رواية أحببته كما هو الفصل الثامن 8 - بقلم رسل طالب

إن المرء حين يُعاني حُزنًا كبيرًا.. حين يعاني كربًا هائلاً.. لا يشتهي إلا أن ينام
▪️دستويفسكي
***********&&&&&&&*********
وصلنه للمستشفى حيل تعبانين ؛ بس جنت خايفة من امي شنو احجي واكول الها على تأخيرنه ..

دخلت للغرفة لكيت امي نايمة من حسن حظي طلعت اركض : حسام امي نايمه .. اكولك ما اريدها تكعد حتى لتنتبه على وقت جيتنه فدوة .

اوك تعالي ..

فتح باب الغرفة الثانية : تعالي انتي نامي هنا واني انام برة على الكراسي.

شنو هالحجي !! وين برة؟؟ نام هنا افرشلك بالكاع ونام.

بس ما اريد تجيج حجايه او امج تحجي ؛،

لا متحجي قابل متعرف هي المكان صغير وين انام؟

اوك لعد انطيني مخده ..

لا وين اصبر ( فتحت الكنتور الملحق بالغرفة لكيت بي فرشه وغطا اضافي ،فرشتهن اله حتى ينام مرتاح) خلصت تعال نام .

تسلمين تعبتج ويايه ..

لدكول هيج بالعكس اني الي تعبتك من يوم شفتني بس المشاكل .

هسه حجيتيها ، بعد ما اريد اسمعها منج ولتعيديها.

نمت على الجربايه ( السرير) وهو خطية بالكاع نام..

ظليت اتقلب بالفراش حاولت انام بس ما كدرت : حسام كاعد؟

رأسا كعد وباوعلي : شبيج محتاجه شي؟؟

فتحت الضوه : لا سلامتك بس ممكن طلب؟

عيوني الج كولي،،

عفيه رجعنه باجر لبغداد ..

كام من مكانه وكعد على الجرباية كبالي: بلا مدكولين جنت مقرر باجر بس نطلع شهد احاجي امج حتى نرجع ؛ (قاطعته : صدك؟)

اي والله صدك لان لازم التحق وما اكدر اعوفجن هنا ما أأمن عليجن..

اني روحي انقبضت احس : ليش تلتحق؟

ابتسم :ولج شنو ليش !غير اني ضابط

ادري ميصير متروح ؟؟

اي يصير مو دالعب دعبل اني وضحك عليه ..

ضربته على جتفه : عابتلك لتشاقه داحجي صدك.
واني هم داحجي صدك هذا دوامي واجبي تجاه بلدي لازم التحق ..

اخاف عليك والله ..

باوع بعيوني : ادري والله تخافين بس ربج الحافظ والي خله الروح هو.. ( خلت ايدها على حلكي ما رادتني اكملها للحجاية ).

يله نامي ورانه طريق باجر ان شاء الله ..

ابتسمت : ان شاء الله.

نمت من التعب .. كعدت تقريبا ب7 على حركة بالممر .. خلتني اكوم رأسا من فراشي طلعت داشوف منو ..

صباح الخير ..( الممرضة المسؤولة على الردهة الي نمنه بيها)

صباح النور ...

عفوا بس صار وقت معاينة المريض ..

اي تفضلي ( اشرت بيدي على الغرفة الي بصفنه وكملت كلامي : هاي الغرفة حجزتها بس منام ماكو بيها مريض وهاي غرفة مريضنه )

تمام..

كعدت امها لرنا واختها هم ..

يمه حسام وينك البارحه؟؟

خالة موجود بالغرفة الي بصفكم نمنه ..

امها لرنا كمزت : شنو نمتوا؟

العفو اقصد نمت اني بالكاع ورنا على الجرباية ..
كمزت امها وطلعت من الغرفة وراحت للغرفة الثانية حتى تتأكد بنفسها ؛ باوعت فراشي بالكاع تقربت عليه وتلمسته ..

بداخلي كلت هذا الفراش دافي يعني اكيد جان نايم بالكاع ؛ باوعت لرنا لكيتها غاطه بسابع نومه ومتدري .. لزمت الحافة مالت الجرباية وتحسيتها والله بارده.

معناها صدك جان كل واحد بمكان .. هيج يله اطمئنيت .. طلعت من الغرفة وشفت حسام ديحجي ويه الممرضة على الخروج ديتفق .

ها يمه حسام ..

خالة هسه سويت خروجيه لشهد لان وضعها الحمد لله تمام وراح اروح ادفع الفلوس وارجعلج ..

اوك يمه حتى نروح للفندق ..

ان شاء الله اوديكم للفندق تاخذون غراضكم وارجعكم لبغداد.

ليش يمه؟؟

والله خاله لازم التحق وصراحه مو مال اعوفكم والبارحه رنا هم طلبت مني هالشي ..

اي يمه بس احنه تعبناك ميصير هيج ..

لدكولين هيج تعبكم راحه.. كعدي رنا وتحضروا بين ما احاسبهم وارجعلج.

ان شاء الله يمه ( ما حجيت ولا اعترضت لان صدك مو مال نبقى وحدنه هنا .. ابد ما وكعتلي هالطلعة ).

كعدت رنا وجهزنه غراضنه بين ما خلصنه اجه حسام واخذ شهد وطلع بيها للسيارة وبعدها رجع عليه وعلى رنا ساعدنه وشال الغراض ويانه..

فتحلي باب الاماميه : تفضلي خالة انتي هنا اكعدي والبنات وره.

ابتسمت : الله يرضى عليك ابني ..

صعدنه بالسيارة ورحنه للفندق ؛ شهد ما بيها حيل توكف فما قبل حسام ينزلها كال لامي تبقى يمها بالسيارة وهو ينزل ويايه نجمع الغراض بسرعة ونطلع.

نزلنه للفندق بسرعة بديت الملم بشغلاتنه ؛ طبعا ما قبل يدخل لغرفتنه لان ملابس نسائية مطشريها احنه ( فديته شكد شخصيه بس خجول 😍)

بلشت اطلع بالجنط للصاله وهو ياخذهن يم الباب : اكولك حسام وديهن للسيارة بين ما اكمل جمع الغراض ، مو احسن؟

لا وين اعوفج نطلع سويه وثانيا دزيت على العاملين بالفندق حتى ينزلوهن النه .

اوك مثل متشوف..

كملت ما طولت ربع ساعة : ما شاء الله عليج سريعة حيل ؛ اول مرة اشوف مرة هيج..

اي عيني لعد شعبالك ؛ تربات رجال احنه 😊

والله والنعم من الرباجن..

استحيت منه : والنعم من اصلك 😊

نزلنه وقفل حساب الفندق وخطيه هم دفع الفواتير وطلعنه للسيارة حمل جنط فوك السيارة لان ماكو مكان يكفي بالرغم سيارته جبيرة .

طلعنه الطريق طويل شغل قران ومرات اغاني بس بصوت ناصي لان يستحي من امي ..

وصلنه ويه وقت العصر للبيت نزل الغراض وسلم علينه وراح (امي توسلت بي حتى يبقى بس ما قبل خطيه ) : والله خاله لازم ارجع للبيت اخذ غراضي واطلع للدوام لازم..

انقهرت عليه من سمعته هيج كال : زين انته مو تعبان شون راح تسوق؟؟

لا راح اخابر صديقي اروح وياه ان شاء الله.

جاوبته امي: توصل بالسلامة خالة خابرنه بس توصل فدوة.

تدللين يمه (باس امي من راسها وطلع)

امي واختي راحو ناموا من التعب ، بس اني بقيت كاعده افكر وخايفة عليه ظليت اكتبله مسجات وهو يجاوبني الا وصل يله اطمئنيت عليه وكدرت انام لان هو هم تعبان فكالي راح ينام مدام وصل من التعب.

خلصت العطلة ورجعت للدوام ؛ ظليت على تواصل وياه من جان ملتحق ومن نزل للبيت  رأسا داوم علمود يشوفني، طبعا كل هاي الفترة اني ما حجيت لأسو على الي صار ويانه وشنو سوه حسام علمود يساعدنه.

صباح الخير ..

شهكت : صباح النور  ..

ابتسم من شاف اللهفه بعيوني : شونج رناوي شخبارج؟؟

الحمد لله انته شونك اخبارك ، الحمد لله عالسلامة ( حسيت روحي رجعتلي من شفته على الرغم طول فترة التحاقه وهي اسبوعين جانت ما كطع ويايه على تواصل ظلينه).

ظلت اسو تباوع مستغربة هاي شبيها !!!

شونج اسراء شخبارج؟

جاوبت بأرتباك : الحمد لله اخي بخير ..

دك تلفونه باوع عليه وما جاوب : هاي اصدقائي رايح اشوفهم وره المحاضرة اجي عليج ... متفقين؟

اي ان شاء الله متفقين .. ودعنه وراح..

ولج رنا شنو شوكت كبلتوا؟؟ ولا تحجين ولا دكولين ؟ بس وكت المصايب تذكريني ها!؟

عابتلج انتي الاصل قلب بس قصة طويلة وصار وقت المحاضرة مو مال نسولف هسه ؛ خلي نروح..

يوميه جان يجيني ونظل نسولف ونضحك وندخل محاضرات سوه ،لان جان بغير كروب فأنقل لكروبي حتى يبقى ويايه ؛ وطبعا اسو ويايه ما عافتنه حتى متجي حجايه عليه .

السلام عليكم .. شونك شيخنه شخبارك؟

يا هله بابو رياض هله بأخويه .. تفضل استريح ..

كعد ابو رياض ( ابو رياض هو الاخ الاصغر لابو لحسام ، وابو حسام هو شيخ عشيرتهم ).. صاح ابو حسام : يولد صبوا الكهوة لعمكم ..

كعدوا رحب بي بين ما صب الكهوجي ( صاحب القهوة بالعراق يسمو كهوجي) كهوته وقدمها للضيف ؛ طبعا ابو رياض اخذ فنجانه وخلاه كدامه ما شربه( من يجي الضيف وعنده حاجه يم صاحب المضيف ما يشرب كهوته وطبعا هاي من تقاليد العرب ) ؛ انتبه عليه ابو حسام فكاله : اشرب كهوتك والي جيت بي ترجع بي.

ابتسم ابو رياض وشال فنجانه : كفو منك يخوي ، وشرب كهوته وهز فنجانه ( هز الفنجان دلاله على اكتفاء الضيف من الكهوة ) .

بلش ابو رياض بسالفته : شوف شيخنه اجيتك اليوم علمود موضوع بنتي سارة ، تدري البنية كبرت ونصيبها ديجي بس احنه دنرفض لان حلالنه منريده لغيرنه .. واني من زمان حاجي وياك بهذا الموضوع وكلتلي تريدها لحسام ..( قاطعة ابو حسام : اي صح واني على كلمتي وبيتي متدخله غريبه) .

خير ان شاء الله .. يعني ننتظر حسام؟

حسام شوره من شوري وميعترض وان شاء الله يجي وانته تحجيها وياه.

ان شاء الله .. ( ضلوا يسولفون ويحجون بشغلات العشيرة بين ميرجع حسام من كليته)

السلام عليكم ..شونج ام حسام شخبارج اليوم ؟

يا هله بوليدي يا هله بشمعة بيتي .. الحمد لله انته شونك اليوم ؟

الحمد لله بخير يمه بس ميت جوع صبيلي غده..

صار وليدي ..

صدك يمه وين الحجي لعد؟

الحجي بالمضيف كاعد ويه عمك ابو رياض  ( استغرب حسام : شعجب جاي هيج وكت عمي مو من عوايده ؛ زين شوكت اجه يمه؟؟

والله يمه ما ادري مو تدري مضيفنه ما تندك بابه الي يجي ويكعد هله بي ما نتباوعله على الوقت..

روح شوفهم وراها اصبلكم الغده.

ان شاء الله يمه رايح..

دخل للمضيف وسلم على عمه وعلى ابو وكعد كبالهم.

شونك عمي شخبارك؟

هله بأبني هله بشيخنه ..

ابتسم حسام: الشيخه متحله بس لراعيها ، واشر بيده على ابو ..

ضحك ابو : ان شاء الله تشيلها من بعدي وليدي .

العمر الطويل الك حجينه.

شوف ابني عمك جايك بشغلة ويريد يحجي وياك بيها..

كول عمي مكضيه ان شاء الله شغلتك.

والله يا عمي يا حسام اريد سارة الك.

حسام ( احس بداخلي غيمت واختنكت ) : بس عمي سارة بعدها صغيرة واني مثل متشوفني بين كليه ودوام ما ملحك وبعدلي سنه يله اتخرج.

باوع ابو رياض لابو حسام فأفتهم ابو حسام نظرته: شوف وليدي اني سارة من زمان حجزتها الك واذا على الكليه هي سنه تخلص شون مجان .. المهم بنت عمك متروح لغيرك لان طلبوها من ابوها ؛ واني كتله لعمك الشغله الي اجيت بيها تروح بيها ..

سكت حسام ودنك راسه : الي تشوفه حجي وتأمر بي .

طلعت من المضيف واني مخنوك ما اعرف شسوي ، يا اللهي وين انطي وجهي وهاي رنا المسكينة شون اعوفها واني وعدتها ما احب  ولا افكر اخذ غيرها ...

صعدت لغرفتي .. لكيت رنا متصلة على الجهاز ودزه مسجات(شو ماكو ، ظل بالي عليك) عبالك قلبها علمها .. غلقت الجهاز ونمت ما كدرت ارد عليها وحتى اذا رديت شكوللها !!

ثاني يوم الصبح حضرت جنطتي وطلعت : ها يمه وين رايح ؟؟

يمه خابروني لازم التحق .

ليش مصارلك اليوم رابع يوم على جيتك!؟

شمدريني يا يمه غير الامر خابرني وكال لازم تكطع اجازتك وتلتحق.

ها بويه صباح الخير .. على وين من الصبح ..

صباح الخير يابه .. خابروني ولازم التحق ..

زين وشوكت ترجع؟

والله ما اعرف ..

زين والمشيه مال بنت عمك؟؟

يابه من ارجع ان شاء الله عود اروح امشي عليها ( واني بداخلي : عساني لا رجعت)

ودعتهم وطلعت ..

طول الطريق افكر بيها ، شون راح افاركها وانساها شووون ودموعي نزلت على وجناتي من ألم صدري.

شبيج رنا شو مو على بعضج اليوم ؟؟

ولج اسو هذا حسام مدري وينه من البارحه اخابره وماكو بالبداية مجان يجاوب وراها كام يطلع مغلق الجهاز ..

زين خاف مخلص شحن او التحق؟؟

ولج شنو مخلص شحن ! اكولج من البارحه مغلق جهازه قابل كاعد بالمنكطعه حتى ميشحن جهازه؟؟
لعد التحق؟

لا وين مصارله اربع ايام من نزل..

اهو لدوخين روحج يمعوده الغايب عذره وياه..

ولج روحي وياه مو عذره وياه ( نزلت دموعي وحضنتني تهدي بيه).

الجهاز ما فتحته ظليت غالقه 3 ايام تقريبا واني داموت بداخلي من تفكيري بيها بس ما اعرف شحاجيها اذا خابرتني جنت خايف من المواجهة وياها ؛ احس نفسي خنت كلمتي وطعنتها.

دك تلفوني الثاني هذا مجان عد رنا فكدرت ابقي مفتوح لان هو خاص بس بالدوام : الو هلو حسام شونك يخوي شخبارك؟

هلو علي الحمد لله انته شونك؟

الحمد لله بخير .. شو ماكو بالكلية؟؟

والله التحقت صارلي 3 ايام ..

اكولك حسام البنية رنا هي وصديقتها اجوني وسألوا عليك وكالت دتخابرك بس مغلق جهازك انطيها هذا رقمك؟؟

اني نار اشتعلت بيه من عرفتها محاجيه علي علمود تعرف اخباري: لا علي ميحتاج تسلم هسه اني اخابرها مخلي جهازي على الشحن .. ممنون منك اخويه ( سديت الخط مثل المخبل فتحت جهازي الثاني ، وصلتني كومه رسائل منها ما فتحتهن ؛ كبل خابرتها)

اني كاعده بالمحاضرة ومخنوكه وبالي مو يم الاستاذ ؛ حسيت الموبايل بده يهتز ، رفعت الجهاز وهذا رقم حسام ديتصل عليه من فرحتي طلعت اركض من القاعة حتى ما استأذنت الاستاذ : الوو حسام ..

الو رنا تسمعيني ؟

اي داسمعك ، هاي وينك وين هالغيبة وو( داكمل حجي جان يقاطعني : شوفي رنا هاي اخر مره تخابريني بيها واني هم ما اتصل بعد عليج وديري بالج تروحين لواحد من اصدقائي وتسألي بعد عليه ،؛ افتهمتي لو لا ؟
اني من الصدمة احس انخرست بعد ما اكدر احجي ( صاح بيه : مو داحجي وياج افتهمتي لو لا؟ )

كوه طلعت الكلمة من حلكي : افتهمت.

سد الخط بوجهي .. استداريت لكيت اسراء ورايه ثاري لاحكتني من اني طالعة وكايله للاستاذ هاي امها تخربطت وهيج طلعت حتى تبرر موقفي .

سمعتي اسراء سمعتي ؟؟؟ انتهى كولشي بساطه.

تقدمت اسراء عليه : اهدي حبيبتي خلي يولي ميستاهلج طبه طوب هو الخسر..وحضنتني .

كمت اصيح ولج شخسر اني الي خسرت ولج روحي بي شون يعوفني ويروح ؟؟ مو كالي اني ابوج واني اخوج واني كولشي الج ولج شون عافني ..

فقدت واني اعيط وابجي وكعت بالكاع وبعد ما حسيت بشي .

يمه تسمعيني؟

اباوع امي فوك راسي واني بغرفتي ؛ بس شون وصلت للبيت ما ادري ولا اريد ادري كولشي مات بداخلي احس.

ظليت يومين ما اكل ولا اشرب كوه اخذت كلاص مي خلال هاليومين وخلصتها معتكفة بغرفتي وبس ابجي لو اضل اكلب بالمحادثات مالتي وياه واضحك على روحي ؛ شون ضحك عليه؟؟؟

من سديت التلفون منها انهاريت لزمت المسدس وصوبت نفسي ؛ نقلوني الجنود للطبابه وهناك عالجوني وره 3 ايام فتحت الفيس وشفتها منزله مقطع لاغنية شكت قلبي بكلماتها .. ضليت اسمعها ودموعي تصب عليها ...

************&&&&&***********

نسبة المشاهدة والتصويت ميشجع حتى اكمل للبارت القادم 😖