رواية أحببتُ ذلك الغريب الفصل الأربعون 40 - بقلم عبير إدريس

اصدق حب عندما تحب انساناً
ولا تعرف لماذا احببتهُ

____________

التفتت على الصوت باوعت بنية غريبة اول مرة اشوفها بنبرة تعالي كالت...

_ انتوا شنو واكفين هنا سوية هو يتغزل بيج وانتِ فرحانة..

ظليت صافنة عليها وعلى خباثتها وصوتها العالي ليش تريد تفضحني ..

_ مو وياج جاوبيني؟

على صوتها التموا الاقارب وكثرت التساؤولات واني صافنة عليهم واردد بداخلي هاي شكو شبيهم ، تركتهم ردت امشي حتى اخذ اولادي وارجع لبيتي اعشيهم وانيمهم وانام ، مجرد ما تحركت انجريت من ايدي التفتت لكيتها هي نفسها تتنفس سريع وتريد تبجي جريت ايدي منها عاطت..

_ وين رايحة شعندج وية خطيبي احجي.

جريت نفس درت وجهي عنها باوعت أسمر جاي من بعيد ، اول ما وصل وسأل شكو ، تقربت منه وهمست..

أسمار : هاي السوقية شوفولها حل قبل لا يكعد أديم وتعكر مزاجه بخريطها التافه مثلها وهذا ابن عمك حطوله حد لو الأفضل تلزموه الباب لأن داس عتبة بيتكم وتعدى على حرمة أخوك.

عكد حاجبه باوعلي وباوعلهم..

أسمر : شنو السالفة شصاير ؟ ابو الحر شبيك وية ام اياس.

نطت خطيبته من يمها وكالت..

_ الهم ساعة واكفين سوية ويتغزلون ببعض وهي فرحانة وتضحكله.

أسمار : لج لا تشيلين حظج وبختج هو انتِ اول مرة اشوفج وهو ثاني مرة ومجرد سلام بينا حتى حجي ماعندي وياه شوكت صار غزل وضحك..

_ شنو تفسرين وكفتكم هاي..

هي تحجي والناس واكفة تتفرج وبين هوستهم صوتي ضايع بس حجيت ودافعت عن نفسي..

أسمار : اني بحالج واصلا منو انتِ واكعد ابررلج ، وخري من وجهي يلا..

تركتهم حتى اروح رجعت التفتت عليها من سمعتها عاطت بصوت عالي وكعدت بالكاع تلطم وتملخ بشعرها وخطيبها النذل واكف يمها ويهدأ بيها وهي تدفع بيه ...

توجهت لبيتي حتى الاولاد نسيتهم ردت بس اخلص من الهوسة والناس الهمجية اللي جانت تنم وتشيل بغيبتي من ضمن الكلام اللي حرك كلبي وحدة تكول طبعاً حلوة وتجنن اكيد تاخذ اعمى على فلوسه وهاي نتيجتها الخيانة..

تخبلت بس ماكدرت احجي شي وادافع وانزل نفسي اكثر..

عندي قانون بالحياة اللي يبرر هواي وصوته يعلى هذا غلطان ، اما اللي واثق من نفسه ويعرفها زين يترك الحمير تلقف بقايا البعير ، هذا مثل دارج عندنا...

وصلت لعتبة الباب توني افتح الباب وافوت سمعت صوت مرأة كبيرة وراية التفتت ابتسمت ، تقربت مني وكالت..

_ شلونج يمة..

تنهدت بصوت مخنوك كلت..

أسمار : الحمدلله خالة بخير..

_ عرفتيني ؟

أسمار : لا ولا صغراً بيج بس اول مرة اشوفج.

ضحكت وكالت..

_ بس اني اعرفج انتِ حبيبة أديم مو ؟

ارتسمت على شفايفي ابتسامة تعب.

أسمار : اي

_ مبين تحبيه هواي..

تنهدت وجريت نفس..

أسمار : اي.

_ لا تهتمين للصار اعتبريه ما صار ..

أسمار : تعبت يا خالة تعب والشكوى لله.

_ يراد صبر مادام جنة عمرة راح يأذوج..

عكدت حاجبي هزيت راسي مستفهمة..

أسمار : ليش يعني ؟

_ جار عليها ظلم ما جرى على جنة بسامراء وتحملت وصبرت لأجل عيون أديم وأفنان وهسه الدور عليج ومتأكدة راح تصبرين مثلها.

أسمار : شنو درجة القرابة بينج وبينهم؟

_ اني اختها لعمرة يعني خالة أديم.

أسمار : ياعيني تفضلي خالة ليش واكفة بالباب..

_ لا ياروحي اريدج سالمة عينج على أديم وحقج يرجعلج ما عليج منهم..

أسمار : حسبي الله ما اكول شي ثاني.

_ ما اريد اتدخل ولا اسأل بس شنو اللي صار اني متأكدة الغلط مو منج يايمة..

أسمار : جنا كاعدين بالحفلة زوجي تعب غفلة رجعنا للبيت اخذ علاجه ونام ، ظل بالي يم الاولاد طلعت اجيبهم حتى اعشيهم وينامون اول ما طلعت مشيت مسافة قليلة صار بوجهي ابو الحر ، شافني وكام يحجي حجي تافه حتى ما يسوى اذكره وما يهمني...

أديم : بس اني يهمني اسمعه..

التفتت عليه لكيته واكف بالباب ، رجلي ماتت بلعت ريكي وهمست..

أسمار : شوكت كعدت حبيبي..

ماجاوبني نزل الدرجات بمساعدة العكاز ، تقربت حتى اساعده سحب ايده مني ومشى ، خالته راحت وراه حجت وياه التزم الصمت ، وصل للمكان اللي اقام بيه الحفل ، وكف بالوسط ضرب العكاز بالكاع وبصوت عالي صاح..

أديم : ابو الحر، كلب وينك ؟

حجاها وكام يضرب العكاز بالكاع بصورة مستمرة الى أن وصل يمه أسمر وكال..

أسمر : هدأ نفسك سوينا وياه الواجب وطردناه..

أديم : لو تخابروه يرجع لو تاخذوني عليه..

أسمر : يولي جوة نعالك طردناه وعيونك

أديم : كلتلك حجاية وما تتثنى لو يرجع هسه لو تاخذوني لبيت عمي.

أسمر : خلص نروح لعمي حتى الحجي يصير كباله ..

أديم : ما يهمني لا عمك ولا غيره اريد ارجع حق زوجتي وبس..

أسمر : اللي تريده وياك احنا..

اخذوه وطلعوا كلهم رغم جان بالتراك بعده ، رافقهم أهاب وأحمد..

تقربت مني خالتي...

أسن : هاي وينج يمعودة شكد دورت ظل بالي وين رحتي.

أسمار : ماسمعتي بالهوسة الصارت ؟

أسن : سمعت ودورتج حتى تجين وتسمعين إيساف شسوة وعمل بيهم يابه برد كلبي..

أسمار : عاشت ايده ماقصر.

أسن : شبيهم غفل كبو عليج..

أسمار : هذا حظي ياخالة الحمدلله على كل حال ..

أسن : لا تخافين هسه يبرد كلبه ويجيج..

أسمار : خايفة عليه منهم ، بعده مريض ما مرتاح وطلعت هاي السالفة شلعوا كلبه الانذال..

أسن : الله يباوع لحالنا ويعيننا عليهم ..

أسمار : يارب..

أسن : الاولاد عشيتهم وغيرت ملابسهم وناموا بغرفة أفنان يم ميمونة..

أسمار : اف نسيتهم تدرين ، هي طلعتي جانت عليهم حتى ارجعهم للبيت .

أسن : يلا ماكو فرق بيني وبينج.

أسمار : تعاي كعدي انتِ هم تعبانة..

أسن : اريد اروح اسوي سونار احس بطني نازلة..

أسمار : ضروري انتِ من بعد التحليل مارحتي اصلاً..

أسن : صح مارحت..

جريت نفس وهمست..

أسمار : الله المعين.

أسن : ونعم بالله.

انتظرنا لحدما شحطت سياراتهم كبال المزرعة انفتح الباب ودخلوا ، أول واحد أحمد بعده أهاب وبعدين يلا دخلوا أديم وأسمر..

كمنا وتوجهنا الهم بس ماحجينا اي شي ، طلع إيساف وأعقل حجوا وية الولد حتى يفتهمون اللي صار ، أديم اشر على راسه عاكد حاجبه..

إيساف : تعال اكعد والبقية يحجولي ..

توجهوا للكراسي كعدوا وبدا أسمر يحجي بعدما طلب إيساف منه توضيح للي صار..

أسمر : اول ما وصلنا ما لكيناه رايح لبيت اهل خطيبته حتى يراضيها ، حجينا اللي صار وية عمي وهاي تفاصيل الحديث..

أديم : جاييك اليوم واريد تصير حكم بيني وبين ابنك واذا ما نصفتني ينهدر دمه واعتبره ما صار..

_ شنو صار تعال عمي اكعد وارتاح.

صاح على ولده يجيبون مي ويضيفونا رفضنا خصوصا أديم حتى ماقبل يكعد..

_ هسه اكعد ارتاح ..

أديم : اذا ما رجعت كرامة زوجتي هسه ما الية كعدة يمكم وحتى صلة الرحم اكطعها...

_ يجرالك بس اصبرلي شوية خليني افتهم شنو اللي صار؟

بدا أهاب يشرح الموقف حسب ما سمعناه من أديم واللي شفناه من وصلنا لمكان المشكلة...

إيساف : عمك شنو ردة فعله ؟

أسمر : كال حقكم وركبته الكم شنو تسوون سووا بيه بس حسبوا حسابي اني اب ...

إيساف : معناها ادبوه بدون ما تطلعون دمه.

أهاب : اي بالضبط.

إيساف : شنو الصار بعدين..

أسمر : خابروه اجى شاف سياراتنا بالباب راد يفلت طلعنا حاصرناه ودخلنا جوى ، أديم كف ردانه وجهلة كم بوكس معدل رتبله ملامحه ، اجى أهاب حددله شعره ، سواله تسريحة جديدة ، اني تذكرت دموع أسمار من نزلت وصدمتها ، وجهتله كم دفرة واخر شي خليناه يوقع تنازل عن الشراكة وية أديم مقابل ننطيه فلوسه كاملة بدون ما يوصل الشركة..

أعقل : يستاهل عاشت ايديكم ، بس اللي مصفني هو شريك أديم وشغلهم سوية ومن يوم يومهم اخوان شلون تطلع منه حركة قذرة ما كاعد افهم..

أهاب : حسب ما عرفت من مصادري الخاصة ..

قاطعه أسمر من ضحك التفت عليه وكاله انجب خليني أكمل ، رجع أهاب يحجي إيساف سأل أسمر..

إيساف: ليش تضحك اكو شي ما حجيتوه؟

أسمر : هذا اخوك فد واحد ماكو تكه..

إيساف : ليش شنو سوه ؟

أسمر : راح لسيارة ابو الحر فتشها وبعدين جاب موبايلاته ، جانن بصمة اخذ اصابعه وجربهن وحدة وحدة الى أن فتح وبدا يقرأ خليه هو يكولك شنو شاف..

إيساف : شنو شفت ؟

أهاب : محادثة وية سليم ..

قاطعة أديم من كال..

أديم : هذا مسؤول المالي شبيه ؟

أهاب : ها من هاي ، شوف يابة انت مو تغيبت عن الشركة وهذا ابو الحر وحده يشتغل شاف الرزق هواي طمع بحصتك راد يشتغل تزوير حتى يطلعوك من الشركة ، بس المشكلة انت ما رحت ابد ولا وصلت لهذا ما صارت فرصة يجون يمك يقرأولك وانت توقع الاوراق مأمن بيهم ما يغدروك، هذا جان الاتفاق، بس من شافوك مابيك امل توصل وهو مخابرك اكثر من مرة وانت وعدته تروح صارت سالفة الخطف واخرت مخططهم ، ابو الحر اقترح يشغل أسمار وياهم حتى تلزم شغلك وما راح تميز الحقيقي من المزيف ، وبهيج يضربون ضربتهم ويتخلصون منكم اثنينكم...

إيساف : ياكلاب ، زين اذا هيج نيتهم ليش سبب فضيحة لأسمار بالمزرعة..

أسمر : برأيي حتى يلهي أديم ويخليه يلتهي بسوالف الشك والغيرة ويتعب دماغه وذاك يبحث عن شغلة جديدة تعطله عن الشغل ويبقى هو ياخذ من ميزانية الشركة ما يدري كلها حساب وكتاب ..

إيساف : مادام نهيتوا كل العقود اللي بينكم هذا هو شوف شكد مختلس وطلعهم من حقه وانطيه الباقي، ولازم بوجود محامين الشركة..

أديم : اي طبعاً المحاميين حظروا كلشي والشغلة اصولية والتنازل صار بوجودهم.

إيساف : يستاهل مستعجل على كطع رزقه..

أهاب : ها وقريت شغلة ثانية خطيبته ضاحكة على عقله تكوله شنو أديم يبقى بالبيت وانت وحدك تشتغل حبيبي هذا تعبك اخذ الشركة كلها الك وهو طلعه هم اعمى وهم يتگلب عليك ، الجلبة بنت الجلب ..

إيساف : عقلها بعد، والتحفة شنو مجاوبها؟

أهاب : كايللها اني ما مستعد اجازف وافوت هيج فوتة ولد الغريب ياكلوني بس راح احاول بطريقة اتخلص منه لأن فعلاً بس اني اشتغل واتعب واني اللي وكفت الشركة وخليتها معروفة لأن أديم مجرد شاركني صارله الحادث والتهى بعد.

أديم :عجل شكد فگر اول ما شاركته عيوني راحت وحياتي انقلبت..

جنت اسمعهم وفرحانة باللي صار بس خايفة اذا دخلنا للبيت وبقينا وحدنا ، ردة فعله شلون تكون ، يلومني يضوج يزعل ما اعرف استأذنت منهم ورحت للبيت ، دخلت بوجهي للحمام سبحت على السريع وطلعت من دخلت غرفتي لكيته واكف همست..

أسمار : منتظرني ؟

على صوتي التفت فتح ايده واشرلي اروحله ، مشيت بخطوات مترددة..

وصلت يمه اخذني بحضنه...

حضنته قوي وهمست..

أسمار :خفت..

باس راسي وهمس..

أديم : ليش ؟

أسمار : من رحت وتركتني تخيلت النهاية راح تكون..

أديم :رجالج يجيب حقج ويرجع مو يتركج بسبب انسان بايع ضميره ومتخلي عن قيمته..

أسمار : ما توقعتك راح تتفهمني ..

أديم : اكو أمور نتباحثها بطريقة عقلانية ونشوف وين الصح وين الخطأ على اثرها يكون التصرف..

حضنته بقوة وهمست..

أسمار : يخليك ظهر وسند..

أديم : ياعيوني الثالثة..

تصاعد صدره وهبط بشكل سريع ، رفعت رجلي حتى اوصل لوجهه همست بكلمات غزل وتقصدت اخلي انفاسي تلفح وجهه..

أديم : هاي حرشة!!!

أسمار: تقريباً..

أديم : تعرفين شغلة راح احجيلج بس امنيتي تكون حقيقية مو وهم..

أسمار : شنو هي ؟

أديم : هو حلم لو واقع ما معروف بس حاسه واقع ما اعرف العلاج الجديد صار يسببلي هلوسة..

أسمار : شنو احجي حبيبي..

حجيتها متحمسة أعرف اللي كاعد افكر بيه نفس قصده لو لا..

أديم : من كعدت على صوتج تحجين ، جانت الغرفة ظلمة بس لمحت ضوء خفيف جاي من جوا الباب، ثواني وهذا الضوء راح ماشفت شي بعد.

شهكت وفتحت عيوني..

أسمار : شفت ضوء فايت من جوا الباب؟

أديم : اي والله حبيبتي..

أسمار : اصبر لحظة خليني استوعب ، انت شفت اكو ضوء جاي من برا ؟

أديم : اي هيج لمحة بعدين رجع الظلام يستوطن عالمي ، اتركج احتمال جنت احلم.

لزمت كفوف ايده ودنكت بستهم ، رجع اخذ ايدي وباسهم بنفس الطريقة..

أسمار : حبيبي ضروري نراجع دكتور ثاني غير دكتورك ودير بالك تحجي لأي احد على الصار...

أديم : ليش ؟

أسمار : راح يرجعون يأذوك لأن مو من مصلحتهم ترجع تشوف ، اول شي تكتشف مقتل شهد وخيانتها والخ ، واللي رايد يتخلص منك راح يغسل ايده بقاصر..

أديم : صحيح..

أسمار : ضروري نراجع دكتور جديد ماشي.

أديم : تمام تدللي..

بعدها استسلمنا للنوم من التعب ، ثاني يوم كعدنا تريكنا وسألته شنو اسوي غداء ، ارتفع صدره متنفس الصعداء رفع عيونه باتجاهي وكال..

أديم : مو ببالي شي شنو تسوين براحتج..

أسمار : بعدك ضايج ؟

سوه حركة بوجهه وكال ..

أديم : تقريباً..

أسمار : شايل هم الشغل؟

أديم : اذا مالكيت شريك اكدر اعتمد عليه ومدير مالي شاطر بدلاً من سليم ، راح تخسر الشركة مبالغ طائلة..

أسمار : شنو طبيعة الشغل تكدر ترشحلي..

أديم : ماكو داعي ادوخج وياية.

أسمار : منو كال ادوخ مستمتعة اصلا..

حجالي نبذة مختصرة عن شغله ودفع الكرسي وكام متحسس طريقه ، التفت علية وكال..

أديم : رايح للمكتب اذا احتاجيتي شي تعالي .

أسمار : تمام ياقلبي..

ترك المطبخ متلمس طريقه بواسطة الجدار ، مشيت وراه على بعد مسافة حتى اتأكد ما راح يرتطم بشي وصل سد الباب يلا رجعت للمطبخ..

سويت الغدا ورحت سبحت وبعدها مريت للمكتب ، لكيته حاط ايده على الميز ونايم عليها ، تقربت حس علية عدل كعدته..

أديم : ها حبيبتي..

أسمار : كاعد ؟

أديم : اي دخت شوية وكلت اغمض عيوني...

كعدت على الكرسي المقابيله..

أسمار : من جنت اشتغل وافكر بطبيعة شغلك ، اجتي ببالي فكرة وكلت عسى ولعل تفيدك.

أديم : وهي؟

أسمار : انت شلونك بالأمور المالية عدا الادارية؟

أديم : فوق الممتاز..

أسمار : زين تكدر تعلمني ؟

عكد حاجبه وراد يتهجم بالكلام ، سبقته بخطوة وهدأته قبل لا ينفجر..

أسمار : اساعدك خلف الكواليس يعني من البيت..

أديم : شلون ؟

أسمار : انت تداوم عادي واني هنا اكمل شغلات الشركة كلها عن طريق لابتوب الخاص بيك ، واي شي يوكف يمي راح اتصل واستعين بيك وتفهمني ونحل الخلل..

أديم : صعب عليج ولازم انجليزيتج قوية..

أسمار : طبعاً قوية اني ٣ سنوات ادرس طب اسنان شلون عبرت المراحل لو جنت ضعيفة باللغة..

أديم : بس هذا الشغل يراد خريج محاسبة مو هيج..

أسمار : اتعلم شوية شوية واجرب اذا كدرت افيدك بشي او لا..

أديم : ما اريد اتعبج اتركي الشغل واهتمي بية وبالبيت واهم شي ابنج لا تقصرين وياه.

أسمار : هذه من أولوياتي بس المهم عندي اساعدك بشغلك ولو لفترة بسيطة..

أديم : تمام افكر بالموضوع ونحجي بعدين..

اجته مكالمة ومبينة مهمة من رفع السماعة وتعابير وجهه تغيرت ، اشرلي بيده بمعنى اسكت ، بقى يحجي دقائق بعدها سده وفرك عيونه بتعب .

طلب يروح ينام ويرتاح همست..

أسمار : تمام اكعدك على الغدا؟

أديم : لا اكلي انتِ والاولاد بالعافية

أسمار : انتظرك من تكعد..

بدون ما يلتفت حرك ايده ليفوك بمعنى لا ، تركني ودخل الغرفة سد الباب معناها يريد ينفرد وحده ، بقيت كاعدة بالاستقبال ، فكرت اغيرله جو شنو الطريقة اللي تقلل عنده التفكير، فتحت التلفزيون وباوعت فيلم ببال شارد ، بعدها اندفع الباب دخلوا اياس وتميم ، اخذتهم للمطبخ صبيتلهم غداء وكعدوا ياكلون ، مرت الساعات واني اسولف وياهم واعلمهم على اشياء لازم يبتعدون عنها ويهزون براسهم ب اي ويضحكون بالخفاء بيناتهم ..

خلصوا وامرتهم ينامون الظهر ، ناموا واني رحت لغرفتي فتحت الباب علي كيفي لكيته نايم سديت الباب ورجعت للإستقبال ، كعدت ، صار المغرب صليت ورحت للمطبخ حضرت سلطة ، جان عندي رمان وأناناس سويت فطائر وخليت الصينية بالفرن ، بعدها طلعت للحديقة اقتطفت ورد وسويته باقة وخليتها بالمزهرية ، رحت للغرفة فتحت الضوء خلى ايده على عينه متحسس منه ، توجهت للكنتور طلعت فستان قصير الوانه صيفية ، ورتبت شعري ورشيت عطر يعشقه ، اعرف ما يشوف هذا الترتيب بس ارتاح نفسياً من ارتب نفسي ، تركت الغرفة ورجعت للمطبخ
طلعت الصينية من الفرن والسلطة من الثلاجة والعصائر ، بلشت اصب ، شغلت موسيقى بموبايلي ، رفعت راسي من حسيت بقدومه للمطبخ..

تقرب وكعد على الكرسي المخصص له ، قرب انفه من باقة الورد شمها وابتسم..

بهدوء كال..

أديم : تطلب ورد نجيب الورد
تگول اللون أحمر ماريده
تزعل ونبـّوس بالخد
ندلعهـا نخليها سعيــــدة
يجي الليل تـوّلع شمع
تعلـّي الموسيقى وتتجنن
تعرف كيف تغازل روحي
وتلعب بإحساسي وتتفنن

ضحكت ..

أسمار : احبها لهذه الاغنية..

أديم : كانه اتغنت الج..

أسمار : حبيبي ..

أديم : اختلط عطرج بعطر الورد هسه اني شنو اسوي؟

أسمار : تعشى سويتلك عشا خفيف...

أديم : شنو سويتي شامم ريحة فطائر..

أسمار : اي صح.

أديم : اكو جاي ؟

أسمار : لا سويت عصائر اذا تريد اسويلك ؟

أديم : لا لا اكتفي بالعصير ..

اكلنا بهدوء على نغمات الموسيقى ، خلصنا ، بعدها راح يغسل ايده ، بديت ارفع الصحون من على الميز ، مرت دقائق سمعت صوت مسجات على موبايلي تقربت عبالي من اهلي فتحت الواتساب ، عكدت حاجبي مبتسمة بتعجب ، الرسائل من محبوبي الغريب ، هيج كاتبه اسمه..

فتحتهم وقلبي يدك ، لكيته كاتبلي

اما بعد.. فإننا لم نلتقي عبثاً
احدنا جاء به الحب، والاخر جاءت به دعوة...

بس اغلب الاحرف مخربطة ، بالاول مافهمت الجملة صح ، بعدها دزها صوت وكال..

أديم : ما اعرف اذا اندزت صح او بيها اخطاء بس كتبت اللي اكدر عليه ، وصارلي فترة بسيطة من بديت اتعلم حسب توجيهاتج ، اني وياج فعلاً ما التقينا صدفة اني اجيتج بدافع الحب وانتِ اجيتيني على أثر دعوة دعيتها من قلبي وبكل سجود اطلب العوض وجبر الخاطر وجنتِ افضل عوض واجمل جبر ، احبج..

سرت رجفة قوية بجسمي ورحتله للغرفة ، لكيته كاعد وبيده الموبايل تقربت منه احنيت نفسي وعانقته بشوق وحب يصعب وصفه تجاوب وياية واشتعلت عواطفنا ، ماكدرت اسيطر على دموعي وشهكاتي بين ايديه ، حضنه صار مو كافي يلم مشاعري ، همست باذنه بحب ...

أسمار : احبك يا روحها لسمرة ونبضها...

بادلني بعناق مضاعف رجع ليورا وبعدني عنه بمسافة قريبة ، جان فرحان والابتسامة مرسومة على وجهه تنهد وكال..

أديم : يا يابه شكد متمني اشوفج يا ثلثين دعواتي..

رجعت حضنته وما بينت فرحتي بسبب الرسائل بس هو عرف هي جانت سبب فرحتي...

بعدها كملت سهرتنا ودخلنا بنوم عميق..

ثاني يوم راح للشركة واستغليت هالشي رحت للبيت الكبير ، ساعدت افنان وخالتي بشغل البيت ، واكيد ما نسيت احتياجات الحجية ، بعدها جنا بالمطبخ ودخلوا أرقم وزوجته جانوا طالعين ، سلمت علينا وصعدت جانت حسنة المظهر ومبينة بنية تعبانة على نفسها ومثقفة ، قريب ما ينصب الغداء نزلوا هي وياه..

اتصلت على أديم ، سألته اذا يرجع على الغداء او لا ، اعتذر وكال عندي شغل هواي وصايرة هوسة بالشركة راح نوصي ومن ارجع اكل وياج..

خلص اليوم وتأخر كلش صارت ال ١١ وهو بعده ما راجع وياه واحد من الولد بس ماعرفت منو..

بالليل رجع وحجالي مختصر عن اللي صار ونمنا بعدها، مرت الايام وضعنا جدا طبيعي وحياتنا حلوة ، بس الغريب واللي شغل فكرنا هو أسمر ، سفراته كثرت ، عصبيته زادت ، شغله تراجع ، ترك الدوام بسبب الاجازات المتتالية بعدها ما قبلوا ينطوه صار يضرب الدوام ، يصفن هواي يشرب كهوة ويقرا الفنجان ومرات يكسره بعدما يقراه ، يسهر هواي وتعبنا وياه ما نعرف شنو علته الى ان مرة من المرات جان مسافر وما حدد وقت لرجعته..

بالليل طلعنا اني والبنات كعدنا بالحديقة والاولاد يلعبون ، سوينا جاي وكرزات وكمنا نسولف ، اندفع باب المزرعة ودخل أسمر بسيارته، طبكها ونزل منها وعاف اللايتات مشتغلة ، سد الباب ومشيته جانت بيها خلل ، يريد يوكع اول مرة نشوفه بهيج حال...

وصل يمنا فقد توازنه وكع بالكاع بس ما اغمى عليه ، وصار يهمس بكلمات ما مفهومة بس من ضمنها ولج احبج ولكم اريدها..

طلعوا الولد على صوته ، إيساف تخبل من عرف بيه سكران ، كام يصيح ويتعارك وياه سندوه الولد ودخلوه للحمام ، على صوتهم طلع أديم من بيتنا وصل يمنا وكال..

أديم : شكو شنو هاي الهوسة؟

أفنان : أسمر ومصايبه كل مجالها تزيد.

أديم : ليش شنو سوه ؟

أفنان : جاي سكران.

أديم : لا صدك؟

أفنان : اي.

أديم : تمام هسه هو وين؟

أفنان : اخذوه للحمام.

أديم : ماشي كوموا ناموا ليش سهرانين.

أسن : ما جايني نوم وسهرتهم وياية.

أديم : اذا هيج هذا هو ابقوا براحتكم..

دخل للبيت واحنا بقينا كاعدين..

بعدها طلع أديم ضايج ، توجه للبيت وصاح سمرة ..

أسمار: جيتك..

حجيتها والتفتت على البنات ..

أسمار : تصبحون على خير..

ردولي بصوت واحد ، ورحت وياه للبيت ، كعدنا بالاستقبال وفتحت موضوع أسمر.

أسمار : شبيه أسمر ؟

أديم : اول مرة اشوفه بهيج حال ، وين وصل نفسه لدرجة يشرب ويفوت للبيت سكران.

أسمار : زين اذا يحبها ليش ما يخطبها ؟ ليش يعيش بتخبطات..

أديم : سألناه ما يقبل يحجي يابه منو هي؟ ساكت ، سولفلنا نساعدك صافن ..

أسمار : وتالي..

أديم : لف راسه ونام.

أسمار : وشنو ممكن يكون السبب الحقيقي ؟ خلف اخفاء هويتها.

أديم : علمي علمج ، بس السبب لو اهلها رافضين ينطوه احتمال من طائفة ثانية او مايريد يعرفنا عليها لسبب معين.

أسمار : وتعوفوه هيج ياكل بروحه اكل ؟

أديم : شسوي اللي بيدي سويته وكلتله باجر اخذهم ونروح نمشي عليها باوعلي ولف راسه ونام..

أسمار : غريب .

أديم : الله يجمعه بيها ويبرد كلبه ، تذكرت معاناتي وياج واكثر واحد حاسس بيه اني.

أسمار : مو بس انت عانيت من الحب اني هم دمرتني يا ابو خشم يابس..

أديم : ريتني ما عشت لأن خليتج تعيشين هيج اوقات صعبة..

أسمار : اسم الله عليك

أديم : راح انام لأن راسي بدا يصدع وخايف يلزمني..

أسمار : أديم تحس اكو فرق هذه الايام عن قبل خصوصاً النوبة ما تجيك الا وجع راس بسيط..

أديم : صحيح واني كلش مستغرب بس يمكن يرجع حسب الحالة النفسية..

أسمار : صحيح.

بس بداخلي اني متأكدة السبب بالعلاج هو اللي جان مأذيه ، ومن بدلناه خف الوجع وشبه اختفى وحتى الرؤية كامت ترجعله صار مرتين يكول اشوف شوية وبعدين يروح النظر مني ..

أسمر التهى بشغلته وما كدرت اسأله عن العلاج شصار منه وشنو النتيجة بعدما وداه للمختبر..

نمنا ثاني يوم كعدت على لمساته وهو يمسدلي شعري فتحت عيني لكيته صافن بوجهي ويتأمل ملامحي بدقة وشبه مصدوم فركت عيوني مد ايده وخر ايدي يعني كاعد يشوفني ، بلعت ريكي .. همس..

أديم : لا تتحركين ، ابقي مستلقية نفس ما جنتي وخليني اتأملج

رفعت ايدي تلمست عيونه وملامح وجهه ، همست..

أسمار : رجعلك بصرك ؟

همس ..

أديم : لا تسألوها كيف فاض جمالها بل سبحوا سبحان من سواها...

يتبع....

صباخ الخير متابعة ممتعة...

اعذروني عن التقصير والتأخير لان ملتهية بتحضيرات العيد وسوالفه 😍ايامكم سعيدة حبايبي...