رواية أحببتُ ذلك الغريب الفصل الرابع وثلاثون 34 - بقلم عبير إدريس

ياحلوتي
ارقصي على دقات قلبي واقفزي
واعثري لأضمك بصدري واسكني
لكن احذري لا اريدك ان تطفئي
انا في الحب اباحي فأنصتي..

بقلمي
عبير إدريس...

السلام على بنات ادريس الغاليات
فضلاً لا تضيفون اي حساب انستا او فيس اذا ما تتأكدون يكون تابع الية اكو ضعاف النفوس كاعد يستغلون بنات باسمي وبندت حساباتهم البارحة...

اذا تريدون حسابي الاصلي ..
اسمه abeer _ idrres
او عبير إدريس شنو تكتبون راح يطلعلكم بيه ٢٦ الف متابع...
هناك ننشر توقعات ونتشارك باحداث القصة...

________________

سديت الموبايل ورجعت لخالتي جانت كاعدة وصافنة بالورقة ، رحت كعدت يمها وباوعت لأفنان بملامحي سألتها شكو ..
هزت كتفها بمعنى ما أدري..

أسمار : خالة حبيبتي مبروك..

باوعتلي ما حجت كامت كدامنا مشت وطلعت من المختبر ، ظلينا اني وأفنان وحدة تباوع للثانية مستغربين..

طلعنا وراها بدون ما تحجي اخذت تكسي وصعدت حتى ما كالتله وين ، هو ظل صافن علينا بالمرايا صعدنا وحجيت وياه دليته مكان المزرعة ، مشت بينا السيارة ربع ساعة ورن موبايلي باوعت إيساف توني أريد اجاوب اخذته خالتي وسدته باوعتلها مستغربة وهمست..

أسمار : هاي ليش ؟ خليني أجاوبه.

باوعتلي والتفتت على جهة الجامة جانت ضايجة بشكل مو طبيعي وترجف..

ظليت حايرة ، يتصل إيساف واخاف ارد وهي ما راضية خفت تزعل مني .

دز مسج كتب ( وينكم أسمار اني بالمختبر ظل بالي اتصل ماتردين أسن بيها شي ؟ )

رفعت راسي باوعتلها وهمست..

أسمار : خالتي خطية إيساف بالمختبر وظل باله خليني اجاوبه ..

بدون ما تلتفت كالت..

أسن : جاوبيه بس حجي وياية ممنوع تحجين بعد..

أسمار : شنو اللي صار ؟ معقولة ما فرحانة بالحمل؟

أسن : التهي بتحضيرات عرسج وحياتي عوفيها..

أسمار : عفوا مو قصدي اتدخل بحياتج بس ردت افهم شنو اللي صار؟ليش هيج ضايجة..

أسن : شلون عرف احنا بالمختبر ؟

أسمار : اني اتصلت..

باوعتلي بنظرة لو مرزلتني ارحم ، رجعت دارت وجها، لزمنا ازدحام بسيطرة ساعة وشوية يلا فتحوه والموبايل احترك علية وعلى خالتي وماتقبل اجاوب اي واحد منهم. الولد كلهم يتصلون، اخذته مني وغلقته وصلنا للمزرعة نزلنا وهي دخلت اول وحدة واني وأفنان حاسبناه ، ودخلنا للمزرعة قبل لانفوت وكفنا اني وأفنان نفسر تصرفاتها وردة فعلها ليش مبالغ بيها وكأنما صاير وياها شي جبير ومغصوبة عليه..

دخلنا صار بوجهي أرود شافنا عقج حاجبه وكال..

أرود : مو إيساف يتصل بيكم ليش ما تردون عليه وراها احنا هم اتصلنا ونفس الشي بعدها انغقلت موبايلاتكم..

ما جاوبناه ظلينا اني وأفنان وحدة تباوع للثانية ، عاط بينا فزينا..

أرود : هي شبيكم ..

أفنان : ليش تعيط .

أرود : مو كاعد احجي ليش ما تجاوبون ..

أفنان : هسه خابره وكوله احنا رجعنا فضت راحت.

أرود : والله هيج سهلة عندج.

أفنان : معلية اني انت واخوك ونسوان اخوك..

أسمار : هلو اخذيني وياج اني شكو..

تركناه يصفن ورانا ، رحت للبيت خليت الاغراض دورت على أديم ما لكيته ،كلت احتمال رايح للبيت الكبير ، غيرت ملابسي وصليت وطلعت ، اول ما دخلت للصالون مال عيالي لكيتهم كاعدين إيساف وأديم وأرود بس وجوهم ما تتفسر..

بتردد كلت..

أسمار : السلام عليكم..

إيساف رفع راسه باوعلي ودنك همس بينه وبين نفسه وعليكم السلام ، أديم جاوبني بس ضايج وأرود ماجاوب كام وطلع من الهول ، تقربت كعدت كبالهم وهمست..

أسمار : اذا زعلانين علية لأن ما رديت اسفة ماكدرت اكسر كلام خالتي..

ضرب رجله والتفت على أديم همس..

إيساف : هاك تفضل جاهل كدامها وازعل.

أسمار : صاير شي ؟ سويت اني شي ؟

أديم : اذا خالتج ما قبلت تجاوبين ماعرفتي بدون علمها تدزيلنا مسج تعرفين بهذا الوقت شنو صار بينا و نوع الافكار اللي داهمت مخيلتنا ، دخلنا بانذار البيت كله طلع كلمن يدور بجهة ، قسم راحوا للمستشفى وقسم للمركز يبلغون ، الحجية تخربطت ، الله يقبلها تصرفات كبار هذه؟

أسمار : حقكم شنو تحجون وماعندي جواب..

أديم : شنو السبب ليش ما رديتوا علينا؟

ردت اجاوب التفتت على صوت خالتي وهو تكول..

أسن : اني رفضت ترد عليكم السبب مني أسمار ما عليها ولا أفنان ، اللي عنده شي يحجيه وياية ..

ظل يباوعلها إيساف بغضب عاكد حاجبه حسيته يريد ينفجر..

أديم : ممكن نعرف السبب خالتي العزيزة ؟ لو تغيير هرمونات؟

أسمار : أديم مو هيج ..

أديم : اطلعي منها نريد نفتهم..

أسن : صحيح ابو تميم تغيير هرمونات وتعرف بعد عقولنا على كدنا والهرمونات تلعب بينا وتخلينا نلعب بالناس.

أديم : اي مو كاعد اكول ماكو تفسير للي سويتوه غير الهرمونات.

أسن : اللي عنده عتب وياية اني بغرفتي ..

إيساف : اصبري احاجيج.

حجاها بنترة..

التفتت عليه وهمست.

أسن : نعم شيخ..

إيساف : اريد تبرير للي صار حتى ما اتصرف تصرف بعدين نندم عليه كلنا...

أسن : تعرف كلش زين اني ما اندم على شي سويته بارادتي ..

تركتنا وصعدت فوك رحت وراها دخلت جانت ترجف والرجفة بايدها ما توكف ، رحت لزمت ايدها ردت اهدأها دخل إيساف وسد الباب ردت اطلع اشرلي بيده ابقى وكال..

إيساف : ابقي حتى تكونين شاهدة على تصرفات خالتج الصبيانية.

أسمار : رجائاً خلوني اطلع وحلوها بينكم

خالتي جانت تباوعله وترجع تدير وجها.

إيساف : هاي مباركتج النا هذا استقبالج لخبر ابننا اللي راح ينور دنيتنا ..

أسن : من نكون جايبيه بالإتفاق ذاك الوقت اشاركك الفرحة مو شي سويته بدون علمي واستغفلتني..

إيساف : هو شنو اللي سويته بدون علمج رزق وربج نطاه معقولة الجحود وصل لهذه المرحلة عندج.

أسن : مو جحود بس اتصور حاجين بهذه المسألة اكثر من مرة وتعرف جوابي شنو..

أيساف : يعني عبالج اكذب ؟

أسن : شلون صرت حامل يلا فهمني ، انت كسرت الاتفاق يا إيساف.

إيساف : عود صدك تحجين ؟

أسن : الطفل ما يبقى..

أيساف : براحتج بس هذا التصرف راح ينهي كلشي بينا..

أسن : اذا الطفل يفرقنا خلص انهي كلشي من هسه..

أسمار : صدك كذب تعوذوا من الشيطان وكولوا يا الله ، الطفل يبقى وانتِ تبقين واليوم نحتفل بهذا الخبر زين لو لا.

أسن : اسكتي انتِ .

أسمار : خالة زودتيها كافي عاد.

أسن : شغلة متفقين عليها ليش يخالف ويسوي اللي يريده وهو ذاك الشهر كال اريد طفل كلتله بعد مو هسه ..

إيساف : وصار قابل بيدي ..

أسن : لعد بيدي ؟ اذا مو بيدك بيد منو ؟

أيساف : على تصرفج مال اليوم وردة فعلج اخذت قراري وراح انهي كلشي ...

تركنا وطلع ، رغم هدوئها الجانت تحجي بيه بس من حجى اخر كلام وطلع كعدت على السرير انهارت بالبجي، كعدت يمها ظليت احجي وياها واهدأها همست..

أسن : نفسيتي تعبانة وصار كم يوم ضغط علية مو طبيعي وهنا الشغل كلش هواي وتعب شلون اجيب طفل وسط هاي الهوسة فهميني اني هيج مسؤولية كبيرة ما اكدر عليها تعبت..

أسمار : وينج لعد اني واني وبس تعالي واقبلي بأديم كلنا وياج وايد وحدة..

أسن : صح كلت وعند وعدي وهسه منو مساعدج بالولد غيري ، اياس وتميم حاسة بيهم انتِ

أسمار : لا كله يمج الله ينطيج العافية

أسن : خلص يعني اني مو متعاجزة بس من اجى وحجى وياية كلتله خلي يترتب وضع بيت أديم ونخلص من الهوسة بعدها نسوي طفل ليش تجاهل كلامي وضربه بعرض الحايط وسوى البراسه.

أسمار : ياخالة حرامات تضيعين هيج فرحة بسبب اشياء تافهة والها حل ، اذا على المسؤولية من باجر كلنا نتفق ونوزع الشغل علينا وننطيج شي خفيف اصلا اتركي كلشي من ايدج وخليج بغرفتج وبس مسوؤلية إيساف شيليها حتى غرفتج اني اجي انظفها..

أسن : ما تسكتين ليش مسوؤليتج قليلة حتى تشيلين حملي هم.

أسمار : لج عيني لا تصعبيها وهي سهلة الله يخليج ، شو مدي رجليج ونامي شوية راح اطفي الضوء هسه تهدأين.

استسلمت لكلامي وراحت مددت ، غطيتها وطفيت الضوء وطلعت ، نزلت جوه لكيت إيساف واكف يم اخوانه بالصالون ويفور من العصبية ، كلهم جانوا ضايجين وما يتحجون ، باوعت لأسمر مجرد لمحني اشرتله تعال..

اجى ورايا طلعنا برا حجينا اني وياه جان بصف إيساف ومأيد قراره اذا أسن نزلت الطفل ينفصل عن أسن لأن هاي روح وهو متمنيها..

أسمار : عيني لا طلاق ولا شي ردة فعل عادية منها وعلى كولة أديم هرمونات هسه نسويلهم هوسات ونفرح بيهم وكلمن يرجع لغرفته وينجب..

أسمر : شو تغلطين انتِ..

شكد جان عصبي بس ضحك من حجيت اخر كلمة .

أسمار : يمعود عرسي بعد يومين وذولة يريدون يتطلكون بطرانين..

ظل صافن وعاكد حاجبه ...

أسمار : شكو شبيك صفنت ؟

أسمر : شلون اهفها ببوكس يعدل مزاجها شبيج بابا زواج شنو ؟ وأديم وين توديه ، شكد شايف مخابيل بس مثلج ومثل أسن ما شفت.

أسمار : عيني عرسي على أخوك شنو ما تدري ما عازميك ؟

أسمر : هاي شبيج أسمار شنو مصخنة شو بلة لزمي كصتج ..

أسمار : ها محترك حرك لأن محد عزمك انتظر يجوز باجر أديم يعزمك.

أسمر : بابا احجي عدل لا تخبليني مو تزوجتوا .

أسمار : اي صح بس ما سوينا عرس.

أسمر : وبعد خمس شهور تذكرتوا تسوون عرس غيركم ابنهم بطولهم..

أسمار : لا بلة وبعدين هذا الحجي روح احجيه لأخوك اني شكو المهم عيني اريد تسويلي كوشة مثل الكوشة مال خالتي وباوع ما اريد الكراسي بنفس السرة حاول تسوي سراوين .

أسمر : شلون وية خيل الحمزة لج بابا شبيج انتِ صاحية راح اهفج بطابوكة اصحيج

أسمار : ترى ازعل حتى لو جان شقى..

أسمر : لا يا الهي دخيلك ، أسمار عيني انتِ صاحية لو متعاطية شي..

أسمار : روح اسأل اخوك وتعال شوف شنو متعاطي معناها اني تعاطيت وياه ، بس قبل لا تروح اسمر حباب سوي فد جو وخلينا نحتفل ونبرد كلبهم شفتهم شلون نار صايرين والله هاي عيون حسدتهم..

أسمر : اكولج ترى عقلي طيرتيه شبيج ، تدرين شنو اني صوجي واكف يم وحدة مخبلة ونص عقل..

أسمار : فدوة لله نص عقل تجي لعقلي انت..

أسمر : ابد ولا اوصله اصلا الله يشافيج بجاه حبيبه النبي..

تركنا ومشى ، ردت افوت طلع أهاب من البيت وكف يم أسمر حجى شوية واجاني.

أهاب : اكولج هاي شكو شنو صاير شو تغدينا كلشي ماكو طلعت للقاعة رجعت لكيتهم ثريد ، ليش إيساف وأسن يريدون يتطلكون.

أسمار : باوع هذا أسمر الخبيث لو مساعدني جان انحلت هاي السالفة كلها.

أهاب : شنو اقترحتي عليه نوريني.

أسمار : شوف خلينا نحتفل بحمل أسونة ونجمعهم سوية غصب عنهم وبعدها ينجمعون بغرفتهم ناس تكتل ناس ما علينا اهم شي نبرد النار اللي شبت بيهم.

أهاب : نوريني شنو عندج افكار واني وياج واسحله لأسمر يسويها ويانا.

أسمار : يعني اذا اكو هنا مزايق جيب واذا كدرتوا تجيبون عشا من برا لأن احنا تعبانين بعد احسن ، واذا حنيت وصرت حباب جيب حلويات وعصائر وشوف حباب احب عصير مال الرمان جيبلي اثنين خوش.

اني احجي وهو صافن علية.

أهاب : اكولج خالتج تريد تتطلك وبيتها راح ينهجم وانتِ تريدين عصير رمان ؟ صدك لو كال أسمر مقطاطة دير بالك منها.

أسمار : هو هيج كال ؟

أهاب : اي.

أسمار : ما عليك بيه ان بعض الظن اثم وعلى ظنونهم يحاسبون ، المهم عيني العصير ما اريده شنو رأيك بباقي الاشياء.

أهاب : تشاركيني بفلوسهن لا عبالج اني أسمر وتقطيني بمليون مدري شكد.

أسمار : اقطه شنو غير اخوه وجابله ، وبعدين هسه اروح لحبيبي أديم واجيبلك كل الفلوس اللي راح تصرفها هسه بس عصير الرمان عليك.

ضحك..

أهاب : يعني لازم ادفعلج اني.

أسمار : هاي شبيك اتشاقى يعني اذا ابقى ابجي وانوح يخرب بيت خالتي يلا استعجل حباب خلينا نبرد الموقف ونحرك الجو..

أهاب : ماشي رايح بس سمرة الفلوس بالنص مو تغلسين بعد ما اجيبلج شي ترى

أسمار : لا يابه اغلس شنو هسه اجيبلك بس شوف شكد تكلف وما عليك.

أهاب : خوش هسه فايت اجيب أسمر ونطلع..

راح لأسمر صاحه وطلعوا اثنينهم وكف يحجي وياه اسمر التفت علية موجهلي الكلام.

أسمر : ولك هاي مخبلة ما عليك بيها غير اذا سوينا هيج إيساف يهجم المزرعة علينا.

أسمار : ما يهجمها ..

أسمر : شلون عرفتي بله ؟

أسمار : اني احجي وياه ما عليك..

أهاب : امشي نسوي اللي كالت عليه والنتائج السلبية توكع براسها.

أسمار : هاي وحدة وياكم زين واذكركم بيها من تحتاجوني يا ال الغريب العجيب الرهيب .

ضحكوا هزوا راسهم وطلعوا من المزرعة ، رحت لأفنان وطلبت منها نطلع الميز الكبير بالحديقة ونخلي عليه جرجف حلو ونرتب كعدة حلوة ، وشنو عندنا فواكه طلعناها ، إيساف راسه يوجعه ومتمدد بالهول خال ايده فوك راسه ، ومشغلين ضوء خافت ، أديم مرجع راسه ليورا وصافن ، أرود يباوعلنا نطب ونطلع ويهز بيده ، احنا من نوصل للهول نمشي سريع ، حتى لا نسمع حجي وتعاي انطي تفسيرات ، اجوي أسمر وأهاب جايبين عشا وحلويات ، تقربت منهم تخصرت..

أسمار : وين المزايق عيني.

أسمر : باع هاي تريدين يطردنا إيساف بطرانة..

أسمار : شبيك وياية اليوم ؟

أسمر : مابية سلامتج بس مفتر مستشفيات على مراكز شرطة اسأل عن اختي ونسوان اخواني..

أسمار : زين اني شعلية ليش بس علية تحجون ؟

ترك من ايده صينية المشاوي والتفت علية.

أسمر : لأن هنه ساكتات وبس انتِ تحجين.

أسمار : تريد اوكف اتفرج عليهم شلون بيتهم ينهجم وانتوا ساكتين.

أسمر : لا ما ساكتين منو كالج ساكتين ؟

أسمار : لعد شنو معناها مأيديه بقراره.

أسمر : طبعاً نأيده يضب مرته حتى ما تعيد السوته لأن مو شي بسيط عاجبها تتزعل تنطي خبر هي وين وترجع هنا تزعل وياه مو تتصرف تصرفات جهال وماترد على اتصالاتنا تركنا شغلنا واجينا نركض وتدرين كلش زين شكد عندنا اعداء وحسبة تودينا والف ترجعنا وهاي الحجية تخربطت وحرنا بيها انتِ ما حاسة بهول الموقف لأن ما عشتيه ورجعتي البيت هدوء جان..

أسمار : بس مو صوجي واعتذرت من أديم وإيساف واذا تحب اعتذر منكم ..

أسمر : ماكو داعي للإعتذار هيج مواقف ما يفيد بيها اعتذار ولا تنسي وبعدين شدعواها أسن كلبت الدنيا شنو حبلت من سوق بلي لو نزلت تطبيق وداسته صارت حامل.

أهاب : لسانك أسمر شوية..

أسمر : والله عبالك حامل بالحرام ثبرت البيت ثبر..

أهاب : هسه انت اهدأ حتى نكدر نهدأ اخوك الكبير.

أسمر : لو يحركها ماألومه.

أسمار : شدعواك شكد قاسي ، صح غلطت بس مو لدرجة يحركها..

أسمر : على اساس راح يسويها دشوفيه شلون يرجف عليها حتى ضغطه صعد..

أسمار : هسه اني شنو اسوي يعني اخذتها بضحك ودست على نفسي وتالي خربت وكلها وكعت براسي.

حجيتها وكعدت بالكاع خليت ايدي على وجهي وبجيت..

دنك أهاب يمي واسمعه يكول لأسمر.

أهاب : خرب بيك زين ، ارتاحيت من هيج بجيتها شكد لغيت وياك بالطريق كلتلك هي معليها.

ظل ساكت ماجاوبه ،..

أهاب : سمرتنا عيوني لا تبجين تونا جنا نضحك ونتشاقى واني اكول شلون قوية ومتباهي بيج طلعتي ام دميعة..

بجيت بالزايد من هيج كال ، جر نفس ونفخه قوي بعدها استغفر ورجع يهمس بصوت ناصي

أهاب : زين سمورة شنو رأيج ما راح أخذ ولا فلس منج واليوم العزيمة كلها اني اشيلها..

بقمة ضوجتي وحزني بس ضحكني حسيته يساير طفلة ، رفعت راسي والضحكة مرسومة على وجهي .

أسمار : كول والله..

أسمر جان مخصر ايده من شاف ردة فعلي نزل ايده ضربها برجله هز راسه وكال.

أسمر : هاك استلم نست حتى خالتها من يم الفلوس.

أسمار : معليك انت خوش يلا روح منا..

أهاب : يلا روح مانحبك بعد.

أسمار : شنو ماخذني على كد عقلي.

أهاب : لا خل يولي هذا مانريده بعد زاعلناه.

أسمار : أهاب لا تضوجني.

أهاب : يروحولج فدوة العشيرة كلها بس اضحكي..

أسمر : خوش خلي يسمعك أديم حتى خوش يسويلنا عرس اليوم وتكمل.

أهاب : شلون اني بالمعقدين ..

أسمر : هاي بعد اخوتك وتتحملهم ..

أهاب : كومي سمرة صيحي أسن خلي تنزل نحتفل بيها.

أسمار : خلي إيساف يصعدلها هسه ترضى بساع والله خالتي فقيرة وتتقشمر.

أسمر : والله احنا فقرا ونتقشمر مو انتن ، هاج اثنين مشوربين ضحكتي علينا ودزيتينا نجيب عشا وحلويات وعايفين اخونا ومكابليج...

أهاب : اي صدك مع العلم جان يفور عليكم وعباله راح ياخذ موقف حتى تتأدبون انتِ وخالتج وأفنان بس من حجيت وياها شوية هدأ.

أسمر : وانت ضيعتنا بسوالفك.

أهاب : عمي اني اذا عاديتها منو ينطيني تولان ابوك .

أسمر : كلمن يمشي ورا مصلحته.

أسمار : ماكو اذا تولان ما قبلت بيك اطيح حظها .

حجيتها بالضحك وهذا أهاب نزل مدح بية لدرجة حسسني باجر عرسه ..

من بعد هاي الهوسة كلها انقسمنا قسمين قسم يحجي وية إيساف ويهدأه والقسم الثاني يروح لأسن ..

ناس تحجي هنا وناس هنا الى أن جمعناهم بالحديقة ، أسن عيونها حمر دم من البجي وخشمها احمر وإيساف دمعته بطارف عينه ، طلعت الحجية ظلت تحجي عليهم اثنيهم ، جرها حضنها وهي بادلته ، الولد رغم ضوجتهم بس ما حبوا يكسرون فرحتهم بالطفل ، احتفلنا بيهم بسهرة لطيفة بعد معاناة وتعب ساعات مرت ..

بالليل كلمن راح لغرفته ، اني وأديم من التعب نمنا على وجهنا حتى بدون عتب ، هو راح لغرفته نام واني نسيت نفسي على القنفة بالإستقبال، كعدت الصبح على لمسات اعرفها مو غريبة ، وقبلات باردة تتوزع على وجهي نزولاً لرقبتي..

فتحت عيني لكيت أديم حضن راسي بعدها كعد على القنفة خلى راسي على رجليه وعيونه يباوع ليكدام..

أديم : ليش نايمة هنا حبيبتي.

أسمار : صباح الخير ..

أديم : صباح النور..

أسمار : نمت لأن تعبانة كعدت اكلب بالموبايل وكلت افوت أنام بس راحت علية نومة..

مسد وجهي وهمس..

أديم : تكسر النومة هنا .

أسمار : تصدك ما حسيت عبالك نايمة لحظة وحدة.

أديم : تعبتي البارحة وصار الضغط كله عليج.

أسمار : يلا مو مشكلة بس شلون عرفت؟

أديم : لأن بس صوتج طالع واسمعج تبررين لهذا وذاك ردت اتعارك وياهم بس سكتت حتى لا تكبر المشكلة.

أسمار : بررت لأن خالتي غلطانة واني وأفنان اخذونا بذنبها وماردت انطي بيها لهذا ظليت اقلب الموقف لضحك رغم اللي صار على اعصابي يا أديم .

أديم : اعرف حبيبتي أعرف هذا مو طبعج واللي كاعد تسويه لأجل العائلة وحتى ما تتفكك.

أسمار : والله صحيح.

أديم : شنو جبتي البارحة ؟

أسمار : يوو هواي شغلات .

أديم : اهم شي البدلة السودة جبتيها لو لا

أسمار : لا

حجيتها بحزن.

أديم : ليش مو جان عاجبج تلبسين بدلة لونها أسود واني البس قاط أسود شنو اللي غير رأيج.

أسمار : شو خالة وأفنان خربوا واهسي كالو الاسود فاله موزين.

أديم : ليش يعني اللون شعليه ؟

أسمار : ما اعرف هذا رأيهم يكولون بدلة بيضاء او لون اوف وايت افضل.

أديم : زين ما عرفتي تكوليلهم أديم بزواجه الأول زوجته لبستله الأبيض وحياتهم تحولت لجحيم وانتِ لبست الأبيض وزواجج ماطول ..

أسمار : هم اجى ببالي بس ما حبيت اناقشهم أكثر..

أديم : مو مشكلة اشتري اللي بنفسج البسيها واخر شي لبسي لون أبيض بهيج يروح الخوف من كلبج اذا زرعوه.

أسمار : هذا رأيك ؟

أديم : طبعاً ، احجيلج من باب ( قل لن  يصيبنا الا ما كتب الله لنا )

أسمار : صحيح ونعم بالله.

أديم : هسه جوعان ما اكل من أيدج الحلوات ؟

أسمار : لا طبعا هسه أسوي بس اغسل

أديم : يلا على كيفج لا تنخبصين.

أسمار : يا الله نسيت علاجك وفاتت ساعة عليه اعتذر حبيبي راحت علية نومة وماحسيت على المنبه ونسيت اصلا المشكلة ماخلت فكر براسي.

أديم : عادي لا تخبصين روحج مو مشكلة..

كمت بسته ورحت غسلت وبعدها للمطبخ بلشت احضر بالأكل اجى وراية حسيت بدخوله للمطبخ رحت خليت الكرسي حتى يكعد رفض وكال.

أديم : عاجبني اساعدج بالريوك.

بقيت صافنة واباوع عليه بعدين همست.

أسمار : يلا شنو تحب تسوي ؟

أديم : بيض .

أسمار : تمام .

دليته على الأشياء وخليتهم يم ايده ، اخذ البيض تلمس الطاسة وهمس.

أديم : شلون تحبيه ؟

أسمار : بكيفك اكله بكل اشكاله.

أديم : تمام..

طك البيض وحدة بالثانية ورش ملح ودارها بالطاوة صح وكع على أطراف الطاوة بيض بس ما حسسته ولا بينت هو وصخ المكان ، وبنفس الوقت ما شجعته ردت يحس هو طبيعي مثلي ويكدر يسوي الشي اللي يعجبه مو فد معجزة اذا سوى البيض..

بس لو نجي للواقع اعتبره معجزة لأن الضرير على كبر صعب يتعلم مو مثل اللي ييجي للدنيا هو ضرير هذاك يتعلم من هو وصغير يعتمد على نفسه وحتى دراسته وكل اموره تتسهل لان حواسه قوية وتساعده ، عكس اللي يفقد نظره وهو جبير يتحسس والتعامل وياه يكون صعب واقل موقف يبدر من عندنا اتجاههم ياخذوه بنرفزة وضيق خلك..
واي شي نريد نعلمه الهم يعتبروه اوامر ونمليها عليهم ، هذا الشي لمسته بالمعهد وبأديم اول ما تعرفت عليه جان يتحسس مني بشكل مو طبيعي ولحد الأن بس هسه شوية أحسن.

كملنا الأكل ونقلناه سوية على ميز الطعام ، جان يمشي والماعون بيد والثانية يتحسس بيها طريقه.

كعدنا ناكل بهدوء مرتاحين وفرحانين بنفس الوقت..

خلصنا غسلت المواعين ورجعنا للإستقبال ، كملت كم شغلة وهو كاعد، بعدها رحنا للبيت الجبير، الولد جانوا طالعين وخالتي وإيساف بعدهم نايمين ، رحنا كعدنا يم أفنان ويمة الحجية..

جانت تعبانة بشكل حجى وياها أديم واقنعها تروح العصر للدكتور .

وفعلا اخذوها أرود وأنهد وأديم..

من رجعوا للبيت دخلوها لغرفتها ارتاحت شوية بعدها دزت علينا.

عمرة : أديم اذا تحبني عرسك لا تأجله

أديم : حجية ياعرس وانتِ بهيج حال.

عمرة : لخاطري

أديم : لا ما اسوي بعد

عمرة : أزعل.

راد يجاوبها حجى أسمر.

أسمر : منا للجمعة تلحك تصير زينة وحتى اني اكون راجع من السفر ..

أديم : وين رايح ؟

أسمر : عندي شغل أريد اجيب كم غرض للمعمل وأرجع ..

أديم : منو وياك من الولد راح يروح ؟

أسمر : وحدي

أديم : هاي شنو ؟

أسمر : اي شنو يعني قابل راح يبوكوني.

عمرة : سويت سفرتك وية عرس أخوك.

أسمر : شغل هذا حجية وبعدين حتى ترتاحين وتحضرين العرس ماظل شي للجمعة اسبوع واحد ..

عمرة : الله كريم.

أديم : حجية عوفج من هاي السوالف شنو تحسين اكو شي يوجعج ؟

عمرة : ابد يايمة ابد ما يوجعني شي.

أديم : ادري بيج هيج تسوين حتى ما افكر.

حجاها وتنهد.

عمرة :لا مابية شي لا يظل بالك.

بهذه الأثناء دخل إيساف ابتسم بتعب وكال.

إيساف : مساء الخير شلون صرتي يمة.

عمرة : يا هلا بحبيبي ظل بالي يمك انت بشرني ضغطك شلونه ؟

إيساف : لا زين الحمدلله لا يظل بالج.

عمرة : الحمدلله

ظلوا يحجون ورا شوية فاتت خالة أسن سلمت وراحت للحجية باستها .

عمرة : مبروك ياحبيبتي يتربى بعزكم.

أسن : الله يبارك بيج حجية واعتذر اذا سببتلكم مشكلة ومقهورة كلش لأن بسببي صحتج تراجعت.

عمرة : توني يلا صرت زينة من شفتج تضحكين ومرتاحة وشفت ابني فرحان ومابيه شي الف الحمدلله والشكر ربي.

حجتها باست ايدها وخلتها على كصتها..

بعدها كلمن التهى يسوي شغلة بالبيت ، خلص اليوم طبيعي ثاني يوم طلعنا أني وأديم وأرود اشتريت باقي النواقص وكم شغلة للبيت ورجعنا ، وسمعتهم يحجون بينهم أديم وأرود كلام ملخصه بعد ما يخلونا نطلع وحدنا لو كل وحدة وزوجها لو اثنين من البنات و واحد من الولد يفرغ نفسه ويطلع ويانا..

مشى الاسبوع عادي مابيه شي ، بس عزمنا اقاربهم للعرس ، بهذا الاسبوع جنت اخابر ماما قليل لأن ملتهية خابرتني تعاتبني وبابا زعلان علية ، بس شرحتلهم اللي صار عذروني وحجينا شوية وراحوا...

حددنا الحفلة نسويها يوم السبت لأن أسمر يرجع الجمعة الصبح..

يوم الخميس اجوي اقاربهم كلهم، الي بيهم أول مرة اشوفهم وبيهم شايفتهم بس قليل..

طبعاً ما عدا بيت عمهم رحمن أهل شهد مقاطعيهم وبينهم تهديدات وتعهدات ناس ما توصل لناس ولا يعتبون باب بيت احد العمام اللي بينهم مشكلة..

اخر شي اجوي بيت عمتهم وياهم بنية تطلع بكدي اصغر بسنة ، من دخلت عيونها تتوزع علينا كأنه تدور على شي مضيعته ، ما اعرف ليش من دونهم خليت بالي وياها ردت اشوف شبيها ليش هيج قلقة وعيونها حزينة..

بالليل ورا العشا لمحتها تحجي وية أهاب وجانت تمسح بعيونها يعني كاعد تبجي ، بعدها صعدت يم خالة أسن سوينا كم شغلة سوية وبعدها من طلعت من غرفتها ،، شفتها فاتت لغرفة أسمر وسدت الباب استغربت شنو واكفة يم أهاب تبجي شنو دخلت لغرفة أسمر مثل الحرامية.

كلت شعلية نزلت ورحت لبيتي دخلت يم أديم جان متمدد على السرير اخذت ايده ونمت ..

خلصنا الليلة غزل وحب واحضان دافئة..

ثاني يوم من الصبح كعدنا على صوت الباب يندك ، كمت غيرت ملابسي وطلعت اشوف منو ، أديم ما حس على دكة الباب لأن جان ماخذ علاج وبيه مسكن للألم مال عيونه..

فتحت الباب لكيت أسمر وبيده جنطة ويمه أهاب

ابتسمت ردلي الابتسامة.

أسمر : صباح الخير

أسمار : صباح النور حمدلله على
السلامة ..

أسمر : الله يسلمج ويخليج اكدر افوت يمكم واخلص النهار هنا بينما أطلع للشغل.

أسمار : طبعاً تفضلوا .

دخلوا هو وأهاب الثاني سلم علية ورديتله السلام ، كعدوا بالاستقبال وأسمر مدد روحه بتعب كال.

أسمر : صارلي يومين مانايم..

أهاب : الله يساعدك.

أسمار : اسويلكم ريوك ويانا ؟

أسمر : الخير وما مدت ايده هسه نجي وياج .

أسمار : لا ارتاحوا هسه اني اسوي.

رحت غسلت وجهي وبعدها دخلت المطبخ بلشت احضر بالريوك دخلوا اثنينهم يمي يساعدوني حجيت ردت يكعدون ماسمعوا ، تركتهم ورحت أكعد أديم ..

أسمار : حبيبي اكعد حتى نتريك.

همس بنعس.

أديم : محبوبتي راسي يأذيني ما كاعد أكدر افتح عيني.

أسمار : بعده يوجعك ؟

أديم : اي.

أسمار : شلون لا تخوفني عليك الولد هنا اخليهم ياخذوك لدكتور.

أديم : اتركيني انام هسه أصير زين متعود على هذا الألم مو جديد علية.

أسمار : راح يظل بالي ، اني برا بس تحتاج شي صيحني.

هز راسه بدون ما يجاوبني واخذ مخدتي خلاها فوك وجها وعصرها بيده قوي من الألم..

متت قهر عليه وتذكرت أفنان شلون جانت توصفلي نوبات الألم اللي تصيبه من فترة لفترة على أثرها يتعب ومرات تنهار اعصابه وللأسف ما الها علاج بسبب الشظية تتحرك من فترة لفترة وتسببله هذا الألم..

طلعت وسديت الباب رجعت للمطبخ سمعت أهاب يكوله.

أهاب : يعني تركت البيت وجبتنا هنا والله شنو ماتريد ميس تحاجيك..

أسمر : ما اطيقها ولا احب احجي وياها ولا اباوعلها.

أهاب : ولك خطية تحبك

أسمر : مو جوي شسوي اذا كلبي ما رايدها اجبره عليها..

تحمحمت التفتوا علية سألوني على أديم وكلتلهم على وجع راسه ويريد ينام ما ناقشوا ولا استغربوا لأن متعلمين..

خلوا الأكل على الميز ورحت للثلاجة أطلع اجبان ومربى أسمر كام يدندن رغم صوته محلو بس حابب يزعجنا من الصبح.

أسمر :لا لست فاتنتي لا، لا لست ملهمتي لا
فأنا مزاجي في النساء معقدٌ بطبيعتي
لا تفرحي وتهللي وتفكري وتحللي
صدري أنا أنفاسه ملك فقط لحبيبتي..

قاطعه أهاب من سأله .

أهاب : تحب مو ؟ لهذا ما طايق ميس؟

أسمر : ولك أهاب أنا عاشق حد البكاء، حد البكاء
وحبيبتي يوماً ستأتي
كي تبادلني الوفـــاء
أنفاسها، إحساسها، بركان نار

أهاب : اترك الاغاني وحاجيني ولك هاي بنت عمتك لا تكسر بكلبها خطية تحبك والبارحة فتت لغرفتك لكيتها تشمشم بملابسك.

ركص حواجبه ورجع يكمل اغنية كاظم ..

أسمر :صعبٌ، صعبٌ أبادلها الهوى
وأنا لغيرها بالمشاعر أنتمي
صعبٌ أعيش بعالمٍ
بعد السماء عن عالمي.

أهاب : غير ينجب ويحاجيني بدون لغوة زايدة.

أسمر : عمنا كاظم يكول صعبٌ أبادلها الهوى وأنا لغيركِ بالمشاعر أنتمي ، وافهم يالمطي.

أهاب : كول احب وفضنا مو تتعزز على البنية مسوي روحك ثكيل..

أسمر : أنا قد نذرت مشاعري وعواطفي لحبيبتي ، ولك مو بس احبها بل اعشقها متيم بحبها اخذتني من عالمي لعالمها حبيتها لدرجة خلتي امشي واضحك.

أهاب : وميس شنو اكوللها وهي طلبت مني احاجيك بدون ما احسسك هي حجتلي.

أسمار : وخوش ضميت السر انت.

أهاب : اني واخواني مابيننا أسرار ست أسمار.

أسمر : ما عليك بيها واذا تريد جوابي كوللها( لا تدخلي مدني لا لا تسرقي زمني
صدري أنا أنفاسه ملك فقط لحبيبتي
لا لست فاتنتي لا، لا لست ملهمتي لا.

أهاب : طيح الله حظك وحظ اللي كاعد يسمعلك مو صوجك.

أسمر : اخذها انت واجبر بخاطرها ما كلتلها تحبني ولا اتذكر بيوم توددت الها ..

أهاب : بس لا تكون قاسي وياها تحبك يا ابن الناس تحبك وتبجي عليك..

أسمر : وحبيبتي هم تحبني وتبجي وقبل اسبوع خابرتني ميتة جانت.

أهاب : اي وحييتها.

أسمر : طبعاً شعندي غيرها..

أهاب : أسمر منو هاي نعرفها ؟

أسمر : وحبيبتي يوماً ستأتي
كي تبادلني الوفـــاء.

أهاب : عوف الاغاني وجاوبني.

أسمر : اي اعرفك عليها عود

أهاب : من سامراء لو من وين ؟

أسمر : بعدين تعرف.

أهاب : وميس.

أسمر : خرة بيها شخبصتني ..

حجاها ضرب الميز وكام طلع من المطبخ..

أسمار : اتركه يا أهاب ليش تلح وياه الحب مو غصب..

أهاب : كلبي ما ينطيني اشوف بنية مكسورة واسكت.

أسمار : ميخالف بس هو يحب وحدة ثانية تريده ياخذ بنت عمته ويكسر كلبها لأن باله وكلبه وفكره يم وحدة ثانية ما اخذها وظلت بنفسه.

أهاب : ما ادري نظراتها دمرتني من شافت أسمر وتلهفت تسلم عليه وانكسرت فرحتها من جاوبها ببرود.

أسمار : الله يبرد كلبها ويساعدها ويعوضها خير ان شاءالله

أهاب : ان شاءالله ، عود شوفي أديم لا تخليه يطول بالنوم ترى اذا تركتيه عنده استعداد يظل للمغرب اهم شي ما يحس بألم.

أسمار : لا ما اتركه شلون اتركه.

أهاب : يلا راجع اني بذاك البيت اخاف أفنان تحتاج شي والولد بالشغل..

أسمار : الله يحفظكم الها

أهاب : يسلمك الله وحاولي تحجين وية أسمر بلكت جذاب ماعنده وحدة ويلتفت لبنت عمته وما يكسر كلبها.

أسمار : اعذرني أهاب اني بكلشي ممكن اتدخل بس بهيج مسألة صعب اذا كلبه ما هاويها ما يصير نتدخل هذه حياته وهو يعيشها مثلما يحب مو هيج المفروض.

أهاب : صحيح يلا يابه رايح اني.

أسمار : الله وياك.

راح واني رتبت المطبخ وغسلت المواعين سويت غدا وعصير لأديم اخذته ورحت للغرفة مريت على الأستقبال لكيت أسمر نايم على القنفة ، دخلت للغرفة تركت العصير على الميز اخذت جرجف ورحت غطيت أسمر بيه ورجعت لأديم ، كعدته بهدوء ولمسات رقيقة ، فتح عيونه جانت مورمة ..

أسمار : شلون صرت ؟

أديم : بعده يوجعني لا يظل بالج وتخافين هو ياخذ يوم كامل.

أسمار : زين اكعد اشرب هذا العصير اني ضجت وحدي حباب.

أديم : مو يمج الولد ؟

أسمار : اي بس منو يعوض مكانك ياحبيبي محد.

أديم : يديمج الله

أسمار : فدوة لعمرك عمري

أديم : اسم الله عليج شنو حياتي بدونج مالها طعم ولا لون ولا عنوان.

أسمار : اذا هيج اسمع كلامي واشرب العصير.

أديم : تمام امرج ..

كام وارتاج على ظهر السرير اخذ العصير شربه مرة وحدة وخلاه بيدي...

أسمار : عوافي.

أديم : الله يعافيج هسه يصير ارجع انام.

أسمار : صدك تحجي ؟ ساعة ٢ ما شبعت.

أديم : العصر اكعد اكون زين ان شاءالله حبيبتي والله اتعب اذا بقيت كاعد وتحتارين بية وضعي واعرفه

أسمار : زين شلون اني ضروري ارجع يم اقاربك لان عيب وهم أفنان ما تكدر وحدها وخالتي حامل ، وهم ما اكدر اتركك وحدك واياس وتميم لازم ادير بالي عليهم..

أديم : منو هنا من الولد ؟

أسمار : أسمر نايم بالإستقبال.

أديم : هذا هو روحي واذا احتاجيت شي اصيحه.

أسمار : يلا واني كل شوية اجي اشوفك.

أديم : ما يحتاج.

أسمار : لا يظل بالي

أديم : تتعبين ياعيني

أسمار : لعيونك كل التعب يهون.

أديم : يلا حبيبتي خليني أنام تعبت ..

أسمار : ماشي.

حجيتها مقهورة على حالته شاب مثل الورد غفل يتعب وحاله ينكلب..

رحت يم البنات تساعدنا كلنا و ويانا اقاربهم البنات حبيتهم مبينات حبابات وحلوات المعشر ، وبسرعة يندمجون وياخذون على الواحد..

سولفنا هواي وكعدنا نرتب بمكان الكوشة بالحديقة ، قبل لا اشوفهم جنت مستحية وشايلة هم شلون راح البس بدلة واكعد واني صارلي اشهر متزوجة واكيد راح احصل انتقادات بس من شفت فرحتهم وشلون حابين الفكرة تحمست وحسيت بنفسي صدك عروسة..

عشيت اياس وتميم وغيرت ملابسهم واخذتهم للبيت نيمتهم بغرفتهم وطلعت رجعت للبيت الكبير..

كملنا بالليل كلش تقريباً ساعة ٢ ونصف ، بهذا الوقت اني اروح وارجع لأديم واللي طمني أسمر يمه وأفنان تروح وترجع يعني مرة اني اروح ومن ارجع هي تروح بمكاني ...

نمنا ثاني يوم كعدنا تريكنا وكبل للصالون ، من رحنا سألت ام الصالون منو العروس كلتلها اني ضحكت وكالت.

_ منو مرت أسمر هاي ؟

أفنان : لا زوجة أديم.

_ ها ليش أديم اخذ الثانية .

سكتنا محد جاوبها من البنات ، موت شهد الظاهر مخفي عن الناس ومحد يدري ، بس زعجتني من همست للعاملة..

_ شوفيه أعمى وبيه كل البلا ماخذ اثنين

ما كدرت اسكت نترت بيها.

أسمار : تشتغلين بفلوسج وانتِ ساكتة لو هسه كلنا نطلع.

أفنان : شبيج أسمار ليش عصبية.

أسمار : ناس تحب الثرثرة وما تشتغل عدل.

بقت تتعذر ام الصالون وعلى اساس اللي حجيته تقصد بيه شخص ثاني ، ما اهتميت لاعتذارها بس من بدت بية اكدت عليها تطلعني حلوة..

أسمار : شوفي اريد اطلع أحلى عروس بتاريخ صالونكم اريد حبيبي يشوفني اجمل وحدة وما يباوع لغيري .

ام الصالون ظلت صافنة علية فززتها من كلت.

أسمار : حبيبي يشوف ويحس ويميز الجمال افضل من الف إنسان مبصر ماعنده ذوق ولا اخلاق .

ظلت ترجف بس ما كدرت تحجي على كولة أفنان من سولفتلها ، تكول تعرف اذا سمعوا ال الغريب بيها مضوجتج يوم واحد ما يخلوها بهذا الصالون.

كملتلي وبلشت بالبنات ، شعري بقى على طوله ومكياجي بسيط وحلو ، خليت تدرجات الوردي..

رجعنا للبيت الكبير البنات دخلوا واني رجعت لبيتي لبست بدلتي السودة وتعطرت لبست حذائي الاسود العالي وانتظرت البنات يجون ، مرت نصف ساعة وكلهم اجوي لبيتي ، اخذوني وطلعنا للقاعة اللي صايرة بداخل المزرعة.

الولد اتفقوا بس يدخل أديم يدخلون وياه يهوسوله وبعدها يطلعون طلعة جماعية لمطعم ببغداد ويبقى بس أديم واحنا البنات ..

سألت أفنان عن أديم ، كالت بعده يم الحلاق ..

شغلوا اغاني ركصنا كأنما حفلة تخرج كلنا فرحانين مو عبالك عروس ومعازيم ، اصلاً ماكو احد غريب كلش اخذت راحتي وتونست وياهم.

مرت ساعة وكالو اجوي الولد وياهم أديم ، راحت أفنان وكم وحدة من بنات عمهم جابوا صينية الحنة خلوها كدامي ولبسنا شالات فوك اكتافنا وشعرنا واللي بدلتها قصيرة راحت لبست بشت فوكاها..

دخلوا بهوستهم كعد أديم بصفي كلبي كام يدك من الفرح هسه يلا حسيت صدك تزوجت ، الولد كاموا يهوسون ويركصون بعدها اجتي الحجية جابوها الولد و حنتنا جانت كلش تعبانة بحيث ما طولت ربع ساعة وكالت رجعوني أنام..

رجعوها واحنا كملنا الحفلة ، الولد انسحبوا وظلينا بس احنا البنات ، ويانا أديم .

ركصنا سلو وقطعنا الكيكة ، واخذنا صور فردية وبعدها جماعية .

جنا اني وياه طالعين اقمار ثنين ، بدون مبالغة..

بعدها كالوا يلا كافي روحي بدلي والبسي البيضة ، تقرب أديم مني وهمس.

أديم : نروح سوى .

أسمار : اي طبعا انت هم بدل القاط ..

أديم : واريد امدد شوية تعبت

أسمار : يلا نرتاح نصف ساعة ونرجع.

أديم : ماشي .

لزمت كفه وطلعنا متوجهين للبيت ، دخلنا سدينا الباب ورانا ورحنا لغرفتنا اول ما دخلت سحبني بقوة لحضنه اخذ شفتي وغرقنا بعالم ثاني بعدها همس.

أديم : اوصفيلي نفسج بدقة حتى اتخيلج لأن يكولون طالعة تاخذين العقل بجمالج..

بدلال مصاحبه خجل همست.

أسمار : منو كال.

أديم : كالو مو ضروري اكولج منو.

حجاها واخذ خصري بيد وايد الثانية خلاها بجيب البنطرون..

أسمار : تمام راح اوصفلك شلون طالعة ..

تحسس رقبتي وعيوني ،و همس بأذني كلام غزلي اول مرة اسمعه ذبت بيه وبجماله..

اديم : يلا اوصفيلي

أسمار: انطيني مجال احجي ..

أديم : يلا..

حجاها وطبع قبلة بخدي ...

تقربت حاوطت رقبته بيدي وهمست بأذنه..

أسمار : شفايفي لونهم وردي عيوني بيهم كحل أسود اجفاني تدرج الوردي لون ناعم مناسب ملامحي ، فستاني اسود وبارز تفاصيلي الأنثوية.

رفع اصبعه سد حلكي وهمس.

أديم : اش كافي خليني اني استكشف الباقي.

صار يستكشف حبيبته بنفسه ، اخذنا عصف الحب ونسينا احنا وين ومنو تاركين ورانا ...

ملابسنا غطت الأرض ، همس بأذني اثناء العلاقة وكال.

أديم : ياحلوتي اسمحي واسمعي واسكتي ، واسرعي وارقصي على دقات قلبي واقفزي واعثري لأضمكِ بصدري وأسكني به لكن احذري لا اريدك ان تطفئي ، أنا في احب اباحي فأنصتي واغمضي وبعدها تنهدي واظهري مفاتنك وابدأي بتعداد غزلي الشهي لا تقاومي فتخسري وتخصصي ، بي وبي وبي لا تصرخي وعلامات الخوف تظهري ، تعالي بثوبك الطويل وتعثري تفحصي ملامحي ولا تخجلي وان لم تكتفي فتكلمي ولا تكذبي وابقي على صدري تلمسي وتمهلي وتمادي وتغزلي تنفسيني ولا تنهضي وأنصتي لجنوني فأنا في الحب لا اعرف حدودي..

بهذا الغزل والحب المتبادل تمت العلاقة وصرت زوجته شرعياً...

بعدها تنهد واخذني لحضنه همس بأذني.

أديم : مبروك.

أسمار : مبروك.

أديم : شكد لذيذة.

سكتت ، بعدها تذكرت الحفلة والبنات من سمعت دكة الباب بقوة كمزت ضحك ..

أديم : شبيج ؟

أسمار : أديم الحفلة البنات شكد عيب.

أديم : مو عيب بويا تعالي عوفيهم هم منا وبينا.

أسمار : لا عفية .

أديم : يلا روحي قبلي واني وراج جاي

أسمار : اكيد.

أديم : اي طبعاً..

كمت رتبت مكياجي وشعري لبست نفس بدلتي والحذاء ، حضرت قاط أديم دليته على مكانه ، ردت اطلع انتبهت على نفسي لابسه نفس بدلتي السودة رجعت على السريع غيرتها لبست الثانية وادردم على أديم لأن اخرني ..

أديم : شبيج ؟

أسمار : ردت اطلع بنفس البدلة انثبرت..

ضحك وكال

أديم : همزين جان انفضحنا

تركته وطلعت لكيت البنات واكفيلي يم الباب.

أسمار : تأخرت لأن أديم تعب شوية..

بنت عمه كالت..

_ سلامته ..

أسمار : الله يسلمج ..

رحنا للقاعة كعدت والبنات يركصون، ورا شوية اجوي كوموني وياهم ، مرت نصف ساعة وأديم ماكو صارت ساعة وما اجى بعدين أفنان كالت حروح اشوفه وين صار وانت ابقي هنا هزيت راسي ب اي..

راحت أفنان ورا ربع ساعة اجتي وجها مخطوف ، وكفت كبالنا وكالت..

أفنان : بنات أديم ماكو دورته المزرعة كلها..

طلعنا كلنا من القاعة ركضت للبيت غيرت ملابسي والبنات راحوا للبيت الجبير ، طلعت اركض والدمعة بعيوني ، مقهورة ليش فرحتي ما كملت ، شافتني خالتي ، كالت.

أسن : شبيج ؟

أسمار : وين أديم ما شفتيه ؟

أسن : لا جنت يم الحجية ليش مو يمكم بالقاعة.

أسمار : اي يمنا بس رجع للبيت كال ابدل وارجعلكم..

بهذه الاثناء دخل أرقم وجهه مخطوف لونه اصفر بصوت يلهث كال.

أرقم : أديم خطفوه..

يتبع.

صباح الخير
نزل بارتين بدل بارت تعويض عن التأخير متابعة ممتعة احبتي ...