رواية أحببته كما هو الفصل السابع 7 - بقلم رسل طالب

الإنثىٰ لا تحتاج إلىٰ شيء لتثبت بأنها ٱمرأة
بينما الذكر عليه فعل الكثير ليثبت بأنه رجل
لهذا قالوا الرجال مواقف
**********&&&&&&&&********
دك تلفون رنا ( قطع سلسلة افكار الماضي) ..

الو ..

ها يمه حسام وينك انته ورنا ظل بالي

لا يمه ليظل بالج ماكو شي بس اخذتها داغديها صار هبوط عدها لان ما ماكله شي فطلعتها بره المستشفى شوية تتغير نفسيتها.

زين يمه بس لتتأخرون فدوة .

لا منطول هسه هي راحت للحمامات دتغسل لذلك جاوبتج اني على تلفونها.. مسافة الطريق ان شاء الله وراجعين.

تسلم يمه..

هله بيج ..

سديته واني صافن ياربي هاي شوكت تكعد وشكول لامها اذا كعدت ومكدرت تمشي؟؟؟

قررت اصيح الطبيب خلي يجي يشوفها صار ساعة وشويه وهي لا حس ولا نفس.

طلعت ادور عليه وره ربع ساعة لكيته .. جبته ورجعت للردهه.

لكيت الممرضة فوك راسها (فزيت عبالي بيها صار شي).

حجى الدكتور بالكوردي ويه الممرضة وابتعدت ؛بعد ما جاوبته للطبيب بأبتسامه ..

باوعت لكيت رنا فاتحه عينها بطريقة ناعسه وكوه تباوع.

شونج رنا ؟

الحمد لله دكتور

بعدج دايخه مو؟

اي وهزت براسها

زين .. راح اسويلج فحص اتحمليني شويه ..

جابت الممرضة ابرة ،راح وكف يم رجلها وبالابرة وخز رجلها..

رأسا سحبت رجلها ؛ بداخلي فرحت رجلها تحركت.

لزم الرجل الثانيه وهم وخزها وسحبتها هي..

تمام عاشت ايدج .. خلصت فحص بس شدولها مغذي وخلوا بي مقوي وبس تخلصه تكدر تطلع ..

استدار عليه الطبيب : ما بيها غير العافية.

تسلم دكتور تعبناك.

باوعت عليها وابتسمت : خوفتيني عليج ليش هيج سويتي؟

لتأذيني بعد ..

اموت ولا أأذيج ( قاطعتني رأسا : أسم الله عليك لدكولها)

ظليت لازم ايدها وافرك بيها بين ما خلص المغذي .. الحمد لله كدرت تنزل وتمشي على رجلها ..

كتلها : اجيبلج كرسي طبي ادفعج بي.

لا .. ميحتاج اريد امشي.

مشت وحسيتها دتضغط على روحه حتى تبين هي بخير .

الحمد لله لحد ما وصلنه لغرفة امها جان وضعها احسن شويه .

يمه شبيج شو مصفر وجهج وكوه تمشين ؟؟

حسام شبيها بنتي شصار؟؟

اهدي خاله هسه افهمج ..

كعدت رنا على كرسي قريب من الباب مال الغرفة.

واخذت امها بره وحجيتلها بس ما كتلها رنا بسببي وكعت خليتها بسبب اختها على اساس انقهرت حيل وما اتحملت..

يا يمه بنتي ليصير بيها شي ..

لا خاله لتخافين ما بيها غير العافية بس اني افضل لو اطلعها من المستشفى احسن خلي تغير جو ..

وين قصدك ؟؟ ترجعها للفندق؟

لا خالة خلي اخذها للمصيف مو بعيد منا .. هم تغيير جو وهم شويه ترتاح .. شنو رأيج؟

زين واختها شون؟؟

شهد كال الطبيب منا لباجر يله نكدر نطلعها فعادي ابقي انتي يمها واني لليل ارجع رنا وحجزت الغرفة الي بصفكم راح ابات وياكم.

لا خاله شنو هالحجي انوب تبات !!

لعد اعوفجن وحدجن!!! .. غيرتي متسمحلي..

رحم الله والديك يمه ربي يحفظك لشبابك..

امين يارب،،، بداخلي كلت( فديتها لعمتي هم بنتها تخبل وهم هي ورده ) .

اخذت رنا وطلعت بالسيارة .. الفرحه الي بداخلي متنوصف جانت ؛ اول مرة احس بهيج شعور .. بس لا حبيتها!!

ظليت الطريق كله ساكته ما حجيت شي وياه .. تمنيت اعرف شون يفكر تمنيته ميجرحني بعد لان تعبت حيل من يوم الي عرفته لليوم.

يله انزلي وصلنه ..

نزلت من السيارة وهو كايدني بأيده لان كوه امشي .

تعالي ..

نزلنه مثل السهل على حافاته يصير مجرى النهر .. جان المنظر يخبل وحيل فرحت من شافته.

وكفت يم الحافه واكو هوايه ناس ..

متنزلين ترى اخاف توكعين وتتنكعين .. ما اريد تصيرين فرجه لليسوه والما يسوه..

اوك ما انزل .. بس اخلي رجلي بالمي ممكن؟

نزعت حذائي وصعدت بنطروني شويه ..
( رأسا صاح ) : ها وين ؟؟

شبيك بس شويه صعدته حتى ليتبلل.

خلي يتبلل عود بدلي .

وين ابدل حسام ما جايبه ملابس ويايه.

مو مشكلة اني اشتريلج .. بس لتصعدي

باوعتله بضوجه : اوك

ظل كاعد يمي ويباوع على الناس خاف احد ديباوع علينه ( بداخلي ضحكت عبالك موكفه شرطي يمي )

اكولج اني جعت راح اروح اجيب شي ناكله وارجعلج ما اطول..

اوك ..

لتحجين ويه احد ولجاوبين احد من ذولة خاف يجي شاب ويريد يحجي وياج.. زين؟؟

اوك افتهمت والله .. بس انته لتتأخر.

مشيت مسافة واني قلبي يمها ؛ امشي والتفت وره اباوعلها لحد ما اختفت من انظاري ..عاد سرعت بالمشي .

ظليت كاعده وصافنه اباوع على جريان المي واحس برودته وشون يداعب رجلي (بداخلي حمدت الله على نعمة المشي والاحساس الي قبل كم ساعة فقدتها ؛ فعلا النعمة منحس بيها الا من نخسرها).

مرحبا ..

باوعت على الجانب ( هذا شاب حلو واكف بصفي وسلم عليه ) رجعت باوعت للنهر ومجاوبته.

ثنه الولد رجليه وقرب من يمي : مرحبا .. ليش كاعده وحدج؟

مجاوبته .. بس بداخلي متت من الخوف.

شنو متكدرين تحجين ؟

استداريت عليه وخزرته بعيني ..

اسف مو قصدي اجرحج.. عموما ما رايد منج شي بس .. (سكت).

بداخلي ياربي شنو هالمصيبه وين اروح اذا كمت من مكاني راح اضيع وما اندل حسام وين راح .. واذا بقيت فحسام راح يجي ويشوفه وتصير مشكلة .. اجتي فكرة ابالي .

كتبت على الكاع : عوفني ما احجي ويه احد.

ابتسم من قره الي كاتبته : اعرف متريدين تحجين بس تمنيت احجي وياج شوية ..

الولد كال هيج وما احس غير رجع وره بقوة ...

انته شدسوي متستحي على طولك واجاه بوكس وكع الولد بالكاع..
اني وكفت بسرعة واباوع لحسام وجه دم صاير من الاحمرار .. تقدم حسام ديضرب الولد اني وكفت كباله : كافي حسام الولد ما حجه شي ولا راد شي كافي .

اجتنه الناس تركض وخروا حسام وساعدوا الولد حتى يوكف ..

ظل يباوعلي الولد مصدوم : يعني تحجين !!

انوب حسام تخبل : لك انته صدك متستحي ودفع الولد الي لازمي .

ضرب الولد بوكس وكعه بالنهر.

ركضوا الشباب الواكفين على حافة النهر ونزلوا للمي وطلعوا الولد؛ والباقين لزموا حسام وطرحوا بالكاع حتى ميهرب بين ما استدعوا أمن المصيف.

المهم اجونه الأمن واخذوا حسام والولد واني وياهم رحت .

فتحوا تحقيق وشنو وليش ؛ حجيتلهم الي صار ويايه ..

قرروا يذبون حسام بالسجن لان اعتدى على الولد .

شبعت قهر وبجي وتوسلت بالولد حتى بس يتنازل ويعوف المسكين بحالة لان كل المشكلة من ورايه..

شوفي ست رنا اتنازل بشرط واحد.

شنو شرطك ؟؟

اريد اكعد وياج ساعة بس واحجي وياج..

شنو تحجي ويايه؟؟

بعدين تعرفين ..

هذا شرطي.. اذا قبلتي حتى اتنازل.

زين اتنازل ونكعد هنا بغرفة المحقق واحجي.

لا مو هنا الكعدة تصير ..

لعد وين؟

عدنا بالبيت .. ما خليته يكمل صحت بي..

يا بيت 😤

لتخافين بيت عائلتي موجودين اهلي بي يعني مو وحدنه.

تحجي صدك لو تشاقه ؟؟!

لا صدك احجي .

مستحيل اسوي هالشي .

براحتج لعد خلي بالسجن وطبعا تهمته الشروع بالقتل منو راح يطلعه؟؟

صدك قلبي انقبض على حسام شوون ياربي شسوي ؟؟

اوك موافقة .. بس تتنازل قبل لا اروح وياك .

مو مشكلة اتنازل بس ميطلع رأسا الا اخذج لبيت عائلتي يله يطلعوا ،، لان اكيد راح يعترض .

بداخلي (اووف يا ربي شدخلت نفسي بورطة بالله هذا انسجن من ورايه لان حاول يحاجيني الولد واني هسه راح اروح برجليه وياه لبيته!!)

كطع سلسلة افكاري : ها شنو رأيج؟؟

نزلت راسي .. اوك موافقة .

تمام حجه ويه الضابط وتنازل واتفق ويه الضابط يطلع وره ساعة من خروجنه من المركز.

تفضلي ويايه ..

مشيت واني ميته خوف وين راح ياخذني وشورطني.

صعدت وياه بالسيارة ( طبعا سيارته راقية وفخمه حتى ما عرفت شنو نوعها)

مشى بالسيارة تقريبا 20 دقيقة وشفت سور عالي وبوابه ضخمه وكف كبالهن.

انفتحت البوابة على مصراعيها.. وصارت كدامي حديقه واسعه ودخل بالسيارة مثل القصر حلو حيل .

نزلت من السيارة وجانت واكفة يم المدخل الرئيسي للقصر مرة مرتبه وحلوة استقبلتني بأبتسامة ورحبت بيه .

عرفني عليها : رنا هاي والدتي ..

اهلا وسهلا خالة .

اهلا بيج عزيزتي ، فعلا مثل ما كلت عليها .

صفنت وبداخلي (ليش شكال علية ؟؟؟)

دخلنه للقصر كان من الداخل كولش حلو نفس الي بالافلام .. بس ما حسيت بالراحة من دخلت اله مع العلم كان اسلوبهم حلو..

كعدت اني وياه وامه بمكان مثل الاستراحة.

شنو تشربين عزيزتي ؟؟

تسلمين خاله ما اريد شي بس خلي افيندار يحجي شنو عنده؟؟ ( طبعا عرفت اسمه من حققوا ويانه)

ابتسم : اسمي حلو من تنطقي.

باوعتله بضوجه .. تفضل داسمعك

اوك اني اتركم لوحدكم

لا خالة وين رايحه عادي ابقي .. ابتسمت وكالتلي :لا افضل اروح.

رنا اتمنى ترتاحين بكعدتج هنا ولتظلين مشنجه..

كلت بداخلي خلي احجي : شوف استاذ افيندار ترى اني قبلت اجي وياك لخاطر حسام ولو ما هو اني بحياتي ما اطلع ويه ولد وفوكاها بيت اهله ، فرجاءا احجي الي عندك وخلصني ؛ تأخر الوقت واريد ارجع للمستشفى.

يا مستشفى ؟؟

ميخصك .. تحجي الي عندك لو اروح؟؟

متكدرين تروحين؟

ليش بله؟

لان الاتفاق كان ساعة واحنه تونه كعدنه .

اممم عادي انته تنازلت اكدر اطلع هسه من بيتكم اذا متحجي.

تنازلت صح بس التنازل غير ساري المفعول الا ورة ساعة يعني اكدر اخابر هسه واكوللهم يوقفون كولشي لان الضابط صديقي..

عصبت حيل منه وكفت : احجي شتريد والله مليت من الكعده ومكابلتك .

دنك راسه : ما تصورتج هيج تضوجين مني..

اخي انته دتستوعب كلامك؟!! اني وين اعرفك !!حتى اتحملك هسه؟

بس اني اعرفج من زمان ( اجتني صدمة )

شون تعرفني ؟؟

انتي ريفان خطيبتي وحبيبتي ..

بسم الله ؛ اخي انته بيك شي؟ بحياتي مجايه للشمال بس هالمرة وساعة السودة الي اجيت بيها .. واني عربية اصلا مو كورديه وما فاقده ذاكرتي سابقا .. فأنت متوهم وافضل تراجع طبيب نفسي.

وكف كبالي وعيونه صارت حمر : كافي اسكتي ما اريد اسمع صوتج ، انتي تشبهين حبيبتي المرحومه ؛ اعرف انتي مو نفس الشخص بس انطيني مجال احجي اكلتيني بأسلوبج .. جانت ريفان دافيه مو مثلج من تحجي بس الي مصبرني انتي نسخه منها.

اني سكتت.. جانت اهانة اليه بس ما كدرت اعترض صراحه لان اذيته بكلامي اعترف بهذا الشي.

اسفة صح قاسية بكلامي بس انته اعذرني ،كاعدة ويه شخص ما اعرفه وبطريقة مساومه صارت وفوك الضيم الي احبه بالسجن.

رفع راسه مصدوم : يعني حسام حبيبج؟؟

بداخلي ( خرب شنو هالجفصة الي جفصتها) : اي احترمه واعزه ..

انتي كلتي تحبي مو تعزي وتحترمي ..

اي احبه ارتاحيت؟؟

كعد على الكرسي احسه مثل المنهار..

ابني حبيبي ( ركضت امه عليه .. وباسته من راسه .. تعال ويايه لغرفتك )

اخذته لابنها وراحت تقريبا ربع ساعة واني انتظر اجتني امه: اني اعتذر منج بس ابني بي حالة نفسية من ماتت خطيبته كدام عينه ومديكدر ينساها وانجن من شافج بحيث من رحنه للمركز وحاجيته اني والده شون متحرش ببنيه ؛ صرخ بوجهنه كال مو اي بنيه الي حاجيتها ريفان نسخه من ريفان وانهار بالمركز ..

اتمنى تعذري لابني هسه انطيته علاج مهدئ وراح ادز على السايق يرجعج للمركز حتى تلتقين بحبيبج.

تسلمين خالة وربي يشافي ابنج .. مشيت بسرعة بس اريد اطلع من هذا البيت ؛احس خنكني عبالك بغير عالم رحت بي.

وصلت المركز ما صدكت لكيت حسام كاعد على كرسي ودينتظرني ( ركضت عليه وصحت حسام ؛ شبكته بقوة وابجي ) : بعد لتسويها ولتتعارك انته مو وعدتني متأذيني بعد ؟؟

كافي يروحي مو قصدي أأذيج بس ..

كافي لتبرر صار الي صار بس خلي نطلع منا .. خلي نروح للمستشفى ..

اوك هسه اخذ مستمسكاتي وباقي اشيائي الي سحبوها مني ..

الحمد لله طلعنه من المركز واخذني الطريق كله ساكتين ما حجه بشي واني بداخلي قررت ما اسولفله ولا اكوله على روحتي لبيت هذا الولد.

*********&&&&&&&&&&******

اعتذر على التأخير بس فعلا واكعه بشده ومحتاجه دعواتكم اليه حتى ارجع اكتب ..😔