رواية أحببته كما هو الفصل الحادي عشر 11 - بقلم رسل طالب

بعيداً عن الحقد، أنا لا اسامح من تعمد كسري..
*********&&&&&&&&*********

هلو رنوش قلبي مشتاقتلج😘

اسوو عمري اني الاشوق والله ،شونج اخبارج؟

بذاته صار شهرين ماكو لا فيس ولا غيره.

والله ما الي واهس فما افتح فيس ..

شسويتي مسويتي بفترة التطبيق الصيفي؟

ولج هذا استاذ علي لعب بينه طوبه خلاني اداوم بمكانين الافندي .

هذا هم حظج يولي..

اووف هو حظي ويامن كعد؟

امممم.. شنو شفتي؟؟

منو ؟

حظج🤔 منو غيره غير استاذ حسام..

شمدريج؟؟

ولج كدامج ثوله ؟ غير اني صديقتج ..احجيلي وين شفتي هذا المكموع؟

لتحجين عليه فدوة اسوو.

لتظلين فطيرة كافي ما مليتي من السواه بيج؟

انوب هاي كتلها هيج اكلتني بلسانها اذا اكوللها خطب شسوي ، يمكن تبسطني بالكلية خلي اسكت احسن الي.

يمعوده هو وربه ينجاز امشي نروح للقسم.

دخلنه اول محاضرة والحمد لله جان استاذ جديد وكلمة عربي ميحجي وخلصناها بس صافنين ؛ وره ما خلصت المحاضرة ظلينه بالقاعة كاعدين فالطلاب حجوا : استاذ بلا زحمة ممكن الملزمة تنطينا لان مدنفتهم عليك انته سريع من تشرح وما افتهمنه لان انكليزي.

باوع علينه وما عاجبه :بالله انتوا متستحون طلاب جامعة ومرحلة رابعة وهيج تحجون؟! شبقيتوا لطلاب الاول ها؟؟

يعني ولا واحد بيكم مفتهم شحجيت ؟؟

ظلينه ساكتين ..

انوب عصب اكثر : انته احجيلي شنو حجيت؟

الطالب ما جاوبه ..

انتِ احجي شنو شرحت ..( والله استاذ ما فهمت شنو تحجي )

عصب حيل : ظل يسألنه واحد واحد لحد ما وصل اليه .

انتِ كومي تعالي للستيج ( اني بداخلي خرب بحظي شصخم بالستيج؟)

كمت من مكاني وخطوة امام وعشرة وره ، احس رجلي ماتت ( اجاني شلل رباعي يمكن من وراه ).

اصعدي كبال البورد (السبورة) احجيلي شنو تشوفين ؟

حجيت اسم الموضوع بالانكليزي وبعدين ترجمته للعربي :
molecular biology
اي شنو معناه ؟
البيولوجي الجزيئي استاذ.

زين احجيلي بعد شنو حجيت ؟

شرحت عن الDNA &RNA ومكونات كل وحده منهن وقسمت القواعد النيتروجينية بيهن ( هذا صفن بوجهي ، حسيته تفاجئ من اجابتي ؛ وبنفس الوقت اني تشجعت حتى اكمل شرح ) .

كملي شرح الهم للطلاب ( اخذ الممسحة ومسحلي نص البورد وكالي هاي مساحتج اشرحي للطلاب وانتوا اسألوها ) .

بديت شرح الهم وصار تفاعل وشويه ضحك لان حجيت معلومة خطأ فنصب الاستاذ والطلاب ضحكوا وتحولت المحاضرة من جوها المشحون الى شي ثاني تماما وطبعا طولت ربع ساعة بس جانت ساعة بنظري لان كنت اني استاذة المادة خلال هالوقت .

دخلت علينه استاذه ثانية : السلام عليكم شونك استاذ مهند ؟

وعليكم السلام اهلا ست علا ؛ اعتذر منج اخذنه من وقت محاضرتج ( راسا تعذر منها لان يعرف نفسه اجاوز بالوقت).

تفضلي .. شنو اسمج ؟

رنا اسمي رنا استاذ .

اوك رنا عاشت ايدج تفضلي لمكانج ومن تخلصين محاضرة ويه ست علا مري عليه.

اوك استاذ.

نزلت والطلاب والطالبات : ها خاينه تقرين من ورانه ؟؟ ، وناس دكولي ها انشتاين ما عرفناج وبده التقليد والتحشيش .

خلصت محاضرة ست علا على خير وطلعت منها : ولج اسو طكني الجوع خلي نروح ناكل .

خاتون واستاذ مهند ؟

شبي ليش ؟

بطلي ثول لو بطنج مأثرة على دماغج ؟ مو كالج مريلي.

ياا اي والله صدك نسيت .. امشي نروح اله ومناك للنادي نروح.

لا عيني ما اروح وياج ؛ كالج تعاليلي ؛ يعني وحدج يريدج.

شبيج شعنده ويايه ؟

ما اعرف روحي ونفتهم شعنده وياج ، يله انتظرج على مدرج حُبنا ههههه ( اي شي كان يجمعنه اني واسو جنه نضيفله كلمة حُبنا ).

دكيت الباب الخاص بغرفة الاساتذة : تفضل .

فتحتها لكيته كاعد هو واستاذ .

العفو استاذ مهند بس اجيت علمود الملزمة ( اضطريت اجذب لان عيب اكوله كدام صديقة اجيتك لان كلتلي مري عليه ).

اي هسه ، مخليها بالفلاش هسه اجيج لحظات .

وكفت بره يم الباب انتظره ( ما طول دقيقتين وطلع).

اسف على التاخير تعالي ويايه اسحب الملزمة بالمكتبة وانطيج نسخة .

اني صفنت شو هذا صدك سواها وراح ينطيني ملزمة ؟ زين ليش ما كلف واحد من ولد المرحلة يجي اني عايزني دوخة راس وهاي المكتبة اذا اطب استنسخ بيها معناها اضرب محاضرة لازم .. شون قهر .. زين والجوع وبطني والفنكر يربي 😔

قاطعني صوته :رنا انتي طالبة صباحي؟

لا استاذ مسائي بس مسوية استضافة للصباحي .

ها حلو ..

سكت وكمل طريقه ويايه لحد ما وصلنه للمكتبة الي جانت ازدحام دكول باب الشرجي  : السلام عليكم بلا زحمة اريد تسحبلي محاضرة بالفلاش.

اعتذر استاذ بس الحاسبة ديشتغلون بيها ربع ساعه وتعال وتدلل.

اوك ممنون منك .

التفتت عليها لكيتها صافنه على البنات كاعدات دياكلن ضحكت بداخلي ( هاي مثل الاطفال متعرف اضم جوعتها ) .

عيني رنا تعالي بالنادي نكعد ربع ساعة ونرجع الهم.

تفاجأة شون راح اكعد وياه وهو استاذ شيكولون عليه؟!

تفضلي ويايه .. مشينه وكعدنه سوه واحد مقابل الثاني : شنو تشربين او شنو تاكلين؟

اني انحرجت منه : ما اشتهي تسلم.

بداخلي كلت ؛ شكد تكابرين.

اوك هسه اجي .

خرب بحظي الجوع موتني من غده البارحه ما مخليه لكمه بحلكي ، مدكوليلي شجاج منين هالادب نزل عليج ؟؟ دكوليله نستله اي شي من ثول ( ظليت ادردم بداخلي على نفسي) .

ما اشوف غير صينيه وبيها لفتين همبركر وفنكر و2 ببسي $ يم يم اجني بوقتهن .

هاي شنو استاذ ليش كلفت نفسك .

ابتسم :لا تدللين😊

ما كدرت اكل احس عيونه عليه واصلا استحي اخذت السجينة وقسمت لفة الهمبركر مثلثات صغار دكول داوكل عصفور في سبيل ما انحرج من اكل.

اي رنا صراحة معلوماتج فاجأتني فشنو شغلج السابق قبل الكلية؟

اني محلله استاذ عندي دبلوم تحليلات مرضية .

اها حلو .. ما شاء الله عليج طموحة .

تسلم استاذ .

زين وظيفتج شنو تركتيها ؟

لا عندي تفرغ براتب جزئي .. يعني ما اداوم بالوظيفة بس بالكلية وينطوني نصف الراتب.

اي كولش ممتاز .. بس عاد يكفيج الراتب كمصاريف للكلية واقساط؟

الحمد لله ومن احتاج الوالدة متقصر .. الله يحفظها اليه.

ليش والدج وين؟

دنكت راسي وحسيت بغصه : والدي متوفي .

الى رحمة الله اسف ما قصدت اذكرج.

لا عادي استاذ مناسيته اصلا.

الله يصبركم ياارب.

امين يارب.

زين رنا انتِ يا مواليد ؟

اني مواليد 88 استاذ.

ابتسم : العمر كله .. اني مواليد 85

الله يبارك بعمرك استاذ .

طبعا هواية تصرفين استاذ 😂

صدك خجلت : مو هيه رهمت هيج.

لا عادي داشاقة وياج.

شوفي راح اسحبلج ملزمة اليوم والمحاضرة الجايه .. اريدج تنطيها للطلاب او تبلغيهم يجون ياخذوها من المكتبة ، بس انتِ اريدج تقريها وتحضرين نفسج تشرحين ويايه ( اني انصدمت : بس استاذ شون اني اشرح) شوفي اليوم اسلوبج حفز الطلاب وخلاهم يتفاعلون اكثر ويسألون بينما ويايه جانوا مثل الاصنام .. فاريد اكسر الحاجز البيني وبينكم عن طريقج .

اوك استاذ الي تشوفه.

اعرف المهمه صعبه عليج بس انتِ كدها ان شاء الله.

بهاي الاثناء كاعده اسو صافنة تنتظرني ومن شافتني تأخرت اجتي للنادي تطلب اكل : يا عزه هاي رنا كاعدة وياه .. نعلالا بليسج رنوش .. راح تجيبين حجايه لنفسج.

باوعت لاسو من بعيد واكفة وتباوعلي .. ردتها بس تجي بس ما تقدمت ودزتلي رسالة: مصخمه كتلج روحي حاجي مو تواعدي بالنادي ؛ راح ابقى بره انتظرج.

اني ضحكت من شفتها كتبت هالشي بس غلست لان عيب بعد اكوم واعوفه.

اووف رنو يوميه مطببه نفسج بسالفة خلي ارجع للمدرجات وانتظرها احسن هناك.

مرحبا ..

رفعت راسي ( يا عزة هذا حسام ): اهلا حسام.

شونج اسراء شخبارج؟

الحمد لله ..

اسراء وين رنا ؟

شتريد منها بعد ؟ ترى كافي البنية دمرتها العام والله سترها وعبرت للرابع ؛ عوفها وروح لان نستك وعاشت حياتها.

صراحة ما عجبني كلام اسراء : اشكرج مع السلامه

رحت للنادي اكيد هي هناك وين تروح قابل.

عزة هذا راح للنادي راح يشوف رنو ويه هذا الاستاذ ، الله يستر.

تقدمت واني بكل خطوة اخطيها احس بروحي ادوس على قلبي .. دخلت للنادي وباوعت للكاعدين ، ما شفتها ؛ رحت طلبت جاي ورجعت ادور على مكان اكعد بي ؛ والله لكيت مكان؛ توني كعدت واريد اطلع جكارة واشربها جان المح شكل رنا وشفت وياها واحد كاعد ؛ ما ادري شجاني صدري اشتعل نار ، تخبلت كمت لا ارادي ورحت عليهم .

السلام عليكم ..

باوعلي الولد : وعليكم السلام تفضل.

رنا رفعت راسها مصدومة بس ما حجت شي.

عفوا منو حضرتك وكاعد وياها؟

شنو ؟؟ منو انته حتى دتسأل ؟( باوع لرنا ورجع باوعلي)

اني الغصة خنكتني من كال هيج شنو اكوله منو اني : ابن خالها اني.

الولد وجهه انطه الوان : اهلا بيك واني استاذها ..

ما جاوبته واستداريت عليها : كومي ويايه هسه.

كامت هي بلا متحجي شي واخذت غراضها وطلعنه.

انته بأي حق هيج تتصرف ؟ ها ؟

رنا امشي كدامي ولتعصبيني اكثر .

يعني شسوي اذا عصبت مثلا؟ ترى سكتت وما فشلتك كدام استاذي لان مو حلوة بحقي .. وما اقبل بهذا التصرف ومو من حقك تدخل بحياتي ويامن اطلع ويامن اطب اني حرة.

كملتي كلامج ؟

اي كملت.

احبج.

اني من كالها قلبي رجف عليه بس تمالكت نفسي : شكرا بس اني ما احبك.

جذابه ..

ما اسمحلك..

كافي رنا فدوة ترى والله تعبت مثل ما انتي تعبتي.

اها حقك والله تعبان يمكن طلبات الزوجه المستقبلية هواية.

فسخت الخطوبة .

واني شعليه ( بس بداخلي طرت من الفرحة)

انتِ شعليج !! اوك ؛ الظاهر غلطت من حاجيتج .. اخذي راحتج وروحي كملي ويه استاذج.

عافني وراح ظليت صافنه اروح اصيحه لو ارجع لاستاذ مهند .. قررت ارجع لاسو  .

ها حبي ( نزلتلي من المدرج ولزمت ايدي حتى تساعدني على الصعود ).

ليش هيج حظي ؟

لتحجين هيج عمري ( خليت راسي على جتفها)

والله حجيت وياه وكتله عوفها ..

رفعت راسي وباوعتلها ليش شوكت شفتي؟؟

اجه عليه قبل ليفوت للنادي ، سلم عليه وسألني عليج ومن ما انطيته وجه راح للنادي يدور عليج.

لعد ليش مادزيتيلي رسالة!

شنو ادزلج انتِ مناقصة ترتبكين اكثر.

لا اسراء على الاقل جان اترخصت من استاذ مهند ورحت قبل ليشوفني.

( قاطعتني : واذا شافج؛ قابل خايفة منه !! انتِ متربطج بي اي علاقة هسه ، وكافي شوفي مستقبلج ؛ لان مبين هالولد مو قسمتج ..( من كالت مو قسمتج احس روحي انقبضت حيل ) يله حبي اروح للمكتبة وهسه اجيج ؛ ابقي بمكانج.

نزلت اني وعفت رنو كاعدة على المدرج ، اعرف كلامي قاسي واعرفها تموت على حسام وتحبه بس لازم تصحى على وكتها متظل عايشه بوهم .

عفيه كملت الملازم؟

اي خلصتهم تفضلي. شكرا وين نسخة صديقتي مو رنا كتلك ويايه هم.

استداريت من سمعت اسم رنا ( شفت البنيه الي جانت كاعدة بصف رنا بالقاعة ؛ يعني هاي صديقتها المقربة معناها )

السلام عليكم ..

وعليكم السلام استاذ مهند.

انتِ طالبه عندي مو؟

اي استاذ طالبتك .

ممكن تنطين هاي الملازم لرنا وكوليللها تحضر المحاضرة مثل ما فهمتها ؟

اوك استاذ تدلل هسه اوصلهن الها .

ابتسم : وكالي ممنون وعافني وطلع.

اني ظليت كاعده وحدي وافكر بكلام اسراء الي حيل اذاني بس يمكن صح حجيها ، رفعت راسي واتلفت منا ومنا ؛ شفته كاعد على كرسي يم جماعته وصافن يباوع عليه ، ارتبكت من شفت نظراته ؛ رأسا غيرت اتجاهه نظري لغير مكان.

احم احم..

ها اسو جبتي الملازم؟

جبت الملازم وياهن غير شي ( ابتسمت)

شنو غير شي ؟

استاذ مهند دزلج الملازم وكالي كوليللها ، تحضر المحاضرة الجاية مثل ما فهمتها ( هنا غمزتلي اسو وضحكت ).

صدك خجلت فهمت شنو ابالها ..

مو كتلج شوفي حياتج حبي كدامج المستقبل وانتِ مجلبه بالماضي.

يله كافي هو دزلي ملازم الي يسمعج دازلي رسالة حب 😂

ضحكنه اثنيناتنه ونزلنه من المدرج بأتجاه القسم لان ورانه محاضرة بس بداخلي استغربت شعجب مهند ما اخذ مني موقف او حاول يبتعد ؟ شعجب رجع دزلياهن واني توقعته حتى سلام بعد ميسلم عليه.. يله مو مشكلة هي محاضرة الجاية راح تبين شنو اباله صار تجاهي.

*********&&&&&&&&&********

بأنتظار تفاعلكم وارائكم على القصة والتصويت 😊😋😍
اعتذر على تأخيري بالنشر بس الكتابة يحتاجلها وقت و واهس حتى تطلع القصة بالشكل المطلوب؛ مو بسهولة ترتب الافكار حتى توصل للمتلقي بالطريقة الي انته تريدها وبنفس الوقت المقابل يستمتع بيها