رواية احببتك انت الفصل العشرون 20 - بقلم ESRA'

#احببتك_انت
#جيانا
.
.
.
- كولولها ؛ ضحكتها تسعد وطن ♥️'
.
.
سارة :
صبحت الصبح على وكاحته
كعدني ببوساته على وجهي
حضنت حيل و بست راسه

سارة .«صباح الخير»
محمد .«صباحي انتي رويحتي»
سارة .«شوكت نطلع»
محمد .«بعد خل نتريك و يصير الوقت و نتوكل»
سارة .«ديلا نكوم»
محمد .«وج كتلج نتريك ريگيني يلا»
سارة .«اي غير ننزل اول شبيك»
محمد .«لا لا ريوگي غير شكل»
سارة .«عليك الله والله توجعني انت تعض ما تبوس»
محمد .«اي غير آكلج»
سارة .«محمد امي شون ما عارضت سفري»
محمد .«يلا كومي بعد ننزل»

كام و مجاوب ، حسيت صاير شي
هي من غير شي على عماها جايه اني هنا
عاد هسه رح اسافر يبووو الله اليستر شرح تكول

غسلت وجهي ، توضينه و صلينه سوة
كملنه و نزلنه جوة حضرت الريوگ وي عمتي
غيداء هم كاعدة حت تودعنه
مدري ليش اشتغل و جالگه الضحكه من الطول للطول
صبينه الجاي و كعدنه ناكل

عمي .«سارة خابرتي اهلج»
سارة .«لا عمو بس جعفر بارحه حاجاني ، انشالله من اخلص اصعد احاجي ابويه»
محمد .«ما يحتاج اني ادكلهم»
عمي .«انت معليك»
محمد .«ياابه ..»
سارة .«شنو اني هم ارد احاجيهم»
عمي .«هذا اهو بنيتي تحجين وياهم و انتهى»

محمد ضاج و گلب خلقته 😐
يلا بعدين يرضا مو مشكله هسه
كملنه و كفيت السفرة وي غيداء
صعدت خابرت بابه يرن و ماكو جواب
دكيت لجعفر بالرنه الثالثه رد .«هلا سارة»
سارة .«هلا بيك حبيبي وين بابه شو ما يرد»
جعفر .«جوة هسه انزله التلفون»

نزل شوي و اجه صوت ابويه .«هلا بشمعتي»
سارة .«هلا بضوة الشمعه ، شونك باباتي»
ابويه .«من اسمع صوت حبيبه روحي اكون بخير»
سارة .«ربي يحفظك الي ، بابه عرفت رح اسافر»
ابويه .«اي يابه روحي و انتبهي على نفسج .. وصيته لرجلج هم لا تخافين اثق بيه»
سارة .«هسه ارتاحيت طالما انت تثق بيه .. شكرا بابه احبك كلش هوايه»
ابويه .«واني هم احبها لسورتي ، يلا بابه روحي كملي شغلج و اجيج للمطار نلتقي انشالله»
سارة .«صار ، ءء بابه اريد امي احاجيها»
ابويه .«ابيت جدج بعدين عود ماشي»
سارة .«مثل متريد يلا اكمل و اجي»
ابويه .«الله وياج باباتي»

غلقته و انداريت شفت محمد متكي على الباب و ينظرلي نظرة المعاجبه !!!!! شبيه هذا؟؟

سارة .«صار شي؟»
محمد .«اني اللي أسالج»
سارة .«مدري كولي شكو»

تقدم و كعد يمي و رافع حاجبه
محمد .«باباتي و احبك و ضوة الشمعه و محمد طز هذا منو بيش حگه»

ياااا 😂😂 .«محمد هذا بابه تغار منه»
محمد .«بس اني باباتج وبس اني تحبين و بس اني ضواج غير هالكلام ماعندي»

سارة .«هههه انت أماني و هدوئي و سلامي
هذن ممكفين يعني !!!!»

رفع حاجبه بمعنى لا 😂
سارة .«لا تغار هسه كوم يلا نبدل»
عفته كاعد و رحت طلعتلي حجاب مرتب
دخلت بدلت و طلعت هو مبدل
خطيت عيني كحله رسمتها كلها
احب شكلي بيها يطلع غير شكل
هو هم لبس محابسه و ساعته و مشط
شال شيشه العطر و سبح بيه ما يعرف يحط كم پسه لا لازم يسبح سبح 😒

كمل كتر العطر رحت حضنته حيييل و خرت
.«هاي حت عطرك يصير بيه»
محمد .«وج امشي بدلي اشو»
سارة .«ما قابل بس انت»
محمد .«صايرة تعانديني هواي للمعلومه يعني»
سارة .«😀 يلا ننزل»

تركته و نزلت اجو بيت اسامه هم شفتهم
غيداء رجلها هم جاي زيارة تفاجأ بسفرنه
سلمنه عليهم و اخذنه اسامه للمطار
هناك شفنه صديق محمد موجود تسالم وياه و رجع يمنه
شوي واجه ابويه و جعفر
ودعتهم و اني اضحك مكيفه مسافرة
صار وقتنه و صعدنه الطيارة واو بدايه موفقه🔥

__________ محمد يروي ___________

ايقنت انه ماخذ طفله وياي
لهفتها و ضحكتها و برائتها و رقتها
كلهن بوقت واحد ظهرتهن

اسامه .«انتبه على مرتك زين»
محمد .«اكيد بعيوني عايز توصيني يعني»
اسامه .«ابعد عن العصبيه قدر الإمكان ماشي»
محمد .«ههه اندعي ما يصير شي»
اسامه .«ان شاء اللة ، انتبه على نفسك و مرتك و ابويه»

حضنته و امنته على بيتنه
اسامه شوكت كبر هيج ما اعرف
تؤامي و اخويه و عضيدي

ركبنه الطيارة و اني متفاجا من روح سارة الطفولية
يعني كل بنيه من تصعد طيارة اول مرة هيج ردة فعلها و ما ادري لو مرتي استثناء !!!!!

حلقنه بالجو 5 ساعات لحد ما وصلنه
نزلنه بالمطار و منتظرينه الولد هنا
عقيل و علي و احسان جايين
سلموا على ابويه و سارة

محمد .«عقيل هاي مريتي»
عقيل .«واخيرا شفتها 😂»
محمد .«يلا كافيك لهنا امشو»
سارة .«اريد مي شوي عطشت»
محمد .«علي حباب جيب مي بين ما أختم الجواز»

تركتها يمي الولد و ابويه ورحت ختمت مال الدخوليه
رجع علي بيدة مي نطاها و طلعنه كلنه
رحنه للشقه وصلتهم عفتهم يمي إحسان
ورحت للجامعه نزلت إعلان للطلاب انه نكمل محاضرات انكليزيه و نطيت خبر للمقرر بوصولي

خلصت اموري و طلعت اخذت عشه و رجعتلهم
دخلت شفتها كاعدة بالصاله وياهم
محمد .«عفيه بيكم محمد ماكو كتبكم مشمرة»
عقيل .«يووو رجع محمد ورح يرجع يسگمنه»
محمد .«اصلا انت راسب مأيس منك»
سارة .«هههه خطيه لا تصدمه هيج»
محمد .«كومي جبت العشه خل نحضرة»
علي .«مو خطار شكو تشغلها»
محمد .«صح حقك اعتذر سرو هسه علي هو يرتبلنه السفرة 😏»
علي .«لا وين هاي سارة مو مرت اخونه هسه تحضرها وهي الممنونه»
محمد .«كوم ولك ولا حرف»

كام يدردم و دخلت غرفتي أبدل
طلعت شفته هو وسارة و عقيل بالمطبخ يحضرون

محمد .«ها يابه عندك خطه تبلش بيها»
ابويه .«اعرف دكتور هنا باجر اروحله بس ما اخذها»
محمد .«تركها اخذها وياي للجامعة تشوفها»
ابويه .«اي خوش حجي .. وشويه تركها تتنفس لا تشدد كلش عليها»
محمد .«ههه شكتك مني»
ابويه .«لا والله ما حجت بس ابني و اعرفك»
محمد .«😂😂ماشي»

عفته بالصاله ورحت يمهم
سارة .«لا صار سنه هيج من مخطوبين»
محمد .«منو ذولي»
سارة .«اكو غيرنه»
عقيل .«سالتها صار شكد من متحملتك 😌»
محمد .«انت ابقى على هذا شقاك واني اخذها و اطلع منا لحد ما ترجع»
علي .«ههه نلحگك ، روح شوف مرتك غار من سارة ودخل غرفته و قفلها»
محمد .«صدگ عود هو وينه»

طلعت رحت دگبت الباب عليه .«احساان»
دكيت شكد ما فتح تالي اتصلت عليه
غلقه و اجه فتحلي الباب .«مو مرتك هنا شعندك بيه»
محمد .«😂 عبالي انتحرت»
احسان .«عاب حظك ولي عندي امتحان روح اقرة انت هم»
محمد .«امتحان شنو هستوني نطيت علم رجعت»
احسان .«هسه اجانه اشعار بخبر الامتحان روح لحگ»
محمد .«شتعل جد جدك لان ما كتلي»

رحت لغرفتي ركض اشوف البريد مالي
اف امتحان و المادة مدارسها لان جنت عد أهلي
طلعتلهم للمطبخ .«علي عقيل داخل ادرس سارة ميحتاج اوصي عليها مو»
عقيل .«ادخل نكمل ونصيحك تتعشه»

اشرت لعلي فهم قصدي ورفع ايدة 👌👍
ماريدها تتعب حت ما يهيج وجع راسها
و علي شايف حالها شون يصير من اجه للمستشفى

دخلت و زرعت عيوني بين الأسطر ادرس
قريت المادة كلها و ذولي بعدهم مكملوا
جعت شنو معقول مدبرت تطبخ شي هنا
ذولي الزوج شديسوون لعد وياها 😦

طلعت برة الغرفه اشم ريحه عطابه
محمد .«بربكم منو حرگ الاكل»
عقيل .«مرتك كتلك ما تعرف تطبخ»
علي .«تكول محمد يحب ياكل محروك»
سارة .«ذولي الثنين هم نسو الفرن😒»
محمد .«وانتي شنو دورج»
سارة .«تعبت هم سفر وهم جبت اكل لازم اسويه ، هسه انت مشتري اول تالي جيبه جاهز وفظها شكو اتعبني»
عقيل .«عفيه بأخيتنه رزليه هيج خل يحرك فلوسه»
سارة .«😒 انت الحرگته امشي جيب عشه يلا»
علي .«ههه بعدج ما تعرفيه عقيل مستحيل يدفع فلس واحد»

طلع إحسان من غرفته .«كلت ارد ادرس فوك الهوسه ريحه عطابه 😠»
عقيل .«شوف چنتنه شون حرگت المطبخ»
سارة .«يااااا طباخكم سگط كتلكم شغلوه وانتو حركتوا الاكل فوك تعبي»

تركتهم و دخلت غرفتي زعلت
محمد .«هسه تنزلون تجيبون عشه معليه منين
فشلتوني كدام ابويه و البنيه 😡»

رحت للصاله شفت ابويه تاركهم و نايم
رجعت للغرفه كاعدة ع السرير مقهورة
محمد .«يشاقون وياج لا تزعلين»
سارة .«مزعلت بس راسي واجعني حيل»
محمد .«جايب علاجج اكلي و اخذيه ونامي»
سارة .«وين انام و عمي وين اينام»
محمد .«انتي يمي و ابويه بغرفه علي و علي وي عقيل»
سارة .«عيب ابقى هنا هم عمي و هم أصدقائك»
محمد. «يعرفوج مرتي ترة»
سارة .«حت لو عيب»

محمد. « شو مدي ايدج ثنينهن»
مدتهن كدامي و حولت حلقتها من ايد لايد
محمد .«هسه انتي زوجتي مالج اعتراض»
سارة .«هههه شكد سهله عندك»
محمد. «يلا مددي ارتاحي خل ادرس بين ما يجيبون عشه»

تركتها و رجعت بين أوراقي اكمل
راجعت وضبطت المادة كلها رغم كتاب كامل
بس اتبعت بيه طريقه سهله و تنفهم
التفت الها شفتها غفيانه
طلعت على كيف سويت اكل سريع و كعدت ابويه تعشه خطيه بسبب هالسرسريه ما اكل بعدة

كمل و دخل ينام براحته
اني هم اخذت كيك و رجعت غرفتي قفلتها
بدلت و طلعت ملابس لسارة
كعدتها بدلت على كعدتها و رجعت نامت
طفيت الضوة و غلقت البردات و مددت سحبتها لحضني شميتها مليت رئتي بيها
بستها و نمت هم تعبان .. سفر و شغل و دراسه

صبحت الصبح و هي بين ايدي
كعدتها و طلعت للحمام غسلت
لبست حجابها واجت هي هم غسلت
دخلنه صلينه و طلعت حضرت ريوك
انجمعنه على السفرة كل احنه
عقيل .«ايييه ذكرتيني بسفرة امي»
علي .«بيك خير ارجع لأهلك»
إحسان .«الوحيد الربحان هو محمد»
ابويه .«تزوج انت هم عمو لا تبقى شكبرك صرت»
إحسان .«دا ادور على عروس بس ماكو التقنعني»
سارة .«تزوج اجنبيه 😂»
محمد .«اي حت تتعيقل براسه»
علي .«لا لا ياخذ عراقيه حت تعرف تطبخ هيج»
سارة .«ههه هو اني تعلمت اكثر شي من عمتي
خل يتزوجها وياخذها لأهله و تتعلم»
محمد .«وين لكيتيها»
عقيل .«سارة ما تدوريلنه على عروس لو لكيتي ارجع للعراق واستقر عد اهلي»

نظرتله نظرة تخض بيها بنات البراسها
لحد ما لگطتها و ضحكت
محمد .«يلا تزوجت لا تخاف بعد»
سارة .«بعدني مكلت منو»
محمد .«شاك بثنين بعدين اكولج منو»
ابويه .«كمل حت نطلع»

كملنه ريوك و سارة تجهزت و اني هم
الولد هم كملوا و طلعنه كلنه كل واحد لجامعته
اني و سارة و احسان رحنه لجامعتي «كليه الملك/لندن» و عقيل و علي بجامعه «باث/لندن» رغم مسافه بينه بس باقين ويانه بالشقه

وصلنه و اخذتها لغرفتي اخذت فايلي و هي تركت غراضها و رحنه لقاعه طلاب الماستر قدمنه امتحانه و كما هو متوقع ان شاء الله يكون تقديري كامل
ساعه و نص و رديتلها و صعدت لطابقنه عندي محاضرة
دخلت للمقرر بصمت مباشرة و طلعنه للقاعه

اثناء طريقنه صادفت مروة و سلمت عليه
سبق و حجيت لسارة عنها وهي تغار منها
مروة نظرتلها نظرة تعالي على انه منو و انوب شافت كامش ايدها حترگت
احسن شي هو جبت سارة حت تكف عني بعد
سألت منو هاي و رفعت ايدها كتلها وايف .. زوجتي
غمزتلها 😉 و كملت طريقي و هي بمكانها بعدها

وصلت القاعه و الطلاب ملتمين
دخلنه سوة و رحبت بيهم و اشرت لسارة بمكاني تكعد
طبعا البنات الطلاب العندي كلهن سافرات لهذا سارة من دخلت وبحجابها رغم بنطرون و قميص طويل فوكاه كوت بس حجاب لابسه و استر الموجودين .. المهم

شرحتلهم و المحاضرة 3 ساعات
خلال الساعه الأخيرة صارلي دخول مفاجئ من المقرر استاذ جون
سارة ما منتبهه ومدري شنو تدون بالأوراق
تمشى مقرر القسم بين الطلاب وأني واصلت الشرح
ان سأل عن سارة سأل ، وان غلس بعد أحسن
دقق وي كتاباتهم و افتر بينهم
استغربت تصرفه لأن اول مرة يسوي زيارة مفاجأة

كملت الفقرة و نطيتهم مساحه يدونون المكتوب
رحت يم سارة طلعت اوراق لموضوع اشرحه بعد ما يكملون
اجه استاذ جون شاف شنو طلعت وشنو رح اشرح

سحب الدفتر الجانت تكتب بيه سارة
نظرتله كاتبه كله عربي
بقه استاذ جون يدقق بالكلام شنو الكاتبته
الاعرفه ما يعرف عربي لهذا ما اعترضت
ابتسم و استأذن وطلع!!!!!
زيارة مبهمه لسبب غير معروف
لان لو ادري بيه يستحيل اجيبها وياي

كملنه الدرس و مضت الساعات و طلعنه
اكو اللي بقى لأن أقسام داخليه و اكو اللي طلع
اخذتها و رجعنه لمكتبي ناخذ غراضنه

سارة .«تدري يلوگلك التدريس»
محمد .«انشالله يطلع اسمج هنا و ادرسج»
سارة .«وااو شايف شون هيبه زوجه الاستاذ»
محمد .«ههه خل يعرفون زوجتي وشوفي شون ياكلوج اكل ما يبقون بيج عضمايه»
سارة .«جان كتلي حت اعاندهن»

هههه كرصت خدودهه .«طفلتي انتي»
سارة .«كلها على بعضها كم سنه انت اكبر مني لا تذلني بيهن»
محمد .«شوفي حت لو اكبر منج ساعه وحدة تبقين طفلتي»
سارة .«ديلا نطلع باباتي»

كزكزت عليها شون حجتها ّ«شو تعاي ولج بعد مبيها مجال»
سحبتها من ايدها لحضني و اخذت شفايفها
بستها بهدوء اله هي تخردلت بين ايدي
بتعدت عنها و اضحك عليها
محمد .«هيج ممصدكه ابوسج😂»

ضربتني بصدري .«انت تذوبني اني شكو»
رجعت حضنها وي مدا احجي نفتح الباب دخلت مروة

محمد .«عفوا اكو شي اسمه استاذان»
مروة .«سوري قاطعت قبلاتك استاذ محمد»
محمد .«اكيد قاطعتي و بطريقه ممؤدبه بالدخول»
مروة .«منو هاي الرخيصه اللي بين ايدك واني صار سنه كدامك ما تجرئت حت تلمس ايدي»

نحجي و سارة عينها منا و منا متفهم كل كلامنه
ضحكت على كلامها و رفعت ايد سارة
محمد .«اذكر انه سبق و كتلج زوجتي😉»
مروة .«استااذ محمد ...»
ا.جون .«شصاير هنا؟»
محمد .«اهلا استاذ جون تفضل»
ا.جون .«جذبني صوتكم عالي»
محمد .«اوبخ مروة لان دخلت مكتبي بطريقه ممهذبه»
ا.جون .«مروة!!!»
مروة .«استاذ جون ، استاذ محمد خله بقوانين القسم و دخل طالبه لغرفته و دخلت كانو بوضع مخل بآداب كليتنه»
محمد .«عذرا استاذ جون .. اعرفك زوجتي سارة و ان شاء الله طالبه ويانه»
ا.جون .«اهلا وسهلا مدام سارة»

التفتت لمروة .«😉 ... و هسه اطالب بخروج مروة من مكتبي لأنها شككت باخلاقي المهنيه»
مروة .«ما شككت .. استاذ جون دخلت وهو جان يقبلها»

ا.جون .«زوجته وهالشي ما يحقلنه ندخل بيه ، نطلع افضل»

جرها و طلعوا ضحكت و سارة ما تفهم شالوضع
تراقب ع الصامت و هو المطلوب

شلنه غراضها وهي عدلت حجابها
شوي و دخل علينه أستاذ جون يضحك
ا.جون .«مبروك زواجك استاذ محمد»
محمد .«تسلم استاذ»
التفت على سارة وابتسم وحجه وياها بالعربي فاجأني انه يعرف يتكلم بيه !!!!

ا.جون .«مبارك لك هذا العشق الأزلي»
ابتسمت واني لسه مرابط شالوضع !
التفت الي مرة ثانيه
ا.جون .«زوجتك تحبك حقا ، حافظ عليها استاذ محمد»
محمد .«ههه اكيد استاذ طلعت تعرف عربي واني مجلب وياك انكليزي»
ا.جون .«كلا اعرف القليل فقط ولكن احببت ان اثني على كلمات زوجتك الجميله»

شطت للعباس ، المشكله اجنبي ما يعرف شنو غيرة و ما نقبل احد يتغزل بزوجاتنه رديتله بالإنكليزي حت سارة ما تعرف قصدي

محمد .«اسمحلي بس اني شخص غيور ما احب انه تذكر كلمه غزل لزوجتي »

وبينت تعبير المحرج حت ما يكول دا اوبخه
هو هم تدارك الموقف و استأذن وطلع

سارة .«صار ساعه تكرون جان قدرت وتحجي بحجينه»
محمد .«ههه حت اذوبج غزل و انفضح كدامهم»
سارة .«ليش جنت تتغازل حضرتك»
محمد .«يلا امشي نطلع»
سارة. «لا فهمني شرادت ذيج ام الخلاجين»
محمد .«هههه حلوة عليك الغيرة يا حلو»

سحبتها من ايدها و قفلت المكتب و طلعنه
وصلنه للسيارة ركبنه ّ«صدك سارة شنو قصد المقرر انه مبارك العشق الازلي»

سارة. «هاااا .....»

_____________ سارة تروي ____________

سافرت لندن .. مدينه الأحلام
مدينه العايشه حياتها وحد عن العالم
جميله بشكل ، من وأني بالطيارة لاحظت
بس شكد جميله و مجذبه بمنظرها و رقيها
اله تبقى بغدادنا اجمل بكلشي
هواها و دفوها و شمسها و ليلها
كلها احلى
هنا الناس العايشه ما تعرف شنو ألفه
ما تعرف شنو اكو ناس ويانه
تجربه موفقه لحد اللحظه
المطار ، الخدمات ، التعاملات و الإنترنت
شي راقي جان
تعرفت على اصدقاء محمد و مبينين ناس بسيطه

عقيل ابن البصرة و طالع من اهله صار قريب ال3 سنوات
علي اعرفه اخو اسماء + جان معيد بمعهدي من جنت اداوم
احسان اخو إيلاف و هذا غني عن التعريف يعني
و اللي يضحك هو من حجولي علي و عقيل عن علاقه محمد و إحسان 😂
و بسبب خوفهم و حرصهم على بعضهم
صار احسان الزوجه و محمد الزوج بحكم محمد اكبر من احسان 5 اشهر
علاقتهم كلهم حلوة و الحبيته اكثر هو احترامهم إلي
حسيت وكأنه يردون يرفعون راس محمد

تشاقينه و ضحكنه من سيوينه العشه
شكد جنت تعبانه بس نسيت تعبي من التهيت
كثر ما ضحكت بدوة يرتفع عندي وجع راسي
مهتميت و احتركت الاكله و محمد رزلنه كلنه
اخذتها حجه و دخلت غرفته بس اريد مهدئ
دورت و گلبت الغرفه ماكو
حسيت بيه اجه للغرفة كعدت على السرير بهدوء حت ما يحس عليه

راح يدرس وعلى نومتي غفيت بعد ما حسيت
صار الصبح و تحضرنه و رحت للجامعه وياه
الجامعه جميله بشكل لا ينوصف
يعني جامعاتنه ما توصلها من جمال
دخلت مكتب محمد تركني بيه وراح امتحن
بقيت بالمكتب اگلب بكتبه
لفتني حاط كتب روايات ضمن كتبه العلميه تحمل عنوان (Arranged The Deal , Lover و لماذا يكذب الرجل و تبكي المرأة)

جذبني عنوان الكتاب لأنه عربي مو مثل الباقيات اجنبيه
كعدت اتصفح بيه و جذبتني جزئيه لطيفه
و محمد مأشر عليها و كاتب هامش على جهه منها :

"ان المرأة بحاجه لان تعرف رجلا واحدا لتفهم كل الرجال 🍃
في حين الرجل قد يعرف كل النساء ولا يقوى على فهم اي منهن 😌"

و الهامش المكتوب بخط ايدة بحروف مبعثرة قليله الثقه كبيرة المعنى و التشتت !!!!

تعليق محمد : "ايهم احببتي منا S" .
احساس كبير بداخلي يكولي اني المقصودة
صفنت على حروفه و افكر بيه
قررت اكتبله جواب وإن كان القصد مو أني

كملت تصفح الكتاب و محمد رجعلي بعد امتحانه وحدة .«ها كملت»
محمد .«اي حمدلله ، يلا نروح المحاضرة الإنكليزي»
سارة .«اجي وياك؟»
محمد .«طبعا ، اذا تعبانه ابقي»
سارة .«لا جايه ، احسان وين»
محمد .«راح لدرسه ، يلا كومي»

گاد ايدي و طلعنه واني افكر و اجمع كلماتي إله
وصلنه قاعته و البهرني هو كبرها و جمالها
قاعه ملكيه فخممه بكل ما للكلمه من معنى
سائد على طابعها الجوزي الصاجي
ستيجات مزخرفه بدقه محترفه
عطر القاعه هو اكثر شي مميز
عطر لطيف يناغي خلايا الخشم
هيج ينعش الروح
بلش محمد درسه واني اتبع مصدر العطر لحد ما لگطت المكان النابع منه !!!
بآخر القاعه بالركن اكو مثل الركن بيه رمز مال سيد المسيح عليه السلام و كدامه بخور و ورد

تجاهلته هسه وبعدين اطلب من محمد نزور كنيسه ، من امنياتي طبعا ادخلها
انتبهت اله شون يشرح و يكتب ع السبورة
مندمج لآخر درجه
اكو شخص فات سلم على محمد براسه
سلام إشارة بس مو اكثر بدون نطق حرف
راح الرجال يتمشى بين الطلاب بهدوء تام

التفتت ع الجهه اليمنى شفت دفتر ملاحظات محمد
اخذته و سحبت قلم بلشت ادون افكاري عليه

"~ صاحب الحب اللامع ... اترك حروفي الآن لا اعلم ان كانت ستصل ليديك ولكن ساكتبها دون كلل و ضرر ... ردا على هامش صغير كتبته في قلب إحدى صفحات كتابك «لماذا يكذب الرجل و تبكي المرأة»
بالنسبه لي ، حتى الآن رأيت كذباتك القليله
وحين اعود الى غايتك منها ، ارى انها تعود للحفاظ عليّ لا اكثر
وحين ابكي انا ، قد يكون السبب تشتتي او خوفي من مشاعري .. ولكن الان سابكي لأنني اعرف كميه هذا الحب القابع بداخلك ، في ذاك القلب الممتلئ بكل الحب الموجه لي
قد لا اكون من يستحق هذا ألحب العظيم
و لكن سأطمع لأكون فقط من تحصل عليه
قد تسائلت ايهم احببت ! ذكرت ربما لم تكن الكلمات موجه لي ولكنني ساجيبك حتى يرتاح فؤادي اكثر مما قد ترتاح انت
احببتك انت يا صاحب الحب الأزلي ليكن هذا ردي الآن على ذاك الهامش و التفسير ستناله فيما بعد~" .

بعد ما كملت خطيت حروف اسمه بمزج انكليزي
و اللي فاجأني و ربك حروفي هو الشخص اللي جان يتمشى بين الطلاب انتبهت واكف فوك راسي
بعد ما ابتعدت شوي عن الورقه سحبها و اتمعن بيها
محمد نظرلي و رجع كمل تصفحه بأوراقه !!
معقول ما غار ؟؟؟
يلا احسن مما يتعارك بنص المحاضرة
استاذن الرجال و طلع ومحمد كمل الدرس
بعد ما إنتهى طلعنه لغرفته ياخذ غراضه و نطلع بعد

سارة .«منو الرجال الدخل !»
محمد .«المقرر مال القسم ، عدنه ابغداد مثل العميد»
سارة .«هاااا اشو مو كبير كلش»
محمد .«وانتي شكو تدققين»
سارة .«غير حلو شبيك مشفته شون عيون جنها بحر»
محمد .«اذا متنازله عن روحج كملي كلام»
سارة .«هههه متنازله عنها يمك بس»
حضن ايدي و دخلنه المكتب
و هو وكلامه و رومنسيته
صار علينه هجوم من قبل مروة اللي اول وصولنه صادفناها و نظرتلي وكأني بايكه حبيبها

تلاسنو بالكلام و فهمته كله طبعا
جان عندي مشكله هي مكدر ارد 😂
اظهرت تعبير المفاهم شي حت محمد ما يطوخ وياها
و الحرجني انوب هو ثناء الأستاذ على كلماتي الكتبتها عرفت انه قراهن
خجلت و حسيت الحرارة تطلع من روحي
شوي و طلعنه من المكتب توجهنه للسيارة
ركبنه و اني اتمنى نفتر شوي ما نرجع رأسا للبيت

قبل لا اطلب انه نفتر محمد سالني «صدك سارة شنو قصد المقرر انه مبارك العشق الازلي»

سارة .«عود من تروح لغرفتك بالجامعه تعرف»
محمد .«ليش يعني»
سارة .«لان تركت الجواب هناك»
محمد .«دمشي نرجع هسه»
سارة .«لا حباب نرجع حت تبدل و نطلع نفتر»
محمد .«لا ماريد نفتر ارتاحي باجر ترحين وي ابويه للمستشفى واني اخلص محاضراتي و اجيكم»
سارة .«الله عليك خل نفتر والله ما اتعب»
محمد .«نشوف منا لليل»

رحنه للشقه مالهم و خابر احسان هم كاله راجع
وصلنه و شفنه عقيل موجود بس هو
محمد .«ها علي وين؟»
عقيل .«علي متباسط وي الاستاذ يطول يلا يرجع»
محمد .«يعني شنو يطول ! انت ليش عفته»
عقيل .«محمد لا تدخل عوفه خل يتحمل مسؤولية مو كلشي يحصله خل يتعب»
محمد .«كوم نروحله ، يتحمل مسؤولية من يكون ابلدة مو هنا محد يعرف»
سارة .«رأيي انه بس تطمنون عليه وهو يدبر طلعته حت ما يكرر غلطه اذا جان هو الغلطان»
عقيل .«وهذا رأيي ما نطلعه»
محمد .«هو محبوس لو شنو فهمني»
عقيل .«لا بس محجوز بالجامعه»
محمد .«افف خل اخابر احسان يرجع و نروحله وين اعوف سارة وحدها»
سارة .«روح ما عليه شي قفلوا الباب وهذا اهو»
عقيل .«لا المفتاح موجود عد الولد ما ينفع»

راح محمد للمطبخ يشرب مي ويتصل بإحسان
دخل بدل ملابسه و طلع
نص ساعه و اجه إحسان بسرعه

احسان .«شسالفه اجيت على اعصابي»
محمد .«شبيك تنهت شنو رجعت ركض»
احسان .«لا بس مشدودة اعصابي لأن مشيت سرعه عاليه»
عقيل .«بالله صارلك شي شهالاهمال انت وذاك»
محمد .«ما تجوزون لحد ما تصير بيه سكته وارتاح»

طلعوا محمد و عقيل يرحون لعلي لجامعته
إحسان .«دخلي ارتاحي ساعه ويرجعون»
سارة .«اكو ماركت هنا قريب»
احسان .«اكو بس منكدر نطلع محمد كون ويانه»
سارة .«لا عليمن نروح نرجع بسرعه»
احسان .«ههه هسه عرفت ايلاف منين ماخذة عنادها 😂 ما يصير لازم تكولين لمحمد يلا تطلعين»
سارة .«لا هاي بالعراق مو هنا + قابل رح اروح وحدي»

ضحك و مد ايدة ع التلفون اتصل بيه
احسان .«محمد نازل للاسواق اخذ مرتك»
محمد .«اصبر لحد ما نرجع»
اخذت من ايدة التلفون .«محمد ارد اروح»
محمد .«سااارة لا تعاندين خل افهم شدا اسوي»
سارة .«نازله اني يلا باي»

غلقته قبل لا يرد .«يلا ننزل»
احسان .«ولا نتحرك تردين يجي ويهجم البيت علينه»
سارة .«هي رزاله هلكدها بس يشوف شرح نطبخ هسه يسامحنه»

بطلاع الروح يلا قنع
بدلنه ملابسنه و نزلنه
الاسواق مقابيلهم عبرة شارع بس
دخلناها وجد انواع كلشي بيها

سارة .«شنو نطبخ !»
احسان .«تعرفين تسوين مقلوبه»
سارة .«اكيد ليش لا»
احسان .«لعد ناخذ موادها ونحضرها»
سارة .«ماشي ، جيب بتيته و بيذنجان»

راح هو ع المخضر واني رحت ع المجمدات
اخذت دجاج و انوب شفت قراميش هم اخذت
رحت على قسم البهارات اخذت مال دجاج كص
وانوب شلت راس بصل صغير و قوطيه معجون صغيرة هم ... شنو بعد !!!!!!
هاااا خبز اي
اجه احسان بيدة 3 بتيتات و 3 بيذنجانات
سارة .«خبز اكو هنا احتاج خبزتين»
احسان .«هسه اشوف»

راح مدري وين بقيت أتمشى اني واتفرج
شفت قالب كيك بوياااي اريد كيك
خل يرجع محمد و اخليه يجيبلي
اجه احسان شايل جيس خبز عيش !!
ما اعتقد رح يفيدني هذا 😐
حاسبنه و طلعنه ردينه للسكن

احسان .«ابدل و اصلي و اجي»
سارة .«اخذ راحتك إحسان روح ارتاح»
احسان .«لا أساعدج حت يجون احنه مكملين»

دخل بدل و طلع توضه
اني هم بدلت و توضيت و صليت
كملت لبست صايتي و شالي و طلعت
غسلت المخضر و بديت اقطعه دخل احسان

احسان .«يلا شنو أساعدج»
سارة .«حل المشكله وهي جدر ماعدكم بشنو تطبخون»
احسان .«لا عدنه بس اخذة مؤيد هسه اجيبه»

طلع من الشقه شوي و رجعلي
احسان .«سارة تمن ما اخذنه و ما عدنه هنا!»
سارة .«يااااااا شون نسيته 😱»
احسان .«ههه دزيت مؤيد لا تخافين»
سارة .«اي زين ، خلي الدجاج جوة المي يحل»

راح اخذة يخليه واني قطعت البيذنجان و البتيته و ثرمت البصل ناعم كلش
طلعت طاوة بلشت اگلي
احسان سوة زلاطه كل هذا بسكون تام
لحد ما هو كسر الهدوء بسؤاله المفاجئ

احسان .«سارة شوكت اخر مرة تواصلتي وي احمد»
سارة .«احمد !!!! منين تعرفه انت»
احسان .«اعرفه من محمد طبعا»
سارة .«هاااا ، اخر مرة حاحيته اخذت من خاطرة لوفاة عمو كاظم»
احسان .«زين تطور لشي كلامكم»

نظرتله متأكدة يعرف بكل شي صاير
ويمكن يعرف اشياء حت اني ما اعرفها
شنو الرد المناسب !!
شنو اللي لازم احجيه هسه
اوضح موقفي لان خفت محمد داري بشي
لو اتكتم و ما لازم اكول لان هالشي خاص !!

منتبهت لحد ما صاح جنت كلش قريبه من الطباخ
سارة .«اسفه منتبهت»
رحت غسلت ايدي تحت نظراته
احسان .«فهميني سارة ، ارد انصح محمد واني اعرف شنو الموضوع»
سارة .«مصار شي لتخاف»
احسان .«بس احمد كال غير شكل»
سارة .«شكال!!!!!!»
أحسان .«خلص انسي ، اروح اجيب التمن»

طلع راح يجيبه وبقيت اني بدوامتي افكر
كملت و حمست البصل شوي و كليت الدجاج بقه بس التمن اركبه
شوي و رجعلي كملت طبخه وخليت الخبز أسفل الجدر فوكاه الدجاج و فوكاه البتيته و البيذنجان و البصل وانوب التمن .. نار هادئه حت يتهدر

احسان جاب كتبه و كعد بالمطبخ يدرس حت يمي
كملت و كعدت يمه ع الطاوله و طلعت فاكهه عدهم بالثلاجه
طلع تلفونه اتصل بيهم محمد مجاوب راح لعقيل شوي ورد .«شبيك مو ديرفضه شكو تتصل»
احسان .«اعرفكم تتعاركون اصلا لازم اني اروح وانت تبقى انت ومحمد بس مكافش»

عقيل ّ«لا تخاف حليناها و جايين»
احسان .«وين هذا السكط نطينياه»
عقيل .«اصبر ياهو منهم»
احسان .«لك لا تخليني اغلط انطيني محمد»
عقيل .«اصبر وشوف شسوي بيك»
احسان .«لك سكط انطنياه عاد»
محمد .«شبيك شبيك»
احسان .«ها شصار!»
محمد .«مصار ربع ساعه واحنه بالبيت»
احسان .«زين .. محمد ابوك لسه ما رجع»
محمد .«اي اعرف خابرته رايحين عليه .. سارة شلونها خو ما تعبت»
احسان .«هستوها كعدت ، طبخت الغدة»
محمد .«ليش خليتها مو تعرف مريضه»
احسان .«لا اني وياها لا تخاف»
محمد .«ديلا جاي منطول»
احسان .«ماشي و قلل سرعه امشي اقل من 90 مو اني ماكو تستغلها»
محمد .«اكولك لا تبالغ يلا ولي»

غلقه بوجهه .«حلوة صداقتكم ملاحظه كلش تهتم بمحمد انت!»
احسان .«محمد صديقي رح يصير 18 سنه تقريبا»
سارة. «صلوات شون عميقه لعد صداقتكم»
احسان .«اي لهذا مو تتزوجون وتدفروني ترة أخرب حياتكم ها»
سارة .«هههه بعد وين وين يلا العرس بعد دراستي و دراسه محمد»
احسان .«سارة عندج شي اتجاه احمد»

سارة .«طبعا ، اكو حب و احترام و صداقه ..
احسان مهما كان احمد شوي نذل وياي بس ما انسى فضله بيوم ، وهالشي محمد ما يفمه»

احسان .«اسمحيلي اكولج تفكيرج غلط لان يستحيل اكو رجال يقبلها انه حبيب زوجته السابق يبقه يتواصل وياها وهي متزوجه .. محمد ساكت بالقدرة ترة لانج مريضه بس»

بقيت مركزة بكلامه !!!
لأني مريضه بس !!!؟
يعني صاير شي
اي اكيد وله جان ما غاب عني شهرين

سارة .«مهما يصير احمد يبقى صديقي
وان ما عجبه لصديقك اكو محكمه تنتظرة»

تركته و دخلت للغرفه
فكري بدة يكتب سيناريو و يخرجه نفس الوقت
سوة مسرحيه كامله و الله العالم اذا كانت صدك
مرت النص ساعه و سمعت لغجه عرفت اجو
بقيت بمكاني ما طلعت من الغرفه
شوي دخلي محمد شمر نفسه على السرير يمي
تعبان مبين عليه بس ماريد اروحله
شوي و كام بدل و هو مستغرب هدوئي لان ما حجيت وياه حرف واحد
كمل و لبست حجابي و طلعت اخلي الغدة
شفت عمي هم راجع و كاعط بالصالة

سارة .«هلا عمي شوكت رجعت»
عمي .«هلا بويه هسه وي رجلج جيت»
سارة .«هااا الله يساعدك»
عمي .«كلولي بنيتي اليوم طابخه»
سارة .«اي مشتهين مقلوبه و سويتها»
محمد .«ليش ما انتظرتي حت نتساعد»
سارة .«لا احسان ساعدني»

عفته و دخلت المطبخ علي موجود
سارة .«حمدلله على السلامة»
علي .«الله يسلمج »
سارة .«ادري قابل بالقسم مالنه حت براحتك هنا يختلف عن اللي عدنه»
علي .«ماكو شي لا تخافين ذولي يبالغون»
سارة .«دروح بدل رح اخلي الأكل»
علي .«بسببج رح تخليني افكر اتزوج ، رجلج غلط جابج عدنه»

دخل محمد للمطبخ .«لازم تحجي عليه ما تكدر»
سارة .«روح غسل وتعال 😒»
محمد .«هاي شبيج»
علي .«شبيها دتكولك روح غسل»
محمد. «لا تتدخل علي يلا لغرفتك»
علي .«سارة اذا تردين قوات مساعدة لا تخجلين تعاي وتدللين»
سارة .«ههه لا اكدر ادبر نفسي»

طلع من المطيخ علي و محمد رافع حاجبه معاجبنه الوضع .«شهالميانه بينكم»
سارة .«بالله لا تبلش محمد»
محمد .«سارة ما اقبل على هذا الوضع»
سارة. «اصدقائك مفروض تثق بيهم»
محمد .«لو ما اثق ما اجيبج هنا »
سارة .«هااا معناها ما تثق بيه اني»
محمد. «تردين تتعاركين كولي حت اجهز نفسي»
سارة .«ما يحتاج لاني مطايقه روحي»
محمد .«وللج 😠»
سارة .«ترة اني هم اعرف اعصب ، تعال اگلب الجدر ثگيل»

بعدني بيدة بنتر و گلبه و هو گالب خلقته
صبيناه و راح صاحهم
اجو كعدوا تغدوا و اني ع الصامت
هم يسولفون و يتناقشون واني مو يمهم من الاساس

عمي .«بيج شي بنيتي»
رفعت راسي .«لا عمو بس راسي واجعني»
محمد .«خلصي حت انطيج العلاج»
علي .«يلا حت وراها نفرج هنا»
محمد .«شو بكيفك تقرر»
سارة .«لأني ارد اطلع»
عقيل .«وين تفترين هسه وانتي متاذي راسج»
سارة .«لا اكدر اطلع»
محمد .«كلت لا يعني لا»

عاف الاكل و كام
احسان .«تعبان اليوم سارة عود باجر»
سارة .«اطلع وي عمي مو بكيفه»
عقيل .«هاي أنتي سارة نفسج اليحجيلنه عنها»
سارة .«ما اجيت حت انحبس ترى»
احسان .«صح هو صوجه لان اجيتي حت تكعدين بالمستشفى تتشافين مو هذا السبب هو»

نظرت لعمي حت يساعدني عليهم
هو بس ينظرلي و ما تدخل ابد
عفتهم و كمت رحت للغرفه كعدت ابجي
هو هم ترك كتابه واجه يمي
سحبني لحضنه يهدوء بجيت و فرغت نفسي
حسيت كلش محتاجه انه ابجي بحضن احد

محمد .«تركتج مبيج شي فهميني شكو»
سارة .«مصار ارد انام»
عفته و كمت فتحت صايتي و الشال و مددت حت أنام

سارة .«كوم اقرة برة ارد انخمد»
محمد .«شوفي صح زعلانه بس مو تتجاوزين»
سارة .«ملغيت شي كوم يلا برة»
محمد .«لسانج يرادله كص»
سارة .«كوووم بررة»
محمد .«صوتج ولج لا تصيحين 😠»

لا هنا صدك صعدت عندي وكمت اشمر و اصيح وهو كمز للباب قفلها و اجه يحاول يسيطر عليه
وجع براسي مو طبيعي صار
و محمد كدامي و ما طلع
ماريد اشوفه ماريدة يمي
حضني من ورة و قيد حركتي

سارة .«عوفني اكولك ، امشي اطلع ماريدك وخر مني 😭 اطلع منا محمد 😭 راسي وخر وخرررر»

محمد .«اذا ما تهدين ما أبتعد»
حجى ابرود عكس عصبيتي دمر اعصابي
حاولت ابعدة بس جان قابض عليه بقوة
بقه بهالحال فترة و بعدين دارني عليه غفل
حضن خصري بأيد و بالثانيه مسح دموعي

محمد .«شنو اللي خلاج هيج تسوين!!!! على طلعه؟؟ مو كتلج اطلعج!!! سارتي ميصير تعصبين و يزيد الم راسج واحنه نريدة يطيب .. وعيب هسه من الولد برة و ابويه مراح يكولون هاي شون مرة»

يحجي و يتلمس و جهي و اني بسكون تام
بعيدة عنه احس ما اشوف شي كله ضبابي
خفت كلش خفت لان عمي حذرني ابجي
هالشي بعدة يأثر على الرؤيه و بعدني مرايحه طبيب

حضنته حيل و راسي على صدرة ابجي بهدوء
مدري شكد طولت وگفتنه بس اعرف هواي
لدرجه رجلي تعبت من الوگفه
سارة .«محمد مدا شوف زين»
تمتمت و ما ادري اذا سمعني أو لا
اخذ حسرة عميقه و هو يشد ايدة حولي
شالني و خلاني على السرير لملم الارض و طلع

سحبت الغطه و نمت 💔

_____________ محمد يروي ____________

تركتها و رحت لجامعه باث حت نشوف علي
و طلع محتجز بسبب عركه وي استاذ
فاجأني انه علي صح متهور بس مو لهالدرجه
ويانه اي يطلع هيج طلعات بس يستحيل هنا
وصلنه و على ضمانتي طلعناه
شون عليه؟؟ لان اظهرت هويتي مال جامعتي
و جامعه الملك مبين الها سيط عدهم
اخذنا و رجعنه بالطريق اتصلت بأبويه

فتحت اتصال بالسيارة حت اركز بالسياقه
محمد .«الو ها يابه بشر»
ابويه .«هسه طلعت ، قابلت طبيب مختص»
محمد .«هسه جاي عليك انتظر»
ابويه .«محمد العلاج اللي تاخذة مرتك كله غلط»
محمد .«اها و عندك البديل»
ابويه .«لازم تجي ويانه يسوون تشخيص كامل»
محمد .«يابه باجر عندي محاضرة مهمه صعب اتواجد شلون؟»
ابويه .«حاول تاخذ اجازة هنا صعب ادخلها لان مو بنتي و لازم لو الاب لو الزوج»
محمد .«خل اشوف شون ارتبها»
علي .«محمد روح انت وياهم واحنه ناخذلك اجازة»
محمد .«لا لا اني اروح اخذها لازم بصمه»
ابويه .«ها وينك مو جمدت»
محمد .«جاي هياتني وصلت»

غلقته و دخلت شارع المستشفى
عقيل .«محمد اترك محاضرتك باجر وروح وي مرتك»
محمد .«باجر عندي الوفد الفرنسي لهذا دخت»
علي .«استاذ براي يتفهم لو طلبت منه»
محمد .«الله كريم .. افتح الباب اليمك»

صعد ابويه و رجعنه للسكن
سارة تريد تطلع للاسواق
اصلا عرفت مرح تكعد 😩
طفله كل مسؤولية ما عدها
كملنه الطريق للبيت
نزلوا و رحت للكراج خليت السيارة
المهم دخلت و شفتها بالغرفه و بعدها ع الغدة طنكرت
و صياحها جان مفاجأ !!؟
كل هذا لان مطلعت من الغرفه !!

صيحت و شمرت لحد ما سكنت بيدي
هدئتها بجت بحضني !
سمعتها حجت بهمس انه رؤيتها ضعيفه وهنا طار عقلي يعني تعرف ما لازم تعصب و تبجي
تعبتني والله تعبتني
منو هيج يصير بيه يعني
كل مسؤولية ما عدها
صوجي خطبت وي دراستي

هدئتها و طلعت من الغرفه
احسان و علي و عقيل كاعدين بالصاله
وأبويه يروح يجي يتمشى
شافني طلعت اشرلي اكعد و كعد كدامي

ابويه .«ليش تعاركها مو طلبت تكون هادئ»
محمد .«يابه تعبان اجل رزالتك»
احسان .«محمد دخلها تحت إشراف طبي احسن»
محمد. «لا هنا يمي احسن»
علي .«صعبه عليك ، دراستك»

نظرتلهم واحد واحد .. عقيل ماخذ وضعيه كل جمعه انه ما يدخل رأسا
ركزت وياه .«وانت رايك شنو»
عقيل .«اعرف اللي دتفكر بيه بس احسبها عدل اذا ما لكيت غير حل ، نفذ»
احسان .«ادرس و اترك مرتك وي ابوك تتعالج»
ابويه .«لازم يتواجد محمد لانه زوجها»

علي .«سؤال رغم مالي دخل .. محمد اهلها وين»
محمد .«مرتي هي ومحسوبه عليه اهلها شكو»
عقيل .«منطقيا هي بعدها مو مرتك .. لازم اهلها إلي يركضون وياها هالفترة انت خطيبها مو اكثر»
احسان .«وهذا رأيي»
ابويه .«بس سارة بتنه هم»

سمعت واحد واحد يحجي بكيفه
واحد واحد اعترض على شي
تركتهم و دخلت غرفتي بدلت و طلعت من الشقه
ارد اكعد وحدي بدون اي احد
نزلت للموقف اخذت السيارة
شغلتها و انفتحت الباب ركب علي
محمد .«ارجع ارد ابقى وحدي»
علي .«جاي وياك لا تخاف مرح احجي»
محمد .«كلمه وحدة انزلك بالطريق»
علي .«مثل متريد»

حركت و طلعت من المنطقه
شوارع تقريبا فارغه لان ساعه قريب الـ11
بقيت ادخل منا و منا لحد ما وكفت يم النهر
نزلت من السيارة أتمشى
يستحيل اتركها او افصخ الخطوبه حت اكمل دراستي
و صعب اترك دراستي لان تعبت بيها
اشهر اني اراجع لحد ما حصلت البعثة
و سنه ادرس و اتعب حت احصل اعلى الدرجات
و تعبت لحد ما طلعت مصاريفي
و تعبت لحد ما جذبت مشاعر سارة الي
عانيت لحد ما ملكت گلبها
كلشي هسه معاكس
كل هالتعب واكف ضد بعضه
دراستي و مستقبلي
و مرتي البنيه التمنيتها و حبيتها
اخ من تهورها لو مماذيه نفسها جان هسه احنه بخير
التفتت لعلي نازل من السيارة و متكي عليها

محمد .«كله صعب وين التفت مسدود»
علي .«اخذ الأهم والباقي ينحل»
محمد .«دراستي و مرتي منو السهل التضحيه بيه»
علي .«صوغها بصورة أصح ، حبك و دراستك»
محمد .«علي لو جنت انت شنو تصرفك»
علي .«لو اني واصل بهالمرحله بدراستي اضحي بكلشي في سبيل اكمل .. بس لو واصل بهالعمق بمشاعري لدرجه اتشتت ، اترك كلشي في سبيل البنيه العشقتها»

محمد .«وكأنك حليت المعضله»
علي .«قدم على تأجيل الدراسه لـ3 اشهر ، كمل امورك و ارجع .. محمد هسه انت استاذ بالجامعه يعني الك افضليه استعين بأستاذ براي خل يسهلها الك»

محمد .«تدري بدت تضعف عدها الرؤيه .. لان تأخرنه عليها .. و هسه بدت عندي المحاضرات المكثفة ، شايف شون مرحله واصل»

علي .«لو كملت دراستك و مقابلها خسرت مرتك ساعتها رح تكون شهادتك هي والماكو سوة
فكر محمد فكر زين لو أتركها للي يحافظ عليها»

حجاها و صعد السيارة !
اتركها للي يحافظ عليها !!!
يعني مثلا احمد يحصلها ؟؟؟
شيحجي هذا سارة مالتي و بس
سارة رح تكون الي بعافيتها
ماكو اهم من انه ارجعها مثل ما كانت

ركبت السيارة و رجعنه بصمت دائم
علي يدخن بهدوء و اني اشد اعصابي بهدوء
اتعارك بداخلي بصمت تام
وصلنه ركنت السيارة و صعدنه للشقه
دخلت احسان و عقيل كاعدين بالصاله يدرسون
تركت مفتاح السيارة بالمطبخ و دخلت غرفتي
شفتها كاعدة بس باقيه بفراشها
بدلت و رحت يمها مددت و اخذتها لحضني

محمد .«تشوفيني لو بعدها الرؤيه ضباب»
سارة .«لا اشوفك زين بس اكو نغزات براسي»
محمد .«هاي لأن صيحتي و بجيتي»
سارة .«اطلب شي»
محمد .«همم كولي»
سارة .«اخذني لكنيسه ، اريد اشوفها قبل لا افقد بعد»
محمد .«ما تفقدين واني موجود ماشي»
سارة .«وين رحت طلعت انت ماكو»
محمد .«رحت افتريت شوي»

حضنتني حيل و اخذت نفس مني
سارة .«تدري خفت بعد ما شوفك»
محمد .«يلا نامي باجر نروح طبيب»
سارة .«لا اروح وي عمي انت عندك دوام»
محمد .«سارة رح اترك اني الدراسه .....

انتهى 😞
حسيت الاحداث جامدة
و صعوبه احس بوصف معاناة محمد
جد هالفترة احسها صعبه عليه
يعني واحد من ينحط بين نارين كلش صعب
حلمه و حب حياته
دراسته و مرته !!
من عرفت رح يترك نبهرت جديا
اتمنى يكون قرارة صائب و ما يندم
ولو ماكو احسن من خطوته هاي

رأيكم بأحداث البارت ككل!!!!!

البارت بدون تدقيق هسه يلا كملته
الجاي يطول فد يومين لان دوامي مسائي وكوة يلا دا الحگ 💔

لا تنسون الفوت 👇
الكاتبه : اسراء الخزرجي💜