#احببتك_انت
#جيانا .
.
.
.
صار العصر و رجع ابويه من الدوام ، واذاني جوة بينهم حت اسمع شوكت امي رح تحجي ، شو ساكته بعدها
صبيت الغدة مسويه مقلوبه تمن احمر ع الكبدة
دناكل جان امي تفتح الموضوع وي بابه
حنان .«عمار ، اليوم اجو ناس خطبو سارة»
عمار .«و منو من بيت منو ، سارة شافتهم»
يحجون و كأنه اني مموجودة ، اف ربي
بقيت صابرة ارد اسمع الحجي الاخير ، رأيي بابه
حنان .«من بيت الحسني ، سادة مو؟»
عمار .«اي ، خوش ناس .. بيت منو هم ، من وين»
حنان .«من الجادريه ، بيت ابو محمد الحسني
كالت ام محمد انه بس نسأل بالمنطقة رح يدلونه عليهم»
عمار .«اي اعرفه ابو محمد و اسامه .. خوش ولد ذهب والله»
رحت بيها طالما بابه حمد بيهم 😭
حنان .«هو الجبير محمد و الثاني اسامه
بس اسامه متزوج وعندة طفل يمكن سنه كالت
محمد يدرس ماستر بلندن .. كالت يجي اسبوع بالشهر لحد ما يخلص دراسته ويستقر»
عمار .«حلو ، جامعه لندن مو قليله ، بس ليش هسه خطب .. غير يخلص ، بتي تروح هناك شسوي وهو ماكو»
حنان .«جا غير بتك مجننته ، ام محمد تكول متخبل عليها صار شكد»
عمار .«سارة بابه تعرفيه انتي؟»
سارة .«بابه ، لا اعرفه و لا اريدة .. فدوة كايلتلك اريد دراستي» خنكتني البجيه وسكتت
حنان .«دنجبي ام دراستي ، بيج خير جان طلعتي شي بيه حظ»
سارة .«تذكري منورا منو طلعت هيج معدل»
عاط بابه بيه وبامي سكتنه
عمار .«لعبتن نفسي ومحمد هسه كلوحدة انطيها دفرة» اندار على امي «وانتي هاي بتج تذكري .. جيبي معلومات الولد حت اسئل عليه ، حت زقنبوتكم ماريدة» عاف و كام
اني هم كمت ، اف ياربي ساعدني شسوي
بالليل ابويه خابر زوج ابتهال وكاله يسأل على الولد و كلف عمي هم يسأل
يومين و اني ميته بدمي لو يذبحوني ما يلكون قطرة دم
بيت ابتهال اختي مرو علينه بالليل ، يمه مشتاقه لعلاوي ، كعدت وي ابتهال اسولف وخواتي كاعدات وي علوش يلعبون جان يحجي زوج ابتهال وي ابويه و طلعوا .. عرفت شنو الفلم 😩
تعشو عدنه و طلعوا ، دا الملم حت اصعد انام ، بابه كال لأمي تخابر الجماعه تبلغهم موافقين وخل يتفضلون .. بس تشرط انه اكمل دراسه
شون بيه ، شون اكمل واحمد كبالي .. ااخ ربي
وصار ثاني يوم خبرتهم وكأنها ممصدكه
واني داخلي يحترك ، وينك احمد
شون رح انخطب و الشهرين ما خلصت حت تجيني وتنقذني ، شون وهسه صرت مستحيلة بعد
مضت الايام و الخميس اجو العالم .. نفسهم بس ام اسماء وياهم زيادة
يمي اجت ايلاف و ثريه هم موجودة
لبست ثوب وردي طويل و عفت شعري مفتوح بس ماشات حطيت سويت پف بگذلتي
نزلت و دخلت العصير قدمتلهم ، مبين اني مفرحانه .. دا اكعد اشرتلي اسماء اكعد يمها
رحت يمها ضحكت بوجهي ، مبينه انسانه عاقله عكس الباقيات 😄
اسماء .«هلو مرت حمايه الجديدة»
هه ضحكتني ، ليش اكو قديمه ، ابتسمتلها «ليش اكو قبلي حتى صرت جديدة»
ضحكت هي هم «لا قصدي صارتلي مرت حما بعد ما جنت وحدي»
ايلاف .«عندج صورة العريس ؟ خل تشوفه سويرة»
سارة .«اليسمعج يكول شايفته انتي😒» رديت على ايلاف بس عود اشاقه
ايلاف .«طبعا شايفته وشابعه منه هم 😄 شبيج هذا نفسه محمد اللي احجيلج عنه جنت صديق احسان اخويه»
بقيت صافنه ، صديق اخو ايلاف ، معقول هيج شافني عن طريقهم واجه
اسماء .«يي طبعا عندي صورته بس ما يحتاج. هو هنا اصلا .. كال قبل لا نروح يدخل حت يسلم على ابو سارة ويشوف سارة هم»
سارة .«اعذريني اسماء ، بس اني مرح اتواجد»
نغتني ايلاف على طريقه كلامي ، ابتسمت اسماء بحرج ما حجت شي
ساعه و طلعوا و ما طب محمد حمدلله
حجت عليه ايلاف و طبعا ثريه هم طبكت وياها
محد حاس بيه ابد ، محد يعرف وجعي
مضت الايام بدون ما اسمع ذكرهم ، لحد ما يوم كاعدين ع الغدة كال بابه «بابه سارة»
رفعت راسي منتظرة يكمل .
عمار .«باجر نروح للحضرة نزور ، واهناك نلتقي ابيت ابو محمد حتى نعقدلكم بالحضرة»
بقيت صافنه على ابويه و دموعي غوركت بعيوني .. ليش هيج
عمار .«اعرف بابه تردين تفرحين وحفله مثل اختج ، بس عمهم بعدها مطالعه السنه مالته .. هسه عقد بسيط و انشالله على المهر عود سوي حفله ، ماشي بنيتي»
هزيت راسي اي و كمت ، بس ارد ابجي وحدي براحتي يا عروس يخبرها مثل الغربه عن يوم عقدها
ااخ يا احمد ، أسبوعين تفصلني عنك المفروض وشوف شديصير بيه
ثاني يوم جمعه نزلنه للإمام ، دخلت و دموعي وكعت بعد ما سيطرت .. حضنت الشباك وابجي
لحد ما اجت ابالي ذكرى ، اني دخلت للامام ونخيته يبعد عني احمد اذا مو هو اللي رح يصوني و يحافظ عليه ...
مسحت دموعي و كمت ، هذا هو .. اسلم كلشي بيد الله ، هو الكفيل بكلشي
طلعنه كعدنه بالصحن خلصنه صلا و زيارة شوي واجو ، سلم ابويه وعمو ابو محمد سلم عليه رديت رفعت راسي شفته كدامي محجيت شي ودرت وجهي
هو بقه يباوع بتساؤل بس معبرته
كملوا زيارة و كالو يلا ، وهنا نقبض گلبي
احس شي دياكلني ، ممرتاحه .. ربي لا تعوفني
كعدت يم ابويه بصف السيد و محمد يمي
سألني السيد و محمد كالي رفعي راسج سوة
رفعت راسي دا اكول نعم صار بوجهي احمد
ديباوع بعيوني و عيونه كلها عتاب
نطقت نعم انت وكيلي ونزلت دموعي ، حسيت محمد كمش جف ايدي وعصرة وقرب همسلي
محمد .«انتي مرتي سارة ، احمد بعد ماكو»
باوعتله بتفاجئ ، شنو احمد ؟ هذا منين يعرفه!!!
رجعت نظري لاحمد وهو دموعه واكعه مثلي
محمد هم ردد كلام السيد و صرت مرته وانتهى
رجعت نظري لاحمد باوعلي بنظرة صعب افسرها وراها راح و هو مكسور
يا ربي هذا هواي عليه ، ليش هيج صار بيه
طلعنه ابو محمد كال نروح عدهم ، اخذونه واني بغير عالم
وصلنه وامه هلهلت مدري شون جان اسماء تركع هلهوله شعلاتها ، ضحكتني المجنونه
سلمنه و دخلنه للاستقبال ، صاحتني اسماء ورحنه غرفتها
فتحت حجابي لان ماكو اسامه ، شفت اموري ابنها فدوة ينگرط
اسماء .«يي سوس ، وج شهالنور بوجهج ، يشع ويصيح بويه انه عروس»
سارة .«حبيبي سومه هذا من جمال عيونج»
اسماء .«سارة انتي مراضيه مو؟؟ احس مفرحانه»
اخدت حسرة و وكعت دمعتي .«بعد صارت ومالي حق اعترض»
اسماء .«محمد يعرف انتي تحبين ولد ، هو حجالي .. بس صدكي سارة سعادتج وي محمد ، مو لأن حمايه وامدحه ، بس اعرف محمد شكد يحبج»
سارة .«مرح اسامحه ابد» حجيت و زادت الغصه بروحي ودمعت عيني
طبت غيداء للغرفه جان تباوعلي وضحكت ، مدري ليش ما حبها
غيداء .«وج هاي شنو الدموع ، هيج ممصدكه اخذتي اخويه😄😄»
يا !!! هو منو سائل على اخوج ، وجع مكروهه
اسماء .«لا بس سارة تحسست لان مرح تكدر تكمل سنه التجي حت يصير النقل مالتها»
غيداء .«عليمن تداوم ، ترة چنه يا دراسه هاي»
شون ما اكوم ادكها .«لا حبيبتي ، حت لو اني چنه ، اعتقد الطلب الوحيد اللي ردته من اخوج جان دراستي ، وهو قبل»
غيداء .«وشغل البيت ، وين رح تلحكين»
سارة .«يا بيت هذا ؟ ترة كله نفرين احنه وميحتاج شغل هواي ، بعدين منا لسنتين العرس .. من هسه تردون اشتغل»
غيداء .«ههه والله ومن اول يوم طلع لسانج يسارة😏»
اسماء .«غيداء ، امشي طلعي ارد انوم امير»
حجت اسماء بعصبيه وياها ، وطلعت تدردم
بسم الله بالطبگ ، بعدني اول جيه و هيج
الله يسامحج يمه لان جبرتيني 💔
نزلنه و صار الاكل ، كعدت بصف امي جان تصيحني ام محمد اكعد يمه .. والله مناقصني غيرة
كعدت و نفسي مسدودة ، اكلت كبايه خالي و انكر بالزيتون حت لحد ينتبه ، بس هذا اليمي واضح يراقبني 😩
محمد .«اكلي ولج ، لا تنكرين بس»
رديت بصوت ناصي محد يسمعه غيرة .«معليك بيه ولا تصدك روحك»
رفع راسه اخذ نفس قوي وكام كال دايمه
صاح عله اسماء يريد جاي
اسماء .«الله عليك اعتقني اليوم وخلي مرتك تسويلك ، انت كارثه وي الجاي خل اخذ نفس حباب»
ضحكتني والله ، واضح شكد متعذبه وياه 😄
ضحك واندار عليه .«سرو ، مدام مدتاكلين وبس تنگرين سويلي جاي فدوة»
رفعت راسي باوعت لأمي اشرتلي كومي ، يا؟؟ ممصدكه شنو!
كمت جان تكول رنا .«اني اكوم احسن ، ليش سارة خطيه و متندل الغراض»
باوعلها محمد بنظرة وحجه بنشافه .«لا كملي انتي ، خل نضوك جاي مرتي»
جرني من ايدي و طلعنه للمطبخ ، جانت رنا تدردم
سارة .«حط ابالك ، ما اصير مرتك ، ولا تسوي هالحركات كدام اهلي واهلك وتحرجني» حجيت بعصبيه و صوت ناصي من طب للمطبخ
سد باب المطبخ وتقربلي وكف مقابيلي ، عينه بعيني لحد ما درت وجهي ، ماريد اشوفه
محمد .«اذكرج بكلامي هذا ، وانتي مرتي قبلتي او لا ، تذكري قبل شويه شصار .. نزلت دموعج عليه مو سارة ، عبالج ما اعرف السبب»
سارة .«اي عليه نزلت دمعتي ، ورح تبقى متنشف لحد ما اصير اله»
جر ايدي عصرها حيل .«اراويج سارة ، وحق الخلقج اموتج لو حجيتي وياه»
طفرت دمعتي ، انداريت رحت ع الطباخ شلت القوري حت اغير الجاي .. هو راح اتكء ع الثلاجه ويباوعلي ..
انداريت عليه .«اريد الجاي»
ضحك وتقدم طلعلي الجاي ونطايلي بقه يمي
حطيت بالقوري كميه اللي اسويها وكتله .«اريد هيل بعد»
ضحك عليه الحقير .«هو جاي ، وج لا روح احبه بعد شيخلصج»
والله يا الله ، بطران
ساعه معصب وساعه يضحك ، محمد حلو للأمانه ، اسمر بس بسمار حلو هذا السمار المرغوب ، طويل .. شوي ضخم بس حلو وي طوله ، عيونه عسلي ساعه و ساعه اخضر زيتوني .. شواربه مرتبهن ، لحيته خفيفه
واللي عرفته من حجي اسماء انه طباكات ، ساعه عصبي و ساعه بارد رغم الموقف
من اجتزي اهله وحجو رسمي ، كالت محمد بعز الهوسه هو بارد ويتكتك الموضوع لحد ما تصعد عندة ويحجي ..
سويت الجاي وصبيتله ، اخذة يشرب منه شوي ويسوي نفسه ديتحسس الطعم ، ضحكني ، شنو طفله كدامه و ما ادري 😄
ضحكت عليه ، شكله تحفه جان وهو داخل بالجو ، لحد ما نطق .«طيب ولج ، اروح اكوللهم جاي مرتي اطيب من جايكم» ضحك واخذ ستكانه وراح للاستقبال .. مجنون
محمد .«وج اسماء ، ورة ما اتزوج اعتقج من الجاي ، وافقت هسه» يحجي وهو يضحك ، ضحكته هم حلوة
اسماء .«صدك والله ، اي الله يبشرك بالخير»
محمد .«سنتين ولج يلا اجيبهه يمكم ، منا لسنتين تحملي»
رنا .«يا شبيك ، اني هنا واسويلك جاي اطيب من اللي بأيدك»
محمد .«لا ، شربي جاي مرتي وكولي عود اذا اكو اطيب»
مها(ام محمد) .«ولك بهالسرعه بعت ، لو تطبخلك شون»
حنان .«بعدة عريس ، بعدين يجي يدور طبخ امه» اندارت على ام محمد «اخويه هيج ، اول ما تزوج جانت مرته ولا غيرها ، بعدين اختلف رأيه»
لا والله ، شون ان تفشل بتها يا الله
سارة .«يا مامه ، ليش شلونه طبخي ، جنتو تاكلون شي لو ما اسويه اني»
محمد .«اي سرو ، بعد معليج بطبخهم ، خلي عمتي تطبخ وانتي سوي بس الي»
ضحكوا عليه ، وامي تغزر بيه .. لا والله ، اخليها تفشلني واسكت .. هه
رنا .«اي يلا سارة ، كون طبخج مثل ما تكولين ، مو ننصدم ورة الزواج»
اسماء .«السبوع اليجي نروحلهم ونشوف ابداعات سارة ، وعود نحكم منو طبخها اطيب رنا»
محمد .«لا ، مبين طبخ مرتي😄»
فشلها الثوله ، لو ساكته اشرفلها 😏
كعدنه يمهم واني كاعدة يم اسماء ، ماريد اختلط برنا و غيداء لان مبين ما يحبوني ، وكأني قاتله ابوهم
سارة .«اكولج سومه ، رنا وين اهلها»
اسماء .«متوفين ، بس اخوها ابراهيم بالبصرة عايش علمود مرته تدرس ، هو كوة راضي تبقى عدنا لان بيت عمتها»
سارة .«ما حبيتها ، احسها تكرهني واني ما اعرفها اصلا»
اسماء .«آه ، معليج بيها ، شسوي تعاي الي لو لمحمد ، ابد لا تسكتيلها سارة»
من كلامها واضح ام مصايب ، الله الساتر منها
صارت ساعه 6 المغرب طلعنه ومحمد كال يوصلنه ، وبالطريق كله ساكته واباوع من الجامه .. احمد وين هسه ، وين صفه شسوة
وكعت دمعتي ومسحتها بساع حت ما تنتبه امي ، رفعت راسي شفته يباوعلي بالمرايه وجر حسرة
لعد شنو اكول عن الحسرة اللي بداخلي ، انت تكدر تطلعها واني لا
رجعنه واني كبل صعدت غرفتي ، بدلت و كعدت نصبت العزة بالتلفون وي ايلاف
احجي و ابجي ، لحد ما كالت محمد عدهم
شوي و طبكته منها ولفيت راسي ونمت
حسيت ب11 ونص على التلفون يدك اتصال ، رقم غريب ، تجاهلته 3 مرات دك
بالرابعه فتحته حجيت بعصبيه .«الو»
رد هو هم ابرود .«حطي ابالج ورة الزواج متفتحين ارقام غريبه»
سارة «هه ، اذا حضرتك لزكه وتعرف ما رديت ، شكو تلح»
محمد .«صوتج لا تعليه ، دكيت حت تفتحيه و تعرفين هاي اني ، يلا روحي نامي هسه»
طبگه وهو ابو الراهي فوگاها ، والله يالله
.
.
.
وانتهى بارت الثالث ، نلتقي بالرابع
شونه البارت ؟؟
رأيكم 💬 و النجمه ⭐ مهمه الي لان تشجعني اكمل 😀
.
.
Geaanaa❤
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!