رواية أهدتني عاراً الفصل الثالث 3 - بقلم نورا ناصر

راح فتحلها الباب وكف وهو متخصر وهو يسد فتحة الباب بايده
جاوبها بدون نفس ... نعم خييير
كالت تعالو تغدو متريدون غدا وتأشر باديها وتطلطل بالغرفة وتتفحث بنظراتها ...

اني طفرت من الجرباية ونزلت من جوه ايده الي ساد بيها الباب وبسرعة صرت يمها
.اباوعلها ارجف متوترة .. اي خاله اريد غدا ...

هو سكت واني مشيت
ورحت وياها امشي واتلفت لجهاد وهو يباوعلي ويتوعدني بنظراته المدري شلونها. يخزر ومنزل حواجبه ...ومثبت نظره عليه

مال ابوس راسج خاله كواكب اروحلج فدوه نقذتيني من المسودن اي والله مسودن.

خرب بحظي شون راح اعيش ويا هذا.!!! والله عبالك وحش

نزلنه جوه جان اكو عدهم خطار واني بين خوف وخجل واحساس بالغربة ضايعة هنا .. الدمعة محصورة بعيوني .. لا اكدر ابجي ولا اكدر حتى اتنفس

اباوع للوجوه بس عقلي شارد وبس انه افكر بكلامه كله و كلبي يدك واريد اجر نفس احس جاي اركض وتعبت وصرت الهث

نوب كسر السيم كارد مالتي شون راح اتواصل ويا اهلي انه . خاف يسوويلي شي شون اشكيلهم واحجي الي يصير بيه اذا ماكو تواصل وياهم
كواكب راحت للمطبخ وانه واكفه ببداية الدرج
حسيت كرصه بايدي.
اللتفتت وراي شفته هو جهاد يمه فز كلبي اجيت اوكع من الباية الي واكفة عليهة لو ما تماسكت بالسياج مال الدرج

تقرب مني وهمس بفحيح ...لج اني شنو كتلج مو كلت لتختلطين بكواكب وتبتعدين عنها اشو متاخذين الحجي لعد استلمي منا وهيج

كال كلامه وجان كله تهديد ... خلاني مهفوفة على راسي مصدومة من الجاي يصير معقولة هاي صباحية عروس!!
ونزل وخلاني وراه.

هزيت راسي وماسيطرت على دموعي نزلت .. مسحتها باديه وباوعتلهم شفت بيهم مكياج انمسح ويه ما مسحت دموعي ...

صعدت للغرفة رتبت نفسي مسحت المكياج المتخربط وصار جوه عيوني وعلى وجهي ...وبقيت ماعرف شكد صافنة ... حتى عقلي عجز عن التفكير

اجت اخته صاحتني نزلت وياها وكعدنه ع الغدا اجه سحبني خلاني بصفه والنسوان مقابيلنه واخته بصفي وكل شويه يقرب مني ويهمس باذني نزلي حجابج نزلي ردانج لاتحجين لاتتنعوصين مللني ماكلت
شي نفسيتي انسدت.

حسيت بغربه ولاول مره بلا اهلي بلا مااعرف احد هنا حتى الاكل حسيته غريب والمي والنفس عليه ضاك بشده من هالغربه

وياريت هو زين ويعوضني عن غربتي و اكول اتحمل واصبر ماجاي افهم سبب تصرفاته يمكن لان انه غريبه عليه او لان ماصار هوايه فقد مرته او ماعرف شبي ماعرف ماعرف مو تصرفات طبيعية عبالك يعاملني بحقد كره شخص يريد ينتقم ... هيج حسيت .

اختنكت كلش ولااكدر اكوم والدمعه بقت بنص عيني
كملنه غدا وجاي اروح اغسل قرب شفته يم اذني وهمس
..وين رايحه انتي مشوفين البيت كله زلم خليج قريبه مني مفهووم.

بقيت وراه وراه غسلنه سوه احس الكل يباوعلي ومركزين اكثر شي على عيوني ويباوعون لبعضهم ويتهامسون.

لزمني من عكسي حسيت قبضته خشنة على جسمي وبخشونة صوت ونبرة امر كال امشي نصعد للغرفة يله

خفت منه ورجف كلبي تبعته مثل العميا وخايفه اريد اخلص عبالك سجين مطلوب اعدام لا حول ولاقوة.

سمعنه صوت جاي من المطبخ النسوان جاي يحجون
الله يساعدك جهاد شون راح تنسى هم نفس العيون
هو جمد بمكانه. والتاف عليه باوعت عليه باستغراب وتساؤل سألته بنبرة توتر عفوية ليش وكفت!

ماجاوبني وداني يم الدرج گلي صعدي روحي للغرفه جاي وراج ... يحجي ويأشر بيده

خليت رجلي على اول بايه والثانيه سحبني نزلني طخت رجلي بالبايه وتوجعت صحت اخخ
باوعت ليفوك شفت اثاري اخو يريد ينزل.

جهاد ... صك اسنانه ويحجي شبيج متشوفي يريد ينزل متوخرين.

جنه ... اللهم طولج ياروح الله يصبرني.
احتاريت بوجع رجلي لو وجعي روحي وغربتي ...

نزل اخو وانه صعدت وانه جاي اصعد اشوفه يطب للمطبخ وطبك الباب حييل ظل يرزل بصوت مسموع بس ماافهم شيكول انه خفت وصعدت بسرعه.

جهاد ... عفيه نسوان ماتعرفن تسكتن اني مو كلت السيره هي تنسددد شجاااجن.

الام... وهي تخلي ايدها على صدره يمه جهاد تهدا باسم الرحمن وروح لمرتك اني احاجيهن وبعد شحدهه لتفك حلكها .

*جنه
صعدت للغرفه وكبل ختلت بالحمام خفت منه
دقايق سمعت صوت باب الغرفه انسدت
نزيت وخليت ايدي على كلبي وظليت اقرا ايات وغمضت عيوني.

فتحت المي حتى يعرف انه بالحمام
مرت دقايق سديت الماي ضجت واختنكت.

جم دوب وانه ابقى هنا خلي اطلع اواجهه
طلعت شفته امدد ع الجربايه وبيده الفون
كتله.
... يعني هسه انت كسرت السيم مالتي انه شون راح اتواصل ويا اهلي ؟؟

... جهاد بهدوء من تليفوني حاجيهم
.... زين ليش هاا شراح اسوي بالتليفون انه؟؟

..... باعي تليفون ماكو وخلللص مفهوم ولاتدوخيني اريد انام.
خليت التليفون ع الميز سحبت مخده وخليتهه على راسي.

جنه .... نام نام نوم الظالم عباده نامت الفتنة لعن الله من ايقضها

جهاد .. رفعت المخده وانت منو ضالمج؟
..يعني ماتعرف منو ضالمني
رد بتحدي : اي منوو
جنه بااستهزاء جبار ابو الكهوه
جهاد يبتسم انطمري احسلج

جهاد.
مرت 3ايام على زواجنا
جنت كاعد بالاستقبال عند ابويه نسولف مواضيع عاديه سألني على جنه جاوبته زينه.

كملت حجي وي ابويه وصعدت فوك شفتها ترتب بالغرفه لابسه تراك سمائي بارز ملامح جسمها الانثوي

صح ضعيفه بس ملامحها الانثويه بارزه.
شفتها مااهتمت لوجودي ولا كانه موجود استفزني تصرفها.

ضليت اباوع الها بنظرات جحيميه شكلها يجذب افكار تتصارع بداخلي.
عجبتني وردتهه ...

كلت ليش مااخليها زوجه اليه تحت جناحي بعدها صغيره اكدر اسيطر عليها ومن بين افكاري ساقتني رجليه الها حضنتها من خصرها وقربتها لجسمي
فزت مرعووبه وهي تبعد اديه عنها

جنه برهبه وتلعثم وخجل ..جهاد شبيك وجعتني وخر شتريد ؟

جهاد بعصبيه..شنو وخر اني زوجج واريد حقي لو اني ازرع التفاح وغيري ياكله.

جنه وهي تتبتعد..ياتفاح يابرتقال شبيك اسودنت عليه اليوم.

جهاد .وهو متمسك بيها وحاضنها وسط مقاومتها .... اررررريد حقي.
جنه ..... بارتباك ممممممستعده وخر

جهاد .... ادري شراح سوين سوقين طياره ؟؟
جنه........اهووو جهاد شبيك عفيه مو هسه.

جهاد .. زين تعالي
اخذتها ع السرير مددتها احسها بين الراضيه وببين الخايفه.

ثبتتها ايديها على بطنها وصرت فوكهه احجي وياهه
بهدوء جنه اني زوجج وانت لازم تتقبليني.

جنه ... بس تصرفاتك ويايه واسلوبك هيج تأذيني.
جهاد ... ميخالف كولشي يتغير.
احنه لازم نخلص شغلتنه ونصير من صدك زوج وزوجه

جنه ... سكتت ماحجيت شي
جهاد ... هسه غمضي عيونج ولتفتحيهه ابد ماشي

جهاد بقلبي اذا فتحتهم راح تخرب الاول والتالي.
صرت عليها اتأمل ملامحها مغمضه بخوف هيج كل شي تمام.

اخذتها خلص كل شي بوستهه من راسها كتلها مبروك صرتي مرتي.

كامت تبجي متوجعه
كومي يلا نسبح
رحنه للحمام
جنه .. شنو راح تسبح وياي ؟؟!!!
جهاد... اي وشكو بيها
جنه ... لايابه استحي
جهاد ... دمشي ولي تستحي.

* جنه
مرت ايام احنا سوه
الموبايل شكد توسلت بي يرجعه ماقبل
ايام يكون بيها حنون ورومانسي وهادئ
وايام بركان من الغضب ع اقل حجايه يثور
عيوني دوم متجنبهه وميباع عليها احتاريت ليش ؟

دائما متوتر وعصبي وعاقد حواجبه اكله قليل كلامه قليل وميحب يكعد ويه عائلته عنده هواي مشاكل
عمته مايطيقها بيت عمه ميحجي وياهم اهل زوجته علاقته بيهم مقطوعه

احس بي غامض مااعرف ليش هيج كاره روحه ومكره الناس كلها بي ... كله غموض كتاب مغلق بحر من الاسرار

ودائما يدخن كل باكيتين جكاير سوى ' يطلع المسدس ويتأمله احسه يريد يعاقب نفسه او يعاقب شخص ثاني

اكله اني اخاف من السلاح لا تطلع المسدس يمي
يضل يصيح ويتعصب وشبي المسدس بيش ضارج ويضل يغلط
مايحب اناقشه ابد.

كله غموض
كاعدين انه ويا بالغرفه
احب الاشي واستفزه اطلعه من كئابته لان اشوف الحزن بعيونه وانقهر اريده يحبني اكثر وينسى مرته لازم اغير من وضعي بعد وانسى ارجع لاهلي .

سألته : جهاد انت شكد عمرك ؟؟
جهاد جاوب ....بهدوء بعد ما نظرلي نظرة متلاشية
شكد يعني ....اكبر منج

جنه بااستفزاز ادري اكبر مني بس شكد
جهاد يحسب..يعني اني عمري13 سنه وانت انولدتي.

جنه .بصدمه كاذبه...عااا بكد جدي الله يرحمه.

جهاد ... بحزن مصطنع ....لا جرحتي مشاعري

جنه .... .انت عندك مشاعر انته حجار صخر طابوك جمهوري يعني المشاعر عندك منقرضه...

جهاد ... هاا جنه تردين تنغسلين بيج كتله اليوم مو كولي لا تستحين

جنه ... يممممايي هو انته ايدك والكتل
اروح يم خالتي احسن.

جهاد ... ابتسمت عليها اعرف بيها تستفزني وتريد تاخذ حقها لان اني دائما محاصرها ومضايقها... احسها طفله ترمي كلامها من تشوفني اتعصب تنهزم..اااخ لو ضاله جان عاقبتها عقاب من نوع خااص ... تتبعتها وهي تطلع من الغرفة وتسد الباب وراها حركت راسي بابتسامة ورجعت راسي ع المخدة
------------

جنة

يوم الثاني الصبح جنت بالمطبخ اشتغل وياهم كلتلي عمتي اطلع امد الماي بالحديقه

طلعت واشوفه ورايه رزلني رزاله الي مصايره خله دمعتي على خدي الكل انقهروا عليه بس محد يكدر يحجي

وصعدت فوك دخلت للحمام ليش هيج يصرف وياي مرات زين ومرات حجيه وكلامه يسم البدن شدعواه هالكد يغار ويشك موتني عبالك ماخذله وحده من الشارع ممتربايه

شسويت طلعت بالحديقه ولابسه حجابي ومتحشمه شبي هيج يعاملني.

سمعت صووت حجي بالغرفه هو وامه.
تقربت من الباب وصرت اتسمع الهم
الام ... يمه على كيفك ويامرتك ميصير هيج كل شوي رزاله شدعواك شذنبها هالطفلة

جهاد .. احسن تستاهل مينطن وجه

الام ... لا ييمه ميصير مو كل اصابعك سوه حاول ادير بالك عليها وتحبها مو ترزلهه كدام الكل.

جهاد ... يممممه مااطيقها مااطيقها كلما اشوف عيونها تذكرني برؤى.

نصدمت .... بعده يحبها وعيوني تقهره وتذكره بيها ..

حسيت طلعت عمتي من الغرفة كمت وطلعت انه همين وجانت عيوني كلها دمووع والقهر بيه مالي روحي

سألته بخنيك : ليش جهاد ليش تزوجتني مدام مااطيقني ؟؟

اللتفتلي وكانه مصدوم لان عرف سمعته. وفاتح عيونه على اوسعهن
عكد حواجبه انت متاخذين حجي

ظليت اللطم على وجهي ولك شسويت متكولي ...شسووييت قابل طلعت مصلخه.
تقرب مني ورفع اصابعه
كال ....حجايتي ماتثنينها

... مو كل شي تكوله يتنفذ مامسويه شي غلط انه ي.
صاااح بعلو صوته.... يعني متاخذين حجي موو ؟؟
صلختها راشدي بكل قوتي.

... اخخخ يمه احس خدي انشلع من مكانه على اثر الضربة ...

لزمت خدي باوعتله بخوف وقهر وصرت اشهك بصوت عالي .... وركضت ورحت طبيت بالحمام وظليت ابجي

يبقى متوحش كلما احاول جاهدة حتى اطلعه من الحاله الي هو بيها مايساعدني يصير ضدي وياذيني بقيت متحيره اريد افهم شبيها مرته وشون ماتت وليش هو هيج وكومه اسئله عندي

بعد ماضربني بقيت مااحجي ويا ولااتقرب منه.
وهو هم ولا تنازل واعتذر او صالحني ولا كانما موجوده بحياته وويا بالغرفه ميهمه شي ابد بارد برود الجليد ولا احساس بتانيب الضمير ابد .
افرش انام بالكاع وهو ينام ع الجربايه.

* جهاد
جنت متمدد على السرير وبيدي ريمونت البلازما اقلب بالقنوات
اجه ابن اخويه كمز عليه وحضني ضحكتله ضليت ابوس بيه وادغدغه وهو يضحك بطفوله يحاول يخلص نفسه

بعد فترة كعد وهو سكران من الضحك... اجت جنه ...

نزل من يمي وراح يمها باوعتله ابتسمت اله و انطته جكليت ونزلت جوه

ضل يباوع عليها واتبعها بنضراته بطفوله
وبعدها سألني عموو يصير واحد غيرك يبوس عمه جنه ؟؟

انصدمت صدمه قويه عطت بي بعصبيه لك شنوو هذا الحجي بعدك طفل لا تتنتبه لهيج سوالف
شفته خاف مسحت وجهي بتوتر وسالته.

....منوو باس عمه جنه؟؟
جاوب بطفوله...لا مو عمه جنه
اني شفت عموو عامر يبوس عمه رؤى

حسيت كل خليه وقفت بجسمي لعد شكد اني غبي نايم ورجليه بالشمس ورؤى لاعبه لعب
سالته بغضب وين شفتهم؟؟

كال صعدنه لقفص الطيور وهي صعدت ورانه ومن شفتها ختلت بالقفص اخاف تنزلني

شفت عمو عامر اجه ليجاي من سطحهم بعدين ضلت تحجي ويه عمو. عامر وباسها....
بعدين سالني بطفوله
عمووو مو ميصير يبوسها لازم بس انت ؟؟
فركت وجهي بتوتر وعصبيه حسيت كلامه مثل انصهار الحديد

اريد اشفي غليلي من رؤى وعامر اريد ارتاح بس مااكدر ذكريات مؤلمه توجعني وتزيدني الم فوك المي كل شي يذكرني بيهااا.

كتله المن كايل هذا الحجي لغيري ؟؟
بس حجيت لبيبي محجيت لاحد
تذكرت امي من شكت منها اثاري هي السالفه وامي محجت الحقيقه.

كتله عموو لاتجيب سيره لاحد عيب انت رجال ولازم الرجال ميثرثر مفهوم؟؟
كال اي عموو مااحجي .

طلع بقيت وحدي سحبت باكيت الجكاير بهالاثناء دخلت جنه صارت عيني بعينها احس روحي جمره صرت نار كبره جني اشوف رؤى مو جنه بلحظه وحده خطيت خطوتين وصرت يمهه ولزمتها من رگبتها بأيد وحده وخنگتها.

‏

جنه *
هجم عليه مثل الوحش صفني ع الباب يضرب راسي عليه وخنكني عيونه تطلع شرار من الغضب حسيت عيوني راح تطلع وبلاعيمي راح يفگن من الضغط مال ايده شويه شويه الهوا ظل يقل وكلبي دكاته تخربطت خلص توقعت راح اموت بيده وهي نهايتي
يحجي ويعيط بس ماافهم شيكول من كد الالم
لحظات وتركني وكعت بالارض اكح واتنفس سريع سريع وازحف على ركبي اريد ابتعد عنه قدر الامكان وحش مو بشر موتني شفت الموت بعيونه اريد امي خواتي سامر ليش عفتني هذا وعدك اليه تظل ويايه طول العمر مو كتلك ادعيلي برويحة حلال هيج اني انشمر شنو ذنبي.
اجه اتقرب مني لزمني فزيت ظليت اصرخ وخر وخر مخبل مخبل مو صاحي ولك شسويت اني شسويت ممسويه شي.
دقايق واجوي اهله كلهم يم الباب يردون يعرفون شصار.
طلعهم يكوللهم ماكو شي بيني وبينها لحد يتدخل
ويصيح عليهم
ظليت اصيح عمه لحكيني راح يموتني
ميقبل يفتح الهم الباب ويكول الهم اني وياهه نحلها معليكم.
امه تدك ع الباب وهو مكرفص يمي واني ناطيته ظهر وابجي وهو محتار شيحجي يعرف بنفسه غلطان
... لو تطلعني من الغرفه لو تخليني اخابر اهلي
فتح الي الباب وطلعت ابجي كلهم تلكوني امه وضمياء ورونق مرت اخو.
كعدت ع الدرج ابجي وهو واكف اباب الغرفه يدخن
الام .. شبيكم جنه شسويتيله وهيج ثار
... عمه ماسويتله شي جنت بالمطبخ وحسوني يمه طلع حسوني واني طبيت هجم عليه وخنكني ممسويه شي اريد اهلي رجعوني بعد مااتحمل.
رونق كالت شنو كله حسوني وراحت تريد تكتل ابنها جهاد ماقبل واخذه ونزل جوه.
بقيت كاعده ع الدرج وابجي
عمتي تكلي هو كلبه طيب بس مراته يعصب اتحملي يايمه شسوين لعد
عمه يعصب على شي غلط اني مسويته مو بدون سبب كل طلباته منفذتهن كلشي ديكوله اسوي نهار كله بالبيت حصره اطلع اشم هوا بالحديقه
ملابس ميقبل اصعد ع السطح اشرهم كلشي منفذتله يجي يضربني بدون سبب ليش بالله ليش
واضرب على رجليه.
كعدت عمتي يمي تصبر بيه بس اني ولابالي يمها دموعي مانشفت واحس بغربه مشتاقه لاهلي محتاجه ازور قبر سامر واذب همومي يمه ليش هيج حضي اني شكد جاي احاول اصير ويا زينه واواسي يجازيني بالضرب.
شفته صعد مره ثانيه صارت عيوني بعيونه نظراته بيها
حزن شفقه ندم
قابلته بنظرات كلها دموع و انكسار والم حقد وعتب
ليشششش ؟؟؟ شنو ذنب السويته
هم الگه جواب بيووم ؟؟
صاح لامه
يمه تعاي اريدج ونزل جوه هو وياهه
*جهاد
صحت لامي دخلنه بالاستقبال
مسحت على وجهي بعصبيه وقهر
امي تقربت مني ...جهاد شبيك تخبلت تسودنت خف على لبنيه شويه
زمجرت بعصبيه..يمه رحمه لاهلج اسكتي اسكتي والله روحي طافرة كتلكم مااريد ازوج مااريد وانتو ازوج تنسئ تطيب جروحك...
الام...ولك جهاد انت مكبر السالفه كافي انسئ
عضيت شفتي بغضب...انسئ انسئ شكد اطلبون مني انسئ واني طفل ذكرني بمصيبتي
الام..بااستغراب..شتقصد؟؟

جهاد بعصبيه وتوتر..شقصد رئيوه الكلبه شايفها شايفها حسوني هي وعامر فوك وهمه بحاله محرجه وكايلج
الام .. بصدمه...هاااا.
جهاد ..بعتب...حتئ انتي يا امي غدرتيني وخنتيني اكوو وحده زوجة ابنها هيج سوي وتسكت تكذبين عليه تكليلي ميانتها زايده
والله والله لو حاجيه ماوصلنه لهل مواصيل ولا ضعت وضيعت حالي اطلكها وتروح بستين داهيه اني جاي اموت شويه شويه وجبتلي عله على كلبي طلعت تشبه عيونها
كعدت علئ القنفه وحاس بغصه بداخلي تقربت مني امي وكعدت بصفي حضنتني وبجت...سوده عليه يمه والله ماحجيت خفت من المشاكل خفت عليكم انت واخوانك خاصة ابن عمك هو لغدرك.
جهاد..الله ياخذني ويخلصني مليت كاره روحي والله كاره روحي.
اني باجر رايح للبصره هي امانتج بعد وانت لازم تاخذين درس من الي صار
تليفون بيدها مااريد طلعه ع سطح بالحديقه بالشارع ممنوع ماتطلع من البيت بدون علمي ويا ااياٍ كان لو اصير جنازه.
جنه
بقيت كاعده ع الدرج شفته صعد وجاي بتجاهي درت وجهي ع الحايط.
كرفص كبالي خله اصابعه حدر حنكي دار وجهي عليه باوعتله تعبان وكل علامات الالم والندم بنفس الوقت على وجهه شفقت عليه بس ماردت اضعف.
ضايجه منه حيل واحس مثل الاطرش بزفه كلشي ماجاي افهم من حياتي ويا.
كال يلا جنه كافي زعل كومي فوتي جوه لاظلين هنا.
... باجر مو تروح لبصره وديني لاهلي ردني الهم.
....شنو اردج لاهلج بابا اني رايح للمركز مو لهلج
...والله مااعيش وياك لحظه وحده طلكني انت وحش
....تنهدت اووف اصبري شويه والله اني تعبان والله لو تعرفين لبيه جان رحمتي حالي ااااه
....مو هيج جيت اموت بين اديك اني شسويت وهيج تعاملني ابيش غلطت اني مالي عيشه وياك طلكني ارجع لاهلي
....اااااش لا تجيبين سيرة الطلاك علئ لسانج انتي ملكي لازم تتحملين اتحملي وانتي بنفسج تكدرين تكسبيني وتزيد ثقتي بيج
....ثقتك بيه ؟؟؟ انت ليش ماالك ثقه بيه اني مدااعرف انت شبيك وليش هيج تصرف انت مريض خلاص مااريدك مااريد ارحمني.
جنه لا تحجين جنه لا تضحكين جنه لا تتنفسين لومسميني جهنم مو احسن.

.....لا تخافين مو مريض بس بس اووف خليها علئ الله ربج يحلها ويالله كومي باجر وراي دوام يالله حبابه
والله ولااجي وياك انت تخوف ابقى هنا انام ولاابقى وياك بنفس الغرفه ياووحش....
جهاد *سحبت ايدها بحنيه وبستها كومي جنه لا تشمتين العذال بينه ماتدرين شكم شامن يتمنى وكعتي.
جنه ... سحبت ايدي منه ودرت وجهي عنه
شالنه كوه واني ادفع بي ودخلني للغرفه.
وشمرني ع السرير شكد حاول وياي لسه ماطيقه وخايفه منه كلش.
لفيت روحي ونمت
غدا ماتغديت شكد توسلوا بيه بقيت فوك بغرفتي
والعشا كذلك مانزلت بعد.
صار الليل واني جوه البطانيه ماطلعت حسيت بي دخل تمدد يمي غفيت.
الليل كله هو مانام ولادقيقه يا احسه يمي يشم بشعري ويمرر شفايفه على ايدي ورقبتي وظهري ويعتذر مني.
جنه اني اسف ماتتكرر.
واغلس واسحب ايدي منه واتغطى.
وارجع انام وافز اشوفه يم الشباك واكف يدخن وبقى الليل كله على هالحال.
الفجر حسيت بحركته اختلست النظر من الغطا شفته اخذ جنطته ونزل جوه.
بقيت طول اليوم افكر بي الليل كله مانايم شون راح يسوق خاف ينعس ويسوي حادث.
*جهاد

بقت طول اليوم متقبل تاكل وبس نايمه بالفراش خلتني بقلق عليها.
اني ماسيطرت على نفسي من شفتها كبالي
الله خلق من الشبه 40 ومن الاربعين ذول جانت حصتي اثنين منهم.
من سمعت هالكلام من حسوني انهاريت وطلعت الحركه بيها لكن سرعان ماتندمت وانقهرت عليها.
كل شويه اروح يمها وهي غافيه ابوسها واعتذر الها حتى لو متسمعني بس اريد اريح روحي التعبانه.
بقيت الليل كله منايم ومقهور عليها مبين راح اظلمها هواي وهي موذنبها.
نزلت الفجر بعد ماابدلت واخذت جنطتي رحت لغرفة امي اريد اوصيها عليها شفت بس ابويه
كلي امك بالمطبخ

درت ورحت للمطبخ
قبل لااوصل سمعت صوت كواكب وهي تحجي وي امي.
......ياعيني كاعد ساعه يتوسل بيها جنه كومي وكومي وسامحيني ويتوسل بيها وهي ولاتقلده وكاعده ع الدرج ولا كانمااااا.
دخلت وقاطعت حديثهم هي شافتني ارتبكت كالت...هااا جهاد صباح الخير
....هزيت راسي بعدم قبول...منين يجي الخير وانتي مثل الشرقيه نيوز تنطين الاخبار اول بااول.
.... اي لعد مو تتوسل وتبوس بيها عبالك ماشفتك
....
جهاد بضيق..وانت شدخلج.
وبصوت خافت ثول حتئ ثول
كون نلكالج شايب ونحطج براسه ونرتاح شنوو من مره هااي.
الام .. جهااااد مايصير هيج يايمه.
جهاد ... يمه اني راح اروح ديري بالج على جنه مااوصيج عليها بعد وهم ديري بالج عليها من بعض الناس خوش.
كواكب .. يا جهاد ولك عليمن تقصد
جهاد ... الحليم تكفيه اشاره اودعناكم.
الام ... جهاد يمه ماتتريك ؟؟
جهاد .. مااشتهي يمه اذا جعت اكل بالطريق.
بوست راسها وطلعت ...
واني بالطريق دك تليفوني
شفته امجد اخويه جاوبته
امجد .. هاا جهاد انت وين ؟؟طلعت للبصره مو ؟؟
جهاد .. اي والله طلعت ليش ؟؟
امجد . . مو مفروض نروح لبيت ابو رياض نبينلهم موقفك اشو غلست
جهاد .. ماعندي موقف وياهم اني وممحتاج اروح.
امجد .. يااخي روح بس كوللهم انت هم جاي تدور عليها ومو ساكت خلي نسد حلوكهم لاتصير طلايب ياخويه
جهاد . . يصير خير
امجد . . شونك ويا زوجتك ؟؟
جهاد . . الحمدلله.
امجد . . دير بالك عليهه يويل مو جايبهه مناك لهنا تكفخ بيها
جهاد . . هي شبسرعه وصللكم الخبر اخخخ ياكواكب يرادلها ضبه.
امجد . . هههه يلا احنه مو غربه من ترجع من البصره حتى نتفق شراح نسوي.
جهاد . . الله كريم الله وياك خويه.
امجد . . الله وياك.

جنه *
نزلت جوه شفتهم كلهم بالمطبخ كلت صباح الخير
ردوا صباح النور.
الام . . يلا بنتي تعالي تريكي ميصير من البارحه لهسه تبقين جوعانه
جنه. . . اي عمه صار
كعدنا تريكنا كلنه سوه.
طلعوا ضمياء ورونق وكواكب من المطبخ استغليتها فرصه اسأل عمتي استحي اسالهه كدامهم
اكولج عمه جهاد تريك الصبح
.. لا والله ماقبل يكول ياكل بالطريق اذا جاع.
... هاا لعد عمه شمرتي وراه مي حتى يوصل بالسلامه؟
.. هههه فدوات لكلبج مشغول عليه اي شمرت وراه الله يهدي الج ان شاءالله
ابتسمت وكمت غسلت
بعدها رجعت الها عمه خابري شوفي وصل بس لتكوليله اني كتلج عفيه
ام جهاد .. بابتسامه صار بنيتي روحي انت هسه اخابره.
جهاد *
خابرتني امي جنت بعد ماواصل وكفت بالطريق افول بانزين.
كلتلي جنه هيج كالت وهيج
فرحت قلبها عليه رغم اني ماذيها
من ارجع اعوضها.

جنه *

مرت ايام وجهاد بالبصره واني وحدي والغرفه تقمت
كلش وتجيلي افكار غريبه احس صاير بيها شي اكول خاف مرته ميته هنا اخلي المخده على راسي وانام.

بالنهار ضووجه كلش.
ضمياء ملتهيه ويا خطيبها وكله تخابره او تطلع ويا
رونق ملتهيه وياجهالها وخاصة عدهه ولد عمره شهرين ماخذ كل وقتها ومن تفرغ تنضف البيت
اني الايد اليمين لعمتي بالشغل بالمطبخ مواعين اغسل وشتحتاج اسوي.
كواكب تطب منا وتطلع منا.
واذا اجت تجيب اخبار المنطقه كلها
هي تزوجت هي جابت ذيج تطلكت ووو يصير راسي بكد المكيف من الدوخه.
مره كاعده يمي بالغرفه ودتحجي وتلغييي قاطعتها كتلها خاله انت ليش لهسه ممزوجه ؟؟
كلت لو ابتليت على عمريي
... وانت شعليج وشنو هالسؤال هذا ماتستحين هذا سؤال خاص ومحرج شكوو تسالين ليش صيرين فضوليه.
طلعت من الغرفه ونزلت وهي تدردم عليه.
خلتني صافنه.
ومنها شدت وياي كواكب وكرهتني بعيشتي.
مرت ال 15 يوم بسرعه واجه جهاد.
جنت بالمطبخ وسمعته ديسلم على اهله
صعدت فوك ركض
ودخلت بالغرفه نزعت شالي وبدلت كلبيتي
ووكفت ع المرايه وفتحت شعري وسويت نفسي دمشط.
دخل هو وعيونه عليه
مباوعتله ولاسلمت عليه
خله جنطته بالارض وفتح حزامه وطلع قميصه من البنطرون اباوعله بالمرايه يباوعلي وهو معصب وده يفترسني.
مهتميت لنظراته اخذت العطر وظليت ارشرش واسمعه يكول.
.. هااست اشوفج ضجتي لان جيت ؟
جاوبته..اي والله جنت مرتاحه وماشاده اعصابي وجودك يسببلي ازعاج وحاله نفسيه.
تقرب مني ويشم بشعري
جهاد بهيام كاذب..بس اني جنت ضايع بدونج.
. ابتعدت عنه متقرفه منه.كتله..خاف ضايع لان مالاكي واحد تفرغ عصبيتك بي؟
جهاد اقتربت منها مره ثانيه وسحبتها الي بقوه تجاهلت اباوع لعيونها ركزت بنظراتي على شفايفها كتلها ...افااا اني مفرغ عصبيتي بيج
... جاوبتني بقهر...يالله انوب فوك ضيمه كذاب..
اللتهمت شفايفها بعمق بادلتني القبله ببراءه و قلة خبره.
حسيت بيها محتاجه تتنفس بعدت شفايفي عنها
كتلها بعدج زعلانه عليه.
... اي بس مو هوايه.
.... شنو اليرضيج بس كوليلي بس كون مو شي من الممنوعات الي فارضهن عليج.
... امممم
.. هاا شنوو
جنه.
خليت ايدي على صدره وبديت افتح دكم قميصه برقه وارفع راسي اباوع لوجهه وكلما اباوع لعيونه يصدهن عني دنكت وجهي وكملت افتح الدكم
.....ضمياء وعمتي حيروحون للسوك
تريد تجهز لعرسها خليني اروح وياهم حبوبي.
... ههه حبوبي ؟؟
... اي انتوا تكولون حباب واحنه نكول حبوبي.
.... حلوه بحلكج.
.. يعني تقبل اروح وياهم ؟؟
... ننظر بالقضيه ونشوف
... يلا سيدي الملازم اول عفيه حبوبي حباب بعد شتريد اكولك ادكلك تحيه.
جهاد .. ابتعدت عنها اضحك على سوالفها احس تعبي مال الطريق كله انزاح اخخ بس لو عيونها غير لون جان يمكن كدرت انسى.
كتلها خلي ارتاح هسه ويصير خير.
... يعني افهم من كلامك بيها مجال توافق.
... جهاد بعصبيه .. جنه تردين تنكتلييين لاتلحين مااحب النگ
.. جنه .. برطمت شفتي كتله صار.
راح احضر الك اكل وطلعت من الغرفه ادردم
بسرعه يثور جنه بركان. هسه شكنالك عيني يبوو الله يصبرج يارووح.
وصلت لدرج وادردم فتح الباب
..تره جاي اسمعج
... يبووو مو ذانات ذاناتك كارثه.
جيت اوكع من الدرج جان يلزمني ويخليني على صدره بسرعه.
بعدني وهو يباوعلي بلهفه ويعض شفته.
باوعتله اضحك بفهاوه خله ايده على عيوني وغمضهن الي كال لتحجين عليه شفتي شلون الي حوبه.
لزمني من اكتافي الوره ونزلني اول بايه من الدرج.
وراح نزلت واشوف كواكب جانت تباوع علينه
استحيت ودنكت راسي وبكلبي اكوول يبوو شكد فضوليه.
وصلت يمها ظلت تباوع ليفوك ولازمتني من ايدي
كواكب .. اكولج جهاد فوك
...اي بالغرفه.
.. اكول ليش يخلي ايده على عيونج ؟؟
... ماادري ليش ؟؟
... يعني معقوله متعرفين ؟؟
... لا كولي
ظلت تهف بيدها وراحت
شغلت تفكيري مره سمعته يكول لامه مااطيقهن عيونها يشبهن عيون رؤى زين شنو الربط ؟؟ وشبيها رؤى والله مداافهم هسه احضر اله الاكل واروح اسأله بعد مااصبر اريده يوضحلي كل شي.

مشيت للمطبخ.
طلعت مواعين صبيت اله مركة باميه وتمن
بيوم الي يريد يجي عمتي تسوي باميه لان يحبها جهاد.

حضرت الاكل على ميز الطعام بالمطبخ
وصعدت اصيحله دخلت شفته
متمدد ع الجربايه .. ومخلي اديه على عيونه واحسه غركان ببحر من الافكار ..

صحته جهاد يلا انزل صبيت الاكل
جهاد وخر اديه ورفع راسه باوعلي وكال
.. جيبي هنا جنه مابيه انزل تعبان

جاوبته ... ماشي. هسه اصعده
نزلت جوه خليت الاكل بصينيه وصعدته فوك.

دخلت للغرفه خليت الاكل بالكاع.
ورحت يمه مدد ع الجربايه ومخلي المخده ع وجهه وبس بالكيمونه.

كعدت يمه امرر اصابعي على صدره لزمني من ايدي وعصر اصابعي ..

كتله يلا كوم تغدا
سألني :-انت متغديه ؟
رديت :- اي بس هم اكل وياك ع الواهس

اخذ ايدي لشفايفه ودنك راسه وهو يبوس باصابعي يحجي ومدنك
كال بحنيه جنه تحبيني ؟؟
جاوبته بعد لحظة تفكير ماادري والله ...

رفع راسه عكد حواجبه لعد ليش تخافين عليه ليش
تهتميلي ؟

ماانكر اخاف عليك وضجت حييل من رحت واشتاقيتلك بس ماادري اذا احبك او لا !!

اممم كومي كومي خل اكل احسن
كتله بضحكة "- هههه شبيك انقهرت.
رد " دروحي ماعاش اليقهرني.

ضحكت
كعد جاي ياكل كعدت كباله اريد افتح ويا الموضوع ماجاي اعرف محتارة كلش .

شون اساله من تزوجنا لهسه ماسئلته ولا مره عن مرته لازم اسأله بلكي اطيح على علته واكدر اتعامل ويا اريد اعرف هي شنو بالنسبه اله يحبها لا متاثر لموتها وهيج جاي يعاملني بهاي القسوة والوحشية .
كلت احم
رفع راسه باوعلي مستغرب ثواني وكال
_ .. شبيج متاكلين ؟؟
كتله .. ردت اسألك شي
.. سألي شبيج تحمحمين ؟؟

.. اكووول زوجتك هم جانت حل..
اريد اكمل شمر الخاشوكه حيل ركعها بالصينيه

.. جهاد بعصبيه لا تسألين لا تسألين مو شوفيني جاي اسمم ارتاحيتي من سممتيني ويفرك بوجه واديه ترجف

....جنه بزعل...على كيفك هسه اني شحجيت كفرت خو ما كفرت
كلب صحن التمن نصه وكع بالكاع ونص فوك المرك ومنا ومنا تطشر كله ...

جهاد بغضب اي اي كفرتي كفرتي كام على حيله ضرب الميز بكل قووته.

حجيت بغصه ودمعه لمعت بعيني .. علئ كيفك لو ندري هيج حبيبة كلبك رئاوي تحرك كلبك ماذكرناها

حسيت كعدت الوحش الي بداخله تقرب مني وهو يفح من العصبيه ضربني راشدي افقدني السمع للحضات.

اختنكت حطيت ايدي على خدي وكوه اتنفس.واشهك بالبجي

..رفع اصبعه بتهديد والله والله اذا مرة ثانيه سمعتج جبتي سيرتها اخليج تلحكينها فاهمه.

رجفن شفايفي وكتمت الغصه داخل صدري حركت شفايفي بهمس من الخوف الله يرحمها...

سمعني تقرب مني وهو يصك اسنانه اطلعي بره ضليت مستقرة بمكاني شلون اطلع واني بهاي لحاله...صرخ بعصبيه اطلعييي بررررررره
لزمني من اكتافي ودارني وهو يطلع بيه بوحشية وعنف حسيت اطير طير بيده من يدفع بيه

طلعت وكفت باب الغرفه حطيت ايدي على شفايفي امنع صوت بكائي، حالتي يرثى الها من ضربني راشدي انكسرت القراصه براسي لان انضربت بالحايط ونفتح شعري ضليت محتاره انزل اضل كاعده بباب الغرفه.

همزين ماكو واحد من حمويني
نزلت جوه بسرعه اكو شال على الدرج اخذته وخليته على راسي
ماكو مكان اروح له غير للمطبخ
رحت اجر خطواتي بجسد منهك موجوع
دخلت للمطبخ شفت كواكب كاعده ع الكرسي
ومخليه رجل على رجل وتشرب جاي وتطلع صوت
ردت ارجع بس وين اروح

كملت مشيتي وهي تشرب جاي وتباوع للستكان
باوعتلي درت وجهي كامت على حيلهه
وتطل بوجهي وتتفحصه بعيونها
.. شبي وجهج

.. بتلعثم كتلهه مماكو شي وكعت على وجهي
.. هاا واضح بس على ايد منو وكعتي وطبعت اصابعه بخدج.

.. توترت والقهر بيه صار اضعاف كتلهه ماكو شي خاله
.. اكوول شبي يصيح جهاد

رديت عليها وكوة لازمة نفسي حتى ماابجي واشهك .. ماكو شي ليظل بالج انتي انه زينة

.. الله يعينج بعدج ماشفتي شي يا جنوه
باوعتله بقهر ونشغة طلعت مني .. شنو شنو ششوف بعد

كالت .. ماكو شي سلامتج
.. خاله عفيه احجيلي عن مرة جهاد فدوه رحتلج
.. اي اي احجيلج بس هسه اريد اروح لبيت اخوي عازميني.

كواكب سرفت ماتبقى من الجاي بالكوب وراحت تمشي مثل باتمان هي وعبايتها.

بقيت انه وحدي بالمطبخ ميته قهر على حالي
ليش هيج اخوي شمرني هالشمره هاي
يعني هو يعرف صديقه هيج مخبل ويثور بسرعه اشو شمرني ولاسأل عني
ماعول يرتاح مني ويخلص

كعدت بالمطبخ حد ماااحس اختنكت حاضنه رجليه وكاعدة صافنة ودمعي مانشف ووجع راسي ووجهي

ونوب كواكب راحت وخلتني معلكه وماحجت بس اريد اعرف شبيهه مرته.

رحت يم ضمياء كعدت
صفنت بووجهي وبحيرة وقهر كالت شبيج جنة وجهج ءاا

كتلها على كل الصار من سؤالي لجهاد الى ثورة غضبه وانفجاره وقسوته ووحشيته وضربه الي

ورى مخلصت توسلت بيها توسل عفيه ضمياء كوليلي احجيلي عن مرة جهاد

كالت بسرعة تحاول تسد السالفة
.. يمعوده شحجيلج راحت لدار حقها لاتفكرين بهذا الموضوع

.نشغت . اخوج راح يموتني ضمياء انه الي يوم ميتة على ايده

كالت .. هو جهاد هيج يكسر ويجبر تحملي شسوين بعد
باوعتلها وصفنت شويه وجاوبتهه.. مشكوره ماقصرتي ضمياء

كالت .. جنووو لازعلين تره ماكو شي ينكال ماتت وخلص وكلنا نموت.

هزيت راسي بس ممقتنعة بكلامها ابد اكو سر بالسالفة

عفتها شفت رونق بالمطبخ فكرت اسالها
رحت غسلت وجهي بالمغسله.
وطبيت للمطبخ
جانت دتعقم الممه مالت ابنها
هاا رونق نايم النونو
اي والله هستوه نام خبلني.

اكولج رونق فدوه عندي حجايه وياج.
اي احجي
اكولج بالنسبه لمرة جهاد شلون جانت احجيلي عنها.
لايابه مالكيتي غيري.
ليش محد يحجي عنها ومحد يجيب سيرتها
احجيلي انت فدوه.
اسالي جهاد
سالته وكلب الدنيا
يمعوده رجلج اخاف منه الله يكفيني شره خليني بعيده اروح لحسوني لا ياذي اخوه.

زاد الغموض عن مرة جهاد وعن جهاد نفسه انتظر كواكب اكيد هي الي راح تحجيلي معتمدة عليها ماكو غيرها.

بقيت كاعده بالمطبخ ع الارض والدمعه بعيني مشتاقه لأمي محرومه حتى من صوتها يربي ليش هذا الجاي يصيير بيه.

العصر جتي عمتي وهم شافتني على هي الحاله وظلت تواسيني
وتوعدني انه هو يتغير ويراد صبر بس. تكول مشي الوضع وهم انت راح تتعودين عليه شويه شويه

كتلها عمة ماسويت شي بس سألت عن مرته

ردت هالمرة سويتيها وشفتي شسوة بعد لا تعيدينهه يوم

هلكد سيرتها خطرة هو شنو الموضوع غير افتهم اذا اكو شي يخصها ليش ماحجيتو بالخطوبة

عمه شنحجي مو كلنه ميتة قابل هسه هي ضارتج بشي

ماضارتني بس جهاد يتصرف بغرابة وبسرعة يثور ويضرب ويكسر الي يوم ميتة على ايده

لا يوم بعيد الشر مايسويهه وانت هم لا تستفزينة وعرفي طبعه شنو يضوجه شنو يعصبه ولا تكررينه

علما اعرف طبعه انه كون تحضرولي كبر بالنجف من هسه احسن اشو هو ماينعرف

ضحكت كالت اسم الله يوم شبيج تفاولين

والله عمه اليوم كالي اخليج تلحكيهه

هي صفنت .... وانه كمت من يمها ...

صار المغرب وحضروا العشا بقيت بالمطبخ ومارحت تعشيت
صاحوني مارحت مااريد اشوفه مااشتهي بعيشة الله على الجاي يسوي بيه من صدك كارهته وحاقدة عليه.

صعدت للغرفه طبيت للحمام احس حمضت بالمطبخ
سبحت وطلعت بدون ماامشط شعري طفيت الضوه ودخلت جوه اللحاف.

غطيت كل شي بيه وظليت ابجي بس صدى شهكاتي بالغرفه مسموع.

حسيته دخل للغرفه كتمت اصوات نحيبي بالكوه عليه.
بس ماكدر اكتم انفاسي بعدهه مليانه بجي

صرت اشم ريحة الجكاير بخشمي عرفت جاي يدخن
دخل ويايه بالفراش وسحبني اله هنا اني ماقاومته مستسلمه مو اله لا وانما لحظي العاثر.

حضني بقوه شهكت بالبجي وهو مخليني ع صدره وحاضني وظل يقبلني واني مانطقت بو لا حرف.

يهمس بأذني اني احبج سامحيني على عصبيتي
احس لساني ثكيل نسيت حتى النطق.

رجع نومني ع ظهري وتقربلي بدون ماامتنع.
خلص وكلي باجر اذا يروحون حتى تروحين وياهم للسوك وراح انطيج فلوس اشتري الي يعجبج.

.. جنه جنه ليش متحجين
لازم وجهي ويقربه عليه ويحاجيني
لج جاوبيني شبيج.

اباوعله ودموعي تجري
وهو استمر يحجي وياي وانه جثة هامدة بس نفس يصعد وينزل

وهو يحاجيني بخوف جنه لاتخوفيني لا تخليني بقلق عليج حاجيني شبيج. لج لتسوين هيج

دفعته وخررر مو اخذت الي تريده بعد شكوو
ولج شنو اخذت الي اريده انت مرتي وهذا حقي.

صيحت لعد هذا هووو وخرر.
نزلت من السرير وركض للحمام قفلته.

بقيت بالساعات بالحمام.
لحد مااحس الاوكسجين خلص.
طلعت شفته نايم.

اخذت فراش وفرشت جوه خليت راسي ع المخده بس افكر.

شبي وليش هيج يتصرف وياي
مرات اشوفه وحش ومرات اشوفه انسان هادئ،حنون
لو ارجع لاهلي لو اطيح على علته واغيره لصالحي.

احس المخده شبعت قهر عليه وشربت كل ماي عيوني.
يوم ثاني الصبح كعدت اجه يمي ع الفراش انطيته ظهري حظني من خصري وانه على هالحطه
ويتغزل بيه ولا جني اسمع اله.

جنه احبج جنه.
تنفست كتله ليحب مايسوي هيج.

لااحبج وغصبا عليج وانت لازم تعرفين شون تتعاملين وياي واني اغيب عنج هواي لازم تتحمليني

وخرت ايديه من على خصري كتله يعني تجي بهال15يوم تعيشني بجحيم هم مايصير.

... ميخالف امون عليج.
يله كومي نتريك حتى تروحين ويا امي وضمياء للسوك.

... ماروح انه مو مال طلعه وسوك اني مال قهر وظيم.
.. يلا لاتعاندين ولاتدلعين وكومي.
ظليت معانده شالني وداني للحمام نزلني يم الدوش وفتح عليه الماي
سبحنييي ويلعب وياي ولاكانه البارحه ضاربني ومأذيني.

خلصنا وطلعنا
تريكنا انطاني فلوس كال اشتري الي يعجبج.
كتله ماشي بس من ورى خشمي بعدني رغم هو صالحني بس كارهته.

رحنه للسوك طبعا سوكهم مااعرفه بس اخته اختارت سوك بغداد الجديده..طلعنه واحسه ممقتنع لان رايحه .

وجهاد ظل ينطي اومر مخلاني اخلي مكياج ولبست عبايه وكال البسي جواريب واني ماعندي واخته هم ماعدها غلست عليهن ومالبست كلت اشوو رجليه جنهن جواريب

لبست بدي طويل بيجي وبنطرون جوزي وشال بيجي وحذاء فلات بيجيه ولبست االعبايه بي ردن مطرز حلوة وحطيت بس كحل.

طلعنه شفنه جهاد واكف بالباب
حسيت انقبض قلبي كلت هسه يرجعني او يزفني حاولت ماارفع راسي كال هااا رايحين
جاوبته عمتي...اي رايحين
كال اصعدوا اني اوصلكم وبالفعل صعدنه عمتي كعدت بالصدر واني وره حاولت مارفع راسي مسافة الطريق وصلنه ونزلنه هو راح كال خابروني واني اجيكم .

نزلنه واني فرحانه بشكل السوك جديد عليه وكبير وبي شغلات حلوة تعبنه حييييل ضمياء مخلت شغله مااشترتها وذوقها صعب كوه تقتنع بشغله تعبتنه حيييل

بعدها دخلنه محل للاحذيه وجنط جان كووولش راقي عمتي دخلت للمحل الي بصفه طكتني الشمس وتعبت حيل احس لحذاء كصت رجلي..كعدت على الكرسي فحطانه .

وضمياء تضحك عليه..ولج المايعه طلعتي متتحملين وجهج صار احمر شلون جنتي متحمله حر البصرة
جاوبتها..ولج اسكتي والله تعبت يمتى نرجع عاد لو ادري ماجايه

اجه ابو المحل جان شاب حلو حييل ومرتب شعره مي نازل منا ومنا قدملي كلاص مي مسلفن

استغربت بس اخذته فتحته انطيت لضمياء شربت وشربت وراها
كال تفضلي المحل كوله كدامج
ابتسمت باارتباك جاوبته شكرا
جابتلي ضمياء الحذاء لبستها
كال والله انتي زدتي لحذاء جمال

شفت نضرات ضمياء الغاضبه واني ارتبكت
كال رجليج بيض اختاري الماروني

ضمياء كالت بعصبيه..كومي ام سجاد الاحذيه محلوه
هو جاوبها..اهااا شوكت صارت ام سجاد فدوة طلعت مزوجه
طلعنه من المحل وضمياء تسب باابو المحل واني خفت واهدي بيها
اجت عمتي جانت قريبه منه وطلعنه
من السوك

خابرنه جهاد كال مشغول وبعيد عنكم انتوا ارجعوا.
عاد نريد نرجع ضمياء رادت كم شغله وهم رجعنا افترينا.
بعدها رجعنه بتكسي للبيت.

*جهاد
رجعت للبيت وهنه بعدهن ماجايات
صعدت فوك ريحت شوي
بعدها نزلت جوه

سمعت صوت ضحك صادر من المطبخ تقربت للصوت
اسمعها دكولها والله بعد مااخذج ويايه للسوك كوله فكت حلكها عليج

ضحكت بصوت ناعم ..ههههه والله ضحكت عليج من دكولين ام سجاد

ضمياء دكولها ...اي ولج خبلني شلون يباوع عليج اكلج بنضراته ويكول رجليها بيض يخبل عليها الماروني
جنه...ههههههه واني لثوله مالبست جواريب وجهاد حذرني عوود

دخلت عليهن بعصبيه..شفتهن كمزن من مكانهن وحده ردمت بثانيه

جهاد بعصبيه...ولج كلبه شنووو هذا الحجي مكيفه حمارة ليوم اله انهيج

جنه ...شمر لكلاص عليه انركع بالحايط ضلينه نرجف
اجت كواكب وامه تركض.

امه لزمته...حبيبي جهاد علي كيفك شبيك تخبلت
جهاد بعصبيه...اي تخبلت تخبلت كل مااريد اعدل اسلوبي وياها ترجعني للصفر مكيفه وتتمضحك زحفولها بسوك

جنه بخووف..والله والله حتئ ضمياء تعاركت وياه اني مالي شغل

تقرب مني وهو يتهدد وامه لازمته مالج شغل هاااا؟؟؟
الام.. بعصبيه...ولج ضمياء طلعيها وروحي لغرفتي
خطيه ضمياء طلعتني واني عيوني مراقبته خاف يخطفني من بينهن وهو بعده يتهدد

نزلت رونق تركض شكو شكو شصاير
ضمياء...ماكو شئ بس طلعنه جنه تهريب .

رونق... ليش شبي جهاد
ضمياء دولي هسه اني روح اشرحلج

كواكب مدت راسها من باب لمطبخ هااا رونق هسه اجي اسولفلج

رحنه للغرفه واني ضجت ضليت احجي
عابت الشايب المراهق عود يغار لمثله تقاعدوا عن قلة الادب واحلام اليقضى ... اول مرة اشوف شايب يغار

ضمياء تضحك...همه شياب هيج عقولهم

وبعد مالتقيت بي. بس من تصرفه هذا قررت اخابر اهلي واحجي لمحمد وعلا على سوالفه بلكي يحاجونه شنو اني تايهه هيج يعاملني

اما كواكب اله اخليهه تحجيلي عن مرته لازم اعرف شنو سر الغموض الي يحيط بيها.

.
جنه.
بقيت يم ضمياء الليل كله وهي تحجي وي خطيبها وتنصي بصوتها مرات شكد رومانسيين.

خلصت مكالمه.
انتجيت على عكسي واباوعلها اريد استدرجها بالحجي
كتلها.. ضمياء كوليلي مرت جهاد وين ماتت ؟؟ بالغرفه مالتنا مووو ؟؟

باوعتلي رافعة تك حاجب وكالت... وليش هالسؤال ؟؟
جاوبتهه اتصنع الخوف... لج والله انقمت بيها واحس بيها شي صاير ولادارتاح ويااخوج يمكن نفسهه بي لهسه !!

دارت وجهه كالت جنة جنة شبيج... دكولي ياالله.
.... عدلت كعدتي فدوه عليج بخطيبج احسان كولي.
... اووو لج لاتحلفيني

.. لعد كولي وين ماتت
... ماماتت بالغرفه بالمستشفى ارتاحيتي

كتلها بصدمة ليش هي جانت مريضة

باوعت بخزرة وعدم رضا وكالت خلي انام تصبحين على خير جنة ...
وغطت راسهااا

تؤ تؤ هف... اوووو ليش الكل يتهرب من هذا الموضوع والله متت متت متتت وظليت اضرب على المخده.

وخرت الغطى ضمياء ..وصاحت. ولج تخبلتي بهالليل.
كمت من الفراش نكته بقوه
كتلها دنطيني تليفونج
.. ياا حتى جهاد يعدمني العافية دمشي ولي

.. حرام والله اريد احجي ويا علا مو عندج رقمهاا
.. حذفته دوخري لانبتلي على عمرنا ورجلج يسويلنه سالفه ترى بعده معصب من الصبح لهسه

... مايسوي شي هسه نايم فوك وميدري بالدنيا طشت لو رشت جييبي ضمضم عفية حبابة حبوووبة

... اوووو شتردين تحجين وياهه بهالليل كعدي راحة جنة.

... معليج انت تره والله هسه اطلع من البيت
... وين ترحين تردين تلحكين رؤى ؟؟
... ايي ياريت الحكها يمكن ماتت من قهر اخوج هنيالهه ماتت وارتاحت.

.. احم هاج التليفون بس لتحجين بصوت عالي اني رايحه اراقب الوضع بره.

اخذت التليفون من ضمياء ودكيت رقم علا.
باول لحظه كالت بيها الو بجيت

علا .. شبيج جنوو خوفتيني عليج كولي خيرج ؟؟
.... تعبانه علا ميته ضايعه هلكانه والله ماجاي اتحمل اعيش هنا والله. انت شنو من اهل ماتحسون بيه

... ليش شنو صاير منو وياج حياتي ؟؟
...اخخخ شكد بارده دخيل الله ولج النار بيه وانت بهالبرود

.. اي غير اعرف شبيج.
.. جهاد موتني عفيه تعالو اخذوني كلي لمحمد ليش هيج يورطني بصاحبه المخبل.
.. عيب جنه هذا رجلج شجاي تحجين انت موزغيره ولان بعدج باول ايام العرس كلنا هيج جنه نعاني وبعدين تعودنا.
... لج شكوكي وعصبييي عصببيي ليكلك بركان يثوررر بسرعه بسرررعه.
... كلهم هيج اعصاب حياتي وانت اكيد مامقصره بلسانج
... اخخخخ مااتحمل تعالوا اخذووني.
.. اكلج انت تردين ضحكين العالم علينه لو تدرين بام ثامر شتحجي عليج ولج لهسه تكول عنج فكر وموتي ابنها وكايله كدام عمتي من سامعه بيج تزوجتي
"هسه تعم على ابنهم وتموته"
هيج كالت تردين الحجي عليج تره الرجال انت تكدرين سيطرين عليه وتقربينه الج وتحبببينه بيج وحتى يصير محبس بيدج حاولي تروضينه.
.. ادري جلب هو حتى اروضه.
.. ولج يامدمغه الاسد يروضونه مو الجلب.
.. شمدريني هم كلهم حيوانات.
... لاتخلين امي تنقهر عليج ولج جنه انت تزوجتي بعد اذا طلكتي تدمرين دمار اخذيهه مني جم مره طلكت تندمت ودمرت
.. انت هيج اشوفين.
... اي حبي انت بعدج زغيره والحياة كدامج ورجلج واهله خوش ناس احنه مو شفناهم وتكدرين تسيطرين انت حلوه وخلي عندج اسلوب يحببه بيج وكل شي يصير تمام لاتخلين الناس تحجي علينه يبعد روحي.
.. ادعيلي الله يهدي الي
.. ماانساج بالدعاء صدكيني وبس نجي زياره اجيلج
... ماشي
سديته منها بس كلش انقهرت من كلام ام سامر بعدهه تحجي عليه. وكلام علا صح هسه بس اطلك يصير الحجي عليه بالزايد.
شسوي يربي شون اتصرف ويا جهاد واروضه ع كولت علا.
لازم احل لغز زوجته وازيح الغموض حول قصتها بعد طول تفكير انهد حيلي واحس عقلي تعب شهالرجال هذا كله غموض.
نمت الليل بغرفة ضمياء يوم ثاني كعدت طلعت من الغرفه صار كبالي عاكد حواجبه دنكت راسي وفتت مره ثانيه للغرفه يمه خفت من عيونه هم شايب وهم يخزر.
دخلت ضمياء.
كتلها وينه جهاد كالت طلع بالحديقه.
صعدت فوك دخلت للغرفه لملمت الفراش ورتبت السرير اخذت النفاضه مال جكاير شمرت كطوف الجكاير وغسلته ورجعتها لمكانها اخذت ملابسه الوصخه ونزلت جوه شفته ع الدرج يخزرني متت خوف وكفت بمكاني هو صعد للغرفه دخل وطبك الباب حييل.
نزيت ونزلت ركض لايجي ورايه.
باوعت شفت كواكب تريد تطلع ركضت وراها
احجي وانهد هاا خاله وين رايحه
ليش اسم الله
هااا
ليش اسالين
مو ع اساس تحجيلي كول شي
بعدين بعدين اريد اروح للجيران.
وطلعت طايره هي وعبايته جنها خفاش.
شفت عمي كبالي كتله صباح الخير كال صباح النور ورحت للمطبخ اساعدهم.
مر اليوم هيجي جهاد يطب زعلان يطلع زعلان وانه كلما اشوفه اختل اخاف منه .
الى ان راح للبصره واحنه منتحاجه.
مليت وتعبت لو اني ازعل لو هو احس لعنة مرته وسامر تلاحقنا ومداتخلينا نرتاح.

*جهاد.
بعد فتره رحت للبصره وبيوم جنت
جنت كاعد الكرسي بالمكتب وكدامي اوراق المجرمين ويمكن مضلومين وقعت نص وباقي نص حسيت بملل وتفكيري محصور بجنه قهرتني اخر مرة حسيتها فرحانه زاحفيلها لو ما امي جان نهيتها بس الله ستر ضلت طول الايام الموجود بيها بيتنا من تشوفني تنهزم وماتواجهني... حتئ تنام عند اختي واني اصلا مااريد اشوفها زعلان عليها قهرتني ليش تضحك. واني على هالحال دك تليفوني رفعته رقم بدون اسم فتحت خط اجاني صوت انثوي حزين
جاوبت...الووو تفضلي منو وياي؟؟

جاوبت بصوت مكسور...اني زوجة عامر
وگفت مصدوم وكوه سيطرت على نفسي جاوبت بعصبيه...خير شرايده
جاوبت بهدوء وعبره...اهدأ شويه اني وانتَ نفس الجمره مشتعله بداخلنه.

عضيت شفتي بعصبيه...والله جمرتي اقوه
جاوبتني بغصه...ااااه ياجهاد يمكن جانت رؤى تضحك عليك وتمثل دور البريئه وذيج الايام ممتعذب بس اني... اني...
قاطعتها بعصبيه...انتِ شنووو؟؟
جاوبت بألم...اني عامر يحجي علني
جاوبتها بفحيح مرعب..شنوو قصدج؟؟
ببكاء...كالت دائما اتعارك وياه واكوله شنوو لعندها وماعندي
يكولي هو انتِ شنوو وتقارنين نفسج بيها من ترحين الها فدوه
سكتت مجاوبت واني افتر بغرفة المركز مثل الاسد الهائج والجريح
كملت يكول شنوو من جسم شنو من طول شنوو من شعر لمعاني تجنن اله انتي عبالك اخويه ونايم بصفي
دعيت الله يفضحها.
جهاد كتلها بصياح ...اسكتي اسكتي لاتكملين
كملت وكأنها تزيد جروحي...ليش ماتريد اكمل ماتريد تعرف حقيقة مرتك..جهاد اني جنت اكوله لعامر هاي وحده شهوانيه وين تلكه مثل جهاد ومجلبه بيك انته شنوو بيك يجذب؟؟يكولي الحب هي تحبني
ركعت الموبايل بالحايط واني عباره عن كتله من الغضب صرت نار كبرا ..بنت الكلب مخابرتني حتئ تزيدين جروحي اني ناقص ماخلصت من زوجج الكلب اطلعيلي انتي شمرت الاوراق والختم وشكوو شئ موجود على المكتب وتنفسي ضاق حسيت اختنكت بيه صرخه وجع صرخة الم صرخة كلب كله جراح بهاللحظه دخل عليه شرطي ومحمد اشرت بااصبعي اطلعوو برررره
تدنى مني محمد وهو يهديني...سيدي اهدئ مو هيج شكوو شصاير؟؟ همس جنه بيهه شي مزعلتك بشي
استغفرت ربي بداخلي اني وين وهذا وين اذا على جنه محلوله بس المصيبه الي طلعتلي زوجة عامر
كلما اريد انسى احد يذكرني.
مجاوبته كتله اطلع اريد ابقى لوحدي.
ضاك بيه نفس الغرفه اخدت مفاتيحي وطلعت من المركز بدون مااترخص من الضابط.
رحت على كورنيش شط العرب المنظر حلو ويريح بس النار الي بكلبي مي هذا الشط كله ماطفيها.
تذكرت جنه وسوالفها مشتاق الها وبعد 3ايام يلا انزل
باجازه واني زعلان عليها وهي عدها كبرياء متصالحني شكد صالحتها اني ولاردتهن الي.
رجعت للشقه ضربت الدوام ورجعت لبغداد.

*جنه
من اجه من الدوام وهو زعلان ومقهور مدري شبي ومافكر حتى يصالحني شكد انتظرته شكد اصير كباله. اتمنى يصالحني مثل كل مره ماكو ولا باوع الي. بس اني عادي تعودت يااما اني زعلانه يااما هوو عمتي صاحت عليه كالت جنه روحي رتبي الاستقبال اخاف يجونه خطار.
دخلت الاستقبال وبديت ارتبه نكتت القنفات ومسحت الميز والبلازما والساعه وكنستها وبعدين مسحتها وجاي اعلك بخور شفته دخل للاستقبال حسيت قلبي وكع يممه اجه الشايب المخرف
وكف مال مقابيل الدكمه مال الكهرباء مشكله بيها الشاحنه وهو عاكد حواجبه ووجهه مايبشر بالخير دخل الشاحنه بموبايله وشغل الدكمه اباوعله شكد مشتاقتله حتى العصبيته مشتاقه حتى لخزراته صدك ويا حياتي بطعم بلايا محلوه ..اجه يطلع اني همست بصوت ناصي جهااد
مارد عليه اجه يطلع سرعت بمشيتي لزمت ايده..ومحتار شكول راسا كتله جهاد انتضر خلي نتفاهم..ماطلع من لساني غير هالكلام.
وكف مقابيلي بغرور..خير رايده شئ..
جاوبت بكلبي هم شايب وهم مغرور..بعدها كملت بحنيه جهاد الئ متئ اضل هيج زعلان والله موقصدي اني شدخلني والله حتئ اسال ضمياء ولا باوعت بخلقته اصلا يلعب لنفس جنه قرد..وبكلبي لا والله شكله حلوو بس شنسوي كمنه نقلد علئ خلقه الله من وراك.
جهاد بزعل..وشكوو ضحكين عبالك مكيفه وفرحانه من تسولفين انتي وضمياء
جاوبت ..اي لان دكول ام سجاد اني اكول هو وينه سجاد ..يالله ان شاءالله يصير عدنه ولد
كال لعد راضيني
جاوبت مبتسمه وفرحانه شعندي غيرك ومااراضيك.. اليوم اسويلك عصير برتقال يخبل من هذا الي يحبه قلبك.
ظل يضرب جبينه مو قابل وكال...لا اله الا الله اكلها راضيني دكولي اسويلك عصير برتقال
جنه بغباء..لعد شتريد
جهاد بهيام...اريد بوسه حضن
جنه بصدمه...يااا موعيب عاد نصعد فوك احسن
جهاد ...لا البوسه هنا وبعدين تطور الامور فوك
جنه...ياجهاد لحد يشوفنه
جهاد..منو يشوفنه هي بس كواكب ضاله تفتر جنها ذبانه
نزل راسه وهي يقبلني قبلات هادئه وبعدها يتعمق واني مبادلته بحب وناسيه نفسي
ماسمعنه بس عيطه واقتحام مفاجئ والله انرعبنه رعب جهاد كمز واني كلبي يدك
كواكب بعصبيه....هيييييي ماتستحون ماتخجلون تنحرفون هنا المن بعد منطينكم غرفه غير حتئ تخلصون قله ادبكم بيها
شفت جهاد رفع راسه بعصبيه...عمتو شلج شغل بيتنه وبكيفنه
كواكب ...عمتوو مو انت صغير ولك رجال شكبرك شكدك عمتوو.
جهاد بدون نفس..مو على اساس انتي صغيرة تذكرين البكر
كواكب بعصبيه...صدك ماعندك تربيه
جهاد ..ليش بالعكس اني تربيتج
كواكب...اني ربيتك لا والله مامربيتك ربيت فؤاد امجد بس انت ماعندك تربيه
جهاد عناد بيها رفع وجهي وهو يبوسني بخدي بسرعه..اها اها اها اني ماعندي تربيه انتي ليش مغثوثه.
ضربت لباب بعصبيه وراحت تدردم واني خجلانه وهو فرحان لان قهرها.
باوعلي يضحك كال
هااا شلوني
هههه شلونك بعد طيرت جبهتها ماظلت عدهه جبهه.
.. يلا خلصي شغلج وتعاليلي فوك عدنه مواضيع خلي نحلهه
... مواضيع ايييش ؟؟
ههه مواضيع تخص السياسه ويغمزلي كرصني بزندي وطلع.
رفعت ايديه للسما الله يهديك اليه ياجهاد يا ابن ساجده
رحت لعمتي بالمطبخ شفت يمهه كواكب جاي تلغي
باوعتلهه واستحيت كلش.
حاجيت عمتي بخجل وهي جاي تطبخ.
عمه تريدين مني شي ؟؟
ضحكت كالت لا روحي يم رجلج خاف محتاجج.
كواكب .. اي داده روحي بغرفتكم فوك مو بغير مكان.
جنه .. غصيت بالضحكه عرفت كواكب كايله لعمتي على الي شافته
كتلها اذا ردتي شي صيحيلي وصعدت فوك.
شفت جهاد متمدد ع السرير.
شافني ضحك واني ضحكت بوجهه
اخذت ملابس وطبيت للحمام نزعت كلبيتي غسلت
.
وطلعت رحت صوب الميز خليت مكياج ورشيت عطر.
وتوجهت صوب السرير كعدت بطرف الجربايه.
هو بيده الموبايل.
من شافني جيت يمه طفا وخله ع دولاب بصف الجربايه.
سحبني اله نمت ع صدره ضعت بين ايدينه
كلي هاا بعدج متحبيني
.. احبك بس من تأذيني اكرهك.
.. الحب والكره ماينجمعون سوه كولي اضوج منك.
.. ماادري مااعرف احساسي بساعتها.
... يلا تقربي يمي بعد
.. اقرب من هالقرب.
اي
قرب وجهه من وجهي متجنب النظر لعيوني
يباوع لشفايفي ولكل مكان بوجهي بس ميخلي عينه على عيني ...ع طرف لساني اريد اكوله.
هالكد تحب رؤى ومتريد عيوني تذكرك بيها انتابني الشعور بالغيره
وتحسرت.
معقوله اغار من ميته ؟؟!!!
باوع ع عيوني ونصه كال شبيج ممرتاحه ويايه
مجاوبته لزمت وجهه وقبلته بحب.
وتهنا بعالم العشق والرومانسيه.
مرت كم يوم.اريد احاجي كواكب مدترهم وعزمونه بعرس.
توسلت بجهاد اروح وقبل مع شروط كوومه
قبل لااطلع مية مره بدلت ملابسي لان ميعجبوو يريد حشمه اكثر لبست فستان محجبات طويل تركوازي شيفون.
قبل لااروح جيكني عشر مرات.
تاكد شعره مطالعه من راسي
جواريب ولابسه عطر مو يفح مكياج مو هوايه
ورحت.
دخلنه لبيت العريس وكعدنا وظلت عمتي تقدمني الهم.
كل شويه تجي وحده تسال انت مرت جهاد
اكوللها اي
تباوعلي وتسالني عيونج لو عدسات
كرهوني بعيوني اي مو افتهمت عيوني مثل عيون مرته بس مو هيج تلحوون.
باوعت لكواكب من بعيد شفتها تلغي وي مره وكلش مندمجه بالحديث.
هي بالاصل اجت قبلنا ماتفوت هيج مناسبات حتى تلغي
اباوعلها بحقد وبداخلي اتمنى احظى بيها واكعد وياها واسولف واخليها اسولفلي على رؤى.
بينما اني كاعده جتي مره كعدت يمي وكالت انت مرت جهاد

كتلها اي عبالك مرت الوزير كل شويه جايه وحده تسأل عني

استغربت ليش هالكد مهم لو شيقصدوون ؟؟
خاف ذني صاحباته.!! اممممم

المره قربت حلكها من اذني وكالت اكولج
كتلها نعم
الله ينعم عليج مرت جهاد الي انهزمت ويا ابن عمه مالكوهااا بعد

وخرت اذني من يم حلكها اباوع بوجهه مصدومه
منو؟؟ مرة منو ؟؟؟شتقصدين خالة

هي عبالها ماسمعت من الدي جي بس اني سمعت كلش زين كرررت كلامها كالت شبيج مرة رجلج رؤى هو مو جان متزوج قبلج هاي الي انهزمت لكوها لو لا ؟؟؟

انتابتني قشعريره بكل جسمي وكلبي انقبض
معقووووله
هي المره خاف مخرفنه
شجاااي تحجي
ظليت صافنه بوجهه للحظات
وتفكيري تشتت وتهت
كتلها خاله مرت جهاد ميته.
كالت ياااا كتلوها عاد شون بنيه حلوه هي الها عيون مثل عيونج انت اختها ؟؟؟
لالا مو اختها شجابني عليهاااا
اي والله جهاد مؤدب وحباب ميستاهل الي سوته بي ونوب انغدر من ابن عمه يايمه والناس ماترحم وتحجي الله يستر عليج ويخليج اله تعوضينه.
هي تحجي واني احس شعر راسي وكف من الصدمه معقوووله
واني نايمه على اذني وماادري هيج سالفة مرته وهو يكول ميته كذبوا علينه.
وخدعوني غشوني
زوجوني لواحد يطلع خابالاته عليه لان مرته خاينه!!!!.
هسه عرفت ليش يشك هسه عرفت ليش هيج خبل
نوب راح بالي بعيد وتذكرت اخويه محمد خاف هم يعرف بحقيقته.
زين ليش انغدر من اخويه. ابن امي وابوي
واني صافنه وهي تحجي سالتني
منو كتلها وابن عمه عامر وين ؟؟
سكتت كمت من مكاني رحت بعيد عنهاا
عركت احس جسمي ظل ينضح عرك يطلع ويا قهر
نفسي صرت اجره بوجع.
واحس مخنوكه وخانكني الالم
واسأل نفسي اني شنو مصيري ؟؟
ولشوكت راح يبقى هيج جهاد ؟؟
ليش هيج حظي لا وي سامر كعد ولا وي جهاد.
اسئله تتكرر بذهني ماالكه الها اجابه
زين شون راح ابين اله اني عرفت شوون ؟؟
بقيت مثل الفاقده.
العرس بعده بس اني اختنكت وهوسه اريد ارجع للبيت لا لا اريد اروح لاهلي.
مااريد اشوف جهاد كدامي بعد الي عرفته عنه
اكيد جهاد مو صاحي من تصرفاته متأثر بخيانة زوجته وعباله اني هم مثلها
مجرد التفكير بهالموضوع يسممني يأذيني.
طلعنه من بيت اهل العريس واني اغلي من الداخل الموضوع الي سمعته اثر بيه كللللش احس فقدت طاقتي وكنت شارده بذهني عن الكل حتئ ا لي حجي وياي مااسمعه فكره وحده ترسخت بعقلي هروب رؤئ ويه ابن عم جهاد حلت هوايه الغاز بعقلي حسيت الدمع تجمع بطرف عيني واختنكت بنفسي.
سمعت عمتي تكول يالله امشن بسرعه امشن بسرعه كلت بكلبي هه عليمن عرفت الموضوع كوله
جاوبتها رونق بااستغراب..خير عمه شكووو؟؟
كالت هاي كواكب فشلتنه جايبتلها جدر مال تمن من العرس
عاطت ضمياء مصدومه .ياااعزه
باوعتلها شفتها بعدها مطالعه من بيت العالم وهي شايله الجدر وحاطه عبايتها جوه ابطها رافعتها وتحجي بصوت عالي...نشكر منكم الله يكثر من امثالكم ان شاءالله مبروكين منكم المال ومنها لعيال
ركبنه بالسياره مالت حماي عماد هو اجه علينه وهي ركبت وصارت عليها الرزايل بفلس مو عيب ماتستحين هسه شيكولون علينه الناس مماكلين اموتينها جوع وهيج شايله جدرها...
جاوبت بعصبيه...شني دهر صابجن هو اني شسويت ماعوني مااكلته فرغته بجدر غير حصتي وجبتها وياي
ضلن يداهرن واني ولايمهن روحي طالعه كارها كلشي ابدي اطفر من السياره لان دخت من كركتهن مسافه الطريق وصلنه للبيت دخلنه
وهنه بعدهن يدردمن واكفات بالمطبخ ويحجن بصوت عالي وكواكب بعدها شايله جدرها تارسته تمن ولحم وفوكه خبزه وبطل لبن وخضره تارسته ترس جنت ابتسم بلا خلك وواكفه بباب المطبخ.
نزل جهاد من فوك على صوتهن اول مشفته احس گلبي انعصر واتلاشت ابتسامتي وحسيت الدمعه لمعت بعيني.
جهاد بعصبيه..خير خير شكوو خبصتن الدنيا صوتجن واصل لراس الشارع.
بس سمعوا صوته سكتوا ومحد حجه شي.
كواكب حطت الجدر بعصبيه علئ الكاونتر وضلت واكفه يمه عبالك احنه بزازين نريد نخمط جدرها.
جهاد عيط عليهم بعصبيه...شبيجن احجن انخرستن؟؟
كواكب..نسوان عيارات جبت حصتي من العرس لو سون بيه فلك.
جهاد انصدمت كتلهااا...جبتي تمن من العرس؟؟
كواكب بعناد..حصتي حصتي
جهاد ...ادري شتكول علينه العالم ماعدهم اكل وطلعتي كدام الزلم بجدرج؟؟
كواكب..دروح كلها اخذت بجدوره
جهاد ... صحت لحسوني وكتله اخذ هذا الجدر انطي للدجاج مال ابو هدى جيرانه
كواكب حضنت الجدر عبالك ابنها والله ولا انطي اني احب اكل العرس.
وبعد جدال طويل هي وجهاد شكد يتناكرون وعلى اتفه الاسباب ضليت اباوعله بنضرات تحسرت على حالي وحاله جان شكله حلوو ومرتب وحتى جداله ويه عمتها حلوو لازم جكارته ويدخن حسيت حالي مثل هاي الجكاره احترك شويه شويه.
عفتهم وصعدت بعد ماربحت كواكب المعركه واخذت جدرها وراحت.
صعدت فوك للغرفه وهو اجه وراي
باوعتله وصديت عنه.
نزعت الحجاب هو حجه ويايه اني فكري شارد.
مجاوبته ولافهمت شنو گلي.
واكفه ع الميز جاي اباوع لنفسي بالمرايه
شمر عليه مخده.
باوعتله
هااا شكوو
مو جاي احجي وياج متجاوبين
مااسمعتك
شبيج شارده بالج وين ؟؟
ماكو شي بس جو حار وتعب.
كام من الجربايه اجه يمي انه جاي احاول انزع الساعه.
اجه لزم ايدي يريد يساعدني انزعها
كمت سحبت ايدي منه.
..عطت . عوفهاا اني انزعها
جهاد .. رفعت اصبعي اهدد.
صوتج لاتعلينه مو عبالج ضحكت بوجهج تستغليني ترة والله اكسرج مااجبرج.
... بگلبي گلت ثار البركان. خلي انسحب من يمه احسن لااحصلي كتله.
اريد اوخر منه بسكوت وهدوء صار مقابيلي
گال بتركيز شبيج جنه مو على بعضج العصر طلعتي منا مابيج شي سامعه شي احد كايلج شي كواكب زاعجتج ؟؟
.. مابيه شي تعبانه متت حر اريد اروح ابدل الفستان
عفته ورحت صوب الكنتور طلعت الي ملابس ورحت للحمام.
وهو ظل يباوعلي مستغرب.
مر وقت واني بالحمام.
كاعده وصافنه حتى مابدلت ومتت حرر
‏احس وكعت بفخ مااكدر اطلع منه والفخ هو جهاد
دك عليه الباب جنووو وينج طولتي شنو لزگتي بالصابونه؟؟؟
مجاوبته وفتحت المي وغسلت وبدلت وقررت اطلع بسرعه لايشك لان اعرفه يشك وهسه يخلي دوبه من دوبي اله يعرف شبيه.
طلعت من الحمام واني احس بااي لحضه انفجر
كعدت على المده وضميت رجليه لصدري وهو متمدد على الجربايه ويدخن خنكني خنك
كال شبيج ليوم مو طبيعيه والله صاير شي
جاوبته بقهر...ماكووو شي
ضل يدخن يدخن عطت بي طفي جكارتك خنكتني خنك حس شويه اكوو ناس كاعده وياك
شفته كعد على حيله وجكارته بيده وعاط بعصبيه..ماعاجبج اطلعي على شنوو تتعيقلين
جاوبته واني مصدومه منه ..تطردني؟؟
لج خبلتيني صايرين اني وياج مثل البزون وخناكها مانكعد كعده اذا ماتعاركنه..وكمل كلامه اي اطردج اذا متحترمين نفسج اطردج.
وكفت واني مدخنه مو بس معصبه .وكلت بكلبي فوك شينه كوات عينه مشيت ودمعه بعيني ناويه اطلع
وقبل لا افتح لباب لزمني ومخلاني اطلع.
شالني وخلاني ع الجربايه واني متمسكه بقميصه واكوله نزلني خلي اطلع مو طردتني
اششش ولا كلمه دلوعه شكد تتعيقليين.
نزلني ع الجربايه وصار فوكايه وثبت ايديه اثنينهم ع المخده.
شعري صار على وجهي ظل يبعد بي بحنكه ويبززني بلحيته.
هسه تكوليلي شبيج.
مابيه تعبانه وضايجه جهاد وخر عني
ميقبل يوخر حاول يتقرب واني طكيت بجي
وخر عني كال شبيييج
وشال وجهي بايده يقربه اله
حاولت اتحجج بشي يخلي يتركني بحالي
كتله اهلي جهاد مشتاقتلهم
صدك جذب مصار النه اشهر متزوجين والطريق طويل ياعيني شيوديج شيجيبج.
اني مكايلتلك وديني كتلك مشتاقتلهم اتركني بحالي ابجي عليهم.
كال صار اوديج الهم تدللين.
اجه يمي انطيته ظهر كتله اريد انام
كال براحتج.
وكام من يمي نمت.

*جهاد
من رجعت من العرس وهي مو على بعضها كلش معجبني وضعها.
نزلت من يمها ورحت لامي اشكيلها
كعدت يمها بالهول.
يمه جنه متغيره من اجت من العرس واوضاعها متخربطه كلش معاجبتني صاير شي ؟؟
الام .. لا يمه ماصار شي خاف حسدوها ؟؟!!
واحنه كاعدين دنحجي طبت كواكب
جانت تتسمع كالت انت بس ورق اني اوديها للكشافه
جهاد .. اي مو اني زوج اخليها تطلع وياج وامنها بيدج
كواكب .. لعد يطبك طوووب انت وياههه
الام ... لا ناخذهه للامام الكاظم ع.

يوم ثاني صعدت كتلهه حضري نفسج اروح للامام الكاظم.
اباوعلها عيونها مغورگه ومالها خلك.
جنه ..جهاد مابيه خاف اتعب
جهاد ..مو اكثر من تعبج هذا.
كامت بدلت واني هم بدلت ونزلنه
اخذنا امي وكواكب جلبت ويانه اله تروح.
اخذناهه وطلعنا.

* جنه.
وصلنا لل الامام الكاظم جهاد لازمني من ايدي بحنيه

واني بين الاحساس بحبه وحنيته وبين الخوف من القادم والمجهول
دخلنا واني اول مره ازور الامام الكاظم زايره بس نجف وكربلا
جان اكو عربانات تنقل الزوار الي ميكدرون يكملون
مشي شافتهم كواكب كالت اني مااكدر امشي
وراحت تعامل واحد منهم.
هي تكله بالف هو يكللها بالفين
جهاد .. هاااج شكد فكوور هاج هذا الالف خلي ويا الفج وصعدي.
كواكب ... شوف الحظ مايدفع الالفين كلها بس الف شكد بخيل.
جهاد ... هسه كولي نعم الله
جنه .. ظليت اضحك عليهم شايب وعجوز البين تناگروا بعد شيفكنه.
بعدهه نريد ندخل للضريج وجهاد يوصي عليه امه مية مره وصه عليه وكواكب تباوعله بعين ونص.
دخلنه زرنه ارتاحيت شويه احس جزء من حملي انشمر هنا.
امي حاجتني كالت جهاد اخذ مرتك شويه ونسها بسوك واحنه نرجع للامام ونلتقي بباب المراد
جاوبتها وكواكب لزت اروح وياكم اني هواي زرت...الحمدلله امي رجعتها لان مابيه حيل اداهر كواكب لزمت ايد جنه لجانت لابسه عبايه سوده وشال ماروني وحذاء ماروني اووف شكد اكرة الماروني رحنه وحس بيها جاي احركه مثل لعبه تمشي بدون شعور
دخلنه للسوك واني اعرض عليها شنو تشتري شنو تردين جانت ترد بعدم مبالاه اكثر اجوبتها مااريد لو بكيفك خبلتني وضليت بقلق وضعها ممريحني
*جنه
اخذني للسوك واني بودي اصرخ كرهت حتئ حنيته اريد افهم الوضع لاني بي لكن ممستوعبه كوولشي حسيت بي بس يريد يرضيني بعدها شفته ابتسم وكال الله ملابس نوم تجنن
بصراحه صدمني جاوبته...يااا جهاد تخبلت تريد تدخل محل نسائي...
جاوب بثقه وشكوو بيها اشتري لمرتي
جاوبت لا والله ولا ادخل عيب يمعود
كال ادخلي انتي اشتري واني انتضرج هنا جانت مرة لتبيع دخلت واني محرجه شتريت بدون ذوق شنو الشفته كدامي جبته
لشايب يريد ملابس مال نووم وشسووويله
طلعت شفته واكف كال هااا كتله يالله اشتريت كال والله بيج شئ انتي مو علئ بعضج
جاوبت بأبتسامه حزينه ماكوو شئ والله
اخذني اكلنه موطه وشربنه عصير وطبعا طلعتنه لا تخلو من المضايقات...مثل شعرج لفي لعبايه زين بنطرونج طلع دنكي خبلني كرهني بروحي وكل كلمه يضايقني بيها اذكر رؤئ وهروبها يالله حاسه بغصه راااح امووت.
ورجعنه يم امه.

يريد يطلعني من الحاله الي اني بيها ميدري الي بيه شنووو
التفكير موووتني اباوعله مناقصه شي وسامه وشخصيه ووضيفه ليش خانته رؤى ليش تقدم المراه على خيانة رجل مثله.
رجعنا للبيت.
صعدنه لغرفتنه
تمددت ع الجربايه اجه كعد يم رجليه وظل يطكطك باصابع رجليه كال
تعبتي اليوم هااا
.. جاوبته بابتسامه مصطنعه اي حبيبي
تعبت والله اريد انام.
..ماادري شسالفتج كاضيتها نوم
.. بعد اطلبك روحه لبيت اهلي.
.. اي غير اللتحق واخذ ويايه اوديج لبيت اهلج.
... يعني ابقى 15يوم بيت اهلي ؟؟
... خو مااخليج بالشقه هناك لوحدج ؟؟
.. اي هو دااسسأل شبيك.
...مابيه شي اظاهر بعده مزاجج برتقالي حضرتج
.. لا مزاجي برتقالي ولا شي بس حاله نفسيه فتره وارتاح.
.. خنشوف دلعج هذا اقصد حالتج النفسيه شوكت راح تتعدل.
تركني وكام واني تغطيت ونمت بملابسي
مرت فتره اني اعيش صراع بداخلي مرات اكعد كباله واريد احاجي اعاتبه ليش ظم عليه سالفة مرته
بس مكدرت خوف مسيطر عليه من ردة فعله
بقيت على حالتي.
مر الوقت بسرعه وبيوم الي يريد يروح للبصره حضرت نفسي اروح ويا لاهلي.
جهزت جنطه الي واله واستعدينا اروح.
طلعنه الفجر
ودعناهم ورحنه.
بالطريق تاخذني صفنات وتفكير وهو متفوته فايته انتبه عليه.
هااا جنووو هسه خو راح ترحين لاهلج ومن نرجع اريد اشوف هذا التعيقل كله شوراه اله اطلعه من خشمج.
باوعتله ودرت وجهي ع الجامه
كام ضربني على زندي
اي اوي شبيك جهاد تخبلت هسه مو جاي اسوق.
تدرين بيه مااحب واحد يحگرني.
اي خوش.
ظل يهف بيده.
علما وصلنه للبصره الا روحي طالعه بس من شفت امي وخواتي والجهال يستقبلوني كلهم بالباب احس ردتلي الروح.
حضنتهم بوستهم شممتهم وبجيت دموعي ظلت تنزل وجهاد يباوع ويسوي حركات بحاجبه انت بيج شي ويهز براسه مو خاليه انت ياجنه.
دخلنه جوه.
ومن شفت محمد ودي اخنكه بعد ماطلع جهاد
ردت احاجي محمد اكوله يدري بهالسالفه لو لا ؟
بس سكت لخاطر جهاد هذا شرفه وسمعته
ومايصير احجي بيها لاي احد.
وحتى خواتي من سألني شبيج وجهج مصفر مخطوف خاف حامل كتلهم لا ماكو شي لا حامل ولاشي بس لان تغير عليه المكان.
مرت الايام بسرعه
واجه اخذني ولسه نفسيتي نفس الشي وماتغيرت
دخلنه للبيت وسلمت عليهم
تعبانين من الطريق ونمنه
يوم ثاني كعدت شفته يدخن
كمت من الفراش بلا مااكوله صباح الخير.
هو يعرف اني بعدني مطنكره.
كال تعااااي شبيج
طلعه وطلعتج اهلج وشفتيهم شبيج بعددد
احجييي تره مااتحمل.
وكفت بس احس رجليه موقويه زياده ع الوكفه
كسرت الصمت البداخلي وخليت الخوف على صفحه لشوكت ابقى هيج
كتله ليش ضميت علي ليش ماكتلي رؤى انهزمت ويا ابن عمك ليش گتليي ميتتته ؟؟؟؟؟

حجيت واني ميته خوف اباوعله عرك وظل يمسح
وايده ظلت ترجف.
عيونه ننططهن بغضب واجه صوبي.
صك اسنانه ومن بينهن كوه حجه
كال منووو گلج هالحجي

كتله وكلبي صارت دكاته باذاني حسيته حيطلع من بلعومي
جهاد اهدأ اهدأ دخيييلك حبي ...
تقرب مني لزمني من اكتافي بقووه عصرني عصر ضربني بالحايط منوو كلج احجي منوووو كلج لا والله ادفنج بمكانج.
ضليت ارجف وصوتي اختفى اشوف الموت بعيونه لتطلع شرار غضب نار تحرك الاخضر واليابس. اريد احجي مااكدر ضليت امتمت واباوعله بخووف
لزمني من شعري احس شعري تكطع بيده وهو يصيح بصوت عالي احجي كواكب حجت
جاوبته بخوف ودموع لا لا والله موو هي
دفعني بقوة على الارض احس عضامي تكسرت وشفته اتجه للباب. كمت واني مكسره ركضت وراه لزمته من من ايده جهاد اوكف خلي نتفاهم.
صررخ بصوت عالي وخررري نعله على اليوم احرك لبيت .الله والله ليوم اكلب الدنيا
دفعني ونزل وهو يفح من العصبيه حسيته تخبل فاقد صررخ بصوت عالي كواااااااااكب
ضليت الطم على خدودي..يمه يمه هسه يسويلنه مصيبه احاول اسيطر على نفسي مكدرت عظامي احس منعنعه مطحونه كعدت على الدرج
كله اجته تركض الحمدلله جان عمو موجود واخوانه
لزمه ابووو لك شبيك تخبلت
جهاد بصيااح ...تخبلت تخبلت لكم راح تخبلوني كواكب الكلبه ليوم احركها والله
اجت كواكب خايفه...شبيك شمسويه اني خاله هجم بيتك ان شاءالله شلون ابن اخووو.
هجم عليها مثل الاسد الي يريد ينقض على فريسته بلحظتها ابوو واخوانه لزموا وهو كلب الامه كلاب بالصياح ذاني احس راح تنسد من صياحه.
وظل يحوم عليهه مثل الصقر
ضمياء وامه لازماتها
وابو واخوانه لازمينه ليفلت ويروح يموتهه.
ابووو عاط بكواكب..مو كلنه لحد يحجي
كواكب ظلت تحلف لا والله وروح امي ماحاجيه ولا جايبه سيره.
عاط بيهه جهاد ويصيح بخبال بوده يفترسهه لعد منو حاجيلها شلون درت بموضوع رؤى اكوو غيرج نمامه وتنقل حجي.

كواكب باوعت عليه..دهر صابج واني اكول فقيره طلعتي ذبين تهايم ولج شوكت كتلج
ظليت اصرخ احجي وابجي واني ع الدرج والطم على وجهي بكفوف ايدي
... موهي والله مو هي حجتلي صدكونيييي.
جهاد...خرب ساعة السوده لعرفتني بيكم الله ينتقم منكم مااجي جيه من الدوام اذا ما تسسمون عيشتي شنوو القصرت بي حتى هيج انغدر من الكل والله احط طلقه برأسي وخلص منكم.
امه تخبلت..وظلت تبجي وتحجي. لا يمه لا الموت لعداك لليكرهوك عمرك طويل يضناي
صررخ بعصبيه وهو يلزم راسه....ااااااه. راسي راسي راح ينفجر.
اخذو اخوانه وابو للاستقبال نزلت وحيلي بايد من الخوف ومن الهبطه ومن الضرب.
مديت راسي اباوع عليهم واني واكفه اباب الاستقبال ولازمه خشبة الباب واباوع بخوف وقهر.
شفتهمم امددينه ع القنفه وديقيسوله الضغط.
وهو مخلي ايده على كصته ومغطي عيونه وامه كاعده جوه ع الكاع من جهة راسه.
رغم ضربني واذاني بدون سبب يكون الي ذنب بي.
بس تعاطفت ويا واشفقت عليه.
بقيت افكر بي رغم الم جسمي
شون راح اروضه على كولت علا وشون راح احتوي واثبتله مو كل النسوان مثل مرته الخاينه
كدامي مشوار طوييل كلش ومتعب ويا هالجهاد
انقطعت سلسلة افكاري بعد سماعي صوت عماد
يكوله ضغطك صاعد 17/10.
انقهرت عليه.
شافني عمي واجه يمي همسلي تعاي جنه فد شويه
رحت وراه للهول
كعد كلي كعدت.
كال :
... انت بنت اصول وناس ومتربايه احسن تربيه واحنه نفتخر بيج انت مرت ابنه جهاد يابنتي مر بضروف صعبه بسبب زوجته وابن عمه.
واحنه لم ردنا نخطبج اتفقنا منحجي بالموضوع
ونكول ميته لان هي فعلا ميته اهلها هدروا دمها واذا لكوها مراح يصير غير هذا الشي.
الي اريده منج يابنتي وانت مثل وحده من بناتي الله شاهد. ديري بالج على جهاد وتحملي واوكفي يطلع من هي الازمه.

جنه ... صار عمي واني عند حسن ظنكم.
كملنه كلام وصعدت فوك.
بقى جهاد لليل بالاستقبال لااكل ولا شرب بس نوم وميريد احد يروح يمه.
واني كل شويه اروح اباوع عليه.
تعشينا وهو ماكو ماكعد ويانه.
بالليل صار وقت النوم رحت للغرفه بدلت طفيت الضوه ودخلت بالفراش.
سمعت صوت باب الغرفه انفتح
وخرت الغطا عن وجهي شفته دخل خفت منه وجهه تعبان وعيونه حمر.
ضميت رجليه لصدري ولازمه الغطا بيديه بخوف.
شفته اسد و مجروح...دخل كعد على الجربايه وكعد يدخن بصمت واني اباوعله بحسره حواجبه معكوده ويدخن بشراهه.
هنا حسيت بي وبجروحه وشكد هالموضوع محرج بالنسبه اله وفعلا محرج هو رجال ومناقصه شي
تجي وجده مغروره وشهوانيه تنزل راسه وتسوي بي هيج لا وتخونه وتنهزم ويا منو ابن عمه حسبة اخووو وچماله متزوج وعنده طفل ماادري شون طاوعه قلبه
ينزل راس اهله وترك ابنه ضناه ولوث سمعته وخله العار يلاحقه وركض وره وحده خانت زوجها ونزلت راس اهلها وتركتهم ويجي يوم تسوي بي نفس ماسوت بجهاد شي ميستوعبه العقل.

وخرت الغطا وتدنيت يمه
سحبت الجكاره من بين شفايفه وطفيتها انصدم من تصرفي باوعلي وعيونه تشع غضب.
جهاد...انتِ بأي حق تتجاوزين وتتصرفين من كيفج.؟

جاوبته بهدوء..جهاد انت ضغطك صاعد موزين عليك وانت تدخن هواي.

جاوب بقهر..مالج شغل شنوو هامج؟:؟
جاوبت ..لعد شلون ماهامني انت زوجي وحبيبي وابويه وكل شي بحياتي.
شفته يباوعلي بنضرات حزينه واني بجيت مااعرف ليش حسيت بقهر عليه اسدي الشايب لحلوو مجروح سحبني نشمرت بحضنه حضنته وحضني بقيته ساكتين لدقائق بلا حجي اثنينه.
بعدها تمددنا ع السرير.
سند جسمه بعكسه ويباوعلي.
.. من شوكت تعرفين ومنو كلج كواكب اكيد ؟؟
.. لا والله وداعة امي مو كواكب عرفت من الناس بالعرس.
.. عفيه نسوان غضب اسود ولا تفوتهن فايته.بس ليش كرهتيني جنه بعد ماعرفتي. ؟؟
..ماكرهتك بس ضجت حييل لان ضميت علي
جهاد حبيبي اكو شغله لازم تعرفهااا انه اني مو مثلها اني متربايه احسن تربيه ولايمكن ويجي يوم واخونك لاتربيتي ولا ديني يسمح لي بهالشي صدكني جهاد.
...جهاد ... مااسمحلج تقارنين نفسج بيها مفهووم.
.. ماشي حبيبي خلينه نعيش بسلام وابعد الشك عنك
... هي فتره وتعدي ويمكن مع الوقت انسى بس عيونج شلون وياهن.
.. عادي اللبس عدسات واضيعهن.
... لا مااريدهن يتحسسن عوفيهن هيج الي يهمني انت جنه اريدج وياي ع الزمن حييل تعبني اوعديني بعد متجيبين سيرتها بعد اوك.
.. اوك ماشي حبيبي وعد مااجيب سيرتها وراح احتويك واوكف وياك انت حبيبي وزوجي وابويه.
.. اي واريد طفل شو طولتي ولج.
... الله كريم شوكت ميجي حياه الله.
.. شوو اشوف وجهج اخخخ الله هي اني اذيتج هيج
احتركت روحي.
.. اسم الله على روحك هي ضريبة الحب.
... تحبيني جنه
... اعشقك حبيبي.
ظل يقبلني بالمكان الي يشوفه مزرك ومورم من ضربه ويتعذر.
جهاد .. جنه كلتيلي عرفتي من رحتي للعرس مو ؟؟
.. اي
...يعني من رحتي لاهلج جنتي تعرفين ؟؟
.. هم اي
... كتيلهم شي ؟؟
.. لا والله وداعة عمري مجبت سيره لاحد حتى امي هذا شرفك وسمعتك معقوله افرط بي واحجي عنه.
... الحمدلله انت مو بس جنه انت نعمه من الله اليه.
... ماراح اخيب ظنك بيه ابد.
مرت الايام وبعد عرفت الي بي هو حاولت احتوي غضبه من يعصب من يزعل اصالحه
عرفت جواه گلب طيب بس مجروح ونتج عنه تصرفات عدوانيه.
هالفتره قلت قساوته وصار طيب وحنون
صح يعصب ويداهر وي كواكب بس مو مثل اول حاولت اغيره واغير من طبعه واحسسه بالامان ويايه.

صادفت التحضيرات لعرس ضمياء هو هنا.
خلصت شغل ويا عمتي ورحت يم ضمياء
كلتلي تروحين وياي للصالون
.. خاف اخوج ميقبل.
.. لا يقبل معليج هو هالايام صاير خوش جهاد.
.. درووحي هو من الاول خوش جهاد اروح اكله واجيج.
.. مااعتقد تجييين بعد مدام رايحه تقنعينه على شي.
.. شكد صايره قليلة ادب ولج علمج احسان ابو مخابرات تالي الليل.
ضحكت مديت لساني الهااا وصعدت فوك.
شفت مدد ع السرير.
كال وينج ولج دخليني اشبع منج هالايام لا كل شويه تگمزين بمكان.
ضحكتله كتله ثوانيي.
طبيت للحمام غسلت وغيرت كلبيتي ولبست غير لبسه ورحت يمه مددت.
اباوعله واضحك.
گلب عليه وصار يلعب بشعري
هاا شو ضحكين ؟
اشرت باصبعي الشهاده والابهام وازغر بعيوني ونطقت طلب زغنون.
اي شنو هو ؟؟
اروح ويا ضمياء للصالون عاجبني اغير اللوك مالتي.
اممم
لزمته من وجهه عفيه حباب
.. اي روحي
.. جنك ماقابل
... لا روحي عادي

نزلت من السرير بسرعه اريد اروح لضمياء ابشرها جان يسحبني من فتحة الراس مالت دشداشتي وجان تنشگ ويطلع ظهري.
كال بعصبيه وين وين مو توج جيتي يمي تردين تروحين هسه.
هي شنو شگييت دشداشتي خررب.
اي خوش سهلتلي المهمه
ويغمزلي.
... هم شايب وهم عنيف.
ورحت يمه مره ثانيه بقيت ويا ومخلاني انزل.
بعدهه
سبحت وبدلت ونزلت شفتهم ديصبون غدا
وكفت يم ضمياء كتلها وافق جهاد اروح وياج
ضمياء ... صلوات كلللللوووش.
صبوا غدا ورحت صحت االه على الغدا
تغدينه وغسلت مواعين وصعدنا فوك
جاي اناقشه بلون الشعر الي راح اصبغه
كال اصبغي ايي لون ماعدا الاسود مااحبه
عرفت لان رؤى جان شعرها اسود بس سكتت
وماناقشته.
رحت وي ضمياء لصالون صبغت شعري.
واشتريت عدسات لون جوزي
رجعنه المغرب للبيت
صعدت للغرفه مشفته سمعت صوت المي بالحمام ديسبح.
نزعت حجابي ووكفت كبال ميز التواليت طلعت العدسات وكعدت اجرب اللبسهن خليت العدسه بطرف اصبع الشهاده وحاولت اخليهه بعيوني صارن دم حمر وماعرفت اللبسهن طلع من الحمام
لاف راسه بالخاولي ويفرك بشعره ينشفه.
كال هااا حببب شدسووين واجه وكف يمي على ميز التواليت.
شبيهن عيونج حمر
.. جااي اللبس عدسات
... وعليمن تلبسين ؟؟
... هيج عجبني والله
.. دشوفي عيونج شون صارن لا ياالله دجيبيهن شووو.
اخذهن مني وذبهن بالزبل.
... لا مو هذن غاليات ليش تشمرهن
كال بعصبيه . اشششش ولا كلمه هي السيره تنسد مفهوووم.
وطلع وركع الباب
يبووو بركاااان خرررب شدعوه بس اني هم صوجي
جان انتظرت اتعلم عليهن يله.
رحت غسلت شعري مره ثانيه احسه ملجج مانغسل زين بالصالون
طلعت نشفته بالسشوار.
انتبهت جهاد ماكو !!!
اكيد زعل.
ردت اطلع العدسات من الزبل بس خاف يشوفهن ويزعل.
نزلت جوه مديت راسي بالاستقبال شفته يم ابو.
ارتاحيت ورحت للمطبخ.
رونق طلبت تشوف شعري شوفتها كالت كلش حلو وجاي ويا بشرتج.
خلينه الاكل وجهاد مطنكر ميباوع بوجهي.
اووو شسويت هسه.
تعشينه وصعد.
غسلت مواعين وصعدت وراه.
طبيت للغرفه نزعت الشال وفتحت شعري جهاد جهاد
شكو ؟؟
غير حبك بالگلب ماكوو
شال راسه رافعلي تك حاجب ونزله
كتله شوف شعري
كال شفته حلوو
رحت يمه شبيك حبيبي تره مو قصدي والله
... لا قصدج واعرفج كلش زين
... لا والله مو قصدي صدكني
.. مااحب سوين شغلات من ورايه وثانيا هي السيره ومتعلقاتها تنسد بعد مينحجي بيهه.
... صار وتدللل وبوسته من خده ظل يلعب بشعري كال طالعه صاكه ضحكت.
بس بداخلي اكول حلال علي حرام عليه
البارحه يكولي لاتصبغين اسود ومن اخلي عدسات ميقبل.

صارت حنة ضمياء ورحت وياهه للصالون
سويت تسريحه رفعت شعري والباقي نازل مبروم كلش حلوه طلعت.
رجعت للبيت وبدلت لبست بدله نيلي رداناتهه كيبور من وره بيهه ذيل ومن كدام حد الركبه طالع.
اقاربهم يكولون حلوه مرت جهاد هم زين الله عوضه
وكواكب ترد عليهم اي تروح قندره عتيگه تجي اجدد منهاا .
لا ياقندره ياكواكب ياعجوز البين اني قندره !!!
صعدت فوك ادردم.
شافني جهاد بالممر
سحبني من خصري ودخلني بالغرفه
شبيج دردمين

سحبني من خصري ظل صافن بوجهي شبيج تدردمين
جنه ...هي كواكب تكول عليه قندره
جهاد ..هوو اكوو غيرها قندره بالبيت
مو هي قندرة وتشوف لناس قنادر
جنه بعدم رضا..لا والله علئ اساس حليتها يعني صدوك اني قندره.
ظل يدك على راسه ولج شنو ه̷̷َـَْـُذآ لايشوفوج اخواني
جاوبته بفرح .. عجبتك ؟؟ صدك طالعه حلوه ؟
.. لج اني وين احجي وانت وين تحجين.
خرب بالحظ
محد محد جهاد شبيك اخوانك ماكو طالعين مو مثلك كله بالبيت.
... هااا ضوجين مني ؟؟
... لا حبيبي شساالفه.
لف ايدي حول خصري وسحبني اله صار وجهي بوجهه كال مااال اكلج هسه.
بهااللحظه سمعت صوت الدي جي
يلا حبيبي خليني اروح.
اي اي شردي.
وخرت منه ونطيته بوسه بالهوا ونزلت جوه.
شكد متلهفه اركص.
ركصيت ذبيت لحم ركص ركص شعر شعر.
مراكصه من عرس محمد.
وبعرس مها ماركصت لان جنت حزنانه على سامر بوقتهاااا

صارت هوسه والكل كامن يركصن واني متحمسه كلش فصعدت على الكرسي وظليت اركص يم باب الاستقبال اباوع اشوف جهاد متخصر ويباوعلي
ويعض شفته وياشرلي تعاااي
ظليت اهزله كتف واحرك صدري
ظل يعض اصبع الشهاده ويخزرني وياشرلي انتظرج فوك.
تعبت ونزلت من الكرسي رحت للمطبخ لكيت كواكب لازمه الجهال من اذانهم تكفخ بيهم.
سالتها شبيهم تكول شايلتلي كيكه وببسي ع جهه ماكلين الكيك وشاربين الببسي.
بگلبي كلت حوبتي هي.

صعدت فوك يم جهاد حصلت رزاله وگلي على هالركص باجر ممنوع ترحين للعرس
لا جهاااد فدووه عفيه خليني اروح
لا مااكووو ابد ليش اصيحج ماتجين
ماافهمت عليك شتريد بالضبط
ماافهمتي مو لعد اكليههه.
يوم ثاني صدك مخلاني اروح للعرس امه كلتله خليها تروح تحجج بان هو حيروح للبصره يوم ثاني ويريدني ابقى يمه.
اني هم استسلمت وبقيت بس طنكرت ويا ومحاجيته.
ودعت ضمياء جانت بمثابة اخت الي.
ودعيت الها الله يوفقها.
كلهم راحو وياها للقاعه بقيت اني بالبيت سويت عشا وفرشت السفره.
وجاي اخلي الاكل بيهااا
سمعنه صوت رمي قريب
طب حماي عماد يركض

جهااد .. شكووو ؟؟
اهل رؤى هادييين على بيت عمي وصايره بالسلاح

.....