رواية أحبها فياليتني احصل على حبها الفصل الثالث عشر 13 - بقلم نور الشمس

شهم..
من گلتلي ريحانه على حلا شلون ضايجه لأن مشافتني فرحت معناها مهتمتلي
اخ احس شوقي الها دمرني
كل شويه بدون وعي الگه نفسي مطلع رقمها
اخر شي اصحا على نفسي واترك الفون ..مو هسه بعد
شبيه بسرعه حنيت
اصبر خلي تحس بيه بعد تحس بناري تشوف التجاهل شلونه
اتذكر من اتصل بيها احچي وياها واحس گلبي دگاته. تسرع ..اكو بروده احسها باطرافي مااعرف منين تجيني احچي وياها بكل حنيه
چان جوابها أي.. لا ..ماكو غيرهن
چنت كلش راضي صوتها انفاسها من اسمعهن يريحني بحيث احچيلها كلشي البگلبي مايوم حسيتها استقبلت مني كلامي وحست بي چانت تسمعه مجرد كلام عابر
احبها مو بيدي بس اريد منها تحبني تحس بيه
تحس بعذابي تعرف هذا ليلي اليمر عليه شلون اخلصه وشوقي الها يذبحني تعرف شنوو رجال مثلي اله مكانته عند اهله والمجتمع تنزل دمعه منه اخر الليل علمودها
شنوو هوه الحب ليش مرات اكرهه
ليش ماعشت حياتي بدون مااجربه ليش الناس مهتمتله.. خاصتا الحب من طرف واحد
ماكو شي اصعب من احساس الي يحب من طرف واحد
مستعد انطيها كلشي مني وكلشي بيه ومااريد مقابل منها غير بسمه منها تحسسني اني شخص اهمها
تحترمني مثل مااحترمها واقدرها
تحترمني كرجل مااريدها تحسسني بضعفي يمها
بقيت افكر شلون اتصرف وياها وشلون اخليها تتعود عليه وعلى طبعي
اوصل مرحله مرات الغي كلشي افكر بي واگول مااريد كلشي اريدها مثل ماهيه
اووف تعبني التفكير گطعت صفنتي ريحانه
..شهم تبقه هيچ ليش مترتاح شويه تتمدد
..ابتسمتلها تعالي يمي اني مرتاح الحمدلله اهم شي حمزه هسه شلون صار
..الحمدلله بس جاي يتعذب لو مسكنات وينام لو ميتحمل
..اكيد ريحانه أصابته مو هينه مو زين الله نجاه الف الحمدلله
..الحمدلله
..تعالي ندخل نشوفه گعد بعده
دخلنه يمه شويه وگعد
..الحمدلله ع السلامه سيد يابه والله انت بطل
..الله يسلمك شهم طول عمري واني الي يگلي ماعندك اخوو اگلهم شهم اخوي تذكر من چنه نتعارك وتشوفني وحدي شلون تهجم وياي عليهم
حته لو چانو اكثر من عدنه تگلي لو ننبسط سوه لو نبسطهم سوه مااعوفك وحدك
...ههههه اتذكر ..وانت ولاتگعد ابو المشاكل تموت ع العرك
..اي هذا هوو بعد.. دنگت مااعرف بعد امشي .. اگدر ارجع للدوام لو لا
..تمشي ان شاءالله والدوام تركه هسه لتفكر بي
لك اني علمودك عايف دوامي وانت كاتلك الدوام
صدگ لو گالو عنك مجيش مهووس بالجيش والأسلحه وجنودك والظباط هههه..تصير زين وترجع وتقاتل ولايهمك بس يرادلها صبر
..ألله كريم اطلب الصبر من ربي
..ونعم بالله ..احس اكو حچي اباله بس ميگدر يحچي لأن عينه على ريحانه كل شويه سكتنه شويه بعدها گلي
..شهم اريد ريحانه ترجع تبقه انت وياي اذا ماعندك شغل او يبادلك هشام وانت تاخذها
ريحانه ..لا اني زينه ابقه يمك ارتاح اكثر
..لا روحي ارتاحي من اشوفچ هيج اتعب اكثر سمعي الكلام وخليچ مثل معرفتچ
شهم..أي روحي ريحانه انتي تعبتي هواي اني ابقه واخابر رضا يجي ياخذچ واني ابقه وي حمزه
حمزه ..لا روح انت ارتاحلك يوم وتعال الي بعدين خلي رضا يمي يوم ماكو شي عليه
..مرتاح هيچ ليضل بالك شعندي اني بس انت حير بنفسك وصير زين واحنه شكوو علينه لتخاف ثاني يوم
اجه رضا اخذ ريحانه وبقينه اني وشهم
متركته ابد چنت اطلع عنهم حته ياخذ راحته وي زوجته يحجون شي بس من راحت ريحانه لا بقيت وياه ابد مااتركه
اصعب ايام احسها اشوفه شلون يتألم
من راحت ريحانه اخذ راحته حته صوته بده يعله
من يتأذه يصيح يصرخ عادي اتگطع وياه ومابيدي شي اسوي اله حته الكلمه توگف مااگدر اواسي ولو بكلمه
المسكنات خففوها مو مثل قبل ينطونه دائما
لا ينطونه بس بالليل ومن الثنتين تلاثه بالليل يگعد يتأذه چنت اسأله شنوو اليوجعك يگلي جسمي كله رجليه ضهري صدري مااعرف شنوو اليوجعني بس اكثر الامه چانت من رجليه
مرت الأيام على هالحال وبدينه بالأسبوع الثاني دخلوو العمليات من جديد سووله عمليه الرجليه
وگالو منگدر هسه نزرعله بلاتين اقل شي تلث اشهر
بقينه فتره بالمستشفى وبهاي الفتره اني ابد ممداوم بس چانو يساعدوني بالدوام يعرفون ضروفي
اليوم الي قرروو حمزه يطلع
اجانه هشام وعمي وسام
والباقي منتضرين
من دخلنه شارعنه شفنه الشارع مليان عالم
كلها منتضرتنه خوالنه واعمامنه والجيران
چانت الفرحه مبينه بوجوهم
حسيت حمزه فرح من شافهم
بهاي الفتره حمزه بقه على كرسي متحرك
والطبيب انطاني تعليمات
شلون اتعامل وياه لازم يطيب بأسرع وقت ونسويله بلاتين حته يمشي
من دخلنه البيت اجواء الفرح چانت حلوه تلگوه بالهلاهل والچكليت
اجوو شافو عمامي والأقارب والجيران سلموو وطلعوو
زيارة المريض تصير سريعه
ردنه نبقي جوه حته نكون يمه كلنه ماقبل
وراد يرتاح بغرفته
گتلهم خلوو على راحته وفهمت عمي وعمتي احتمال يصير عصبي اوو يتكأب حاله طبيعيه الي مثله هذا كلام الطبيب خلوو على راحته
ريحانه فهمتها شلون تتعامل وياه واهم شي تتحملين كلشي منه ومتعاندي ابد
من دخلت بيت عمي واني اريد بس المحها اشوفها
كلشي بيه يريدها
شگد چنت ضايج ومهموم على حمزه وتعبان بشكل فتره طويله مماخذ كفايتي من النوم كلشي ماشغلني عنها
اول نهار بقيت يمه لأن اعرف اتعامل وياه وهمه يراقبوني وراي يتكفلوه خاصتا ريحانه چانت مركزه وياي بكل خطوه تحاول متخلي يحتاج شي رادت تفهمه قبل ليگلها على شي
چنت اتمنى حلا مثل ريحانه يهمها رجلها وطلباته تحب تتعلم كلشي حته متنطي فرصه الغيرها يتكفل اموره
چنت كل مااشوف ريحانه وتعاملها وي حمزه افتخر بيها نعم الأخت
بهذا اليوم خواته رادن يشوفنه وطولن من سأل عليهن حمزه گالتله امه يردن يشوفنك وصارلهن فتره بره يبجن من الفرح
گلها صيحيهن
ردت اگوم اطلع لزم ايدي
..شهم انت واحد منه ليش تريد تگوم
..خليهن ياخذن راحتهن
..ميخالف ابقه
بقيت وبالي كله يم حلا
دخلن شفت حلا چانت تبچي وحيل خايفه على حمزه من شافته بوضعه انهارت بچي ردتها تسكت غلط تتعامل هيچ وياه
بس ماعرفت شلون ابينلها ميصير هيچ
بقت عيني عليها اشرتلها براسي وبطرف شفافي على كيف
حاچيتها حاولت ميشوفني حمزه
گتلها
غلط لتسوين هيج ميصير اصبري
فهمت مسحت عيونها ع السريع وابتسمتله
بوقتها حيل فرحت حسيتها فهمتني او سمعت الكلام مني
صار وقت الصلاه
دزيت على ملابس من بيتنه وجابتهن امي
من شفتها چنت مشتاقلها حضنتها وبست راسها وخدها صار هواي مشايفها
غسلت ابيت عمي چان عدهم حمام خارجي
بيوتنه كلهن نبنيهن حمام خارجي ومدخل الي هوه بي مغسله وغسالة ملابس كلنه سوينه بره علمود الزوار
كل سنه نستقبل زوار الأربعينيه للأمام الحسين عليه السلام بيتنه وبيوت عمامي كلها تنملي زوار ف اضطرينه نبني بره حته ياخذون راحتهم
اني من غسلت ابيت عمي غسلت بره من طلعت صارت بوجهي حلا الضاهر چانت تغسل بالغساله البره ومتعرف بيه اني موجود لأن واضح عليها ارتبكت حيل وبقت واگفه بمكانها مدنگه
من شفتها مااعرف شصار بيه شكوو عهد ماخذه على نفسي تبخر تفكيري وحرصي على انو لازم المبادره تكون منها مو مني مابقه شي ابالي من هذا
بقت على وگفتها واني ماشلت عيني منها شويه رادت تروح لزمت ايدها
..السلام ال الله ليش ساكته
..دنكت هلوو شهم
..هلوو بيچ لچ هلوو هوه هذا سلام تلاگيني بي شلونچ حلا
..الحمدلله وانت
..عايش. تحسرت ..حلا مشتاقلچ
..أنت مشتاقلي ممبين
..شسوي تعلمت منچ من گد مااحبچ گمت اطبع بأطباعج
..أني
..لا اني منو غيرچ يعني لچ شلعتي گلبي گليلي شسوي انطيني حل
..شهم فدوه خل اروح لايجي ابوي استحي
..غير عاقدين
..مو ردت تنهي كلشي أنت
..تردين انهي يعني
..مو هيچ بس انت گتلي كلشي انتهه ليش هسه تحچي وياي
..ليش وهاي الليش اني مااعرف جوابهه كل الأعرفه گلت ومگدرت هاي تعجبچ يمكن ضيفيها لأنتصاراتچ وسجلي  حب بمذله بكلام گاله ميگدر عليه ضيفيهن وشيلي هالخشم شيلي بعد وخلي يوصل للسمه وخليني اني بهمي وقهري
..أنت ليش تحسسني اني مغروره وماعندي احساس
..لأن هوه هذا الصحيح انتي هيچ بس مجاي تشوفين نفسچ
لچ انتي شنوو قالب ثلچ متحسين شنو هالبرود العندچ الخاطر الله بعدي عن طريقي خليني اولي احس روحي احترگت وانتي يمي ثلجه

حلا..
ضليت صافنه دفعني وطلع هذا صدگ يحچي اني هيچ بعدين هوه شبي هيچ يحچي وين اكوو غزل برزاله هسه هوه دلعني رزلني مااعرف شبيه اني من شفته هيج احس اطرافي بردت ووجهي صار نار بس اكو غرور بداخلي خلاني ابينله عكس الي حسيت بي
يمكن صدگ اباله مغروره بس اني مو هيج كل مااتذكر شلون اجه وتركني ذاك اليوم اكره نفسي ع اللهفه الي اني بيها ودگات گلبي چانت طبل چنت ارد اشوفه اعترفله بكلشي من تركني وطلع حسيته كسرني وحسيت نفسي رايحه زايد
همزين هسه طلع لو باقي شويه چان ضعفت وبچيت گدامه واعترفت بكلشي

شهم..
دخلت مزعوج يمكن ومبيين عليه حاولت اخفي القهره الي بيه مگدرت ماچنت مقهور وبس اكو احساس مختلط فرحان وضايج مااعرف شلون افسرها بس چنت فرحان بشوفتها ووگفتها وياي والضوجه البيه من البرود الي بيها
گعدت طلعت فوني وبقيت اگلب بي هيج بدون وعي
صوت حمزه نبهني 
..شهم خيرك ليش مزعوج
..لامابيه شي متوهم
..لتگلي متوهم مبيين عليك شهم يمي ريحانه بس صعدني الغرفتي وروح ارتاح انت تعبت
..چنت صدگ تعبان وماردت ابقه اكثر يمهم
صعدته ووصيت ريحانه عليه وطلعت سلمت على عمي وعمتي ورحت للبيت
چنت تعبان كلش بس شفت فراشي نمت بدون اي تفكير

حمزه ..
چنت محرج من ريحانه مصارلها فتره طويله ايامنه الي گضيناها سوه بعد الزواج واحد وعشرين يوم بس
من شفت فرشة الچربايه وغرفتنه وتذكرت ايام العرس حيل انقهرت وين چنت وهسه وين
ليش مصار بيه هالشي واني شاب ليش حطمت البنيه وياي منوو يگول اگدر امشي بعد
ومنوو يگول تصبر عليه
تعبت واني افكر دخلت عليه مبتسمه
..حبيبي مرتاح
..شتشوفين انتي
..اشوفك گدامي وبخير ان شاءالله لو تعرف الخوف الي عشناه چان انت هم شفت هالشي نعمه
..ريحانه اني اعرف كلشي وحسيت بكلشي من هاجمونه الحد منقلوني مر عليه كلشي مثل الحلم
چنه مجتمعين وواحد يشد عزم الثاني
نموت ومانستسلم كلنه هيج نحچي
شفت جماعتي گدامي وگعوو
شفت علي قبل يومين اتصلوو بي اهله واجانه فرحان وگال صرت ابو حسين حسين الي ملحگ يشوفه
شفت گدامي بكر ولد وحيد الأمه وعنده اخت وحده چان عايش بقلق لأن امه واخته بخطر افتر الوحدات كلها حته يساعدونه ويطلعوهم ومن خابروو وطلعوو المكان امن من الأنبار البغداد يم خواله شنوو صار تلگنه هناك بدل ميشوفنه على طوله راحلهم مشدود بعلم
شفت عباس  وجعفر واسامه كلهم گبالي استشهدوو
بقينه اني وشكم واحد ومانعرف بعدها شنوو صار
النعمه الي تحچين عنها ابتلاء بالنسبه الي
لو جايكم ملفوف بعلم ولاجيتي على هذا الكرسي
واني مااعرف مصيري شنوو امشي اگدر اكمل علاقتي وياچ كزوج اگدر اصير اب لو لا
كل هذا مجهول بالنسبه الي فهمتي احساسي هسه
..من حاجاني هيچ شبعت بچي هزيتله راسي فهمت
..ريحانه دموعچ هاي توجعني اكثر من الوجع الي بيه
..چنت احلم اعيش احلا عيشه ابينلج حبي واهتماني بكل ساعه وموقف يجمعنه
هسه ماعندي غير هذا الي ينبض الچ اشرت على گلبي وهذا الي يحاچيج بس گلبي والساني ماعندي غيرهن يكفيج الكلام وبس لو يكفيج نبضات گلبي
..يكفيني عيونك وگلبك والسانك كل هذا يكفيني
اني عندي ثقه بربي يشافيك وتمشي واذا مممشيت اعتبرني اني رجليك اني وياك نكمل بعض انت بس ارتاح وكلشي يصير تمام
..متحلمين تصيرين ام بيوم
..مااريد مو شرط هواي ناس كلشي مبيهم وميخلفون شنوو يعني عادي
..مو عادي والله موو عادي انتي تكذبين عليه لو على نفسج
..مو عادي بس راضيه ومقتنعه بمشيئة ربنه
..مشيئة ربنه هذي اني الي ارضا بيها انتي ممجبوره
تگدرين تشوفين حياتچ وي غيري وتعيشين احلى عيشه
..من گلي هيچ صدگ انقهرت وضجت منه بچيت بحرگه حمزه تريد تتخلا عني شلون تفكر هيچ شلون تفكر اصير الغيرك وين غيرتك واهتمامك عليه ليش هيچ عندك عادي
..مو عادي والله مو عادي لچ بيه نار تسعر محد حاس بيها لچ راح يموتني الهم افكر بيچ اريدچ ومااريد تتعذبين اريد راحتج واريد قربچ ريحانه لو تركتيني اموت
..نزلت يم رجلي وبوستهن والله ماتركك اصير جوه رجليك منا لما تتحسن وتعوضني عن كلشي
..گومي لتگعدين هيج لتعبيني تعالي خلي راسچ بصدري ارد اشمچ من حضنتها نزلت مني دمعه غصب بطرف ايدي مسحتها بوستها براسها وهمستلها
چنت واثق من ردچ بس مااگدر مااگلج الي بگلبي وحته واني واثق اكو نار بيه وهسه يلله طفت چنت خايف من احتمال واحد بالميه اتركيني
ريحانه ادعيلي اصير زين واعوضچ

يتبع ..

مساء الخيرات التأخير بسبب النت
من الشبكه الي ساحبين منها فاصل وفعلت ع الرصيد بس ضعيف والبارت ميحمل حته كتابه مگدرت اكتب لأن ميحفض مسوده بدون نت جربت ومصارت
اذا لحگت انزل بارت للسهرانين واذا لا على باچر وعذرني حبايب
اهم شي اريد ارائكم