رواية أحببتُ ذلك الغريب الفصل الثامن والعشرون 28 - بقلم عبير إدريس

اديم يكول...

خاطرة بعنوان ( يا تصاويرك )
بتصاويرك رسمتهن تعابيرك
خططت وجه الليل يشبه حيل تصويرك
وحجيتلك وشكيتلك واسمعتهن زين وتبسم ثغرك وكلت ياويلك
كل الصار واللي يصير هد حيلي وحيلك
عندي حجي هواي بس شحجيلك
ليلة نمت وجه الفجر صافن حيل واتذكر تفاصيلك ولك شغنيلك
رسم العين والشفتين وعلى الخدين مجموعة تناهيدك
لحنت غنيت وكتبت وكلهن سميتهن باسمك وتلحينك ياتصاويرك..

بقلمي عبير إدريس....
احبكم 😘

_______________

عكدت حاجبي الموقف كله مستغربته مصدومة بعدني ردت احجي انطق بكلمة او انطي ردة فعل ماكدرت...

استحوذت على افكاري رغبة قوية احضنه بيها واضمه لقلبي خصوصاً من شفت اناقته جان لابس بدلة سوداء وقميص ابيض وربطة عنق ملونة ، مزين شعره خفيف والوجه يلمع عدا الضحكة جانت موضوع ثاني ، جان وسيم بشكل وساحر ، بلعت ريكي ومديت ايدي اخذت كلينكس من الطاولة وتقربت منه مسحت الحمرة الحاوطت فمه ، جان مبتسم ويتنفس الصعداء ، ما اعرف مرتبك لو ما مصدك الصار مثلي...

سحب الكلينسة من ايدي وقلب كفي وباسه ، وبعدها مسح فمه بكل هدوء...

جانت ملامحه مرتاحة و واضحة عليها علامات الفرح ، بالمختصر جان طاير ، تنهد بسكوت فتح اذرعه على اكملها وطلب مني احضنه ، فتت لحضنه واسمع دقات قلبه السريعة وخرت راسي وطبعت قبله على خده وهمست..

أسمار : هاي شسويت ؟؟؟

أديم : ما اعرف مستغرب مثلج..

أسمار : بس اني زعلانة عليك تدري مو ؟

أديم : اعرف يا نظري بس كملت هواي شغلات يلا كدرت اتقدم...

أسمار : مثل شنو ؟؟

جر حسرة وكال..

أديم : عوفيها هسه بعدين احجيلج.

أسمار : فلوس البيت رجعتلي عن طريقك مو بس ابني؟؟

هز راسه ساكت..

أسمار : احجي يا أديم لا تظل ساكت..

تقرب مني وكال تعاي ، تقربت همس بأذني..

أديم : حبي الج شلون افسره او ابينه ؟؟ بالحجي !!! اكيد لا ...ابينه بالفعل ...

أسمار: شلون يعني ؟

أديم : اول شي خلصتج من متعلقات الماضي وماعاد عندج شي يربطج بيه وثانياً وفيت بوعدي وخطبتج..

أسمار : بس انت ما وعدتني..

أديم : من وعدت نفسي معناها وعدتج...

أسمار : أديم تعرف بيوم من الأيام فكرت انت ما حبيتني بيوم ولعبت بمشاعري..

أديم : سمرة اني ما جنت اكدر اخليج تجازفين بحياتج خصوصاً انتِ أم واكو ولد مسؤول منج لازم تداريه وتكبريه وتأمنين مستقبله يعني اني ما اكدر اجي افرض عليج واكولج تقبلين تتزوجيني مقابل حرمانج من وظيفتج او تقصيرج بأمومتج لأن عندج ٣ اشخاص بركبتج غير ابنج ، اني وامي وأبني ، وتخيلي اني وامي من ذوي الأعاقة تعب عليج وجهد مضاعف وما اريد بيوم تتندمين لأن دخلتي حياتي المتعبة..

اخذت كفوف ايديه قبلتهم بلهفة وحب وحضنتهم لقلبي، تنهدت وكلت..

أسمار : هذا شغلي واحبه واني من جنت بالمركز بدل ما اداري شخصين اداري عشرة ومرات أكثر وافتر عليهم وهالكد ما حبيت الشغل وشفتهم شلون يحبوني ويطلبوني بالإسم كمت اشتغل شفتين باليوم يا حبيبي لهذا اترك عنك التفكير شلون راح ادبرها واخاف أمل ، وبعدين اذا انت تصرف علية اني وابني وتكفينا بعد ليش اشتغل،، و اذا حبيت اكتب بداخل بيتك وانشر كتبي وهذا يعتبر وارد مالي لا بأس بيه..

أديم : ان شاءالله ناوي أسويلج مكتبة اجمل من مكتبتج القديمة بس ارتب البيت واعدله صدك ردت اسألج قبل لا ابلش عندج اعتراض اذا عشنا بنفس البيت الجنت عايش بيه وية شهد بس اغير كلشي وعلى ذوقج لو نعيش وية بيت الحجية أمي بس راح تتعبين وتتقيدين وبنفس الوقت اغار عليج اني.

أسمار : تغار !!

أديم : طبعاً..

أسمار : من شنو تغار ..

أديم : من الهوى اذا مر بيج.

أسمار : زين ليش شنو سبب هذه الغيرة اكدر افسرها شك لو حب !!!

أديم : سمرة اني رجل غيور على اشيائي فما بالك أن كنتي أثمنها !!!!!

أسمار : بس هيج راح تتعب واني هم راح اتعب.

أديم : ما اريد اشوفج بعيونهم سمرة وهذا هم سبب من الاسباب الجنت رافض ارتباطنا ، اني نحس وغيور بشكل طبعي صعب ، ممكن اكون صديق جيد واكدر اسيطر على غيرتي بس حبيب راح اتعبج وياية..

أسمار : اني هم غيورة وخلي ابالك يمكن اكون أكثر منك..

أديم : غاري علية ضميني اخفيني عن العالم المهم اكون وياج وهذا يكفيني..

أسمار : تعرف لحد الأن احس بنفسي عايشة بحلم.

أديم : حلم جميل و واقع أجمل ان شاءالله..

أسمار : بس ضروي ازعل عليكم انت وخالتي والشيخ لأن لعبتوا علية.

أديم : لا تنسين أسمر هذا اهم شي زعلي عليه لأن اقرب واحد الج وما خبرج.

ضحكت وهزيت راسي مستغفرة.

أسمار : صاير حاروكة أديم.

أديم : عجل بس علينا تزعلين هذا هم قاطعيه المستهتر..

أسمار : لا أسمرنا خوش أسمر.

أديم : ها صار اسمرج راح نتخارب سمرة.

أسمار : هو علمني يكول سمرتنا اني كمت اكول أسمرنا..

أديم : يلا شكو بيها..

حجاها وتنهد بعدها كال.

أديم : تدرين لو بيدي ابقى وياج وابات لو اخذج هسه بس لازم نرجع الوقت تأخر والوضع موزين ، حضري نفسج حفلة المهر راح تكون نهاية الاسبوع بس نكمل البيت وتفاصيلة اجيج كل يوم ونطلع نختار كلشي على ذوقج..

أسمار : بس هيج تعب عليك.

أديم : ماكو تعب اريد اسوي الحفلة قبل سفر اهلج وبعدها بكم يوم أسوي العرس.

أسمار : عليمن حفلتين وهوسة ليش ما نختصرها بحفلة وحدة هي مهر وهي زفة افضل ولو علية ما احب اسوي اي شي..

أديم : ماكو هيج شي راح اسوي حفلة الكل يحجي بيها هاي سمرة مو اي وحدة عادية اني مرتبط بيها.

أسمار : تمام ما نختلف بس خليها حفلة وحدة لخاطري لان تعبانة صدكني ..

أديم : هذا هو حددي الوقت ويصير خير ان شاءالله..

أسمار : ان شاءالله..

أديم : يلا اروح ولو ماعاجبني افارقج..

أسمار : حتروح يعني ؟؟

أديم : تحبين ابقى ماعندي مانع بس اخذيلي موافقة من عارف ..

حجاها وضحك ، اول مرة اشوف ضحكته هيج حلوة ...ردت اعاتبه واحجي وانتقد تصرفاته بس ما ردت اخرب فرحتنا...

طلع موبايله من جيب السترة وطلب مني اتصل على أسمر اتصلت وخليته بيده اخذه مني وسحب كفي طبع قبلة حنينة وظل لازمه ويحجي بهدوء وية أسمر ..

بعدها أجتي أفنان سلمت علية وحضنتني طلعت وياها سلمت على الحجية وهم باركتلي مرة ثانية ، جنت فرحانة لدرجة اتمرجح بين الحلم والحقيقة...

طلعوا واني واهلي وكفنا بالباب ودعناهم يمشي أديم بوسط اخوانه جانوا محاوطيه ، صعدوا سياراتهم وراحوا التفتت حتى افوت لكيت خالتي وراية شهكت ورحت حضنتها وظليت اضرب بيها بالشقى..

أسمار : هاي دكة تسويها بية ما خفتي يصيرلي شي..

ضحكت وبادلتني الحضن بقوة...

أسن : مايفيد وياكم الأ هيج اثنينكم عنوديين وراسكم يابس ..

أناهيد: اي عفية بأختي وزين من سويتي هيج ، يعني اريد افتهم اني أم لو جرجوبة مال صورة ؟؟؟

عارف : يا بنت الناس انتِ الخير والبركة واخذت رأيج قابل نطيتها بكيفي.

أناهيد : واني قبلت ؟؟ لو كلتلك لا.

عارف : البنية مقتنعة واني مقتنع والولد ما يتعيب واهله خوش ناس واختج مرتاحة عندهم بعد ليش ما اشيل بنتي وانطيها اني ومغمض.

أناهيد : مثل لؤي كسرتوا كلمتي ونطيتوها وكلبي جان ما مرتاح وبهاي زيجتها هم عدتوا نفس السالفة ومن هسة اكولج يا أسمار راح تتندمين بكد شعر راسج اذا الولد طلع زين اهله راح يأذوج.

عارف : هسة ليش متفاولة عليها خليها تروح بفالها وتمنيلها السعادة..

أناهيد : اني اكثر وحدة اتمنى لبناتي السعادة واحب اشوفهم مرتاحين بس مو بهيج صورة وية هالكد عالم تعرف حتى على زواج أسن ما جنت راضية صح احب الحجية ويعجبني أكعد اسولف وياها بس مو معناها اشيل ببناتنا وانطي كوترة هي..

أسن : والعذرا ناس ذهب وما شفت منهم غير الخير وهاي صارلي سنة يمهم لا يوم ولا يومين ، كلهم شخصيات وناس تعبانة على نفسها..

أناهيد : وليش ما سويتي طفل اذا خوش ناس ليش مترددة لحد الأن.

أسن : ماسويت مو لأن هم مو خوش اوادم وأنما تعرفين طبعي شكد نحس احب اتأكد من نفسي اكدر اقاوم هيج مسؤولية وأكون كدها لو لا يلا أجازف...

أناهيد : على العموم شايفات كل الخير فايتة ارتاح بغرفتي وممنوع احد يفوت علية منا للصبح.

أسمار : ماما والعشا مو على اساس نطلع.

أناهيد : خلي أبوج و خالتج ياخذوج اني شنو..

عافتنا وفاتت ردت اروح وراها بابا سحبني عليه حضني وباس راسي كال..

عارف : عوفيها ترتاح وتستقر نفسيتها من تتقبل الموضوع نفوت نحجي وياها اني وياج ونطيب خاطرها امج طيبة وترضى بساع..

تنهدت جريت نفس وهمست..

أسمار : خايفة من حجيها نفس الفال تفاولته الية من خطبني لؤي وهسة عادت نفس الشي ..

عارف : هي ما تحب الشي اللي يصير فجأة ، تريدين الصراحة يابنتي حتى اني استغربت خطوبتهم يعني اول مرة اسمع بهيج شي.

أسن : ليش سموهم ال الغريب كلشي عندهم غريب مرات يتصرفون تصرفات اصفن بيها اكول منا لمئة سنة ليكدام ما تخطر ابالي اسويها.

عارف: بس بالمجمل خوش ناس وطيبين.

أسن : طبعاً ما نختلف على هالشي..

عارف : وهذا المهم ، يلا اني رايح بشغلة وانتوا كعدوا وخططوا ، حاولوا تكملون كل شغلكم قبل سفرنا حتى تستقرين وية خالتج ..

أسمار : أن شاءالله بابا حبيبي..

طلع بابا وكعدنا اني وخالتي خلصناها عتب وضحك كل شوية تحجيلي موقف من المواقف اللي جانت ضامتها علية...

بالليل رحنا يم ماما حجينا وياها بلشت تقنع شوية وماتركناها الا وهي تضحك..

ثاني يوم بلشنا اني وخالتي نجهز ملابس الية ، أديم تارك يمها فلوس وطالب منها تطلع وياية وتفض سالفة الجهاز لهذا خلوها تبات يمنا..

اشتريت جهاز كامل بنفس اليوم عندي كم محل اشتري منهم دائماً ، كبل رحنا عليهم ما افترينا هواي طلعنا ساعة ٨ الصبح رجعنا ب ١١ بالليل ، اشتريت النواقص العندي وخابرني أديم كال اذا تكدرين جيبي فرشات للغرفة وجبنا...

مرت يومين خابرني ساعة ١٢ بالليل بين الغزل وضرب الجنون اللي عشناه بلهفة وحب ، على اساس نختم الحديث من كال

أديم : حبيبي باجر ساعة تسعة الصبح اني يمج تحضري ماشي..

أسمار : ماشي حبيبي.

أديم : محتاجة شي ياروح حبيبج..

أسمار : سلامتك..

أديم : تصبحين على أجمل وأروع شي بالوجود..

أسمار : اصبح عليك انت يا اغلى شخص عرفته..

قبل لا يسده تنهدت و همس..

أديم : سمرة ..

أسمار : نعم ...

أديم : انتِ ما تشبهين احد
انتِ تفصيلة من اثر تنهيدة
طلبتج بختمةٌ ترتيلة
بسجدة خاشع
ودمعةُ ذليلة.

بقلمي🤭

جريت نفس ابتسمت وهمست..

أسمار : الله تجنن...

أديم : جنت بكل سجدة اطلبج بخشوع وابجي مثل الطفل رغم اعرفج تريديني وتحبيني بس الصارلي خلاني افقد الشغف بكلشي وردت تبقين صديقتي اللي تحبني وتتمنى تفداني بروحها لهذا ما قربتج مني أكثر..

أسمار : زين تعرف شعوري شنو بعد اول مكالمة غزل اليوم تغزلناها اني وياك...

أديم : شنو ؟؟

أسمار : من سمعت صوتك رجف گلبي
من شفت عينك تهت كلي
صفنتلك وشفت الكف
صليتلك قريت الكهف رفعت الكف تمنيت نظل سوية..

بقلمي🤭

أديم : الهي يديمنا سويا ما أعرف حياتي شلون عشتها بدونج ما تعرفين شلون جنت عايش صدكيني مهمش حياتي فارغة وخالية من كل لون وطعم كل يوم صوتج يرن بأذني وضحكاتج تتردد براسي خلصت ايامي بضيق وخوف من الفقدان والحسرة والألم..

أسمار : وانت يا أديم عذبتني حرت شنو سويت في سبيل اكرهك وابتعد بس ما كدرت اكرهك يا أديم شنو السر ما أعرف.

أديم : سمرة مستغرب أول مرة بنية تحبني بدون مقابل خصوصاً بهاي حالتي.

أسمار : يا أديم شبيها حالتك افضل من الف شاب مابيهم شي ، تكفي رجولتك وشخصيتك والمقربين يحسبولك الف حساب تتذكر من دخلت وياية لابو الدار شنو سويت بيه لو من اجى بلال زوج اختك.. لو من رجعت حقي من لؤي . أديم انت شخصيتك حلوة وتنحب وقوية لهذا اني انعجبت بيك ...

أديم : وحبيتيني..

أسمار : أعترف اي.

أديم: من اول حضنه هاا؟

أسمار : من اول شمه ، يمكن انت جنت متقصد مو ؟

أديم : متقصد ومتقصد مع سبق الاصرار والترصد ولو بيدي جان طولتها وازيدج من الشعر بيت اني ادري انت واكفة بهذا المكان وأعقل جان منبهني على الحاجز الحديدي الصغير بس عثرت نفسي لأن ردت قربج ..

أسمار : يعني انت تحارشت ؟ وانت سويت هاي الحركة حتى تتقرب مني يامحتال.

أديم : يابه لو جنت اشوف غير ومنا اسمع صوتج وشام العطر وفوكاها اشوف شكلج ما احجيلج جان شنو سويت..

أسمار : شنو سويت ؟ صار عندي فضول.

أديم : مو هسه بعدين اكولج.

أسمار : لا كولي هسه جان شنو سويت

أديم : اكولج بوقتها يلا روحي نامي وارتاحي حتى اكعدج الصبح ونطلع ، يوصلني أسمر ومرتي حبيبتي تاخذنا بسيارتها..

أسمار : تحت امرك مرتك حبيبتك وسيارتها..

أديم : دايمتلي حبيبتي هي وحنيتها وطيبة كلبها الملائكي اللي اجزم وابصم بالعشرة ماكو منها بهذه الدنيا.

أسمار : أديم حبيبي اريد اكولك شغلة ياريت تاخذها بعين الاعتبار..

أديم :كولي سمرة..

أسمار : لا تتحسس مني اريد اصيرلك عكاز وعيون انور دربك واريد اوصلك مرحلة تعتمد بيها على نفسك بحيث ما تحتاج احد حتى سمرة..

أديم : تعالي يمي وراح اخبصج بالاسئلة ، الله سمرة هيج وتشاركيني عالمي وتنورين ظلامي والله ماشايف النور صارلي سنين مرات اختنك ياحبيبتي واكول اذا اني دنيتي هيج ظلمة القبر شلون،، تدرين يعني راح اعيش ظلام بداخل ظلام ثاني اكثر منه.

أسمار: أديمي اي سلبية بعد ما أريد ، ضروري نعيش بأيجابية ونرتاح شوية بعدها نبدي نراجع ضروري ولازم اكو حل وخلي عندك أمل ياحبيبي .

أديم : ويرجع الأمل لگلبي وبعدين تصير عندي خيبة أمل جديدة وارجع لليأس..

أسمار : هذا اليأس قبل أسمار هسه وياها ماكو يأس ان شاءالله.

أديم : بشنو اجازيج فهميني..

أسمار : من تبقى تحبني وتداريني وتهتم بية هاي مجازاتي.

أديم : من اكولهم احبها ياناس يلوموني ليش حبيتها وردت تموت بسبب بعدها عنك ، وينهم يسمعون الكاعد اسمعه لج انتِ حياة ..

أسمار : نام وارتاح واحلم بية بين ما يطلع الصبح ونتشاوف

جر نفس تنهد وكال.

أديم : هم راح ييجي يوم ونتشاوف صدك اشوفج اني هم واتمعن بملامحج اكعد الصبح الكاج نايمة بصفي اشوف لون شعرج وابصر بشرتج لون عيونج اشوف ضحكتج اللي حاسس بيها ومتخيلها وراسمها ابالي، تعبت من التخيلات سمرة أريد اشوفج عندي رغبة لشوفتج بحياتي ما صايرة عندي مثلها ماعايش هذا الشغف اتجاه شي مثل ما عايشه هسة تخيلي صرت ادعي اشوف ولو يوم واحد حتى بس اشوفج وبعدها ارجع اعمى عادي المهم شفتج والله ظلت حسرة بگلبي..

يحجي بحرقة قلب ويجر حسرات ويتنهد بجيت كلامه هواي أثر بيه ظليت اهون عليه لحدما راح وهو ضايج..

ثاني يوم الصبح كعدت رغم جنت فرحانة بجيته وراح نطلع نجهز بس فرحتي طفت بسبب حسرته البارحة وشلون يوصفلي شعوره بسبب هالشي الليل كله مانمت منه غير ساعة بس...

خلصت تبديل سمعت بابا يصيح من جوى.

عارف : يلا بابا أسمار اجه خطيبج..

ضحكت على هاي الكلمة الله خطيبج حسيت نفسي لأول مرة اتزوج ...

نزلت بلهفة ودلال على الدرج شافني بابا ودعا تدوم هذه الفرحة ، خالتي طلعت من غرفة ماما شايلة جنطتها وراها طلعت ماما.

أسمار : ها خالة شنو رايحة؟

أسن : اي راح ارجع وية أسمر.

أناهيد : ظلي للعصر مو راح ييجي حتى يرجع أخوه ورجعي وياه.

أسن : وإيساف شيخلصني منه ثبرني البارحة ونام ضايج..

أسمار : يلا ماظل شي ونرجع نعيش سوى مثل قبل بس راح افتقد ماما وبابا شلون راح يعوفونا ويسافرون مايصير تلغوها بابا !!!

عارف : ذبيت دم گلبي على هاي السفرة واغلب اغراض البيت بعناهم يبقى البيت اشوف شوكت يتأجر هذا الدلال ما رجعلي خبر بعد..

أسمار : على الخير ان شاءالله ولو راح افتقدكم هواي بس شسوي بعد.

أناهيد : هسه تنسينا مثلما خالتج نستنا وصارت من ال الغريب.

أسن : ها اناهيد قلبتي علية هالمرة..

أناهيد : لا عيني الله يسعدكم..

أسن : امين يلا سمرة منتظرينا الولد عيب منهم.

أسمار : اي صدك يلا ، باي

أناهيد : ديري بالج

أسمار : ان شاءالله.

خالة سلمت عليهم وطلعنا سلمنا نزل أديم صافح بابا وحضنه ، حجى بابا وياه بعدين اخذه ناحية سيارتي فتحتها صعد أديم ، خالتي صعدت وية أسمر وراحوا واني رحت صعدت سديت الباب وهمست.

أسمار : صباح الخير نورت حياتي و سيارتي.

التفت علية مرجع راسه للكشن وكال..

أديم : صباحج قبلات مشتاقة من فم أديمج ، شنو هذا ابوج مستعجل يصعدني عبالي افوت بالبيت اسلم عليك بطريقتي ونتريك سوى ونروح.

أسمار : ما متريك؟؟

أديم : لا وين اجيت بوجهي حتى جاي ما شارب.

أسمار : يلا ننزل نتريك ونروح اصلا بعد وقت.

أديم : لا لا عيب بعد وزحمة عود اخذج يمي بالمزرعة واعرف شلون اطلع الفرق ..

أسمار : أديم صير حباب وعاقل.

أديم : اني خوش ولد لحد الان وجداً مؤدب ..

أسمار : هسه انت يعني بقمة أدبك.

أديم : ورشدي.

أسمار : يعني راح تتخبل علية.

حجيتها وضحكت.

أديم : والله انتِ تتحارشين فد وحدة اويلي منج.

أسمار : قابل اني وكعت نفسي بحضن واحد حتى بس اتنفس عطره واتلمس بشرته.

أديم : حبيت العمى بسبب هالموقف هذا وكلت كون اظل طول عمري اعمى بس تصيرين بحضني..

حجاها وضحك..

عليمن اصفن على السمار على الضحكة على الاناقة لو على عروق ايده البارزة اليوم اول مرة اشوفه يلبس تيشيرت نص ردن جان ضاب عليه لأن سمنان..

أديم : سمرة..

أسمار : ها عيونها.

أديم : كافي تباوعين علية حسبتي حتى مسامات جلدي.

حجاها بغرور حسيت رجعت ثقته بنفسه لهذا فرحت...

شغلت سيارتي وهمست.

أسمار : يحقلك الغرور..

أديم : مغرور بيج وحك ربج وعظمته اللي صورج وخلقج بأبهى صورة ، هاي الصورة اللي خلتني ما أعرف طعم النوم ولا اجربه..

أسمار : تقعني يعني ماجنت تنام.

أديم : وداعة ابني ما نايم من يوم اللي تركنا بس جنت انام من التعب والتفكير بدون ما احس يعني مو رغبة بالنوم.

أسمار : تنذكر ما تنعاد.

أديم : يارب ياحبيبتي ..

ظلينا نحجي الطريق كله قبل لا نوصل للمكان القاصديه ، وكفنا جان الشارع مزدحم بأثناء حجينا هو ابتسم ، لزمت ايده وضغطت عليها وهمست.

أسمار : حبيبي من تبتسم واريد ارجعلك الابتسامة راح اضغط على ايدك برقة معناها اني هم ابتسمت ورديتلك الابتسامة..

أديم : بلغة المكفوفين؟

أسمار : اي ياحبيبي.

أديم : هذا هو بعد كل شوية ابتسم بسبب وبدون سبب حتى تغمرني ايدج بعطفج وحنانج.

أسمار : بدون ما تطلب راح اغمرك بيه..

أديم : شنو مسوي اني وانرزقت بيج يمكن باري امي وابوية بشكل خارج عن الطبيعي لو اجيتيني تعويض حق صبري ومعاناتي.

أسمار : انتِ هم تعويض لصبري ولحياتي الضاعت مني ..

أديم : انتِ متفضلة علية وهذا فضلج طول عمري ما راح انساه.

أسمار : يافضل أديم شبيك.

أديم : لأن قبلتي بية.

أسمار : اذا راح تعيد هذا الحجي يكون فراق بيني وبينك.

التفت علية مبتسم.

أديم : تتحملين بعدي؟

لزمت ايده بقوة وابتسمت..

أسمار : ما اكدر ولا راح اكدر انت سحرتني ، بيك سر عجيب شنو ما اعرفه.

أديم : عوض ربي انتِ..

أسمار : حبيبي.

وصلنا للمحل مال أثاث ونزلنا بعدما دليته الطريق دخلنا للمحل مشينا واوصفله غرف النوم والوانهم ، تقرب مني وهمس..

أديم : عوضي.

صفنت شنو عوضي ، بعدين عرفت معناها العوض مالتي..

أسمار : عيوني كول اسمعك.

أديم : اختاري شنو تحبين واللي يعجبج لا تتقيدين بية ابد..

أسمار : ذوقي على ذوقك يلا نشتري الشي.

أديم : عوضي عيوني انتِ اختاري اني اول وتالي.

قاطعته وخليت اصبعي على شفايفه عكد حاجبه مستغرب لردة فعلي لأن بوسط محل هيج سويت سحب ايدي بخفة وهمس.

أديم : لا تعيديها بعد بوسط الناس.

أسمار : بس اني وانت ماكو احد غيرنا

أديم : حتى لو ما تعرفين وين واكفيلج

أسمار : تمام بس انت هم بعد لا كل حجاية والثانية تكول ما اشوف والاثاث بس على ذوقج صدكني ابطل وبعد ما اشتري..

أديم : لا يلا نتشارك الذوق وامري لله.

أسمار : شنو تحب انت؟؟

أديم : ذوقي كلاسيكي قديم ، يميل للأنتيكة ..

أسمار : نتشارك الذوق والأفكار اني نفس الشي هذا هو راح اختار هاي الغرفة..

وصفتها اله جانت لونها اسود ومحددة بلون بيجي حجزناها دفعنا عربون وطلعنا صعدنا السيارة رحنا على اهل الستائر كصينا للبيت كله ، اختاريتهن لون جوكر يرهم وية كل ألوان الاثاث حتى ما اتقيد..

بعدها طلعنا اشترينا تخم للأستقبال، ظلت كم شغلة بسيطة اتفقنا نروح غير يوم نشتريهن وية اثاث المطبخ..

رحنا لمطعم قريب وكعدنا طلبت اكل على ذوقي ، اكلنا وضحكاتنا ترست المكان ، جنا منطلقين ونحجي ونخطط ، طلب مني البس بدلة رفضت بالبداية بعد اصراره اقترحت عليه البس فستان طويل لونه ابيض يميل للبدلة اقتنع ، وكال.

أديم : ما اريد اخلي شي بنفسج عاجبني اعيشج شعور بعمرج ما عايشته عاجبني اجيبلج الجنة لو اكدر ..

أسمار : ابقى انت بهاي السعادة والضحكة المرسومة على وجهك صدكني هاي الجنة بالنسبة الية.

أديم : لج احبج.

أسمار : يحتاج اكولك شكد احبك اني؟

أديم : يحتاج كل شوية تنطيني جرعة وطاقة اعيش بيها ايامي بفرح وسعادة.

أسمار : تتدلل احبك ياعمري.

أديم : عوضي وأجمل عوض..

ظلينا نتغزل واحد بالثاني بعدها شربنا جاي وطلعنا ، صعدنا بالسيارة مشيت شوية استغربت سكوته التفتت ناحيته لكيته غاط بنوم عميق وراسه صاير يم الجامة خفت عليه لا ينضرب كلت اخفف السيارة وامشي على كيف او اطبك بمكان معين ، دست البريك ما ييجي رجعت دست مرة ثانية نفس الشي ، تخبلت ردت احلها بدون ما اسببله ذعر بس ارتباكي وشهكات الخوف ظهرت على صوتي بدون وعي مني ، سمعته بقلق يكول.

أديم : شنو حبيبتي شبيج ؟؟

بخوف همست..

أسمار : حبيبي السيارة ما كاعد اكدر اخفف سرعتها البريك ما اعرف شنو بيه؟

أديم : على كيفج لا تخافين ارفعي رجليج ودوسي على البريك على كيف.

أسمار : كاعد ادوس ماكو ماكو..

كمت اضغط بكل قوتي واضرب بعصبية على الستيرن..

أديم : حبيبتي اهدأي على كيفج لا تخافين اني يمج .

أسمار: أديم راح نموت...

أديم : لا لا البسي حزام الأمان بسرعة وحاولي تاخذين سايد اليمين واذا شفتي طريق ترابي فوتي بيه.

أسمار : واذا انگلبت السيارة بينا شلون ؟؟؟

أديم : لا راح تخف السرعة احسن ما نفوت بنص السيارات سوي الاكوله الج..

بعدها طلع موبايله لا على التعين صار يدوس بالموبايل حتى يتصل اسمعه يكول.

أديم : لك أسمر دبروا مكيدة لأخوك ، هو وسمرة ما خلوه يفرح بيها ، لاعبين بالسيارة وخرج الوضع عن السيطرة اذا صار بية شي عينك على أمي وابني امانة دير بالك عليهم ولا تنسون أفنان وبنتها ...

من سمعته هيج يحجي انهارت اعصابي وظليت ابجي سمعته يتشاهد اني هم تشاهدت وفقدت السيطرة طبيت بأول سيارة كدامي ...

اخر شي سمعته قبل لا يغمى عليه صوته الضعيف من يكول..

أديم : من عمري على عمرج بس يطلعوج سالمة...

يتبع....

صباح الخير ومتابعة ممتعة...