رواية أهدتني عاراً الفصل الرابع 4 - بقلم نورا ناصر

جهاد :- اهوووو مراح نخلص من هالسيره ..

* جنه :
شفته يريد يطلع رحتله اركض خليت ايدي على صدره اترجاه.
لا جهاد فدووه وين طالع ياعيني متشوف الرمي عالك ارجع فدوه ليصير عليك شي.
فؤاد .. امشي اخويه امشي هي مصيبتنا احنه هم مو بس هم دمشي خلي نشوف شنو الوضع.
وباوعلي وكال عوفي رجاءاا
طلع فؤاد وراه عماد
جهاد لزم ايدي باسها وكلي ليظل بالج هسه ارجع فوتي جوه وابتعدي عن الشبابيك ماشي
وراح
بقه گلبي يمه يربي صدك شوكت نخلص من مصيبة رؤى شوكت راح تنحل.

*جهاد.

طلعت وره اخوتي شفت سيارتين
رياض وويا اخوته اثنين وبعد ولد عمه
واكفين مقابيل بيت عمي
وبيديهم سلاح.
ركضت كبل اخواني وصحت عليه
ولللك رياض جبااااان خسيس شجااي اسوي
ولك هنا عوائل واطفال مالهم ذنب.
هو من شافني انطلق مثل الجلب المسعور وهدوو

وظل يصيح وللللك جهااد وين وديتو اختي عائله سززز اطلعوهاا لو احركككم حركك

..جهاد. يضحك بااستهزاء..هههه الخسيس يعرف نفسه ويعرف شلون من البدايه ماانطه تربيه الخسيس انت وامثالك وامثال تربيتكم العاطله
ضربني بوكس اني نار واشتعلت هجمت عليه ورديتله البوكس اثنيين.
اخواني اجوي فاككونا واللتمت العالم.
جهاد...ههههه عوفوا عوفوا كلب بس ينبح
اخوو رؤئ فلت من نص العالم وتكامشنه وصارت بوكسيات.وهو يعيط ..اني كلب اني كلب
..ضربته بوكس وكع بالكاع كلب وستين كلب لك خسيس كدرتك على اطفال هي اختك مربيتوها زين ذول شنو ذنبهم. . روح طم روح بمكان ماهاد علئ هاي لناس العزل تربيه سزز

رياض ..
جهاد لك انت تدوس على شرفي اذا ماطلعون اختي لنمحيكم من على وجه الارض لاعبالكم صدگنه جذبتكم اختي شريفه وداگه القرأن ممسويه شي طلعوها احسللكم.

جهاد ..
لك يا مامسويه شي لك عليها شهووود شبيك انت هي مال مامسويه شي وشريفه فرح بيها روحك.
انتفض من مكانه ويريد يهجم عليه
كتله ههه ياشرف ابو شرف انعل تربيتكم لاابو شرفكم.
اخوو رؤئ والناس لازمته..والله ليوم اله اشرب من دمك والله اله ادفنك بالباب ووجه السلاح صوبي يريد يرمي عليه.
قبلها بلحظات وصل ا ابو رؤى واخوانه اثنيين.
اباوع لابو رؤى اجه باتجاهنا محني الظهر وبعيونه نظرات انكسار وبايده كانيولا شسوت بيك رؤى ؟؟؟
هي كلها لان مااحسنت بتربيتهه.
ابو رؤى ... ولك رياض المن تقتل لك كاافي موتوني راسي شااب منكم تريد تحط دمه بركبتك.

ابويه لزمني وبعدني عنه ويريد يفوتني لجوه
الاب .. لك جهاد طلعت تكحلها عميتها
جهاد ... بهدوء منو كلك اني اكحل اني بس اعمي.
ودخلنه جوه اخواني فاتو كلهم وهم راحوو.
بهالحظه اجوي اهلي من عرس ضمياء
امي طبت مفزوعه يمه خوما تعورتوا
الاب ماكو شي يامره تعاي طبي تعاااي
دخلت واني اريد ادخل صاحتني كواكب واني واكف بالكراج.
اللتفت الها تنهدت هاا شكو
... ولك جهااد تريد تعم على اولاد عمك تريد تسويهه حمام دم.
... اهووو شتريدين هسه الي تردين توصلين اله شنووو
... انت تعرف شسوي بيدك القفل وبيدك المفتاح ولا يروحون الولد يتكتلون
.. كواكب كلمه زياده افرغ مخزن براسج وانت تدرين شسوي اني طلعي منهااااا احسلج مفهوووم.
خزرتها وطبيت.
شفت جنه كاعده ووجهه مخطوف خوفتني عليهااا
كرفصت يمهه شكووو شبيج.

جنه
طلع جهاد واني بالي كله يمه متت خوف عليه واني اسمع صوت الهوسه اتمنيت كلبي طير وعنده جناح ويطلع يشوف شصار بس لاتأذه جهاد
ماادري شلون راح بالي لقبل وتذكرت سامر من جابولي خبره انهاريت كلللش
ورجليه احس صارن خيوط وميوكفني
كعدت بباب الاستقبال انتظر جيتهم.
فاتوا اخوته وابو وتالي اجو عمتي ورونق واني اباوعلهم اشو جهاد ماكو
بس احس مااكدر احجي واسألهم
ظلوا يحجون بيناتهم ومحد انتبه على حالتي.
لحظات واباوع للطرمه شفته اجه كلت اي اجه النبض.
احس ردت الي الروح ورجع الدم بشراييني واوردتي.
هو شافني حس بيه شي اجه وكرفص يمي.
اني نسيت كل الي حولي وشبگته
بلحظه وحده قوه حضنتي اله وظل يشم بيه بعدهه دفعني ويباوعلي نزل حواجبه وسوه حركه بيهم معناهه اهلي هنا عيب.
...شبيج جنه بيج شي ؟؟
... ماكو شي ظل بالي عليك.
باوعت لوجهه ازرك من يم عيونه وطالع منه دم
وشفته مشكوكه.
كلت ياعزاا ضربوك ورفعت ايدي اتلمس اصابته باصابعي.
... شنوو السالفه على كيفج مابيه شي مجرد بوكس متعلمين.
كمت جبت المعقم والقطن.
ورجعت للاستقبال كلهم كاعدين ويحجون بالحادث
اقتربت من جهاد واخذته من ايده ورحنه بالمطبخ اجت ورانه كواكب تحووم.
جنه ...سوده عليه هي شمسوي بيك عديم الرجوله ياكلب ياحمار شلون يمد ايده عليك الحشره عاا ماكوو كلمه تريح كلبي وتكبل رجولته عديم الرجوله
كواكب ... هسه شخبصتينه سوده عليه ما سوده عليه هو اكله بوكس قابل طكو طلقه
والله ياجهيدان ماتكعد راحه.
جهاد ...اسكتي كويكبان تره يلوحج طشار.
كواكب ... ماكبرت راسك بس هاي الزعطوطه مرتك ماتستحي محد مطيك تربيه.
جنه .. جنه ياااا اني شعليه خاله شبيج.
جهاد .....عوفيه ليوم طابك البارد والحار

بعدها دخلت عمتي تتفحص جهاد
ظليت ادردم
هذا شمسوي بيك عديم الرجوله الحقيير ميروح يدور عرضه العااار
جهاد لزم ايدي قوي وخزرني واني جاي اداوي
كال بحديه
جنننننننه
اني خفت من خزرته وسكتت.
بكلبي كلت ليش ميقبل احجي عليهااا شنو يحبهااا
بعده.
هد ايدي بهدوء و صعد فوك واني اللتهيت يم عمتي تحجي عن ضمياء وتبجي.
ومقهوره لان حوراء مااجت لعرس اختهااا
وتحجي عن مرت امجد عبالك اقارب العريس راحت كبل للقاعه حتى ماجتي هناااا
كتلهه عمه الله يسعدهاا كل بنيه لازم تجي قسمتها وتتزوج هي سنة الحياة.
دنحجي واسمع صوت جهاد م̷ـــِْن على الدرج يصيحلي.
ترخصت من عمتي وصعدت.
رحت للغرفه كاعد ع السرير
... هاا جهاد !؟
... جوعان شوفي كواكب مجابت تمن من العرس هاي سوالفها
... هههههه لا بالقاعه ميوزعون تمن بس لفات.
... اي اي شي خلي اسد بي جوعي.
... صار هسه نازله اسويلك اكل.
نزلت للمطبخ
ماكو احد بس كواكب وتكلب بالجدوره مال اكل الظهر بيهن تمن ومرك لان جان خطار عدنا.

كواكب... هي شنيه هاللفه ماتشبع شكدوتها
وام امجد حذرتني كالت ذولي مثقفين ديري بالج تطلبين بعد لفات منهم مثل عرس بيت ام حافظ.

جنه ... ضحكت عليها مدري شجاوبهااا
خفت اكللها مماكله اكل هنا شو خير من الله خاف تكب عليه.
غيرت الموضوع كتلها اي شونهه ضمياء خو مابجت

كواكب .... يا خاله شبجت ركصت ركص الماصاير هي وهذا احسان مسوي على شعره عرف جنه ديج هراتي مسويله سكابي
جنه .. شنو سكابي
كواكب .. هي نسيت بكاسي سوكيبي
جنه .. هي تحجي واني عاوجه حلگي هناك واذكرت تسريحة شعره سبايكي
كتلها سبايكي
كواكب .... اي ذبتلهه دمعه دمعتين كبل الزفه.
جنه .. الله يسعدهاااا
كواكب ...ماكوو اني طلعت بره ا لقاعه شني صوت لاغاني عالي شني عيب وحرام هذا باجر صوت لاغاني يذبونه مثل التيزاب بااذانه استغفر الله ربي ناس لا تحلل لا تحرم
جنه بكلبي..احم والفتنه والفضول وقال وقيل شنو موقعهن من الاعراب ناس تاخذ شي وتعوف شي من الدين ماتلتزم بالدين كله صدك لو كالو دين لو طين.

طلعت الخبز وخليته بالميكرويف وسخنت الجاي
جانوا جايبين كباب ع العشا ووقت الحادثه كله طفرت محد اكل.
حضرته ويا طماطه شوي وطرشي
وكفت انتظر الجاي يصير حار
لان جهاد اذا اودي اله بارد يصبه على راسي لو يغسل بي يكولي شوفي بارد يريده كلش حار.
كواكب .. اكلج شو ماشحنتي ؟
باوعتلها شنو اشحن ؟
ظلت تأشر على بطنها عود ماحبلتي.
كتلهاا هااا خاله شوكت ميجي حيااه ااالله
درت ظهري الهه وكفت ع الطباخ گلت شحنتي شنو قابل تليفووون اني.
اسمعها تكول
روحي دكتوره روحي صخام لاتخليني اشك بقدرات ابن اخووي.
درت عليهااا ياااا هي شبيهه
ظليت اهف بيدي وهي متربعه بالارض وتاكل تمن ومرك باوعتلها كل هذا البلع مايبين بيهاااا
ولاتسمن اكيد تحرك سعرات حراريه من الفضول والحشريه.
اجه على بالي اسألها على رؤى
وكفت يم راسها كتلهه اكول خاله رؤى شكد ظلت وي جهاد گبل لاتنهزم
باوعتلي بنظره غريبه مكدرت افسرها ماادري شنو الغلط بكلامي.
كالت سنه ونص
ومااصار عدها حمل ؟؟؟
صار عدهاا بس بالخامس وماات.
هاااا زين
كرفصت رجليه يمهه كتلهه هم جان يحبهاا جهااد
باوعتلي واللگمه بحلكها تلوووك بيهاا
ايي قابل وحد هو ياهي تجي يظل يحبهه
باوعتلهه ورفعت حاجبي وهي كملت كلامهاا
...مدلله جانت خاشوگه ماشيل من الكاع والتليفون نهاره كله بيدهه وتطب وتطلع وكله لبسها حصر واذا واحد حاجاهه انتم تغارون مني ومن جمالي .
...هاا زين شوكت شكيتوا بيهااا عدها علاقه وياعامر.
... هي من زوجت وكحه وبرعه يعني بعد العرس بشهر ظلت تروح يمهم وحدهه وهم قريبين منا جانت تروح يمهم العصريات وتتطور الاوضاع تروح الصبح وتتأخر يمهم.
ومرات تعبد السطح وماتنزل خاصة اذا جهاد ماكو.
والرجال على كولتهم مثل الجلب بس واحد يذبله عظمه يظل يلهث.
يلا عيني الجاي فار روحيله وخل اسكت انه لايجي رجلج المخبل يسويلي سالفه.
... ههههه فديته الشايب مالتي وفديت خبالاته.
شلت الصينيه وصعدتها فوك.
وبالي يم كلام كواكب عن رؤى
فتحت الباب شفت جهاد
كال مو عشا طلع منين رحتي جبتي من البصره وجيتي ابتسمت اله.
خليت الصينيه كتله على طاري البصره بعد يومين تلتحق موو ؟
اي
انت موعندك شقه هناك اخذني وياك مااتحمل بعيد عنك تعلقت بيك حييل.
اويلي صدك جنه
اي والله
لا وليالي الخفر مااكدر اعوفج وحدج بالشقه.
اي عادي اروح يم اهلي
انت شايفه الطريق شلون بعيد بين المركز وبين بيت اهلج.
اهلج بالجبيله والمركز بالفاو يعني بعيد كلللش كعدي هنا وسكتي بينما الله يفرجهااا وتعاي خل ناكل وكافي لغوه.
.. الي تشوفه حبيبي.
سكتت وظلينه ناكل واباوعله
ظل يباوعلي
كال
... هاا جنج تردين تكولين شي
احجي احجي لايظل بكلبج الحجي.
...لا بس طولنا هواي وماصار طفل خلي اروح لدكتوره اجيك وضعي.
..جنه دكعدي وسكتي شوكت ميجي هله بي.
...•اللّـہ̣̥ كريم
بگلبي عفيه رجال كلشي لاء لاء لاء ولا مره طلبت كلي اي هوووف.
كملنه اكل ونزلت الصينيه
رونق وعمتي بالمطبخ
كواكب مدري شعجب ماكو متفوتها لغوه.
جانو ديحجون بالحادث الصار.
رونق ... زين خاله هم اهل رؤى ليش غيرو موقفهم مو ابوها اجه هنا وشمر عكاله وكال دمهه مهدور اشو هسه سووها شريفه.
الام .. والله ياام حسوني ماادري والله خايفه على الولد خايفه من حرب تحرگ الاخضر واليابس بسبب وحده مثل رؤى ماحسبت حساب لكل شي وسوت سوايتهااا
رونق ... الله كريم عمه الله موجود ويلطف بحالنه.

سمعتهم خفت وخاصة كلام عمتي خلاني بقلق على جهاد احس سالفة رؤى كابوس جاثم على صدري خايفه لايكون سبب بدمار حياتي.

غسلت المواعين واني ارجف
الجو حار بس ارجف من الخوف يكولون اخو رؤى مخبل اكيد مثل اخته خايفه لايأذي جهاد بعد ماااستقرت حياتي ويا ادري بحظي العاثر ماايوم نصفني ووكف وياي ماعرف الايام شضامتلي بعد
وره حادث سامر احس وكفت بيه الدنيا بس بعد ماحبيت جهاد احس ضحكتلي وهسه ماادري شمضموم الي اليوم تفكيري كله بسامر هواي جاي اتذكره ماادري ليش يكولون الذكريات تمشي بالدم يمكن لهيج جايه اليوم على بالي .
كملت شغل وغسل مواعين وصعدت فوك
دخلت للغرفه شفته صافن ويدخن تقربت منه باوعت للنفاضه شفته مدخن اكثر من خمس جكارات بصراحه ضجت من ينذكر موضوع رؤى يضل بس يدخن ومهموم وميسولف يقهرني حيييل
رحت بدلت لبست ثوب قصير ولونه احمر وحطيت شويه مكياج وجيت يمه...
كتله جهاد كافي تدخين
جاوب بهدوء..بيش مضايقج؟؟
جاوبته..مضايقني بصحتك الجكاير بيها نسبة نيكوتين وسبب رئيسي لمرض السرطان اسم الله عليك
سكت ومجاوبني..قهرني بزايد اضوج من يحگرني
واغار من يفكر بذيج احس بعده يحبهاا
اجيت اسحب الجكاره لكن هو ابتعد ومخلاني
...كال جنه مااكدر اتركه رحمه لأهلج عوفيني اني شويه شويه اتركها حاليا اني مدمن عليها
انقهرت حيييل..سحبت الباكيت من يمه وأخذت الجداحه وخليت الجكاره بين اصابعي ورثتها
جهاد *
شفتها سحبت باكيت الجكاير والجداحه عبالي راح تشمرهن بالزبل اشوو هاي ورثت الها جكاره وجنها تريد تدخن.
خطفت منها الجكاره بسرعة البرق ودفعتها على السرير ثبتت اديها باايد وحده وايدي الثانيه بيها الجكاره قربت الطرف الملتهب من الجكارة من شفايفها
حجيت بهدوء واني اقرب الجكاره وهي تبتعد
وعيونه بعيون بعض.
...شنوو حمامتي البيضه ناويه تدخن؟::
جاوبت بخوف وهي تبعد شفايفها من طرف حرارة الجكاره.
..لا والله
جهاد قربتها اكثر...اااه
جنه بخوف...وغلاتك وغلات عيونك
جهاد...ياغلاتي ياغلات عيوني هو اني لو ما لزمتج جان اخذتيلج نفس. جنه ...لا والله وروح ابوي اصلا تلعب نفسي منها ومن ريحتها بس ردت احسسك شلون اني اضوج من ادخن وردت احسسك مدام انت مامهتم لصحتك اني همات مااهتم
جهاد عضيت شفتي..تردين احسسج بحرارتها؟؟

شفتها غمضت عيونها بطفوله وهزت راسها بمعنى اي وراحت مستسلمه عبالها راح احركها.

بعدت الجكاره وقبلتها قبله حاررره اقوى من حرارة جكارتها... ...
ابتعدت عنها...وجاوبت بخوف عبالي اجيت تحركني بجكاره
جاوبتها..لا بكلبي بس انتي دائما تجنين على نفسج بتصرفاتج وهسه نامي لا ااغير رئيي وترحين بيها

ابتسمت..حضنته من خصره ونمت وهو هم نام

جنه .. اووف جهاد والله تعلقت بيك هالمره
شيصبرني 15يووم

جهاد ... ميخالف حبيبي يلا تعالي........

*جنه
فزيت فتحت عيوني واني انضح عرگ واتنفس سريع سريع
اباوع لنفسي نايمه بحضن جهاد وضوه التيبللمب يضرب على عيوونه
وهو يباوعلي بنظرات غريبه ماتتفسر

باوعتله بين الكاعدة وبين النايمة

گلي منو سامر منوو سااامر ؟؟؟ صحصحت واسمعه يكولي ساامر منو ... فتحت عيوني على وسعها !

بعد وفاة سامر بقيت سنه ونص قبل لازوج جهاد
بقيت هواي من الليالي اتمنى احلم بسامر اتمنى يمرلي طيفه ولو مره وحده بس.
بس ماشفته بحلم بس باحلام اليقضى
تزوجت جهاد وشيئا فشيئا حبيته واحتل مكان سامر بس الذكريات تبقى عالقه بذهني
ايام كعدنا حجينا سولفنا وضحكنا مستحييل تنسي
بالعاده اني من احلم بشخص
اظل الهج باسمه
مرات احلم بامي واصيح باسمها او وحده من اخواتي
واظل احجي بيهم واني نايمه.
كل الي ابالي جهاد يعرف جنت مخطوبه قبل
ومن كلتلي امي ومحمد لتحجين بي كدامه توقعت حتى ليتحسس او يضوج لان فكرة انه المراه كانت مرتبطه سابقا حتى لو بشخص ميت صعبه ع الرجال.
فزيت لگيت نفسي نايمه على رجلين جهاد
وهو يباوعلي مستغرب ويسألني منو سامر
مجنت واعيه لشي
شجاب سامر بالنص
لان الي يحلم من يكعد ميتذكر الحلم رأساا اله بعد مرور وقت من سألني تفاجئت شبي سامر
من وين يعرف اسمه ؟؟؟

فتحت عيوني زين وبديت استوعب
وتذكرت الحلم.
سامر اجه ونطاني ورده وراح اركض وراه
و اگله سامر حبيبي لتروح لتعوفني. ...

كام جهاد من السرير وعيونه تخوف راح يثور ادري بي كلي منو ولج سامر حبيبج الميعوفج هاااا انت هم خاينه
وسحبني من شعرري ونزلني من السرير.

جهاد جانت نايمه بحضني واني أتأمل ملامحها لبريئه جانت جان اكوم اسبح واحضر نفسي للدوام حسيت بيها ضلت تهلوس وهي نايمه رحت خليتها بحضني وهي تذكر اسم مافهمته بالبدايه ومن ركزت بكلامها افتهمت الاسم سامر وحبيبي واحبك ولاتعوفني.

تولد عندي احساس بين الحاضر والماضي وخيانه رؤى تكررت بجنه ماتوقعت جنه تكون خاينه مثل رؤى حسيت صحى الوحش الي بداخلي بعد مجان نايم بسبات عميق.

ضلت جامده ومتحجي ضربتها بقووه على وجهها وانقضيت عليها مثل الوحش الهائج طار شعرها بين اديه وبين صياحي وصياحها وضربي اله الكل كعد اجوو يركضون امي وكواكب سحبنها مني بالقووه وابويه واخويه لزمني.

امي لبستها عبايه الصلاه لان ثوبها قصير وهي تبجي بووجع

ابويه لزمني بقووه...شبيك لك شبيك انت مريض تسودنت تخبلت لناس تكعد الصبح تكول اصبحنا واصبح الملك لله وانت تصبح بالمشاكل

جهاد بعصبيه وتوتر ومشاهد قاسيه تنعاد عليه..والله ليوم اطلكها والله اطلكها

دخلت رونق بخووف..شكوو شصاير؟؟؟

جاوبت كواكب...جهاد راح يطلك جنه بس بعدنه مامفتهمين السالفه

جهاد جاوبت بعصبيه...اطلعووا طلعوا بره وهاي طلعوها لا اجرم بيها والله

الاب...يالله كلكم اطلعوا خلي اتفاهم وياه
الكل طلع وامي نزلت جنه وياها واني بودي افترسها احس القهر اضعاف بداخلي كل من احبها وانطيها قلبي تغدرني
كعدت ادخن واني ساكت وهادئ وداخلي بركان يغلي من الغضب

الاب بحنيه..لك بابا جهاد شبيك تخبلت لك شسوت البنيه وهيج تسوي بيها حرام عليك الله مايرضى

بقيت ساكت مجاوبته واني ادخن
بهاللحظه دخل فؤاد مستغرب
فؤاد...شكوو شصاير؟؟
جهاد مسحت وجهي بتوتر..ماكوو شى ممكن تطلعون اريد انام
الاب..مو قبل ماتحجي شنو الي صار
جهاد..يابه عوفني بحالي وجارع مرارتي لوحدي لا والله اشمر روحي من جسر الصرافيه
كام ابويه وطبطب علئ كتفي كال براحتك قبل لا يطلع كتله يابه بلا زحمه عليك ليوم لمذيعه لا تخليها تطلع لا تفضحنه
جاوب بااستغراب منوو المذيعه
جهاد..كواكب القيسي
فؤاد بضحكه عاليه....ههههاي والله احسب ساعتين تلكه واصل الخبر لبيت امجد بس حلوه هاي مال كواكب القيسي..اوف هي وين وسهير القيسي وين هنه ثنينهن اشرد بس الاولى اشررد من جمالها وكواكب تشرد مخترع
ابويه ضل يغلط علينه ثنينه ليش منحترم اخته ورزلنه اني مجاوبته وفؤاد ميت ضحك. تنهدت باااه وحسدت فؤاد وصرت ممنوع حتئ من الضحكه هم كبير نايم علئ صدري عبالك انخلقت بس للقهر وحرك الاعصاب.
طلعوا من يمي واني لسه افور واغليييي لازم اعرف هذا سامر منوو
تذكرت رؤى يا ما ذكرت اسم عامر كدامي وجان هالشي بداية شكي بيها
طفيت الجكاره فتحت باب الغرفه بقوه ونزلت
سمعت صوت نحيبهااا بغرفة امي
فتحت الباب ودخلت شفتها كاعده بالارض ضامه رجليهه لصدرها وتبجي وامي يمهاااا

بس دخلت صارت وره امي
صيحت هسه مراح تكولين سامر هذا منووو
امي قصيره وجنه اطولها منهاا واني اطول منهم اثنينهم كدرت اسحبهاا من شعرها طخت بامي وصارت يمي.
امي لازمه ايدي وتتوسل
قربت وجهه لوجهيي هاااا احجييي ياخاينه كلجن نفس الشي
شكد اكرهج شكد اكره عيونج كووولي كوولي منووو سامرررر.
جنه ... صرخخت بخووف وخنگه سامر جان خطيبي
جهاد .. هااا حلووو جان خطيبج وبعدج تتواصلين ويااا مووو
جنه ... سااامر ميييت ميييت حجيتهاا بقهر ودموعي على خدي شلال واحس راسي يطك من الوجع وشعري بين ايدي.
رخه ايده من شعري وظل يباوعلي متفاجأ
جهاد .. وليش اني مااعرف جنتي مخطووبه.
جنه .. وهسه عرفت يلا عوفني خابر اهلي يجون ياخذوني
كدرت املص شعر راسي منه واكعد جوه بالكاع ابجي بنحييب وقهر
امه ظلت تتوسل بي يطلع
الام .. اطلع ييمه وعوفها تهدأ البنيه منهاره اني افهم منها كل شي واجي اكللك.

جهاد *

طلعت من الغرفه كعدت ع الدرج
واني اسمع صوت نحيبهه

*جنه ...
عمه والله ماادري ماايعرف كل الي ابالي اهلي كايلين اله جنت مخطوبه اني شمعرفني
بالخطوبه لاشفته ولا حاجيته حتى اكوله جنت مخطوبه.
وخطيبي مات بحادث دراجه
اصلا اني تزوجت جهاد مجبوره بس حبيته وجاي اصبر عليه هيج يجازيني والله راسي راح ينفجر حرام يعاملني هيج.
والله صار فتره نسيت سامر رغم تعذبت بموته هوايه اللتهيت ويا جهاد وحبيته بس ماادري شون اجه على بالي البارحه وحلمت بي.
جهاد يعرف اني من احلم احجي والبارحه حلمت بي جاي وانطاني ورده وراح واني كلش تاثرت وانقهرت وظليت اركض وراه وهو مايرجع.
هو حلم وسامر ميت
جهاد متسرع ايده والصواب بسرعه
يكتل بيه اني ضعيفه وهو قوي جاي يستضعفني حرام والله ماجاي اكدر اتحمل.
جهاد *
اسمع كلامها وتندمت صعدت فوك حتى الدوام ضربته
ليش هيج محمد يجبرها تزوجني وضم عليه
خطوبتهه السابقه.
اله اخابره اطيح حظه.
بس فكرة الشغله صارت وراحت وهسه جنه زوجتي وخطيبهه ميت واني غلطت وياهه
خلص المشكله هي اني احلها ومالها داعي تطور وتكبر وماانسى وانكر اني ضميت وضام عليها هواي شغلات

*جنه
بقيت نايمه بغرفة عمتي لااكل ولاشرب يصيحوني مااريد يتوسلون مااقبل حتى ما اطلع.

ليوم ثاني اني على هالحاله هذه متلفلفه وكاعده بالكاع والدمع ميفارگ عيوني.

وانا على هالحال انفتحت الباب وطب جهاد
شفته صديت عنه
اجه كرفص كبالي اريد اكوم من يمه
لزمني من ايدي
نترت بي وخررر عني

جهاد ..
دخلت للغرفه شفتها متلفلفه ونايمه كسرت كلبي تقربت منها مسحت علئ شعرها بحنيه
ميصير هيج حارمه نفسج من الاكل والشرب ومعتكفه هنا.
جنه .. ليش شنو هامك بيه وخررر
جهاد ... خزرته كومي اكلي يلااااا
جنه .. مااريد اكل يجون اهلي ياخذوني يلا
جهاد .. وتعوفيني جنه ؟؟
جنه .. انت وحش
جهاد .. زين خل نتفاهم
جنه .. بحديه ..وصلنا لطريق مسدود وماكو تفاهم بينااا
جهاد .. خلي نفسج بمكاني كل الي مريت بي وتجي مرتي تنطق اسم شخص ثاني وتكوله احبك يعني شنو تتوقعين ردة فعلي
دااحجي وياج باوعيلي
جنه .. شحجي اذيتني وسكتت خدعتني وتعاطفت وياك ضربتني ووكفت لجانبك
جهاد .. لج والله من غيرتي عليج سويت هيج
تقربت منها حضنتها وهي تدفع بيه
وخرر وخرر
سحبتها من ايدها كومي كوميي
جنه .. عوفني راح تكسر ايدي عووفني
جهاد .. يعني ماطلعين موو
جنه .. ماطلع شتريد سوي
جهاد .. هاااا يصير خير جنه
طلعت وطبكت الباب حييييل عود جاي اراضيها ومتنازل عن كبريائي تصدني ولاتعذر.
من طلعت من جنه توسلت بيها بستها ومارضت زعلها كبير حقها ومحد يلومها
تلكتني كواكب...هاا بدت لواكه
باوعتلها بصدمه...انتي شعليج شنوو لواكه مرتي ضربتها وغلطت بحقها وجاي اصحح غلطي انتي شكوو...وبعدين اني وجاري شدخل حماري
كواكب بعصبيه...لا ياحمار ياماتستحي ماعندك تربيه محد رباك حل تستاهل كل ليصير بيك
جاوبتها بقهر...ماتولين مني روحي واصله لخشمي
عفتها ورحت رجعت صاحت عليه..جهاد مرتك طلعت ماخذه ثنين رجوله...عمي والله بخت ناس متخومه وناس محرومه
جااا ياربي مثل ماتوزع ثنين ثنين اشمر النه واحد
درت عليها ابتسمت..كتلها ماتستحين شنو ثنين رجوله انتي امج بيش متنسيه ببيج بمركه خباثه لو ثول وبعدين ربج مايريدج تزوجين خاف تتكاثرين
كواكب بعصبيه...تكاثرت عليك المصايب ان شاءالله يالماتستحي
ضلت تدردم وتغلط عفتها ورحت مالي خلكها بطرانه اني وين وهي وين والله علئ يوم اذبها بمستشفئ العجزة وخلص منها.

جنه *
شفته طلع طلعت بهدوء وراه وتوجهت للاستقبال
شفت عمي.
شافني وكف كال

..... هاا بنيتي عندج شي.
.. عمو محتاجه تليفونك شويه
.. ليش بنتي محتاجه شي كولي بس امري
.. بس اريد اخابر اهلي فدوه عموو
.. اني مو كايلج تحملي لجهاد صدكي يتغير بس يرادله صبر.
... عمو ماظل صبر الله يخليك مايصير ترضوها على بناتكم اني مو تايهه كل مره هيج يتمادى وياي ومحد يصده
.. لا حشاج بنتي تفضلي هذا التليفون كدامج

جنه *
اخذت التليفون تشكرت منه ورحت اركض لغرفة عمتي
رقم محمد موجود بتليفونه لان لم يروح جهاد للبصره اني اتصل من تليفون عمي على محمد احاجي امي
طلعت الرقم ودكيت عليه
جاوبني محمد
بس كال الو نهديت بي
محمد ليش هيج اني اختك هيج سوي بيه
محمد .. شبيج ولج صاير شي
.. صايره اشياء كول شماصاير
.. احجي غير افتهم ؟؟
.. انت ليش ماكلت لجهاد اني جنت مخطوبه
.. وانت اكيد حجيتي كدامه هسه اله تحجين
عرف شسوه
.. شسوه جنزني تجنز سواني جنازه والله حرام عليك تشمرني هالشمره تزوجني لواحد مريض مسويني مكب لخبالاته ويطلع حركة كلبه بيه
.. شجاي تكولين انت
.. هذا العندي تجي عليه لا والله انهزم واجيكم لو اكتل نفسي خلاص تعبتتت مليييت.
... يعني هو ضربج ؟؟
.. اكله سواني جنازه موووتني كله منك محمد مو كتلك مااريد ازووج شون قسمه هي.
... زين ميخالف هاليومين اني يمكم.

سديته منه ورجعت التليفون لعمي.

محمد.
خابرتني جنه وهي متخبله كالت جهاد ضربني واني تخبلت صارلي يومين اتصل بي وهو ماكوو وضارب الدوام خبرت اهلي راح انزل لبغداد اشوف اختي وامي رادت تجي ويايه لكن رفضت كتلها اني راح اجيبها وياي
حضرت نفسي وطلعت ب 6الصبح وصلت ساعه 11 تقريبا اكثر مااعرف وصلت لبيتهم محد جان موجود استقبلتني ام جهاد ودخلت للاستقبال
مرت عده دقايق ودخلت عليه جنه انصدمت بشكلها والتشوه الصاير بيها تخبلت عليها ركضت عليه وحضنتني وهي تتنحب وتشكي من جهاد قبضت على ايدي بقوة من العصبيه الكلب مدمرها دمار
بعدتها عني ومسحت دموعها كتلها روحي جيبي اغراضج ونروح
جاوبت بسرعه محمد لا تعوفني هسه اجي ركضت جاي تطلع وصدمت بجهاد دخل علينه
لزمها جهاد وباوعلي متفاجئ.
..محمد شجابك؟
جاوبت بعصبيه...جاي اخذ اختي الي أمنتهه بيدك والله عمي زين هيج ادمر امانتي هاي مرجلتك تتمرجل على مره

جهاد بحده...احترم نفسك محمد تره انت دايس فراشي وكاعد بيتي

جاوبته بعصبيه...الك عين تحجي ولك شنوو تضربلك بحايط هيج مشوهها شنو القصرت بي اختي حتى هيج تسوي

جاوب بهدوء...سوء تفاهم تنحل ان شاءالله
جاوبته..ههههه سولفها لنفسك مال سوء تفاهم
جاوب...شنوو تريد تاخذها؟؟؟
جاوبته.. اخذها وغصبن عليك
جاوب ...والله ملكي وزوجتي مالك حق تاخذه
ضحكت بااستهزاء..لا ملكك ولا ورث من الخلفوك
تقرب مني بعصبيه...انت زلمه اخذها
هجمت عليه وهو هجم عليه وصارت بوكسات وجنه المسكينه بنصنه تفاكك وتبجي وتتوسل بيه واجت عمته وامه لزمونه
دخل ابوو ولزمه كله بابا خلي ياخذ اخته وبعدها نحلها الله كريم
الاب...روحي عمي جيبي اغراضج وروحي ويه اخوج
راحت تركض ضل شويه وطلع
عرفته لحكها بس ماكدرت اتصرف
بيتهم اله حرمه ميصير تنداس
جنه...صعدت اجيب اغراضي شفته فتح الباب وقفله
خفت ضليت ابجي تقرب مني ومسح دموعي كال هنت عليج تردين ترحين روحي الله وياج بس اتذكري ليوم ذبحتيني واني احبج باسني براسي وطلع
نزلت الجنطه بدون مالتفت اله وطلعت اني ومحمد واني مقهوره ومصدومه وملكومه

طلعت من بيتهم وادري بي طلع وراي يباوعلي
عمي راده يتادب بطلعتي عبالهم ارجع
بس اني تعبت كلش مااتحمل بعد
احس جسمي مكسر وراسي مفلش
كلما اطيب من جروحي يرجع يضربني ويدممني
مليت شهالعيشه
اني اهلي عمرهم ماضربوني يجي هو يضرب وبدون سبب
بس العتب على اهلي الشمروني بعيد عنهم
ومااهتموا بس للمظاهر
شافو ملازم اول واهله شبعانيين عبالهم راح انسعد ويااا
وكفنه بالشارع واجرنه تكسي وصعدت وره ومحمد كدام وطول الطريق اباوع لمحمد واساله اسئله بگلبيي
ليش شمرتني هالشمره
متعاجز من مكاني ؟؟
من لگمة اكلي
من لبسي لو من شنووو ... يااخويه ؟؟
مزوجني لواحد يگبح ويصبح
وشالفايده ولشوكت ابقى هيج اني
يضربني بالليل الصبح يصالحني
جنت معصبه كلش وكارهته لجهاد
قررت بلحظتها ماارجع
واطلب الطلاق موتنييي.
نزلنه من التكسي بالكراج وصعدنه سياره تودي للبصره.
طول الطريق وعيوني دمعه تجر دمعه
وروحي تلوب ماهدأت واثار ضرب جهاد بعدهه توجعني خاصة راسي موتنيي.
وصلنه قبل المغرب للبصره نزلنا بالكراج
اخذنه تكسي،ونزلنه يم البيت
نزلت مفرفحه على امي
دخلت شفتها كاعده يم باب الاستقبال
ومخليه ايدهه على راسها مبينه لايبه روحها عليه
رحتلهه اركض وكعت العبايه والجنطه
هي شافتني مكدرت تكوم
المسافه قريبه بين باب الشارع والاستقبال لان اصلا بيتنه زغير فبسرعه وصلت الها قبل لتكوم
شمرت روحي بحضنها تمنيت ارجع زغيره بلا هموم
الام .. يمه شمسوي بيج كسر بيده ان شاءالله
من كالت امي هيج وجعني كلبي رغم حاقده عليه.
كومتهه ودخلنه جوه جتي عذراء وسلمت عليه تباوعلي بعطف وشفقه حسيت باهانه شكد كرهت روحي.
ليش يربي
دخلت جوه كعدنا بالهول اجه احمد اخوي وظل
يحجي اذبحه واصلخه واله اروحله للمركز اطيح حظه وباسني على راسي.
كتله مايحتاج اني بعد ماارجع اله
محمد .. هذا بيت ابوج وكعدي يولي مدام ماحافظ على امانه الي انطيتهيا يولي لاترجعييين.
جنه .. باوعتله تعبان وهسه جايين مناك وخطيه ماطول واجه عليه ماردت اوجه اله كلمات تضوجه
فسكتت.
امي دخلتني بغرفتهاا نزعت شالي وباوعت للمرايه شصاير بيه مفترس وحش كرهته كرهته.
كعدت ع الجربايه ومخليه ايديه على وجههي
لو هسه متزوجه سامر هم يضربني هيج
سامر حباب ومؤدب ميسويهاا
جهاد عصبي ومتوحش ميرحم احد
حتى اهله يخافون منه اني شون راح اـعيش ويااا
تمددت ع الجربايه وغفيت
جان وكت مغرب والدنيا بدت تبررد شويه.
تغطيت فكرت بي من باسني وطلع وبعيونه نظرات ندم
هم يشفيني ندمه لا والله مايشفيني.
نمت وماادري شكد نمت
فزيت على صوت امي
تكولي علا على التليفون تريد تحاجيج
اشرتلهه بيدي مااريد
ورجعت تغطيت ونمت نومه عدله للفجر
كعدت الفجر اتوضيت وصليت صلاة الفجر.
واني كاعده اسوي التسبيح
اجه على بالي جهاد هسه اجه للبصره لو لا ؟؟
ماادري ليش بس افكر بي مليت من التفكير
‏بي كل مره ياذيني واني گلب سمجه وماكو على بالي غيره.
طلعت من الغرفه رحت للمطبخ امي جاي اسوي جاي وريوك
شافتني كالت
هاا يمه كعدتي يانظر عيني سوده عليه من امس ماماكله شي تعاي اكلي ويا محمد يريد يروح للدوام

هزيت راسي بكلبي كلت اوي خطيه البارحه جنه ابغداد واجه تعبان واليوم راح يداوم بس لا هم يتعارك ويا جهاد وذاك مخبل ويضربه شون مصيبه هي.

الام ... هااا يمه شبيج صاافنه ؟؟
... ماكو شي يمه
كعدت بالارض امي مخليه صينيه وبيها كوابه اثنين وبيهن شكر
وطاوه بيهاا بيض عيون
تالي جابت كوب وخلته وياهن وجابت القوري وصبت جااي اباوعله شون تصبه حار وعرك الكوب
وريحة الهيل البي فحت ودخلت بانفاسي
انفتحت نفسيتي جيت اطيح من الجوع ماماكله من يومين وحتى لعبان نفس صار عندي
راحت امي صاحت لمحمد
واجت وراها دخل هو بملابس الدوام يكول متاخر كلش
كعد يمي ظل يضرب على كتفي هاا شونها حكاكة الجدر اليوم
باوعتله ابتسمت زينه
هو يسميني حكاكة الجدر بمعنى اخر العنقود اصغر الاولاد
من زغيره هيج يسميني.
باوعلي ودنك اللتمست بنظراته الندم وميكدر يباوع لجروح وجهي.
تريكنا وكام محمد غسل ودخل الغرفته وطلع
وكف يم باب الاستقبال يلبس حذائه
وكفت يمه كتله
محمد خاف يداوم جهاد اليوم فدوه لاتحتك بي وتجنبه لاتتعارك وياااا عفيه.
محمد ... الله كريم خيتي انت ارتاحي الج الصافي خوش لاتفكرين هسه تاخرت خلي اروح ديري بالج على نفسج.
هو راح طلعت وراه وكفت بالطارمه بلا حجاب
فرجت ايديه اتنفس مرتاحه شكد جنت مخنوگه هناك.
دخلت يم امي غسلت المواعين وهي دخلت للحمام
وطلعت بيدهه سلة االملابس تريد تنشرهن فوك السطح.
كتلهه اني اصعد اشرهم
خاف مابيج يمه جايه تعبانه الطريق بعيد
كتلهه ماعليه شي يمه
اخذت سلة الملابس وصعت فوك وهم تنفست اريد اسوي كل ممنوع فرضه عليه جهاد عباله
الكل مثل مرته السافله.
شريت الملابس ونزلت
رجعت السله بالحمام ورحت وره امي
كالت هسه راح تجي مها اشوفج
كتله خوش
سويت كم شغله وعذراء وابنها بعدهم نايمين
دخلت للغرفه الساعه 9 تمددت ع الجربايه
ونمت ماادري بروحي شوكت نمت
حسيت بمها يمي تبوس بيه.
كمت اخذتها بأحضاني
ومثل كل الي يشوفوني يباوعون لوجهي كالت مستغربه
هي شصاير بيييج شمسويلج الله يكسر ايده
الله لاينطي ..
ظلت تدعي عليه ماانطاني گلبي
گتلها مها الله موجود ياخذ حقي لاتدعين الدعوه ترجع على صاحبهاا.
مها .. ترجع على صاحبها لو ماترضيين عليه.
جنه .. المهم تره نفسيتي متأذايه عندج شي بي حظ احجي ماعندج اسكتي وخليني اكمل نومتييي.
مها .. يابعد عمري ولج والله انقهرت عليج من شفتج هيجي ولج لو يصير ذهب لاترجعيله ابقي هنا بيت ابوج ومعززه مكرمه هي كلها من محمد شمرج هناك.
جنه ... الله كريم شسوي يعني.

بقت مها ع الغدا تغدينه وبعد الغدا مددت وهم نمت انتبهوا عليه هواي انام
كتلهم تعبانه منايمه هناك والطريق وراسي يوجعني.
والعصر راحت مها وهي توصيني مااتواصل ويا جهاد ولا احجي ويا كلش.

قبل المغرب وصلت علا.
جان موقف علا مغاير جدا لموقف مها
اصلا هنه اثنينهم ميتشابهون لا بالشكل ولا بالشخصيه
علا تهتم لكلام الناس هوايه لذلك من جتي وشافتني بهالحاله.
علا .. يابعد عمري انت اكبر غلط عفتي بيتج وجيتي المفروض تبقين هناك جيتج مابيها اصلاح.
جنه ..شتحجين انت ماتشوفين وجهي شصاير بي تردين ابقى مكفخه اله هااااا ؟؟
علا .. لا مو هيج بس تره صدكيني يتغير ولج احنا شگد تحملنه وخاصة اني تذكرين شكد جان يضربني حتى عمتي هم تضربني وتطردني بالشارع وصبرت وصبرت حتى الناس لاتحجي عليه وصبرت الخاطر جهالي وهسه الله عوضني والحمدلله عزلني بيت وحدي وصار مثل المحبس بيدي.
جنه .. اني مو مثلج ولا راح اصير مثلج علا انت تهتمين الكلام الناس اني عندي طززز وبالنسبه للاطفال الحمدلله ماعندي اطفال اصبر الخاطرهم.

علا .. ولج جنووو الناس تحجي عليج واولهم بيت ام سامر
جنه .. اووو ماراح نخلص احنه شوفي كلامي اوجهه الج مثل ما وجهته لاختج عندج شي بي خير تكولينه كولي كلي اذان صاغيه ماعندج عوفوني بحالي تعبت هي فوووك ضيمكم بعد.
علا .. اريد مصلحتج ياعيني.
جنه .. كافي علا فدوه تعبانه من هالسيره اني اريد ارتاح.

*جهاد

حاولت امنعها تروح لكن هي اصرت حمامتي البيضه عافتني وراحت بدون ماتلتفت حقها ومحد يلومها اني قسيت وياها وقسيت بقوه جن جنوني من لهجت بااسم غيري تمددت علئ السرير واخذت باكيت الجكاير وادخن تذكرتها وتذكرت طفولتها وجمالها وبرائتها وتصرفاتها العفويه قبل يومين كانت ويايه وعلئ فراشي حاس بقهر حاس بغربه وضياع ومتشتت
وقفت مقابيل المرايه واني اشوف ملامحي التعبانه بنفس هذا المكان كان الي موقف ويه رؤئ استرجعته وتذكرته
جهاد بعصبيه...ماكوو دخان بدون نار ومحد يتهم احد باطل ليش الكل يشكي منج ليييييش؟؟
رؤى بعصبيه...جاي تحاسبني لك جهاد انت متعرف هذن الحيايه شلون يكرهني اي طبعا يتهمني باطل غيرانات مني ومن جمالي يلبسن عدسات يردن يصيرن بجمال عيوني ومجاي وياهن.
جاوبتها من بين اسناني...ليش انتي بالذات؟؟ ليش مصارت تهمه على نسوان اخويه ليش بس اني مرتي اثاروا الشكوك عليها
رؤى بعصبيه...شنوو قصدك جهاد قصدك اني مو شريفه؟؟؟
جهاد بهدوء...ماكلت مو شريفه؟؟انتي عرضي مستحيل اقبل احد يتهمج باطل...ونطيني موبايلج بسرعه
جاوبت وهي متفاجئه وعصبيه تشك بيه وتفتش موبايلي هاااك شمرت لموبايل بقوووة انضرب بالحايط تحت صدمتي من صلافتها وعدم خوفها وجرائتها
لزمتها بقووة من ايدها صرخت بوجع جهاد حتكسر ايدي !!!
جهاد بعصبيه...ليش فلشتي الموبايل؟؟؟
بجت وحضنتني...جهاد احبك مااريدك تشك بيه كسرت الموبايل لان انقهرت من شكك بيه جهاد احبك
ضلت حاضنتني هدأت شويه...همست بدون ادراك عامر احضني..غلطت بااسمي وهلوست بعامر
عضيت شفتي بقهر وادركت كل الشكوك حقيقه
ابعدت ذكراها من مخيلتي وراحت ذاكرتي عند طفلتي المسكينه الي انضربت بدون سبب وتعاقبت علئ ذنب مو ذنبها
جنه محتاجها وكفت وياي وساندتني ماجازيتها اتمنئ اروح احضنها وابوسها واعتذر منها وماارجع اله وهي راضيه لكن حزنها اعمق من ان اعالجها بتودد الها
اريد اكلها اسف على نفسيتي المتقلبه وعلئ غضبي المفاجئ واسف لكلبج لمسكين ليعاني من مزاجيتي بدون ذنب اسف لحضج العاثر الي انطاج شخص سيئ مثلي.
تذكرت من تدخل وتشوفني صافن وسارح بلي في بالي من ظيم وهم الدنيا تسوي حركات حتى تطلعني من الجو الي اني بي.
قبل كم يوم جانت هي جوه واني بالغرفه
صافن وسارح بهواي شغلات مااعرف شوكت تنحل.
حسيت بشي بااارد دخل بظهري اللتفت شفتها وراي وانه لازم ظهري اتلمس شنو اكو
انت شوكت دخلتي وشنو هذا
عرفت مخليه قطعة ثلج بظهري
ولج جنووو تحبين تنكتلين
جنه .. لاا عفيه دااشاقه ويااك
ركضت وراها لزمتها بسرعه وربطتها بجسمي
هااا شبيك اصلا هالكد ماجسمك حار بسرعه ذاب الثلج
... شنو هالحركات هي انت ماتكبرين
... دالعب وياك شبيك
... اني جاهل تلعبين وياي شوفيلج جاهله مثلج تلعب وياج
ملصت ايدهه وخلت اصبعها على شفتي كالت
.. ماكو بس انت موجود صح شايب بس ينلعب وياك.
... تعاااي اشوفج الشايب شلون يلعب
واخذتها على السرير .......

اووف صحيت من ذاكرتي وقلبي يمها هسه شدسوي كدماتها وجروحها الي صنعتهم ايديه طابت لو بعدها

نزلت جوة جاي اطلع دخلت زوجه اخويه امجد هي واطفالها
كالت..هلا جهاد شلونك
جهاد ..شلت ابن اخويه واني ابوسه ...زين الحمدلله انتم شلونكم
كالت الحمدلله جهاد زعلت عليك
استغربت جاوبتها..ليش؟؟
جاوبت بااسف...ليش مزعل جنه وضاربها والله جنه ماتستاهل حبابه ومؤدبه وتحبك...
جاوبتها بقهر...الله كريم ان شاءالله تنحل
جاوبت...شتنحل اذا انت تريد تطلكها الله عليك لا طلكها خطيه.
جاوبتها بااستغراب...اطلكها منوو كلج؟؟
شفت زوجة اخويه شتت نضرها وعبالك دتباوع وراي.

درت وجهي وشفت كواكب تاشر الها علئ غرفه رونق..عرفتها تريدها تكولها كليله رونق
تنهدت بملل وعضيت شفتي ..منوو كلج؟؟
سكتت
نزلت الطفل من ايدي
جاوبت كواكب هاي رونق ماتستحي بس مال قال وقيل نسوان شكد يحبن الفتنه لايحللن .ولايحرمن يموتن علئ الكرشه
ضحكت بااستهزاء...غريبه منين تعلمت الفتنه؟؟
جاوبت..هي من اجت من اهلها فتانه
جهاد بهدوء...لا من اجتنه صارت فتانه صدوك لو كالو من رافق القوم اربعين يوم صار مثلهم
كواكب..شنوو قصدك ولك؟؟
ماجاوبتها جاي اطلع سمعت صوتها....اكلك صدك جهاد شوكت تطلك جنه جااا انت مو حلفت
درت وجهي عليها رفعت حاجبي..ومنو كال اني اطلك جنوو لا عمتوو غلطانه اني مكايل بس الضاهر انتي الزهايمر صاعد عندج كمتي تخبطين
كواكب بعصبيه...اني ام الزهايمر يالخبل
جهاد..خاب طيري اني هم زوج احجي وياج
زوجة امجد...خاله علئ كيفج
كواكب بعصبيه...وخلخلاله تخلل عضامج ام المشاكل بعدها ماجايه فتنت الجهاد المسودن
عفتها ورحت كواكب تحب المداهر وحتئ لو غلطانه متعترف بغلطها الخبله تريد اطلك جنوو اطلك الدنيا ومااطلكها.
يوم ثاني قررت اللتحق للبصره وابالي اروح لجنتي اصالحهااا وارجعهااا وياي.

*جنه
علا رجعت لبيتها بعد ما صدعت راسي تصدع واني قافله كلش.
دخلت للغرفه تمددت ع الفراش احس بدوخه ولعبان نفس
ونعسانه كلش ابدي بس انام
دخلت عليه امي جابت الي التليفون
هاج يمه هي حماتج تريد تحاجيج
اشرتلهه منو منهم
كالت العروسه
عرفت ضمياء بس مالي خلك احجي وي احد منهم واسمع تبريراتهم بس فشله اني حتى ماباركتلها بسرعه صارت السالفه واجيت لاهلي.
اخذت التليفون من امي تنفست بملل
وكلت الوو
ضمياء ... الوو شلونج حبيبيتي
.. على الله عايشين بخير انت شلونج ؟؟؟
.. حمدلله هي شنو الي سمعته ؟؟
.. اي صدك مبروك عذريني حتى مااتصلت وخابرت اتبارك الج تعرفين ماعندي تليفون.
.. لا يمعوده معذوره بس لتتهربين من السؤال هي ليش هيجي عفتي البيت.
.. والله صراحه اي اتهرب مالي خالك هذا الموضوع
.. جنه جهاد يحبج بس عذري الي صارله مو شويه هو طيب القلب بس عصبيته وشكه مخربته صدكيني هو مجان هيج قبل بس رؤى الله لايوفقها دمرته واجه الوقت الي انت تبينين بي طيب اصلج وتوكفين ويا وتخلينه يستعيد حياته ونفسيته.
... انت منو كلج ماحاولت
اني حاولت بكل الطرق والوسائل ولج وهم يرجع يضربني اخر مره جيت اموت بيده يطبني طووب خلي امووت بس امي تروح بيهاا بعد مااتحمله اخوج وحش عباله رجوله يضربني وياريت ع شي يسوه نوب يساويني بمرته الخاينه ولج مخبل مخبل يكولي بعدج تتواصلين ويا شون اتواصل ويا واني تليفون معندي ولج حتى المسدس خلاه براسي بعد ماتحمله اخاف منه ماارجع.
ختمتها وياها وراحت
وتكررت المكالمات حوراء خابرتني ورونق وورود مرت امجد وبعد عمتي وعمي كلهم خابروا على تليفون امي بس اني موقفي بعده مااريد ارجع اله.
بعد مرور كم يوم كاعده بالغرفه استوه كاعده لان كلش منعسه وكله نايمه
دخل اخويه احمد كال جهاد يريدج !!!

*جهاد
كعدت الصبح باوعت للسرير اووف تنهدت والله ماينام عليه وجنه مو يمي.
تسللت من السرير بملل
كالعاده الارق والتفكير ماخذ جزء كبير من ليالييي
انام قليل وهسه جنه ماكو بعد اكثر زاد الارق عليه.
جنطتي محضرها من الليل
نزلت جوه امي بالمطبخ رحت الهاا
تتريك .. لا مااشتهي
تروح لجنه موو ؟
اي يمه اروح ان شاءالله.
بوستها من راسها ودعتها وطلعت
وصلت للبصره
من داومت بالمركز
محمد بيني وبينه نظرات وهو بس يشوفني عاكد حواجبه
مرت كم يوم على هالحال
قررت اخلي يبرد شويه واحاجي
لازم اصير ريلكس حتى اخذ مرتي
كلشي بالصيحه والعيطه ميجيب نتيجه
هم غلطوا واني غلطت ولازم نصحح غلطنه
بالتفاهم.
ومرت كم يوم
دخلت المركز شفت محمد واكف يم شرطي
فتت من يمهم سلمت عليهم
ردوا السلام بس محمد وجهه ثگيل ومتنك من وره خشمه يرد
گتله تعال ابو يوسف عندي حجي وياك بالمكتب
بدون ميحجي
دخلنه وسديت الباب.
.. بدون مقدمات محمد اريد مرتي اريد اجي اخذها
.. ماعندك يمنه مره
.. نرفزني جيت اعصب عليه بس لزمت اعصابي وخليت ايدي على راسي
كتله محمد انتم غلطتوا من ضميتو عليه واني هم غلطت بهذا تصرفي ومرتي اريدهااا
وعد هي اخر مره وماتتكرر
كلمه مني كلمه منه
بالاخير كال اخذ رايها بالاول

كتله لا اني اروح لبيتكم هسه واخذ رأيها بنفسي

طلعت من المكتب ورحت لسيارتي
حركتها ورحت لبيتهم دكيت الباب واني مشتاق الها اريد اشوفها تعبت من البعد عنها هي كم يوم عبالك دهر.
دقايق وطلعلي اخوها احمد سلمت عليه
ظل يهاتبني ليش هيج مسوي باختي
كتله اني تفاهمت ويا محمد ومالها داعي بعد تحجي واحنه اثنينه غلطنه.
دخلت جوه بالاستقبال كال هسه اصيحلهااا.

*جنه
تفاجئت بجيته اله عين يجي ومكيف عباله راح ارجعله
كلت لاحمد مااطلعله خلي يروح كارهته كارهته
طلع احمد من الغرفه
بس لحظه تراجعت عن قراري ورحت وراه اركض شفته يريد يطب للاستقبال صحتله
احممد تعال اني رايحتله.
كال خوش خبلتيني كيفج
اكو مرايه جانت يم الاستقبال باوعت لنفسي بيها جنت لابسه دشداشه سمائيه كودري
ربع ردن مخصره ومن جوه كلوش
شعري رافعته ونازل خصلات منه.
تأملت الكدمات الي على وجهي لازم تخليني اصر مااسامحه.
دخلت بعد مابقيت لحظات اباوع لاثار ضربه
شفته كاعد يباوع لساعته
وعطره ترس انفاسي بس دخلت.
حسيت مشتاقتله بس لازم مااضعف واصير قويه.
من شافني وكف واجه باتجاهي كتله
هاا شكو شجابك
وكف بمكانه كال هي هذه طريقه تستقبلين بيهاا رجلج.
جنه...ههه ليش نسيت زوجي شلون استقبلني
جهاد..تردين تاخذين ذنبي واني اخذ اجرج
جنه..لا خليني مضلومه احسن وخير محتاج شئ خدمه امر.
جهاد بهيام مستفز...اي محتاجج
جنه بعصبيه...جهاد لا تقشمرني بكلمتين محتاجج واحبج تره اني سديت الطريق بينه ومستحيل ينفتح
جهاد بهدوء...عاادي اني افتحه بس تدرين شكلج من عصبيه احبه
جنه..وانت شكلك من عصبي اكرها.
جهاد.
تقربت منها احاول احضنها واراضيها ابتعدت خطوات سريعه ورفعت اصبعها بتهديد لا تحاول مفهوم لا عبالك تضحك عليه بضمه وبوسه
يمكن تروح اثار وجهي لكن الاثر البكلبي ميروح ماانسئ شلون سبيتني وخزيتني كدام اهلك وكدام ليسوه ولمايسوه وطلعتني خاينه اني مو مكب لخبالاتك روح طلعها بغيييري.

جهاد عضيت شفتي وحطيت ايدي على خصرها...خبالاتي يعني اني مخبل جنوو؟؟
بعدت اديه بملل...اي مخبل وشايب وكلهن بيك وكتلك لتحاول ترة متأثر بيه
جهاد بهيام...بس اني مصر ااثر بيج وبعدين شنوو شايب اصلا بعدني كتكوت
جنه ...يااا منيلك انت كتكوت انت وحش انت مجرم انت رهابي بس كتكوت بعيده عليك
حاولت اقبلها دفعتني...اهوو كتلك مااريدك والله ويالله حضر ورقة الطلاق
جهاد .رفعت حاجبي .. يعني ؟؟
جنه ..باصرار . يعني طلگنييي
جهاد ... هه تحلمين والله مااطلگ.
فتحت الباب باوعتلها بخزر وطلعت.
جنه .. ماتصيرلك چاره راح تبقى هييج ولو ادري تتغير جا رجعتلك.

جهاد *

طلعت واني ‏قلبي مُستاء و بائس و متحطم
و حزين جدًا ‏و مازلتُ تحت تأثير نظراتِها الأخيرة.!
والكدمات الي سببتها الها بوجهه باقي اثرها بس ديروح شويه منطيهه جاذبيه اكثر
صدمتني ردة فعلها وقهرتني
اني اعرف اذيتها
وهي تعرف بضروفي والي جاي اعاني منه
توقعت راح تعذرني هالمره
بس خذلتني ...

*جنه
طليت عليه من الشباك وهو يطلع يمشي وساد قبضة ايده مبين غضباان كلش
ماعرف الاحساس الي اجاني بلحظتها شنو بين انقهرت عليه وبين اكول يستاهل ليش يأذيني
هو هم خدعني وضم عليه
عصبيته راح تنهي بيوم من الايام راح دمره.
حرت بين اريده ومااريده
طلعت من الاستقبال شبه منهاره شفت امي واحمد گبالي
سالوني وينه كتلهم راح صديته.
وركض دخلت للغرفه
كعدت ع الجربايه ابجييي بحرگه
اجت امي
شبيج يمه ليش تبجين بعد مو راح اذا تردينه جان رحتي ويااا
.. يمه اخاف منه اخاااف خايفه لااموت بين ايديه.
.. انت ارتاحي تعبانه وربج يحلهه لاتفكرين ومايصير غير الي تريدي وعد مني بعد مااخلي احد يجبرج على شي.

هزيت راسي وتمددت وتغطيت.

مرت ايام واني تعبانه خواتي يتصلن مااجاوبهن
علا تكولي رجعي ومها تكولي لاترجعين
احس اذا اسمع حجيهن اتخبل لان وحده جر طول وحده جر عرض
عمتي ورونق وضمياء هم اتصلوا وكالوا ليش مارجعتي مو اجاج يريد يرجعج
سكتت شجاوبهن كتلهن تعبانه
انوب حتى كواكب حجت وياي
مره تكلي يكول يريد يطلكج مره تكول يريد يرجعج
خلتني اتمنى اصرخ.
ولهسه ماريده يطلكني وماريد ارجع ماادري شنو بيه
فد يوم كعدت الصبح دايخه ولعبانه نفسي دخلت الحمام مااتحملت كلش صرت اتقيئ كلش تعذبت احس روحي دتطلع

غسلت وجهي وطلعت دايخه ومالي خلك الدنيا
صارت گبالي عذراء وبطنها الحلگهه تتلوه
كالت لحكولي وين خالتي راح اجييب
اني مدري شصارلي بلحظتها
شوفتها هيج والبيه اني احس راح اوكع.
اني خفت حتى اتقرب الهاا وكفت بمكاني اصيح لأمي
اجتي امي الهاا وهي لازمه الدرج وتلوب
الام .. يايمه ليش هيجي تتوازين كلش غير تكولين من الاول.
هي تلوب وتكوول خابرو محمد يجي خابروو عفيه.
الام .. مو على ما يجي انت جايبه
جنه .. يمه بدل لاتحجين روحي اخذيهه للمستشفى راح تجيب هناا.
كالت روحي جيبي عبايتهاا
رحت للغرفه ويوسف يبجي واني كل حيل مابيه مدري اسكته مدري ادور عبايتها
فتحت الكنتور وطلعت العبايه
ورحت لسرير يوسف طلعته واخذته
رحت شفت عذراء مابيهه شي كاعده
كالت جيبي تليفوني اخابر محمد
رجعت للغرفه جبت تليفونها وانطيته الهاا خابرت محمد كلتله عندي اوجاع تعال
ورجعت للغرفه كالت راح احضر الجنطه.
رحنه اني وامي للمطبخ
الام.. يمه هبطتنا عبالي راح تجيب
وره شويه رجعتنه عذراء لازمه بطنهااا جنهه طوبه جنه ... وعاااا وعااااا
يبووو لعبت نفسي والله راح اذب شهالقرف
عذراء. .. ولج شبيج الله يخلي البيه بيج ويجيج طلووك حار من تجيبين يموتج تمووت.
الام .. لا يمه انت جاي جيبين ليش دعيين عليها
جنه .. ماجيب انه ان شاءالله مااريد على هالظيم
عذراء ... عاااا اخخخ يمه تجيبين وغصبااا عليج
جنه .. مااجيب شنو هو غصب مااجيب
الام .. تسودنوا تخبلوا
اييي شبيكم.
ظلت عذراء هيج تتلوه
لحد مااجه محمد
طلعوا امي وعذراء وهو طلعت وراهم شايله يوسف واسكت بي
جنت لابسه دشداشه نص ردان ومخليه شال على راسي وطالع منه شعريي.
ولازمه يوسف واسكت بي.
وجان يصير گبالي جهاد يباوعلي بنظرات ثاقبه وحاده احس تخترقني احتاريت شسوه
وهو على ماافوتوا عذراء للسياره محمد وامي هو كاصني كص بنظراته واني هم تعمدت اوكف هيج مقابيله وادري ميقبل اطلع هيج يم باب البيت بس حتى اغيضه.

*جهاد
جنت بالمركز واريد اطلع خلص دوامي
وجان اشوف محمد يطلب اجازه من االضابط
عرفت مرته عدها ولاده
كتله محمد اني اخذك بطريقي.
اخذته ورحت للبيتهم
طلعت مرته وامه ووراهم طلعت جنوو
اني تمنيت اشوفهم بروحتي هي واجتني للحلك
واكفه بباب البيت شعرها طالع وايديهه وتباوعلي وتسكت بابن محمد.
رحت اقتربت منها بينما يفوتون للسياره
كتلهاا دخلي وين واكفه بنص الشارع وين عايشين احنه ببارييس.
جنه .. وانت شدخلك بيه بعد اني مااخصك ولااعنييك ويله حبيبي يوسف خلي نروح نودع ماما

اريد اطلع لزمني من ايدي قوي كال دخلي لااسحلج سحل هسه هناا
.. ايباااه بصفتك شنوو بالله ؟؟؟
.. رجلج وغصبااا عليج
.. روح سولفهااا للدبه
.. اشو وجهج اصفر وتعبانه هيج مأثر بيج فراگي
.. لا عيني اصلا هي اثار اذيتك اليه من جيت اني هيج.
صاح عليه محمد
يلا جهاد خلصنا
خزرني فوووتي يله
باوعتله بدلع
اخذت يوسف ودخلنه

ظليت اضحك على الموقف ياالله شون حلو
لا مو حلوو اصلا يخرع اللهم اجعله في عيني قرد.

بقيت اني ويوسف صدعني بس يبجي يريد امه
كتله امك هسه تجي وجايبتلك اخت عنونه تلعب وياها
وهم يبجي
ماكو مايفيد مامتعلم عليه بس يبجي ويبجي ويبجي صدعني يااابه درووح الي خلكك
اني اريد واحد يسكتني ويلعبني.
ظل يبجي حد مانام.
وبعد ساعات يله اجوي
عذراء جابت بنيه
سمتها مريم ظليت اباوع الهاا تمنيت اصير ام
بس على ياظيم.
بقينه نداريهاا
اني بهالايام حالتي كلش زادت مااشتهي الاكل واي شي يدخل معدتي اذبه ونفسي تلعب كارهه كل شي.
لحد ماانتبهت عليه امي واخذتني للدكتوره وطلبت مني تحليل حمل وطلعت حامل.

* جهاد

اجيت من الدوام تعبان سلمت علئ اهلي وبدون اي نقاش صعدت لغرفتي فتحتها دخلت نزعت ملابسي وسبحت طلعت نشفت شعري ونمت واني افكري بجنه وعنادها مشتاق الها مشتاق لدلعها ودلالها لكن هي رافضة وبقوة وطالبه لطلاق هههه لو تنط وتحط مااطلكها
نمت من تعب الدوام وطريق البصرة مرت ساعات واني نايم ومحد كعدني مااحب اكعد اله لوحدي واهلي يعرفون هذا الشئ لهذا السبب محد يصعد يكعدني
الام...جهاد يمه رحت لمرتك
جاوبتها بهدوء واني اشرب المي اي رحت ومقبلت ترجع معانده
الام..لا يمه شنوو تطلك اذا تريد اني اروح وياك وارجعها
جهاد..لايمه ماكوو داعي اني احاول اقنعها
كواكب...جهاد خاف ماتلوكت هواي لو متلوك عدل جان رجعت
جهاد بعصبيه...اكلج انتي ليش ماتسكتين لايجيج لكلاص طاير
كواكب...جااا اني مجذبه شوو انت تضربها وتكعد تتلوك عبالك ماادري ومااشوف من تضل تتوسل وتبوس
وجنه انه احبج وجنه اموت عليج وهو شابعه كتل والله فلك
هسه يرجعها وتبدي قله الادب والمحاضن والمباوس ياخذله يومين وتكب لعيطه وتعاي يكواكب فاككيهم
جهاد بعصبيه...انتي شلج شغل اتلوك ابوس احضن اضرب شنوو لغاثج اني والسيطرة شدخل القندرة
كواكب بعصبيه...لا ياكلب ياماتستحي اني قندرة اني الك جهاد اذا ماتخلي ابوك يطيح حضك فوك ماهو طايح
جهاد بعدم اهتمام...دطيري
كواكب بعصبيه...طارت روحك ولا طابت جروحك ياجهيد يالنذل
جهاد..اهووو شلون مانتسمم
كواكب..تسمم تسمم شفتي ام امجد شفتي شلون عنده قلة ادب
ام امجد...اي مايستحي بس انتي ماقصرتي تكولين يتلوك عيب هاي الكلمه
كواكب...جااا اني مجذبه والله من سولفت لجيرانه كالت هسه ترجعله مدام يحضن يبوس
كتلها اي يتلوك
جهاد بعصبيه...لا اله الا الله كواكب توخرين من وجهي لا اجرم بيج
راحت وهي تدردم اني قندره جهاد والله اله اطيح حضك واكل لاابوك المخبل المسودن اني الك
اجه فؤاد كعد كال شبيها كواكب القيسي
جاوبته صاعد الزهايمر
فؤاد...هههههه والله جاي اتخيل شكل عمتي كواكب مذيعه لابسه تنورة عريضه وقميص مخطط عريض وطويل واصل للركبه ولابسه ربطه والشحاطه لديدي القديمه وتذيع اخبار
جهاد...هههههه لك كواكب مو مذيعه كواكب مراسلة كل شويه تلكاها بمكان من بيت ام عباس لبيت ام سامي لبيت ابو كريم ترسل وتستلم
فؤاد...ههههههه اسكت اجه ابوي لا يزعل علينه
جهاد...هههههه سكتنه
اجه ابويه كعد ضل يسولف مواضيع عاديه وسأل عله جنه وجاوبته بجاوبها ورجعت لغرفتي تعبان مشتاق ومحتار مااعرف شسوي ولا املك الوسيله حتى ارجعها بس اني وراها وراها لازم ترجع.
عفتهم وصعدت فوك.
اذكرت موقف كنت باالاستقبال اني وعامر اندخن اركيله ونسولف دخلت رؤى وكانت بقمة جمالها لابسه نفنوف مخصر وشال وحاطه مكياج وشايله صينية الجاي
ابتسمت وحطت الصينيه على الطاوله ونحنت شويه حطت تلجاي مقابيلي ورجعت حطت الجاي مقابيل عامر
بادلته النضرات وهو بادلها بس بدون ميحسسني
من انطته الجاي حسيت بي لمس طرف اصبعها
وهي ابتسمت...
حاجيتها كتلها رؤئ رجعي لاستكان للصينيه واطلعي بره وهاي اخر مرة تجين تضيفين واحد مفهوم
توترت وكالت جهاد صاير شئ اني غلطت بشي
جهاد بهدوء..اطلعي
طلعت تحت خوفها وخوف عامر
عامر بلع ريقه...جهاد خير اكوو شئ
جاوبته..ماكوو شئ بس الشيطان شاطر وممات
جاوب..شنو قصدك اني حاط عيني علئ مرتك
جاوبته..ماعاش ليحط عينه على عرضي بس اني مااحب تطلع كدام اي شخص
نزل راسه وسكت
استفاقيت من ذاكرتي ومراره احس بداخلي خيانه عضمئ من ابن عمي الي بمثابة اخويه ومن زوجه جانت كل حياتي..طردتهم من مخيلتي ورحت بذاكرتي عند جنتي اااه راسها والف سيف ومترجع
وبعد مرور كم دقيقه اجاني اتصال من اخت جنه الكبيره علا جاوبت عليه
هلا جهاد شونك
اهلا وسهلا ام رضا انت شلونج
الحمدلله بس والله ياجهاد ميصير هيجي
يعني زوجتك حامل وانت لاتسأل عنها ولا تحاول حتى ترجعها

*جنه
كاعدين اني وامي بالمجمع الطبي وننتظر
يطلع تحليل الحمل
متوتره وخايفه
واطكك باصابعي
اسمع صوت المحلله
جنه فاضل
ندستني امي كومي كومي طلع تحليلج
ظليت اباوع منا ومنا
تيهت مكان غرفة التحليل.
هالكد ماتوترت
اتجهت لليمين ودخلت
كالت باسم منو
جنه فاضل
باوعت بوجها وكانها فهمت سؤالي دون ان انطقه
كالت مبروك حامل
مشاعري صعبه اوصفها
ماكو انثى ماتتمنى تكون ام
لكن بضروفي صعبه
فرحت وضجت
فرحت لان ومن زغيره جنت اللعب بلعابتي الكطونيه المصنوعه من القطن والقماش ابدللهه وامشط شعرها الاصفر المصنوع من خيوط الحياكه
جنت اتمنى اكبر بسرعه واتزوج واصير ام
كبرت وانخطبت السامر
جنت اتمنى نتزوج ويصير عدنا طفل واثنين و3
لكن القدر حرمني منه
تزوجت جهاد وهسه الطفل هذا ابنه
طلعنه من المجمع واني امشي بس افكر وعبالك روحي مو هنا
بس جسد يمشي
افكر بالطفل الي راح اجيبه
وتذكرت الحلم
الي شفت بي سامر واطاني ورده
تمنيت هذا المولود بنت
واسميها ورده
تمنيت ميجيني ولد
ولد ومثل جهاد ماايراد يمه هيج عصبي ومؤذي مااريده.
ومااريد جهاد يعرف اني حامل
ع الاقل هالوكت مااريد ارجع اله
وصلنه للشارع وجاي ننتظر تكسي.
كتلهه يمه مااريد جهاد يعرف اني حامل
.. استهدي بالرحمن يمه موزين تضمين عليه وجم دوب اول وتالي يعرف خو ماضمين عليه طول العمر.
..اي اعرف بس ع الاقل هالفتره لان تعبانه
واريد ابتعد عنه.
وكف النه تكسي وصعدنه وره اني وامي
بقيت افكر وافكر
ياربي شون اذا نجبرت ارجع لجهاد وهو مخبل خاف نوب يضربني ويوكع ابني
لو يضربني بعد مااولد خاف هم يكتله ويايه
ياربي ليش مالي حق افرح بامومتي الاولى ؟؟
وصلنه للبيت نزلنه

تلگتنه عذراء هاا حاامل موو
مجاوبتهه
كلتلهه امي ايي حامل
عذراء .. ياارب كون اشوفج طلگين واضحك علييج
جنه .. تعاااي انت هيييه كولي لمحمد مو يكول لجهاد تره والله افررر وماتلكوني وين بعد
الام .. يمه اسم الله
عذراء .. اي ومحمد ماعنده شغل وعمل يروح يكول لجهاد افندي جنه خانم حامل.
جنه .. اي مو ادري بي اخوي مثل البزون الي ماعنده شغل وعمل يخرمش بالشبه
نسيتي من زوجني اله
شيسموها هي يسموها ماعنده شغل ولا عمل صايرلي خطاب.
الام ..وهي تاشر على جنه وعذراء حامل ونفسه وفكن حلكهن شيسكتهننننن.
جنه .. اي والله يمه حااامل ولزمت بطني وخليت ايدي الثانيه على خصري واتمشى بهدوء ورحت للغرفه.
اخلص من عذراء تطلعلي كواكب اخلص من كواكب تطلعلي عذراء وشيخلصهااااا.
رحت للغرفه بدلت ملابسي وطلعت رحت ادور امي
شفتهه بالهول هي وعذراء يوسف ديلعب بمكعباته وهي بحصنها مريم ترضعها.
كعدت يم امي
.. يمه مشتهيه روبيان.
.. عذراء ... وين اكو هسه روبيان بردت الدنيا
..جنه .. انت سكتي ممحاجيتج محاجيه امي اني.
ظلت تهف بيدها ودارت وجهه
الام .. ان شاءالله يمه باجر اروح للسوك اجيبلج
جنه .. اي يمه فدوه كون تازه مو من هذا المفلس والمجمد مااريده
عذراء .. خلي جهاد يجيبلج ويا من الفاو هسه بس تكليله يكيف ويجيبلج من هذا الجامبو الكبار وشبعي
جنه .. اوووو لازم تسدين نفسنه بطلنه كل شي مااريد.
نمت بحصن امي وظلت تلعب بشعري كتلهه يمه ادعيلي اجيب بنيه.
عذراء .. هاا غرتي من عندي ؟؟
جنه .. اووو حطت روحهااا اكلج ماتاخذين خلفتج وتدخلين بغرفتج اجفينه شرج ؟؟
عوجت حلكها وخذت مريم ودخلت لغرفتها
الام .. يمه مايصير هيج وياهه احترميها مرت اخوج
.. هسه ماشفتيهه تلاشيني على كل شي.
دقايق ودخل محمد
سلام عليكم
انا وامي... عليكم السلام
طب كال شونهم الربع
بخير حمدلله
بوس يوسف شاله واخذه جوه.
وره شكد اجه مبدل ملابسه لابس ملابس البيت
كعد يمي وضربني خفيف على راسي
كال اي حكاكه مبروووك راح تصيرين ام بلكي تعقلين
بسرعه جاوبته بحديه بس مو تكول لجهاد دخيلك محمد مااريده يعرف.
نتر بيه موصوجج صوج ليباركلج
وكام من يمي يريد يطلع مد راسه جان يكول بومه
وراح.
باوعت لامي كالت يمه على كيفج مايصير هيج
كتلها يمه هي شبسرعه كلتله ولاتضم شيييي
.. ولج يمه المن كايله هو اخوج
.. اي خل يرتاح خلي يبدل خلي ياكل بسرعه نشرت بوست عن الخبر والله يعلم المن تكول هسه.

بعد العشا اتصلت مها على تليفون امي
لان عذراء وبفضل الكروب البيناتهن طشت الخبر
مها .. بعد عمري جنينه ولج راح صيرين ام يبوو مااصدك والله تمنيت بضروف احسن بس يله الف الحمدلله ان شاءالله كصته خير عليج ويعدل احوالج بس تعاي خل اكلج انه مااريدج تطلكين بس شرطي علي اذا قررتي ترجعين ولو مايستاهل والقرار الج خلي يجيبج هنا ويخليلج بيت يم اهلي احسن حتى لايستوحد بيج هناك ويظل يكفخ بيج.
كتلهه الله كريم وراحت
وخابرت علا
علا .. جنون فد فرحتلج ولج ان شاءالله تجيبين بسلامه كلتي لجهاد حتى يجي ياخذج.
جاوبتهه .. شبيج علا حتى ياخذني ويكتلني ويطيح الطفل شجاي تحجين انتِ
علا ... لا يا شسالفه وحش خما وحش
جنه .. علا انت ماعايشه ويااا لذلك اكرميني بسكوتج الله يخليج
علا .. ولج خو ما يعيش ابنج بلا اب.
جنه .. اسم الله مايعيش بلا اب بس مارجعله هسه نوب يضربني ويوكع.
.. مايوكع شبعت كتل من ابو رضيو وانه حامل شو ماوكع خما معلك بشعره هو هي المره الله خالقها تتحمل والله تحملي والله يعوض صبرج ويجازيج
...اي مو هي مطي المره وتتحمل شهالمنطق هذا علا شبيج ؟؟؟ وبعدين انت ماشايفه جهاد من يعصب شيصير خو اذا خله عيوني بعيونه يفقد بعد ويتخيلني غير شخص. وده يفترسني.
.. شنو ماافتهمت شنو غير شخص.
.. هيج ماكو شي
.. لعد شون تبقين هيج ؟
.. لا بس اريد انطي درس حتى مايمد ايده عليه بعد
.. هسه هو عرف لو لا
.. لا وحذرتهم مايكلوله
.. وجم دوب ؟
.. الحد مااجيب يله
.. تخبلتي ولج شصارلج
.. اي هيج مقرره واني مخبله على روحي ضارتج بشي ؟؟
.. لا بس حرام هو ابو واله حق يعرف
.. انت طلعي منهاااا واني احلهاا
.. خنشوف شون تحلينهه بله جنه تره امج بعد عمر طويل ان شاءالله مادايمتلج ولا اخوانج احسبيها صح وارجعي وكسبي والله مبين خوش رجال وشكد متتحملي تكبرين بعينه وبعين اهله.
.. انت شمدريج يعني هالكدمات الي بوجهي كله مو كافيه ؟؟
.. ولج ضرب الحبيب هذا شبيج انت ههههههاي
.. دطييري شكد فطيره انتِ
ختمته وياهه احس راح اتخبل الكل يريد يتخذ قرار عني بس اني لازم اصير قويه لازم احمي ابني منه
لازم انطي جرة اذن حتى ليكررها بعد

*جهاد

من عرفت جنه حامل فرحت ومافرحت
مافرحت لان الضروف كلش مو ملائمه ولا مستقره
لهسه شبح الماضي يطاردني ومااعرف هذا شراح يكون مصيره واني ابو !!!
لهسه قضية رؤى وعامر مامنتهيه ويوميه طلابه
شكل
جنه زعلانه وماادري ليش ضمت عليه هي حامل كل هذا الوقت واسمع سمع من اختهااا
وفرحت لان هالشي بادرة خير حتى ترجع ويايه ونبدي من جديد ونختصر كل الي صار وننساه
حسيت اكو امل بحياتي رغم الظلام المحيط بيه.
كمت من مكتبي وتوجهت لمحمد
صحتله واجه
محمد ليش ضامين عليه حمل جنه لو هذا هم ماتريدوني اعرفه ؟؟ مثل ذيج الشغله مال خطوبتها السابقه. ؟؟ !!
جاوبني .. لا مو هيج بس اني وعدت جنه مااسوي شي غصب عنها ولاااجبرهاا على شي.
جاوبته ... جنه تعرف ضروفي كلش زين ورغم هذا كله ضمت عليه المهم معذوره اني اليوم يمكم اجي اخذها
جاوبني .. والله اذا هي موافقه اني ماعندي اي مانع
كتله يصير خيير.
خلص الدوام وتوجهت لبيتهم
وصلت دكيت الباب طلعتلي امها تفاجئت عبالك شايفه جني
يمكن لان حست عرفت بموضوع حملها
سلمت عليها كالت تفضل يمه
دخلنه للاستقبال
اجت ضيفتني
كتلها عمه صيحيلي جنه.
ان شاءالله يمه.

* جنه
الام .. يمه جهاد يريدج.
... اوووو هذا مايفك اصدك مايفك
الله جابه وانه شون تعبانه نفسيتي والنساوه اموتتني خليني اروح ارزله وافش خلگي بي.

هسه يمه جايتله.
باوعت لروحي بالمرايه خلي اشوفني بالله ينطلع بيه هم مايصير اروحله مرعبله.
شعري شايلته ليفوك
نزلت منه جم خصله
وردت خدودي شويه وشفايفي حتى احرك دمه وطلعت. ...
طبيت للاستقبال جان لوحده كاعد
اجيت الزم گلبي شكد مشتاقتله
يارب قوييني مااضعف كدامه
هااا شجابك
.. انت يمته يصير عندج ذوق وتستقبلين زوجج باحترام
.. اني عديمة ذوق انت شنوو
.. اني احبج
.. احم احم اكلكياهه من الاخير مارجع وياك
.. وتحرميني من ابني ؟؟
.. ياابن ماعندك ابن يمي
.. تقربت منها لزمتها من خدها بيد وحده كتلها لايك الج الحمل صايره تخبلين
.. منو كللك اني حامل
.. شنو تردين تضمين عليه اني ابووو شنو شبيج جنه. ؟؟
.. محمد كللك مووو ؟؟
.. لا مو محمد. جنه اكسري الشر ويله امشي وياي
.. ليش حتى تطلعني خاينه وتتهمني بشرفيي وتضربني وتموت ابني
اني هنا حتى احمي منك
مارجعللك رووووح انت وحشش.
جهاد .. رفعت ايدي بتهديد كتلها لاتخليني استخدم طرق ثانيه وياج والله اندمج
.. لا والله شتريد سوي سوي ماارجع خووش وطلعت من الاستقبال وگلبي يعورني عليه.
سمعت باب البيت انركع ركعه
عرفته عصب كللش
احبه ومااريد ارجعله اخاف منه واخاف على ابني.
دخلت بالغرفه واني معصبه مدخنه ليش محمد يگووله.
مو كال ماعليه ومااحجييي.
انتظرته اجه وجان انهد بي
محمد ليش تكول لجهاد انه حامل هااا لييش،؟؟
... ولج يمته انه كتله شبيج خرفتي هااا ماكتله.
.. لعد منو غيرك يتواصل ويا محد غيرك.
اجت عذراء جان تكول مو هو كله علا كالت راح تكله ويمكن هي تواصلت ويا وكلتله ليش اذبينها براس محمد
جنه ... اني اعلمها وج يمه وين تليفونج
الام .. يمه شبيج تخبلتي اهدي لايصير بيج شي وانت حامل.
جنه ... هي بتج اني اعملها.
اخذت التليفون واتصلت بيهاا
بس جاوبت صيحت بوجهاا
ولج علا بعد لاتعرفين ولاعرفج
.. ليش شصاير
.. كلش زين تعرفين ليشش ؟؟
رحتي كلتي لجهاد ليش ولج لييششش .بصياح .
.. والله اريد مصلحتج.
.. ولج يامصلحه هذه ارجع لواحد يطعني بشرفي ويطلعني خاينه
.. الرجال من يعصب كل شي يحجي وبعدين ينسى ولا كانه كايل شي .
.. بس اني ماانسى كلامه حجيه مااريد يحجي ومااريده يعصب اصلااا لان اني ممسويه شي غلط وكايمه بواجبه على اكمل وجه هيج يجازيني
افتهمي هي حياتي واني حره بيهاا مااسمح الج تدخلين بحياتي وانسي عندج اخت مفهووم.
سديته بوجهه خربتلي كل خططي شكد فطيره ولاتعرف تصرف
جفص تجفص من اول يوم العرس كتلها هذا ياذيني مقبلت حتى احاجي امي.
شسوي يربي ونوب يهددني يصرف وياي غير تصرف شيسوي يعني نوب مخبل هذا كل شي يسوي
يربي اوكف وياي ماعندي غيرك سند.

*جهاد

طلعت منهم معصب مثل المره القبلهه ولاتحترم ابد هم خذلتني مره ثانيه لا صدك ندمتني على عصبيتي واسلوبي وياهه

طلعت للشقه ونويت اروح لأهلي واجيبهم وياي للبصره يحاجوها بلكي تقتنع بجيتهم واذا ماقبلت اسويها محاكم وياها وارجعها غصب.

وصلت للشقه اخذت كم غرض وطلعت لبغداد
بعد طول طريق اسوق واني اغليي من جوه
شهالعيشه هذه الي مابيها بس الهم والاذيه
يمته ارتاح ماادري.

وصلت البغداد نزلت ابيت اهلي
تعبان نفسيا وجسديا
بس مااريد ارتاح من ترجع جنه يله ارتاح

شفت امي.
..هاا يمه شوكت جيت
..هسه جيت حضروا نفسكم انت وابوي اخذكم للبصره نجيب جنه.

تفاجئت امي.
اي يمه صار بس هسه ؟؟
كتلهه بعصبيه اي هسه لعد يمته مو جاي اكلج هسه.
روحي كلي لابوي هسه اروح.
.. ليش يمه صاير شي شبيك معصب ؟؟
.. يمه جنه حامل وماتقبل ترجع واريدكم تحاجوها بلكي تشوفكم وتستحي منكم وتغيير رأيها هي تحبكم وتحتر مكم.
الام ... صار يمه هسه اروح اكول لابوك
.. يله بينما تحضرون نفسكم اني رايح اريح شوي تعبت من السياقه وطول الطريق.
واذا تشوفين فؤاد او عماد يروح ويانه يعاوني ع السياقه بعد احسن لان تعبان كلش.

صعدت فوك شمرت نفسي ع الجربايه نمت شويه غفيت من التعب وطول الطريق
فزيت على صوت امي يله يمه جهزنه كل شي.

بدلت ملابسي ونزلت
اباوع لامي وابوي راح اخذهم والطريق طويل وهم كبار ومرضى
كلها بسبب تصرفاتي الطايشه
وطلعنه للبصره اني وامي وابوي ويانه اخوي عماد.

جنه *

ساعه 9:30بالليل
كاعده بغرفة امي ودمعتي على خدي
وحسره بگلبي
وافكر بكلام جهاد
وتهديده يعني هم ارجع وهم انضرب وانهان ؟؟
خليت ايدي على بطني احاجي جنيني
اكله سامحني ذا بيوم راح تتأذه ومااكدر احميك
والله خايفه عليك بس شسوي يربي شسوي.

دخلت امي
كومي يمه تعشي
.. مااشتهي لعبانه روحي
.. ميخالف كومي لكمتين
.. يمه مااريد
اجه احمد
جنه كومي مو اله تاكلين بس كعدي يمنه لاتبقين حابسه روحج
كمت على حيلي بملل وبطئ
طلعوا وتبعتهم
كعدنه بالصاله والجو بارد وشاعلين الصوبه
شبسرعه بردت الدنيا
البرد يجي فجاه
كعدت يمهم ع السفره مسوين كباب وطماطه گلي
وجاي وخضره وخيار.
شكد احب اكل امي
نساتي لعبان نفس بس اكل
كلشي كدامي اكله
بحيث زاد وزني بهالفتره
الاكل ريحته بخشمي
تدنيت يمهم وبلشت اكل
احمد .. هاا مو كلتي ماتشتهين ؟؟
الام .. خليهه تاكل شتريد منهااا

اندكت الباب
طلع احمد يشوف منو
طبت وراه علا وجهالهه
اجت حضنتني
يمه خيتي زعلانه عليه
وخري عني وخري مااحجي وياج
منو كلج بس كليلي
سكتت
باوعت العذراء
عذراء .. اجت تهد بمحمد عبالهه هو كايله
كتلها علا كالت
علا .. عضيت اصبعي .. اخخخ ماينكال كدامج شي كون تفتنييين.
جنه .. انت شعليج احد شاكيلج احد عاتب عليج كاعده على كلبج تروحين تكليله ؟؟
علا .. موردت مصلحتح والله
... اني اعرف مصلحتي كلش زين ميحتاج تدورين مصلحتي.
.... يلا هسه ماصار شي يمعوده شسالفه
... لا صار ولج اجه ييهدد اله ارجع وجهاد خبل كلشي يسوي

بينما دنحجي هم اندكت الباب
يا منو جاي هسه بس لا جهاد ظليت ارجف بس مو من البرد حسيت بي اجه.
سمعنه جماعه دخلوا للاستقبال اصوات مو غريبه عليه.
دخل احمد باوعلي كال هذول عيالج
عمج وعمتج ورجلج وحماج.
يبووو مخبل والله مو صاحي راح جابهم واجه بهالليل
طفرت امي عدلت شالهه وكالت يلا كومي نسلم عليهم
ضربت علا على ظهرها بثنين اديه حيل
ارتاحيتي هسه راح جاب اهله واجه ارتاحيتي
كام محمد كال يلا جنه كومي سلمي عليهم عيب جايين مناك لهنا.
جريت روحي بملل وحزن ويأس
بداخلي ضجر تعب
تعب من الي ياخذون قرارت عني
دخلت للغرفه اخذت شال خليته على راسي
وطلعت
باوعت لعلا خزرتها وغميتها
وهي الفطيره تضحك
بودي افترسها كتلها من عابت للضحكه
سحبتني امي يلا يمه
دخلت ...
سلام عليكم
ورحت بوست عمتي جان بصفها جهاد
لزمني من ايدي همس باذني
" هسه شوفيني منبع اصلج تحترمين جية اهلي وشيباتهم لو لا "
باوعتله بخزر وخرت
كعدت بغير مكان بعيد عنه
صاحتلي عمتي تعالي يمي كعدي
كمت سوتلي مكان بينها وبين جهاد
تقرب يهمس باذني كال مريتي صايره تخبل لايك الهاا الحمل صايره بطه
اباوعله وارفع تك حاجب
ابو جهاد...عمي احنه نحبج اذا عندي خاطر عندج ارجعي لخاطر شيباتي وجيتي مناك لهنا انت بنتنه واحنه مانتخلى عنج
وهالمره اني اكفله مو اني خليتج ترحين ويا ابو يوسف.
ارجعي الخاطر حفيدنا.
جنه بزعل...عموو انت شفت جهاد شنو سوه اني بعد ماعندي ثقه بي شفته شلون ضربني وسبني وتهمني بشرفي وهو يعرف تربيتي عمي ترضوها علئ بناتكم يناهنن وينضربن وتسكتون ؟
ابو جهاد..لا والله ياعمي ماارضه بس والله انتي بمعزة بناتي واني اضمن الج جهاد اذا مد ايده عليج اني اتبره منه
جنه باوعت الجهاد كان كاعد يستمع الحديثنه وعلامات الندم بارزة علئ وجهه رفعت حاجبي ووجهت كلامي اله . خاف يضربني ويوكع ويوكع طفلي ؟؟
شفته عدل كعدته ونتر بعصبيه...شنو افقدج طفلنه انتي ماتعرفين شكد اتمنئ يصير عندي طفل يملي حياتي ويعيني علئ جور الايام
رفعت اصبعي بتهديد ..والله ياجهاد اذا صار عليه شئ او علئ الطفل متلوم اله نفسك واني حرجع لخاطر عموو وعمه
همس بااذني بهيام يذوب..واني مالي خاطر
ارتبكت...شبيك منا عموو استحي.
بعدهه ظلوا يسولفون وجهاد كلساع يهمس باذني شي مسوي نفسه رومانسي
قررو يباتون الليله ابيت اهلي والصبح نرجع لبغداد واني وياهم يعني الكل قرر عني واني ماالي قرار
همس باذني كال مدام راح نبات يمكم دبريلينا مكان انام بي وحدنه شكددد مشتاقلج
باوعتله بخزر كتله ماعدنه مكان نام يم اهللك يله.
باوعت لعمتي كتلهه ارجع بس بشرط ابقى يمج بالغرفه من هو موجود لحد مااولد.
جهاد .. وهي شيسمونهه بعد ؟؟
ام جهاد .. اي تدللين حبيبتي جهاد يمه خليهه عندي احسن لاتصعد الدرج تتعب وهي حامل.
سكت جهاد بس احسه معصب
طلعت من يمهم اخذت عمتي يمنه
خلينالهم عشه وتعشوا
وعمتي تعشت ويانه
بعدهه اخذتها للغرفه تعبانه خطيه من طول الطريق
حضرت الها فراش لحتى تنام.
مددت وغطيتها
كعدت يم راسها كتلها عمه انت وعدتيني تخليني يمج من اروح
ام جهاد .. وعد عليه اني احميج تره جهاد تندم ولو تشوفينه بلاياج جنه طير مجروح.

گلت بگلبي طير مجروح لو خبل خبل مجروح وحششش.
الليل كله مانمت بس افكر شون راح ارجع وادري بجهاد وعصبيته مايفك اله يضربني
حضرت ملابسي
ومددت شويه اريد اغفي مايجيني النوم كوه نمت.
الفجر الكل كعد وتحضرنا
رحت لامي بالمطبخ جاي سوي ريوك للكل
واني الصبح لايبه روحي ولعبان نفس كلش مااشتهي الدنيا
لعبت نفسي من ريحة الاكل وطلعت
رحت توضيت وصليت
كعدت عمتي توضت وصلت
تريكوا كلهم واني مااشتهي
بقيت ساعه اعدل بالجنطه وهم ينتظروني اطلع
مالي خلك اروح منا نساوة ومنا راح ارجع غصب
اجت امي
يلا يمه مايصير جاي يتانونج
كتلهه اي يمه
لبست العباه واخذت الجنطه
بوستها وحضنتها
دعواتج يمه
الله يهدي الج بعد روحي لاتخافين مدام اهله وياج
اي
هزيت راسي بيأس
ورحت للاستقبال اباوع لجهاد بخزر اخذ مني الجنطه ولزمني من ايدي
سحبت ايدي منه ورحت بصف عمتي
بالسياره عماد يسوق
وعمي بالصدر
واني وجهاد وعمتي وره.
عمتي كاعده بالوسط.
جهاد يباوعلي بس اني ماانطي وجه واصد عنه
هو ضاج كلش
الطريق كله لعبانه نفسي وحمدلله مااكلت جان ذبيت كلشي.
وجهاد كل شويه يطل عليه هاا بيج شي
ارفعله حاجبي وادور عنه اخلي يعصب ويعصر اباكيت الجكاير يريد يدخن بس مايكدر.
وصلنه للبيت نزل اول واحد فتحلي الباب.
نزلت من دربي لغرفة عمتي اجه ورايه يباوعلي خله الجنطه مالتي وطلع.
كعدت اني ومددت رجليه احس تكسرت.
دقيقه ودخلت كواكب ضلت تهوس وجنه رجعت لعيالها وطير السعد يبرالها وتركص بااستهزاء وبعدها كملت تيتي تيتي مثل مرحتي اجيتي.
بوستها كتله شكرا خاله
جاوبت صدك ولج حامل
حطيت ايدي على بطني وابتسمت اي الحمدلله
جاوبت يبوووو مانعول نفتك من ابو المسودن يروح 15يوم يطلع النه ابنه ازيد من خبالات ابوو
ابتسمت وجاوبتها...لا خاله لاتحجين علئ جهاد
جهاد عصبي مو مخبل
جاوبت خايبه مخبل انتي ماتعرفين هذا المخبل شمسوي
تفاجئت...شمسوي؟؟
جاوبتني وخري مني لا يجيني هو وعضلاته مالي خلكه وضلت تدردم خرب حضي راح تجيب ولي العهد المسودن مو عايزين مخابيل والله من تخلف اني اشرد مو بيت عبالك مستشفئ المجانين
استغربت منها صدك هي حشريه وتدخل بكل شئ ومو بس اني حتئ نسوان احمويني بس متوصل لهاي الدرجه حتئ مكالت مبروك عبالك شريجتها...بس رحمتها يمكن لان ممزوجه وماعندها اطفال دتسوي هيج.
طلعت واني رحت كعدت ع الجربايه
كلش تعبانه
دخلت عمتي كالت ماتاكليلج لكمه مااكلتي شي اليوم الصبح
هاا عمه والله تعبانه اريد انام
يله لعد ارتاحي حبيبتي
مددت ع الجربايه وافكر بلي راح يصير ومعاملة جهاد الجديده الي
وغفيت
فزيت على صوت يمي فتحت عيوني شفت جهاد
بالغرفه واكف يباوعلي وبيده علاكه بيضه.
ظليت اباوع اله بخوف ضميت رجليه لصدري
كتله هاا شتريد
.. شبيج خايفه مني ؟؟
.. اي اخاف منك
.. ليش ولج اكل ؟؟
..اي وحش ووحش ماانسى الي سويته بيه اخر مره.
تقدم خطوتين كال وحش بس يحبج.
.. والله خطوه وحده اصرخ واخليهم يجون
خله العلاكه ع الميز
تقرب مني بسرعه لزمني من ايديه كبلني وخله شفته على شفتي.
صرت ادفع بي وخر شفته كال ولج لاتعورين ابنه.
... صرت اباوعله بغضب واكوله وخرر جهاد شصارلك تخبلت
.. شنو تخبلت رجلج اني
.. اي وخرر مااريد
دفعني دفعه بعصبيه بس خفيف
... ظلي بعنادج هذا
وكام
شمر عليه العلاكه كال
... هذا تليفون الج
خليت بي رقمي وارقام اهلج بعد تردين شي اني باجر من الفجر طالع للبصره
سكتت وماحجيت
كرر كلامه كال تردين شي ؟؟
مجاوبته
ضرب الميز بقبضة ايده وطلع
ادري بي مايجوز من عصبيته بس مو سهله الي سواه بيه اخر مره وخاصة قارني بزوجته الخاينه وسبني وغير الضرب الي يموت.
اخذت العلاكه بعد مااتاكدت منه راح
فتحتها تليفون حديث.
بي ارقام اهلي وبرنامج تواصل.
خليته ع الميز الي بصف السرير.
ورجعت لنومتي.
طبت عليه رونق سلمت عليه
كالت جنت ابيت اهلي هسه اجيت.
طلعت رونق
واني هم طلعت رحت للمطبخ جوعانه ميته جوع.
صبيتلي اكل
طليت من الشباج شفته جاي يدخن بالحديقه
راح يكتله التدخين يوم من الايام
يمكن يدخن بسببي اروح يمه اصالحه
لا ميستاهل خلي يتأدب.
اكلت ودخلت للغرفه
البيت هدوء كواكب ماكو يمكن ابيت اخوها ذاك.
يوم ثاني الفجر اني نايمه
حسيته يم راسي تقرب مني باسني وطلع.
ياترى صدك تحبني لو مثل متكول كواكب دائما هيج تكول يتلوك ؟!!
طلعت الصبح من الغرفه رحت للمطبخ شفت
كواكب ورونق صبحت عليهم
وبيدي تليفوني الصدك فرحانه بي حتى براحتي اراسل اهلي وخواتي
خليته ع الكاونتر
اجتني رساله رحت اخذته اشوف منو ؟
كواكب .. بخت جابلهه تليفون سحل
اي داده يتلوك حتى ترضين عليه
رونق .. خاله لمس مو سحل
كواكب اي متشوفيهه تسحل الصوره سحل
رونق .. لا خاله تسحبهه مو تسحلهاا
كواكب .. اووو هسه انت تعلميني درووحي.
اني الصبح اكعد طالعه روحي اكتفيت بالسكوت.
من راح جهاد بقيت انام فوك مرت ال 15يوم بسرعه جان
يراسلني ويدزلي صوره اباوعلهم شكد حلو بالصور خرب بيومه بس ماارد عليه
ناويه اادبه كلش وابينله اني قويه ومااستسلم لقلبي بسرعه.
اباوله بهيام شكد مشتاقتله

طلعت من غرفة عمتي شفت كواكب
كواكب .. اجه المخبل مالتج دريتي
جهاد .. اكلج خاله انت ليش ناشبه ويا تره مايصير واذا غلط عليج ماتقبلين تره مايصير هيج.
كواكب .. شوف الملسونه لو ما يحطج ويكتلج يجنزج واني افكج منه وشدعواج واذا كلت مخبل ابن اخوي وبكيفي وهو صدك مخبل ماتعرفين بسوالفه انت ولااحد من هذا البيت كدي اني اعرف شصخم وشسوه.
جنه .. خاله جهاد رجلي وابو ابني مااسمحلج تحجين عليه عيب راح يصير ابو وانت هيج تكوليله.
خليتها تدردم وصعدت الدرج نسيت روحي عبالي هو ماكو
تفاجئت بي كدامي لزمني من خصري بسرعه ولزكني بي
.. شبيهه بطتي ؟؟تتعارك على مودي هااا ؟؟
.. لا مو علمودك ووخر عني يله
باسني بركبتي دفعته وخرر لايجي احد عييب
جهاد .. بخزر ماكو عيب وبعدين اني بكيفي مدام ابني ابطنج ابوسج واحضنج حتى لو غصبا عليج
ابوسج معناهه بايس ابني احضنج هم احضن ابني
.. من يطلع من بطني عود حظنه وبوسه على كيفك مو هسه.
.. هسه وبعدين وشوكت ميعجبني كيفي
.. لا مو كيفك
.. ليش متجاوبين من اراسلج واني هناك
.. بكيفي مااجاوب
.. مو دارسلج صوري يعني ماتحنين ماتميلين من تشوفيهن مايرق قلبج
.. ههه هنه شنو خلك صور شايب شميل شحن ؟؟
عض شفته وعقد حاجبه قربني من راسي اله وخر شالي عن رقبتي
خله شفته على رقبتي ..
وجعني
كتله ااخخخ
باوعلي رافع تك حاجب وعض شفته
.. هاا هسه شونه الشايب ؟؟؟
ملصت روحي منه وداانزل وهو يصيح لاتوكعين على كيفج خبله.
باوعتله عكدت حواجبي كال ،،
وكت الزعل حواجبج وهي معكوده مال بوس ويضحك.
حصرتني الضحكه درت وجهي عنه.
كملت ضحكتي جوه.،
رحت للغرفه باوعت لركبتي مطكعه خرببب يومك جهاد.
وكت العشا بالمطبخ دنسوي عشه
اجتي عمتي تقربت مني كالت
ماكافي زعل خطيه جهاد صارلج هواي تره حارمته منج حتى الله مايرضى
سكتت
كواكب جانت كاعده تلف الهه لفه من الي جاي اكلي كبه وخضره وتلوك كالت
.. عيارة مصر نسوان اخر زمن صوجه هو ساكت الهااا ولو هو يستاهل الي جاي يصير بي كلها حوبة حوبه
باوعتلها
...حوبة منو خاله
.. حوبتي نهار كله يغلط عليه
.. وانت هم ماقاصره هم تتحركشينن بي.
.كواكب واللكمه بحلكها مسويتلهه طوبه بخدهه . ولج انت طلعتي مو هينه.
عمتي سوتلي حركه بعيونها معناهه اسكتي عنهاا وفعلا سكتت ولا ترحم كلللش.
خلينه العشا وكعدنه نتعشا كلنه سوه
جهاد .. عمه كافي شكد تاكلين مكينه خما مكينه تعاي اكليني بعد.
كواكب ... اووي كلاك الدود والعكارب السود وانت شعليك ماكله من لحم جتافك
جهاد .. والله لو ماابوي كاعد.
جنه .بگلبي .. والله موتتني شكد دعي عليه.
شلنه السفره
وغسلنه مواعين
ورحت للغرفه حضرت النه الفرش حتى انام
دخلت عمتي اخذت بطانيه ومخده باوعتلها باستغراب
.... هاا عمه ؟؟
.. جنه يمه عمج مريض افلونزااا راح انام يمه بالاستقبال انطي الدوه واسويله كمادات دافيه
.. مايشوف شر ان شاءالله عنده العافية.
طلعت وبقيت اني
بعد زواج ضمياء حماي عماد اخذ غرفتها الجوه
وغرفته الفوك صارت لرونق لان متكفيهه غرفه وحده.
هي والجهال واني حاجزه غرفة عمي وعمتي شكد فشله ياربي هونها عليه.
رحت تمددت ونمت صفح ظهري صار للباب وبيدي التليفون احاجي خواتي بمسجات.
سمعت الباب انفتحت وانطبكت
درت شفته جهاد
كعدت ع النص
... بملل اوووف شعندك بالله ؟
.. مرتي واريد اجي يمهه عندج مانع ؟؟
.. والله اذا ادنيت يمي اصرخ
.. صفك ايده هو شصرخين ومنو راح يجيج رجلج يمج قابل غريب.
جنه ببكاء.. جهاااااد اطلع بره اريد انام
تقرب مني ولاكأنه يسمعني سحبني اله بحنيه
وخلاني على صدره وظل يحجيلي مع لمسات هادئه رومانسيه
جهاد .. جنه احبج اذا تكوليلي مخبل ماجذبتي اني عاشق مجنون مجنون بحبج
رغم كولشي
رغم عيونج الي الف مره اموت من اشوفهه بس حبيتج حبيت روحج كلامج شخصيتج
واسلوبج.
لج الغرفه ظلمه مداطيقهااا
يحجي وهو حاضني ويتقرب شويه شويه
لحظات
ذبت بحظنه واستسلمت امام لمساته.
جنه ... لك جهاد خاف يجي احد هنا فشل
جهاد .. كلهااا نايمه محد يجي.

بعدها كال يلا كافي تبقين هنا امشي يمي فوك
لا جهاد مرتاحه هنا روح وباجر اجي يمك.
ظل ينفخ بعصبيه وطلع.
مااريد اروح ويا احس هنا مرتاحه اكثر
خايفه اصعد ويا ونتعارك فبقيت رغم هو ضاج.
يوم ثاني انقهرت عليه اخذت ملابسي وصعدتهم فوك هو كلش فرح وعدني مايأذيني بعد واني صدكته بس مو مطمنه.
جنت بالبلكونه ادخن وجنه جوه فرحان بيها وبحملها احس نفسي مداريها افكر بيها ومن تتقيئ اتخبل عليها احبها حب موطبيعي وبتملك
وافكر شلون من تحين لحضة ولادتها اااه اكيد حتكون صعبه اشوفها تتوجع وروحها بين الحياه والموت لكن وعدت نفسي اوكف وياها وادخلها احسن مستشفئ
ان شالله تكون سهله
ومن بين افكاري اتصل موبايلي
رفعت الموبايل وبان الإزعاج علئ ملامحي خررررب يومه هذا شيريد ميخلون واحد يرتاح اذا ميعكرون مزاجه اووف عفته رجع اتصل اكثر من مرة فتحت خط كتله نعم تفضل رايد شئ؟؟
جاوب...زاد فضلك...اي رايد اختي
جاوبته بهدوء..واني من اجيبلك اختك؟؟
رد بعصبيه...اختي تطلعونها من عيونكم والله والله مثل ماخطفتوها ومحيتو ذكرها اخطف مرتك وخلي سيرتك علئ كل لسان
وكفت مصدوم وبعصبيه..والله والله اذا مرتي صار عليها شئ ماتلوم اله نفسك ورب الكعبه اذا طلعت وصار انفجار وماتت احملك كافة المسؤليه هددتني مع سبق الاصرار وترصد
جاوب بمكر...هههه تحبها اي تحبها بس مو اكثر من حبك الرؤى وهي وين ورؤى وين رؤى بس عيونها يسون مرتك
جهاد بعصبيه...تخسى انت واختك ماتلحكون اضفر مرتي
مرتي مو بس حلوه ومؤدبه واخلاق وشايله طفلي بطنها ههه باركلي راح اصير ابوو
جاوب بحده..الله لايبارك بيك خلي نشوف من اختي ترجع شحيكون موقفك
جاوبته...ليش مناوي تغسل عارك ياعار
جاوب..لك ماكوو عار غيرك والله ماكوو اذا اختي صدك ويه ابن عمك شلون تغمض الك عين وانت مرتك ويه غيرك
جاوبته...نعله علئ والديك ابن الكلب خرب ساعه السودة العرفتني بيك وبااختك قفلت الخط
دخلت للغرفه موجره نار بصدري ماراح اخلص من هالسالفه ودي اكسر ودي اضرب اعيط اصرخ
شمرت نفاضة الجكاير بعصبيه وتناثر الكزاز
بدخلة جنه للغرفه صاحت اخخ
رحتلهه اركض حبيبي بيج شي
جنه .. اخخ جهاد شون مابيه شي متشوف رجلي والدم البيها
اخذتها من الارض شلتهه شيل خليتهه ع الجربايه وهي تبجي واني اسب واغلط برياض واخته
جنه ... شكووو انت مراح تبطل عصبيه مو هي العصبيه راح دمرنه ودمرك
جهاد .. سبق وان دمرتني
رحت يم رجليها طلعت الكزازه منها وجبت ادوات وعقمتها وربطتها
جنه .. شنوو صار جهاد
جهاد .. بعصبيه ماصار شي لاتلحيييين.
تنفست حييل رفعت شعري اريد اوخر التوتر مني هذا يهدددني شون وياااه ياالله شوكت اخلص من هالموضوع
اباوع لبطن جنه دتكبر انتابني خوف بداخلي
خايف على الطفل هذا لايلوحه شرار من الجاي
شكول عليج رؤى دمرتيني دمرتي الكل
يارب قدرني احمي زوجتي وابني.
تقربت الجنه
بستهه على راسهاااا
حبيبي خو مابعدج متوجعه
... لااحسن بس متشوقه اعرف جنس الجنين
اليوم العصر كالت عمتي اروح اخذ سونار

جهاد .. فكرت بتهديده الخسيس ولو اعرفه جبان وبس حجي كتلها اني اوديكم.

* جنه
العصر طلعنا من البيت اني وعمتي وجهاد
جنت متشوقه اعرف جنس الجنين الي ابطني
دخلنه للعياده اباوع الجهاد ماتركني ومتوتر
مااعرف شبي ولايحجي شكد كتوم.
اجه دوري وفتت للسونار.
نمت واخذتلي كالت
وضعيته زينه ماياته نسبتهه زينه
كلت الحمدلله
كتلهه بنيه لو ولد
كالت اصبري مستعجله
ضحكت كتلهه اي
كالت بيج بنيه
فرحت
كلت بكلبي اي بيه ورده
كالت بس احتمال ماتجيبين طبيعي احتمال عمليه.
لان عندج ضيق.
خلصت وطلعت
بشرت جهاد وعمتي كالو الحمدلله اهم شي تمام الخلقه وسلامتج.
طلعنه من العياده واخذني للسوك افترينه واشتريت ملابس اطفال مال بنات وتجهيزات ثانيه تخص البيبي.
همستله لو ادري شبيك متوتر
اكو غيرج اخاف عليه.
ليش شبيه اني
ماكو شي حبيبي يلا نرجع.
رجعنا للبيت.
يوم ثاني هو اللتحق
ومرت الايام وكبرت بطني وصرت باخر شهر للحمل
هالفتره كلها جهاد تغير وصار زين وفرحان ابنته ورده ويحسب الهااا الايام حتى تطلع.
صح عصبيته بعدها يكسر ويغلط بس ميضرب
حبيته تعلقت بي
بس من يعصب اخاف منه.
ايامنا سوى جانت حلوه بس جان يعكر صفوها المشاكل وي اهل مرته يطالبونه ببنتهم
ومشاكل وي بيت عمه وكواكب وتلميحاتها
كل مره تكول شكل وكلمااا اصير عركه بين اهل رؤى وبين اهل عامر هي تتخبل تجي لجهاد تكوله حلها من يمك لايتكتلون الولد.
فد يوم طكت روحه منها كلش ظل يعيط ويصيح ودخل الغرفتها يكسر ويغلط عليها هي تخبلت
لبست عبايتها وطلعت تدردم
اني اعلمك اله اروح لبيت اخوي ابو عمار وافضحك
اله اخليهم يسيلووون دمك اله اكللهم شصخمت وشسووويت اني الك يجهيد.