رواية أحببتُ ذلك الغريب الفصل السابع وخمسون 57 - بقلم عبير إدريس

خسرانه رجعت من هذيج آمالها
جرحو احساسي السولفولي احوالها
يكولون هسه عيونها وذيج الجفون
الدمع بيهن كلشي ما خلالها
يكولون تحلم بية رجعت من جديد
الكبل ما قبلت اضل ابالها.....
_________________

اختنك ماكدر يكملها ، نطوه مي اشر بإيده مايريد ، تقدم أسمر بفنجان قهوة ونطاه اخذه منه وطلع باكيت الجكاير سحب وحدة خلاها بين شفافيه ، أسمر جاب الجداحة ورثها له بدون ما يطلب منه ، اخذ نفس منها واحتسى من فنجان قهوته، جنت مركزة بكل حركة يسويها واحقد على أهلي واكول ليش هيج يسوون بيه ليش ما يزوجوهم جان هسه فرحته شكبرها ليش يخلوه يتدمر و توصل بيه الحالة يدمر نفسه حتى لو بشكل وقتي وبعدين يجتازها بس شكد راح تاخذ من صحته وعافيته وقوته..

تنهدت اخذت نفس وكمت استأذنت منهم ما اتحملت ، رجعت للبيت واول مافتت فكرت اتصل على ترنيم واعرف ماراح تجاوبني لهذا دزيتلها رسائل صوت..

أسمار : شوفي اعرف ما تجاوبيني لسبب معين لو خايفة من ماما لو حقد على أرود بس مال انتِ ما رايده زواجكم يتم هذا الشي مستحيل اصدكه..

اثنين اذا الولد صار بيه شي انسي عندج اخت اسمها أسمار ، وشوفي لو شكد ما يحبج خطيب الصدفة اللي مدري من وين طلع من يا نصيب ، ماراح يحبج ويسعدج بكد هذا المسكين اللي كاعد يحرك بروحه واعصابه برا علمودج ، ولج ذبلان وعلى لحظة ينفجر ، ولج هذا اللي جان يضحك للهوى هيج يصير بيه بسببج ، صدكيني مجرد ما خطوبتج تصير ابدأ ادورله عروس تسوى راسج اذا طلع السبب منج وحاطه ايدج بيد ماما ..

دزيتها صار صحين تأكدت وصلت ، سديت موبايلي ودخلت للحمام فرشت اسناني بعدها اجى تميم كعدت وياه شوية اتصلنا على اياس حجينا وياه بعدها فتت نمت وهو كال شوية وانام ، اخذت إيد أديم نمت عليها ، حس عليه غمرني بحضنه...

بقيت افكر بموضوعهم ، ممكن قسيت عليها بالكلام وهي ما الها ذنب وساعة اكول تستاهل ، الى ان غلبني النعاس ونمت ، ثاني يوم كعدت على صوت أديم وهو يبدل..

مطيت جسمي بتعب ، باوعتله بنص عين وهمست..

أسمار : صباح الخير حبيبي ..

التفت علية وهو يسوي بربطة العنق...

أديم : صباح الخير والعافية صح النوم..

أسمار : هاي ليش نومي ثكيل وصايرة ما احس عليك..

أديم : تعب هذا حبيبتي ارجعي نامي ماعندي شي .

أسمار : لا اسويلك ريوك..

أديم : لا تسوين اليوم نتريك بالشركة ..

أسمار : شعجب ؟

أديم : عازمهم ، ربحنا مشروع وكلتلهم ٣ وجبات اغطيها على حسابي..

أسمار : ها الف مبروك.

أديم : الله يبارك بيج ، البارحة ما صارت فرصة احجيلج..

أسمار : عادي حبيبي مو مشكلة.

توجه على مكان حقيبة العمل ، اخذها قبل لا يطلع التفت ورجعلي ، دنك قبلني رفع نفسه وكال..

أديم : خابرت عمي وتأجلت الخطوبة اسبوعين لحدما نروح ، بس أسمار اياج تحجين لأرود شي .

أسمار : ليش يا أديم بلكت يرتاح ما شفت حاله البارحة.

أديم : ونرجع نزرع الأمل بقلبه وينتظر وتالي يرجع ينتكس ، خلينا نروح انحلت وكدرنا نجمعهم كان بها ما صارت يتقبل الوضع ونساعده ينسى..

أسمار : هم صح.

أديم : يلا من نرجع نحجي باي حب..

أسمار : باي ..

كل مرة اوصله للباب هسه مابية حيل ثگلانة بشكل مو طبيعي..

ورا دقائق اجاني مسج على موبايلي باوعت منه فتحته كاتب..

تفاصيلها ملاك لا يقربه شيطان إنسي..

ضحكت واتصلت جاوبني برسمية..

أديم : الو ام اياس ..

أسمار : ياعيني على الجدية اللي انت بيها..

أديم :بطريقي للشركة محتاجة شي ؟

أسمار : اي

أديم : كولي هسه اوصي الولد يجيبولج اذا شي مستعجل واذا لا انتظريني من ارجع...

أسمار : لا هاي ولا هاي.

أديم : عجل؟

أسمار : اريد اكولك اني احبك كفاصلة ما يتبعك احد واموت عليك كنقطة ينتهي عندها كل أحد..

سكت بعدها كال..

أديم : احم ، شيخ نزلني دقايق بس..

اسمعه يكوله ليش ..

أديم : اريد امشي شوية.

إيساف : ماشي بس وين تمشي الشارع بيه حفر..

أديم : هنا يمك قريب..

إيساف : يلا ماشي..

صف السيارة وسمعته ينزل منها ، ابتعد عنه وكال..

أديم : تدرين الرجل اذا اهتم بحبيبته وبأدق تفاصيلها راح يضيع..

بإبتسامة همست..

أسمار : ليش ؟

أديم : ما اعرف ليش بس اللي اعرفه اني ضعت بيج وبدونج..

أسمار : هاي شنو ؟

أديم : ادمنتج بنت الأوادم

أسمار : لهذه الدرجة ؟

أديم : واكثر بعد ، تدرين من يوم اللي عرفتج انقلبت كل الموازين وتاه كلشي ، تهت وتشتت ورجعتي لملمتي شتاتي..

أسمار : اني ما اكدر على لسانك الحلو حتى التعبير نسيته.

أديم : مو مهم تحجين المهم تسمعيني وتتأثرين باللي اكوله لأن واللهي طالع من القلب..

أسمار : اعرف حبيبي اعرف..

سمعت إيساف يصيح ، يلا تأخرنا يمعود ضحكت على جواب أديم وهو يكوله.

أديم : اجيت احترك المشروع على البية.

أسمار : اعصابك يلا من ترجع نحجي.

أديم : كعدي ابو سمرة خليه يروح يحجزلنا خاف تاخذه النومة وينسى

أسمار : أسمر راح يحجز؟

أديم : اي.

أسمار : ماشي ان شاءالله خير.

أديم : ان شاءالله..

راح سديت الموبايل ورجعت نمت نسيت اتصل على أسمر ، واخذتني النومة ما حسيت غير واحد كاعد يمي ويمسد خدي ، فتحت عيوني أديم راجع ومبدل ملابس بيت ..

أسمار : هاي شوكت رجعت ؟

أديم : صح النوم يا كسولة عود اني وصيتج طلعتي نايمة.

أسمار : شنو وصيتني ؟

أديم : لا هاهيه عوفج من اللي وصيتج عليه وكومي تغدي حتى نروح للدكتورة حجزتلج..

أسمار : وشعجب راجع من وقت ؟

أديم : هو رجعت حتى اخذج ورحنا اني وأسمر حجزنا تذاكر سفرتنا اسبوع القادم..

أسمار : مو عندك أجتماع وعلى اساس أسمر يروح وحده يحجز شعجب انت رحت؟

أديم : صار خطأ بالحجز مالتي اجاني للشركة اخذني رحت وياه حليت المشكلة وبعدها طلبت منه نروح لدكتورتج اللي مرة وداج عليها ، حجزنا ورجعنا للبيت والكاج مثلما عفتج..

أسمار : ليش هسه ساعة بيش ؟

أديم : ساعة ٣ ونص يا حبيبتي..

أسمار : حيل صدك والله ؟

أديم : وعيونج ..

أسمار : هاي ليش هيج صايرة انام هواي اليوم اسأل الدكتورة النوم طبيعي لو لا بس ما حاسته طبيعي ابد

أديم : نسألها بس اني اكولج طبيعي.

أسمار : صدك بس بحملي باياس ماجنت انام هالكد.

أديم : تعبانة ياروحي هذا التعب طلع عليج ..

أسمار : هم صح، تغديت ؟

أديم : صبتلنا أفنان وتغدينا اني وابو سمرة.

أسمار : شربت جاي؟

أديم : وصليت هم ..

أسمار : هههه يلا الف عافية وتقبل الله.

أديم : اجمعين ، انام ساعة وكعديني بس ارتاح شوية.

أسمار : ماشي يلا نام واني راح اشوف شكو ماكو..

أديم : تغدي اول اروحلج فدوة.

أسمار : اسم الله عليك ، هسه راح اتغدا ..

اديم : سدي الباب ..

أسمار : تمام..

طلعت وسديت الباب وراية ، رحت لبيت عيالي شفتهم شنو مسوين اكلت شوية وكعدت يمهم وبعدين رحت سولفت وية الحجية كلش احبها للعصر رحت لأديم كعدته ،كعد ودخل للحمام واني بدلت ، فات للغرفة غير ملابسه وطلعنا وية أسمر للدكتورة ، دخلنا حسب الموعد اني وأديم ، اول ما حجيت وياها تذكرت حالتي استغربت صارلي هواي من اجيت شلون تذكرتني بسهولة ، سألتها كالت الحالة الوحيدة اللي عندها داء السكري وية الحمل هي اني اما بقية المراجعات سليمات ، كعد أديم على الكرسي واني مددت على السدية حسب توجيهاتها الية ، تقربت مني رفعت القميص ومررت ألة السونار بعدما غطت بطني بسائل خاص ..

_ اخذي نفس ، اي عفية ، وضعية الطفل زينة وحجمه زين ماشاءالله هسه نشوف جنسه، تريدون تعرفون لو لا؟

أسمار : ما عندي فضول، اي شي يجي من رب العالمين نعمة..

التفتت على أديم وسألته..

_ وانت ؟

أديم : عاجبني أعرف من باب الفضول لا أكثر وحتى ابدي اجهزله..

_ انتِ شنو تريدين ؟ ولد لو بنية ؟

أسمار : مو كلتلج اي شي دكتورة عندي اهم شي سلامة الطفل..

_ الف مبروك مرزوقكم ولد..

أسمار : صدك ؟

_ اي

أسمار : الحمدلله على النعمة.

أديم : ها ام عيسى مبروك يابة

ابتسمت وكلتله الله يبارك بيك ، رجعت كعدت على الكرسي سألتها كلشي اريد اسأله ، كالت النوم عادي والارق هم عادي وهاي كلها تغيرات مال حمل، كتبتلي علاج غير العلاج السابق وطلبت مني احلل مال داء السكري بس لازم قبل الريوك ، تشكرناها وطلعنا رجعنا للبيت ، بلغناهم ، باركولنا وجان الخبر عادي بالنسبة الهم بس تميم اكثر واحد فرح خصوصاً من كال..

تميم : يعني اني مثل بابا راح يكونون عندي ١١ اخ..

أديم : بابا ومن وين اجيبلك وحدة تجيبلك هالكد..

تميم : هسه احنا ٣ اني واياس وعيسى مابقوا غير ثمانية..

أديم : يلا راح اتزوج ٣ وية سمرة حتى اكدر اوفرلك هذا العدد.

أسمار : ويهون عليك فراق ماما ها تميم.

تميم : طبعاً لا ليش تعوفيني؟

أسمار : اعوفكم اني واياس وعيسى اذا ابوك يتزوج..

تميم : يتشاقى مو بابا صحيح تتشاقى؟

أديم : غير هي ما تكدر تجيبلك فريق مثل عمامك.

تميم : ما اريد احنا ٣ وبس.

أسمر : قنوع ابن الغالي.

أسمار: تربيتي مو مثل بعض الناس عيونهم فارغة.

أديم : ليش حاسس نفسي اني بعض الناس..

أسمر : انت كلهم يابعدي..

حجاها وضحكوا ، مشت الايام سريعة واجى وقت سفرنا وما بلغنا أرود بروحتنا كلناله طالعين للشمال ، وصلنا وجان سلامهم اعتيادي بس سلام ماما بارد حيل ، دخلت لغرفة ترنيم ردت احجي وياها لكيتها طالعة سألت تولان عليها كالت بالدوام ، رجعت كعدت بالهول ، صبوا الغداء وبعدها شربنا الجاي وانفتح الموضوع كالوا نستغل الوقت قبل جية ترنيم..

إيساف : اني خجلان احجي بس ما اكدر اشوف اخوية يذوب واسكت.

عارف : ما اكدر الموضوع قافليه وحجيتلك بهذا الشي بالموبايل وجيتك على راسي ياشيخ..

إيساف : اعرف الموضوع قافل من يمكم بس ممكن اعرف ليش شنو الاسباب اذا على المشاكل اللي عندنا انحلت الحمدلله وهسه حياتنا صافية.

عارف : لا مو بس هيج الناس خوش ناس ونطيتهم كلمة هاي اولاً ، اثنين اني عندي صحة زوجتي بالدنيا كلها ، كاعد اشوفها حزينة وتتآكل روحها ليش اخسرها ..

إيساف : لا ان شاءالله ماكو خسارات بس بلكت نحجي وياها وتغير نظرتها..

عارف : ابد حتى البنات ما اقبل يحجون وياها ، صدكني لو اشوف بيها مجال او اكو أمل جان اني حاجيتها، انتوا تدرون بزواجاتكم شلون وكفت وياكم وساندتكم وكفت بوجهها وماسمعتلها وزعلت علية وزعلها جان ثكيل اخذ من صحتي وصحتها هسه ما اريد اعيد الشي نفسه اني تعبان واريد ارتاح والبنية مقتنعة بالولد وحجت وياه بدون ضغط قبلت بيه..

أديم : عمي هذا اخر كلام عندك؟

عارف : اي والله يا ابو تميم ياريت ما تحرجني.

أديم : هذا هو ، نروح احنا نحجز بفندق قريب منا ، ونروح ونرجع عليكم واذا البنات حابين يبقون هنا ما عندنا مانع.

عارف : هاي شنو يعني زعلتوا وتريدون تبقون بفندق هاي ما مرجية منكم..

أديم : لا يابه احنا ما نفكر هيج بس الشيخ بهذيج جيته بات بفندق وهسه نفس الاتفاق اني وياه اتفقنا قبل لا نجي والبنات يبقون يمكم واحنا نروح ونجي عليكم.

عارف :زين ابقوا اليوم على الاقل..

أديم : تعبانين ونريد ننام نرجع المغرب ان شاءالله.

عارف : اجي وياكم حتى احجزلكم اني.

إيساف : حجي اكعد واخذ راحتك احنا نروح

عارف : هيج صارت شيخ ما تريدني اجي وياكم.

إيساف : مو هيج والله بس ما عاجبني اتعبك

عارف : تعبكم راحة ما مسوي شي..

طلعوا واني وخالة أسن قررنا نحجي وية ماما وياريت ما حجينا اخذتنا بالصياح واللوم والعتب ورفضت حتى تكعد يمنا تالي سكتنا ، اجتي ترنيم انصدمت بينا شافتنا وكالت..

ترنيم : هاي شوكت اجيتوا ؟

أسن : وعليكم السلام..

أسمار : الله يسلمج

ترنيم : شكو شبيكم تريدون تاكلوني..

أسن : صوتج منا امج لا تسمع تغدي وارتاحي وتعالي نحجي.

ترنيم : اي حجي يخص اي موضوع لا تخوضون نقاشه وياية تعبانة وما بية حيل ومليت والشي مو بيدي ماشي.

كمت يمها لزمتها وعتيتها من بلوزتها..

أسمار : لج شنو مو بيدج شلون تقبلين تتزوجين واحد ما تحبيه

ترنيم : نزلي إيدج أسمار ما اريد احجي حجي يأذيج.

أسمار : شحدج احجي يلا اريد اسمعج..

ترنيم : وخري عني ترة روحي ما طايقتها..

أسمار : احجي عدل شو تشمرين بالحجي انتِ..

ترنيم : عكب باجر حفلتي يعني ماكو داعي تعبين روحج بالنقاش وحجي ماله فائدة..

أسمار : مو بكيفج خوش.

ترنيم : هذيج امج وروحي حاجيها اني ما الي لا خلكج ولا خلكها اوك..

أسمار : روحي ترنيم اني الج روحي.

تركتني وراحت طبكت باب غرفتها بقوة ، ردت اكوم منعتني خالتي ..

أسمار : يا ادبسز خليني اروح اكسرها..

أسن : اتركيها الظاهر أناهيد مسودة عيشتها ما شفتيها شنو صاير بيها.

أسمار : ماما تتنحس صحيح بس مستحيل تجبر وحدة على شي هي ما رايدته.

أسن : اتركيها ونرجع نفتح الموضوع العصر ونشوف شنو يصير ويانا.

أسمار : كرهتهم تدرين.

أسن : عاد انتِ كلشي وكلتي اكرههم.

أسمار : تدرين بية اكذب ، بس احترك قلبي ليش هيج تسوي بروحها وبالولد.

أسن : معناها مو قسمتهم..

أسمار : اويلي اذا ترنيم ما تهنت ورجعت لماما عود هذاك الوقت خليها تندب حظها زين..

بقيت احجي لحدما تعبت ، مشى اليوم عادي وثاني يوم اجوي الولد وفتحنا الموضوع من جديد صارت هوسة جبيرة والانفعال الزايد جان مني، اضطريت اسكت بعدها وما اناقش، خالتي هم جبرتني انهي الموضوع ، ثاني يوم حضروا للحفلة وهي راحت صالون ، اني حلفت ما احضر لا حفلتها ولا عقد قرانها ، قبل لا تبدأ الحفلة بساعة رن موبايلي الماسنجر باوعت أرود ، استغربت شنو قلبه يعلم ، احتاريت اجاوبه لو لا ، فصل ورجع اتصل جاوبته..

أرود : عليج بداعة ولدج احجي الصدك سبب سفرتكم شنو ؟

أسمار: رايحين للشمال.

أرود : لا كذب مو للشمال ، عرفت مسافرين يمها تحظرون عرسها موو؟ بعدها ما عاقدة ، اذا بعدها خليني احاجيها .

أسمار : اتركها ما تستاهلك.

أرود : لخاطري خليني بس اسمع صوتها للمرة الأخيرة لا تخلين صوتها بنفسي مثلما اهلج خلوها بنفسي..

أسمار : تمام هسه ارجع اتصل عليك

أرود : انتظرج..

أسمار : تمام شوية بس..

أرود : استعجلي ..

أسمار : اي.

سديته ورحتلها للغرفة لكيتها كاعدة وصافنة تلعب بأظافرها بملل صفنتها ابد ما بيها فرحة بالها شارد لبعيد سديت الباب فزت وباوعتلي..

أسمار : اذا ما تريديه تكدري تحجين وننهي ليش تفوتين بزواج فاشل واضح من بدايته..

ترنيم : ماكو داعي للحجي هذا واصلا مو وقته.

أسمار : يريدج حاجيه ولو مرة وحدة راح يتخبل عليج ..

ترنيم : منو ؟

حجتها وعيونها صارت بيها لمعة حزن..

أسمار : منو يعني أرود..

ترنيم : ما اكدر احجي وياه..

أسمار : اسمعيه لا تحجين خليها تطلع من نفسه حرام عليج.

كامت تريد تطلع قفلت الباب واخذت مفتاحها

أسمار : اخربها وتعرفيني هسه افوت بنصهم واكول انتِ مجبورة لو تحجين وياه طيبي خاطره ولو بكلمة..

بقت صافنة تباوعلي وتتنفس سريع ، اتصلت وفتحت الخط خليته بيدها ، هي ساكتة وهو ساكت ، ماحجى شي بس اشتغل صوت ولد يلقي شعر وهذا نصه..

لو صابر انت علي صدكني اعوضك عمر
بس انت هيجي رحت مافكرت تنتظر

گتلك حياتي الك
وشيصير مابدلك

والجرح بيه بقه
لو بيك ماعفته
جائز اكون السبب
وجائز تكون انت ؟

بس هي رحلت عمر
وكلشي انتهى بوكته
قصة وطواها الزمن
رحلة انتهت وبثمن
وبين چبير الفرق

(وين اني وين انت )

أرود : مبروك من لسان وگلب والله يهنيج لأن ما اكدر ادعي عليج بسوء واشوفج تتأذين ، ترنيمتي ، اذا تأذيتي معناها تكون أذيتي..

فصل الخط ما اعرف هو سده باوعتلي انهارت بالبجي كامت تضرب على وجهها فقدت ، وهي تصيح..

ترنيم : كلتلج ما اريد احجي وياه ليش هيج ليش اني بالكوة مصبرة نفسي مو حرام عليكم هيج تسوون بية منا انتِ ومناك امج خبلتني كالت اتبرأ منج اذا ما قبلتي انتوا ما تحسون بية محد يسمعني محد اخذ رأيي اني انجبرت وكلكم تدرون بعدني احبه اتنفسه ، كلكم اخذتوا اللي تحبوهم ليش اني حظي هيج ليش..

بقت تبجي وتحجي الى ان اندك الباب فتحته بابا عصبي نار باوعلها خزرها دنكت ، دارت وجهها وكامت تمسح بعيونها ، تركت الغرفة وطلعت ما اعرف شنو صار ماما فاتت من يمي تباوعلي صفح وتخزرني ، اجوي اهل العريس وهي طلعت كعدت انعقد قرانهم وماكدرت اسوي شي أديم وإيساف واكفين ومبين القهر على ملامحهم ، بس يتظاهرون بالفرح شكلياً فقط، خالتي نفس حالهم الا اني جنت ابجي واندب حظ اختي ، حاربت لأخر لحظة ماكدرت اسوي شي لحبهم ، اختنكت وطلعت برا بالحديقة كعدت لحظات وكعد بصفي أديم ، اثنينا ضايجين حجيتله اللي صار من بابا الفضفضة لأن اختنكت وهو زاد الخنكة من كال..

أديم : خابرني يبجي يكول اذا بعدها ليش ما اخذتوني جان جريتها من ايديها ورجعتها وياية، ليش هيج سويتوا بية اني تدمرت ، أديم الله عليك امنع العقد بينما اجي ، صافن بيه وبكلامه عباله الشغلة هينه وما حاولنا وياهم ، اني لحد قبل جية اهل العريس احجي وية ابوج ونفس رأيه ما تغير..

أسمار : كله صوج ماما ، أديم اريد اجي وياك بالفندق ما ابقى هنا بعد..

أديم : امشي ارتاحي بس خاف عيب.

أسمار : اروح ولا ابقى اتعارك وياهم..

أديم : يلا ماشي وباجر تهدأين ونرجع..

أسمار : الله كريم..

دخلت اخذت كم قطعة من ملابسي وسلمت على بابا وماما ما جاوبتني بابا سألني وين كلتله تعبانة وهو عرف السبب ما طول وياية بالاسئلة طلعت وأديم حجى وياه كايلة اخذها ترتاح واجيبها باجر ، طلعنا ويانا إيساف اخذنا تكسي ورحنا للفندق بيومها ماكدرت انام ولا لحظة وكل شوية نتصل على واحد من الولد يطمنا على أرود..

ثاني يوم رحنا لأهلي ما فتحت وياهم موضوع لأن اديم حذرني وقبلها طلب مني بمودة ما احجي شي حتى لو شفت شي ما عجبني ، لخاطره ماحجيت ومشيت الامور عادية وهي ابد مو عادية ، بس سايرت حتى ما اخسر رضا الله ورضا اهلي علية، واللي صار صار بعد ما بيدي شي..

خلصنا اليوم وياهم وطلعنا افترينا شوية غيرنا جو ويانا بابا وتولان ، اتصل أسمر على إيساف ، ما اعرف شنو حجى وياه بعدها إيساف كال دير بالك على نفسك ونهى المكالمة ، حجالنا اللي صار..

إيساف : خابرني أسمر وكال لازمين ابو الحر وباقي أرقم ما لاكيه طالع من المكان اللي جانوا بيه قبل جية الأمن بربع ساعة.

أديم : شنو هذا بس لا عنده عرف بالأمن.

إيساف : كلشي توقع الله اعلم..

بقوا يحجون اخر شي كعدنا بمكان واتصل أديم على أسمر ، والشيخ طلب منه يفتح سبيكر حتى يسمع هو هم.

أديم : ابو سمرة خوما عرفوا بيك انت ورا هذا الشي.

أسمر : ويعرفون طبهم طوب خايف اني

أديم : حبيبي احنا خايفين عليك لا كلشي وتاخذه بحيل صدر ..

أسمر : ما يخوفون جلبي طز بيهم..

أديم : وتالي وياك أسمر.

أسمر : وداعتك ماكو شي لا يظل بالك.

أديم : هسه انت وين ؟

أسمر : طالع لبغداد.

أديم : شنو عندك ؟

أسمر : شغل غير شنو عندي يعني .

أديم : وحدك ؟

أسمر : أهاب وياية..

أديم : اي اذا هيج زين.

أسمر : يمعود لا تحسسني اني بالابتدائي وخايف علية كل اللي بيني وبينك سنة..

أديم : اعرف بس اخاف عليك من غدرهم صارن عليك هواي نقاط..

أسمر : يمعود لا تخليهم ببالك هم ونعالك اليسار....

أديم : الله يحفظك حبيبي ويبعد عنك كل شر..

أسمر : يسلمك ربي يلا اروح اني.

أديم : الله وياك درب السلامة.

أسمر : الله يسلمك لا تطولون راح ابدي اشتاقلكم..

حجاها وضحك..

أديم : الظاهر طاكك الجفاف.

أسمر : حيل يا ابو تميم حيل .

إيساف : كاعد نسمع لا تروح زايد البنات كاعدات.

أسمر : اني شكو اخوك سرسري يلا عيني سلام عليكم كلكم.

ردينا بعليكم السلام وراح ، مرت ساعتين وجان يتصل أهاب صوته مفزوع ...

أهاب : يولد أسمر غدروه..

إيساف : شنو ولك ليش وينه ؟
قبل شوية جنا نحجي وياه..

أهاب : ما اعرف وكفنا على الطريق اكو حمامات نزلنا اني وياه بعدها ، مشيت كم متر لأبو كشك اخذت منه جكاير ومي رجعت لكيته ماكو وبالسيارة دم ..

أديم : يا الهي دخيلك..

يتبع...

متابعة ممتعة ياب.....

بعد بارتين للختام هيج اعتقد لان اكون بعد احداث بكل رواية ما احسبها صح....🤭