رواية أحببتُ ذلك الغريب الفصل الحادي وأربعون 41 - بقلم عبير إدريس

صباح الخير
وكل عام وانتوا بالف خير حبايب..
ياريت بدون دعاء وبدون تجاوز الله يخليكم...
________

غرغرت عيوني واني اسمع كلامه واشوف الدهشة مرسومة على ملامحه وعيونه اللي يحاول يفتح ويغمضها سريع ..

بلعت ريكي ودعيت ربي اللي نعيشه بهذه اللحظة حقيقة و واقع مو حلم ، رفعت ايدي تلمست وجهه باصابعي غمض عيونه ورفع نفسه يعدل كعدته..

همست بصوت مخنوك اريد ابجي..

أسمار : اول ما فتحت عيونك شفتني لو شنو وهذا واقع لو حلم الله عليك فهمني..

بصوت يرجف وإيد ما مسيطر على حركاتها كال..

أديم : اذا اللي شفته قبل شوية جان واقع مو حلم ، فهذا فضل كبير من ربي وحققه الية، تصدكين جنت بكل سجدة ادعي اشوفج ولو بس المحج وهذا هو وتبقى صورتج مطبوعة ببالي ..

سألت بدهشة..

أسمار : يعني شفتني؟

بضحكة همس...

أديم :  شفتج ..

أسمار : اوصفني يلا...

أديم : ماشفت بوضوح بس ميزت ملابسج ، لابسة ثوب ناعم اكمامه مفتوحة وقماشه من الستان لونه يشبه لون شعرج احمر غامق و بشرتج حلوة وعيونج احلى..

صوته امتزج بين القلق والخوف وعدم الرغبة بالتصديق لا يكون اللي شايفه حلم مو واقع..

بجيت وكمت من مكاني استندت بعكسي على المخدة ولزمت وجهه بثنين اديه وهمست بحب وعيوني غرقانة بدمعها..

أسمار : صحيح اني لابسة هذا اللون وانت شفتني حبيبي..

جانت نظرته مشتاقة لكل جزء مني ويتفحص ملامحي بدقة وكأنها هذه لحظاته الاخيرة وبعدها يفارق الحياة..

أديم : لمعة عيونج ورجفة شفايفج شايفهم ..

تلمس شفايفي دنك حضني بقوة وضمني لصدره ، تنهد وكال..

أديم : لا تعوفيني مهما بدر مني مهما سويت ، سمرة احبج حب ما اكدر اوصفه بيوم .

أسمار : وليش تحجي بالفراق منو كال اني اعوفك..

أديم :مشكلتي نحس و مزاجي وصعب المراس اعترف وممكن مرات أأذيج وما حاس بنفسي بس صدكيني احبج اكثر من نفسي ومن كلشي املكه.

أسمار : مستحيل اتركك مستحيل شفت فرحتي بيك هسه شفت دموعي شلون نزلت مجرد كلتلي شفتج هذا مو حب لو شنو تفسره ؟

أديم : شفت فرحتج ولمعة عيونج وابتسامتج المليانة خوف...

أسمار : وليش هسه متباوعلي ؟

أديم :ما اعرف بس رجع الظلام سيطر على عيوني ورجعت غرقت بيه .

حجاها يرجف بعدته برقة عني وكعدت بصفه..

أسمار : وهذا مؤشر جيد معناها اكو أمل كبير برجوع بصرك مو صحيح ؟ ثالث مرة تصير وياك هذه الحالة ، أديم ضروري اليوم نزور الطبيب.

أديم : دكتوري كلش زين وانسان فاهم نروحله وبعدها نسأل على دكتور غيره مثل ما تفضلتي واقترحتي علية قبل فترة.

أسمار : تمام مو مشكلة بس اهم شي نتطمن ويبرد كلبنا.

أديم :ممممم بس اني اريد ريوك جعت..

حجاها مبتسم..

مسحت عيوني وكمت لزمت كف ايده وسحبته وكف حضنته بقوة ورحنا للحمام غسلنا وتوجها للمطبخ ...

أسمار : اليوم الريوك علية انت بس اكعد..

ضحك مرر ايده بشعره وكال.

أديم : اللي يسمعج ياسمرة يكول كل يوم أديم مسوي الريوك وياج ومساعدج ..

أسمار : اي سويت اكثر من مرة ليش تنكر تعبك؟

ابتسم رحت لزمت ايده رديتله الابتسامة، اخذ ايدي باسها خلاها فوك قلبه باوع باتجاه وجهي تنهد وكال..

أديم : اوووف يا سمرة هيج وارجع اشوفج كل يوم الصبح ولج ما جنت متخيل بيوم من الايام ممكن اشوف وجهج فرحان ياالله..

أسمار : الله عليك شلوني؟ لأن شفتني بدون مكياج وشعري مخربط وعيوني لايصة بالكحل ...

أديم : اسكتي عمي لا تحجين على سمرتي لعلمج اجمل الجميلات هي.

أسمار : صدك نيالها ..

أديم : هي منو ؟

أسمار : سمرتك

أديم : وانتِ منو ؟

أسمار : سمرتك ..

ضحك وجرني لحضنه بادلته الحضن بعدها  وخرت ورحت اكمل الريوك...

تريكنا وتركت اكل الاولاد على جهة ، بعدما راح أديم للمكتب رحت كعدتهم ، غسلوا واجوي للمطبخ اكلوا وعيونهم نعسانة ويتثاوبون ، ظليت اشاقيهم واسولف وياهم حتى اصحصحهم.

وراها كملوا غيروا ملابسهم وطلعوا يلعبون برا...

خلصت شغل البيت وكل شوية اطل على أديم اشوفه اذا محتاج شي او لا وجنت اخذله بيدي عصائر او فواكه ، جان يرفض وارجع استبدلهم بقهوة حسب طلبه..

سويت الغدا تغدينا ونمنا شوية ، صار العصر أديم اتصل على أهاب حتى ياخذنا للدكتور مالته ، كال ماعنده شي اتصلنا على رقم العيادة وحجزنا ، غيرنا ملابسنا ورحنا..

بالطريق أديم وصى أهاب ما يحجي لأحد عن زيارتنا للدكتور واساسا الاخير ماعرف سبب الزيارة شنو وما حجينا عن التطور الملحوظ بعيون أديم عباله زيارة عادية ومجرد مراجعة حالها حال المرات السابقة..

اول ما وصلنا العيادة دخلنا...

وكف الدكتور مبتسم ورحب بأديم ، الاخير سلم عليه وعرفنا على بعض...

كعدنا وبلش أديم يحجيله التطورات اللي صارت وياه ، ارتسمت على ملامح الدكتور ابتسامة تفائل تبشر بخير ، بعدها شرحله الوضع وانطانا أمل برجوع بصره اذا شكه جان بمحله ، طلب مجموعة تحاليل واشعة ومفراس ومن تطلع النتائج نرجع للدكتور ويحدد اللي راح يصير.

رحنا اني وياه سوينا التحاليل وكل الاشياء اللي طلبها من عندنا الدكتور بعدها رجعنا للبيت وأهاب يتسائل شنو اللي استجد واحنا ساكتين جوابنا مجرد مراجعة عادية وبس..

ثاني يوم خابرونا على النتائج وهم رحنا بس بهذا اليوم ما اجى ويانا أهاب اضطرينا نروح وية أعقل جان جاي يمنا خطار ، من عرف طالعين تبرع هو يوصلنا خجلنا نكوله لا ، رحنا من وصلنا المختبر نزل ويانا اخذنا النتائج ورحنا للدكتور من دخلنا هو هم دخل ويانا ، تضايقت وضجت وحتى أديم بانت على ملامحه عدم الراحة..

كعدنا واخذ النتائج قراهم بضحكة كال..

_ ابو تميم كل الامور تبشر بخير اكدر اكولك مقدماً مبروك رجوع بصرك..

بشهكة أعقل كال.

أعقل : صدك دكتور ؟؟؟ شلون !!!كلامك صحيح لو جرعة تفائل هاي؟

التفت عليه وكال..

_ اي نعم كلامي صحيح والمرات السابقة اللي رجعله النظر بيها هاي علامات تبشر بخير..

أعقل : رجعله بصره هاي شوكت شو ماندري ؟

حجاها ويتلفت علية وعلى أديم ، بعدها كام من الكرسي وراحله حضنه وكام يبجي ويبوسه بعيونه ، للأمانة جان فرحان وحتى لحيته تبللت بالدموع بس اني داخلي ما مرتاح ابد..

بعدها طلب الدكتور منه يكعد بمكانه حتى يكمل شرح التفاصيل اللي راح نسويها..

_ اول شي نغير العلاج بعلاج ثاني هسه اكتبه ، ثاني شي نسوي العملية باقرب وقت ، حتى نمنع رجوع الشظية لمكانها الجانت مستقرة بيه ..

أديم : يعني عصب العين ما تلفان مثلما كالوا بالخارج..

_ لا الحمدلله موجود بس هذه العملية من اصعب العمليات راح تكون دير بالك وتحضرلها زين.

أديم : ليش يعني من اصعب العمليات شنو الفرق..

_ يراد راحة تامة ، ممنوع تتعصب الحالة النفسية جداً مهمة ، نجاح الجراحة ما تتوقف عند اجراءها فقط، بل اهتمامك  بصحتك بعد إجراء العملية وإتباعك تعليماتنا لان تعتبر عامل قوي في الشفاء...

أعقل: يعني مثل عملياته السابقة ؟

_ هو بشكل عام جراحات العيون من أدق الجراحات وهي قد تمثل ضغطاً نفسياً على المريض فى جميع مراحلها ، قبل وأثناء وبعد إجراء الجراحة، لأن الطبيب يتعامل مع جزء مهم فى جسم الإنسان يتوقف عليه حياة المريض وقدرته على الإبصار، وهذا يتطلب من المريض الحرص على تنفيذ تعليمات طبيبه المعالج.

أسمار : شنو الممنوعات دكتور حتى اعرف لان اني راح اكون المرافقة الاولى بالعملية وقبلها وبعدها..

ابتسم الدكتور وكال..

_البعد عن مصادر تلوث الجرح لمدة تتراوح من أسبوعين إلى ثلاثة.
- الحرص على عدم تعرض العين لأى كدمات أو صدمات،عدم التعرض للأتربة والأبخرة وأى مواد تعمل على تهييج العين لمدة تتراوح بين 4:3 أسابيع بعد العملية. عدم وصول مواد كيماوية للعين مثل الصابون.عدم فرك العين.
البعد عن التدخين أو الأمكنة التى يتم التدخين بيها لمدة شهر حتى لا تهيج العين وتلتهب.
اذا شعر المريض باحمرار غير عادي في العين أو ألم ملحوظ ،عليه مراجعتي  على الفور.اذا لاحظ تغيير فى قوة الإبصار  عليه التوجه مباشرة للعيادةو
انصح بوضعية نوم معينة بوقتها احددها..ضرورة الالتزام بالدواء اللي  اوصفه والاهتمام بـأخذه بمواعيده بانتظام
المتابعة وياية  خاصة فى الأيام الأولى من إجراء العملية إلى أن اطمئن على سلامة مريضنا العزيز...

أسمار : ان شاءالله دكتور نكون وياك خطوة بخطوة..

_ تمام ورقمي موجود عند ابو تميم اي شي تحتاجوه او سؤال يخطر ببالكم اني موجود فقط اتصلوا لأن جدا مهمة هذه العملية بالنسية الكم والية..

أديم : اكيد دكتور راح نتواصل وياك..

كملنا كلام ورجعنا للبيت فرحانين ، اول ما دخلنا شاع الخبر عن طريق أعقل ما كدرنا نحجي وياه ونبهه ما يحجي ، أديم بقى ساكت واني ماعندي جرأة احجي نيابة عنه وهو موجود ، كلت الله موجود وهي يسهل الأمور..

كلهم فرحوا خصوصا امه وأفنان كاموا يبجون اما بقية الولد اللي يركص واللي يهلهل والتموا داير مداير أديم شالوه ويفترون بيه بالمزرعة عدا أسمر اللي جان واكف ايده بجيوبه وابتسامة تعبانة مرسومة على وجهه ، بارك بنفس طافية وترك المكان...

على هذا الخبر إيساف قرر يسوي عزيمة كبيرة لكل الكرايب ، حددوا موعد عزموهم بيه ، جابوا الذبايح وطباخين تكفلوا بأمر الطبخ للحضور..

بعدما صبينا الغدا وتغدوا الخطار، قسم جبير طلعوا بقوا فقط البنات وامهاتهم، جانت لمة جبيرة لهذا بقينا كلنا كاعدين بالصالون مال البيت الجبير ...

كلهم يحجون ويخططون شنو راح يسوون بالعيد وشنو  يجددون بنفسهم..

اني جنت ملتهية اسولف وية صبا وريما وبالي ابد مو يم البقية شنو يحجون لأن ما احب هيج تفاصيل ، وحدة من البنات سألتني..

_ وانتِ أسمار ماراح تغيرين لون شعرج؟

سألتني بصوت عالي بس اني ما انتبهت الها وجنت مندمجة وية البنات واسولف ، بعدين وحدة ثانية جاوبتها ، كالت ..

_ وعلى شنو تغير هو وين يشوفها لو تبقى طول العمر بدون حفافة ما راح يحس بيها...

الثانية جاوبتها..

_ اي عفية نيالها حلو احساس وحدة تاخذلها اعمى على الاقل ما يخونها ويمكن هذا السبب الرئيسي اللي أسمار قبلت تتزوجه وهو تجربة ثانية بأعتبار الأولى فشلت بسبب الخيانة..

اني هذا كله ما جنت مركزة بيه حجتلي ريما بعدما جاوبتهم اني..

_ أسمار شتكولين مو صح الكلام ؟

ضحكت وية صبا والتفتت عليها وسألتها..

أسمار : شنو ؟

_ شعرج تغيريه لو كلامنا صحيح..

هم قبل فترة كالوا على شعري لونه حلو وابقي عليه لا تغيريه واني توقعت انعاد نفس الحديث وابدوا الرأي السابق نفسه لهذا جاوبت..

أسمار : اي صحيح..

حجيتها وضحكت وية البنات...

ريما : هو شنو صحيح انتِ تدرين شنو جانوا يحجون؟

أسمار : لا هوسة وكلشي مافهمت بس اختصار كلت اي صحيح على رأيهم السابق بشعري..

ريما : بس الكلام جان جارح ويخص علاقتج بأديم..

عكدت حاجبي وهمست..

أسمار : شنو يعني مافهمت علاقتي بأديم شجابها بوسط حديث البنات وتحضيراتهم للعيد ؟ شنو حجوا بله ؟

سردتلي تفاصيل الحديث فتحت عيوني والتفتت على صبا سألتها

أسمار : سمعتي شي من اللي كالته ريما؟

صبا : لا ابد اللي سمعته حجي على تحضيرات الشعر والصالون وبس ماسمعت شي يخص علاقتكم جان نبهتج..

ريما : قابل اكذب ، والصراحة ما حبيت ردج هسه كلهم ياخذون فكرة انو أسمار اخذته وقبلت بيه لان اعمى وما راح يخونها وهسه يطش الخبر وكولي كالت ريما ، المنافقات لازمات ابواق ويكيفن على هيج شي يردحن عليه..

أسمار : خلي يحجون اهم شي عندي أديم اوضحله الفكرة اذا وصلته ومتأكدة  يصدكني لأن يعرف مستحيل انطي بيه بيني وبين نفسي عاد كدام الناس..

صبا : وهذا رأيي هم.

ضجت واختنكت اول مرة اجاوب على حديث واني ما سامعته من البداية..

ما خليته بالحسبان وراح الموقف من بالي ، راحوا الخطار نظفنا البيت ، بالليل اجه أسمر جمعنا كلنا و توسط الكعدة وكال..

أسمر : عرفت منو ورا الحادث اللي تدبر لأديم وأسمار قبل عرسهم..

إيساف : منو؟

أسمر : لؤي..

أبسل : لؤي ؟ شلون عرفت.

أرقم : احم م م م .

الاخير ظل يتحمحم ، ويكح كام للمطبخ شرب مي وجابه وياه وكعد..

أسمر : شلون عرفت خليها بس المهم اريد اوصل للي متفق وياه .

إيساف : منو متفق وياه؟ مافهمت.

أسمر : صارلهم اسبوع يحاولون يخلوه يقر وعبالي يعترف على الشخص اللي متفق وياه يلا اجي احجيلكم بس رافض ينطي اسمه ومصر على الرفض ، راح يستمرون يحققون وان شاءالله نعرفه..

إيساف : ان شاءالله خليك ورا الموضوع وهسه واحد يجر الثاني ونعرفهم كلهم..

أسمر : اي لأن هذا جبان ما اتوقع وحده مسويها..

إيساف : وهذا رأيي.

التفت على أديم وسأله.

أيساف : أديم وانت شنو رأيك ؟

جاوب بخشونة ..

أديم : رأيي بشنو ؟

إيساف : باللي سمعته ..

أديم : شي متوقع..

إيساف : بيك شي؟

أديم : تصبحون على خير..

ترك الكعدة وكام مشى خارج البيت كمت وراه اخذت كف ايده حتى اساعده سحبه مني ، وكف التفتت عليه مستغربة تصلب فكه وبنبرة خشنة كال..

أديم : اندل بيتي ما محتاج مساعدة .

بلعت ريكي مستغربة اسلوبه الجديد ، جريت نفس وزفرته...

دلك رقبته وصار يحجي بكلمات ما مفهومة ، مشى باتجاه البيت وجان عصبي حسيت النار مشتعلة بداخله وراح تتحول علاقتنا لرماد بس يحاول قدر الامكان يبين كدامي ثابت ومابيه شي..

دخل للبيت دخلت وراه سديت الباب وتوجهت للحمام غسلت وجهي ورجعت لغرفتي لكيته واكف بباب الغرفة من وصلت يمه تلمسني بايده وصل لعكسي لزمه...

أديم : شعندج كاعدة بنصهم ؟

أسمار : بنص منو ؟.

أديم : ********** اخواني.

فشر بعدها ذكرهم..

أسمار : وين الغريب بالموضوع كل مرة نكعد سوه ليش انت مانعني قبل وهسه خالفتك؟

أديم : واذا كلت ماتروحين هناك بعد تسمعين كلامي..

أسمار : لا طبعاً لان عيب وماكو سبب قوي ومقنع حتى اقاطعهم واللي تحجي عنهم اهلك...

أديم : وزوجج ماعاد لرأيه أهمية ولا له وجود بحياتج..

أسمار : شو طريقتك بالكلام جديدة واسلوبك جديد ممكن توضحلي سبب التغيير المفاجئ لأن دخت بهاي الكم دقيقة اللي حجينا بيها واني ادور لسبب تغيرك ومالكيت..

أديم : اي اعمى ويدور مشاكل وغثيث وخلف الله عليج قبلتي تتزوجيه..

انهارت اعصابي وعطت بصوت عالي..

أسمار : كافي تشفق على نفسك وتعيد بالحجي تعرف كلش زين اني ما افكر هيج الف مرة كلت اني احبك اني اريدك اني قابلة بيك وانت بهذا الحال ليش مصر تخلي حواجز تقطع بيها علاقتنا..

أديم : رهيبة بالكلام ومقنعة الصراحة..

أسمار: حبيبي ليش تغيرت اريد افهم اني شنو سويت من خطأ حتى تحجي وياية بهيج اسلوب و نبرة استهزائية ؟

جاوبني ساخط من كلامي..

أديم : لج حبيتج مثل الطفل المهووس بأمه وتالي تطلعين شي بعيد هووواي عن الحقيقة اللي قنعتيني بيها ؟

سحبت كرسي كعدت عليه تفادياً من الانهيار اللي ممكن اتعرضله واوكع واني استمع لكلامه الجارح وصوته الحاد.

أسمار : احجي وياية طك بطك بدون تلميح رجائاً.

أديم : ومنو انتِ وألمحلج او اعيرلج اي اهمية..

أسمار : هيج صارت أديم ؟

أديم : انقهرتي مو ؟ من سمعتي لزموه .

حجاها عاكد حاجبه ويريد ياكلني بعصبيته وملامحه الحارة..

أسمار : هو منو ؟

أديم : الحب القديم.

أسمار : ماعندي قديم بس انت القديم والجديد.

دار راسه للجهة البعيدة وضحك ..

تركني دخل للغرفة سحب الغطا والمخدة وطلع باتجاه الإستقبال واني صافنة على حركاته وتصرفاته الغير مدروسة ، دخلت غرفتي غيرت ملابسي وجنت اراقبه من بعيد شلون نام على القنفة وتغطى ، تركته يهدأ بعد مرور ساعة ضبط رحتله ...

خليت ايدي على كصته دنكت بستها ما شفت منه ردة فعل للرفض فتحت الغطا وقررت انام يمه ...

جاوبني بحده..

أديم : وين ؟

أسمار : انام ..

أديم : تركتلج فراشي والغرفة ما كفوج؟

أسمار: اجيت حتى اكولك هذا مو مكانك ، مكانك بغرفتك وبحضني..

أديم: ماكو شي يجمعنا بعد اليوم لا فراش ولا مكان ولا حتى كلمة..

ارتديت ليورا واني اسمع التجريح والاهانة بكلامه نزلت دموعي صوتي رجف وهمست..

أسمار : بس انت وعدتني ما تتركني انام بعيدة عن حضنك ، اشتاقلك والليل طويل شلون يخلص واني وياك بنفس المكان بس مفترقين..

بتوتر مرر ايده بشعره ، حسيته تعبان لدرجة العذاب ، وقرر يعذبني وياه..

أديم :انتِ اخر اهتماماتي واخر ما افكر بيه احساسج ومشاعرج ..

أسمار : تكذب..

أديم : اخر اهتماماتي صدكيني...

أسمار : حتى لو تحجي هيج تبقى انت اول اهتماماتي...

قاطعني بطريقة وحشية وكال..

أديم : اسكتي اي كلمة ثانية ما اريد اسمع لا تسوين روحج الزوجة المحبة اللي تقلقها صحة زوجها ووضعيته..

أسمار : طبعاً زوجة محبة ومهتمة منو فهمك غير هذا الشي..

أديم : فاركي وجهي أسمار وخلي الليلة تعدي على خير..

تركته والدموع تجري على خدي ، تخبلت ليش هيج تغير شنو السبب عصرت دماغي ما اتذكر اني غثيته بشي او سمعته كلام يقهر او حتى تعاجزت من شي طلبه مني..

كعدت بالكاع قريب منه و صوت شهكاتي مسموعة ، فزيت من عاط بصوت عالي..

أديم : صوتج اريد انام ..

رجعت يمه وكفت وانفاسي عالية طلعت مني آه حارة واني اهمس باسمه واريد بس يجاوبني..

أسمار : أديمي حبيبي شنو سويت اني حباب بس فهمني لا تعاقبني بدون ما اعرف سبب عقابي ..

أديم : روحي نامي.

أسمار : ما انام بدونك مستحيل ، احلفك بحبنا لا تهجرني بدون سبب مقنع وتخليني اعاني حرمان حبك وحنانك..

جاوبني بصوت مليان كراهية للنفس والمقابل ..

أديم : اذا على حقج كزوجة راح أأديه غيره لا تطلبين أكثر، ولو اعمى وعاجز عن رؤية التفاصيل سواء غيرتي شي من نفسج او لا بس اكدر اوفي بالغرض وراح اكون كدها وشفتي بعينج وخليتج تحسين برجولتي صح ؟ مع العلم باقي الشغلات فشلت بيها سواء بشوفتج بطلعتج وياية ما اكدر اسوق وانتِ بصفي لازم واحد يوصلنا واذا احد تعرضلج ما اكدر احمي شعرة وحدة من خصلات شعرج..

أسمار : ابقى عيد وزيد بهذا الكلام واحرك كلبي وأذيني وما دام عمليتك تقربت احرك بروحك وتعصب بسبب ومن دون سبب حتى تفشل حالها حال سابقاتها..

ضحك مستهزء  ..

أديم : اووو يارنة العذاب اللي سامعها بصوتج اللي يسمعج يكول شكد مهتمة.

أسمار : مهتمة واريد رجال يوكف بوجهي ويكول عكس هالشي.

ترك الغطا بعصبية تقرب مني وكف كبالي وكال.

أديم : اني اكول يلا شنو تسوين ؟

لويت رقبتي بتعب كلت.

أسمار : بهذا كلامك كأنه كسرت اضلع من ضلوعي هيج الوجع حاسته بصدري ، أديم اني حبيبتك ما استاهل هاي المعاملة ..

اديم : عجل روحي من وجهي ولا تسمعيني صوتج حتى ما تتكسرلج ضلوع ثانية..

تحديته بنبرة حادة كلت..

أسمار : تمام بس اريد حقوقي كزوجة ممنوع تتركني ليلة وحدة انام وحدي اذا جنت عاجز تأدي واجباتك ناحيتي كزوج كامل مثل ما تفضلت ، على الاقل ادي هذا الحق..

رفع حواجبه مستغرب جوابي بهت ، اكفهرت ملامحه ارتفعت تفاحة أديم ورجعت انخفضت واني اراقب بيه ما حسيته غير يجرني ويشمرني بجهة القنفة انضربت براسي طلعت مني اه مسموعة ما سألني شنو بية ولا حتى أهتم، انتقم مني بطريقته، صار يهمس بأذني كلمات لو ميتة ولا سامعتها ، عاملني ببشاعة خصوصا بطريقة وصفه للعلاقة والي وشنو شعوره ويايه وشكد كاره هذا الشي ..

دفعته ردت اكوم سمعت رنة العذاب بصوته وهو يحاول يعتذر عن تصرفه ..

تركته اخذت ملابسي و دخلت للحمام..

بجيت ولطمت على وجهي ، بعدها كعدت جوا المي احاول اتذكر سبب هذا التغيير ويامن ملتقي احد حاجي براسه شنو ممكن يكون ماتذكرت شي ولا خطر ببالي وماشفت غير صورته الاخيرة انطبعت ابالي حاولت امسحها ماكدرت..

دخلت غرفتي مددت والحركة بداخلي ، بجيت بشهكات حسيت بيها روحي طلعت ، سمعت صوت المي بالحمام ، دخل يسبح ،ورا ربع ساعة دخل للغرفة تحسس طريقه اخذ ملابسه وطلع بدون ما ينطق كلمة وحدة..

بقيت كاعدة للصبح طلعت الشمس واحتلت كل مكان بالغرفة واني على كعدتي اهز بروحي وحاضنة نفسي مثل الطفل الخايف ، اول مرة انكسر هيج كسرة قوية ، بعمري ما انهانيت مثل هاي الاهانة ...

كمت اردد بيني وبين نفسي اني ما استحق هيج معاملة اني مو هيج أسمار اخذي ابنج واتركي كلشي طز بيهم ، عوفيه ماعرف قدرج وقيمتج ، الى أن سمعت صوت هوسة من البيت الكبير  فزيت وكمت لبست ملابسي على السريع وطلعت لكيته متوجه للباب يريد يطلع تركته وطلعت من وصلت لكيت إيساف شايل خالتي وهي تنزف ، تخبلت بقيت اسأل بيهم شكو شبيها محد يجاوبني ، ما باوعت لنفسي شنو لابسة صعدت السيارة وياهم ، كعدت ليورا اني وخالتي وإيساف وليكدام أهاب وأحمد ، ..

بالطريق اباوع للأرضية مال السيارة اللي جواها مليانة دم وارجع اباوع عليها وجهها اصفر وتتلوة من الألم سألت إيساف ما يجاوبني حاير بخالتي جان لازم وجهه وحاضنه بيده خلاها على كتفه ويستعجل بالولد ، وصلنا للمستشفى اخذوها من عندنا ودخلوها للطوارئ بعد الفحوصات حولوها سونار من اخذنالها طلع الطفل ميت ، لطمت وجهي إيساف داخ راد يوكع  لزم الحايط واستند على اخوانه ..

الدكتورة كالت لازم نسويلها كورتاج وسألت قبل كم ساعة اكلت لأن لازم اقل شي ٨ ساعات تقطع الاكل ، كال إيساف ست ساعات ، جاوبته..

_ بعد ساعتين ندخلها والله يعوضكم خير.

إيساف : دكتورة هسه اني مصدوم شلون هيج صار كلشي مابيها البارحة تسولف وتضحك ...

_ هذا بعد مكتوب..

إيساف : بس غير المفروض اكو سبب معين مو هيج مابيها شي ويموت الطفل غفل ...

_ عزيزي الطفل ميت والسبب نعرفه بعد الاجهاض..

حجتها تركتنا وراحت ، الصدمة اللي اني بيها بسبب أديم وهسه خالتي ما خلتني حتى احجي وية إيساف او  اخفف عنه ظليت كاعدة بمكاني...

مرت الساعتين واخذوا خالتي لغرفة العمليات ، اجهضت الطفل وطلعوها لغرفة عادية دخلنا يمها ، وضعها يقهر بشرتها صفرة وباهتة والوجه ذبلان والايد ترجف ، فتحت عيونها باوعتلنا نزلت دمعة ورجعت غمضت ...

بقينا كاعدين يمها ، ما فتحت ابد ولا حجت ويانا بس ادري بيها كاعدة، إيساف واكف يم راسها ويحجي وياها ويقرا ايات،، اعصابه ترجف ويبين الثبات كدامها حتى يمدها بالقوة اللي هو محتاجها..

من طلعنا بالطريق سألني عنها شنو اكلت شنو سوت جنت اجاوب بما ادري بس همست ..

أسمار : اخاف تعبت من العزيمة.

إيساف: ما خليتها تسوي شي وجبرتها تصعد فوك تكعد واسأليها ..

أسمار : صحيح قليل شفتها جوة ..

إيساف : لهذا مستغرب شلون هيج صار.

سكتت وبعد ماجاوبت بالي تعبان ونفسيتي تعبانة بعد اكثر..

وصلنا للبيت دخلنا وتلكونا البنات ، والحجية ، جانوا يحجون واني بالي يم خالتي وصحتها ماجنت اسمعهم ، رحت ساعدت إيساف ونيمناها بغرفة أفنان، صعدت فوك حتى اجيبلها ملابس ، خجلت افوت وبنفس الوقت كلت اخاف اكو شغلات خاصة بيهم ما يحبون احد يشوفها ، رجعت نزلت وطلبت من إيساف يصعد وياية ، باوعلي عاكد حاجبه بصوت تعبان كال..

إيساف : بوية غرفتج هاي اخذي راحتج..

أسمار : لا عفية اذا تكدر انت اصعد وياية او انت جيبلها..

إيساف : ماشي هسه اني صاعد اسبح و اغير ملابسي كلها ريحة دم واجيبلها بدربي.

أسمار : راح اصعد وياك انطيني ملابسها وانت اسبح وبدل براحتك لأن اعرف خالتي ما تتحمل الملابس اللي بيها ريحة المستشفى..

صعدت قبله من وصلت الممر اللي يودينا للغرف سمعت طبكة باب بس ما ميزت ياباب بيهن ، قريب لا اوصل غرفتها باوعت زوجة أرقم جاية من جهة باب خالتي ، استغربت غرفتها من الجهة الثانية وبعيدة عن غرفة إيساف وأسن شجابها هنا كلت احتمال تنظف غرف الولد ، ما اهتميت..

دخل أيساف واني انتظرت برا ، نطاني الملابس ، اخذتهن ونزلت ..

غيرت ملابس خالتي وأفنان جابت الاكل ردنا نوكلها رفضت جانت بس تبجي ، اني واقنع بيها على الأكل سمعت صوته من وراية هزني هز وهو يتحمد لخالتي على سلامتها ويسلم على الموجودين ومتجاهل وجودي..

أديم : حمدلله على سلامتج خالتي الغالية أجر وعافية ان شاءالله ..

بتعب جاوبته.

أسن : الله يسلمك ابو تميم ويبعد عنك السوء ..

أديم : الله يخليج .

كعد على الكرسي ،تقربت مني أفنان سألتني اذا متريكين او لا، رفعت راسي بتعب وهمست.

أسمار : كعدنا على صوت الهوسة ، اخوج ما متريك ريكيه عنده علاج..

أفنان : وانتِ ؟

أسمار : ما اريد رحم الله والديج..

أفنان : والديج الرحمة..

قطع كلامنا إيساف من تقرب وبصوت حاد كال..

إيساف : أسن هذا شنو ؟

باوعت على ايديه شايل علبة ادوية وكيس ثاني ماعرفت شنو بيه..

يتبع...