رواية أحببتُ ذلك الغريب الفصل الحادي وثلاثون 31 - بقلم عبير إدريس

يالشليت العگل
ابشرك ما ظل فكر بية...

بقلمي😘

________

غمضت عيوني واني سارحة بجمال الغزل الكاعد أسمعه أخذت كفه قبلت باطنه وخليته على خدي ميلت راسي عليه وهمست..

أسمار : اقسم بالله العظيم حبيتك حب مستحيل ينوصف بكلام ولا تتصور بيوم راح ازعل منك ومن عصبيتك او مزاجك الحاد ، نتكاتف سوى الى ان نوصل لبر الأمان ، راح اسمعك وافهمك واحاول احل المشكلة قبل لا تبدأ وراح انذر عمري في سبيل اعوضك عن كل معاناة عانيتها وكل ألم سببلك شرخ عميق بحياتك..

بحركة سريعة شدني لصدره وتوسدت اذرعه مسد شعري وباس راسي وهمس..

أديم : سعادتي من اسمع هذا الكلام ما ممكن اكدر اوصفها ، تخيلي انتِ بالنسبة الية مثل الغركان واجاه مركب من بعيد وبيه فريق انقاذ وانقذه من بعد سباحة سنة كاملة ، ولو ماكو هيج شي بس حبيت التشبيه..

ضحكت هو هم ضحك ..

أديم : اخ يا الهي شلون اهديتني زوجة تصوغ الكلام مثل صياغة الذهب بحيث تخجلني من افعالي ، شنو سويت جواك من فعل عظيم وعوضتني بحب اعظم من فعلي السويته...

أسمار : بوقت اللي تعرضتله للخيانة تعبت وفقدت ثقتي بالناس وبنفسي ، وكلت مستحيل بيوم ارجع اثق بجنس ادم وما راح اسلم گلبي بسهولة ، بس من لما دخلت للقاعة يا أديم اخ اخ شنو سويت بية خليت نبضات گلبي تتراقص فرح خليتني اتصور الحب وياك وارسمه بذهني وتخيلت كفي حاضن كفك وداخلين بمكان سوية من نفس الباب والابتسامة تعلو وجهنا بس رغم هذا كل التخيلات ما تجي نقطة من اللي صادفته وياك فعلياً حبك فاق الآمال والاحلام وحتى التوقعات صدكني مو اني اللي خليتك تبصر الحياة انت خليتني انسانة بصيرة وكمت اشوف الدنيا من منظور اخر ، صار كل شغلي الشاغل شلون اخليك سعيد ومرتاح.

أديم : كملي...

أسمار : ما دخت من ثرثرتي..

أديم : يا ريت تبقين تحجين وتدوخيني طول العمر سمرة صوتج راحة نفسية يسحب كل الحزن من كلبي ويبدده...

أسمار: زين شنو عاجبك نسوي اول يوم صباح النا..

جر نفس قوي وتنهد ...

أديم : العاجبني ما أكدر عليه هسه ، بس اكو بديل..

أسمار : وهو ؟

أديم : نشرب جاي بالحديقة وتوصفيلي كل شي يحيطنا بصوتج ..

أسمار : يلا اساعدك تكوم..

أديم : ما راح تكدرين يا غرامي ..

ابتسمت للكلمة ولزمت ايده قوي رجع ابتسم..

أديم : ابتسمتي ؟؟

أسمار : اي صح..

أديم : عجبتج ؟

أسمار : اي هواي.

أديم : يلا عجل ياغرامي ساعديني اكوم وراح اعتمد عليج بس خايف اتعبج..

أسمار : ليش ما نستبدل كلمة خايف بتكدرين يا بطلتي .

أديم : اووو فعلاً انتِ بطلتي يلا بطلت من هاي اللحظة اكول كلمة خايف..

أسمار : واكو شغلة اذا حجيتها تزعلني..

عكد حاجبه وهمس..

أديم : وهي ؟

أسمار : تكول اني هواي عليك..

جر نفس عميق وزفره..

أديم : هاي حجاية شهد خلتني احس نفسي كل الناس هواي علية..

اخذت ايده وساعدته يكوم ، نزلت رجليه للكاع وكعدت بصفه لزمت كفه ..

أسمار : بس ياحبيبي اني مو شهد وبعدين هاي شنو وتخليها على بالك وحدة حقيرة وناكرة للعشرة والمعروف تسوى كل شوية تتذكرها اصلا هي هواي عليك وعلى گلبك..

ابتسم وشدد لزمته على ايدي وكال..

أديم : صيحيهم خلي واحد منهم يساعدني افوت للحمام..

أسمار : راح نتولى هذه المهمة اني وأفنان من تتعافى رجليك بعد اني بس محد يساعدني بيك..

أديم : ولج..

أسمار : شكو ؟

أديم : بعدني ما متعود عليج.

أسمار : تتعود ..

أديم : وبعدين افنان بعمرها ما ساعدتني افوت للحمام.

أسمار : خلص ما تفوت..

أديم : سمرة..

أسمار : بكيفي..

أديم : لا هيج راح نتخارب.

أسمار : كل مهام زوجي خاصة بية اني والباقي ينشغلون بحياتهم شعلينا بيهم..

ضحك وهز راسه وتمتم كلام بينه وبين نفسه ما سمعت غير كلمة مخبلة...

ضحكت ، كمت غيرت ملابسي لبست كلبية ولفيت شال على شعري احترام للموجودين ولأديم خاف تحز بنفسه ويغار..

أديم : وين رحتي ؟ شنو كاعد تسوين؟

أسمار : شلت شعري ولفيت حجاب..

أديم : حجاب ؟؟؟

حجاها مستغرب.

أسمار : اي سويت شي غلط.؟

أديم : لا بس مستغرب.

أسمار : بعد فتت لمزرعة الغريب وراح تستغرب هواي من افعالي ..

حجيتها وضحكت..

أديم : باعي اني مستحيل اجبرج على شي ما تحبيه ابقي مثلما حبيتج لا تغيرين من نفسج شي.

أسمار : مستحيل تكدر تجبرني اصلا بس عاجبني ومرتاحة لهذا الشي..

أديم : اي عمي ما نكدر ومستحيل من هسه بدينا ...

أسمار : يلا راح اطلع اصيح أفنان..

أديم : سمرة حبيبتي صيحي أسمر بس اليوم وبعدها نتفاهم لأن يراد تتعلمين صعب اشمر ثكلي عليج لا نروح نتكسر اني وياج ونكضي شهر العسل بقسم الكسور يا حبيبتي يا فارتي...

أسمار : بطل كلمة فارتي ترى ازعل.

أديم : شو خفيفة كلش غشيتيني ولج..

أسمار : يمه منك عيني ناعمة شتريد اسمن ما اسمن..

أديم : لا يابه قابلين وندعي من الله تدوم هاي النعمة دايمة يابه انتِ وعودج الطري..

أسمار : اي هيج راضية عليك ورايحة اصيح أسمر..

أديم : ماشي..

طلعت لكيت الولد بالهول كاعد يتريكون صبحت عليهم ابتسموا من شافوني بس ما ردوا السلام..

أسمار : هاي شكو شنو شفافة شو محد يرد السلام..

ابتسمت أفنان وكالت..

أفنان : من عادات آل الغريب على الريوك محد يحجي يكعد ياكل وبعدها نصبح على بعضنا او قبل الطعام هاي عادة متوارثيها..

أسمار : وأسمر يكدر يبقى ياكل ساكت بدون ما يحجي؟

لعب حواجبه يجاكرني ويضحك..

أسمار : عيني أخوك يريدك تساعده اذا امكن تتفضل وياية..

شال بيده ٢ صمونات واشرلي عليهن يعني اكملهن يلا اجي..

أسمار : اني الأدري بيه تزوجت واحد من عشيرة الغريب مو الخرسان ، اجاني صوت من وراية نكد علية صباحي..

أرقم : اجتي البارحة تريد تغير عاداتنا ..

أسمار: صباح الخير ، اذا صرت من العائلة وما عجبني شي وين الضرر اذا غيرته..

تجاهلني وكعد وياهم مأشر لأفنان تنطيه صمون ، تركتهم ومشيت للمطبخ ، عبالي الكى خالتي كاعدة ما لكيتها استغربت بالبداية بعدين تذكرت عندها دوام ، تأفأفت وردت اطلع ارجع لغرفتي ، دخل أسمر بيده لفة وكلاص جاي قدمهن الية مبتسم..

أسمر : هاج اكلي وجه الفارة.

أسمار : ما ريد وخر من وجهي جنك جريذي...

أسمر : مقبولة بس هاج اكليها وجهج اصفر..

أسمار : وخر ضوجتني اليوم .

أسمر : شنو سويت؟

أسمار : واكفة بوسطكم واحجي وياك ما كدرت تعوف الاكل وتحاجيني.

أسمر : شوفي هنا اغلب العادات غريبة عليج بس ضروري تلتزمين بيها ليش حتى ما تصير حزازيات بينج وبين اخواني الكبار ، احنا هنا مو كلنا راضين على هذا النظام بس ملزمين نلتزم بيه ليش لأن من عادات اجدادنا وابوية وصى نكمل ونمشي بنفس المشوار.

أسمار : ولازم يمشون كلهم على هالشي ومن ضمنهم الاحفاد يمعود العادات كلها بالية ومشى عليها مي الزمن..

أسمر : هذا ريف مو مدينة والريف عاداته تختلف بعد تورطتي وحبيتي واحد منهم..

أسمار : اي هسه ما كلت شي بس تنرفزت من احجي وياكم وتجاوبوني بلغة الاشارات حسستوني خرسة..

أسمر : تتعودين مثلما تعودت خالتج تدرين لو هي موجودة جان ما جاوبتج وظلت تاكل ...

أسمار : صخام بعيني يعني هي هم تعودت مثلكم.؟

أسمر : اي بالبداية استغربت بعدين تعلمت..

أسمار : زين هاي بس الصبح لو كل وجبة؟؟ لأن اتذكر من جنا نجي كلنا نسولف ونضحك على الاكل.

أسمر : غير خطار ومجبورين نسولف ونجاملكم ..

أسمار : يعني انتوا ما تحجون على الأكل ابد ..

أسمر : لو تجين علية رأيي مثل رأي الشاعر من كال ( وَرُبَّ ضَيفٍ طَرَقَ الحَيَّ سُرى صادَفَ زاداً وَحَديثاً ما اِشتَهى إِنَّ الحَديثَ طَرَفٌ مِنَ القِرى)

ويعني اكو احاديث تدل على استباحة الحديث اثناء الطعام واكو تمنع لهذا احنا فريقين فريق يحب يسولف هواي بكل وقت وفريق يحب الهدوء والاكل بدون صوت ، احتراماً للكبير تلكيني اني وباقي المعارضين ومن ضمنهم انتِ مستقبلاً ننصاع للأوامر..

أسمار : عجيب غريب الكاعد اسمعه المهم عيني تعال وياية ساعد اخوك تأخرنا عليه وبعدين نتريك اني وياه..

أسمر : يلا امشي..

ترك الاكل وكلاص الجاي على الميز ورحنا للغرفة ، دخل سلم على اخوه وتشاقى وياه بعدها بلش يساعده اخذه على الكرسي وطلع بيه للحمام اني بقيت بالغرفة احاول احضر ملابسه ولأول مرة افتح ابواب الكنتور ، باوعت ملابسه هواي وما اندل شي ، سديت الكنتور وكعدت على السرير دقائق ودخلت أفنان حجت وياية شوية وبعدها طلبت منها تدليني على كل شي يخصه حتى اعتمد على نفسي واخفف عنها ، هزت راسها وبدت تشرحلي عن تفاصيل لبسته وشلون يحب يتأنق...

جنت استمع مستمتعة ، بعدها سمعت صوت اياس يسأل وين ماما ، تركت كلشي من ايدي وطلعت لكيته يمطي جسمه توه كاعد من النوم ، بوسته وحضنته قوي ، يتثاوب ويهمس باذني بنعاس..

اياس : اني كلش جوعان وتميم بعده نايم ..

أسمار: تريد تتريك وياه؟

اياس : اي احب اكل وياه.

أسمار : يلا هسه شوية ويكعد اخاف نعسان..

اياس: لا نمنا سوى لازم يكعد هسه..

أسمار : اي صحيح هسه اكعده..

اياس : ماما نقلتيني من مدرستي.

أسمار : حبيبي اللي يسأل عن مدرسته اي نقلوك عمو إيساف وخالة أسن..

اياس : يعني اداوم وية تميم بنفس مدرسته؟

أسمار : اي حبيبي تداومون سوية..

اياس : اي ..

ابتسمت لأن صار يلفظ الاحرف بشكلها الصحيح من جان صف اول حيل عانيت وياه جانت الحروف عنده تتكسر من راح للثاني صار احسن وان شاءالله هاي السنة بعد اكثر يتطور وبعد ما عنده مشكلة بالاحرف..

رحنا اني وياه كعدنا تميم ، تميم يكبر اياس بثلاث سنوات ، شافني ضحك ابتسمت وسحبت ايده وطلبت منه يرافقني للمطبخ ، كمز من فراشه واجى وياية طلبت منهم يدخلون للحمام ويغسلون وجهم ويرجعون للمطبخ حتى يساعدوني نحضر الريوك فرحوا وركضوا واحد يردم بالثاني ، ضحكت ودخلت المطبخ بلشت احضر الريوك دقايق وانضموا الية ، كمت اطلب منهم اشياء بسيطة يساعدوني بيها وشفتهم يحبون يسووها بحب..

كملنا الريوك ونقلناه للحديقة ، صح حارة بس اكو مكان مسكف وبيه مبردات ، جان زين الجو بهذا المكان..

رتبت الريوك ورجعت اجيب الصمون واشوف أديم وين وصار ، تأخر هواي..

اول ما فتت اسمع هوسة دخلت لكيتهم بغرفته كلهم يهوسوله وهو يضحك...

أهاب : نعيماً عريسنا..

أديم : ينعم الله عليك.

أرود : شلون تزوجون الاصغر مني هاي عيبة بحقكم وحقي ..

أهاب : واني اكبر منك بسنتين المفروض اني أول اتزوج يلا انت يلا أديم..

أديم : هذا الحادث الصارلي من فراغ لا والله من عيونكم.

أرود : اذا تجي للصدك اني حاسدك ولك شنو هاي سمرة تموت عسل عسل خرب بيومها..

أسمر : ولك تضحك للهوى.

أهاب : كتلونا كتل المسيح.

أديم : عاد مو بوجهي تحجوها احترموا شوية..

أنهد : حبيبي أديم احنا بالغزل كلنا نشاركك تدري عزابية واجني بنات سبحان الله تكول كرز ..

أديم : راح اطيح حظك هاا.

أزر : اخ اويلي ربي المياعة العندهم ما شايفها بس عند هند رستم بفيلم ست البنات..

أديم : هاي عود انت الصغير راح اطيح حظك اجي.

أنهد : كل احنا عيونك وكاعد نوصفلك وصف حي للنعمة العندك.

أديم : لا اله الا الله كافي ضجت ترى وحتى لو جان شقى اعتبره ماصخ..

أسمر : يلا برا بدون مطرود واني اولكم..

أديم : وين سمرة افنان صيحيها اني اخليها تطلع منا بعد خلي اكمل البيت حلم تشوفوها تاكلوها انتم.

أهاب : الصراحة اني متعجب شعجب ما ماكلها انت لحد الان.

أديم : راح اسبك وابوك ميت واني احبه أهاب طوختها صدك ضجت وتعرفني اذا لحيت وياية بشي ما احبه راح اطلع من طوري..

أهاب: وتتجاوز على اخوك الكبير ياحيف يا أديم.

حجاها بشقى والتفت غمزلي..

أديم : هي وينها أفنان رحتي تصيحيها؟؟

أسمار : هنا اني حبيبي.

كلهم بصوت واحد كالو..

_ يا حبيبي...

وجروها يضحكون ، بعيطة من أديم طلعوا يتراكضون...

رحت يمه وكفت جريت نفس مبتسمة تغير مزاجي اللي تعكر الصبح ..

أسمار : ريوكك برد.

أديم : جيبيه هنا لو اكولج اصبري خلي أفنان تجيبه.

أسمار : خليته بالحديقة وهناك عاجبني اتريك.

أديم : كل عقلج اخليج تتريكين بوسط فصيلة القرود

أسمار : هسه راح يطلعون للشغل كلهم مبدلين.

حجيتها وضحكت.

أديم : تضحك واني محروك حرك.

أسمار : عليمن ياعيني اني الك ليش تغار.

أديم : يابه محروك اكلها اغار اغار تكولي عليمن..

أسمار : من اخوانك تغار وتعرف حجيهم مزح بمزح هنا اكولك غلطان..

همسلي بكلمة تقربي ، رحت تقربت وصلت يمه رفع ايديه خلاها على اكتافي وهمس..

أديم : لا مو غلطان لأن ما اريد اشوفج بعيونهم ما اريد يخربون شكلك اللي راسمه بمخيلتي بوصفهم ..

أسمار : اني اوصفلك شكلي حتى ما يخربوه الك بس ذكرني بعد الريوك والولد جاعوا خطية..

بنرفزة كال.

أديم : ياولد؟؟

ضحكت..

أسمار : مو اخوانك ابني وابنك..

أديم : ها وينهم ليش؟

أسمار : خطية منتظرينا برا حتى نتريك سوية..

أديم : يلا نروحلهم.

كمت جنت كاعدة على الكرسي مقابيله ، فريت العربانة وطلعنا للحديقة وصلنا يم الولد اشرتلهم يصبحون على أديم ويبوسوه.. تقدم تميم حضن ابوه وباسه..

تميم : صباح الخير بابا.

أديم : صباح النور حبيبي..

اياس : صباح الخير عمو..

أديم : صباح النور حبيب عمك ، بس شو ما بستني؟

اياس : مو عمو أرود كال بعد محد يبوسك لأن شبعان..

أديم : هو هيج كال ؟

اياس : اي هو اني سمعته

أديم : ما عليك بيه وتعالي بوسني يلا..

اياس : اجيت..

حجاها مبتسم وتقدم على أديم باسه وحضنه مثل ما سوى قبله تميم ، كعدنا ناكل ، قربت الاكل يم اديم والماعون من اخليه كباله اطلع صوت واذكر نوع الصنف البيه حتى يعرف شنو كدامه من طعام وبنفس الوقت يندله بدون مساعدتي ، والجاي سويت نفس الشي..

أديم: دايمتلي.

أسمار : دايملي ..

بديت اكل واتفرج عليه صافن وفكه ينبض ..حسيت بعصبيته اللي ضامها..

أسمار : حبيبي لازم اكلي ما عاجبك لهذا ما اكلت منه.

أديم : لا مو هذا السبب عاشت ايدج.

أسمار : عجل ؟

ضحك هز راسه ...

أسمار: شو تضحك ؟

أديم : وينج وين العجل ؟

أسمار : من عاشر القوم ..

أديم : يعني ما تكولين لعد منا وجاي..

أسمار : عجل وشحلات العجل ، عجل لعدنا احنا هو الحجي بلا عجل ، عجل شنو لذته..

أديم : يا لوتيه غيرتي المثل هذا خاص باهل الجنوب.

أسمار : ادري..

أديم : چا وشحلات الچا چا لعدك انت هو الحجي بلا چا ..

أسمار : چا شنهي لذته..

ضحكنا وتغير مزاجه وبلش ياكل بنفسية مفتوحة...

أديم : بابا تميم اكو مي يمك؟

أسمار : اي موجود ، هذا تفضل..

أديم : زاحمتي نفسج؟

أسمار : ما سمعتك ، يلا اكل ريوكك..

أديم : يعني اسكت بس بشكل مؤدب..

أسمار : شسوي كل شوية وكلت زاحمتج وتعبتج وهذا واجبي..

أديم : خلي ابالج ماكو شي واجب عليج ، من تتعبين من شي ما مجبورة تسويه..

أسمار : ماشي ، تدلل، أديم صدك سؤال..

أديم : عوضي كولي..

أسمار : والدتك شوكت تكعد صارت ال ١١.

أديم : الحجية بعد مو هسه تكعد علاجها بيه منوم يخليها تتأخر للوحدة مرات اكثر بساعة.

أسمار : ها خطية يلا ترتاح احسن.

أديم : اي ، اكو جاي تصبيلي؟

أسمار : اي طبعاً..

صبيتله ورجعت صبيت الية طلعوا الولد سلموا وراحوا كلمن لشغله ، الأطفال كملوا اكلهم وراحوا يلعبون بعيد عنا..

انتظرت الجاي شوية يبرد بديت ارتشف منه ، اختنكت بالجاي من شفت أبسم دخل من باب المزرعة شافني وابتسم..

سرت قشعريرة خوف وهو يرمقني بنظرات حيرة على غضب ما فهمت نظراته شنو ، اشرلي بكلمة اش يعني لا تحجين ، واشرلي اروحله..

أديم : سمرة

أسمار : نعم حبيبي.

أديم : حبيبتي بيج شي؟

أسمار : لا ليش؟

أديم : شو سكتي ومن حجيتي صوتج يرجف..

أسمار : يمكن بردت..

أديم : برد وبشهر اب ؟ غريب..

كمت من مكاني ورحت كعدت بصفه التصقت بيه ، مد ايده اخذ كفوف ايدي رفعهم لفمه باسهم برقة وهمس ملتفت علية حاضني بايده الثانية..

أديم : ما بيج شي دافية وحلوة وحاس بحرورة دمج يتدفق بالعروق..

أسمار: مرات تصير رجفة بسبب البرد مو الا تحس بالبرودة اذا لزمتني

حجيتها ورجعت التصقت بيه اكثر لدرجة ضميت حتى وجهي بصدره ، انشد حمايته الية..

أديم : كولي اريد حضنك وفضيها سالفة بردانة كلاوات صح؟.

أسمار : اي صح ..

ضحك ولف ايديه حول خصري وسحبني نمت على كتفه غمضت عيوني حتى ما اشوفه اذا تقرب واجى وكف كبالي..

ظليت اتسائل شنو يريد مني ليش اجى وليش ما يريدني احجي وانبه أديم بوجوده ، رفعت راسي لكيته واكف بنفس مكانه عاكد حاجبه ومستغرب ، لم شفته لداخل حلكه متأسف هز راسه بعدم رضا وطلع من المزرعة...

أسمار : أديم .

أديم : اي حبيبتي كولي.

أسمار : أبسم جان هنا..

أديم : شنو ؟؟

أسمار : أديم على كيفك لا تعصب حبيبي بس ردت انبهك لكلشي يصير ..

أديم : وينه هسه ؟؟

حجاها بعصبية ومتلفت داير مدايره..

أسمار : طلع لا تدور

أديم : أسمار لخاطري هذا ابتعدي عنه واحد كلب وخاين..

أسمار : شنو سوه ممكن أعرف لأن ما اريد ابقى على عمى عيني.

أديم : احجيلج بس ارتاح هسه تعبان المهم اخذي حذرج منه وهسه اوصي الولد يكصون رجليه اذا حاول مجرد محاولة يفوت المزرعة..

أسمار : تمام هذا هو..

أديم : ساعديني افوت جوى حتى اصلي راح يأذن.

أسمار : اي بعيوني..

فريت العربانة ودخلنا جوى من سمع صوت امه طلب مني ندخل عليها دك الباب وصاحت أفنان ادخل ، يلا دخلنا ، اول ما شافتنا ضحكت وصلت على النبي عليه وعلى اله افضل الصلاة واتم التسليم..

عمرة : ماشاءالله تبارك الرحمن الرحيم ، شنو الشمس والقمر هلوا علية بوقت واحد ..

أديم : صباحج خير وعافية حجية..

عمرة : صباحك ورد وجوري مثل خدود سمرتك.

أسمار : صباح الخير يا خالتي الغالية ، اخذت كفوف ايدها ودنكت بستهم ، استغفرت وجرت ايدها..

عمرة : العفو امي حبيبتي صباحج عافية وراحة بال..

أسمار : يخليج ربي ويديمج..

عمرة : شلون وجه حلو لك يمة اديم زين ما اختاريت شوفها مثل الشمس ماشاءالله ..

أديم : حجية ولدج الباقين كفوا بحرك گلبي ما يحتاج اشوفها بعد

تقربت منه وهمست باذنه.

أسمار : هسه اوصفلك شكلي والا اخليك تشوفني ...

رفع راسه ناحيتي بتجهم كال..

أديم : وشلون راح اشوفج ؟ اني راح ابقى بحسرة شوفتج طول عمري.

أسمار : تشوفني وتشبع مني شوف وتمل ..

أديم : امل ؟

أسمار : اي .

أديم : كل عقلج ؟

أسمار : بوقتها نحجي هسه خلينا بالحاضر مستمتعين.

ظلينا يم الحجية قريب الساعة بعدها طلعنا منها توضينا وصلينا ، ورحت وية أفنان حتى نحضر الغدا وية ما خلصناه فاتت الخالة أسن للمطبخ بملابس الدوام ..

أسن : يا هلا بجنتنا من أول يوم بالمطبح ليش هيج أفنان غير تخليها تعرس..

حجتها وتقربت باستني وضحكت..

التفتت أفنان عليها جانت واكفة تقلب بالجدر مال تمن.

أفنان : هاي راسها يابس أكثر من حماج اللي هو زوجها لهذا ما اتعب نفسي شنو يعجبها تسوي.

أسن : يا ولج تلحكين على التعب هنا مو شباب مغول ياكلون نصف كونية تمن باليوم.

أسمار : لاحضت خالتي وانصدمت قبل لا تحجين بس يلا بالعافية اني شايلة هم مو للطبخ للمواعين شلون نغسلهن..

أسن : لا هنا راح تتفاجأين تغدي وكملي وتشوفين المواعين شلون ينغسلن.

أسمار : يعني طقوس خاصة مثل الريوك.

ضحكت خالتي وكالت.

أسن : بعدج ما شفتي شي .

أسمار : شو ما حجيتيلي شي وانتِ سنة يمهم قبل لا اجيج ..

أسن : خفت تترددين بقرارج وابقى وحدي اني وهاي المسكينة بوسط جيش المغول وهم حبيت تتفاجأين مثلما اني تفاجأت..

أسمار : خالة صايرة خبيثة..

أسن : بربج اللي تعاشر شلة الغريب ما تاخذ منهم .

أسمار : تاخذ ونص...

ضحكنا وكملنا تحضيرات منتظرين جية الولد ، مجرد سمعنا سياراتهم بلشنا نصب اول ما فاتوا بلشوا ياخذون المواعين ينقلوهن للأستقبال ، بعدها راحوا غسلوا وكعدنا ناكل ويانا أديم خلينا طبلة كدامه وياكل بهدوء ، ساكتين محد حجى حرف غير اللي يريد شي يناوشوه..

منتظرة بفارغ الصبر شلون راح نغسل هاي الكمية الكبيرة وشكد تاخذ من عندنا وقت..

كملنا والمواعين اللي بيهن اكل نظيف يرجع للجدر اما اذا باقي بيه مركة يتفرغ للحيوانات اللي بالمزرعة عندهم دجاج وبط واشكال بعدني ما شفت بس سمعتهم يحجون.

اكو جوة السفرة مثل الفرشة طولها امتار شالوها من الطرفين أهاب وأسمر وطلعوا بيها للحديقة طلعت وراهم اشوف وين موديها ، امشي مستغربة حالي حال الطفل اللي يريد يتعرف على مكان بيه العاب غريبة ، حتى أديم وابني نسيتهم ، مشيت وراهم وصلوا لمكان بيه حوض كبير ومليان مي نظيف نزلو الفرشة وبوسطها المواعين داخل المي من نزلوها سحبوا الفرشة وشروها على حبل قريب...

رفعوا ردن القمصان مالتهم واجتي افنان وخالة أسن بيدهم جلافات وطوس مال زاهي وتكابلوا اربعتهم ضحك وسوالف خلصوا غسلهن وسطروهن بمكان شكله مثل تنور الطين بس بيه رفوف من خلصوا أسمر راح جاب منقلة وشغل الفحم وأفنان جابت قوري الجاي وهو مدد على العشب..

أسمار : حارة هاي وين نمت؟

أسمر : متعلم هذا العشب اللي ما عاجبج ابرد من دخان المكاين اللي يحرك وجهنا..

أسمار : بس حارة شنو السالفة..

أسمر : ما تفوتين جوى هسه يطلع رجلج يسويلنا محضر وكل شوية محقق وية واحد بينا..

أهاب : اللي يسمعه اليوم يكول ولد الغريب ما شايفين نسوان.

إيساف : والله ما شايفين بجمال المسيحيات هي مال جذب..

كام أسمر وتربع على العشب وكال.

أسمر : يا هلا بالشيخ هسه حلوت الكعدة..

بعدها انضم الهم أديم بمساعدة أرود واجوي البقية بالتتابع شربنا جاي ضحك وسوالف عشقت هاي الاجواء اللي بينهم شلون تعاون حلو وحبيت المساوات العندهم بين الرجل والمرأة ،جنت متصورة هذا التعب كله على أفنان وشايله همها طلعوا كلهم ايد وحدة...

خلصنا الكعدة وقسم بيهم راحوا ناموا وقسم توزعوا على تنظيف الحديقة والكراج واني والبنات دخلنا نظفنا البيت ، جنت اشتغل بسعادة بعمري ما حسيتها ولا عشتها بحياتي العصرية اللي بالمدينة...

صار الليل تعشينا وسهرنا على فلم كلنا واللي ينعس ينسحب يروح ينام..

جنت اقرا ايات بكلبي لا احسد جو الألفة والمحبة اللي بينهم وكمية المساندة والتعاطف واحد اتجاه الثاني..

من نعس أديم ما طلب مني ندخل للغرفة ، رجع راسه ليورا على القنفة وغمض عيونه تقربت منه وهمست.

أسمار : حبيبي نعست ؟

أديم : يعني .

أسمار : نفوت ننام.

أديم : لا لا خلصي الفيلم بعدها نفوت.

هو باقي علمودي ما شاف منه شي وجان الهدوء يعم المكان عدا اصوات الفيلم..

أسمار : اساسا اني ما اندمجت وكاعدة علمودك.

أديم : واني باقي علمودج ليش وين اشوف حتى اتابع..

أسمار : يولي الفيلم مو ضروري تشوفه..

أديم : يولي على كولتج.

جنا نتهامس حتى ما نزعجهم..

وجنت لافة ايدي حول ايده وحاضنتها ومتلاصقين ببعض ، همس أهاب..

أهاب : أسمر ...

أسمر : هممم

أهاب : هسه يا فيلم نحضره ، الحسناء والوحش لو الاكشن اللي كدامنا ..

قصدهم اني وأديم الحسناء والوحش لأن الفيلم جان أكشن.

أديم : وصل بسمارك وتزين بسمارك فايتين ننام بعيداً عن الضوضاء اللي بصوتك المزعج..

أهاب : اخ وأويلي بس اشوفها لبنت الحلال واجيبها لهنا اني بعد اتابعك صدكني الغي المتابعة..

أسمر : ادري شنو أديم لو أنستغرام..

أهاب : شمدريني بس شو حلوين سوى خرب بيومهم..

أديم : شدعواك هالكد مراقبنا ..

أهاب : جفاف ياعمري جفاف

أسمر : النا الله هوبي النا الله.

أهاب : ما تنطينا ترنيم وتولان ويصيبج أجر وعافية.

أرود : انجب ترنيم الي وثولان الكم شوف منو يريدها..

أسمر : ادري هو ركي وعلى السجين وبكيفكم منو يكول البنات يقبلون بيكم.

أرود : كبار الاكابرية اخذناهن منهم بقن على ذني الصغار شبيك انت على واهس خالتها واختها تجي.

أسمار : عيوني اخواتي سافرن لا تحلمون بيهن ومستحيل يقبلن يتزوجن اذا ما كملن دراسة..

أهاب : ننتظر شنو عندنا..

أديم : وشكد يصير عمرك منا لذاك الوكت اكعد راحة يالعجوز..

أهاب : لك نسيت نقطة مهمة نسائهم عازفات عن الزواج من خالتنا أسن وشيل ايدك وعلى كبر يلا يتزوجن...

أيساف : عوف خالتك بحالها لا يطيح حظك.

أهاب : انت ليش تتجاوز ترى كل البيني وبينك سنتين ما ادري ٣ احترمني كدام مرتك ومرت اخوك على الأقل ماريد شي أكثر من الاحترام..

أسمر : قهرتني كلب..

أهاب : يانذل .

أديم : كومي خلينا ننام متت نعس راح انام على كعدتي وذولة مستعدين للحجي لباجر الصبح.

أرود : ابقوا يمنا ياعيني هو شنو ظل للصبح.

اديم : روح بابا روح ابقى للصبح نعسان اني .

أرود : علمودك اني

أديم : شلون علمودي؟

أرود : تعرف انت شاب وهي شابة واثنينكم حلوين تختلون بغرفة وحدكم والشيطان ثالثكم صعبة اشوفها.

أديم : ها الشيطان ثالثنا حبيبي أرود ترى اني متزوج خاف ناسي وهاي زوجتي.

أهاب : انت كاعد تضربنا بالصميم نعرف كلش زين هاي زوجتك ما الها داعي كل شوية مذكرني...

أيساف : كوم حبيبي اني اوصلك لغرفتك ونام ارتاح عليك بالف عافية سمرتك ، و اني اخذ مرتي واصعد انام ذولة صيع ما عندهم شغل وعمل سهر وطيحان حظ ونوم للظهر..

أسمر : نطق الشيخ بعد ما نكدر نحجي يلا عيني تصبحون على خير سدوا الابواب وراكم وعود راعوا مشاعرنا .

إيساف : شلون نراعي مشاعركم يعني ؟

أسمر : يعني ضحك بصوت عالي ما نريد.

أهاب : شقى زايد عن حده بيناتكم هم ما نريد.

أرود : ولا كل شوية وصحت حبيبتي ترى الحياطين الها أذان..

أديم : شوف إيساف الحسد عينك عينك.

إيساف : واللي صارلك من عيونهم ربك ستر وحماني.

أديم : وديني لغرفتي ومن باجر اسوي تحصين من عيونهم.

أسمر : لا تتعمدون تقهرونا حسد ما تشوفون..

ضحكنا وكمنا كل واحد لغرفته..

من دخلنا نيمه إيساف على السرير بعدما غيرله ملابسه بتراك قطني خفيف ، من طلعوا غيرت ملابسي طفيت الاضوية ورحت توسدت صدره ونمت ، تغزل بية وتغزلت بيه ودخلنا بنوم عميق ...

مرت الأيام متشابهة ويوم يشبه اللي قبله بس الفرق جنا نطلع اني وأسمر وخالة أسن حتى نكمل تجهيز بيتنا ونكعد بيه، اثناء ما اشتغل بالبيت اكتشفت غرفة من الغرف بيها لوحات وادوات رسم كلش هواي وتصورت هذه اللوحات أديم مشتريهن ومعتز بيهم لهذا جامعهن بهذه الغرفة الى ان سألت وعرفت المن...

نظفتها ورتبت كلشي بمكانه بحب وعيوني تطلع منها كلوب واني اشوف الرسمات شلون جميلة وتسحر بعدها طلعت متوجهة للبيت الكبير وكبل رحت لغرفة أديم ، دخلت جان يتغدى ويمه أفنان.

أسمار : هلو شلونكم..

جاوبوني بعدها كلت.

أسمار : شنو هذه غرفة الرسم تاخذ العقل شلون مقتني لوحات تجنن..

جان مدنك ياكل ، ابتسم وهمس..

أديم : عجبوج؟

أسمار : فوك ما تتصور حتى قررت من بعد اذنك طبعاً اعلق كم لوحة باماكن متعددة داخل البيت.

أديم : اي شكو بيها البيت بيتج يا سمرة..

أفنان : هذه اللوحات كلها رسم باليد..

أسمار : اي التمست هالشي بس هالرسام كلمة عبقري قليلة بحقه..

أفنان : هو عراقي من سامراء.

أسمار : واوو والله وعاشت ايده.

أديم : تحبين تلتقين بيه.

بفرح كلت..

أسمار : ياريت..

أديم : تمام اخذج اله..

أسمار : واريده يرسمني من بعد أذنك طبعاً..

عكد حاجبه وتغيرت ملامحه ترك الخاشوكة من ايده مسح حلكه بالكلينكس وهمس..

أديم : ما يكدر يرسم بعد.

اسمار : حرامات شنو اعتزل ؟

أديم : تكدرين تكولين هيج.

أسمار : اكيد حاربوه طبعاً الشخص الناجح هنا محارب.

أديم : صحيح.

أسمار : اذا معتزل شلون التقي بيه ؟ عبالي عنده مرسم ونروحله.

أديم : لا موجود ببيته..

استغربت شلون رجال غريب و يوديني لبيته هنا شكيت اكو شي غلط ، من سكتت همس ..

أديم : الرسام كدامج اذا تحبين سلمي عليه..

يتبع....

حبايبي مساء الخير

البارت اربعة الف الا شوية...

مو تكولون قصير انتحر هههههه...

احبكم...