أحببتُ ذلك الغريب الفصل الحادي وسبعون 71 - بقلم وأهملها القارئ

في وقت اشتياقي لك، تتركّز كلّ أفكاري، وتهرب منّي إليك، يشدّني الشوق والحنـين بشدّة إليـك. لا تسألني عن الندى فلن يكون أرق من صوتك، ولا تسألني عن وطني فقد أقمته بين يديك، ولا تسألني عن اسمي فقد نسيته عندما أحبّبتك. قولك وداعاً غير مؤلم حتّى أعلم أنّك لن تقول مرحباً مرّة أخرى.

بسيل
___________________

بسيل: الموقف الي صار بالشقة .

بقى ساكت بعدها كال...

أسمر: بسيل من أجي نحجي بهذه الأمور يومين بالزايد اني يمج ..

بسيل: أسمر؟

أسمر: نعم

بسيل: ليش تريد تساعدني؟ او بالأحرى ليش كاعد تستمعلي؟

أسمر: اكو وحدة خابرتني وجانت بحالة يرثى لها وتحجي خرابيط ودخلتني بساعات إنذار لهذا اضطريت اجاوبها حتى اشوف شنو بيها وشنو كاعد يصير وياها..

بسيل: خفت علية؟

أسمر: لا

جاوبته بهدوء

بسيل: يعني احساسي مو بمحله؟

أسمر: شنو الي فكرتي بيه ؟

بسيل: فكرت يهمك أمري

أسمر: الي صار اعتبريه فضفضة او مساعدة من شخص عابر لا تروحين زايد بتفكيرج ..

تنهدت بعدها همست.

بسيل: ما اعرف ليش ما حسيتك شخص عادي ولا دخلت بحياتي لسبب عادي ولا لقاءنا جان عادي، ممكن هذه تكون صدفة تغيرلي حياتي؟

أسمر: مااعرف يمكن اي ويمكن لا بالتالي خلي الوضع كما هو عليه واتركي الخرافات والاساطير

بسيل: مو قصة خرافات واساطير بس حدسي يكول انت مثل العاصفة الي راح تغير موازين حياتي ...

أسمر: الحدس عبارة عن خرافات لهذا إرضي بالواقع ...

من بعد سكوت دام لدقائق همست..

بسيل: ممكن كلامك صح بس كل مرة قبل لا انام يجيني إحساس ، راح اقابل شخص غريب ينتشلني من المستنقع الي عايشة بيه يغير تصرفاتي يكون طوق نجاة الية بالأخير تبقى أمنيات ممكن تتحقق وممكن لا ...

أسمر: بسيل فوضي أمورج لرب العالمين ولا تفكرين هواي ومن أجي نحجي أكثر ،خليني اروح انام وراية دوام..

بسيل: ماشي تصبح على خير وشكراً على كل شي ..

أسمر: ما سويت شي تلاكين الخير

بسيل: الي سويته اليوم محد مسويه وياية قبل، الحنية الي بصوتك وخوفك علية بعمري ما التمسته بإنسان غير بابا الله يرحمه ،طولت عليك اني مع السلامة.

أسمر: الله يرحم والدج ويهدي بالج الله وياج .

سديته منه ونمت لأول مرة بحياتي احس بالأمان، احس اكو شخص يخاف علية، بعمري ما حسيت بهذا الشعور جنت افتقر للإهتمام من الاهل وجنت اراقب اهتمام الاهل لصديقاتي وأتمناه، بالضبط مثل شعور الطفل الفقير الي يباوع للحلوى وماعنده فلوس يشتريها.

استودعت نفسي وأمنياتي وأحلامي لرب العباد وعند المسيح والعذرا ونمت.

ثاني يوم كعدت ساعة سبعة الصبح دخلت على الانستكرام وعلى حساب أسمر كتبتله ..

_إن كنت تشعر بالألم فأنت حيّ أما إن كنت تشعر بآلام الآخرين فأنت انسان ،صباح الخير يا عزيزي

دزيتها وسديت الموبايل، سويت ريوك والابتسامة على وجهي وكل شوية اتذكر تفصيلة من الي صارلي البارحة مرة اضحك ومرة أخجل، كملت الريوك وصبيت الجاي وكعدت آكل، اجاني مسج فتحته لكيته كاتبلي ...

_ حماكِ الرحمن لأهلكِ ،صباح الخير
شلون صرتي ان شاء الله احسن؟

اقرأ المسج والضحكة مرسومة على وجهي جاوبته بلهفة

_ الحمدلله زينة

_نومتج شلونها؟

_ مريحة

_ شنو برنامجج اليوم؟

_راح اروح للشغل وبعدها اروح اجيب شغلة محتاجتها وارجع للبيت

_ديري بالج على نفسج، نحجي بعدين.. اني طالع للدوام

_ ماشي

_باي

_أسمر

_نعم

_مرة قريت إقتباس حسيته ينطبق عليك

_وهو؟

_هناك نظرة تختصر الحياة ،وصوت يختصر المسافة،وشخص يختصر الجميع وهو انت...

دزيتها قراها وبعد ثواني دزلي قلب

لزمت الموبايل بإيدي وصرت أكمز وأصيح

يحبني.. يحبني.. يحبني.. والله يحبني، كعدت وكلبي يدك سريع مغمضة عيوني وأضحك واضرب برجلية سريع بالكاع من الحماس الي اني بيه..

لهناك ورن موبايلي باوعت أسمر، جاوبته حمحمت وكلت..

بسيل: الو

سمعت ضحكاته العالية كلتله..

بسيل: خير ضحكني وياك؟

أسمر: شبيج انتلتي ؟

بسيل: شنو؟

أسمر: شفتيلج فارة وكمتي تكمزين ؟

بسيل: شنو تقصد؟

غير صوته يقلدني وكال ...

أسمر: يحبني.. يحبني.. يحبني.

شهكت وخليت ايدي على حلكي وكلتله

بسيل: هاي شمدريك ؟

ظل يضحك بعدها اصريت عليه جان يكول

أسمر: اني أقرأ فنجان لهذا عرفت..

بسيل: لا حباب احجي الصدك ..

ظليت اتوسل بيه بعدها كال..

أسمر: اتصلتي فيديو بالغلط وشفتج شلون تكمزين

بسيل: شفتني؟ صدك شفتني؟

أسمر: والملوية ،خرعتيني من الصبح هاي شنو كفشتج طلعتي محلوة بدون مكياج!

من كالي هيج رحت لغرفتي اباوع على نفسي واعدل بشعري اشوف شكلي ما بيه شي كلتله

بسيل: لا تجذب علية صدك اني محلوة؟

أسمر: اسألي زوجج هو يجاوبج ، مع السلامة

سده وخلاني حايرة افسر تصرفاته وياية وليش هيج حجى؟ بالساعات الي مضت حسسني بمشاعر عمري ما حاستها وبدقيقة وحدة انتشلها كلها من داخلي أصبت بخيبة أمل والحماس الي عشته انطفئ تركت موبايلي بالغرفة ورحت للمطبخ لكيت ماما تصب جاي التفتت علية.. همست

بسيل: صباح الخير

ماريا: شنو الي صاير وياج اليوم صوتج واصل لآخر الشارع ؟

همست بضيق

بسيل: ما صار شي سلامتج...

اخذت الصحن والكوب الي جنت اتريك بيهم وتوجهت للسنك حتى اغسلهم حجت بحدة..

ماريا: مو طفلة كدامج وتقشمريها منو جان يحجي وياج؟

بسيل: صديقتي...

تقربت مني نترت الصحن والكوب من إيدي وضربتهم بالكاع فزيت ورجعت ليورا مصدومة بتصرفها، عطت بصوت

بسيل: شبيج انتِ شبيج؟ من جنتي بالعراق زينة وصوتج هادئ شنو صارلج هنا وشنو غيرج تخبلتي علية تتقصدين تسويلي مشاكل ؟ هاااا !!! لو هناك جانوا ولدج معوضين وانتِ ساكتة ...

ماريا: أكرهج من يوم الي أبوج مات بسببج

بهتت ،وبعدها سألتها

بسيل: بسببي اني؟ بابا مات بسببي!!

ماريا: اي بسببج

بسيل: شنو سويت؟

ماريا: تتذكرين كلش زين ..

بسيل: لا ما اتذكر ذكريني شنو الي صار ؟

ماريا: لو ساكتة وما حاجية لأبوج الي شفتيه بعينج جان ما انجلط ومات

ضحكت مستهزئة جاوبتها..

بسيل: جنت صغيرة اني وما اتذكر ،شنو قصدج لو ساكتة؟ عن اي موضوع تقصدين؟ عن موضوعج انتِ وعمي الي من كبرت يله عرفته وذيج السنين كلها ساكتة أستحي اواجهج بالحقيقة بس مادام انفتح الموضوع عندي هواية اسئلة اريد اسألها واتمنى منج تجاوبيني بصراحة

جانت نظراتها عبارة عن غضب وإستياء يطلع منها شرار

ماريا: أني غلطت ما جنت بوعيي وبنفس الوقت ما صار شي حتى تروحين تفضحيني يم ابوج

بسيل: جنت صغيرة وما اتذكر هواية من ملامح الموقف بس ما انسى رنين ضحكاتكم وباقي يتردد بأذني كل يوم ..

ماريا: الموقف اللي تتناسيته وتدعين ما تدرين بيه بسبب الفتنة مالتج ابوج انجلط...

بسيل: شنو كلتله اني بالضبط لان ما اتذكر ؟

سحبت كرسي وكعدت اخذت جكارة، ورثتها أخذت نفس وزفرته بالهواء ضيقت عينها وكالت ..

ماريا: أجى ابوج تعبان ورحتي كعدتي بحضنه تتسابقين ويا اخوانج على حنانه ما اتذكر شنو اللي سألج وانتِ شنو جاوبتيه لان ما سمعت بس ابوج دخل للمطبخ مثل البركان وكال ...

_ماريا! شنوعندج اليوم ببيت كمال وماخذة وياج بسيل؟ اني مو حذرتج بنتي ما تروحلهم؟

ماريا: هاي شبيك غير اجتي وياية قابل راحتلهم وحدها..

_ ليش اني اقبل انتِ تروحين حتى تاخذيها ؟

ماريا: بيت اخوك قابل غربة؟

_ كام يصيح وصار عصبي ويكرر بهاي الكلمة مو اخوية هذا مو اخوية، عار الأخوة هذا..

ماريا: ليش شبيه؟ شنو سوى؟

_عينه نكسة تصرفاته جايفة وفوك هذا كله كاعدة بحضنه!

حجاها وظل يملخ بشعري اريد افهمه ما يفهم، لهناك وكع وانجلط ما طول سنتين ومات،بسبب منو برأيج ؟ بسببج يا غبية حجيتي شي اني ما مسويته..

بسيل: ماما بس انتِ بستيه!

ماريا: هذا الشي عندنا عادي لان هو بمثابة أخوية، ماسويت شي غلط ولا كعدت بحضنه مثلما كال ابوج

بسيل: اني حتى لو هيج حجيت المفروض بابا ما يصدكني لان عنده ثقة بيج، الخلل بعلاقتكم مو بتصرفي اكيد صاير شي خلى بابا يشك بيكم ..

كامت تضرب على ميز الطعام وتصيح ..

ماريا: اسكتي اسكتي حقيرة تستاهلين الحرك الي بظهرج وابد ما متندمة عليه

بهتت وبقيت اباوعلها همست بصوت مبحوح ودمعتي نزلت،صافنة على قساوتها

بسيل: يعني انتِ الي حركتيني؟ مو قوري الجاي وكع علية !!

ارتبكت وكامت تعدل بشعرها وكالت

ماريا: كومي روحي لدوامج تأخرتي.

كامت من مكانها متفادية نظراتي،بقيت ابجي وسألتها..

بسيل: شلون انطاج كلبج هيج تسوين بية ؟ لهذا السبب ما خليتيني اروح أبرر موقفي لبيت خالة اناهيد ولا انتِ شهدتي وكلتي اني جنت وياها ، بقيتي ساكتة ولا اعترضتي على زواجي من لؤي بالعكس باركتيه وبنفس الفترة اخذتيني وسافرتي بحجة تحميني من أخواني دمرتيني ودمرتي مستقبلي دمرتي حتى سمعتي، أم انتِ أم؟؟

كمت اصرخ وما سيطرت على نفسي سكتت من سمعتها تكول

ماريا: ردت تعيشين شعور الخيانة اللي انتِ ما مسويتها وتشوفين نظرة العالم الج حتى من نجي نتحاسب مثل هذا اليوم لا تلوميني ولا الومج ونكون متعادلين...

بسيل: مستحيل تكونين أمي !مستحيل ولا اصدك بيوم انتِ جبتيني من بطنج ،
اني وحيدتج ،. شلون انطاج كلبج هيج تسوين بية! راح اتخبل..

ماريا: مثلما انطاج كلبج تدمرين سمعة امج وهي بريئة ...

بسيل: لا انتِ مو بريئة بابا ما انجلط ومات من فراغ إلا متأكد من كلامي ..

كامت تصيح وتضربني وتكول...

ماريا: حقيرة حقيرة شلون تحجين هيج!

تركتها ودخلت لغرفتي غيرت ملابسي اخذت جنطتي والاغراض وطلعت، ظليت امشي بدون وعي وافكر بكلامها الى ان تعبت وكعدت، طلعت موبايلي احتاجيت احجي وياه بعدين صفنت شنو اللي اريد اكوله! بعقل مغيب بدون وعي اتصلت عليه، ما رد رجعت اتصلت على الخط طلعلي مشغول، كتبتله ..

_محتاجتك بحياتي.

جنت أدرّس ودك موبايلي ، مندمج اكتب بالموضوع على السبورة واصيح
يالمضارع ، يالأمر انتبهوا وياية..

كام واحد من الطلاب وكال..

_أستاذ أستاذ ، تلفونك يدك...

التفتت عليه وكلتله..

أسمر: ادري منو كالك اني اطرش، انتبه على الدرس وخلي بالك وياية، رجعت اشرح بعدها كال

_ أستاذ؟

أسمر: هاااا

_ الشقراء تتصل

توجهت للرحلة حتى أخذ الموبايل والكتاب تعالت اصوات ضحكاتهم وصاروا يتهامسون بينهم رفضت اتصالها وخليت الموبايل بجيبي طلبت من الطالب يجي يوكف يمي، أجى وكف كبالي مدنك راسه..

أسمر: التصرف الي سويته لائق؟

_ أستاذ شنو سويت؟

أسمر: أسأل نفسك شنو سويت..

_ أستاذ دك موبايلك وكلتلك منو المتصل

أسمر: برأيك هذا الفعل صحيح؟

_ ما اعتقد سويت شي غلط

أسمر: من ترفع موبايلي من فوك الكتاب وتشوف منو المتصل رغم اني مخليه على الشاشة وتذكر الاسم بصوت عالي وتسمّع زملائك هذا الشي مرفوض وغير مقبول لا عبالك اني اخجل من انت ذكرت الاسم متأكد كلكم بوقت معين وبعمر معين راح تصير عندكم صديقات او قريبات تحجون وياهم، وين العيب بالموضوع حتى صرتوا تضحكون وتستهزئون ؟

دنك راسه واعتذر من عندي ، وكفوا بقية الطلاب اعتذروا مني، قبلت اعتذارهم ورجعت كملت الدرس واتصلت عليج...

بسيل: تصورتك تجاهلتني عمداً لهذا دزيتلك هذه الرسالة ...

صار يقلد صوتي ويكول...

أسمر: حاولت ما اتصل حاولت ما اخليك تغضب مني ولا تنزعج من كثرة مسجاتي بس وعد راح اسكت فترة طويلة من الزمن لان المبالغة بوضوحي صارت تزعجك، وبعد شوية تكومين تدزيلي أسمر تعالي.. اني بمصيبة ،اني محتاجتك ، عندي شي اريد احجيه ..

مسحت دموعي وضحكت ...

بسيل: ابقى قلد علية ..

أسمر: ما اقلد بس ردت اضحكج وبنفس الوقت أريد تلتمسيلي عذر اذا ما جاوبت معناها مشغول، احجيلي شبيج بشكل مختصر لان عندي درس ..

بسيل: اكو اشياء سيئة كاعد تصير بحياتي توجعني...

أسمر: ما الحك هسه افتهم منج الموضوع بس خلي ببالج اكو ناس يحسدوج على جمالج، اكو ناس تتمنى وظيفتج واكو من يكره تقدمج ويتمنى يوكفج بنفس المكان واكو ناس راح يخلوج وحدج بوسط الطريق ، بعدها راح تلكين مفترق طرق حاولي ما تمشين بالطريق الخطأ لان اذا خطأتي محد راح يرحمج واذا تعثرتي محد يبررلج سقوطج ، واذا الشدائد أقبلت بجنودها والدهر من بعد المسرةِ اوجعك لا ترجو شيئاً من اخٍ او صاحبٍ أرأيتِ ظلكِ في الظلامِ مشى معك ارفع يديكِ الى السماءِ ففوقها ربُّ اذا ناديتيهِ ما ضيعك.

كمت ابجي بصوت عالي انهارت أعصابي حاول يهدأني ما كدر يسيطر علية بس من كال اذا ما سمعتيني هسه ما راح تسمعين صوتي بعدين سكتت تحمحمت بعدها كال......

أسمر: احاول اربط من الأشياء الي سمعتها بحياتج وتوضحلي ماكو سند حقيقي يسندج لهذا حجيتلج هذا الكلام بمعنى التجأي لرب العالمين هو الي راح يغيرلج حياتج من اليوم امشي صح وشنو غلط عندج صححيه مو لأجل أسمر ولا لأن اني حجيتلج اتركي كلشي يغضب الله في سبيل الله،،

محد يدوملج غير وجهه الكريم صح هسه اني اسمعج بس راح يجي يوم أمّل حالي حال اي انسان ملول عجول متسرع لهذا التجأي لليسمعج بدون ملل وعنده الحلول اللي أسمر ما يكدر يخترعها الج يا بسيل نعيشُ على الصبرِ والصبر جميل كل شيء بيد الله وما أجملُ هداية الله. وهذا اللي حجيته حتى اهون عليج مو تكعدين تبجين..

بصوت مخنوك همست..

بسيل: اريد هديته إنسان يرشدني ويصلحني ويأويني ويسترني.

بقت تحجي كلام يعبر عن كسرتها وهواي حجيت وياها ، بعدها كدرت اضحكها يله ،نهيت المكالمة...

رجعت للدرس كملت باقي الحصص وطلعت للبيت اتصلت على أرود جاوبني

أرود: الو هلو أسمر ؟

أسمر: شسويت على التكت ، حجزتلي ؟

أرود: لا ما حجزت..

أسمر: ليش شنو وصيتك قبل لا أطلع؟

أرود: كلتلي احجزلي هاليومين غيرها لا تحجز واقرب حجز بعد أسبوع..

أسمر: نشوف مكتب ثاني ..

أرود: هو شنو غير نفس المطار والرحلات وحدة شعليها المكاتب ؟

أسمر: عجل شوفلي مطار النجف

أرود: ادري متوازي؟

أسمر: اي متوازي، روح هسه إفتر ودورلي أريد حجز هذه اليومين، بقينا نحجي يحاول يقنعني آخر شي اني قنعته، سديته منه ورجعت للبيت لكيت أسمار كاعدة بالحديقة بصوت عالي
صحت

أسمر: ها سمرتنا؟

التفتت علية تضحك رحت كعدت يمها ..

أسمر : الله يگويج .

بإبتسامة حلوة وهادئة همست..

أسمار: الله يساعدك شلونك؟

أسمر: الحمدلله بخير، أديم شلون صار؟

أسمار: بعده، نريد نراجع ونشوف شنو إستجد وياه..

أسمر: خير ان شاء الله، منو راح ياخذكم؟

بملامح وابتسامة خجل كالت.

أسمار: منو غيرك حاير بينا؟

بقيت ساكت ما ردت أكوللها عندي سفر وارد طلبها، ابتسمت وكلتلها ..

أسمر: تدللي عيوني الاثنين الج حبيبة اخوها ..

أسمار: يخليك ويسلمك ..

أسمر: محتاجة شي سمرة لو افوت انام؟

أسمار: تغديت لو أصبلك ؟

أسمر: انام ساعة واكعد اتغدا لان ممرود

أسمار: الله يساعدك ...

أسمر: ويساعدج..

دخلت مددت بغرفتي وإحتاريت اكلف أهاب ياخذهم واني اسافر لو أأجل السفرة اودي أديم ،وجعني ضميري على الإثنين بسيل وأسمار ما ردت أكسر بخاطر وحدة منهم ،
من بعد تفكير أخذت موبايلي اتصلت على أرود طلبت من عنده يحجزلي على الاسبوع الجاي سألني شعجب غيرت رأيك كلتله صارتلي شغلة،
بعدها نمت كعدت تغديت، اتصلت عليها ما ردت بعد ساعة كتبتلي ...

_ عفواً جنت نايمة ما سمعت الموبايل وهسه ماما كاعدة يمي ما اكدر احجي، اذا اكو شي مهم اكتبلي..

كتبتلها

_ ماكو شي سلامتج، حبيت اطمئن عليج وابلغج بسفرتي الاسبوع القادم حجزت على اول طيارة، بعدها بقينا نحجي شوية وراحت، بهذا الاسبوع الي مرّ اخذت أديم للطبيب سوينا الفحوصات والاشعة اتطمنت على وضعه ارتاحيت نوعاً ما.

الفترة الي قبل السفر جنت كل يوم احجي وياها ساعة قبل لا انام وبوقت الاستراحة اللي عندي بين الدروس اتطمن عليها بس من خلال الكلام واسلوبها بالحديث شكيت بيها منفصلة عن زوجها

اقترب موعد السفر وبلغتهم عندي شغل استفسروا شنو هذا الشغل وشنو نوعه اللي اقتنع اقتنع واللي ما اقتنع مثل ارود حجيتله الحقيقة ،ظل يلومني وما قبل على تصرفي كلتله..

أسمر : ما اكدر نختني ولازم اساعدها ..

أرود : حياتها كلها مشاكل وتعرف كلش زين موقف سمرة تجاهها ...

أسمر : اعرف بنفس الوكت اكو اشياء مبهمة ضروري تتوضح للكل ..

أرود : بس رح تخسر اخوك ومرته...

أسمر : اساعدها وبعدين احجيلهم ..

أرود : شكد تتأخر ؟

أسمر : حسب ما اعرف .

أرود : ودوامك ؟

أسمر : شبيه ..

أرود : راح تنفصل لان هواي تغيبت..

أسمر : ماخذ اجازة ..

أرود : المدير خوش انسان كل مرة ينطيك اجازة ...

أسمر : خليني اروح ، انت إحفظ سري واياك تحجي لأقرب شخص حتى لو جان أهاب ...

أرود : لو ما تعرف نفسك غلطان ما تسكت جان حجيت ..

أسمر : عندي هواية اشياء اريد اعرفها ،من ضمنها حادث اخوك لا عبالك اني رايح احب وانحب ..

ربت على كتفي وكال ..

ارود : سهلة ان شاء الله سهلة..

سافرت وكلي امل احل مشكلتها واخذ اللي اريده من معلومات وارجع وبعدها ينتهي كل شي ،بس اللي صار مو بالحسبان...

اتصلت عليهاوسألتها اذا بالبيت او لا كالت

بسيل : اني بالدوام انت وين ؟

اسمر : اني وصلت ،وين تحبين انتظرج ؟

بسيل : صدك وصلت !

أسمر : اي

بسيل : نورت ،ساعة واكون يمك ..

بلغتها بعنوان المطعم اللي رح نلتقي بيه ورحت للفندق اللي كل مرة اروح بيه،حجزت غرفة ،ارتاحيت شوية وبعدها رحت للمطعم .

انتظرتها شفتها طولت اتصلت عليها جاوبتني ..

بسيل : اسمر دقايق واني يمك ، ما رح اتأخر اذا تكدر اطلب النا غدا بينما اوصل ..

أسمر : شنو تحبين تاكلين ؟

بسيل : بكيفك بس كون شي دسم ..

ابتسمت وكلت الها ماشي
طلبت اكل نزلوه ، وبعد نصف ساعة يله اجتي ،دخلت للمطعم تبتسم ،بقت تدور علية وكفت اشرتلها ، ابتسمت واجتي ،كعدت ميلت ركبتها وكالت..

بسيل : هلاااااو

أسمر : تأخرتي هواي وبرد الاكل ..

بسيل : صارتلي شغلة اضطريت اتأخر

أسمر : عسى ما شر ؟

بسيل : لالا ،سلامتك ، ليش ما تغديت ؟

أسمر : مو جوعان هسة ناكل سوية ،خليني ابدل الاكل ..

بسيل : لالا اني احبه بارد ..

اصريت عليها اغيره،ضحكت من شفتها متجاهلتني وظلت تاكل ..

جنت مدنكة راسي واكل انتبهتله ما ياكل ،رفعت راسي لكيته صافن علية بنظرات حنونة يتأملني بيها ،حاط ايديه الاثنين جوة حنكه قابض الكف ،ابتسمت وهمست ..

بسيل : شبيك صافن ؟ليش ما تاكل ؟

اسمر : ها لالا هسة رح اكل
بس كلتلج شبعان ..

رجعت اكل ، رفعت راسي لكيته يباوع نفس النظرة ..

بسيل :اسمر شبيك ؟ اكو شي غريب ؟

همس بصوت ناصي بيه بحة وكال ..

أسمر : بالعكس طالعة كلش حلوة ،ولايكلج الحجاب ...

ابتسمت دنكت راسي ،كملنا الغدا وشربنا الجاي وبعدها طلعنا من المطعم ،تمشينا وصلنا لحديقة عامة كعدنا بيها
فتحت علاكة الهدايا ،طلعت علبة وخليتها بصفه..

همس ..

أسمر : شنو هاي ؟

بسيل : ذكرى بسيطة مني

بقى صافن على العلبة رفع راسه باوعلي وكال..

أسمر : بسيل ما اكدر اخذ هدايا منج..

رجعلي العلبة ..

بسيل : بس هاي مو هدية..

أسمر : عجل؟

بسيل : ذكرى بسيطة مني ..

أسمر : ليش وين راح تروحين ؟

بسيل : ما اروح ،وين اروح ؟

أسمر : خليها من يصير وقتها المناسب اخذها.

رجعتها بالعلاكة تنهدت ،وبقيت ساكتة ..

اسمر : ما اريدج تزعلين مني وبنفس الوكت ما اريدج تخطئين ..

بقيت ساكتة ماجاوبته..

بعدها كال ...

أسمر : اريدج تحجيلي كل شي صار وياج بس قبلها شنو اللي خلاج تقتلين شخص..

عكدت حاجبي باوعتله بإستغراب

بسيل : منو هاي اللي قتلت شخص ؟

اسمر : انتِ

بسيل : شوكت هاي ؟ اني قتلت شخص شو ما ادري ..

أسمر : مو انتِ كلتي اني قتلت واحد ؟

بسيل : اني؟ شوكت حجيت هيج ؟

أسمر : انتِ تحجين صدك لو تتشاقين ؟

بسيل : اساسا اني مستغربة من سؤالك انت كاعد تتشاقى وياية لو مسوي بية مقلب ؟

أسمر : بسيل من جنتي سكرانة واتصلتي انتِ حجيتيلي

بسيل : انت كلتها سكرانة يعني مو حاسة بنفسي من احجي

أسمر : مو اتفقنا ما تضمين علية شي ..

بسيل : اي و كاعد احجي الصدك ما كذبت..

أسمر : بدينا مراوغة شلون راح اثق بيج؟

بسيل : ما مجبور تثق بية ،ولا مجبور تسمعني ..

اسمر : شبيج زعلتي ؟

بسيل : لا ليش ازعل ؟ انت مو اول واحد ما عندك ثقة بية ..

اسمر : ما اعرفج ،وعليج هواي علامات استفهام ،حقي ما اصدك ،غير هذا كلهم ضدج،اهلج وزوجج واسمار و هذولة ما اعرفهم وما عندي ثقة بيهم ،بس أسمار عرفتها حق المعرفة وما اتصور تكذب ،لهذا صعب اصدك كل الكلام اللي تحجي ..

صفنت بوجهه جريت نفس وهمست.

بسيل : ليش جاي وكاعد يمي هسه ...

رفع اكتافه وكال..

أسمر : ما ادري ..

بسيل : خلص ،خلينا نرجع ما تسوى احجيلك بعد وتأخرت على البيت ..

كمت مشيت خطوتين صاح ..

أسمر : بسيل ..

التفتت عليه همست

بسيل : نعم

أسمر : طالعة كلش حلوة اليوم بالحجاب.

بسيل : شكرا ،اعرف ..

أسمر : الحجاب دائم لو مؤقت لان ما مشطة شعرج .

بسيل : اي ما عندي مشط ..

أسمر : اشتريلج ..

بضحكة كالت..

بسيل : ياريت ..

أسمر : انتظري اوصلج..

بسيل : ما احتاج ..

راحت وبقيت كاعد بمكاني حاير شنو اسوي ؟ اسمعها واساعدها حتى لو ما اصدكها ،لو اتركها وارجع ؟..

استمريت بالتفكير الا ان صارت الدنيا ليل ،حرت بين قلبي و عقلي
آخر شي قلبي الغبي انتصر ،اتصلت عليها ما ردت ،رجعت اتصلت مرة ثانية وثالثة ورابعة هم ما ردت ،كتبت الها زعلتي مو ؟

ما جاوبتني اخذت بعضي ورجعت للفندق سبحت وطلبت اكل ،مددت عالسرير فتحت موبايلي اتصفح بيه لكيتها دزاتلي مسج مكتوب بيه ...

_اصبحت في الفترة الاخيرة انفض الاشخاص مني كمن ينفض الغبار عنهم حرفياً ،لم يعد لي طاقة على تحمل اي مخلوق يشعرني بربع شعور سيئ او يجعلني ان اشعر بأنني كنت غير كافيا ، وطريقك وحدك قد يرافقك فيه احدهم لفترة من الوقت لكن لا يكمله احدا غيرك ....

قريتها وكتبت غير يستقر جلال الدين الرومي .

دزتلي ضحكة

كتبتلها ..دزيت عشا، لشخصين تشاركيني بيه؟
كتبت

..لا بالعافية

-بسيل

- نعم

- تحجبتي ؟

-ليش ؟

-فضول..

-تقريبا ،بس مو كلش

- اي واضح ،لان ملابسج مو مال حجاب

-ماكو بالمنطقة اللي كاعدين بيها ملابس مال حجاب .لهذا اريد اوصي

- عجل الشال من وين جبتيه ؟

- عندنا احنا شالات من نروح للكنيسة نلبسها ..

-شنو قررتي تجين نتعشا سوية؟

- لا

-عجل تصبحين على خير ..

_ وانت من اهله.

ثاني يوم اتصل عليها ما ترد ،تركتها براحتها...

كملت كم شغلة ،دزيتلها مسج

-بسيل انتِ وين اتصل ماكو وما تردين..

ما اجاني جواب من عندها،ثاني يوم اتصلت نفس الشي ،رحت كبال بيتهم وكفت ساعتين ما طلعت ،رجعت رحت لمكان دوامها وهم وكفت انتظرها و ماكو ،اتصل عليها ما عدها انترنت وخطها مغلق ..

صرت عصبي نار ،حلفت بعد ما اجاوبها
وثاني يوم رحت حجزت رجوع للعراق ،سفرتي جانت بعد يومين من الحجز ،خلال اليومين انتظرت تتصل ما اتصلت ،اخذتها حجة عليها حتى انهي كل شي بيني وبينها ،لا اساعدها ولا اسمعها ،اما عن لؤي عندي طريقة ثانية اكشف بيها الاعيبه .

صار موعد سفرتي رجعت والطريق كله اسب بنفسي واضحك على غبائي ،شلون صدكتها ..

مرت فترة طويلة ما حاجيين وما ادري عنها اي شي بهاي الفترة جنت كل يوم اشرب فنجان واقراه ردت اتخبل بعدها هملت سالفتها وبديت ارجع لحياتي وانساها وفضولي بمعرفة حياتها انتهى
بعد مرور سبع شهور اجاني اتصال من رقم دولي جاوبت ...

أسمر : الو

اجاني صوتها تصرخ وتبجي

بسيل :أسمر فدوة لعيونك ساعدني ...

سويت روحي ما اعرفها وبجيها ما اثر بية ،ببرود جاوبتها ..

أسمر : منو انتِ ؟وشو نوع المساعدة ؟محتاجة فلوس احولج يعني ؟

سكتت ،اسمع بس انفاسها السريعة بعدها كلت..

أسمر : الوو ،وياية لو اسده ..

همست بصوت مبحوح..

بسيل :أسمر هاي شبيك اني بسيل ..

اسمر : مر علية هذا الاسم من قبل بس بصراحة ما متذكره..

يتبع....

متابعة ممتعة..

مرحبا حبايب ، صعب هسه ادخل أسمار وأديم لحد ما نوصل للحد اللي ادخلهم بيه ياريت ما تضغطون علية ، لان هذا مسار السرد و صعب يتغير....

https://www.youtube.com/watch?v=7uGfqkeeLSY