#أحببتك_انت
.
.
أحب ذاك الـ يميزني
ويرسمني حلم وأنوب
يَتعبلي ويحقُقني ،
أحب ذاك الـ يقدسني !
.
.
محمد :
وصلت لندن عقيل موجود بالمطار
تسالمنه و رحنه للبيت
تركت الاغراض و طلعت رحت لجامعة باث
لحد ما وصلت ساعتين !
شلون يوصلون عالوقت ما اعرف
دكيت لعلي انه وصلتله
شوي و طلعلي
علي .«حمدلله عالسلامه»
محمد .«الله يسلمك ، ها شلونك»
علي .«زوين ، سلمت الكتاب و بعد يومين المناقشه»
محمد .«يي زين ، تخلص على خير»
علي .«منو اجاك»
محمد .«عقيل شفت بس ، إحسان مموجود وين»
ما جاوب ، رحنه للمركز التقيت بالدكتور
كل التقارير ماخذها وياي
من بدايه شعله الإدمان الى اخر مرة
كال يراجع الامر و يرسلي خبر
رجعنه للبيت عقيل و احسان موجودين بعدهم
محمد .«سلام عليكم»
احسان .«وعليكم السلام ، شوكت جيت»
محمد .«اليوم ، رحت بشغله وهاي جيتي»
عقيل .«يلا طلعوا كلكم خل اكمل بلا لغوة فوك راسي»
محمد .«واخيرا شفتك شاطر قبل لا اموت»
عقيل .«طول عمري شاطر»
عفته و رحت شربت مي
رسلت لعلي 'مراح تكول منو'
جاوب 'احسان'
شنو إحسان ؟؟ ليش يجيبلها يعني !!
هو يعرف كل شي شلون يسوي هيج
من التفكير راسي أفتر فر
كعدت بالصاله و هو كدامي ولا وياه
معقول يعني بينه شي صاير و يريد يأذيني من خلالها !!! لا لا إحسان صديقي العمر كله شسالفه
محمد. «إحسان»
رفع رأسه نظرلي ينتظر كلامي
نظرت لعلي و عقيل هم انتباهم وياي
إحسان .«كول أسمعك ..... »
محمد .«هيج انسى»
كمت لغرفتي عفتهم
لا محمد تفكيرك غلط اكيد
هذا صديقك قابل رح يضرك هيج
هو يعرف شكثر تاذيت
ما معقول هو ، لا علي غلطان
رسلتله لعلي 'علي متأكد انت'
شوي و دخل الغرفه سد الباب
محمد .«ترة عقلي على شعرة و يجن ، احجي شنو قصدك»
علي .«الصيدلي من شاف الحبايه وعرف نوعها ، كال قبل كم أسبوع نطاها لشخص .. مدري شلون طلعتله صورنه كلنه ، اشر على إحسان كال هذا الشخص»
محمد .«فهمني شرح اسوي ، أحسان كبرت وياه ممعقول يأذيني هيج»
علي .«شوف محمد ، ما اكولك هو متقصد و ولا اكولك يمكن غلط لان مثلك ما اعرف الحقيقه ، بس اهدئ و اسأله .. حت لو هو جان واثق رح يبرر السبب»
هو هيج لازم
لازم اهدئ و اسمع منه
ما لازم اتهور بشي و اعقد الأمور
يبقى هذا إحسان
علاقتي وياه حت اعمق من علاقتي وي أسامه
خليت ورحت للحمام سبحت بمي بارد
مدري دا اهدئ روحي لو اعذبها
يا رب وين الصح
طلعت صليت فرض الظهر و العصر و طلعتلهم
كاعدين علي و عقيل يدرسون و احسان يشتغل بالحاسبه مدري ايش
محمد .«إحسان»
إحسان .«اذا هم تصفن ولي منا»
محمد .«سارة وصتك على شي علاج من جانت هنا»
نظر لعقيل و رجع نظرلي
احسان .«شوكت يعني»
محمد. «قبل لتروح غير»
عقيل. «ليش تسأل»
محمد. «غير اعرف يعني»
احسان .«اي جبتلها كالت محمد يدري»
علي .«زين ما شفته انت شنو»
عقيل .«لا ما شاف شي»
محمد .«من كلامك يعني تعرفون شقصد»
عقيل .«إحسان مدخله»
محمد .«عقييل »
وكف على حيله
إحسان .«لحظه عقيل ، اي اني جبته لان حضرتك تعرف بيه»
مدري شون كمت نطيته 👊
محمد .«هو شنو الادري بيه ، انت اكثر واحد تعرف شون اتصرف من توصل للادويه ليش ما جيت و كتلي»
علي .«اهدئ و لا تغلط ، تفاهم بهدوء»
عقيل .«ترة مصختها انت ، خل اكولها هم بوجهك احسن ، مرتك وصلت هالحال كله بسببك و كله انت تتحمل مسؤوليته لا إحسان اله دخل و ولا حت ذاك احمد كله بسببك»
ترك المكان و طلع ، شوي و طلع وراه إحسان
كعدت بمكاني أفكر يعني بشنو سببي !!
الله يلعن الحب و ساعه تعرفت على ذولي هم ديالله
علي .«لو شما يكون ما لازم تصربه ، هسه اكولك صدك غلطت»
مرديت عليه
وكأني ناقص وجع جاي تكمل
اعرف هسه تسرعت بس لو ممسوي هيج
جان طكيت و متت
دخلت غرفتي سديت الباب و مددت نمت
خل ارتاح شوي و اشوف شلون
نمت قرابه 4 ساعات و كعدت
كمت بدلت دا التفت نضرب الميز وكعت الساعه نكسرت
ديالله كملت هسه وقتج
عفتها دا روح عالمرايه نفتح الباب
إحسان .«كعدت»
محمد .«لا بعدني نايم ، هذا شبحي كدامك»
إحسان .«هااا زين لعد ، اطلع اريدك»
محمد .«من اكعد كتلك نايم»
إحسان .«ترة ما احجي وياك بعدني»
محمد .«اي الشبح هذا ديجاوبك»
إحسان .«ناقص مو بيدك ، كمل بسرعه»
تجاوزته رحت للحمام غسلت وجهي
اول ما طلعت 👊
باوعتله .«تخبلت»
إحسان .«لا بس دا اردها إلك»
متفقين قبل من يصير سوء تفاهم
و بعدين ينفهم الموضوع
اذا اكو بينه دين يرجع بنفس الطريقه
هههه بعدة يتذكر سوالف المراهقة هاي
باغته من ورة بضربه هم
و هيج تباسطنه عدل نقشنه شكولنه
كعد واحد كدام الثاني و طكيناها ضحكه
طلعوا علي و عقيل صافين علينه
عقيل .«كسرته عدل»
إحسان .«لا تركت شوي بيه حت ما نسمع صياح سارة و بعد شيخلصنه»
محمد .«بيك لزمه ثانيه حت انهيك هسه»
عقيل. «لا بعد دوري كوم يلا»
محمد .«كوله لهذا ما احجي وياه»
عقيل .«ههه تعلم طباكات من مرته»
محمد .«لسانك لا اكوملك هسه»
علي .«جهال هش يلا»
إحسان .«هاي كل قوتك»
كلنه ضحكنه عليه
علي .«اصلا اني نعمه عدكم ، العالم برة تتمناني بس شسوي گلبي اغبر باقي عدكم»
محمد. «ما ترجع لأختك و اخلص منك»
علي .«اكولك شو انت صرت ضدي هم»
محمد. «كلكم مالي بيكم»
علي .«صوجي دافر مستقبلي منوراك»
عقيل .«عوفه عوفه خيولي»
محمد. «رح اكوملك ومحمد»
عقيل. «هه 😏»
إحسان. «ارتاحيت هسه !! يلا كوم بدل خل نطلع»
محمد .«ما تبطل هالعادة؟»
إحسان .«اعرف ترتاح من تطلع عصبيتك هيج»
محمد .«إحسان ليش جبت السم ذاك»
إحسان .«ما اعرف انت متدري ، قبل رجعتكم بأسبوع لاحظت حالها ، كتله لعقيل و بدلناه بدون علمها»
محمد .«شلون يعني»
__________ FLASH BACK ________
بالمطبخ كاعدين نقرة و سارة دتسوي بالعشه
سارة. «محمد يطول يلا يجي»
عقيل .«لا راح لمؤيد هسه يجي ما يطول»
إحسان .«تردين شي»
سارة .«لا هيج»
طلعت الجبن من الثلاجه خلته عالبيتزا
شالت التبسي و ايدها رخت فلت منها
خترعت و رأسا لكفته قبل لا يوكع
ستندت عالكاونتر شوي و راحت للحمام
عقيل .«ملاحظ مثلي لو من عقلي هالشي»
إحسان. «شاك بسبب الحبوب الاخذتها»
عقيل .«يا حبوب»
إحسان .«يوم الاجو كالت محمد نسى يجيبلها الدوة ، شفته نوع مهدئات وانت تعرف محمد مانعها»
عقيل. «لا تكول رحت جبتلها»
إحسان .«كالت محمد عندة علم»
عقيل .«مستحيل ، يموتها والله»
إحسان. «شلون ، حت محمد ملاحظها ترة»
عقيل .«اصبر هسه اجيك»
راح شال قمصلته و طلع
اجت سارة تحاول تكون عاديه
خلت البيتزا بالفرن و حضرت المقبلات
إحسان .«سارة بيج شي»
سارة .«لا لا ولا شي»
إحسان. «ماشي»
دخل محمد للمطبخ .«ها بعدج»
سارة .«اي سويت بيتزا اليوم»
محمد .«عاشت ايدج ، عقيل وين راح شفته طلع»
إحسان .«عندة شغله هسه يجي»
سارة .«محمد انزل للاسواق جيب مشاريب»
محمد. «هسه ارجع لمؤيد انطيه أجار الشهر يوديه وياه و اجيب عود»
راح محمد لغرفته شوي و اجه عقيل
كعد كدامي وفتح السترة ماله خال كيس بيه حب ابيض !!
لشرتله شنو هذا ؟؟
كتبلي عالكتاب براسيتول عادي رح يبدلهن
شوي و طلع محمد .«طالع تردون شي وياي اجيب»
عقيل .«دوندرمه»
علي مد راسه .«كيك»
محمد .«زرعت بطنه كيك»
علي .«شسوي اذا مرتك تاكل حصتي»
سارة .«اني شعليه»
محمد .«ماكو كيك بعد ، ميطب الشقه ابد»
علي .«اشيل منا لعد ، تعرف احبه»
محمد .«حب شي بيه حظ»
عقيل. «ههه روح ما تخلصون منا للصبح»
إحسان .«جيب وياك زيتون»
محمد .«ماشي»
خله و طلع شوي و كام عقيل لغرفتهم
طول و سارة رادت تطلع من المطبخ
إحسان .«سارة بلا زحمه سوي جاي»
سارة .«بعد مو هسه»
إحسان .«لا لا هسه طفيت وبعدني ممكمل»
سارة .«بس اروح للغرفه اخذ تلفوني و اجي»
إحسان .«هاج هذا تلفوني»
بقت تنظرلي ، شكت اكيد
إحسان .«يعني اذا دتخابرين محمد»
سارة .«لا دا شوف جعفر اخويه»
إحسان .«هااا ، مماشي»
توترت شلون هذا بعدة بالغرفه
وي ما طلعت دخل عقيل
إحسان .«خرب متت ، رايحه للغرفه»
عقيل .«ولك هاي ارهابيه متأكد»
إحسان .«ليش»
عقيل .«ضامته فوك الكنتور ، دورت ماكو دا اطلع مدري شلون رفعت عيني شفت علبه»
إحسان .«اي تخاف من محمد يروح يعرف»
عقيل .«المهم بدلته وي ما طلعت شفتها»
إحسان. «و !! خو مشكت»
عقيل .«لا لا زبگت للحمام درته بالمنهول»
إحسان .«أحسن»
__________END BACK_________
محمد .«هو من بدلتوه انتو هي تركته»
إحسان .«تركته !!!»
محمد. «اي لان معدتها تحسست كلش وكامت تراجع»
إحسان .«هي قبل لا نبدله انتبهنه عليها»
محمد .«جانت حامل»
إحسان .«ام أمير كالتله لعلي»
محمد .« .. يصير خير انشالله ، كوم»
مديتله ايدي كمنه .. رحت غسلت
خرب اهلك إحسان ، خرب شكولي كلها
عقمته و طلعت كاعدين
محمد .«واحد بيكم يكوم يسوي اكل»
عقيل .«علي كوله لليمك ما عدنه خل يرجع بيتهم»
محمد .«لا تسخف»
عقيل .«علي كوله لليمك خل يسكت»
محمد. «علي دفرة من يمك»
علي عافنه و كام لغرفته .«الاسمع صوته اخليه يبات بالشارع»
محمد .«كوم عقيل سوي اكل»
عقيل .«اسكت محد اكو حت يوصلك كلامي»
محمد .«ما تبطل سوالفك»
عقيل .«والله هذي سوالفي معجبك ارجع بيتكم»
خله و راح غرفته !!!
شهالسوالف هاي 😠
رحت للمطبخ ادور بالثلاجة
سارة هنا مسويه اكل قبل لا نروح
إحسان .«لا تدور علي قضى عليه كله»
محمد .«هو أسبوع شلون خلصه بهالسرعه»
إحسان. «الليل كله يسهره يدرس ، حت ما يمل يكوم يسوي اكل»
محمد .«هف مبيه اطلع أجيب من برة»
إحسان .«افتح الفرن اكو صاج»
فتحته شفت ماعون بيه لفات صاج
محمد .«هذا شو هنا ؟ منين!!»
إحسان .«هاي بعيد عن ايد علي»
دخل علي .«اراويكم صبرولي عبالكم ما ادري»
محمد .«الك الثلاجه و اتركلنه الفرن»
علي .«شو دجيب»
اجه اخذ لفه و كعد ياكل
محمد .«منو جابه»
إحسان .«عقيل بمناسبه جيتك كال عشانه على حسابه»
محمد .«مو كتله كافي يصرف»
عقيل .«زين لعد حت بعد معليه بيكم»
اخذ لفته و شال بطل عصير و طلع
إحسان راح يطلع مايونيز ما لكه
إحسان .«بطل المايونيز وين ؟»
علي .«بارحه خلص وي البيتزا»
إحسان .«ترة صدك مصختها علي»
علي .«ترة اني جايبه شبيكم ، باجر اولي و تخلصون مني»
محمد .«وين تولي بلا زحمه»
علي .«ارجع للعراق»
إحسان .«و الصخام مناقشتك»
علي .«اكمل و اروح ، اكو شي لازم احله»
محمد .«خير مو من عوايدك كليندايزر»
علي. «من عندي نسيب مثل اخوك ليش ما صير كليندايزر»
محمد .«شبيه اسامه»
علي .«وصله عن لساني ، اسماء ترجع لبيتنه وابنه يريدة خل ياخذة .. و تولد بالسلامه و بنته هم خل ياخذها ، و خله يطلك بهدوء احسن مما اسويها عليه سودة و مصخمه»
محمد .«عرفت بالحلاويه»
علي .«هاا يعني انت هم تدري»
محمد .«ادري و ابويه هو اللي يتصرف وياه»
علي .«لا هالمرة ما اسكت بعد ، اول مرة كسروه كلت رح يتوب بس بعد خلص ماله فرصه»
محمد .«ومنو يكول هي نفسها»
علي .«كل عقلك تحجي يعني اكو غيرها !! اخوك ابو بنات وهو متزوج»
محمد .«اكيد عندة تبرير ، مالك حق تاخذ اسماء اذا ما نسمع من اسامه شنو الموضوع كامل و ابويه هسه وياه ما تاركه وحدة .. صدك لو اسامه غلطان اني بيدي اجيبها الك وانت تعرف اني شكد احترمها و احبها»
علي .«محمد من تخابرك غيداء و تبجي ، ذاك الوكت رح تفهم موقفي»
محمد .«مو ضدك بس خل نفهم ، اسماء هم كثر ما تغار ممكن تفهم غلط»
علي .«لا ترگع لأخوك»
إحسان .«ولو مالي دخل بس رأي من رأي محمد ، افهم الموضوع عدل .. اكو بينهم اطفال لا تخرب»
إجه عقيل. «راسي رح ينفجر رسمي و تطير المعلومات قبل لا اناقش ، ساعتها اخذ مركز الاول بتعساء الحظ»
محمد .«كوم اسبح و العب رياضه شوي غير مزاجك»
عقيل .«مشتهي بيك بسطه محمد تعال يمي»
محمد .«مال هسه هم اطلع ضيم گلبي بيك»
علي .«مال انيمكم ثنينكم بالشارع هسه»
إحسان .«اكولك تذكرت ، منو هاي اللي اتصلت عليك الصبح»
علي .«ماريان ، رسلتلي شغلات لمناقشتنه باجر»
محمد .«منو هاي شو جديدة»
عقيل .«مرت اخوك الجديدة»
علي .«عاب حظك ، هي هاي شكول حت اتزوجها»
محمد .«خاف هاي الشگرة»
علي .«اكو غيرها»
عقيل .«ولك فستقه مفستقه شكو ما تزوجها»
علي .«لا لا اني اتزوج عراقيه بويه آنه ادور اصيل»
محمد .«هه هه هه وبعدين تعال كول ليش زوجتوني»
علي .«لا تحجي بناءا على تجاربك»
محمد .«ما ندمت اني لان تزوجت اللي حبيتها»
عقيل .«اي و خلتك تتعارك وي اصدقاءك علمودها والله بيها شكل بسطه مرتك بس الله يدري شلون»
محمد .«وبيك شكل دفرة انت ، بس الله يدري شلون»
علي .«المهم ، اني اخلص دكتوراه ، اجي اكولكم زوجوني»
محمد .«عجز عجز»
علي .«شما اكبر ابقه شباب»
عقيل. «محمد شايف البنيه اللي يدرسها إحسان»
محمد .«منو هاي»
إحسان .«انت وين شايفها»
عقيل .«هي كلتلي اني طالبه عد استاذ احسان»
إحسان .«هاااا»
محمد .«منو منهن ولك»
إحسان .«جاكلين»
محمد .«هاي بعدها ولا ايست منك»
إحسان .«هههه يمعود اصلا ما انطيها مجال»
علي .«انت اصلا تعذبهن»
إحسان .«ماحب السوالف هاي شسوي»
تعشينه كل احنه و كعدنه كلنه
علي و عقيل يكملون دراستهم
إحسان يشتغل بحاسبته و اني اراسل اسماء اشوف شنو الوضع
ما ذكرت شي عن اسامه
بعدها ابيتنه و اسامه اليوم يبات ابيته
كون يطلع تفكيرنه غلط و ما تهدم عائلتك
كام عقيل لغرفته نام وراه راح إحسان
بقيت وي علي لحد ما صار الفجر نام ساعه و كعد
بدل تحضر .. راح وي عقيل قبلنه
ساعتين و طلعت للمركز اخذت الجدول لعلاج سارة و شلون امشي عليه فهمني الدكتور
اتصلت على إحسان اخذته و رحنه لجامعه باث
عدهم المناقشات مغلقه مو مثل عدنه
بدخلون الطلاب و المشرفين فقط
بقينه برة ننتظر لحد ما شوي و طلعلنه عقيل يضحك
محمد .«ها شو بسرعه طلعت»
عقيل .«يكفي اللي كدامهم عقيل»
إحسان .«يعني طردوك ، فهمت عليك»
عقيل .«اعرف تقللون من قدراتي ، بس لا تخاف انشالله الاول على دفعتي»
محمد .«وعلي وين»
عقيل .«ديناقش جوة اله لو تشوفون كارولين اكلته اكل بعيونها😂»
محمد .«هسه يطلع المسكين كبل للمستشفى»
إحسان .«قابل هو محمد بزر نستله»
محمد .«اني بس هبط ضغطي ما رحت مستشفى»
عقيل .«المهم هسه هاي الامريكيه متخليه يناقش عدل هو من غير شي ممكمل و متوتر»
بسببي مكمل طبعا ، أسبوع اخرته وشغلته وياي
كون انشالله يطلع اللي يريدة
بقينه منتظرين لحد ما طلعوا ثنين و هو وراهم
المقرر مارك طلع و رجع دخل عصبي
علي التفت عليه و اخذ نفس ضايج شبيه
محمد .«ها !!»
علي .«وخروا اريد اروح للبيت»
محمد .«شصار جوة»
إحسان .«ناقشت»
عقيل .«لا تكول خربتلك التقييم ذيج السعلوى»
علي .«هي خلتني الغي بت الكلب»
تركنه و طلع من الجامعه
محمد .«رايح وراه شوفوا التقييمات»
إحسان .«روح ، لا تخليه يسوق هو»
محمد .«اعرف طبعا»
لحكته كاعد بالسيارة و متكي عالستيرن
فتحت الباب رفع راسه و شغل السيارة
علي .«ارجع جوة ارد اروح للبيت»
محمد .«راجع وياك انزل اني أسوق»
علي. «مبيه حيلك محمد»
محمد. «دوخر منا يلا»
عبر عالكرسي الثاني و صعدت سقت اني
محمد .«اعرف بسببي ما كملت»
علي .«لا تخبلني ولك ، اذا هي وي اول سؤال ختمت التقييم رأسا»
محمد .«يعني !! يا مركز اخذت»
علي .«الاول على دفعتنه»
محمد .«و مراضي»
علي .«طبعا ، محمد اريد اخذها بتعبي»
محمد. «وانت تعبت»
علي .«لا ، شايف شسوت بعقيل بس ما نطاها مجال لحد ما خلتله الختم وهي محتركه»
محمد .«على هذا مقهور»
علي .«ما تفهمني»
محمد .«اعرف قصدك ، بس هي هيج سوت لان معجبه بيك»
علي .«مارك رح يعترض لأن هو وي عقيل كلش ، ذاتا لو عرف عقيل رح ينقهر لان هي ما صانت مهنتها»
محمد .«هو لهذا غلط تصير هيج اشياء بيد النسوان ، هاي لان معجبه بيك تخطت الباقين»
علي .«الف مرة موضحلها يا بت الناس ماعندي اني هالسوالف»
محمد .«هسه انت ليش مقهور ، خلص مزين حصلت الأول هسه»
علي .«انت لو محصله بهالطريقه رح ترضى»
محمد .«لا ، بس ممكن اسكت و اروح رأسا اقدم عالدكتوراه»
علي .«بعد مو هسه اخذها ، تعبت اريد راحه»
محمد .«تزوج سنتين و ارجع اخذها»
علي .«واصير محمد الثاني اتبهذل»
محمد .«صح تبهذلت و تأذيت هواي بس شوف كملت»
علي .«اذا انت عندك صبر وي مرتك اني ما استحمل ، لا تشوفون اضحك وياكم و اصنف .. صدك لو سارة مرتي و هاي سوالفها دقيقه ما خليها بهالدنيا»
محمد .«حمدلله اللي هي مرتي و لا تشبه عليها»
علي .«شلون حبيتها هلكد و مندري بالله»
محمد .«اوف اسكت»
علي .«رحت للمركز»
محمد .«اي»
دك احسان .«الو وينكم»
محمد .«قريب ما نوصل ، شصار»
إحسان .«عقيل حصل الرابع»
محمد .«اي »
إحسان .«بس الثاني ككل»
محمد .«كلش زين ، و علي»
إحسان .«الاول على دفعته بس ما علنت شكد ككل»
محمد .«هههه والله هذا فار عقلها»
علي .«بلا لغوة ، إحسان عقيل عرف»
إحسان .«ههه اي عرف و فرحلك»
محمد .«راجعين !»
إحسان .«لا نروح للمطار نحجز طيران»
محمد .«اخذ طيارة تركيا حت ويانه»
علي .«ليش لتركيا»
محمد .«ماكو للعراق هالاسبوع»
إحسان .«ماشي نشوف»
غلقه وصلنه البيت
علي .«رح انام ماريد احد يكعدني»
محمد .«ما نحتفل يعني»
علي .«على شنو»
محمد .«تفوقكم غير ، وصيت كيك»
علي .«لا طبعا نحتفل اصلا منعسان»
محمد .«ههه ادخل نام ساعتين و اكعدك»
دخلت غرفتي حضرت غراضي
خابرت سارة شفت اوضاع البيت
تعبانه و تشكي بعدها نفسها ترد
شبيدي عليج ، كله من العناد هذا
لو سامعه كلا كل شي ما يصير بيج
اجو الولد و طلعت جبت الكيكه و عشه هم
اجو مؤيد و سامان هم احتفلوا ويانه
كلمن راح بيته و الكل جمع أغراضه
رحت للغرفه نمت و الصبح قفلنه الشقه
و طلعنه للمطار كلنه هالمرة نرجع شهرين
طرنه لتركيا و بقينه ليله ثاني يوم يلا ردينه
وصلنه اسامه اخذنه
علي سلم عليه بثگل
وصلنه عقيل و احسان و طلعنه لبيتنه
محمد .«شلونه الصغير»
اسامه .«خبالات خاله»
محمد .«شف الجذب همزين عندة خوال ثنين»
اسامه .«غيداء متخبله لأن يشبهك صاير»
محمد .«أصلا خل تحمد ربها»
اسامه .«اسماء تكلها خاله احلى من ابوه»
محمد .«عفيها بيها ذيبه»
اسامه .«شسويت بمناقشتك علي»
علي .«يعني علي اللي يناقشهم شتتوقع»
محمد .«هههههههههاي»
علي .«شكو تضحك ابو راس»
محمد .«مو يمك ، اكولك مرتك بالبيت لو رجعتوا»
اسامه .«الصبح وديتها تعبت كلش»
محمد .«لعد دروح بيتكم ، مشتاق لاموري»
اسامه .«رح نوصل»
محمد .«والله ما انزل ، نروح اشوفه اول»
علي .«احسن اريد اشوف اسماء هم»
اسامه .«شجاكم»
علي .«اذا مبيك حيل انزل هنا اكمل الطريق»
محمد .«اهدئ»
اسامه .«خلص رايحين»
حول الطريق لبيتهم
افكر شلون انفرد بيها اشوف شنو السالفه
وصلنه للبيت امير يصير اموو اموو
علي .«يا ساقط ولك خالك كدامك»
محمد .«اني الاصل بابه»
علي .«مبين تربيتك بعد»
محمد .«بكل فخر»
اسامه .«هو طباع خاله و اخلاق عمه بشنو طالع عليه ما اعرف»
محمد .«مو مهم انت»
اسماء طلعت بطريقه تمشي .«يا هلا»
محمد .«هلا بيج سومه»
علي .«هلا بطريقتي شلونج»
اسماء .«هلا بيك حبيبي حمدلله عالسلامه»
علي .«الله يسلمج»
اسماء .«شلونك حمودي»
محمد .«هلا بيج ، سمعت تعبانه»
اسماء .«يي تعبت شوي جيت»
محمد .«ههه هم امير و هم آدم و الصغيرة»
اسماء .«لا آدم اغلبه وي سارة بس غيداء نحسه تتألم»
محمد .«لعد اكرم وين عنها»
اسامه دخل مبدل .«رجع للناصريه»
علي .«هذا من الناصريه نسيبكم»
محمد .«ههه اي»
علي .«ما تشوف ما حبيته»
محمد .«خل يسمعك»
علي .«خايف منه قابل»
اسامه .«امه نقهرت لان غيداء بقت عدنه مو عدهم»
محمد. «ادري تروح منو يداريها»
اسماء .«هي حماتها رادت تجي عدنه خطيبها ما قبل»
محمد .«حور مخطوبه»
اسماء .«اي زواجها تقليدي على ابن عمها مسمايه»
اسامه .«يلا بعد كوم روح لمرتك»
محمد .«انت بتطردني يجاسم»
أسامه .«ههه كوم ولك البنيه هم تعبانه»
علي .«يلا انت هم روح وي اخوك خلني انام ، وها اخذ هذا الخروف وياك»
اسامه .«شكو تنام هنا»
علي. «بيت اختي انت شكو»
محمد .«ههههه كوم كوم ، اسماء بدلي لأمير اخذة وياي»
اسماء .«لا تركه يعض بس آدم»
اسامه .«تركهم العصر نجي عود»
محمد .«ماشي ، باقي انت»
علي .«اي روح خل اخلص منك شوي ، ترة تعب بكل مكان وياي»
محمد .«بعدين ارد عليك و الشغله ذيج تركها علي ، بعدين نشوف شلون»
هز راسه اي و تنهد
طلعت من عدهم للبيت
مشتاقلها و اريد اعاركها شلون هسه !!
__________ سارة تروي __________
سافر من يومين .. وقتي كله وي آدم
فدوة مو طفل لعابه بيدي و هادئ
مو مثل الاطفال الباقين نعواصه
بس بالليل ما ينحمل بس يبجي
عبالك يعرف هذا ليل
غيداء تنام النهار لانه هادئ
و بالليل وياه تبقى
على واهسها كملت مسيرتي بالمطبخ
كل شوي شكل اسوي
ترايفل ، كيك ، معجناات ، طبخات
كل شي بنفسي سويته
اتمنى محمد يمي و ياكل منهن كثر ما يطلع طيب
جعفر يوميه يجي عندي من رجعت لليوم
فدوة رجال صاير
انشالله يوم الافرح بيه و اشوف اطفاله
ابتهال و امي هم اجو باركو لغيداء
و هم عود علمود رجعتنه من لندن
علاوي شاف آدم و خبلها لأمه حلو و حلو
يمه مو ابن اختي ، لا ابني عبالك
هيج ناگع بگلبي فدوة لروحه
قضوا عدنه نص نهار إله صدك غيرت جو
حت امي وياي مختلفه
مادري اذا هيج بس كدامهم
بس حبيت اسلوبها كلش
من عرفت طرحت ، حجت وياي
كالت انه الله يرزقنه بالمستقبل وهو هيج الصدك
عمي طول فترة غياب محمد مدللني
ولا رفضلي شي حت مرة حجه على عمه
لان مقبلت اسوي برياني
جنت مشتهيته كلش مدري روحي بيه صارت
اخذني وياه للمستشفى علمود آدم
غيداء مكدرت تروح و عمه وياها
و مرة طلعني بالليل جبنه عشه
كلش حنين عليه ، بابه الثاني صاير
بابه بس اول ما رجعت شفته
وراها راح لسامرة مرة ثانيه
على اساس ترك الشغل ، بس كلوله يكمل أول
بابه يشتغل بمعمل مال تصنيع الادويه
هو المسؤول عن تسليم الادويه للتجار
ولازم يدون كل بضاعه شوكت تطلع و شنو نوعها
مرة صارت خربطه هواي اذوه سودة عليه
و تالي طلع بسبب عامل و هو اللي تحملها
هاي صارله 13 سنه على هالشغله
كل ما يكول اترك بس تصير سالفه و يرجع
و تعبر السنين و ممنتبهين
كاعدة احجي وياه بالتلفون اشوف شلونه
صدك مشتاقتله ، شكد احب اكعد وياه
بس تعودنه اغلب الوقت مموجود
صح علمود نعيش احنه ، بس همل الجانب انه احنه دنكبر وهو بعيد
وهاي تزوجت واني مشابعه من حضنه و حنانه
حمدلله على كل حال
المهم هو موجود و يشم النفس
ماريد اكثر من هالشي
البنيه تبقى بخير من ابوها عايش
و تفقد امانها لو فقدته
الله لا يحرم هالشي للكل ، و يكون وي كل وحدة فاقدة ابوها ، ربي يرحمه و يكون وياهن
غلقته من بابه بعد ما حجيت وياه و تطمنت
كمت سويت الغدة و مر روتين عادي
اسبوع قضيته بدون محمد
بس مشتاقتله بكد زحمه الحسين
بالليل نتخابر ، بس ما يكفي التلفون
اريدة يمي ، روحي تهدئ بوجودة
اما وضعي نفسه ، ساعه التجي نفسي هم ابقى دموع تصب و احس دا اموت
ابقى فوك بعيد عنهم لحد ما اهدئ وارتاح شوي
يلا عود انزل بس اسماء رأسا تعرف
كل ما تريد تكول لعمي تخليني ادكها مناحه يلا تسكت و تخابر محمد تكوله هيج صار
علاجي هم تاركته من اخذة وجع بطني يزيد
الليل ابقى وي غيداء و انام على روحي
من راح لحد الآن ولا نايمه بغرفتنه
احسها باردة بدونه ، هو اللي يمليها عليه
صبح الصبح على صوت آدم
كمت سويتله مي فاتر و شكر شربته
صعدت بدلت بدلت ملابسي شفت محمد داكلي
فتحت وياه إتصال و مسحت الغرفه
واني اشتغل و احجي وياه بدت رحمه الله
صار فترة وجع براسي يصير
كملت والله ، تسكربت عدل
هسه يكول اخذتها بس عطلات مبيها شي صاحي
نزلت حضرت غدة و كاعدين اني عمتي وي غيداء و آدم
عمه تسولفلنه على ايامها وي عمي
طبعا رومانسيته جذب احد يلحكه بيها
ضحك و سوالف نضدنه ماعون كرزات كبير 😂
نفتحت الباب اجه عمو اكيد
كامتله عمه و بقينه احنه على كعدتنه
محد اكو ماخذة راحتي باللبس
لابسه برمودة و ردان قصيرة
عمتي هم كالت عادي كدام عمو بمقام بابه
لهذا ممهتمه وماخذة راحتي عالاخر
دخل عمو بضحكته ، دائما يدخللنه هيج
سارة .«الله يساعدك»
عمي .«هلا بيج بابه ، كومي لعمتج»
سارة .«جايبلي شي 😍»
عمي .«اي جبتلج ، اكدر ما اجيب😂»
غيداء. «واني بابه ما إلي»
عمي. «لا هالمرة بس لسارة عود بالليل اجيبلج من اطلع مرة ثانيه»
حمسني خليت و طلعت شفته كدامي
سارة .«حبيبيييييي»
ركضت عليه حضنته ، تعلكت بركبته
صدك مشتاقتله حيييل
محمد .«وج على كيف عيب اهلي هنا»
سارة .«ليش ما كتلي جاي مو تخابرنه»
محمد. «لو تدرين احصل هيج حضن»
سارة .«اكيد جان استقبلتك»
محمد .«هاي فرحتج احلى استقبال 💏»
بعدت عنه اجت عمه من المطبخ
.«ها بتسم وجهج ، ارتاحيتي»
سارة .«اكيد 😁»
محمد .«هههه شلونكم»
عمتي .«زينين ، اصعد بدل و ارتاح و تعال شوف ابن اختك خل يروح تعبك اول»
محمد .«اي هو صاعد »
جرني من ايدي وياه و صعدنه
همزين الغرفه هستوها ممسوحه
باردة صايرة و مشغله التكييف
محمد .«اففف هيج يريح جو الغرفه»
سارة .«اي باردة»
التفت عليه من كتله هيج
نظرلي من فوك ليجوة عصب !!
محمد .«سارة هذا لبسج كدام ابويه»
سارة .«اي عمه كالت عادي»
محمد .«لا مو عادي بدلي يلا»
سارة .«شبيك ترة هو بمقام بابه يعني مبيها شي»
محمد .«تردين اتعارك وياج يعني !! ماحب لبسج هيج كدام احد غيري بدلي»
سارة .«شبيك هيج ، مرتاحه بيهن قبل شوي مبدله و لو بيهن شي جان عمه كلتلي ، ترة عمي ابوك ليش تغار منه يعني !!»
محمد .«لا إله إلا الله ، رجعت للعناد»
تركني و راح عالكنتور بدل و راح للحمام
ثوان و طلعلي جرني من ايدي ودخل
سارة .«شبيك!!»
محمد .«صبري»
جرني جوة الدوش فتحه مي و نگعني
سارة .«هستوني سابحه ليش هيج تسوي»
محمد .«هسه ارتاحيت يلا روحي بدلي»
سارة .«ليش تخبث هيج ، جنت رح ابدلهن»
محمد .«عبالج ما اعرف عنادج تسويلي نسيت و فد شويه»
سارة .«خبيييييث انت خبي💏»
دفعته اريد نفس ما يوخر
خليت ايدي على ركبته بادلته
مشتاقه إله ليش اضيع الفرصه 😅
سبحنه و طلعت قبله بدلت و شسورت شعري هو طلع نظرلي و أبتسم الحقير
سارة .«مزاعلتك لا تبتسم»
محمد .«تعاي اصالحج 😉»
سارة .«لا وخر»
محمد .«مجاي عليج ارد امشط بس انتي تردين اصالحج مو»
سارة .«ههه جذاب»
محمد .«ثگل حسابج اليوم ، خبيث و جذاب واني شون ما ريد اعاقبج»
سارة .«ههه عليك الله بطل هالسوالف»
محمد .«أبطل من ترجعين حبابه و ترحين تبدلين هذا هم»
سارة .«ترة تراك طويل بعد شنو»
محمد .«اي صح بجامه طويله و البدي بلا ردن»
سارة .«محمد والله حارة حباب فدوة»
محمد .«ليش تعاندين»
سارة .«هففففففففف»
رحت عالكنتور طلعت بليرة لبست فوكاه
اهم شي ما بدل مبيه حيل أبد
باوعلي صفح لان مبدلته فر بيدة
سارة .«هم مراضي»
محمد .«اذا نزعتيها والله ارزلج كدامهم»
سارة .«اعوفك واروح لأهلي»
محمد .«اجبرج تبقين مرتي وبكيفي»
سارة .«وخر محمد انت جاي بس حت تتعارك صوجي اشتاقيتلك»
محمد .«هاي بعد تحملي»
تركته و نزلت ، صدك ضجت
لك بابه صرت الك و مرتاح
بس مو مال تغار من ابوك 😠
هف ... نزلت ادرم عليه شافتني عمه ضحكت عليه
عمتي .«تعاركتوا مو 😂»
سارة .«عمه ابنج يبزع»
اجه صوته من وراي .«هاي عليمن»
سارة .«ما احجي وياك 😛»
نزلت بركضه دخلت الصاله يم عمي
دخل يضحك .«جبانه»
راح سلم على غيداء و شال آدم
رحت كعدت يمه .. ناغاه و لعبه شوي
حزت بگلبي ، بسبب غبائي خسرت أعيش هاللحظات
التفت عليه ابتسم خلاه بحضني وكام
محمد .«يمه شنو الاكل جوعان»
عمتي .«سارة طبخت اليوم»
محمد .«كومي سرو صبي»
سارة .«ما احجي وياك شبيك»
عمي .«هاي لحكتوا تتعاركون»
محمد .«هي غير تعاند»
سارة .«احجي شنو»
غزرني سكتت ، شكو اخاف يعني
خليت الصغير عد امه وكمت للمطبخ
طابخه تمن باكله و تشريب اصفر
دوغته دهن حر صار يبجي 😍
صبيت الاكل للكل و رتبت السفرة
طلعت لبن و طرشي ، محمد اجه يمي هم
كملت كله دا اطلع اصيحهم سحبني من ايدي
محمد. «عاشت ايدك»
سارة .«وايدك حبيبي ، وخر اصيحهم»
محمد .«سارة عركاتنه بس بالغرفه جوة محد يعرف ، لا تطنكرين كدامهم»
سارة. «ههه ماشي تدلل»
محمد .«شو تعاي 💏 ، يلا صيحيهم»
تركته و طلعت كتلهم اكل
كعدنه تغدينه وي سوالف عمي و محمد
راحه مو طبيعيه سكنت داخلي بهالكم ساعه اللي إجه بيها .. حبه بداخلي يكبر يوم عن يوم
للعصر اجو بيت اسامه و جعفر هم اجاني
درسته ساعه و راح كال هوسه تصير يروح أحسن
حياتنه ماشيه بهدوء و راحه الحمدلله
محمد التزم وياي بنظام خاص بالعلاج
ما يقبل أرفض اعبر خطوة منه
التزم بشغله بمطعم عد صاحبه كمال
اول مرة اسمع بيه ، بس كال يعرفه من ايام الجامعه
عيال غيداء اجو كلهم شافوها هي و الصغير
رندة و عمتها بقوا عدها ليله و ثاني يوم إجو اكرم و صادق و اخذوهم كلهم
رح اشتاق لآدم تعودت عليه
بس هاي بعد لازم يروح لبيت ابوه
غيداء هم رح افتقدها ، تعودت عليها كلش
وهيج رجع البيت فرغ علينه من جديد
وقت اللي محمد بالشغل اني وي عمه كاعدة
لو نسولف لو نعزل لو ننام 😂
رجعت باندا شوي بالنوم
محمد يطلع ما حاسه عليه
الايام بهدوء تمشي ، بس طبعا مو بهدوء من ناحيتنع احنه الثنين ، عركاتنه نفسها
رحنه للبصرة أسبوع حضرنه عرس فرح و كرار
هم جان كلش حلو و تونسنه هواي
سوو طقوس الحنه عالعادات الخليجيه
اله شكل اجواء تجنن
و سوو جوله هم ، تندمت متزوجه عجبني اوكف وياهن 😂
مثل كل حفله ، محمد يميزني عنهم بالأبيض
بيوم العرس هم لبست فستان محجبات بيض
و شال بنفسجي وي لون التخريجات
حذاء عالي و مكياج أنيق
محمد اصر نروح وياهم للاستوديو ناخذ صورة
هو هم ما قصر باناقته
غرت حيل عليه ، بت عم كرار ذابت بيه
خاف ناقصه يعني وجود رنا
انوب هاي السلبوحه ، يحظي مرته اني مو يمه شكو ما تشوفيني عميه وما ادري 😠
و هو مكييف يكولي احسن خل اشوفج تغارين
خلص العرس احنه متناكرين 😀
بس من اجت هاي الزركه مرة ثانيه
رحت يمه حبيبي و حياتي حت تموت
بس وخرت رجعت زاعلته
ميت ضحك هو .. شكو عليك 😒
وهاي مضى الشهرين بروتين عادي
محمد قلل العلاج بدل الـ3 مرات صارت مرتين و هسه مرة وحدة اخذ الدوة
رحت حللت و النسبه الجنت جارمه بروحي بيها
حمدلله قربت تختفي
من 69% نزلت هسه 17%
بس تصير أقل من 15 نكدر نسوي حمل ويعيش
بلش محمد يحضر لروحته اللندن
و رح نرجع على يروح و يجي
و نبدي بشلاع الگلب هذا
اجتمعوا الرباعي المرح مرة ثانيه
احسان و علي اجو العصريه و عقيل وراهم بساعتين اجه من البصرة
هم سلمت عليهم و طلعت احضر عشه
عمه وياي و جهزنه سفرة كامله
بقوا عدنه الليله ، ذكروني بأيام لندن من جنه
حبيت حياتي هناك رغم ممستقرة 😂
بس حلوة جانت وي عركات علي عالكيك
و عقيل حرشته بإحسان
اتفقوا بعد 4 أيام يرجعون يسافرون
علي رح يقدم وي محمد بنفس الجامعه
بس عقيل يريد يكمل دكتوراه
بس اعتقد مرح يكدر لازم تعبر سنتين !!
.
.
.
إنتهى ....
.
.
اكو تعليق حذفته و ندمت !
شنو الغرض من هاي القصه !!!!
هي حياة عاديه تماما مثل مدتشوفون
احداث استرسلت بمواقف ممتوقعه
اشخاص كثيرين بس واحد مرتبط بالثاني
كان هدفي هو ابين مو دائما الحب هو الأختيار الصحيح .. مرات النصيب اقوى من الف قصه حب و على رسله تنشأ قصص و تعيش ، و من تعمقت بحياتهم اكثر .. شفت انه اكو شي ثاني و هو ما لازم نغلط و ناذي نفسنه من ننجبر على شي و نتجه للادمان و هالسوالف ، بعدها اكو شي جذب انتباهيمثل الباقين ، وهو قوة الصبر و التحمل اللي قدمها محمد وووو بعد هواي .. تبقى رساله بسيطه بين اسطر القصه موجودة .. هذا جوابي لصاحب التعليق .
يعجبني اعرف رأيكم باللي شفتوه من القصه
.
.
لا تخافون مو النهايه هاي
بعد بارت لو ثنين و تنتهي 😀
.
.
سؤال عالماشي اتمنى أحصل جواب ؟؟
اكو احد يدرس حاسبات ؟؟ برامجيات ؟؟
نظم الحاسبات و هيج ؟؟؟
حت لو مرحله ثانيه او متخرج ! هيلب بليز 😭
شسمه ! شلونكم بالدراسه الإلكترونيه 😐
خلص خلص رح اروح 😅😂
دمتم بحفظ الرحمن 💙
الكاتبه : إسراء الخزرجي 😉
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!