حبايب بارت مفاجئة اتمنى يعجبكم 😍هدية العيد 🎁🎊🎉
منوريني و لا تنسون التعليقات الحلوة و التصوووويت 🎈🎈
البارت السابع و العشرون
اغلال القدر
امير .... :علي وين رح تروح انت و زينب ....؟
علي ...: اسكت امير خابرت ع المستشفى البيهة زوج زينب و يكولون حالته كلش مو زينه
امير ..: لا بربك ... زين منو وياه هسة ..؟
علي ..: زينب خابرت اقربائه و وصل اليوم يمه ...
امير ..: ياله حتى يخلالك الجو ابو حسين 😉
علي ..: انچب اثول ... اصلاً البنية زواجها منه صوري مو زواج طبيعي ... بس ساعدها حتى لا تضيع و اني ممتن منه هواية ... الله يخفف عنه ...
امير ..: ها زين يعني الحب مالتك بعدها الك ما دخل لگلبها غيرك ... تعال صدك انت و عرفناك مغرم و هي تبادلك هالشعور ...؟
علي ..: امير شتدور رحمه لاهلك
امير ..: هسة اني ما مفتهم طكة انت طلعت تعرف مرت الحجي ... و كرايب الحجي مرت ابن خاله هم تعرفها و طلعت الحب مالك ... و هنوب طلعن خوات ... تعال يمعود فهمني ... شنو السالفة اشو شبچت ..🤔
علي ..: شوف رح احجيلك و اسولفلك ............
زينب ..:
اسيل بعد عمري خيتي تعاي احجيلي كلشي اريد اعرف ... من ليلة العفتيني لليوم شلون عشتي ..؟ و يامن ..؟ منو جابج لهنا ...؟ گلبي نار طفيلي النار البية فدوة ....
اسيل ..:
يوووو ليالي سودة و ايام تعيسة ... شأحجيلج و مين ابدي ...؟
زينب ..:
كتلها احجيلي كلشي ... اريد اعرف ... اسيل انت متدرين شصار بيه هالسنين ...
اني احجي و دموعي بدن ينسابن من عيني كتلها ما ادري هم منو اشيل و بالي ينشغل على منو ... عليج لو على شمة و نونو الي ما اعرف وين صاروا .. لو على علي لو على جواد ...
اسيل ..:
اي يابة شلج بينه لگيت الحب القديم .... تعاي صدك سولفيلي شلون لگيتي علي ...؟
زينب ..
ولج اسيل شلج بهالسوالف ... عموماً انت ابدي سولفيلي و اني هم رح احجيلج وين جنت ... بهالسنين ...
امير ...
يا يابة شوف الدنية شكد صغيرة يعني لو فلم جان كلنه شنو هالهمبلة ...
علي..: الحمدلله الله رزقني شوفتها و بعد لو اموت ما اتركها لو على موتي...
امير ..: شوف علي.. خابرت امي وكالت اكو اثنين جوي سألوا عليك .. و هذا خالد ما رح يسكت ... فكتلها يمة فرغي البيت و تركي هالايام ... و هسة اهلي بغير محافظة ... اهل امي عدهم بيت بقرية بمحافظة (..) كتلها روحي بي مؤقت و اني رح اروح لهناك و تعال انت هم و زينب...
علي ..: ما ادري امير ... الله كريم ... هو يمكن هيج رح تصير لان زينب ما اخليها ترجع لبيتها ...
واني تدري بيه ما عندي مكان ... فمؤقتاً نجي وياك ....
امير ..: علي صراحةً...... عسل قهرتني ... و وجعني گلبي عليها ...
علي .: ولك طلع عندك شعور و اني ما ادري ... شنو هالتطورات .. معقولة امير ابو النسوان و القلب الذي لا يظام ... ينكسر گلبه و تهتز مشاعره ..؟
امير ..: لك لا علي والله عوف الشقة ... ترة صعبة القاسته ... لا ام و لا اب .. و الشارع ما يرحم ... و هنوب تنهزم من الواقع تدخل بكابوس خالد ...
علي ..: امير الحچي مو مثل الشوف ... انت ما شفت زينب و محاوطة اخوانها و هي بعمر ترف .. ما الگة ام بتصرفاتها و لا الكة انسان بطيبتها ...
امير ..: الله يباوعلهم و يقدرنه حتى نكون سند الهم ..
علي ..: افهم من كلامك .. انت ما ناوي تطلك عسل ..
امير ..: والله يا ابو حسين ما اعرف گلبي يگول شي و عقلي يگول شي ثاني .. ما اسبق الاحداث لكل حادثٍ حديث ... ياله كوم ...
اوكف اوكف .. باوع ..
علي ..
درت وجهي ع المكان الي اشرلي بي امير و كلي هذوله مو زلم خالد ..؟
كتله ولك اي .......
امشي للفندق ع السريع ناخذ البنات .. و للمطار ..
طلعنه من الكوفي و رحنه للفندق الي بي زينب و اسيل ..
زينب ...
اسيل حجتلي كل الي مرت بي ... هي تحجي و اني بس دموع.... گلبي يقطر الم ... اختي شافت مرار ... و ظيم ... من هذا خالد الظالم ....
بچيتا و بچينا الى ان غفت بحضني و اني الاعب خصلات شعرها ... طبعاً اختي هواية بيها ملامح متغيرة لان هذا الحقير خالد جابرها حتى عمليات تجميل تسوي ...
ما عدا فارض عليها متلبس الحجاب و لا تلبس شي مستر ... حسبي الله عليه ...
اني تمنيت الله يجمعني بشمة و نونو ... اريد اشوفهم شمة هسة صبية جبيرة و نونو هم كبر ... يا ربي اكيد انت ادرى بحالي و لهفتي على شوفتهم ... كحلي عيني بشوفتهم و اجمع شملنه ...
اندكت الباب و صوتها خرعني .. و صار الدك اقوى .. فزت اسيل و كمزنهاثنيننه ع الباب .. لكيت علي و امير بحالة استعجال دخلونه و سدوا الباب و كالوا ع السريع لموا غراضكم رح نتوجه للمطار جماعة خالد وصلولنه ..
و ع السريع لمينه غراضنه و طلعنه ..
الطريق كله علي لازم ايدي ميقبل يهدني .. كتله علي ميجوز ..
وگفني ع صفحة و بعيد عن اسيل و صديقه امير .
گلي زينب .. افهميني .. اني احس روحي عايش حلم ... لا لا ... متت و الله ذبني بالجنه .. و شال كفي و باسه من باطنه و بعدين حطه على صدره ... الي جان صخب بصوت قلبه و نبضاته المجنونه .. كلي شوفي .. هذا حاله من يوم الشفتج .. صار مجنون و هاجت براكينه ... مو بيدي زينب .. بقانون گلبي انت حلالي يا نبضي و سبب وجودي ... ماكو شي اسمه ميجوز بقوانين گلبي العاشگ...
اني استحيت و نزلت عيني ... كلامه حسسني بانوثتي و حسسني اني ممكن احب و انحب ... معشت هالشعور ... و مجنت متخيله علي لهالدرجة يحبني ...
حريت ايدي منه و كتله علي ... كافي افهمت خلي نروح ليكون نتيهم ...
باس ايدي و باوعلي بعينه المملوحة الشايلة حزن و حب و هليط من مشاعر دغدغ جنبات گلبي ....
ابتسمت و هو كلي اواعدج اريد الله يقدرني و اجمع شملج بخواتج و ما انحرم من هالضحكة على ثغرج ... و اسعدج يا بعد كل اهلي و ناسي ...
غمضت عيني و كتله يا رب امين ...
امير ...
خابرتني امي و عرفت متزوج و جايب مرتي وياية كامت تبجي و تعد و تصف علية .. ابن الغبرة ما حجيت ما كلت ... و من هالحجي .. يبوووو شحيفضها .. وية امي ..
لزمت اسيل كتلها باعي .. ترة امي كتلها احنه متزوجين زواج طبيعي لا يزل لسانج و تكولين غير شي .. كالت انت اول و تالي لازم تطلكني ..
اختي و لكيتها .. بعد ميحتاج مساعدتك شكراً لشهامتك 😏و كالتها باستهزاء
كتلها حضرتج تقلدين و تقربت منها ... كالت لا العفو ما اقلد ... وهم استهزئت
جريتها من شعرها .. بس مو حيييل كتلها ام كفشة تذكرين الوعد موووو ..؟
كالت لا يا وعد ليش بيناتنه وعود .. هااا. اي اتذكرت .. كتلها ها اذكرتي موووو .. كالت اي قصدك الفلوس مو اي عيني انطيكياها كلها ... و اشمرها فوك قندرتك ...(العفو )
كتلها لج و جريتها من شعرها و حطيت شفتها بثغري و بستها بوسه عميقة نسيت الاول و التالي بيها ... هي ارتبكت و خنزرت و مكدرت تحجي لان شفافي سجنن صوتها و شفافها و بثواتي خليتها تذوب و ذبت وياها ...
و ما حسينا الا على صوت شهگة اختها ....😱😱
دفعتني اللوتية من شافت اختها و خنزرتلي .. اني ابتسمتلها و غمزت و مسحت شفافي ...
علي گلي امير هاي الامور تصير بمكان وحدكم بي ٤ حياطين وانتو و باب مسدود .. مو هنا كدام العالم ..
كتله اي صح .. امي حضرتلنه غرفة و كالت اريد اشوفك عريس ...
جان تصيح اسيل و كالت :شنوووووو
كتلها هالسمعتي حرم امير المصون ... كالت على جثتي والله .. زينب انت مو عندج بيت .. نروح لبيتج اول منصول بغداد ..
علي كلها عيني يا بيت يا تروحون .. كلنه رح نروح لبيت امير لان زينب خالد يندل بيتها و من المستحيل اعوفها ...
و امير بيت اهله احسن مكان لان مو ببغداد ..
باوعتلي و مشمئزة اني شلت ايدي علامة الاستسلام .. كتلها الوضع يطلب من عنده هيج ... اتعاوني ...
كالت اوووووووف شلون يعني .. شوكت اتحرر ... و اكون حرة نفسي ..
كتلها صبري خانم و اتعاوني ...
علي ...
صعدنه للطيارة و صارت كعدتي يم امير و زينب يم اختها ...
كتله تعال ولك صدك امك تريد تسويلك عرس ..؟
كلي اي علي تخيل مصرة ع هالشي .. دكول لعد تزوج واني ما ادري ...
ضحكت كتله جنك مكييف يا ويل ..
كلي ههه اي اشو حلتلي الشغلة ..............
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!