رواية أحببتُ ذلك الغريب الفصل الحادي وخمسون 51 - بقلم عبير إدريس

احببتُ ذلك الغريب.

( بقلم عبير إدريس)

التفتت عليه مصدومة سألته بدهشة !!!

أسمار : ثار شنو ؟

أديم : بينا وبينهم ثار قديم يا أسمار شجابج هنا وبالذات اني مطلوب الهم..

أسمار : تحجي صدك أديم ؟

رجع راسه ليورا تنهد وكال

أديم : اخ اخ من عنادج وتلوميني ليش ما حجيت الحقيقة ليش ما حجيتلج كلشي وهاي نتيجة تصرفاتج..

بلعت ريكي اريد ارجع السيارة للخلف إيدي ترجف ، رجلي وكفت ما اكدر اكبس على البانزين ، لهناك وسمعت صوت تهيألي رجل بس من التفتت بخوف شفت نسوان اثنين بيدهم منجل ولابسات زي ريفي معصبات راسهم ، وحدة منهن كالت..

_ ياهو هنا ؟

حجتها وضربت على السيارة ، نزلت الجامة أديم سحب إيدي عصرها محذرني احجي شي رجعت سديتها تقرب مني و همس..

أديم : لا تفصحين عن شخصياتنا ولا تكولين تايهين كولي جاييكم بطلبة وبس اياج تحجين شي..

رجعت فتحتها مبتسمة بخوف..

أسمار : مرحبا خالتي ..

_ انتِ ياهو ؟

أسمار : اني خطار من بغداد واجيت سياحة هنا...

همس أديم ..

أديم : انلاصت يا الحمزة...

التفتت عليه وهمست..

أسمار : شبيك ؟

أديم : اقريلي الفاتحة..

أسمار : ياستار.

حجيتها والتفتت على النساء وكملت حجي ..

أسمار : اني سائحة من بغداد ولأول مرة اجي بسيارتي الخاصة وحبيت افتر بهاي المدينة العظيمة و...

قاطعتني المرأة الثانية من كالت..

_ بس هاي سيارة بيت الغريب شجابها عندج؟

هنا قطرة دم ما بقت بية ، بلعت ريكي حسيت جسمي نشف ، الثانية اللي تعرفت على السيارة عصبية وتحجي بزودها وأكدتلي هالشي من دنكت وباوعت لأديم وضحكت ضحكة خبيثة وكالت..

_ يا هلا واخيراً اجيتنا برجليك ، نورت ابو تميم الك وحشة كول بيت حواش اكلنا وياهم زاد وملح وعشرة عمر هيج هانت العشرة عليكم؟بالجذب ما تمر علينا..

نزلت دموعي والندم اكل قلبي اكل بس شيفيد الحجي واللوم بعد ، تندمت ما سمعته تندمت ما كعدت وسكتت ، التفتت عليها بدموع متوسلة ..

أسمار : عفية زوجي ضرير واني حامل لا تأذوه خلونا نطلع منا الله يخليكم..

اول وحدة اللي حجت جانت متعاطفة ويانا اما الثانية لا كلما احجي كلما يزداد شرار اللؤم بعيونها..

_ هذا مجرم عليش جايبيه هنا هيج نسيت فعلتك واجيت برجليك بس شفت الدنيا شكد صغيرة يا ابن الغريب بكد حلقة الاصبع لابد تفتر بيك وترجعك لنفس المكان اللي اخذت ارواح منه..

جاوبها بثقة وصوت ثابت..

أديم : شعجب ال حواش يخلوج تحاجين قاتل ابنهم اللي اعرفه وكفتج هاي بيها كص ركاب..

_ بس راح يتفهمون اني زوجة مفجوعة ولابد ييجي يوم ونحجي وياك وناخذ حقنا مربع وبعدها ييجي دور زلمنا..

أسمار : تستقوون على رجل ضرير حرام عليكم .

ردت بخشونة..

_ من قتل زوجي وزوج سلفتي الثانية وحرم اولادنا من ابهاتهم شنو عادي عندج؟؟

أديم : ما قتلت احد..

حجاها ومركز اتجاه راسه علية كأنما يريد يقنعني ببرائته.

خليت ايدي فوك كفه وطبطبت عليها رجعت التفتت عليهن..

أسمار : هسه المطلوب من عندنا شنو ؟

_ تنزلون ويانا بالمضيف..

أسمار : مستحيل نتحرك منا..

فتح أديم الباب وكال.

أديم : انزلي سمرة.

أسمار : وين ننزل مستحيل خليني اتصل بأسمر يجي ويجيب اخوانك.

رفع إيده محذرني..

أديم : اياج أسمار اياج تصير قاتل ومقتول نحجي وياهم بعقل افضل.

أسمار : خلينا بالسيارة ما ننزل فدوة اخاف عليك..

أديم : يحركوها واحنا بيها اصلا انسي هاي السيارة مادام فاتت هنا ما ترجع ، ذولة ولد حرام ، واذا الله يحبنا وعلى عيونج طلع واحد ادمي وحجينا وياه وخلانا نطلع ذاك الوقت يكون بختج جبير عند ربج ياسمرة ...

حجاها وضرب رجليه اخذ نفس قوي فتح باب السيارة ونزل مقدم عكازته على خطوته..

أديم : يلا يابه اخذونا بإتجاه المضيف...

من مشى بالعكاز كدامهم ، وحدة منهن جلبت بدشداشة الثانية وكالت بصوت مسموع.

_ يولي خليهم يروحون ولج هذا صدك اعمى خطية ..

_ منو يكول ما يمثل..

_ يمثل واجى لهنا برجليه ، مبينة البنية اللي وياه كلشي ما تندل ، بروح المرحوم خليهم يرجعون قبل لا يجون ضياء وعلوان صدكيني ما يخلوه عايش شوفيه يكسر القلب..

_ ما اعوفه اذا ماخذت ثار ولدنا واحد واحد واتشفى بيه..

تركتهن من سمعته صاح اسمي ركضت عليه من وصلت قريب منه مد ايده سريع ولزم معصمي ...

أديم : حبيبتي اسمعيني اني فتت هنا امشي على رجلي واحتمال اطلع بجنازة ديري بالج على اولادنا واذا اجتج بنية سميها أسمار واذا ولد سميه عيسى لأن طلبتج منه ، وتذكري دائماً شكد احبج اني وشكد خفت عليج رغم خبالاتي وباقي صفاتي السيئة..

اخذت كفوف ايده وبوستهم غوشت عيوني من البجي..

أسمار : مابيك شي سيء والله اموت عليك حبيبي نطلع سوى منا الله يخليك لا تحجي هيج مبينين ناس طيبين والله هسه نطلع واذكرك ، وراح  ترجع تشوف ونربي اولادنا سويا...

اشتدت قبضة ايده على ايدي ،جر نفس قوي تنهد وكال..

أديم : انتِ ما تعرفين عاداتهم ومعتقداتهم شنو ؟ لهذا متأكد اليوم هو يومي الاخير..

أسمار : اسكت عفية لا تحجي هسه اروح احجي وياهن وراح يتفهمن الوضع هسه تشوف..

تركته حتى اروح رجع شدني من ايدي ناحيته وثبتني بقوة تحت جناحه ، تقربوا من يمنا الاولى كالت بصوت مقهور..

_ انتِ تطلعين اما هو لا ...

دك قلبي بقوة بتوتر حجيت..

أسمار : اعرف شعوركم واعرف حزنكم على اقربائكم بس صدكوني زوجي مستحيل يقتل احد اني عاشرته ماكو بطيبة قلبه وشهامته وحتى متكفل ناس ويساعدهم

قاطعني وكال..

أديم : هاي شمدريج ؟

اجتني الضحكة بنص دموعي  رغم بشدة الموقف..

أسمار : هسه وقتك أديم ..

أديم : احجي ولج شلون عرفتي ؟

أسمار : كلشي اعرف عنك اني..

تركته والتفتت عليهم كملت كلامي..

أسمار : تشوفوه عايش بس يومية عملية ومريض وامه تعبانة ومتعلقة بيه واني ماعندي احد اهلي مسافرين وما اكدر اسافرلهم ماعندي وظيفة ولا سند من بعد ربي غير زوجي أديم فدوة خلونا نطلع منا..

بضحكة مكتومة كال ..

أديم : ما ظلت غير كلمة لله يا محسنين.

ضربته بعكس ايدي ...

أسمار : اسكت انت ابو لسان..

تقدمت الثانية اللي زوجها مقتول وكفت يمي تنفست بعصبية وكالت..

_ روحي تتعذب وزوجي راح مني وابني بين الحياة والموت بسبب الثارات من هذاك اليوم لهذا يومنا، والناس كلها تكول السبب زوجج..

أسمار : يا ثارات الله يخليج اني صارلي سنين يمهم لا سمعت انثارت طلقة لا شفت تجمع علمود فصل هاي شوكت الحجي.

ضحكت موجهة الكلام لقريبتها..

_طبعاً معيشها ملكة بوسط المزرعة تأمر وتنهي وتسوق سيارات شلون تدري بالثارات اللي تصير قابل مثل حظي وحظج ؟

بلعت ريكي وهمست..

أسمار : اني اتمنى يشوفني بيوم لا تحرموني من هذا الشي ..

الاولى مالت براسها بعطف كالت..

_ زوجج ما شايفج ؟

هزيت راسي والدموع تارسة عيوني..

أسمار : لا ..

_ ما شايف هذا الجمال ؟

أسمار : ابد لا تحرموني من هاي الفرحة

الثانية جاوبتها..

_ شلون صارت حامل اذا ما يشوف ؟

الاولى جاوبتها .

_ ما يحتاج لعيونه حتى يخلف اطفال اسكتي كافي .

تقربت المرأة الاولى وحجت وية الثانية هواي لدرجة رادت تشب عركة بينهم بعدها اتفقوا اتفاق وبلغونا بيه ..

_ عيوني اذا تريدون تطلعون منا تتركون السيارة والمفتاح بيها ، وراح نطفي الكامرات حتى تطلعون ومحد يشوفكم ولو هي مجازفة بس هذا السر راح يندفن بيني وبين ام ياسر لأن مادام فاتت السيارة والكاميرا الأولى سجلت دخولها ما نكدر نسمحلكم بطلعتها..

أديم : وهنا ماكو كامرات؟

_ لا ماكو ما يحطون كامرات على حريمهم من تشتغل بالبستان..

بدون ما انتظر دقيقة وحدة ،كمزت للسيارة اخذت سترة أديم وجنطتي والموبايلات لبست سترته والجنطة خليتها برقبتي وبيها الموبايلات..

جسمي يرجف، بخوف خليت ايدي فوك ذراعه ، حسيت التوتر راح من ملامحه، من لامسته  لف ايديه على كتفي ومشينا جنب بعض وصلنا للمكان اللي واكفات بيه النساء..

أديم : الله يبارك بيكم ، واتمنى تقبلون مني هذه الهدية البسيطة والايام القادمة راح ادزلكم اسم القاتل بس اتأكد من شغلة وحدة..

_ لا شكرا ما ناخذ شي ولو نكدر نطلع حتى السيارة جان طلعناها فلوسك الك عندنا خير من الله..

أديم : الله يبارك بيكم ويزيدكم ويحفظكم ريتكم دايمين ...

_ الله يسلمك اتبعوني راح امشي كدامكم وقريب الباب اكو بيت من طين افوت بيه و اطفي الكامرات تحسبون عشر ثواني كون مختفين ما اكدر اخليها تعبر دقيقة لأن احنا كهربائنا ما تنطفي اكو مولد كبير موجود لهذا بوجود السيارة وانطفاء الكامرات بوقت محدد راح يثير الشك ونتأذى احنا ،و من حسن حظكم اليوم الحارس طالع وية الشيخ عندهم فصل..

هي تحجي وتمشي كدامنا واحنا نتبع خطواتها بخوف وحذر بالنسبة الية اما أديم جان ثابت الخطوة وما هامه شي ، محاوط كتفي وحاضني بقوة ، يمسد  كتفي بحذر مطمني ..

وصلنا للبيت اللي كالت عليه ، دخلت بيه بعدها طلعت واشرتلنا نطلع ، طلعنا نركض رغم خفت على خطوات أديم لا يتعثر بيها بس الحمدلله عدينا المكان ومشينا سريع ، على الطريق المبلط بعدها سحبني أديم وكال..

أديم : اخذينا على يمينج وبعدها اطلعي بينا كبل لا تلتفتين مهما سمعتي حتى لو ضربوا فوك راسنا طلق لا تهتمين..

أسمار : تمام بس ليش يضربون علينا.

حجيتها واني امشي وياه بالإتجاه اللي كال عليه..

أديم : اراضيهم ما يسمحون لغرباء يفوتوها

أسمار : وهاي الاراضي تابعة الهم

أديم : لا غير ناس...

أسمار : وهواي بعد يلا نوصل للشارع العام شلون بهيج حالة..

أديم : نمشي على كيفنا والله يسهل لا تخافين..

أسمار : عادي اتصل على الولد ؟

أديم : ابد مو عادي لأن اذا ردت ادليهم راح انطيهم عنوان ال حواش راح يهجمون عليهم خلينا نمشي بهدوء عيوني انتِ  ....

أسمار : تمام هذا هو..

أديم : تسمعين كلامي بعد؟

أسمار : التوبة اذا خالفت..

أديم : هذا هو نشوف..

نمشي إيد بإيد نسينا احنا منفصلين ، ونسينا الخلاف اللي بينا ، فعلاً المواقف تبين حقيقة العلاقة وتصقلها..

وكعت قطرة مطر على انفي ابتسمت رغم الرعب اللي عايشته..

أسمار : غيث خير يارب..

أديم : راح تمطر صح ؟

أسمار : اي هاي سترتك البسها..

أديم : مابردان..

أسمار : شلون وانت بطرك القميص الخفيف..

أديم : ما يدفيني غير شي واحد..

حجاها والتفت علية مبتسم.

أسمار : وهو ؟

أديم : حضنج يا ظالمة..

سكتت ما جاوبته..

اخذنا الواهس وبرودة الجو وجمال الطبيعة واني اوصفها بوصف رجعته لأيام قبل من جان ييجي ويفتر هنا قبل الحادث والثار ، حسب كلامه وشعوره من شبهلي وصفي باللي جان يشوفه..

حسيت بتعب قوي وصار عندي وجع اسفل بطني ، عصرتني روحي تأوهت بألم صحت آه..

التفت علية بقلق مستفسر ...

أديم : سمرة شبيج ؟ حبيبة روحي..

أسمار : عندي وجع..

أديم : وين عيوني انتِ؟

أسمار : اسفل بطني..

أديم : اقرب مكان بيه ظل شجرة اكعدي جواه حتى ما يلوحج المطر ونشوف شنو نسوي..

أسمار : لا عادي اكدر امشي.

أديم : لا تعاندين اكعدي واسمعي كلامي..

أسمار : كعدتنا خطر شلون اذا لزموك..

أديم : ابتعدنا هواي وهسه احنا بارض غير ارضهم اذا تعدوا علينا او ضربونا راح توكف بوجهم عشيرتين الاولى احنا والثانية اهل البستان ..

أسمار : اذا هيج زين.

أديم : رويت فضولج يلا اكعدي لخاطر الله..

رديت بارتباك خفت على الطفل لا يصيرله شي..

أسمار : تمام ، راح اكعد هنا..

كعدت وهو كعد بصفي رجع ظهره على جذع الشجرة وطلب مني انام على رجليه بس قبلها كال..

أديم : افرشي السترة مالتي ونامي عليها حتى ماتبردين .

أسمار : راح اكعد بصفك.

أديم : نامي أسمار واسمعي كلامي مو شليتي قلبي...

أسمار : تمام تمام راح انام بس لا تعصب..

فرشت السترة على الكاع ومددت عليها ، خليت راسي فوك رجليه ، اخذ وجهي بكف إيديه ، تحسس برودته ،مرر اصبعه على شفايفي وهمس..

أديم : ليش ترجفين بردانة؟

أسمار : لا..

حجيتها واسناني تصطك..

سحبني وضمني لصدره بقوة ، سرت رجفة بجسمي ، رجفة حب وطمأنينة غير عن الخوف والبرد اللي جنت حاسته ، صدقاً هنا نسينا نفسنا و وضعنا جنا خايفين على بعضنا لحد الموت..

دنك على راسي وهمس..

أديم : بطلتي ما تخاف ولا تتعب هسه نتصل على أهاب ويجيب سيارة ياخذنا واذا احد سألج وين جنتوا لا تحجين اي شي اتركيني اني افهمهم ماشي عيوني..

هزيت راسي ب اي نسيت حالته تصورته يشوفني ، رجع كرر علية السؤال بعدها همست.

أسمار : صار تتدلل..

حضني بقوة حسسني بمدى اشتياقه ، مشاعرنا تجاوزت الاحلام وتخلت عن شكو ذكريات سيئة مرينا بيها..

اخذت نفس عميق ، رفع نفسه ورجع ليورا باعدني عنه ، طلب مني اتصل على أهاب وهو يحجي وياه، كمت طلعت الموبايل من الجنطة واتصلت عليه وخليته بإيده اخذه مني وحجى وياه بهدوء واصفله المكان ومفهمه احنا طلعنا نمشي وبعدها اخذنا الواهس و وصلنا لهذا المكان ، من ردة فعل أديم وتكراره للكلام فهمت أهاب ما مقتنع وباقي يسأل الى ان أديم نهى المكالمة بكلمة تعال منتظرك..

كمنا من مكانا ومشينا بإتجاه الطريق العام على التبليط تاركين ورانا البستان والجو الحلو وريحة الاشجار، مرت ربع ساعة بهدوء وصمت ، توقفت سيارة أهاب وصعدنا ، جانت نظراته كلها اسئلة واستفسارات ، اهمها شجابكم هنا وانتوا بخير او لا...

وصلنا للمزرعة دخلنا كبل لبيتنا سبحت وتمددت بغرفتي وأديم بالإستقبال يم أهاب..

من الخوف والصدمة نمت بدون وعي ، ورا ساعتين كعدتني أفنان حتى اتغدا كمت احس بدوخة قوية وتعب فظيع طلعت للهول لكيت أسمر وأهاب وأديم كاعدين يتغدون سلمت باوعلي أسمر بنظرات عتب بس ما حجى ، كعدت وأهاب كال..

أهاب: شلونج ام اياس..

أسمار : الحمدلله زينة وانت؟

أهاب : ياالله يلا اكلي مدي إيدج واني زين بشوفتكم..

استغربت ليش محد سألني على اللي صار ، اكلت قليل انتبه أسمر علية وكال..

أسمر : أديم الظاهر احنا ما مرحب بينا هنا..

التفت عليه وجاوبه..

أديم : ليش؟

أسمر : زوجتك ماعاجبها تاكل ويانا..

أسمار : لا ليش ؟

أديم : سمرة ليش ما تاكلين؟

أسمار : كاعد اكل ..

أسمر : من كعدتي لحد الأن بس تخوطين بالماعون وصافنة..

أسمار : صافنة بالرحمة الألهية اللي اجتنا اكيد سمعتوا باللي صار..

أديم : سمعوا وعلقنا على الموضوع وانتهى لا يظل بالج..

أسمار : يعني ماكو خطر عليك بعد؟والسيارة رجعت لو لا؟

ضحك أسمر وباوعلي..

أسمر : تدرين شكد راح ننقط من غير السيارة لو ما عندج علم ؟

أسمار : مافهمت !!!

أديم : فدوة الها اهم شي سلامتها..

أسمر : اي وتعب عمرك راح لبيت حواش..

أديم : احسن ما رايح اني والحمدلله من  مرتي زينة لو مسوين بيها شي لو خسران الطفل منو يفيدني..

من سمعت كلامه وكلمة مرتي نزلت دمعتي ..

أهاب : الحمدلله على كل حال..

أسمر : عبالهم انت فايتلهم

حجاها وضحك..

أهاب : هو غير اني باث الرعب عندهم..

أسمار : من كل هذا الحجي اني صافنة بشي واحد واريد اسأل ممكن لو لازم ابقى ساكتة وما اعرف شنو اللي كاعد يصير؟

أهاب : لا يابه من حقج اسألي..

أسمار : ليش متهمين أديم بالقتل وقتل منو ؟..

أسمر : هلوو انلاصت..

أهاب : انسحاب تكتيكي..

أسمار : أديم احجيلي ترى مليت كل يوم اسمع شي وما افهم معناه ..

أديم : اخذوا راحتكم شباب وخلوني احجيلها كلشي ...

أسمر : الله يعينك

أهاب : اذا تحتاج امدادات احنا موجودين..

أديم : ما تقصرون دايمين..

طلعوا الولد واني شلت الصينية وأفنان اخذت تميم وراحت وراهم،  رجعت كعدت كباله رفع الضماد من على عيونه وصفك إيد بإيد ، جر نفس وكال..

أديم : اذا حجيت راح تصدكيني وتثقين بكلامي ؟ لو تشككين بيه ؟

أسمار : طبعاً اثق ليش انت حجيتلي شي مرة واني شككت بيك ؟ وبكلامك.

أديم : تمام راح احجي بس اتمنى ماتكرهيني ..

أسمار : لا ما اكرهك..

أديم : شوفي يابنت الناس اني جنت صغير وعشت بشاعة الحياة اللي امي عاشتها بحذافيرها شهدت قهرها ودموعها وحزنها وتعبها وغيرتها على والدي وحقدها على شريكتها ، وجانت تكبت كلشي بداخلها اني هنا اخزن الصور واضمها بداخلي لدرجة حسيت نفسي عاجز كدام حزن امي وتعبها ليش ما ادافعلها ليش ما احميها ، كبرت شوية وعبرت مرحلة المتوسطة كمت ادافعلها واوكف بوجه اكبر واحد يحاول يأذيها ، اولهم زوجة ابوية وبعدها بيت جدي ،و مرة من المرات ضربت امي بالجفجير جنت راجع من المدرسة واشوف امي مستسلمة جوة ايديها تستقبل الضرب بدموع سكتة واللي يخبلني ما تحجي لأبوية ولا تقبل اني احجيله ، وهي جانت تختار اوقات ابوية واني ما نتواجد بالبيت ولا حتى ولدها الكبار حتى تاخذ راحتها ..

بيوم اللي رجعت وشفتها تضرب امي لزمت الجفجير نفسه كسرته عليها  فقدت تخيلي انكسر على ضهرها ما خليت مكان يعتب علية راسها متونها دمرتها وهي بس تبجي وتصرخ على صوتها التموا بيت جدي وعمامي واحد منهم ضربني والثاني رزلني ومن اجوي ابوية والولد حجولهم واخذت نصيبي من الرزالة هنا منو شد وياية أرقم وأعقل وأبسل عادوني وكرهوني بوقتها وحتى صارتلي مشاكل وياهم بالبيت وبالشغل حزازيات صارت وهواي أمور ، وهي استمرت تعادي امي واني جنت بخط الدفاع الأول ماجنت انطيها مجال تأذيها ،بالرابع الاعدادي تركتها لأن بالي يم امي وخايف عليها وماجنت اركز وية الدروس ومن ارجع انقهر وما اقرأ رسبت اول شهر بالمواد وقررت اترك وتركت بعد معارضة الوالد ، ومشت الايام عبرت السادس صارت مشكلة لأمي جبيرة بسبب مرت ابوية دخلت مستشفى بوقتها ورادت تنعمي..

أسمار : اي صح اتذكر..

أديم : اي حجيتلج بوقتها من سجدت وطلبت عيوني تصير الها..

أسمار :اي صحيح كمل حبيبي..

أديم : بعدها من حركتي على والدتي هددت بقتلها وبهاي الفترة ابوية جان مشتري بستان عليه نزاع قوي بين عشيرتين من ضمنهم ال حواش اللي اليوم جنا بالبستان مالتهم..

أسمار : زين.

أديم : من اشترى ابوية البستان صارت مشاكل وتهديدات وانتهت بوقتها بصلح بتدخل وجهاء المنطقة ، بس ما نسوا ثارهم وية ابوية ضموها بكلبهم راح يوم اجى يوم ، اخوهم الجبير اشترى بيت بصف مزرعتنا وزرعله أذن يمنا البستاني اللي جان يهتم بالزرع طلع جاسوس الهم واحنا ماندري ، بيوم اللي هددت زوجة ابوية بالقتل هو رايح وحاجيلهم ، مر كم يوم وزوجة ابوية حبت تروح للسوك ، من راحت بعد ساعتين انخبصت المنطقة خبص كالوا زوجة أشعب بيت الغريب انقتلت ، انصدمنا شنو انقتلت منو يتجرأ هيج يسوي انثبرنا ثبر طلعنا بوجهنا للسوك لكينا الاسعاف توها واكفة اخذناها ورحنا للمستشفى بعد نصف ساعة اجتي قوة نزلوا بباب المستشفى دخل ضابط وياه شرطة اثنين وطلبوني بالإسم ، سألهم والدي شنو يريدون مني كالوا مشكوك بأمره..

اخذوني مكبل الايادي للمركز من رحت هناك اخذوا افادتي وانصدم اللي مشتكي علية أخوية من لحمي ودمي ..

أسمار : أرقم مو ؟

أديم : اي

أسمار :و شوكت قدم شكوى وين جان من اجاكم الخبر وليش شك بيك انت بالذات يعني لأن هددتها بالقتل ؟

أديم : بالضبط لأن هددتها ومن اجانا الخبر هو جان طالع بعد ما اعرف شوكت عرف وشلون وشوكت قدم شكوى ضدي المهم ، انحبست ٣ ايام على ذمة التحقيق ، واللي شهدوا ضدي ارقم والبستاني،من تواجهت وياه صيح علية واصر اني اللي قتلت امه

أرقم : انت اللي قتلتها ماكو غيرك ؟

أديم : ما قتلت احد ..

أرقم : هددتها وبشهادة الكل..

أديم : صحيح بس ما قتلت..

بقى عنده اصرار على الموضوع  لكن من حققوا زين وعرفوا اني وين جنت متواجد واهلي البقية جانوا شهود على وجودي بالبيت و وصف الناس للقاتل ما يشبهني لا بهيئته ولا جسمه طلعوني بكفالة ، من رجعت صارت مواجهة بيني وبين أرقم للدرجة اللي ضربنا بعضنا بيها..

ورجع وجهلي اتهام قوي بمقتل أمه وعلى اساس اني اللي دزيت احد يقتلها ، رجع قدم شكوى مرة ثانية وبدليل جايب شهود مدري من وين شهدوا شايفيني احجي وية القاتل قبل ساعة من القتل وهم انحبست بس الولد إيساف وأرود وأهاب وأسمر وأبسم خصوصاً الأخير جان دوره كلش قوي بكشف القاتل وعرفناه من راحوا ولزموا البستاني وهددوه بعائلته وكم بوكس وجلاق معترف على القاتل ومدليهم عليه اخذوه للمركز اعترف عليهم طلعوني ، هنا بسرعة ينتشر الخبر القاتل من سامع البستاني لازميه محاول ينهزم هو  و واحد اقاربه فجأة ونسمع بيهم انقتلوا و بنفس الوقت اللي انقتلوا بيه أرقم تمرض ٣ ايام نام بالفراش ومن نسأله شكو يكول نفسيته تعبت على امه بس كلنا شكينا بيه هو القاتل بس ماعندنا دليل ، من ضاع خبرهم وانسدت السالفة وماعرفوا القاتل منو هدوا علينا والبستاني رايح وكايللهم أديم هو اللي قتل زوجة ابوه وقتل ولدكم ومنا بلشت العداوة يومية تهديد وتتبعه عطوة وفصل وبقيت اني مطلوب الهم شوكت ما ادوس بستان ابوية اللي هو بإسمي انقتل والبستان اللي دخلتي بيه هذا راجع النا وملكي اني....

أسمار : وهذا سبب حقد أرقم عليك ؟

أديم : بالضبط..

أسمار : واني تصورت بسبب الورث.

أديم : وهذا هم سبب مو قليل..

أسمار : زين شلون رجعت علاقتكم قوية وياخذك ويرجعك للكلية وانت أمنت بيه..

أديم : ما أمنت بس سلمت أمري لأن تعبت هاي شغلة الشغلة الثانية كسرتي واللي صارلي وفقداني للبصر خلاه يندم ندم عمره وبقى يداريني فترة طويلة وصدمتي بأبسم دمرتني كمت ما اثق بأي احد بس اتقبل مساعدتهم لأن ما باليد حيلة..

أسمار : ياعمري يا أديم هاي شنو صاير وياك وشكد متحمل انت؟

أديم : وبعد وبعد اكو شغلات شوية شوية احجيلج عنها..

أسمار : وهسه انت بمنو شاك مدبرلك الحادث ؟ بعد كلامك رجع الشك يتوسد صدري اتجاه أرقم.

أديم : لو هو لو ابو الحر ونشوف منو وراه..

أسمار : الله ينتقم من كل شخص ظالم ويأذي بشر.

أديم : امين تسمحيلي هسه ارتاح وانام شوية لأن وردتي نامت وارتاحت واني بعدني تعبان.

أسمار : اكيد طبعاً اخذ راحتك..

كام وتحسس طريقه للحمام وبعدها دخل غرفته رحت وراه سألته اذا يحتاج شي لم شفته لدخل حلكه وكال.

أديم : عندي مرهم للعين داير مدايرها ولازم اسويلها مساج خفيف واني تعبان تكدرين تخليلي لو تعب عليج ؟

أسمار : اكيد وينها ؟ انطيني ..

تقربت واخذت العصارة من إيده ، تمدد كعدت يم راسه عصرت على اصبعي  وزعته على اجفانه وسويت مساج خفيف بطارف اصابعي وعلى كيفي حتى ما أأذيه ابتسم وكال..

أديم : ريت هاي الاصابع سالمات..

أسمار : ياعيوني أديم ربي يريح بالك ويعوضك خير ان شاءالله.

أديم : واذا جنتي انتِ هذا الخير اللي تعوضت بيه .

أسمار : تكون انت الجبر اللي ربي واعدني بيه.

أديم : دايمتلي..

أسمار : دايملي .

جانت اخر كلمة يحجيها قبل لا يستسلم للنوم العميق غطيته وطلعت سديت الباب ورحت للمطبخ كملت كم شغلة واتصلت على أهلي حجيت وياهم شوية وسولفت وية اياس ونطيته تميم حجى وياه اخر شي ، تولان اخذت الموبايل وحاجتني..

تولان : أسمار عندي خبر الج..

أسمار : يا الله خير ان شاءالله.

تولان : خير صدكيني.

أسمار : يلا نسمع.

تولان : أهاب ..

أسمار : شبيه ؟

تولان : خطبني.

أسمار : هاا؟ شنو ؟ من منو خطبج ؟وشوكت ؟

تولان : اليوم حجى وية بابا وسأله عن رأيه واذا موافق يتقدملي هو وأهله..

أسمار : صدك تحجين ؟

تولان : اي طبعاً..

أسمار : ما حجالي اليوم جان يمي.

تولان: ما اعرف بابا العصر بلغني واخذ رأيي ..

أسمار : وانتِ شنو رأيج ؟

تولان : بكيف بابا.

أسمار : وترجعين للعراق ؟

تولان : اذا يمج علواه.

أسمار : يمي لو يم الحب ؟ بينكم علاقة مو ؟

تولان : هاج اياس ثبرني ثبر يريدج ، هاك امك هاك..

أسمار: اني الج تهربي من الكلام، وذاك اني اعلمه...

سديته من اياس بعدما حجينا ربع ساعة اضافية للحجي السابق ، واتصلت على أهاب اكثر من مرة يلا رد..

أهاب : عيون أهاب ونظرها..

أسمار : بدون كلاوات المن خاطب اليوم ؟

أهاب : ها وصلج الخبر.

أسمار : بدون لف ودوران احجيلي

أهاب : تدرين بية احبها وتعجبني وعاجبتني من زمان بعد شكو ياعيني.

أسمار : واني اخر من يعلم وعود احنا اصدقاء..

أهاب : من بعد الوالد الله يحفظه انتِ دريتي ترضيها احجيلج قبل لا احجيله.

أسمار : طبعاً لا ما اقبل..

بقينا نحجي نصف ساعة بعدها سديته ورحت لغرفة أديم فتحت الضوء عكد حاجبه ورفع ايديه خلاها على عيونه وطلع صوت من فمه يدل على انزعاجه تركت الضوء مفتوح وبقيت اباوعله سمعته يتألم واجعه شي رحت اخذت موبايلي واتصلت على أسمر ما جاوبني تركت موبايلي ودخلت للغرفة مشيت على اطراف اصابعي كعدت يم راسه نايم على جانبه الأيمن والمخدة مطوية جوة راسه شعره نازل على عيونه مغطيها ، مديت ايدي حتى ارجع شعره ليورا دمعت عيوني واني اتفحص ملامحه واتسائل وية نفسي شنو يصير لو يشوف وما عايش كل هاي المعاناة اللي سببت بأذيته ، بس بقيت اردد بداخلي هو سبع وقوي اللي تحمل كل هذا ما يتحمل ألم مابعد العملية ويرجع حسيت بفخر اني زوجته و خير أب لأولادي.

كمت حتى اطلع تقربت خليت ايدي على كف ايده ربتت عليها بحنية وسحبتها التفتت جان يجرني من ايدي وكعت بصفه..

أديم : حياتي..

أسمار : شلون عرفتني ؟

تصاعدت انفاسنا بقوة همس بأذني.

أديم : عبالج اميزج من عطرج بس ولج حتى لمساتج اعرفها وافرقها عن الكل..

أسمار : شلون ؟

أديم : الاعمى اذا تقربت زوجته منه كل حواسه تستيقظ تخيلي اول ليلة قضيناها سوية من تركتي لمساتج الدافية على اجزاء جسمي تركتي وياها تأثير عمري ما راح انساه حتى دفئ لمساتج حافظها لدرجة حرارة جسمج اميزها عن البقية...

يسولف بصوت بيه بحة، ردت اغير الموضوع حتى اطلع...همست

أسمار : اسفة اذا كعدتك من نومتك.

أديم : هسه عفتي كل هذا الكلام الحلو وخليتي بالج يم كعدتي ، اني رايد هذا الشي وعاجبني.

اخذت كفوفه الضخمة بين ايدي وهمست..

أسمار : ارتاح وبعدين نحجي..

أديم : شوكت تعبت واريدج .

أسمار: مو وقتها يصفى كلشي يلا.

أديم : حبيبتي سمرتي عيوني خليني اعوضج عن اذيتي الج.

أسمار : تعوضني بس مو هسه.

أديم : راح ارجع انام سدي الباب وراج..

حجاها متظاهر بالبرود بس نبرته عصبية جانت ، سحبت ايدي وطلعت ، لكيت موبايلي يرن باوعت أسمر.

أسمار : الو

أسمر : وينج يمعودة صارلي ساعة اتصل ظل بالي .

أسمار : جنت يم أديم وتركت الموبايل برا.

أسمر : خير اكو شي ؟

أسمار : ردت اسألك عن حالته وبنفس الوقت اعرف شنو صار وياك بخصوص هذا الولد على منو اعترف..

أسمر : عوفج من الولد وعلى اللي اعترف عليه احجيلي عن حالة أديم.

أسمار : جاوبني أسمر.

أسمر : زوجج ما يقبل ..

أسمار : لا  صدك ؟

أسمر : وداعتج منعني احجيلج شي وحتى أهاب هم حذره ...

أسمار : ممممم

أسمر : وهسه احجيلي عن أديم شبيه ؟

أسمار : شوف من اعلك الضوء صاير ينزعج لدرجة يتأفأف ويغطي عيونه ويحب ينام بالظلمة وعنده ألم براسه بس يكابر ما يحجي الصراحة..

أسمر : هاي كل يوم لو بس هاي المرة.

أسمار: لا هسه انتبهت عليه لأن جان ساد عيونه بالضماد.

أسمر : راقبيه اذا تكررت الحالة ازور الدكتور واحجيله متفقين؟

أسمار : متفقين.

أسمر : وريحي بالج اني كاعد احلها الج ويجيج الصافي..

أسمار : مشكور يا اعز اخ بالدنيا.

أسمر : هذا واجبي سمرة وما يحتاج تشكريني ، اني المفروض اشكرج على صبرج وخوفج وتحملج لكل تصرفات أديم وتخبطاته.

أسمار : هذا حبيبي وهذا واجبي اتجاهه..

بقينا نحجي شوية وبعدها نهينا المكالمة..

نمت وثاني يوم قررنا بأتفاق اني وأديم وأسمر نروح لبيت طليقة أرقم والمفاجأة اللي غيرت فكرة طلعتنا من انفتحت باب المزرعة ودخلت خالتي أسن وياها إيساف والجنط مالتها وبابتسامة حلوة كالت..

أسن : رجعتلج..

يتبع..

صباح الخير لأحلى حبايبي...

متابعة ممتعة ، وعيونكم مشتاقة بس .......الله يعلم بالباقي ...