رواية احببتك انت الفصل الرابع والعشرون 24 - بقلم ESRA'

.
.
‏أحببتُكِ حُباً لَمْ يعرِفهُ إلّا من خَلَقكِ ❤️
.
.
محمد :
«يعني شنو ترجعين؟؟ سارة متزوج طفله اني؟
فهميني شكد عمرج!!! شنو من تكوليلي احبك يعني هاي كذب ومجرد مشاعر عابرة و انتي بعدج تردين أحمد!!! صار سنه و 4 اشهر انتي على ذمتي و صار 11 شهر من اعترفتيلي انه تحبيني ... عوفي الفترة القبلها ، هاي الـ11 شهر ما حركت شي بداخلج من تكوليلي احبك
ما حسستج بصدقها ؟ فهميني مقصر عليج بمشاعري حت تنتظريه اله !!! تذكري كم مرة كتلج يا بت الناس اذا بعدة بداخلج ساكن انسحب اني ، و قسمتلج انهي كلشي و ترديله
وضحي شنو ارجعله ؟ شنو تتعاركين بسببه ! »

بكل صدق ما اعرف منين نزل عليه الهدوء
شون حجيت بدل ما ابسطها ما اعرف
بس الاعرفه انه اكو وجع بگلبي كبير
هي تسمع و تبجي بس

محمد .«احجي سارة ، ماريد ااذيج»
صحت بيها نزت من علو صوتي

سارة .«احبك الك والله محمد احبك بس مدري شيصير بيه من اشوفه ، وحق جدك مو حباً بيه
حت من دعا عليه مارديته كثر ما رديته من دعا عليك .. افهمني
ضجت لأن كالي انت اللي دزيت علي يصارحني
و بسبب علي انت اجيت خطبتني
لو متأخر انت اسبوعين جان هو خطبني وصرت إله
محمد ذكرني بكل هاي الأيام ، مع هذا كتله عندي رجال مالي عيني وروح شوف حياتك
اندعا انه ما نحضى بضنه و كتله اني بنتك وهذا كافينه
لا تحكم عليه هيج انتظر اهدئ و اكولك كلشي
انت بالذات مالك حق تقسى عليه والله مالك حق😭»

محمد .«ليش مالي حق !! شنو تردين اسوي يعني
انتظر شوكت يحقق كلمته يقشمرج وياخذج
سارة اسبوعين ماكو غيرهن نتزوج و نسافر
هذا كلام نهائي ، ما يعجبج كل واحد يشوف طريقه»

شغلت السيارة و طلعت لبيتنه
دتحجي اشرتلها اسكتي
سكتت و كتمت دموعها بهدوء
محمد .«مسحي وجهج وصلنه»
سارة. «مبين باجيه رجعني بيتنه»
محمد .«كوليلهم بسبب عرسنه وها هي»
سارة .«محمد 😭 رجعني»

تركتها و نزلت فتحت باب الحوش
رجعت ركبت دخلت السيارة
نزلت و رحت سديتها هي هم نزلت
محمد .«يلا اشو دخلي بضحكتج شوي و تصعدين فوك»

جريت ايدها و دخلنه .«سلام»
عمه مليكه .«هاي رحت جبتها»
محمد .«غير جنني اله تجيبها»
عمه .«دخلي سورة كلهن جوة»
سارة .«اي عمه»

عصرت ايدها حيل و صعدت غرفتي
بدلت و كعدت على لابتوبي اراسل الولد
المهم اشغل تفكيري عنها بس مكدرت
صعب والله صعب
دخلت لاحسان خاص حجيتله
بس اريد افرغ اطلع الطاقه البداخلي
حت ما سويلها شي
وهو مثل ما عودني يسمع بس
كملت غلقته ورحت نمت
شوي و نفتحت الباب دخلن

_________ سارة تروي _________

يمكن تشوفون تصرفي غلط
بس جان هدفي هو استفزة حت يحجي
صح احبه هسه
بس جان هذا الصار كله ما صار
بسبب تسرعه هذا و خلاني على اسمه
هو الوحيد اللي ارتاح بيه
اني و احمد تعذبنه
و احمد بالذات لاني تكيفت على طبايع محمد
بس احمد عانه الألم بدوني
واني هم قسيت عليه هواي بالفترة الراحت

مو حنيت اله بس شعور بالذنب
انه اني سبب معاناته عاش وياي هالفترة
وبلحظه اعرف انه سبب معاناتنه ثنينه
هو محمد الشخص اللي احبه هسه

هذا اللي جان ساكن تفكيري لقبل ما يعاركني
بس من حجه محمد و ذكرني بكل ايامنه
هو الوحيد اللي وكف وياي
هو الوحيد اللي طلعني من اللي جنت بيه
هو الوحيد اللي رح احبه واستمر بحبه
قهرني من كال اسبوعين بس مع ذلك عذرته
يمكن لو اني شفت حبيبته السابقه
مرح اسامحه أو رح اتعارك وياه

وصلنه و قاطع افكاري من نزل
ما كعد يمنه ، لا رأسا صعد غرفته
غيداء .«تعاي سورة زين جيتي عبالي ما تجين»
سارة .«هستوهم راحو بيت ابتهال واجه محمد»
فرح .«شبيج !! صوتج مو على بعضه»
سارة. «لا عادي يمكن مريضه»
اسماء .«كومي سورة ، تعاي نشوف اموري»
مرام .«هستوهه اجت خل تكعد يمنه»
سارة .«اشوفه و اجيكم»

خلينه و صعدنه فوك ، فتحت الباب مدت راسها
و رجعت سدتها .«محمد بفراشه نفوت اهنا لو نروح غرفه البنات»
سارة .«شنو تردين !!»
اسماء .«ارد اعرف ليش باجيه ، ليش محمد مقهور»
سارة .«ماكو شي لا تخافين سومه»

سحبت أيدي ودخلنه على كيف غرفتنه
اسماء .«تعاي هنا محمد نايم»
سارة .«ما ينام هسه اعرفه»
اسماء .«نايم معليج»
كعدت ع القنفه ، رحت فتحت حجابي و علكته

سارة .«متفقه وياه حت يعرف شكو مو»
اسماء .«لا والله ولا حجيت وياه»
سارة .«لعد شدراج صاير شي»
اسماء .«لان محمد مستحيل يجيبج و يصعد رأسا»

رحت كعدت يمها .«اجه لبيتنه احمد و كلي انه محمد دز علي اخوج يعترفلي وهو جان موجود
بيوم اللي احمد اعترفلي كدام القسم كله
سومه ما شفتي احمد شكد بجه اذاني والله
احمد تربطني بيه صداقه قبل الحب بهواي
من شفته هيج مدري شون افكر بس اريد اساعدة
بس دعا علينه انه ما نحضى بطفل والله يطلع حوبته بينه ، هنا تخبلت انه اليحب ما يدعي بالموزين شما يكون
على صياحنه اجه جعفر رزله و طلعه من يمي
ماكو شوي واجه كال محمد يكول تحضري نروح
مكدرت سومه طلعت عصبيتي بيه و رزلني
ما اكولج مغلطانه بس لأن جنت عصبيه
من يجي احمد مدري شيصيرلي احس كلشي يتخربط 😭»

اسماء .«وحق هو اللي رزقني امير لو ما محمد هنا نايم جان سويت بيج سوايه يمعزايه
سارة انتي متزوجه ترة ، احمد شنو بعد فهنيني
مو تحبيه لرجلج شنو تتخربطين هو هذا حجي
انتي متستاهليه لمحمد هذا هو الصح
راجعي نفسج ، اذا تشوفين بعدج تحنين لذاك
رجاءا انسحبي من حياته
محمد مو بس حمايه هو اقرب إلي حت من علي
يستحيل ارضى تكسريه بيوم مهما يصير»

خلت و طلعت عافتني وحدي
كمت ابجي ايدي على وجهي
'احبه والله بس محد يفهمني ، محد يحس بيه'
احجي و ابجي مهتميت لعلوا صوتي
اضغط على راسي وجع يزيد بيه مو طبيعي
اكتفيت بعد وجع وجع وجع
شوكت ارتاح شنو كاعدة بين نارين
محد يصدك روحي بيد محمد
موقفي وي احمد اندفاع
بس والله ما عيش بلا محمد
هو أنفاسي مالي غيرة 😭

حسيت عليه سحبني اله
حضنته حيل .«افهني انت الوحيد والله»
محمد. «كافي ولا حرف»
صوته هم باجي عبالك
سارة .«شنو تريد سوي بس لا تخليها تعيد انه ابتعد عنك محمد صعب هالشي مكدر»
محمد .«كلت كافي»
سارة .«اسبوعين مو ، قابله والله قابله»
محمد .«كومي ننام باجر ورانه شغل وهوسه»
سارة .«ما خليني هيج»
محمد .«كومي بفراشنه اخليج عود»

عافني وكام راح طلعلي علاجي
نطايالي وراح ع السرير مدد
شربته و كمت بدلت ورحت يمه
بقه ساكت ما حجه شي بعد
واني دموعي تنزل بهدوء

صبحت الصبح هو مموجود يمي
كمت غسلت وجهي و لبست حجابي و نزلت
سارة .«صباح الخير»
عمتي و عمي .«هلا صباح النور»
سارة .«شونك عمو»
عمي .«بخير اذا بناتي بخير»
سارة. «الله يحفظك ، عمه محمد طلع»
عمتي .«اي يمه راح يجيب كراسي و يحجز كيك»
سارة .«هااا البنات كعدن!!»
عمتي. «اي ديتحضرون يرحون الصالون ، صعدي انتي هم تجهزي وياهن»
سارة. «لا عمه خل يجي محمد اول»
عمي .«روحي بابه اني انطيج اذن»
سارة .«ماشي»

تركتهم و صعدت بدلت ملابسي
و تجهزت ورحت لغرفه غيداء
سارة .«هلو صباح الخير»
غيداء .«هلا حياتي صباح النور ، تجين مو»
سارة .«اي عمتي كالت روحي»
مرام .«زين تسوين تعاي نتونس»
فرح .«غيداء لا تنسين البرنص»
غيداء .«اي خليه وي التاج»
سارة .«لا تخليه اليوم التاج خليه على العرس»
رقيه .«متدرين انلغى العرس»
سارة .«هاااا !!!!»
غيداء .«مصخمه ، قصدهه صار كلهن اليوم»
سارة. «هاااا ليش هيج سويتو»
فرح .«نفس سؤالي»
غيداء .«يريد من نروح للناصريه يسوي عرس كامل هناك»
سارة. «بس حقج تسويه هنا بين اهلج هم»
غيداء .«كتله كال يجون وياج»
فرح .«احنه نروح وياها زفه لهناك ، كولي لاهلج وتعاي انتي هم»
سارة .«كون محمد هم يرضا»
غيداء .«اسماء متكدر تجي تعاي انتي ع الأقل شسالفه نسوان اخوتي غير وياي»
سارة. «هسه اكوله لا تخافين»
رقيه .«يلا إجه عباس خل ننزل»
غيداء .«خل يدخل ما اطلع اذا ما آكل😁»
سارة .«ههه احسن وراج طريق»

نزلنه كلنه عمتي مجهزة السفرة وي اسماء
ما تحجي وياي زعلانه من كلامنه البارحه
ما تدكرت بيها هسه خل نروح و نرجع
كملوا و طلعنه ممرتاحه دزيتله رساله 'رايحه وي غيداء للصالون عمي كالي'
كلت عمي حت ما يحجي عليه
كلنه ماخذين فساتينه حت نطلع رأسا جاهزين

دخلنه الصالون وكلنه غسل و تشحين
كله صار إصدار جديد
اني عدلت وجهي و حاجبي شوي
سويت مكياج سموكي طلع كلش حلو
فستاني ذهبي اله بشدة
طبعا الله يستر لو يشوفه محمد
وياه سترة هو بس ما جبتها
لان حجاب البس من اطلع مالها داعي

المهم 6 ساعات جهزنه كليتنه
إجه عباس رجعنه بس غيداء راحت وي أكرم
يرحون استوديو اول وبعدين يرجعون
لافه حجابي عدل و ذابه شال على وجهي
لان مكياجي كلش طوخ

دخلنه البيت و كل وحدة راحت مكان
صعدت غرفتنه وي ما فتحتها صار بوجهي محمد

سارة .«هاا هاي بعدك !!»
محمد. «اي بعدني شنو هذا المكياج ، سارة هيج طالعه هاي كل عقلج»
سارة .«لا خاله شال على وجهي»
محمد .«شو دخلي بسرعه»

دخلت الغرفه كلت رح ينزل
شو هذا سد الباب و وكف كدامي بنظرة تفحصيه !!

سارة .«شبيك !!»
محمد .«فتحي حجابج بسرعه»
سارة .«اطلع حت افتحه»
محمد .«ليش اطلع مو تبدلين يمي عادي ماد ايدي يوم ! لا ، شكو خجلانه هسه إله اذا شي ما اقبل عليه»
سارة .«ثوبي ماريدك تشوفه»
محمد. «والله !! وبهالسهوله تكوليها»
.
.
محمد. «تفتحين الحجاب لو اني اجي»
سارة .«افتح بس اوعدني ما تحجي»
محمد .«بسرعه»
صدك متت خوف هنا لأن نبه على لبسي
افتح الدكم و اردد صم بكم عمي حت ما يحجي
ذبيته و غمضت عيني يارب هي رزاله
بس خليها بهدوء أرجوك

فتحت تك عين اشوفه صافن عليه
بس صفنته مو راحه لان مبين عصبي
اني غبيه مو كل لبسي على ذوقه
اخذت هذا شنو ! 😩

محمد .«هذا فستان بربج!!»
سارة .«مبيه شي وهي مناسبه»
محمد .«كدامي تخجلين و للوادم عادي مطلعه صدرج و جسمج ماكو خجل ، ماعدهم لسانات يوصفوج لزلمهم مو!»

سارة .«بيه سترة اكدر البس فوكاه»
محمد .«ورجلج الكلها مبينه و صدرج قابل رح تضمه السترة شبيج تخبلتي شجاج»
سارة .«ليش تكسر فرحتي»
محمد .«هاا وفرحتج بالمشلح يعني!!»
سارة .«معاجبك كول غيريه لا تتعارك»

تقدم عليه و كال .«لا ليش عاجبني بس يرادله شوي تعديل منا»

خله ايدة على فتحه الصدر و شگه
شهگت و التفتت عنه نطيته ظهري
محمد .«ليش خجلتي مو ما بيه شي»
سارة .«ليش هيج سويت 😭 تعرف لابسته على جسمي 😭»
محمد .«ارد اشوف مرة تطلع بيه عاندتي و عقابج ما تخطين خطوة وحدة برة الغرفه ، يلا حت هاي الشخابيط اللي بوجهج تمسحيها»

تركني ابجي و طلع ولا اهتملي ابد
شجاك عليه تخبلت فهمني
هي حجايه طلعت بلايه قصد
هيج قستك عليه 😭😭😭
رحت للكنتور طلعت تراك و بدلت
فستان بـ85 شون شوهه 😭
رحت على المرايه امسح المكياج اللي صار خريطه من الدموع
شفت عطورة شون مسطرهن
مديت ايدي و كلهن كومتهن بالكاع
اخذت وحدة وشمرتها ع المرايه هم كسرتها

اخرب غرفته مثل ما خرب فستاني 😭
خيولي بعد ولا احبه و ولا اريدة
كعدت على السرير تربعت
كدامي خليت علبه الكلينس و دكيتها مناحه
عبرت الساعه و دخل صفن على الغرفه
مهجولتها تهجول مبقيت عليه عدل

محمد .«شهالخبال !!»
مرديت عليه ميستاهل
امسح خشمي لو دموعي
و اشمر الكلينس بالكاع
محمد .«دا الغي سارة شنو هالمنظر»
سارة .«مو خربت فستاني اخرب غرفتك»
محمد .«والله من يكون فستان مال اوادم واخربه عود تعاي هجولي الغرفه»
سارة. «ما احجي وياك و ما احبك اطلع منا يخلص العرس ارجع لأهلي ولا اجي عندك»

محمد. «والله شنو الجديد اعرف ما تحبيني»
سارة .«اي مو احب ابن الجيران مو»
محمد .«هاي العايزة والله ، كومي لملمي»
سارة. «معليه غرفتك شسوي سوي مدخلني»
محمد. «هاا غرفتي و البيها مالتي يعني»
سارة. «ما اعتقد اكو شي مو صحيح»
محمد .«زين لعد انتي هم مالتي لان بغرفتي»
سارة. «معليك بيه»
محمد .«شوفي نقهرت عليج و رحت اخذتلج فستان كلت خطيه احرمها بس طالما هيج مسويه وحق هو الحق تحلمين ترحين»

شمر عليه بوكس الفستان و طلع
كول من البدايه جبتلج لو اله تتناگر 😒
كمت لميت گزاز العطور و المرايه
عدلت الفراش و شلت فستاني كترته
غسلت وجهي و فتحت البوكس شفت الفستان
بويه اذوب على ذوقه 😭
حقير يقهرني و يجيبلي هيج شي
كمت خليت مكياجي ورتبته
لبست ستريج كبس ع الجسم و لبست الفستان
بويه زفوني بيه كثر ما حلو 💃
فتحت شعري هم عدلته
دا البس ذهبي رجع دخل
رأسا لكنتورة طلع بدلته النيليه و دخل الحمام
ولا صدلي ابد ولا كال هاي منو
طنشته كملت تجهيز نفسي
طلع من الحمام مبدل مخبوص مدري شبيه
اجه يمي يدور بغراضه
شنو هيج ممرئيه اني !!!!

سارة .«لبسته ... ما تشوفه عليه ؟ ... محمد باوعلي ... محممد 😠»
محمد .«سكتي تعرفين تسكتين»
سارة .«ليش متباوع عليه»
محمد .«مزاعلج»
سارة .«صالحني وباوع»
محمد .«ماريد لان رح تكوليلي اروح وياها وما اريد ترحين»
سارة .«صالحني حت اكولك»
محمد. «افف سارة وين محابسي»
سارة. «معليه»

دا اوخر سحبني من زندي حيل اذاني
سارة. «شييك محمد تاذيت»
محمد. «من الغي تبقين واكفه»
سارة .«لا صدك زودتها لازم اني الازعل مو انت»
محمد .«اي ست الحسن لازم تزعل تعودت محمد يصالح مو»
سارة. «ما احجي وياك وخر»
محمد. «طالع ، سارة مترحين بالزفه وانتهى»

تركني و نزل
اليوم برعاية لازم نقهر سارة
فستاني و مكياجي و تسريحتي كلها خربها
واجه خرب الطلعه بعد شبقيت 😞😒
ربي سويلي فرصه اعضه الله عليك
هيج اريد اعضه بحيث يبجي يبجي من الوجع

كملت و طلعت صارت بوجهي فرح
.«ولج وين فستانج ذاك احلى»
سارة .«أستشهد حبيبتي ، هذا احسن»
فرح .«عزة خاف محمد شافه»
سارة. «اي 😭»
فرح .«ههه ليش احس شاگه وماشالله انتي لابسته على جسمج وحدة»
سارة .«سكتي لا تفرفحيني رأسا صديت عنه»
فرح .«ميخالف هو رجلج لا تبجين»
سارة. «خل كرار يسويها وعود كولي رجلج»
فرح .«هههه لا اذوبه وما خليه يعاقبني»
سارة .«عاب حظي اي والله شوف اللسان»
فرح .«ههه تعلمي ، يلا نزلي اهلج وصلوا»
سارة .«ولي منا بسرعه»

عفتها و نزلت والله يا الله
بت البارحه تتصرف احسن مني
امداني 👐

نزلت يم اهلي امي لأول مرة تمدح فستاني
جلگت الضحكه من الأذن للاذن
هسه يلا ارتاحيت حرفيا
صارت الحنه حلوة كلش و غيداء هم طالعه حلوة
ساعتين و كالو خل تبدل رح تجي الزفه
لبست الثوب الأبيض يجنن عليها
وهي جسمها شون ناحته وتعبانه عليه
صدك حلو طالع وهي نزاكه ملامحها
هم احتفلنا وياها ودك و ركص لحد ما سمعنه صوت الزفه دخلو البيت وصار الدك بالطرمه
كلنه لبسنه حجاباتنه و كعدنه نباوع
شوي و دخلوا اهل أكرم هم باركولها
هزوا هزتين و دخل أكرم بدلوا الحلق
رندة جابت الكيكه الكبيرة
و حور تصورهم من قطعوها و اكلوا
نص ساعه و كال لبسوها حت نطلع
لبست البرنص و كامت تبجي انوب
حضنت عمتي و دك بجي ثنينهن
اسماء فاركتهن .«كافي دودي هاي احنه يمج»
غيداء .«سومه امي امانه عدكم انتي و سارة»
سارة .«حياتي تبقين انتي الاصل وهاي قريبه علينه ليش البجي»
غيداء .«احبكم هوايه»

حضنتنه و بجت و بچتنه وياها
عدلنه مكياجها و لبست البرنص عدل
دخلوا عمي و محمد و اسامه
هم سلمت عليهم بدموعها
اسامه خطيه وگفته گوة
حضنها و وصه اكرم بيها
محمد .«ما اوصي لان اعرفك تصونها بس اذا زعلتها تحلم تسمع اسمها بعد»
اكرم. «لا تخاف بعيوني»
عمي .«نطيتك جنتي حافظ عليها»
اكرم .«انشالله اكون عد حسن ضنك واستاهل الجنه هاي»
غيداء .«احبك بابه »
حضنت عمي وهم بجت
عمي .«روحي بابه لا تبجين انتي رفعه راسي موفقه بنيتي»
غيداء .«مو تنسوني ها ترة اخبلكم وعلي»
محمد .«هههه ما ننساج روحي مو رح يموت»
غيداء .«ما اصبر اودع اهلي»
اسامه .«وين تودعين هي يومين و نجيج»
غيداء .«ها اذا هيج شكو خليتوني ابجي»
محمد .«انتي ام دميعه»
غيداء .«يلا منو يجي وياي»
محمد .«كلهم عدا مرتي 😁»
غيداء .«لا تخبث»
محمد .«ولج مو عروس ميصير احجي ، روحي لرجلج وعوفيلي مرتي»
غيداء .«والله ما ، شو اكرم اكمش الورد خل اشوف»
عمي .«وج بابه روحي عيب من العالم»
عمتي .«عوفي سارة اسماء جايه وياج»
غيداء .«البنيه فرحت ليش ما يخليها»
محمد .«باجر اسافر 8 اشهر يلا اجي خليني اشوفها عدل»

صدمني !!! فاجئني !!! مدري شعبر
شنو اسافر شنو 8 اشهر مدا افهم
شيحجي هذا ترجمولي بلا زحمه
فصلت عنهم ارد افهم هالجمله

غيداء .«تخليها تحضر السبعه لعد»
محمد .«هاي تبقى عد ابوها»
سارة .«روحي دودي بعدين نتفاهم على هذني»
اكرم .«تحضروا السيارة برة»
محمد .«يلا بسرعه تعشوا وراكم طريق»
اكرم. «علواه لو نطلع هسه بدت تظلم»
غيداء .«جوعانه 😁 خل ناكل اول»
اكرم .«اكوللكم شمسوين بأعداداتها شو مدا اعرفها»
محمد. «هههه وج فضحتينه روحي عاد»
اسامه .«خليها تاكل لا تتخربط عليك»
عمي .«يلا بويه طالع للعالم برة»

طلعوا عمي و محمد و اسامه
تعشت العالم و صارت ساعه 7ونص كال يلا
زفوهم و اخذوها و راحوا
البيت فرغ بقينه اني و عمتي و عمي
حت اهلي رجعوا وي مصطفى ولا كالوا بتنه
كفينه البيت اني و عمتي
خطيه دمعتها ولا نشفت سودة عليه
عمي هم مقهور بس يعني شيسوي
شوي و دخلوا الولد رأسا لغرفهم
كملت شغلي وي عمه وصعدت أبدل

دخلت الغرفه هو ولا معبرني
طلعت ملابسي و دخلت غيرتهن
علكت الفستان بالكنتور و التفتت عليه
.«احطلك عشه»
محمد .«ماريد» بنتر
سارة. «انزل تعشه عمه و عمو ممتعشين»

تركني و نزل !!!
ماخذ وضعيه زعلان بقوة
مهتميت يمكن لان اخته راحت
لفيت شالي و نزلت عمه بالمطبخ
سارة .«ها عمه اساعدج بشي»
عمتي .«لا يمه ارتاحي بعد بس احط عشه وهاهي»
سارة .«يلا وياج عادي»
عمتي .«شوكت تجين بعد فرغ البيت هسه»
سارة. «خل يكمل محمد كال رح يسافر 8اشهر»
عمتي .«اي عرسوا و خل يروح»
سارة .«ما اعرف»

خلينه السفرة و صاحتهم عمه
اسامه كال يريد ينام متاذي
و عمو ومحمد تعشوا على الصامت
كملوا و شربوا چاي
سارة .«عمو عرفت محمد يسافر هواي يلا يجي»
محمد .«معليج انتي»
سارة .«دا احجي وي عمو ترة»
محمد .«ساااارة»
عمي .«لا تصيح لو لان دتكولي»
محمد .«لا بس تعرف ما احجي وياها»
عمتي .«لعد شكو ما خليتها تروح زفه»
محمد. «يمه ابويه من يزعل هم يطلعج»
عمتي .«اي طبعا ، مرة حامل بيك و هو زعلان ردت كنافه طلعني اكلت ورجعت ولا عارض»
سارة .«هذا عمو مو محمد»
محمد. «تردين احجي شنو الفلم»
سارة .«انت التخسر 😌»
محمد. «شفتوا اللسان»
عمي .«اكيد مزعلها اللي هيج وياك»
عمتي .«صح وله سارة وين تستغني عنك»

خجلت 😅
باوعلي ضحك ودار وجهه
محمد .«لا تباعين خليني زعلان»
عمي .«بسرعه بابه تزوج و استقر»
محمد .«ورى سفري عود»
عمتي .«خليها هسه حت تروح سارة عدنه تبقى»
محمد .«ورى سفري يمه»
عمي. «نكول هسه يعني هسه»
محمد .«بويه آنه المتزوج لا تعاند كلت مو هسه وانتهى»

ضاج و كام صعد غرفته
سارة .«عمو خل يكمل احسن حت اني هم اتفرغ لدراسه جعفر»
عمي .«لا بنيتي محمد اعرف فلمه شنو»
عمتي .«استغفر الله ما بطلها عاد»

مفهمت القصد ، افر راسي منا و منا
عمه كالت صعدي اني ألم
واني هم صعدت ما كلت لا
دخلت الغرفه شفته مطفي الضوة ومدد
ذبيت حجابي و رحت دحست روحي بحضنه
راسي بصدرة دفنته و لفيت ايدي عليه

سارة. «اعتذر زعلتك بارحه و اليوم»
محمد. «نامي»
سارة .«صالحني حت انام»
محمد .«شايفه من اتذكر منظرج بالفستان ، تجي ابالي جريمه ترديها ابقي كولي صالحني»
سارة .«العالم كله ياذيني وانت لا لهذا ما خاف على نفسي وياك»
محمد. «منو كالج اني نبي فهميني»
سارة .«لو تريد مني جان حاولت بس أعرف انت شنو»
محمد .«نامي سارة»
سارة. «بوسني صار هواي مبايسني»
محمد. «ومن افقد عليج ابجي وكولي محد متجرا بس عادي تطلعين بفستان كلشي مساتر منج»

سارة. «تحسسني كلشي ملابسه عبالك»
محمد .«وهو هيج جان»
سارة .«احبك من تغار عليه»
محمد .«وهاي الاحبك الي عاد ؟»
سارة .«هيج متثق بيه»
محمد. «اوف منج سارة حبج اذيه الي ، نامي»
سارة .«احبك حت لو بطلت انت معليه بيك»

حضنته حيل و نمت
كلامه هضمني قهرني جرحني كلهن
استاهل صح بس مو بهيج يقسو عليه 💔

__________ رنا تروي __________

كبر بطني و صرت ثگيله بعد
حركتي صعبه كلش
تفاجأت بوضعي شلون صار هيج
بعد اسبوع و ادخل شهري
احس ظهري نقسم من الثگل
رغم بطني مو كلش كلش كبيرة
بس من دخلت الثامن هيج صار بيه،
رزاق انذار صاير بسببي مايقبل اتحرك
عمتي و بلسم دايرين بالهم وياي
فاطمه ولدت وجابت احمد للدنيا
اياد سماه احمد على اسم عمي
و احنه زوزة بقت

صار عرس غيداء و رزاق منعني اروح
كال حاس اذا ترحين تدخلين ولادة
و هم بقيت هنا بس خطيه تعب كلش وياي
الليل كله ما ينامه يراقب حركتي
من اكعد عود تجي عندي بلسم يلا يغفه هو
رزاق و رزق الله نطاه إلي
اتمنى انه الله يكتبلي عمر و اعيشه احسن ايام

كعدت هو ديبدل وراح لدوامه بعد ما وصه عليه
كرهت النومه حيل حت ظهري صار لوحه عدله
كمت بالصلوات و الف يا علي
رحت سبحت و لميت هدومه خليتهن بالغساله
لملمت الغرفه و نظفتها ساعه ونص كملت كلشي
رتبت ملابس زهرة بالجرارات مالتها
حضرت ملابس الوگعه هم بجنطه
خاف تصير الولادة حت مكمله
خلصتهن و حطيتهن بسرير الصغيرة
لفيت حجابي و طلعت كرار كاعد بالهول

رنا .«كرار»
كرار .«ها تعاي»
كام يمي سندني رحت كعدت يمه
كرار .«محتاجه شي كولي بلسم دتحضر الاكل»
رنا .«اي اعرف اريد احجي وياك»
كرار .«اي اسمعج اامري»
رنا .«تسلم كرار ، انت اخويه حت اكثر من ابراهيم .. اريد اوصيك على بنيتي من تجي ، امانه عندك تبقى .. قبل لا تحجي ، ابوها اله حق يتزوج و يشوف طريقه بس زهراء تبقى عندك ماريد مرت ابوها تعذبها»

كرار .«رنا شهالحجي واثق رح تشوفيها و تشميها لا تكولين هيج رزاق لو يسمعج يموت»
رنا .«هاي وصيتي سواء طلعت او لا»
كرار .«تكومين بالسلامه ، ماريد اخسر اختي طلعيلنه بحيلج»
رنا .«ان شاء الله ، يلا اروح امدد شوي»

عفته و كمت على كيف رحت لغرفتي ، مدري شجاني بس الافكار إللي براسي فضيعه
مددت بفراشي واني أتخيل رزاق يتزوج
هو زوجي و ابويه و اخويه و كل اهلي
صعب اتخيله بهالمكان
بس مالي حق اعترض لو الله اخذ امانته
يا رب

غفيت ، تعبت من التفكير
حسيت على وجع بظهري
كانه اسياخ حارة يدخلوها بيه
كمت الوب فتحت عيوني شفت رزاق جاي
من تعبه غافي يمي
شنو الساعه اللي اجه هستوني غفيت
كوة كدرت التفت شفتها ساعه 9
عززة هاي شكد نمت
الوجع بدة يتفاقم
خليت ايدي على كتفه .«رززاق كوم ، رزاق دا موت .... فدوة اروحلك كووم»

فز على صوتي .«هاا هاا شبيج شصاير»
رنا .«ما اعرف ألم الم يمكن ولادة»
رزاق .«شون ولادة بعدج مداخله شهرج»
رنا .«ما اعرف فدوة سوي شي دا اموت 😭»
رزاق .«اهدئي حبيبي هسه اصيح أمي»
رنا .«لا تعوفني الله يخليك»

طلع صاح عمتي و بلسم من الدرج و رجعلي
طلع حجابي بسرعه لبسني و هو لبس شون ما كان
اجت عمه و بلسم ساعدوني اكوم
دخل كرار على صياحنه شاف هيج اخذ السويج و غراض الطفله و نزل كدامنه
ارد انزل ما اكدر كوة شالني نزلني
احس ايدة ترجف و هو شايلني
خلوني بالسيارة و طلع بينه كرار للمستشفى
وصلت و شلتها شيل بالصياح من الالم
خايفه على بنيتي حيل
يا زهراء احضريني اريدها منج
دخلت الصاله و الطبيبه تفحصني
نطوني مهدئ بس ماكو وجع وجع يكص
خلت و طلعت مدري شبيها
عافتني افرفح وهم ولا وياهم

_______ من جهه رزاق ________

اخذتها المستشفى و گلبي قابضني
بعد وقت على الولادة ليش هسه اجاها الطلگ
طول الطريق انخا اهل البيت مبقيت امام يعتب عليه
اريد رنا ترجعلي بالسلامه
اذا لا سامح الله صار شي لزهرة
اكدر اضحي بيها والله يرزقنا بس مهم مرتي
وصلنه و دخلت الصاله واحنه ننتظر
الوب روحي تطلع ومحد طلع منهم
عبرت الساعه وطلعت الدكتورة
.«منو زوجها»
رزاق .«اني دكتورة»
دكتورة. «زوجتك شهر ثامن و مو وقتها حت علامات الولادة ما عدها بس طلوگه»
رزاق .«دكتورة اريد مرتي تكوم بسلامه ساعديها»

احجي و خنگتني العبرة عمري مراجف هيج
دكتورة .«اهدئ ضربناها ابرة تساعد على التوسع اذا ما صار نضطر نولدها قيصرية»
رزاق .«والخطورة»
دكتورة .«انشالله ماكو شي»

تركتنا و دخلت واني اسمع ونينها
يا رب العالمين يا رحيم
لا تحرمني منها بعد ما شفت حبها
يا رب استودعتك قلبي فاحفظه لي
رنا هي گلبي و لو صارلها شي اموت

مضت الساعه و الدكتورة كالت لازم عمليه
وقعت على الاوراق و دخلوها صاله الولادة
شوي و طلعت ممرضه صاحت .«زوج المريضه رنا»
رزاق.« كولي شبيها»
الممرضه .«يردوك بالداخل»

رحتلها ركض حت مدري شون لبست ثوب الأخضر شون رجعت ما اعرف بس شفت نفسي كدامها و هي من البجي عيونها حممر دم

رزاق .«روحه لرزاق وج رنا كومي بسرعه»
رنا .«ردتك قبل لا يخدروني ... ردتك تسمعها خاف يصيرلي شي واكون حارمتك منها ، ماريد تبجي ورايه و احمي بنيتي .. رزاق احبك بكد الكون ، ادعي زهراء تجي بالسلامه»

رزاق .«لا لا لا مو مقبول كلامج ، اريدج واكفه بحيلج و تكوليها حت انطيج جائزة ، كوميلي انتي بالسلامه مو مهم زهراء اريدج انتي»

رنا .«اعرف اذيتك ، سامحني»

اخذ المخدر مفعوله و غابت عن الوعي
دمعتي طفرت عليها حسيتها تودع
ادري مو هاي النسوان تولد شو ما يصيرلهن هيج
شو فاطمه جابت احمد و صحتهم صلوات على النبي
ربي حصلتها بمعجزة لا تحرمني منها

طلعت و مكسور عبالك كعدت اباب العمليات
اجه يمي كرار .«كوم خويه ادعيالها اعرفها تطلع بس تخوفك سهله شبيك ترجعلك و تكحلون عيونكم بزهرة»
رزاق. «ادعي كرار ادعي وياي»
كعدت فتحت القرآن و اقرة
عبرت ساعتين و سمعنه صوت زهراء
مرت ساعه ثانيه و طلعوهم

دكتورة .«حمدلله على سلامتهم»
رزاق .«ددكتورة رنا عايشه»
دكتورة .«الحمدلله ، مبارك ما اجاك»
رزاق .«الله يبارك بيج»

كمت ابجي و نزلت للگاع سجدت الشكر
الحمدلله ربي ، اشكرك على عطاياك
الف الحمد و الف الشكر
وزعنه اني و كرار و امي بشارة السلامه
بلسم راحت وي الطفله
كملنه و رحتلها دخلت شفتها
هستوها يفتحها البنج
تتألم و تون ، بست راسها و كعدت يمها
شوي شوي بدت توعه علينه
اجت الدكتورة نطتها مهدئ كالت رح تتوجع
و خلتلها فلاجيل و مغذي و بطل دم
هواي فقدت بولادتها اللي تطلبت دم

مرت الليله واني يمها حت لبتي ما رحت
تأكدت هي مبيها شي و صحتها زينه
مضت 6 ساعات و جابوها لازم ترضع
بين ما تحضر نفسها شلتها بيدي اذنتلها
هلكدها ريحتها عذاب
هاي زهرائي و شمعه بيتي
هسه عرفت ليش ابويه جان يكول لبلسم شمعتي

عدلت كعدتها و كعدت مقابلها
خليت زهرا بحضنها و خلت صدرها بحلكها حت ترضع
بس شو ما يطلع حليب !!
دزينه ع الدكتورة مدري شسوت وخرت من يمهم
شوي و كالت اي و رضعت زهرة اول رضعه

تمسد رنا على وجهه و تناغيها
رزاق .«واني مالي كلمه»
رنا .«شكرا لأن دعيتلي»
رزاق .«بس طلبتج من ربي»
رنا .«احبك رزاق ، انت رزق ربي إلي»
رزاق .«اووف لو بغرفتنا جان رديت بطريقتي»
رنا .«ههه عوفني تعبانه»
رزاق .«لا تحبيها اكثر مني»
رنا .«تبقى من ريحتك و غلاتك»

كاعدين و ندكت الباب ، اخذت زهرة و هي عدلت ملابسها و لفت حجابها زين
خليها بحضنها و فتحت الباب
بلسم و امي و كرار رجعو
كرار جايب عشه و امي راحت جابتلها قرآن
خلوه جوة راس زهرة و كعدوا تعشوا
رجعت بلسم و كرار وامي بقت يمي نبات عدها

هم تتالم و تتحمل بس من يزيد تفقد
يومين و طلعنه للبيت و بعد ثمن ايام نرجع نشيل الخياط
وصلنه و عمامها كرار و علي و اياد جايبين ذبيحه ذبحوها جوة رجلها مال السلامه
دخلنه بيتنه و بلسم محضرة فراش بالاستقبال
مددت رنا و خليت الطفله بكاروكها
رزاق .«نامي اروح بشغله و أرد»
رنا .«لا تتأخر»
رزاق .«ماشي ، يحتاج اوصي؟»
بلسم .«لا خويه توكل كل احنه هنا»
رزاق .«يلا في أمان الله»

طلعت گبل رحت للصايغ اخذتلها زنجيل
صبيته بنبضات كلمه احبك
و اخذت شباحات لزهرتي و سوار
اخذتهن و رحت اخذت مشكل حلويات و مريت لبيت إبراهيم

رزاق .«سلام عليكم خالو»
ابراهيم .«يا اهلا وسهلا ، هلا بيك نورتنه»
رزاق .«منور منور ابو وعد كلت اذا ما يذكرنه عمي احنه نروح نذكرة»
ابراهيم .«حقكم والله و رنا هم لو تعتب حقها بس نقلوني للكوفه و دايخ صار 8 اشهر اركض اريد ارجع هنا»
رزاق .«الله يساعدك روح الكوفه حلوة»
ابراهيم .«والله اعرف بس رونق تريد اله اهلها»
رزاق .«هم حقها بس اذا مدتصفه شون»
ابراهيم .«هذا آخر شهر بعد اذا ما طلعلي نقل غصب عني اروح هناك اداوم»
رزاق .«الله يقدم اللي بيه الخير»
ابراهيم .«اي رزاق امرني محتاج شي»
رزاق .«لا والله بس جبت حلاوة سلامه زهرتي»
ابراهيم .«لا تكول ولدت رنا»
رزاق .«مو دخلت و كلت خال و خال ما انتبهت»
ابراهيم .«ابد والله ، خير ما اجاك خويه و تتربه بعزكم و دلالكم ، يلا حت نحجزها 😂»

رزاق .«ابد اياد اخذها عود نخلفلك غيرها»
ابراهيم .«ههههه شونها شوكت ولدت»
رزاق. «صار يومين اليوم طلعتها و اجيتك»
ابراهيم .«مشكور والله اعرف مقصر»
رزاق .«ما اجيت حت تكول مقصر»
ابراهيم. «هه انشالله بالليل نمرلكم »
رزاق .«كل الهلا تفرح بشوفتك والله»
ابراهيم .«مشتاقلها ام لسان بعدها لو عقلت»
رزاق .«ولك هو شخلاني احبها غير السانها»
ابراهيم .«اخجل يولي اخوها كدامك»
رزاق .«صرت قديم بعد 😂 يلا اروح نلتقي بالليل»
ابراهيم .«انشالله سلملي عليها»
رزاق .«الله يسلمك»

رجعت للبيت اشوفها نايمه و زوزة هم
خليت الهديه يم راسها و صعدت غرفتنه
سبحت و بدلت و نزلت حت تعبي يروح
كعدت يمها اتمعن بتفاصيلها
بيضه على امها و رموشها طويله مبينه عليه
حلكها على امها و خشمها عليه
بقه اشوف عيونها
بقت مگابلتني و كاعدة و كتلها اريدها تشبهج
اعرف اني حلو بس غير البنيه على امها

مددت يمهم حت كلنه نكون جوة سگف واحد
وي ما غفيت بدت تتنعوص زهرا
كمت عليها هزيت الكاروك شوي سكتت
رجعت انام و كامت تبجي
شلتها اهشهش بيها بس ظاهر جوعانه
حست على صوتها رنا تدنت سوتلها مجال

رنا.«جيبها ارضعها»
رزاق .«نامي اني اسكتها»
رنا .«لا خليها خطيه»

خليتها يمها و بدت ترضع بس رنا تاخذها غفيات
بقيت اراقبها لحد ما نامت وخرتها
مسحت حلكها و خليتها بفراشها
عدلت ملابس رنا و نمت ع الطخم يمهم
اخذنه ساعتين و رجعت تبجي
عاد كامتلها رنا و كمت عليها
رزاق .«انتبهي عمليتج»
رنا .«اعرف بس تبجي شسويلها»
رزاق .«وين بلسم و امي»
رنا .«گتلهم ينامون خطيه وياي صار شكد نومت زوزة و كتلهم نامو»
رزاق. .«دنامي انتي هم»
رنا .«لا جيب اخليها على صدري تسكت»

اخذتها رضعت شوي و غفت
عيارة هي گوى بس حت تكولي
هاي امي بعد مو الك
بت الحلوة هو هم صوچي خلفتج
صدك ضجت اهتمامها بس ابتها
ولا كالتلي شلونك 😒
مددت مقهور منها

_________ رنا تروي _______

مرت ايامنه وي ضحك و بجي زهرة
شلت الخياط و رجعنه لغرفتنه بعد
عمتي سبحتها لزهرا و دفتها زين يلا صعدتها
اخذتها رأسا رضعتها و نومتها
كمت طلعت ملابس لأن لازم تسبح بعد
شو اجه يمي رزاق يطلع بملابسي وياي صافنه عليه

رنا .«تريد شي؟»
رزاق .«اي ، اليوم اني اسبح مريتي ادللها دلال»
رنا .«لا فدوة رزاق اخجل والله»
رزاق .«عليج الله ! من شنو ولج مو خلفنا بعد صرنه عرف ماكو خجل»
رنا .«الله عليك»
رزاق .«قافل لا تحاولين يلا للحمام»

جرني من ايدي و دخلنه
سبحني هو و حذر كلش وي عمليتي
ههه حنفشت عليه و بوسته خليته يعصب
لان عمليتي خضرة بعدها ميكدر يقربلي
خطيه تبلل هو انوب 😂
كملني لبست البرنص و طلعت هو سبح بسرعه وطلع
لبست ملابس ثخينه دفيت بطني
اجه هو مشطلي شعري و شسورة نشفه كله
مدد و خلاني بحضنه
رزاق .«نامي اليوم بحضني مدام بتج نايمه»
رنا .«ههه حارمتك مني اعرف»
رزاق .«خل تكبر شويه و اطردها»
رنا .«ما عزة»
رزاق .«ما اني الاكولها انتي مالتي مو مالتها»
رنا. «ياا شجاك بتك هاي»
رزاق .«والله معليه اني»

حضنته و بوسته و نمنه حت ما يزعل
يمكن 3 ساعات و كعدت
بس زين طولت هي 4 ساعات نومه على فد جرة
كاملها ابوها جابها يمنه خلاها على صدري
رضعت شوي و جرها .«شجاك خل ترضع»
رزاق .«لا ولج ترة ليهسه مشاربه مي هسه تذكرت»
رنا .«خل ترضع و عود اجيبلها»
رزاق .«لا كلت كافي»
رنا .«والله حرام عليك طفله ترة»

رجعها بحضني و كام زعل
عززة هيج يغار من بته يمه شنو هذا
غار بس مو من جهالك !!!!
(فاجأني اني هم والله 😂 .... اسراء)
المهم

مرت شهرين و رزاق يغار بجنون
كمت ارضعها و تشبع حت اتفرغله
عبالك هو الطفل مو هي
من يجي من دوامه يشاقيها و يلعبها
و بعدين يشطحها يم عمها
حت فشله من كرار شيكول مشايف اخويه

تعودت على عمها اكثر من ابوها
كرار كلش مدللها و يحبها
و رزاق كثر ما يغار منها يعاركها مرات
بس يحبها يموت عليها
كله يصيحلها زهرائي لو شمعتي
وعد كامت تجي حت تشوفها و تلعبها
رونق تكول مجننتنه نروح لعمه نروح لعمه
بعد روحي وعد مو بنيه عمر 6 سنوات
عبالك جبيرة و تفتهم و تسمع الكلمه

زهراء ملت عليه فراغ شكبرة ولا جنت حاسه بيه
و يمكن اني ممنتبهه عليه وهسه نبهتني
حسيت ولدت من جديد حت تفكيري بدة يختلف
يمكن بنيتي نبهتني انه هي بنيه ولازم اداريها حت ما تشوف مثلي و تتاذة
صح خالي و مرت خالي ما قصروا من عشت عدهم
بس ابقى مو بتهم و احتاجيت امي بهواي امور
اتمنى الله ينطينه عمر اني و ابوها
لحد ما نوصلها بدراستها و نزوجها
اتمنى تحصل واحد يحبها مثل حب رزاق إلي

شارة و افكر و زهرة نايمه بحضني
حسيت على رزاق حضني من ورى
رنا .«زوزة بحضني»
رزاق .«خليها بفراشها مشتاقلج»
رنا .«بعدني تعبانه»
رزاق .«مشتاقلج»
رنا .«اني هم والله بس تعبانه»

كام زعل ، صاير اقلشي يزعل
كلش صعب صار من اجت بته
كمت نومتها بفراشها و سبحت
لبست ثوب قصير و خليت مكياج شوي
ماريدى يرجع عصبي تعبت منه
بقيت انتظرة طول جوة
كمت اغفي وهو ماكو نمت
حسيت على حركته و وكاحته
معترضت شسوي يعني
اخذني بلهفته و حبه و كعدت زهرة
كام يسب و يلعن لان صار كم مرة هيج 😂
كمت عليها و هو راح سبح و اجه نام
شبيدي عليك ما تفهمني

________ سارة تروي ________

من ثالث يوم عرس غيداء و محمد سافر
حت لبيت اهلي رجعت وي عمي
زعلان محمد كلش لدرجه عافني
قهرني حيل
طول هاي المدة هو ما سأل عني أبد
تعمت افتح الحاسبه رغم اعرف مربوطه بحاسبته
صارت 3 مرات بنيني و بين احمد محادثه
و عادي حجيت وياه على أمل يجي حت لو يعاركني
اعرفه تعب مني و مل
حت ما استغرب لو كال انتهى طريقنا 💔😭
.
.
.
.
.
.
انتهى 💃
شلون البارت 😊
.
.
صورة الواجهه مال البارت هذا فستان عرس غيداء 😁
أما فستان سارة اللي تلفه محمد والي جابه هم موجودات ، بس النت ضعيف مديحمل داخل البارت ... لهذا انزله بعدين 😩
.
.
البارت اليجي احتمال أتأخر بيه
هذا الاسبوع اكمل دوامي 💔
انشالله انشالله ما طول هواي

لا تنسون الفوت 👇
الكاتبه : اسراء الخزرجي 💜