رواية احببتك انت الفصل الخامس عشر 15 - بقلم ESRA'

#احببتك_انت
#جيانا
.

.

كل عام وانتم بألف خير 🎄🎊
ربي يجعلها سنه خير و عافيه عليكم يا رب ❤
اللهم احفظ عراقنا بعينك التي لا تنام 🙏
اللهم اجعلها سنه خير على عراقنا الحبيب 🙏
ربي يرزق كل أم الصبر على فراق عزيزها 💔
.
.
.
.

محمد :
كاره الدنيا و كاعد وحدي
حسيت على خطوات وراي
التفتت شفتها هي اجت و عيونها قلقه
مديتلها ايدي تجي يمي
سحبتها لحضني و شميتها

محمد .«سارة شكثر تحبيني»
سارة .«ما حبك اصلا»

نظرت لعيونها ركزت و درت وجهي عنها
ديالله بالله فوك قهري قهر

جاوبتها بنتر .«شكو كاعدة بحضني لعد»

خلت راسها على صدري و لفت ايدها وراي
بقت على سكتتها بس اعرف نهضمت
وحق الله من تسوي هالسوالف احس عمرها ما يتجاوز اكثر من 4 سنوات مو اكثر
شغلت جكارة ورثتها وهي على الصامت
حسيت بدموعها على ملابسي
عصرتها بحضني حيل ، علا صوت بجيها
دافنه وجهه بصدري و انفاسها تحرك بيه

رفعت راسي 'ربي والله آنه مو نبي حت اتحمل هيج قرب و هيج موقف'

رفعت ايدي على راسها على كيف
و الثانيه على خصرها
شوي شوي هدئت انفاسها

محمد .«شو اشوف وجه بنيتي»
حركت راسها لا و شدت حضني
محمد .«يلا باباتي لا تعاندين ارد اشوفج»
حجت بصوت باكي .«اعرفك مليت»
محمد .«ههه شمليت ولج ، سارة لا تجننيني شو خل اشوفج رفعي راسج»

بعدت عني و منزله عينها
محمد .«شبيج حبيبي شنو هالدموع»
سارة .«اخذني لبيت اهلي فدوة هنا انت تتاذة واني اتاذى و ماريد اسمع احد يحجي عنه»

محمد .«شكيتلج شي!!! راضي باذيتي مهم انتي يمي و ما اقلق عليج»
سارة .«باجر أخذني لأهلي و كول لبابه على العرس حت اجي عندك للأبد»
محمد .«هو باجر رايح لاهلج بس ما اخذج تبقين هنا ........ سارة من أسال تحبيني مو اشكك بيج ، من اسمعج تكوليها اخذ طاقه مثل ما انتي تحتاجيها و تخابرين علمودها»

سارة .«اسفه لان هيج افكر بس احسك مواثق بمشاعري ، صدكني كلشي ما احمل بداخلي لأحمد غير صداقه »

محمد .«اعرف بنيتي ، اعرفج زين»
سارة .«كوم يمي ناكل حباب جوعانه وانت هم ممتعشي شي»
محمد .«باجر اروح اسجلج بكورس انكليزي»
سارة ّ«ليش يعني»
محمد .«حت اخذج وياي انكليزيتج زينه مو ضعيفه»
سارة .«زينه بيه اني بس يراد اقرة و هذا اهو»
محمد .«اي ميخالف ادخلج و اني هم ادرسج حت بسرعه بسرعه تضبطيهن»

كمنه للمطبخ اكلت و شربت جاي
و صعدنه لغرفتنه ننام
كعدت الصبح صليت و بدلت جهزت نفسي
رحت بستها و غطيتها عدل و نزلت

محمد .«صباح الخير»
امي .«هلا حبيبي صباح العافيه»
محمد .«ابويه ما اجه»
امي .«على جيه بالطريق ، مرتك باقيه مو»
محمد .«اليوم اي و باجر ما اعرف بالضبط»
امي .«عندك شي اليوم»
محمد .«اي امر على صادق عندة شغل محتاجني و عندي تسجيل سارة و اروح لأهلها
كلهن التمن اليوم»

امي .«انتبه على نفسك ، تريد اكول لاخوك يجي وياك»
محمد .«لا هو اسامه اجل قضيته لان اليوم عيد زواجه انوب يجي وياي»

كملت ريوك و طلعت لمشاويري قضيتهن

___________ رنا تروي ___________

مضى يومين و الخطار ما وكف
تعبت كلشوي ابدل و امكيج و انزل
و تعاي جاملي هاي و بتسمي بوجه هاي
اني مو هيج ابد
و علمود رزاق متحمله على اعصابي كوة
ترة مو هيج العرس خير شعدنه

صبحت الصبح و هو ديبدل حت ينزل
التفت شافني كاعدة و دار وجهه كمل ترتيب
ضايج لان صار يومين مسامحتله يقرب مني

رزاق .«يلا كومي حت ننزل سوة»
كمت على حيلي و رحت يمه
بسته بخدة و رحت للحمام غسلت وجهي و توضيت طلعت صليت هو كاعد على السرير يشتغل بالحاسبه مالته
كملت ، شلت مصلايتي و بدلت ملابسي
عدلت الفرشه و عدلت شكولي لفيت الحجاب
انتبهت هو مركز وياي

خلصت رشيت عطر هادئ مو قوي
رنا .«يلا ننزل»
رزاق .«غيري لبسج»
رنا .«ليش شبيه!! ترة عريض»
رزاق.«بعد ما سبحتي بالعطر ما تبقين بيه»

ههه مجنون وربي 😂
رحت كعدت يمه و اخذت ايدة بيدي

رنا .«ترة لازم اني اغار لان انت عطرك اقوى ورح تروح للجامعه بنص البنات بينما اني هنا بالبيت و حت اخوانك مموجودين عليمن غرت هيج يعني»

نظرلي صفح و رفع حاجبه
.«رايح بنص البنات بس عيني ما تشوفهن ، انتي حت من امي اغار عاد لو اجه احد من اخواني»

رنا .«رزاق ، اني هم عيني ما تشوف غيرك لانك رجلي .. واخوانك هم اخواني ليش تغار منهم ، اذا تبقى متثق بيه لا تحاجيني بعد»

رزاق .«هاي غيرة مو قله ثقه ، اعرف هم بمقام اخوج بس مكدر افهمي»
رنا .«دكوم كوم خل ننزل ميته جوع ، عود اصعد ابدل مثل متريد بس خل اكل شي اول»

بطلاع الروح يلا رضه و نزلنه
كالي قبل زواجنه هو يغار
بس مو بهالدرجه يعني ؟؟
نزلنه و صبحت علينه عمتي و بلسم
تريكنه كل احنه و رزاق ضاج اكثر لان نزل علي
هم بسرعه شربوا الجاي و طلعوا لوجهتهم
هاي فترة اخر السنه و هو يتعب هناك لان عندة مراقبه للاعداديه شامريه
اللي اعرفه اساتذة الجامعيين ما يراقبون
مدري شون طلعتله

نظفنه اني و بلسم البيت
و سوينه ماعون فاكهه و كعدنه ناكل
هم سوالفها حلوة
همزين أهي السنه التجي سادس جان التهت بالامتحانات بس بقت غيداء بت خالي

صار العصر صعدت لغرفتي
كنس و مسح و عطرتها
دخلت سبحت ذبيت تعبي كله
طلعت لبست دشداشه قصيرة و لميت شعري شون ماكان مبيه انشفه هسه هو ينشف على كيف
و نمت عود من يجي هو يكعدني
شو النومه نومه لليل يلا حسيت

راسي يوجعني ثكيل عيوني كوة فتحتهن
عرفت داكه بيه صخونه 😩
رزاق يمي صافن عليه و متوتر
شكو شصار اللي هيج عصبي!!!!
دا انهض نفسي صاح بيه ابقي بمكانج

رنا .«ارد اروح للحمام»
رزاق .«صبري»

كام على حيله راح للكنتور طلع تراك ثخين
اجه يمي بدلي ملابسي
روحي خاويه معندي طاقه اعارض
ايدة اطخ بيه احسها قالب ثلج
دفاني زين يلا كومني للحمام
دخلت و اله يدخل وياي
يمعود عدل بدل ولا وياه
تالي سديت البردة القاطع بين المغسله و الحمام

طلعت غسلي وجهي و رگبتي
من برودة المي حسيت جسمي جمر
سندت راسي على صدرة احس خلصت طاقتي
شالني و اخذني للسرير
مددت غطاني و نزل تركني وحدي
حرف ما حجه شبيه ساكت
دتاخذ عيني الغفيه دخل بيدة صينيه صغيرة
اجه يمي مسوي تشريب دجاج

كعدت شوي شربني دفت بلاعيمي
كملت و اخذها و طلع
يااااا شبيك ع الصامت يعني
رجعلي ما صدلي ابد
والله رح ابجي شبيه هذا يعني
بدل و اجه مدد يمي وهم ساكت
عيوني غوركت دموع منوراه

رنا .«رزاق»
نظرلي رأسا لان صوتي مخنوك
فزز كعد يمي قاس حرارتي

رزاق ّ«واجعج شي ليش تبجين ، اخذج مستشفى»
حضنته و كمت ابجي ّ«لمن خايف عليه شكو ما تحجي وياي ها ليش هيج مزاعلني»

رزاق .«مقهور لانج مريضه واحنه تونه متزوجين من البدايه تمرضتي و اني مو هنا ، اجي الكاج تهذين و مكبرة بالصخونه ، شصار و هيج وصلتي»

رنا .«مصار شي ، نظفت الغرفه و سبحت
بس شعري مشسورته كلت هو ينشف لان تعبت وهو طويل يتعبني اكثر ، و نمت كلت من تجي انت عود اكعد بس شو كعدت مريضه»

رزاق .«اي طبعا تتمرضين وانتي لابسه هالثوب الكصير و الغرفه ثلج عاد شعرج انوب»

رنا .«لا ترزلني شبيك»
جرني لحضنه و مددنه
ايدة على خصري جوة البدي
رزاق .«منا لساعه ما نزلت حرارتج اخذج للمستشفى جسمج قطعه نار»
ندت براسي اي و بقيت بحضنه
بعدها محسيت غير هو يصيح بإسمي
فتحت عيني بثقل اشوفه كتله قلق بس
بلسم يمنه بالغرفه مبدله و لابسه حجابها

بقت كاعدة يمي راح للحمام بدل و اجه
طلعلي حجاب و لفه الي و سندني
معندي قوة هم شالني و نزل
اخذني للمستشفى خلولي مغذي و بيه ابرة
و ابر بالعضله هم و ادويه
اهمشي ركز انه تنزل حرارتي
الدكتورة من عرفت عروس كالت هذي الصخونه اثرها سلبي عليه هالايام
مفهمت ليش بس العرفته انه رزاق لو بيدة يموتني هم ما يكول لا

بقيت لل4 الفجر يلا طلعني
خابر صديقه طلب منه ياخذله اجازة باجر
وإن ما قبلوا مو مهم

وصلنه و مددت بفراشي
اجت عمتي اطمنت عليه و راحت تصلي
بلسم هم تشكرها رزاق وراحت غرفتها
بقه هو يمي يتابع الساعه لوقت العلاج
صارت الـ6 الصبح حضر الابرة و هنا بدة
الفلم الاصلي هو اني اخاف من الابر
مفكرت انه هو يضربنياها كثر ما فكرت بيها
ابجي و اتوسل انه يعوفها وهو على فد عناد
لحد ما تركها و كعد يسولف و غفيت بحضنه
و حسيت على الچكه متت بجي
خصلها فركلي مكانها و اجه يمي نمنه سوة

الوجع مال الابرة يموت كلش قويه
يعني هي صخونه هالابرة ليش

كعدت حالي احسن و رزاق خطيه نايم بعدة
تقربت بسته و كمت للحمام غسلت و توضيت
بلكي اكدر اصلي فرض الصبح و اقضي المغرب مال بارحه لان مصليته

و هذا اتفاق من اول يوم زواجنه طبعا
انه اليكعد لازم يروح للثاني يبوسه
حت لو نايم او زعلان هذا لازم يصير
وكفت صليت الصبح قضيته و انداريت عليه كعدته خطيه تاخر ساعه 11
اول ما فتح عينه طفر قاس حرارتي
شافها نازله يلا اخذ نفس وارتاح
تحمدلي بالسلامه و باس راسي
راح سبح و توضه و اجه اني كملت قضه العشه و هو وكف صله الصبح قضاها

كملنه و نزلنه هم سلموا و تحمدولي بالسلامه
علي .«رزاق اتصل العميد سأل عليك»
رزاق .«شكتله»
علي .«طلبتلك اجازة من مقبل كتله الاهل بالمستشفى حجه بالبداية وبعدين كال ماشي»

دخلت المطبخ و عفتهم يحجون
بلسم .«صباح العافيه رنو»
رنا .«الله يعافيج ، شدسوين غدة»
بلسم .«بعدني ممفكرة ولله»
رنا .«دكملي الماعين بين ما يموع الدجاج ، نسوي مقلوبه مشتهيتها»

دخل علي .«اي والله مال مقلوبه بس رجلج ما يحبها »
رزاق .«عادي سويلي غيرشي»
رنا .«اني رح اطبخها يعني تاكلها»
علي .«ههههاي و الله يا خويه إجت اللي رح تعدل سوالفك ، عفيه عليج رنا كملي على هالدرب»

رزاق .«شنو هي قابل غصب ما اكل و هاهيه»
رنا ّ«انت اول واحد اشوف ما يحبها
ولد خالاتي و خوالي كلهم يحبوها»

بلسم .«ههه اتخيلكم تتعاركون عليها»
رنا .«محمد و مرتجى ياخذون الصينيه و يطفرون يخلون جدتي تصيح عليهم»

رزاق .«يلا كافي حجي كملن شغل»
عصب و طلع ، اعرف لان ذكرت محمد
تافف علي وراح وراه
التهيت بالشغل و التحضير و بلسم ايدها وي ايدي تساعدني عمتي راحت لبيت اخوها

كملناها تتهدر و صعدت غيرت ملابسي
لبست دشداشه عريضه لان الصايه ثولتني
نزلت صبينه و مسويت غير نوع لرزاق
يكعد ياكل الموجود شعدنه منازل كربله قابل
بالبدايه قلد و بعدين أكل شفت انه حبها حمدلله

كملنه و صعدت و هنا بدة الرعب للابرة الثانيه
و هم صياح و نواح بألف يا علي يلا ضربتها
لو اموت بعد ما أضربها أبد
نمت بحضنه و غفيت لان بيها منوم
حسيت عليه كاعد يدخن

رنا .«كافي تدخن رزاق موزين عليك»
رزاق .«شون صرتي»
رنا .«زرقتني تزرف شون اصير يعني»
رزاق .«هه كل عقلج تخافين منها»
رنا .«انت ما عندك گلب شون تضربني واني ميته بجي كرهتك من ضربتها الي»

رزاق .«تدرين هاي الإبر تنقذج ، لانج بعدج عروس و حرارتج صعدت لل40 هالشي يأثر على فرص الإنجاب تردين تنحرمين منهم و تحرميني»

شهكت معقول لهنا واصله حرارتي
شون بقيت عايشه لعد
سكتت و اتخيل نفسي محرومه اطفال
و العالم تعيرني و رزاق يتزوج يممممممه 😲

رنا .«وهسه يصير عدنه يعني»
نظرلي و ضحك عليه
رزاق .«يصير لا ما اعرف اللي الله يريدة يصير»
رنا .«اذا محبلت تتزوج عليه مو»

باوع بعيني نظرة تفحصيه و طكها ضحكه
بقيت ادقق وياه لحد ما تخلص النوبه مالته
حسيت اني التعبت مو هو التعب

رزاق .«خايفه اتزوج و مخايفه تصيرين ام لو لا»
رنا .«طبعا خايفه ، بس اهم شي انت يمي وين تتزوج معناها طارت رنا بالطكاك»
رزاق .«ههه لا تبقين هيج تفكرين ، واذا تبقين حارمتني اتزوج طبعا لان اريد طفل يشيل اسمي»

جريت شعرة بيدي حيل صاح بيه
رنا .«والله يا رزاق لو تزوجت و حق هو علي اذبحك و اذبحها سوة ، سويها و كول رنا ما حذرتني .. تريد جهال مو اراويك والله اله احبل و اموتك»

رزاق :
ههههه احلى تهديد اسمعه بحياتي
جا بويه آنه شريد غير احبلج
و اشوف وليدي بحضنج
لو مستعجل ما اصبرلج 9 سنوات

سحبتها بحضني و همستلها .«تعاي نسوي هسه طفلنه الاول»
طفرت من حضني بفزة 😂
رنا .«ماريد روح لمرتك الثانيه»

رنا :
رجع اخذني لحضنه و ذوبني بيه
اصبر اذا ما اخبلك ما اطلع رنا
بعدني كم يوم عندك و تفكر بالزواج
اخذني بحبه و همساته جبرني استسلم
نمت على تعب و اني اصلا مطيبانه كلش
ملكني و حبيت هالملك طالما يبعد عن راسه الزواج

____________ سارة تروي _____________

صبح الصبح و محمد طالع
اكره شي اكعد و هو ماكو
طفرت للمرايه اشوف اذا مسوي شي
لا حمدلله امان ممتوكح بالليل

غسلت وجهي و صليت و نزلت
عمي جاي صبحت عليه و البنات كاعدات
غيداء زارعه عيونها بالكتاب بلشت الامتحانات و باجر الاول و عمي كاعدلها هالكعدة ياويلها ترفع عينها لو تسولف
شعجب لعد راحت لعرس رنا !!
فرح و عمتي قسمن ايام التسوق
ما شملوني وياهم بالطلعه 😧

سارة .«عمه ما تاخذوني 😟»
عمتي .«لا ، تكعدين تقرين عندج دراسه و هم مو ردتي ترجعين عود من تخلص غيداء ناخذج ويانه»

سكتت ما رديت
افضل هيج اروح
بقه بالي وي محمد اليوم كال يروح لبيتنه
كمنه وي عمتي جهزنه الغدة
عمي كلشوي يصيح بغداء حت تقرة ما تسخت
تحلفلها بس يجي محمد يكوله

عمه سوت سمج مشوي وي تمن احمر
و فرح جهزت الزلايط و اني كاعدة 😒
صارت ساعه 4 اجه محمد
دخل للمطبخ دك الباب طلعتله بيدة اموري
اشرلي البس حجاب عرفت اسامه جاي
دخلت و صعدت غرفته و فرحه هم صعدت تلبس

شوي و صعدلي بدل و صلى و نزلنه
اسماء .«هلا بسورة »
سارة .«هلا بيج عمري ، شنو خرب احتفالكم»
اسماء ّ«لا نحتفل هنا وياكم»
محمد .«رجلج وين»
اسماء .«راح يجيب الكيك 😁»

نزلت فرحه .«كيك لمنو»
اسماء .«مال عرسي»
محمد .«وج خجلي اليوم يزفوج»
اسماء .«بربك محمد لو ما انته هم اتزوج اني»
سارة .«ومحمد شكو»
فرح .«يا انتي متدرين بالحب و الغرام»
محمد .«هذوله الزوج سووني مرسال حب علمود هالمفعوص ، بالله مكيفه جايبه هالنعواصه هاي»
شايل امير و يدغدغه ابطنه فطسه ضحك

اسماء .«يا عزة محمد ، اله اكوله عمك هيج يكول عليك اصبر»
سارة ّ«سومه انتي كرايبهم»
اسماء .«لا وين كرايبهم»
محمد .«تعاي سارة خل اصدمج 😂»
فرح .«لا تكول تعرف احد منهم»
محمد .«تعرف طبعا شون لعد»
سارة .«ههه منو منهم»
محمد .«اخت علي المعيد وياكم جان»
سارة .«علي يعرب 😮»
اسماء .«وج منين تعرفين اخوي»
محمد ّ«مو كلت جان وياها بالدوام 😒»

تقرب محمد همسلي .«علي اللي اعترفلج»
نظرتله بصدمه !!!!!
شدراه اعترفلي علي و بس احمد و مرتضى يعرفون بهالسالفه كلها

اسماء .«تذكرين من اجيتي لبيتنه ، هو علي اخويه اللي جابكم»
سارة .«اي عرفته ، اعرفه زين»
محمد .«هو صديقي بالشله وي إحسان ، و اسامه من شاف هالمخبوله بنجر يمها و دگ رجل لو اسماء لو ماكو .. لحد ما هي هم تخبلت وياه وهيج صارت مرت اخوي»

دخل اسامه .«تموت اذا ما تحجي عليه»
فرح .«دنسمع بطولاتك»
اسماء .«اسامه اخوك يكول عليه مخبوله»
اسامه ّ«هسه اني حبيتها و اخذتها بسنه وحدة
مثلك عشكت 7 سنين و 3 يلا تعرس
بالله سارة شمسويه باخويه حت عشر سنين يتبهذل»

سارة .«اني كاعدة ابيت اهلي وهو اجه ، اسبوعين لو متأخر جان هسه اني متزوجه و عندي اطفال كومه»
فرح ّ«عليج الله منو الرادج غيرة»
سارة .«ولد وياي جان»

محمد عصر ايدي حيل
مهتميت لأن مغلطت عادي كل بنيه الف واحد يخطبها لحد ما الله ينطيها لقسمتها
التفتت اله طابگ حواجبه و گالب وجهه
يوووووو هسه تجي جلسه تحقيق بعد

محمد .«لا تخاف رح اقلل المدة من 3 سنين للسنه ونص واعرس»
اسامه .«زين تسوي حت اخلص من سفراتك»
سارة .«لا هم رح اروح وياه»
اسماء .«يااا ما تبقين عدنه»
محمد .«بعد اذا صار و قبلوها بجامعتنه اخذها»

فرح .«تحبي لبن عمي ولج»
سارة .«ليش لعد مو رجلي»
اسماء .«ايي محمد منو كدك اعترفتلك كدامنه»
اسامه .«بالله ما تعترفيلي انتي»
اسماء .«كلهم يعرفون اعشقك مو بس احبك ما اخجل اني اخوك اول يوم حبيتك كتله قبلك»

فرح ّ«شون يعني»
محمد .«ههه جنت يم علي دندرس ، دخل يجيب كتاب واجت مصوفرة .. شبيج ؟ ها اني احب اسامه و خايفه من علي»

اسامه .«اجه الاخ يبشرني البت وكعت
واني عبالي صارلها شي ، طلعت واكعه بحبي»

سارة .«الله يهنيكم ، جد حب اسماء الك مبين من بين عيونها»

نزلت غيداء .«اكوللكم جعت»
فرح .«هسه يجي عمي يصيح عليج»
محمد .«لا خليها تتغدة و تصعد»

كمزت عليه حضنته و باسته
غيداء .«يمممه احلى اخ بالكون»
راحن البنات يحضرن السفرة
بقينه اني وياه و اسامه

اسامه .«سارة اريد اكولج شي بوجود رجلج»
سارة .«كول شنو ، حت لو مموجود محمد رح اكوله اول تالي »
محمد .«صاير شي احجي»
اسامه .«ماريد تذكرين حرف عن احمد ابد
فرح لو حجت كدام عمتي سميه
حسبي حسابج لو طلبوا يطلكج محمد ماله حق يعترض ويكول لا»

محمد .«شتحجي انت شنو مالي حق؟؟»
اسامه .«محمد بعرس رنا طاش حجي انه سارة عدها علاقه عود و عمتي متخبله
و من سألوني كتلهم هالشي ماكو و سديت الموضوع محبيت يوصلك ، بس طالما هسه سارة حجت لا خل تعرف احسن»

محمد ديحجي سكته .«اصبر محمد
شوف اسامه ، عرفت انت تعرف من وقت وفاة زوج خالتي واني حاسه انت تعرف احمد منو
و مخايفه لأني حاجيه لمحمد كلشي
و هسه هم مخايفه انه احجي حت لو عمتك تسوي هوسه لان اعرف اخوك بظهري
اسامه اني اعرف اصون سمعه زوجي
محمد اني صاعدة اجهز نفسي حت نروح الاهلي»

تركتهم و صعدت فوك دمعتي بعيني
احجي و احس جسمي يرجف رجف

بسرعه بدلت ملابسي دخل هو
كعد ع السرير و يتبع حركاتي
احس نار و شابه بيه
و كفت عدلت شعري و عصبيتي بيه طلعت
جر ايدي و دارني عليه بعصبيه

محمد .«اهدي كطعتيه شبيج»
سارة .«تركني خل اكمل حت اولي»
محمد .«كتلج ما ترحين ليوم بلا عناد»
سارة ّ«لو عندك ذرة ثقه بحبي الك ما تسمح للموقف الصار جوة ، محمد لو رجعت مشاعري لاحمد فهي بسببكم انتو و بس
بكلشي احمد احمد احمد الله يلعن هالحب و ساعة اللي حسيت بشي اتجاهه»

جتفني بحضنه يهدئني بسكوته
بعد عني التفتت للمرايه لفيت حجابي
لبست صايتي و كملت
سارة .«انزل تغدة حت نروح»
محمد .«كلت ماكو»
سارة .«محمد لا تجنني اروح ما ابقه»
محمد .«وحق هو الله يا سارة لو طلعتي اليوم اندمج و جربي تعاندين»

تركني و طلع برة
بس اريد شي أفرغ بيه عصبيتي
فتحت التلفون و شفت رقم احمد

فتحت اتصال وانتظر يرد
رن هواي و ماكو جواب
رن لحد ما فصل
شنو وين راح يعني!
اتصلت مرة ثانيه بآخر رنه فتحه

احمد .«سارة؟؟؟ بيج شي»
سارة ّ«ليش ما تجاوب»
احمد .«بالواجب أني مكدرت افتح محتاجه شي»
سارة ّ«لا ، اصلا اتصلت غلط»

سديته ، شكو اتصلت شكو 😬
كعدت على السرير و اتعارك وي روحي
لحد ما دخل الغرفه شافني كاعدة بحجابي

محمد .«كومي نطلع نفتر و نرجع»
سارة .«ماروح ، خابرت جعفر يجي عليه»
محمد .«سااااارة »
سارة ّ«لا تصيح»
محمد .«كومي لا تعبيني ، يلا بلا عناد»

نزلت كدامه صار بوجهي اسامه .«سارة ماله داعي تطلعين و تسويها زعله ، حجيت لمصلحتج»

سارة .«لا عادي مزعلت ، بس ردت اروح لأهلي لان طولت هنا بعد»
محمد .«يلا سارة امشي»
مدري شنو اشر لاخوه و طلعنه
فتر بالسيارة مدري وين يطب منا و منا
لحد ما وصلنه للامام عرفت جابني للكاظميه

دخلنه زرنه و طلعنه ، فترينه بالسوك
اخذ راشيه و ساهون و بقلاوة
دهين دياخذ مقبلت لان معاملهم كلها فيران
بالطريق دنرجع سفط يم النهر

محمد .«اسمعج شي اريد تفسيرة»
بقيت ساكته ما حجيت
فتح تلفونه و شغل تسجيل
اجه صوت احمد !!!😧
هذي مكالمه قبل شوي وي احمد
شوصلها اله ؟؟؟؟؟
شنو معقول مراقب تلفوني يعني!!!!!

محمد .«يلا سارة ، مو كلتي لاسامه صاينه اسمي .. فسريلي شنو هاي»
سارة .«شون وصلك التسجيل»
محمد .«احجي اول»

اخذت نفس واني خايفه لانه عصبي
سارة .«هاي قبل شويه من نزلت و بقيت فوك وحدي جنت عصبيه و بس اريد احد اتعارك وياه و شفت رقم احمد مدري ليش اتصلت
و اعتقد سمعت انه كتله اتصالي غلط»

احجي و منزله عيني صادتها عنه
رفع راسي و بقه ينظرلي بدون كلام

سارة .«يلا عاقب هاي نطيتك فرصه»
محمد .«تدرين منين عرفت ؟»

ركزت نظري بعيونه
محمد .«احمد دزلي التسجيل .. كاتب كتلك ما تعيش بدوني ، شفتي سارة احمد شنو
للحظه فكرت انهيج و اكسرج و اموتج بيدي .. ليش اتصلتي عليه هو ، ليش ما فكرتي بيه شنو موقفي»

لو ميته و لا مسويه هالخطوة
ليش هيج احمد متخبل عليه
اللي يحب يقدم الراحه لحبيبه
مو الاذيه وهو يعرف محمد شكد يغار

سارة .«كتلك تكدر تعاقبني»
محمد .«بشنو اعاقبج يعني!! سارة لا تبقين هيج مهمله ، مو كل الناس نقيه و تاخذ الشي بحسن نيه الكل يحب نفسه نادر من تلكيه يفكر بحبيبه

سارة .«اسفه والله»
محمد .«ماريد هالشي ينعاد ، لا تخليني اشك اوعديني ما تتعاركين وياه ، تردين نكعد نتعارك اني وانتي لحد ما تهدئين بس لا تلجئيله»

سارة .«وعد والله ما اعيدها 😭»
محمد .«كافي بجي يلا»

مسحت دموعي و كارهه نفسي
شهالموقف البايخ الخليت نفسي بيه
تقربت بسته بخدة .«اسفه»
ندارلي ابتسم و كمل سياقه للبيت
دخلنه و صاحت بينه اسماء لان تاخرنه

محمد .«زرنه و جبتلج هذا خليه وي الكيك»
نطاها قواطي الحلا و صعد بدل
بقيت اني بحجابي بس عبايه الراس نطيتهه اله صعدهه وياه

سوو الاحتفال بكيكه مزينه ذكرى زواج سعيد
و شمعه رقم 2 مشعوله
هم احتفلوا و ضحك و شقه
كعد اموري جابوه وياهم
محمد لوخ وجهه بالكريم 😂
كلش يحبه لأمير حت اكثر من أسامه
خلاه بحضني و كام غسل و رجع
خلص الاحتفال و صاح بغيداء تروح تكمل دراسه تراجع ، صعدت تدردم

شلنه الماعين و أسماء و فرحه غسلوهن
دخل محمد للمطبخ شاف اموري بيدي بعدة
كعد يمي و يسولف وياهن
تقرب همسلي ّ«اشتقت لابني ترة»

سارة .«عندك طفل 😨»
محمد .«بعدة ابطن امه»
سارة .«محمد ، شنو ابطن امه»
محمد .«ههه وج اريد طفل عاد»
سارة .«يمه هبطتني ، اصبر نتزوج ويجي لا هيج تخبلني»

اسماء .«بربك تريد تبسبس اخذها و اصعد»
فرح .«لا ولج خليه هنا»
محمد .«صدك فرح ، كرار سأل عنج»
فرح .«ها ، يا كرار .. ليش يسال»
محمد .«ههه شوفي العشاق كلهم اعرفهم
واخر من اكتشفته هو كرار و قصه عشقه
و اليوم خابر يكولي طيرتي عدكم»

ندسته حت يسكت ما يحرجها
هو ولا وياه اصلا
فرح .«محمد ..»
محمد .«شوفي صح ضجت من عرفت
بس كتله اخطبها ، لا تنطيه مجال انتي
حت لو من سنتين مضت بس العالم ما يتامن بيها خل يخليج باسمه ومحد يحجي بعد»

خطيه خجلت و دخلت جوة
سارة ّ«ليش هيج حجيت خطيه»
محمد .«احسن مما يتمعشقون بالخفيه»
اسماء .«لو كايل احنه نحاجيها خطيه تحرجها»
محمد .«احسن حت ما تتمادى ، اسماء سنتين هم حب شمنتظر ما يجي يخطب والله دا ابني ، بنات العالم مو لعب»
سارة .«كايللها يخلص و يطلبها مبقاله شي»

اسماء اخذت اموري وراحت غرفتها
و احنه هم صعدنه غرفتنه
بدلت و كعدت ع السرير كوة
سارة .«فدوة باجر ارجع الله يخليك»
محمد .«ليش دتلحين على الرجعه»
سارة .«ما اخذ راحتي هنا كلش»
محمد .«شصاير ، شحلاتج الايام الراحت
ليش اليوم متخبله على الرجعه فهميني»
سارة .«شوف انت زوجي يعني و مو حرام تعرف»
محمد .«شنو هو المو حرام ؟؟ جتج الشهريه»
سارة .«اي و مكدر اخذ راحتي فدوة خل ارجع»
محمد .«بس جعفر بالبيت وين اوديج سارة
هسه قابل هنا شمسويلج حت هيج ضايجه
انتي مبيج شي ما اقربلج عاد هي انوب ، ليش هيج متضايقه من وجودج يعني»
سارة .«ممتضايقه بس ممرتاحه»
محمد .«زين عندج لو اجيبلج»
سارة .«هو لهذا ارد اروح»
محمد .«هسه اروح للاسواق واجيبلج ، منا لباجر الله كريم»

اخذ سويج و طلع .. متت خجل
بس هو زوجي يعني مو حرام
بقيت اردد هالشي حت ابعد الخجل عني

ربع ساعه و رجع ، خلاهن بحضني و طلع
رحت للحمام رتبت نفسي و طلعت
هو امدد بفراشه .. علكت ملابسه و مددت يمه
خليت راسي على صدرى و ايدة على خصري
يراسل إحسان و كله عطلته رح تخلص بعد
شفته ضاج كون يرجع
عندة مناقشه اول
اول مناقشه مال هاي السنه
نمت واني اشوف كلامهم غفيت
حسيت الصبح عليه ديكوم
كمت وياه ّ«صباح الخير»
محمد .«صباح النور كملي نومتج لا تكومين»
سارة .«لا اروح للحمام»

كمت على كيف رحت غسلت و تجددت
طلعت هو مبدل ، دخل توضى و وكف صلى
كمل شال مصلايته كترها و تعطر واجه يمي

محمد .«اليوم اجي عليج بـ12 اوديج»
سارة .«ماشي»
محمد .«يلا كملي نومتج اني طالع»

طلع من الغرفه و اني رجعت على نومتي كملتها
بالعشرة ونص اجت فرح كعدتني
غيداء هستوهه راجعه من الامتحان
بدلت و بسرعه و نزلت جوعانه
كلنه سوينه ريوك و كعدنه فد كعدة

سارة .«عمتي وين»
فرح .«راحت وي عمي للمستشفى»
غيداء .«شبيها؟»
فرح .«عمو كاللها تعاي وياي اليوم»
غيداء .«جذب مو للمستشفى😁»
اسماء .«هاي عمي مشتاقلها و هنا مياخذ راحته»
سارة .«ههه خطيه»
غيداء .«يا خطيه خل يكعد بالبيت حت يشبع منها»
اسماء .«غير هذا شغله»
فرح .«هو من جان ساكن ويانه جان بالضيم ومن اجه هنا هم نفس الشي والله يقهر»
سارة .«اني اليوم اروح لبيتنه و اسماء ترجع بيتهم غيداء تزرع عيونها بالكتاب ، بقت فرح رجعي بيتكم حبيبه خل عمي ياخذ راحته خطيه 😂»

اسماء .«هو اني هم راجعه اول تالي بقن ذني»
سارة .«تعالو عندي 😄»
شالو الصينيه و غسالناها اني و اسماء
غيداء صعدت تنام شوي و فرح بيدها امير
كملنه و رحت للغرفه عزلتها و رتبتها
حضرت غراضي اللي اخذها
فتحت التلفزيون و كعدت اكلب بيه و غفيت
حسيت على محمد يمي مدد و اخذني لحضنه
شبگته حيل و اخذت نفس منه
بس هو قابل ، اني هم ادمنت وجودة

محمد .«شون رح اوديج منو ينام بحضني»
سارة .«تعال لبيتنه و تدلل»
محمد .«حت عمتي تركض وراي بالصوندة و دگ وين ميوجعك»
سارة .«ههه لا متسويها ، والله جد تعال بات عندي فد يوم»
محمد .«كومي كومي ، بات عندي
اذا ابات تسمحيلي اسوي اللي اريدة »
سارة .«هنا مو سامحتلك ، اشو ولا منعك مني»
محمد .«هااا يعني ما تمنعين»
سارة .«ما منعك اذا ما تفقد كلش كلش»
محمد .«اريد نعرس حت افقد براحتي»
سارة .«هه كوم اشو»
محمد .«اريد تصبيرة اول ، كم يوم يلا اشوفج»

تقرب عليه كلش و ندمجت انفاسنه
غمضت عيوني و نطيته الاوكي
اخذ شفايفي بهدوء بقُبُله بس حب
احبه من يبوسني بدون اذيه
نزل لرگبتي و عضني عرفت سوة اثر
رفع عينه لعيني .«هاي ذكرى تبقى»
سارة .«انت موجود ما احتاج ذكرى منك»
محمد .«سارة احبج كافي نطول عرسنه»
سارة .«تعال اليوم و اتفق ع الوقت اللي تريدة»
محمد .«هاا منو يريد يستعجل»
سارة .«غير حت ابقى يمك»
محمد .«نروح المغرب مو هسه حت ارتاح شوي»
سارة .«كيفك بس المهم اليوم»
محمد .«ههه لا تخافين ما بيتج هنا»
سارة .«خل ابوسك بس لا تفقد عليك الله هيج بوسه بريئه حباب»
محمد .«قبل شوي فقدت قابل ، مو بريئه جانت»
سارة .«لا بيها زراك سويت»
محمد .«ديالله 😂»

اعظم شي جريء طلبته
بسته بشفايفه على كيف و لزمتني الضحكه
هو هم ضحك و عضني من شفتي
سارة .«ليش تخبث ، شنو كتلك»
محمد .«اسف نسوي من جديد»
سارة .«لا كافي هي شبع»
محمد .«بوسي ولج»
سارة .«كوم حباب »
محمد .«زعلت كومي يلا»
سارة .«شو تعال»

كوبت وجهه بيدي و بسته من عيونه و شفايفه
سارة .«هاي كافي بعد»
كمام طلع ملابس وراح للحمام حت يبدل
نزلت عمتي جايه و كاعدة وي فرحه

سارة .«هلا عمه رجعتي»
عمتي .«اي رحت لشغله»
دخل عمي للصاله .«هلا بسورة»
كمت بوسته سلمت عليه .«هلا بيك عمو»
دخل محمد ّ«هلا بويه رجعتوا»
عمي .«يي كملت ، بقت مرتك اذا تريد كوللها لان حت اخوك هم رح يكول لمرته»
محمد .«بعدين عود هسه عندي شغل»

اشرتله شنو مرد
عمتي حضرت الغدة و كعدنه كلنه
عمو سوة تحقيق لغيداء حت يشوف شلونها بالامتحان
كملنه و غسلت الماعين و صعدت
بدلت و جهزت نفسي و نزلت يم فرح
طلعنه فاكهه و محمد مدري شيحجي وي عمي
عمه هم شكلت وياهم
اني و فرح ساكتين ننتظر يخلصون
صارت الـ6 و گال يلا كومي نروح
عاد سلمت عليهم و طلعت

قريب ما نوصل التفتت اله .«اذا هم مقبلت امي خلي ابالك ما ارجع لبيتكم»
محمد .«اخذج و نروح لفندق 😉»
سارة .«شبيك اليوم عليه»
محمد .«ضايج لانج راجعه»
سارة .«مو نطيتك تعويض»
محمد .«نزلي حبابه ام التعويض»

وصلنه و جعفر فتح الباب
حضنته مشتاقتله حيل
سلم محمد هم عليه
دخلنه الصاله بيت اختي ابتهال موجودين
سلمت عليها شكثر مشتاقتلها
اخذت علاوي هم شميته
.«يمه روح خالتك مشتاقتلك»
محمد هم سلم على امي و مصطفى
سارة .«مشتاقتلكم حييل»
ابتهال .«غير انتي ماكو»
سارة .«شسوي عرس رنا و رحت وياهم ع الواهس .. شلونك ابو علي شلون صحتك»
مصطفى .«هلا سرو حمدلله انتي شونج وين هالغيبه ماكو»
سارة .«ههه رحت لبيت عيالي عرس اكو»
محمد .«سارتي مي»

دخلت اجيبله مي و هو بقه يمهم
امي كاعدة سلمت بس على محمد واني لا
يلا مهم مفشلته كدامهم
قدمتلهم مي للكل
كعدت يم محمد بعناد امي
عليمن استحي وهي اصلا شمرتني يمهم

بقه عدنه مراح رأسا
طلعت للمطبخ و إجت يمي ابتهال
حضرنه العشه سوة ثنينه
شوي و اجو كلهم يمنه بالمطبخ
مصطفى جاب علي لابتهال و محمد وياه اجه حت لا يبقى وحدة
مرتاحه بوجودة يمي واني ابيتنه
وكفت اگلي كبه اجه يمي وكف
التفتت ابتهال يم رجلها دشوف علاوي موصخ ملابسه لو لا

محمد بهمس .«شو صاير احلى شسالفه»
سارة .«امشي اكعد عيب»
محمد .«لا خل يشوفون شون اغازل مرتي»
سارة .«ههه الله عليك ارجع ، ما تشبع انت»
مصطفى .«ههه صار اسبوعين هي عندك ما كفتك وكفت يم الطاوة انوب»

ابتهال ضربت كتفه و ضحكت
محمد .«كوم انت هم يم مرتك و بسبس😂»
مصطفى .«شفتي اخذت الاوكي عديلي و قابل لا تكولين عيب بعد»
ابتهال .«ههه يمعود اكعد خل اشتغل عدل»
محمد .«ما يفهمن انه هاي اللحظات ثمينه»
مصطفى .«اي والله حت ابيتنه ما تخليني اطب المطبخ يمها»
سارة .«احمد ربك اللي اني تعوفني ، هم قبل لا تعرس جانت وحدها تطبخ و تطلع»
محمد بهمس .«امشي للاستقبال اشتاقيت»
سارة .«شجاك 😂»
مصطفى .«شد الهمه محمد و عرسو بسرعه»
محمد .«غالي و الطلب رخيص ، سبوع الجاي اسافر و اقدم اجازة لزواجي حت ارجع ارتب على راحتي ، انشالله 3 اشهر ونعرس»

دخلت امي للمطبخ .«اي يلا عمه لان العالم لو تلاحظ سارة تبقى عندك تاكل وجهنه مايصير»
محمد .«انشالله مبقه شي عمه ، انتي و امي هم اتفقن حت نكمل بس احصل اجازتي اجي كامل شغلكم»

امي .«اي انشالله هالسبوع امرلكم ونتفق»
ابتهال .«يمه عود كوليلي اروح وياج»
مصطفى .«شكو رايحه انتي»
محمد .«لا تركها هلا بيها ، كلكم تجون حت عمي و جعفر نضبطها و اتصل بعمي ابلغه»

بقيت اني بس اسمع ما تدخلت
كملت تگلاه و إجت ابتهال على البيذنجان
التفتت غسلت الخيار و الطماطه اسوي زلاطه
امي طلعتلي نارنج و نطته الي بدون ما تحجي
محمد اشرلي اسكت و امشيها
مصطفى اخذ علاوي للاستقبال نيمه و اجه
جعفر هم رجع جاب صمون حار
لحد الان ماشفت ابويه وينه

ابتهال .«سارة بيج شي وجهج اصفر»
سارة .«لا حياتي بس تغيير مكان مو اكثر»
محمد .«اساعدج بشي 😉»
ههههه حقير يعرف شبيه مترهي
سارة .«لا تسلم اني اسوي»
مصطفى .«شوكت تسافر محمد»
محمد .«انشالله بعد 8 أيام عندي مصادر رايديها الولد هناك كون ادورهه الهم واني هم اكعد ادرس عندي مناقشه»
مصطفى .«انت مو رياضيات للشنو مناقشه»
محمد .«هو بالاسم رياضيات بس صعب وكون اكتشف طرق و ادرس طرق دوخه»
ابتهال .«الله يسهلك ، مبقى شي»
محمد .«اي صح ، سنه وحدة»
سارة .«سنتين ترة لا تنسى»
ابتهال .«ليش ثنين»
محمد .«عندي عقد بالجامعه و 3 اقل شي لهذا تنضافلي سنه هناك»
مصطفى .«سهله تخلص بسرعه»
امي .«لعد شون راح تتزوج هسه»
محمد .«اي عمه هو نسوي العرس و اخذها ونروح هناك اني اكمل و هي تدرس»
امي .«احسبها عدل لا تروح و تتبهذل»

كملنه تحضير العشه و هم يسولفون
سحبنه ميز الطعام و نصبنه السفرة
صحت جعفر ينزل يتعشه و بقيت واكفه بالدرج
نزل حجيت وياه على كيف

سارة .«جعفر بابه وين؟»
جعفر .«ذاك الاسبوع تعارك وي امي و طلع بعد ما رجع»
سارة .«عزة وين راح يعني»
جعفر .«ابيت عمو ليث بس من سأل رجلج كتله بسامرة رايح»
سارة .«نخلص و نروحله فدوة مشتاقتله»
جعفر .«كون تاخذين اذن رجلج و زحمه يعرف»
سارة .«اني ادبرها لا تخاف»

ابتهال .«سارة جعفر وينكم يلا»
جعفر .«امشي بعدين نتفق»
سارة .«يلا »

كعدنه نتعشه و محمد لاحظ عليه شي
كعدتي يمه كلشوي ياشرلي شنو و اكله ماكو
خلصت امي و كامت هدرت جاي
مصطفى .«محمد الخميس انشالله انتو عدنه»
محمد .«لا تكلف نفسك خويه ، هاي هسه كل احنه سوة كافي علينه»
ابتهال ّ«لا لا تجون عدنه جيه خاصه»
سارة .«اذا تسويلنه لزانيا اقنعه نجي »
محمد .«هههه شو ما تطلبيها عدنه لعد»
سارة .«اجيكم خطار عيب اتطلب»
محمد .«لعد منو يسويها هنا»
امي .«هو من تجي اختها تسويها مرات اني بس مو دائما»
محمد .«ما تعرفين تسويها سارة»
سارة .«لا ممتعلمتها بعدني😁»
محمد .«يلا عود نضوكها عد ابتهال واذا حبيتها تعلميها»

امي .«ما تعرفلها امك؟»
محمد .«والله ما اعرف عمه ما مسويها قبل ، خل تتعلمها سارة و نسويها»
سارة .«مو شاطرة بالطبخ ترى من هسه اكولك»
امي .«تعلمي شوي شوي»
محمد .«اهمشي تعلمي المقلوبه»
مصطفى .«ايي والله مال مقلوبه»
امي .«على جيتكم الجايه نسويها ، محمد انت هم تعال قبل لا تسافر حت اسويها»
محمد .«ايااابه اليوم عمتي تدللني ، صار عمه اتفقو و نطوني خبر»

ندسته برجله ورفعتله حاجب
بعد كوم اثرد روحك ممصدك
الله العالم ليش تعاملك عدل
عمري كله ما انسه تصرفاتها وياي

كمت بضوجه اغسل ايدي اجه وراي
محمد .«لا تضوجين سارتي تقصدت ارد هيج حت تعرف مضايجين منها»
سارة .«ماشي»
محمد .«مشيها عادي لا تبينين شي»
سارة .«صار»

ردينه المطبخ صبيتلهم جاي و ابتهال تكف السفرة ، قدمتلهم و رحت ساعدتها بسرعه غسلناهن و كترنه كلشي
علي كعد راح يمه ابوه ، محمد اخذ چايه و راح وراه و جعفر اجاه اتصال و صعد

ابتهال .«غيري اسلوب العصبيه سارة ، عيب كدامهم»
سارة .«مسويت شي ترة»
ابتهال .«اريد اروح لبابه تجين»
سارة .«اي طبعا هسه اكوله لمحمد حت يقبل»
ابتهال .« روحي كوليله بين ما حط فاكهه»

طلعت اشرتله يجي
شال الاستكان و اجه
اخذته خليته بالمطبخ و رحنه للاستقبال
دخل و رد الباب

محمد .«صار شي؟»
سارة .«محمد بابه ابيت عمي ليث واريد اروح اشوفه حباب»
محمد .«خير بيه شي ؟»
سارة .«والله ما اعرف جعفر كال تعارك و طلع صار اسبوع من جنه بالبصرة وهسه بيت اختي رايحين اروح وياهم»
محمد .«بيت عمج منو موجود منهم»
سارة .«لا تخاف عمو ليث عندة بس غياث و عمرة سنتين صغير»
محمد .«قصدت اروح اشوفه وياكم»
سارة .«لا خل اروح اني اول وبعدين اكولك»
محمد .«ماشي روحي بس انتبهي على نفسج»
سارة. «صار»

رحت لابتهال كتلها أروح
كعد نص ساعه و كال يروح بعد
مصطفى .«هستوها الـ9 وين رايح»
محمد .«لا والله وراي درب اروح الحك ارتاح»
مصطفى ّ«كيفك بعد بس لا تنسه الخميس عدنه»
محمد .«ههه لا ما انسه ، يلا اودعناكم .. معسلامه عمه»
امي ّ«الله وياك عمه انتبه لطريقك»

طلعت وراه .«من توصل رمشلي»
التفتلي .«دايخ شون اليوم»
سارة .«ليش شكو»
محمد .«شون انتي مو يمي تعودت على حضنج»
سارة .«تريد ابقى يمي»
محمد .«يي هاهيه ، شو تعاي اخذ شحن»

حضنته حيل واخذت نفس من رگبته
.«راح اشتاقلك هواي» رفعت راسي اخذ شفايفي بوسه سريع
محمد .«احبج يولو»
سارة .«واني هم 💏»
محمد .«انتبهي على نفسج و شربي شي دافي يدفي بطنج حت ما تتاذين مثل البارحه ، من ترجعين من بيت عمج دكيلي»
سارة .«صار»
محمد .«يلا في امان الله»
سارة .«الله وياك»

راح و دخلت يمهم مصطفى كال تحضري
امي دخلت رأسا لغرفتها
سارة .«ابتهال بابه ليش ابيت عمو؟»
ابتهال .«ما اعرف ، جيت الثلاثا الراح و ما لكيت احد اتصلت بجعفر كال انتي ماكو و ابويه ابيت عمي وامي ابيت خالو حسين .. مكدرت اجي ضميتها لليوم يلا»

سارة .«هففف اكوم اتحضر و اجي»
صعدت غيرت ملابسي لبست تراك بيت و فوكاه صايه حت من ارجع ما بدل مرة ثانية 😁
كملت و نزلت يمهم شوي و كال مصطفى يلا
رحنه و طول الطريق افكر بيه
بابه تاذة هواي بسببي
من انخطبت و هو ومامه مشاكل

وصلنه و ستقبلنه عمو و اجت مرته هم رحبت بينه و ضيفتنه
دخل بابه للصاله و طفرت عليه حضنته
تجاهلت كل الموجودين
بس اريد اخذ منه طاقه
مشتاقتله بگد زحمه الحسين

ابويه .«بتعدي بابه عيب خل اسلم»
سارة .«مشتاقتلك حيل»
ابويه .«اسلم و رديلي»

بتعدت عنه و سلم عليهم
كعدت بصفه راسي على متنه خليته
يمه بس وجودة يمي كافيني

ابويه .«اي يابه شونكم حبيب جدة شلونه»
ابتهال .«بخير و سأل عليك»
ابويه .«ههه والله كلت امرلكم باجر»
مصطفى .«اي هم تعال هلا بيك والله»
ابتهال .«والله عين غطى و عين فراش تنورنه من تجي بدخلتك العافيه تدخل بيتي»
ابويه ّ«الله يحفظج بويه ، وشمعتي شونها»
سارة .«مشتاقتلك ، محمد سأل عليك وكال يمرلك»
ابويه .«انشالله خل يجي للبيت و هلا بيه»

دخل عمي ليث و غياث ابنه بيدة
اخذته من ايدة .«عمو هذا ابنك كيمر والله»
ليث .«ههه هو كل معالمه ماخذها من امه»
مرت عمي .«اي مني الجمال و منك الرجوله»
سارة .«ايي عمو بعد شكو»
ليث .«وج ما تجين انتي هيج كطعتي»
سارة .«غير زوجتوني دايخه وين اروح»
ليث .«هو رجلج هم ماله حس»
سارة .«عمو هو يدرس خارج هاي اجه قبل فترة و اسبوع اليجي يرجع يسافر»
ابويه .«عود اعزمه و انت هم تعال ليث حت تلتقي بيه»
ليث .«اي شكو بيها ، والله دائما اكوله عمار نسابتك ورود مصطفى ذهب و محمد الفضه واحدهم احسن من الثاني»
مصطفى .«تسلم عمي»
ابويه .«باقين عدنه عمو»
مصطفى .«لا اوصل سارة و نرجع ابتهال مماخذة ملابس لعلي كافيه»
ليث ّ«باتو عدنه و هو و غياث يتقاسمون»
مصطفى .«لا عمو تسلم على الجايات انشالله»
ليث .«على راحتك عمي»

سلمنه و طلعنه بعد
مصطفى كال تأخر وراهم طريق
رجعت شفت جعفر .«ليش ما اجيت»
جعفر .«امي وحدها تبقى»
مصطفى .«يلا ابتهال سلمي على عمتي دنروح»
طلعت امي .«وين عمه تباتون اليوم»
ابتهال .«لا يمه علاوي خطيه يتبهذل و يبهذلكم»

سارة .«انتبهوا للطريق»
مصطفى .«انتي هم انتبهي على نفسج و ذكري محمد الخميس»
سارة .«هههه اجي لا تخاف اكو لزانيا ما فوتها»
مصطفى .«اي زين ، يلا اودعناكم معسلامه»
امي .«الله وياكم»

راحو و دخلت البيت
حت بيتنه اشتاقيتله
صعدت غرفتي شمرت روحي على السرير
تذكرت محمد خطيه وحدة هسه
كمت خابرته ّ«الو»
محمد .«ها حبيبي»
سارة .«شدسوي»
محمد .«كاعد ادور مصادر ، رحتي»
سارة .«اي هسه رجعت»
محمد .«يي زين ، راح تنامين»
سارة .«هفف مو كتلك اكره تعودي عليك»
محمد .«صار سنه اكولج خل نتزوج انتي معاندة»
سارة .«لو قابله من اول مرة جان حياتنه صارت جحيم لأن ما احبك»
محمد .«مبقه شي ، كم يوم بس»
سارة .«اي ، يلا اروح انام و انت هم كمل ونام»
محمد ّ«ما نام اليوم»
سارة .«ليش»
محمد .«تعودت اغفه بحضنج»
سارة .«تعال لعد ، وكأني ما تعودت»
محمد .«كم يوم و حنه غيداء وتجين عندي»
سارة .«بعد اكثر من اسبوعين»
محمد .«اول تالي تجين»

دا احجي وياه واجه اتصال ثاني!!!
محمد .«منو يدك عليج بهالوقت سارة»
سارة .«لحظه اشوف»

شفت احمد!!!!!!!!
محمد .«ها منو»
سارة .«محمد ، هذا احمد يتصل»
محمد .«شعندة ، لا تردين»
سارة .«راح افتح وانت ابقى على الخط عادي»
محمد .«سااارة»
سارة .«افهمني الوقت متاخر يمكن اكو شي»
محمد .«استغفر الله»

فتحت الخط عليه
اجه صوته تعبان و مخنوك
سارة .«أحمد .........

تيراااااا 😀
.
.
.
.
الكاتبه : اسراء الخزرجي ❤
🎄 HappyNewYear🎄
.
.
.
Vote 👇😉