رواية احبك .... وانت الفصل الحادي عشر 11 - بقلم وردة عمري

البارت الحادي عشر ..
هاجر
جنت كاعدة مندمجه بالشغل .. احاول اخلص الي بيدي واكثر مااريد اي نقص ..
اراد الحاسبه توكع من حضني لمن سمعت صوته .. وجسمي يخذلني وخلاني اوكف على حيلي
ـ صباح الخير هاجر ..
حجيت واتي اكوم على كيفي .. وخليت الحاسبه يمي
ـ صباح النور هلا استاذ ايهم ..
جنت اعرف رغم كل محاولاتي حتى اسيطر على نفسي صدري يصعد وينزل .. وكلبي يدك مثل الطبل ..
وهو واكف هناك صافن عليه من رجلي ويصعد بعيونه لشعري .. اول مااشافه ابتسم.   الله ينتقم منج يسهر لهل دكه .. ضفرته لي ضفاير وصرت جني وحدة بالابتدائيه .. امداج هاجر بالله ورديه ضحكت عليج وسوتج مضحكه له .. انتي عايزة يخايبه ..
استحيت لدرجه مااعرف شحجي .. كلمات كامت تطلع مني واعتها عد .. عبالك سيارة مسكربه
ـ الحمـد االله على سلامتك
مشه وكف كدامي مباشرا ...وعيونه على ضفايري ..
الله يطيح حظج يسهر .. واني شلون طاوعتها وخليتها تسوي شعري ضفاير ماادري ..
ـ الله يسلمج من كل شر ..
يارب .. يارب يدور وجهه ..
بلعت ريجي بلكوة واني اباوع عليه رغم كولشي صار .. اني افتقدة .. حسيت بغيابه .. وسطوة حضورته شلون تربكني ..
عيوني شكد حاولت انزلهن مااكدرت ... صافنه بتفاصيله واتمعن ملامحه ..
شنو بيه غير مروا بحياتي وشفتهم ..
شكد جنت اشوف شباب بالكليه ولا واحد مله عيني وكدر يأخذ نظرة وحدة مني .. بس هذا بيه شي يختلف يجذب .. وجنه قاصد يجذبني له بكل ماعندة من قوة
اسبوع مر بدون مااشوفه .. صح جنت مشغوله .. ويمكن مااداومت الا يوم بدونه بس احس مشتاقتله ..
واحاول اخفي هل شي مااريد اصدكه ولا اريد عقلي يستوعبه ..
حجه ووجهه يضحك ..
يربي هذا يضحك عليه
ـ معقوله فاتح مدرسه بمكتبي واني ماادري ..
لا اراديا شلت ايدي .. تلمس كصيبتي ..
وكمل
ـ بس حلو الواحد يرجع ويلكي احد مشتاقله مو بالله ..
رجفت اوصالي .. معقوله كدر يقراني بهل بساطه .. توترت وكمت مااعرف شسوي ..
عيوني احسن كامن يدمعن من المستحه ..
ـ وحلو ارجع ولكاج مثل مااعفتج بالضبط ..
كمت احك بأذاني .. هذا طبعي اذا توترت او خجلت .. اكوم احرك بلحمه اذني وافركها بأصابعي ..
حركه شكد حاولت اتخلص منها بس مااكدرت .. ملازمتني مثل ظلي اذا توترت ..
ـ الشغل الي طلبته منج خلصتيه ..
ـ طبعا خلصته ..
ـ شنو مااحسيتي الايام طويله بغيابي
كلامه سبب لي ارباك .. مااعرف ليش عن طريق كلامه ونبرته المختلفه دا يرسل شي .. اشياء هوايه بيها مشاعر نابضه ..
حاولت اغلس عليه واعبر واسوي نفسي ماافاهمه ..
ـ وخلصت جم شغله وي الشغل الي طلبته مني ..
كعدت على الكرسي وهو صار وراي مباشرا ..
فتحت الحاسبه على اساس اشوفه الشغل .. دخلت اريد افتح الملف ماكو ...اضغط .. خايب رحمه لهلك .. ابد .. واني من التوتر والارتباك كمت مااشوف بعيوني .. انفاسه وهي تضرب بركبتي كمت احس بيها .. شويه حسيت اصبعه يبعد اصبعي جانت مجرد لمسه عابرة سبب لي مثل النتله ..
نقر وفتح الملف ..
لعد شبيك وياي يحضي ..
جان مدنك ويقرا .. او يمكن مايقرا ..
بس حسيت بنفسه يخلل شعري ..
عدل وكفته وكال
ـ جنت اعرف بيج بنيه .. سكت شويه وكمل طموحه ..
وخر عني .. واني ضليت بمكاني مااشوف شي كدامي جنت مثل الغبيه يمه ..
احساس التوتر ملازمني .. والكارثه ماكدر اخفي هذا الاحساس كدامه ..
ـ جيبي حاسبتج وتعالي راويني الشغل على المكتب هنا ..
يمه .. واني عبالي تخلصت منه .. كمت من مكاني وقريت شكو سورة حافظتها من القران .. وكعدت يمه حتى اروايه الشغل ..
قطع كلامي
ـ تلوك لج الضفاير حلوات
.....
بعد شفل طلعنا اني وشهد كلنا نكعد بالكافتريا جان ووكت غدا .. من بعيد شفنا استاذ باسل .. سلم واجه كعد يمنا ..
بس شهد عود انكلب وجهها واشوف الخوف والتوتر بعيونها ...
بس استاذ باسل مبين عليه خوش انسان .. كام يذب نكت واني ميته ضحك عليه ..
ضحكت مرة ثانيه عليه وشهد دنت راسها يمي
ـ شبيج هاجر تخبلتي من كعدنا لهسه تضحكين بعدين من يمته تعرفين باسل اها
همست لها
ـ من اخذتي اجازة اجه سأل عليج .. شبيج ترة مبين خوش رجال
ـ اسكتي الله عليج انتي ماتعرفين شي.  
ابتعدت عني .. شنو الي مااعرفه .. صح اني وشهد مو صداقه قديمه .. بس حلوة العلاقه بيناتنا ..
رغم هذا مااعرف شي عن حياتها .. مرات احسها لغز .. هو احنا كل شخص عندة لغز بحياته ..
رجع هذا باسل ينكت ويضحك واني مدري شبيه اضحك وياه .. تخبلت مدري شجاني يمكن لان شفته معقوله ..
ـ الله عليك استاذ باسل كافي والله حموت من الضحك ..
ـ استاذ شنو هاجر ...احنا بعد صرنا اصدقاء كولي باسل وبس مو بالله شهد
شهد تحركت من مكانها ..
ـ والله ماادري بكيفكم .. عن اذنكم ..
وانسحبت شهد من يمنا اول ماكامت كام وراها هو
ـ عن اذنج هاجر
اجيت اصيح وراهم لولا ذاك الخيال الي شفته بالزويه خاتل .. مثل واحد يراقبني ..
شفته شلون طلع وعرفته
ـ ايهم ..
...
ايهم ...
رجعت واحس النار تريد تطلع من عيوني ...يعني مو مثل مااترسم روحها كدامي .. البريئه المرتبكه من كلمه وحجايه .. يعني كل هذا كذب ..
يعني تطلعت تضحك عليه ..
طلعت تعرف تغازل ..
ولك ايهم اذا هي غازلتك انته .. اي لمن ادعت البراءة .. مر عليه وجهها وهي تضحك وي مدير الحسابات .. يمته تعرفت عليه وكامت هيج تضحك وياه ..
ااااخ يا يابه ..
جنت داير وجهي ..
وسمعت صوتها
ـ استاذ ايهم نكمل الشغل
درت وجهي عليها وحس قسوة الدنيا كلها لتمت بيه
ـ من يمته تعرفين باسل مدير الحسابات ..
ارتجفت شفتي من سمعت سؤاله .. اريد اجاوبه ماكو ..
ـ شجنتي تسوين وياه من جنت مسافر اها
شنو قصدة ..جاوبته واني اريد اكله بسنوني
ـ ماكو شي بيني وبينه مجرد زميل عمل لا اكثر ولا اقل
ـ زميل عمل اها! ?
هز راسه وكأنه يتوعد لي ويهز بالقلم الي لازمه بيدة
ـ لا تجين لمكتبي من اليوم لمن اقرر عكس هل شي
ـ والشغل ماكـمـ
بس قاطعني
ـ كولي لمنتظر يدزلي هيفاء بدالج
حسيت بالاهانه لكرامتي .. شنو يعني ...شنو قصدة من هذا الحجي والتصرف .. اااخ نار شعلت بداخلي مثل البراكين .. الحقير .. الما يستحي
جاوبته واني احاول اسيطر على نفسي مااريد اخسر عزة نفسي وكرامتي اكثر مااجنت اعرف اني مثل الكتاب المفتوح كدامه ..
لملمت بعض الاوراق .. الي تخصني ..
ـ ماشي استاذ راح اكول للاستاذ منتظر يدز شهد بمكاني.  
احس الدموع ترست عيوني .. تنفست بعمق حتى ماابجي كدامه ولا تنزل لي دمعه وحدة
ـ بس اني راح اقــد ..
ـ اتجرئي وعوفي الشركه وداعتج لو تلفين هذا البلد شركه شركه دائرة دائرة مراح تشمين الوظيفه شم ..
بعدني فاتحه عيوني وصافنه عليه .. كلامه كان مثل حد السيف بالنسبه لي.  
عفته وطلعت بدون حتى مااستأذن منه .. مايستاهل .. احترمه او خليله اي منزله بكلبي ..
طلعت وعيوني مثل واطلق العنان لهن .. ابجي بحركه والم .. ليش يحجي وياي هيج .. وشلون ...واني ساكته ..

ايهم ...
بس طلعت من يمي .. البرود كله تحول الى براكين من النار .. وحدة مثلها تضحك عليه .. مستعد تعيد نفس التجربه والجرح ليش
ـ سهله هاجر الا ماخليتج تكصين ضفايرج وتنتطينياهن فصل ماتسمى ايهم ..
بحركه قويه زحت كل الاغراض والملفات الي على المكتب وظاهر سمعت الستكرتيرة الصوت ودخلت عليه
ول مااشافت المنظر شهكت
ـ هاي شصاير استاذ ..
صحت بيها
ـ معليج اطلعي ..
وكفت اباوع من الجامه مااريد اشوف انعكاس صورتي بيها .. ماريد اشوف وجههي احس نفسي وحش يصرخ ومحد يسمع صوته ..
شبيك ايهم ليش ضجت مو على اساس هاي لعابتك تلعب بيها وتذبها مو على اساس هاي مجرد مخدر للالم الي تحس بيه .. شنو الي صار .. لان عبالك بريئه .. نقيه .. وفقدت هاي الصفه لمن شفتها شلون تضحك وي باسل .. جنت تعتقد نقيه لدرجه بس تمد اصبعك الزغير بهذا النقاء راح يتلوث ويصير اسود مثل كلبك .. جنت تترجى تأخذ من الاسواد البيك شويه بلكت ترتاح مو ..
  رجعت صورتها كدامي وهي تضحك وتهز بضفايرها ..منظر شل عقلي شل بدون سبب افهمه
والافكار كامت تووالى عليه ماادري منين ..
شبيك ايهم .. موضوع ابسط من هيج .. !?
صارت هاي الحمرة ملاذ لرجولتك المهدور دمها بسوق الزلم .. بعد مااخانتك الي سلمت لها كلبك ووعقلك وكيانك ..
بعد ما اتهدرت كرامتك وكسرت روحك .. شلت ايدي كمت اضرب بيها بالحايط
ـ الله يلعنج .. الله ياخذج ويزود عليج الي انتي بيه
بعد مااتحمل .. لازم كل واحد يأخذ جزاته .. بس من وين اخذها من وحدة شبه ميته .. انسانه بين الحياه والموت وتعاني من ويلات المرض ..
اطيب ايهم مثل هيج عار مراح يموت بسهوله .. واح تأخذ ثارك منها مربع ..
...
هاجر ..
رجعت واني اجر برجليه جر .. دخلت لكيت استاذ منتظر مشغول .. ودخلت وراي شهد واشوف حالها اخس من حالي .. ايااا شبيها هاي .. هسه اني ماكله خوش اهانه من ايهم هي شبيها .. ونوب منتظر شافنا شال راسه وعيونه كل ساعه على وحدة .. ذب القلم من ايدة
ـ خير ياطير شبيجن ...
وكفنا وحدة تباوع للثانيه .. حجيت اني
ـ استاذ منتظر .. استاذ ايهم طلب شهد بدالي
شهكت شهد
ـ شنووو
شلت اديه بأستسلام
ـ اني معليه هو كال
رجعت كعدت بس بعدني ارجف .. شسوي .. ارضخ لتهديدة وظل بالشركه ويجوز يطردني بعد كم يوم حتى يهينيي اكثر .. لو اعرف الوظيفه ولعن ابو اهلها واحفظ ماي وجهي وكرامتي. ...
كعدت .. مبعدني ممصدكه الي صار ..
وحجي وي نفسي ..
شبيج هاجر ...شصارلج .. ولج انتي هيج واحد متكدرين تتحملينه ولا يكدر يتحمل المشاعر الي جاي تحسين بيها له .. هذا رجال ماينعرف قرارة ..
رفعت عيوني لشهد اباوع عليها .. شهد حلوة ...رشيقه وجسمها مرتب .. وحلوة ..
يعني راح تأخذ مكاني يمه ويوميه تروح وترجع عليه .. احس نار الغيرة كامت تأكل بيه من هسه .. ويسولف وياه مثلي واكيد راح تنعجب وينعجب بيها ويمكن ..  قطعت عليه حبل افكاري من كالت
ـ باسل خطبني
ـ منو باسل
ـ شبيج هاجر هو شكم باسل عدنا .. ابو الحسابات ولج
ـ صدوك معقوله والله معبالي يخطبج بهل سرعه
ـ ليش ولج هو كايل لج يريد يخطبني
ـ لا بس شفت اهتمامه بيج
ـ لج خل يولي والله لو اخر رجال بالعالم ماتزوجه وخل يضرب راسه بالحايط
ـ اياااا شهد شبيه خوش رجال باسل محترم ومؤدب وفوك كل هذا اشوف اكو حب بعيونه لج
ـ الله يخليج هاجر لا ظلين تحجين مثل امي ..
ـ اذا امج تحجي هيج فحجيها كوله صحيح ...نصيحه مني اقبلي بيه
ـ هسه عوفينا من باسل .. ايهم المدوحس شبيه وياج ..
ـ مااعرف شافني كاعدة وي باسل واضحك .. ووو
ماتكدرت اكمل عيوني كامن وحدهن يصبن دمع .. جنت مجروحه .. دموعي سالت على خدي والغيرة بعدها تاكل بكلبي
ـ من الاسبوع الجاي انتي راح تبدين وياه
بعد نهايه الدوام مريت على الحسابات وسلمت راتبي .. رغم فرحتي بيه .. بس ماتهنيت بيه هم كل مرة اتذكر الي سواه بيه ايهم .. ممصدكه ممكن يسوي بيه هيج ..
طلعو واني مثل التايهه .. اول مرة احس بقيمه ان للوحدة لها وظيفه وراتب تستلمه اخر الشهر .. طلعت بيه مباشرا للسوك .. افتر واني احس نفسي ممكن اشتري كلشي .. ايدي على جنطتي ... مو حبا بالفلوس لا باحساس بانك تكدر تأخذ اي شي تريدة ..
اشتريت كم غرض لامي ...و غاليه. حتى سهر شتريت لها سترة ورديه حلوة ونازكه .. واني شتريت لنفسي موبايل وخط ..
ورجعت للبيت ..
غاليه متغيرة ... اول ايام كانت بأنهيار تمام .. كلنا خفنا عليها .. بس بين يوم وليله بدأت تسيطر على نفسها ...مانست .. مرات اكعد بالليل لكيها تحن وتون بس صابرة .. كعد وتحط ايدها على بطنها عبالك الي ببطنها يصبرها على فراك لولو ..
دخلت للبيت وبيدي علاليكي ..
واني بباب البيت صحت
ـ ماما .. غاليه ..
امي طلعت من المطبخ ..
اول مااشافتني كالت
ـ اها ولج شنو هذا ..
ـ ابشرج اليوم ستلمت راتبي
تلكتني وهي تأخذ الاغراض مني
ـ يااا صلاوت ماما الله يزيدج ان شاء الله
كلت بكلبي مامن ورة ابن اختج زيادة ..
امي فرحت كلش وهي اطلع بالشغلات الي اشتريتها ..
اشتريت لها دشداشه جديدة وادري بيها تحب شغلات المطبخ شلتها الباقي من الراتب ونطيتها لها ..
ـ ماما هذا الباقي منه اخذيه لج وانتي بعد رتبي امورنا ..
من شافت هيج دنكت وكامت تبجي .. بستها من راسها
ـ فدوة لدموعج ماما لا تبجين
اجت غاليه وايدها على بطنها كالعادة .. كعدت يمي ..
ـ هاي شنو هاجر اكيد مستلمه راتبج ..
ـ اي والله وهاي هديتج ..
خليتها لها بحضنها ..
غاليه ذبلانه مو مثل قبل .. بس احسها تقبلت موت لولو اكثر من الاول ..
ـ لعد و لولو ماجبتيلها شي ..
انصدمت .. رفعت راسي لها ..
ـ لولو! ?
خلت ايدها على بطنها ..
ـ اي لولو ...
احس قالب ثلج وتكسر فوك راسي ..
لزمت ايدها ...واعصابي كوة مسيطرة عليها
ـ لولو الله يرحمها غاليه
ـ والله زرقني بلولو ثانيه هاجر .. مايطفي نار الولد الا ولد غيرة ..
ولولو نارها هنا .. وتأشر على كلبها .. مشتعله .. تحرك بيه و تجويني يوميه .. ولج يوميه بالليل .. اكول هسه تبجي وتكعدني تريد حليب .. هسه تكعد تريدني تحطها بحضني ...افز من نومتي على صوت بواجيها .. انتي وامي وسهر وكلكم تردون انسى .. واني شينسيني يهاجر ...شلون انسه نبض كلبي ..
هسه الي مصبرني هذا الي بطني .. احس بنبضه وعايشه على امل جيته ..
مسحت دموعي السالت  .. وياها
ـ الله يساعد كلبج غاليه احنا مانكول انسيها ابد والله احنا ماناسينها .. نكول ارضي بقضاء ربج وقدرة ...والله على الظالم ..
هزت راسها وسكتت ..
ـ راضيه .. اللهم اني راضيه.. والله ينتقم منك يراغب وين ماحطيت رجلك الله يحرمك من نفسك الي تتنفسه مثل ماحركت كلبي وحرمتني من بنتي ..
...

جنت كاعدة بين امي واخواتي ... واباوع عليهن يسولفن .. غاليه وسهر ويمنى يمنا بس تأكل بالكيك .. الي سوته سهر عود على اساس مسويه روحها شيف علينا بالبيت ..
هي هم استلمت راتبها ..
الجو بدا يكسر والبرد بدا يقل .. جنت ساكته ..
واحجي وي روحي
ـ لا تفكرين بيه هاجر ... ولج خل يولي .. كافي يباوع عليج بنظرة دونيه .. شنو الي خلقه ماخلق غيرة .. حتى لو مر بيج بدون مايباوع او يهتم حتى يشوفج بطرف عينه ..
تذكرت قبل ثلاثه ايام من مر بينه اني وشهد ...وتجاهليني حتى ماباوع عليه ..تحسرت على روحي .. من سمعته يسلم على شهد واني ابدا ولا جني موجودة
يعاقبني ...يعاقبني بقسوة على شي مااعرفه ..
يمكن تفرحني فكرة ممكن يغار من باسل بس دا تعذب ..
ماتحملت .. رحت للاستاذ منتظر وقدمت اجازة مستعجله .. وشهد ابد مااسألت ولا ادخلت بس نظرتها نظرة شفقه عليه
شهد ابدا مااسألتني عن سبب التغيير لي صار بيه .. من فترة حتي مااسألت ليش ادموعي نزلت بسرعه بذاك اليوم ..
شهد ساكته ..
مثل واحد يكلب الموضوع بعقله ..
ضحكت واني اتذكر شهد وباسل ..
جننهم الفارة والبزون ...واحد متجاهل الثاني .. وواحد مايحجي وي الثاني بس عرفت باسل متقدم رسميا للشهد وينتظر الجواب من اهلها ..
بس اظاهر شهد ماتطيقه .. ماافهم السبب ...ماتريدة ...يمكن فعلا ماتحبه وماتشوفه الرجل المناسب للحياتها الجايه ..
دك تلفوني .. شلته ... شهد
ـ هلو هاجر
ـ هلا عيني بالعروس
ـ دولي خايبه ياعروس يابطيخ
ـ ليش يابه مو صدوك عروس والعاشك الولهان موجود يريدلج الرضا ترضين
ـ انتي تافهه كولش
معقوله عشت بعيد عن المشاعر والاحاسيس بحيث كمت ماافرق بين المرة والرجال لي يحبون بعض والي يكرهون بعض
ـ لج شبيها شهد الولد ميت عليج ويريد يتزوجج شبيها هاي
ـ هاجر اني مطلكه
شهكت وكمت من مكاني وطلعت للطارمه ..
ـ شنووو
ـ اي مطلكه وعندي بنيه .. وباسل من اقارب زوجي سابقا ..
ـ صدوك تحجين شهد لج صار شكد اني وياج ليش مااكلتي
ـ عفيه هاجر لا تكولين لحد .. الله يخليج خاصه استاذ ايهم
ـ ليش شنو عيب لو حرام
ـ لا عيب ولا حرام بس الشركه ماتشغل بس الي ممزوجات والي ماعندهن مسووليات
مااريد تزوج واعوف بنتي
ـ وليش تعوفينها شهد .. لا انتي اول ولا اخر وحدة تتزوج وتاخذ بنتها وياها
ـ اخاف من ابوها يسمع وياخذها ...
ـ بس هو يحبج شهد ودا ينتظرج عمري
ـ هو ينتظر رد ابويه هاجر مدا ينتظرني
ـ لج انتي مدا تعرفين نفسج شلون محضوضه ..
ـ مو كوتلج انتي تافهه والله
سكتت مااعرف شكول لها
ـ هسه عوفينا من هل حجي .. يمته اداومين ...
ـ ليش ترة اجازتي بعدها ممخلصه .. صاير شي ترة مصار كم يوم من اجازتي
ـ مبين الي دا تسوينه جاب نتيجه مثل مااخططتي له
بلعت ريكي .. واحس اخدودي كامن يشعن من الخجل .. واسمع صوت طنين بأذني
ـ شنو تقصدين شهد ...
سمعت صوت تنهيدتها
ـ اجانا امر اداري عيني .. يردونج داومين خلال اربع وعشرين ساعه
حسيت انقطع نفسي وكمت لهث
ـ شنو! ?
ورجعت كالت
ـ ماكو يفصلونج وينطوج شهادة سوء سلوك بالداوم وانتي بكيفج
حسيت بخدودي يشتعلن ...يريدني .. اي ...يريدني ارجع للشركه ..
ـ اها شدا تحسين ...متحمسه  مو ... فرحانه انتي! ?
رديت عليها واحس الحجل داخلي يزيد وسويت نفسي ماافهم كلامها
ـ شنو ... مدا افهم منج شي
ردت عليه بصوت هادي
ـ عبالج اني غبيه هاجر .. ولج اني اكدر تخيل وجههج هسه واني دا حجي وكلبج شلون يدك لمن كولتلج سوة هل شي .. لمن تأكد من صحه خطوبتي من باسل .. ولج امس سألني اذا باسل خطبني لو لا وبعدين سألني عنج .. عود كوتله انتي بأجازة ماكو ساعة ووصلنا الامر الاداري
جان كلبي يركض صدوك .. يعني سامحني .. رجعني للشركه لان يريد يشوفني .. يعني يحس شي بأتجاهي
ـ اسمعي ولج هاجر اني اعرف انتي منجذبه له مو بس انجذاب انتي عندج مشاعر له اكبر من الاعجاب .. وهذا شي دا يقلقني عليج والله ..
كمت اهز راسي واريد بس الكاع تنشك وتبلعني .. هيج اني مفضوحه كدام الناس ..
ـ لا شهد انتي غلطـ ..
ـ لا تنكرين .. الله يخليج .. اكدر احس بيج ببساطه .. احس بغيرتج بكل مرة اروح بيها لمكتبه .. بنظراتج وانتي دورين ولو نظرة منه بكافتيريا الشركه ..
عضيت شفتي الدرجه حسيت طعم الدم بحلكي من الاحراج الصرت بيه .. مو احراج وبس الا والخزي هم .. مامتعودة على فكرة الحب .. وشكد اهابها .. واخاف منها ..
ـ اني مثلج جنت هاجر .. جنت زغيرة .. وبريئه مااعرف شنو حب ولا عايشته .. وجذب عليج اذا كوتلج مو حلو حلو الحب خاصه اذا الشخص نفسه الي تحبينه يبادلج نفس المشاعر
ـ واني احس بمشاعر حلوة شهد
ـ يدري بالج هاجر ... ديري بالج ترة الموضوع مو مثل مااتتخيلين
جنت داخلي اسمع نفس صوت شهد يحجي نفس الحجي .. بس قمعته من داخلي
ـ شبيج شهد ترة هو متهتم بيه و
ـ حتى لو مهتم .. هو مو مناسب لج
وتكملت
ـ انتي بعدج طاهرة ...نقيه ماعندج تجربه بالحب يعني خام وبسيطه .. مشاعرج ماملموسه قبل
سكتت ماكدرت اكول شي كل فرحتي ماتت بمكانها بعد مااسمعت كلام شهد .. صح ايهم ابن خالتي بس اني مااعرفه .. معرفتي بيه سطحيه عاديه مثل اي موظف برب عمله
ـ هاجر ترة الي سمعنا عنه مو سهل .. الرجال مار بتجربه صعبه .. ورغم هاي التجربه اظاهر بعدة يحب خطيبته السابقه او زوجته لان اصلا هو جان عاقد عليها
رديت عليها
ـ قصدج يدور على تعويض .. يريد وحدة تعوضه وتعيشه الحب .. هوايه زلم مروا بتجارب صعبه وتزوجوا عاشوا حياتهم
ـ ولج يخبله .. انتي تقارنين الزلم بواحد مثل ايهم .. ترة هذا واحد مو سهل .. اني اقتربت منه وعرفته .. وحدسي بيه ماجذب .. دا يمر بمرحله من الفراغ الداخلي... وانتي مو بحال تواجهينه .. انتي قويه اي .. بس قوتج ماتسوى شي كدام جبروته ..
لا شعوريا شلت عيوني ...وكمت اباوع .. للبنات امي واخواتي وهنه يسولفن ويضحكن .. وغاليه الي كالعادة دا تسولف وي الطفل لي ببطنها ..
رجعت كلت لشهد ...
ـ شهد اني فكرت بالموضوع ترة مو مجرد مشاعر و
ـ لا تحاولين تبررين لي ...انتي ماتحتاجين تسوين هل شي كدامي .. تصرفي مثل ماتريدين اني اعرف الكلب اذا لعب بالعقل يخيل له احلام ورديه
ـ لا شهد لا تتخلين عني هسه واني بهل حال
ـ لا تخافين حبي انتي مثل اختي الزغيرة وراح اضل دوم يمج ...
ـ شكرا شهد مااعرف اذا هل كلمه توفي حقج صدكيني حتى اخواتي مااكدرت اسولف لهن الي بداخلي ..
ـ المهم تعالي بسرعه ترة مدا تحمل سوالف باسل وثكل دمه ..
ضحكت ...
ـ وانتي بديتي تتعودين على ثكل دمه شهودة
سدت الخط بدون ماترد عليه ..

...
ـ صباح الخير ..
وكفت بمكتب السكرتيرة ..
شافتني السكرتيرة ..
ـ العفو ست وداد ... استاذ ايهم داز عليه .. يريدني اكمل الشغل
شالت راسها وباوعت عليه
ـ ماشي هاجر بس خليني اكمل شغلي وي استاذ ايهم وبعدين اكوله عليج ..
وكفت وهي تكول
ـ ترة لحد لان مااصدر هيج امر لي
حسيت دا تجرحني ...وتحرجني بنفس الوقت عبالك دا تتهمني اني اكذب عليها ..
ـ ست وداد ترة استاذ منتظر هو الي دز عليه وكال لي اني مجايه من وحدي ...
اشو هاي كامت تدردم اريد افهم منها شي ماكو .. واخذت الملفات ودخلت له ..
مرت عشر دقايق وطلعت من عندة .. واشرت بيدها الي حتى ادخل ..
رجف كلبي وخدر جسمي لدرجه كمت مااحس بيه ..
كلبي ...كلبي .. ااه الكلب .. ولك اوكف عن دكاتك المفضوحه ..
دخلت بدون مااشوف كدامي .. وسديت الباب على كيف ..
خذت نفس قبل لا اشيل راسي واشوفه ..
كان واكف كدام المكتب مالته متجي عليه .. والابتسامه شاكه حلكه شك .. ابتسامته واسعه اكثر مما يتحملها كلبي ..
عيونه يلمعن .. وي قميصه الكاكوي اللابسه ..
ـ صباح الخير يا بيضاء
كال اخر كلمه بالفصحى ..
بللت شفتي بطارف لساني .. بدون مااحس شفت عيونه تلاحك حركه لساني ..
طلع صوتي خافت
ـ صباح الخير استاذ ايهم .. استاذ منتظر كال لي تريدني ارجع للشغل وياك ..
مازال على نفس وكفته .. ماتغيرت .. احسه مستمتع بالي دا يصير والي دا يشوفه كدامه ..
شكد ضجت من نفسي ليش اني بهذا الضعف كدامه .. منو هو .. شنو هو .. واني حتى حجي مااكدر احجي ..
الله يلعن كلبي الي يسوة بيه هيج سوايه.   ولج هاجر مو هذا الهانج و طردج من الشغل وياه وبدلج بشهد .. مو هو نفسه الي هددج وبسببه كطعتي اجازتج واجيتي بسبب تهديدته
جنت اناقض نفسي ..
امس مااكدرت انام واني افكر بيه .. اشتاقلي .. اكيد اشتاق لي ومااكدر على فراكي ..
وهسه هذا هو كدامي ولا مبين عليه شي
ضجت من نفسي اكثر ..
ـ استاذ اريد احجي وياك بموضوع اجازتي.  
ـ افتقدناج هاجر ... حتى الشركه مفتقدتج ترة
كان صافن عليه بطريقه مااسواها من قبل ..
نظراته الي مااكدر تحملها بعد كل هذا الجفه منه .. بكل الايام الي فاتت ..
ـ استاذ ايهم اني ..
اقترب مني وهو يحجي
ـ خلينا ننطي مهله لل كنز
يقصد شهد .. تعرفين راح تتزوج .. ولهذا اني محتاجج هسه
رديت عليه ناسيه كل الحجي القبله
ـ نعم استاذ ..
ـ وين جنتي بهاي الايام
ـ وين يعني بالبيت اكيد ..
ـ معقوله ..
ـ ليش ممعقوله
كملت بكلبي
"ليش عندنا غير البيت نكعد بيه يا حسرتي "
ـ معقوله تغبين 3 ايام وماتشتاقين لنا
ـ منو كال مااشتاقيت ..
رفه راسه حبيت لعب عليه مثل ماهو يلعب عليه
ـ اشتاقيت للشركه ولشهد ..
ـ لعد محظوظه شهد مو بالله
ابعد من يمي .. وهمزين راح ..
وكمل
ـ يلا نبدي من جديد ..
مد اصبعه كدامي
ـ بس خليج مطيعه ماكو ابدلج من جديد بحلوة شهد
كلمه "حلوة " استفزتني .. وشعلت نار الغيرة بداخلي .. شبيه هذا تخبل.   اشو من دخلت ..
سماني البيضه .. وهسه شهد الحلوة ..
ـ ترة يصير تسميها الحلوة اكيد خطبيها مراح يعجبها الموضوع
اول مااحجيت حسيت بالندم .. اكلني اكل .. هاي جانت عايزة لتمت .. قبل  اخاف شويه شاك .. هسه اتاكد اني اغار عليه
عضيت شفتي .. وهو كدامي كاعد وشابك اصابعه كدامه ..
ـ عادي .. ترة الموضوع بيني وبينج واكيد مراح تكولين لخطبيها .. واكيد مراح اصيحج كدام احد ام الضفاير لو البيضه .. لو الحمرة
جنت احس اكو شي غلط .. واني اضعف من ان ارفضها ..
مااقبل بيها
اقاومها من صدوك
ـ حتى اني ترة ميصير احنا موضفات عندك مو لعابات كل وحدة منا تنتطيها لقب
سالتني بنبرة ثابته
ـ شنو راح تمنعيني
ـ لا ماامنعك بس انبهك .. ميصير تسوي هيج
جان بنفس وضعيته .. صافن عليه وماغير من وضعيته
ـ يجوز اكدر اتنازل عن لقب شهد بالحلوة .. بس انتي مااكدر احب اكولج ام الضفاير احسها تليق بيج من صدوك
ـ ترجاك ايـ
ـ شكد عمرج هاجر ...تصدكين مااعرف شكد عمرج ..
ـ عمري 26 سنه
ـ تدرين اني شايب بالنسبه لج .. عادي اعتبريني مثل منتظر مو يضحك ويشاقى وياجن
ـ استاذ منتظر مايسوي هيج ومو لهل درجه ..جبير ترة
بس كلت اخر جمله ...عبالك فتحت عليه باب من الضحك .. كام يضحك .. وكأنه عمرة ماحس بالراحه مثل مايحسها هسه ..
ـ تصدكين صار شكد مااضحكت هيج من زمان
....
رافــد
جنت هايم بشوراع اسطنبول .. افتر بيها شارع .. شارع ..
اتذكر اتصال ايهم 
وصوته هو يحجي اجاني
ـ اها رافد
ـ بشرني سويت الي كوتلك عليه
ـ وزايدة مو بس الي كتلي عليه
ـ شكد انتطيته
ـ مبلغ مايستاهل ينذكر صدكني
ـ شكد ايهم لا تشل حالي
ـ عشر الف دولار ..
ـ بس
ـ بس
ااخ ... شكد رخيصه لعدة .. يدري بيها حامل وباعها .. وانته رافد مستعد تبيع العمر لخاطرها وهذا النذل بدلها 1000 دولار بس ..
سديته منه ..
رجعت لحاضري .. غاليه .. حرة .. حرة .. وهذا الشي يخليني مثل المقسوم نصين.   نص يكلي ارجع ...ونص يكلي ظل بمكانك لا تتحرك ..
ماادري ليش مرت ذكرى ابويه لمن جان يتوسل بأمي بعد مااعرفت بيه متزوج غيرها .. ابويه لي كضه سنين عمرة .. يدرس بمصر ويدز فلوس حتى يدرسهم .. شكد دز لامه رسايل حتى تجيبهم وتجي ...بس ماكو فايدة امه جانت متمسكه بالعراق وهو هناك متعلك بمصر الى ان تزوج عليها .. وعرفت ..
عرفت ... بيه متزوج .. سافرت له فجاة ولكت هناك متزوج ..
اجه وراها .. ترجاها .. مو بس ترجاها .. ركع على رجليه كدامها .. كدام عيوننا .. بس حتى تسامحه ..
جنت اكول كل لحظه مرت عليه .. هسه تسامحه ...هسه تحفظ كرامته الي هدرها كدامنا وتكومه من الكاع. وتسامحه .. بس صار العكس .. طردته ..
نفته من البيت مثل ماينفي الملك العبيدة ..
من يومها راح .. لا يعرفون عنه شي ... ولا مر عليهم .. ماعدا بعض الاخبار الي توصل لهم
من بين وبين ...اخر مرة سمعوا بيه بتركيا .. وهذا الجاب سعد لهنا ...يدور عليه ..
وهذا الي مأثر على ياسر مخليه يتصرف هيج وي سهر وهذا الي مزود نار ايهم ومخليه يشوف النسوان كلهن سوة .. خاصه بعد سوايه سميه بيه
وانته رافد .. الي كسرتك .. وخسرتك كرامتك تستاهل ترجع لها ..
سوت بيك مثل مااسوت امك بأبوك .. واكثر .. فضلت واحد ثاني عليك ..
ترجع لها ..
بعد كل هذا ..
اااه من النار المشعوله بكلبي .. جمر .. يجوي الكلب ويحركه حرك ..
كعدت على وحدة من المساطب الموجودة على الطريق.  
اشوف الناس تمر ..
ناس رايحه وناس جايه واني بمكاني ..
يمكن البعد احسن .. البعد حل .. هسه ..
المهم .. هي حرة .. حرة ..
شكد حلمت بهاي الكلمه وهسه صارت ..
رجعت فتحت الموبايل .. واتصلت بامي
ـ هلا يوم شلونج
واجاني صوتها تعبان ..
ـ يمه رافد ..
وبجت صوتها مكسور
ـ ولك يوم صدك كلت لك سافر .. بس ماكلت لك اكطع بيه .. ليش هيج
ـ الله يخليج يوم اني اتصل بيج حتى اطمئن عليج نوب اسمعج تبجين ..
ـ غير شتاقتلكم اانته واخوك .. ارجعوا يوم كافي عبالي اكدر اتحمل مااكدر على فراكمم ..
ـ الله كريم .. نرجع ان شاء الله
...
ـ رافد غاليه اطلكت ..
كأنها داست على الجرح ..
ـ ادري
ـ اريدك تتزوج غاليه بس تخلص عدتها ..

....
شلونكم بنات شخباركم ..
طبعا اليوم البارت
برعايه ايهم وهاجر ..
والقفله ..
مو تنسون التصويت .. والتعليق ..
صوتوووووووا حبابات ..
وعلقوا على الفقرات
قراءة ممتعه ..