رواية اغلال القدر الفصل الثالث والعشرون 23 - بقلم الكاتبة ديانا

سلام يا احلى متابعين
ورود اتمنى اليقرا يصوت ع الجزء و يكافيء تعبي واني اشكركم كلكم وهذا بارت استثنائي كسر المواعيد و صار بين ايدكم
شكراً و انتظر تعليقاتكم و لا تنسون التصويت 🌸😍🌸😍

جواد ...
عفت ملاك و سديت باب الغرفة حييل ... و طلعت من الشقة ... رحت امشي و ما ادري وين و لا حتى اندل ... ردت اضيع .. اتيه و ما ارجع ... مو ضعف مني و لا هروب من الواقع ... بس حسيت اني بالغت بردات فعلي وية ملاك ... ليش هو انت جواد شنو العرفته من زوجوك بتهم ... اعوذ بالله من الشيطان الرجيم .. ما رح اكدر اتخلص من هالوحش البداخلي الي يثور ع اتفه الاشياء ...
اتنهدت و طلع زفير من نار هذا زيدون اني اعلمه .. و ما راح انتظر اكثر الا ارجع و اسوي عبرة لغيره ...
اني يستفزني و يبتزني بصور .... اصبرلي يا خنيثة ....
ظليت اتمشى و اتوجهت للشقة و صاح الله اكبر اذن الفجر ..
صعدت و دخلت للغرفة ... و ظليت مشدوه .. من المنظر ..
ملاك فارشة سجادة و دتصلي .. ظليت واكف و تفاجئت بحركتها سجدت و كامت تبجي بحرگة و تدعي ..
دخلت و كعدت ع السرير .. ارسم بيني و بين نفسي شلون رح اكتل هالارعن و بيش اكتله ...
دگ تليفونها .. و هي تفاجئت بيه كاعد بالغرفه ... باوعت على تليفونها راد تشيله ... و اني اباوعلها و اباوع للتليفون ... توجرت النار بصدري من شفت اسم هالساقط ... كتلها و من بين اسناني المگزگزها ... شيلي ....
جتي شالته و فتحت سبيكر بعد ما اشرتلها تفتحه .. جان اسمعه يكلها ... تعرفين اني بيني و بينج كم كيلو متر ... الحنين الج اخذني و جابني وراج لام الدنيا مصر ... انت جاية تعسلين و اني مشتهي العسل و كلت لازم احصل العسل شنو رايج امسح صورة و تجيني ...
اني عروگ ايدي رادن يطكن من هالكد حاصر اعصابي ...
ملاك ترجف و دموعها عشرة عشرة و تباوعلي ... بخوف ...
الحقير كمل و كلها انتظر منج جواب لو حبيتي امسح صورة من الصور و كلما تنفذين شي امسح وحدة ... شنو رايج خوش اتفاق ... موو؟؟؟
ردت لو بيه و اكدر ادخل من التليفون و اجره من ياخته و اشبعه كتل و بكل الانواع و اخلي دمه بطوله النذل الساقط الحقييير ...
اخذت التليفون منها و جريته كتله يا ارعن يا نذل انت لو رجال جان ما سويت هالشكل ... بس اني رح اعلمك الرجولة يا خنيثة ....
سده التليفون ...باوعت عليها و باعصاب كتلها اني مو كسرت تليفونج ..؟ شنو هذا مين طلع ...؟ كالت هذا خطي الثاني ...
كتلها شكد خطوط عيني عندج .. كوليلي حتى اخذ احتياطاتي .. مسحت دموعها و كلتلي .. ما محسبة يخابر على هذا لان هذا مناطية رقمي لاحد بس صديقاتي ..
كلها هو شنو الهجم بيت ابوج و خلاج بهالوضع غير صديقاتج الشريفات ....
انصدمت من كلامي و شافتني احجي باعصاب ... هي نزلت عينها و زمت شفتها ندم و حسرة ...

ملاك ...
لا يا ربي .. كافي يا الهي .. جواد يحجي و بيده بسمار يزرف بگلبي ... كتمت حسرة و بچي ما اكدر ابچ كدامه ... بس دموعي عاندني و نزلن .. ظليت اتوسل بعيني يسكت ... لان گلبي اليحبه تعب من الاذية ... و ما سكت ...
كمل و كلي .. انجرفتي وية هاي و ذيج و نسيتي ابوج .. نسيتي السمعة الي هي اغلى من الذهب .. و تجملتي و زهيتي و زهت لج الدنية و عبالج الرجال تعجبه هالتصرفات ... عبالج رح تلاكين معجبين ... ما خليتي ببالج الي ينعجب بالرخيص ... رخيص ... رخصتي جسمج و مفاتنج للرايح و الجاي ... و ما فكرتي و كلتي ليش اخلي نفسي متاحة للرايح و الجاي .. ليش اكون لذة و طعم ينضاك على كل لسان .. ليش ما حفظتي هاللذة و الحلاة لانسان يبيع عمره و يشتريج .. يشوفج اغلى من الذهب .. يواجه العالم حتى تكونين اله ... مو تلبسين لبس و تتمكجين و تزهين و تعرضين جمالج و احلى مابيج للكل ...
تنفسه صار سريع و عروگ رگبته بينت من الاعصاب و عينه حُمر ... كلامه كله صح .. كلامه هيج جروحي الي عمرها ما رح تطيب ... اني ضحية اهلي ... اهلي الما منعوني و ما واحد منهم وكف وكفة جواد و نبهني .. حتى لو بكلمات قاسية و جارحة ... اعتقد لو باجية من حجيهم و لا هسة ... و صار الي صار و توجرت بكلبي نارين نار تصرفي الارعن و فسح المجال لزيدون يسوي الي سواااه و نار گلبي الي دگ لانسان و حبه من صدك بس هالانسان تكشف على عيوبي و شمئز مني و مستحيل فد يوم يرف گلبه عليه ... او الاگي بعينه نظرة اعجاب ...
مستحيل ... مستحيل ...
اليوم الثاني .....

ملاك ...
بعد ما جوحني جواد بكلمات حقيقية ... و مطابقة لواقعي الاسود المصخم ... اني ما اعترضت و لا بدر مني اي شي غير الدموع ... و شأحجي و ليش احجي ... استاهل كل الصفعات الي نطانياها ... واحد تلو الاخر ...
گلي تحضري باجر راجعين لبغداد ...
وهاي اني دا احضر الغراض لان طيارتنا بالوحدة الظهر ... و رغم زوج رغد الح علينا ... بس جواد اتفق وية رغد تقنعه انو بابا محتاج جواد كلش ... و لازم نرجع ...
و فتحت الجنطة و لگيت شال جنت الفه ع رگبتي و اسوي اكسسوار هيج يعني ستايل ..
جريته .. و بتردد كدام المراية حطيته على راسي و لفيته زين ... بالبداية بقيت خصلة من البداية طالعه ... بس محبيتها مو حلووو .. رنت باذني حجاية جواد من كال ليش خليتي نفسج و جسمج متاح للرايح و الجاي .. كلامه موزون و كلام عاقل عجبني .. ليش الوحدة منه تكون عرضه للحجي و النظرات الحقيرة من البعض ... شنو الفائدة من العرض لمفاتنها و اغلى ما عدها .. و بلاش ...
كلام جواد صح .. ليش ما احافظ عليه و اخليه غالي و ما ينوله غير الشاري ... و الشاري يكون انسان يستاهل اقدمله الغالي و يكون حلالي ...
المهم شديت الشال و ما طلعت و لاشعرة .. و بنطروني اللابسته طويل و فوگاه لبست قميص طويل و ردانه طويلة .. ابتسمت لمنظري بالمراية ...

جواد ..
دخلت للغرفة و جنت عصبي لان رغد زعلت واني جنت اقنع بيها حتى ارجع ..
كل ملامح العصبية تلاشت ... كل النيران الجواية طفت ...
صورة ملاك و هي بالحجاب خلت عيني تدمع .. لا ارادياً .. ابتسمت ابتسامة هادية .. هي منتبهت ..اندارت ع السريع و جان دكلي ... كملت ....نروح ..؟
شتت نظري حتى لا تحس بية اريدها تتغير مو من ورة كلامي ... اريدها تتغير تحس بكلامي و تشوفه منفذ امل و تصلح حالها ...كتلها اي الجنط كاملة .. هزت راسها ... اي ..
طلعت سلمتْ على اختها المصدومة و رجلها المشدوه من حالها الجديد ..
رحنه للمطار .. و هناك ظلينه كاعدين ننتظر الطيارة ... ورة شوية ملاك كالت جواد اروح للحمام .. هسة اجي ..
كتلها اي اني انتظرج بس لا تتاخرين ...
صراحة ملاك حتى بعد ما لبست الحجاب و عافت المكياج . بقت حلوة و تجذب .. اني توترت .. ردت اكلها اوكفي اجي وياج ... بعدين كلت لا .. اليوم دست عليها بالحجي هواية .... عوفها جواد ...
طولت صار خمس دقايق ... وكفت و صرت اروح و اجي بمكاني و خال ايدي ورة ظهري و كلساع اشوف الساعه .. اتنهدت و وكفت اباوع على الطريق الراحت بي نطيتها عشر ثواني كلت اذا مرجعت رح اروح الها اني ...
و فعلاً ماكو ملاك .. و مشيت بخطوات سريعه اقصد الحمام .. طلعت منه وحدة كتلها اكو احد جوة .. كالت لا .. فارغ
بدة الفار يلعب بعبي .. لا هاي مو سالفة ... باوعت يمنه و يسرة ماكو .. مشيت ليكدام و جان اشوف تحجي بالتليفون و تبجي ... و طلقة رحت و جريته من ايدها ... سمعت هالحيوان يكلها ... ( شوفي الي جنت رايده منج اخذت و غصب عنج ... تدرين لييش ... ؟ لان استلذيت بخوفج و عياطج ... استلذيت بنفورج الي ... مو صعبة لو ردتها منج يجوز بكل سهولة تنطيني الاريده ... بس من اخذت منج و غصب عنج هي هاي اللذة تكمن هنا ... )
الحجي الحجاه خلة شياطين الارض و السماء تسكن عيوني و ما شفت شي كدامي ...
كتله شوف يالجيوان يا القذر اذا انت رجال و دكول رجال ... تكول التريدة و هسة ... و اني كرجال رح اسلمك التريده ...
ضحك كال انت القشمر الي ذبوها براسك مووو ؟ مو وحجيت وياها و يمكن سمعتني انت الفجر ... اريد دفترين .. اممم لا لا اريد ٣ حك سكوتي ليهسة ... اليوم رح التقي وية ابو روز هنا بمصر عازمني على سفرة لشرم الشيخ ..
اني اسمع و ساد عيني و ضاغط على اسناني .. و ايدي عاصرها و محضرها الكم اي واحد يعترضني و يصير كبالي .. كتله زين .. اذا انت رجال و من ظهر رجال تمسحهن و اليوم يحولواي المبلغ و نتفق على مكان و تعال اخذه ..
كلي اوك خوش اتفقنه .. المكان بمطعم (..) تعال وياك كل المبلغ .. و لا تصير حامي الحمة .. و تطلعلي عضلاتك ... لان متاكد حتى الفلوس مو منك ...
كتله تمام ... بس طلعتها بالكوة الحجاية و لزمت نفسي بالكوة من التهور و ما اغلط عليه هالساقط بس اني اعلمه ..
انداريت على ملاك لگيتها منهارة بچي ...
حاوطتها بذراعي و كتلها ملاك .. انت انظلمتي و لازم نكشف الحقيقة ...
هي فزت و كالت شرح تسوي ..؟
كتلها امسحي دموعج ...... جواد رح يكون الج سند و يرجع حقج ثالث و مثلث .......
***********************************
امير ...
انگطع الاتصال وية علي .. و معرفت شيسوي بالفلوس ... دكيت مرة ثانية عليه .. كتله علي شنو السالفة ..؟ شسوي بالفلوس ..؟گلي امير واگع بمشكلة و من ورة الحجي ... و لو تدري امير حلمي تحقق .. امير حب حياتي زينب لگيتها ... كتله شلوووون و وين معقولة .. و هي شنو سالفتها بالحجي ... كلي هذا موضوع طويل .. فلوسك تكفي مال تكتين طيارة لبغداد ..؟
كتله لا بابا اخذتهن كلهن و شلعت وية مرتي الجديدة .. و عليت حسي متقصد اسمع عسل ...
كلي امير روح انت ما منك فائدة..و سده التليفون ...
اسيل شفتهة عدلت كعدتها و جان دكلي ها هذا صاحبك اكيد دله الحجي علينه و طمع بفلوس الحجي الي قدمها اله موووو اي ادري بهالاشكال... لا اكيد هذا مو علي الي ببالي .. ذاكه شهم ساعدنه هواية ...
كتلها بسسسسسسس ... شبيج عرك ... خليني افهمج ام كفشة ...
جان تخنزر علية و دكلي لا تمون تره مدا اتحملك و يمكن اخنكك هنا ... قبل منوصل لبغداد ...
كتلها لج ... و جان الوي ايدها و اححطها وراها و هي صار ظهرها علية .. همست باذنها ... واني مكزكز .. شوفي لج ... احترمي و اسمعي الكلام و لا تحجين وياية بهالنترة ترة والقرآن اشوفج شي ما شايفته بعمرج كله ...
كلتلي ههه شنو الي ما شفته بحياتي ... ابشرك كلشي شفت ...
رجف جسمها و اختظت بين ايدي ... جان دكول هدني امير و اختنگت بعبرتها ... هديتها و جان دكولي لا تكررها بس مششفت وجهها لان مدنگة ... اني جريتها من وجهها بايدي و قربت وجهي منها و خشمي طخ خشمهاوجان اشوف دموعها المحبوسة بعينها و رغم هذا ما ضعفت ... كتلها تعرفين تحترمين ... ما اكررها و احترمج ..... متحترمين تشوفين الاسوء ...
غمضت عينها حيل و تاذت من ايدي ... و جان تنزل دموعها ... اني من شفتها تبجي و هنوب فتحت عينها الي جانت بحر حزن ... مليان سوالف مجروحة ... خلت گلبي تتكسر حياطينه و ملامحي تلين و ايدي خففت ضغطها على وجهها ... كتلها عرفتي لو اعيد ....؟
احتدت ملامحها و هزت راسها .. اي ..
هديتها و كتلها علي .. صارتلة مشكلة وية الحجي ... تريدين اتصل بي تحجين وياه .. ؟
باوعتلها مجاوبت .. بس عينها تريد دكول اي ...
اني اخذت الموبايل و دكيت على علي ... طلعلي
امير ... علي شلونك .. وين انت .. ؟
علي ..: اني بمحطة القطار
امير ..: هاي عسل تريد تحجي وياك ..
علي ..: اي
عسل ..: الو مرحبه ..
علي .:: اهلاً ..
عسل ..: بلة زحمة اريد اسالك سؤال لان ملامحك مشبهة بيها .. انت مو جنت ساكن ببيت تجاوز..
علي ..: اي بفترة من الفترات .. ليش
عسل ..: اني عندي قصة قديمة و ية شخص يشبهك و مضيعة عنوان شخص ثاني و بلكي كلت انت هو و تدليني العنوان ..
علي ..: دقيقة ممكن شوية و اخابر لان اعتقد وصلتي ..
عسل ..: ليش دتطبكة كمل عفية ،.
علي ..: ما اكدر اكمل هسة اغير مكاني و اخابركم

علي ...:
يا رب تطلع وحدة كن خوات زينب ... زينب هسة وشعها ميسمح احجيلها لان كلش تعبانة .. خابرني شوان و كلي الحك جيت لگيتها جايتها نوبة الصرع و حالتها حاله ... هذا المرض ما راح منها ..
بعد ما استعادت وعيها و غسلتلها .. كتلها امشي نرجع لبغداد .. كالت و مؤنس .. كتلها دزيله احد من معارفه يجي عليه ترة خالد رايدج يساوم بيج زوجج ..
ابو سلمان اطقست منه و عرفت... و خالد حس بية كذبت عليه و هسة دز حراسه يدوروني ...
كتلها زينب كعدني هنا هسة اجيج ... كعدتها ع مسطبة و رحت ليغاد حتى اخابر امير .. لان ظاهر زينب رح تنجمع وية خواتها و اخيراً ...
علي ..: الو
عسل ..: الو ها عفية ... وياك كمل ....
علي ..: انت انطيني اسماء و اني رح اكولج اني هذا الشخص لو لا ...
عسل ..: تذكر بيوم جينه الكم زينب اختي و اني و اختي و اخوية الزغير ...

علي ...:
حطيت ايدي على حلگي و حاصر بچية عمرها سنين .. يا ربي و اخيراً رح اكون سبب و لو صغير بارجاع البسمة لثغر حبيبتي زينب .. صدت عيني الها وجانت كاعدة و بوسط هالة حزن عينها بيها دمع لو انكلب سوالف جان ما كفته الحروف و ما استوعبته كل لغات العالم ..
كتلها اي اني علي ... انت اسيل لو شمة ...؟
عاطت و صرخت و ظلت تبچي و كالت اختي ويين..؟ عفية ..؟ تعرف زينب وين؟؟؟ علي الله يخليك زينب ووويييييييييييين .....؟