رواية أحببتُ ذلك الغريب الفصل الحادي عشر 11 - بقلم عبير إدريس

لأجلك تركت الهوى
فلا هوى بعد هواك يهتوى

_______________

عكدت حاجبي استمع لكلامه ، باوعتله بنظرة قوية خليته يخجل من نفسه ، استمريت اباوعله وهو كذلك ، بعدها بنبرة حادة كلت...

أسمار : وياية تحجي ؟

حجيتها وكتفت ايدي ..

أبسم : ليش اكو احد غيرج هنا ؟

أسمار : أعرف ماكو غيري بس الكلام ماحسيته موجه الية..

أبسم : الج الكلام وجهته الج..

أسمار : المطلوب مني شنو اسوي ؟ او بالأصح شنو تريد انت؟

أبسم : خايف عليج .

أسمار : بصفتك منو ؟

أبسم : بصفتي إنسان وشايف الغلط بعينه وضروري انبهج عليه ، لان اذا سكتت وتلاكيتي وية شهد بنفس المصير راح اظل ندمان وياكلني القهر طول عمري.

أسمار : العفو انت وصي علية واني ما أعرف؟

أبسم : انت ليش هجومية ؟

أسمار : وانت ليش متطفل ؟

أبسم : اني بكدج وهيج تحجين وياية مو عيب عليج؟

أسمار : اذن احترم شيب شعرك وعمرك ولا توكف تهدد ببنات الناس وانت ما تعرف شي عنهم ، بعدين شبيكم خبصوتني لا تتقربين من أديم ، داخلة على طمع ، مصيرج مصير شهد اللي لحد الان ما عرفت قصتها ولا يهمني أعرف ، شنو لكيتوني لابسة البدلة ومنتظرة اخوكم بالكوشة شوكت يشرفني ويعقد علية ؟

أبسم : اعتبريني غلطان وانتِ الصح ، راح اسألج جاوبيني.

أسمار : وانت منو وتسألني واجاوبك جواب يوصلك لقناعة انت ترتاح بعدها ، اني اتصرف حسب الموقف اللي كدامي والكاعد اشوفه صح ، لا انت ولا أخوك تملون علية تصرفاتي سواء اتجاه أديم او اتجاه نفسي..

عكد حاجبه بعصبية كال.

أبسم : راح تمرين بمواقف هوواي كلش هواي وبيها تتذكريني وتتذكرين وكفتنا هنا وتكولين ياريت عبرت الشط من قريب وما غصت بيه.

أسمار : لاتخاف اني اذا سويت شي وطلع موزين ما اندم اعتبره تجربة وفشلت وتعلمت منها بس دير بالك على نفسك لا تتسمم بافكارك ، الله يعين عقلك عليك شلون متحملك..

أبسم : أول مرة بحياتي أشوف هيج بنية صلفة..

أسمار : واني أول مرة بحياتي أشوف أخوان مثل أخوة يوسف..

تركته ومشيت سمعت أفنان تحجي وياه تكول..

أفنان : البنية خطار شبيك وياها؟

جاوبها بحدة مسمعني صوته..

أبسم : خلي تدير بالها من اخوانج العصابة اولهم أديم وبعده أعقل وأرقم ..

ابتعدت وبعد ماسمعت شي ، تلاكيت وية أسمر شافني ضحك ، بادلته ضحكة متصنعة ، شاب ضحوك و شكله مريح وأريحي عكس اخوانه....

أسمر : ها شنو الوضع؟

أسمار : والله ما أدري حاسة نفسي فايتة بمعركة ما معروف غدارها..

ضحك ضحكة بقهقهات مرجع راسه ليورا بعدها كال..

أسمر : تعالي أسولفلج شغلة تعريفية عن هذه العائلة..

أسمار : دخيلك لا تحجيلي ولا اسمعلك خليني اخلص اليوم شلون ماجان وارجع من وين ما اجيت واعتبروني لا سمعت ولا شفت ولا تكلمت..

أسمر : زين اسويلج عشا وياية؟

أسمار : اكولك سؤال؟

أسمر : جواب.

أسمار : انت وية كل الناس هيج تتصرف اللي تعرفه واللي ماتعرفه ؟

أسمر : لا طبعاً اللي اعرفه غير عن اللي ما اعرفه.

أسمار : وشلون تتصرف وية الشخص الغريب.

أسمر : يعني بجدية شوية ويمكن رسميات.

أسمار : شو ماشفت هذا الشي بتعاملك وياية ولا وية خالتي ، وليش اني معتبرني من اهل هذه المزرعة وتريد نتعشى سوى..

أسمر : شوفي يا بنت الناس اولاً انتِ مو غريبة ، نعرفج من زمان يعني من فترة مو بعيدة ، شلون وليش اتركيها هاي ، ثانياً انتِ خطار ببيتي يعني واجبي اضيفج واشيلج بعيوني ومن واجب الضيافة الوجه البشوش وحسن المعاملة ، لو تريديني اكولج تريدين عشا والوجه قافل قفلة مالها مفتاح ، لو اجيب عشاية واكعد كبالج اكل وانتِ تتفرجين ، عيع تخيلت ...

حجاها وضحك..

أسمار : الحلو بيك انت تحجي وتجاوب نفسك وتوفرلي التعب.

أسمر : مو اني بتاع كلو بس هنا محد يعرف قيمتي غير بس أديمنا ..

أسمار : اعماركم متقاربة ، يعني خوتكم خوة صداقة صح ؟

أسمر : اي اصدقاء أكثر من اخوان.

أسمار : حلو.

أسمر : شبيج ضايجة ؟

أسمار : مابية هيج ..

أسمر : تحبين القهوة ؟

أسمار : منو ما يحبها ؟

أسمر : اذا ما تتعشين اسويلج وياية نشرب شنو رأيج ؟

أسمار : يلا ما راح ارجعك هالمرة.

أسمر : اسويها على الفحم متعوب عليها.

أسمار: هاي شنو ؟

أسمر :اصبري راح تعشقيها ، وتدمنين جيتج لهنا بسببها.

أسمار : نشوف وبعدين نحكم.

أسمر : تعالي وراية..

مشى كدامي هزيت راسي وضحكت ، اسأل نفسي شنو من عائلة غريبة هاي ، واحد ما يشبه الثاني ، تحسيهم بيهم خلل مدري اني بية خلل واجيت لهنا ، رحت وراه جان يشغل بالفحم ، اكو مكان صغير بيه بناء على شكل تنور طين بس مو للخبز ، وعليه شبكة حديد يخلون جواها الفحم ودلة القهوة فوكاها ، بفضول سألته..

أسمار : هاي تسوون بيها قهوة وبس لو شغلات ثانية؟

أسمر : قهوة جاي كباب تكة شنو يعجبج .

أسمار : بس شكلها غريب يعني ما تشبه المنقلة العادية اللي نشوي بيها بأغلب البيوت.

أسمر : هنا كلشي غريب ومختلف ما راح تشوفين شي مألوف حتى بالتصرفات لهذا يسمونا بالمنطقة بيت الغريب ، او ال الغريب.

أسمار : يعني مو بس أديم لقبه الغريب انت واخوانك هم؟

أسمر : بالضبط ، هسه اني معروف عني بالمنطقة اسمي أسمر الغريب ، محد يصيحني أسمر أشعب..

أسمار : سؤال ؟.

أسمر : هواي تسألين..

أسمار : اتحملني لان راسي امتلئ بالتساؤلات..

أسمر : كلشي ولا راسج يمتلئ هسه ينفجر علينا ، كولي اسمع واجاوب بأريحية ..

أسمار : لا تندفع اصبر.

أسمر : حلوة منج حبيتها شنو سؤالج..

حجاها وقدملي كوب القهوة اخذته منه احتسيت شوية ورجعته على الطبلة ، جنا كاعدين على كراسي من الخوص ،
اما المكان وجماليته ما تنوصف ، ترتيب قديم بهيئة حديثة.

أسمار : ليش هيج أسمائكم غريبة عجيبة..

ضحك شرب قهوته دفعة وحدة وقلب الفنجان فوك الصحن ، خضه وخلاه على الطبلة..

أسمر : مو بس انتِ مستغربة كل الناس ياهو يسمع بينا يستغرب من العدد ومن الاسم، لهذا قبل شوية كلتلج كلشي هنا غريب حتى الاطباع.

أسمار : هسه جاوبني لا تحجي شي خارج عن سؤالي..

أسمر : سبب تسمية الاسماء بهيج غرابة هو والدي الله يرحمه ويرحم والديج..

من حجاها ضحكت ، ابتسملي وكال.

أسمر : اوفرلج الجواب شبيج.

أسمار : يلا رحم الله والديك.

أسمر : يحتاج اردها؟

اسمار : شنو ؟

أسمر : الرحمة ؟

أسمار : لا مو ضروري

أسمر : اي عفية مابية حيل.

أسمار : هي كلمتين لو مختصرها ولا هالجمل الرنت على مسامعي ..

أسمر : تحمليني مو بس اني اتحملج.

أسمار :ماشي يلا كمل ..

أسمر : اي يابة ، ابوية الله يرحمه وينور قبره ، جان ماخذ دكتوراه باللغة العربية ،و ياطفل يجيه يسميه على وزن افعل ، يموت على الافعال تخيلي اذا راد يتغزل ب امي يكوللها..

سوف افعل لك جميلاً اذا قمتي بكذا شغلة ..

أسمار : الله شلون ترابط بالكلام.

أسمر : لا ابوية يختلف ما يحجيها هيج بس اني كاعد اشبهلج..

أسمار : اذا هيج لا تشبه احسن ..

أسمر : المهم من اني اجيت ونورت الدنيا هم راد يسميني اسم غريب عجيب امي ملت تعاركت وياه كلتله حلكي انعوج من اصيح على اخوته ، ومرة تحلف تكول ضربني شرجي وما صرت اميز بين أعقل وأبسل وأرقم وأبسم ، أنقهر عليها والدي وكللها انتِ اختاري الاسم ، بس بشرط يبدأ بالالف غيرها ماكو، امي تكول باوعت بوجهك شفتك اظلم ، تكول ما اجى ببالي غير اسم أسمر ، وسمتني الحجية بهذا الاسم ، همزين ربج اجيت اسود حتى لا احصل اسم غريب مثل اسمائهم..

أسمار : حظك حلو..

أسمر : مو شلون ماجان.

سكتنا بعدها كال.

أسمر : خلصتي قهوتج ؟

أسمار : شوية بعد..

اسمر : شنو رأيج بيها؟

أسمار : طيبة عاشت ايدك.

أسمر : اذا خلصتي اقلبي الفنجان شلون ما سويت..

أسمار : ليش يعني.

أسمر : شكد تستخدمين كلمة ليش ، اظن والله اعلم متعرضة لأزمة خلتج تخافين من المقابل وهواي تتحفظين على نفسج وتسألين بكلمة ليش وفي بعض الاحيان تكون اجوبتج هجومية.

أسمار : هاي كلها استنتجتها من كلمة ليش مالتي؟

أسمر : لا من طريقة كلامج هم.

أسمار : زين ليش تريدني اقلب الفنجان.

أسمر : كلبيه يمعودة وبعدين افهمج.

أسمار : تمام ، وهاي كلبته ..

أسمر : اتركيه..

أسمار : ماشي..

تركته على الطبلة وظليت اباوعله بغرابة شنو يقرأ فنجان وهو ولد أول مرة اسمع بهيج شي.

رفع الفنجان مالته وكعد يباوع بيه بعدين همس ..

أسمر : نفس الحظ شلون يتغير واني باقي هنا.

بعدها سحب فنجاني ورفعه ظل يباوع بيه عاكد حاجبه ، تارة يباوعلي وتارة يباوع على الفنجان ، بعدها بلش يحجي.

أسمر : عندج ماضي اسود ومتعب، ومغدورة ، وجان اكو شي بحياتج كلش حلو مثل امنية جنتي تتمنيها وانحسدتي عليها وراحت منج ، واكو بالبيت طفل عيونه عليج يباوعلج هواي ،هذا ابنج؟

سأل وباوعلي منتظرني اجاوب..

من كال هيج فزيت ، عكدت حاجبي بتوتر كلت.

أسمار : وهذا كله طلع يمك بالفنجان؟

ظل يباوعلي بشك ، بعدها دنك للفنجان يباوع بيه ، بعدين كال..

أسمر : عندج سر جبير وراح ينكشف ، بس اذا انكشف راح تتأذين وتخسرين شي اكبر من الخسرتيه قبل..

أسمار : ماعندي أسرار.

أسمر : متأكدة ؟

أسمار :طبعاً..

أسمر : تحبين شخص بقوة وراح تمشين ورا كلبج مع العلم العقل والاهل والمجتمع كله رافض هيج علاقة.

أسمار :لا يعلم الغيب الا الله ، اتركه من ايدك وعوف هذه الخزعبلات لان ماعندي ايمان بيها..

أسمر : راح تمرين بعقبات كلش هواي وحياتج الجاية بيها تعب ويمكن قليل من الراحة..

أسمار : ما أحب أسمع شي عن المستقبل أريد أكتشف حياتي بنفسي.

أسمر : متعرضة لخيانة؟

أسمار : انت تسألني لو تقرأ الطالع ؟

خفت منه لدرجة حسيت يعرف حياتي كلها ، ظليت أفكر معقولة أرقم او أعقل دازيه يجر لساني او عندهم معلومات عني ويريدون يتأكدون من خلال أسمر او احتمال يسجلون كلامي كلشي اتوقع ، بنرفزة ونفاذ صبر كلت..

أسمار : تصبح على خير اروح يم خالتي أريد أنام ورانا كعدة من الصبح حتى نرجع لبغداد..

أسمر : الج مساحتج وعذريني اذا كنت متطفل بس عبالي حالج حال بقية البنات تحبين هيج سوالف وكلت نتسلى..

أسمار : للأسف ما احبهن ولا بيوم تقربت من هيج شغلات الكعدة وياك حلوة لوما نعست تصبح على خير..

أسمر : تلاكيه..

تركته ومشيت بإتجاه البيت وعقلي امتلئ بالحوارات لو بيدي ورقة جان كتبتها وصارت قصة ، بس جمعت كل هذه الاحداث بزاوية من زوايا عقلي وقفلت عليهن ، لا بد ييجي يوم وافرغهم بورقة من اوراق حياتي ، يمكن الناس تقراها او يمكن اطويها واشمرها بالبحر او احركها .

دخلت للغرفة مال حجية ابتسمت وكعدت على الكرسي القريب من السرير ، الظاهر الحجية مقعدة لان من تريد تتحرك افنان تساعدها او تعدل المخاد وراها ، شافتني ابتسمت وسوت حركة براسها بمعنى هلا بيج..

رديت الابتسامة ، وكعدت استمع لكلامهم ، خالتي جانت مندمجة وياها بشكل ..

عمرة : وهاي حياتي من جنت صغيرة تعب بتعب ، بعدين خطبني ابو اديم ، جان يكبرني بهواي عشرين سنة لو اكثر بشوية ما اعرف احسب يا امي المهم هو جان شاب ومالي هدومه واني بعدني صغيرة يادوبك اعرف العب ، اي اي تزوجت ودخلت بعائلة ماعرفت راسها من رجليها بيها هواي ناس نساء رجال اعداد مو طبيعية ، ظليت عايشة وياه بالضيم ، خمس سنوات وماصار عندي طفل جبروه يتزوج بنت عم ابوه جانت اكبر مني بعشر سنوات ، اجتي شادة حزامها علية رادت تفرقني عن ابوهم بكل طريقة ماكدرت لان جان يحبني هواي ، اول دخلتهم صارت حامل بتؤام جابت أعقل وأبسل انخبصوا بيهم بيت عمي وجدهم صار يطالب بزوجة ابنه تجيبله ولد بعد ، ارتاحت اربع سنوات كبرتهم ورجعت حبلت وسبحان الله هم جابت توأم اللي هم أرقم وأبسم ..

أسن : وصار العرس عرسين والعزف على جراحج ياحجية ..

جرت نفس بحرقة..

عمرة : اي يايمة اي ، رغم اني وحق الحق فرحتلهم ومن كلبي بس لجمتي وين ؟ من الناس تباوعلي بنظرات ، تفهمني بيها اني عايبة وما اصلح للخلفة ، جنت ابجي بيني وبين نفسي وكدام الناس اضحك للهوى اللي يمر بس القهر اخزنه بصدري ما احجيه ممنوع اصلا احجيه ،لان يتفسر بغير شي..

أسن : صح مرات اكو اشياء نسكت عنها افضل من ما نحجيها وننفهم خطأ.

عمرة : بالضبط ، وهاي اني اداري والبس واوكل وانيمهم يمي ، يصيرون سنة اخذهم يمي بعد ، ماجنت مجبورة بكد ما احب اداريهم لان اني احب الاطفال ومحرومة منهم، أبسم وأرقم ظلوا وياية اكثر من الكبار لان جانت تخاف عليهم مني ما تخليني حتى اشيلهم تخاف احسدهم ، ..

بعدها صارت حامل وجابت إيساف ، وراها إسلام و أهاب وأرود مفرد مفرد.

زاد الحمل والتعب تضاعف علية، ابو اديم تعب من الهوسة والمسؤولية جان ييجي يمي بالبيت بعدما طلعنا بسبب المشاكل ، هي جانت ما تقبل ييجي يمي وهو من وراها جان يعوف البيت ويبات عندي اغلب الايام ، كامت تدز جهالها الصغار حتى ما تخليني انفرد وياه واعيش لحظات حلوة ، وماجنت احجي ابد اظل ساكتة ، وبيوم عمتي اجتي جابتهم يمي وجنت مريضة راسي يوجعني والوضع كله متخربط ، ليش ما كلتلها عمة اني ما اكدر اخليهم يمي اليوم حاسة نفسي مريضة..

باوعتلي هيج،، حجتها وقلدت الحركة بعيونها ، بحزن وحرقة كلب كالت..

عمرة : كالتلي ما تشوفين الله ماينطيج بزر لان حقودة ونفسيتج سودة ، ظلي عاكر لا مستفادين منج ولا الج نفع غير بس نصرف عليج حالج حال الحواوين بس علف ، لا حتى الحيوان نستفاد منه انتِ شنو نستفاد منج..

أسن : شكد صعبة ياربي..

عمرة : حيل حيل صعبة، بيومها كابلت الولد الصغار ودمعتي ولكمتهم سوى اوكلهم بيد وبيدي الثانية امسح دمعتي ،تركتهم و طلعت وكت الغروب دعيت بحركة كلب ورجعت توضيت فرشت سجادتي وسجدت بدعاء خاشع متذلل وبيقين كلت..

_ ياجابر المنكسرين أجبرني
ياجابر المظلومين اجبرني
ياجابر الخواطر اجبرني.

هاي الثلاث جمل حجيتهن من كلبي وبنية صافية لا احد علمني ولا قريتهن بكتاب ، وهيج يايمة وتغيب الشهرية عني ماصدكت وخفت احجي بيها لاحد ، يوم يومين شهر شهرين وخفت بالاكثر ، انتظرت بعد وماكو الى ان شفت بطني كبرت والبس عباتي واروح للجدة قريبة من بيتي جانت وهمست بحجايتين بيني وبينها مستفسرة ، باوعتلي فاتحة عينها وكالت روحي ياعمرة انتِ شايلة .

ماصدكتها ابد وظل الشك ياكل بية اكل الى ان كبرت بطني والناس كامت تنتبه وتباركلي ، بس أشعب يا بعد روحي جان ما مصدك ابد واللي يشوف فرحته يكول هذا بجرة ماعنده غيرهم ، تحاربت من ضرتي ومن عيالي كل يوم مشكلة كل يوم حجاية والحمدلله بسبب افعالهم علاقتي ب ابو أديم تزيد وتقوى أكثر الى ان بيوم من الايام حسيت بوجع قوي اخذني للجدة بذاك الليل شافتني كالت هاي شنو بعد وكت يامعزاية ، مو مال ولادة لان من رحتلها اول مرة حسبنا الاشهر ، وهسه اني واصلة نهاية السابع ، كالت رجعي ياعمرة نامي ورفعي رجليج وادعي من الله بطيبة كلب يحفظلج ضناج ببطنج رجعت وادعي عيني على السما كلت مثلما نطيتني بدون منية منك و فرحتني لا تاخذ فرحتي مني ، اذا تريد طفلي اخذني وياه..

والله ورجعت نمت و ابو أديم من حجيتله منعني اتحرك ، كام يشتغل وياية بالبيت ويساعدني وهناك يحتركون حرك ، الى ان دخلت بشهري هو وياي وياي وتفاجئت من عرفت الله رزقني بثنين ورورد ولد وبنية ، بلهفة سماهم ابوهم ، أديم وأفنان..

ضرتي من سمعت تخبلت كامت تخلف واحد فوك الثاني وجابتهم كلهم ولد بعدها التهت وياهم وتعبت لان وحدها اني رفعت ايدي عنهم مو مثل قبل، هي رجعت ليورا واني انفتحت علية ابواب السبع سعادات من يومها تدللت من ابوهم ، وصرت العزيزة لان ما بيوم طلع مني غلط لو اذيت واحد بيهم ، عيالي صاروا زينين وتغيروا وياية والحمدلله عشت براحة بس اللي نكد علية حياتي هي ضرتي ما جازت مني الى ان خلتني انام هاي نومتي ولليوم ماكمت بعد.

أسمار : لا اله الا الله ، وهسه هي وين؟

عمرة : ماتت قبل ابو أديم بكم سنة ، عكب ما طرحتني الفراش هي ماتت.

أسن : كل جرف كباله شاطي ولو الموت مابيه شماته..

عمرة : وهذا الصار وهسه كل الولد يصيحولي يمة الحجية والكل يحبني ويحبون ابني لو لا صارت الحادثة مال شهد فرقت الكل ماظل الحال نفس الحال..

أسن : الله يعينكم.

عمرة : يعين الجميع دوختكم اني.

أسن : بالعكس حبيت الكلام وياج حجية والله يشافيج ويرحم الحجي برحمته الواسعة.

عمرة : امين يمة امين..

ظلوا يحجون بينهم اجتي افنان جايبة كلبية جديدة طلعتها من الكيس وخلتها بحضني.

أفنان : كومي بدلي ملابسج حتى تنامين..

همست..

أسمار : ما يحتاج.

أفنان : خالتج غيرت ملابسها من زمان وتحللت كومي ياعيني انتِ هم..

أسمار: مرتاحة عادي.

أفنان : ترى جديدة.

أسمار : أعرف بس صدكيني مرتاحة.

أسن : كومي لبسيها ما ترتاحين بالنوم ادري بيج.

اخذتها منها وتشكرتها رحت على الجهة البعيدة بالغرفة غيرت ملابسي ، سمعت صوت سيارة طبكت وحجي ما مفهوم ميزت صوته من اقترب من الباب وهو يكول..

أديم : اشوف الحجية وبعدها انام لا يظل بالك..

اندك باب الغرفة ، راحت أفنان فتحته ، حجت وياه اسمعه يكوللها.

أديم : لا ما رايد افوت بس كوليلها أديم رجع وحب يمسي عليج قبل لا تنامين.

أفنان : صار

عمرة : سمعتك امي مساك خير وعافية..

باوعت على الساعة ، الثانية والنصف ليلاً ، جريت نفس ورحت مددت بمكاني ، ماكدرت انام ظليت اتكلب لحدما طلع الصبح ...

كعدت على هوستهم ، صوت جهال ونسوان هواي ، اسمع أفنان تكول

أفنان : صوتكم عندنا خطار من بغداد

جاوبتها وحدة ، مبين من كلامها من الريف مو بنت مدينة متسائلة منو موجود وفهمتها أفنان احنا من طرف أديم ، الصوت صار بعيد اعتقد غيروا مكانهم ، كعدت بفراشي مديت ايدي كعدت خالتي ، فتحت عينها باوعتلي ..

أسن : صباح الخير.

أسمار : صباح النور ، يلا كومي حتى نروح.

أسن : ليش ساعة بيش هسة ؟

أسمار : سبعة ونصف.

أسن : حيل هواي ما أعتقد الحك على دوامي وامج هم عندها دوام هسه تسويلنا مشكلة..

أسمار : اني ما راح ارجع للبيت ..

بعكدة حاجب كالت.

أسن : ليش ؟

أسمار : عندي امتحان خاف ما الحك ارجع للبيت وبعدين أروح للدوام ، وسيارتي تاركتها بالكراج.

أسن : هاي اخر مرة تسويها وتجين لهنا ومنا وجاي تبتعدين عن هاي العائلة ماعليج بيهم لا من قريب ولا من بعيد شوفي شلون كلهم غامضين وما تعرفين خيرهم من السيء مالتهم.

أسمار : اني هم هيج فكرت وصدكيني ما راح أغير الاتفاق مهما كان.

أسن : كومي بدلي يلا ..

أسمار : ماشي..

نهضنا من الفراش سوا، غيرنا ملابسنا وصفطت الفراش وخليته على صفحة ، عندي رقم أفنان خازنته يمي اتصلت عليها ، رن رن ومحد يرد ، بعدين سديته ، كلت هي تشوفه وترجع تخابرني ردت ارجعه للجنطة رن جاوبت اجاني صوته جر نفس وكال..

أديم : شلونج ؟ قبل لا تحجين أعتذر عن الصار وعد مني راح تسمعين توضيح وتبرير لكلشي صار وسمعتيه..

أسمار : نريد نروح اذا امكن تسوولنا طريق ..

سكت بعدها كال..

أديم : ما نمت الليل ..

أسمار : خالتي عندها دوام وبعد ما نلحك ..

جاوبني بضيق...

أديم : صار يابة صار هسه جايين..

سديته ، استغربت ليش هو جاوبني ليش مو أفنان ، توترت أعصابي شلون اطلع نفسي وشلون اترك هاي العلاقة اللي ما اعرف اولها من تاليها..

ثواني ودخلت أفنان بيدها صينية ريوك خلته على الطبلة ورفعت عينها مبتسمه..

أفنان : تفضلوا.

أسن : زاد فضلج ليش كلفتي نفسج.

أفنان : ما كلفتها سويت من الموجود..

أسن : عاشت ايدج يلا كعدي ويانة وكعدي الحجية.

أفنان : امي ما تكعد هسة علاجها ياخذ وقت بعد ساعتين يلا ، واكلها يختلف عن هذا..

أسن : ها خطية ..

أفنان : يلا أسمار تعالي كعدي..

جريت نفس ورحت كعدت بدون نفس اكلت مجاملة بس..

أسن : عاشت ايدج وسفرة دايمة بأهلها أن شاءالله.

أفنان : الف عافية عيوني ماسوينا شي مقصرين والله.

أسن : ابد حشاكم من التقصير ، اهل طيب والله.

أفنان : رحم الله والديج خالتي.

أسن : هسه نكدر نطلع عادي ؟

أفنان : بس يكمل أديم وتطلعون سوى لان دوامه ببغداد..

أسن : لا يابة احنا نروح .

أفنان : ابد والله ما يصير عندنا جيش من الزلم وتالي تروحون وحدكم شنو تكولون عنا مو أهل واجب؟

أسن : كاعد تخجلونا..

أفنان : لا تحسبيها هيج ياعيني احنا اهل ان شاءالله.

حجتها باوعتلي مبتسمة ، بعدها اخذت الصينية وطلعت مرت نصف ساعة وسمعنا هوسة برة ، التفتت خالتي كالت.

أسن : هاي شكو شو انخبصوا ؟

أسمار : ما أعرف حالي حالج مصدومة.

أسن : لو طالعين هسه ليش سمعت كلام أفنان ليش ؟ أخ أخ يا أسمار

أسمار : ها خالة راح تاكلين كلبي بعد صارت

أسن : شكو عليج انتِ ؟ اني الراح أتحمل الحجي واللوم لأن المفروض وعلى اساس اني مسؤولة عنج وضروري اعرف الشاردة والواردة بحياتج وهاي تاليها شوفي سوالفج وين وصلتنا.

أسمار : يلا كومي نطلع واني راح احجي اذا احرجونا لان بعد مابية اسمع حجي وملامة تعبت..

كمت اخذت جنطتي فتحت الباب ردت أطلع ، خالتي سحبتني من ايدي ، التفتت عليها ..

أسمار : هاا خالة ؟

أسن : اصبري عيب.

أسمار : مو عيب اختنكت أريد أطلع..

صفنت علية بعدين كالت...

أسن : يلا امشي.

طلعنا اني وخالتي ، عبرنا باب المدخل التفتت علية كالت..

أسن : مو حلوة طلعتنا لان اذا انسرق شي من البيت لا سامح الله راح يفكرون احنا اخذناه وطلعنا خفية ،خلينا واكفين ننتظر البنية تجي وتودعنا وراح تشوف مابيدينا شي ونطلع كدامها احنا،، وبعدين احنا متأخرين متأخرين.

أسمار : تمام ماشي خالة..

ظلينا واكفين ، انفتح الباب الخارجي دخلت سيارة ضخمة لونها أسود ، وكفت ونزل منها ولد شاب مبين من عمر خالتي شوية أكبر ، لابس دشداشة ولاف على راسه قطعة قماش يشبه الشيوخ اللي بالتلفزيون مشى باتجاه البيت قبل لا يوصل يمنا دنك راسه ، باوعتله شاب سبحان الخالقه ، طويل وصاحب اكتاف ، الوجه نوراني ، فات من يمنا ما رفع راسه ، من دخل سمعت صوته يسلم وبعدها اختفى الصوت ، ثواني وطلعت أفنان شافتنا كالت.

أفنان : يابة وين طالعين والله ترزلت من إيساف بسببكم لان شافكم واكفين برة عباله ما مهتمين بيكم.

أسن : جنا منتظريج حبيبة نريد نروح والله.

أفنان : خالة اني ماعندي خوات ورايدتج اليوم يمي انتِ وأسمار اعتبريها طلب من اختج الصغيرة ما اكول بنتج لان ما ترهم اعمارنا متقاربة ..

أسن : يعني محتاجتني بشي ضروري اذا هيج باقية عيوني الج.

جرت نفس بحسرة وكالت.

أفنان : راح ييجون بيت عمتي بعد شوية اهل زوجي السابق واريد تظلون يمي تسندوني..

ظلينا باهتين اني وخالة شنو هذا المصير المشترك والربط بالأحداث شي غريب..

خالة تعاطفت وياها بشكل واني كذلك لان مريت بهذا الشي قبلها لهذا خليت كلشي ورا ظهري وحبيت اسندها بهذا اليوم..

رجعنا دخلنا للبيت وهالمرة كعدنا بالصالون الثاني مو الكبير اللي بيه الزلم ، غيره ، جانت مرتبكة وخايفة ، تطقطق بأصابعها ، مرت فترة من الوقت واندك الجرس ، كامت ترجف لزمت ايديها حضنت كفي و همست..

أفنان : أحبه ويحبني وطلاقنا ظلم بظلم..

أسمار : ياحبيبتي قهرتيني.

أفنان : أريده شلون اذا حسموا الأمور وجانت مو بصالحي.

أسمار : المكتوب راح نشوفه اكيد حتى اذا جان مو بصالحنا

أفنان : بس اني بالكوة مصبرة نفسي شلون راح اتحمل اسمع صوته وهو يطلكني..

أسمار : ليش طلاقج محكمة بس.

هزت راسها والدموع انهارت من عينها برجفة كالت..

أفنان : بعده ما رامي علية يمين الطلاق..

أسمار : ياربي ..

ماعندي اي كلمة اكدر احجيها الها وابرد
كلبها ولا اكدر اغير رأيها لأن ما أعرف نوع وسبب المشكلة ، اقترب الصوت وتوضح أكثر ، جانوا كاعدين بالصالون الكبير ..

سمعنا صوت واحد يحجي بوقار وهدوء همست أفنان ..

أفنان : هذا أخوية الشيخ إيساف بلكت يكدر يقنعهم..

ظلينا نستمع لطريقة كلامه وشلون عنده قدرة عجيبة يدير بيها الحوار ويلوف الموضوع لصالحهم ، صار عندي فضول اسأل عن تخصصه.

أسمار : اعرف مو وقتها بس أسلوب اخوج أخذ عقلي شنو دارس ؟

أفنان : إيسوفي دارس فقه وأصول الدين ، وعنده دكتوراه باللغة العربية..

أسمار : ما شاءالله..

أفنان : يعشقون اللغة العربية هالكد ما بابا الله يرحمه جان مفعم بالحيوية من يدرسهم لهذا صار كلشي سهل عليهم.

أسمار : الله يزيد ويبارك..

بعدها حجى رجال ، أفنان كالت هذا عم بلال زوجي ، سمعناله بإنصات..

هزيت راسي ساكتة واستمع..

_ شكرا على استقبالكم النا اجيناكم اليوم حتى نوضح بعض النقاط المهمة وكلمن يروح لحال سبيله...

بعد هذا الكلام عم الهدوء بالمكان ، ثواني واندكت باب الغرفة ، اجى صوت أديم وهو يكول..

أديم : ام ميمونة ، تعالي بلا امر عليج..

كامت فتحت الباب وجانت ماخذتها الرجفة ..

أفنان : هياتني ..

أديم : اگعدي قريب الباب واسمعي الموضوع بحذافيره لأن يخصج الج أكثر ما يخصنا النا...

أفنان : اني وياك شنو تقرر راضية..

أديم : لا اني اقرر ولا غيري القرار الج ولو يعز علية تصيرين بهيج موقف بس هذا الصار ولازم نواجه كلشي بكلب حديد.

أفنان : ماشي لا يظل بالك.

أديم : كلشي يصير واي قرار تسمعيه عادي متوقعين احنا كلشي منهم مو صح ؟

أفنان : صح..

مد إيده بإتجاه الصوت مالتها لزم راسها سحبها ناحيته وباسها بكصتها وبعدين حضنها مطبطب على ظهرها برقة..

أديم : ابوية انتِ..

أفنان : يخليك ويسلمك الغالي.

هز راسه ساكت تاركها بعدما اخذت كرسي وكعدت عليه ، تقربت منها وكفت وراها لزمت ايديها حسيتها تريد دعم معنوي مني وبالفعل اخذت ايدي ولزمتها بقوة كأنما تعرفني صارلها سنين.

عمه اخو ابوه حجى بصوت عالي كال..

_ طبعاً اني خجلان بشكل مو طبيعي منكم لان مستوى استقبالكم النا غير عن الموضوع اللي جايين نحجي بيه وصدكني يا ابو تميم لو الموضوع بيه امل يتصلح بينهم جان اني اول واحد صلحت بس انت تعرف الصار مايحتاج احجيلك..

أديم : ابو محمد يابة جيتكم على عيني وعلى راسي وتعرفنا احنا اهل مضيف وبيتنا مفتوح للكل العدو قبل الصديق الجار قبل الاخ ، لهذا كول اللي عندك واترك الباقي علينا..

_ خجلان احجيها والله.

أديم : تخجل من ولدك؟

صوت الرجل رجف من كال..

_ ماردت توصل هيج مواصيل وداعة بلال..

أديم : حجي كلتلك احجي وماعليك شنو الموضوع ؟

_ يابة بلال احجي صعبة علية..

الولد حسيت بحسرتة من طريقة النفس اللي اخذه ، تحمحم وكال.

بلال : ام ميمونة صديقتي قبل لا تكون ام ابني ،وبيننا عشرة عمر وزاد وملح جمعنا سكف واحد وضحكة حلوة ، ما يوم اذتني ولا سمعتني كلمة مو طيبة بس الصار صار وما نكدر نرجع الزمن ونصلح الغلط ، سبب جيتنا اليوم ، جايب وياي الحك مالتها من حاضر وغايب وذهب وبيتها موجود تريد تاخذه تكعد بيه تريد بدل منه فلوس شنو يعجبكم اني وياكم.

أديم : خلصت ؟ أكدر أحجي؟

بلال : اي تفضل..

أديم : بلال انت مو بس نسيبنا وابن عمتنا ، انت صديق الطفولة وسندتنا بيوم مال بينا الوكت وجنت خير اخ ما اخيرك عن باقي اخوتي ، واني اعرف كلش زين لا بيك الخلل حشاك انت ولا اكو تقصير من اختي حتى احاسبها عليه ، اثنينكم انظلمتوا والله يجازي الكان السبب وبعد الصار صار ما نكدر نغيره وبأعتراف منك اختي ما قصرت وياك ولا اذتك بيوم.

بلال : صحيح..

أديم : مهرها كله شكد يجيب ؟ اذا ردت عقار او ارض بدل عنه؟

بلال : تقريبا يجيب ١٥٠ متر هنا..

أديم : الفلوس موجودة عندك ؟

بلال : اي تحب هسه انزلها من السيارة ؟

أديم : اي والله ياريت..

طلع الولد هو وعمه جابوا الفلوس وخلوها كبال اديم ، سمعنا صوته يتقرب من الغرفة بقوة صاح.

أديم : يابة ام ميمونة وصل حكج باوعيلي شو..

لفت نفسها بالعباية طلعت بس عينها وطلعت اخذت كيس ورجعت كعدت يمي ، اللي عرفته كلهم اقارب مابينهم غريب...

بعدها أديم دز أرقم وطلب منه يحسب الفلوس اني استغربت يعني معقولة هاي نفسيته ، شلون هيج يتصرف وياهم على الاقل خلي يطلعون يلا يحسب الفلوس عيب كدامهم وبنفس الوقت فكرت هو لو مفكر بيها من جانب ثاني جان ما خطى هيج خطوة ، الولد بكامل ارادته جاي وجايب مهر اختهم ويتعذر بدون لا محاكم ولا محامين ، كلش ضجت وحسبتها نقطة عليهم ..

ارقم حسب الفلوس شدة شدة بعدها اجى أسمر ساعده ، ربع ساعة وكالوا المبلغ كامل..

صاح أديم..

أديم : ابو عطاء يابه جيب بكد هذه الفلوس وخليها بكيس ثاني وتعال.

أعقل : صار ابو تميم.

أديم : تسلم ابوية انت.

جاب الفلوس وخلاهم كبال أديم ، بعدها حجى بصوت مسموع..

أديم : بلال تقرب يمي لان ما أكدر اكوملك جان اجيتك..

بلال : العفو ابو تميم اجيك على راسي.

أديم : سالم راسك ، شوف يابه حك اختنا وصل الها كامل وجيتكم على عيني وعلى راسي ، الاريده منك ما تخجلني ولا تردني وبدون ما تناقشني كول تم.

بلال : تم بس غير اعرف شنو ؟

أديم : أختنا غالية لا تنشري ولا تنباع ومن نطيناها الك اشترينا رجال ما بعنالكم مرة ، ومن خسرناك خسارتنا جانت جبيرة ما تعوضها لا فلوس ولا ذهب ولا اراضي وانت شايف بعينك مال ابوها واراضيه تارسة سامراء ، لهذا فلوسك ترجعلك وسلامي لأبوك كوله يكول ابو تميم ،حجي نسوان ما نمشي بيه احنا زلم ، وبيناتنا عيش وملح ولا عبالك اختي كسرتها لا اختي معززة مكرمة وفلوس الدنيا ما تعوض كسرة كلبها وفقدان زوجها..

قاطعه عم الولد كال.

_ شنو تحجي وياك بس بالفلوس مو وياك هذا حك البنية..

اديم : اختي وصل حگها كامل مكمل واني رديت الفلوس بمكانها بس حبيت اوضح شغلة لبلال قبل لا يرمي اليمين ويطلع ، تعرف كلش زين هواي رادوها مني وجنت شاهد بس اني تنغصتها الك لان اعرفك انت شنو من رجال حوك وراح تصونها بس خذلتني.

راد يحجي قاطعه أديم من طلب من إيساف يجيب أفنان وتدخل للصالون الكاعدين بيه ، جانت ترجف وتشهك بجت بصوت مكتوم .

أديم : ارمي اليمين عليها وخلينا ننهي كلشي ..

بلال بصوت يرجف كال.

بلال : ما قصرتي وياية حشاج والله الخلل مني ومن اللي جان السبب..

أديم : اختصر ابوية انت ما يفيد الحجي لو يفيد جان حجينا للصبح وصلحنا كلشي..

جر نفس وكال..

بلال : انت طالق طالق طالق..

طلقها بالثلاث ، هي شهكت واجتي للغرفة فتحت ايدي ارتمت بحضني تشهك وتبجي بحرقة قلب..

بعدها سمعت اديم يكول.

أديم : اعقل لا تخليهم يطلعون الغدة راح يجهز...

عافهم واجى يمنا بالغرفة دك الباب وفات متلمس طريقه طريقه ، صاح بصوت مهزوز حسيت بكسرته..

أديم : عيون اخوها وينج..

كامت مني راحت حضنته عصرها حيل من قوة الحضنة صوتها اختفى ، وخفتت شهكاتها همس بأذنها بصوت مسموع..

أديم : اصبري واحتسبي راح تشوفين العوض الجبير مادام ما سويتي الغلط وحشاج منه وربج كريم ، لخاطري لا تأذين نفسج و تخلين ملح فوك جرحي ولا تكسرين كلبي فوك كسرته ..

يتبع..

متابعة ممتعة حبايب...