رواية أحببتُ ذلك الغريب الفصل الثالث عشر 13 - بقلم عبير إدريس

وجالس جميل الروح
عسى أن تصيبك عدوى من جماله

___________________

ظل ساكت عدة ثواني بعدها كال ..

أديم : نفرض فرضياً ما حبيت أحجي شنو راح يصير ؟

أسمار : هذا رأيك وحياتك وأكيد ما راح اجبرك على شي وبالمقابل انت ما تكدر تجبرني استمر وياك او لا .

أديم : تعوفيني وتنهين كلشي هيج تريدين ؟

أسمار : ليش هو اكو شي بيناتنا حتى ينتهي ؟

أديم : هسه جاوبيني تعوفيني وتنهين كلشي؟

أسمار : اذا ظليت بهذا غموضك اي لان الصراحة بلشت أخاف..

ابتسم ابتسامة خفيفة بعدها ضرب العكازة بالكاع وخلى كفوف ايديه عليها ، رفع راسه باتجاهي ، ظليت اتفرج على الأناقة اللي هو بيها ، همس.

أديم : تخافين مني ؟

أسمار : منك ومن حياتك كلها..

أديم : مو اجيتي وشفتي وضعي و وضع أهلي ؟ حسيتي بشي غريب او يستدعي هذا الخوف المبالغ بيه.

ذبيت جنطتي على الكرسي وكعدت بصفه بعصبية كلت..

أسمار : انت راح تخبلني ، ليش منو حذرني وكال ابتعدي لأن خايف عليج واني مستهدف ويريدون ياخذون عيني الثالثة لان انتِ صرتي عيني وراح ابصر من خلالج ، مو انت لو اني متوهمة؟

أديم : صحيح كلت ولحد الان على نفس رأيي وحياتي مهددة بخطر واعدائي كثر ما أعرف منو منهم شنو ضاميلي مستقبلاً وبعينج شفتي وبأذنج سمعتي ، أولهم أخوية أبسم من خلى ايده بإيد بيت عمي ، وبيت عمتي عيال أفنان وبعد الباقي ما تدرين بيهم.

أسمار : أديم اني حياتي هادئة وما أتحمل أعيش بضغوطات وحياة متعبة ومغلفة بالغموض.

أديم : اذا عرفتي كلشي عني راح تستمرين وياية لو تتركين ؟

أسمار : حسب الوضع أقرر.

أديم : يعني ممكن تتركين ؟

بعد تردد كلت بضعف.

أسمار : اي.

ابتسم وظل ساكت أكثر من عشر دقائق بعدها التفت علية وكال.

أديم : مرة سمعت اقتباس كلش عجبني ، يكول ( عجباً لها عبثت بها أشواقها تقول من فرط المشاعر أكرهك ! محتالة مفضوحةٌ أحداقها ، هل تضحك العينان لك لو تكرهك؟

ردت اجاوبه دخل الدكتور ، سلم وكال.

_ وين الطلاب البقية ليش بس كم واحد ؟

جاوبه واحد من الطلاب كال.

_ عبالهم مجاز لهذا طلعوا برا..

_ بكيفهم يسووني مجاز ، المهم اريد من كل واحد يسويلي بحث وباجر اريده..

_ عن شنو دكتور تريده؟

_ بكيفكم اي شي يخص العربي..

_ تمام يعني اسويه واجيبه؟

_ لا تختار الموضوع وتصعده الية فوك وابلغك شنو تكتب خوما تنزلي الموضوع كله.

أديم : دكتور راح نختار الموضوع بوجودك وحضرتك تنطينا المفردات الخاصة بالموضوع حتى نكتبها لان تعرف ما اكدر أصعد.

_ اكيد حبيبي شنو يعجبك اكتب بس منو راح يشترك وياك بالبحث ؟ عندك احد ؟ لو تريد تسويه وحدك ؟

أديم : لا اني وزميلتي أسمار عارف

_ ها تمام اذا هيج اتفقوا على مفردات للبحث واكتبوه.

أديم : شنو رأيك اكتب عن طرائف اللغة العربية في الشعر وروائع اللغة العربية في الشعر.

_ فكرة حلوة بس اكتب عن المفردات ( كذا ، وكذا ، وكذا ) حددلنا شنو يريد نكتبله واني كتبتهن بدفتر، اللي لحك من الطلاب اختار موضوع واخذه واللي جان برا ، الحاضر بلغ الغايب، التفتت على اديم همست.

أسمار : نسويه هسة لو من نرجع للبيت؟

أديم : لا قبل لا نطلع لان يراد مصادر من المكتبة بالبيت نستعين بالانترنت فقط وما راح نلكى كلشي ..

أسمار : تمام نطلع مادام خلصنا محاضرات..

أديم : ماشي يلا نروح.

طلعنا اني وياه ومشينا للمكتبة وصفتله المكان بالمضبوط ودخل مستند بعكازته ، مشى كدامي واني متأخرة عنه بخطوة وصل للميز ، استوقفته..

أسمار : لحظة اديم اكعد بمكانك الكرسي وراك مباشرةً.

هز راسه ، مد ايديه سحبه وكعد ، ترك العكاز وفرك كفوفه بحماس بعدها صفق خفيف وكال.

أديم : جيبي كتاب كذا وكذا وكذا..

أسمار : تمام

رحت دورت بالقوائم الموجودة على الميز عن اسماء الكتب واخذت ارقام التسلسل مالتهم ورحت لداخل المكتبة اللي بيها الرفوف مال الكتب ومشيت حسب التسلسل واخذت الكتب بس كتاب واحد ما لكيته ، رحت سألت الموظفة عنه ، كامت دورته وياية كالت احتمال ماخذيه ، نطيتها هوية الطالب سجلت اسمي واخذت الكتب ورجعت للطاولة اللي تركت بيها أديم ، خليت الكتب سحبت كرسي وكعدت.

أديم : لكيتهم ؟

اسمار : اي بس واحد ما لكيته اللي عنوانه كذا **

أديم : وهذا أهم واحد ، يلا مو مشكلة نستخدم البقية ونشوف شلون نحصل الأخير.

أسمار : تمام.

أديم : اول موضوع نكتب عنه طرائف اللغة لو روائع اللغة ؟ شنو رأيج ؟

أسمار : نبدأ بالموجود بالكتب.

أديم : والموضوع الأول اللي أختاريناه ما موجود بذني الكتب.

أسمار : هاي شنو ؟

أديم : يصير تستخدميني مصدر ؟

أسمار : شلون يعني ؟

أديم : جربي يجوز يطلع مني شي مفيد وما يخليج تستخدمين الكتب.

ابتسمت بعدها كلت..

أسمار : اول مفردة رادها الدكتور هي أبيات العواطل ، وليش سميت بهذا الإسم ومن شنو تتكون ويريد بيت شعري عليها.

أديم : أبيات العواطل ، مممم هذا شرحهم مطول اكتبي مختصر ، ..

أسمار : تمام ، بس منك لو من الكتاب؟

أديم : هو موجود بالكتاب بس راح انطيه الج على شكل اختصارات.

أسمار : ماشي يلا.

طلعت القلم وبديت اكتب بالدفتر.

أديم : هذه الأبيات مكونة من حروف ليس لها نقاط ومثال عليها
الحمد لله الصمد حال السرور والكمد
الله لا إله إلا الله مولاك الأحد..

أسمار : هذا هو ؟

أديم : اي ما يحتاج تضيفين أكثر اللي بعده شنو ؟

أسمار : أبيات المعجمة.

أديم : ها هذه عكس أبيات العواطل ، حيث كل حروف كلماتها نقاط ، ومثال عليها اكتبي (بشجي بيت في شجن في ينتشبن في فتن
شيق تيق تجنب في نفقٍ ضيقٍ بقى ففني)

أسمار : هاي شلون حفظتها صعبة ؟

أديم : بعدج ماشفتي شي.

حجاها بغرور وضحك ، ابتسمت على ضحكته..

أديم : اللي بعدها ؟ أبيات الخيفاء صح ؟

أسمار : صح .

أديم : هذه الأبيات تحتوي على كلمة حروفها منقطة ، والكلمة التي تليها حروفها غير منقطة مثال عليها (ظبية أدماء تفني الأملا خبيبت كل شجي سألا
لا تفي العهد فتشفيني ولا تنجر الوعد فتشفى العلا)

أسمار : ماشاءالله عليك ماشاءالله تعرف انت تنحسد بسرعة اذا حجيت هيج كدام الناس ..

أديم : منو كالج اني حاجي ؟

أسمار : يعني اخاف بيوم دكتور او استاذ يسألك سؤال ارتجالي دير بالك تبينلهم كلشي تعرف والله العين ما تحب الأرجح منها وراح يحسدوك.

أديم : ما ظل شي ننحسد عليه المبلل ما يخاف من المطر.

أسمار : صدكني بهذا حالك والكثير يتمنى ربع العقل اللي انت شايله.

أديم : الحافظ الله الرحمن الرحيم لا تخافين كملي شنو بعده ؟

جريت نفس ودنكت على الورقة وحجيت.

أسمار : بيت شعر لا يتحرك اللسان عند قراءته..

ابتسم وكعد مرتاج براحة على الكرسي..

أديم : من عجائب اللغة العربية سرد قصائد شعرية تتمكن من التحكم في اللسان والشفتين كذلك مثل ( آب همي وهم بي أحبابي همهم ما بهم وهمي ما بي) ردديه هسه تشوفين لسانج ما يتحرك ...

أسمار : صحيح ..

حجيتها وضحكت..

أسمار : انت بحر والله.

أديم : لا وين بعض ما عندكم.

أسمار : هممم ، هسه نجي لروائع اللغة العربية في الشعر..

أديم : لا هاي عليج انت حيري بيها.

أسمار : ليش ما حافظ شي؟

أديم : لا معلوماتي على كدي.

أسمار : شوف شوف كاعد يطرد عيون ترى صار ساعة اقرا معوذات بقلبي.

أديم : يلا يا ست بلشي افتحي اول كتاب اللي عنوانه كذا..

وذكر العنوان فتحته شرح مفصل عن
أبيات الشعر اللي نكدر نقرأها افقياً ورأسياً وبالحالتين تنطينا معنى مستقل، حجيت حجيت وبعد الموضوع متشعب.

أديم : عطشتي ؟

رفعت عيني من الكتاب باوعتله مبتسم .

أسمار : شلون عرفت ؟

أديم : كل شوية تبلعين ريكج

أسمار : مو الموضوع طويل وهواي بيه تفرعات.

أديم : مابيه اختصارات قصدج ؟

أسمار : بالضبط .

أديم : روحي على صفحة ١٣٨ راح تلكين نبذة بسيطة وعليها مثال هذا فقط اكتبيه.

عكدت حاجبي ورحت للصفحة اللي كال عليها ، وقريت الموضوع فعلاً مختصر بصورة جميلة وبشكل وافي عكس اللي قريته رفعت راسي باوعتله وحجيت بضوجه.

أسمار : يعني كول من البداية رقم الصفحة حتى اكتبه ليش تعبتني ؟

أديم : اذا انطيج كلشي جاهز راح تتعلمين على الراحة وافرضي بيوم اني ما موجود ولازم تسوين البحث وحدج شلون راح تدبريها ، هم تدوخين هيج دوخة، اني وياج نتعلم شلون نسويه ، بلشي انتِ بعدها اعلمج شلون تروحين على الاختصار وتاخذين نبذه مفصلة عن الموضوع..

أسمار : تمام ..

أديم : يلا اكتبي البيت مطلعه، ألوم صديقي وهذا محال..

أسمار :ألوم صديقي وهذا محال
صديقي أحبه كلام يقال
وهذا كلام بليغ الجمال
محال يقال الجمال خيال.

أديم : احسنتِ..

أسمار : ماسويت شي بالكتاب قريته..

أديم : ميخالف نعتبره انجاز بسيط ولا يهمج..

أسمار : سايرني يلا..

حجيتها وضحكت.

أديم : هسه بيت شعر بالمقلوب يمكن قراءته من الجهتين ...

ذكرت عده ابيات استوقفني عند هذا البيت وكتبته.

أسمار : مودته تدوم لكل هول وهل كل مودته تدوم.

أديم : هذا حلو ثبتيه.

أسمار : ماشي هسه يريد ابيات كل حروفها شين هاي شنو صعب وما موجود بالكتاب ؟ ..

أديم : حرف الشين من الحروف قليلة الكلمات في اللغة العربية ، لهذا صعب ايجاد كلمات يمكن سردها بجملة وحده ويكون الها معنى مثل..
(فأشعاره مشهورة ومشاعره وعشرته مشكورة وعشائره
شمائله معشوقة كشموله ومشهده مستبشر ومعاشره
شكور ومشكور وحشو مشاشه شهامة شمير يطيش مشاجرة)

أسمار : هاي شلون تحفظهن؟ لا صدك اديم شلون؟

أديم : من عمرنا ست سنوات والدي الله يرحمه يغذينا باللغة العربية لهذا تلكين اقل واحد بينا حافظ ١٠٠ بيت شعري بالقليل..

أسمار : عنده واهس كلكم يخليكم تحفظون ويسمعكم لو هيج؟

ضحك بعدها كال .

أديم : شوفي قبل من جنا صغار وتنطفي الكهرباء نطلع للبستان ويانة سماور مال جاي والكعك وجيس حب الشمس والركي ونروح نتوسط الحديقة الكبيرة ونكعد بشكل دائرة ويبلش والدي يشعرلنا ابيات على قصائد كاملة على ابوذيات ، وياهن اسم الشاعر وشرح البيت ، والدتي جانت تعترض تكوله ما يفتهمون ليش تدوخ نفسك هو يجاوبها يكوللها التعلم من الصغر كالنقش على الحجر ، ذولة اني شنو احجي براسهم راح يحفظون والطفل حتى لو ما يحفظ بوقتها ويعيد وراية راح تظل بباله ومن يقراها مرة ثانية بكتاب او بالمنهج الدراسي راح يتذكرها ويحفظها بسرعة وهذا اللي صار وياية وية باقي اخواني بالأخص إيساف.

أسمار : هو شيخ مو ؟

أديم : اي درس فقه وأصول الدين واخذ دكتوراه بالعربي ودخل بهذا المنهج وسلكه بعد .

أسمار : ماشاءالله عاشت ايده ابوكم والله يرحمه مبين تعبان عليكم.

أديم : كلش مو شلون ماجان بس راح للأسف.

حجاها متحسف وحقه لان والده مبين كنز من كنوز العراق ..

أسمار : سؤال أديم ولا تعتبره تدخل بس يعني مرات افكر بيني وبين نفسي وما الكى جواب لسؤالي.

أديم : كولي أسمار شنو ؟

أسمار : شعجب أجيت درست بجامعات بغداد مو بعيدة عليك ليش ما اختاريت جامعة اقرب عليك وتختصر مسافة الطريق وازدحاماته ودوخته.

أديم : سؤال حلو ، شوفي اول سنة اجيت داومت بيها جنت اجي اني والوالد سوية هو جان دكتور بهذه الجامعة ، بعدها من صارلي الحادث تركت ،توفى والدي وصارت هواي امور وصلت مرحلة ما عجبني اعيش ولا ردت اكمل اي مشوار من مشاوير حياتي ، بس من اجوي الدكاترة اصدقاء والدي للبيت وحجوا وياية وكالوا امنية ابوك يشوفك بروب التخرج اذا مو الك الشهادة اخذها اله علمود يرتاح بقبره وانت ذكي وشاطر واحنا كلنا وياك وراح نساعدك لهذا رجعت لنفس الجامعة بسبب والدي اريد افرحه.

بجيت ماسيطرت على دموعي من وين تنزل ، هو عيونه دمعت بس مسحها بسرعة ، بعدين تحمحم وكال.

أديم : وين وصلنا ؟

مسحت عيوني وحجيت بصوت مخنوك.

أسمار : بيت شعر لا تتصل حروفه ببعضها وعلى الرغم من ذلك يعطينا معنى متكاملًا..

أديم : دموعج غالية ليش تخليني ما أحجي شي بعد ؟

أسمار : لا تهتم .

أديم : امسحي عيونج..

أسمار : مسحتها يلا نكمل.

أديم : لهذا السبب ما ردت احجيلج عن باقي تفاصيل حياتي الا والله يعجبني أكعد انفض غبار الهم النايم على كلبي من سنين ونغسل شكو جرح عميق بداخلي ونعالجه سوى .

أسمار : حسيتك تتعب من تحجي.

أديم : كلش.

رجف حلكه بعدها كال.

أديم : لدرجة ارجع اعيش تفاصيل الحادث وألم العملية والخوف من صالة العمليات وصوت الانفجار وشكو شي سيء صارلي.

تنهد هبط صدره وارتفع..

عكدت حاجبي ردت اسأله سبب فقدان بصره انفجار لو حادث ، بس اللي فهمته حادث ، دخت حياته غريبة هذا الولد ..

أديم : نرجع للبيت اللي ما تتصل حروفه ببعضها يا ست أسمار لان وراية رجعة للبيت..

أسمار : تمام ، هذا البيت موجود كدامي يكول ( زر دار ود إن أردت ورودا زادوك ودا أن رأوك ودودا )

أديم : عفية احسنتِ ،هسه التلاعب بالألفاظ في الشعر

أسمار : عكس الكلمات.

أديم : ابيات اذا قرأناها كما هي وجدناها مدحاً واذا قرأناها بالعكس أصبحت هجاء.

أسمار : بيت شعر عن المدح يكول (باهي المراحم لابس كرما قدير مسند باب لكل مؤمل غنم لعمرك مرفد) .

أديم : اعكسيها تصير بيت عن الهجاء.

أسمار : شلون تصير ؟ دخت اني.

أديم : دنس مريد قامر كسب المحارم لا يهاب دفر مكر معلم نغل مؤمل كل باب.

أسمار : دخت تدري.

أديم : هذا العربي.

أسمار : ليش اختاريت هذه المواضيع بالضبط مو صعبة ومتشعبة؟

أديم : بكل بساطة آل الغريب..

حجاها ورفع اكتافه..

أسمار : اي صحيح نسيت..

أديم : هسه شعر التوأم

أسمار : ليش سموه بهذا الأسم مو غريب ؟

أديم : لأن الشاعر بتلك الأبيات استخدم كلمات متطابقة الرسم لكن مختلفة في المعنى.

أسمار : ها فهمت ومثال على هذا
( سِنَد سَيِّدٌ حَلِيــمٌ حكِــــيمٌ * فَاضِلٌ فَاصِلٌ مَجِيدٌ مُجِيْدُ
حَازِمٌ جَازِمٌ بصِيرٌ نَصِيرٌ * زَانَهُ رَأْيَهُ الشــدِيدُ السَّدِيدُ
امهُ اُمَّةً رَجـــاءَ رَخَـــاء *** أدْرَكتَ إذْ زَكَت نُقُودٌ تَقُودُ
مَكْرُماتٌ مكرمات بَنَتْ بَيْــــــتَ عَلاَء عَلاَ بِجُود يَجُودُ..

أديم : احسنتِ وأجدتِ وأبدعتِ...

أسمار : اللي يسمعك يكول ارتجالي لوما قريته ..

أديم : اني مو على قريتيه لو ارتجالي او حفظتيه اني على طريقة الإلقاء يا كاتبتنا.

أسمار : ها يلا رحم الله والديك على رفع المعنويات.

أديم : دايملج بكل وقت.

أسمار : ريتك دايم تسلم.

أديم : أديم دايم لهذا دايملج.

أسمار : نفس الوزن.

حجيتها وضحكت هو هم ضحك بعدها كال.

أديم : نختم بطرائف وعجائب اللغة العربية ؟ شتكولين.

أسمار : بلشنا بيها ونختم بيها ؟

أديم : هذا البحث براحتج تتلاعبين بيه ليش يسموه بحث ؟.

أسمار : تمام..

أديم : اكتبي اللغة العربية الفصحى هي ميداناً لتنافس وجذب الشعراء نظراً لإحتوائها على ملايين من الكلمات المعروفة بفصاحتها مما ساعد أصحاب الأدب والعلماء على استغلالها لإظهار روعة وجمال بيانها، على الرغم من ذلك يوجد بها طرائف غريبة ومن ضمنها ما يلي:

• لا يطلق على الحديقة اسم حديقة إلّا إذا كان لها سور، وفي تلك الحالة تسمى بـ بستان.

• تتشابه كلمة الرجيف والوجيف لكن لكل منهما معنى مستقل بذاته، فالرجيف يعني زيادة ضربات القلب بسبب الخوف من شيء ما، أما الوجيف معناه أيضًا زيادة نبض القلب ولكن بسبب الفرح.

أسمار : أول مرة أسمع بيها ..

أديم : يلا نتعلم سوى ، مو مشكلة، نرجع للموضوع.

أسمار : أسفة قاطعتك.

أديم : ماكو داعي للأسف ..

• يطلق على المائدة اسم خوان إذا لم يكن عليها طعام وتسمى بـ المائدة عندما تستخدم لتناول الطعام.

• يسمى الكأس كأساً إذا وجد به شيء ما ليشرب، أما إذا كان فيه شراب يطلق عليه قدح.

أسمار : تمام كتبته..

أديم : هسه اختمي ..

أسمار : هذه علية ..

حجيتها وضحكت ..

أديم : أكتبيها واقريلي.

أسمار : ماشي..

دنكت كتبت خاتمة للبحث ورتبت اسماء المصادر وقريتله..

وبذلك نكون قد وصلنا إلى نهاية بحثنا المشترك بيني أنا أديم أشعب وبين زميلتي أسمار عارف بعد أن تعرفنا على قصائد تعتبر من عجائب اللغة العربية الفصحى في الشعر، كما تطرقنا إلى ذكر كيفية التلاعب في الألفاظ في الشعر، بالإضافة إلى الحديث عن طرائف كلمات اللغة العربية مع تمنياتنا أن ينال أعجابكم ..

أديم : روعاتج يابه بس ليش خليتي اسمي أول..

أسمار : شكرا بعض ما عندكم أستاذ ماسويت شي وبالنسبة للاسم ليش خليته أول لأن انت المصدر جنت اني بس كتبت..

ضحك وبعدها كال..

أديم : نروح شنو رأيج ؟

أسمار : تأخرنا صارت خمسة ونصف.

أديم : هسه أرقم كاعد يفتر..

أسمار : شعجب ما اتصل عليك؟

أديم : بعدين أفهمج ليش ..

أسمار: تمام..

كمنا بعدما لميت كل أغراضنا وطلعنا من المكتبة ، متوجهين لباب الجامعة ، هو راح وية أرقم بعدما اتصلنا عليه من موبايل أديم واني رجعت للبيت.

ومرت الأيام بين الجامعة وبين البيت وجان الوضع كلش طبيعي وياية ماصار شي جديد ولا حدث يذكر ، وبيوم جنا كاعدين اني وأهلي ومن ضمن الحجي اجى طاري مزرعة ال أشعب وماما ذكرت بابا بالعزيمة..

أناهيد : أبو أسمار ..

عارف : هاي عيوني..

أناهيد : ليش ما نعزمهم صار عندي فضول أتعرف على الحجية.

عارف : يابه مرت اشهر تريدين هسه نعزمهم بعد ما تسوى ومنو يكول ييجون؟

أناهيد : لا تسوى احنا نعزمهم ونشوف اذا أجوي اهلاً وسهلاً ما أجوي براحتهم أكيد معذورين..

عارف :زين المن نخابر تعرفون رقم من أرقامهم؟

أناهيد : احجي أسمار تعرفين رقم نتصل عليهم من خلاله؟

أسمار : اي عندي رقم أختهم أفنان وهي اصلاً صديقتي وعلى طول نتواصل ..

عارف : اتصلي عليها وسلمي وبعدها بلغيها ابوية يريد يحجي وية واحد من أخوانج.

أسمار : تمام.

طلعت موبايلي واتصلت على أفنان ، جاوبتني تسالمنا وحجينا شوية بعدها بلغتها باللي أتفقنا عليه اني وبابا ، كالت.

أفنان : ثواني وأرجع أتصل ماشي..

أسمار : أكيد براحتج.

سدته وراحت بعد عشر دقائق اتصلت، فتحت الخط أجاني صوت غير صوت أديم ، بابا كال..

عارف : الو مرحباً.

_ اهلا ومرحباً شلونك حجي وياك شيخ إيساف أشعب.

عارف : ياهلا بالشيخ ياهلا شلونك يابة الوالدة شلونها..

خالة دغتني وهمست.

أسن : هذا ابوج كام يخبط بين الحجية وبين امهم الأصلية.

اسمار : داخ حقه احنا صارلنا أشهر وما حفظناهم.

أسن : اي هم صدك.

أسمار : خل نسمع شنو يكول.

سكتنا وصرنا نستمع.

إيساف : على عيني وعلى راسي حجي نجيك وأحنا الممنونين بس ياعيني راح نكلفكم هواي..

عارف : عيب هاي ولا تحجيها أزعل ترى.

إيساف : كلشي ولا زعلكم شوكت تريدنا نجي احنا حاضرين .

عارف : الجمعة تفيدكم ؟

إيساف : هذا هو الجمعة احنا يمكم هيج زين ؟

عارف : اي زين

حجاها بابا وضحك .

إيساف : دايمة ضحكتك حجي.

عارف : حبيتك يا ابني..

إيساف : مشكور حجي مشكور ربي يطول بعمرك ان شاءالله ويجعل بكل خطوة تخطيها خير وسلامة ورزق.

عارف : رحم الله البطن الحملتك وجابتك.

إيساف : الله يرحمها ويرحم والديك.

نهى المكالمة والتفت نطاني الموبايل ، واتفقنا على يوم العزيمة شنو نسوي وشنو نطبخ ..

أناهيد : يعني بعد يومين للعزيمة.

أسن : لو مأجليها على أسبوع الجاي مو أحسن؟

عارف : صارت بعد وبلشوا أكتبوا شنو نجيب حتى نتحضر واجيب كلشي قبل بيوم وما تتذكرون بيوم العزيمة وتعال عارف اركض.

أناهيد : لا هسه اني وأسن نكعد عليهن فد كعدة يلا أسن.

كعدوا ماما وخالتي يكتبون شنو راح يسوون ، كعدت اكلب بالموبايل مالتي توقعت يتصل علية أديم ويسألني عن سبب العزيمة ويبررلي ليش إيساف هو اللي حجى وية بابا مو هو أستغربت ، صار الليل واجى ثاني يوم وما أتصل ، ولا حتى أفنان اتصلت ، صار صباح الجمعة بالستة الصبح كعدنا بابا وبلشنا نحضر بالأكل ، صارت ساعة تسعة أتصلت أفنان مسحت ايدي وجاوبتها.

أسمار : صباح الخير حبيبتي أم ميمونة.

أفنان : صباح الخير والعافية شلونج ؟

أسمار : الحمدلله وانتِ ؟

أفنان : الحمدلله، خابرتج حتى أبلغج بالعدد حتى ما تكلفون نفسكم وتطبخون هواي لأن اليوم يلا اتفقنا منو ييجي ومنو عنده شغل.

أسمار : زين كولي حبيبتي كل الهلا باللي راح ييجي واللي ما كدر.

أفنان : أني والحجية وأديم ،
وعددتلي باقي أخوانها اللي ما راح ييجي أرقم وأبسم أعقل وأبسل والبقية كلهم راح ييجون ..

أسمار : هلا بيكم عيني ننتظركم.

أفنان : محتاجين شي نجيبه ويانا ؟

أسمار : جيتكم كافية ..

أفنان : مع السلامة لان راح نطلع منتظريني.

أسمار : الله وياج وتوصلون بالسلامة.

أفنان : الله يسلمج ويخليج.

سديته منها وبلغت أهلي بالعدد ، رجعت أشتغل وياهم ،اني وخالتي واخواتي وأمي..

كملنا كلشي صارت الساعة ١٢ ظهراً طبكت سيارات بالباب ، طلع بابا على الصوت فتحلهم الباب ودخلوا الولد محملين صناديق من الفواكه والتمر وغيرها ، الباب جان مفتوح الطلاكتين لهذا نشوف البرا بوضوح ،باوعت سيارات عالية نفس اللون من السيارة الوسط نزل أديم بمساعدة أسمر ، جان لابس بنطرون رصاصي وقميص أسود وليلك صوف رصاصي وسكارف أسود ، ونظارات لونهم اسود عاتم ، خطف قلبي باطلالته المميزة عنهم ، نزل بثكل ومد العكاز سابقته بخطوة جنت سارحة بمشيته وماحسيت الا واختي تكول.

ترنيم : عاش الماخذ هالبال وين صفنتي ؟

التفتت الها مخروعة

أسمار : وياية تحجين؟

ترنيم: لا وية روحي المهم هاي الفواكه والأكل وين راح نوديه لو نوزعه للمنطقة هم يزود منه ، ذولة عزمناهم على غدا خسروا اكل مال سنة ليكدام.

أسمار : هذا طبعهم أهل خير بعد.

ترنيم : اي الله يزيدهم

أسمار : نفس ما وصيتج حبابة لا تنسين.

ترنيم : للمرة الألف كلتلج صار اياس ماراح يفوت يمهم ولا يعرفون هذا ابنج ولا انتِ منفصلة وبعدين ليش نحجي وتدرين ببابا كلش زين ما يحجي عن بناته كدام ياهو الجان تريديه هسه يكعد يحجي والله بنتي الكبيرة منفصلة وعندها طفل

أسمار : أعرف بابا ماراح يحجي مو تعلميني بيه بس افرضي دخل اياس وسألوه منو هذا الحلو ماراح يجاوبهم بابا برأيج ؟

ترنيم : وليش ما تريديهم يعرفون ؟

أسمار : لأن ابنهم وياية بالجامعة ومحد يدري بية منفصلة وعندي طفل ، ومو ضروري يعرفون اريد اتخرج بدون ما احد يدري.

ترنيم : مسوية جريمة قابل .

أسمار : يعجبني ، وما احب خصوصياتي يتدخلون بيها ..

ترنيم : حقج لا تشيلين هم ما راح يطلع ولا اخليهم يشوفوه.

أسمار : حبيبتي.

ترنيم : يلا راح افوت للغرفة.

أسمار : تمام.

تركت أسمار ومشيت حتى اوصل غرفتي واعثر بواحد بيهم اذا هم جيش وبيتنا انترس بيهم ، رفع ايده صاح.

_ الله الله اعتذر ياسبحان الخالق الناطق الرازق ..

ترنيم : راح تعدد أسماء الله الحسنى ، عادي ماصار شي اهلا وسهلا نورت.

تركته حتى افوت من وراية كال..

_ وياج أرود مواليد ٨٢

التفتت عليه ضحكت..

ترنيم : هذا بيت مو دائرة مال جناسي اعتقد غلطان حضرتك.

ضحك وتركته دخلت غرفتي ، رتبت الأغراض ورحت مددت يم اياس ، اخذت موبايلي واتصلت على أسمار.

أسمار : ها ترنيم كعد اياس؟

ترنيم : لا بس هذا شنو ابنهم زاحف عينك عينك

أسمار : منو منهم؟

ترنيم : أرود مدري شنو اسمه.

أسمار: حجى وياج شي مو حلو ؟

ترنيم : لا ابد بس كال اسمه ومواليده ..

أسمار : يتشاقى عادي مشيها.

ترنيم : ماشي..

أسمار : اروح اكمل اذا ما محتاجة شي.

ترنيم : ما محتاجة..

أسمار : يلا باي.

سديته منها ورجعت أكمل ، خلصنا كلشي واجتي أفنان للمطبخ صاحتني، رحت يمها وأخذتني على صفحة .

أفنان : باوعي حبيبتي راح اكولج بس مو تزعلين.

أسمار : لا كولي عادي والله يبعد عنا الزعل.

أفنان : أديم يعرف بيكم من اخواننا المسيح.

أسمار : زين

أفنان : لهذا طلب مني نجيب سجادات على عددنا حتى نصلي عليهن هنا وهسه نريد نصلي ومستحين نتصرف براحتنا بدون ما نستأذن.

أسمار : صدك كذب أفنان هذا بيتكم واحنا خطار بيه.

أفنان : فدوى لعينج اعرف بس يعني مابيها أحراج تعرفين إيساف يصلي بأخواني جماعة وصوت عالي راح يصير.

أسمار : تريدين نفرغلكم البيت عادي ماعندنا مانع.

أفنان : لا حبيبة أستغفر الله بس حبيت ابلغكم .

أسمار : البيت بيتكم وشنو يعجبكم سووا واحنا راح نكمل الغدا حتى نصب بعد الصلاة.

أفنان : تمام رايحة أبلغهم.

هزيت راسي مبتسمة ، راحت وبعدها اجى بابا للمطبخ وكعدنا كلنا بيه وبلشنا نسمع لصوت إيساف وهو يكبر ويصلي بأخوانه ، أخذني الفضول اروح اشوف ورحت من باب الإستقبال باوعت ، منظر ياخذ العقل ماشاءالله كلهم بالصفوف الأمامية وبالنهاية على جهة الحجية بالكرسي المتحرك كاعده تصلي وبصفها أفنان...

سديت الباب على كيفي ورجعت للمطبخ ، وجهي مورد جان وحاصرتني الضحكة ..

مر وقت واجتي أفنان كالت.

أفنان : خلصنا يلا اساعدكم .

أناهيد : قبل الله صلاتكم ، ماعندنا شي ارتاحي عيوني.

أفنان : مو على اساس هذا بيتي.

أناهيد : اي طبعاً.

أفنان : خلوني ماخذة راحتي عجل.

أناهيد : هذا هو براحتج..

صبينا الغدا الولد بمكان تغدوا واحنا بمكان ثاني لان المكان ضيق ، بعدها بابا دز علينا اني وماما وخالتي ، احنا عندنا عادي نكعد كلنا وية الضيوف بس هم عاداتهم شنو ما اعرف اعتقد مثل أهل لؤي مايصير ينجمعون سوى ، بس بابا ماعنده هذه السوالف ولا يعترف بيها.

بعدما سلمنا كعدنا بالإستقبال ، ماما جابت الجاي وكمز أسمر اخذ الصينية منها و زع للكل بعدها التفت علية كال.

أسمر : طالبج كهوة لو نسيتي.؟

أناهيد : تحبها يعني ما تحب الجاي؟.

أسمر : لا احبه بس أطلبها كهوة تگول اسويها طيبة بعد ماندري صدك لو كذب.

أناهيد : زين لعد ابقى أطلب أسمار كهوة وضوك كهوتي اليوم شنو رأيك؟

أسمر : خالتي تعرفين تسوين كهوة ؟

أناهيد : تعجبك صدكني

أسمر : يعني تنافسيني بيها؟

أناهيد : مو شلون ماجان نجرب ؟

أسمر : يلا بس أجي وياج للمطبخ.

أناهيد : يلا تعال..

راحوا للمطبخ كمت وراهم ردت أشوف شنو راح يسوي من يشوف طريقة ماما بالقهوة.

يباوع عليها وعاكد حاجبه ويصنف هاي لا وهاي اي اخر شي اخذ الدلة منها واخذ علبة القهوة وكعد يسوي بيها.

أسمر : خالتي طلعتي مبتدئة.

أناهيد : شنو السالفة هاي الكهوة صار سنين نسويها.

أسمر : واذا سنين معناها صح ؟

أناهيد : خل نضوكها أول ونحكم.

أسمر : راح تدمنيها وتكومين تصيحين وينك أسمر وتسويلي كهوة تعدل راسي بيها.

أسمار : مو شربتها شو ما أدمنت ؟

أسمر : انتِ طلعي منها اني وخالتي شدخلج ؟

أسمار : اي صدك شدخلني أم وأبنها.

حجيتها وطلعت من المطبخ هو ظل يضحك ، رحت كعدت ورا دقايق دخلوا للإستقبال هو وماما كعدوا يشربون كهوتهم ومن خلصت ماما كاللها تقلب الفنجان قلبته وخلته بالصينية ، وكامت تسولف وية الحجية واندمجوا سوى، باوعت لأيساف ماخذ ركن معزول ويقرا شي بالموبايل مندمج ، أديم كاعد يسولف وية إسلام وباقي أخوانهم طلعوا وية بابا للحديقة يعزلون المسواك اللي جابوه..

تقربت من ماما كعدت بصفها ردت أسمع أسمر شنو راح يقرا بالفنجان واشوف صدك لو كذب كلامه ، وصحيح من حجالي عن حياتي لو هما مراقبيني.

رفع الفنجان وباوع لماما كال.

أسمر : خالتي كافي سوالف انتبهي وياي.

أناهيد : الحجية ما تنمل سوالفها.

أسمر : اقرالج الفنجان ورجعي سولفي.

أناهيد : هاي شنو تعرف بهاي السوالف انت؟

أسمر : هسه اقرالج وشوفيني أعرف لو لا؟

أناهيد : يلا أسمع

كعد يباوع بالفنجان عاكد حاجبه ومرة يضحك ، بعدين تقرب من ماما يهمس..

أسمر : خالتي.

جرها للكلمة..

أناهيد : خير ؟

أسمر : جنتِ بشبابج معجبة بواحد وماصار قسمتج صح ؟

ماما انصدمت بيه هذا السر محد يعرف بيه من أهلها بس اني وخالة أسن ومن حجتلنا حجت حتى تخفف عني الحزن والنكد اللي جنت عايشة بيه بفترة انفصالي عن لؤي.

أناهيد : شنو طلع يمك؟

أسمر : بعدج تفكرين بيه ؟ بس هذا حرام بحق عمنا عارف.

أناهيد : يمعود شنو السالفة لا أفكر بيه ولا يفكر بية بس مرات تمر علينا لحظات حياتنا مثل الشريط قابل بيدي.

أسمر : هذا الشريط اقطعيه ، يمكن هسه ضجتي مني ، بس بهذا تفكيرج راح تجذبين مصيبة لبيتج وينقطع حبل الود بينج وبين عمنا ، لهذا من هسه استغني قبل لا يستنغى عنج.

كمل جملته الأخيرة ونزل الفنجان بالصينية ، خلى ماما صافنة ماتعرف شنو تحجي ، وبنفس الوقت ما سمعنا احد بس اني وهو وماما وهذا اللي ريحها بالموضوع.

بعدها دخل بابا وبلش يتعرف عليهم واحد واحد وبلش إيساف يشرح عنهم ..

إيساف : اخواني البكر توأم أعقل وأبسل مواليد ٧٠
بعدهم أرقم وأبسم كذلك توأم مواليد ٧٤
بعدهم اني مواليد ٧٦
يليني إسلام ٧٨
أهاب ٨٠
أرود ٨٢
أديم ابن الحجية توأمه أفنان مواليدهم ٨٣
بعدهم أسمر ٨٤
أنهد ٨٦
أزر ٨٨
والصغير حمودي أحمد مواليد ٩١ ..

عارف : ماشاءالله الله يزيد ويبارك بيكم ، وكلكم متزوجين وعندكم عوائل.

إيساف : لا اللي متزوج أعقل وأبسل وأبسم و إسلام البقية بعدنا عزابيين.

عارف : ولو تدخل مني بس كبار شعجب بعدكم.

إيساف : اللي جان متزوج وزوجته الى رحمة الله واللي التهى بالدراسة وبأخوانه و نسى نفسه وهملها مثلي.

عارف : ها الى رحمة الله وربي يعوضكم خير مما فقدتوه.

إيساف : امين حجي والك دعوة بالمثل..

عارف : زين انت شيخ بالجامع لو تلقي محاضرات شلون هذولة بالتلفزيون..

إيساف : لا هيج ولا هيج مجرد درست ونطوني لقب بس ما استخدمته غير بين أهلي وناسي ..

عارف : ها هيج ، وانت بابا أسمر شنو تدرس مكمل اكيد لان مبين كبير.

أسمر : اني معلم لغة عربية.

عارف : يعني متعين على المدارس الابتدائي ؟

أسمر : اي بالضبط.

عارف : ماشاءالله ، وانت أهاب ؟

أهاب : تركت الجامعة لان عندي هوايات نميتها وبعدها فتحت مشروع بهذا الخصوص

عارف : مثل شنو ممكن أعرف؟

أهاب : يعني العب الكاراتيه واحب الحديد لهذا فتحت قاعة والله فتحها علية مرات ادخل بطولات وكذا بس محلية يعني .

عارف : حلو وانت أديم ؟

أديم : بعدني طالب مرحلة ثانية

عارف : تمام وهم عندك هوايات مثل اخوك لو بس هو يتفرد بهذا الشي؟

أديم : احب الشعر ويكولون القائي حلو .

عارف : وتكتب لو بس تلقي ؟.

أديم : مرات اكتب.

عارف : احب الشعر اني ، تسمعني شي ..

أديم : بمناسبة برودة الجو اكو بيت شعري يكول ( ياسارقاً دفء الفؤاد اعدهُ لي صدري تجمد والشتاء لا يرحم)

حجاها وحضن ايديه وفركهم بطريقة يدفي نفسه بيها.. بعدين بهدوء وضحكة حلوة كال ..

وفي يوم تعثرت برائحتها فسقط قلبي.
وصرتُ أحج اليها كل موسم
وأرمي كل جمال سواها بالحجارة
يا من تحملين كل النغم في صوتكِ.

القاها بطريقة حب وشاعرية بحيث الكل سكت ينصت اله ، بعدها كمل بابا وسأل عن البقية وخلص اليوم واستأذنوا لأن وراهم طريق طويل ، راحوا ،اني وخالتي رجعنا للبيت ..

ثاني يوم داومت عادي وحجينا عن العزيمة شوية وجان فرحان بأهلي ويمدح بيهم وبالطيب اللي عندهم ..

بعد مرور شهر من العزيمة جنا كاعدين ونلخص بالمواد اللي داخلة بالإمتحان هو يردلي واني أكتب بعدما شرحتله الموضوع وحفظنا المهم والملخص بعدين رفع راسه بأتجاهي كال.

أديم : أسمار عندي موضوع وياج .

يتبع..

صباح الخير والعافية
وهذا بارت الهدية💙