رواية أحببتُ ذلك الغريب الفصل الثالث وثلاثون 33 - بقلم عبير إدريس

تفائلت بالخير فعرفتك...

____________

تقربت لزمت ايده جان فرحان وحاير شلون يعبر عن احساسه..

طبعت قبلة على خده وهمست...

أسمار : اوصفلك شكلي لو بنفسك تستكشف وترسمني وانطيك النسبة بين رسمتك و بين شكلي الحقيقي بدون غش.

ميل راسه بهدوء كال..

أديم : واذا فشلت شلون ؟

أسمار : نعيدها من جديد شنو يعني ؟

أديم : ناسي تدرين..

أسمار : نتذكر سوى مو مشكلة..

أديم : اذا بديت اخطط الوجه شلون اعرف هذا الخط هنا وما ارسم فوكاه.

أسمار : عجل اني شنو هنا خراعة خضرة..

حجيتها وضحكت لأن عرفته راح يضحك عليها، وفعلاً ظل يضحك يفرك عينه ويهز براسه..

أديم : خرب ببليسج يا سمرة شجابج على العجل ما تكوليلي؟

أسمار : الصدفة جابتني يمك لوما عاثرة بيك جان شلون عرفت العجل وناسبناهم..

أديم : اويلي بس اني عثرت بيج مو انتِ عثرتي بية ، تدرين شكد احبج يالعطرج ورد ندى فوك خدج ..

أسمار :اوو سويتلي واهس اشعرلك تدري عاجبني اكتبلك خاطرة او قصيدة صارلي هواي تاركة القلم ..

أديم : تدرين شنو عاجبني اني ؟

أسمار : شنو ؟

أديم : عاجبني اتنفسج ، ارسمج احسج ، اشعرلج ، ادللج ، اضمج ، ارهمج لكل جرح بية ، اشيلج براحات اديه ، اشمج حيل لحدما تخلصين واسقيج حب وحنان وترجعين توردين وارجع اشمج ...

ضحكت...

أسمار : زين هذا مو غزل ارتجالي ، معناها كتبتلي قبل لا اكتبلك اني..

أديم : كتبتلج وانتظرت منج جواب
كاعد عله عتبة باب محد يدكها
لا غريب ولا قريب ولا سائل جاي يسأل من بعيد وحدي كاعد بصيفنا الحار اللهيب وانه كاعدلج انتظر ، تأسرت ولج يمتى اتحرر من محبتج وابقى حر...

لزمت وجهه بكفوف اديه وحضنته حيل و اجاني الألهام وحجيته دفعة وحدة .

أسمار : يا سارقاً فكري وانتباهي
القلب فيك حائراً وساهي

كل شيء بجانبك مربك
انت من قررت رسمي
ومن فمك اجمل صار اسمي

انت كأخي وأبي وأمي
وحنان جدي وجدتي
انت يا ألفي وأيلافي وألفتي

يوم قلت لي تمني
قلت لك الماضي
قلت لي انسي وانهي
وللقادم معي تمهلي

ثوري على صدري وكابري
انزعي كل حزنك معي
وارتدي ثياب حلمي وحظي وحكمي وتوسدي حضني ....

سكتت تنهد مبتسم وهمس.

أديم : انتِ جيشي وانا الحامي فأحتمي
كوني حربي ومحرابي وقبلتي
كوني تراتيل اشعاري
كوني ديني وذاتي واماني وامنياتي
كوني داري ودربي
كوني ذاتي ورمزي وذوقي وعفتي
كوني سجني وسحري
انتِ شفتي وشكري وشمسي
انتِ صبحي وصدقي وصوتي
انتِ ضعفي وقوتي
انا من دونكِ عاري عصي قاسي نكدي مؤذي وغير مرئي...
كوني لغتي ولقبي
فأنتِ كنزي وكبدي وقلبي ..

دموعي تنزل واني اسمتعله شلون يتغزل بية ، تنهدت وهمست...

أسمار : انت قلمي وقواي وقوتي
انت كأنني تشبه فكري انت قصتي..

أديم : انتِ كأسي انتِ ملكي
انتِ موتي انتِ نظري و وقوعي ونهوضي ...

بعدها سكتنا وانفاسنا تتسارع حب ولهفة ما مصدكين انجمعنا و واحد بحضن الثاني ونتغزل ببعض، طال السكوت لدقائق واحد غرقان بحب الآخر وما نعرف شلون نتسابق و نعبر عن حبنا ...

طلب مني اساعده يكعد على القنفة الكبيرة واقرب معدات الرسم واكعد بصفه حتى اساعده سويت مثل ما طلب مني ،  كعدت بصفه وصرت قريبة منه  تحسس وجودي  رفع كفه تلمس عنقي ، جمدت بمكاني كطعت النفس ظليت هادئة ما تحركت ..

مرر اصابعه بدقة وبطئ  مثلما احب وكأنما يرسمني وصل لعظام كتفي وقرب فمه من اذني وهمس..

اديم : اه يا ريحتج تتجدد كأنما عروس بليلة عرسها،  تحسين باللي كاعد احسه وياج؟

هزيت راسي ب اي وهمست مغمضة..

أسمار : كلشي وياك مختلف..

مرر اصبعه على جفوني ضحك فتحت عيوني سألته ..

أسمار : ليش ضحكت ؟

ما جاوبني رجع يتلمس باقي تفاصيل وجهي حتى يرسمها وصل لشفتي مرر اصبعه ابتسم وكال..

أديم : قبل لا ارسمها لازم اجرب طعمها..

أسمار : أديم ارسم وصير حباب.

أديم : اذا ماكو رشوة ما ارسم لو مو تتوسليني.

أسمار : بوسة بس..

أديم : عجل شرايد أكثر هي بس هاي..

أسمار : وصير حباب بعدها.

أديم : تقربي واشوف بعدها نسولف..

قربت وجهي لوجهه اخذه بين كفوفه وتبادلنا الحب..

بعدها همس..

أديم : نعست ..

أسمار : والرسم ؟

أديم : خليه وقت ثاني..

أسمار : ماكو هيج واحد مرتشي وكذاب مثلك ماشايفة..

حجيتها بعصبية هو ضحك..

أسمار : على شنو تضحك بله؟

أديم : اضحك على عصبيتج وانتِ كد الفار.

أسمار : وين كد الفار خبصتني  طولي ١٦٤ وين بعد قصيرة بس كول انت طويل اطول من كلمة السلام عليكم من واحد نعسان ويحجيها يوم الجمعة الصبح..

ضحك بقهقهة رجع راسه ليورا وهمس..

أديم : يايابه والله تعبان وهاي النسوان يرادلهن گلب فوك كلبك اخ يا أديم اخ بشنو ورطت روحك..

أسمار : لا بله منو قبل شوية انتِ لغتي وانتِ لقبي ومن دونكِ عاري بلا هدوم..

ضحك ضحكة طويلة بعدها تنهد وكال..

أديم : هاي شبيج كلام قصص لا كلشي احجيه تاخذيه صدك.

أسمار : يعني هسه هذا كلامك اخذه بجد لو مزح ؟

أديم : لا تاخذين كلامي جد مثل قبل شوية من ضحكت وياج ردت اضحكج ولج اني وين الكى مثلج حبيبتي.

أسمار : انت واحد ما تتأمن.

أديم : عود سويلي تأمين وأمنيني..

جرني عليه وخرت ضربته على كتفه..

أسمار : وخر زعلت منك.

أديم : هسه غير اعرف ليش شو ردتي ارسمج ورسمتج بعد شكو..

أسمار : وين رسمتني يالجذاب يالمرتشي.

أديم : شبيج خبصتيني مرتشي ومرتشي شنو ماخذ هي بوسة شوفي الزلم شتسوي ياعمي اني فقير..

أسمار : اي كلش فقير..

أديم : تعالي ارسمج اليوم ما راح تفكين مني ياخة اعرف..

أسمار : شنو اصلا ما اغديك اذا ما رسمتني..

أديم : اي اعرفج ظالمة .

أسمار : يلا طلع الفرش وبدون كلام ارسمني حتى لو مجعمرة..

أديم : شلون ورطة هاي ما تكوليلي شلون دخلتي لغرفة الرسم واني جنت قافلها..

أسمار : سألت أفنان عنها لأن استغربت ليش مقفولة من دون الغرف وجابتلي المفتاح وافتحتها واكتشفت مواهبك المدفونة..

أديم : اني الها أفنان فتحتلي خوش باب.

أسمار : لاترسم زعلت و اصلاً مايحتاج بعد..

أديم : لا لا تعالي هسه ارسمج..

أسمار : يمعود انت بس حجي.

أديم : لا تدفعيني مايحتاج راح ارسم يلا ثبتي اللوح الخشب على الستاند..

أسمار : تمام ، وهذا ثبته..

أديم : انطيني فرشة رفيعة كلش.

أسمار : هاي بس ممكن تشرحلي تفاصيل..

أديم : تريدين اعلمج ؟

أسمار : احب الرسم

أديم : ماشي هاي استخدمها للتفاصيل لازم تكون رفيعة..

أسمار : تمام.

أديم : هسه ناوشيني فرشة رقم سبعة ورقم ثمانية..

أسمار : مممم وينها وينها..

أديم : اكو علبة لونها اسود افتحيها تلكيهن بداخلها لونهم رصاصي...

أسمار : لحظة يمكن ناسيتهم فوك هسه اجيبهم واجي.

أديم : على كيفج لا تركضين خاف تتعثرين.

أسمار : تمام..

مشيت وصلت للدرجة الأولى توني اصعد وصاحني التفتت عليه وهمست نعم ، كال..

أديم : شنو جايبة ادوات ؟

أسمار : لوح وكم فرشة..

أديم : بس ؟

أسمار : اي شنو اجيبلك بعد ؟

أديم : قلم رصاص وممحاة الوان زيتيتة عندي بالمجر الثاني على ايدج اليمين واريد وعاء نخلط بيه الألوان ومن الحديقة جيبيلي نفط بوعاء صغير..

أسمار : شنو تسوي بيه؟

أديم : انظف الفرش من الألوان اذا ردت اعيد استخدامهم..

أسمار : ها ماشي..

أديم : طبعاً اني كاعد اسايرج حتى لا تكولين يكسر بخاطري لأن اعرف بنفسي راح اخفق بالرسم ترى يرادله انتباه قوي وضروري اكون مبصر يا اميرة..

أسمار : ميخالف نجرب قابل راح ندخل بيها معارض هي بالبيت.

أديم : امرج ست..

صعدت اركض دخلت لغرفة الرسم فتحت المجر لكيت العلبة اخذتها، جان مرتبهم ترتيب يجنن ومبين ذواق وصاحب مزاج عالي باخيتار الاشياء..

اخذتهم ونزلت رحت يمه خليتهم على الطبلة وقربتها من ايده..

أسمار : هسه كلشي صار جاهز.

أديم : تقربي ساعديني ماكو داعي تبقين بعيدة حتى اشوفج وارسم راح ارسمج شلون ما متخيلج ببالي..

أسمار : وهذا أكثر شي متحمستله اريد اعرف شلون واصفني بداخلك..

أديم : يلا تعالي ساعديني.

أسمار : اجيتك.

رحت يمه طبعت قبلة قوية على خدة وحضنته قوي..

أديم : هاي حرب مو مساعدة.

أسمار : شسويت ؟

أديم : لا كلشي ما سويتي بس جدي كاعد يغني ...

أسمار : جدك انسان راقي

أديم : شعبالج عجل يغني فوك النا خل..

ضحكت وكلت..
أسمار : عمري كله جنت اغنيها فوك النخل طلعت غلط فوك النا خل..

أديم : اي صح الاغلبية جانوا مفتهميها خطأ..

أسمار : عوف السوالف و يلا بلش..

أديم : غير تكومين أول..

انتبهت على روحي كاعدة على رجليه..

هز راسه يضحك وكال.

أديم : والله يا الله شلون ناس استغلالية..

أسمار : اذا حبيبي ما استغله منو استغل.

أديم : استغلالج خليه بشع

أسمار : ليش عود؟

أديم : لأن اذا اجى وقتي ولازم استغل راح استغلج ابشع استغلال لدرجة يا سمرة ما راح يبقالج أثر..

أسمار : شنو وحش.

أديم : عندي مجاعة افريقا من يم الحلوات..

أسمار : الحلوات بشكل عام لو بس اني.

أديم : الله لا يجذبني بس انتِ..

أسمار : خرب صدك تحجي؟

أديم : هسه شكايل بس انتِ يمعودة ، صدك باعي اني متت جوع والغدا صار شوكت نروح نتغدا .

أسمار : ارسمني أول..

أديم : اهووو ، يلا وخري من رجلي وساعديني .

أسمار : لتظل تحجي يلا وخرت بلش.

أديم : كعدي بصفي .

أسمار : وهاي كعدت..

بيد لازم فرشة والايد الثانية بلش يتحسس بيها ملامحي مرر ايده على وجهي بشكل دائري ورجع مرة ثانية تحسسه ، صفن عكد حاجبه..

أسمار : ها شنو لكيت؟

أديم : اصبري كاعد افترض القياسات واتخيلها لا كل شوية حاجية وقاطعة سلسلة التخيلات عني.

أسمار : تمام سكتت كلشي ولا تنقطع هاي السلسلة..

أديم : ام لسان انطيني قلم رصاص..

اخذته وخليته بيده ، ترك وجهي وبلش يرسم بخط واضح وايد ثابتة..

أسمار : ابقى على نفس المسار واقفل الدائرة ليوين ما وصلت..

أديم : التقوا الخطوط لو بعد ؟

أسمار : التقوا هذا هو اقفل..

أديم : تمام هسه الوجه تحسيه يشبه شكل وجهج ؟

أسمار : تقريبي ..

أديم : تمام ، تقربي..

أسمار : تقربت.

مرر اصابعه بدقه على جبيني وحسب القياس بالطول وبالعرض ورجع للوحة بمساعدتي رسمها ، صح الخطوط جانت مو واضحة بس بالنسبة لحالته كلش زين.

أديم : واضحه الخطوط لو بيها خلل؟

أسمار : واضحة وتجنن.

أديم : الله عليج لا تجامليني.

أسمار : كملها ونشوفها للباقين وعود عاتبني اذا عرفت مجاملتك.

أديم : يكفيني رأيج ما احب اخذ رأي احد ثاني..

أسمار :احبك.

أديم : سكتي ولج خليني أكمل..

تلمس حواجبي وهمس..

أديم : تقويستهن حلوة بس مو ثخان شوية؟

أسمار : ما احب اشيلهم يعجبني هيج ، اذا تحب ويعجبك اغيرهم عادي.

أديم : هاي شبيج واني وين اشوف.

أسمار : ما راح اجاوبك وابقى اقهرني..

أديم : موقصدي اقهرج بس غير اجاوبج..

أسمار : اساعدك برسمهم؟

أديم : هي اصعب شي بهاي حالتي الحواجب شلون راح اخليهم بنفس المستوى..

أسمار : اخلي مسطرة بالطول وبالعرض وانت ارسم وحدد ومن توصل للمسطرة لا تتعداها ..

أديم : خوش فكرة يلا سويها.

اخذت مسطرتين وخليتهم على الرسمة ، وبلش يرسم ، طولنا هواي بيها تقريباً ساعة رن موبايلي همست..

أسمار : موبايلي اجاوب واجيك..

أديم : بس خليني اكمل يلا تتحركين لأن تخرب وانسى التفاصيل اللي راسمها ببالي وحفظت المسافات بس تكومين اتشتت..

أسمار : طز بالموبايل ..

ضحك وهمس.

أديم : تقربي.

أسمار : اكثر من هذا القرب وين اروح بعد.

أديم : عطشت مو .

أسمار : اذا كمت جبت مي راح تتشتت.

أديم : فهمتيني بس تتغابين.

أسمار : يا لوتي ..

أديم : تقربي يلا..

تقربت سرق قبلات.. بعدها رجع يرسم.

أديم : خلصت الحاجب صح ؟

أسمار : صح.

أديم : هسه وصلنا للعيون وما بينهما نون وما يعلمون..

أسمار : يلا خل اشوف شلون متخيل عيوني.

أديم : لونهم حسب ما كالو اسود يشبه سواد الليل..

أسمار : اي لونهم اسود ..

أديم : البؤبؤ كبير مو ؟

أسمار : لا عادي يشبه عيونك.

أديم : والله !!

أسمار : اي..

أديم : ورسمة العين شلونها ؟

تقربت منه اخذت اصبعه خليته على عيوني وهمست..

أسمار : تحسسها وراح تعرف شلونها.

مرر اصبعه وابتسم.

أديم : رموشج هواي....

أسمار : غش هذا.

أديم : لا بله شلون ؟

أسمار : خالتلهم مسكرة..

أديم : بس كثيفات .

أسمار : هي تكثف الرموش.

أديم : نترك العيون هسه لأن هاي صعبة ونعبر الخشم اريد اوصل لمكان احبه كلش ومتعلق بيه هواي.

أسمار : ماكو عيني ترسمني بالسرة.

أديم : زين اقيسهم اول وبعدين اكمل الرسمة..

أسمار : اهوو بدينا أديم..

ما جاوبني مرر اصبعه على خشمي ، وبعدها على شفايفي ، مروراً بخدودي والحنك، تنهد وهمس..

أديم : عيني اليوم تعبت وجعت ، شنو رأيج نكمل بعدين ؟

أسمار : عادي حتى لو كل يوم شوية ..

أديم : اي وهم ايدي ترجع تتعود لأن من زمان تارك ويراد تركيز وذهن صافي وعاجبني اتخيلج بهدوء وراحة بال..

أسمار :تمام يلا نروح نتغدا لأن اتصلوا علية من زمان..

أديم : تكدرين تساعديني لو ادز عليهم.

أسمار : حبيب روحي منا وجاي اني عكازتك محد غيري يساعدك

أديم : دايمتلي يابه ..

أسمار : يلا حبيبي انطيني ايدك..

أديم : قربي الكرسي أول حتى ما ينشلع كلبج

أسمار : تمام..

رحت قربت الكرسي وساعدته من وكف سحبني لحضنه وحضني قوي همس بأذني..

أديم : حبيبتي الأحبها تفداج روحي والله.

بادلته الحضن وبسته بخده ..

أسمار : ربي يديمك ويخليك يا اغلى البشر.

أديم : تحبيني؟

أسمار : فوك ما تتصور..

باس راسي وطلب اكعده ، بعدها طلعنا من البيت سديت الباب وتوجهنا للبيت الكبير ، اول ما دخلنا جانوا الولد كاعدين وبوسطهم إيساف واياس وتميم محاوطيه ويستمعوله ، سلمنا والكل صاح ..

_ وينكم متنا جوع صدك جذب..

أديم : جنت نايم وهسه كعدت..

إيساف : ابو تميم اللي يكذب وين يروح؟

أديم : بحضن حبيبته..

أسمر : يرزقنا كلنا هذا العقاب..

أهاب : امين يارب العالمين نريد عقاب مسيحي.

أرود : ترنيمي صاك..

أهاب : تولاني يثول ثول..

إيساف : انفتحوا ماشاءالله عليهم ما يحبون سوالف..

أديم : وين أمي وأفنان؟

أسن : أفنان نامت قبل شوية وكالت وقت الغدا كعدوني..

أديم : شعجب مو من عوايدها تنام بهيج وقت خاف مريضة ؟

أسن : لا ما اتصور..

أديم : ضايجة جانت ؟

أسن : ما حسستني بهالشي بس كالت اريد انام..

أديم : ماشي ..

أسمار : نصب الغدا خالة؟

أنهد : لا طبكوه وية العشا افضل ..

أسمار : ها بدينا ؟

أنهد : مو تحجين الأخرس ياعيني.

أسمار : حقكم بس اليوم بعدها نلتزم بالموعد.

أهاب : يابه عرسان عوفوهم براحتهم..

أرود : عايفيهم حاجين شي نريد بس نتغدا.

أسمار : خالة بعد ما نخلص يلا كومي .

أسن : يلا..

دخلنا للمطبخ صبينا الغدا من كملنا دزينا على الولد اجوي نقلوا الأكل للهول ، ودزيت تميم يكعد أفنان على الغدا ..

كعدنا كلنا على السفرة اجتي أفنان عيونها مورمة مبين باجية هواي ، تقربت كعدت وهمست ..

أفنان : السلام عليكم..

أديم حس بيها شي بل تأكد ، ترك الخاشوكة من ايده ورفع راسه ناحيتها وكال .

أديم : منو مضوجج ؟ مغثوثة من شي ؟

أفنان : لا سلامتك.

أديم : شعجب نمتي هيج وقت.

أفنان : مالي خلك ونمت..

أديم : بعد الغدا نحجي.

أفنان : ماشي..

قربت الأكل يم أديم وبديت أعدد الأصناف اللي كدامه..

أسمار : حبيبي على ايدك اليمين صحن تمن وعلى اليسار صحن مركة الفاصوليا ، انتبه المركة حارة شوية ، وهذا سوب الدجاج بوسطهم حار كلش ، والخضروات على يمين الصحن والزلاطة على يساره ، ومن تريد مي كولي اصبلك..

بلشنا اكل انتبهت عليه ياكل حسب وصفي حفظ الأماكن ومن اشوفه يخطأ اقرب الخاشوكة للمكان الصحيح وادك خفيف بخاشوكتي على الماعون حتى ينتبه...

ميل راسه باتجاهي وهمس..

أديم : سمرة أريد مي..

أسمار : اي عيوني..

صبيت المي وخليته بيده اخذه مني شرب راد يرجعه للسفرة اخذته منه لأن نزله على ماعون المركة قبل لا يصير بيه اخذته ...

أديم : اكلتي لو حايرة بية ؟

أسمار : مستمتعة بالأكل بصحبتك أكل حبيبي عليك بالف عافية..

أديم : الله يعافيج ويبارك بعمرج.

أهاب : حجي على الأكل ممنوع لو بدينا نكسر القواعد..

أسمار : وياية ماكو قواعد..

أرقم : خوش.

أديم : مرتي براحتها تمارس طقوسها مو مجبورة تمشي على عادات وتقاليد احنا نفسنا ما مقتنعين بيها واذا احد ما عاجبه كلامي يكول حتى ما نكعد وياه على سفرة وحدة ، الحمدلله بيتي موجود وفلوسي جوة رجليها تلعب بيهن لعب تجيب ما حب كلبها واشتهاه..

إيساف : اعصابك أديم ليش هذا الانفعال وبعدين ماعندنا احد يعزل كلنا نتشارك بالأكل حتى البركة ما تطير من بيتنا

أديم : البركة تطير بكثرة المشاكل مو بعزل الأكل و مرتي محد يملي عليها أوامر سواء كان كبير او صغير.

أرقم : اشوفك تحجي معلك ونسيت منو اني.

أديم : ما ناسي بس زوجتي ما احب احد يضوجها.

أرقم : تمام ، الحمدلله بالعافية عليكم الغدا..

عمرة : وين وليدي توك كعدت..

أرقم : شبعت يمة  ..

سكتنا واكلنا بهدوء ، صبينا الجاي من وزعوه  قربت كوب أديم  منه وهمست.

أسمار : تشربه حار لو تنتظره يدفى شوية..

أديم : اشربه حار ما احبه يصير دافي..

اخذت كف ايده بسطه خليت الكوب بماعونه فوك كفه.

أسمار : دير بالك حار ..

أديم : متعود لا يظل بالج..

أسمار : تمام..

شربه انتظرته حتى أخذه لاحظ هالشي علية ترك الكوب من ايده على الطبلة وهمس..

أديم : لا تبقين تراقبيني مارسي حياتج طبيعي عادي اذا كسرت شي او وكع مني او انسكب علية ولا عبالج راح اخجل منهم ترى متعودين علية ..

أسمار : ضجت من أهتمامي أديم ؟

أديم : لا بالعكس بس مقهور عليج كاعد احس تعبتني ..

أسمار : واذا تعبت وبعدين مجبورة على التعب؟  لو حابه هالشي ؟ وصدكني جنت متمنيته..

أديم : ياعمري.

أسمار : نعست مو ؟

أديم : اي شلون عرفتي؟

أسمار : عيونك حمر .

أديم : راسي كام يوجعني هذا ضوجني.

أسمار : ليش تتعصب بسرعة.

أديم : اني اساساً مو طايقه من يوم ما ضم علية سالفة موت شهد.

أسمار : اترك الموضوع ولا تكدر روحك يا عيني..

أديم :اساساً مابية حيل احجي ياريت ترجعيني للبيت انام ساعة وكعديني.

أسمار : ماشي يلا نروح..

اخذته وطلعنا بعد ما سلمنا عليهم ، دخلنا للبيت وبعدين للغرفة ساعدته ينام بفراشه طلب مني انام يمه وما اتركه ، ماجان عندي رغبة بالنوم وردت أروح يم اياس اشوف احتياجاته ، بس ما رديتله طلب ، مدتت يمه فتح ايدي ونام بحضني ، غمض عيونه وبديت اتفحص ملامحه ، كثافة رموشه سمرة بشرته وعروق رقبته البارزة ، جانت تنبض بشده ، مسدت شعره ، مزينه خفيف ، ثكل نفسه ودخل بنوم عميق ، بس ما تركني بقى حاضني ما رخت ايده..

خدرت أيدي ردت اسحبها بس خفت يفز ، انتظرته الى أن غير نومته وانكلب للجهة البعيدة سحبت نفسي على كيف ، غطيته وطلعت من الغرفة ، لبست شال وتوجهت للبيت الكبير اول ما دخلت جان البيت هادئ ، سمعت صوت من غرفة أسمر تقربت سمعته يسولف وية اياس وتميم دكيت الباب طلعوا الجهال حضنتهم واخذتهم وياية للهول كعدنا سولفنا وسألتهم شنو محتاجين ، هزوا راسهم بلا يعني ما رايدين مني شي ، طلبت من تميم يروح يصيح عمه أسمر ، ركض صاحه بعد دقايق اجوي اثنينهم أسمر لازمه من ايده ويضحكون..

أسمر : أمريني ..

أسمار : ما يأمر عليك ظالم بس حبيت اطلب منك طلب.

أسمر : غالية والطلب رخيص كولي واعتبريه تم.

أسمار : فدوة لعيونك ، أريد منك تجيبلي موبايل أيفون حديث.

أسمر : الج ؟

أسمار : لا اريده لأديم.

أسمر : شيسوي بيه هو على كد المكالمة ويتركه..

أسمار : لا اريد اعلمه عليه.

تقرب كعد يمي عكد حاجبه وكال.

أسمر : سمرة هذا موبايل يرادله عيون مو تمن ومركة وتدليه على اماكنهن..

أسمار : هسه جيبه واشوفك شلون اخليه يستعمله أحسن مني ومنك..

بقى صافن علية حركت ايدي كبال عيونه وهمست..

أسمار : شبيك وين صفنت ؟

أسمر : على قدرة التحمل اللي عندج خبلتيني اليوم على الغدا شلون واهس توصفين مكان الأكل وتنطيه حتى القياسات ، تصدكين اذا كلتلج أول مرة أديم ياكل بترتيب مثلنا من يوم الحادث لهذا يومج أكله بهوسة ويدمر نفسه والأرض رغم أفنان جانت تساعده وتوكله بس جان يرفض يريد يعتمد على نفسه ، السويتيه اليوم ما فد يوم واحد بينا طخت عنده وكعدنا نوصفله اصناف الأكل الموجود واماكنهن..

أسمار : اني لو ما مشتغلة بهذا المركز وماخذة دورات هم مثلكم جان تركته لأن ما أعرف ..

أسمر : بس عبالك عندج معرفة وياهم ومعاشرتهم من زمان ما معقولة بالجديد متعلمة وهسه رجعتي صدمتيني بسالفة الموبايل راح تخليني هسه اجيبه حتى بس اشوف شلون تعلميه عليه.

أسمار : ياريت تجيبه قبل لا يكعد من النوم.

أسمر : رهيبة يا سمرة ربي يستر عليج ولج حتى درجة حرارة الشي تكوليله المي بارد الجاي حار المركة دافية خبلتينا اني والولد بقينا صافنين عليج.

أسمار : هسه اذا صار بية شي معناها عيونكم.

أسمر : يابه ما نحسد اصلا فرحانين بيج وبخالة أسن.

أسمار : فدوة لعينك والله عبالي راح تظل زعلان مني ومن أديم بس شلون شايل قلب نظيف بسرعة يسامح.

أسمر : اني عذرته بسبب اللي صارله قبل بس هو المفروض يعرفنا زين ويعرف اخلاقنا عيب عليه يشك ، سمرة احنا اذا ردنا نسوان نجيب الماجابتهن أمهن واللي يحبها كلبج ويتمناها بس احنا فرحانين بيكم لأن بيتنا عبارة عن شباب وهوسة مابيه حس أنثوي غير أفنان وهاي خطية ملتهية بأديم وأمنا الحجية وبنتها وتميم ما نلحك نشوفها من اجيتوا ضفتوا لون للبيت ونكهة للأكل ، كمنا نتفق اني والولد نكمل من وقت حتى نرجع من وقت ونسهر وياكم أعرف بعدكم عرسان بس صارت بعد وما تتكرر.

أسمار : لا ازعل عليك اذا انسحبت وبقيت بعيد ، اذا على أديم شوية شوية يتعلم على الوضع وترجع ثقته بنفسه وبينا..

أسمر : ان شاءالله ، هسه راح اطلع اجيبلج الموبايل واجي واشوف شلون راح تعلميه يا الداهية يالطولج شبر..

أسمار : نص أحسن..

أسمر : هم صدك هواي عليج الشبر..

أسمار : أسمر روح قبل لا نتخارب..

أسمر : ما تكدرين.

أسمار : لا تتراهن على عمرك.

أسمر : يعني هذا تهديد صريح ؟

أسمار : و واضح همين.

أسمر : خليني اروح وأسلم على عمري .

أسمار : يكون أفضل والله.

ضحك وكام حتى يروح وصل نهاية الهول ورجع التفت..

أسمر : الفلوس مني منج ؟

أسمار : طبعاً منك اخوك لو اخوية والله ياربي وبعدين اني موظفة حتى اجيبله من راتبي شو لا تعين ولا شغل..

فتح عيونه وحلكه مصدوم من جوابي.

أسمار : شبيك يلا عيني وجيب ارقى نوعية..

أسمر : خرب ماكو هيج استغلال..

أسمار : هذا اخوك ما يضيع وياه يلا اتدعبل.

رجع راسه وضحك بصوت عالي بعدها كال..

أسمر : لج شكد شايف سوالف من آل الغريب بس مثل سالفتج هاي ما شفت.

أسمار : شعبالك عيني آل الغريب هينين اللي يطبلهم وما يتعلم خباثتهم ما محسوب عليهم..

أسمر : خرب بضميرج اذا عندج ضمير.

أسمار : يلا راح يكعد أديم استعجل وها صدك اخذ وياك الجهال اشتريلهم كل واحد علاكة..

أسمر : علاكة ؟

أسمار : اي شبيك علاكة.

أسمر : يعني مو نستلة وشربت واقشمرهم.

أسمار : عيوني ولدي كبار ما يتقشمرون بهيج سوالف وباوع احب نستلة نسيت اسمها بس غلافها اسود وعليه خطين لونهم احمر بابا جان يجيبلي منهن كارتونة كاملة لأن تطلع أصرف عليه

هنا خله ايديه على وجهه وظل يضحك غص بضحكته كمت للمطبخ جبتله مي ونطيته.

أسمار : هاك اشرب .

التفت علية شاف المي بيدي ضحك بالاكثر..

أسمار : هاي شبيك فاتحة مسرحية كدامك ؟ شايف عادل امام بصفي واكف ؟ وجهي يشبه سعيد صالح الله يرحمه ؟ شبيك ما تكولي..

صافن علية وعيونه تتوزع على ملامحي وخانكته الضحكة تركني وراح للدرج وكف على أول باية وصاح.

أسمر : ولك أهاب تعال وينك.

ذاك جاوبه من فوك.

أهاب : شكو شبيك نايم .

أسمر : اكعد وانزل شوف مرت اخوك ولك طلعت فد وحدة..

رحت وكفت يمه ولويت ركبتي وباوعت لأهاب.

أسمار : هاي كله لأن كلتله جيبلي نستلة وياك مادام طالع وهيج فضحني ما اريد الله لا يعوزني هسه يكعد أديم يجيبلي..

أهاب : صدك جذب هسه نازل اجيبلج المحل كله نستلة شنو.

أسمار : ياعيني شلون نفسية طيبة والله مو مثل أخوك واحد بخيل ويفضح اللي يوصيه.

ظل صافن علية ما رمش ، حركت حواجبي اجاكره ..

أسمر : ولج والأيفون بنت الأوادم هيج صارت ؟سهلة أسمار سهلة..

أسمار : صوجك شكو تمشي وتصيح سمرتنا معناها اني مسؤولة منكم كلكم ، وتدللوني وانت بلسانك كلت نفتقد للعنصر النسوي بالبيت يعني شنو يعني لازم تدللوني.

أسمر: رايح وهاي سالفتج نحجي بيها بعدين يا أسمار الغريب..

أسمار : اي عفية ما دام دست بساطكم صرت منكم..

أسمر : كفو كفو ببنيتنا ..

ضحكت و وصيته على الولد يدير باله عليهم ورحت يم الحجية كعدت يمها ساعدت أفنان بشغلات امها ، ورا ساعة استأذنت ورجعت للبيت ، فتحت الباب هدوء ، تقربت من باب غرفتي فتحته شوية علكت الضوء بعده نايم طفيته وسديت الباب ، رحت للمطبخ سويت قهوة وخليت كم نوع من الحلو ، وديتهن للأستقبال ، وكعدت أديم ما قبل يكعد بالبداية  بس من كلتله راح يفوت المغرب كعد ، ساعدته ورحنا للحمام أول مرة افوت وياه بالبداية خجل مني بس من حجينا سوالف عامة وسولفتله مواقف الأطفال وسوالفهم اللي صارت وهو نايم نسى وانكسر حاجز الخجل بينا ، غسل ايده واني غسلت وجهه ، ناولته الخاولي وطلعنا للأستقبال، كعدنا ، استأذنت منه اخلي منديل على رجليه حتى  فتات الأكل اذا وكعت ما تخرب شكل ملابسه ، هز راسه بالقبول ، تقربت خليتها وناوشته كوب القهوة وهمست..

أسمار : سويتها مرة مثل ما تحب وبعدها حارة اذا تريد اشربها هسه ، وهاي حلويات اذا تريد تاكل وياها..

فتحت الحلا مع ذكر نوعه وقدمته اله..

اكل بهدوء وأريحية ، جنا ساكتين بعدها رفع راسه سألني على أفنان..

أديم : شفتي أفنان؟

أسمار : اي وحجيت وياها ..

أديم : حسيتيها زينة ؟

أسمار : الصراحة لا

أديم : بلا أمر عليج تكدرين تتصلين عليها وتجيني اريد احاجيها..

أسمار : تتدلل هسه اتصل ..

اتصلت عليها وطلبت منها تجي ، كالت اكمل كم شغلة بيدي واجي..

ظلينا نسولف اني وياه مواضيع عادية بينما اجت ..

دخلت سلمت على أخوها وباسته ، كعدت يمه واني ترخصت أروح للمطبخ تحججت عندي شغل حتى ياخذون راحتهم..

بس سمعته يسألها بهدوء شنو بيها بالبداية رفضت تحجي بس من لح عليها بجت ، تخربطت أحواله وانخبص بيها شلون اخته تبجي ، توتر وصار عصبي.

أديم : لخاطري احجيلي شنو صاير؟

أفنان : انت ناقصك قهر واجي اكمله من احجيلك.

أديم : قابل بالقهر ميخالف بس احجي.

أفنان : بلال خابرني علمود ياخذ ميمونة و...

سكتت ، همس..

أديم : و شنو أفنان ؟ ضوجج ؟ حجى شي غثج بيه؟.

أفنان : لا بس طلب مني ارجعله ومن رفضت كال راح اتزوج..

أديم : ويتزوج يطبه طوب وهذا الشي متوقعيه على شنو ضايجة ؟

أفنان : يكولي متندم كلتله ليش صدكتهم وما صدكتني ليش سمعتهم وما سمعتني ، ذليتني وذليت بنتك من ثبتت علية التهمة وطلكتني ...

بلال : وعيونج جنت معمي على عيوني وهسه حسيت بقيمتكم وقدركم وصدكيني ما اكدر اعيش بدونكم..

أفنان : تركتنا وعشت سنوات طويلة بفصولها ما تذكرتنا بيوم ولا كلت عايشين ميتين هسه راجعلي بعدما تشافيت منك.

بلال : يعني ما ترجعين اذا حاولت وية اهلج ؟

أفنان : لا تخجل نفسك ويانا لا اني أرجعلك ولا أهلي يريدوك بعد.

بلال : بس بعمري ما اذيتج ولا ضربتج ولا قهرتج ،بس هذا الموقف وصار بفعل فاعل وعرفناه واخذ جزاته وبيته انهجم مثلما هجم بيتنا  ..

أفنان : لو ضاربني ومأذيني ومجوعني وحابسني ولا مصدكهم من طعنوا بشرفي اعذرني ما ارجعلك بعد الصار..

بلال :  اتزوج اذا ما رجعتي .

أفنان: الف مبروك بالرفاه والبنين.

بلال : ما انهزيتي ؟

أفنان : وعيونك ابد..

بلال : مادام حلفتي بعيوني معناها بعدج تحبيني .

أفنان : صدك اللي تريد تصدكه ماعندي شي انطيه الك..

بلال : ما هزتج محبة ولا مشاعر بيننا ولا ايامنا وليالينا..

أفنان : تعال الصبح أخذ بنتك وتصبح على خير وعينك على بنت الناس اذا تزوجتها لا تكسرها مثلي لأن حوبة البنية جبيرة وتبطي ما تخطي..

بلال : لا ترجعين بس سامحيني اريد انام ليلي بدون عذاب الضمير تدمرت..

أفنان : الله اللي يسامح مو البشر.

بلال : أريد اسمعها منج فدوة..

أفنان : تسمعها من جرحي يطيب منك مع السلامة..

ظل صافن عليها ساكت وهي تبجي همس.

أديم : تعالي حبيبة أخوج..

فتح ايديه وراحت دخلت بحضنه حضنها قوي وظل يحجي بأذنها الى أن ضحكت ومسحت دموعها وهو هم ضحك على ضحكتها تنهد بقهر ..

جنت واكفة بباب المطبخ اباوع عليهم ، بعدين دخلت سويت قهوة جديدة وصبيتها ، وديتها قدمتلهم وكعدنا نسولف غيرنا جو شوية ..

بالليل جنا بالبيت الكبير نسوي عشا اجوي الولد وأسمر جاب الموبايل صاحني رحت..

أسمار : ها جبته ؟

أسمر : هو اني أكدر ارفضلج طلب حتى تفضحيني.

أسمار : اي عفية شوفني حلو ؟

أسمر : احدث شي جبت شنو حلو.

أسمار : سويتله حساب؟

أسمر : لا هاي سوالف أرود اني مو كلش بيها خليه يمي يكمله ويضبطه الج واجيبه لباب بيتكم..

أسمار : عفية عليك ..

أسمر : ان شاءالله راضية علية ؟

أسمار : فوك ما تتصور عفية عليك، نساتلي جبتهم..

بضحكة كال..

أسمر: ولج الوحدة بألف والباكيت ب ١٥..

أسمار : يعني غالية علية ؟

أسمر : ترخصلج عيون أخوج..

أسمار : فدوة لعيونك تسلملي صدك بس اتعين اعوضك..

أسمر : ما اريد منج شي بس جفيني لسانج.

أسمار : اذا على هاي سهلة ..

ظلينا نحجي الى ان كمل العشا كلنا تساعدنا بيه ولد وبنات ،والحلو من خالة أسن تركض وراهم تاخذ الكباب من ايديهم خبلوها تكلي وياخذوه أول ما تطلعه للماعون...

مرت الأيام بحلوها وعسلها وراحتها، راجعنا بأديم للدكتور شاف رجليه كال زينة راح نفتحها ونشوف اذا تحتاج تجبير من جديد او هذا هو..

فتحها والحمدلله زينة بس وصانه نسوي علاج وتمارين خفيفة حتى يرجع يمشي طبيعي...

رجعنا للبيت الولد كاموا يهوسوله ويبسمروه بالحجي ويغنوله...

خلصت السهرة رجعنا للبيت اول ما دخلنا وكفني يم الباب وخلى ايديه على اكتافي وكال..

أديم : اني حالف اسويلج عرس وحاولي تكملين كلشي خلال يومين ما اكدر انطيج أكثر ..

أسمار : أديم ماكو داعي صارلنا اشهر متزوجين لا يوم ولا يومين حتى ما تسوى وعيب وبعدين عليمن هالخسائر

أديم : مو عيب وتسوى عندي وبعدين هنا بالبيت نسويها ما راح نخسر شي القاعة موجودة والجيش موجود والأكل خير من الله بس جهزي روحج وهذا هو..

أسمار : ضروري يعني؟

أديم : جداً وما اتمم الزواج اذا ماسويت عرس قسمت قسم عظيم بعد ما أكدر اخالفه.

أسمار : هذا هو باجر نبدي نجهز كلشي بس لخاطرك راح اسويه اني ما رايدته..

أديم : ميخالف حتى لا بيوم من الأيام تسولفين بعرسنا لجهالنا ويكون ناقص بالتفاصيل..

أسمار : ياحبيبي انت ما مقصر كلشي وفرتلي ودللتني دلال ظلت على العرس يعني؟

أديم : ميخالف لخاطري اقبلي..

أسمار : تمام هذا هو .

أديم : بس حضري بدلاتج والصالون الباقي ما عليج بيه.

أسمار : ماشي..

دخلنا نمنا ثاني يوم بلغت خالتي ضحكت بعدين كالت شكو بيها حتى ما تبقى بنفسكم ، اتفقنا نطلع للسوك اني وياها وأفنان ، افترينا هواي خالتي وضعها ما عجني تمشي وتكعد ، اخر شي هبط ضغطها اشتريتلها عصير شربته وذبت من راسها اخذناها لمختبر قريب من السوك لأن شكينا بيها اني وأفنان كلنا احتمال عندها حمل لأن خالتي لا تتعب من السوك ولا تمل تحب تتبضع حتى لو جان الشي مو الها ، دخلنا للمختبر كلنا نتأكد رغم هي عارضت وكالت  مستبردة بس ما سمعنالها...

اخذنالها تحليل وانتظرنا النتيجة تطلع ، أول ما صاحوا أسمها وكالوا مبروك حامل تركت خالتي وما شفت شلون ردة فعلها طلعت برا واتصلت على إيساف بشرته.

أسمار : جيب البشارة عيني شيخ ..

إيساف : شكو سمرة ؟

أسمار : أسونتك حامل..

إيساف: لا تتشاقين.

أسمار : والنبي.

إيساف : عليه وعلى آله افضل الصلاة وأتم التسليم ، صدك تحجين؟

حجاها يصيح..

أسمار : وداعة ابني..

إيساف : وين انتوا هسه ؟

كالهاواختنك بعبرته فرحان وصوته يرجف..

أسمار : بالمختبر.

نطيته العنوان كال جاييكم...

يتبع..

صباح الخير

متابعة ممتعة...

😍🥰