رواية أحببتُ ذلك الغريب الفصل الخمسون 50 - بقلم عبير إدريس

أديم يكول
انا محظوظ
في حياتي شخص يصنع المستحيل لتظهر ابتسامتي من جديد
_________________

سديت الباب ونزلت إيدي من المقبض ، التفتت صار بوجهي ، فزيت بس ما بينت ، باوعلي مبتسم ، مشيت حتى اروح صاحني..

أرقم : لحظة...

أسمار : نعم..

أرقم : شلون تفوتين لغرفة واحد محرم عليج وغريب.

أسمار : مو غريب ابو ابني ، وما الك دخل اذا كان محرم او لا ، كلمن يتحاسب على ذنبه..

أرقم : نسيتي احنا ناس محافظة ماعندنا الانفتاح اللي جنتي عايشة بيه ؟

أسمار : لا مانسيت بس احنا هم محافظين وملتزمين مو شرط الالتزام بالحجاب وانما التزامنا تعاليم الدين الاسلامي وتطبيقها افضل من معرفتك بيه وتطبيقك لهذا الدين اللي تنتميله بس ما تعرف الحلال والحرام اللي بيه..

أرقم : اسمعي لج تبيعين شرفيات وتخلين راسج براسي راسج اكسره..

تعالت اصواتنا ، انفتح باب غرفة أديم ، طلع عاقد حاجبه وصاح بصوت عالي موجه كلامه لأرقم..

أديم : عليمن تقصد بكلامك ؟

أرقم : اي كلام ؟

أديم : اللي حجيته قبل لا اطلع..

أرقم : ماحجيت توني نزلت من غرفتي.

أديم : اتوهم يعني ؟

أرقم : احتمال..

أديم : اني اعمى مو اطرش يعني سمعي كلش زين وسمعت كلامك كله..

أرقم : اذا سامع ليش تسأل ؟

تقرب أديم للجهة اللي جنت واكفة بيها مد كف إيده طلب يلزم ايدي ، نطيته كفي سحبني عليه بطريقة جنونية وخلاني ورا ظهره بتحدي لأول مرة اشهده بشخصية أديم وبغضب كال ...

أديم : هاي زوجتي وفخري وتاج راسك وراسي واذا مسيتها بكلمة لو تعديت لفظياً عليها اللي انت ما تكدر تسوي غيره اعتبر امك ما جابتك...

أرقم : صاير مرعب..

أديم : بشكل ما تتوقعه.

ضحك مستهزء وكال..

أرقم : يعني اتقي شر الحليم اذا غضب.

أديم : من يم أسمار اتقي شري غيرها ما حاسبك موجود بحياتي..

أرقم : حبيت الدراما اللي عايشها شنو تابعت اخر مسلسل ؟

أديم : النبي يوسف ( عليه السلام ) من اخوانه شمروه بالبير ورجعوا لأبوهم يبجون..

أرقم : مممم واجتي زوجة العزيز وطلعته ، تصدك قصتك بيها شبه شوية من قصة النبي يوسف خصوصاً  أسمار شلون طلعتك من البير وخلتك بحال احسن من قبل..

أديم : بالضبط صحيح ..

أرقم : على العموم اترخص اني وتصبحون على خير.

أديم : يلا سمرة امشي اوصلج للبيت..

أرقم : بات هناك شيرجعك وراك طريق طويل.

حجاها مستهزء وصعد ، تنفست بقوة ودخلت للغرفة اخذت موبايلي ورجعنا للبيت اول ما دخلنا همس..

أديم : مشتهي كهوة من ايدج الحلوة وتحجيلي قصة وانام مرتاح البال..

ابتسمت وتقربت ضغطت على كفه وهمست..

أسمار : صار تدلل..

أديم : اميرتي..

حجاها وضحك خلى ايديه بجيوبه ومشى للقنفة كعد عليها مرجع راسه ليورا حركته المعتادة ...

اني وافتر بالبيت جنت احجي بصوت مسموع حتى يجاوبني..

أسمار : الضماد شوكت تنزعه ؟

أديم : ما اعرف اني هم مليت كالوا ٣ اشهر ..

أسمار : شعجب؟

أديم : مو الضماد مو فقط لافيه علمود عيوني ..

أسمار : لعد ؟

أديم : الجرح اللي براسي مال الشظية نسيتيه ؟

أسمار : ها اي صحيح راح من بالي .

رحت للمطبخ حضرت القهوة وياها بعض من الحلويات الموجودة وشوية مكسرات ورجعت للإستقبال خليتهم يمه وكعدت...

وصفتله الاشياء حسب اماكنهن ، اخذ قهوته وبدا يحتسيها..

بعدها كال.

أديم : انتِ جميلة روح لدرجة يصعب على الإنسان تصديقها ...

أسمار : خجلتني ...

أديم : واقع هذا..

أسمار : شكرا أديم..

أديم : سمرة ابتعدي عن الرسمية بالتعامل كاعد ترهقيني ..

أسمار : مو رسمية بس تعبانة ..

بين تناقل الكلمات من هنا وهنا وتركيزه على مواضيع تخص علاقتنا ، وصل لنقطة تناقشنا بيها ..

أديم : من يجتمع بالإنسان العقل والقلب تصير بحياته مفاجآت ما محسبلها حساب..

أسمار : بمعنى ؟

أديم : مثال حي سمرة انتِ جامعة العقل والقلب العاطفة والمنطق كادرة توزنين كل هاي الأمور رغم اني رجل وصعب علية اديرها بالشكل الصحيح..

أسمار : من حملتك تسعة اشهر وانجبتك وسهرت وربت وكبرت وصرت بهذا الحال هذه ما تعتبر مثال حي ، للعقل والقلب والعاطفة والمنطق رغم بساطتها ، المرأة هيج يا أديم تحتوي المقابيلها بكل مساوئه ومميزاته وتحتضنه بقوة اذا جانت تحبه وتبقى تقوم بسلوكه اذا جان بيه عواج الى ان توصله مرحلة يكون معتد بنفسه ويليق بيها كرجل تمشي وياها جنب الى جنب وتكمل حياتها..

أديم : المفروض هسه اسكت ماعندي تعليق الصراحة اختصرتي كلامي بحوار اعجز عن وصفه..

أسمار : احجي اذا تريد..

حجيتها وضحكت ، ابتسم بعدها تقرب من مكان كعدتي صرنا قريبين لدرجة اختلطت انفاسنا ، سحبت نفسي حتى اكوم لزمني من ايدي وجبرني اكعد..

أسمار : أديم خليني اروح انام وانت ارجع لغرفتك..

ماجاوبني سحبني بقوة حاول يقبلني رجعت راسي ليورا جان اقوة مني ، صارعته وهمست..

أسمار : أديم شبيك وخر عني أديم ، إيدي اذيتني..

ماجاوبني وترك شفايفه تعثوا بملامحي وتعبث مثلما يحب..

أسمار : صار عندي تشنج عضلي برجلي وخر عني ليش تخليني اصيح ويلتمون علينا...

هو وحاضني كال..

أديم : يلا ياريت حتى نعقد ..

أسمار : تعقد شنو بكيفك هو تطلكني وترجع تتزوجني..

أديم : شنو رأيج اذا مرجعج على ذمتي وانتِ ما تدرين؟

أسمار : ساعتها اني راح اطلب الطلاق واذا فكرت ارجع ترجعني بمهر جديد..

أديم : وعرس جديد وبيت جديد بعيد عن هذا بس ارجعيلي مشتاقلج لدرجة ما تتخيليها يا أسمار تعبت تعبت تعبت..

بقى يكرر اخر كلمة الى ان حسيت بغثيان صاب معدتي دفعته وركضت للحمام تقيأت بعدها غسلت وجهي وطلعت لكيته واكف بمكانه رحت شلت الصينية وهمست..

أسمار : تصبح على خير..

هز راسه بدون ما يجاوبني مدد بمكانه ، دخلت لغرفتي حاولت انام رغم دموعي اللي اصرت تنزل وتخرب علية ليلتي بس اصريت امنعها ، جفوني ثكلت ونمت ثاني يوم فتحت عيوني رفعت راسي حسيت بصداع قوي نهضت نفسي واسندت ظهري على ظهر السرير ، باوعت اكو اثار تدل على دخوله لغرفتي اثناء نومي ، عصرت دماغي ردت اتذكر اذا فات او لا ما تذكرت ، كمت من مكاني واكو وجع بعظامي رهيب اشتد لدرجة رجعت استلقيت على فراشي بوهن ، خليت ايدي على كصتي اتلمس حرارتي  ، بهذه الاثناء رن موبايلي كمت بثكل ومشيت للميز سحبته باوعت أسمر ، رديت وعيوني خطفت ملامحي من المرايا ، عكدت حاجبي من شفت نفسي شكد تعبانة لدرجة اكو سواد يحيط عيوني شعري صاير خفيف صدري واكتافي هزيلة ، تسألت منو هذه ما اعرفها بس صوتي من كلت الو نبهني على وجودي بهذا المكان والا البنت اللي امامي ما اعرفها ولا شايفتها قبل ...

اجاني صوت أسمر وهو يحجي بالحاح مستمر..

أسمر : سمرة يمعودة الو الو تسمعيني وينج سمرة يهووو سمرة هي ..

أسمار  : الو شبيك صباح الخير..

أسمر : صباح النور هو اني اللي شبية لو انتِ ، وينج صار وقت فاتحة الخط وبس تنهيداتج اسمعها.

أسمار : أسمر اختصر راسي يموتني واريد ارجع انام.

أسمر : واذا كلتلج خبر يطير النوم من عيونج..

أسمار : اعتبره طار احجي.

أسمر : تعجبيني من تفهميني..

حجاها وضحك.

أسمار : الظاهر الموضوع قوي وهيج فرحان.

أسمر: اسمعي الشخص اللي تعامل وية لؤي قبل الحادث وكان مرسال بينه وبين الشخص اللي ساعد لؤي اعترف عليه اندليناه واخذناه اني وأهاب وراح نفهم منه قبل لا نسلمه للشرطة..

أسمار : لا صدك ؟

أسمر : وداعتج وانطيه يومين بالزايد راح يعترف وبهيج حالة راح نعرف الخيط لأي خياطة..

أسمار : حلوو ، وانطيك خبر اني هم عرفته البارحة..

أسمر : يا بخيلة يعني ما تحجين الا بمقابل..

أسمار :عرفت متأخر لا تخاف ..

وحجيتله اللي صار وية زوجة أرقم وشنو حجتلي ، واخذت رأيه باللي سويته بخصوص الموبايل والتصوير..

أسمر : يايابه ولج هاي سارة اذا صدك نيتها طيبة وتكدر تساعدنا راح تسهل هواي أمور.

أسمار : منها ؟

أسمر : تجيب موبايل أرقم بدون رمز..

أسمار : وشلون هاي ؟

أسمر : الشلون علية بس المهم خليها تعرف الرمز وكلش كلش تفتحه وتجيبه بوقت معين نستخدمه وبعدها تاخذه ترجعه لمكانه ولا من شاف ولا من درى..

أسمار : تروح تتأذى البنية.

أسمر : ما راح تتأذى اذا ساعدناها ..

أسمار : زين ..

أسمر : وبالنسبة للتصوير راح اجيب كامرة ما تبين واشدها بغرفة أديم وتسجيل صوت وصورة بوقت أرقم يطلع بيه من البيت واتركي سالفة الموبايل لا تجازفين بيها بعد..

أسمار : تمام هذا هو..

أسمر : اني جاي بالطريق وراح اكعد وياكم انتِ وأديم ونوصل لحل لكل مشاكلكم واكعدوا وانجبوا مللتونا ترى..

أسمار : قبل لا تجي اريد اسألك عن طليقة أرقم وين بيتهم ؟وشنو تصير من عندكم ، اعرف اكو صلة قرابة بس ما اعرف بالضبط شنو ؟

أسمر : شعندج وياها ؟

أسمار : كل الخير..

أسمر : بنت عم ابوية من زوجته الثالثة.

أسمار : خوش شجرة المهم اريد اوصلها بأي طريقة..

أسمر : غير تستقر المصلحة الاجتماعية ..

أسمار : مو مصلحة اريدها بشغلة اكيد راح تساعدني بيها.

أسمر : تحجيلي أول يلا اخلي إيدي بإيدج لأن اقاربنا ما يتأمنون مو مال ادزج وحدج الهم..

أسمار : طبعاً ما اروح وحدي بس احجي وياها على انفراد..

أسمر : متفقين ..

أسمار : من تجي نفتح الموضوع وية أديم حتى رأيي على رأيك نكون فكرة صحيحة ومسنودة من شخصين يضطر يوافقنا بيها..

أسمر : تمام ياعلم من اعلام المسيح ..

ضحكت..

أسمر : وهسه صرتي من اعلام الغريب.

أسمار : أسمر استعجل..

أسمر : جاي والحمزة اطير خوما اطير.

أسمار : شنو اخبار حبيبتك الشقراء..

أسمر : اخ اخ ولج شحجيلج اسكت احسن ..

أسمار : شوكت ناوي تعرفني عليها..

أسمر : ارتاحوا وراح اعرفكم عليها ونخطبها سوية..

أسمار : يلا حتى ندخل الفرح لهذا البيت

أسمر : أهاب راح يتأهل أول واحد بعدها اني واذا الله سهل أرود بعدنا..

أسمار : شنو اخباره بالي يمه..

أسمر : زين وأهاب يروح وييجي عليه وربج يستر منا لحدما نكتشف الحقائق المرة.

أسمار : الله كريم.

أسمر : يلا اجيت سديه خلص الرصيد..

سديت الخط لميت شعري بملل وطلعت من غرفتي للحمام غسلت ومريت من الإستقبال لكيته بعده نايم ، ومغضب ملامحه ، تركته ورحت للمطبخ سويت ريوك يكفي لثلاث اشخاص ، حسبت حساب أسمر ، قريب ما اكمل اندك الجرس ، رحت حتى افتح الباب ، أديم كعد وصاح..

أديم : اني افتح..

همست ب اي ورجعت للمطبخ ، سمعت صوته يرحب بأسمر ، خليته بالصينية واخذته للإستقبال خليته على الطاولة وصحتهم ، جانوا بالمكتب ، شافني أسمر ضحك هز راسه وأشرلي يعني شبيج..

جاوبته بإشارة يعني مابية..

أسمار : صباح الخير شلونك أسمر..

أسمر : الحمدلله وانتِ شلونج ؟

أسمار : بخير الله يسلمك.

أسمر : ابن اخوية شلونه واياس شنو اخباره؟

أسمار : ولد اخوك زينين ابني وتميم واياس كل يوم على تواصل وياه من الصبح لليل ، حاسس بملل فظيع وحابب يرجع للمزرعة..

أسمر : يلا ماظل شي ان شاءالله ويرجع لحضنج..

أديم : لحضننا رجائا ابني هذا بطلي ..

أسمر : طبعاً بعد انت ابوه.

حجينا تفاصيل عادية بينما خلصنا الريوك بعدها كعدنا نخطط ، أسمر حجى لأديم عن الولد اللي لزموه وعلى الكاميرا اللي راح نشدها بغرفته ، وطرحت فكرة نلتقي بطليقة أرقم ، عكد حاجبه أديم وكال..

أديم : شنو ؟ شجابها على بالج وليش تريدين تشوفيها؟

أسمار : لسببين الأول اريد اعرف سبب طلاقها المجهول والثاني ممكن نستفاد منها بمعلومة تفيدنا..

أديم : ما اعتقد راح تفيدنا بشي وبعدين منو يروحلها وعلى شنو ؟

أسمار : ابو تميم اكو شغلات تنحل باضعف الإيمان ومرات ربك يخلي سره باضعف خلقه ، ليش ما نجرب يمكن نوصل لخيط من الحقيقة..

بنرفزة كال .

أديم : واي حقيقة هاي اللي كاعد تدورين عليها ؟

أسمار : الحادث موت شهد الخطف اتهامي بابشع التهم ، قضية أرود ، هواي أديم ..

أسمر : لحظة شنو هذا التشنج بالكلام شبيكم واحد يريد ياكل الثاني..

أديم : هي عاجبها الوضع ومبينة مرتاحة للفراق وعاجبها تنام وحدها..

أسمر : ويمكن جمع الشمل من بعد الفراق يكون بيه متعة ولذة ما تعرفها الا تجربها..

أديم : اشعب احترك بكبره ما تسكت لخاطر دينك.

أسمر : والله تنحسد على معاناتك هاي اكو احلى من هيج حياة ..

حجاها وضحك..

اختنق صوت أديم وهو يكول..

أديم : احسدني على وجع قلبي بلكت بالحسد يروح ويختفي من حياتي حاله حال النعم اللي راحت..

كمت من الطاولة رفعت الأكل ورحت اسوي قهوة بعدما اخذت رأيهم ، انتبهت على اسلوب أديم بالحجي بالكوة يحجي وملامحه ضايكها التعب..

كملت تحضير القهوة اخذتها ورجعتلهم كعدت وأسمر حجى موجه كلامه لأديم..

أسمر : أسمار تعرف كل التفاصيل..

أديم : اي تفاصيل ؟

أسمر : الحادث ؟ وماقبل الحادث ؟

عكد حاجبه وبلع ريكه هز راسه بهدوء كال.

أديم : لا ..

أسمر : وليش ما تحجيلها ؟

بعدها التفت علية وسألني..

أسمر : شنو تعرفين عن حياة أديم القديمة عدا الحادث وخيانة شهد ؟

هزيت راسي مستغربة..

أسمار : ما اعرف غير طلع وياه زوجته وابنه وطكت السيارة بيه وعباله موجودين داخل السيارة وفزع الهم واحترك وجهه..

أسمر : أديم هذا اللي فهمته لأسمار ؟

هز راسه مدنك..

أسمار : ليش اكو حقيقة ثانية تختلف واني ما اعرفها ؟

أسمر : أديم تحجي لو اني احجي ؟

أديم : احجي انت..

حجاها ودنك اخذ نفس قوي ورجع زفره..

أديم : بس الحادث أسمر لا ياخذك الواهس ..

أسمر : صار..

أسمار : اني اريد اعرف كلشي شنو متزوجة واحد عنده ماضي وما معروف شنو ؟ من حقي اعرف..

أديم : لا مو من حقج.

أسمار : ليش بله ؟

بقى ساكت ..

أسمار : ليش مو من حقي اعرف ؟ بهذه تصرفاتك راح تخسرني أديم..

حجيتها وكمت حتى أروح منعني أسمر واصر على أديم يحجيلي كلشي، صاح أديم بصوت غضبان..

أديم : ما اريدها تعرف لمصلحتها ..

أسمار : وين مصلحتي من تضم علية شي اني ما اعرفه؟

أديم : كلتلج مو شغلج يا سمرة كافي ..

أسمار : فهمني بوجهة نظرك يلا اسكت..

أديم : انتِ اذا تعرفين شي تتصرفين من راسج بدون استشارتي وتعرضين نفسج للخطر وجربتج اكثر من مرة ، بحجة حمايتي تندفعين والدليل اليوم تريدين تروحين تنبشين كبر أرقم حتى تعرفين اسراره وانتِ حامل وينج وين هاي السوالف..

أسمر : ما تحلها غير سمرتنا ، طليقة أرقم مستحيل تحجي ويانا او تقابلنا كم مرة رحنالها ورفضت بس اذا راحتلها سمرة يختلف الوضع صدكني..

أديم : ما اعرضها للخطر ولاادخلها بهيج مواقف واخليها طعم لأرقم لو اعرف اموت والله.

أسمر : تخسى يصيرلها شي واحنا بظهرها ولك نسيت منو احنا ، وشنو لقبنا وخلي ببالك ولا اني رايدها تتعرض لهيج مواقف بس مجبورين..

أديم : ونسيت أرقم واتباعه منو هم وشنو لقبهم؟

أسمر : يابه سمرة كدام عيوننا وراح نمشي وياها خطوة بخطوة وما راح ندزها هيج خطار او شي لا بطريقة مرتبة..

أديم : شلون يعني مافهمت ؟

أسمر : اكو حفلة عرس راح تصير بالبستان مال عم ابوية واكيد هي راح تحضر لأن اختها العروس وندز سمرة بالعرس على اساس من طرف العريس وتشوفها وتحجي وياها وزوجة أرقم من النوع اللي تفتح كلبها للغريب شكد جانت تاكل كتل من أرقم لهذا السبب..

أديم : وتكون سمرة صاحبة الطرق الغريبة بفك عقدة الألسن ؟

أسمر : بالضبط ..

أديم : نهائياً..

أسمار : اني حابة اروح ..

أديم : واني ضدج بالرأي ..

أسمر : واني مأيدها..

أديم : زوجها اني..

أسمر : واني ابن عمه شبيك محسسني راح ناخذها منك يابه نريد نوصل لخيط نخلص من اللي احنا بيه مو متنا صارلنا سنين عبالك لعنة ..

أديم : حسب كلامك عن أرقم والشكوك ، معناها كاعد نتعامل وية مجرم بارع التفكير مو انسان عادي عنده غيرة على اخوانه واهل بيته مستعد كلشي يسوي في سبيل يحصل على المزرعة ونصيبي من الشركة وبقية العقارات..

أسمر : ولا تنسى السبب الرئيسي..

أسمار : اي سبب ؟

حجيتها عاكدة حاجبي..

أديم : انت اليوم ناوي تحجي كلشي.

أسمار : اريد اعرف عقلي وكف ، شنو تفاصيل الحادث الحقيقية وشنو سبب عداوة أرقم الك..

أسمر : شوفي السبب ..

قاطعه أديم بصوت حاد.

أديم : اذا حجيت ودينك اتبرا منك ..

أسمار : واني انساني ..

أديم : مو مشكلة المهم احافظ عليج.

أسمر : يابه ما راح تتصرف بكيفها سمرة كلشي تحجيلنا أول بأول ، مو سمرة؟

أسمار : لا اني مو اهل للثقة لهذا ما يحجيلي..

حجيتها وعيوني ما نزلت لحظة عن أديم..

أديم : اتركج من هذا الموضوع وريحي راسج وراسي..

أسمار : وروحتي لبستان عم ابوك ؟

أديم : ياربي الصبر..

أسمار : اختار لو تحجيلي كلشي لو تخليني اروح

أديم : لج بابا راح تسمعين قصص متضاربة وردات فعل تافهة يمكن تتعرضين للإهانة ، زوجتي مستحيل اخليها بوسط هيج جو..

أسمار : احجولي سبب الحادث لأن صدك ضجت وراح اخلي ببالي شغلة السفر وارجع لإبني ليش اني مضيعة وقتي بوسط ناس ما يهمها رأيي ولا مصلحتي ومعيشيني داخل كذبة كبيرة..

أديم صفك إيد بإيد ملتفت على أسمر بوهن كال..

أديم: احجيلها وانت تتحمل كل التبعات..

أسمر : ماشي اني اتحملها ، شوفي ، أديم ما انفجرت عليه سيارة بباب المزرعة مثلما وصلج الخبر ..

أسمار : لعد ؟

أسمر : هذا السبب حجيناه للمعارف ولكل شخص قريب من عندنا عدا اهل المزرعة المقربين يعرفون السبب الحقيقي شنو.

أسمار: وليش ما تحجون السبب الحقيقي؟

أسمر : لأن المجرم من عندنا بس ما عارفيه منو مستحيل يكون غريب مثلما وهمنا الناس الغربة وفهمناهم عندنا اعداء هم سبب الحادث بس الحقيقة احنا نعرف اكو عدو بس ما محدديه بالضبط ..

أسمار : وين صار الحادث وشلون ؟

أسمر : صار الحادث بكراج الشركة ، أديم طلع منها متوجه للسيارة وكف يحجي وية ابو الحر والأخير ورثله جكارة حجوا شوية وكلمن راح لدربه أديم اول ما صعد بالسيارة ويريد يحرك حس اكو ريحة مو طبيعية نزل منها ودنك يباوع يكول نسيت الجكارة بحلكي ظليت اتبع جهة البانزين من وين كاعد ينزل ، يكول مجرد دنكت طكت السيارة بوجهي احترك وجهه وايديه وصدره ودخلت شظية من حديد السيارة براسه وهذا كل اللي صار.

أسمار : وسالفة شهد والسوك واصرارها على المسواك ليش هيج حجيتوا ؟

أسمر : بوقتها اتفقنا نحجي هذا السبب حتى ما ننطي نقطة ضعف لأعدائنا يستغلوها ضدنا على سيارتهم بالكراج وبوسط الشركة وموظفين وحرس وييجي واحد يخترق كل هاي الاشياء ويسبب عطل بالسيارة..

أسمار : وشهد تدري بهذا السبب ؟ وراح تحجون هيج قصة لو من ماتت تألفت عليها قصص.

أسمر : لا تدري وبعلمها وهي اقترحت سالفة السوك حتى تبعد الشبهات عن اهلها بالدرجة الأولى..

أسمار : اهلها شعليهم ؟

أسمر : اخوانها ويانا بالشركة جانوا مساهمين اقوياء بيها وبعدها صارت مشاكل نهينا كل متعلقاتهم بالشركة بعد الحادث ، وأرقم انسحب من وحده وما بقى غير أديم وابو الحر..

أسمار : فترة شراكة أديم وابو الحر شكد استمرت وبعدها صار الحادث.؟

أسمر : حوالي سنة ونص او سنتين ..

أسمار : وسالفة البانزين والجكارة ما تحسون بيها ربط؟

أسمر: شلون يعني ؟

أسمار : يعني يكون ابو الحر هو اللي ورا الحادث.

أسمر : هاي وين شطح عقلج يمعودة ..

أسمار : يعني ما اجى ببالكم هذا الفعل ولا واحد بالمية يعود لأبو الحر ؟

أسمر : نهائياً تدرين ليش؟

أسمار : ليش ؟

أسمر : لأن يحب أديم محبة اخوه ما يحبه ويخاف عليه بكده.

أسمار : نفسه هو اللي تحارش بزوجة صديقه وتواطئ وية ابو المالية حتى يزورون اوراق ويورطون أديم بيها...

أسمر : بس بهذا الوقت ما ممكن تشكين بيه هالكد ما علاقته قوية بأديم الى حد بعيد..

أسمار : وشنو يعني اخوان من نفس الدم يتعادون وخير مثال كدامكم أرقم..

أديم : تعرف أسمر نفس احساس سمارة اني حاسس بيه وكلما افكر بالموضوع يزيد الشك بقلبي بس شلون نكتشف الحقيقة؟

أسمار : أرقم اللغز ومنا راح نفتح كل الشيفرات..

أديم : واجازف بيج؟

أسمار : ليش تعتبرها مجازفة خليني اجرب حظي وان شاءالله نوكع على العلة..

أديم : اقبل بشرط.

أسمار : وهو ؟

أديم : ما تروح بالعرس زيارتج الهم بيوم عادي ونروح اني وأسمر وياج..

أسمر : شلون نروح اكيد تخاف تحجي شي كدامنا نسيت اخوك عنده عيون بكل مكان.

أديم : العندي حجيته.

أسمر : تمام نروح وياها بس نبقى برا والخط يظل مفتوح ونسمع اي شي يصير ندخل ونطلعها من البيت..

أديم : واجازف بيها وبالطفل كل عقلك؟

أسمار : أديم اريد اعيش حياتي مرتاحة كافي لازم نشوف حل مو حياة هاي ..

أديم : اتركي كلشي والدنيا كفيلة تدور بيهم وكلمن ياخذ جزاءه..

أسمار : حتى لو نسرع الجزاء ليش ننتظر.

بالاجبار والالحاح وافق، قررنا نطلع ثاني يوم ، من اجى وقت طلعتنا أسمر تأخر علينا هواي لدرجة كل شوية اتصل عليه ويرفضه اخر شي كتبلي..

سمرة اجلوها لأن هذا اعترف بكلشي ومانكدر نعوفه نريد نعرف أكثر ، خلي طليقته نروحلها بعدين..

كتبتله..

نفسه اللي ببالي ؟ واني راح اتصرف بسالفة الروحة طمني شنو يصير وياك.

كتبلي
ان شاءالله خير وديري بالج على نفسج وخليني بالصورة..

كتبتله..

تمام مع السلامة.

رد الله وياج..

سديت موبايلي ورحت لأديم وكفت كباله وحرت شلون افتح الموضوع تشجعت وحجيت..

أسمار : أسمر عنده شغل ماراح يكدر يجي..

أديم : الله اجتي من يمي يلا هي من البداية ما قانع بيها.

أسمار : بس ما راح تنلغي ولا تتأجل..

عكد جاجبه وكال..

أديم : وشلون نروح ؟

أسمار : يا اما تكسي لو نروح واني اسوق..

أديم : شبيج أسمار ؟

أسمار : شنو اذا عجبني اشتري سيارة راح تمنعني؟

أديم : لا طبعاً بس شلون نروح وحدنا وانتِ ما تندلين الطريق..

أسمار : عن طريق الجي بي اس..

سكت مدنك راسه بعدها رفعه بنفاذ صبر كال..

أديم : يلا نروح هذا هو جيبي سويج سيارتي..

رحت بسرعة جبته واخذت جنطتي وطلعنا قبل لا يغير رأيه ، سقت السيارة ومشينا الطريق جان معروج و السيارة عالية ما متعلمة عليها وسريعة ، حاولت اسيطر على الوضع..

دخلنا بطريق عبارة عن بساتين ولهناك وانقطع الطريق العام ولازم افوت بداخل بستان ارتبكت ملتفتة على أديم..

أسمار : أديم الطريق العام شكد يبعد عن المكان ( وذكرت اسم اللافته اللي موجودة ) ..

عكد حاجبه وكال..

أديم : شجابج هنا يمعودة ذولة عندنا ثار وياهم....

يتبع....

متابعة ممتعة....