أمس من احترك كلبي انطفيت انت.
أديم
_____________
أسمار : تمام
أسمر : باي
أسمار : باي.
حجاها وراح سديت الموبايل وكمت للمكتب صعدت وصفنتلها ، رتبت كلامه وكتبته بورقة وشفت التناقضات البيه ، شنو يكولي ، مجبورة من دخلتي للعبة تكملين ، وبعدها يناقض نفسه ويكول ،ابتعدي قبل لا تغركين أكثر اتصرف وياه بغباء ولا كأنما مارة علية أشكال من هذه القصص وأصير ساذجة وأنطيه اللي بيدي ، لو أرجع لأديم وأشوفه كلشي وهو يتصرف، ضروري أسبقهم بخطوة اذا هما أذكياء اني أدهى منهم..
ابتسمت على تفكيري و وين وصلت بسببهم ، طلعت الفلاش اللي بيه التصوير والمحادثات سويت نسخ بفلاش ثاني وضميتهم بالمجر ، وخليت نسخة منهم بالموبايل.
ورحت خليته بالجنطة حتى لا أنساهن من أطلع الصبح..
دك الجرس فتحت الباب اجتي خالتي واياس ،أخذته منها حضني متلهف بوسته بكل مكان بوجهه خصوصا الخشم الفستقة أموت عليه..
أسمار : هاي وين رحت وعفت ماما ؟
اياس : بيباي بيت بيبي اهاديد.
أسمار : فدووة لليكولي اهاديد وينها عنك وتسمعك هيج تكول غير تكرطك كرط..
أسن : سمعته وحارت شلون تعبر عن فرحتها ركصت وطشت جكليت وكل شوية ماخذته مشتريتله.
أسمار : اي جانت ناذرة اذا يحجي ويذكر اسمها تطش جكليت.
أسن : اي بعد أناهيد
أسمار : أول حفيد الها أكيد هيج تفرح.
أسن : اي صدك ، أكولج شنو سويتي وشصار وياج احجيلي.
أسمار : اياس متعشي ؟
أسن : اي واني هم تعشيت وانتِ؟
أسمار : قبل شوية تغديت ، راح أنيم اياس وأدرس ساعة وأجيج نسولف خالة مو تنامين.
أسن : لا ما راح أنام ، راح أفوت أسبح بعدها أحضر بوشار وأطلع فلم معتبر ونكعد نشوفه سوى عاجبني أسهر وياج سمورة.
أسمار : تمام خلي أقرا شوية ونسهر ان شاءالله.
أسن : متفقين.
ضربت كفي وراحت للحمام ،خالتي روحها حلوة ومرحة وتنحب بس ماعندها حظ أبد ، ولا قسمة اجتها وكعد حظها بيها لازم يصير شي وتتفركش لهذا ملت وكامت ترفض الشخص اللي يتقدملها قبل لا تعرف شنو ظروفهم ، أخذت اياس للغرفة غيرت ملابسه ولعبت وياه شوية وبعدها نام من التعب ، تسحبت على كيفي وطلعت من غرفتي للمكتب ، شغلت ضوء خافت وكعدت بمكاني المعتاد ، طلعت ملازمي وحضرت للمادة وانتظرت أديم يتصل ، بلشت اقلب وأأشر ، ربع ساعة واتصل ، بلهفة طفل جاوبت..
أسمار : الو هلو .
اجاني صوته نعسان..
أديم : ياهلا يابه اكلتي ؟
أسمار : اي الحمدلله.
أديم : يستاهل الحمد
أسمار : صليت ؟
أديم : اي الحمدلله
أسمار : تقبل الله
أديم : منا ومنكم..
أسمار : شفت شنو سويت يا أديم؟
أديم : لا والله ماشفت نوريني شنو مسوي؟
حجاها بضحكة ..
أسمار : الدكتور دخل البحث مالتنا اللي سويناه بالإمتحان ولازم نحفظ الأبيات اللي انت كتبتها وهاي شلون تنحفظ؟
ضحك وكال
أديم : شلون تريدين تصيرين مدرسة لغة عربية اذا ما عندج مادة حافظتها خارج عن المنهج المقرر.
أسمار : ضروري يعني ؟
أديم : هي مو ضروري بكد ما مجبرة تسوين هالشي ، لنفسج اولاً ومن ثم لطلابج..
أسمار : تمام ، زين سؤال اني كتبت وياك كل التفاصيل هذه الإضافات شوكت كتبتها؟
أديم : ياهو اقريلي ؟
أسمار : لحظة ، أول اضافة ، السبط والحفيد ، السبط: هو ابن البنت، لذلك الحسن والحسين عليهما السلام سبطا رسول الله صلى الله عليه وآله
أما الحفيد: فهو ابن الابن.
وبعدين كاتب.
المختال والفخور
يقول الله تعالى في كتابه العزيز: "إنَّ اللهَ لا يُحِبُّ مَنْ كَانَ مُخْتَالاً فَخُوراً."
المختال: في هيئته.
أما الفخور: في قوله.
الغدوة والروحة والدلجة
الغدوة: أول النهار.
الروحة: آخر النهار.
الدّلجة: آخر الليل.
الرحمة والمغفرة.
المغفرة: لما مضى من الذنوب.
الرحمة: السلامة من الذنوب في المستقبل..
أديم : هذا هو ؟
أسمار : لا بعد
أديم : خرب بغيرتك إيساف .
أسمار : إيساف ؟
أديم : كملي وأسولفلج..
أسمار : ماشي..
وكملت باقي الإضافات.
المعتدي والأثيم.
المعتدي: في أفعاله
الأثيم: من يرتكب خطأً في أقواله وفي كسبه
الأوثان والأصنام
الصنم: ما جُعل على صورة إنسان يُعبد من دون الله
الوثن: ما عُبِدَ من دون الله على أي وجه كان.
أديم : كملي شو سكتي؟
أسمار : لا خلصت .
أديم : بس
أسمار : بس
أديم : غريب والله ، هيج بحث يوكع بيد إيساف ويطلع بورقة وحدة ؟
أسمار : يجوز انقهر علينا وكال ذولة طلاب وخطية خلي أضيف بس ورقة وبعدين هو ما شاف أخوه ما مقصر حب يضيف للبحث والله يا إيساف..
هو يستمع ويضحك .
أسمار : وين رحت؟
أديم : هياتني كبالج كاعد.
أسمار : كبالي ميزي المكتبي
أديم : اي اني على الكرسي اللي على اليمين.
شهكت .
أديم : صحة هاي شكو ؟
أسمار : شلون عرفت اكو كرسي على اليمين ؟
أديم : كلتلج كبالج كاعد بس انتِ مكاعد تشوفيني.
أسمار : أديم ؟
أديم : سمرة.
أسمار : صدك شلون عرفت ؟
أديم : بكل بساطة لان كل ميز بمكتب اكو كراسي عددهم اثنين ، واحد يمين والثاني يسار ، حجيتها من باب تصوري للمكان.
همست..
أسمار : بس اني ماعندي غير كرسي واحد على اليمين واليسار مابيه كرسي.
أديم : اي هذا مكاني.
ضحكت
أديم : شو تضحكين ؟ ما أستحق هذا المكان ؟
أسمار : أديم.
أديم : نعم يا ست أسمار.
أسمار : نرجع نقرا شنو رأيك؟
أديم : ماشي نقرا.
وبلشنا بالمواد ما رفعت راسي الا وخالة تفتح الباب مأشرتلي يعني يلا تأخرتي، اشرتلها بيدي ثواني ، هزت راسها وسدت الباب ، اخذنا ربع ساعة وكملنا كلشي..
أسمار : خلصنا..
أديم : تمام عاشت ايدج.
أسمار : وايدك ظل بس بحثنا المشترك وهذا انت حافظه يعني ما يحتاج أراجعه وياك .
أديم : انت اقريه زين ترى اغلب الافرع راح تجي منه .
أسمار : شلون عرفت ؟ تنبئت يعني ؟
أديم : لا طبعاً بس هذا الدكتور يحب هيج نوعية من الأسئلة يعني كلشي مختصر واجابته بكلمة او كلمتين بالزايد بيت شعري ، يجيبه ، ما يحب الشرح المطول ..
أسمار : ماشي هسه ارتاح شوية وأكعد أقراه ..
أديم : تصبحين على خير.
أسمار : وانت من اهله.
أديم : اسمار لحظة.
اسمار : اي أديم وياك.
أديم : بعدك ضايجة ؟
أسمار : من شنو ؟
أديم : اي شي جان مضوجج ؟
أسمار : لا عادي راحت بعد
أديم : احلام سعيدة
أسمار : للجميع يارب.
سديته وتركت الموبايل على الميز وطلعت يم خالتي كعدنا وسولفنا شنو صار وياها وشنو صار ببيت اهلي وحديث عني عابر ما له اهمية ، بعدها حسيت بنعاس ولستأذنتها حتى انام ..
أسمار : نعست كلش ، راح انام.
أسن : تصدكين اني هم من الصبح كاعدة ومانمت بعد
أسمار : ننام سوى حتى نكعد مصحصحين شنو رأيج ؟
أسن : تمام يلا نام .
نهضنا وتمنينا لبعضنا احلام سعيدة ونوم هنيء ودخلنا كلمن لغرفتها سهرانين وية دواخلنا ونناقش أفكارنا قبل النوم ، بعدها نعست ودخلت بالحلم السابع.. فزيت على المنبه الساعة تسعة ، كعدت حضرت الريوك وكعدت اياس ريكته وغيرت ملابسه واخذته للحضانة بعدها رحت لأهلي سلمت وكعدت.
أناهيد : شعجب اجيتي هيج وقت واليوم عندج دوام؟
أسمار : عرفتيني عندي شي ؟
أناهيد : طبعاً بنتي وتربيتي.
أسمار : خلصت فلوس.
أناهيد : شكد تريدين كولي.
أسمار : الخير وما مدت ايده.
حجيتها وضحكت وهي هم ضحكت ، كامت والتفتت علية.
أناهيد : أسمار هم ملابس؟
أسمار : اوو ذكرتيني صارلنا شكد ما طالعين مشترين ملابس يلا اليوم اتفق وية اسونه ونطلع نشتري ونمر ناخذج ويانا
أناهيد : اي تاخذوني مو محبة بية لا والعذرا حتى أدفع ، وانتِ وأسونه بس بالملابس تتذكروني.
أسمار : كم مرة نتوسل بيج ما تقبلين تطلعين.
أناهيد : اي هواي صحيح.
أسمار : اشم ريحة استهزاء ماما.
أناهيد : لا استهزاء ولا ابد ، شكد رايدة مثل كل مرة لو أكثر صارت عشرة ونصف وراج دوام ولا تسوقين سريع.
أسمار : ماشي نفس كل مرة وباليل من نجي اخذ الباقي..
حجيتها وضحكت.
أناهيد : ملعونة أسمار.
أسمار : قصدي ناخذج ماما.
أناهيد : اي الصراف قصدج فهمت عليج امي من أول ما عزمتيني ..
أسمار : أناهيد اللي ما تتناقش نسكت أحسن.
أناهيد : هاج هاي الفلوس ومن تخلصين كولي قبل بيوم أدزلج ماشي.
أسمار : فدوة لعمرها لأمي.
أناهيد : يلا عوفج من الحجي وروحي لبيتج غيري ملابسج وبوجهج للدوام ..
أسمار : بوسة زين.
أناهيد : يلا فضيني تأخرتي.
بستها وأخذت حضن حنان وطلعت فرحانة متمنية يومي هذا وباقي أيامي تمر بسلام بدون تعب.
وصلت للبيت ، غيرت ملابسي رحت للمطبخ اكلت فواكه وطلعت من البيت وصلت للجامعة ورحت للقاعة شفت أديم كعدت بصفه سلمت ردلي السلام وبعدها اجى موظف من فوك أخذه وطلعوا للقاعة الثانية حتى يمتحن ، توزعت علينا الاسئلة وبلشنا نحل ، مرت ساعة والدكتور نبهنا على نهاية الوقت ، جان باقيلي سؤال اللي يخص البحث مالتنا ، نسيت اقراه بالليل كتبت اللي أتذكره واللي راجعناه البارحة من الأمثلة الكاتبهم إيساف.
سلمت ورقتي وطلعت لكيت أديم واكف بنهاية الممر ومرتاج بكتفه على الحايط منتظرني ، رحتله قبل لا احجي ابتسم..
أديم : تأخرتي شنو صعبة ؟
أسمار : اكيد شفتها سهلة عليك عبالك اني هم سهلة علية..
أديم : جاوبتي عاد.
أسمار : يعني بين بين.
أديم : ليش مو اغلب الاسئلة اجتي من اللي قريناه البارحة وركزنا عليه.
أسمار : جاوبت يا أديم هسة ضروري اجيب درجة كاملة.
أديم : طبعاً ضروري حتى تكملين دراسات..
أسمار : حيل وين وصلتنا خلي انجح اول وبعدين أفكر بالدراسات..
أديم : من هسة اقري زين وخلي طموحج أكبر من النجاح وراح تحققيه.
أسمار : ان شاءالله ، انت جاوبت؟
أديم : الحمدلله.
أسمار : الحمدلله.
أديم : ماكلة ؟
أسمار : فواكه اكلت قبل لا أطلع.
أديم : اني ما ماكل شي على لفاتج مال البارحة.
عكدت حاجبي والتفتت عليه.
أسمار : ليش مو كلت راح اروح أتعشى وأصلي ونرجع نحجي.
أديم : ما عادت النفس تستطيب شيء..
أسمار : عندك علاج يا أديم .
أديم : عوفج مني وامشي نروح ناكل اذا حاسة بجوع.
أسمار : حتى لو ما حاسة امشي ناكل.
أديم : ياريت لان حاسس بدوخة قوية..
مشينا ساكتين وصلنا للمكان اللي كل مرة نكعد بيه حديقة صغيرة قريبة من النادي ، كعد وخليت ملازمي وسألته شنو ياكل ، اخذت فلوس منه ورحت اجيب أكل ، بالطريق رن موبايلي باوعت أسمر ، جاوبت.
أسمار : هلو أسمر.
أسمر : مساء الخير وآسف على الإزعاج الراح اسببه الج ببداية يومج .
أسمار : اووو اختصرت علية وصف مزاجي الراح يتغير بس أشوفك.
أسمر : يولي مو من ريحة أديم المفروض تحبيني...
أسمار : رجعنا نلمح أسمر.
أسمر : ونرجع نأكد شكوكي أسمار.
أسمار : شكوكك بخصوص شنو ؟
أسمر : الإهتمام المبالغ العصبية المفرطة وية اخوان أديم ، لمعة العين من ينذكر اسمه والصوت من يتغير والإبتسامة المرسومة على وجهج هسة.
التفتت لكيته يأشرلي من بعيد.
أسمر : شفتيني ؟.
أسمار : شفتك عبالي هذا هم من ضمن الطالع كلت شلون عرف ضحكت.
أسمر : شوكت نلتقي مطولة ست ؟
أسمار : بس نتغدا اذا حضرتك تسمحلنا يعني ؟
أسمر : اي طبعاً كل الوقت الكم ست كم سمرة عندنا احنا.
حجاها وضحك.
أسمار : من رخصتك اجيب الأكل لأن اخوك ينتظر بعدين نحجي .
أسمر : كلشي ولا تخليه ينتظر ، نلتقي بعد ساعة.
أسمار : ان شاءالله باي.
أسمر : باي.
سديته ورحت وصيت على الأكل اخذته ورحت لأديم خليت الأكل وكعدت ،رفع راسه باتجاهي كال.
أديم : ما تأخرتي اليوم؟
أسمار : ماكو ازدحام عليهم .
أديم : الحمدلله ما تعبتي يعني؟
أسمار : لا ما تعبت، حسستني مسوية شي جبير.
أديم : مجرد احساسي بالخوف علية بصوتج هذا بحد ذاته دين ما اتصور اكدر اسدده الج بيوم من الأيام..
أسمار : مابيننا ديون ولا مجاملات ولا اي شي يدور ببالك تغدا وبعدها نحجي.
أديم : يا أسمار محسستني طفل كدامج.
أسمار : ليش
أديم : يعني كاعد احجي وياج تكوليلي اكل وبعدين نحجي.
أسمار : علمودك اني لان رايدتك بموضوع مهم نحجي بيه بعد الاكل..
عكد حاجبه بهدوء كال.
أديم : بخصوص؟
أسمار : أكل أول ونحجي بعدها.
أديم : لا خلص احجي ما رايد آكل.
أسمار : بس اني جوعانة واذا ما اكلت انت، اني هم ما راح آكل.
ابتسم وكال..
أديم : مو كلتلج تعامليني معاملة طفل ، اجيتي من مبدأ الثواب والعقاب.
أسمار : عقاب وين حجيت بالعقاب اني.
أديم : من كلتي ما راح آكل معناها تعاقبيني.
أسمار : اذا هيج فهمتها كلش زين يلا اكل حتى اني اكل.
رفع حاجبه مبتسم ، اخذ اللفة وبدا ياكل واني هم اكلت لفتي شربنا العصائر بعدها اخذت كلينكس وهمست.
أسمار : أديم .
أديم : هممم.
أسمار : هذا كلينكس
أديم : شنو أسوي بيه؟ ايدي ما توسخت.
أسمار : لا مو ايدك.
اديم : عجل شنو؟
شلون ورطة ورطت روحي بيها.
بهدوء كال
أديم : امسح شنو أسمار ؟
أسمار : شفايفك بيهم أكل.
أديم : هممم تمام انطيني
مد ايده اخذ الكلينسه مسحها وهمس مبتسم.
أديم : هذا هو ؟
أسمار : اي
أديم : اكو بعد ؟
أسمار : لا
أديم : تأكدتي.
حجاها بخبث وضحك..
أسمار : اذا كملت اكل وشبعت نحجي بالموضوع اللي اريدك بيه.
عكد حاجبه مغير ملامحه من الهزل للجدية.
أديم : يلا نسمع
أسمار : البارحة سألتني اذا شفت شي غريب بالمزرعة او لا؟
أديم : وجان جوابج انو ماشفتي.
أسمار : صحيح بس اني كذبت.
أديم : أعرف.
أسمار : الغريب انو ما عاتبت؟
أديم : لان اعرف راح تحجيلي.
أسمار : من وين جبت هالثقة.
أديم : احساسي ما يخيبني يا أسمار.
أسمار : واحساسك شنو يكول ؟
أديم : احساس على معلومات عرفتها انو انتِ مهدديج داخل المزرعة.
أسمار : صحيح مو تهديد بالمعنى الصريح بكد ما اسميه تحذير .
عكد حاجبه وكال.
أديم : تحذير من منو ؟
أسمار : منك ومن أرقم ومن أعقل.
أديم : شلون يعني مافهمت وضحي أكثر.
أسمار : اخوك أبسم اجاني وكال..
وسردتله باقي التفاصيل ، جان يستمع بهدوء يحاول يسيطر على انفعالاته..
أديم : يعني شنو يعرف شي هو بخصوص شهد؟
أسمار : ما اعرف بس اني مستغربة من شي واحد يا أديم.
أديم : وهو ؟
أسمار : ولا كأنما زوجتك اللي ماتت تصرفاتك انت واهلك كلها عادية لو حيوان مربيه وميت يمكن تتأثرون عليه أكثر من شهد ، من وين جايبين هذه القساوة.
تجاهل كلامي وكال.
أديم : بالضبط كالج احنا عصابة مو ؟
أسمار : اي
أديم : تعرفين شي بعد اكثر من هذا..
أسمار : اي أعرف شي ثاني بس ياريت تلزم أعصابك من اقراه الك..
أديم : المسجات اللي اجتج ؟
أسمار : تتذكرها ؟
أديم : ما نسيتها اصلاً.
أسمار : بس صدكتني بوقتها ؟
أديم : من تلاعبتي بالجواب ومرة أرقم كذا يكول وكذا وهو مسافر.
أسمار : بس انت صدكت صح ؟
أديم : تجاهلت مو صدكت.
أسمار : لهذا غيرت الموضوع وسألتني ورا شكد وصلت للمستشفى بيوم اللي تسممت بيه.
أديم : صحيح.
أسمار : تمام هسه عندي هذه المسجات اقراهم الك؟
أديم : أسمعج ياريت حتى النقطة والفاصلة تنذكر..
أسمار : تمام ، المسج الاول يكول بيه أرقم ( أعقل صدمة صدمة ، يمكن شهد ماتت محروكة ، بس دير بالك تبلغ أديم دزيت مسج اقراه وانت اتصرف من يمك هذا مخبل شيخلصنا منه اذا عرف)
حشاك يعني بس هذا اللي مكتوب بالرسالة..
أديم : المسج الثاني .
حجاها ورجفت شفايفه و ايديه.
عين عليه وعلى ملامحه وحركاته وعلى موبايلي اقراله المكتوب ..
أسمار : ( أعقل راح أتصل على أديم وأحجي وياه طبيعي وأقنعه ييجي يمنا بالبيت شنو رأيك أكتبلي بينما نتأكد من صحة الخبر)
عكد حاجبه بالاكثر وزادت ملامحه قساوة..
أسمار : غلطت من حجيتلك صح..
هز راسه ب لا ، رجعت سألته.
أسمار : شنو راح تسوي وهذا الشي يفيدك لو لا؟
أديم : صبري لحظة صبري.
حجاها ورافع كف ايديه مأشر بيها ، سكتت بعدها رجع راسه ليورا واستغفر هواي حسيت بذنب لان حجيت ردت ابجي.
أسمار : لهذا السبب اني ضميت عليك شوف شنو صار بيك والله اعلم شنو راح تسوي وراح تخليني اندم لأن حجيتلك.
أديم : لحظة خليج وياية ، راح افكر بصوت عالي وساعديني .
أسمار : تمام اسمعك
أديم : بالرسالة كاتبله يمكن شهد ماتت محروكة ؟ وكاتب دير بالك تبلغ أديم ؟ دزيت انت اقراه واتصرف من يمك هذا مخبل يقصدني اني.
أسمار : صحيح.
أديم : بعدين يكوله راح اتصل واحجي وياه طبيعي واقنعه ييجي يمنا للبيت حتى نتأكد من صحة الخبر.
اسمار : صحيح هذا المكتوب
أديم : هنا هما بين الشك واليقين انو شهد ماتت او بعدها.
أسمار : بالضبط.
أديم : وهذا الشي يشير الى انو شهد ما ماتت محروكة بالمزرعة..
أسمار : شلون يعني مافهمت ؟
أديم : لو ماتت محروكة بداخل المزرعة ليش ينتظرون فترة يتأكدون بيها غير هما مطلعيها من البيت صايرة فحم معناها ميتة.
أسمار : صحيح بس انتبه أديم من يكوله جيب أديم يمنا بالبيت هنا يخافون عليك تروح للبيت وهو محروك وتنصدم بموت شهد.
أديم : اعرف جاييج بالكلام ، من رادوني أعوف البيت اللي جنت كاعد بيه اني وشهد وارجع اكعد بالبيت الجبير اللي يتوسط المزرعة واجيتي بيه انتِ ، لسبب واحد وهم اقنعوني بيه بس بنفس الوقت اني ماصدكت وظليت بشك ولهذا كلتلج تعالي للسيارة واقريلي شكو ورقة بيها لأن شكيت بيهم .
أسمار : شلون شكيت وبشنو بالضبط.
أديم : شكيت شهد تنهزم من المزرعة ووهموني على اساس أبسم اللي ساعدها وبنفس الوقت من واجهت أبسم نكر هالشي وكال شهد ما مهزمها ورحنا لأهلها كالو ماندري بيها واجوي ويانا للمزرعة وشافوا بعينهم شهد ماكو بالبيت، واني هنا صدكت انو هي انهزمت وضاعت علية..
أسمار : دقيقية ليش أبسم ردة فعله جانت قوية بيوم اللي اجينا بيه اذا هو جان مساعد شهد حتى تنهزم وبنفس الوقت ليش ما راح شاف البيت اذا محروك ، زين اخوانك وين جانوا ما سألتهم اذا البيت محروك او لا ..
أديم : اني عرفت بيوم اللي انتِ اجيتي بيه للمزرعة، ورحت بالليل وياية أسمر وإهاب وأكدولي البيت محروك يعني صحيح محروكة بداخل المزرعة بس بنفس الوقت الشك وين صار عندي اذا هي صدك محروكة بالمزرعة ليش يدز لأعقل يريد يتأكد من الخبر وهي يمهم..
أسمار : اي صح هنا مربط الفرس ، دخت اني ...
عاكد حاجبه بغضب وفكه ينبض بتوتر جر نفس عميق وكال..
أديم : شهد ما ماتت منتحرة شهد مقتولة..
أسمار : ياستار شلون عرفت ؟
أديم : مقتولة خارج المزرعة وحاركيها وبعدها حاركين البيت ماكو غير تفسير.
أسمار : شنو السبب وليش هيج يسوون ومنو اله ايد بهذا الشي.
أديم : هسه أرقم وأعقل اثنينهم خليت عليهم دائرة الشك، يبقى أعرف باقي التفاصيل.
أسمار : اكدر أساعدك بشي؟
أديم : شلون ؟
أسمار : اني البارحة اخذت رقم أسمر وإيساف من موبايلك ردت اساعدك بدون علمك واسفة بتجاوزي على خصوصياتك بس والله علمودك ، بعدها هو عرف اني ماخذة رقمه ما اعرف شلون واتصل علية واتفقنا نتشاوف وانطيه الادلة ويبلغني شنو اكولك وشنو ما اكولك..
أديم : تمام هسه تدرين شنو تسوين ؟
أسمار : شنو ؟
أديم : اخذيله الادلة وشوفيهم اله وشوفي من شنو يحذرج ويأكدلج تضميه علية .
أسمار : شنو راح تستفاد من هذه الخطوة؟
أديم : راح اعرف هو متشارك وياهم بالجريمة لو لا .
أسمار : ماشي متفقين هسه اني راح اروح احجي وياه وانت وين تظل هنا؟
أديم : لا ارجع للقاعات حتى لا يحس احنا متفقين وانتِ كوليله بلغت اديم انو اجاج اتصال من البيت وضروري تحجين وياهم واذا تأخرتي ما راح تدخلين للمحاضرة.
أسمار : متفقين.
أديم : خير ان شاءالله ديري بالج على نفسج.
أسمار : اوك
كمت حتى نروح ، استوقفني من كال..
أديم : أسمار اكو شغلة هسه خطرت ببالي.
أسمار : وهي ؟
أديم : خلوني اشك حتى ب أمي وأفنان..
أسمار : لا أديم لا توصل لمرحلة الشك ب أقرب الناس الك تتعب صدكني..
أديم : طيب مو هم مبصرين شلون يضحكون على واحد اعمى ويتفقون عليه معقولة هيج وصلت بيهم.
أسمار : ليش ما تاخذها من باب اخر ممكن ما رادوا يأذوك شلون ما اني سويت نفس الشي.
أديم : انت سويتي اللي سويتيه من باب حرص على نفسج او خوف علية او ما امنتي خفتي هواي احتمالات بس اهلي لا ما انطيهم الحق لان هم اعرف بحياتي واللي صارلي ويعرفون كلش زين شكد تأذيت واجتي ايام اني واخواني بالشوارع نفتر ندور عليها تركت شغلي تركت الدوام تتذكرين جنت اتغيب هواي.
أسمار : اي
أديم : بسببها جنت ادورها ولكيتها وبعدها تغيبت حتى احقق وياها ردت اعرف وين راحت وبعدها اختفت مرة ثانية كالوا انهزمت وشددت حراسة على المزرعة ودورت عليها ما خليت مكان يعتب علية بس اوكفي معقولة اخواني البقية هم مشتركين بهذا الشي ؟
أسمار : شلون هيج فسرتها؟
أديم : مو طلعنا اني وياهم للمراكز والمستشفيات دورت عليها ما كالوا مرت عليهم هيج حالة او اجاهم هيج اسم..
أسمار : اديم اني اتصور هي صدك انهزمت واحد من اهلها او اهلك لزمها خافت وحركت نفسها ورادوا يخفون هالشي حتى لا تتأثر سمعتهم بالمنطقة كالو هي حركت نفسها وبعدها حركوا البيت .
أديم : رجعنا لنفس النقطة وهي احد من داخل المزرعة مساعدهم ومسوي حادثة حقيقية بحيث قانع إيساف وأهاب وأسمر والبقية مثلما اني على اساس اقنعوني.
أسمار : اويلي شلون شغلة غامضة وتالي وين راح نلكى الحل.
أديم : تكدرين تساعديني ؟
أسمار : ياريت ما راح أقصر.
أديم : خايف عليج بس بنفس الوقت ما أأمن بأحد غيرج بالاخص اليوم رجعتي الثقة بكلبي وزادت بالاكثر.
أسمار : أديم مادام مامسوين شي غلط وبعيد عن رب العالمين لا تخاف ماراح يصيبنا الا ما كتبه الله لنا.
ابتسم بعدها كال..
أديم : سمرة سؤال.
ابتسمت وهمست.
أسمار : جواب.
اديم : هواي بيج من ديننا الإسلامي شلون انتِ مسيحية مرات من تحجين اغالط نفسي وانسى انتِ مو على ديننا.
أسمار : وعد احجيلك هذه التفاصيل بس مو وقتها هسه خلينا نحل مشكلتك أول ..
أديم : عاجبني أعرف هواي اشياء عنج.
أسمار : احجيلك بس مو هسه.
هز راسه ساكت بعدها كمت وكلتله.
أسمار : رايحة لأسمر تجي اوصلك للقاعة حتى يبين الشي طبيعي وتمام.
أديم : يلا..
كمنا وصلته للقاعة واتصلت ب أسمر جاوبني.
أسمر : كثر الحديث عن التي يهواها ..
أسمار : هلو أسمر اتصلت بيك حتى نلتقي اكيد تسمعني..
أسمر : ماعمرها مااسمها ماسرها ماشكلها بيضاء ام سمراء عيناك احلى انت ام عيناها جل الذي اخشاه ان تتاثري فتماسكي وتهيئي وتحضري فلغيرة النسوان فعل الخنجر..
أسمار : أسمر راح اسده ..
أسمر : هذا البارحة أديم يسأل أفنان عنج..
التفتت على صوته وراية، نزلت الموبايل من ايدي سديته عاكدة حاجبي.
أسمار : هاي شنو شوكت اجيت؟
أسمر : من لما كلتي الو..
أسمار : ما كلت الو انت جاوبتني بأغنية.
أسمر : جنت اغني لبغداد.
أسمار : وأديم وأفنان شجابهم بالنص؟
أسمر : البارحة جان يسأل أفنان عليج ويكوللها اوصفيها الية بالتفصيل اريد أخزن شكلها بعقلي.
أسمار : اي وبعدين شنو صار ؟
حجيتها وكتفت ايدي.
أسمر : كالتله هي اجمل من كل جميلة احلى منك واحلى مني..
أسمار : بدون شقى احجي الصدك.
أسمر : وسألها سمينة او رشيقة كالتله.
هي ارشق من كل رشيقة هي اقرب من قلبك عني..
أسمار : انت ليش تحب تستفز الواحد؟
أسمر : بدون مبالغة ولا مكذب عليج حرف هذا الحديث اللي دار بينهم اخر شي سألته تحبها تدرين شنو كال ؟
أسمار : شنو ؟
أسمر : عيناها بيتي وسريري ووسادة رأسي اضلعها تمحوا كل هموم حياتي لو مس جبيني اصبعها ضميني يا احلى امرأة لو صمتت قلبي يسمعها...
أسمار : أديم هيج كال؟
أسمر : ما اريد أحلف بس كلمة رجال مني وهذا شاربي هو هيج كال واذا ما صدكتي روح اسألي أفنان..
أسمار : وليش تحجيلي شنو السبب ؟
أسمر : لان اريدج تبادليه المشاعر أديم يستحق ينحب ويستحق يعيش حياة حلوة ويستاهل العوض لأن انسان ما اله مثيل بالطيبة والاخلاق والشهامة ، بس الاخلاق يعني مرات يزاغل بيها ..
حجاها وضحك.
أسمار : شنو انت غريب مرة تكولي مجبورة من دخلتي للعبة تكملين ومرة ثانية ابتعدي قبل لا تغركين أكثر وهسه حبي اخوية لان يحبج ويستاهل الحب ، شوف التناقض بكلامك هاي انتوا كلكم هيج لو بس انت؟
أسمر : عوفج من تناقضي واحجيلي شنو تعرفين ؟
أسمار : وليش اثق بيك واحجيلك ؟
اسمر : مجبورة.
أسمار : ومنو راح يجبرني؟
عكد حاجبه ضيق عينه وكال..
أسمر : خوفج على أديم.
أسمار : خوفي على أديم يدفعني أخفي كلشي عنكم لان الصراحة وحشاك انت اني ما أكدر أأمن بيكم ..
أسمر : اجي وياج واكولج حقج ، شنو تحبين تسمعين حتى تأمنين بيه ياست أسمار.
أسمار : أول شي فهمني شلون عرفت ماخذة رقمك لان ماشربت يمك كهوة ولا شفت كفي حتى تقرا الطالع ومال تعلم الغيب هاي منتهين منها العلم عند الله فقط ..
أسمر : واذا كلتلج راح تأمنين؟
أسمار : حسب ما أعرف.
أسمر : أول مرة تمر علية هيج بنية ذكية.
أسمار : تتصورني اكون غبية واني كاتبة واسمع كل يوم مئات القصص ومارة علية أشكال وألوان لهذا يا أستاذ أسمر خلي ببالك أسمار دائما راح تسبقكم بخطوة.
أسمر : مممممم يعني قصدج تلعبون وياية ألعب وياكم وماراح اخليكم تورطون أديم اكثر من هيج واني بنية
حجاها وحك شعره.
ت
قربت منه وهمست .
أسمار : انتو ال الغريب واني عقلي غريب هيج ربك خالقني.
أسمر : عجبتيني والملوية.
أسمار : المهم تريد تسبق أديم بخطوة وتعلمني شنو أسوي وأروح احجيله صح ؟
تقرب مني وكال..
أسمر : قبل لا تكوليلي وأعرف شنو عندج أي شي يخص أديم يمج احجيله لا تضمين عليه حرف واحد..
صدمني من هيج كال وزاد شكي بيه أكثر.
أسمار : تريد تخليني أأمن بيك بهذا الحجي صح ؟
أسمر : مو ضروري اني أأمن بيج بكدما تريحين قلب أديم هو محتاج يرتاحلج أكثر مني..
أسمار : ما قنعتني.
أسمر : أسمار بالبداية شكيت بيج بسبب حجي اخواني عنج واندفاعج المبالغ بهيج علاقة رغم جمالج ومكانة اهلج يعني مو ناس حي الله تعبانين على نفسكم لهذا كلت احتمال طمعانه بأخوية بس بعد اللي سمعته منج اليوم وشفت شلون خايفة تحجين سره لأخوانه لا تراجعت عن قراري.
أسمار : شلون عرفت ماخذة رقمك؟
أسمر : جلبتي الا تعرفين اني وين احجي وانتِ وين..
أسمار : احجيلي لان صدك تأرقت من هذا الموضوع وكمت أخاف منك.
أسمر : بكل بساطة يا بنت الناس اخواني جانوا يحجون بيج بالبيت وعرفت من أعقل انتِ ماخذة موبايل أديم ولاعبة بيه ومن دكيتلج وما استغربتي او مثلتي الإستغراب وجاوبتيني بسرعة ، ربطت السالفة والا ليش تاخذين الموبايل ومو طبعج تتصلين بأهلج من ولد غريب..
أسمار : ياويلي على التفسيرات والتخطيطات انتو ماعندكم شي طبيعي ويسويها لله الا لازم وراها شغلة .
أسمر : لان بالفعل جانت وراها شغلة والا جان ما شكينا من الاساس.
أسمار : هسه ما تريد تعرف شنو عندي ؟
أسمر : بلغي أديم اول وبعدها دزيلي اذا هو وافق كوليله تقبل اخلي أسمر يساعدنا ونصير ٣ بدل ما ايد وحدها اكيد ما تصفك.
أسمار : تمام شكرا أسمر.
أسمر : عفوا يلا فوتي محاضرتج وساعة وارجع بس اتغدا..
أسمار : ماشي راح أبلغ أديم.
أسمر : مشكورة سمرة أخوية..
حجاها وضحك ، بعدها غمز وسوى حركة باصابعه علامة النصر واخذ بيها تحية وراح..
ضليت واكفة بمكاني متعجبة من الصار ، لدرجة انهديت من تعب التفكير بعد ما اكدر انطي حلول أكثر من هيج عقلي وكف ..
رجعت للقاعة لكيت المحاضرة خلصانة تقربت من اديم همست ..
أسمار : خلصنا الحديث.
التفت علية وانفاسنا اختلطت سوى غمض عينه مستنشق نفسي بعدها فتح وكال.
أديم : عرفتي شي ؟
أسمار : لا يظل بالك ان شاءالله خير..
أديم : يارب.
كام ومشينا لخارج القاعة كعدنا بالحديقة المقابيل القسم ، جر نفس وكال .
أديم : احجي أسمار أسمعج.
أسمار : قبلها اريد أسالك سؤال وبعدها احجيلك كلشي عادي..
أديم : طبعا اسألي.
أسمار : لا تعتبره تدخل مني بس ظل بكلبي هذا السؤال ومحتاجة تفسير .
أديم : وهو؟
أسمار : انت تحب زوجتك ؟
سكت وصار هدوء نسمع بيه ضجيج كلوبنا بعدها كال..
أديم : سألتيني اليوم عن سبب برودي وبرود أهلي من سمعنا بشهد وليش اني نسيت او بينت عدم اهتمامي ، قبل لا احجيلج كلشي عن حياتي وقبل لا ادخلج بتفاصيل يمكن انتِ بغنى عنها ، بس أريد اسألج سؤال وجوابيني بصراحة..
أسمار : طبعاً اجاوبك بصراحة..
أديم : اذا انت عندج زوج يحبج ومدللج وما مقصر وياج بيوم وانتِ تبادليه هذا الحب وحياتكم مليانة بالاهتمام اللي يسبق الحب علاقة ناضجة بتفاصيلها ، تحبين شكله ورسمه وشخصيته وجنتي تتمنيه او بالاصح تتمنين نظرة وحدة منه ومن يحجي وياج يصير عندج عيد واخذج وحققلج كلشي وبيوم من الايام صار حادث وياه ، زوجج تشوه حروق من الدرجة الاولى وجهه واحدى ساقيه واكتافه وفقد بصره ، شنو راح تسوين؟
أسمار : الصراحة وبدون مجاملة.
أديم : اي هذا اللي أريده حتى اجاوبج.
أسمار : راح ابقى وياه لان اني من حبيته حبيت روحه لا يهمني الشكل لان زائل ولا الفلوس لان رايحة ولا المنصب ولا الاملاك مايدوم غير وجهه الكريم.
أديم : بارك الله بيج وهذا الشي الصحيح اللي بنت الاصول تسويه اذا زوجها ضاقت الدنيا بيه او غدرته ، تدرين هي شنو سوت؟
أسمار : شنو ؟
أديم : اذكرلج موقف واحد حاز بكلبي لدرجة كل يوم قبل لا أنام يتردد صوتها بأذني وهي تحجي لأختها ، تكوللها كل عقلج ارتبط طول عمري بواحد اعمى واني بهذا الجمال لا يشوفني ولا يتغزل بية واذا ألبس او ما ألبس واحد لان مايشوف وجهه بشع ما اطيق اكعد يمه لحظات ولج صايرة ما اتحمل يلمسني ولا يحضني واذا حاول يبوسني يمكن انتحر او اسوي شي بنفسي اذا ابوج واخوانج رفضوا انفصل عنه.
غمض عينه وبعدها نزلت دموعه كأنما مطر ونزل على وجناته ، بقهر وردة فعل قوية مني حجيت بحرقة قلب ونزلت دموعي..
أسمار : لا يا أديم ليش بجيت انت اقوى من هيج ..
اكتافه صارت تهتز وهو يحجي عمق مشاعره والإحساس اللي مر بيه بعدها بلع ريك مسح طرف عينه باصبعه وكال..
أديم : اغمضتها كي لا تفيض فأمطرت.
يتبع...
مساء الخير والعافية..
💙💙
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!