رواية أحببتُ ذلك الغريب الفصل السابع عشر 17 - بقلم عبير إدريس

Journey to the future
رحلة الى المستقبل

أسمار : مافهمت عليك إيساف

إيساف : هذه رغبة أديم ما نكدر نخالفها ونبلغج الا بعلمه..

أسمار : تحققون رغبته مقابل خساراته ؟

حجيتها ونظراتي ثبتتهم بعيونه لأول مرة أسويها جنت منهارة..

إيساف : انت انطيه العذر .

قاطعته.

أسمار : اي عذر هذا اي عذر انطيه اله وهو تخلى عني .

إيساف : ما تخلى خليني أكمل ، اني لو بمكانه وعندي زوجة بهذا الجمال وصار موقف مشابه جان أول ما فكرت بيه الإنتحار رغم اني إنسان مؤمن والمفروض ما اجزع..

أسمار : بس هو حتى ما سمعني رفض يصغي الية..

حجيتها وبجيت.

إيساف : هسه هو عاجبه يختلي بنفسه خليه يرتاح وبعدها نرجع نفتح وياه الموضوع.

أسمار : لأن يريد يختلي بنفسه رفض يجاوب اتصالاتي لو بعده مصدك اللي صار ..

إيساف : هذا الشي بداخله اني ما اكدر اجزم واكولج السبب الحقيقي وراء رفضه لسماع صوتج او حتى قربج.

بوهن كلت.

أسمار : بس اني ما أتحمل فكرة الابتعاد عنه معناها نهايتي..

إيساف : وهو رافض رفض قاطع يعتمد على اي شخص ومصر هو يتحمل مسؤولياته..

أسمار : الكاعد تحجيه مستحيل اوافقكم بيه ولا راح امشي ورا مزاجيته.

إيساف : مأرقته فكرة العجز عن تقديم الحماية والامان الج ولأبنه وكلما نحجي وياه مقدم فكرة السفر للخارج على اي فكرة ثانية..

أسمار : شنو يسوي بالخارج اريد أفهم وين يروح وعلى منو يعتمد.

إيساف : يكول هناك الطب متطور واحتمال يريد يشوف حل.

أسمار : ليش سوا عملية هنا وجازفتوا بيه اذا ما تنجح؟

إيساف : ماعندي علم ولا خبر باللي راح يصير..

أسمار : هذا طبعكم ال أشعب تديرون ظهركم للناس اللي تحبكم وتريد خاطركم ؟

اشاح بعيونه للجهة البعيدة وكال ..

إيساف : أديم حاله حال كل الرجال يريد يكون زوج كامل ويحسس زوجته بهذا الشي..

أسمار : ليش منو كال هو مو زوج كامل ، احنا جنا عايشين أجمل حياة وتأقلمنا ليش صدك بيهم وماصدك بية ليش مصر على اتهامني بأبشع التهم وين حبه وين حنانه وين خوفه علية هيج يتركني للمجهول عادي عنده أروح واترك المزرعة ؟

إيساف : أفعاله خارجة عن سيطرته والكاعد يسويه مو بوعي وادراك صدكيني هو خايف تتركيه بس كبريائه يمنعه يتوسل بيج ويمنعج تروحين..

عيوني غركت بالدموع بقهر كلت..

أسمار : يستحيل أديم يخاف من شي او يهزه شي.

إيساف : يخاف فقدانج وبنفس الوقت هو حزين ومتألم..

أسمار : اسمحلي أشوفه..

إيساف : صدكيني رافض يحجي وية أحد وحتى رفض زيارات الاقارب والاصدقاء.

تقربت منه بدموع وصوت تعبان ومجهد كلت.

أسمار : بس أني زوجته وحبيبته لا صديقه ولا اقاربه ولا جوارينه حتى يرفض يشوفني.

إيساف : راح يحتاجج بس بعدما يصيبه اليأس..

أسمار : واني ما راح اخليه يوصل لهيج مرحلة..

إيساف : مستعدة تحاربين ؟

أسمار : طبعاً اذا لحبيبي ما حاربت و وكفت وياه شنو بعد حياتي عليمن عايشة

إيساف : الله يسهل روحيله بغرفته القديمة نايم.

جريت نفس خوف على فرحة لأن سمحولي اشوفه ، اول ما دخلت شفت أفنان وامه الحجية سلمت عليهم جانت وجوههم ثكيلة ، باوعت بايد أفنان صينية أكل ، همست.

أسمار : الصينية لأديم؟

هزت راسها ب اي.

أسمار : اني راح اخذها اله.

أفنان : ماراح ياكل .

أسمار : ليش ؟

أفنان : لان هسه طلعت من الغرفة واخذت الاكل نفسه مثلما دخلته.

أسمار : صارله هواي الاكل بالغرفة؟

أفنان : تقريباً نصف ساعة.

أسمار : احميه لو اصبله جديد.

اخذت الصينية منها رفضت راحت هي حمته واخذته منها ورحت لغرفته فتحت الباب ، وكفت اتأمل ملامحه الحادة والحزينة، عقدة الحاجب وقساوة الفم، عيونه ملفوفة بالشاش الابيض لان مسوي عملية من فترة.

اجتني رغبة اترك كلشي من ايدي واروح احضنه خفت من ردة فعله تكون قاسية من المرة الماضية ويمكن اكثر هسه..

اجيت للمزرعة بدون علامات يعرفني من خلالها واولها العطر.

بتردد وصوت حاد كال.

أديم : كلتلج ما عاجبني آكل ليش تلحين يا أفنان..

حجاها وكز على أسنانه ، رجفت ايدي وطلع صوت شهكتي ماكدرت أكتم نفسي ولا مشاعري ولا دموعي اطلقتها مرة وحدة..

بايد ترجف مررها بشعره ازدادت ملامحه قسوة ، تركت الصينية من ايدي وتقربت ، اراقب حركاته بحذر كام من السرير متوجس طريقه لعكازته ، جان مرتبك انضرب بالكرسي اللي كدامه كام يسب ويضرب الكرسي بعنف ، وكعت العكازة بالكاع دنك حتى يجيبها ركضت بخطوات سريعة حتى أساعده ، تراجع وعدل وكفته بصوت يرجف كال...

أديم : بالله عليج ليش اجيتي؟ حتى تشوفين عجزي لو تعاقبيني ؟

أسمار : اني اعاقبك أديم انت روحي.

طلعت منه شهكة مسموعة باستغراب ممزوج بصدمة كال..

أديم : سمرة ؟؟؟

حجى اسمي وتبعتها آه حارة مغلفة بعاطفة عميقة فضحت حبه واشتياقه وتعلقه..

أسمار : اي سمرة منو تصورت اجه ؟

بصوت مرتبك كال.

أديم : تصورتج وحدة من البنات ما تخيلت انتِ تجين.

تجرأت وتقربت منه حضنته ، جسمه متشنج عبرلي عن عدم رغبته بهذا الحضن ، تركني وكعد على الكرسي القريب بعدما عدلته..

أسمار : أديم اني رجعت وما راح اتركك مرة ثانية حتى اذا طردتني..

أديم : ليش رجعتي ؟

أسمار : اني ما رحت برغبتي حتى ارجع بدون رغبة مني ، اني رحت لان ردت انطي فرصة لحبنا ونشوف نكدر نعيش ونكمل بدون بعض او لا ، بالنسبة الية ماكدرت واجيت اليوم حتى اسألك انت كدرت تعيش بدوني او لا؟

ارتفع صدره وكتم انفاسه وبصوت عدائي كال.

أديم : ارجعي من وين ما اجيتي اللي بينا انتهى.

تقربت منه وكعدت قريبة رجليه حضنتهم بايدي خليت راسي بحضنه وبجيت ، مسد راسي برقة ، تخيلت انو تقبلني او حن علية وانتهى كلشي وراح نرجع ، هذا الشعور اللي انتابني خلاني اتحمس وارفع نفسي أحضنه بقوة ، تسارعت دكات كلبي بشغف ، هدأت من شفت بروده وما بادلني الحضن ، نزلت ايدي وابتعدت شوية لكيته مرجع راسه ليورا بألم كال..

أديم : اخذي كفايتج من حضني وارجعي من وين ما اجيتي اللي تسافر بدون علم زوجها ما تستاهل تربط اسمها باسمي ، أسمار اني طلكتج غيابي..

عكدت حاجبي بصدمة كلت.

أسمار : شنو ؟ انت طلكتني من شوكت ؟

أديم : خالتج ما بلغتج ؟

أسمار : لا ما كالت ولنفرض كالت طلاكنا باطل لان مو برغبتي.

وجهه صار اصفر وشفايفه تحول لونهم ابيض ، بلع ريكه بصعوبة بعدها كال.

أديم : كلشي انتهى وخلص ماعندي شي اضيفه.

باوعتله بنظرات غضب وعصبية كلت.

أسمار : مو بكيفك تنهي شي هسه بدا .

أديم : شنو قصدج؟

تقربت وبخبث طبعت قبله على شفايفه وهمست بأذنه اربكت احواله..

أسمار : لان نبض ابنك مختلط وية نبضي...

حجيتها وطلعت ما انتظرت جوابه ولا ردة فعله ، سمعته بصوت عالي يصيح.

أديم : أسمار أسمار..

ويردد باسمي ، طلعت من البيت لحديقة المزرعة افتريت بيها و وكفت بالمكان اللي اجتمعنا بيه قبل كم سنة ، أول عزيمة النا برمضان ورجعت بالذاكرة للاتصال مال إيساف..

أناهيد : هاي شنو وشعجب وافقت ؟

عارف : احرجني وماكدرت اردله طلب والعزيمة ما تنرد يا أم أسمار.

أناهيد : ما اعرف بعد واني وين بية حيل طريق سامراء طويل.

أسن : اي كلش وازدحامات اني من هسة ما اجي.

أسمار : ولا اني .

عارف : وحدي اروح يعني ؟

أسمار : بابا اني اريد ارتاح لان عندي موعد ثاني يوم وية المركز اريد ارجع اشتغل وياهم.

عارف : شعجب مو كلتي دراستي والمركز صعب اوفق بيناتهن.

أسمار : ضجت من كعدة البيت وبنفس الوقت عاجبني استقل مادياً.

أناهيد : اسبوع اسبوعين ونشوف ام الاستقلال المادي من وين تاخذ مصرفها.

أسمار : ماما ترى اني لوما دراستي مستحيل اترك المركز لان كلش احب شغلي هناك.

أناهيد : اي ماشي ما نختلف ننتظر ونشوف.

أسمار : تمام.

عارف : هسه شنو وحدي اروح كلش عيب .

أناهيد : احتمال اني اجي وياك لان الحجية أحبها ..

عارف : هذا هو متفقين نروح اني وياج نأدي الواجب ونرجع

أناهيد : اي ان شاءالله..

بعدها تغدينا ورجعنا اني وخالتي للبيت ، ومرت ايام الاسبوع بهدوء بدون حدث يذكر ، صباح يوم الجمعة خابر بابا كال احنا طالعين اجوي علينا اللي عرفته منه ، جاي إسلام والسايق مالتهم ماخذين بابا وماما الساعة جانت بالضبط ٨ ونصف ، سديت الموبايل ورحت يم خالة فتحت ايديها ونمت عليها حست علية حضنتني ونمنا بعمق ، جنت محتاجة حضن حنين ارتمي بيه ، كعدت على صوت اياس يبجي فزينا اثنينا..

أسن : هذا اياس كعد.

أسمار : اي رايحتله ارجعي نامي.

أسن : نمت هواي كايمة اني هم ..

تركنا الغرفة واتجهنا لغرفتي لكيته كاعد ويدور علية بعيونه رحت حضنته ورفعته لصدري ضم وجهه بين ركبتي وحاضنها بايديه الصغار..، اخذتهن بوستهن وهو يضحك والنعاس معشعش بعيونه..

رن موبايل خالتي اسمعها تكول..

أسن : اي يا أناهيد شمدرينا راح تتصلين نمنا بعد ، لا هي نامت يمي بعيد عنها الموبايل ، هاي شنو اي غير تنطينا خبر اهوو يا أناهيد واياس شلون ؟ هذا هو هسه اشوف اسمار شنو رأيها ، اي يلا مع السلامة..

سدته واجتي لغرفتي جنت شايلة اياس وبعدني واكفة بمكاني وكفت بباب الغرفة وكالت.

أسن : بدلي.

أسمار : ليش ؟

أسن : خابرت أمج وكالت الحجية من شافتكم ماكو زعلانة وكايلة ضروري ييجون والشيخ وأديم نفس الشي واجوي أسمر وأرود بالطريق حتى ياخذونا وتكول ساعة بالزايد وهم يمكم.

أسمار : هاي شنو ؟

أسن : هذا الصار بعد عيب نرفض.

أسمار : اي صحيح، زين اياس وين اوديه اني لهذا السبب رفضت اروح وطلعت حجة بالمركز.

أسن : ناخذه ويانا عود ليش ما تقبلين يعرفون عندج ولد.

أسمار : كلتلج سابقاً لان مو وقتها اني شنو عرفت عنهم حتى احجيلهم اسراري وبعدين شمدريني ما يصير استغلال بالموضوع ؟

أسن : هم صحيح.

أسمار : مو مجبرة احجي شي الا بالوقت المناسب اذا هو سألني عن حياتي احجي ليش هسة اسردله تفاصيل وبعدين ياخذها بنظرة ثانية احتمال يفكر انو اني من حجيت هيج بنية استجداء عطف منه او اهتمام او يمكن حتى ابين له عندنا ظروف تتشابه وتعال خلي ظرفك على ظرفي ونتزوج.

أسن : وهذا اللي راح يصير اذا استمريتي بالعلاقة..

أسمار : صحيح اذا هو حب يعرف عني شي راح احجي تفاصيل بس اذا ما سأل ليش احجي .

أسن : هم بيها وجهة نظر بعيدة ، المهم وين توديه لاياس؟

أسمار : ترانيم راحت وياهم؟

أسن : اعتقد اي لان عاجبها تزور الملوية وكالت فرصة ..

أسمار : تولان راحت ؟

أسن : لا ما راحت ظلت بالبيت يم أدلر وثابت..

أسمار : شعجب ماما ما أخذتهم.

أسن : رفضوا تعرفين بيهم ما يحبون الاختلاط..

أسمار : اذا خليت اياس يمهم عادي ؟

أسن : تولان كبيرة وهي ساعات ماراح نعوفه ايام ، وبعدين اياس كبير لا محتاج ممة ولا حفاظة وياكل وحده..

أسمار : اي هو بس تخلي عينها عليه..

أسن : بدلي وخلينا نروح لبيت أهلج ننتظرهم هناك لان ما يعرفون اني وياج كاعدين وحدنا..

أسمار : اي يلا هسه ابدل لاياس وبعدين اني.

أسن : تتأخرين روحي انتِ بدلي واني ابدل لأياس ..

أسمار : لا هسه على السريع

أسن : أسمار تبدل على السريع لا عيني يلحكون جايين ومنتظرينا ساعة وانتِ بعدج..

اخذت اياس مني بدلتله واني رحت بدلت ، ولفيت حجاب على راسي احترام للشهر الفضيل وللعائلة اللي احنا رايحيلها كملت ورحت حتى ابلغ خالتي هم تلبس حجاب لكيتها لافته وكاعدة بالهول شافتني ضحكت.

أسن : حلو عليج الحجاب اني مطلعني جبيرة.

أسمار : بالعكس كلش حلوة ، وجهك طالع بيبي فيس.

أسن : اضحكي علية وقشمريني سمورة.

أسمار : لا اضحك عليج ولا اقشمرج هذا واقع..

أسن : يلا اعتبريني صدكت.

حجتها وضحكت.. ،..

أسمار : يلا نطلع؟

أسن : يلا..

طلعنا وصعدنا سيارتي متوجهين لبيت أهلي وصلنا طبكت ونزلنا دكيت الجرس فتحه أدلر بوسته ودخلنا جوة سألت عن تولان كال بغرفتها تقرا ، جانت عطلة بس تحضر للصف السادس الاعدادي اخواني أدلر يصغرها بسنة وثابت بسنتين..

أسن : راح اصعده فوك واجي انتِ ابقي جوة خاف يبجي عليج.

أسمار : تمام..

اخذته وصعدت ، بعدها اجتي كعدت يمي وانتظرناهم لحدما اجوي ، اندك الباب طلع أدلر ورجع بلغنا بجيتهم طلعنا جانوا واكفين بالباب ضحكوا من شافونا، مشينا يمهم سلمنا ردوا السلام بعدها اسمر بضحكة كال..

أسمر : عمي شنو هالثكل هذا يعني ضروري اتعبونا ونتعنى مناك لهنا خو من أول وتعالوا.

أسمار : زاحمناك استاذ أسمر.

أسمر : لا يابة نشيلكم على راسنا صدك جذب بس اذا النية بايتة جان حميتوها واجيتوا من الصبح.

أسمار : جنا نعسانين لهذا السبب.

أسمر : يلا يابة تفضلوا ..

فتح باب السيارة مأشر عليها بضحكة..

صعدنا وانطلقنا لمدينة سامراء، وصلنا وية الغدا ، نزل أرود فتح الباب ودخلنا للمزرعة بالسيارة، تأملت المكان بصورة ثانية عن اللي شفتها اول مرة اجيت بيها لهنا ، الاشجار الخضراء من الليمون والبرتقال تحيط نوافذ البيت الكبيرة ، استنشقت رائحة العطر المنبعث من شتلات الورود ..

نزلنا وتصادفنا وية رجل داكن السمار يميل بالشبه لأسمر ، حجى وية أرود بعربية واضحة وسليمة كأنما يلقي خطاب مو كلام عادي ، استغربت طريقته بالكلام ، التفت أسمر علينا وهمس..

أسمر : هذا ابو الحر ابن عمنا طالب دكتوراه بالفقة الاسلامي..

تقربت خالة مني وهمست.

أسن : باعي نظراته ليش يباوع النا بحقد.؟

أسمار : شمدريني احتمال هو مو هيج بس انتِ حسيتي احساس غلط

قاطعنا أسمر من كال.

أسمر : تفضلوا بالصالون الحجية بانتظاركم.

ابتسمت خالة وهزت راسها ، دخلنا لكينا ماما والحجية وأفنان كاعدين استقبلونا اجمل استقبال ورحبوا بينا بعدها كعدنا ، همست لماما.

أسمار : بابا و ترنيم وين ؟

أناهيد : راحوا يزورون الملوية لان بعد الفطور ما يكدرون يطلعون.

أسمار : منو راح وياهم ؟

أناهيد : الشيخ إيساف واخوهم إسلام.

أسمار : هاا.

أناهيد : تأخرتوا هواي.

أسمار : ما تأخرنا أول ما اجوي طلعنالهم..

أناهيد : اي الطريق بعيد..

أسمار : يادوب اصلا.

أناهيد : صحيح.

التفتنا على صوت الحجية وهي تحجي لخالة تكول...

عمرة : ابوه جان يموت عليه أكثر واحد يحبه وفضله على أولاده رغم وداعة حيلي وعافيتي جنت ما اقبل اكوله عيوني ابو أعقل لازم ما تبين حبك لأديم بهيج طريقة راح تخلي اخوانه يكرهوه ويحقدون عليك وعلية بس جان يكولي هذا ثمرة حبنا اللي انتظرناها سنوات طويلة حقي افرح بيه وادللة مثلما دللت اخوانه لحدما كبروا واني مامقصر وياهم ، كلتله حشاك من التقصير بس حاول تساوي بينهن ، اني اعرف يحبهم كلهم واعرف مدللهم كلهم ، بس امهم الله يرحمها ويسامحها جانت تزرع افكار براسهم وييجون يكولولي بالحجي واني افهمهم بطريقتي واطيب خاطرهم لهذا تشوفيهم يحبوني ويلتمون عندي وترى كلهم عايشين وياية بس الكبار من تزوجوا طلعوا برا ، وأرقم من انفصل عن زوجته رجع سكن يمي .

أسن : الله يحفظهم لهذا ثار فضولي وسألت عن حبهم واحترامهم الج بهذه الطريقة الحلوة ، حجية تستاهلين الحب انتِ .

عمرة : ياعمري سنية ياحلاوة وجهك من يضحك ، تعرفين بمنو شبهتج اني.

ضحكت خالتي وهمست بخجل.

أسن : بمنو ؟

عمرة : شنو اسمها الممثلة اللي كلتلج عليها يمة أفنان.

أفنان : ماجدة الصباحي.

عمرة : اي عفية بأول شبابها شكد تشبهج يايمة حتى إيساف هم كال اي صحيح تنطيها شبه.

ضحكت أفنان ، اني همست لخالتي.

أسمار : شفتي عمنا إيساف بمنو مشبهج اذا ما طلع هو خالها براس الحجية تعالي عاتبيني.

ضربتني بعكسها وكالت اس ، ضحكت ، بعدها التفتت أفنان على الحجية وسألتها.

أفنان : يمه الحجية بمنو شبهتي أسمار ؟

عمرة : يااا بيوم اللي سألني أديم حتى اوصفياله ..

أسن : فضحتيهم ياحجية..

حجتها خالتي وكلنا ضحكنا ، ..

عمرة : ضحكة خير يايمة اني ولدي كلهم طيبين وخوش ولد وحبابين وصدكوني نظرتهم كلها احترام وحجينا بيكم بالخير بس تعرفون ابني ما يشوف مرات يسألني اوصفله اشكال الناس او الاشياء اللي اني اشتريها او شنو الالوان اللي لابستها حتى يتصور المكان والموقف وما يختنك بظلامه ، سألني وكلتله تشبهين شمس البارودي مثل هدوئها برودة ملامحها.

أفنان : اي صحيح..

عمرة : هو اني من شبهتج بهذه الممثلة ،هنا الشيخ سألني وخالتها المن تشبه عاد اني شبهتج بماجدة..

أفنان : حجية والله لو يدرون بيج فاضحتهم.

عمرة : ليش يمة اني شنو كايلة ؟

التفتت علينا وكالت.

عمرة : حجيت شي ؟ غير اسولف وية بناتي.

أفنان : نحجي لإيساف ونشوف شنو رأيه.

عمرة : بالج تحجيله ازعل عليج فنينة.

ضحكت وكالت.

أفنان : يعني تدرين شي غلط بس الج غاية حجية.

عمرة : غايتي كل الخير بيها بس مو وكتها هسه.

تنهدت وحجتها بعدين باوعتلي وابتسمت..

ظلينا نحجي بعدها صار صوت عالي بالبيت كالت أفنان اجوي الولد وكامت طلعت من الصالون ، ماما كالت للحجية اذا يحتاجون مساعدة او لا ، كالتلها لا البنات يكفون ، تقصد زوجات ولدهم ..

دخلت ترنيم مبتسمة وكعدت يمي.

ترنيم : شوكت اجيتوا؟

أسمار : صار ساعة تقريباً..

ترنيم : هاا زين..

أسمار : تونستي.

ترنيم : كلش ولج صعدت اخر شي حسيت بدوار خفيف بس بعدين سيطرت.

أسمار : ترنيم ..

ترنيم : نعم.

أسمار : صار شي وياج ؟

ترنيم : لا ليش؟

أسمار : ما اعرف وجهج أحمر وفرحانة معقولة السبب بس لانه زرتي الملوية ؟

ترنيم : اذا قصدج صادفني شي ولازم احجيه ، ثقي لا جان حجيت.

أسمار : هذا رأيي هم.

اخذتنا السوالف ماحسينا الا وصارت ساعة خمسة ، والكل توضىء وفرشوا سجاداتهم ونسمع تلاوة القران يقرأون بصوت خافت، حتى الحجية بمكانها جابتلها أفنان مي توضت بيه وكعدت تقرا قران تخيلت منظرهم بدون ما أطلع مثلما اصطفوا بالاستقبال مالتنا..

بعد ساعة طلعت أفنان من الصالون وسمعنا خبصتهم ناس تردم بناس ، مثل الاجواء اللي عشتها ببيت عيالي هم جانوا هيج ينخبصون وقت الفطور.

فرشوا النا سفرة ومدوا بيها اصناف عدة من الاكل ، والرجال بالصالون الثاني..

سمينا بسم الله وجان غدا النا وفطور الهم كملنا بعدها صلوا المغرب وبعدين قروا قران ورجعوا صلوا العشاء صارت الساعة قريب ثمانية وشوية دخلت أفنان وكالت.

أفنان : تفضلوا برا نشرب الجاي والكهوة.

لبسنا حجاباتنا وطلعنا برا لكينا كعدة عربية بمكان داخل المزرعة يجنن ، عبارة عن ديوان عربي وبالوسط دلة الكهوة على الفحم ، والفناجين ، والجهة الثانية قوري الجاي والاستكانات ، وصينية حلويات وكرزات ، فواكه ، بابا كال.

عارف : يابة هواي مكلفين نفسكم..

إسلام : حجي يومية انت جايينا.

فات أرقم سلم سريع ودخل جوة قاطع كلامهم، بعدما شربنا الكهوة من ايد أسمر وقسم شرب جاي ، اكلنا حلويات ، طلع الشيخ إيساف سلم وتوسط الكعدة ، بدأها بالصلاة على محمد وال محمد..

صل الله عليه وعلى آله وصحبه أجمعين

بعدها كال..

إيساف : حبيت اليوم نتشارك اجواء هذا الشهر الفضيل ، وبنفس الوقت ظل ببالي بجيتنا الكم من سألتني عدة أسئلة عن تفسير القران وعن الغاز معينة بيه ، بوقتها حجينا بصورة سريعة وما اخذنا وقتنا الكافي بالشرح والتفسير.

عارف : اي صحيح ولو تعرف بهذا الاسبوع المضى حضرتلك اسئلة جان عندي بعض التحفظ اتجاهها او ما مقتنع بالشرح اللي قريته ردت افتهم منك أكثر..

إيساف : اي ليش لا تتدلل كلشي كاتبه لو حافظه على الغيب؟

عارف : لا قسم حافظهم وقسم كاتبهم بالموبايل.

إيساف : اي تمام اذا هيج هسه نتاقش بشكل موسع.

عارف : ياريت والأجواء تسوي واهس .

ضحك الشيخ ، بعدها انفتح باب المزرعة وفاتت سيارة أديم عكدت حاجبي ، طيلة وجودي اسأل نفسي وينه ليش ما سمعت صوته بس ماحبيت اسأل ، وكفت السيارة نزلوا منها أرود وأهاب وأديم ، وكفوا يمه حجوا وياه عكد حاجبه جان متوتر جاهلة السبب هل هو مجيئي لهنا وتره او شي ثاني وبعدين ليش ما أفطر بالبيت ، هواي تفسيرات اجتي ببالي..

مشوا وصلوا يمنا سلموا علينا بعدها أهاب صافح بابا عرفت هسه يلا شافه ..

طلب منهم إيساف يشاركونا الجلسة ، كعدوا بس أديم ترخص حتى يصلي ويرجع ينضم النا ، دخل للبيت تبعته أفنان ...

إيساف : اي حجي عارف اسأل ..

ضحك بابا وكال..

عارف : سمعت مفسرين يقولون ،( ربنا يعلم ) هذا قسم عند العرب ومن قال ربنا يعلم وهو غير صادق فقد كفر مو مثل حلفان اليمين .

إيساف : صحيح لانه نسب الجهل الى الله ..

عارف : اني فهمت ربنا يعلم مثلاً اذا سألتك عن شيء حضرتك تكولي ما اعرف الله اعلم هذا الكفر او المفهوم بشكل ثاني؟

إيساف : لا اذا اشهدت الله على كلام غير صحيح انت تكوله ( مثلاً تحجي شي وتكول الله يعلم بما اقوله ) وبداخلك تعلم ان هو كذب بهذا الشيء تنسب الجهل الى الله وبالتالي كفرت بالله..

عارف : انطيني مثل حتى افهم الموضوع اكثر.

إيساف : مثلاً شخص سرق وسألوه هل سرقت كذا شيء فيقول يعلم الله أني لم أسرق هنا استخدم الجملة للقسم ، بهذا الشيء نسب الجهل الى الله وبالتالي قد كفر..

عارف : فهمت ، ومن عجائب القران الكريم لم ترد كلمة سنة مفردة ابدا فقط كلمة عام..

إيساف : صحيح يعني ما ترد سنة او سنتين ابداً تجي الف سنة وبلغ اربعين سنة و في بضع سنين..

العام يرد للواحد والأثنين والجمع مثلا..

قال تعالى فصاله في عامين يحلونه عاماً ويحرمونه عاماً..
بل لبثت مئة عام..
العام يأتي مفرد ومثنى وجمع..

عارف : سبحان الله العظيم.

إيساف : سألتني اليوم ما الفرق بين الخاطئ والمخطئ؟

عارف : صحيح.

إيساف : الفرق الخاطئ هو الذي ارتكب الخطيئة عمداً ، المخطئ غير متعمد بالخطأ..

عارف : ما الفرق بين لدي ، وعندي ..

إيساف : الفرق بين لدي وعندي هو أنّك تستخدم لدي إرادتك الكلام عن وجود الشيء حاضرا بحوزتك فتقول لدي رمان ، وتقصد أنّه حاضر بحوزتك . أمّا عندي فتستخدم لما في حوزتك حاضرا أو غائبا --فتقول "عندي رمان ولا يستطيع السّامع أن يقدّر أنّه حاضر معك أم غير حاضر

عارف : ماشاء الله وسبحان الله ..

إيساف : الحمدلله ..

عارف : من عجائب القران الكريم ذكر بسورة الانعام بسم الله الرحمن الرحيم.

(وَ مَنْ يُرِدْ أَنْ يُضِلَّهُ يَجْعَلْ صَدْرَهُ ضَيِّقَاً حَرَجَاً كَأَنَّمَاْ يَصَّعَّدُ فِيْ السَّمَاْءِ)

شلون يصعد الى السماء اني هنا وكف عندي العقل من لما قريت السورة ودققت بيها، كتبتها حتى استفسر منك.

ابتسم إيساف بهدوء كال..

إيساف : صاعد طيارة قبل أبو أسمار ؟

عارف : شي اكيد ..

إيساف : اوصفلي شعورك اول ما تركب الطيارة وتطير بيك وتصعد للسما.

عارف : اشعر بضيق بصدري.

إيساف : برأيك من الذي أخبر النبي محمد صلى الله عليه واله بذلك قبل ١٤٠٠ سنة ؟ هل كان يملك مركبة فضائية ومن خلالها استطاع ان يعرف هذه الظاهرة الفيزيائية ام انه وحي من الله سبحانه..

عارف : سبحان الله وبحمده..

قاطع حوارهم أديم من كال.

أديم : حي الله من زارنا.

عارف : الله يحييك والله مكانك خالي وية الشيخ شلون شرح جميل..

أديم : وان شاءالله استفدت من المعلومات ؟

حجاها وكعد.

عارف : شي اكيد هواي توضحت عندي أمور ، اني احب اطلع على الديانات الاخرى حتى من انسأل ما اجهل الاجابة.

أيساف : وهذا الصحيح بارك الله فيك.

عارف : بارك الله بنا جميعاً..

بعدها التفت على أديم وسأله عن احواله ، بس جانت اجاباته مختصرة وبخلك ضيق يحاول يبين مرتاح قدر المستطاع بس التوتر غلب على كلامه وحركاته.

انضم للكعدة إسلام ، صرنا ١٢ نفر إيساف وأديم أسمر وأهاب أرود وإسلام وأفنان وعائلتنا ، جانت جمعة كلش حلوة بعدها انسحبوا الولد ظلوا بس إيساف وأديم وأسمر واحنا..

خالتي فتحت موضوع وية أسمر وشي جر شي وعرفت منه يفسر أحلام ، سألته..

أسن : شنو تفسير اذا نفس الشخص يتردد بمنامك كلما تغمض عينك..

من كملت جملتها كح إيساف وشرب مي ، التفت أسمر ناحيته ابتسم ورجع لخالتي كال.

أسمر : إذا شفتي شخص معين بالمنام وتكررت رؤية نفس الشخص فهذا إشارة إلى تعلقج بهذا الشخص اما اذا جان الشخص ما معروف بالنسبة الج فهي إشارة إلى الاقتراب من أمر جديد يا اما عمل أو دراسة أو زواج أو الإنجاب. ويقال أن تكرار رؤية شخص في المنام أكثر من مرة هو إشارة إما للحب القوي بينهم أو العداوة والكره والله اعلى واعلم..

أسن : على شنو تعتمد بتفسيراتك؟

أسمر : هواي مصادر قاري المهم نطيتج الزبدة بالموضوع..

أسن : بس اني مكملة دراسة ومتعينة ..

خالة حجتها بسذاجة ما حسبت حساب لجواب أسمر اللي جان قاصد كل كلمة كالها.

أسمر : ما ظل غير الزواج يعني نكول مبروك ونبدي نحضر للمراسم..

إيساف : أسمر شنو رأيك تجدد الكهوة بردت وعاجبني أشرب.

أسمر : عبالي اوزع عصائر شيخنا.

إيساف : كوم جدد الكهوة.

أسمر : صار من عيوني.

جنت منتبهة على كل حركة ونظرة تبدر من خالتي او إيساف اثنينهم جانوا مفضوحين سواء بسرقة النظرات من بعضهم او الابتسامة بخجل والتوتر..

توتر الموقف ، ورجع الهدوء للكعدة من بابا وجه سؤاله لأديم كال.

عارف : عاجبني اسمع منك شعر او ابوذية قصيدة خاطرة صوتك لحد الان يتردد باذني القائك عجيب.

ضحك أديم وكال

أديم : بالغت بوصفي حجي ..

عارف : ابداً حجيت الحقيقة .

أديم : الله يخليك شنو تحب تسمع ؟

عارف : اي شي يخطر على بالك.

أديم : مرات ييجيني الالهام والقي شعر او خاطرة بشكل ارتجالي ، اليوم صار وياية موقف وحاب اكتب عنه .

عارف : تمام اكتب وبعدين نسمع هسه حابب اسمع شعر..

حجى اشعار حزينة وابوذيات تكطع الكلب بعدها سكت ورا شوية بابا وأيساف كاموا يفترون بالمزرعة وتبعتهم ترنيم ، وأفنان و ماما دخلوا يم الحجية ظليت بس اني وياه..

تنهد وكال.

أديم : ست أسمار شلونج ؟

أسمار : احم الحمدلله استاذ أديم وانت شلونك ؟

أديم : بخير تحت رحمة الله..

حجاها وجر نفس عميق بعدها كال.

أديم : الصبح ليش ما اجيتي وياهم..

أسمار : ما جنت متهيئة اطلع وتكاسلت..

أديم : ها تمام..

سكتنا بعدين كال..

أديم : عاجبني اكتب شي تشاركيني بيه؟

أسمار : اذا يحضرني شي اشاركك ماعندي مشكة.

أديم : الخاطرة بعنوان ( اباريها الذمم )

صفنت بيها ورجعني لكم سنة ليورا وكلت لا والله ما اباريه الذمم ابد ، تنهدت وكلت ..

أسمار : من اجرعك تفاصيل السقم من أهيج بيك جروح ليلك الهودت عشك سنين بايعها بصنم يلا اباريها الذمم..

ارتفع صدره وهبط بصوت مخنوك كال..

أديم : من كفنوك وشيعوك لمثواك الأخير داخلي بارد حيل ومبتسم ، لا تراني ولا أراك ولا الك يمي بوح بخجل الا اباريها الذمم.

أسمار : غروب وغربت ورعشة بالايدين وهواي تنهدت وكلت احبها حيل ومن صدك عشگت ومن صارت صدك حلفت هاي نزوة والطير من طار لابد لعشه يرد

أديم : لا جذبت الا اباريها الذمم اني حلفت.

أسمار : لا رديت ولا بررت ولا كلت اني من صدك اغدرت وتريد اباريها الذمم الا اغركك بالندم..

أديم : الا افوت كبالك وتاخذلي تحية كالعلم..

أسمار : الا ارجعك لذاك المكان منين ما بلشنا كان يامكان ..

أديم : هنا حلمنا وهنا بنينا وهنا تبارينا الذمم الا اعيشك بالندم..

جنا غارقين اني وياه ببحر احاسيسنا ونشكي لبعضنا شلون انغدرنا من احبابنا هو عركان واني دمعت ، ما فزينا الا على صوت ماما وبابا من اجوي التفتت عليهم عيونهم مدمعة ، جايين وكاعدين بسمعولنا واحنا ما حاسيين بيهم ، انكلبت الكعدة الى نكد، على أثرها استأذن بابا وتشكرهم هواي على حسن ضيافتهم ، رفضوا نطلع وتوسلونا نبات بس رفضنا ، طلع أهاب وأسمر وإيساف وصلونا للباب وأديم ظل كاعد بمكانه وعيونه غركانه بالدمع ظل بالي عليه وتنكدت ، صعدنا بالسيارات وتقسمنا على سيارتين اني وخالتي وترنيم بسيارة إيساف وماما وبابا بسيارة أسمر الطريق كله ساكتين واني بالي مشغول شوكت اوصل حتى اتصل عليه واشوفه شبيه ..

وصلنا قريب الساعة وحدة ونصف ليلاً دخلنا للبيت ، اخذت اياس جان نايم يم تولان، ورجعنا للبيت بيتنا قريب على اهلي خالة دخلت للحمام وبعدها لغرفتها واني كذلك بعدما كعدت اخذت موبايلي خليته بايدي حرت ادز مسج شلون يشوفه اتصل خاف واحد يمه ، كأنما سمع نداء قلبي رن موبايلي فزيت الغريب يتصل بك ..

دكات كلبي نبضت بغرابة ، بلهفة جاوبت.

أسمار : على بالي ردت اتصل بس كلت احتمال مو وحدك.

أديم : جنت منتظرج مانمت.

أسمار : شلونك ؟

أديم : كلش موزين ..

أسمار : شنو اللي صار ظل بالي تكدر تحجيلي.

أديم : صعبة علية شلون احجيها يا سمرة شلون ..

أسمار : اعتبرني اني نفسك واحجيلها ..

سكت بعدها كال.

أديم : عجبتج مزرعتنا ؟

أسمار : ليش تغير موضوع؟

أديم : اوصفيها الية صار سنوات ما شايفها ..

أسمار : أديم انت زين صوتك ليش يرجف..

أديم : اوصفيلي عيوني مشتاقة تشوف هذا المكان..

أسمار : أديم يا أديم وضعك غريب ما عجبني ابد وهسه حيرتني أكثر.

أديم : شنو شكل الاشجار ؟ اللي شفتيها..

سايرته و وصفتله المكان بدقة كأنما ادليه على طريق معين ، جر نفس تنهد وكال..

أديم : تصدكين اذا كلتلج أول مرة أشوف مزرعتنا بهذا الجمال ، ابدعتي بالوصف بالاخص من لما كلتي كان الهواء ينضج بعبير الزهور ، فعلا هو هيج لان اجمل الزهور جانت ببيتنا اليوم..

أسمار : ارتاحيت هسة ؟

أديم : لا نار بكلبي سمرة نار ما تطفى.

أسمار : احجيلي اسمعك وما راح امل صدكني.

أديم : حقي من كرهتها للحد اللي ردت اتخلص منها بأي طريقة ، جانت تستحق معاملتي الوحشية الها بآخر فترة لانها عاملتني بشيطنة...

يتبع...

صباح الخير.
متابعة ممتعة حبايب.