رواية اغلال القدر الفصل السادس عشر 16 - بقلم الكاتبة ديانا

البارت السادس عشر
اغلال القدر ...
امير ..
طلعت من حجي خالد و اني مضروب على راسي .. طلبه الي طلبه مني صدمني ... كملت الشغل و رحت للشقة ... لكيتها ظلمة و علي نايم بالهول ..فتحت الاضوية ...
و كمت اصيح ولك لساك مهطور ... ساعة ستة كافي دكوووم ...
فتح عينه و جان يكلي امير ولي من يمي ...
كتله ولك كوم شوف حالي... اخوك رح يطك ...
كلي ها هم نسوان ... امير بربك روح من يمي انت و نسوانك ...
كتله علي ... ولك يا نسوان .. لك اني حاير كوم اسولفلك و شور علية ...

علي ....
كعدت حتى اسمع امير الي طير نومتي مو عيني ... كتله كول شكو شصاير ...
كلي هي هاي چهرة احجي وياها ... كوم غسل ولك عيونك زروف چفچير هاي من يا ساعه مخمود ....؟
گتله امير ... ترة مزاجي صفر مو مال مغثة ... احجي شنو الصاير ...
گلي و طبك طوب ... غير اريد چهرتك تستعدل ... شعلية بيك ... اسمع .. اليوم من كتلك حجي خالد رايدني ... تدري ليش .. و لك انصدمت بطلبه ...
كتله و ليش باله ...؟ يزوجك بته ..؟
گلي لا مرته ..
علي ..:امير احجي عدل شراد منك ..؟
امير ..: ولك شبيج يريد يزوجني مرته ..
علي ..: لك ابو درب اريد انام و انت دا تضحك عليه ..
امير ..: ولك والله اليوم دز عليه يريدني اتزوج مرته ...
علي ..: شلون يعنيه معقوولة ؟؟
امير ..: شوف هو مطلكها ٣ مرات و يريد يرجعها .. فلازم ينكحها رجل غريب و يطلكها حتى تحل عليه مرة ثانية ...
علي ..: هااا فهمت .. يعني انت شغلتك مثل عادل امام كوبري .... هههههه اي يويل تالي عمرك تزوج الحجية مرت ابو خالد ... هههه ولك هاي انت وصلت لارذل العمر هاي العاقبة الموزينة ههههههههههاي والله امير وكعت بيد الحجية
امير ..: اسكت لك اثول ... بيها فلوس هالشغلة لا عبالك ...
علي ..: امممم خوش شكد رح ينطيك مهر الحجية ...
امير ..: علي انجب احسن لك و منو كلك اني رح اتقرب منها سواء جانت جبيرة او زغيرة ..
علي ..: عيني لعد  الويش مزويجها الك .. حتى تدخل بيها يعني ليلة دخلة و هالسوالف كلللللليش اموري ابني كبر و للحجية رح يزفونه 
امير ...: شو كوم من يمي ترة و امير المؤمنين لا اكلب خلقتك ..
علي ..: هههههههههههه اموري عيني الحجية تخاف دير بالك عليها .. ما اوصيك و بس مرة لا تروح تتاذة ههههههههههه
امير ..: كوم بومة وجه الچوب ميصير براسك خير ... لك اني رح اكسب اجر و ثواب ... و فوكاها ينطيني الحجي فلوس ..
علي ..: ولك هاي بيها حلال و حرام ... لازم تنكحها للحجية لا بد ان تدخل بها ...... ههههههه
ولك انت وكعت بحلكي يا امير يا ابن سليمة ...
امير..:  وعبالك رح اديرلك بال ياالفاشل ... روح اضحك على نفسك ابو الحب الضايع ...
علي صار عصبي و انگلب وجهه ..: امير اني صح سولفتلك على الماضي و الي بگلبي بس مو معناتها تضحك على خصوصياتي ... خليك انت بحالك و اني بحالي ...

علي ..
دخلت لغرفتي و مددت ع الجرباية .. حطيت ذراعي على عيني و ردت ارجع بخيالي و ذكرياتي للماضي ... امير دائماً يجفص بحجاياته ...
ورة دقايق اجة طب كلي كوم بدل دنروح لبيت حجي خالد رادني اليوم افض الشغلة ...
كتلة واني شعليه روح انت عساك لا رجعت ..
كلي لا علي بروح امك اريدك وياية عوفك من الشقة ... مدا اشاقة
وكفت على حيلي وباوعتله مخنزر عليه ... كتله ولا اني اتشاقة وياك من اكلك الماضي الي مسولفلك عليه لا تتمضحك بي و لا تدخل نفسك بي ... احترم امير هاي خصوصياتي ...
كلي  لك ساقط مو صارلك ساعه تضحك علية على حتاخذ الحجية و نزفك و تهلهل ..
كتله امير هذا الشي ميشبه الي هنا بكلبي ... انت دتدوس على كلبي واني ما ارضة بعد جيب طاري الماضي..
كلي اوي روميو كوم بدل دنروح .. ياله انت اخو العريس لك مو قبل شوية هلهلت .. تعال خلي شوية نركص ..
وجان يطلع اغنية مال اعراس و مزايق ... و هو يركص واني اباوعله بنص عين ... هذا صاحبي فالت متصيرله جارة ... صح مرات غثيث بس يبقة صاحبي الاحبه ...
شبگني و كمنه نركص اثنينه ...

امير ....
بدلت و تعطرت و طلعت من الغرفة .. شافني علي كلي ولك ابو درب ى الله عايش الدور رح توكع الحجية بحبك ...
ضحكت كتله اشو عندي احساس زوجته مو جبيرة كلش .. اعتقد اربعينية ..
كلي امشي نتعرف ع الحب الجديد ...
و طلعنه و توجهنا لبيت حجي خالد ... بالعاصمة يبعد عنا حوالي نص ساعه  ... وصلنه و نزلنه .. الحماية فتحولنه الباب و دخلنه ... احنه مو اول مرة نجي لبيت حجي خالد بس ما طابين جوة ...
البيت بمنطقة راقية  بأمستردام ... بوابة البيت عالية و حماية ٢ برة سدوا الباب ورانه و نطوا خبر للحماية الجوة ... علي كلي متحضر العروس دتنتظر ...
كتله انجب علي اسكت لحد يسمعنه و نروح بيها...
طبينه للبيت و كعدنا واحد من الحماية بالصالة الي ما شايف منها غير بس بالافلام ... قنفات رئاسية و ڤازات منقشة كل وحدة بطولي و ثريات كرستال و الكاشي ... يا كاشي كله مرمر ... علي كلي مجنت متخيل هيج اموره .. كتله اشش ليسمعنه يمعود ...
والله ورة دقايق اجة حجي خالد بس صاير اعصاب من وجهه هو شكله مو عصبي ابد بس ما اعرف شبي (معذور خطية رح يفارك الحجية 😂علايم علي)
تسالمنه و گعدنه و صارت كعدتنه كدامه بس الباب الاجة منها ورانه ...
كال الحجي ..:  علي اليوم انت ماكو .. شعجب .. بس نظراته نار ...
علي ..:  حجي والله شوية مريض ..
الحجي ..: اي حمدلله ع سلامتك
حسيته ديستهزيء و اني ادري علي هذا خبل اذا سمع منه حجاية لخ يكوم يتهور ...
سديت الموضوع ..كتله حجي البارحة تاجر من بغداد دز بالفاكس طلبية من الالبان و نطيتها لابو سلمان و كال انطيها للحجي .. وصلتك ..؟
الحجي ..: وصلتني .. بس هذا اعرفة مؤنس ابو فليس ... شعجب طالب هالنوعيات و الكميات .. و مجنت متوقع هالخناوة يتعامل وياية مرة ثانية واحنه على خلاف ...
كلت بكلبي هذا شبي اليوم .. كلش مأثر بي الوضع .. اوي شسويلة عاد يخلص اليوم و يجي باجر دا اكمل هالمهمة ..
فززني صوت الحجي كلي .. شوف امير .. انت عرفت شنو رايد منك ... و باجر الصبح .. يجيبوك الولد حتى تطلك ميحتاج اشرحلك الموضوع و لا يحتاج انبهك تعرف حدودك كلش زين ... و ما اعتقد تريد تتاذة و انت ولد خلوق و تسمع الكلام ...
كتله و اني صافن مدا اعرف شيقصد .. كتله اي ان شاءالله ...
كال هسة اجة الشيخ اني اترخص اروح اصيح المدام ...
علي باوعلي ورة مطلع كلي اكولك شبي الحجي اليوم ...؟
كتله اسكت علي اني بس اريدها تفض ...
ورة شوية اجة شيخ و سلمنه عليه و كعد و راه سمعت اجة من وراية خطوات حذاء نسائي... احنه كاعدين ظهرنا ع الباب ... اني وية كل خطوة نبضي يزيد ... اي ادري الحجية لابسة كعب شبيها ممصدكة ..
سلمت و يا ربي الصوت ناعم و لبنية عمرها ميتجاوز العشرين ... انخطف لوني ... و علي باوعلي و دننتظر المفاجئة ... وجانت تفوت من يمي شابة عشرينية  طويلة و جسمها رشيق شعرها احمر هادته على اكتافها و لابسة فستان اسود قصير وية الركبة و حذاء اسود عالي مكياج و عطر و صبغ اظافر احمر اني غمضت عيني و فتحتها ... ورجعت اغمضها و افتحها و حلكي فاكة ... هاي الفختية هي الحجية مرت الحجي😳😳😳؟؟؟؟
علي حسيت بي مثل وضعي ... هي مبتسمة على شكولنه و تريد تضحك ... كلي الشيخ منو العريس ...؟ هي ظلت صافنه علينه ... تباوع بعيني شوية و ترد على علي ...
عضتلي شفة و باوعت ع الشيخ يعني جاوب الشيخ ... اني اتسودنت ...
ابلعت ريكي وباوعت للشيخ كتله هاااا ،،؟ كلي بابا سمعتني ..؟ كتله لا هااا اي لا ... كال بعصبية منو العريس .. كتله اني .. هي باوعت علية و نزلت عينها مبتسمة ...
كال تعال هنا ... كتله..ها ..  اي ... كال اسمك و سنك ...
مرديت ارتبكت بابتسامتها و مجنت متوقع هاي العروس ..
كال جاوب ... كتله اسمي امير عبد الزهرة فلاح كال و عمرك .. كتله ٢٦ سنه والله بعدني زغير واباوع عليها ... علي كال احم احم ... يعني فهمته قصده لنروح بالزلك ..
كلها وانت بابا شنو اسمج ... كلتله و بصوت ما سامع منه ابد شكد سامع نثاية بس مثل هديل هالفختية ما جاي باذني ... عسل محمد عبدالله كلها عمرج كالت ٢٢ .... وبعد ما اخذ اسماءنا و اعمارنه و نطينا  هوياتنه ...  عقدلنه و كال مبروك ... طبعاً الشيخ يدري بزواجنه و طبيعته ... لذلك ما سال ...
اجة واحد من الحماية ... و كال تكدرون تروحون هسة ... اخذت جاكيتتها لبستها و طلعنه ... صعدنه بالسيارة ... واني كلساع اخمها و اندار ... علما وصلنه كلشي محجت .. علي كال امير اروح لشقة شوان لان دا اباوع اللعبة اليوم مانشستر تلعب ياله مع السلامه ...
وعافنه و راح ...
بقينه اني وياها بالشارع ... كتلهة امشي نصعد ..
صعدنه و اول ما طبينا ركضت ع الشباك و جان تسد البردات .. كالت و بانفعال  ... انت اكيد تحتاج فلوس ... شتريد انطيك ... و الرقم الي انت تكوله ... و اكثر و اضعاف ما خالد ينطيك بس طلعني من هولندا...
كلها صبري .. فهميني شنو السالفة ... كالت و باعصاب  خالد حيوان بعد ما ارجعله ... و ما ابقة عبدة اله ... تعرف صارلي شكد اخطط لهاللحظة ...؟ ما اخربها و الا احقق الاريده و ما ابقه لهالسافل ... كتلها انت شبيج دارخة هالكليشة و جاية اوكفي فهميني وحدة وحدة ...
قبل شوية جنتي تضحكين ... و تبسمين ... كامت تعيط متهسترة جنت امثل و اكذب حياتي كلها كذبة و تمثيل حتى الافندي يرضى و يتونس براسي ...
كتلها ممكن تفهميني شبي حجي خالد ... كالت لا دكول حجي كول شيطان كول ابليس ...
كتلها اوك احجيلي حتى يجوز اكدر اساعدج ...
كالت شأحجيلك و منين ابدي ... اني الحجي مالتك مسويني عاهرة و يشتغل بية ..............
كتلها شنوووووووووو؟؟؟؟؟؟؟

صوتوا للجزء اذا عجبكم حبايب 🌹🌹🌹🌹