رواية احببتك انت الفصل الثاني والعشرون 22 - بقلم ESRA'

#احببتك_انت
#جيانا
.
.
.
ايگول : انتي تربيتي وأعرفچ
حتى لو عنچ بعيدد. 🍃☁
.
.
محمد :
ضبطنه كلشي و حجزنه تذاكر ردينه للعراق
كلنه رجعنه هالمرة حت علي و عقيل
نزلنه بالبصرة حت عقيل يروح لأهله
و من هناك طلعنه لبغداد
صار علينه الطريق 6 ساعات ونص لان علي مشه على طريق العمارة
التعب كلش صار .. لنص الطريق واستلم السياقه إحسان
اني اصلا متكسر ولا بيه اسوق
لحد ما وصلنه صايرة ساعه 3 الظهر
عاد وصلنه إحسان واحنه رحنه لأهلي
اسامه خابر يشوف وين احنه
فصلته و دخلنه بيتنه

محمد .«سلام عليكم»
أمي .«هلا بشمعه بيتي ، حمدلله على السلامه يمه»
محمد .«هلا بيج يمه .. علي جاي وياي»
أمي .«اي دخله للاستقبال هسه اصيح اخوك»

دخلت جوة تصيحه واني دخلت علي
اسامه .«يا هلا شونكم»
اجه سلم علينه .«حمدلله شونكم انتو»
اسامه .«حمدلله»
علي .«اسامه مي رحمه لأهلك منتهي ترة»
اسامه .«اي صار ، تريد تدخل تغسل»
علي .«لا لا بس ارتاح و اروح بيتنه»
محمد .«اختك و هنا شكو رايح»
علي .«شوف لا تخليني اعاركك واحيل اخوك ها»

غزرته حت يسكت اعرفه لو ححه بعد ما يسكت
طلع اسامه يجيبله مي التفتت عليه
.«والله يا علي لو حجيت شي اموتك»
علي .«اراويك هسه تشوف»
محمد .«هو هم استاهل لان جبتك وياي»
علي .«لهذا تستاهل»

أسماء دخلت الصاله .«يا هلا بالغايبين»
محمد .«هلا بيج سومه شونج»
اسماء .«حمدلله مشتاقتلكم»
حضنت اخوها وسلمت عليه وكعدت يمنه
محمد .«كومي جيبي امير اريد اشوفه»
اسماء .«لا حباب هستوة نام خبلني من بارحه لليوم على فد سهرة»
علي .«بيه طاقه على خاله 😁»
محمد .«ليش تحجيني كوة يعني»
علي .«هو احجيك حت احجي براحتي»
اسماء .«اذا تردون تتعاركون كولو حت اطلع مبيه حيلكم ترة»
محمد .«لا ابقي حت تشوفين اخوج»
علي .«شوكت ترحين بيتج»
اسماء .«غير من رجلي يكول يلا»
محمد .«صارلكم شكد هنا»
اسماء .«اليوم تاسع يوم صارلنه»
محمد .«شبيه ليش هيج»
اسماء .«اني كتلك قبل اخوك شايفله شوفه»
علي .«كومي تحضري انتي وابنج اخذج وياي اذا يحجي اكوله راجع من السفر اريدج يمي»

محمد .«لا علي مو هيج خل نفهم شسالفه»
اسماء .«محمد لو تطبل للصبح اخوك ما يحجي شي ، عمي صارله شكد يحاول وياه وما ينطق حرف»
محمد .«تعرفين شي عن شغله»
اسماء .«هو كلشي ما يشاركني عن شغله .. قبل فترة وحدة اتصلت بيه عدها دعوة طلاك ، محمد تتصل حت نص الليل واني حقي اشك ترة»

علي .«كومي اسماء تجهزي بدون اعتراض»
محمد .«لا تتدخل هسه علي»
علي .«اسمحلي ، بس اخذها حت لو غصب»

طلعت اسماء من الصاله راحت تتحضر
محمد .«لا تتدخل خل نفهم اول ، لو شكوك اختك صحيحه ارجعها اني واصير ضد اخوي»
علي .«اخذها حت ترتاح ، لا تعارض الله عليك»

نسولف وسمعنه صياح اسامه و مرته
طلعتلهم اشوف أمي تدك الباب عليهم وهم قافليها
محمد .«افتح الباب اسامه»
.«افتح الباب رح اكسرها عاد»
.«لك افتح 😠»

دفعني علي ودفرها للباب انفتحت
صحت بيه لان فتحها هيج
دخلوا امي و علي و اني بالباب

اسماء .«اروح لبيت اهلي مالك حق تمنعني»
اسامه .«والله اندمج لو خطيتي خطوة»
علي .«اسامه اختي تجي وياي»
اسامه .«لا تتدخل و ما تاخذها»
اسماء .«افهمني تعبت منك ارد ارتاح»
اسامه .«ترتاحين يمي بس عوفي شكوكج هاي»
علي .«خل ترتاح و ارجعها»

بقه ينظر لها برفض انه ما تطلع
عرفت تفكير اسماء غلط
و اسامه اله دافع اللي هيج ديتصرف
علي اخذ غراضها وطلع
دتطلع وراه كللها .«اذا تطلعين امير ما تاخذيه ومالج رجعه بعد»
التفتت عليه بتفاجئ .«لهالدرجه وصلت»

تقدمت اخذت امير من ايده
محمد .«تعاركوا بعيد عن ابنكم ، يلا اسماء اخوج ينتظر الجمعه اني اجي عليج ماشي»

نطيتها امير
اسامه .«مالك حق تكسر كلمتي»
محمد .«يلا سومه روحي ارتاحي»
اخذته و طلعت و تخبل علينه اسامه
كسر غرفته كلها ولا واصل لهالدرجه من العصبيه
هو اهدئ مني يعني ولا يخطي هالخطوة
حت اسماء ما يتعارك وياها ابد
هو بطلاع الروح يلا حصلها انوب هيج يهددها !!

تركت أمي يمه تهدئه و صعدت غرفتي
عادي يعني متعود كل ما ارجع اواجه مصيبه
الفرق هالمرة المشكله ابيتنه مو وي سارة
دا ادخل لغرفتي و سمعت غيداء تحجي

غيداء .«هاي شبيك ، شجاك تطلب هالطلب !
ليش تبينلي اختياري غلط ، ليش هيج صرت وياي»
.
.
.«أكرم تحلم تشوفني برة بيتنه ، بعدني ابيت اهلي وهيج تطلب ترضى خطيب حور هيج يكوللها تعاي لشقتنه مشتاقلج»
.
.
.«خلي ابالك ترة اني مو رخيصه و طلبك هذا معناه»
.
كامت تبجي و تصيح عليه
ادري شجاها الوادم تغيرت هيج
دخلت غرفتها واخذت التلفون هي بقت صافنه
مبين متعرف اني راجع

محمد .«أكرم محمد وياك ، اليوم ب8 تجي لبيتنه اريدك بشغله»
أكرم .«هلا بيك شوكت رجعت»
محمد .«قبل شي ساعه ، انتظرك مو تغلس»
أكرم .«لا جاي مشتاقلك بس باجر مو اليوم»
محمد .«ماشي»

غلقته وبقيت التلفون عندي كعدت مقابلها
محمد .«احجي شطلب منج»
غيداء .«مطلب شي لا تهتم روح ارتاح»
محمد .«غيداااء دا اكول احجي»
غيداء .«محمد والله مغلطت ولا تجاوزت»
محمد .«فهميني طلب اللي افكر بيه لو شنو»
غيداء .«شون احجيلك فهمني محمد انت اخويه»
محمد .«سوي مثل سارة ونصير هسه أصدقاء انسي اخوج احجي قبل لا تصعد خبالاتي»

غيداء .«أخذ شقه النه عود نعيش بيها و عمتي مقابله لان تريد وياها نسكن تكول منو الي صادق و مرته بيتهم وحد و حور كم شهر و تتزوج و هسه اكرم هم عزل ، كتله اشو تعارك و اليوم دزلي انه تعاي للشقه مشتاقلج اطلع بيج ضيم تأخير عرسنه 😭 محمد واني مقبلت اروح والله مغلطت 😭»

طنه براسي لا غير
يعني شحجي !!
ترة كلها على بعضها خطبتهم صارلها 7 اشهر
هيج ما يصبر ابد
هسه مو اني عبرت السنه
صح سارة يمي بس ولا احجي هيج

كمت كعدت يمها .«شوفي انتي تردين تعيشين وي عمتج»
غيداء .«اي عمتي حبابه مثل امي ليش ما أعيش وياها بس هو ما يقبل 😭»
محمد .«كافي بجي مو دنحجي بهدوء .. اني ادبر سالفه الشقه بس المطلوب منج ما يفتهم انه اني دريت بالتفاصيل ماشي»

غيداء .«لا خل يعرف حت يكول اكو بظهرها رجال مو من الشارع جايه»
محمد .«اوف اوف معرفتي تحبين غيرة»
غيداء .«مجان هيج ولله حت جان يخاف عليه أكثر منك شجاه و تحول ما اعرف»
محمد .«عادي كلكم متحولين رجلج و اخوج و مرتي و هسه انتي اروح شكل و أرجع الكاكم شكل»
غيداء .«شبيه اسامه جان يصيح»
محمد .«معليج بيه تخبل»
غيداء .«محمد بارحه هو لل3 الصبح هنا كاعد يخابر و كلامه مبين وي بنيه»
محمد .«لا تحجين كدام مرته اني احلها»
غيداء .«اسماء سامعته هي كالت لأمي بارحه»

تركتها و توجهت لغرفتي .«صوجي رجعت لمشاكلكم»

دخلت طلعت ملابسي دخلت سبحت و صليت و نمت
مشاكلهم يضموها لجيه محمد
حت يعرسون على راسه
خاف ناقص يعني ديزيدون هم 😒

صبح الصبح بدلت و طلعت رحت لابويه
هم وصلت ولكيت عندة جراحه
متأكد نشرة الابراج مالتي تكول "محمد يحضى باكثر اسبوع فگري😂"

طلعت من المستشفى مريت لاحسان
توجهنه لجامعه المستنصريه
عدنه مقابله البروف حت ناخذ تعليمات عن الامتحان شون يصير
همات منا و منا نركض لحد ما كملنه كلشي و طلعنه

إحسان. «تجي وياي»
محمد .«شعندك»
إحسان .«ندرس ابحاثنه سوة ، ما تريد روح»
محمد .«لا اجي امر لسارة و اجيك عود»
إحسان .«شعجب مبقت عدكم»
محمد .«كتله العناد وين تسمع كلام»
إحسان .«اصلا احمد ربك انه تبقى عندك .. هسه مو هاي إيلاف نخطبت مانعها منعا باتا تبات ابيت مرتضى اني لو اخوها لسارة واشوفها تبقى هلكد عدكم صدك اجرم بيها»

محمد .«هههه حمدلله اللي ما ناسبتك»
إحسان .«حان شخلصني منك»
محمد .«هو عمي من البدايه قبل ، و عمتي رغم تحجي بس يعني لو يمانعون يكولون يابه لا تاخذها ، وهم ممتجاوز وياها حدود الثقه»

احسان .«حت لو اكو أصول»
محمد .«ههه كولها ما تعرف الأصول و فضها»
احسان .«لا مقصدت هذا لان اعرفك ، بس اعتب على ابو جعفر يعني شعجب يسمحلك»
محمد .«من عقدت محكمه ، كتلهم هسه سارة مرتي مو خطيبتي اللي اسمعه يكول لا يشوف وراها جرت المشاكل وعمي هم ما رفض مرة»

احسان .«شخبار احمد»
محمد .«شدراني ، اتمنى ابسطه بسطه معدله بس مالي خلكه هسه خل اكمل دراستي اول»
إحسان .«لا تخاف مرتضى گام بالواجب»
محمد .«هههه عاشت ايدة بس بعد لا يتدخل»
احسان .«ثنينكم مخابيل»
محمد .«ديالله أنزل يالعاقل اروح لمريتي واجيك»
احسان .«دخلها السيارة جوة لا تبقيها بالشارع»
محمد .«افتح الباب »

نزل و دخلت السيارة بگراج بيتهم
قفلتها و نطيته المفتاح و طلعت لسارة
وصلت دكيت لجعفر طلعلي

جعفر .«هلا ضلعي حمدلله على السلامه»
محمد .«هلا بيك ابو علي»
جعفر .«ههه هسه تسمع سارة تكول هاا كتله لمحمد واني لا»
محمد .«ههه وينها هي»
جعفر .«فوك مطنكرة لان ابويه ما قبل تروح لبيت عمي ليث»
محمد .«حيل تستاهل ، اخذ طريق حباب»

دخل شوي و اجه كال فوت
دخلت للصاله و هو طب يصيحها
يمكن عشر دقايق و رجع يضحك
جعفر .«تكول جذاب مجاي تريد تنزلني»
محمد .«ههه اخذ طريق اصعدلها»
جعفر .«اصلا محد اكو اصعد»
محمد .«ما تحجي من اول 😂»

صعدتلها فتحت الباب قافلتها
محمد .«سورة فتحي الباب»
.«ولج سارة بلا عناد»

سارة. «جعععفر امشي انزل بلا جذب»
محمد .«هههه وج مصيبه راسي فتحي»
سارة .«والله لو افتح ابسطك»
محمد .«هههههههههه ام لسان»

شوي و فتحت الباب شافتني ورجعت سدتها
وانوب فتحتها .«شجابك ها شكو ما كتلي»
و رگعت الباب حيل 😂😂
محمد .«مو كتلج مخبله ، فتحي»
جعفر .«سارة امي راجعه فتحي الباب»

صاح جعفر من جوة وهي رأسا فتحت
سارة .«شسويلها يعني»

____________ سارة تروي ___________

3اسابيع قضيتها بغرفتي ⬅ بيت خالتي ⬅ بيت عمي ليث ونعيد الكرة
ما رحت لبيت عمي حت لا يكول ابقي لو محمد ما يرضه ترجعين بعد
من اروح بيت خالتي يومين و أرجع
و بيت عمي ليث اصلا نهار واحد و ارد

وها قضيته وي كتب جعفر طبعا
يوميه ناخذ دروس 6 ساعات
و هو هم ما شاء الله يفهم بسرعه

معتز ابن خالو حسين كال لابويه
اكو بنيه رايدها وياه
واذا صار و جبرونه امي و خالي
هو يسافر بعد ما يرجع
خالو من شاف اصرارة رضخ اله
ولان ماعندة غيرة
ساعدنه هالشي انه قتنعوا بكلامه
تشكرت منه و راحوا
رغم كل هالكلام ماله داعي
يعني امي ما فكرت عدل
وين اكو وحدة تطلك بتها حت تزوجها لابن اخوها
ماكو منطق بالسالفه كلها
بس بعد امي و تفكيرها المدري شلونه

صبحت اليوم كلني نشاط هيج من الله
نظفت البيت و سويت الغدة اني و جعفر
امي ابيت ابتهال بقت يمها لان صارلها إسقاط
و ابويه بشغله مثل كل يوم

كملت و خابرته اروح لبيت عمو ليث
بس فاجأني من حجه عليه و صيح !!
اني هم صعدت الطنكورة و صعدت فوك ابجي
شنو يصيح كول لا بابه لا ترحين
هيج صعبه يعني
حت سهله بس 4كلمات ثنين مكررة صارت 3
كله منورة جعفر
شكل عندي الرياضيات بكلشي نابص

فتحت الحاسبه و كعدت ع الفيس
علقت بمنشور اكثر اكله سويتها بالكليه 😂
كتبتلهم صاج و دولمه
جنه ننجمع و كلواحد يسوي شكل
والله ايام تجنن جانت
اوف اتمنى ارجع اكمل 💔

عبرت المنشور و كملت تصفح و إجه اشعار
فتحته أحمد راد على تعليقي .«و الكيك هم😍»

رديتله .«اي صح نسيته»
رد .«ما نسيته اني لان اتذكر كل التفاصيل»

!!!! ماذا ارد !
تركته بعد مرديت
شوي و غلقته رحت لغير برنامج
جعفر دك الباب بخبال

سارة .«لك ارعن هو هيج»
جعفر .«نزلي رجلج اجه»
سارة .«نقلع و بطل كذب»
جعفر .«والله هياته جوة»
سارة .«اعرف بابه خابرك و كالك انه تجي حت ماروح لبيت عمو»
جعفر .«يابه شكد صغير عقلج فتحي»
سارة .«شوف منو صغير عقلك اراويك»
جعفر .«هههه»

بقه يضحك و نزل وي ما ها كملت تصفح
ندكت الباب مرة ثانيه يكولي محمد
عباله رح اصدك يعني
بقيت اعاند و هو يلح فتحته و طلع هو صدك
تلاسنه وسديتها بوجهه 😂
شوي و فتحته من جعفر كال امي جايه
ارد أشبع منه شوي
عاد دخل شاف فراشي مكومته بالكاع و كدامي اللابتوب

محمد .«شهالهوسه ولج»
سارة .«هاي طقوس ما تفهمها انت»
محمد .«دلملمي بسرعه خل نكعد عدل»

عفته و رجعت كعدت بين الاغطيه
.«تريد تعال اكعد هنا ما الملم مبيه أرجع اهوس مرة ثانيه»
محمد .«كل عقلج!!!»
سارة .«اس والله شبيك ، تعال اكعد»

سويتله مكان و اجه كعد يمي
تدنيت عليه و خليت راسي على متنه
سارة .«حمدلله على السلامه»
محمد .«هههه هسه يلا صدكتي»
سارة .«يي 😂 ليش ما كتلي راجع»
محمد .«وكأنه رح تسمعين كلامي»
سارة .«لا تتعارك حباب والله مشتاقه نكعد مثل العالم»
محمد .«هههه هو غير تلملين حت نصير مثل العالم»
سارة .«تجاهل الهوسه شبيك ، يي شونك»
محمد. «زين كملت امتحانات اوليه وهسه عندي اشراف هنا بجامعتي»
سارة .«هاااااا»

بقيت افكر شو جاييني هالمرة مؤدب 😂
لا حضني و لا باسني شبيك يحظي
عيب اني ابادر اول هسه يكول مستهترة
ولك احضني اريد اوكسجين
شفته بقه ساكت جريت اللابتوب

محمد .«ما ترجعين وياي»
سارة .«نو 😌»
محمد .«كومي لا تعاندين»
سارة .«ابد ما شفت بابه شون صاح بوجهي لان ردت اروح لبيت عمي»
محمد .«حيل بيج تستاهلين لان لازم تاخذين اذني هم»
سارة .«شو روح بيتكم يلا»
محمد .«كومي تحضري اخذج وياي»
سارة .«لا بعد يومين و اجي علمود مجلسكم»
محمد .«وج تبلش امتحاناتي»
سارة .«ما اجي لا تحاول»

شاف قافله ستسلم و كام
كمت وياه وكف باب الغرفه
محمد .«ما تغيرين رايج و تحنين»
سارة .«هه كلها يومين واجي شبيك»
محمد .«ارد انام هذا البيه»
سارة .«نعسان تعال نام هنا لو ارجع بيتكم»
محمد .«اعرف فهمتي قصدي ترة»
سارة .«يومين و تنام عدل»
محمد .«اذا اروح ازاعلج»
سارة .«هاي شبيك»
محمد .«سألي نفسج»
سارة .«شو تعال»

لفيت أيدي على خصرة و حضنته
راسي على كلبه يدك حيل
رفعت راسي اخذ شفايفي بهدوء 💏
كوب وجهي بيدة و باسني
فصلها و باس راسي
رجعت حضنته حيل

سارة .«رح تكدر تنام هسه»
محمد .«ههه شعلتي جدي وخري بعد»
سارة .«اي مو هذا الردته»
محمد .«لا وخري بعد لا يصعد اخوج»
سارة .«رجلي قابل غريب»
محمد .«شون مال افقد عليج و يوصل صياحج للجهه الثانيه من العالم»
سارة .«كافي اطلع 😂»

رجع باس راسي و نزل
يمه احبه ، لو معتز جان مايد امي
يمكن مستعدة اهرب في سبيل ابقى مرة محمد

قضيت يومين نفس الروتين
صار يوم الجمعه وتجهزت
اجت ابتهال هم حت تروح وياي
رغم تعبانه بس كالت عمتي حضرت فاتحه زوج حماتها ولازم هي ترد الواجب !
امي هم تجي بس تنتظر خالتي اول
ساعه 12 إجه محمد اخذنه لبيتهم
سارة .«الله يساعدك»
محمد .«هلو حبيبي»
ابتهال .«شلونك محمد»
محمد .«هلا بيج خويه حمدلله شونج انتي علوش شونه و مصطفى»
ابتهال .«حمدلله زينين»
سارة. «لو جايبته خطيه»
ابتهال .«لا يثولني خليته عد ابوه»
محمد .«هههه هسه يخبله لابوه»
سارة .«لا وين يحب مصطفى أكثر من ابتهال»
محمد .«اي غير ابوه اله مكانه خاصه»
ابتهال .«هو صح كلامك بس تبقى الام الأصل»
محمد .«ههه لا احنه الاصل»
سارة .«ابتهال جيبي بنيه حت تبقى يمج»
محمد .«وج شعليها ولد لو بنيه»
ابتهال .«صح هو معليها حت لو تجيني بنيه اذا ابوها يدللها هذا اهو يصير هو وبس»

وصلنه نزلنه و هو كال نص ساعه و يرجع
دخلنه سلمت على عمتي مشتاقه الها
تلكتنه غيداء هم سلمت و صعدت لغرفه محمد
خليت غراضي و عباتي و نزلت
ابتهال كعدت بالصاله بعد محد جاي من العالم

عمه .«شونج عمه شون صار راسج»
سارة .«حمدلله عمه اكو وجع بس من اخذ علاجي يهدئ»
عمتي .«اليوم يرجع عمج و يشوف عود»
سارة .«اي والله مشتاقتله»
غيداء .«كومي فتحي حجابج اسامه طالع ، ذبي وتعاي خل نكمل»
سارة .«ماشي ، ابتهال تردين اخذ غراضج»
ابتهال .«لا قلبي هنا اتركهن رجلج يرجع»
سارة .«كيفج حبي»

صعدت فتحت حجابي و عدلت شعري
ذبيت صايتي بقيت بالثوب
اسود الردن تور و قصير للركبه
جواه كولون ثخين
كلش حلو الثوب مديله

نزلت و بلشنه نجهز زاد الامام
عمه طابخه لليوم حلاوة و چرك
و باجر تمن و قيمه
كيسناهن و خليناهن بالصوان جهزناهن
مرت ساعه و ندكت باب المطبخ

عمتي .«غيداء فتحي الباب يمه»
غيداء .«أيدي صابون سورة فتحي الباب»

كمت فتحتها صار كدامي محمد و بيدة امير
دخلت وراه اسماء سلمت عليها

سارة .«هستوني دا اسأل وينج»
اسماء .«رحت لبيت اهلي علي رجع وحدة خطيه»
سارة .«أي صح »
محمد .«رح تسولفن ع الباب ، سومه تعاي دخلي اموري غافي»
اسماء .«اي جيت»

خلت عباتها و غراضها بالحولي
واجت اخذته من ايدة دخلته لغرفتهم
سارة .«رح تروح»
محمد .«لا صاعد أبدل تعاي وياي»
سارة .«روح بدل بين ما اكمل شغلي»
محمد. «بس أصيح تجين»
سارة .«اصعد هسه 😂»

غمزلي و صعد
رجعت للمطبخ كملت تحضير الجاي
و غيداء غسلت كل الاستكاين
كملنه و حضرنه بلام الكعك
شوي و اجو بيت جدهم
دخلت اول شي عمه مليكه و فرحه
و بعدين مرام و رقيه و عمه سميه و جدة
دخلوا هم صار لغجه و حجي ثبروا البيت

سارة .«فروح تعاي شوي»
اجت يمي فتحت عباتها
فرح .«ها حبيبه»
سارة .«رنا شعجب ماكو كالت اجي»
فرح. «اي باجر تجي مو اليوم ، رزاق مقبل تبات»
سارة .«ههه شكد يغار عليها»
فرح .«وووو الله لا يراويج من رحت عدهم شسوة»

محمد .«سااارة ، ساارة»
سارة .«جيت ... شوي و ارجعلج حبي»
فرح. «ههه تعودت عليه روحي روحي»
سارة .«😂شسوي يعد»

تركتها و صعدتله واكف كدام المرايه بنشف راسه
سارة .«نعيما»
محمد .«ينعم الله عليج»
سارة .«يي كول شنو ردت»
محمد .«ها اي ، علكي ملابسج تعرفين ماحب هيج تشمريها»

😒😒 اوي عيني مرتب ، عشتو
رحت سفطت عباتي و ملابسي و خليتهن وي ملابسه لان كنتوري قافله

سارة .«اي اوامر ثانيه»
محمد .«اي تعاي يمي»
سارة. «ههه ما كول منا»
محمد. «دتعاي ولج 😤»
سارة «جيت لا تعصب بسرعه»

وكفت يمه و رش عطر غسلني اني وياه
سارة .«كافي خنكتني كح كح ولا تبطل هالعادة»
محمد .«خاف يخطبوج غير»
سارة .«احط لافته يابه متزوجه ترة»
محمد .«تسويلي فضل»

كزكزت على خدودة .«مجنوني»
محمد .«شهالحجي ولج»
سارة .«أحبك وانت متجنن بيه»
محمد .«ما تشوفين شون طايح حظي»
سارة. «هههه يلا انزل بعد عيب العالم بدت تجي»
محمد .«يلا رايح ، جيبيلي السترة»

رحت طلعتله سترة سودة
لبس كلاسك بس عبالك رسمي
كله اسود بس شنو الاناقه تصيح
احبه من يكشخ يصير صاك كلش
اكو يغارن من زلمهم يكشخون
بس لا وين طالع يجنن
وهم واثقه بمشاعرة متستاهل اشك بيه

رتب نفسه و طلع راح لأصدقائه
كملنه اني و البنات التحضير
كعدنه ننتظر يجون العالم
التقديم صار على غيداء و مرام و رقيه
اني و فرح و اسماء كاعدين
ابتهال هم إجت يمنه
شوي و اجت امي و خالتي و ثريه
كملت جمعتنه احنه البنات
صار المجلس و جان كلش حلو اجوائه
حت احلى من اجواء بيت جدهم
لان الاضاءه مالهم ملونه احمر و اخضر
مضت الساعاات و انتهى و العالم هم راحت لبيوتها
لملمنه المجلس و المطبخ و كلشي كعد بمكانه
عمتي خطيه تعبت راحت غرفتها
جدة و عمات محمد مددن بالصاله
البنات فوك بغرفه غيداء
واني رحت لغرفتي بدلت ملابسي
دزيت رساله لمحمد .«كمل المجلس ، مطول؟»
تركت التلفون و سرحت شعري
اليوم ولا اخذت علاج وجع الراس
هسه احس اكو مثل الطبل براسي يدك

رحت على علاكه الادويه اخذتهن
و مددت بالفراش العب بالتلفون و غفيت
حسيت محمد مدد يمي و اخذني لحضنه
ابتسمتله خفيف و رجعت نمت
صبح الصبح على صوت عمتي تكعد محمد
التفتت على الساعه ب6 الصبح
شو مغبشه عمتي شعدها

سارة .«محمد .. محممد كوم عمه تصيح ... ولك محمممد»
محمد .«سكتي خل انام»
سارة .«عمه تصيحك»
محمد .«عوفيها و نامي»

شد ايدة على خصري ورجع غفه
وي ما دتاخذ عيني النومه مرة ثانيه
ندكت الباب .«وللك محمد كوم وي ابوك»
محمد .«استغفر الله مها اليوم ما تعوفنه»
سارة .«كوملها خل انام»
محمد.«فدوة لالله اني اكعد وانتي تنامين»
سارة .«عليك الله راسي مأذيني»
محمد .«كومي اشربج شي حار حت يفك»
سارة .«هههههههههه ما»

سحلني سحل وياه تالي استسلمت و كمت
لبست صايتي كال .«اسامه ابيته لا تلبسين حجاب»
سارة .«شعجب اسماء مو هنا»
محمد .«اي بس هو ما إجه»
سارة .«هاااا ، ماشي»

فتحتها و بس عدلت شعري و نزلت وياه
سارة و محمد .«صباح الخير»
عمي .«هلا صباح النور بعد وكت يابه»
محمد .«ههه بويه هو اني هستوني نمت شبساع صارت ال6»
عمتي .«شكو تسهر تعلمت»
محمد .«لا وين ب12 رجعت بس بدلت و نمت»
عمي .«يلا صحصح و اكل خل نبلش نطبخ حت اطلع للدوام»
سارة .«عمو انت التطبخ»
عمي .«اي كميه هواي عمتج تتعب»
سارة .«انشالله تنالون مرادكم بحق هو صاحب المراد»
محمد .«انشالله ، كومي صبيلي جاي»
سارة .«اصبر اذا ما توبك من الجاي هسه تشوف»
عمي .«هههه نفس حجايه عمتج و ما فاد»
عمتي .«هو غير ابنك طلع عليك»
محمد .«خل اشرب الجاي وعود تعاركو»
سارة .«ههه هسه اجيبلك»

صبيتله و تريكنه .. شوي واجت عمه مليكه
هم كعدت تريكت ويانه
عمو و محمد كامو ع الطبخ بلشوا
الباقين كلهم كعدوا هم تريكوا و طشوا كل واحد مكان
لساعه 11 إجت رنا و رجلها و بلسم
هم سلموا و كعدوا ويانه
رزاق دخل وي عمي و محمد بالمنور
استلم عن عمي شوي لان تعب خطيه

صعدت لبست حجابي عدل و نزلت
اخذنه الوقت لساعه وحدة كمل عمي
بدل و راح لدوامه رغم تأخر خطيه
محمد هم صعد بدل و راح وي رزاق
و كمل المجلس اليوم هم بكل طبيعيه
وانتهى و الله يتقبل مراد صاحب المجلس

____________ رنا تروي ___________

اخذنه سونر و دننتظر تكول
الدكتورة .«شنو منتظرين »
رنا .«ولد»
رزاق .«بنيه»
الدكتورة .«هههه رجلج يحبج اكثر»
رنا .«يعني بنيه 😳»
رزاق .«مو كتلج اني اعرف»
رنا .«وخر ما احجي وياك»
رزاق .«ههه وج قابل اني الخليتها بنيه»
رنا .«كثر ما تنگ صارت بنيه»
الدكتورة .«هههه اغرب ثنين اشوفهم يتعاركون»
رزاق .«اي دكتورة ما طلعت صورة بنتي»
رنا .«معليك ما اخذها»
رزاق .«تبقى عندي هاي حبيبه ابوها»
رنا .«وأني»
رزاق .«انتزري ابنج عود»
رنا .«وخر اشو ما خليك تشوفها»
رزاق .«ههه كومي يلا اروح ابشر عمها»
رنا .«لا تحجي لأحد رزاق»
رزاق .«بس كرار خطيه جاي علمودها»

تركني و طلع .. مسحت بطني و عدلت ملابسي
دكتورة .«انشالله شهر اليجي تجين نشوف نموها ، مبقه بس كم شهر انشالله سهله»
رنا .«انشالله»

اخذت تصوير السونار و طلعت
كرار .«مبروك ام زهورة»
رنا .«ههه الله يبارك بيك ، زين تعرف احسن من اخوك»
رزاق .«لا اني رح اطلعج بدل المباركه»
رنا .«اووي شهالكرم 😒»
كرار .«بداعه زهرا لا تتعاركون هنا»
رنا .«كول لاخوك يحجيني گوة»
رزاق .«ههه دمشي للسيارة»

مشيت كدامه و وياي كرار
وصلنه السيارة التفتت رزاق ماكو
رنا .«وين راح»
كرار .«يوفي نذرة ، رنا لا تعاركيه متدرين شون فرحان .. طلع يكولي طلبت تكون جبيرتي بنيه والله ما خيبني»
رنا .«اني هم فرحانه بس هو يريد ياخذ بنته و يطردني من الغرفه»
كرار .«ههه مخابيل ثنينكم متكدرون بلا بعضكم»
رنا .«لا ليش اكدر اروح»
كرار .«وبالليل خابري كرار رجعني اخوك عافني»
رنا .«لا تلح هي مرة وحدة صارت»
كرار .«ههه دصعدي بارده عليج»

صعدت ليورة و غمضت
نفسي على اقل شي تلعب
لهذا كون ارتاح دائما
رزاق راح يوفي نذرة !
هو بقه شي ما نذرة ارد أفهم
كلشي محصله بالنذر

مرت ربع ساعه و رجع صعدوا ثنينهم
رزاق ساكت ولا حرف نطق
كرار .«رنا ربطي الحزام»
رنا .«تمام»

طلع بينه للبيت وصلنه و رجع لجامعته
وهو لأن على الدوامين
يرجع للبيت ب5 العصر
يتعب كلش هواي خطيه

رنا .«سلام عليكم»
عمتي .«هلا بيج يمه ، ها بشري»
رنا .«ممبين داير نفسه الطفل»
عمتي .«خجول من هسه»
بلسم .«يعني يزعل عمته لان يخجل»
رنا .«ههه مو يتحرك وي ايدج مو كافي»
بلسم .«لا مو كافي»
كرار .«اني هم اريد احس بيه»
عمتي .«ولك اخوك لو يسمعك يموتك»
كرار .«معليه رنا من تحسين تحرك كوليلي»
رنا .«ههه كول لرزاق يروح يتعارك»
بلسم .«رزاق يغار ما رح يرضه»
رنا .«لا اني اكوله»
عمتي .«ما يصير رنا»
رنا .«عمه شسالفه ترة كرار و علي و أياد مثل اخوتي»
كرار .«صح اني هم قابل»
عمتي .«ابو لسان لا تنطوط ما يصير»

عفتهم و صعدت شوي و ندكت الباب
رنا .«تفضل»
كرار .«رنا هاي اني»
خليت شال على راسي و طلعتله
رنا .«محتاج شي»
كرار .«لبسي صايتج و تعاي»
رنا .«ثوان»

دخلت بدلت ملابسي و لبست دشداشه عريضه
عدلت شالي و طلعت منتظرني بهول الفوك
رنا .«اي كول»
كرار .«ليش ما كلتي عن زهراء»
رنا .«خفت تعرف انه تجينه بنيه و تحجي مثل ما سوت وي فاطمه من عرفت بيها بنيه مو سمعتها كلام»
كرار .«رنا هذا رزق من الله امي صح يمكن تحجي بس تذكري هذي بت رزاق ما تعيل بيها»

رنا .«اياد هم جان هيج مو خطيه سمعتها لفاطمه»
كرار .«بس غلط تضمين»
رنا .«لا عود قريب ولادتي اكوللها»
كرار .«ما اضمن اسكت ترة 😂»
رنا .«اذا تحجي ما خليك تشوف حركتها»
كرار .«لا على بختج ولا أنطق حرف»
رنا .«عفيه 😁»
كرار .«يلا دخلي ارتاحي طالع اني»
رنا .«مر لأهلي جيب فروحه»
كرار .«اي تدللين»
رنا .«ههه تكيف»
كرار .«طبعا ، تدرين عاجبني ابوسها بس ما تقبل»
رنا .«اخجل ولك مرت اخوك كدامك»
كرار .«لا بربج ، ولي حالج حال بلسم»
رنا .«على اخوك مجنون»

ضحك و نزل رجعت لغرفتي
غيرت لبسي و مددت بفراشي
بطني بيهه شوي علو حلوة
كاعدة احجي وي بنيتي و غفيت
حسيت رزاق عدل نومتي
والله مخبلني هالرجال
رنا .«نفسي انام براحتي لا تبقه عينك عليه»
رزاق .«تعلمي مو وحدج بعد بداخلج روح»
رنا .«ما اكدر اغفه اذا مو هيج شون يعني»
رزاق .«تعلمي هي 4 اشهر وتخلصين»
رنا .«اففف متغدي لو اسويلك»
رزاق .«بلسم و فرح جوة كرار جاب جاهز»
رنا .«ها إجت فرحه»
رزاق .«رنا لا تخليهم يختلون وحدهم اعرف كرار ميت عليها مبينه حيل مصيبه»
رنا .«أدري مو 4اشهر مدري خمسه اني هنا عايشه وياك شو ما سويت شي ، اخوك هم هيج»

رزاق .«اي جنتي ما تحبيني غير»
رنا .«اي بس جنت تكدر تتمادة»
رزاق .«هو اني اريد تحبيني عاد اجبرج حت اخسرج للابد»
رنا .«ههه جان كرهتك والله»
رزاق .«رنا ....

اجه كعد مقابيلي
نهضت نفسي و كعدت عدل
رنا .«كول»
رزاق .«حبيتيني مو ، هسه اني الساكن داخلج»
رنا .«لا طبعا»
رزاق .«شون يعني !!»

رنا .«زهورة بداخلي غير»
رزاق .«رنااااا فهمتي قصدي»
رنا .«انت رجلي بعد تبقى الاقرب إلي»
رزاق .«ردي جوابي ، رجلج على كد الواجبات لو تحبيني»
رنا .«أحبك طبعا ، ما تشوف روحي تستقر يمك»
رزاق .«يعني فزت بيج»
رنا .«ههه شبيك اليوم»
رزاق .«ماريد بنتي تجي وامها مملكتني گلبها»
رنا .«انت تملكه و تملك الروح البيه هم»
رزاق .«احبج تدرين مو»
رنا .«اعرف من اول دخلتي لبيتكم»
رزاق .«ما نغش اليوم و نزعج بنيتنه»
رنا .«لا حباب ما بيه 💏

دا احجي و قاطعني بقبلته
اخذني بمشاعرة وحنيته و حبه
جان حذر لان الدكتورة مانعتنه
وي ما دا ارجع اغفه ندك الباب حيل
فز رزاق وكام لبس و فتحها
رزاق .«مخبل هو هيج»
كرار .«غير فرح هنا شوكت تكعد رنا»
رزاق .«روح هسه تجيكم»
علي .«يلا تعالو تعشوا»

اسمعه يحجي وياهم كمت اني
طلعت ملابس الي و دخلت اسبح
كملت و طلعت هو كاعد بفراشه
رنا .«كوم اسبح خل نتعشه جوعانه»
رزاق .«رايح ، طلعليلي ملابس»

دخل الحمام و طلعتله تراك خليته ع السرير
وديتله منشفه اخذها
شسورت شعري و عدلت حجابي
طلع بدل و طلعنالهم
رنا .«هلا فروح»
فرح .«هلا بيج حياتي»
رزاق .«هي فرح شخبصتوا الدنيا»
فرح .«هههه والله كتلها لبلسم هذا اخوج ما يخليها تطلع»
رنا .«لا جنت نايمه وهو يشتغل بسجلاته»
بلسم .«ما رجع اليوم سجلات»
رنا .«دفوتي شوفي الهوسه المسويها»
علي .«من يوم يومه هيج»
فرح .«تعالو يلا »

كعدنه يمهم جايبين گص و مشروبات
تعارك رزاق و مخلاني اشرب وياهم
من كل عقلي كمت ابجي
روحي صارت بالميرندا
وهذا قافل ما يخليني 😭

رنا .«هسه تشوف شسوي بيك»
علي .«رزاق اليوم استضيفك بغرفتي»
رنا .«ابسطه حت لو يمك وتاكل انت هم بسطه»
رزاق .«هههه والله ابني مستهتر يحرض مرتي عليه»
رنا .«معليك بيه .. كراار كراار تعال»
طفر كرار يمي جريت ايدة خليتها على بطني
رنا .«هنا ركز رح يدفر»
رزاق .«هاي شدسوين»
رنا .«معليك خل يشوف»
كرار .«لا تدخل هذا اجتماع عائلي»

بلسم .«واني هم اريد اشوف»
كرار .«وججج وج دفر »
سحب ايد رزاق خلاها بمكان ايدة
وهم تحركت بس رزاق مات غيرة
خله و دخل غرفته
فرح .«ترة اني هم اغار شسالفه»
كرار .«لا تتدخلين»
علي .«رنا ترة صدك ما يصير»
رنا .«انتو اخوتي خل يفهم ، تريد تحس بيه»
علي .«لا مبيه لسان رجلج»

عفته علر راحته و كملت عشه
كرار رجع يم فرحه
صح فرح لان حس بيه
بس ضاج من تصرف رزاق
اني ضجت اضعافه أصلا
لأن هاي مو غيرة قله ثقه بس
كملنه و بلسم نزلت الصينيه
فرحه هم نزلت وراها
علي كام بقينه بس اني و كرار
رنا .«لا تضوج منه هسه احاجيه»
كرار .«لا يمعودة شعليه بيه»
رنا .«حسيت بيها»
كرار .«بعد عمها قويه»
رنا .«يي بالليل تعلب لعب»
كرار .«روحي لرزاق خاف يحجي عليج»
رنا .«اخوك مصيبه»

دخلت غرفتي شفته كاعد بالفراش
النفاضه يمه ماليها جكاير
رنا .«شبيك»
رحت كعدت يمه و فتحت حجابي
رزاق .«شبيه فرحان باستهتار مرتي بس هذا»
رنا .«شبيك كايلتلك ذوله اخوتي»
رزاق .«افهمي حرام ما يصير»
رنا .«ليش حرام ثنينه مغلطانين»
رزاق .«يصير اكمش فرح هسه !!»
رنا .«هي مرت اخوك خل تحمل وروح حس بيه وهو بداخلها»
رزاق .«انتي ما تفهمين بس تعاندين»
رنا .«لا تزعل خلص بعد ما عيدها»
رزاق .«وخري منا لان مشتهي ابسطج»
رنا .«واني هم مشتهيه ابسطك لان ما جبتلي ميرندا»
رزاق. «ام لسان شون تكولين هيج»
رنا .«قابل ربك وحد 😒»
رزاق .«كومي لا ومحمد هسه ابسطج انتي و بنتج»
رنا .«رزاق ترة ما كلت لأهلك ع الطفله»
رزاق .«ليش بالله»
رنا .«لان من عرفت بفاطمه حجت عليها»
رزاق .«شوكت هاي ؟»
رنا «الثلاثاء الفات من اجت عدنه»
رزاق .«معليج باليحجي ، رنا اهمشي اني فرحان»
رنا .«ماريد يكرهون بنيتي»
رزاق .«المهم اني و انتي نحبها»
رنا .«اريد ميرندا بداعه زوزة»
رزاق. «والله مو زين شبيج»
رنا .«زين روح جيبلي عصير برتقال»
رزاق .«نزلي عصري»
رنا .«من برة اريد»

تافف وكام بدل و طلع
طلعت يم البنات كاعدات
صعد كرار .«وين طلع رزاق بعدة زعلان»
رنا .«لا بس راح يجيبلي عصير 😁»
فرح .«ههه مستغله الرجال ولج»
رنا .«لا والله بس اذا ما اشربه اعرف رح ابقى الليل كله اتقيئ»
بلسم .«يبوو وج فرح نحس حت معدتها رح تتقيئها على ساعه»
كرار .«كله بسبب بت اخوي»
رنا .«هههه ما تكدر»
فرح .«ادري اني من الصبح»
بلسم .«واني هم ادري اول ما رجعتوا»
رنا .«ايا كذاب قشمرتني حت تحس بيها مو»
كرار .«انتي عقلج صغير شسويلج»
فرح .«والله عفيه عليج»
كرار .«اي حطي ابالج مو انتي هم تخلفيلي بنيه اول ، اريد اناسب اخوي ترة»
رنا .«اول تالي بنيتي أكبر»
فرح .«صبري مو هو قابل بيدي»
بلسم .«شوفي بلا خجل شيحجون ، دلبسوا الحلق اول»
كرار .«انتي شدراج لعد شحاط بيدها اني خرخاشه»
رنا .«اي بس مو رسميه»
فرح .«لا عدنه رسميه 😁»
رنا .«ثگلي ولج مصخمه»
فرح .«عليمن اثكل احبه و يحبني بعد شكو»
كرار .«هاي هي روحي شفتي شون سبورتيه»
فرح .«اي بس مقابله على تصرفك للمعلومه»
رنا .«هههههه قصفتك»
بلسم .«وج فرحه لا تحجين هيج»
كرار .«اني هم أقبل ترة اخوي يطمن على جهالي ليش؟ لان اثق بيه ورزاق مفروض هيج يفكر»

صعد رزاق و رد عليه .«شرعا حرام ابو راس»
كرار .«ترة لابسه حجابها جانت هي ايد و خليناها ع الطفله بعد شكو»
رزاق .«اي بس ما تعيدها بعد حت ما تخرب بينه»
كرار .«عود اخليك تحس بأبني»
رزاق .«كوم لا اجيك بالحزام»
كرار. «عيب مرتي هنا»
فرح .«هو بقيتوا عيب 😂»
كرار .«مو بالله شو تعاي اخذ شمه»
بلسم .«هههه صار محمد الثاني»
رنا .«شدراج ولج»
بلسم .«اسماء حجتلنه»
فرح .«هو غير ذايب بمرته اكثر واحد شايفته يحب مرته هو محمد»
كرار .«هااا بعني ما حبج اني»
فرح .«لا هم اكثر منه»
رزاق .«رنا البرتقال جوة»

نزلت للمطبخ و هو نزل وراي
رزاق .«مرت خالج خابرت عزمت امي على قرايتهم»
رنا .«ياا صدك شو هسه رح تقرة»
رزاق .«لا اسبوع اليجي ، بس خل ابالج ما تباتين»
رنا .«اي اعرف»

شربت العصير و صبيت اله هم شرب
رجعنه صعدنه كلنه كاعدين
ب11 اجه مرتجى على فرحه
هم كعد يمنه لل12 و راحوا
كل واحد راح غرفته
اني بدلت و جيت انام صاحني رزاق
.«تعاي ننزل نكول لأمي عن طفلتنه»
رنا .«لا اصبر ادخل الخامس»
رزاق .«هي 3 ايام متفرق»
رنا .«ما انزل»

طبيت بفراشي وهو بقه ينظرلي
استغفر و راح غسل واجه يمي مدد
نمت بحضنه و غفيت
علمود حملي حت لو متزاعلين اني و هو
لازم انام بين ايده حت روحي ما ترد
وطبعا هالشي عاجبني 😂

مضى الاسبوع و طلعنه لبغداد لبيت خالي
وصلنه عدهم سلمنه و رزاق عرف الطبخ هنا
دخل يم خالي و محمد ساعدهم
اسامه ما شفته يمكن عندة قضيه وما كدر يحضر
همزين اجه رزاق لان خالو تعب خطيه
كمل هو ومحمد بساعتين كلشي كملوا
محمد صعد هو و مرته لغرفته
رزاق هم اخذته لغرفتي غير ملابسه لان تدمرت
بقه يتفحص غرفتي لان مداخلها هو
كمل و نزل انتظر محمد شوي و طلعوا ثنينهم
خالو قاسم هم بدل و طلع لدوامه

صبوا البنات الاكل و كيسناه كله
مقبلوا اساعدهم هواي لان حامل عود
خاله مها كلش مداريتني تكول خاف تتاذين

كمل المجلس و العالم طشت لبيوتها
خلوا عشه و نجمعنه حت محمد و رزاق اجو
خالو يتأخر يلا يجي
هم لمتنه حلوه و سوالفهم احلى
كثر ما ضحكت بنيتي موتتني
جريت ايد رزاق خليتها عليها بدون ما ينتبهون
هو هم من حس بيها قرب شوي و همسلي احبج
خجلني و درت وجهي عنه

عمه سميه .«اي رنو ما عرفتي سرج شنو»
عمه مليكه .«صدك عود نسيت اسالج»
رزاق .«كوليلهم» بهمس كالي
فرح .«لحظه ، خل نشوف كلواحد شنو يتوقع»

عمه سميه .«ولد»
عمه مليكه .«ولد»
خاله مها .«بنيه»
محمد و سارة .«بنيه»
غيداء .«ولد»
اسماء. .«بنيه»
مرام و رقيه. «ولد»
جدة .«ولد»
دخل خالي قاسم .«بنيه» اني هم وياكم اصوت
رزاق .«اي عمو اهم صوت هو انت»
دخل وراه مرتجى .«اكول لو لا»
رزاق .«لا انت تدري اكيد»
مرتجى .«عباس يكول ولد»
محمد .«وينه ما يجي»
مرتجى .«يطبگ السيارة و يجي»

فرح. «هسه منو بنيه رفعوا ايدكم»
رفعوا اللي كالو بنيه 5 وي خالي قاسم
و الولد 6 كالوا
دخل عباس .«بنيه ولكم اني داعي على رزاق لان ما قبل يريگني ذاك الاسبوع»

كلنه ضحكنه عليهم و رزاق هم مات ضحك
.«ولك ما تنسه كتلك متأخر عن دوامي»
عباس .«شكو تكول تعال نتريك سوة»
رزاق .«شدراني رح أتأخر»
فرح .«هسه صاروا 6 ب6 😂»
عمتي مليكه. «وج كافي خل نعرف»
رنا. «كوللهم انت ابو زهراء»
رزاق .«زوزة جايه»

كلهم فرحوا و محمد صفك .«شوف مو كتلك»
سارة .«قابل انت تعرف»
محمد .«اذكر اسماء سمنت بحمل امير رنا من ضعفها مبين عليها»
اسماء. «اي صح هو اختاريت بنيه لان حسبت هيج»
جدة .«هذا مو قياس يمصخم»
محمد .«جدة بدت تغرد اليوم»
جدة .«اي اغرد طبعا عبن مراضيه عنك»
خالي قاسم. «شسوالج يمه كولي اخذ حقج»
محمد .«يابه هو آنه شفتها حت اسوي شي»
جدة .«ما ريدن احجي هسا ، بعدين بينه»

كاموا البنات طلعوا فاكهه
وي ما خلوها وجان تنرگع باب الحوش
عبالك شمروا شي قوي
محمد رأسا طفر و وياه عباس و مرتجى
رزاق .«لا تطلعين» و راح وراهم

خالو طب طلع سلاحه و طلع !!
كلنه رجفانين منعرف شنو السالفة
صار انوب صياح وعياط برة
و مرتجى و رزاق دخلوا اسامه سابح بدمه
دخلوا وراهم الولد و خالي
محمد صعد بدل ونزل و خالي هم
كملوا و طلعوا بيه للمستشفى
كل هذا و محد منتبه على اسماء
لحد ما طلعوا انتبهنا عليها وكعت
راحت عليها خاله مها و سارة و غيداء ركض
هم اخذوها غرفتها لحد ما حست
بقينه بفكر شارد على اسامه
و قلق على اسماء اللي ضغطها ارتفع كلش
المشكله هي محد بقه من الولد حت ياخذوها مستشفى !!!

مدري شسالفه بس غيداء تكول راح بيها اخويه
الله العالم شنو 😐
.
.
انتهى ....
شونه البارت 😁

لا تنسون الفوت 👇
اسراء الخزرجي 💜