رواية اغلال القدر الفصل الحادي والثلاثون 31 - بقلم الكاتبة ديانا

سلام وردات ........ضروري تقرون كلشي كتبته من الملاحظة الى اخر كلمة بالبارت 👇🏼👇🏼👇🏼👇🏼👇🏼
الحمدلله شوية تحسنت فكدرت اكتب شوية من البارت الاخير الي قسمته قسمين او حيصيرون ٣ لان تدرون احداث و ابطال هواية ....
هذا البارت الاخير القسم الاول وباجر انزل القسم الثاني💐💐انتظر تعليقاتكم و ارائكم و عفية الله يخليكم لازم تتفهمون هي صح طولت بس ما خليتكم تشعرون بالملل ابد قصة مشوقة و احداثها واقعية و بيها اكثر من قصة ... لذلك لا دكولون طولتييها و ملينه و من هالسوالف لان القصة مابيها ملل ابد و اذا طولت فعادي لو دنتابع مسلسل هم ميخلص بيوم و لا يومين و اني كلت هاي مو قصة هاي روااااااية 👍🏻👍🏻👍🏻

اشكر متابعتكم و اعتذر لان البارحة جنت مريضة جدا و منزلت و رغم المرض  لكن  اليوم كتبت و ما اختصرت لا ... لان كتلكم البارت الاخير مقسم الى ٣ او ٢ اقسام هذا القسم الاول من البارت الاخير 👇🏼👇🏼👇🏼👇🏼👇🏼👇🏼لا تنسون التعليقات الحلوة و التصويت يا احلى متابعين

الجزء الاول من البارت الاخير

#اغلال_القدر
بقلمي الكاتبة ديانا
لا احلل النقل ابدا

ليث..: عفاف شلون اكلها ...
عفاف ..: كلها لازم تعرف و بعدين لازم توديها تشوف اخوها كلشي يصير ... خاف يصير على الولد شي بعدين تتندم ما شافته ...
ليث ...: الله لا يكولها ... اكيد شمم رح تتاذة .. اني فرحان لان قبلت تراجع طبيب العيون و الطبيب النفسي ...
عفاف ..: ليث انت بأسلوبك فهمها و گلها و اخذها و روح لبغداد و اني و جوري هنا ...
ليث ..: اي لازم لان علاء گلي وضعية يزن كلش حرجة ...
الله يعافيه ...

  شمم ...
صارلي يومين من تزوجت ... ممصدكة اني خطيت هالخطوة و تعديت مرحلة مهمة من حياتي و صعبة ... احس نفسي انولدت من جديد ... احس شي جبير و انزاح عن كاهلي ... ليث انسان حنين و صبور و متفهم ...
قنعني اروح دكتور نفسي حتى اكدر اتغلب ع مخاوفي و و دكتور عيون حتى ارجع بصري و اعيش طبيعية ..حتى ارجع بصري و اعيش طبيعية ...
شمم ..: ليث انت هنا ..؟
ليث ..: اي حبيبتي اني هنا شلون عرفتي ...
شمم .:: عطرك هو الي نبهني ...

ليث ..: اتقربت منها و حاوطت خصرها بيدي و بستها من جبينها ... كتلها يعني مو گلبج حس ...
ابتسمت و كالت ...اممم يمكن ...
كتلها يمكن لو اكيد .... انت ليهسة ما كتيلي شنو مشاعرج اتجاه ليث ...؟
كتلها و ليث اعترفلج ... و كال شمة هي نبضة بين الضلوع ... شمة النفس اليصعد و الينزل ...
ضحكت كالت ما رح افصح عن مشاعري و مكنوناتي هسة .. خليها هي مولودة بالجديد ... اريد اتاكد من حجمها و اني اسولفلك بيها ...
كتلها فديت الخجل الي بعيونج و بست ايديها ...
كالت مو عدنه موعد وية الطبيب ... كتلها اي بس قبل هالشي حاب اسولفلج بموضوع و اريدج متتسرعين بردة فعلج ...
رجفت اطرافها و كالت..: شنو ليث يا ساتر صاير شي ...
كتلها شمة ... يزن بالمستشفى ببغداد  ... و علاء كال لازم تجين لان اخوج حالته صعبة ...
تغيرت ملامحها و صارت حادة اكثر ... زمت شفتها وكالت ... هسة عرف شمم . الله يخليك ليث سد الموضوع و يزن هاي مو اول مرة يوكع و ينام مستشفى ... كل مرة هيج . و يطلع من المستشفى ورة يومين ...
اروح ابدل حتى نروح للطبيب .. اني متحمسةاريد يرجعلي نظرلي تعبت من الظلام ..
بستها من راسها و كتلها شمم لخاطري و لا تعاندين ...
الطبيب ملحوك عليه ...
دمعت عينها ... و كالت شوووف هو حتى ما شال تليفون و باركلي ع زواجي ... هسة يخابر و يريد منك تقنعني اروح لبغداد و الله شنو يزن مريض ... مو مية علة بية اشو محد ما اهتم و لا شال تليفون و سال ....
كتله يا عمري اني ما اكفي ،..؟ اني يمج و بروحي افديج شلج بالبقية .... اني ابوج و اني اخوج و اني زوجج و اني حبيبج ... ميكفيج ليث ....؟
جان تحضني و تبجي .... كالت الله عوضني بيك .... لا تعوفني الله يخليك اني بلياك اتوه ... اضيع ....
مسحت على راسها و بسته كتلها انت روحي ... اكو واحد يتخلى عن روحه ... انت نبضي ... اكو واحد يعيش بلا نبضه ... مسحي دموعج و طاوعيني و تعاي نروح لبغداد و هي يومين و نرجع اوعدج ....
كالت ميخالف بس هاي لخاطرك قبلت ... بستها من شفافها و طولت ببوستي و حضنتها حييييل ... كتلها يا بعد كل هلي و ناسي ربي لا يحرمني من طيبة قلبج و حضنج الدافي .... ياله هسة روحي تحضري حتى احجز للروحة .... كالت اي رايحة ..........

علي ....
امير اخذ سيارة اخو و طلعنه لبغداد ... زينب كتلها الحجي رجع بغداد و بالمستشفى هي كامت تبجي ... عصرني كلبي عليها و دموعها هزت كياني ... هنوب تبچي على رجال .... ااااااااخ لو بيدي اصرخ صرخة اگلب الدنيه بيها گلاب .... و الملم دموعها و اسكي گلبي العطشان منها ....
وصلنه للمستشفى و جان حجي مؤنس حالته مستقرة ... بس ممنوع الزيارة ...
كعدت زينب برة و بعينها الحزن ساعه تبجي و ساعه تسكت ... و كل دقيقة عيني تصد لعينها و تناجيها .... تسولفلها و توعدها ... بسج يا عين بطلي الدمع دام گلبي موجود ... انت الية النبض و بسكتة بفراكج  يصرخ اخ موجوع....
امير و اسيل جانوا بيت مؤنس راحوا يلملمون غراض زينب ... لان زينب مقبلت تروح تنتظر مؤنس يفتحون الزيارة و تدخله ...اني ما انكر النار البيه جبيرة ... بس متفهم خوفها و اصرارها لان هو رجل ساعدها و هي جانت بأمس الحاجة للمساعدة اني ممتن اله لان ساعدها و حواها ...
************************************

جواد ....،
صار يومين و ملاك بيت عمتها ... كل ثانية امر علية احسها ايام ... كم مرة تاخذني ايدي للتليفون و اريد ادك عليها .. بس اسمع صوتها و اطمئن ... بس اكول لا خليها ... لازم تكعد كم يوم تحكم عقلها و تشوف جواد يصلح الها لو لا ... و تحكم قلبها و. تشوف و تتاكد من احتياجها الي و نبضاته دكت ...حب لو نزوة ...
واني هم احتاج وقت حتى افهم مشاعري و افرزنها .. هي حب لو شفقة ... هي عشگ لو عطف .. ما اريد اغامر بگلبي و احساسه ...... و يخيب املي ... احتفظت بالاحساس الي انولد بالجديد لملاك و نبت باسمها ... و ردت اتاكد منها و بعدين افصح عنه .....
رحت لبيت عمي ابو رغد ... بس مكلتلهم ملاك يم عمتها .... عمي صحته شوية تحسنت ... كعدت يمه سولفت شوية و ذكرتله محاسن ملاك الجديدة منها كامت تصلي و تغيير بهواي عاداتها ... هو ما ابدى اي ردة فعل بس لاحظته عينه دمعت و كام ... نوهتله على جيتها لهنا ... هو ما نطاني اي جواب بهالخصوص ... تركته و ما ضغطت عليه ...
صاحتني ام رغد ... گلتلي شلونها ملاك .. كتلها الحمدلله زينه تسلم عليكم ... كالت جواد اني ادري بنتي بيت سماهر حماتي ... و اتصلت بيه من هناك و سألت على ابوها ... جواد اني ام .. و حاسة ببنتي ... بنتي محتاجتك فدوة لا تعوفها ... ملاك محتاجة رجل مثل بطيبتك و شخصيتك القوية توكف وياها ... بنتي هشة و خايفة عليها ليكون تنكسر من كثر الضغوطات ... كالت جواد ... ملاك هواية سولفتلي بيك ... و لامتني ما اتخذنه وياها نفس اجراءاتك و تحذيرك الها ... جواد ....
كامت تبجي و غطت وجهها ... كالت جواد الا اكولك بنتي تمنتك من نصيبها و تكون زوجها و هذا خوفك و اهتمامك يكون نابع من حب ... مو شفقة ... البارحة دكلي ماما تمنيت الموت و لا اشوف رفضه الي بعينه ...
اني انصدمت... كتلها ام رغد لا تبجين اني ما اعوفكم و انتو امانة عمي ابو رغد و عمي هسة مريض و اني يمكم ... كالت جواد ... رح اكولك شي ملاك ما صرحتلي احجي بي ... بس اني ام و اتمنى تتفهم حالتي ... ملاك تغيرت علمودك ... و ملاك مشاعرها صادقة نحوك ... بنتي تحبك و تتمنى تكمل وياك بس دكول ما اكدر افرض نفسي عليه ...لان ما عنده اي احساس الي غير العطف و الشفقة و الشهامة ...
اني انتبهت لگلبي زادت دگاته من ام رغد اعترفتلي بهالكلام ... .... ردت اروح و اقطع كل هالمسافه لبيت عمتها و اعترفلها و احتضنها بين ضلوعي ... اني اجهدني التفكير و اجهدني التعمق بمشاعري حتى افتهمه .... اني مصعب الامور و معقدها على گلبي ... يكفي جواد ... هالگلب شوكت يرتاح ..؟ شوكت ينسى و يفتح صفحة جديدة ...؟
احساسي و مشاعري لملاك التفت حوله نارررر الحب يمكن و زاد هالشعور ...
ام رغد كالت جواد انت شهم و خو خيتك ... كلشي ما اريد منك بس اريد تشوف ملاك اليوم انساها شلون جانت البارحة و انسى الي صار وياها ،، و ابدي وياها بداية جديدة و اني اضمنلك ملاك حتكون مثل ما انت رايد لان ملاك تغيرت من وراك و الك و الدليل كلامها البارحة وياية .... و صدق مشاعرها و دموعها عليك .... بنتي عنودية بس انت خليتها تسلك الصحيح شلون ما ادري ... اريدك تكون وياها العمر كله ..
شعوري صار امواج و كام يتلاطم گلبي زادت نبضاته نار بداخلي التفت حوله ... كتلها ام رغد محتاجة مني شي كالت اي اريدك تاخذني لبيت حماتي سماهر اليوم النيشان مالت بتها ....
كتلها تمام جهزي واني اخذج .. بس ام رغد اطلب منج طلب ... كالت كول ... كتلها لا دكولين لملاك اني جايبج ...
كالت ميخالف لعد ساعة و تعال اخذني كتلها تمام ...
رجعت للشقة .. و كشخت و كأنما طالع بموعد .. و طول ما ابدل اني راسم ابتسامة على ثغري ... باوعت على صورتي بالمراية و تذكرت حركات ملاك و ابتسامتها الجديدة و المستحة و الخجل بعينها ... اتشجعت اروح اكمل نيتي و اعترف لملاك و انهي هالخوف الي بداخلي و التردد ..
مريت على مرت ابو رغد و توجهنا للمحافظة الي بيها بت عمة ملاك ..
********************************

ملاك...:
اليوم نيشان بنت عمتي و مخبوصين بالتحضيرات ... شوية الاجواء نستني الحادثة و نستني دموع الليل الي مدتنشف... البارحة اعترف لامي بكلشي عن مشاعري لجواد و عن سبب تغيري ... لان جنت محتاجة اطلع الكابته بداخلي ... جواد هو حلم مفقود ... هو نسمة  ليلة صيفية قضيتها امام البحر ....
عطر هالنسمة لساه عالق برئاتي ... استنشقه بكل ثانية اشتاقله ....
گلبي مثل النار عليه بس بنفس الوكت عندي كرامة ... ولازم احافظ ع المتبقي منها ...
كافي ...تمزق ثوب الكبرياء العلية ممكن ابني حياتي الجديدة من غير رجل و اعتمد على نفسي و شهادتي مو قليلة .. جواد ذكرى حلوة حتكون ملازمتني دائماً ...
عمتي اشترتلي فستان و جان مو مناسب لان بي فتحات هواية و بلا ردان .. استغربت لذوقي الي ما حبه و ما هواه ... كتلها عمة عذريني ما رح البسه ما عجبني ... و طلعت البارحة بدلته و جبت واحد بردان طويلة و طويل و ياه حجاب تقريبا نفس الالوان و رغم الكعدة بس نسوان بس اني ما عجبني ..
المهم خابرتني ماما كالت جاي و تقريباً وصلت ... اني مشتاقتلها كلش ..
صعدت فوك اجيب موبايلي و جان سمعت صوت باب سيارة انسد وخرت البردة و شفتها امي و .......... جواااد 😨 جواد جايبها ... جان كاشخ و طالع وسيم مثل ما اني محتفظة بصوره ببالي و احلى عدل قميصه و شال راسه شافني ... حسيت اكو شي جديد بين نظراته من باوعلي ...
اني ارتبكت و رحت سديت باب الغرفة ... لا قفلتها ... و كعدت ع السرير ... افرك بايدي و اتمنى يرجع جواد و ميصعب عليه الامور ....
اندكت الباب و جان افز ... سمعت صوت بنت عمتي الزغيرة كالت ملاك جتي امج و زوجج .. كتلها بصوت مخنوك اي فد شوية و انزل دا اعدل شالي ...
راحت و اني ضليت كاعدة انتظر بلكي يمل و يطلع .. لا خاف عيب ما انزل كدام بيت عمتي ... يعني هسة يفسروها ما احترمت زوجي... لا ما اكدر انزل ... اخاف گلبي يزيد جرحه ... جواد ميريدني و ما اريد اثبات اني افتهمت و ردت انسحب بهدوء بلة جرح كبرياءي و مشاعري ...
على عفلة و فززتني من هالدوامة دكات خفيفة ع الباب و الي گلبي انتفض منها ... سمعت احم احم ملاك فتحي اني جواد ...، كمت من مكاني مفزوعه رجعت ليورة لا ارادي..
كلي ملاك افتحي رايدج بموضوع ...
نبرات صوته جذبتني للباب و صرت اتلمس الباب من شوگي اله ضليت واكفه ورة الباب .. بس ما حجيت دموعي صارت تجري بدون استأذان ... تحولت الدموع شهكات خفيفة ... كلي ملاك ... لا تعاندين فتحي الباب ... اريد اشوفج و احجي وياج ..
كتله جواد ... لا تصعبها علية ارجوك انزل لان ما اريد بيت عمتي يعرفون شي ...
گلي لا تخليني اكسرها هالباب و تعرفيني مجنون و تطلع مني ...
كتله... جواد ... اوك اني حنزل بس انت انزل واجي وراك ... كلي لا فتحي اريد احجي وياج هنا ... ردت افتح الباب بس الي مخلاني افتحها صوت الهلاهل و عمتي صاحتني ... كتله روح جواد واني انزل ... كلي تمام رح انزل بس ملاك لازم احجي وياج .... كتله ماشي ماشي بس انزل ديصيحوني ....
كلي تمام ... نزل و سمعت خطوات الي اخذت روحي وياه ... و اني على كيفي فتحت الباب و شفت ظهره و لاف للمطبخ ...
واني مسحت وجهي و نزلت ....
ردت اروح للمطبخ بس شي بداخلي جبرني ان اثكل و اتأنه  لان ميصير هيج اظل ذابه روحي على جواد ... وهو لساه ماخذني بعين زغيرة...
دخلت للاستقبال وشفت ماما و سلمت عليها حبست دموعي و كابرت ...  شفت العروس و العريس و فرحتهم ما سايعتهم .. و الناس فرحانين الهم قطعوا الكيكة وكلها و وكلته و بعدين كاموا ركصوا على نغمة لاغنية هيجت الحنين البية لجواد ... ( ما بعرف كيف بنظرة بتعمل هيك ... تاخذني ليك ... وبموت عليك ... ما بعرف شو عم يسحرني هيك ... لمسة ايديك ... ضحكة عينيك ... حسيت بقربك بالامان ... صرت بزمان ... غير الي كان .... عم اعشق انا عم اخلق من اول وجديد ... ع اسمك انا عم البس خاتم عمري بالايد .....)
كلمات الاغنية مطابقة لحالي وية جواد ... فزززت كل قطرة حنين غافية ... و هيجت كل دمعة طافية ... و شعلت بية شموع الشوگ و ربكت حالي و خلتني بلا احساس ابجي ... طلعت من الاستقبال حتى لا احد ينتبه علية ... و رحت للحديقة  من باب الاستقبال طلعت ...
الكل جان ملتهي بالاجواء ... و الحديقة مال بيت عمتي جبيرة تمد ليورة البيت ... اني دخلت للحديقة و صرت اركض اريد اروح لمكان محد يشوفني ... اريد افرغ الشوك البية من خلال الدمع ...
حسيت احد ركض وراية....  ولزمني من ايدي ... دفو الكف عرفتله هذا جواد ... مردت يشوف دمعي مسحت بايدي الثانية و هو دارني عليه ... ظل يباوع بعيني ... و اني بالكوة لازمة نفسي ما اريد اضعف ... بالبداية جان عصبي و متوتر ... كلي صارلي نص ساعه انتظرج ... و حضرتج ضاربة حجايتي بعرض الحايط ... مو كتلج رح انزل و تعاي ... ليش ما اجيتي ...
كتله و ببرود و كبرياء مصطنع ...: رادتني امي و رحت ...
كلي ياهو الاهم زوجج  لو امج ...؟
كتله امي طبعاً ... لان زوجي ما دايملي كلها ايام و يصبح ماضي ...
وجه صار احمر و عقد حاجبه و كزكز بسنونه ... كلي انت رجعتي للعناد جنج ... كتله وبنفس البرود لا ما معاندة بس اعتقد هو هذا الاتفاق ...
لو اني غلطانه ...؟
كلي اي غلطانه و ستين مرة هم ... اني خفت من نبرة صوته و ضغطة ايده على ايدي و عروكه صارت بارزة كتله جواد ... هذا الشي مو بس اني ردته انت هم ... و ايدتني عليه .. صح لو لا ...
كلي خلي نفرض اني جنت موافق بالبداية .. ما سألتي نفسج جواد شراد منج واجة كل هالمسافة من بغداد لهنا ... ليش اصر يحجي وياية و اني ما نفهتله ...؟
ارتبكت لسؤاله ... كتله ما ادري يجوز الشفقة و العطف الي جنت تعاملني بيهم همه نفسهم الجابوك لهنا...

جواد ...
رجعت لاسلوب العناد الاكرهه ... كتلها هو هذا رايج ..
كالت اي اكيد ... انت جنت تعطف علية و تشفق و لان اني بنت ابو رغد و ابو رغد عنده افضال عليك هواية ... فحبيت ترد قسم من افضاله بيه ..
كتلها تعاي .. و جريتها و صرت امشي ع السريع و هي وراية تمشي ايدها بايدي ...
طلعت برة و صعدتها للسيارة و اني صعدت و قفلت البيبان... كالت جواد وين ماخذني ... مجاوبتها طلعت بالسيارة و مشيت الطريق كله تفرك بايدها الجنتضاغط عليها ... اكيد اذيتها و بلا ما احس ... جواد انت تظل هيج ... من تريد الشي تاخذه بالقوة ..
وصلنه لجسر و نزلت و فتحت الها الباب حتى تنزل .. ظلت تباوع عليه ... واني جريتها من ايدها و كفتها قريب السياج .. المي جوانه .. و الهوة يلعب بينه و بمشاعرنه .. كتلها تذكرين ببغداد من وكفنه ع الجسر .. نزلتي تصيحين و تصرخين.. هزت راسها كالت اي ... كتلها اكيد ارتاحيتي ... مووو؟؟ كالت اي .. و نزلت دمعتها ... كتلها و عيونج بوقتها اعترفتلي بشغلة ... لسانج ما نطقها .. بس عيونج سولفتلي كلشي بگلبج ...
دارت وجهها و دموعها صارن يجرن ع السريع .. كتلها ملاك اني غبي ..
اي غبي و اثول ... اني گلبي جان معلك بوحدة ما عبرتني فد يوم ... گلبها و فكرها يملكه واحد ... و هالواحد مسلمها گلبه ... يعني همه واحد يعشك الثاني ... مرت سنين واني كلبي بيدها .. نبضي باسمها و لساني يلهج بسوالفها .. و ما نسيتها رغم البعد البيناتنه ...
و يمكن تعرفين هالشي ... بس جواد گلبه صار عنده راي ثاني .. من يوم شفت عينج اعترفتلي بالحب... بينتلي حجم المكانة الي اني اشغلها بگلبج ... گلبي تخلى عن الذكريات .. شطب و محى الماضي ... صار ينتظر شي منج .. صار يتلهف الج ... لشوفتج لتفاصيلج ... لرسمة بسمتج.. ما كدرت امنعه و حبيت هالشعور الجديد ..
ملاك ... اني ........ احبج ...
ملاك اني ما اكدر اكون بلياج ... انت سلوتي .. انت مرتي .. انت حبيبتي ...

ملاك ..:
صرت اشهك و مصدومة بالكلام الكاله جواد ... لساه كبريائي رافض يصدك ... كتله و بدون شعور ... انت كذاب ... انت متحبني ... انت تشمئز مني ... اني بنظرك فالتة ... طايشة ... بس انجبرت تكون وياية حتى توفي ديونك لمديرك ... الو رغد افضاله هواية وياك ... لازم تسد العليك و رضيت تكون زوج وقتي لبنته حتى يوهمون الناس ...حتى يمسحون غلطة غلطها كرايب عيال بنتهم الناس الابهة ... و الشرفاء و النبلاء ... حتى يبينون الهم بنتهم تزوجت و ما توافقت وية زوجها ... و طلكت ... مثلها مثل الاف ...
جواد احنه طريقنه مسدود ...
شال ايده و جان يكول كافي .... كملتي هسة ... انت مو بنت مديري و ردت اغطي على فعلة واحد نجس ... و اخذتج ... يجوز بالبداية كان هذا الاتفاق ... ملاك انت من تغيرتي ... كبرتي بعيني ... و صرتي جبل ما يهزه ريح ببالي و بعقلي ... انت العفة صدكيني و الشرف ... ما اسمح لكائن من يكون يجيب طاريج بالمو زين ..... انسي اسمه و اشطبه من الحياة ...
لزم ايدي و كلي ملاك ... ليش تصدين شعوري ... ليش رافضة حبي ... لا تكابرين ... انت تحبين جواد ... و جواد حابج ... خلينه نبدي بداية جديدة ... خلينه نكون واحد ... و نسگي حبنه اخلاصنه لبعضنه ...
كتله و حبك الاولي ... گلي طار و مسحته اعترافات عيونج من گلبي و من عقلي ... و خلت ملاك وحدها تتوسط گلب جواد ...
اخذني من ايدي و صعدني بالسيارة شغل السيارة و مشى سريع كتله وين ..؟ كلي يعني وين ...
و وصلنه لمكان هاااا ي شنوووو فندق ....؟
نزل و نزلني ... كلي احنه ما شفنه شي من عرسنه ... و اني وياج عرسان جدد ... تعاي ...
و دخلنه واني باهتة ... الفندق رغم بساطته لكن شفته حلوووو ...
حجز غرفه و صعدنه ... سد الباب و اجاني حاوط خصري و باسني من جبيني ... كلي ملاك ... اني احبج ... احبج احببببببج و كام يصرخ ... ابتسمت و زلت عيني ما مصدكة ... شال ايده ونزعني الشال ... و فتح شعري ... وصار يلعب بخصلاته ... كلي من اليوم اني اوعدج ... ماكو غيرج بگلبي ... و من اليوم اوعدج گلبي باسمج يدك ...

جواد ..:
نزلت على رگبتها شميتها و بستها ...... و صعدت ع شفافها الوردية و تهت و ضعت و كملت ليلة عرسي ................

يتبع......