رواية أحببته كما هو الفصل التاسع 9 - بقلم رسل طالب

لقد أخذ الأمرُ مني قلباً كاملاً ...

***********&&&&&&&*********

بعد مرور اسبوع على اعتكافي بالبيت والحرب النفسية والصراع الداخلي الي خضته ؛ كان من الممكن ان استسلم لريح الالم؛ ان تسكنني وتحيط بي ولكني فضلت المقاومة لأخرج بأي طريقة مما انا فيه ..

جنت داتصفح بالفيس وقريت منشور مكتوب بي : ستصل لمرحلة ما في حياتك تعرف فيها أن معظم الجهود والكلام والأعمال التي قمت بها من أجل الآخرين كانت مضيعة تامّة للوقت والجهد، وأنك لو استثمرت هذه الموارد من أجل نفسك لكان أفضل بألف مرّة.

ما اعرف حسيت الكلمات تنغزني ؟ معقولة جان ديخلص وقت براسي معقولة هذا الشهم وهذا الشجاع الي جنت اتغنى بشخصيته وبرجوليته، يطلع جذاب وكل الي عشته وياه مسلسل جان؟!!!

ما بقى شي وتنتهي السنة وكان لازم اداوم حتى لو ادوس على جروحي ؛ امي المسكينه ما الها ذنب بأنتكاساتي ، جانت تنتظرني يوم يوم حتى اتخرج من الكلية واخلص ؛ لازم ادوس على مشاعري واتحمل .. والله المعين.

داومت اول يوم وره غياب لمدة اسبوع ؛ طبعا جنت متيهه الامور المواد متراكمه والملازم كومه ظليت بالمكتبة ساعة بس استنسخ وراها رجعت اني واسو للقسم وحضرت المحاضرة الثانية .. بعد ما كعدنه ناده الاستاذ باسمائنه علمود الحضور يسجلهم ؛ بده يذيع الاسماء لحد ما وصل اسمه ( اووف شكد صعب اسمه من صاح بي وهو ماكو ؛ احس صوت الاستاذ خناجر نزلت بصدري ، احس الناس الكاعده شمتانه بيه ؛ شمس عمري وغابت) .

نزلت دموعي الفاضحتني بين الناس ( دنكت اسو وكالتلي : مو هنا عمري ترى فضحتينه حاولي تتعودين ).

اووف الحجي سهل من يحجون ..وينك حسام هم يجي يوم واشوفك وتسكت  الشمات؟؟

اني ظليت بالمعسكر لان وصل خبر للأمر مالتي بسالفة صوابي : رائد حسام شنو الي صار ثارت الطلقة وانته دتنظف سلاحك؟

لا سيدي اني صوبت نفسي.

تدري هذا كلامك راح يوديك بمشكلة؟؟

اي سيدي اعرف لذلك اريد تحولني مجلس تحقيقي واني مستعد للعقوبة.

راح ارفع بيك تقرير ..

وفعلا رفع الامر تقريره الي على ضوئه تحولت محكمه واعتبروني ضمن قانون (التعمد بألحاق الاذى بالنفس ) وكان قرار القاضي ورة اسبوعين من التحقيق ؛ سجن 3 اشهر داخل المعسكر وطبعا كان يكدر تكون اكثر بس بسبب ظروف الحرب وداعش خلها فقط 3 .. وهو هذا الجنت اريده ابتعد عن البيت اطول فترة ممكنه.

طبعا ابوية وصله خبر ان اني تصوبت بس استغرب ليش ما نزلوني فأضطر اجه بنفسه للمعسكر حتى يشوفني ، ومن دره بالسالفة تخبل : شون تسوي هيج نزلت راسي ، انته ضابط وتضرب نفسك شيكولون خايف من الموت ؟؟

ظل يحجي ويصيح واني ساكت :كملت يابه ؟؟

اي كملت احجي ..شعندك؟

شوف اني صوبت روحي حتى ما انزل الكم راح انسجن 3 اشهر وراها راح تبلش معارك التحرير وراح اشارك بيها وان شاء الله ما ارجع الكم الا واني ملفوف بالعلم.

ابوية مصدوم :ليش هيج تحجي؟

لان فشلتوني ويه عمي وقررتوا بدل عني واني ما اريدها لبنت عمي .

وكف ابوية على حيله وعيونه تجدح نار: لك تكسر كلمتي تريد تخزيني بين اهلي ويكولون الشيخ ما عنده كلمه على اهل بيته؟؟

لا يابه حشاك ومحشوم ما عاش الي يكسر كلمتك بس اني خليت نفسي بهذا الوضع حتى الكل تسكت ويكون الموضوع خارج مني ومنك.

ابوية طلع وكف بالباب : تجيني وبالعلم ملفوف مرفوع ولا ترجعلي ماشي على رجليك وتنزل راسي .

كلماته حيل اذتني .. هيج كلمتك اهم من حياة ابنك !!!

بعد ما عندي شي اخاف عليه واخسره ؛ الي احبها راحت وابوية اذا ارجعله راح يجبرني على بنت عمي ؛ بلحظتها نذرت عمري للوطن .

مشت الايام (وياثكل الايام على المفارك حبيبه 😔)

بلشت امتحانات الفاينل بعد 3 اشهر من فراقنه اني وحسام الي محد شافه بعد، ولا عرفت عنه شي ، تقريبا تناسيته ، حاولت اركز بأمتحاناتي ردت بأي طريقة انجح واعبر للمرحلة الرابعة .

جنت يوميه افتح الفيس واشوفها شنو تنزل وشنو تنشر بصفحتها ؛ عشت وياها بكل لحظاتها افرح لفرحه واحزن لحزنها وصورتها جنت ضامها بمحفظتي ؛ جانت هي ونيسي بوحدتي من يجي الليل :

خليني على بالك من يجي الليل
واذكرني بحلم من تغمض عيونك
وميل على التوده شماردت ميل
واغار عليك ثق من اليودونك
فراك الناس دمعة وفركتك ويل
وعمت عين النهار اليمر من دونك

بدت معارك التحرير بالانبار وشاركة بأغلبها جنت اتعب وتنهك قوتي بس ما انسحب رغم ضغط الامر والجنود الي ويايه ؛ جنت اريد انتقم من نفسي الي اذت اعز انسانه عليها .. ردت تسمع بخبر استشهادي عسى ولعل يكون الها العزاء الوحيد على فراكنه ؛ وصيت علي صديقي بالكلية اذا استشهد يروح يبلغها بهذا الشي ويكوللها بالي صار ويايه بالتفصيل .
كانت الوضعية تعبانه والايام منحس بيها بسبب كثرة المعارك والمناورات والنت طبعا ماكو بس بالقاعدة وبالبوكة مخلي احنه لان ميصير .

وره شهر ونص كدرت ارجع للقاعدة بعد ما اصوبت برصاصتين وحده بالكتف والثانيه بالخاصرة (كان التقرير يبين ان اصابتي عبرت 50% لذلك ميصير اكمل قتال) ؛نزلوني للمعسكر حتى ارتاح والمفروض انزل بعدها لاهلي ، جان كل تفكيري ، اعرف اخبارها بعد كم يوم من صرت زين كدرت احصل شبكة نت بغرفة قريبه على غرفتي ؛ فتحت الفيس وكعدت اتصفح واشوف شمنزله خلال هالفترة ؛ شفتها حيل متأذيه من الامتحانات ومن صعوبة المواد ؛ شفت اسراء شون تعلقلها وتحشش وياها .. حسيتها تريد تنسيها .. باللحظه الي اني كاعد اقلب بيها هي نزلت منشور بي نتيجتها وكاتبة #رابع_لاتكلمني 😎.

فرحت من شفتها ناجحه انطيتها لايك وعلقتلها : تستاهل البطلة.

طبعا اني اتابعها من فيس ثاني (وهمي).

اجاني رد على تعليقي : شكرا ،بس منو؟؟

اني كتبتلها: متعرفيني بس شفتج فرحانه وعلقتلج .

انطتني بس لايك على تعليقي الاخير وسكتت.

حسيت بداخلي الي ديكتبلي هو حسام.. حسيت بألم مو طبيعي خلاني اصيح وابجي واني بغرفتي حسيت جروحي المطمورة كلها نهضت من جديد 😔😭

نزلت بوست : أنت حقيقتي الوحيدة التي أُؤمن بها .. انتظرته يعلق بس ماكو

مرت الايام واجه شهر السابع طبعا عندي تطبيق ولازم اطبق بمستشفى لمدة شهرين، بلشت دوام بالمستشفى جان حلو بس هوسه .....

اكولج رنا اليوم خلي ننزل للسحب شنو رأيج؟

سحب شنو؟؟

سحب دم ثوله ، يعني سحب شنو؟؟

يبو قصدج الغرفة الجوة الي شفنه الهوسه يمها؟؟

اي يولي هي نفسها ..

لا ما انزل اضوج من الهوسه واصلا ما اعرف اسحب دم..

اي على اساس اني اعرف اسحب!! ولج غير نتعلم لعد شوكت نتعلم ؟؟ وفوكاها انتي موظفة بالصحة؟!

ولج جنت اشتغل اداريات مو بالمختبر وما طولت وقدمت على الكلية ..

لعد هاي فرصتج قلبي حتى نتعلم..

تمام عيني..

ننزلنه سوه وجان المكان خنكه كومه مراجعين.. بدينه نسحب دم شفت رنا بسرعه تسحب وميهتزلها جفن ولا تخاف اصلا ..

ولج رنا منين جبتي هاي الجرأة ؟؟

ابتسمت وبداخلي :(ملجوم القلب هيج جريء يصير).

سحبت تقريبا 20 مراجع وراها كعد كبالي شخص لابس ملابس عسكرية ( لا ارادي قلبي رجف من شاف الملابس) رفعت راسي وباوعتله : شنو عندك تحاليل ؟

تفضلي؟

شفت الورقة شنو مكتوب بيها : تمام طلع ايدك وسد الكف بقوة.

سحبتله دم .. وباوعتله داشوف ردت فعله خاف اغمى عليه او داخ شفته صافن بوجهي رأسا نزلت عيني من عليه : تكدر دكوم اخي خلصت سحب.

شوكت تطلع النتيجة؟

ب 12 الظهر تستلمها.

كملت شغل بيومها وجان حيل متعب .. بقيت اني وبنيه صديقتي نوزع نتائج اما الموظفين طلعوا؛ ناس تصلي وناس تاكل وعافونه وحدنه بكيفنه نصرف.

شفته وكف كبالي : بلا زحمه نتيجه بأسم ملاذ.

اي نعم هسه (ظليت ادور عليها بس ما اعرف ليش ارتبكت ؛ يمكن لان ذكرني بحبي القديم ؟ )

المهم انطيته النتيجة : تفضل.

ممكن تقريها اليه؟

اعتذر لازم ترجع للطبيب.

الطبيب ما موجود هسه..

ليش ما موجود؟! دوامهم ب2 يخلص وبعدها ب12 .

تكدرين دكومين ويايه وتتأكدين.

لا ميحتاج اتأكد .. انطيني التحليل .

قريت النتيجة: ما بيك شي.

شون ما بيه ؟

تحاليلك نظيفة..

لعد ليش قلبي يوجعني؟

رفعت تك حاجب وباوعتله معاجبني: جوز بين عليك الكبر ؛ العمر هم اله حوبته، تفضل.

انطيته النتائج وطلعت من الغرفة وهو صافن عليه شون جاوبته .. مشيت بالممرات واني احس الحياطين تريد تاكلني خنكتني حييل.

طلعت من البناية وكعدت بالحديقة ؛ تصير كبال المختبرات ؛ اجر حسرات وندامه .

لحكتني صديقتي : ولج شبيج طلعتي تركضين وعفتيني ويه هذا الخبل .!

يا خبل تقصدين؟؟

هذا النقيب.. شبيج الي قريتيله النتيجة.

ليش شبي؟

سلامتج عيني دزلج هاي الورقة.

فتحت الورقة كاتبلي بيها:
... حافي كلبي ♡
                 ... ومستلذ ..
                              ... يمشي بكزازك

صفنت على البنية : بله هذا مو بطران؟؟ وثانيا شون تاخذين الورقة منه؟

شسوي توسل بيه حتى انطيها الج .

اوك ..

استدارت لكيته واكف مسافة مو بعيدة ويباوع علينه .

شككت الورقه كدامه وذبيتها بالزبالة.

قررت ارجع للمختبر لان اذا ابقى بالحديقة احتمال يجي يحجي ويايه.

فتت من يمه : ياظالمة ليش هيج؟؟

دنكت راسي وعبرته وبداخلي ( اكو قبلك الي ظلمني).

مرت الايام وتقريبا راح يخلص الشهر السابع واني يوميه اداوم بالمستشفى ؛ المفروض الاستاذ المشرف يسوي زيارة النه نهاية الشهر حتى يسجل ملاحظاته على دوامنه وشنو تعلمنه.

اكولج رنا خابر دكتور علي يكول ما اجي ولا اشرف عليكم المستشفى بعيده عليه.

زين شون لعد منو يسوي النه تقييم؟ وبقالنه شهر الثامن ونخلص؟

ما اعرف راح اخابر السكرتاريه واشوف .

وره يومين رجع خبر لازم نغير المستشفى ونكمل الي بقى النه من فترة التدريب وهي شهر الثامن .

كانت المستشفى قريبه على قاعدة عسكرية فالمراجعين اغلبهم عسكريين ..

طبعا شفت اشكال والوان بس عادي تعودنه اني وصديقتي على الدوام تقريبا خلصنه نص شهر بيها .

رنوش اكولج المسؤول يكول نزلوا جيبوا نماذج الدم من غرفة السحب .. تعالي ويايه حبابه.

يبو عليج وعلى السحب مدكوليلي شعاجبج بيها؟

دتعالي لتعاندين ..

نزلنه سوه سلمنه على الموجودين : بلا زحمة استاذ اريد النماذج نصعدها فوك للمختبرات.

ميخالف بس اصبروا شويه خلي نجمع بعد نماذج حتى تصعد وجبه .

اوك على راحتك يعني نروح؟

لا ليش تعالوا ساعدونه واسحبوا ويانه.

ابتسمنه : تدلل استاذ

والله كعدت على كرسي مقابل كرسي السحب وبديت اسحب للمراجعين.

حسام محمد احمد منو حسام محمد؟؟

رفعت راسي من الصدمة هذا اسمه لو اني غلطانه؟؟؟

ظليت اباوع للباب منو راح يدخل ؟؟

صاح الولد الي بالباب مرة ثالثة بأسمه ؛ وراها دخل حسام علينه وفعلا هذا هو بشحمه وبلحمه انصدمت من المنظر .

تفضلي اخي منا اكعد .

جان هو بعده ما منتبه عليه اجه .

خلي البنية تسحبلك ..

باوع حسام عليه بصدمه 😮

كعد كبالي واحس قلبي طفر من صدري ..

طلع ايدك بلا زحمه ..

فتح دكمت القميص ويريد يصعد الردن مالته جان انتبه على ايده لابس حلقة ذهب بأيده اليمنى (يعني خطب!!!) حس عليه انتبهت على ايده حاول يضمها ؛ بس بعد فوات الاوان .

اني الالم الي صار عندي مينوصف ؛ يعني انتظاري ولهفتي كل عالفترة وصبري راح على البلاش جنت اضحك على روحي واصوره متعذب مثلي؟!

بينما هو كاعد يحب ويخطب ولا جاي ديحلل يعني عايش حياته عادي!!

لا ارادي ذبيت التورنكه ( اداة تستخدم لحبس الدم بالوريد عند سحب الدم من الجسم) وطلعت اركض من الغرفة.

سمعت الولد ورايه يصيحون ، بس اني كمت ما اشوف شي من البجي .

جانت المستشفى جبيرة وبيها مساحات واسعه مسويها حدايق ؛ طلعت بره مخنوكه حيل .

كعدت على مسطبة بعد ما انهد حيلي من الركض والبجي .

صفنت اباوع للسما .. لا لساني ولا قلبي قبلوا يحجون .. الدموع وحده بعيوني جانت تسولف..💔

جنت اعرفه من الاول قاسي وطبعه مو مثل طبعي ليش حبيته ؟؟ ليش تأملت خير من الما بي خير؟؟

مرت ساعة تقريبا .. هديت وقررت ارجع للقسم اخذ جنطتي واطلع للبيت .

لكيت صديقتي واكفة وماخذه الجنطه اصلا .. تلكتني يله خلي نطلع للبيت .. استغربت اول مرة تسويها .. يله بعد احسن ما اريد ارجع للمختبر.

رجعت للبيت واني الصفنات وحده تاخذني والثانية ترجعني .. حسيت برود بداخلي عبالك قلبي عافني وراح ؛ ميته وتمشي .😳

دخلت للفيس لغيت اعجابي بكل صفحات كلام الحب والرومانسية والاشتياق مسحتهم من حسابي مثل ما مسحت الحب من حياتي .. بعد ثقه ما عندي بأحد ، حتى بقلبي ما عندي ثقة وماصدكه.

نزلت اخر بوست اليه قبل لا اسد الفيس لان ما اريد بعد شي يذكرني بي :
خل انموت فراك المحب تابوت
خل انموت
اصيح ومامش صوت
خل نموت
ليش نعيش واحنه بتوت
خل نموت
يم بابه وما سمعت الفوت
خل انموت
--------------------------------

***********&&&&&&**********

بانتظار تفاعلكم ومشاركتكم للقصة ولتنسون التصويت .. هي اشياء بسيطه بنظركم بس تكون حافز قوي للكاتب ان تعبه وجهده اكو من يثمنه ومتابعتكم اليه هي ثمن لهذا التعب .. محبتي