رواية احببتك انت الفصل التاسع عشر 19 - بقلم ESRA'

#احببتك_انت
#جيانا .
.
.
.
"تلكَ اللَّهفَة الَتي تَراها في عينيّ كُلَّما رأيتَني هيَ الشيءُ الوَحيد الَّذي أعلمُ أننّي لن أتَخطَّاه".☁️
.
.
محمد :
تعبتني هاليومين كلش لان اتعامل وي طفله مو مرة كبيرة عمرها 22 سنه أبد
جبرتها على العلاج واني احس انه قوتي انتهت وياها
مو هي اللي دتتعذب لا والله
اني الاتعذب اضعافها ولازم اسيطر على روحي

كامت تدعي على نفسها و فقدت على شفايفها
هم سكتتها و هم رويت نفسي شوي
يمكن قسيت عليها زايد بس مهمني
احس دا افقدها و خايف لا تبقى تفكر انه اذا تموت نرتاح و ترجع تاذي نفسها من جديد
حت ادفنها بيدي هالمرة خلصت طاقتي بعد
مبيه اقاوم و ارجع اسندها من جديد لو عادتها

طلعت من يمها واني دمعتي بعيني
آخر عمري تنزل منوراها
تفاجأت عمتي مليكه متكيه على محجر الدرج كدام غرفتي و اكيد سمعت كلامنه لأن عالي
درت وجهي عنها ورحت للحمام غسلته
طلعت نطتني منشفه نشفت

كعدت بهول الفوك و اني هم كعدت يمها
اعرفها تريد تحجي شي

عمتي مليكه .«شنو سمعت هسه اشرحلي عمه»
محمد .«عمتي كل السمعتيه ماريد بشري يعرف بيه حت امي»
عمتي ملكيه .«تدلل اعتبرة صار»
محمد .«عمه اليوم من طلعت ، سارة سوت شي»
ع.مليكه .«لا بعد عمتك اصلا هادئه كلش
كمل المجلس و لملمته هي و مرت اخوك
وراها كعدت يمنه بس ما تعشت مقبلت
امك كالت تنتظرك تاكلون سوة .. صعدت حت احطلكم اكل و سمعت كلامك ، عمه شنو ادمان فهمني»

محمد .«شحجي عمه ، خليها بكلبي احسن
بس من اطلع ماريد تتركوها وحدها او تقرب على علاج او شي فدوة .. انشالله بس يخلص المجلس مالكم نرجع حت تبقى كدام عيني»

ع.مليكه .«شوف روح عمتك .. لا تحجي
بس اخذها بسياسه اذا ادمانها قوي .. خففه لا تمنعه مرة وحدة تتعب انت و هي تبقى هيج
خففه الها و اكسبها الك و فهمها الغلط وين
ما تذكر نورجمان شون توفت من جدك كطع عنها مهدئاتها وبقت بالبجي و الونين لا تغلط انت هم»

فرت راسي بكلامها .. نسيت نورجمان
نورجمان مرت جدي الثانيه نطوها اله هديه
و لان جدي جان هاملها و كله وي جدتي
ادمنت المهدئات ومن جدي عرف
منعه عنها مرة وحدة
و مطولت شهر و توفت بسبب تركها المفاجأ

بهيج حاله شنو مثلا لازم مركز تأهيل يعني!!
وين عدنه هنا بالعراق مراكز لهيج شي!

نزلت عمه جوة يمهم و اني رجعت لغرفتي
شفتها نايمه و بحجابها و بلا غطه
حت من اكول انه متزوج طفله محد يلومني
فتحت شالها و غطيتها
مددت يمها و سحبتها لحضني
حسيت عليها خلت راسها بصدري و شدت ايدها عليه

بست راسها و نمت
صبحت الصبح على التلفون
لازم اطفيه بعد حت انام مثل الاوادم
لا هناك مرتاح و لا هنا
ادري اكو واحد يتصل من صباحيات الله خير

محمد .«خير شتريد من الصبح ولك»
اكرم .«بربك هيج اللي يرد»
محمد .«ولك سكط هسه يلا تذكرتني»
اكرم .«خلفالله عليك هاي و بسببك تأجل عرسي»
محمد .«واني شكو»
اكرم .«منو عاند ما نزل لأهله ابويه»
محمد .«مخابر تتعارك و ما ادري»
اكرم ّ«مخابر اشوف مرتي وين شنو طرطور تطلع وما ادري عنها خبر»
محمد .«ليش منطتك علم طالعه وياي»
اكرم .«كالت بس ما كالت تبات»
محمد .«لا تبات و باجر هم تبات»
اكرم .«انزلي يلا وصلت بيت جدك»
محمد .«شعندك ولك جاي مرتك و ما تنزل»
اكرم .«آنه بتليت بيكم والله .. محمد انزل عاد»
محمد .«نازل ، يلا زين جيت حت اخذك وياي مكان»
اكرم .«خل اشوف مرتي اول بالله قتلتني»
محمد. «😒امشي حباب نازلك»

سديته و كمت على كيف حت ما تكعد
سحبت نفسي منها و غطيتها عدل
نايمه نومه للجنين و وجهه بصدري خالته
الليل كله حاس على انفاسها مدري شون نايم
بدلت و طلعت غسلت و صليت
شلت غراضي و نزلت
لازم أسال على مركز هنا

نزلت امي كاعدة و عمتي سميه
محمد .«صباح الخير» بست راس امي
امي .«هلا بهالصباح حبيبي»
عمتي ملكيه .«هلا عمه»
محمد .«اكولج يمه طالع بشغله وي اكرم
ب9 كعدي سارة نطيها علاجها و خل اسماء تخليلها مغذي ماشي»
امي .«صار يمه ، رجل اختك شعجب جاي»
محمد .«شغله عدنه ، يلا سلام»

احاجيها و اشرب جاي
كملت و طلعتله ركض اعرف تأخرت
زين جاي بسيارته مبيه اسوق

تسالمنه و ركبت وياه و طلبت نروح لشارع السعدي هنا بالبصرة
ما اندله صراحه لان مواصل هناك 
هو هم اصلا مو منا و نلاصت علينه
نسأل ونمشي لحد ما واحد دلانه على مركز
هم حولنه الطريق و رحنه و أكرم يسأل شعندي بيه

وصلت طلع عيادة مو مركز
بس مو مشكله نزلت و دخلنه
سألت وين الكه طبيب استشاري
دلتنه الرسبشن و رحتله
لحد ما اجه سرانه دخلت

محمد .«سلام عليكم دكتور»
الدكتور .«وعليكم السلام والرحمة تفضل»
محمد .«عفوا دكتور عندي زوجتي اجت فترة شي سنتين مواضبه على اخذ مهدئات بدتها من الفاليوم الى حد ما وصلت للورازيبام
وهسه بعد ما عرفت و منعتها دتنهار و تريد تاخذ منهن ، هنا ك مركز تأهيل شنو الخطه انه اخلصها من هالشي اريد انهي ادمانها»

اخذ ثواني يفكر و طلع ورقه يدون بيها
د .«شكد عمرها »
محمد .«22 سنه»
د .«بعدها صغيرة»
محمد .«ههه اي بعدها»
د .«من شوكت بدت تدمن»
محمد .«حسب كلام اهلها قبل شي سنتين بسبب الدراسه و الضغوط و ابتدت بالفاليوم»
د .«زين اي نوع بعدة قبل اللورا»
محمد .«ما اعرف بالضبط هاي الفترة ماجانت زوجتي»
د .«همممم ، زين صار شكد مانعه عنها»
محمد .«يطلع شي اسبوعين منعوه عنها بالمستشفى و وراها أني مانعها»
د .«اخر مرة تناولته»
محمد .«قبل يومين»
د .«السبب ليش نطيتها»
محمد .«اخذته بدون علمي»
د .«جيد ، شوف استاذ محمد .. احنه عدنه كخطه اساسيه هي نمنع بالتدريج بس اللي واصلته هي لورازيبام هذا منكدر نجزء منه
لهذا اصلا نغيرة كله وناخذ مهدئ عادي بس مهم هي تعرف هذا مهدئ لان فسلجه العقل مبرمجه تلقائيا على انه اخذت مهدئ ورح اهدئ حت لو ما كان هو مهدئ فعليا ورح تصادف هيج حوادث»

محمد .«صارت دكتور صار هالشي ، والدي دكتور جراح و هو اشرف عليها فترة .. جان يخليلها مغذي عادي بس يفهمها هو مهدئ وهي تهدئ و تصدك انه نطيناها»

د .«زين بهالحاله شوف شنسوي ، علاجها انت مسؤول عنه مو؟»
محمد .«اي نعم اني انطياها»
د .«كلش جيد .. تنطيها العلاج على اتم صورة
و وياهن تحط براسيتول او بندول حت مبيه اضرار و تفهمها على هذا مهدئ .. شوف ان استجابت خير على خير ، ان مقنعت ساعتها نتبع خطه بديله»

محمد .«زين دكتور شكد تطول و تتخلص من هالشي»
د .«حسب إرادتها ، اهمشي المحيط بيها
و طالما زوجتك تكون فراح يكون الجزء الاكبر على عاتقك»
محمد .«افهمك لهذا سألت لأني استاذ جامعي و خارج العراق ارد اعرف شكد حت ارتب اموري»
د .«اذا تكدر اخذها وياك تغيير البيئه يساعدها»

محمد .«الله كريم ، تسلم دكتور انشالله يومين و امرلك نشوف الجديد شنو»
د .«اهلا وسهلا انشالله الشفاء العاجل»

طلعت منه و اكرم يسأل و يلح شنو سبب تواجدي هنا و أني على أعصابي ساكت
ردينه لبيت جدي و دزيتله مرته حت يكف عني
صعدت رأسا لسارة شفتها بعدها نايمه
شنو ساعه عشرة ونص ليش مكعدت
صحت امي .«يممه وينج»
صعدتلي .«ها شوكت رجعت»
محمد .«هسه ، شو سارة نايمه اخذت علاجها»
امي .«لا مقبلت و بقت تصيح وتعيط و تضغط على راسها حيل ، تالي فرح ضربتها ابرة و هدئت و نامت»
محمد .«استغفر الله شكو ضربتوها ابرة يمه
جان خابرتوني ابويه مو منع عنها اي مسكنات»

تركتها و دخلت كعدت مقابيلها اكعدها
كوة يلا حست عليه و كعدت
كومتها كعدتها عدل عيونها غايرة

محمد .«يلا باباتي كومي صحصحي حت ناكل»
سارة .«نعسانه محمد»
محمد .«ميخالف ناكل وناخذ دوة ننام ، انيمج بحضني اليوم وين لاكيتها بعد»
سارة .«هه ماشي كومني مبيه طاقه»
محمد بصوت ناصي .«طبعا من السم الاخذتيه»

كومتها و اخذتها للحمام
غسلتلها وجها و ردينه للغرفة
اكلت شوي و اخذت علاجها بدون عناد
قنعتها انه تنزل جوة عيب تبقى كله هنا
لحد ما قنعت رأسا غيرت ملابسها و نزلتها
وصيت عليها اسماء و طلعت وي عباس نجيب خبز لجدتي موصيه علمود المجلس تسوي خبز العباس .. 200 خبزة واني اخذت فوگهن 50 نذرت مريتي
اخذناهن و طلعنه للسوك هم جبنه جبن عرب المالح
ردينه للبيت شفت سارتي كاعدة وي البنات تنظف خضرة و ضحكتها بوجها مرسومه

شتهيت ابوسها على هالضحكه هاي
نطيتهم الخبز و كتلها لجدة ضفت عليهن هم
امي شالت اللبن عليها و سارة طلعت دازة حليب
وكفت وياهم افلس خضرة حت ابقى يمها
اجو مرتضى و عباس هم كعدوا كلهم
صارت كعدتنه تحفه
اجت عمه سميه اخذتلنه صورة كلنه

واحنه كاعدين دخلوا رنا و حماتها
البنات كلهن بحجابهن راحت صاحت رزاق
دخل و وياه كرار شاف كعدتنه و ماتو ضحك

رزاق .«بالله هاذ شغلكم»
محمد .«تعال اكعد وشوف شون فاتتك»
كرار .«شو سوولي مجال ، جدة آنه مو حفيدج يعني تقبلين أشارك»
جدتي .«ههه هله بيك يمه اطلب مراد»
رنا .«سوولي مكان الي هم اريد اطلب مراد»
كرار .«شو كومي فرح خل اكعد»
رزاق .«ههههه علينه»
محمد .«عباله ما نعرف الفلم شنو»
رنا .«خاله شنو جبتو لحد الان»
عمه مليكه .«اللبن و الخبز و الحليب جاهزين
بعد التمن و القيمه هم يكملن و نصبهن شنو ينضاف بعد يبقى على النذور»

رزاق .«خاله ام مرتجى اني اجيب حلويات شوفي شنو تردون وكوليلي»
رنا .«اي عفيه مشتهيتهن 😂»
رزاق .«ما شبعتي حلا انتي وج تسمنين»
سارة .«هو لابنك غير هو السبب»
رنا .«اي والله بس حبلت خربت عاداتي»
غيداء .«صح ملاحظه اشياء متحبيها صرتي تطلبيها»
محمد .«ادعولي يوم اللي اغير عادات مرتي وارتاح»

ضربتني على متني و خجلت
محمد .«هسه كلت اخليها حامل لا ما كلت»
سارة .«راح اموتك والله»
امي .«ولك محمد عوفها لا تخجلها»
رزاق .«هسه مكيف بس خل يصير هه تندم عمرك كله»
رنا .«هااا ندمت مو ، شوف منو ترجع اليوم»
كرار .«حيل تستاهل ، اني وياج رنو لا تخافين»
فرح .«وانت شكو تحط راسك»
مرتجى بصوت ناصي .«لا تفضحين نفسج يا غبيه»

ضحكنه عليها شافها كرار نقهرت
كرار .«جدة اني مو حفيدج ؟»
جدتي .«اي يمه انت و رزاق و اياد و علي كلكم احفادي»
كرار .«زين جدة اذا طلبت طلب تسهليه الي»
محمد .«ههه رح يفضحج فرح»
كرار .«معليك ولك ، ها جدة»
جدتي .«اعرفنك شتريد يمه هي إلك من زمان»

عمتي سميه .«شنهي الإله يمه»
جدتي .«فرح مسمايه بإسم كرار من ولادتها
و من توفت بلقيس و رجلها كالو إبراهيم ياخذها
بس إبراهيم طلع عاشك و اخذ العشكها
وهيج بقت هالفرحه لهالوليد هو خيالها الوحيد»

فرح .«يمه إبراهيم شنو جدة»
كرار .«ما سمعتي الأخير اني هو خيّالج الوحيد
يعني هسه فرح مرتي و الكل درى يخلص محرم و صفر و نسوي كلشي رسمي»

محمد .«ارتاحيت هسه يعني»
كرار .«لا وين ارتاح غير احط الحلقه حت بعد مبيها رجعه»
رنا .«اني مو كتلك طالما مرت اخوك عايشه معناها لا تخاف»
مرام ّ«وهسه عاد انتي الخطبتيها»
رنا .«مو هو لأن صرت چنتهم هو اخذها»
رزاق يهمسلها .«سنتين حب ولج يا انتي»

رقيه .«صار كم عرس عدنه ، فرح و غيداء و سارة»
محمد .«لا وين عرسنا مطول»
جدتي .«ليش يمه مو كلت بفرحه الزهرة»
محمد .«اي جدة بس بصادف مناقشه مالتي و صعب اخذ اجازة»
رزاق .«اخذها و روح لا عرس و لا بطيخ 😂»
محمد .«هو أخذها وياي»
غيداء .«اجي وياكم»
سارة .«مو رح تعرسين انتي»
محمد .«غبيه»

خلصنه الخضرة خلال سوالفنه
واخذتها عمتي تغسلها و تنشفها
لملمن البنات كعدتنه و كل واحد راح مكان
اني اخذتها و صعدت غرفتي
و رزاق و اخوه راحو
و الولد هم طلعوا

اول ما دخلت الغرفه سحبتها بستها
مو حيل مثل البارحه بس طلعت ضيمي بشفتها

محمد .«هاي لأن نزلتي وارتاحيتي
شفتي شون نطيتج مكافئه»
سارة .«ههه مشكور بس اذيتني متدري يعني»
محمد .«يلا تعاي ناخذ علاجنه حت تطيب»

فتحت العلاكه طلعتلها
رفضت رفعتلها قرص براسيتول .«هذا مهدئ تاخذين ذني انطيج متاخذين تحلمين تشمين ريحته»
سارة .«لا جيب اخذهن»

اخذتهن و مشت عليها عادي ما حست بشي
بدلت و طلعتلي ملابس هم بدلت
مددت بفراشي اخذ غفيه قبل لا يبلشون
هي هم طفت الضوة واجت مددت يمي

سارة .«محمد»
محمد .«همممم»
سارة .«تدري ورة ما اذيت نفسي ندمت بسببك
خفت انه شون تنام بعد اذا اموت اني»
محمد .«جان لحكتج رأسا»
سارة .«سمالله عليك ، جد مدري شون فكرت»
محمد .«انسي انتهى وراح بعد»
سارة .«بعدك تحبني مو»
محمد .«حت لو اقسى عليج بس ماكرهج»
سارة .«اني احبك كلش لهذا اخاف تتغير عليه»!
محمد .«لا تعاندين ما اتغير»
سارة .«انت تخوف من تعصب كلش اخاف منك»
محمد .«ههه كافي باباتي نامي»
سارة .«تتمنى تصير اب مو»
محمد .«ليش السؤال»
سارة .«لان دائما تكولي باباتي»
محمد .«لان انتي بنيتي شعندي غيرج»
سارة .«كلها عل. بعضها اكبر مني 6 سنوات وين بنيتك»
محمد .«سبعه ولج»
سارة .«احبك باباتي»

خربطتني من كالتها هيج وهي تحط راسها بركبتي
مبقت عندي عقل بعد نيمتها و صرت فوكها
اخذتها بقبله شغوفه بس مشاعر الحب بيها
من توترها و خوفها شدت على أيدي نبهتني
بعدت عنها و حضنتها و نمت ماريد احجي لا اكمل عليها ساعتها ما يفيدنه شي

_________ سارة تروي __________

شكد ما يبعد عني بس من يرجع
يجدد مشاعرة بداخلي اضعاف قبل
شون تحولت مشاعري من كره للحب ما اعرف
بس الاعرفه انه اذا اكو شي ادمنت عليه
فهو هذا الإنسان اللي يمي
يمكن لو اريد اتعالج منه ما الكه علاج
الادمان الوحيد هو اللي ماله علاج بالكون

نام بعد ما فقد عليه
بقيت اراقب انفاسه
اشتمهن و ارتوي بقربه مني و دفو حضنه
اتمنى انه يكون هو اول حب بحياتي
جان هذا اللي اني بيه كله ماكو
جان عشت مثل كل وحدة تحب و تطير بالحب
جان هذا وجعي كله مموجود
بست راحه ايدة بهدوء و حضنتها
غفيت وياه واني افكر بيه بس

حسيت على عمتي تصيح عليه
فتحت عيني نايمه بحضنه
التفتت عمه واكفه .«ها عمه»
عمتي ّ«كومي يمه كعدي محمد يروح بدت تجي العالم»
سارة .«اي عمه هسه اكعدة»

طلعت و سدت الباب واني ميته خجل شافتنه هيج نايمين .. كعدته و معاند ميقبل يكوم
كوبت وجهه بيدي و بسته حييل 💏
ابتسم و عضني خفيف من شفتي

سارة .«شبيك تعض ليش تخليني امنعك بعد»
محمد .«جوعان وشفتهن يروون جوعي»
سارة .«هسه تورم و تفضحني»
محمد .«احبهن شسوي»
سارة .«كوم حت عمتي شافتني نايمه بحضنك فشله»
محمد .«شوكت تستوعبين انتي مرتي»
سارة .«اعرف بس لا تنسه اني خطيبتك»
محمد .«لا مرتي لان رجعه لاهلج ماكو بعد .. كتله لعمي انتي زوجتي شرع و قانون يعني شنو»
سارة .«والله لو مفكر تحرمني من العرس اعرس على راسك و اموتك»
محمد .«لا اسويلج عرس لا تخافين»
سارة .«ديالله لعد كوم حت تطلع»
محمد .«طلعيلي ملابس بين ما اروح للحمام»

كام طلع من الغرفه و حضرتله ملابس
طلعت الي هم بدلت لبست ثوب اسود كلوش
حلو و مرتب و بسيط .. وياه طلعت شال
دخل محمد هم بدل و ضميت ملابسه
وكف رتب نفسه و تعطر
خليت كحل رسمت عيوني

محمد .«موجوعه ؟ راح اطلع اطول يلا ارجع ترة»
سارة ّ«لا اذا صارلي شي اخابرك»
محمد .«ماشي حبيبي يلا ننزل»

طلعت اخذتله طريق و نزل بسرعه
طلع راح لبيت عمه مليكه يم الولد
كعدت اني وي البنات يصبون تمن و قيمه
كملنه تجهيزهن بسرعه و اجت المله و بدة المجلس
حمدلله ما صارلي شي لحد الآن
ضحكنه هواي على رنا بيست بالحلويات
انوب خفنه يصعد عدها السكر لان صدك هواي اكلت
بطنها بارز شوي مندري من الحمل لو من الاكل
كملت المله و بدت نعي و وراها 4 لطميات
3 ذبن نذور واني رحت نطيتها خير الامام و طلبت قصيدة للإمام الكاظم عليه السلام
رنا طلبت للمحسن يعني كأنما للزهراء عليها السلام .. و الشي الرهبنه هو من بدت القصيدة ونعت على المحسن .. عطت ريحه بخور بالمكان و المل سأل منو شغل بخور لان المله يتحسس صدرها منه
و المفاجأنه هو من كلنه محد مشغل المله بجت و كالت صاحبه النذر نقبل نذرها وام الحسن باركته بحضورها
رنا بجت هواي سودة عليه وهي حاضنه بطنها
مفهمت شنو يعني بس العرفته انه صار حضور بالمجلس
دخيلج سيدتي و مولاتي كوميها بالسلامه و قري عينها بطفلها
العالم تبجي و تلطم ، اول مرة احضر هيج مجلس

المجلس طول 3 ساعات و نص
لحد ما خلص اخذوا تبرك منه
اشوف اكثر من مرة تنصي على كاع المجلس و تضربها و تحجي بينها و بين نفسها
سألت عمتي كالت هاي ياخذون نذر من المجلس
ومن يتحقق انشالله يجيبون نذرهم
هذا الشي يدل على انه صاحب المجلس بيته مبارك

وزعنه زاد الإمام و اني وياهم
حسيت انه بيتي و الكل وياي وعينهم عليه
عمتي هم كلشوي تجي تسأل اذا متاذيه
حمدلله خلص المجلس و كعدت جدة هي و كم مرة من البقن و احنه البنات و عمات محمد و نسوان عمومته كل احنه كعدنه بالمجلس وجدة قرت نعي يبجي كلنه بجينه
قرته على روح بتها امها لرنا وهنا هي خطيه نهارت
كثر ما بچتنه شكل عندي الوجع و بدة يزيد
تجاهلته لحد ما هدئنه رنا و راحن النسوان
راسا عمتي اتصلت بمحمد انه يكول لرزاق يجي
ماطول نص ساعه واجه
دخل للمجلس محد اكو و عمتي اخذتله رنا
محمد اجه شاف عيوني باجيه
راسا اخذني لفوك نطاني علاجي
شوي سكنت روحي حمدلله و بدة يتبدد الالم

نزلنه لملمت وياهم و عمتي صاحت بيه اصعد
رجعت فوك شوي و اجت رنا
اخذت غراضها و لفت حجابها تروح لبيتها بعد
هم خطيه تعبت و هم حامل الله يساعدها
سلمت و نزلت رحت لغرفه محمد دخلت بدلت ملابسي ارد انام بلكي يروح الوجع كله
خف بس ما راح و ماريد افكر بالمهدئ

__________ رنا تروي ___________

الصار بالمجلس رهبني كلش
من كالت المله انه صار حضور
حسيت دفو صار بداخلي و حركه
بعدني مداخله الرابع يستحيل يتحرك هسه
حضنت بطني و على فد بجيه
اريد اهدئ ماكو و جسمي يرجف
شكرا سيدتي و مولاتي على رد النذر
اللهم لك الحمد والشكر دائما و ابدا

لحد ما خلص المجلس واني على نار
اريط رزاق ومنين احصله هسه
جمعتنه جدتي و صديقاتها هم موجودات
و ذبت قصيدة على روح مامه الله يرحمها
حسيت شكد محتاجتها هسه
محتاجه تباركلي ابني و تشوف شنو صار
واليوم الزهرة فدوة لاسمها بارت ابني
صدك اليتيم الله ما ينساه و رسلي اعظم امرأة

يمه هسه مرتاحه و راضيه على بنتج
يمه ابني مبارك و عندة كرامه وهو بعدة طفل
يمه وينج اريدج تكولين هاي بنتي و تفتخرين بيه
واني افكر انهاريت بجي هم القصيدة وهم افكر بامي
خاله مها اتصلت طلبت رزاق يجي
و حمدلله ما طول عليه و اجه
دخلت للمجلس وي خالتي
اول ما شفته ركضت عليه حضنته و ابجي

رنا .«رزاق تذكر من نذرت ابنه من الزهراء عليها السلام ، رزاق ام الحسن باركت ابنه اليوم و ردتلنه النذر .. رزاق اني هسه مو يتيمه مو هسه امي فرحانتلي»

هو يسمعني ويبجي وياي و خالتي تبجي
بقه يردذ حمدلله حمدلله حمدلله وهو يشد عليه الحضن
ابتعدت عنه مسح دموعي و مسحت دموعه
التقتت شفت خالاتي هم داخلات و جدتي
و يبجون ويانه عاد رزاق حجالهم شنو سالفه النذر
و جدتي بجت اكثر لأن مجانت تدري
تعبت من البجي و عيوني احسها ورمت
كتله اروح وياك و صعدت جهزت غراضي
بلسم تبقى وي فرح بس اني ارجع
كملت و طلعت شفت سارة كاعدة بهول الفوك

كعدت يمها .«سارة اريد اطلب طلب»
سارة .«كولي»
رنا ّ«اريد تسامحيني ، اعرف سوايتي بلندن اذتج بس جنت افكر غلط وبس اريد ااذي محمد»
سارة .«لا تهتمين رنا ، لو اني بمكانج هم هيج اسوي»
رنا .«اريد تسامحيني .. حت ارتاح»
سارة .«مسامحه حياتي ، اهمشي كومي بالسلامة خل نشوف هذا العنفوص الصغيرون»
رنا ّ«ههه انشالله ، يلا اروح رزاق ينتظرني»
سارة .«الله وياج»

نزلت سلمت على البنات و خالاتي و طلعت
طول الطريق رزاق كلشوي يبوس ايدي و يحمد الله
وصلنه البيت و ححيت لعمتي و هم بجت وياي
الولد ما صدكوا بس بعدين كالو مو بعيدة عن اهل البيت و كراماتهم
صعدت بدلت و سبحت بسرعه ارد انام
طلعت رزاق مبدل و كاعد
رحت كعدت يمه اخذ المنشفه نشف شعري

رنا .«رزاق اكو شي محجيته لاحد»
رزاق .«شنو هو؟»
رنا .«من اجت ريحه البخور والمله كالت صار حضور .. رزاق احلف بابني حسيته تحرك
شون تحرك واني بعدني مداخله الرابع ؟؟
محجيت خفت محد يصدك بس صدكني حسيت بيه بداخلي تحرك والله»

ابجي و احجي وهو حضني و ايدة على بطني
رزاق .«اصدكج حبيبي اصدكج ، ابنه مبارك من هو وبعدة بداخلج .. شوفي رنو لا تحجي لأحد بعد خاف تصيبج عين»
رنا .«اي اني هم اخاف»
رزاق .«يلا كومي ننام مشتاقلج»
رنا .«ما نام عاقل تعبانه اليوم بجيت لمن هلكت»
رزاق .«هههه دتعاي لحضني اشو»

مدد و نمت بحضنه و الاحداث تتجدد براسي
شي ممتوقعته و رهبته لسه ممتخطيتها ابد
حسيت خله ايدة بطني حضنه اني و ابنه و نام

___________ محمد يروي __________

حجولنه الموقف الصار اليوم
اول مرة اسمع انه يصير هيج شي
فدوة لكرامات اهل البيت
يا زهراء اطلب سارة منج
و اتمنى ما ترديني بحق جدي رسول الله

بعد ما تعشينه و صعدت عرفت نايمه
شعجب نامت من وقت حت ما انتظرتني
دخلت الغرفه و هنا الكارثه اللي منتظرة
عرفت يستحيل يمضي اليوم بسلام و هدوء
الغرفه كلها منكوثه و مكسرتها و جنطه الملابس مبعثرة!

محمد .«سااارة» صحت بيها
انتبهت انه نكمشت على نفسها
جريت الغطه من عليها و انتبهت على دموعها
محمد .«شو كومي اشوف»
سارة .«ماريدك وخر منا»
محمد .«كووومي دا اكول »
سارة .«لا تصيح على راسي لا تصيح لا تصيح»
كامت تعيط و تشمر بالفراش
كعدت يمها و جريتها قيدت حركتها

محمد .«ششش بلا صياح ، صوتج ما سمعه ماشي»
نادت براسها اي و حليتها
محمد .«فهميني شنو هالمنظر هذا»
اشرتلها على الغرفه وهي تباوع وياي عبالك مو هي اللي مسويتهن اصلا

سارة .«ما ادري شون صارت هيج»
محمد .«هاا ابوي اجه خربط ورجع لبغداد مو»
سارة .«يمكن بس مو اني سويت»
محمد .«هه كومي ولج كومي نعزلها لا يجون و عبالهم باسطج ولو تستاهلين بسطه»
سارة .«ما كوم اذا ما تنطيني مهدئاتي .. محمد والله وجع مسيطر عليه فدوة انطيني ولا تعاند»

محمد .«ماشي كومي لملمي و انطيج»
سارة .«وعد»
محمد .«عفيه بيج صارت حت الثقه صفر»
سارة .«مو صفر بس اعرفك ما تقبل»
محمد .«لا يلا انطيج»

كامت و لملمنه الغرفه كلها وهي هم سفطت الهدوم بالجنطه مالنه و رجعت رتبتها
لميت الفراش و عدلته و هي راحت شالت كزاز المرايه و لمته
تعاونه و كله كملناه و كعدت على الفراش كدامي تنتظر انطيها
رحت طلعت ملابس بدلت وهي على اعصابها متحمله
كملت و طويت ملابسي و خليتهن وهي عينها وياي
خليت التلفون على الشحن و طلعت الحاسبه وهي تنتظر
لا لهنا خطيه بعد رحت على علاكه علاجاتها طلعتلها براسيتول و بندول نطيتها
لكفتهن من ايدي اخذتهن و مددت
كاره هذا الوضع احسن انه متتعافه حت لو اصل الدوة مختلف
لو اعتادت على ذني هم يصير ادمان و هيج نرجع للصفر

مددت و اخذتها لحضني نومتها
هدئت أنفاسها و نمت بعدها

صبحنه الصبح متأخرين
كعدت بالعشرة وسارة بعدها بحضني نايمه
احبها من تنام نومه الجنين
بوستها زعجتها مخليتها تنام
حضنتني حيل و خلت راسها بصدري حت ما ازعجها اكثر
كمت ادغدغها ذابت ضحك و تمصرنت بالفراش
لحد ما خلصت نفسها من ايدي تنهت

احلى صباح هو ابديه بيها
محمد .«صباح الحب حبيبي»
سارة .«ههه الله عليك بقيت صباح انت»
محمد .«وين اكو احلى من انه تصبحين عليه»
سارة .«ماكو بس مو هيج موتتني»
محمد .«حقج شو تعاي»

اجت يمي و مددتها بنفس نومتها و غطيتها
محمد .«يلا غمضي حت اكعدج من جديد»
كامت تضحك و غمضت عيونها
مشيت ايدي على وجهه
عيونها و خشمها خدودها شفايفها
و نزلت عليهن اخذتهن ببوسه لطيفه
ذابت بين ايدي و خبلتني عليها

وج اله تجننيني ما تجوزين
بعدت و ثنينه محتاجين انفاسنه
بعدت شعرها ورة اذنها و بقيت انظرلها وهي مغمضه بعدها و تاخذ انفاسها
منظرها قاتل يمنع المقاومه رجعت كملت عليها💏

ندكت علينه الباب ثنينه جفلنه
من انتبهنه على ردة فعلنه طكيناها ضحكه
كمت و سحبتها وياي
طلعنه رحنه للحمام غسلت وجها نطيتها الخاولي تنشف و دخلت اغسل

فرح .«عشاق العصر شوكت تخلصون»
محمد .«هسه لي شوفج يكول محرومه»
فرح .«والله اطا ما اكوله محمد هيج يكولي اصبر عليه»
محمد .«والله اذا ما كول لعمي جواد بس اصبري»
فرح .«يااا محمد شبيك»
محمد .«هههه لا تبسمرين حت ما خبث»
فرح .«سارة شكو حبيتي هذا المخبل»

ههه شمرت عليها الخاولي ّ«ولج لسانج»
سارة .«عوفها محمد ، ولج فرحه لا تحجين على رجلي»
فرح .«😛 يلا نزلوا ريوگ خلينه»
محمد .«نزلي هسه ننزل»
فرح .«لا تطول عمو قاسم اجه»
سارة .«ياا شوكت اجه»
محمد .«ادري بيه عدنه شغله و اجه»

رحنه للغرفه و سارة تسأل تريد تعرف شعندة
محمد .«اجه حت يخطب لابنه يعرف چنته حارمته»
سارة .«صدك تحجي محمد رح تتزوج ثانيه»
محمد .«اي طبعا كتلج أريد عرس»
سارة .«اي عرس علي شكو تدور غيري»
محمد .«ومنو تصيح محمد انتظر»
سارة .«اي انتظر لحد ما يكمل زواجنه»
محمد .«لا اني رجال يريد يعرس بسرعه»
سارة .«والله محمد انت تطلع منا ، احسب جنازتي تطلع وراك .. وحق جدك اسويها»

عافتني و نزلت !!!
شو هاي عجبتها سالفه تهدد بالانتحار
مخبله نجت منها مرة ما تنجي بالثانيه
لبست القميص و طلعت صحتها من فوك

سارة .«لو يحضر حضير ما اصعد»
محمد .«سااارة صعدي دا اكول»
سارة .«والله اكوله لعمي هئ والله اموتك محمد هئ»
محمد .«لج مخبله صعدي لو انزل اموتج»
سارة .«تهدد فوكاها لان اهلك كلهم هنا واني وحدي»

لا هاي قافله ، دخلت كملت تبديل و نزلت
اشوفها كاعدة و دمعتها بعينها تنظرلي نظرة شر

ابويه .«شبيك وي مرتك ولك»
محمد .«زعلت لان كتلها رايح اخطب»
ابويه .«مرتك مريضه شهاللغوه الزايدة»
سارة .«ميت على العرس والله اموت نفسي»
ابويه .«معليج بيه عمو مخبل هذا»
محمد .«اشو اله اخطب اليوم ارد اشوف منو المخبل»
سارة .«والله احرك روحي و تعرف ما خاف»
محمد .«ولللج 😠 فوك اشو يلا كدامي»
امي .«محمد مو هيج يمه ، انت خبلها وانوب صيح»

عمتي سميه .«الولد يريد يزوج شكو تمنعيه»
سارة .«اي حقه بس اول يطلكني ويرجعني لأهلي»
محمد .«كتلج وين اطلكج وانتي تنسين شسوي يعني»
عمتي ملكيه .«ياا محمد وين تطلكها ولك عمه وين تلكه منها بعد»
محمد .«ياا عمه غير اطلكها من تجيب فرخي»

كلهم ضحكوا وهي كامت تبجي و صعدت فوك عصبيه
جدتي .«يمه مريتك مو تعبانه ليش تزيدن عليها»
محمد .«احب غيرتها جدة ، هاي تعاركت لان شاقيتها و كتلها رح اخطب»
امي .«تعرفها تغار ليش هيج تتشاقه»
محمد .«هسه اصعد اراضيها لا تخافين»
ابويه .«لو تبسطك تستاهل»
محمد .«ههههه كوم حجي كوم ورانه شغل»
امي .«اصعد كوللها لا تطلع وتاذي روحها»

صعدت وأني اضحك على خبالها
دخلت الغرفه و اشوف بيدها مكص تريد تكص شعرها
ركضت بسرعه سحبته من ايدها

محمد .«تخبلتي 😠»
سارة .«اي معليك بيه»
محمد .«لا صدك مخبله انتي ، هستوج جنتي بيدي اجي اتزوج عليج شنو ما تفكرين انتي»
سارة .«اي تزوج حت تدخل عليها لان سارة مانعتك»
محمد .«صح سارتي مانعتني بس منعتني لانه تعرف زواجنه مو كامل ولازم تثق انه اني ما اطالب بهيج حاله»
سارة .«الله يخليك لا تتزوج 😭 ارد اعيش يوم واحد طبيعي شبيك يوميه مبجيني يوميه يوميه ما تفكر بيه انت»

حضنتها .«وج كل هذا وما فكر بيج .. لعد شنو الشعل اهلي شعل غير تفكيري بيج وحدج»

شدت عليه و حيل و غمضت
سارة. «لا تعيدها بعد لان صدك اموت هالمرة»
محمد .«ههه تموتين و اتزوج ، ااااخ ولج»

عضتني من صدري الجريديه 
.«لا صدك تخبلتي انتي وج كبري شوي عقلي»
اجت باست العضه .«شوف شون ادللك»
محمد .«سارة ارد اطلع لا تتهورين ماشي»
سارة .«عليك علي رح تخطب»
محمد .«لا باباتي رايح اشوفلج دكتور حت يطيب وجع راسج بسرعه»
سارة .«ماشي»

بستها براسها و نزلت نطيت امي المكص
ضحكت عليها و على خبالها 😂
صعدوا رقيه و مرام يمها حت مو وحدها
طلعنه اني و ابويه رحنه لمركز الؤلؤه
دخلنه اخذنه سرة للطبيب لحد ما اجه طبينه

محمد .«سلام عليكم دكتور سلام»
د.سلام .«اهلا استاذ محمد»
محمد .«اعرفك والدي دكتور قاسم»
د.سلام .«اهلا وسهلا دكتور»
ابويه .«اهلا بيك»
محمد .«اي دكتور سويت اللي اتفقنه عليه و ماشي تمام بس هالشي ما منع حاجتها للمهدئ هم تجيها نوبات و تريدة»
د.سلام .«اي طبيعي هالشي يصير دائما»
ابويه .«عفوا دكتور هي درجه ادمانها يعني صعبه مثلا»
د.سلام .«لا مو كلش لانه مهدئات هاي مو مخدرات حت صعب كلش و انشالله شهر بالقليل و تتخلص منه»
محمد .«زين اكو شغله مراضيتني .. هسه اني انطيها براسيتول و بندول عادي و كلت ما تضرها لهنا تمام ... بس جسمها لو تعود عليهن هم رح نرجع كأنما ممسوين شي»

د.سلام .«شوف استاذ محمد شكد ما تعتاد عليهن هو افضل من اللورا الجانت تاخذة
انت لا تخاف اذا صار شي مفاجأ جيبها عدنه»

ابويه .«حضرتك دكتور و تفهم انه البشر مو تجربه اذا يصير شي والله تعال جيبها غير تنطي حل كامل»
د.سلام .«اسمحلي دكتور احنه هنا عيادة قبل المركز لهذا اني نصحته مع انه مو اختصاصي ، اذا حابيت اخذوها مركز اصلا مختص بهيج حالات»
محمد .«كوم يابه ، اخذها وياي احسن»
د.سلام .«وافضل هيج بالخارج هواي عدهم مراكز لان هناك معروفين بالمخدرات و هذا سمحلهم يفتحون مراكز متخصصه مع ذلك احنه نكدر نعالجها بس بطريقه بطيئه مو مثل الخارج»
محمد .«انشالله تدبر ، مشكور دكتور»

خلينه و طلعنه ديالله بالله حت هذا ما ضبط
محمد .«يابه انت اقنع عمي انه اخذها و اسافر»
ابويه .«محمد ودراستك»
محمد .«بويه هسه مرتي اهم»
ابويه .«اصبرلي يومين اشوف ارتب وضعي و اجي وياك حت انت تدرس و اني اخذها»
محمد .«بويه عمتي اذا صار و طلبت تجي امنعها لان هي السبب و اخذتها لذاك الدكتور»
ابويه .«ليش ما منعتها»
محمد .«جنت مسافر مهنا»
ابويه .«اوف من سكوتك ع الاقل انطيني خبر»
محمد .«بويه مرتي اني مسؤول عنها
بس شدراني هيج رح يسوون من اروح »

رجعت و مجتمعه العائله كلها يحضرون غدة
ابويه ديرجع منعته نتغدة و كلنه نروح وياه احسن
اتصلت بأسامه اشوف اخبار قضيته و هم تطمنت عليه نحلت حمدلله
كعدنه نتغدة كل احنه مسوين دولمه و طرشانه و سمج مشوي مشكلين السفرة بأطيب الموجود

وي ما ها دنگعد اجت رنا و رجلها
رنا .«حمدلله لحكنه جان متت»
غيداء .«رزاق بالله بالبيت هم هيج مفجوعه صايرة»
رزاق .«لا وين بس تشم الريحه ترد اللي بمعدتها»
سارة .«تعاي هنا لحد ما يخلص وحامج😂»
محمد .«خو تجي بيتنه و هم تغير جو وهم تاكل براحتها»
رزاق .«اي و رزاق يروح طبه طوب»
مرتجى .«طبك طوب عادي»
فرح .«لا لا خطيه تعال انت هم وياها»
رزاق .«اي هاي مرت اخوي مو مثل مرتي باعتني»
رنا .«حرف ما حجيت دا اكل و ساكته انتو تتعاركون بوحدكم وكأني رح اقبل»
محمد .«ولك جيب مرتك و تعال مو وعدتني»
سارة .«عود من يجون الكم كولي اجي😀»

كملنه و كمنه سارة سوت الجاي
محمد .«يمه وين اسماء شو ما شفتها»
امي .«امير مصخن و كاعدة يمه»
سارة .«اي سودة عليه بارحه ليل كله يون»
محمد .«شكو ما حجيتن 😠»

طفرت فوك اشوف أمير
دكيت الباب عليها بغرفه فرح .«سومه»
شوي و فتحت الباب عيونها مورمه .«هياتني»
محمد .«شو شبيه حبيب عمه تعبان»
رحت على امير اشوفه مو صخونه عاليه
فتحت حلگه اشوف .«وج هاي مال سنون مو هيج صار من طلع اول سن»
اسماء .«اي جان ابوه يمي هسه وحدي»
محمد .«وعمه شنو لعد خراعه خضرة 😒»

اخذته منها و طلعت رحت لغرفتي
نومته بفراشي بعيد عن عينها بس تبجي فوك راسه
بدلت و عدلت ملابسنه حت نرجع
اجت سارة للغرفه نطيتها ثوب حجاب تبدل
هم خلت ملابسها
قربنه هالفترة زاد وهي اخذت راحتها وياي و امنت اكثر من قبل
فعلا سارة طفله و دتكبر على أيدي
اتمنى انه ابقى محافظ عليها شما يصير

كملت لفه حجابها و اجت يمي كعدت
سارة .«بشنو صافن»
محمد .«افكر بيج»
سارة .«أحبك محمد»
محمد .«احبج باباتي»
سارة .«رح ارجع لأهلي مو!»
محمد .«لا لبيتنه اكمل جوازج و اخذج وياي لندن و ابويه ويانه هم»
سارة .«احضني حيل احب دفو حضنك»
محمد .«ومن تصعد عندي»
سارة .«هههه متسوي شي»
محمد .«شو كومي ننزل يلا .. اخذي امير لفيه زين بطانيته و نزلي»

راحت عليه تشيله و قفلت كنتوري واخذت الجنطه
سارة .«اريد من هذا»
محمد .«شنو هذا»
سارة .«امير ، اريد منه»
محمد .«يصير انطيج منه و هسه طلعي الشيطان بدة يطافر كدامي»
سارة .«هههه سلم عليه و كوله بنيتي تعبانه عوفها»
محمد .«يلا امشي»

نزلنه و اهلي هم متحضرين
اسماء اخذت ابنها سلمنه و طلعنه
صلوا على محمد وآل بيته 3 مرات و توكلنه لبغداد

__________ سارة تروي __________

هوس و ادمان و تعود و تملك وووووو
كل المصطلحات اللي تادي لهذا المعنى
كلهن بداخلي لمحمد
اغار عليه و احبه و روحي بيه
شون و شوكت ما اعرف
يمكن صدك هو نقلي مشاعرة و صارت بروحي
يمكن اني محبيت احمد من الأساس
يمكن جان مجرد شخص عابر مو اكثر
صح تاذيت بالبدايه من ابتعدت عنه
بس حب محمد بداخلي يأكدلي انه اكو قرارات نتخذها تحت اصرار شخص ثاني
تكون افضل من قرارات نتخذهه براحتنه هيج

و صح كرهت امي لان جبرتني على محمد
بس هسه اشكرها لأن بسببها حضيت بإنسان عظيم
محمد يستحق كل خير بالعالم
حت يستحق وحدة احسن مني
اشكرة على حبه الي رغم كل اغلاطي
اشكرة لان خلاني احبه

وصلنه بغداد و وصلنه اسماء لبيتها
اسامه طلع سلم على اهله و اخذ ابنه و مرته و دخلوا بيتهم بهدوء 
اتمنى يجي يوم احضى ببيت دافي هيج

وصلنه بيت عيالي و نزلنه عمي فتح البيت
كل واحد راح غرفته يرتاح
و طبعا غرفتي هي غرفه محمد
دخل مدري شنو اخذ من كنتورة و التفت عليه

محمد .«رايح لاحسان سورة ، ماطول ماشي»
سارة .«اوكي انتبه على نفسك»

طلع و اني بدلت ملابسي و فرغت جنطه ملابسنه
كملت و نزلت لعمتي شوي لأن عمي طلع همات
اليوم عندة خفر و يبات بالمستشفى
بقيت كاعدة بغرفه عمه و هي تفصل ببدله غيداء
تريد بدله الحنه السودة تكون من خياطها
رغم هي اخذت حاضرة احتياط خاف متلحك

على كعدتي يمها غفيت لان هدوء
و كعدت عليها لان إذن المغرب و كومتني أصلي
توضيت و صعدت للغرفه أصلي
و اني دا اكمل فرض العشه دخل محمد
بدل و توضه و وكف صله همين
نزلت جوة حضرت العشه وي غيداء

اذكر كلتلكم احب بيت عيالي لان جوهم
ينطي شعور انه هم عائله حقيقيه
كملنه و كلنه كعدنه ناكل
ندكت الباب و جابو من بركه الإمام
زردة و حليب اللي محمد تخردل عليها
تعاركوا هو و غيداء هذا يكول الي و هاي تكول إلي
هههه جهال ثنينهم 😂

مضت يومين اني عدهم و جعفر اجه يمي
هم تونست وياه و فهمته موضوع لأن بلش يدرس سادس بعد كمل و راح
و خلال هاي اليومين محمد مشتغل بمعامله الجواز مالي
و بما انه عندة عرف بالدائرة (واسطه)
رح يطلع خلال 5 أيام بدل الأسبوعين
هو هم رتب أمورة و احسان و علي سافروا لندن
متحمسه اروح حت اشوف طابع عيشته هناك
يعجبني اشوف شون مدبر يومه
و شون عايش وي اصدقاءه بالشقه
مرت الايام الـ3 هاي و كمل جوازي و سحبلي فيزا الي و لعمي
بابه قبل اروح بعد ما عرف انه لازم حت وجع راسي ينتهي قبل لا يأثر على الرؤيه عندي
وهيج لميت غراضنه و حضرتها حت نسافر الصبح 💃

اول سفرة بحياتي و اول مرة اطلع من العراق
جان حدي بين بغداد و كربلا و نجف
و ورة خطوبتي صارت البصرة 😁
نمت بحضنه مثل كل ليله و افكر شنو باجر رح يكون واني رح أخوض تجربه جديدة بحياتي
و هي اركب طيارة 😍
و هسه تصبحون على خير انام وراي سفر 🔥

إنتهى 🙋
بارت متعب اكثر من القبله بهواي
طبعا من قصتلي حزئيه المجلس الحسيني
حسيت بقشعريرة من الموقف لأن عبالك عشت الصار واني أكتب 😐

سؤال هسه الكم بالله 😁
تعتقدون رنا رح تجيب محسن لو زهراء ؟؟

لا تنسون الفوت 👇
الكاتبه : اسراء الخزرجي 😉