رواية احبك .... وانت الفصل الثاني عشر 12 - بقلم وردة عمري

البارت الثاني عشر ...
ـ اني اريد رجال يحبني ...يعشكني على كوله امي .. اريدة يحب تفاصيلي .. كلي انته تحبني واني اتزوجك من عين باجر
صفنت عليه متعجبه ..
شنو هل الصداع الي بداخله وتفضحة عيونه! ?
عاض على شفته بقوة عبالك يمنعهن من الكلام او بتصريح حبه الي ..
عيونه بس الي يشعن بالمشاعر والاحاسيس ..
اثنينا كمزنا علي صوت الموبايل وهو يرن ..
مر من يمي .. واخذ سترته من الكاع ...طلع موبايله من جيب السترة .. كل هذا واني عيوني مااتركته ..
ـ هذا ايهم ..
دار وجهه عني .. طبعا ايهم هادم اللذات .. شدعي عليك ايهم هو اني اجر الحجايه جر من المتجمد الشمالي تجي انته تخربها ..
والله حسيته راح يكول ...راح يعترف بحبه الي .. بس وين هذا ايهم اتصاله عبالك لوري حمل وسحكتني سحك ..
ـ الو ايهم .. اني بالمطعم ... اي
سكت شويه ...وصاح بصوت عالي
ـ شنو .. شكلت .. !?
حسيت شي مو زين صاير .. سد الخط من ايهم .. وصاح بيه
ـ جبيبي جنطتج اوصلج للبيت
ـ ليش شصاير ياسر ...
صاح بيه
ـ معليج لا تتدخلين ..
صاح على واحد من العمال ووصاها على المطعم وطلع
رحت وراه للسيارة اركض .. فتح باب السيارة وشغلها واني بعدني ما راكبه السيارة .. ركبت وسديت الباب وهو شخط بالسيارة شخط
ـ شكو ياسر .. احجي شصاير خالتي بيها شي
دار وجهه عليه وعيونه انكلبت من العشق الي كنت اشوفه بيهن لحقد .. خفت بحيث رجعت لورة وجسمي كله انحصر يم الباب.. 
ـ ياسر
ـ اششش ...لج اشش ماتعرفين تسكين شنو ..
يحجي ويضرب بالستيرن ..
عرفت الموضوع بيه أن .. سكتنا وصمت ماكان هادي لا بالعكس كان كله شحنات سلبيه ..
نزلني بالباب وراح .. ضلت عيوني.   وراه ..
شصاير ...ليش هيج تعامل ويايه قبل شويه جان راح يعترف بحبه الي... ويترجاني حتى ادخل حياته وتزوجه .. شكلبه هل كلبه هاي ..
دخلت للبيت واني اجر برجليه جر .. احساس الخيبه والخذلان .. ماافاركني.. 
اول ماافتحت الباب وشلت راسي لكيت غاليه كاعدة بالطارمه ومتمددة .. بطنها بارزة لان هي بنهايه الشهر السادس .. مخليه اوراق بحضنها اول ماشافتني .. كامت تضحك وبعدين حجت بصوت متكسر ..
ـ سهر .. اجيتي .. تعالي .. تعالي شوفي راغب طلكني ..
خلت ايدها على حلكها وكامت تهلهل .. وتبجي ..

ـ كلوووووشششش .. راغب طلكني .. وتضحك بشكل هستيري ..
لازمه ثوب لولو مخليته بحضنها وتشم بيه
ـ ابوج طلكني لولو. ..
ونوب كامت ادك على وجهها وتخمش بيه
ـ ياريتني ماطاوعتج يمه ورجعت .. ياريتني متت بذلك اليوم الكشر ولا دخلت بيته ..
جان انتي هسه بحضني ملوكه يمه ..  جان هسه تلعبين كدام عيوني ..
مااكدرت لزم اعصابي ولا مشاعري ولا دموعي لي سالن على خدي ست اشهر غاليه رافضه تماما الروحه للدكتورة .. تخاف .. تريدها بنيه تخاف تشوف جنس الطفل ويطلع ولد .. شكد حاولنا وياه اني وهاجر وامي وهي رافضه رفض قاطع فكرة الدكتورة  .. كعدت ايمها ..
ـ اذكري الله غاليه ... الله انطاها والله اخذها .. راحت للرحم عليها مني ومنج يكلبي لا تسوين بروحج هيج ..
حضنت راسها لصدري ...واني ابجي واشهك مثل شهيكها ..
لولو ...رويحه طير لرفرفت ... ملاك واسمها عليها ...يمكن اذا ظلت مراح تتحمل ظلم البشر وحقدهم ...
مراح تتحمل يصير عدها ابو مثل ابوها .. يمكن هي اختبار كانت لامها .. وابوها .. والله اعلم بالنتيجه ...
امي جانت كاعدة بعيد عنا ...عيونها تربي علينا .. امي احس هلكم شهر كبرنها سنين .. صدك هي من زمان متعوبه... بس جان تعب جسد .. وتعب الجسد اهون بهواي من تعب الروح ..
كومتها ...بلكوة ...ودخلتها لجوة .. 
نومتها ... وضليت كاعدة يمها امسح على راسها وهي حاضنه روحها وملابس لولو .. عيونها مابطلن بجي لحد مااغمضت ونامت ..

طلعت لامي والي حالها مو احسن من حال غاليه ..
اول ماكعدت يمها
حجت ونبرة الحزن والانكسار مليتها
ـ اختج مشيلتني ذنب يسهر .. تكلي كله من وراج ماتت بنتي ..
دارت وجهها عليه
ـ شنو ذنبي اني ماما كولي لان مااردتها تتطلك .. لان ماردتها تتبهذل وتبهذل بنتها وياها .. وين ادري راح يصير هيج
ـ تحمليها ماما .. غاليه منهارة ... مو سهله ترة الي ماتت بنتها و كسرة كلبها وروحها من الدنيا تدرين كولش زين شلون جانت متعلقه بيها .. ساعديها ماما ولا تشيلين بكلبج عليها
ـ ترة راغب من زمان طلكها قبل اسبوع واني استلمت الاوراق من الشرطي
ـ شنوو.
ـ اي ماادرتها تعرف الا بعد ولادتها خفت عليها لا يصير بيها شي
ـ لعد شلون عرفت
ـ خابرت خالتج رضاب وكلت لها وسمعتني ...
سكتت وهز براسي
ـ انتي شجاج من وكت .. مو هذا وكتج بالجيه
نزعت السترة مالتي وذبيتها بعيد عني ..
ـ ابنج اختج ماادري شبيه اشو اجاه اتصال .. وتخربطت حالته ونوب جابني لها ذبني وراح
ـ ايااااا شبيه ولج ماعرفتي اخاف صاير شي
ـ مكال ... ليش هو يتحاجه فدوة اروح لج .. الله لو جورج كلوني ماجان تجاهلني هيج ..
ـ منو هذا كلوني ولج ...
ـ اهووو ماما اكوم اني احسن لي اروح ابدل ملابسي وانام .. بلكي اكعد ولكي المتجمد الشمالي ذاب ..
صاحت وراي امي ..
ـ تردينا نفيض ولج سهر هنه جم نكاطه طاحت علينا صار لنا 3 ايام فايضين النوب الشمالي يذوب ..
صدوك ضحكت من كلبي .. بس بنفس الوقت خفت ...خايفه من اليوم الي بيه يذوب المتجمد الشمالي ...ياترى باذاك الوقت اكدر اتحمل فيضانه ......
...
ياسر ...
اتصل بيه ...ايهم ...وكال امي بالمستشفى .. راجع من الشغل وداخل للبيت للاكيها واكعه بالصاله .. محاول يكعدها بس ماكو فاقدة تماما .. ماخذها وطالع بيها للمستشفى ..
ماادري شلون وصلت للمستشفى وبياحال .. احس الدنيا صارت ازغيرة بعيني .. دخلت واني ادور علي ايهم .. شفته كاعد ومخلي اديه اثينهن على راسه مدنك .. وكفت شويه اتأمل كعدته ...مكسور .. معقوله امي .. هزيت راسي وحاولت امسح هل فكرة من بالي تماما ..
ركضت عليه متلهف ..
ـ اها ايهم شصار ..
شال راسه عليه وعيونه مدمعه
ـ ماادري دخلوها للنعاش وبعدة الدكتور ماطالع ..
كعدت يمه
ـ اي شبيها مااعرفت
ـ مااعرفت ياسر ..
جان مثل التايهه ..
ـ اني ...اني ...خايف .. خاف بيها شي
ـ لا تكول هيج ان شاء الله مابيها شي
ـ شلتها مثل الميته بين اديه ..
بلعت عضه صارت بلعومي من سمعته يحجي هيج
ـ ان شاء الله مابيها شي .. ترة امي تحملت اشكال اللوان .. مو بهل السرعه توكع ..
طلع علينا الدكتور وركضنا وراه ..
حجيت اني
ـ بشر دكتور شبيها الوالدة
ـ للاسف عدها بدايه جلطه
ـ جلطه! ?
ـ لا تخافون هي زينه ...مبين عليها قويه وجسمها قوي كدر يتحملها ويعبرها هم
ـ حالتها دكتور شلونها
ـ حاليا مستقرة راح انخليها بالعنايه اليوم والباجر نطلعها بس اهاا ديرو بالكم عليها اي انفعال زايد مو زين عليها ..
ـ دكتور الله يخليك اذا تحتاج عمليه او اي شي ثاني احنا جاهزين لا تتأخر عليها
ـ ميحتاج .. حالتها مستقرة وان شاء ماعدها الا العافيه عن اذنكم ..
لتفتت ايهم وراي ..
ـ نخابر رافد ...
صفنت ... شريط حياتي كله مر كدامي .. اخر .. شي توقعته امي نهار بهل السرعه ..
رافد اقرب واحد لامي يمكن صدوك تحتاجه بهيج ضروف .. هو اقرب لها واكثر واحد تكدر تحجي وياه وتشكي له همومها .. رافد صديقها مو بس ابنها ..
ـ اتصل بيه .. بس لا تكوله امي عدها جلطه كوله تعبانه اخاف يقلق ويصير بيه شي تعرف هذا سفر ..
كل لحضه تمر علينا اني و ايهم عبالك سنه ..

...
رافد
ـ اريدك تتزوج غاليه بس تخلص عدتها ..
ـ اتزوجها بس بشرط .. هي تطلب مني بنفسها ..
سديت منها الخط ..
صوت امي يهتز بعقلي .. طلبت مني اتزوج غاليه واني رفضت ..
رفضت رافد حلم عمرك الجنت تكعد وتصحى علمودة .. دفرته برجلك هسه ..
ضحكت على عقلي وشلون افكر .. ليش غاليه راح تقبل بيه ..
راح تكدر تنسى لو تكدر تعيش ..
سحبت شعري بيدي لفوك ..
وكلبي يرد على عقلي ...ساعدها رافد .. هاي البنيه محتاجه وجودك بحياتها .. صير لها الامان والسند .. وانسى ...انسى كلشي صار بالماضي ..
جفلت من حسيت بواحد كعد يمي .. واستغربت اكثر لمن سمعت
كالت بالتركيه
ـ مرحبا ..
جان كلشي بداخلي هايج ...ثائر وهاي تحجي باريحيه وتتمضحك .. هسه منين الله ذبها عليه ماادري
ـ اني اسمي هوليا وانته
باوع بعيوني بعيونها الزركه .. كمت تذكرها شويه ...شويه ...هاي شايفها .. عيونها مو غريبه عليه مرات قبل هل مرة ..
بس وين ..
لمحه بسيطه .. عرفتها ...
ـ وانته اعرف اسمك رفاد ...
رجع صوت الناس والرايح والجاي .. رجعت للمكان .. للزمان الي اني بيه .. وفوك هذا كله للكاعدة يمي ..
ـ رفاد! ?
سألتها
ـ اي احنا هيج نطقه الاتراك .. ممكن تنسى لقاء الاول ارجوك .. كانت وي صديقاتي وصار بيناتنا رهان اذا كدرت الفت انتباهك او ماكدر
وكفت اريد اروح بس هاي جلبت بكتفي وهي تكول
ـ بالمسلسل الكوري اذا راح البطل البطله تعرف مكانه من مكان وجود النجم القطبي رفاد
ـ اضاهر مثكله بالشرب حضرتج ..
حاولت ابتعد واجر ايدي منها بس جلبت بيه اكثر وكامت وكفت على حيلها
ـ مو كوتلك انسى لقاءنا الاول .. جنت احاول العب دور معين خلينا نبدي من جديد ..
ضحكت عليها .. شبيها هاي ..  هسه اني لي خلك بالله للمراهقات ..
ـ وهسه يادور تلعبين بالله ..
ـ اسمي هوليا .. ببساطه ..خلينا نتعرف على بعض من جديد وبطريقه صحيحه اني طالبه سنه ثانيه  .. وانته رفاد جاي بزيارة لخوك هنا يدرس
هل مرة ماكدرت اتحملها ولا تحمل اسلوبها .. سحبت ايدي بعنف منها

ـ اسمعي هوليا .. ترة اني ماعندي وقت لسولف البنات الزعاطيط .. روحي شوفيلج واحد بعمرج ولعبي وياه ماشي ..
رفعت ايدي لها ...
ـ يلا سلام ..
رجعت للشقه .. والف هم وهم فوك راسي ..
نزعت سترتي ...وتمددت على الكرويته ..
وعقلي مخوذ مني .. شنو حالها هسه.   من عرفت راغب طلكها شسوت .. فرحت لو  حزنت .. حست بيه اني ساعدتها لو لا
افكار تروح وتجي لمن نمت ... مادري شكد نمت ماافزيت الا على صوت الموبايل وهو يرن ..
فتحت عيرني بالكوة .. اريد اشوف منو .. ايهم! ?
ـ الو ...ايهم
ـ هلا رافد شلونك ..
من سمعت صوته كعدت على حيلي .. صوته مو طبيعي .. بيه شي
ـ شبيك! ?
سكت شويه وجر نفس .. كأنه يبجي ..
ـ ايهم .. احجي امي بيها شي .. شبيك ولك
ـ امي تعبانه
جنت ضاغط على ايدي اول مااسمعته .. بادت ... اريد اسيطر واسكت رجيف اديه ورجليه ماكو
وماادري شلون طلع مني الحجي
ـ شلون تعبانه فهمني.  
ـ تريدك رافد .. امي مريضه حاليا حالتها مستقرة بس تريدك ...اني اعرف بيها كبل لا تكولها
ـ جاي ..
رجعت للبغداد وشميت ريحتها .. صدوك لو كالوا الغربه موت .. الغربه ضياع .. احس روحي مفاركها سنين مو كم شهر ..
روحي لايبه على امي .. معقوله جوابي هو الخله صحتها تنتكس .. معقوله هيج تريدني اتزوج غاليه ...زين ليش ..
دخلت للبيت واني الف فكرة تجيبني وتأخذني ..
ايهم اول مااشافني ذب نفسه عليه وحضني حيل
وياسر اخذ دور المتفرج من بعيد .. دائما ياسر هيج مايعبر عن مشاعرة واحساسيسه لاقرب الناس له .. اني شكد اكعد وياه واسولف واشكي .. وهو ابد ..
سالتهم
ـ وينها ...
كال ياسر
ـ هناك بغرفتها .. رافد امي زينه ...بس الدكتور حذرنا من اي انفعال او توتر
هزيت راسي له ..
ودخلت لجوة ..
فتحت الباب .. وشفتها نايمه مطروحه على فراشها .. مغمضه عيونها .. ماادري اذا غافيه او مجرد اغماضه ..
دخلت على كيفي وسديت الباب ..
يمكن ماكو لحظات .. فتحت عينها وهي تصيح
ـ رافد ...رجعت ابني ..
ركضت عليها حضنتها وحطيت راسها بحضني .. بستها براسها وايديها
ـ رجعت يمه
ادنت يم بطني وشمت عطري ..
ـ ادري عرفتك ريحتك هبت عليه يبن بطني ..
ضحكت بوجهها
ـ هاي شنو رضاب كالوا عليج مريضه وجيت ركض وعفت بنات تركيا وراي تالي لكاج كلشي مابيج .. ويجوز مناك وجاي ادور لج رجل
ضربتي بيدها ضربه خفيفه
ـ دسكت ...اسكت ... تعلمني بيك واني حافظتك حفظ صايم عن بنات حوا لمن تفطر بيها
شالت راسها لي
ـ تزوجها رافد ...تزوجها يوم
اخر شي جان يتوقعه ممكن امه تطلب منه هيج ...طلب و بهذا الوقت الحرج ..
بهذا الوقت الي هي بيه مريضه مااتتحمل اي ضغط نفسي ولا جسدي ..
ـ يوم الله يخليج
ـ انته مراح تحجي ولا كلمه وغصبا ماعليك اطيعني اني امك .. اني ادري انته تحبها من جانت زغيرة ..
فتحت عيوني علي وسعهن وكلبي كام يتلوى بصدري .. جبيني كام ينضح عرك.
ـ يوم .. انه ...انه
قاطعتني امي وهي تغمض عيونها ..
ـ انته ربيتني .. مثل مااني ربيتك رافد.  كل الي راح تسويه تحول الخب الي بداخلك لها لصفه ثانيه ...الزواج
طنين اذاني زاد والعرك. البارد صار حار مثل روحي وكلبي الحارات ..
ـ يوم الله يخليج هسه انتي عوفي هذا االموضوع بعدين نحجي بيه لمن اطيبين ان شاء الله وتصيرين زينه
فتحت عيونها ..
ـ ماراح اخذ دوة ولا اكل ولا اشرب لمن تكول تم ...وصار وتوعدني وعد رجل تسويه
بلعت ريكي بلكوة .. مديت ايدي لايدها لردت الزمها بس سحبتها مني حيل ..
ـ يوم مستحيل لي تكولينه ...علي الاقل البنيه ماطالعه من العدة. غير هذا كله بنتها مصار لها هوايه من ماتت ماافكرتي بكلام الناس وشراح تحجي
ـ معليه بكلام الناس ... رافد ولك راح يصير عمرك 45 سنه وانته عايش على ذكراها .. ولك مااخليت وحدة ببغداد ماخطبتها وانته كله ..لا ...مااريد ...ماعجبنتي .. تريد تشل حالي تموتني ناقصه عمر ...البنيه طلكت ...اتزوجها ورتاح وريحني الله يخليك .. كافي .. كافي اشوف ازعر اخوانك تزوج وانته واخوتك لا .. ياسر الي كلبه حجر .. وايهم الي نضرب نبص كلبه مااعرف يمته يشفى هذا الكلب ... واني ادري يمكن مرات ...تشوفوني اني السبب بحالتكم
انته تدري ابوك عايش بالنمسا ..
مااكدرت الا انصدم باخر كلمه لها ...
ـ شنووو! ?
صفت عليه بس جانت مو يمي .. غركانه بالمأساة الي مرت بيها ويمكن لليوم ماكدرت تنساها .. يمكن تشوف غاليه تشببها بهاي الماسأة ..
ـ سنين مرت مااكدرت ادور على مكانه .. وين هو عايش .. جنت انته بأخر سنه لك بالكليه .. يومها .. نغريت .. اي نغريت حتى اثبت له اني اكدر اعيش بدونه .. وربيت وتعبت وتخرج ابننا الي ربيته وحدي شكت انطيت لروحي العذر واني ادور عليه .. كلت اني طردته ...اجه ركع على رجليه ووما سامحته .. انطيه فرصه خليه يرجع بيناتنا خليني اسامح واغفر لحظه ضعف مر بيها .. عبالي بعدة عايش على ذكراي مثل ما اني عايشه على ذكراها
بس لا مااصار الي تخيلته واتمنيته ...ابوك طلع متزوج ..
متزوج وحدة نمساويه ويربي لها ولدها ...عايف ولدة ولا سأل عليهم ويربي بولد مو من ولدة ولا من صلبه
كامت امي تبجي بحضني ..
ـ والله مااقصدت احرمكم من ابوكم رافد .. رافد ابوكم هو اختار طريقه بعيد عنه .. يمكن اني قصرت اعترف ماكو واحد بالدنيا مايغلط بس هو داس عليه مرة ومرتين وثلاثه ...
رافد انته تحبها ...تزوجها ...تعيش حياتك لي ماشفت منها شي .. ساعد نفسك بيها وساعدها هي ضايعه مثلك .. انته دليها ودلي نفسك على طريق واحد يجمعكم ..
اذا مااسويت لي اكولك عليه ترة اموت بحسرتي رافد
طلعت من غرفه امي واني مااكدر اصلب طولي ..
وعدتها ..
وعدتها واني ممصدك سويت هيج ..
عقلي يريد يطير من مكانه ...شلون وعدتها هذا الوعد المستحيل. 
بس ليش ...ليش دا احس كل الي دا يصير خبال عقلي ممستوعبه ..
غاليه كدامي هسه ...حرة ...واكدر اتزوجها .. واني هي طلبت مني تزوجها ...
يارب السموات .. يعني اتزوجها وتصير حلالي ..
شي بداخلي كام يفور وثور .. حس عبالك وحش يصيح بيه ويفتح الف .. باب وباب حتي يطلع من سجنه ...
وحش شايل شعله نار يريد يحرك شكو كدامه ..
بس ...لا ...لا
لازم اكو غلط بالموضوع ..
ليش رافض ...ليش واني اسنين عايش بالعذاب ...سنين عايش على الم والحزن .. معقوله لوصلت لمرحله تعودت على الالم لدرجه كمت ارفض الدوة له
ـ المرض اصابك غصبا عنك يرافد والدوة هم اجاك غصبا عليك .. وانته مابين الدوة والمرض كلبك مشتاك لحبيبه.  
كمت اضرب براسي
ـ ولك اكعد ...اكعد اكيد غاليه راح ترفضك .. وشلون ترضى وهي بعدها بنفس نظرتها لك الاخ والسند .. .. اكعد يكلبي ولا تظل تحلم ..
...
سهر ..
ـ شنو راح تبقين صافنه علي تلفونج ...هسه يابه عرفنا جديد .. وحلو .. و الكفر مالته وردي بس شدعوة هيج متعجبه بيه
ـ هاجر لرحمه لاهلج اسكتي انه بياحال وانتي بياحال
جنت صدوك صافنه علي التلفون .. وريوك كدامي مالمسته ولا حطيت لكمه بحلكي ..
ـ لج دكيت عليه 3 مرات يسدة بوجهي الاخ .. ادري اشغل عندة لو مااشتغل عندة
ـ والله الحك انتي تشتغلين عندة لعد ويامن تشتغلين حضرتج
رديت عليها
ـ اشتغل عند رافد هو الي وظفني اما هذا المتجمد الشمالي مااعرفه ولا اريد وظيفته ..
جت هاجر يمي وسحبنتي من ايدي ..
ـ لج انتي كولتي متجمد شمالي .. شتتوقعين من متجمد شمالي يعني .. يصير عصير مثلا
بس والله يجنن مطعكم سهر .. مجنت اعرف بيه هيج حلو ومرتب ..
مااحجيت وياها ولا اهتميت لكلامها ولا كدرت الضحكه تنرسم على وجهي ..
ـ هاي شبيج سهر الله عليج لا تزعلين يااختي مو تعرفين خالتي مريضه وهمه كولشي ولا خالتي ...لج حتى رافد عاف تركيا واجه غير علمودها ..  تريدين ياسر يعوف امه ويجي للمطعم
ـ اني ماكلت يجي للمطعم كلت يرد علي اتصالاتي شدعوة عليه .. ترة مجرد ضغطه زر
ـ تحبينه انتي !?
ـ تعالي نروح للمطبخ نشوف الشيف شسوة ماسوة تعرفين الشغل كله ظل فوك راسي
ـ ترة دا تتهربين من السؤال دادة. 
كمت اتأفف
ـ هاجر حبي مااريد تمارسين عليه طقوسج الي اعرفها .. تحليل شخصيتي .. ترة كبرت علي لعبتج ومو وكتها كولش الله يخليج
ضحكت ..
ـ هاي شبيج ...صدوك تحجين لج اريد اضحكج ترة
ـ مالي خلك عوفيني بحالي ...ويلا روحي راويني عرض جتافج انتي مو عندج .. شغل لو اذا غاب القط لعب يافار
شفت وجهها شلون تغيير وكام ينطي لوان
ـ اها اشوف وجهج صار قوس قزح
ـ اروح احسن لي قبل لا تكلبين عليه
ـ اها خو شردتي
اشرت لي وهي طالعه ...
ـ باي
كعدت علي وحدة من طاولات .. ممصدكه تصرفه وياي ..
ليش دا يتعامل وياي ...المفروض يرد عليه .. يحاجيني .. مو مخليني هيج لا طايله سمه ولا كاع ..
رجعت للبيت حيلي مهدود .. وروحي ..
العصر اخذتنا امي وراحت بينا للبيت خالتي .. اني وهاجر ..
جنت شايله عليه بكلبي ...
وتحلفت بيه الا اراويه نجوم الظهر مثل ماراواني ومرر بكلبي ..
اول ماادخلنا ماشفنا احد ...بس مرت عماد .. بنيه بسيطه .. وبين عليها فقيرة ...رحبت بينا و دخلتنا خالتي ..
امي خطيه اول ماشافت خالتي نايمه .. حضنتها وكامت تبجي
ـ عمت عيني عليج دادة رضاب شنومج هل نومه هاي
حتي خالتي بجت
ـ الضيم دادة ..
عاد اني ضحكت ..
ـ هاي شبيكم ياجماعه شنو راح تسوها منحاحه ترة وداعتج خاله كولشي مابيج تخبلين بعدج شباب ..
ـ ياشباب .. ضل شباب عكب الضيم والقهر
كعدنا يمها شويه ونوب صرفتنا بطريقتها ..
ـ يبنيات روحن كعدتن يم مرت عماد عيب وتعرفن عليها
طلعنا اني وهاجر ...البيت فارغ ..
عيوني ادور منا ...ومنا ماكو ...وينه هذا ... طالع .. مداني واني معدله ومبدله على سنكه عشرة وتالي يطلع ماموجود ..
نكزتني هاجر ..
ـ لج شوفي منو اجه ...
درت وجهي تخيلته هو بس خابت الامال والاحلام
ـ رافد .. الحمدلله على سلامتك
هاجر
ـ الحمد لله على سلامتك رافد .. تخطاها الشر ان شاء الله
ـ الله يسلمجن ... شلونج سهر المطعم شلونه
ـ تمام الحمد لله ...
ـ ندري نعبناج هل كم يوم بس تحملينا تشوفين الظروف انتي بعد
ـ عادي رافد ان شاء ماكو شي
نزلت راسي ..
همست لي هاجر
ـ لج عطشانه اروح اشرب مي واجيج
ـ شبيج سهر ...
رفعت راسي متعجبه
ـ مابيه
ـ معقوله يعني ماسمعتي بالخبر
عقد حواجبه
ـ لج ذاك الخبر ...صدوك يعني
اشو هذا غمز لي
ـ ذاك الخبر المنشور
يمه نخمش كلبي منشور ....دهر صابج يسهر منشور
ـ وين منشور رافد الله عليك احجي ترة شلعت كلبي
ـ لا ...لا مااريد احرجج
عضيت شفتي بقهر ..
ـ رافد! 
ـ جان مزاجج احسن قبل مااتعاشرين ياسر
قبل ماارد عليه حجه
ـ مو المفروض تلبسين حلقه بصبعج الايمن ...لو الايسر احسن عبالي من ارجع لكاكم متزوجين
حسيت خدودي صارن حمر .. صح رافد .. منفتح ويحجي كولشي ...بس والله ستحيت كولش منه مهما كان هو ابن خالتي واخو ياسر .. حجيت بداخلي ليش اني شايفته يحضني اشو طير ونكطع خيطه ...بعد وين الحلقه وين الضيم
ضحك رافد
ـ منشور على صفحه ولجهج ترة المنشور
ـ الله يخليك اسكت رافد ترة اخوك هذا مينعرف له .. واني مالي خلك بعد ابد
ـ اي عمي من عاشر قوم ..
سكت شويه وبعدين سألني
ـ سهر شلونها ... سكت وكمل شلونها غاليه
كلت اي صارلك ساعه تسولف وتحجي حتى سأل عن غاليه .. هو هنا مربط الفرس
جاوبته جواب مقتضب
ـ زينه
ـ عرفت ...وكام يتحمحم
ـ عرفت بطلاكها
هزيت راسي واني اذكر حالها من دخلت عليها
ـ عرفت
ـ شسوت
ـ اتمنت لو صاير الطلاك قبل لا تموت لولو .. الندم والحزن ماكلها اكل .. غاليه تقريبا على حافه الانهيار رافد .. كولنا نحاول نساعدها ...نقويها ونسندها .. بس يمكن مو احنا السند المناسب لها بهيج حاله
رفع راسه الي مصدوم من كلامي
ـ شتقصدين ..
بس بهل لحظه طلعت امي
ـ اياااا ...اياااا هذا رافد ...هلا بيك يمه الحمد لله على سلامتك
واخذته بالاحضان
ـ الله يسلمج خاله شلونج شخبارج
ـ بخير يمه كونك بخير ..
دارت وجهها عليه
ـ وين اختج هاجر يلا هم يلا نرجع
ـ شنو سالفه خاله دضلوا على العشا ..
ـ لا خاله البيت مو فارغ واخاف كلشي يصير ..
رجف كلبي لكلمه البيت مو فارغ ...اعرف تقصد غاليه .. ضلت عيوني متعلكه بسهر وحجايته شتقصد اني السند المفروض اكون وياها بهيج ضرف ...بصفتي شنو .. ومنو
ـ لعد خليني اوصلكم
.....
ياسر ..
نزلت من سيارتي وركنتها قريب على المطعم .. دخلت امشي بالممر الي رايح للمكتب .. حسيت بكعبها وراي ...يضرب بملبي قبل لا يضرب بالكاع .. الله ينتقم منج سهر .. كعب ..
لو ادري فلا نطيتج الراتب .. مشتريه كعب .. مالتفتت عليها .. خليتها تلاحكني واني مستمتع بخطواتها وراي ..
واخيرا وصلت الي تلهث .. بس هي الظاهر اعند مني .. حاولت تخفي تعبها .. رفعت راسها لي
ـ صباح الخير
التفتت لها علي كيف ...صافن علي ملامح وجهها الي شتاقيت له مثل ماشتاقيت لصوتها الناعم
ـ صباح الخير
شويه كامت تدرم عليه بنبرتها العمليه .. عود على اساس مسويه روحها مديرة المطعم بغيابي .. وغياب رافد .. عيوني تباوع عليها بكليتها .. وجهها .. عيونها .. خشمها .. ارموشها كلشي بيها حلو ..
والوردي الذابحتني بيه ذبح ..
لابسه سترة وردي ..
عيوني تعلكت بوردة صطناعيه مثبتتها بدنبوس .. لونها كحلي .. حاطتها فوك الكلب مباشرا
كلبها هي .. باوراقه الورديه الي اريد اشلعهن ورقه .. ورقه
كعدت من صفنتي بيها وعليها .. لمن صاحت بيه ضايجه مني .. ادري بيها ضايجه مني بس ماتبين عليها ..
ـ شبيك ياسر .. ممكن تركز وياي الله يخليك .. وعوفك من التركيز بيه هيج .. ترة عدنا طلبيه مستعجله و  ... اااه ياسر
خطفتها بخشونه من جانبين خصرها .. دفعتها للحايط .. وهي تتلوى بين اديه تريد تخلص روحها مني ماكو .. واني اضحك من كلبي ...
ـ عوفني ياسر ...شبيك تخبلت
ـ صايرة تلعبين النفس بالوان الوردي واني دامجتها بالكحلي ..
كامت تضرب بيه بيدها ورجليها ..
ـ لك انته شنو ماعندك احساس هذا الي طلعت بيه من اسبوع كامل غاط بيه
املت لها واني اهمس باذانها
ـ اني واحد ماعندي احساس واني ورديه تلعبين النفس ياترى شنو نوع الاطفال الي راح نجيبهم للدنيا ... اكيد لعبون النفس مثلنا
كملت واديه تتحرك على سترتها
ـ اتصل بيه النجار .. وكال جربايتك الورديه خلصت وجاهزة
دفعت اديه عنها ...وهي تصيح بيه
ـ وعروستك الورديه مجاهزة عيني ...شنو اني لعبه بكيف حضرتك ..
توقف بيه الوكت تجمد كلشي بيه .. وبعدين حسيت نار وكامت تحرك بيه ..
ـ عروستي .. عروستي واخيرا سهر
كملت وهي تحاول تبعد اديه مرة ثانيه .. بس وين اني ملزكهن بصمغ امري ماينشلعن
ـ انته نسيت ودا تتناسى حضرتك لخد الان متقدمت بشكل رسمي لي يعني هسه اني حرة وممكن اقبل بأي واحد .... ااااه
اصابعي انغرزت بخصرها ..
وحس نار العاطفه ...صارت نار غيرة تأكل بيه اكل
ـ اكسر اعضامه ...عضمه ...عضمه
سهـر
كمت باوع عليه واني ارجف .. شتاقيت له وحتى للعنف الي دا يعاملني بيها ..
تجاهله البارد لي خلاني مثل النار وكايدة عليه ..
ـ الي ماتعرفينه ست سهر امس امي فاتحت الموضوع وي امج يعني صارت رسمي مو بالله
تبخر كلشي من راسي
...
ـ شنووو....بس امي مكالت لي
ضحك ضحكه غريبه
ـ مو اني كلت لامي توصيها متكولج .. ردت اكولج بنفسي يمدلله
رجعت ادفع ...اريدة يبعد ماكو عبالك حايط مبني كدامي مو بشر ..
ـ حتي لو كلت لامي .. اني مراضيه ..
ـ معناتها راح اشوهه سمعتج .. علي طريقه رافد .. وين مااشفتج ابوسج .. وخليهم يحطون جيش جرار حتي يمنعوني عنج
سمعنا صوت رافد وهو يضحك
ـ وانته شخليت بالسمعه ولك ..
كمت افور ...افور .. والنار صعدت الراسي مخبل هذا .. شوف شسوة بينا .. وجههي من الخجل و العصبيه كام ينطي لوان والله صدرت قوس قزح .. من يطلع
لزمني من ايدي
ـ بارك لنا رافد .. خلص سهر صارت خطيبتي
دفعت ايدة
ـ والله تحلم اصير لك مرة ..
تلاشت ضحكات رافد وي رنه الموبايل ..
يتبــع
صباح الخير بنات ..
عذروني لان تأخرت عليكم ..
بس والله ضرفي مااسمح انشر امس
للاسف طلعت عدنا حاله مصابه بكورونا بالبيت
اريدكم تدعوله الله يخليكم ...
لا تنسونه بالدعاء ..
واعذورني اذا تأخرت او راح تأخر لان لو تعرفون البيت شصاير ماتعتبون والله ..
وحتى البارت مااعرف شلون كتبته بالكوة طلع مني ..
فلتمس العذر منكم ..