رواية أفلا تغفري الفصل الرابع 4 - بقلم مريم السعدي

بارت ٤

#افلا_تغفري

#مريم_السعدي

ايسر....

الايام تمر واني اودي رضوى واجيبها لمدرستها
لغة الحوار مقطوعه بيننا
حتى هي الجانت  بس تريد تحاجيني بعد مشكله سنا بالمدرسه كامت ابد متحجي ويايه
وان حاجيتها تجاوب على كد الكلمه ومتباوع بعيني

مرت فتره نور ماشوفها ابد
وشلتها من راسي
وبيوم من الايام العصر دااجيب المسواك الاسبوعي لبيت ابويه طببت الجياس بالمطبخ عالميز ابويه ورضوى طلعو ويايه يساعدوني
ابويه ينزل من الصندوك ويخلي بالطرمه
ورضوى تجيبه للمطبخ

شفت نور تمشي بسرعه وجنطتها على كتفها منصيه راسها بقيت صافن بدون حركه مستغرب

لا هو وكت مدرسه وجايه من المدرسه لبيت خالتها
ولاهي الدتمشي عادي
جانت  منزله راسها حيل وتمشي سريع خايفه ومرتبكه وصلت لباب بيت خالتها الجان مفتوح ابويه بس كاللها

.. نور شبييج عمي
وهي طكت بجي
احس حيلي انهد شبيها منو وياها طبت ركض للبيت اباوعلها وجهه فوك حاجبها دم وصفحتها حمره ابويه باوع لعيوني كال

.. هاهي يابه روح الله وياك وعينك عالسوبر ماركت
.. ها اي اي صار

صعدت بالسياره وعيوني على باب الطرمه اللي انسدت وكلبي مفرفح عليها
منو الاذاها خاف احد متعرضلها
اخاف متحرشين بيها
طلعت وبقه بالي يمها لاكدرت اسوي حساب ولا كدرت الزم شغله ساعتين ورديت رجعت لبيت ابويه دكيت الباب طلعتلي رضوى

مادري شكول وشنو اتحجج

.. ابويه هنا
.. اي توه اجه من المكتب تطب لو اصيحه
.. ها لالا اطب

التفتت عليها
.. سويلي  چاي

ابتسمتلها وهي ابتسمت بفرح كالت
.. ببطن عيني فتحت باب الصاله وطبيت انتظر ابويه شوي وطب

.. ليش كاعد هنا يابه جان فتت يمنا بالهول
.. لا بابا نسوان ياخذون راحتهم بقه يباوع بوجهي مستغرب
.. كول بابا تريد شي احجي
.. لا والله ههه هيج جيت اناقش وياك امور بالسوبر ماركت عدي كم فكره

.. ها يله يا الله احب افكارك اني
.. بقيت اجيبها منا واوديها منا اخر شي تحججتلي بانه نخلي ركن مخضر وابويه  شجع الفكره وجبتلي وجع لكلبي جديد وابويه مكيف طاير لان داطور بالشغل

ميدري اني جيت بالي يم نور ساعه وطلعت واني ممحصل شي الليل كله منمت بس اتكلب النوبه لاعدي رقم رضوى ولا رقمها كمت تذكرت  قيصر عده رقم رضوى يعني اخابرها شكوللها  خل اكعد واسكت

ثاني يوم الصبح مريت اخذ رضوى للدوام وتفاجأت بنور وياها باوعتلي رضوى كالت

.. عادي نور ويانا تكول خاف ميقبل

.. اي عادي هي نفس المدرسه قابل غير طريق لو شايلها على كتافي
كلتها بنتره خافي لهفتي صعدت بهدوء متباوع بوجهي ولا بالمرايه واني ركبتي انكسرت بس ردت اشوف شبيها
شفت ملزوك شي على كصتها مكان الجرح وخدها بي زراك يم اذنها الطريق كله عيونها عالشباك متباوعلي ابد وصلوا ونزلوا وطلعت لشغلي كلسا واتذكر ضحكتها بوجهي ذاك اليوم اغمض متأثر گلبي بيها جسمي كلش ينحل

وارجع اتذكر بجيها البارحه شنو معقول ابوها ضاربها هسه اني ليش هلكد مخبوص بيها ليش ماخذه حيز من دماغي

كمت انتظر يوم يوم اوديها واجيبها وي رضوى اربعة ايام مرت وهي عيونها متخليها بعيني احجي وي رضوى هي مترد ولا تناقش ولا تضحك ولاتحرك عينها تجاهي حسيت روحي عاجز

فترة اسبوع مرت داودي المسواك شفت سلوى طبت وصلها ابن عمها بسياره فاخره بقيت صافن نزلت تضحك اشرتله باي وطبت متباوعلي طلع ابويه بوسته وفاتت اني تبسمرت عيني عليها طلع والدي كال

.. الله يساعدك بابا طيني خل اخذ الغراض
سألته رأسا ً
.. هاي سلوى رجعت هنا
.. اي واخيرا صالحت امها واقتنعت وجتي
.. زين منو الوصلها هذا بعد نترت بغضب
.. ابن عمها بابا شبيك صاير جهنم
.. بابا الضحك واصل للستار
.. خطيبها ابويه انت مالك دخل عدهم ام تربيهم
.. والله اني هالسلوى ممرتاحلها ابد تربيه سزز

.. انت مالك دخل بس دير بالك على سنا اللي مدترضه حتى تحاجيني فوك شينها
.. ها حتحول على اختي هسه عوفها براحتها
.. عود من اموت تعرف قدري

.. عمرك طويل حجي عمرك طويل طلعت من يمه موجر مدري ليش من سلوى اتخبل رجعت للبيت دااحجي لامي وسنا

.. جتي العينتين بالبنطرون  والقميص وابن عمها موصلها بسياره عاليه وصوت الاغاني والضحك مالتها وابويه يكول  امها تربيها

سنا : هذا ابن عمها ليش ابو الجكساره
ايسر :  اي شمدريني واحد من المكرنين مالتها لا وابوج يكول  خطيبها

سنا : شنوو خطيبها ياهو هذا العده طبره بحاجبه

عكدت حاجبي مستغرب لفزتها ضيقت عيني هزيت راسي اي عده طبره بحاجبه  انتي وين شايفته
تلبكت كالت اا

سنا : هاا  مو يجي ياخذها ويرجعها للمدرسه ووشايفته

سكتت واباوع بعين اختي الحقد والغيره والنار حاولت اغير موضوع بس صفنتها خوفتني شبيها ليش هلكد تأثرت

مرت ايام ونور تروح وتجي وي رضوى وابد متحاجيني  لحد مافد يوم رضوى تأخرت جوه بالمدرسه ونور طلعت شافت السياره فارغه بقت واكفه تباوع للمدرسه تنتظر رضوى يله تصعد دكيت هورن التفتت اشرتلها بحاحبي اصعدي دارت وجهه عالمدرسه نزلت الجامه صحت

.. نوررر

التفتت عاكده حاجبها اشرت تعاي صعدي التفت عالمدرسه وتقدمت وعيونها عالمدرسه صعدت وسدت الباب بهدوء ساكته

ايسر :  وعليكم السلام ورحمه الله وبركاته

نور ...
نصيت راسي العب بسحاب جنطتي اللي بحظني ماريد اخلي عيني بعينه كال

ايسر : شو باعيلي
بقيت على وضعي ماشلت عيني

ايسر : نوور شوو باعيني
رفعت راسها بهدوء وعيونها صارت بعيني رجفة سرت بجسمي هلكد مشتاق لعينها وبرائتها بين بعيوني التاثير ونفسي تخربط بقيت اباوعلها بالمرايه ترفع عينها وتنزلها وترجع  ترفعها متدري شدتسوي بيه متعرف كلبي شديصير بي خدودها حومرت خجل واني دايخ بيها

ردت اسالها منو الاذاج شنو الصار كل الكلته

.. شونج

هزت راسها بخجل بله صوت
تنهدت بتعب
.. شو باعيلي
.. همم
.. منو ضربج ذاك اليوم

رجعت نصت وتلعب بسحاب الجنطه
.. نواره
رفعت راسها تبتسم لان دلعتها
ابتسمت لابتسامتها البريئه رجعت كررت السؤال
.. منو وياج ذاك اليوم منو ضربج

كالت مبرطمه
.. مرت ابويه
فكيت عيني
.. وابوج وين عنج
.. ميصدك بيه

دارت وجهه عالشباك مال سياره جتي رضوى صعدت وسكتنا بس كلسا ترفع عينها تباوعلي وصلتها وي رضوى للبيت وطلعت من اتذكر بياض عيونها اذبل كلي

مرت يومين ويوميه اوصلها وعيوني تحاوطها وتحاوطني عيونها

اخر يوم جان يوم خميس اخذت نستله وكتبت بيها رقمي خليتها بالسياره كلت انطيها الها لان باجر وعكبه ماشوفها

وفعلا بس صعدت قبل لتصعد رضوى شمرت ليوره بدون متحس علينا اختي اباوع عيونها تفاجات 

بعدها ضحكت حدما طلعت سنونها مشيت واباوعلها خربانه ضحك شكد فطيره يا الله

ذبيتهم ورحت لشغلي والتلفون بقيته بيدي هسه تخابر وهسه تخابر ماكو لليل ومخابرت ومر يومين ومخابرت واني الليل عليه صار شطوله وديت المسواك لبيت ابويه  مشفتها لحد يوم الاحد يوم دوامنا سنا اختي داومت ويايه كعدت الصبح وامي تدردم على ابويه وتوصي سنا لتحاجيهن لبسيهن خلي يولن ابوج باعنا اسمع واعصابي تلفت اريد اصيح عليها اكلها كافي مدا اكدر تاثرت بكلامها وحقدت من جديد ولو ابويه كدامي اكله

اخذت سنا وطلعت وصلت لبيت ابويه صعدت رضوى ونور مباوعت لنور ابدد ومعصب من رضوى اول مصعدت رزلتها

.. شنو هالريحه متستحين المن مخليتها حتى الشباب تباوعلج زين هي هاي تربايه امج من طاح حظ هالتربيه الزفره

بقت رضوى صافنه كالت
.. نزلني هنا ارجع للبيت

.. انجبببي واكعدي فاهمممه اذا امج معرفت تربيج اني اربييج

.. انت معليك مني عدي ام واب يربوني انت ربي اختك

سنا : شنو قصدج لج اني ممتربايه ام البناطير انتي واختج ام الولد

- انجبي اقلها اختي وي خطيبها ومحترمه روحها

ايسر :  بسسس ادبسزز صدك تربيتج ناقصه

باوعت لنور فاكه عينها صافنه تباوع لرضوى وتباوع لسنا وترجع تباوعلي
باوعتلها بغضب نصت راسها مرتبكه
وصلتهم المدرسه نزلوا وطلعت اعصابي فايره
ساعه واتصلت عليه المديره تعال للمدرسه ورحت واتفاجا بسنا وسلوى ورضوى بغرفة الاداره
طبيت بنص هدومي

.. تفضلي ست خوماكو شي
.. انت اخوهم

.. اي نعم اخو رضوى وسنا
سلوى : مو اخويه اني خطيبي هسه راح يجي

.. السلام عليكم

سلوى : هذا خطيبي ست اني ماعدي علاقات مثل متكول سنا اني مخطوبه

باوعت لسنا اكلت الولد بعيونها تقدم الولد جان لابس لبس عسكري ومرتب ومهيوب تقدم عليها كال
.. عفوا منج ست اني ابن عمها وولي امرها وخطيبها شنو الصار

المديره : عيني صاير مناوشات كلام بين البنات ماعرف امها متزوجه ابو الطالبه سنا وسنا متجاوزه عليه وصاير ضرب ادري شنو مدرسه لو سيرك عيب ماما

سنا : هي البدت
سلوى : اني كلشي محجيت والبنات يشهدون اني دااحجي للبنات عن خطوبتي وهي ضلت تتهجم تكولي من واحد لواحد مثل والدتج وهسه انخطبتي حظ ال--
حجايه اخجل اكولها

ايسر...
خشيت بهدومي باوعت لسنا بغضب الولد ابن عمها صار عصبي والتفت عليه نتر كال
.. كول لوالدك عدنا كعده زلم هالحجي مينسكت عليه اعتذر ست منج يله سلوى  امشي ويايه

سلوى : عفيه ظافر عدي امتحان والله
جاوب بغضب

.. يتاااجل اشوف حل للمهزله هاي يله ترجعين تداومين وين مدرساتج اللي عدج امتحان بدرسهم اني احاجيهم امشي كدامي
.. اوك

خجلت من الموقف ونزلت راسي راسي سنا كالت

.. كذابه والله تكذب
ايسر : بسسس حسج ميطلع
سكتت ودموعها نزلت رضوى كالت

.. ست مو كتلج انقل مقبلتي كتيلي نهايه سنه ميصير
المديرة : ماما ماكو مدرسه تقبلج بهالوكتت حلو مشاكلكم بالبيت عيب انتو خوات ضحكتو عليكم العالم
سنا : مو اختي هاي مو اختي

عافت الاداره وطلعت ترخصت من المديره وطلعت ارجف رجعت للبيت واخذتها ويايه اول مطبيت ضربتها راشدي وامي تصيح وتعيط عوفها وتدعي على ابويه وعلى بنته وعليه اتصل بيه والدي عصبي  يكول شيخ العشيره مال سلوى طالب كعده واني تخبلت اريد احجي تلجم حلكي صاح

.. تعالي للبيت دااتفاهم وياك
رحت للبيت وبده الموضوع واجه قيصر هم ترزلنا ذيج الرزاله انه ملازمين اختنا وصارو اصحاب حق

وانفتح الجادر  بعد يومين وصار فصل جبير واخذو بنتهم عدهم وابويه  گلب الدنيا على سنا رزلها وكلها ماريدج بعد

طلع حجي مخازي  بنص الجادر طلعت اختي ماخذه رقمه ومحاجيته تتوددله ومحاوله تسقط من سلوى  كدامه باثباتات واهيه

ولان هو بالشرطه طلع رقمها وباسم منو ردت انجلط بيومها نزلت راسي وراس قيصر وراس ابويه

تفاهم ابويه بطيب خاطر ورجع ويانا لللبيت حيل خايف حيل شراح يسوي بيها جنت ناطي العذر اول موصل جر حزامه واني تعاركت وياه وسنا طبت تركض خايفه كسر  الباب عليها موتها كتل

جرينا اني وقيصر وحلف اذا داومت بعد يتبره منها ومن عدنا ويحرمنا من الورث وبطلها لسنا
وتخبلت اني واحنا مكدرت ندافع بعد بس حجايه ام رضوى كافييه

( بناتي متربايات روح ربي اختك )
وكانما تدري بكلشي تعرف بحجي اختي وي الولد وسامعه التسجيل كانما كانت تلمح بالكلام  الكالته سنا

الولد ظافر اخذنا اني ووالدي وقيصر وشيخ عشيرتهم على صفحه سمعنا التسجيل كامل بوكت الجنت انكر كلام سلوى ضدها واتهاماتها وسمعني كلشي كال

.. اني اخذتك على صفحه حتى متنفضح البنيه بس اختكم لزموها لان حتى لاخويه طبت تحاجي وتسقط بسمعتها تره اذا سكتنا هالمره  بالحسنى مره لخ رصاصه براسه متبرد كلبي ولا يوكفني ابوك ولا امها

كان كلامه مثل الرصاص باذني اسمعه جمد كل قطره دم بجسمي كرهت سنا حيل وكرهت مرت ابويه اكثر لان طلعت تربايتها الشريفه تاذينا حيل ذيج الفتره ايام اني بيها مانام حدما تمرضت ومحد عرف علتي اسبوعين  بالفراش وكع جسمي كله

وامي حارت بيه انام واكعد ابويه يم راسي وامي وقيصر نوبات اسبوعين شوي فكيت لزمت التلفون اكلب بي لكيت ٤١ مكالمه لم يرد عليها رقم غريب فتحت الرسايل شفت الرقم جايه  منه رساله

.. الو اني نور
كلبي دك رغم تعبه تمددت ودك تلفوني باوعت نفس الرقم رديت

..الو
بقت ساكته

.. الو الو
متحجي بس صوت النفس وصوت بجي
همست بتعب
.. نور
.. اي
وبجت

.. ليش تبجين
.. خفت عليك شون صرت

.. زين الحمد لله احسن شوي اليوم شونج انتي
.. زينه اني بس ضل بالي
.. منو ديوديكم ويجيبكم

.. اني ورضوى نروح ونجي بخط عمو خلاه

.. منو الولد شسمه
.. محمد
.. محمد عده وحمه بخده سوده
.. اي اي
.. ها صانع عدنا خوش ولد جريت نفس اي ليش خابرتي
.. مو مو شسمه خفت عليك
.. ليش

غمضت عيني وتغطيت
.. ليش خفتي عليه نور
.. مادري كالو مريض كلش
.. هسه ليش البجي ياعيني
.. سكتت  زين انت شوكت تجي علينا
.. تردين اجي عليكم

.. امم
.. كافي نور لتبجين بعد بس
.. اوك
.. تردين اجي عليكم
.. اي
.. ليش
.. حتى اشوفك تمشي مابيك شي
.. ها ههه اي نور وليش مخابرتي من طيتج الرقم

.. استحيت وخفت
.. شكد قاسيه عليه الا اتمرض يله تخابرين
.. لاعفيه صير زين

.. اندعيلي
.. اي حندعيلك

.. نواره
.. نعم
.. انتي شكد حلوه

.. هه شكرا لان عجبتك

.. نور ؟
.. نعم
.. بعدج بيت خالتج
.. اي بعد ماريد اروح لبيتنا
.. ابوج اجاج؟
.. لا خابرني كتله مرتاحه هنا ودزلي مصرف
.. همم اني راح اجي لبيت خالتج عود صبيلي جاي
.. تدلل

.. نور؟
.. نعم
.. تنهدت .. هيج نور روحي
.. زين دير بالك على روحك والبس زين
.

. هههه اوك عيني انتي
.. باي
.. باي

ايسر....
كمت لزمتني دوخه لزمت راسي ركزت ومشيت طب قيصر
قيصر : هااا حمد الله عسلامه
ايسر : بس ناوشلي المنشفه داسبح
قيصر : اي روح كتلتنا ريحتك بس بقي الحمام مفتوح
- ليش يابه
- خاف يعجبني اتفرج ولك هو انت قرد مهزوم من حديقه الحيوانات غير خاف تتخربط
- لا مبيه شي

طبيت غسلت وطلعت لبست وتعطرت اباوع لروحي وجهي اصفر طلعت امي كالت
.. ها ماما شون تحس نفسك حبيبي
.. زين اني ليضل بالج
.. خوش وين رايح
.. اا لشغلي اختنكت
.. اي زين بس  دير بالك ماما
.. ديله فيماللا

طلعت من بيتنا رحت بالسياره لبيت ابويه وكفت بالباب شعدي جاي لهنا
عيون مرت ابويه ماريد اشوفها  واقره بيها اختك ممتربايه بيك خير ربي اختك مالك دخل ببناتي

استداريت ورديت رجعت للبيت وانفتح موضوع سنا امي كالت
.. ماما هاي باجر تداوم
.. يمه لخاطر الله سدي الموضوع لا اهج من البيت
.. يمه لتسوي هيج احجي وي ابوك ليتدخل بحياتنا
.. يمه ممتدخل هو اختي التدكرت
.. حقها تنام وتكعد تبجي تكول اخذو ابويه مني هي ششافت منه ماما وذيج عالحاضر اخذته اختك محرومه حنان

سكتت انعصر گلبي والكعده مال زلم بالجادر تجوي ب گلبي  تحسرت باوعت لامي

۔۔ هسه شتردين
۔۔ ترجع اختك تداوم بغير مدرسه انقلها
۔۔ خوش

عفتهم وطلعت للسوبر ماركت طبعا كومه شغلات متعطله كومه كعدت ارتب واسوي حساب للفجر يله رجعت  طبيت للبيت تلفوني كنك دازه رساله نور
حضرتلك جاي وانت مجيت

مجاوبتها لعبت نفسي سويت بلوك الها ونمت والصبح دك تلفوني ابويه
۔۔ ها بابا
۔۔ ها ايسر شون صرت
۔۔ زين الحمد لله احسن يابه دز محمد للسوبر ماركت ديودي الغراض لبو المطعم خابرني البارحه بليل
مو ديودي اختك
۔۔ ااني امر عليها داودي سنا اخذ اوراقها انقلها
۔۔ صاح ابويه شنووو تكسر حجايتي
۔۔ يابه اذا طلع منها شي بعد نبطلها هاي من الحقد تررره من الحقد
كمت اصيح فاقد
۔۔ كله من وراك اختي انحرمت منك لا عرفت تعوضها لا قربتها الك وتريد تجيك كل اسبوع تشوف طعاجيتك  للمحروسه  كدامها شتريد شتصيير بنيه مراهقه

سكت ابويه جر نفس كال بهدوء
۔۔ انقلها
۔۔ اي هو شداكولك لعد هسه جاي عالبنات خلي يتحضرون

كمت بدلت باوعت بالمرايه مدري ليش اشوف روحي بعيون نور شحتكول عليه حعجبها لو لا

طلعت اني وسنا رغم كلامي وياها ثكيل بس ماريد ااذيها اكثر

طبكت بالباب شفت سياره ابن عم سلوى  واكفه والولد نازل ديفتح الباب الثانيه وبيده ورده بلبسه العسكري باوعت بعيون  سنا تشخصت عليهم   بقيت اباوعلها تباوع بحسره نترت

.. سنااا
التفتت ونصت راسها طلعت رضوى ونور
نور جانت تبتسم بحيويه وشايله جنطتها صعدت كالت
.. صباح الخير

جتني الضحكه وضميتها رضوى كعدت بصفها باوعتلي بقلق كالت
.. شون صرت
.. هزيت راسي ساكت
.. بعدك مريض
.. لا احسن

طلعت وعيون نور عليه بالمرايه واني مغلس ماباوعلها ماريد اطبب روحي بشي اني مو كادر عليه نور متفيدني اسمها بت اخت مرت ابويه وامي  لو تموت متتقبلها ولااني اصلا سفور وابوها مو مهتم كلش يعني تربايه بيتين 

وصلت للمدرسه ونزلو التفتت نور ابتسمتلي درت وجهي عنها طبت والتفتت مره لخ عكدت حاحبها مستغربه تصرفي

مهتميت طلعت لشغلي وخابر قيصر

.. الو
.. ها قيصر
.. اكولك ااني طالع للنجف
.. شعدك ياستار
.. اازور وازور ويايه الولد الضربته
.. هاه عشره ماشاء الله
.. عوفني مرتاح ايسر المهم ليضل بالك اذا تاخرت
.. ماشي زين باوع شوف

.. ها يمعود
.. شايل فلوس
.. اي عدي ليضل بالك
.. انت وياه وحدكم
.. لا وياه اخته وخالهم
.. خوش الله وياك
.
.

قيصر...
علي صادقته وحسيته قريب مني احساس التانيب بالضمير خف وارتاحيت وياه حيل صح اصغر مني بس حباب وبسيط گلبه ابيض وفوك هذا كله فرحان بصداقتي

كمت كل يوم العصر امرله بس ادك الباب يصيح
تعال مفتوحه واخته ماشوفها ابد متدخل علينا اضل اسولف وياه اضحكه نوبات  اجيب مسواك ويايه صار قريب مني كلشي يحجيلي حجالي عن عيشتهم وحياتهم

..  والدي توفى قبل سنتين وقبله والدتي  صعد ضغطها وتوفت وبقينا احنا اني واختي
اختي الحمد لله تعينت وصارت تصرف عالبيت
واني جنت عامل وادرس هم كضيناها سوه بالحلوه والمره تخاف عليه هواي  
واني اموت خوف عليها لدرجه للسوك ماخليها تروح وشتريد تخابرني واني اوصلها لدوامها واروح لدوامي

قيصر :  الله يخليك الها

علي : تتوقع اكوم على حيلي اكدر امشي بعد
.. يابه الدكتور كال بس يلتزم  نبدي تمارين شبيك مأيس
.. اختنكت اريد ازور اهلي
.. تريد اخذك للنجف
.. لا يابه تتورط بيه
.. علي اوديك واجيبك تزور ترتاح هاه
.. لا قيصر والله دتخجلني
.. يول صرنا صدقان لتسوي هيج
.. خل اكول لاختي
.. اذا تريد خل تجي وي خالك ويانا
.. هاه يله خل احاجيها بليل اردلك خبر
.. اكولك علي منو يسبحك

.. خالي من يجي
.. ولك ليش ماسبحك اني  شنو تخجل
.. هو اني من خالي اخجل  ماخلي ينزع كل هدومي
.. هههههه لا هالمره  اني اسبحك كاعدلك ماعدي شي
.. لا قيصر والله ماريد اثكل عليك
.. اهووووو هو انت ريشه ابن الحلال اختك شوكت تروح للدوام
.. هو الصبح لل٢ ترجع
.. كلش زين باجر  ب١١ امرلك نتريك سوه
.. خوش هله بيك   انتظرك
.. اي ماشي يله فيماللا

وكفت صحت يا الله مرتين انداريت على علي كتله احس روحي بمسلسل باب الحارة

وطلعت ركض جنت مرتاح بالداسوي بس خايف منها هواي خايف محملتني ذنب السنه الراحت وخايف مشيته متصير عدله بعد واموت بدمي

ثاني يوم الصبح رحتله عالاتفاق صحت من الباب
.. علاوي
.. تعال تعال طب
.. ها ماكو  احد وضل  البيت لم طيره وطارت بي فرد طيره

كمت اكمز واصفك هو متمدد خرب ضحك  فركت ايد بايد سريع
.. يله عيني نسبح لو نتريك
.. لالااسبح اول
.. خوش يله يحلوه يله حستفرد بيك اشوفك طيور اللي بالسطح
.. هههههاي خرب ببليسك والله لو اختي هنا تشك بيك هي منا حابتك

كالها وسكت واني غلست طببته للحمام  بالكرسي المتحرك وشلته عالطابوريه كعدته جان الحمام نضيف ومابي هدمه وحده جنت  منحرج لااحرجه واشوف شي يخص عرضه بس الحمد لله  عدت سلامات

نزعته وبديت ادير المي عليه جتف جسمه
.. شبيك يول خجلان مني انزع
.. لالا عوف الداخلي
.. هاي شنو ولك العدك عدي تريد انزع كدامك ههههه
.. طاح حظك ولك عييب

.. اوي عيني سندس عيب
غسلت شعره بالشامبو واضحك واصنف تيشرتي  تبلل صوتي عالي واصيح وضحكنا عالي نزعت تيشرتي علكته بالحمام منكع نشفت لعلي وشمرت الخاولي عليه صارلي اربع سنين العب حديد جسمي معضل وكعدت اتباهه كدامه كال

.. بس اطيب اسجل  حديد
.. باذن الله ووياك اروح واجي اضحك عليك
.. الله يسهل

لبس وطلعته كعدته بالكرسي المتحرك دااطلع واني بله تيشرت بطرك البنطرون وانصدم باخته بالحجاب والجبه فكت عينها كلها  مصدومه والنوب اني ملابس تيشرت بيدي سترت جسمي بايدي خجلان ومنحرج باوعت لعلي كالت بصوت ناصي ونزلت عينها عني

.. شنو سبحت
علي : انتي شجابج من وكت

باوعتلي بعصبيه رجعت للحمام جريت تيشرتي ولبسته ورجعت علي  لمكانه شلته وخليته بقراشه كمل لبس وبقيت اسولف وياه  وكفت باوعتله

.. عيني الحكومه جتك خل اروح تروح تخليلي سم بالجاي اروح اتريك عد امي احسن
علي : ههههه لا الله عليك ضل تريك وياي
.. ياب دروووح عيني حضر روحك ب١ نطلع
.. ماشي شكرا قيصر
.. هله بعلاوي الورد

طلعت صحت يا الله طلعت بلبس الحجاب وكفت اشرتلي بهدوء تعال عرفتها متريد علي يسمع
.. انت شتريد مننه
بلعت ريك صافن على حسنها من تعصب تصير احلى نصيت راسي ساكت
.. مكفاك السويته بي روح منريد شفقه من احد ابتعد عننه علي ديتاثر بيك ماريد يتعلم منك شغلات متفيده

.. اني كل الداسوي مو شفقه واذا شايفه بيه  شي غلط علمي اخوج ليتعلمها مني  وللعلم كل اللي احجي وياه بي احاول ماالوث تفكيره خاف متدرين داكولج نترت بيها بعصبيه فكت عينها كلها كالت

.. هسه تخابره تكوله ماروح للنجف كافي ابتعد
.. ومنو يجبرني
.. اني الدااكولك ابتتتعد علي مو مثلك ولا انت المثلنا احنا ناس بسيطين
.. اني بيوم اللي هو يكولي اتركني اتركه اترخص
.. ماريد تاخذه للنجف
.. مااتوقع الولد صغير وتمشين كلمتج عليه اذا ميريد خلي يخابر يكولي ماروح وخلص كافي تخربطين بالحجي تره هواي دستي بالبطن فيماللا خزرتها ضلت ترمش وعيونها مدمعه عصبيه عفتها وطلعت اعصابي منهاره

رجعت للبيت ساعه بدلت ورجعتلهم لكيته مبدل للروحه بالكرسي المتحرك بالحديقه الصغيره مالتهم

.. ها يابه الله يساعدك
.. هلا بقيصر كلت بطل والله
.. لا يابه شنو نسوان كدامك كال
.. لاالعفو خالي اجه وراح عده شغل بس اني واختي نروح

.. هاهي يله نتوكل تره تاخرنا
.. اي اي يله حور

صفنت بالكع ..  حور..  حور واسمها عليها طلعت بهدوء وبيدها جنطه صغيره وبطل مي جبير مجرش باوعتلي ونصت راسها وجهه ينشر غضب

درت وجهي علي كال
.. قفلتي
.. اي كالتها ونصت راسها

طلعت كدامها وعلي ادفع بكرسيه المتحرك واسولف وياه
.. لك علي غير رحت لكيت السبلت  معطب وتلحكناله جان وج البيت

.. لا بربك الله ستر
.. اي والله الحمد لله
.. تالي اهلك هسه بله كهرباء
.. لا سويناها غير جان فضحوني فضيحه همه ذوله يكدرون بله كهرباء اول ما النت ميكدرون بلاه
.. هههه صار العصب المعيشي الكهرباء والنت
.. اي والله

وصلت للسياره فتحت باب الصدر شلته من الكرسي وكعدته ليكدام

.. رحمه الله والديك
.. ووالديك.
اخذت الكرسي خليته بالصندوك سديته صارت عيون اخته بعيوني ملتفته من الجامه الخلفيه باوعتلي ودارت وجهه كارهتني كره العمه صعدت وطلعنا باوعت لعلي

.. شتريد اسمعك لزمت السيدي
.. كيفك قران باسم كربلائي
.. خوش هاك التلفون بيدك وطلع عالنت

طلعت طريق الخارجي فارغ دستلها شوي وعيوني صارت بعينها بالمرايه عكدت حاجبي اباوع الحاجب سبحان الله شون مرفوع عبالك بسمار مدكوك التقت عيوننا نصيت راساً سمعتها جرت نفس بعصبيه

يبو هسه عبالها دابصبص بقيت اباوع لطريقي شوي زيدت سرعه تقربت من جتف علي من وره الكرسي وهو رجع اذنه يسمعها شكد حبيت ثكلها باوعلي علي كال بهدوء

.. على كيفك ليش مستعجل
.. ها ليش داامشي سريع ههه ممنتبه
.. لا مو صار بيها خوفه كالها  همس وضحك

.. جاوبته تعقدت من ورايه ههه احجي بهدوء واباوعلها بالمرايه مسمعت بس عاكده حاحبها تريد تفهم الحديث. شوي وكامت تبحوش بجنطتها طلعت معجنات نطت لعلي حافضه باوعت بيده ديفتح العلبه كال
تفوتك

باوعت شكلها يشهي
.. ولك هاي تبجيلها على جاي اوكف خل بالسيطره بلكن نشوف يبيعون جاي مشينا وكفنا بالسيطره واخذت ٣ وخففت مشيتي طلعنا اكل واشرب داسولف لعلي على الماركت واخويه ايسر

.. هو يجيب عمال ويشتغل بمكانهم لعد ذوله المن جايبهم يفترون وميسوون شي يكولي ميعرفون يشتغلون دهريه لعد المن موظفهم تنطيهم راتب عاد من سمعوني كامو يتلاطمون كلمن مشه عدل

علي : اخوك حباب مو قاسي  عليهم
قيصر : يابه اذا ضل هيج كلها توكع براسه وذوله يستفلكون الوضع يستسهلوها على هو يسويها والله غيره واحد ابو ابو الاسواق بس كاعد عالحساب تدري هو يفتر عالقوائم يشوف النقص هو يحاسب نوبات هو يطلع يتعامل وي اهل الكيه الحمل بس النهار كله يصيح ويجيب ويودي مو يتعب يطلعها بعصبيه

.. اي صح اني والله استاذي جان بالورشه شاك حلكي مره من المرات تمرضت بطني توجعني رجعت للبيت ساعه وطابت كلت اروح ليش اضيع اليوم بلاش ويروح راتبي مو جان راتبي يومي صدك اروح يكولي ضل لل٢ بليل يله تروح يله ينحسبلك راتب يوم كامل واني بس ساعه عبرت تالي رجعت وراح شغل نص يوم عليه بلاش وين اضل لل٢ واختي وحدها بالبيت

- عمي ذوله قفاصه رحمه ماكو بكلوبهم متشوف الله كالبها بينا
- شسويله شغلتك عد الجلب حشاك  سمي عمو

- ههههه صح خرب ببليسك علاوي وهاي طبينا ارض السلام وين مقبره اهلك التفت على اخته
- حور بعد ليكدام لو هنا
حور : بعد شوي امشي

مشيت رفعت عيني بعينها جانت تدور بلهفه على مقبره اهلها فجاه كالت
- هاي هاي هنا اوكف
قيصر : اي صار وكفت نزلت راساً نزلت الكرسي المتحرك وشلت علي خليته بي جان منحرج كلما اشيله واني ابتسمله

مقبرتهم عالشارع بالضبط وكفنا جبت مي ورد ورجعتلهم خطيه شفتهم ميتين بجي كلبي انعصر تركتهم وخليت البطل يمهم ابتعدت عنهم واباوع عليهم خلت ايدها عالقبر ضمت وجهه وجسمها ينهز من البجي معرفت شسوي واخفف علي اللي صوته عله شوي وتقربت خليت ايدي على جتافه التفت مسح عيونه كال

.. مو بيدي قيصر من عافونا اختفت ملامح الدنيا

.. الله يساعدكم شفتها دارت مي الورد باوعتلي ونزلت راسها عيونها من بجت صارت حمره اختنكت حيل. رجعو صعدو صفيت السياره بالكراج وطلعنا للامام اسمع همسات علي

يا رب بحق هذا الضريح والمقام شافيني وخليني اوكف على رجلي من جديد تكطعت ابتعدت عنه روحي فرفحت كملت زياره وياه وطلعنا بالحرم  ننتظر اخته شوي وجتي تعدل بعبايتها النثر جانت  جنها شمس تلمع ووجهه يضوي بقيت اباوعلها مضيق عيوني وصلت يمنا نصت راسها علي كال

.. رحمه. الله والديك قيصر صار سنه مزايرين سنه مو حور
حور : اي العام هيج وكت اجينا
قيصر : الي الاجر ههه بلكن الله يهدي ابويه عليه ويخليني اشتري غير سياره خهههههه

باوعتلها باوعتلي بغضب ودارت وجهه سكتت علي كال

علي : والله تستاهل
قيصر : يله نتغده متت جوع
علي : يله براحتك طبينا مطعم جان ببالي اعزمهم كعدنا عالميز طلبو اليردو  وتفاجأت من اكمل اكل واكوم الحساب مندفع منها تخبلت عقل مضل براسي تصرف عليه ششايفه روحها طلعنا بقيت مغلس مشيتها بمزاجي صعدنا بالسياره بقينا نسولف اني وعلي وصلنا بغداد طيته الحساب كامل

.. هاي شنو قيصر
.. الحساب مال مطعم وفهمها اني مو مره دتصرف عليه شوي خل تحترم تره اني مو متقصد من ضربتك
.. هاي شبيك كول يا الله

.. اسالها كلما اجيتك سمعتني حجايه بكد راسي
.. ميهم لتزعل هاي شنو صدك تحجي عمي جيبها اخذهن ورحمله والديك  عالزياره الترد الروح والله روحي ردت

ابتسمتله جريت نفس
.. علي لو شماسوي اطلع مقصر باوع لروحك شصار بيك من ورايه

.. بس ربحت صديق يوم الجان ماعدي ولا واحد قيصر صارلي شهرين تعلقت بيك خاف اطيب وتعوفني

.. لا والله اني هم  اتونس من اجيك
كمت نزلته ودفعته بالعربانه اخته مباوعت لشكولها بعد ترخصت وطلعت

يومين ممارلهم عدي شغل الاجارات ومريت الجمعه جانت موجوده وهي فتحت الباب جنت داير ظهري كالت
.. تفضل ينتظرك علي

طبيت ماباوع بوجهه شوي وجابت الجاي والكعك بيدها وطلعت
بده تمرين علي جبناله كابتن للبيت وبدت المعاناة يصيح من يبدي يتدرب يفرفح والله روحي تطلع  عبالك اني الي دا اتاذه لدرجه اول يوم بجه وبجيت  وياه كمت اصيح

.. من الله ياخذني نتر بيه
.. لتكووول هيج اسكت امي جانت تدعي على روحها تالي راحت من صدك اسكت سد حلكك مصدك مجذب صار عدي صديق

سكتت واباوع بعينه انسان  صافي من صدك ماعده خباثه ومصلحه ويايه  يوم وره يوم التدريب يصعب بس تعلم يكتم الالم مره متحملت طلعت من الغرفه احس صعد الضغط لراسي  طببت راسي جوه المغسله المي بارد ردت بس اهدا نشفت سمعت صوت صياحه زاد وصوت بجي ودعاء بالغرفه اللخ

يردد

.. ربي دخيل حبيبك خفف عننه ربي شيل من المه وانطينيا الي بس خلي يطيب

قشعر جسمي اختنكت حسيتها تقربت من الباب انفتحت الباب  واباوعلها تعدل بالحجاب عيونها ووجه احمر وتفرك بيدها بقلق و شافتني باوعتلي بغضب نترت

.. كلله من وراك الديصير بي والنوب مجلب بي روح عوفه

فركت  وجهي  رجعت شعري ليوره  دافوت للهول كالت
داحاجيييك تقربت دفعتني من ضهري بقيت صافن عليها شبيها تخبلت بقت تدفع
.. دووخري شبيج

.. اطلع رووح اطلع من حياتنا من الله لاوفقك

.. رحمه الله والديج بس طيني مجال افوتله
.. داكوولكك رووووح

دفعتني قوي لبره البيت وسدت الباب صعدت السياره وطلعت حقها بالتسوي دتسمع اخوها يتالم اني ردت اموت الله يساعدهم نطيتها العذر بس ضل  بالي يم علي.

يومين ما مرلهم كلت الا هو يخابر ومخابر بالي بقى يمه ويمها هي لان جانت منهاره  دزيت المسواك وفلوس وياه بيد صانع عدنا بالماركت ورجع كال مقبلت تاخذه المره لزمت التلفون خابرت على علي مرد

رجعت دكيت مره مرتين ماكو رد صرت اعصاب وايسر انتبه تقرب مني كال

.. عوفهم لتضغط عليهم
.. ايسر بيوم وليله ينكلب الولد طب بكلبي تعلقت بي عبالك اخويه الصغير

.. ميخالف خلي براحته مرحله صعبه مرحله التدريب موذيه حيل
.. اي موردت اني اضل وياه ولك شسوي بعد
.. ياببببه عووفهممم خرب ببليسك شكد تلح

سكتت وعفتهم  والتفتت لشغلي كمت الهي روحي بأي شي  وفجأة الضهر داارجع للبيت شفتها واكفه عالشارع عبالك  تنتظر سياره

ضهريه والدنيا شتا ماكو احد بالشارع وكفت سيارتي يمها فتحت البنيد ونزلت راسي جوه البنيد باوعتلي ودارت وجهها وانكلبت خلقتها ضايجه من شوفتي

.
.
.

.
.
.
يتبع

.
.
.
.
هذا 👇🏻👇🏻 يشبه منو ؟؟

خلي نشوف توقعاتكم 🙂🙂

.
.
.
اجه