رواية أحببتُ ذلك الغريب الفصل العاشر 10 - بقلم عبير إدريس

ان تبتر بعضك لتنقذ بعضك الاَخر
وتيقظ الكهل النائم داخل عقلك
لتأخذ منه الحكمة
خير لك من أن تعيش بعقل مشرد
داخل علاقات زائفة...

بقلم عبير ادريس..

__________________

يا أسمار انتِ بموقف صعب لا يحسد عليه ، الموقف صعب وردة فعله غريبة ، صار يضرب ضربات خفيفة على ركبته ، بعدها همس يغالط مسامعه..

أديم : شهد شهد ؟

أسمار : اي شهد..

أديم : شهد رحمن ابراهيم ؟

أسمار : هممم

بصوت يرجف كال..

أديم : متأكدة مو ؟

أسمار : اي

فتح باب السيارة حتى ينزل ، نزلت قبله نزل تارك عصاه بداخل السيارة اخذتها وقفلت السيارة والسويج خليته بالجنطة ، مشيت وراه جان متخبط ما يعرف وين يروح خفت يوكع يتأذى، همست..

أسمار : أديم راح تتأذى..

أديم : أكثر من هيج ؟ شلون تصير الأذية بعد؟

أسمار : هسه انت وين رايح بس فهمني.

أديم : ما أعرف ما أعرف ، بمنو أأمن بعد ، زين شلون ماتت وشوكت ؟ معقولة قتلوها ؟

ظل يحجي ويه نفسه ويعيد بالحجي بصورة هستيرية، بعدها رخى الأسكارف اللي يحيط عنقه ، وكال.

أديم : وكفي اي تكسي خليني أحجي وياه.

أسمار : تمام هسه..

وكفت سيارة حجى وياه، ماقبل يروح ، الثاني نفس الشي والثالث ، اخر واحد وافق ياخذه ، تقربت منه همست.

أسمار : هذه الباب أديم..

أديم : اريد اصعد ليورة ، مخنوك ما اكدر اكعد لكدام..

أسمار : ارجع خطوتين بعد توصل الباب..

حجيتها واخذت كفه خليته يتلمس مقبض الباب ، صعد وما حسيت بنفسي الا وصاعدة وياه ، ما اعرف ليش حاسته هذا الأنسان خاص بية ولازم اني ادير بالي عليه منا ورايح....

صعدنا ومشى بينا التكسي ، رجع راسه ليورا مغمض عينه نزع الاسكارف وشمره بعصبية على الكشن بصفه ، فتح بداية ازرار القميص واخذ نفس عميق..

جان مغيب لدرجة ما حس بية من صعدت ولا ناقشني ، لعد المصيبة شكد عنده جبيرة..

بلع ريكه وهمس متحسس الجزء العلوي من عنقه..

أديم : عندج مي ؟

أسمار : لا هسه نوكف بمكان وانزل اجيبلك.

أديم : حبيبي بلا أمر عليك أقرب اسواق تلاكيك ، جيب مي.

السايق رفع عينه وجاوبه بالمرايا بكلمة تتدلل، من وصلنا لمكان بيه كشك صغير ، توقفت السيارة نزل السايق، التفتت عليه سألته بقلق..

أسمار : بشنو تحس ؟

أديم : عندي التهاب باللوزتين صار يومين اخذت علاج الها وهسه حسيتها احتقنت وتضخمت أكثر ..

أسمار : علاجك وين ؟

أديم : بجيب السترة..

حجاها وخلى كفه يتحسس جبينه لزمها عاصر عينه همس ..

أديم : عيني ، يا الهي..

أسمار : تاخذ علاجك؟

هز راسه بلا...

اسمار : اذا متأذي نروح مستشفى ؟

رفع حاجبه وهمس ( هئ) معنى لا..

صعد السايق وبيده بطل مي ، التفت على اديم قدمه اله ، تعمدت ما اخذه منه وخليت اديم هو ياخذه ، الولد فتح عينه مستغرب رفعت اصبعي على حلكي سويت حركة بمعنى اش ، لا تحسسه..

تفهمني وهز راسه مقهور ، بعدها رجع يسوق ، اديم بعدما شرب المي رجع راسه وغمض عيونه بقوة..

مشت بينا السيارة وصلنا لمدخل مدينة سامراء رفع راسه السايق وباوع بالمرايه واصف لأديم المكان اللي وصلنه اله ، الأخير همس بتعب يدليه على مكان بيتهم ، مشت بينا السيارة بشارع عام ، السيارات جانت تتدافع برفق جنب الى جنب وعلى السايد الثاني سيارات كبيرة ، تسمى تريلات ،

وعلى يسار الشارع اكو سيارات اجرة مصفوفة ،
وعلى الرصيف عمال نظافة ، يعملون بجهد وضمير ، في سبيل نظافة هذه المدينة ، اللي لأول مرة أزورها..

انعطفت السيارة بينا بطريق ترابي، و حسب وصف أديم للمكان ، وكفت السيارة كدام باب حديد كبيرة وداخل البيت مبين منها ، يبعد مسافة كبيرة عن الباب الخارجي بالمقياس النظري حسبته ٣٠ متر او اكثر ، قبل لا ننزل التفتلي أديم بتعب وفرط من العصبية كال..

أديم : هذه السترة حاسبيه على الأجرة والمي اللي جابه ..

نزع سترته وشمرها على الكشن نزل ، واني حاسبت السايق اخذت السترة طويتها خليتها بيدي، خليت جنطتي فوق كتفي ومشيت مدنكة راسي ، اسأل نفسي ، وين جاية اني وشنو هذا المكان وليش تركني وحدي وفات معقولة ما مركز اني وياه ، لهذه الدرجة الصدمة مأثرة عليه..

باوعت اديم يمشي بمحاذاة شخص ثاني كلت اكيد هذا اخوه ، ظليت واكفة بمكاني ، ما خطيت خطوة جديدة..

انصدمت من شفت أعقل جاي بأتجاهي ، رجعت خطوتين ليورا بس بثبات ، وصل يمي عاكد حاجبه متسائل..

أعقل : شجابج هنا ؟

أسمار : اجيت ويه أديم..

أعقل : بمناسبة ؟

أسمار : بدون مناسبة هيج؟

أعقل : بصفتج شنو جيتي وياه؟

أسمار : انت شنو تريد بالضبط ؟

أعقل : اني الأريد لو انتِ ، التفتي شوفي المكان انتِ وين ؟

أسمار : ماعندي كلام وياك صيحلي اخوك.

عكد حاجبه مستغرب..

أعقل : أديم اذا راد ييجي راح ييجي ويه أرقم اعتقد تعرفيه..

أسمار : كاعد اكولك اجيت ويه أديم شبيك انت..

أعقل : لحظة فهميني وحدة وحدة ..

أسمار : شنو افهمك اكثر من اللي حجيته؟ اني اجيت وية اخوك وصلته وهسه راح ارجع بس المسافة عن شارع العام بعيدة وما اكدر اروح وحدي صارت دنيا ليل..

أعقل : ترى اني فاهمج أكثر ما انتِ فاهمة نفسج .

أسمار : المطلوب شنو؟

أعقل : أديم مو مسؤوليتج سامعة يا بنت الناس ، لا أديم ولا متعلقاته تخصج ولا تخص اي بشر ثاني خارج محيط اهله.

أسمار : انت..

قطع كلامي صوت أديم جان يصرخ بصوت عالي ، لدرجة تركني أعقل وصار يركض سريع متوجه للبيت ، جريت نفس وطلعت موبايلي من جنطتي اتصلت على خالتي..

أسمار : هلو خالة شلونج؟

أسن : وين صرتي أسمار ظل بالي وماعندي رصيد أتصل كلت شوية لاخ اطلع اشتري بس يكعد اياس حتى اخذه وياية..

أسمار : اني بسامراء.

أسن : شنو شنو عيدي.

أسمار : بسامراء مدينة بالعراق.

أسن : أعرف مو غشيمة بس شعندج هناك ؟

أسمار : أديم اللي حجيتلج عنه قبل فترة.

بعصبية ونترة كالت.

أسن : وشبيه هذا؟

أسمار : صارت شغلة جبيرة تخص حياته وجان وحده ماكدرت اعوفه اجيت وياه بنفس التكسي وتركت سيارتي بكراج الجامعة..

أسن : اي وشوكت ناوية ترجعين؟

أسمار : هسه ارجع.

أسن : منو يرجعج؟

اسمار : وحدي قابل صغيرة؟

أسن : اي صغيرة وستين صغيرة ، لج هاي ثاني مرة تسويها ذاك اليوم رحتي وياه للمستشفى وهسه لأهله شنو سالفتج انتِ؟

أسمار : أسفة خالتي السويته خطأ بس ماكدرت اتركه وحده.

أسن : يا عذرا ، امي شعليج بيه انتِ ؟

أسمار : انسانياً ما كدرت اتركه.

أسن : اهله وين ؟

حجتها وعاطت..

أسمار : موجودين.

أسن : وليش زفتي روحج ورحتي وياه لبيته،،

أسمار : اجي وافهمج هيج ما راح تفتهمين مني شي..

أسن : أنطيني العنوان بالمضبوط هسه جايتج ديري بالج ترجعين وحدج اموتج والله.

أسمار : هسه جاية عليمن تجين.

أسن : اذا ما تسكتين اخابر عارف وهو يتصرف وياج..

أسمار : زين شلون راح تجين؟

أسن : مثلما انتِ رحتي..

أسمار : واياس وين راح تخليه ؟

أسن : اتصل على امج تجي واحجيلها كلشي.

أسمار : خالة كلشي ولا تخليني بحلك ماما.

أسن : لعد شتريدين اتحمل مسؤولية طيشج وحدي بله صار عليج شي ما ياكلون وجهي ؟

أسمار : خالة شنو سويت وصلته وهسه راجعة.

أسن : لا ما مسوية شي غير رايحة وية واحد غريب لمحافظة ثانية وخيم الليل عليج وانتِ ما راجعة عفية اسمار عاشت ايدج، اوصفيلي المكان ودزيلي العنوان بالمضبوط يله..

أسمار : تمام..

جريت نفس بعدها وصفتلها المكان والعنوان حسب ما وصفة أديم للسايق ..

سديت الموبايل التفتت لكيت بنية حلوة تطلع بعمر أديم واكفة تباوعلي ، ابتسمت من شافتني التفتت ، رديتلها الأبتسامة، تقربت ناحيتي وكالت.

أفنان : مرحبا اني أفنان ، أكيد انتِ أسمار؟

بتردد كلت..

أسمار : اي اني شلون عرفتي ؟

أفنان : أعقل دزني حتى أضيفج يمنا.

أسمار : لا شكرا منتظرة خالتي راح تجي وارجع.

أفنان : زين اذا كلتلج ام أديم حابة تسلم عليج؟ تجين لو لا؟..

أسمار : والدتج تريدني ؟

هزت راسها بأي مبتسمة..

بعد تردد مني واصرار منها ، تبعتها دخلنا لبيت ماشاءالله اشبه بالقصور القديمة ، بناء عصري بذوق كلاسيكي قديم ، فتحت باب كبير بعدها اخذتني لمنعطف اشبه بممر بس هو مو ممر ما اعرف شنو اسميه ، بناءه غريب ، بعدها دخلنا لغرفة ثانية صغيرة ، بالنسبة للغرفة الاولى اللي دخلنالها ، سميت بسم الله وفتت ، لكيت اخشاب عادية متوسطها سرير مستلقية علية أمرأة تكبر أمي بسنوات معدودة ، أبتسمتلي رديت الأبتسامة مرتبكة هزت راسها مطمأنتني من كالت مأشرة بيدها..

_ اني ام أديم تعالي حبيبتي لا تخافين..

تقربت منها دنكت بستها بخدها حضنتني بقوة ،رحبت بية هواي بعدها ربتت بكفها على السرير وطلبت مني أكعد ، كعدت وعيني تتنقل بينها وبين أفنان اللي جانت واكفة بباب الغرفة.

_ منو الحلوة ؟

رجعت التفتت عليها ، ابتسمت وهمست.

أسمار : اني أسمار ، زميلته لأديم.

ضحكت ضحكة غطت وجهها بفرح ،كالت.

_ سامعة بيج هواي .

ما علقت على كلامها بأستفسار، ظليت ساكتة ، بعدها كالت.

_ منج عرف بخبر شهد ؟

ظليت ساكتة اني ، هي جرت نفس وأستغفرت هواي بعدها كلت..

أسمار : انتِ جنتي تدرين بيها ؟

_ ما أعرف يا بنيتي شنو أكول بس صدمتي ما تقل عن صدمة أبني اليوم..

أسمار : يعني انتِ هم جنتِ ما تدرين؟

هزت راسها بلا وهمست...

_ لا اني ادري بس ابني اليوم تفاجئ بالخبر هو سمع منج مو ؟ ..

أسمار : وهسه أديم وين ؟

ابتسمت الأم بعدها جرت نفس بيه حسرة وكالت..

_ بالديوان كاعد ومنتظر اخوانه يجتمعون لأن هنا بس أبسم واعقل ، البقية بالشغل يتأخرون..

ظليت اباوع بقلق وزاد خوفي بالأكثر، بعد تردد همست.

أسمار : اني شوية وأروح وان شاء الله يكون الوضع ترتب يمكم وتقبلتوا الموضوع..

جرت نفس طويل وكالت..

_ بيوم اللي فقد أديم بيه عيونه ولهذا يومج لا وضعنا ترتب ولا كدرنا نتقبل المواضيع اللي ترتبت جبر علينا..

أسمار : الله يساعدكم.

_ ويساعدج أمي..

ابتسمت وسرعان ما تلاشت أبتسامتي من سمعت صوت عالي وخشن يبدر من رجال ويه أديم اللي جان يجاوبه بتعب وصوت يادوب اسمعه ، بعدها امه صارت تعرفني عليهم من خلال الأصوات..

_ هذا الكاعد تسمعين صوته اسمه أبسم ، الرفيق الروحي لأديم بس للأسف صاروا أعداء من قبل كم سنة.

عكدت حاجبي مستغربة الاسم ، هي حست على أستغرابي وسكتت تنصت للكلام اللي دار بينهم..

أديم : يعني انت جاي تحاسبني الي؟

أبسم : المن احاسب غيرك ،فوكاها تجي تجمعنه تريد تفتهم الجريمة اللي سويتها حضرة جنابك.

أديم : اني سويت جريمة ؟

أبسم : اي انت عجل فسرلي شهد شلون ماتت حتى أعذرك، انت مو أخذتها بعدما لگيناها وحبستها والمفروض منك تحافظ على حياتها؟

أديم : منتظر أخوانك البقية يشرفون وأشوف شلون ماتت وعلى اي أساس اني ماعندي خبر بموتها؟ مادام ضميتوا علية الموضوع معناها الكم أيد بيها مو كلتوا على اساس انهزمت واخوها هزمها شلون تكذبون علية هيج شلووون..

أبسم : بالنسبة الية ما دريت الا هسة ..

أديم عاط بصوت عالي.

أديم : لك إيساف وينك..

ردد أسمه أكثر من مرة ، بعدها سمعت صوت مختلف عن صوت أديم وأبسم ، جان الصوت اكثر وقار ورزانة واهدأ من الصوتين اللي سمعتهم..

إيساف : نعم أديم ؟

أديم : احجيله لأخوك شنو فهمتني من أجيت ، لأن الظاهر عباله اني أكذب واني السبب بوفاة شهد.

أبسم : عجل اقنعوني أعتبروني واحد غبي وما دارس وفهمي على كدي..

إيساف : لا اني ولا أديم عندنا خبر بوفاة شهد ، واليوم من رجع أديم سولفلي الصار، رحت استفسرت من أعقل وما أخذت منه نتيجة يكول أسألوا أرقم هو يحجيلكم..

أبسم : يعني شنو ؟ أرقم وأعقل يعرفون بموت شهد ؟

أديم : للأسف اي اخوتك اخوة يوسف يعرفون بموت شهد وضاميها علية شلون وليش ما أعرف..

بعدها صار حجي وتراشق بالكلام لبرهة من الوقت بعدها ، سمعنا صوت أعقل يرجف ويحجي بعصبية..

أعقل : يعني شنو تتهموني اني القاتل؟

أديم : منو تهمك ؟ وعلى اي اساس هيج فكرت ؟

أعقل : صار ساعة أسمع حجيكم وساكت شنو معناها بس أرقم وأعقل يعرفون بموتت شهد ؟ فسرلي سوء الظنون العندي ؟

أديم : شوف من الأخير انت وأرقم المسؤولين عن موت شهد ، فسرلي سبب موتها المفاجئ واخفاء الخبر عني وعن باقي اخوانك..

أعقل : امك واختك يدرون وباقي اخوانك هم بس هذا ما يدري.

سمعنا صوت سيارة برا ، أفنان كامت فتحت الستارة باوعت منها وهمست.

أفنان : هذا تكسي بس منو بيه ؟

جاوبتها امها.

_ واحد من أخوانج ، اليوم كلهم راح يجتمعون هنا بسبب أديم.

أفنان ظلت تباوع واصبعها على شفتها تطبطب عليها بقلق ، بعدها كالت..

أفنان : نزل أرقم .

_ ها ليش هو مو وية أديم المفروض يرجع ؟

أسمار : جان عنده شغلة وراح وبعدها اني وأديم اخذنا تكسي واجينا..

_ شلون عرف أديم بموضوع شهد ؟

ظليت ساكتة شنو احجي اخاف اتورط ، وبنفس الوقت فكرت ، بجواب أديم أحتمال يكون مختلف ، لهذا تحفظت على جوابي وغيرته بكلمة.

أسمار : ما أعرف.

نظرات الشك حاوطتني ، سرعان ما انزاحت من اجتي بنية مبينة تشتغل عندهم طرقت الباب بعدها دخلت وكالت..

_ بنية اجتي وتكول اني خالة أسمار ، منو هي أسمار ؟

أفنان : اني رايحة ، رجعي لشغلج حبيبتي.

طلعت أفنان ، وسمعنا أرقم يحجي وية اديم بصوت عالي.

أرقم : بوية ليش ظامين الخبر عنك ؟ غير خايفين عليك تصير عصبي ، عمليتك الأولى ليش ما نجحت بسبب انفعالاتك ، ليش ما شايفين تطور بحالتك بسبب عصبيتك ومزاجيتك وتريد نحجيلك هيج خبر..

عاط بيه أديم بصوت خرسه.

أديم : لا تاخذني بالصوووت أرقم اليوم تحجيلي كلشي لا احرك الدنيا عليكم.

أرقم : شنو سالفتك كاعد اكولك هي حركت نفسها يعني شسويلها اني.

بهذه الأثناء دخلت خالتي الوجه باهت ومصدومة من اللي سمعته ، سلمت على الحجية وكعدت ، تباوع علية خازرتني..

أديم : أرقم جيبلك مخبل وكعده كبالك كوله شهد محبوسة بمكان لا بيه غاز ولا نفط ولا بانزين ولا حتى جداحة شلوون احتركت اذا مو بفعل فاعل ؟

جاوبه أرقم بنترة.

أرقم : يعني تتهمنا احنا حاركيها؟

أديم : ما كلت هيج.

أبسم : ما استبعد واحد بيكم أديم مكلفة يحركها..

أديم : شلون استنتاج غبي ؟

أبسم : لك جنت تتهمني وياها مجرد جانت صديقة الية واحبها على محبتك وحبنا اخوي رحت حبستها ورجعت انهزمت ورجعتوا دورتوا عليها لحدما لكيتوها وتالي رجعت حبستها تحقق وياها ، واحنا اوهمتنا وصورتلنا حياتكم عايشيها بسعادة تالي حركتوها ،،انت بالدوام و واحد من اخوانك ساعدك حتى تضيع على اهلها وعلينا ، بس عبالك راح اسكت واعديها لا والله اذا ما رحت لأهلها بلغتهم وأحرك الاخضر واليابس ..

أديم : يعني تريد ينقتلون اخوانك بسبب غبائك مو ؟

أبسم : مادام شهد قتلتوها ظلم تتعاقبون واني اعرف شلون اخلي القاتل يعترف على نفسه..

أديم : وخر من كدامي أبسم وخليني ساكت لا اسوي بيك جريمة..

أبسم : حرامات بيوم سميتك عضيدي يا اللي جنت اخوية..

أديم : طلعوووه من يمي بسرعة ما اريد اسمع صوته..

امه الحجية كامت تصيح.

_ ولكم طلعوه لا يتأذى أديم و تنتكس حالته ، بالف يا الله صار زين، لج يمه أفنان روحيلهم.

أفنان : يمة لا تورطيني وياهم هسه ياكلوني.

سكتهم صوت السيارات اللي سمعناها كأنما كاعدين بشارع عام ، عدا صوت الهورنات كأنما عرس صار عندهم والليل انكلب نهار من اضويه السيارات ، سمعت صوت شاب يصيح.

_ أجاكم أسمر ابشروا ، تفك جايب ، سلاح ابيض موجود ، خناجر سهام ، طلق بلاستك طلق حي ، عصا كهربائية ، زواج المطلقة ارجاع الحبيب، كلشي موجود بس كولولي ياهو هذا اللي مندك بأديمنا يوووول ...

رغم المصيبة اللي عندهم ضحكت..انتبهتلي أفنان هي هم ضحكت بعدين كالت..

أفنان : هذا أسمر..

حجتها وهزت كف ايدها..

خالتي كامت واجتي بصفي كعدت ، كرصتني من فخذي بقوة بعدها حجت ضاغطة على اسنانها..

أسن : شنو من عائلة هاي اليوم مكتشفين وحدة ميتة ومانعرف شنو تصير منهم وفوكاها محروكة ، وناس تنحر بناس بالكلام وفوكاها اجى هذا المخبل مدري منين ، انتِ وين جايبتنا ما توبين من سوالفج ؟

أسمار : خالتي اني متفاجئة مثلج ، جنت راسمتلهم صرح شو هسه انهد وصار بيت من طين..

أسن : طول عمرج هيج ابد ما عندج تفكير عميق للبعيد تفوتين بالشغلة غلط صح اهم شي ترضين غرورج..

أسمار : ها خالة سالمين.

أسن : اصبريلي اذا ما رحت حجيت لأناهيد سوالفج كلها ما اتسمى أسن..

حجت الحجية .

_ شلون صدفة حلوة ؟

التفتت عليها خالتي مستغربة وعاكدة حاجبها ، الحجية كالت..

_ صدفة أسمائكم.

أسن : شبيها ؟

_ مثل أسماء اولادنا تبدأ بالألف وغريبة.

أسن : هاا الله يخليهم.

_ الله يسلمج...

الصوت برا يعلى ويرجع يخفت ، بعدها صار صوت شخط سيارات بالأرض وصوت الرمل والحصو وجعلي أذني ، هالكد ما جان عالي...

الحجية صاحت سترك ربي ،افنان طلعت تشوف شكو ، واني اكلت القسم الكبير من الرزالة ، لحدما تشبعت ، بعدها كالت همس..

أسن : كومي يلا نروح..

أسمار : ماعندي شي.

كمنا حتى نطلع الحجية كالت..

_ وين عيني؟

أسن : راجعين لبيتنا هم يلة نوصل..

_ باتوا يمنا قابل كاعدين بالشارع؟

أسن : تسلمين حجية بس ما متعلمين نبات بمكان غير بيتنا..

_ انتظروا واحد من الولد ياخذكم.

أسن : لا رحم الله والديج احنا نروح.

_ يمه وين اكو هسه تكسيات لازم تمشون هواي يلا توصلون للشارع العام..

اسن : احنا ندبر امورنا تسلمين.

دخلت أفنان ، وجهه مخطوف، تحاول تسيطر على نفسها كدام امها ، اخذت نفس وتقربت من امها كعدت على السرير وحجيت بهدوء.

أفنان : حجيتنا القوية ادري بيج اذا ما سمعتي مني تزاعليني واني اخاف من زعلج واذا حجيت تتقبلين مني على كيف..

_ احجي شنو الصار؟

أفنان : هذا الغبي أبسم طالع منا ورايح لبيت عمي رحمن ومبلغهم بموت شهد..

شالت الحجية ايديها وخلتها على راسها وكامت تصفك بأيدها فوك راسها وتنعي أبنها أديم وتصيح..

_ يمه وحيدي راح يروح مني سودة علية أديم راح مني راح يلحك ابوه مو اني ماعندي حظ احويه مو مرة حوك لو حوك جان حويت ابوه ما ضيعته من ايدي.

أفنان : حجية انتِ قوية تحملتي الأكبر والأصعب من هذا وبعدين أرود أجى وبلغهم للولد واخذوا أديم وطلعوا من البيت ، يعني لا تخافين.

_ وراح يهدون علينا هسه واحنا وحدنا مو ؟

أفنان : برأيج أديم يعوفنا وحدنا ؟

_ لعد وين راح وعاف امه واخته وحدهن..

أفنان : أسمر وأرود وأنهد واحمد بالباب واكفين وشايلين سلاح، وأهاب وإيساف وآزر راحوا وية أديم طلعوه من المنطقة ، وأعقل وأبسل وأرقم وأسلام راحوا لبيت عمي رحمن يفهموهم باللي صار...

_ وأبسم النذل وين راح وياهم عليهم هذا تاليها هيج يجازي اخوه .

أفنان : يوم الصار جبير وتعرفين أبسم ما جان هيج..

_ خابريلي اخوج بسرعة..

أفنان : صار صار اخابره هسة بس على كيفج..

طلعت موبايلها واتصلت فتحت مايك ، ونطته الها ، اجى صوت أديم تعبان وعصبي تحمحم بصوت خشن مبحوح..

أديم : اي حجية أأمريني..

_ وين انت يابعد أمك وين رحت وعفتني ؟

أديم : وين عفتج هياتني يمج نشتم نفس الهوى العذيبي مال بساتين أشعب..

_ يمه لا تتمازح وياي ترى كلبي ملجوم من ابوك لا تلجمني بيك..

أديم : يا عيوني ونظرها انتِ فد يوم كلتلج شي وخالفته.

_ حشااا والله..

أديم : خلص وعد رجال ساعة ٣ الفجر اني يمج واذا ماجيت تبري مني.

_ اتبرأ من روحي وراحتي وعيني ونظرها ولا اتبرأ منك يا قطعة من كلبي لا بل كلبي كله..

ضحك بصوت مطمأنها كال..

أديم : هسه يجيج ابو سمرة ويشاقيج ولعبوا اللعبة اللي تحبيها ماتحسين الا وصار الوقت وانام بحضنج يالغالية ، لو انيمج بحضني اليوم ؟شنو رأيج ؟

_ لك يمه لا تلجمني بيك اديم..

حجتها وبجت..

أديم : حجيتي انتِ قوية وين ذيج عمرة السباعية اللي ما تنهز وبنص الحرب تفوت حتى توصل اكل للجنود مالتنا..

عمرة : عمرة راحت وية ما راح اشعب وراح نظرك يا بعد نظري..

أديم : كلشي يرجع بس ابويه هذا قضاء الله وقدره ما نكدر نعترض عليه..

عمرة : صحيح حبيبي..

ظل يحجي ويه امه ويتمازح وياها واني فاتحة عيني باهته ما اعرف على عدد الأخوان ماشاءالله ما اعرف على الاسماء الغريبة العجيبة ، لو على ردة فعل أديم الغريبة تجاه شهد اللي لحد الان عندي شك بين زوجته وخطيبته ، تصورت راح يروح بيها ، ياربي وين اني شنو سويت بروحي بشنو ورطتها ، رجعت اندمجت وياها من لكيتها تباوعلي تضحك وتكوله..

عمرة : يمه خطارك عايفه هنا ورايح ما كلت شنو تحب نضيفهم بينما تهل علينا؟

أديم : ياخطار ؟

حجاها متفاجئ..

عمرة : يايمة لا تتماصخ ..

أديم : كاعد احجي صدك منو جاي للبيت ؟

عمرة : سمرة الحجيتلي عنها..

أديم : أسمار ؟

عمرة : اي هي وخالتها..

أديم : يمه لحظة أسمار شنو جابها يمنا .

عمرة : اجتي وياك ، رجعتوا سوية..

تأفأف جر نفس وهمس..

أديم : لا ياالله نسيتها صحيح اجينا سوى وينها هسة ؟ لا تخليها ترجع وحدها اياج حجية منطقتنا مو آمنة خطرة..

ضحكت الحجية باوعتلي وكالت.

عمرة : لا تخاف عمرتك ما تخليها تطلع.

أديم : اي زين هسه راجع اني.

عمرة : وين راجع ساعة تسعة ونصف هسة ،،و بعد هواي على ال ٣..

أديم : حجية جاييكم اني ..

عمرة : لا تخبصها لروحك خالتها هنا اجتي.

أديم : خالتها ؟؟

عمرة : اي واسمها اسنية..

أديم : خير ان شاءالله هسه جاي يمة لا تخليهم يطلعون ابد ، حجية وياي ديري بالج يطلعون..

عمرة : اي اي كلتلك صار ما اخليهم يطلعون..

أديم : يله مسافة الطريق اني بالبيت..

اسمع واحد يمه يصيح بصوت ،سكت من اديم كال ..

أديم : الروح وحدة واللي ركبها ياخذها..

وبعدها انقفل الخط ، التفتت على أفنان ، سألتها..

أسمار : شنو اذا رجع خطر على حياته؟

أفنان : اللي فهمته من الولد بعدوا أديم حتى يحلون المشكلة وية بيت عمي رحمن اللي هم اهل شهد وبعدها يرجع أديم لهنا بعدما يتأكدون ماكو خطر على حياته.

ردت اسألها عن شهد ، دفع الباب طفل دخل بسرعته يركض اتجاه بيبيته يفرك بعيونه و يبجي، كامتله أفنان، رفعته من الكاع وخلته بحضن الحجية ، التفتت الاخيرة علينا وكالت..

عمرة : هذا تميم أبن أديم ، امه شهد اللي حركت نفسها..

ظليت ارمش بعيني باهتة مو مصدومة بزواجه لا شي طبيعي هذا ، بس انصدمت باللي سمعته عنها وشلون جان يعاملها بقساوة ، بلعت ريكي هامسة لخالتي.

أسمار : اريد اروح..

أسن : اني هم كلش ما مرتاحة .

حجتها بعدين التفتت تجاه الحجية كالت.

أسن : عيوني حجية احنا رايحين ما نكدر نتأخر بعد والأهل ما يدرون احنا هنا جايين.

عمرة : ميخالف يمه صبر بس يرجع أديم وياخذوكم ما سمعتي شلون شدد علية امنعكم تطلعون منا..

أسن : من يرجع سلمي عليه وكوليله اصروا يروحون واني منعتهم واهلهم بالبيت يظل بالهم.

عمرة : مايصير بنات وحدكم تمشون بهذا الليل بوسط البساتين خطرة عليكم.

أسن : واحد من الولد يوصلنا لراس الشارع بعدها احنا نتكفل بكلشي اذا ما بيها زحمة عليكم..

عمرة :لا يمه ماكو اي زحمة هذا هو براحتكم .

بعدها التفتت على أفنان وكالت

عمرة : شوفي ابو سمرة وينه خليه يوصلهم لدارهم ويرجع..

أفنان : صار.

كامت خالتي لزمتها من ايديها..

أسن : كوليله ياخذلنا تكسي وهذا هو..

أفنان : اعرف اخواني ما يقبلون بس مع ذلك راح انفذ رغبتج تدللي..

أسن : ما يدلل عليج ظالم حبيبة..

طلعت دقايق ورجعت كالت..

أفنان : أسمر يكول يلا خلي يطلعون ، ولو يعز علينا تروحون بدون عشا ولا ضيافة الوضع اللي صار اربكنا كلنا..

اسن: لا امي الله يساعدكم واعتبريها وصلت الضيافة..

عمرة : والله راح تزعلون أديم بهاي طلعتكم..

أسن : شلون ياحجية لازم نرجع لأهلنا.

عمرة : يعز علينا والله يابه.

أسن : فدوة لعمرج حجية عزيزة وغالية اوعدج نجيج بأقرب وقت ..

عمرة : يايمة حبيتكم..

أسن : والله احنا هم حبيناج.

عمرة : هيج دخلتوا بكلبي..

أسن : فدوة لعينج حجية.

عمرة : والله نكعتوا بيه مو يمه افنان..

ضحكت افنان وكالت..

أفنان : من زمان ناكعين بكلوبنا حجية من زمان..

حجتها وضحكت ، عرفت تلمح لأخوها ، بس مافرحت ، جان الخوف والقلق مسيطر علية وعلى مشاعري..

أسمار : يلا خالة.

أسن : يلا عيني

كمنا بوسنا الحجية وافنان وطلعنا ، جانت تمطر رذاذ خفيف ، اليوم نهاية شهر ال ١١ وباجر نفوت بشهر جديد الصبح جانت باردة وهسه بردت اكثر ، لبست كلاو القمصلة،

ومشينا وصلنا لباب المزرعة ، التفت علينا شاب أسمراني ، ينطي شبة لأرقم وأديم ، نفس الدم ، شافنه ضحك ، برزت غمازاته ، حافرات خده ، ملتحي وشاربه كثيف ، عيونه حادة تشبه عيون الذئب هيج مسحوبة ...

أسمر : على وين رايحين يابة شنو بيتنا ما يصلح للضيوف لو ما عندنا نفرشلكم مائدة ترى ملتهين بأخونا ، ما مقصرين وياكم عمداً ، احنا اهل ديوان واهل مضيف وهذا حلال ابونا ، ورثناه ابا عن جد..

ضحكت بداخلي هذا شكاعد يحجي شبيه هيج منفعل ، خالتي ضحكت مجاملته بطيبة خلك..

أسن : عيوني خالتي تسلملي بس نريد نرجع ومبين عليكم اهل خير وشبعانين ما يحتاج تكول وتشرح..

أسمر : خالتي ضايكة أكلي اذا طبختلكم والله ما تهدين المزرعة بعد وراح تسميها المزرعة السعيدة..

ضحكت خالتي بصوت، بعدين تأسفت لان ضحكت وهم بهيج وضع ، ردلها الإبتسامة بضحكة حلوة ، ربت على صدره وكال.

أسمر : يابة خطار أديمنا غالين مثل غلاوته وأكثر وما يصير يطلعون اذا ما نشيلهم على كفوف الراحة..

أسن : فدوة لعينك امي بس خلينا نطلع منا ورانا طريق طويل عيوني انت.

أسمر : اني اوصلكم ليش شايلة هم الطريق؟

أسن : زحمة عليك وبعدين شلون ترجع والوقت متأخر..

ضحك والتفت على ولد صاحه بأسم أرود..

أسمر : أرود ..

التفت الثاني عليه ، غمزله وضحك كال.

أرود : ما يدرون.

أسمر : لا.

أسمار : عفية افتح الباب خلينا نطلع تأخر الوقت..

التفت علية عاكد حاجبه بأستغراب كال..

أسمر : هاي منو حجى ؟

أسمار : اني.

أسمر : وليش هيج صوتج؟

أسمار : شبيه؟

أسمر : لا مابيه بس ما سامع منه قبل.

أرود : معزوفة .

أسمر : كناري.

أرود : هسه يجيك..

أسمر :لا بربك اسكت هذا يغار حتى لو شقى..

حجيهم كله الغاز ومبطن بس اني افهم قصدهم يتمحور حول أديم ، واعتقد يعرفون بيه يحبني او عنده مشاعر اتجاهي سواء اعجاب او حب..

أسمر : يلا بلا ما تتاخرون واني اتأخر واخاف ارجع وحدي هالمرة ارجعكم وياي...

ضحكت خالتي وطلعت تمشي وراه واني تبعتهم ، صعد و صعدنا بسيارة عالية لونها اسود ، ، باوعلنا بالمرايا عاكد حاجبه وجه السؤال لخالتي.

أسمر: خالتي؟

أسن : ها عيني.

أسمر : عود ليش ما كعدتي ليكدام ؟

أسن : عادي غير لازم هيج.

أسمر : لا لازم تجين هنا قابل اني سايق تعالي نسولف شيخلص الوقت يمعودة.

ضحكت خالتي هزت راسها ونزلت صعدت ليكدام ، التفتت عليه وكالت.

أسن : يلا صعدت كلشي ولا تخلي ابالك شغلة مو حلوة وتفكر بشي احنا ما مفكرين بيه..

أسمر : سويتها ظلمة شنو كلت اني؟

حجاها عاكد حاجبه

أسن : لا ما كلت شي بس سالفة معتبريك انت سايق مافكرنا بيها..

أسمر : اتشاقى يابه ردتج تجين ونسولف شيخلص الطريق ..

أسن : هم صدك.

حرك السيارة وكل شوية يوصف مكان لخالتي ويشرحلها عنه ، انتبهت على نقطة ، يتشارك ويه اديم بيها، يستعمل نفس المصطلحات ومتأكدة دارس اللغة العربية ، لان حجية بين العامية والفصيح.

جنت افكر بأوجه التشابه بينهم ، وسرحت عنهم ماعرفت وين وصلوا بالكلام، بس لفت نظري من ضحكت خالتي وكللها..

أسمر : فدوة والله خالة انتِ عسل ناقصج كيمر وتنوكلين.

أسن : ديلا بله ولك اعرفك تعرفني ذبيت ميانة وياية واني بكد امك.

أسمر: بكد امي شنو ؟ تعرفين امي يامواليد.

أسن : لا ما اعرف.

أسمر : لعد لا تفتين ياعيني ، انتِ يامواليد ؟

أسن : ٧٧

أسمر : يعني اكبر من اخوتي التوأم بسنة.

أسن : عندك اخوان توأم؟

أسمر : اي ، أعقل وأبسل توأم كذلك أرقم وأبسم ، وأديم أفنان هم توأم..

أسن : ماشاءالله هاي وراثة؟

أسمر : سالفة طويلة يراد نروح لبغداد ونرجع مرتين يله تخلص ، عوفج منهم خليني اشوف ليش هيج ظالمة روحج ومكبرتها.

أسن : رحم الله امك على رفع المعنويات .

حجتها وضحكت ، بعدين رن موبايله ، جاوب ..

أسمر: هله باابو تميم الورد ، لا يمعود ادري ، افرهم بس ..

ضحك ضحكة مال ادبسزية ، بعدها فر الستيرن طلع من طريق ثاني وكال.

أسمر : شبيك اني هيج جنت ناويها ، تمام ابو التميم، الله وياك دير بالك تفض يله تجي ماشي يله روح سبع..

سده والتفت على خالتي يجذب عليها..

أسمر : هذا واحد صاحبي هم عنده مشكلة ..

أسن : ها خطية الله يفك ضيقته بس اخوك هم عنده ولد اسمه تميم.

أسمر : هنا بين فرع وفرع يسمون بهذا الاسم مو بس اديم.

أسن : اي صحيح ..

خالتي تحجي مستهزئة تعرف بيه يكذب وهو مسايرها ..

بعدها وصلنا لطريق بيه سيطرة نزل راح يمهم وكف خلى ايديه بجيوب البنطرون يضحك ، بعدها رجعلنا ، صعد وكال.

أسمر : قفلوا علية ما يقبلون نطلع ..

أسن : هاي شنو يعني ماكو طريق ثاني غير هذا؟

أسمر : لا ماكو هذا المخرج الوحيد من المنطقة..

عرفته يكذب سكتت وخليت خالتي تحجي ، افتر بينا ورجعنا للمزرعة ، نزلنا ضايجين اني وخالتي لان عرفناه يكذب علينا ، بس ما نكدر نخجله لو نطلعه كذاب اخلاقنا ما تسمح..

من دخلنا لكيت أفنان شايلة بيدها سلة بيها نوع من النبات رحت يمها وخالتي وأسمر دخلوا للبيت .

أسمار : وين رايحة ؟

أفنان : اودي برسيم وتبن للخيل ..

أسمار : عندكم خيول ؟

أفنان : اي كل واحد بينا عنده واحد.

أسمار : صدك ؟.

أفنان : اي.

أسمار : عادي اجي وياج اشوفهن.

أفنان : اي طبعاً..

رحت وياهم واتفرج على جمال الطبيعة وشلون هوى طيب يدغدغ الرئة من يفوتلها ، ظليت استنشقه بلهفة ، طلعت موبايلي وبديت اصور وهي تطعمهم ، بقيت يم واحد من الخيول لونه كلش حلو وغريب مندمجة اصور ، فزيت ونزلت موبايلي من سمعت صوت رجال التفتت عليه من كال.

أبسم : نهايتج مثل نهاية شهد اذا ظليتي مستمرة وية أديم وكولي ما كال أبسم ..

يتبع..

متابعة ممتعة حبايبي..

💙💙💙💙