رواية احببتك انت الفصل الخامس والعشرون 25 - بقلم ESRA'

.
.
.
.
لوُ يعزونه صدك ماتيهُونه ،
ماحچوآ چلمات خَشنه وُضيعونه 🍂🍁
.
.
محمد :
سافرت ورة عرس غيداء مباشرة
حت سارة ما اهتميت الها متعمدا
حت تحس بغلطها من وحدها
تعبت انبها على اغلاطها
كبيرة بعد رح تصير 23 سنه
مو مال واحد يبقى يركض وراها

اتفقت وي الولد و سافرنه كلنه
هم كملنه و ظائفنه و شغلنه
وهم اني و إحسان بعد رح تبدي مناقشتنه
سنه و نص سختنه عدل و ننزل لاهلنه
رغم قوانين جامعتنه تمنع نزولنه
بس لأن احنه ضمن كادر تدريسي
صارتلنا مثل الواسطة
لو باقين بس طلاب جان شتعل جدنه

عدنه 6 اشهر دراسه بحت
شهر مناقشه محتوى الماجستير
و شهر الباقي هو دراسه الختام
و المناقشه تتم في 3 ساعات فقط
وهاي حسب لباقه و دقه الطالب
اذا جيد يحصل الدرجه بالبدايه
واذا اكو ارباك و خلل برسالته
معناها رح تطول مناقشته و تقل الدرجه
طموحي هو اكون الاول
حت لو مو على الجامعه
يرضيني الاول غلى دفعتي من العراق
و فرحتي لو إحسان حصل مركز الثاني
حت ما يقل مستواه
ما اعارض لو اخذ الاول بدالي
بس تبقى امنيتي و اتمنى احصلها

قضينه شهرين نكمل وظيفتنه مثل كل أستاذ
و حت اقوي معلوماتي گمت اسد من دروس إحسان
اذا يصير عندة شغل واني فارغ
اكوله روح و اني اسدلك
هم هو وكف وياي من جانت سارة هنا
و هم هو اختصاص رياضيات
يفيدنه كأنما نسوي رفرش للعقل
نراجع دروسنه البدائيه اللي هي الأساسيات
هنا بلندن ماخذيها بصورة اوسع من عدنه
لهذا خدمنه هالشي كلش

مقرر اللجنة العليا مال قسم إحسان
أفضل من استاذ جون و يتساهل هواي
لهذا استغليت الفرصه مرة ثانيه وبديت اجمع مصادر
اخذ عنوان و بعد الدوام اطلع ابحث لحد ما احصل

وهيج قضينه الفترة لحد ما حصلنه استئناف دراسي
الأساتذة قريب مناقشتهم يحصلوه
و من توقع القرار و سلمنه طلابنه
كعدنه اني و إحسان كعدة على كتبنه
حت علي و عقيل الهم وقت محدد باليوم يحجون ويانه يخلص لازم يسكتون
اللي يعاند يبات برة الشقه هذي التعليمات جانت
و بسببها صرنه دودة كتب حقيقيه
نكعد بيدنه كتاب
نروح بيدنه كتاب
ناكل نسبح نسوي كلشي مهم بيدنه كتاب
بكل مكان خال شكل موضوع
ادخل الحمام حاط ملزمه لازم ادرسها واني اسبح
اغسل هدوم حاط ملزمه ادرسها واني انتظر الملابس تخلص
اطبخ و اكو كتاب لازم اطلع منه خلاصه كامله بين ما اكمل
ما انام اذا ما اخلص اللي محددة لهاليوم
هيج جنت محدد وقتي و دراستي
إحسان ما مشه على خطتي كال يدوخ

هو صح دخت أول بدايه الروتين
بس اعتاديت آخر شي
و اتبعته بهاي الفترة كلها

و لان هذا النظام قاسي شوي
كمت خليت بكل يوم ساعه مكافئه اذا كملت
و هي اخابر اهلي اشوفهم
تقريبا كل مكافئاتي اليوميه احصلهن لحد الآن
عدا مرتين ما لحكت
و جنت على اتصال دائم باهلي
لان اطول هالمرة يلا انزللهم

روحي مفرفحه على سارة كلش
صار قريب الـ3 اشهر محاجي وياها شي
من اول ما اجيت واني فارض عليها العقاب هذا
تذكرتها و كمت على حاسبتي فتحتها
شتغلت و حولت اليوزر على حسابها
ما فتحته شك وانما اريد اعرف شوكت فتحت آخر شي

نبهتها سارة ماريد اشك بيج الفتالاف مرة
تجبرني تجبرني انه اتعارك و ارزل و اشك
اول محادثه احمد كاظم
كلش حلو برافو ست سارة 👏
افتح البرنامج الثاني و الفلم ذاته
و الثالث نفس الشي !!!
ادري مو كالت رديته و مقبلت على كلامه
تدخل تحجي وياه لييييش !!!

والله هاي البنيه اذا ما تسكني النجف
ولا يحلالها شي ولا ترتاح اذا ما تسويها
كمت حضرته من كل البرامج حت تعرف
كملت و دزيتلها رساله

.«انتي السبب بفقدان آخر ذرة ثقه ، بيج حظ تعلمي شون تبنيها ولو ما صدك تكدرين»

رسلتها و غلقت اللابتوب و كمت
طلعت سويت اكل تعشيت و بدلت و طلعت
مخنوگ مالي خلگ ادرس بعد
رحت للنادي لعبت شوي
اجت مارلين ويانه بالجامعه
عربيه الاصل بس برطانيه المنشأ
كلامها العراقي مكسر لهذا تحجي فصيح بس شنو بطلاقه بيه و حلو لايك إلها
مسيحيه بيضه ثلج عبالك منا مو من عدنه

اجت كعدت يمي ابتسمت بوجهه
مارلين .«ماذا بك»
محمد .«ولا شي»
مارلين .«اعرف نظرتك عندما تكون متضايق»
محمد .«هههه لا تخافين مبيه»
مارلين .«اعتبرني شقيقتك»
محمد .«اووف اووف تدرين حت غيداء مشتاق الها شونها شسوت بالناصريه تاقلمت وياهم لا»
مارلين .«من هذه»
محمد .«اختي»
مارلين .«اووه هل هي جميله»
محمد .«طبعا نسخه امي»

طلعتلها صورتها .«وااو حقا جميله اهذا زفافها»
محمد .«اي هاي يوم عرسها .. دشوفين هاي»
مارلين .«اجل»
محمد .«هاي زوجتي»
مارلين .«يا اللهي انت متزوج»
محمد .«اييه متزوج بلوة راسي»
مارلين .«ماذا تعني»
محمد .«لا تهتمي مو شي 😅»
مارلين .«تحبها صحيح»
محمد. «تصدكين لو كتلج ما اعرف ، المشاكل الدتصير مشتتني»
مارلين .«كم مضى لك لمعرفتك بها»
محمد .«سبع سنين احبها من بعيد و سنه و نص هي مرتي»
مارلين. «بحق الله كل هذا وانت لا تعلم»
محمد .«مارلين ايمجان هم شك بيج»
مارلين .«ايمجان عشقني لدرجه الشك»
محمد .«وانتي شسويتي»
مارلين .«لا شيء محدد ، مرات نتشاجر و اخرى نكون عشاق»
محمد .«هههه شوكت يرجع»
مارلين .«ايمجان ذهب لأستراليا لوالدته»
محمد .«اي اعرف كالي»
مارلين .«أقدم لك نصيحه صغيرة ، ان كنت تحب زوجتك هذه لا تتركها لأجل احد .. اكمل ما بدات به دون تراجع او اتركها لغيرك»
محمد .«مارلين ترة زوجتي شنو اتركها لغيري»

مارلين .«هذا هو ما اعنيه ، هي زوجتك لذا تفهمها جيدا»
محمد .«مثل ايمجان كل كلامكم ممفهوم»
مارلين .«هههه لا اعرف كيف اوضح لك قصدي يلغتي الأم»
محمد .«شبيج ترة العراقي سهل ليش متعرفين»
مارلين .«لانها لغتك تراها سهله»
محمد .«يمكن »
مارلين .«هيا صديقي ، عد وصالح زوجتك»
محمد .«هههه صار ، شكرا على الدردشه»
مارلين .«لا شكر على واجب»

طلعنه و كل واحد اخذ وجهته
رجعت للشقه اول دخلتي صاح احسان
.«وين طلعت 3ساعات مختفي»
محمد .«مرتي وما ادري بيك حت تحاسب»
عقيل .«يااا نسيت إحسان مرتك»
محمد .«تريد اجيك بالحزام»
علي .«عوفه عقيل مقهور ليهسه ما خلف»

حجاها و شرد غرفته لان شمرت عليه الحذاء تكرمون 😂😂😂😂
محمد .«شكو كول شرايد»
إحسان .«ماكو بس مرتك شالت البيت باتصالاتها»
محمد .«وين تدك و ما عدها رقمكم»
احسان .«مو اختي البگه صديقتها»
محمد .«هههه اله افتن الها و لمرتضى»
عقيل .«محمد سارة خابرت تبجي»

التفتت عليه بتفاجئ .«منو رد عليها»
عقيل .«اني رديت إحسان مقبل بس خوما نعوفها تتصل وانوب عبالها بيك شي»
محمد .«بعد محد يرد عليها»

تركتهم و دخلت فتحت الحاسبه رأسا
راسلتلي جواب .«اعيد الثقه هاي بحبي الك بس أرجع عاد كافي عاقبتني بما يكفي ما مليت ، جاوبته لان واثقه احصلك بهالطريقه مجان إلي قصد ثاني»

اتصلي و اعتذري قابل صعبه 😠
تجيبين اعذار من راسج شنو
تركيبت عقلها ما افهمها !!
تفضل تحجي وياه حت تحصلني !!
طنشت و مارديت بس خليتها مرئي
بدلت و كعدت كملت دراستي
مضت ايام و اني عصبيتي اطلعها بدراستي بسبب سارة اللي خلص بعد قررت قرار نهائي انه ارجع انهي كلشي وياها
يستحيل اكو واحد يرضى مرته تحجي وي واحد يحبها و ينبها و تعيد الكرة و يسكت

سارة تضيع الحب اللي جنت محتفظ بيه إلها
و السبب هي تصرفاتها اللا مسؤوله

خلصنه 6 أشهر بعد
ضعفنه كلش بسبب تكثيف الدراسه
وجبه وحدة ناكل حت نكمل دراسه
ننام 4 ساعات بس مو اكثر
متحمل اني بس احسان مرتين صار عندة إنهيار
هو بساع يخرب من يعبر شهر بهيج روتين
بس ولأن نريد التفوق
باقين بهالنظام لان مبقه شي ونخلص

عقيل و علي رجعوا بعد لان خلصوا قبلنه
اخبار اهلي ...
غيداء رجعت بغداد لان طلعلها جامعه بغداد قسم لغات إنكليزي
اكرم كال يأجر شقه لحد ما تكمل
بس ابويه ما قبل نطاهم بيت صغير و قريب على دوام غيداء
اسامه رجع لشغله و القضيه مال ذيج المرة نسحب منها
بشرني انه رح يجي اخ او اخت لأمير ورح أصير عم لطفل ثاني 💃
امي ملتهيه وي اسماء و امير اللي اغلب الأيام هو عدها يبقى
ابويه بين بيته و بين دوامه و الحمدلله الله حافظهم بظله و رحمته

اما مصيبه راسي اللي مشيبتني لـ6 اشهر
طول هاي المدة ما حجيت وياها
اله مشتاقلها بگد زحمه الحسين
شكد اكول انساها و بعد انسحب من حياتها
بس روحي بيها و گلبي مختارها
گلبي دوم يعصيني و يشتاقلها
عقلي دوم يفكر بيها
سبب تعب نفسيتي هي مو دراستي

قضيت هاي المدة واني اقرة تفاصيل محادثتهم كلها
عمي رجع قدملها ورجعت تداوم
ورجع احمد وياها وكأني مموجود
اتخذت قرارها و بلشت دراسه و مكالت استشيره

ممكن تشوفوها سخافه بس عندي مو هيج
هي زوجتي ، صح بعدنه ...
بس هيج قرارات الي حق اتدخل بيها و ارفضها
حت عمي ما قدرني و كال لازم ننطيك خبر !
شهرين بقت مو اكثر
شهرين ورح تشوف محمد جديد
لكل فعل رد فعل .. واجه وقت عقابها عدل

___________ رنا تروي ____________

.«وج مامه كافي روحي لابوج»
بقت تعض و تعاند
يمه مو بنيه مصيبه مصيبه
و ابوها طاعجها خبلني
كله على بعضها 6 اشهر و نص صرتي
هالعناد شنو ، نسخه من أبوها

رنا .«رزااق ، تعال اخذ زهرة رح اموتها»
رد من الصاله .«عوفيها براحتها»

خربيييك هو انت التتعضعض لو اني
رنا .«كافي مامه ، وج ارد اكوم»
زهرا .«ممممممم 😠»
رنا .«شو وخري لج جاي اتوسل بيج»

وخرتها ورمت صدري الحقيرة
هو نص سن تشوغ روحي من تعضني بيه
عدلت ملابسي و اخذتها لابوها

رزاق .«هاي شبيج خل تشبع وجيبيها»
رنا .«لا والله خل تعضك و عود تعال كول خل تشبع»
رزاق .«خل تعض واني اطيبه الك 😉»
رنا .«صدك صاير مستهتر 😒»
رزاق .«لسانج ولج»
رنا .«والله بعد ما رضعها تروح تجيبلها حليب ، ثور مو طفله هاي»

عفتهم و نزلت للمطبخ
بلسم .«شبيج عصبيه»
رنا .«من اخوج و بنته»
بلسم .«ههه هاي بعدج ولج»
رنا .«حقكم ما تحسون بيها ، والله كوة انام من الوجع و رزاق مكيف»
بلسم .«لا بلعكس اليوم كاللها لامي رنا هواي دتتعب وي زهرا احس تسرعنه و جبناها»
رنا .«غير هو تخبل عليه اله تحبلين»
بلسم .«رنا رزاق ما حجه وياج بشي»

رنا .«اي حجه و متحلف بيج وكوة مهديته عنج»
بلسم .«هو ما شاف شبيج ، بس مدري شدراه»

سحبتها و كعدتها كدامي و كعدت
رنا .«احجيلي كلشي حت اعرف شحجي وياه»
بلسم. «رنا اني احبه و رزاق يعرف مو حبج قابل هو حلال واني حرام»
رنا .«اي حرام ، رزاق من صرت مرته يلا تمادى مو مثلكم يلا غردي»

بلسم .« .......
اول زيارة بعد ولادة رنا رحنه لبيت جدها حت جدتهم تشوف زهرا متكدر تجي عدنه حركتها صارت صعبه شوي
هناك كاعدين بغرفه فرح كلنه بعدين رنا كالت تريد تنوم زهرا ف الكل طلع من يمها
اني وياهم طلعت بعدين صاحتني رنا نطيتها حجابها كالت خاف احد يدخل
طلعت صار بوجهي مرتجى ، احنه من الاول بينه نظرات و كلام مشفر من عندة
من شاف محد اكو سحبني لغرفته وسد الباب
وي ما التفت اخذ شفايفي ابوسه ذوبتني
مشاعرنه طغت على اللحظه و نسينه احنه وين
بادلته و تخبل عليه اكثر
بدون شعور نزل على رگبتي و صدري
شون و شوكت وصلنه لهالحاله ما ادري
شوكت فتح حجابي هم ما ادري
بس الاعرفه هذا الإنسان هو اللي يحبه گلبي

حسينه من الباب تريد تنفتح بس مرتجى قافلها
جان نفضحنه ، من نتبهت ع الموقف
خفت و كمت ابجي لأن انتبهت لحجم الغلط اللي سويناه
حرام اصلا يلمسني مو عاد يبوسني و انوب يفتح حجابي
شافني ابجي حضني هدئني حت يكدر يتصرف

كعدت على سريرة اعدل نفسي هو هم فتح الباب و طلع ما خله احد يدخل او اني ابين
وكفت ورة الباب واسمع هذا رزاق اللي فوك
يسأل عليه لان ما شافني لا جوة و لا عد رنا
تشاهدت لان هاهيه رحت بيها بعد
رزاق ما رح يرحمني لو يشوفني
ياربي ساعدني شسوي هسه

مضت ربع ساعه واجه مرتجى
رجع قفل الباب و كعد يمي
بلسم. «عرفوا اني هنا مو»
مرتجى .«لا بس رزاق شك بينه»
بلسم .«مرتجى اخطبني لا تخليني اموت بذنب اللي صار هسه»
مرتجى .«مصار شي كبير ، مو غلط ننجرف وي مشاعرنه واحنه ثنينه نحب بعضنه»
بلسم .«الله يخليك مرتجى ، والله حرام .. اصلا حت هاي كعدتي هسه كدامك حرام»
مرتجى .«احبج بلسم ، تعرفين شنو يعني احبج .. يعني انتي إلي وبس ، واليوم اني جايب مشيه عليج تدللين»

بلسم .«حت اني احبك والله بس لازم ننتظر💏»
قاطني مرة لخ ببوسته اللي التهمني بيها
احس نبض گلبي صار بشفايفي كثر ما اذاني هالمرة
فصلها و حصني حيل
من اكون بين ايدى
انسى كل الحلال و الحرام
وهو يستغل هالشي اعرف

ايد على خصري و الثانيه على شعري
راسي على صدرة و اسمع دكات كلبه
نفس كلبي يدك سريع و عالي

بلسم .«يلا ننزل خاف يصعد مرة ثانيه»
مرتجى .«مبقه شي واخليج مرتي»
بلسم .«اوعدني»
مرتجى .«وعد يا روحي انتي»
باس راسي و كمنه
رحت كدام المرايه الف حجابي وجان اشهگ
شمسوي هذا ، شفتي مبين شصاير بيها
وركبني زركه هم مبينه
نزلت شوي القميص حت صدري
هاي شوكت سوة هيج
التفتت عليه هو ينظرلي .«هاي شنو»
دمعت عيني شون رح ادبر روحي هسه
تقدم يمي .«لا تبجين ، رگبتج تنضم بالحجاب .. هسه اصيحلج فرح تشوف شون تساعدج هم»
بلسم .«حت انفضح عدل ، ليش ما فكرت بيه قبل لا تسوي هيج»
مرتجى .«حمدي ربج ما سويت اكثر حت تعرفين بعد ما اصبر اكثر»
بلسم .«شبيك لا تخوفني 😭»
مرتجى .«ما خوفج حبيبي شو تعاي نطيني 💏 حت دا انزل»
بلسم .«وخرر كافي بعد»
مرتجى .«ههه خلصت يلا سدي الباب بين ما صيح فرح»

طلع و بقيت صافنه و افكر بهاي الساعه الراحت
شسوة بيه و شون هيج سمحتله
لفيت شالي و عدلته دخلوا فرح و مرتجى
.«صخام شمسوين ولكم»
مرتجى .«بلا حجي زايد تعرفون احبها»
فرح .«مرتجى مو هيج ، اخوها بس يشوفها يعرف»

نزلت دموعي على الصامت
اعرف كلامها صحيح و رزاق رح يلاحظ رأسا
إجه يمي مرتجى مسح دموعي
وباسني من راسي .«كافي بجي ، حت لو عرف اني طلبتج وهذا هو اخذت كلمه بعد»
بلسم .«رح يرفضك اعرف»
فرح .«لا نطاه لا تخافين ، و هسه تعاي خل نشوف شون ندبر اللي مسويه»
مرتجى .«بلا لغوة ليشوفج يكول انتي ورجلج انبياء»
فرح .«رجلي ذاك مو ماعندي اي صله بيه😠»

خليت شوي كريم اساس و حمرة فاتح فرق عن الاول
دخلت رنا .«ها اليوم يم مرتجى»
مرتجى .«ابشر مريتي حصلتها غير 😒»
رنا .«لا تكيف رفضك»
بلسم .«عليج علي صدك !!!😨»
مرتجى .«هسه اذبحى لو صدك»
فرح .«كافي خبال و حقه ترة»
رنا .«فهموني شصاير ؟ رزاق ليش عصبي ؟»
فرح .«بعدين حبي ، يلا ننزل»

كلنه نزلنه و صدت عيني بعين رزاق
راسا نزلت عيني و رحت كعدت بعيد عنه
مرتجى اجه كعد كدامي
جدة بيدها زهرة و كعدت عددتلها و لبگتها
سوالف البيبيات حلوة و تعدادهن يضحك
نسينه السالفه و صار ضحك و سوالف
حت رزاق و مرتجى تشاقوا عادي
للعصر اجو عباس و كرار هم و نجمعنه كلنه

رزاق كام كال يلا بعد نروح قبل لا تظلم
و طفر بوجهه مرتجى .«رزاق هالاسبوع نسوي كلشي رسمي»
رزاق .«لا تصدك نطيتك ، انت مو كفوا»
مرتجى .«اذا ما تريد انزل راسكم ، تنطيني»
رزاق .«لككك عااار احفظ لسانك 😠»

تباسطوا و كوة فكوهم مرتجى عصبي و يرجف
و رزاق هم عصبي بس مو مثله
سلمنه و طلعنه رأسا
بيدي زهرة حت ما يعصب عليه ولو وين رح اروح

وصلنه بيتنه و عدل و گبل للغرفه
رزاق صيح و حجه بس رنا و كرار هدئوه
ساعه و اجه اخذ زهرة ولا حجه وياي حرف ..»

رنا .«بربج انتو لاعببن لعب واني ما أدري»
بلسم .«رنا مغلط طلبني مو يتسلى بيه»
رنا .«شوفي احجي وياه يكول لا هذا هو ولا احجي بعد»
بلسم .«شعندي غيرج ، عليج الله سهليها عليه»
رنا .«مو وجه نعمه انتو ، ادري من هسه تماديتوا من تتزوجون شسون لعد»
بلسم .«منسوي بس المهم اكون اله»
رنا .«😒 شريفه خطيه ما تعرفين»
بلسم .«عليج الله رنو بداعه روزة»
رنا .«الله كريم ، كومي نكمل العشه قبل لا تبجي هاي المفجوعه»
بلسم .«وج لا تشدين وياها»
رنا .«كومي حبابه بيج بس لسان»

كملنه تحضير عشه و تعشينه كلنه
صبيت الجاي و اجه اخذة كرار
رزاق .«رناا زهرا تبجي»
رنا .«انت ابوها روحلها»
كرار .«انتو لو تتعاركون على وحام لو على زهرا»
رزاق .«اخذها يمك لعد»
كرار .«والله مشتاق لمرتي واريد اسهر وياها اليوم»
رزاق .«عايزة والله ، تزوج واسهر»
كرار .«اكولك اروح يمهم ما ترضى ، اسهر وياها بالتلفون ما ترضى شبيك انت اخذ مرتك و اصعد عوفني»
رزاق .«اي حت هم مثل اختك مو»
رنا .«رزااق يلا كوم»
كرار .«وشبيها اختي»
رنا .«ما بيها يلا رزاق تصبحون على خير»
رزاق .«جيبي بتج»

صعد و رحت لغرفه عمتي
اخذت زهرة وصعدت وراه
غيرتلها ملابسها وخليتها بحضنه
.«اكمشها خل ابدل»
رزاق .«رنا مرتجى غلط شي وي بلسم»
رنا .«لا تخاف حققت وياهم ماكو شي من الي تفكر بيه»
رزاق .«لا تطمطمين»
رنا .«ما تثق بيه لا تسأل لعد»

بدلت و اخذتها منه ارضعها
رزاق. «مو ثقه ، بس اريد افهم»
رنا .«سالت و جاوبتك»
رزاق .«ليش هسه يلا صاح اريدها»
رنا .«لا مو من هسه ، من احتركت واجه لمحلك ترة»
رزاق .«اي وصار هواي بعد ما فتح الموضوع كلت غير رايه»
رنا .«عدنه الحب من ينزل بالگلب ما يطلع بعد»
رزاق .«مثل حبج يعني»
رنا .«انت ما حاربت هيج مثله»
رزاق .«اووف اوف خليني ساكت»
رنا .«وهسه خل الولد يخطبها لا يتهور صدك»
رزاق .«حت اعدمه»
رنا .«ترة مشاعرهم متبادله مالك حق»
رزاق .«لا تشجعيها»
رنا .«لا والله بس اعرف مرتجى يصونها»
رزاق .«خل اهدئ منه اول»
رنا .«سهلها هليهم بداعتي»
رزاق .«ما تشمرين بنتج عد عمها»
رنا .«هسه تنام»
رزاق .«مشتاقلج»
رنا .«بتك مورمتني مابيه حيل»
رزاق .«ههه اطيبك»
رنا .«لا تصير كلش اوفر»
رزاق .«منو تحبين اكثر اني لو زهراء»
رنا .«زهرة طبعا غير من روحي هاي»
رزاق .«وابوها شنو لعد😠»
رنا. «ابوها هو روحي»
رزاق .«اي جذبي»
رنا .«شو تعال»
رزاق .«ما»
رنا .«انت خسران كلت ابوسك»
رزاق .«اجي 😁»
رنا .«لا خسرت»
رزاق .«هههه ما اخسر وياك آنه»
رنا .«كافي حل تنام زوزة»
رزاق .«نامت ترة»
رنا .«بعد شوي»

بقه كاعد شوي و اجه اخذها من حضني
مسح حلگها و نطاني الخاولي مسحت صدري
اخذها لفراشها نومها و طفه الاضويه واجه
نمت بحضنه و غفينه

اسبوع و ردينه كلمه لبيت خالتي
و صارت المشيه و رزاق نطاهم بلسم
و شرطه جان تكمل دراسه يلا تتزوج
مرتجى وافق رأسا المهم اخذها
بعدها بلش الدوام و صار هو يوصلها
و كرار رجع لبغداد عندة خط هناك
اني هم خلصت هالسنه زين حمدلله
افضل شي هو زوزة اجت اني متخرجه 💃

حياتي هادئه ، رغم جنت متوقعه انه سنه ما طول
اتعارك وي رزاق و اتطلگ ووووو
مجنت حاسبه انه الله رح يزرع حبه شوي شوي
رزاق غيرني جذريا
هسه لو اشوف رنا القديمه
ما اعرفها أبد ، شون كانت و شون صارت
عائلتي هم حلوة و دافيه
الله حرمني من اهلي بصغري
و عوضني بزوج و طفله هم كل دنيتي

كاعدة الظهريه خلصت تنظيف بعد
و صعدت ارضع زهرة انومها خطيه
صار 6 ساعات على فد كعدة
خليتها بحضني ترضع و اگلب بالتلفون
دخلت بلسم و عيونها مدمعه. «شبيج»
بلسم .«ابن خالتج حقيير»
رنا .«خير انشالله»
بلسم .«كوليله بلسم بعد ما تريدك»
رنا .«غردي شصاير لا اكوملج»
بلسم. «يكولي تعاي اريد اعيد اللي صار بغرفتنه»
رنا .«تستاهلين حت بعد ما تذوبين بيدة»
بلسم .«هي مرة صارت و نجرفت ورى مشاعري ، شنو فكرني رخيصه يعني»
رنا. «شوفي ترة اول مرة حرام ، بينما هسه شيصير عادي انتي مرته شرع و قانون»

بلسم .«رنا اني صغيرة ترى ، مفروض يقدر خجلي»
رنا .«😒كومي لغرفتج حبابه»
بلسم .«كوليله هسه خل ينهي ماريدة»
رنا .«اكولج ترة الزواج مو لعبه اليوم اريد و باجر لا ، وبالذات مرتجى بصيحه وحدة يسكنج النجف»
بلسم .«😭😭😭»
رنا .«ابجي بغرفتج خل بنيتي تنام عندي شغل»
بلسم .«متوحشه لازم تواسيني»
رنا .«للاسف 😁»

طلعت و نومت زوزة بفراشنه
حاوطتها بالمخاد و نزلت
عمتي كاعدة على مكينتها تشتغل بجهاز كرار
صارلها شكد تشتغل بيه
كله على ايدها تريد تسويه
خطيه هواي تتعب لهذا البيت عليه
مو كلشي كلشي بلسم هم وياي
و من عدها امتحان ما خليها
عاد كرار يوكف وياي

رزاق لحد الان يغار من كرار لان قريب مني
من راح لبغداد و صار علي بمكانه
بالبدايه عادي عندة و بعدين رجع يغار
كملت تحضير الغدة رزاق و علي على جيه
خلصته وصعدت مددت يم زهرتي
عمليتي صايرة تصل عليه من اشيل ثگيل لو اشتغل هواي
عاد اليوم تنظيف وطبخ من غير سبحت زهرة

غفيت و حسيت على ايدة نلفت على خصري
التفتت عليه حضنته و خشمي برگبته
بعدني احب ريحته و اذوب بيها
احب قربه مني و انفاسه التصد بيه
احبه كله على بعضه

رزاق .«يلا حبيبي كومي جوعان»
رنا .«مكمله كلشي اسبح حت اصب»
رزاق .«ماشي ، كومي وياي»
رنا .«اغفه شوي حباب»
رزاق .«تعبتي اليوم»
رنا .«اي والله حت عمليتي مأذيتني»
رزاق .«درتاحي هسه اجيج»

ندت براسي اي و رجعت غمضت هو كام
راح سبح و اخذتني غفيه
ما كعدني لحد ما اني كعدت على بجي زهرة
رنا .«ها مامه ، صبري وين ابوج»
اتلفتت مموجود بالغرفه
خليت صدري بحلكها ترضع و دخل
رزاق. «ها كعدتي ، كلت اخذها لا تحسسج»
رنا .«لا تركها ، ليش نا كعدتني»
رزاق .«كلت ترتاحين مدام نايمه جانت»
رنا .«بعدني نعسانه بس اريد اكوم ، تأخر الوقت»
رزاق .«لا تسوين عشه اليوم»
رنا .«لا تخاف عادي اكدر»
رزاق .«لا حبيبي علي يجيب من برة»
رنا .«هااا لعد اسأل عمه شنو يجيب»
رزاق .«اي تمام»

كمت و عفت زهرة يمه
رحت طلعتلها ملابس و غيرتلها حفاظه
ابدي ارجع انام بس خطيه مو مال اعوفه
غسلت و رحت كعدت يمه
رنا .«شونك اليوم»
رزاق .«من ترتاحين كولي رزاق مرتاح»
رنا .«دوم ترتاح انشالله»
رزاق .«رنا باجر نطلع لبغداد»
رنا .«شعجب!!!!»
رزاق .«هم نروح نزور وهم خالج قاسم طالبج بالاسم»
رنا .«خير انشالله ، بيه شي خالي»
رزاق .«لا ، سألت اسامه كال لان صار هواي مشايفج»
رنا .«هااا ، هو حت محمد مسافر يمكن»
رزاق .«اي بس يمكن يرجع»
رنا .«خير انشالله»

جاب علي العشه و هم حضرته و وكعدنه كلنه
رزاق تخبل لان زهرة بدت تتوازن شوي
شالها لگفها و ثنينهم تكركر ضحك
لو ما عيب جان كمت وياهم اكمز 😂
كفينه السفرة و كل واحد راح لغرفته
رزاق و زهرة يمي لحد ما خلصت كف المطبخ
وصعدنه كل احنه سوة

حضرت جنطتنه لباجر
اخذتلها ملابس و حفاظات و معطرات
كلشي خليت عبالك رايحه شهر
رنا .«اخذلك ملابس مو»
رزاق .«اي سيت واحد هي ليله و نرجع»
رنا .«ما نطول اكثر»
رزاق .«لا دوامي ما اكدر»
رنا .«خلص براحتك»

الي هم خليت ملابس وي ملابسه
كملت لميت الغرفه طشروها مة لعبوا
رحت لبست دشداشه قصيرة و مددت
هي نايمه على صدر ابوها و تدردم وحدها
متونس عليها هو و يجاوبها
واني انظرلهم غفيت بعد
حسيت عليه خلاها على صدري
عدلتها و نمت هو يراقبها مبيه بعد

صبح الصبح تريكنا و طلعنه لبغداد
صلينه على محمد 3 مرات و استلمنه الطريق

اللهم صل على محمد وآل محمد

_________ سارة تروي __________

بعد ما دزيتله انه نعيد ونبني الثقه ... ماردلي و ولا عبرني طول هاي المدة المرت ...

ردت منة اي رد فعل ماكو
و يجوز هو السبب خلاني اتواصل وية احمد بنية اغيضه بس حتى يحاجيني

رجعنة نتواصل اني واحمد ورجع تعودي عليه تقريبا بديت احن لايام الدراسة ومن جهة ثانية اريد اعاند محمد واعاقبة لان تاركني بكل الطرق

بديت اضغط على بابا حت ارجع لدراستي او ارجع لادماني عالمهدئات وافق ارجع واخيرا حسيت بنصر 🔥
صادفتني عراقيل بسبب تركي للدراسة سنة واحمد حل الموضوع بمعرفتة حمدلله
ورجعت اداوم واحمد وياية
اما محمد ما كو اي خبر عنة
و ولا تواصل وياي من بعد آخر رساله بينه

و مرت هاي الـ ٦ اشهر
اسماء مراات تسال عني و علاقتنة مو مثل قبل بحيث عمتي تخابرني اكثر منها

فد يوم بالدوام و اجتني ايلاف
سارة : تعاي نصعد فوك حبابة عندي محاضرة اريد اكملها
ايلاف : ولج هي ساعة واروح وعود كملي براحتج
سارة : لا مو عدنة امتحان واريد ادزها لاحمد
ايلاف : شنووووو! احمد احمد؟! احجي !!
سارة : اي احمد مو تدرين وياية بعد شكو تسالين
ايلاف : سارة تخبلتي انتي لو شنو فهميني لج انتي متزوجة وعلى ذمة رجال وتعرفين احمد ومحمد شنو بينهم ليش تخونين ثقة محمد تقبلين هو هناك يلعب براحتة ؟؟؟ حرام الدتسوي والله ،، سارة اصحي لنفسج
سارة : اسمعها واكتب ،، طنشتها مااعرف ليش !!! هي هم زعلت وراحت

وطبعا احمد بهالفترة مرتااح لان ماكو محمد ورجعنة على طبيعتنة قبل بدون اي عائق بنظرة

مرة كاعدين بالكافتريا دنراجع للامتحان
و احمد ياخذ مني ملخصات فجأة كال

احمد : سارة اطلبي الطلاگ !
سارة : تفاجأت بكلامة ! وما حبيت اجاوب ، سكتت ورجعت عالدفتر واخذتني افكاري ........ تذكرت محمد وشلون تاركني 💔
بس بنفس الوقت مستحيل اطلب الطلاگ لان هو احن علية من امي هو الامان والحنان بوجودة احس نفسي ملكة ومحمد مايستاهل اتركة تعب وياية هو اذا طلب ماامنعة بس مو اني اطلب منة ،، قاطع افكاري بصوت حاد

احمد : وين صفنتي ؟؟ لازم تذكرتي !
سارة : لا ماصفنت ، واحمد رجاوءا لاتتدخل بيني وبين محمد
احمد: شنو لا تتدخل ! سارة افهمي اني احبج واريدج لحد هسة وانتي الي ومحمد اخذج مني شوفي نفسج شلون تار....

قاطعتة قبل مايكمل كلامة
سارة : هو قسمتي وماتاركني بس مشغول بدراسته مبقه شي ويخلص ويرجعلي ، مااكدر اطلب منة هالطلب صعب ومستحيل هو كلشي بالنسبة الي هو زووجي ( بلا وعي حجيت ماتحملت فكرة انه محمد يتركني و تذكرت اني الدااسوي غلط بحق محمد ومااردت اسمع كلمة تاركج )
هو عصب من كلامي
عافني وكام باوعت عليه طلع من الكافتريا
ضجت من تصرفة مالة داعي

و مضت الايام بنفس الروتين محمد ماكو وامي كانه ماعدها بنية وياها بالبيت ولا معبرتني
ادرس جعفر يومية من ال٧ لل١٠
ودوامي واحمد مايحجي وياية زعلان مااهتميتلة

وبيوم كملت من جعفر وصعدت درست شوية كملت كلت خلي افتح الحاسبة
فتحتها دخلت عالماسنجر ولكيت محادثة قائمة بين احمد ومحمد ! من حسابي تفاجات !
وخفت تركتهم غلقت الماسنجر ونمت 😞
ثاني يوم كعدت فتحت الماسنجر اريد اشوف شصاير ، لكيت احمد دازلي رسالة

احمد: سارة اطلبي الطلاگ وارحميني اني دااتعذب وهاي فرصتج لاتخيبين املي بيج (( محمد حسابي يمة من شايف الرسالة معصب وهو مجاوبة ))

محمد : ماشالله بكيفك تخطط ولك حقير كم مرة حذرتك من سارة الظاهر تريد اجدد الكتلة
احمد : اي اخطط مثل ما انت خططت واخذتها مني سارة الي ومااخليك تاخذها
محمد : انجب لك لو عندك غيرة جان من البداية تقدمتلها لو عندك شرف ماتحاجيها وهي متزوجة
احمد : هههههههههههه ضحكتني سارة هسة ملكتها من جديد والفضل الك لان تاركها وانت صرت ماضي

• محمد ( اني هنا اشتعلت شسوي بيها اني كم مرة كايللها ماتطلع خصوصياتنا وتالي تحجي لهذا الحقير وبالتفاصيل ماخذة راحتها اوووف يا سارة احمدي ربج مو يمي جان دفنتج )

محمد : لك نذل والله لو موجود جان عرفت اتصرف وياك بس هينة نلتقي شي يوم وعن قريب
احمد : اراويك الزلم شنو تعال وتتدلل ابني 😉

محمد : شوف لك حيوان تترك سارة بحالها وماتراسلها بعد لا وربك افني حياتك وحسابها يمي فهمت
احمد : مو بكيفك واذا مااراسلها فاشوفها بالمعهد ههه 😏

تركت المحادثة لان اعصاب صرت من الكلام محمد هسة شصاير بي
يا ربي ليش هيجي اني لا مرتاحة وية هذا ولا وية هذا كمت ابجي واحجي ، محمد ليش هسة يلا حجيت وتدخلت ! انت لو متدخل من البداية جان ماارجعت اتواصل وية احمد ، لمن هيجي تحبني وتغار علية ليش تركتني كل هالفترة كلها

احجي واضغط على راسي رجعلي الوجع يا ربي ريحني ودليني عالطريق الصحيح بقيت حابسة نفسي بالغرفة اني وابجي نمت للعصر كعدت نزلت شفت بابا ديسوي جاي

سارة : هلو بابا خلي اني اسويلك جاي ارتاح انت
ابويه : هلو باباتي وينج اليوم عود جمعة شو مختفية
سارة : اريد اشبع نوم الدوام حارمني من النومة
ابويه : اكلج بنيتي تروحون لبيت عمج ليث
سارة : اي بابا عفية ضايجة
ابويه : يلة لعد كملي ورحي تحضري
سارة : ماشي

كملت وصعدت بدلت ونزلت رحتة لبيت عمو ليث ولعبت وية ابنه غياث يمة يمة يخبل صاير وملاعيبة وحركاته مال الزمة اعضعضة ههههه
ذكرني بأمير من بقه عندي
صدك مشتاقه الهم من العرس لحد الان مرايحه
اذا اروح و محمد ماكو ضوجه
و اساس روحتي علمودة
لهذا بعد ولا وصلتهم بس على تواصل وي عمتي
اخذ اخبارة منها جنت

تعشينة يم بيت عمي وتعللنة
طلعنة ب١٠ تقريبا رجعنة للبيت
رجع الهدوء يعم عالمكان
امي كاعدة بغرفتها
و جعفر بغرفتة يدرس

صعدت لغرفتي بدلت وكعدت
صفنت شوية وكمت ارتب ميز التواليت
مااريد افكر اني بلا شي راسي ديموتني من الوجع والافكار الي براسي مالها نهاية
جان يدك تلفوني شفتة عمتي ابد ماقطعت سؤالها عني طول هالفترة
احن عليه من أمي 😞

سارة : الو هلو عمة شلونج
عمتي : هلو حبيبتي الحمدلله انتي شلونج
سارة : الحمدلله برحمة الله عمو شلونة بيت اسامة شلونهم
عمتي : الحمدلله زينين ، ليش قاطعة ويانة مانشوفج
سارة : ( اخذت حسرة ) عمة غير انتظر محمد يجي ويجيبني
عمتي : يعني الا محمد ! شوفي سورة يوم ١٦ تعالي يعني بعد ٤ ايام
سارة : والله شفايتلي بس مااكدر هم دراسة عندي ومحمد مايدري يروح يحجي عل.....

و قاطعتني
عمتي : معليج بمحمد عمج ديكول تجين وهو يجي ياخذج إنتهى
سارة : ماشي عمة تدللون
عمتي : يلة حبيبتي خو ما محتاجة شي
سارة : لا عمة ما تقصرون
عمتي : يلة مع السلامة
سارة : مع السلامة عمة

سديت الخط صفنت اني مااريد اروحلهم
بس بعد ما كدرت اكسر كلمة عمي 💔

مرت الايام وصار موعد روحتي واجة عمي اخذني
سارة : هلو عمو شلونك
عمي : هلا بسورة الحمدلله عمو انتي شلونج ، ليش هيجي قاطعة ويانة يعني اذا محمد ماكو احنة تنسينة !
سارة : لا والله عمو بس محمد مايقبل اطلع بلا مااكلة وهو الي يجيبني الكم
عمي : ماصار شي بنتي بس لا تكطعين بينه بعد
سارة : انشالله عمو تدلل

عم السكوت طول الطريق وصلنا دخلت للبيت وصارتلي مفاجأة !!!!!!!!
.
.
.
ص.
وهي انه محمد موجود !! شوكت رجع ؟
ليش ماحجة وياية ؟ ليش ماعمي وعمتي كالولي ؟ هو عندة مناقشة ليش رجع ؟؟؟

كل هالافكار دارت براسي واني متبسمرة بمكاني وعيني عليه

لا بيه اتقدم و أسلم عليه لان خايفه
و لا بيه ارجع بيتنه واني مشتاقتله

.
.

تنننن 🙋 انتهى البارت 😁
اعتذر للتأخير بس جديا مدا الحك بسبب الدوام
و طبعا الشكر لزهرتي هي اللي ساعدتني بكتابته
لو لاها جان لسه ما نزلت 😐
شكرا رويحتي zozaity 💜

ما اكدر اكول شوكت البارت الجاي
بس انشالله انزله أسرع من هسه
شكرا لصبركم 💚
دمتم بخير و عافية 😊

قراءه ممتعه ، لا تنسون الفوت 😀
الكاتبة : اسراء الخزرجي ❤