كالوها اخابر مترد
التفت عليه باوعلي بعتب همس
.. تورطت خوما تورطت يابه هاي هي كفيت ووفيت
.. هاي شبيك علي سامع مني شي

.. لا مسامع اخذ راحتك هاذ هو واحسب روحك لاداعمني ولا شايفني  بيوم

.. علللي شبيك متكولي عمي احجي لتخبلني اني تره مو علمود الدعمه اني حبيت روحك الطيبه تعلقت بيك

باوع عالباب وباوعلي بغضب
.. لعد شعدك تباوع لاختي
فكيت عيني كلها
.. اباوع لاختك !!! شنو انت شدتخربط هاي منو كلك هي ؟؟؟ .... صيحها

.. لالا هاذ هو اني داكولك انسى ذنبك وكانما مشفتني بيووم
.. اي زين بس صيح اختك احاجيها واروح  هاي هي

.. لا روح متجي اختي
.. ماااطلع اذا متصيحها اريد اشوف اني شون سااقط غيره بس والله عاشت ايدها جتي عالوتر الحساس صيحهااا
طب خاله على صياحي باوع مستغرب راساً كتله

.. عمي بله امر عليك بس صيحلي  حور
.. خو ماكو شي يابه
.. لالا ماكو هي هاي اخر مره افوتلكم طلعت اني ساقط غيره

صاح على حور وعيونه عليه اني عقلي من راسي طار طبت مستغربه وكفت قريب عليها وباوعت لعلي وحجيت وياها

.. احللفج بتراب امج وابووج بتررابهم وروحهم اني مباوعلج بنظره نكسه

سكتت وباوعت لعلي

.. جاوبي وهاي هي اخر مره اطب التردي صار بس خل اطلع من صخامكم بالوجه الابيض

كالت مرتبكه
.. اانت كلما اصعد بالسياره تباوع--

قاطعتها بغضب
.. انييي مباوعللج نظره نكسسه خلي الله بين عيووونج عليمن  الحجاب  والايمان والصلاه لعد لعددد نزعييي واتركي عمممي هو هاذ مفهوم الدين عدج

باوعتلها بغضب شفتها بلعت ريك ونزلت راسها
احجيي مباوعلج مبصبص عليج

كالت بنتره
.. لااا

.. هاذ هو
اشرتله  لعلي رافع ايدي تقربت من الطبله اخذت تلفوني وسويجي  وكتله

.. ابقى وره حجي اختك خلي تسويك خنييث واني اسف اذا فسدت اخلاقك يابه

عفتهم وطلعت عيون علي عليه يريد يكوم  ورجله توجعه دااطلع صاح
.. قيصر لتروح دقيقه

عفته وطلعت كبل مكدرت ابقى بس الله يدري شكد انقهرت لان صدك بيها يعني صدك صدك بيها انه اني اباوعلها بنظره موزينه ششايف عليه صارلي سنه الا شهر وياه اكل وشرب وكعده وسوالف ساعات اكضيها ونوبات نهار كامل طلعت كبل لبيتنا دكلي علي كم مره مرديت  نمت راساً كدما انقهرت
اصعب شي من يتجازه الزين بموزين.
.
.

ايسر ...
نوبات الانتقام يبرد الكلب ونوبات يوجعه اكثر 
نور كمت استمتع بنظراتها ويعجبني كون اني هاملها ومو مهتم الها  بالظاهر بس الواقع انه مهتم بروحي علمود عيونها

اكشخ وازين واتعطر وفيكات الزيان بس حتى تنعجب بيه من اوصلهم

ايام مرت واني بكل ليله اتخيل شكلها تلفونها من خابرت تبجي وكت مرضتي وارجع اتذكر يوم يوم نظره نظره وكلمه كلمه منها تحاول بيها تجذب انتباهي مثلا

.. رضوى اكول لخاله تكص شعري
ابتسمت وباوعتلها باوعتلي ونصت بخجل

.. لالا بطلت احبه طويل

ومنها هالكلام جنت احب لهفتها الي برائتها بس احب اكثر. غروري وعدم اهتمامي بيها حبيت وقع انها ذابه روحها عليه.

فتره مرت وسلوى علساس عقدت وابن عمها يوديها ويجيبها اني كمت نادرا ماشوفها يمكن بس بوكت المسواك من اودي المحها وفجاه اتصلت بيه مرت ابويه الصبح كالت

.. الو سلام عليكم ايسر

.. هلو باجي تردين شي دزي برساله

.. لا ماما رايدتك تجي اريد احجي وياك موضوع مهم محد يدري بي

.. موضوعيش بخصوص شنو ؟

.. بخصوص اختك ياريت تتفضل مدام والدك مو بالبيت
.. اي شكو منها جاي شوي وجاي

راساً كمت تركت السوبر ماركت ورحت صدقا خفت لان رغم كلشي هاي اول مره تطلبني وحدي دكيت الباب

.. فوت تعال تفضل

طبيت بهدوء طببتني بالهول جانت سلوى موجوده وابن عمها من اباوع لسلوى ميته بجي وابن عمها بصفها يتوسل بيها بهدوم الشغل وكف بدخلتي مد ايده تصافح ويايه وامها كالت تفضل ماما

باوعتلهم مستغرب
.. خير خو ماكو شي

مرت ابويه جرت حسره باوعت للولد يباوع لبت عمه وخطيبته ويهز رجله وعاض شفته سلوى مسحت دموعها وكعدت عدل كالت

.. ماما تحجين لو اني احجي

.. يمه ايسر اني دزيت عليك لان انت رجل واعي ومو عصبي تتفاهم اني راح احجيلك وانت احكم

.. خير باجي شكو
.

. يمه هاي اختك مدتكعد راحه يعني محاجيه خطيب سلوى وصاير بينهم حجي مو حلو بعدين شون يعني الصداقه يعني شون افهمك

نطت سلوى

.. ماما احجي تره هذا انتهى بعد مو هذا كاعد بصفي مداشوفه

.. سلووى احترمي اني لخاطر مرت عمي تره ساكت اني رجال وتصير هالسوالف تره وكتلج ردت اعرفها منو وهاهي

..  حلقتك دزيتها انتهى البيني وبينك افففهم انت ابن عمي وبسس

ايسر...
بلعت ريك نشف دمي مرت ابويه كالت

.. شوف يمه هاي تريد تفصخ وصارت مشكله شكبرها اني مرضيت اكول لابوها اني مرايده شي بس كولها تبتعد عن بنتي تره بنتي ممسويتلها شي ولاباكت ابوها

احس الدم وكف بعروكي باوعت لسلوى كالت
.. اختك وحده متستحي
..  احترمي نفسج شون عرفتي هي يجوز دتتبلين عليها وانتي شنو دااوثق بيج

.. بسيطه هسه اخابرها وشوف هاي صوتمن

لحضتها خفت اكوللها خابري لزمت التلفون باوعت لخطيبها غمض عينه وفرك وجهه دكت سلوى كم دكه وردت سنا

.. الوو ها شبيج شتريدين
.

. سنا دزي صور المحادثات بينكم بس اريد اتاكد هو لو لا

.. عليش حبيبتي خو ادزلج صوره الدزهن الي

فركت وجهي وعضيت اصبعي وخطيبها فز نتر

.. بسيطه اني اعلمج واذا دزيتي اي شي لا احركج واشيلج من الدنيا كلها

غطيت وجهي بيدي ومسحت على شعري بقت سنا ساكته من سمعت صوته سدته
وكفت وسلوى وكفت ويايه كالت

.. اني كلشي ماريد بس كولها تبتعد عني واذا تريد خل تاخذه اني خابرت عمامي وكتلهم كالو التردي يصير شتريد مني فهمني تريد ابوها متاخذه خل تخابره وتهتم بي اني مالي دخل بابوك اني عدي اهل يردوني حجايه كالوها الي من مات ابويه

نمشيج على ذهب مو عالكاع اذا ابوج مات عدج سبع اباء اني ماخفت بس على امي لذلك رجعت لان عافيتها راحت فهمها اني ابوها مهامني واذا على رجلي خل تشبع بي ماريده بعد اليباوع لغيري ماخلي هفوه ببالي

تحجي وعيونها دم وهو عاف البيت وطلع واني تبسمرت مادري شسوي اخاف اروح لبيتنا واذبحها لاختي بس رحت طاير عليها واخذت التلفون من ايدها واصيح فكي الرمز متفكه لزمتها ملختها وتتوسل بامي وامي وكعت من طولها ركضت بيها مستشفى ورجعنا وره ساعتين طتني التلفون جانت ماسحه كلشي كتلها حجايتين

.. مدرسه ماكو بعد صخمتي وجهي تدرين شتكولج سلوى تكولج تردين خطيبي شبعي بي لج انييي توكفني مرت ابوج الشفيه وتكولي ضب اختتك
لطمت على راسي واصيح

انييي تكولي ممتربيه ربيها لج للليش مو وكفت بوجه ابوج تصخمين وجهي

كامت تبجي وانهارت تتوسل عرفت ادري كلشي وفوك كل هذا تنكر وتكول موو اني اخذت التلفون وامي توسلت بيه ارجعها للدوام واني قسمت اذا طلعت لباب البيت اسكطها

زاد حقدي لرضوى وحتى نور كمت من صدك ماطيقهم واختي انكطعت شوفتي الها حتى مصرفها صار قيصر مسوول عنه اللي كلشي مكتله عن الصار لانه عصبي

واجوها خطابه جيران بيت خالي وقبلت بيهم راساً سالنا تطقسنا خوش ناس بس ماعدهم على كد حالهم بس الولد ذهب ابويه كال اني موافق شوفو اختك

وقبلت وتزوجت اختي وره شهر من طلعت من البيت بوستنا ماتت بجي فكيت عنها واصفحت وحضنتها وراحت بيت رجلها العرفته سلوى فصخت ودتداوم كليه خلولها بيت جدها خط يوديها ويجيبها كليه الصيدله اهليه دخلوها فتره بسيطه واخذولها سياره

وبدت امي تللح عليه
يمه اخطبلك ماخطبلك بت خالك مابت خالك حدما عصبت وطلعت من اللبيت سكتت خايفه مني وعليه

وره فتره دااوصل البنات للمدرسه شفت رضوى دخلت طلعتهم ورديت افتريت لنفس الفرع مدري شرجعني شفتها دتحجي وي ولد بالفرع الولد بعده شارب مطاك بوجهه وضعييف بقيت امشي بهدوء هي ممنتبه مدري شطلع من جيبه وطاهيا هي ابتسمت وحضنته الفرع فارغ ردت اتخبل ونفس الوكت اثبت لمرت ابوبه انه تربيتها فاشله نزلت ومشيت سريع شافتني عكدت حاجبها التفت الولد عليه جريت رضوى ضربتها داصعدها بالسياره الولد جرني صاح
اوكف اخي منو انت

جاوبته
.. دووخر لللك بعد عليه الزعط
.. اخي انت مفاهم

التفتت عليه ضربته بدفره ببطنه شو هذا وكع تكوم صرخت رضوى
.. لااا لااا عوفه ونزلت ركض من السياره عليه تساعده يكوم جريتها من شعرها احس تكطع بيدي وهو صيح

.. لك بابا عوفهااا.

انهزمت مني وراحت ركض لطريق البيت واني صعدت بالسياره الحكها عفت الولد بالشارع كوه وكف ويباوع لصفحتي فوك صلافته

كمت امشي وي رضوى واصيح بيها صعدي عارر
وهي متجاوب وتبجي وتمشي سريع شبه تركض وتعدل بشعرها الكفشته بيدي  وصلت لبيتهم واني طبكت ونزلت وراها طبت للبيت تصيح وتبجي

.. مامااا مامااا وينج

.. هايمه شرجعج شبيج

.. ماما خابري رافد هذا الحقير ضربه على مكان العمليه

طبيت للمطبخ اكمل ضرب ودفعتني امها بعصبيه

.. شبيك تخببلت
.. بتج ممتربيه بنص الشارع تحضن وتبوس شنوو شعدنا اذا متعرفين تربين اني اربي النوبه تحجي وتكول لم اختتك

.. بناتي وبت اختي اشررف منك ومن عشيرتك فاااهم
.

. داكولج شفتها وي ولد تحاضن بنص الشوارع

.. انجب لاااشك حلكك الولد هذا ابن خالتها واخوها بالرضاعه ومريض فاهمم اخوها شنو يعني اخووها تعرف لو اعلمك بيك خيير روح ربي اختك اللي تزوجت ومكعدت راحه

للمره الثانيه كلشي بيه رجف وهالمره كص ركاب هالمره خيانه صحت  بعلو صوتي

.. انتي شدتحجيييين اختي تزوجت وانسترت
.. صاحت روح رووح كادرعلى بناتي يشرفوك ويشرفون اختك مكيف مستوره ومتزوجه روح شوفها متزوجه وتراسل غيره

الدنيا وكعت عليه والاضرب ابويه بصياحها فات ورضوى ركضت بحضنه وحجتله اله هو بقه مركز نظره عليه كال

.. اختك وين
.. يابه مرتك تكذب اختي مرتاحه وي زوجها

.. اختتتك اليوم تجيبها وتجي وادز على الولد اريد اشوف الصدك من الجذب لاعبالك نايم على اذني اعرف كلشي تره يوصللي

.. اللي دتوصله مرتك كذذب يابه اختي تزوجت ومستوره

.. مو مرتي الحجت مو مرتي الولد  اجه وتوسل بيه اتوسطله وي بت عمه وهسه سمعت حجيكم انت بعد مالك دخله ببيتي ومالك دخل لا برضوى ولا نور ولا حتى سلوى واختك اذا مجرت عدل اطلكها من رجلها قبل لننفضح واقتلها بديه قسم بالله

كلبي وجعني حيل ومرت ابويه واكفه بنظره شماته تعبتني وكسرتني واهانتني. طلعت من البيت مكسور خابرت اختي واجتي حجيت كلشي بس جنت مكسور حيل

حجايه وحده كتلها

.. ابوج تبره منج واني واخوج هم واذا تكررت السالفه اني اروح اكول لرجلج

بجت ولطمت وكالت همه ديجيبون حجي تزوجت ومخلصت وامي تدعي لدرجه صدكت انه ماعدها شي وطلعت من عدنا زعلانه

شي بداخلي كبر حقد وكراهيه حتى لابويه تمنيت اثبتلها انها فاشله بتربيتها كل السويته للاسف

اخذت رقم جديد واتصلت بسلوى حاولت حاولت اصادقها حدما زهكت منطتني مجال وحتى مردت ملكيت غير نور واتصلت بيها

مردت لان رقمي غريب اتصلت من رقمي الخاص اللي هي تعرفه ردت مستغربه بصوت ناصي كلش

.. الو
.. الو هلو نور

.. ههلو ايسر ؟
.. اي شونج

.. زينه وانت
.. الحمد لله
.. تريد شي

جانت مرتبكه وعبالك خايفه تحاجيني يمكن حجولها ويمكن كرهتني جاوبت

.. اي والله اا شتاقيتلج لان صار فتره مشايفج

سكتت واسمع نفسها اضطرب ابتسمت لبرائتها وسذاجتها. واتخيل وجه مرت ابويه واني اكوللها  هي هاي تربيتج لو الاحلى من تشوف صوره وهي بحضني شون حتكون رده فعلها بله  سكتت وهي ساكته كالت

.. اايسر
.

. ها عيني

.. خاله دتصيحني
.. تخابريني وراها
.

. ها ليش؟

.. اريد احجي وياج مو كتلج  مشتاقلج  ها شكلتي
.

. اي

.. شنو اي
.. اي اخابر

.. انتظرج مراح انام نور

بقت ساكته
.. ها شو سكتتي كالت
.. انت شتريد مني
.. هيج اريد احاجيج
.. ليش هالوكت انت مو متعار ك وي خاله
.. اي شعليها هاي بهاي اني ضايج وحدي دااحس روحي وتذكرتج

.. اوك

.
.

نور....

انا الشمعه التي اوشكت على الاتقاد
فأنطفأت بتراب امي
انا التي دفن عمري قبل جسدها الشريف
انا التي التمس عطرها باختها وبحنانها منها

نور لكني نور خافت اوشك على الانطفاء لولا خالتي اصبحت لي اما بعد امي

كانت سندي وسقف روحي الصغيره تحميني من اعاصير ابي ذو النفس المتعبه العصيبه التي استغلت وضعه زوجته واستطاعت السيطره عليه فما وجدت نفسي الا بين احضان خالتي خالتي عوضتني اياه كل مااعرفه عن والدي هو سند مالي فحسب

ايسر الشخصيه الحنونه تاره المجنونه تاره اخرى
غاضب مسيطر
واجده بين دموعي حائر متندم

سبحان من اسكنه جوف قلبي بيوم كنت قد هربت من كلماته الجارحه ولحق بي نادما معتذرا
حينها لمست بياض قلبه بتوسله ان اعود ادراجي خاشيا علي تركي لوحدي

زرعت بذره حبه من حينها وانا اذوب شيئا فشيئا بمقلى عينيه الغاضبه حتى يبتسم ويحاول اخفاء الابتسامه فاضيع انا بين الجفن والحاجب

ياويل قلبي كم عشقت عينيه كل الليالي التي ابتعد فيها عنا كل المصاعب وهو ساكن لم يتغير مكانه رغم ما سمعته عنه من خالتي وبناتها اخواتي قريناتي بالسن
لم يتغير مكانه ابدا كل ما رايته ازداد قلبي ولها متعمقا اقسم بين عروقه ان اجعل حبي بقلبه عاجلا ام اجلا

وقد اتاني من نفسه قبل ان احاول ان ابينه له رغم ان عيني كانت قد افلتت كم نظره محبوسه سابقا لعيناه لم استطع كبتها
.

.

كملت التريده مني خالتي ولزمت التلفون باوعت لرضوى غافيه وسلوى بغرفتها اللي بصفنا

بقيت اباوع عالشاشه واسمه عالفايبر دز رساله

.. وينج متصله ليش مخابرتي

دزيت
.. الو
راساً دك

رديت بصوت ناصي

.. الو

.. هه هلاو نور شونج
.. الحمد لله

.. دراستج شونج بيها
.. زينه كلش زينه
جر نفس كال
.. سباعيه

سكتت
.. اي شكو ماكو
.. ماكو شي انت شونك
.. زين اني روتين عادي سوبر ماركت وو بيت لاجديد
.. اي
.. دااشتاقلج لان مداوصلكم
.. شنسوي هاي المشاكل
.. ممم زين حاجي خالتج ارجع اوديكم واجيبكم ولو حتى اشوفج
سكتت مستغربه
.. ها سكتي اشو
.. اخجل اخاف انفضح

.. ممم لاعوفيها
تنهدت وهي تنصي بصوتها واني ساعه اتاثر وساعه اتذكر اني ليش هيج داسوي وساعه اكول خاف تتاذه ويرجع يقسى كلبي بكلام سنا

والله اني ماعدي شي همه يردون يسوون مشاكل اني صاينه رجلي ومحافظه عليه ذوله كذابين اني اريد بيتي وبس يسوون هيج حتى بابا يسجل كلشي باسمهم

اغمض بقوه والبداخلي يقسى اكثر

.. نور
.. نعم
.. اريد اشوفج شون

.. ليش تريد تشوفني
كلتها بخوف وحذر رد كال
.. مشتاقلج مو داكولج

.. هاه ااني ماكدر اطلع وحدي خاله متقبل
.. ممم زين باجر من اجيب مسواك للطرمه انتي طلعيلي اوكي
.. ها ليش راح تجي مو ديجي غير ولد اني كل اسبوع اباوع من شباك المطبخ من يجيبون مسواك ماشوفك

.. ههه تنتضرين جيتي نور مو؟
.. سكتت عضيت شفتي خجل
.. اني باجر اجيبها اقنع ابويه صار شهر للسالفه نوعا ما بردت هسه
.. اوك
.. انتظريني العصر
.. اي
.. شحتلبسين من اجي
.. مادري
.. لبسي شي مال بيت بس اريدج حلوه ولو انتي شتلبسين حلوه

.. هه شكرا
.. نور ؟

.. نعم
.. انتي هم تفكرين بيه
.. سكتت خجلانه
.. احجي
كلتها همس اريد ااثر بيها كالت بهدوء
..  امم هوايه

.. ههههه شكد تنحبين يا الله
كلتها بعفويه فعلا هي تنكرط ببرائنها وعيونها الحزينه سكتنا كالت
.. حروح خاف خاله تجي
.. اوك روحي باجر موعدنا تردين اجيبلج شي ويايه
.. لالا سلامتك
.. ماشي باي تصبحين على خير تغطي زين
..  هههه اوك باي

سديته منه كلبي صاير شكبره من الفرح شكد احبه واتمنى بس يباوعلي وهسه مخابرني ويتغزل ويريدني اشوفه باجر كمت من الفراش ذبيت التلفون اكلب بهدوم الببيت اريد ارتب شي ملكيت كلبت بهدوم رضوى خطيه دائما جانت تخليني البس منها طلعت تراكسودها الرصاصي ووردي يبين ملامحي لان اني ملامحي ابرز من ملامحها وهو بي ضيق رغم بجامه وبدي ردن بس كلش يرتب الجسم واني نعومه جسمي مرتب كانثى باوعت لخصلات شعري الجوزي فليته حتى ميحتاج تسريح افله باجر باوعت لوجهي كلت من الصبح اخلي حليب حتى يصير حلوه فرحانه كلش رجعت نمت الصبح كعدت دز رساله

.. نايمه واني كاعد
حسيت راسلته راسا
.. كعدتني

.. شون كعدتي على صوت الرساله
.. اي ههه

.. كون يمج واعرف شون اكعدج

كلبي دك بسرعه شديحجي هذا راساً كال
.. باي عدي شغل العصر اشوفج
.. اوكي

رجعت نمت جان هاليوم لحد الان اتذكر تاريخه
١٢ - ٤ يوم سبت مستحيل انساه
حسيت روحي مهمه بالنسبه اله كلش تغدينا وعيوني عالباب كلما يندك الجرص افز واصفن كلسا اخجل ادز رساله اذا مو هو يكتب ماارسل

وهو ماكو كضيت الوكت اتامل بوجه عمو رجل خالتي لان ابنه ويشبهه اشوفه شون يعامل خاله. بكل حب واتخيل روحي وي ايسر يمكن استعجلت ذاك الوكت بتفكيري بس تفكير مراهقه عمرها١٨ سنه شون يصير بعد

لل خمسه العصر دك تلفون عمو رد كال
.. ها يابه بقيت اتامل ملامحه لعمو جر نفس كال
لا يابه لا دزه بيد محمد وبقه وياه يحجي اخر شي كاله
يله جيبه وتعال اني داانتظرك

كمزت من مكاني حتى خالتي انتبهت كالت
.. اسم الله ماما شبيج
.. ها خاله لالا هيج
طبيت للغرفه بدلت ركض وفليت شعري سرحته جنت مخلصه كل دروسي حتى اتفرغله خليت مسكاره من سلوى وطلعت للمطبخ خاله شافتني ابتسمت كالت
شهالحسن هذا اي اعتني بنفسج بشعرج فهمنا سادس مو تموتيها لروحج

هزيت راسي وكفت يم السنك طب عمو كال
.. ايسر حيجي
جاوبت خاله

.. عفيه لتكول لرضوى تفوت تسلم عليه تره الشفته منهم يكفي وهي هم متريد احد يضغط عليها عالسواه باختها

.. لالا خليها براحتها
باوعتلهم خليت الدله عالنار ابتسم عمي وباوع لخالتي كال
.. هاي نواره اليوم مضويه
ضحكت خجلانه خالتي كالت
.. اي حبيبه كلبي باع الشعر شون طولان
.. اي ماشاء الله لتكصي عمو حبيبتي المره زينتها بشعرها واخلاقها

هزيت راسي ساكته كال
.. هاي شنو حتسوين كهوه
.. هاه اي اي
.. المن الج
.. اي شو عجبني
.. لعد سوي ثنين لخ وياج اني وابني

هزيت راسي اي عمو
راحت خاله واني كوه مسيطره كون ماخلي ينتبه سويت وحضرت الفناجين وخليت نستله بماعونها وماي بارد بي ثلج وعيوني عالباب بس اندك الجرس فزيت وايدي رجفت فتح الباب من جوه مثل كل مره وطبب الجياسه فرغ السياره وعيونه على باب المطبخ طلع رجل خالتي

واني وكفت بباب المطبخ همست
ااعمو اساعدك اطبب وياك الغراض
باوعلي وباوع لايسر كال
.. عالواه

طلعت بخجل اول مره البس هيج لبس بي كصف نوعا ما ومهتمه بروحي نصيت اشيل الجياس طب ايسر عركان عاكد حاحبه بس شافني بهتت ملامحه من نصيت شعري نزل نظرته خجلتني حيل بقه واكف يباوع كال همس ويتلفت على ابو الطلع ينزل الغراض من الصندوك مال سياره

.. الجيس الاحمر الصغير الج
رفعت راسي وكفت وبيدي الجياس تامل جسمي ونفسه صعد ونزل كال

.. هاي الجمال كله متحضر الي

خجلت حيل طبيت راساً للبيت ولغرفتنا رضوى كاعده ممنتبهه عليه دتدرس طبيت الحمام حتى بجيت من الرجفه كلبي احس حيوكف دز رساله

.. وينج مشبعت منج شوف
دزيت
.. اخاف يبين علينا
.. اني اكدر اسيطر بس وجههج مفضوح وعيونج ومرتبكه
.. موبيدي
.. ميخالف دطلعي تعاي جيبيلي مي نشف ريكي تعاي اخذي غراضج خليتهن بالبرميل مال زبل جيس احمر خاف احد ينتبه
.. اوك هسه

كمت طلعت صبيت الكهوه نطيتها لخاله الصينيه كالت وديها ودكي الباب يطلع عمج طيهيا لتطبين
اوك

وصلت لباب الصاله دكيت الباب ماكو رد شوي ودفعتها شفت ماكو احد فتحت الباب مال صاله عالبره شفتهم بالحديقه كاعدين التفت شافني ابتسم وعظ شفته نصيت راسي ضميت جسمي وره الباب صحت
.. عمو الصينيه

.. ها اي يابه جيت

باوعت لايسر عكد حاحبه وهز راسه متحلف طبيت للغرفه شوي وراح طلعت للحديقه بحجه داشيل الكوابه اخذت الجيس الاحمر وطبيت للبيت للحمام فتحته شفت كومه نساتل وجيس ( m&m)  مره اشتريت منهم اول مره اشوفه ومادري بهالسوبر ماركت مالتهم

.
.
.
.
يتبع
.
.
.
.
ملاحظة : سبق وأن بلغتكم القصه قصيرة يعني حرامات تخلص بسرعه لهذا السبب النشر بين يوم ويوم
البارحه دمجت بارتين يعني عدد البارتات صار اقل مما بالكتاب

اختاروا شلون يكون النشر وكتبوا تعليق بالفقرة الي تختاروها وعلى اساسة نقرر طبيعة النشر

... يومي

... بين يوم ويوم

... يومين نشر يوم استراحه

.
.

اغلب التوقعات للصورة تكول هذا ايسر

والجواب هو :
.
.
.
ايسر