رواية أحببته كما هو الفصل العاشر 10 - بقلم رسل طالب

عندما لا تجد شيء يطمئنك
انظر الى السماء
هناك الله يسمع ويرى ❤

******** &&&&&&&&&& ******

رجعت للبيت مضطر لان ما قبلوا ابقى بالقاعدة بسبب اصابتي .

تلكتني امي من الباب : هله يمه هله بشمعة بيتي.. بوستني واخويه عصام هم تلكاني بس حسيته مو على بعضه.

كتلهم الحجي وين؟

اشرتلي امي على المضيف ..

دخلت للمضيف وكف وتلكاني: يا هله بالعريس.

احس كلمته خنجر بصدري ( معناها يريدني أمشي على بنت عمي)

تسلم يابه .. اترخص منك اريد ارتاح .

اي اخذ راحتك وراك ترتيبات المشيه ، حسب حسابك نهاية الاسبوع نروح.

ان شاء الله ..

صعدت لغرفتي ويايه عصام ساندني؛شبيك يخوي ليش هيج سويت بروحك؟

باوعتله واني مخنوك : ابوك واهله ميرحمون ( عيوني صارت حمر ) عصام اطلع من الغرفة ، اريد ارتاح .

طلعت من الغرفة وظليت واكف يم الباب واني اسمع شهكاته قبل دموعه فضحته ؛ صدك كسر خاطري بس شنسوي هاي اعرافنه بعد.

ظليت بغرفتي ما اطلع يومين ؛الاكل امي تجيبه اليه .. واكل شويه واعوفه.

يمه عصام اخوك مدري شجاهه ميقبل يطلع من غرفته ولا يقبل ياكل بس شوفه شبي ، احد غاثه أحد مسمعه حجايه؟

ليظل بالج حجيتنه اني احجي وياه.

صعدت لغرفته ودكيت الباب ما اجاني رد منه دكيتها كوه سمعت صوته : ادخل.

السلام عليكم .. شبيك يخوي ، اريد افتهم شجاك وشنو الي غيرك هيج؟ تحب وحده؟

اني من كال كلمة تحب وحده رأسا رفعت راسي باوعتله حسيته داس على جرحي.

ااحجيلي اني اخوك مو ابوك ولا عدوك.

حجيتله القصة بما انزلت من اول ما عرفتها لليوم الي عفتها .

صفن عصام عليه : اني احاجي ابويه واكوله.

شنو تحجي!! ابوية قافل وصلت بي يكولي ترجعلي ملفوف بالعلم ولا ترجع تمشي على رجليك وتنزل راسي.

ميخالف خلي احاول وياه.

صدك قبل المشيه بيوم كعدت ويه ابوية وحجيتله سالفة حسام بس مو بالتفاصيل : يابه ميصير احنه بيا وكت حتى تريد تجبره على بنت عمه وفوكاها هي بعدها طفلة .

ما بقى والله غير من بزري ويعلمني شون اتصرف!!

العفو يابه مو قصدي اعلمك بس حال اخويه يكسر الخاطر والله.

شوف كلمة وكلتها ياخذ سارة لو والله يحلم يطب البيت واتبره منه.

يعني اني هم تتبره مني اذا ردت اخذ غريبه؟

انته عناد بأخوك الا ازوجك غريبه، وعلى ذوقك منو تختار اروح امشيلك.

انصدمت من كالها : يابه اني واخويه حسام واحد ليش تخلي يموت بقهره؟

لان ميعرف مصلحته وين واني كلمتي لو ما منطيها جان خليته يزوج الي يريدها بس مدام كلت كلمة بعد خلص.

طلعت من يمه واني نفسيتي تعبت ، اول مرة اشوف ابوية هيج يحجي ؛ هذا الي يحل مشاكل الناس تالي هيج يسوي بأبنه.

استسلم حسام لكلام ابويه ورحنه مشينه على سارة طبعا خطب وجاب سيد وهو مشايفه ومن كالوله طب لبسها الذهب ما قبل كال لامي انتي روحي لبسيها.

المهم بعد ما صار الي صار كعدت ويه امي داسولف وياها على وضع حسام؛ جان وضعه حيل مو زين ومتخربط يوميه نودي للمستشفى بسبب فقر الدم الحاد الي صار عنده .. كالتلي : يمه خاف اخوك ما رايد سارة؟

والله يمه ما رايدها وحجه ويه ابويه من جان بالمعسكر وابويه كاله ترجع بالعلم ملفوف ولا تنزل راسي .

ضربت امي على صدرها : يا يمه وليدي .

ورجعت حاجيته لابويه من رجع حسام وكلتله ميصير تغصبه؛ كالي لو مدري شيصير ما ارجع بكلمتي ولو ما منطي كلمة مجان جبرته بس مدام انطيت كلمه بعد انتهى ، وكالي انته عناد بأخوك الا ازوجك على مرامك ومنو تريد بس كول واني امشيلك.

فجأة وكف حسام كبالنه وظل يباوع عليه وعلى امي .. ما حجه شي بوجهه طلع من البيت ركضت وراه بس ما قبل يسمعني وطبعا اختفى اسبوع، ما بقينه مكان ما دورنه عليه تالي طلع راجع لوحدته ملتحق حتى بلا مياخذ جنطته ولا كايل لأحد.

تقريبا ظليت بالوحدة بلا ما ادخل قتال شهر ونص لان كانت فترة اجازتي بس مضطر ابقى لان ما عندي مكان اروح اله حتى ابات بي وطلعت من البيت ما شايل فلوس تكفيني حتى اكعد بفندق او أأجر بيت .. بعد ما خلصت اجازتي وقررت التحق بصورة رسميه طلب الامر من عندي اروح اسوي تحاليل حتى يتأكدون من جاهزيتي للمعارك لان جان وضعي الصحي مو تمام.

رائد حسام هاي الارسالية مالتك اخذها وروح للمستشفى وخلي يكتبولي تقرير بحالتك.

حاضر سيدي .. اخذتها ورحت واني كوه دامشي والدنيا تفتر بيه بسبب فقر الدم حتى ضغطي على طول هبوط .

دخلت لطبيب الباطنية من شافني كال وضعك مو تمام ومبين فقر الدم عندك بس لازم نتأكد شكد وصل حتى نقرر اذا تحتاج ننطيك دم او لا.

اخذت ورقة التحليل وانطيتها للولد الي كاعد بمختبر سحب الدم.

كالي : انتظر استاذ شوية واصيحك .. واني صدك ما بيه حيل اوكف رحت كعدت على كراسي الانتظار .. الولد ما طول صاحني وكالي : تفضل منا خلي البنية تسحبلك.

باوعت البنية الكاعده هي رنا اني شفتها كوه لزمت نفسي ما حظنتها ردت ارتمي بحظنها وابجي.

بس هي ظلت كاعدة ما سوت شي فخفت احجي ظليت ساكت .. طلبت مني ارفع ردن القميص حتى تسحب دم.

انتبهت على ايدي اليمنى الحلقة بيدي حسيتها انخطف لونها من شافتها ( طبعا الحلقة لبستها لان ابويه حلفني ما انزعها مدامه حي يرزق).

فجأة كامت من مكانها وركضت وهي تبجي .. الولد صاحوا وراها ما رجعت .. اني طلعت وراها بسرعة ، ردت الحكها .. ما طولت بس عبرت باب السحب حسيت مثل الغيمة سوده ونزلت واختفى كولشي .

وره 4 ساعات كعدت واحس بألم قوي بوجهي وبراسي ، حسام ابني تسمعني؟

هزيت براسي ..بنعم

زين تشوفني ؟؟

مداشوف ظلمه او مغوشه مدافتهم الصورة . . هزيت براسي ب لا.

ضليت لليل اني ما اشوف زين ؛ وسخونه موتتني بس اهذي بكلام ما مفهوم بس ( رنا) فاهمين منه هذا الي فهمته من الجنود مالتي بعد ما صار وضعي احسن ثاني يوم.

ضليت 3 ايام ينطوني دم ومغذيات لحد ما تحسن وضعي وكدرت وره 5 ايام امشي لوحدي لان بالايام الاولى جنت لو كرسي لو الجنود يكودوني من اتحرك.

وره ما طلعت رحت لغرفة السحب وسألت عليها ؛ كالولي ان هي طالبة جانت مو موظفه وصارلها فترة مجايه .

رجعت خائب صراحه ماكو طريقة حتى اشوفها واذا ردت اشوفها لازم انتظر لشهر العاشر اروح للكلية من اداوم.

مشت الايام وجنت حيل اشتاكلها واظل ابوس بصورها وابجي :
اه يا ليل المفارك

موت يتمشه علكيف..😔

وره فترة اذكرت الفيس مالتها واني متابعة .. فرحت كلت خلي افوت اشوف شبي ما بي واعرف اخبارها .

انصدمت الفيس تقريبا صارلها شهر ماكو واخر بوست جان حيل حزين باوعت لتاريخه .. اذكرت تاريخ دخولي للمستشفى ورقودي بيها.

صدك انقهرت بداخلي: يا اللهي اني ما ردت اكون لهاي البنيه غير بس مصدر سعادة ليش هيج خليتني ادمرها😔.

ما بقالي حل غير انتظر دوام الكلية حتى اشوفها .

بعدين صفنت اذا رحت شحجي واصلا منو يكول راح تسمعني وتتقبل كلامي .. وحتى اذا تقبلته شنو راح يتغيير ؟ قررت انسى هالفكرة واعوفها واسلم امري بيد الله هو يحلها اليه.

نزلت للبيت بوقتها تقريبا 10 ايام وهم نفس الشي رجعت ما اكل ويوميه اتخربط على اهلي ؛ امي تخبلت كالت لاخويه عصام خلي نودي لسيد يقره عليه ويرقيله ويسويله حجاب خاف عليه عين وليدي.

صدك اخذني عصام اني وامي ورحنه .. الشيخ بس شافني كاللها ابنج مشربي ( سحر مشروب ) .. امي تخبلت : يا يمه وليدي وحسبي الله منو سوت هيج بي.

شوفي حجيه الي سوته قريبه منج وبيج وسوته علمود زواج !

صدك انصدمنه معقولة سارة ؟!

عصام كال لا البنيه معليها بس امها على طول من تجينه الكاها فاتحه الجدورة مال الطبخ ومدري شسوي.

زين والحل شنو ؟؟

راح انطي حجاب وارقي عليه.

وانتي اخذي لأمام وزوري كالت امي : يا امام اودي ؟

اني اذكرت كلام رنا جانت هوايه تحجي بالامام الكاظم وحيل تحب تزوره : يمه نروح للكاظم نزور.

دخيلك يا باب الحوايج اريدها من الله ثم منك.

طلعنه من يمه ورحنه للامام وهناك دعيت وبجيت وردت رنا من الله تكون اليه .. وراها رجعنه للبيت وفعلا بدت اعراض عندي دوخه وتقيء واختنكت بعد ما شربت المي الي انطانيا الشيخ وجان مقري عليه ايات قرأنيه .

وره كم يوم تحسن وضعي وصرت احسن الحمد لله بس كمت ما اتحمل اشوف الحلقة بأيدي : يابه اني جايك بشغلة وادري انته متقبل .. بس بعد ما اكدر اكثر من هيج اني راح اعوف بنت عمي.

باوعلي بهدوء : الي تريده يجرالك انزع الحلقة ودي طارش لبيت عمك وكوللهم ما اريدها وادفع حاضرها وغايبها ( بداخلي حيل فرحت وكيفت ) بس بالمقابل بعد ما امشيلك على اي وحده .. انصدمت من كلمته .. بس سكتت لان هسه بس اريد اخلص من هالورطه .

صيحلي اخوك عصام.

صحت عصام : تعال ابويه يريدك.

عصام مو تريد تزوج؟

اي يابه ..

عندك مهله هالاسبوع تشوفلك بنيه حتى نمشيلك عليها الجمعة .

فهمت قصد ابوية من سوه هيج راد يحرك قلب حسام.

بس يابه مو لهدرجه مستعجل اني.

كلمتي وحده متصير اثنين للجمعة تفض لازم .

طلعنه من المضيف واحد صافن بوجه الثاني شون قهر وشديسوي ابويه بينه ..

اكولك حسام هو شكالك من كتله تفصخ؟

كالي اقبل بس بعد ميمشيلي على اي وحده ؛ يعني ما ازوج بعد.

لا ان شاء الله تزوج .

مو مهم هي الاحبه راحت بعد بقت على هاي!

زين بربك هسه منين الكه بنيه وتلائمني ؟؟ اني من العرب ما اريد .. اريدها مثقفه ومتعلمه وتفهمني وما اعرف وحده ولا حتى مصادق .

صفن حسام تعال نفكرلك بوحده ونشوف وين يرسى تفكيرنه.

طبعا صارت مشاكل ويه بيت عمي وزعلوا لان فسخ حسام خطوبته .. بس جان حسام حيل فرحان رغم الجو احترك من وراه ومن وره تصرفه بس هو كمل ومدار بال والي براسه سواه.

لك عصام ما مصدك الله خلصني واخيرا صرت حر ؛ عبالك جبل وانزاح من على قلبي.

باوعتله : انته جبل وانزاح واني من وراك بمشكله المفروض عكب باجر امشي واني ما اختاريت اي وحده.

عندي حل الك .

شنو الحل كول يمعود .

كول لابويه خابروني من الشركة ولازم اسافر بشغل ويطول اسبوعين او 3 .. بلكي ابويه يعوف موضوعك .

خوش فكرة راح اكوله.

والله راح كعد ويه ابوية وكاله الجمعة لازم اسافر من الصبح ، الشركة خابروني.

باوعلي الحجي وحسيته ما مقتنع بكلامي بس ميكدر يجذبني : توكل على الله وروح لشغلك ومن ترجع الله كريم على موضوعك.

طرت من الفرح هم وانزاح منا لحد ما ارجع السالفة منسيه ..

اخذت جنطتي وطلعت ع اساس داسافر .. وصلت باب البيت واني حاير وين اروح وين انطي وجهي ؟ خرب حسام شدعي من وراك ورطتني .. عاد قررت اروح لتركيا هم اغير جو وهم اخلص من هالورطه.

**********&&&&&&&**********

شونكم حبايبي مشكورين على تفاعلكم الحلو بالبارت السابق يارب ينال اعجابكم هذا البارت بانتظار تعليقاتكم وارائكم والتصويت 😍😘