رواية اغلال القدر الفصل السادس والعشرون 26 - بقلم الكاتبة ديانا

مساء الخير عيدكم مبارك يا اجمل متابعين
اليوم البارت ٢٦ صار جاهز اتمنى يعجبكم و لا تنسوني بالتصويت و التعليقات الحلوة 😍😍😍🌸🌸🍬🍬🍬🎊🎊🎊

البارت السادس و العشرون ....
اغلال القدر

ملاك...
جواد جابني  يم رغد ... و راح لزيدون ... بس اول مرة اشوفه بهالشكل ....عبارة عن كتلة نار ... اتفق وياية ما اكول لرغد على شي ... حتى لا تخرب الاول و التالي ... ما ادري على شنو ناوي ... حتى طلع بلا فلوس و كذب على زيدون ... شلون بية اني ادري زيدون هذا مخنث و ميحسب حساب لحركاته ... مو مثل جواد ... من يكول كلمة ينفذها ...و ما يهاب احد ...
رغد سالتني ليش رجعتوا ...؟ كتلها اجلوا الرحلة... شسوي و هسة گلبي ناااااار يم جواد ... حاف يروح يصير بي شي ... دخلت الغرفة .... و كعدت ادعي و ابجي ... يا رب يرجع و ما بي شي ... و ما يسوي شي لان خاف يتهور لان  الي عرفته جواد ميسكت و دمه حامي شنو حيكون رده ...
صرت الوب اروح و اجي بالغرفة و ادعي ...
عدت الساعة و صارله ساعتين و اني الخوف اكلني اكل .... لا بية الاخابره و اسأله و لا بية الاكعد و اسكت ... اذا اخابره شأكوله ... يا ربي هم الي عين و اسال و احط روحي ...

جواد ...
هذا الساقط النذل ... جايب وياه لمة مال مخانيث مثله يخوفني بعضلاتهم ... و عباله ما اكدرلهم ... بس ااااخ ما كدرت اكتله ... ختل وره هالاشباه الزلم ...
اني هسة راجع للشقة بس حالتي مبينة جنت اتعارك و الدم ما ادري مين ينزل ... بس اني اعلمك يالجريدي ....
اني اتقصدت اروح بلا فلوس،..اريد اكتله لهذا الحيوان و اربي و اتوبه بعد لا يحط بعقله ملاك ...
مساعدتي لملاك هي لخاطر ابوها ... البنية اذا درى ابوها بهالحجي و افعال زيدون الخايسة هاي ... يمكن يموت ...
و اني هذا الداسوي كله رد جميل لابو رغد لان هو الادمي زين وياية كلش ...
صعدت للشقة و جانت سنطة .. دخلت للغرفة و لكيت ملاك كاعدة ع السرير تبجي ..، ركضت علية و شهكت من شافت وضعي ...
كالت جواد شنو هالدم ،...
ركضت راحت جابت معقم و قطن .. و خاولي  مبلل مسحت الدم و هي تبجي ... كالت .. اني اسفة خليتك بهالموقف ... كتلها ... مشفيت غليلي ... بعدني ... هذا الحيوان لازم اسكطه .. و اربي .. 
كالت جواد انت مو بكده عوفه ...  رفعت راسي و باوعتلها بغضب .... كتلها حقج ....  كمت اصرخ .... كتلها مو بعين حضرتج اني ...
اني جواد الفقير ... اني جواد الي بلا اهل ... جواد سايق بابا ... قابل اني زيدون ... ابن الحسب و النسب ... يلعب بالفلوس لعب ...

ملاك ...
والله مجان  قصدي اقلل من شانك ... جواد ليش اخذتها من هالباب ... والله مو ببالي هالحجي ... بالعكس ....
تقربت منه و هو غادي اعصاب نار من عيونه تطلع ... لزمت ايده الي جانت عبارة عن قنبلة موقوته علصرها حيييل و عروگه كلها بارزة مليانه غضب ...
و بحركة هادئة لزمت قبضت ايده و على كيفي بديت افتحهة و اول اصبع كتله ما لگيت بشهامتك ... ثاني اصبع ... و لا بطيبة گلبك ... ثالث اصبع ... انت رجال و زيدون و عشيرته يرحولك فدوة  ... ( نزلت دمعتي )و فتحت رابع اصبع كتله اني متت خوف عليك من تاخرت ... ارتخت عضلات ايده و ملامحه هدأت ... فتحت الاصبع الخامس و دموعي زادن ... كتله اني ما استاهل منك هالرجولة ...
سحب ايده من ايدي و مسح دمعتي كلي ملاك عمي ابو رغد وكفلي هواية ... وهذا شي بسيط ارد بي افضاله  العليه ...
جملته هزت گلبي و كطعت روحي معقولة جواد مديقرا اسطر الحب البعيني ... معقولة نبراتي ما دلوا ... معقولة دمعاتي ما فضحوني ..
درت وجهي عنه و حفظت اخر قطرة كرامه الي ...  و كتله اوك ينطيك عافية ...
كتله اطلب منك طلب ... كلي كولي ... كتله اريد قبل الموعد المحدد تطلكني ...
كلي ... اني هم كلت ... بس قبلها لازم اربي هالحيوان ...
زين و حتى اطمئن بعد ما يتعرضلج ...
حجايته جانت سجينة بگلبي ....

كلت بكلبي ... ليش لا ملاك شتريدين من الولد .... يكلج لا عفية حبيتج و لا تعوفيني ... اصلاً كلش زين منه رضى بهالاهانة الي لبسهة علمودج ...
لفيت ايده و ضمدت جرحه الي براسه و مسحت الدم الي على وجهه ...

جواد ...
اني مو اثول و لا غبي حتى يتوه عليه ارتباك ملاك من تكون قريبة مني ... احسه تكن الي مشاعر و احاسيس ... بس اني لازم اكون بارد اتجاه هالاحاسيس الانية ... هذا احساسها اني و وقتي ... لان شافتني شهم  وياها فانعجبت بافعالي مو بية و الا وحدة مثلها تحب واحد مثلي ...
لمساتها جانت تصرخ احتياج ان افهمها و اترجمها ...
مسحت الدم العلية كله ..
وصلت لصدري ... اني صراحةً توترت ... و ردت اوخرها ... بس هي فتحت دكم القميص ... و نزعتني ... استسلمت للمساتها الدافية  ... و جسمي متعطش للحنان... للدفو ... غمضت عيني و صرت طاير بسمه ... روحي هودت جروحه من شفت طيف زينب بدال وجه ملاك ... ظليت مغمض عيني و جان اكول ... ااااي زينب طيبي الجروح الي بيه  ... وكفت اللمسات الدافية ... انتبهت على نفسي و جان افتح عيني و تتغير ملامحي ...
شفت وجه ملاك مو طيف زينب ... عيونها مليانه دموع عكس ما تراوالي لعين  زينب مليانه ضحكات ...
هي ابتسمت بين دموعها و كالت تحبها ...؟
اني تنهدت و درت وجهي .. كتلها لازم نروح للمطار لان الطيارة بعدلها شوية و تقلع ...
كلتلي جواد جاوبني ........ باوعتلي بنظرة مكسورة ... كلتلي تحبها...؟
كتلها ملاك هذا موضوع حساس ما احب احجي بي ...

ملاك ...
گلبي اتفطر من كال اسم زينب ... اتفاجىء من شاف ردة فعلي ...
و ردته يجاوبني هو ساكت ... كتله تحبها و عدت السؤال مرتين عليه ...
كلي ما احب احجي بهالموضوع لان حساس ...
كتله على راحت ... ما اكدر اوصف حجم الاهانة الي بية ... و هو فشل ...
كلت لگلبي كافي بعد ... گلبه ينبض لشخص ثاني...
كمت من يمه و لميت الغراض .. انداريت و كلبي عاصرني ... دموعي صارن عشرة عشرة ... ابجي ع الخيبات الي لاحكتني.... جواد اعتبره صفحة بيضة ما يرهم لكتاب حياتي الاسود ... عليمن انقهر و اضوج هو ميرهم الي ...
بس هذا گلبي معاند ... دگاته تصرخ باسمه من عيني تصد لصورته ...
سمعته يگول .....زينب مو بس خليلة گلب ... انثى و عشقها گلبي ...
غمضت عيني حيل و ظليت واكفة ناطيته ظهري امتنعت يشوف ملامحي الي تشعر بالاهانة ... رفضت يشوف الالم الي كل كلمة من كلماته تطعن بقلبي ...
كمل و كال ... زينب اتخذتها ام ... بخيالي ... اخت ... حبيبة ... و تمنيت اكمل كل حياتي وياها ...
زينب حلم وردي ... ما يوم فارك ليلي ... اتنفس حروف اسمها ... انبض دكات الها ... يومية عايش ندم لان ضيعتها عايش حسرات ... تايه بايامي و سنيني ... يوم الشفتها نسيت العالم و عشت ذكريات قديمة جانت هي بطلتها ... بس ظلت حلم وردي ...
مسحت دموعي بطريقة مردته يحس بيه ... و كتله بصوت مبحوح و كبرياء ممزق ... الله ينولك شوفتها و يفرحك بيها ...
و عفته و مشيت....
دخلت للحمام طلعت كل البچي المخنوك ... و دموعي تجري .... ما بطلت ابد ...

جواد .....
اتقصدت ابوحلها بمشاعري القديمة ... اتجاه زينب ... زينب طيف مقدس جانت ساكنه عقلي ... و صورته غافية بين ضلوعي ...
تنهدت و گلبي وجعني من سمعتها تبجي بصوت ناصي ... حسيتها انقهرت ... شسوي ملاك لازم تتعلمين من تغلطين لازم تتاذين حتى تتعلمين متعيديها ...

في اليوم الثاني في بغداد ....
جواد ...
هااا دكتور شنو السالفة ....
الدكتور ..: المريض بحالة مستقرة ... لكن قبل شوية فقدناه و راد يموت لان مبين متعرض لصدمة و انجلط ... و رجع للحياة بفضل الله ...
جواد ..: شلونه هسة اكدر اشوفه ...
الدكتور ...: لا اكيد ممنوع ... لازم يرتاح ع الاقل ٧ ساعات و بعدين تكدر تفوت انت وحدك ...
جواد ..: اشكرك دكتور ...
ابو ملاك تخربطت اليوم الصبح ... بعد ما اجاله ظرف مجهول ...
بعد ما رحت افتهمت من ام رغد ... الساقط زيدون العار داز صور ملاك لبيت عمها ... و اهل ابو رغد مو مثل اهل ام رغد ..... و داز نسخة ثانية مم الصور لبيت ابو رغد .... ما شفت الصور بالظرف بس الي فهمته هي تبين انه ملاك ويه هذا النذل بوضعيات حميمية ...
ابو ملاك حقهة يصير بي هالشي ... حلفت الا اطلع هالنذل حيوان وافضحه كدام الكل ....
كرايب ابو رغد  وصلهم الحجي و هذوله عشاير جبيرة و ناس محافظة كلش مو مثل اهل ام رغد  ... متحررين و تحرررهم جاب الفضيحة ... بيت ابو رغد مليان ناس ... جايين يتفاهمون وية ابو رغد ... على هالوضع ... اني اخذت ملاك و ضميتها بشقتي ... لان الي عرفته من ام رغد واحد من ولد عمها رايد يكتلها و الله شنو يغسل العار ...
ما اعرف شاكول ... حقهم و مو حقهم ... شلون يسكتون و صور بتهم و بهالوضع ... يهددوهم بيها ... ميدرون هالنذل مغتصبها ...
رجعت للشقة و شفت ملاك وجها خريطة من اللطم و البجي ... كالت اني استحق الموت جواااد ... اريدهم يكتلوني ... والله ما الوم ابني عمي و عمومتي ... بس ابوية سودة علية شلون ... حنيت راسه و ظهره ... طمست راسه بالطين ...
اني ظليت ساكت ما عندي جواب ... فعلاً افعالها اللامسؤولة ضيعت اهلها ...
كتلها انت شفتي الصور ... كالت لا ... شنووو شمسوي الحقير ...
كتلها انت كاعدة وياه بوضعيات حقيرة خانم ...
كالت والله شكد نطلع سوة كله كدام العالم كعداتنه و الله ممختلي بيه الحقير ...
طلعت الظرف و شمرته بوجهها ... كتلها شوفي يا البريئة .....
گلبت بيهن و صفنت ... كامت تبجي اكثر ... كالت صدكني مفبركة الصور ... احلفلك و داعت ابوية الغالي اني ملابسة هاللبس وية زيدون ... هذه فساتين البسها بحفلات صديقاتي ....
كتلها هو شنو الضيعج غير صديقاتج و اللبس و المسابقات بيناتكم بياهو تطلع احلى ...
ملاك ابوج اليوم مات و الدكاترة بمعجزة رجعوا للحياة ... ملاك بيت اهلج مهجوم من ورة اهل ابوج ... روحي شوفي دمهم غادي نار ... رايدين يلزموج و يذبحوج ... هسة جاية تحلفين ... على هدوم و لبس... هسة تندمتي ما حسبتي حساب هاليوم الاسود ...

ملاك ...
عكبيش الندم ... عكبيش البجي .. ابوية رح يموت من وراية .. اهليته بعد محد يحترمه ديشوفوا بعين زغيرة ...
لزمت الصور و اباوعهن و ابجي ... اني الذليت ابوية بكم قطعة قماش ... اني الهنته و جبتله العار من ورة رعونيتي و نزوة انتابتني بوقت المراهقة ...
دك تليفوني و انتبهت للمتصل هاي ريا .. وحدة من صديقات الهم و الطيحان حظ ..
مكدرت اشيله و حلفت بس تنتهي هالمحنه اترك كل العلاقات و الصداقات و اقفل تليفوني و ارجع على تليفون بلا كامرا احسن لي ... و ما اريد اي تطبيق بتليفوني .. سكطوني هذا التطور ،،؟ هاي الحرية..؟ ما قادتنه غير بس للتهلكة ..
اجتني رسالة .. من ريا  دكولي ملاك ... اني اسفة ...
مفتهمت شنو معناة اسفها ...
تمعنت بالصور اكثر .. و مسحت دموعي و اخذت التليفون و كمت اقارن الصور وية صور السناب ... الكعدة الكاعدتها اني بالصور وية زيدون ... هاي مفبركة .. اني هاي كعداتي وية البنات صديقاتي من جنه نسوي حفلات .. فتحت الصور و تخبلت .. يعني هاي ريا  اسفها على هالشي ...
ريا خانتني و دزت الصور الي اني محددته بس بيناتنه احنه الصديقات عود محد يشوفها غيرنه .. لهذا الحيوان ..؟
طلعت ركض لجواد ... كتله جواد .. تعال لكيت شي .. عفية ساعدني ...
بالبداية متجاوب .. وياية .. بس بعدين كلي ايي ملاك هذا الحل ... جيبي الموبايل دكيلي ع التافهة هاي صديقتج .. كلي عندج برنامج يسجل مكالمات كتله اي .. كلي دكي عليها و سجلي بلكي رح تحجي شي يفيدنه .. اني كيفت اكو من وياية جواد الله دازة الي ..
دكيت و ربطته ع التسجيل و جان راسا تشيله ..
ريا بصوت مخنوك ..: الو .. هلو ملاك ..
ملاك ..:،هلو ريا
ريا ..: ملاك عفية ..اني اسفة و متندمة مليون مرة ع الصار
(جواد ياشر لملاك استدرجيها )
ملاك ..: على شنو الاسف ..
ريا ..: ع الصار كله .. زيدون هو قشمرني و كلي ملاك تحجي عليج كدامي و متحبج و كون انت دكوليله زيدون لا ريا تحجي وية كو ولد ... هاي وحده ساقطة ...
ملاك ..: وين اني حاجية هيج و شوكت ...زين ينقلج حجي دكومين انت تسوين هيج ... تنطي صوري كلها بالحفلات مالتنه ...
ريا ..: والله ملاك هو ما اعرف شلون قنعني و اعترفلي بحبه ..
ملاك ..: شنووووو ... يكلج احبج دكومين انت تخونين صديقتج علمود نزواته ...
ريا ...: والله اني اسفة ... تاكدت منه هو كذاب ... لا يحبني و لا ابد ...
ملاك ... ريا انت غدرتيني ... بس ترة ما علية عتب اذا شفتي شي يبدر مني ادافع بي على نفسي ...

ملاك ...:
طبكته التليفون و اني ممصدكة ... ريا ... عشرة من المتوسطة تسوي بيه هيج ... تخوني ...
جواد كلي هاهي ... اني حسمت امري ...

بعد يومين .....

ملاك ...
جواد و اني رحنه للدكتورة و حصلنه تقرير منها ... على انه اني مغتصبة مو زوجي الي اخذني بهالطريقة ... و قنعتها بالكوة ... و لزمتني على صفحة و كالت لعد هذا منو ... كتلها زوجي ... كالت هذا حافظي عليه بعيونج و سنونج ... انسان ما يتكرر مرتين ... بجيت من حجت هالجمله لان صحيح ... جواد ماكو منه ... انسان يقطر شهامة و رجوله انوجد بزمن كثر بي اشباه الرجال امثال زيدون الحقير ...
جواد فكر و حسم امره بفكرة ... انه يجمع اهلية بابا و اهل زيدون ... و يكعدهم و يثبتلهم اني بريئة من هالصور .. بس قبلها ... لكف زيدون فد مرة بالمنصور بمكان تواجده الدائمي هو يتردد لكوفي هناك ...
و لزمه زورگه ... گله كدام اصدقائه انت تحجي على مراتي هنا و هنا ..؟ لك يا ساقط بس اشوفك تنطق حرف من اسمها لا ادفنك بيدي .... و شغلة ثانية جره على صفحة و خنگة كله اذا مشلت هالليلة هاي كلها ... ولك والله و قسماً بالسماء لا اعلگك هنا ع هالعمارة و اخليك عبرة ... فهمتني يا خنيثة ... دكول لاهلك على فاينتك و تحجيلهم انت المتعدي على ملاك... و تقنعهم باسلوبك الزبالة ... لازم يعتذرون لو تحب بالتقارير و الادلة اذبك بسجن ... و اخيسك هناك ..؟
و فعلاً الگعدة اليوم ... و اني رح اموت من القهر و الخوف ... القهر اخاف ارجع لبيتنه ... و ميتة على شوفة امي و ابوية ... و الخوف ...خايفة على جواد ... خاف ياذوا اهل زيدون ... طبعاً رجل رغد عرف و اهله عرفوا ... و مصدكونه و صدكوا كرايبهم اهل زيدون و رغد ظلت تلوم بية ..
جواد راد رجل رغد و اهله هم بالكعدة ...
طلعت لجواد لكيته يسد الدكم مال قميصه و لبس حذائه ..
اني بهاليومين لا اكل و لا شرب بس احلج و افتت .. و افكر ببابا و بالحجي العليه ..
افكر بجواد و الي ديسوي علمودي ...
صدك اني ما استحق جواد الملاك الابيض .. تني شيطانه شنو يتلوث بياضه بسوادي ...
كمل و كف كدامي مسح دمعه من عيني و كلي ملاك .. لا تنقهرين ادعيلي الله يوكفلي بهالخطوة  و ارجعلج كرامتج و كرامة عمي ..
باسني من راسي .. و طول بالبوسة اني اخذني الحنين لامان طيبته و حنيته .. حضنته حييل و حطيت راسي على صدره و صرت ابجي بلا شعور ... هو خلاني على راحتي .. بس بالاخير حسيته ببطيء رفع ايده و هو هم حضني ...
وخرني و كلي كافي مسحي دموعج .. روحي ادعيلي .. و ان شاءالله الله ينصرني و ينصرج ..
هزيت راسي و مسحت دموعي و كتله ما اعرف شلون اجازيك ... كلي ما اريد شي بس اشوف والدج بخير

طلع و سديت وراه الباب و رحت توضيت و كعدت اصلي و ادعي الله ينصره ...

جواد ...
وصلت لبيت عمي و جانت اللمة هناك .. بس عمي بعده ميكدر يكوم من الفراش فظل بالغرفة مطلع ..
اهل زيدون جايين منهم اقل من العشرة ابوه و اخوته و رجل رغد و اهل ملاك عمومتها ٢ و اولادهم و اني ..
كعدنه بعد ما تسالمنه و اني ما سلمت غير بس على ابو زيدون و عمام ملاك حتى ابن عمها الي هدد بقتلها مسلمت عليه ..
كتلهم يا جماعة الخير اني زوج ملاك و نسيب الحجي ابو رغد .. و اني اتشرف اكون نسيبهم (و جان اباوع ع رجل رغد تقصدته يسمع هالجمله .. )
لانهم ناس تاج الراس و شرف و طيبة و اصل ...
كتلهم ابنكم و مفروض واحد غيري يسكطه و يذبه جوة التراب ...
ابوه مفتشل لان اكيد زيدون كايللهم الي فهمته يكوله ...
نطيت التقرير و نطيت التسجيل كتلهم هاي دلالتنه على انه ابنكم مغتصب ملاك بتاريخ هلكد و دلالتنه ايضا انه ابنكم فبرك صور و هددنه بيها ... ها هسة علينه الحق لو النه ...؟
ابو دنك و نزلت دمعته كال لا عمي احنه العايلين ... كمت وكفت على حيلي و جان يثور الخايس كال يا نذل مو كلت ما اجيب ادلة .. لزمه اخوه الجبير و جان ينطيه راشدي و وكعه بالكع ... كله حرف متنطق اطلع منا .... و طلعوه ...
اهلية ملاك كلهم صافنين و باهتين .. رجل رغد مثل بلاع الموس ... كتلهم شوفوا اني ملاك زوجتي و اتشرف اكون زوج الها و هي على راسي بنت اصول و بنت ناس اشراف ... و عمي ما اسمع احد يجيب طاريه و يكول اسمه او اسم بنته بمجلس ... ملاك اني واليها ... و ملاك ظلمها طيش ولد ارعن ... و المهم اليوم تحدد منو  الظالم و منو المظلووم ...........