احفاد عمران الفصل الأربعون 40 - بقلم ضحى اليوسف

الكاتبه ضحى اليوسف

أحفاد عمران

بارت _39_

لا تنسون التصويت+ التعليق بين الفقرات 🌿

"هلي انه مو نعسان بس ندمان"
"هلي اريد اعاتبكم عتب خرسان"
"هلي دموعي بعيني تلمع"
"بس مالكيت اذن تسمع"
"هلي منكم راح اروح وبعد مارجع"
"هلي الحجي وياكم بعد ما ينفع"

•~•~•~•~•~•~•~•~•~•~•
ليان.....

رجعنه البيت واول مادخلنا من باب
الطارمه اسمر اندار عليه وهو يكول

اسمر:: الزمي فكج

ليان:: شنو

اسمر:: الزمي فكج وسوي روحج موجوعه

ليان:: ليش يمه اسم الله شبيه

اسمر:: غير جذبنه وطلعنه غير نكمل الجذبه

ليان:: ملاحظ نفسك صدك صاير تجذب هواي

عفته واني دخلت واول مادخلت عمتي
كامت من القنفه وبيدها جود وصاحت بينه

عمه سناء:: وينكممم لهسه وعايفين
الطفل عليه ماتكولون مره تريد تنام

لزمت فكي وعقدت حواجبي دامثل
عود متوجعه وهيه تباوعلي بخزره
تقرب اسمر عليها وكوه عود قنعها
احنه جنه بالعياده واتاخرنه وهيه
ماكالت شي غير انطته جود ومشت
كبل الغرفتها واني صعدت وويايه
جمانه شلتها وأسمر عده جود
صعدنه الغرفه وكبل نزلت جمانه
وذبيت الصايه والشال لأن اختنكت بيهن

اسمر:: شوفي جود شبي

التفتت اله اخذت جود من ايده وكعدت
اباوعله اصلا ممبين باجي عفته ورحت
سويت ممه لجمانه وجود رضعته
ونومتهم اسمر جان يلعب بموبايله
وكام ذبه على الميز وأخذ ملابس
يسبح لأن ماسبح من اجه

كمت اني اباوع على الموبايل
وأتذكر شلون من ورا اسمر اني
اليوم جذبت على حمزه لزمته بيدي
ومشيت الحايط الي كسر بي موبايلي
رفعته ولطشته بالحايط طلع صوت
لطخه قويه وعلى اثرها اجاني
صوت اسمر بالحمام وهو يكول

اسمر:: شنوو هاذا الصوت ليان

ليان:: ماكو شي ماكو شي تطلع وتشوف

باوعت الموبايل مامكسور شنو
هاي اني غير لطخته بقوه ليش
مانكسر رجعت ضربته اقوه بالحايط
وهم ماكو وأسمر يصيح شنو هاي
واني اكله تطلع وتشوف والطخ بي

ليان:: شنو هاي اشو اسمر من اول
ضربه كسره الموبايل

رجعت هالمره ضربته اقوه من كل
الضربات وهاي المره صدك انكسر
واني حسيت بالفخر ليش ماعرف
بس جني لأن اخذت حقي منه
باوعت عليه شلون شاشته الداخليه
مفلشه بس باقي على قيد الحياة
بعده ممحترك

ليان:: يله ضل العب بي يومين
ازياده لما يحترك عليك

مشيت ورجعته على الميز مثل ماجان
واني كبل رحت دحست نفسي بالفراش
ماريد اشوف رده فعله ولا اريد اسمع
شي منه غطيت راسي بالجرجف وغمضت
عيوني انفتح باب الحمام وماسمعت أي
صوت ولا هو حجه بس مرت دقائق لا
اكثر ونسحب مني الجرجف فتحت
عيوني اباوعله شلون خازرني

ليان:: شبيك حتى على نومتي لاحكني

رفعلي الموبايل يشوفني ياه وهو
يكول بعصبية

اسمر:: ليش هيج

ليان:: يااا هاذا شبي موبايلك ليش هيج

اسمر:: ليان لا تقشمين نفسج وكوليلي
ليش هيج سويتي

ليان:: مامسويه شي اني

اسمر:: ليان اعترفي

ليان:: شبيك اسمر شعليه اني

تقرب عليه ورفعني من زندي خلاني
اكوم من الجربايه واصير بصفحه
حجه وهو صاك على سنونه

اسمر:: تحضرين العالم بكيفج وماحجيت
شي بس تجين تكسرينه لا هواي
اجاوزتي حدودج

رفعت راسي اله واني اباوعله صافنه
بوجه يعني يعرف اني حاضره بنات
من حسابه بلعت ريكي بصعوبه واني اكله

ليان:: ماعجبني وحضرتهن

اسمر:: حلو وتعترفين

ليان:: اي

اسمر:: والموبايل ليش هيج مكسرته

ليان:: بسببك

عكد حواجبه مستغرب مني رفعته ايدي
خليتها على ايده واني ابعد ايده مني

اسمر:: أنا شنو سويت

ليان:: كسرت الموبايل الجابه حمزه
واليوم اني بسببك جذبت على حمزه

اسمر:: والجهاز شعليه وتكسرينه

ليان:: غير كسرت جهازي

اسمر:: وترجعين تكسرين جهازي

تقربت عليه واني اباوع بعيونه وكتله

ليان:: العين بالعين والسن بالسن
والي ماعاجبه يلطخ راسه..

ماحجه شي بس رفع ايده بحرگه
سريعه شمر التلفون على الحايط
وخلاه يصير ميت وصله ضليت اني
صافنه بي هاذا شجاه شنو تخبل
عافني بالغرفه وهو طلع ضليت
اني وحدي مشيت رحت اباوع على
الموبايل واني احجي

ليان:: والله ياسمر صاير هواي تمذر موبايلات

لميته وصله وصله بس طلعت منه
السيمكارت ضميته وذبيته بالزباله
-تكرمون- ورجعت اني الفراشي نمت......

•~•~•~•~•~•~•~•~•

فرح....

فرح:: يمههه

أمي:: ادبسززز أنا هيج ربيتجج

دفعتني للداخل وطبت وراي وسدت
الباب وبسرعة جتي وضربتني راجدي
انصدمت بيها واني لازمه خدي جسمي
كله يرجف، ماعرفت شنو صار ليش
هيج تعاملني ليش هاي القسوه بعينه

فرح:: يمه شسويت ليش اضربيني

جرتني من زندي بقوه عيونها مشتعله
غضب وصوتها يعلك بالمكان

أمي:: ولج فضحتينهه

فرح:: ماسويت شي والله

أمي:: شنوو الماسويتي ولج وانتِ نايمه
يم الرجال وبيت وحدكمم

تجمدت بمكاني حسيتهه الدنيا كلها
توقفت، كلبت راسي عليها ودموعي
نزلت بدون وعي

فرح:: بس خلي افهمج والله مو مثل
ماانتِ فاهمه

أمي:: شتفهميني اصخام الوجه

فرح:: يمه فدوه لتصيحين الجيران
راح يسمعون

أمي:: واذا سمعتتت شسويلههه إذا أنا
بنتي *****

اتوسعت عيوني كلبي نزل ماجنت اتصور
أسمع من أمي هيج كلمه غلطه ما تنغفر
كل كلمة تطعني مثل سجين

رجعت عليّ وسحبت شعري من
وره الحجاب حركتني من وجعي
ومن الخوف جانت فايره عصبيه
تصرخ بوجهي والدمع محبوس
بعينها بس الغضب غلب عليها

أمي:: شسويتييي هااا شسويتيييي
سلمتييي نفسججح

أبجي أهز براسي لا أريد أحجي أريد
أوضح بس هي ماطتني مجال كلشي
سدته بصراخها وضربها وكبل صاحت
بصوتها العالي

أمي:: امشييي بدلييي سلاباتجججج

فرح:: يمه بس خلي احجي

أمي:: ماريدج تحجين إلي احجي
لابوج من ترجعين

فرح:: يمه....

امي:: وصمههه مشييي بدلييي صخامججج

صارت تدفع بيه الداخل البيت لحد
مادخلت رحت كبل الغرفه عسه ولعل
الكه حمزه بس حمزه ماجان موجود
بالغرفه وين راح ماجنت اعرف كعدت
بنص الغرفه ونهاريت بالبجي

_جان أملي بيك وين رحت وعفتني

ضليت كاعده وابجي لحد ماسمعت
صوت أمي تصيح عليه كمت من بكاني
ودخلت الحمام غسلت وجهي وذبيت
ملابسه ولبست ملابسي وهاذا كله
أمي برأ تصيح لحد ماطلعت الها
باوعت عليه من فوك ليجوا وهي تكول

أمي:: ملابسها بالغرفه وتكلي مو مثل مافاهمه

ردت احجي من بين دموعي بس هيه
عتتني من أيدي عت وطلع بيه من
البيت حجيت وتوسلت بيها بس تعوف
أيدي بس هيه أبد ولا سمعت مني كلمه
وحده طلعنه برأ البيت وهيه تعت بيه
عت وكأن طفله صغيره اني أطفال
بالشارع ضلو صافنين عليها وشلون
تجر بيه واني شكد فشلت من هاذا
الموقف ومستحيل انسه طول حياتي

اجرت تكتك ورجعنه البيت واول ماوصلنا
ودخلنا البيت استلمتني أمي ضرب وصياح

امي:: ياطايحههه الحظ ياادبسززز
ولججج فضحتينههههه

فرح ببجي:: يمهه والله مامسويه شي
شبيج ماتصدكين بيه

امي:: ولججج جذبيننن عيونييي مووو
شفتججج أنا شفتججج شلونننن لابسههه ملابسههه وجذبين عليه ادزينننن البنااتتت يخابرونييي حتى يحلالج الجوووو
موووو والله اليوم محد يخلصجج
من عندي

رجعت تضرب بيه وماتخليني احجي
واني اريد بس احجي وافهمها ماكو
مانطتني مجال أبدا وأخير شي
دفعتني وهي مفرفحه وتكول

امي:: الله لا ينطيج امشي الغرفتج
ماريد اشوف وجهج هسه بس يجي
ابوج هوه خلي يتصرف وياج

صارت كوه تحجي وهيه تلهث تقربت
عليها واني احجي بخوف

فرح:: شبيج ماما

باوعت عليه وكبل صرخت بوجهي

امي:: امشييي انكلعييي الغرفتجج

عفتها وركضت كبل الغرفتي دخلت
وسديت الباب قفلته رحت الكنتور
طلعت ملابس وإني اديه ترجف
رجف والخوف محتل جسمي دخلت
الحمام بسرعه بدلت وطلعت كعدت
على الجربايه انتضر مصيري

بالساعتين وصرت اسمع اصوات
صياح عرفت ابويه اجه وامي حجت
كلشي اله كعدت اكل باضافيري من
الخوف جسمي كله يرجف كلبي يدك
بسرعه واحس روحي تطلع من الخوف
اكيد هوه ماراح يصدكني فجأه سمعت
صوته قريب من الباب وهو يصيح
بصوت عالي يهز البيت

_وينهههههههه هااايييييي

ردت اكوم مالحكت الباب بقوه
انفتح ظهر ابويه وجهه محمر من
العصبيه عيونه تشتعل غضب
ماحجيت ولا كلمه بقيت ابلع
بريكي والخوف مسيطر عليه كلياً

قرب مني كعد بصفي على الجربايه
خله ايده على رجله وصوته مليان قهر

ابوي:: عشرين سنه عشرين سنه وانا
شايلج بين عيوني جيتيني بس انتِ
وكلهم يكولولي روح ازوج وخلي يصير
عندك ولد يشيل اسمك واني شجنت
اجاوبهم جنت اكوللهم فريحه تسوه
الدنيا كلها هاي عزيزه ابوها هاي
الي تشيل اسمه منو كال الا الولد
يشيل اسم ابوه البنيه هم تشيل
اسم ابوها واني جنت دايماً افرقج
عن بنات عمج وادللج ومخليج تحتاجين
شي عماتج يكولن لا تدللها واني اكوللهم
اذا ماادلل فروحتي ادلل منو

صوته مليان وجع واني دموعي تنزل
ووجهي غارك بالدمع باوعت عليه بس
ماكدر اباوع بوجه نزلت راسي الخوف
والذنب خانكني

ابوي:: ليش هيج سويتي هاي مجازاتي
احنه هيج ربيناج

رفعت راسي شوي واهز براسي بمعنى لا

فرح:: بابا والله امي فاهمه غلط

ابوي:: جنتي بيته لو لا

فرح:: بابا و...

ابوي بعصبيه:: جنتي لو لا

فرح:: اي جنت

ابوي:: وهو موجود وياج بالبيت لو لا

فرح:: موجود

ابوي:: ومثل ماكالت امج جنتي لابسه
ملابسه لو لا

ماكدر احجي بس هزيت براسي اي
كعد من مكانه ووجهه كله قهر

ابوي:: هاي هيه يا فرح من اليوم
تنسين عندج اهل على هاي عملتج
واني راح احجي ويا يوسف بخصوصكم
وخلي يجون ياخذونج بالنهايه انتي
جنتهم وخلي ياخذوج بدون عرس
واني ماريد شي منهم غير ياخذوج
وبعد ما اشوف وجهج

طلع من الغرفه وعافني بصدمتي واني
بعدني مدا استوعب شنو حجه معقوله
بهاي السهوله تخلوا عليه زين همه
يعرفون شنو عشت شلون مريت بكل
لحظه وجع بلامس ليش هيج صار
شنو تغير ليش فجأه كلشي انهدم

ظليت صافنه دموعي تحرگ خدودي
وكلبي يضوج جواتي حسيت روحي
ضاعت ما ظل بيه حيل حتى للحجي

تمددت على الجربايه وغطيت نفسي
كلشي اريده بهاللحظه انام انسى
اهرب من كلشي من نظراتهم من
اصواتهم من كلام ابويه الي بعده
يطن براسي مثل طعنه سجين

•~•~•~•~•~•~•~•~•~•~
ليان........ الصبح...

نايمه وماحس غير صوت اسمر عالي
نكلبت باوعت عليه لكيته يلبس بملابسه
ويحجي بس ماسمعه شنو يدردم
لأن صوته ناصي

ليان:: خير من الصبح وين

اسمر:: خاب ليان تسكتين لو هسه
اخليج تكومين بكتله

ليان:: ليش يمه تايهتلك

اسمر:: بطلي مني

راح الميز وصار يعدل بشعره على
السريع كمت اني عود اريد انزل
اسويله ريوك هو انتبه عليه وكبل كال

اسمر:: وين

ليان:: جوا

اسمر:: شسوين

ليان:: اسويلك ريوك

اسمر:: طالب أنا منج

ليان:: لا

اسمر:: ارجعي الفراشج

ليان:: ليش هسه اسويلك على السريع

رجع يعدل بشعره وهمس بصوت
ناصي بس سمعته اني

اسمر:: البارحه تكسر موبايلك واليوم
دور تسويلك ريوك والله مصيبه هل
نسوان

ليان:: ترا سمعتك

اسمر:: وإذا سمعتي.... امشي امشي
رجعي نامي

ماهتميت اله ورحت غسلت وجهي
وطلعت وهو اخذ سويجه ومحفظته
ونزل قبلي سديت الباب على الجهال
ونزلت اني ورا

هو طلع من البيت واني سديت الباب
ورا ونضفت البيت على نومه الجهال
طلعت عمتي من الغرفه الضحكه شاكه
حلكها ولازمه تلفونها وتحجي

عمه سناء:: درد يايمه شنهي مامليت
وحدك اهناك...... ههههههههه دتعال
يمه مشتاقيلك

ضليت صافنه عليها شلون تضحك
همست بكلبي"طلعت هم تضحك بالي
ماتعرف الضحك أبدا " سويت ريوك
وكملت وهيه تحجي ويا أخير شي
نقلت الريوك على للطاوله وصرت
اصب بالجاي وصحت عليها

ليان:: عمههه ريوكك

عمه سناء:: جيتتت

جتي بي ماساده الخط فتحت سبيكر
وكعدت تاكل وتحجي واني بس
استمع وأكل

عمه سناء:: شوكت بعد تجي يمه

أمجد:: يمه بس هالسبوع وانا راجع

عمه سناء:: أي يمه تعال خلي نزوجك

أمجد:: يمه شني مابطلتي من هالسالفه

عمه سناء:: وليش يمه ابطل غير
لاكيتلك الكاوا تخبل

أمجد:: شنو يمه مافهمت عليج

عمه سناء:: لكيتلك مره تخبل وأنا
متاكده راح تعجبك واول ماتشوفها
تكلي روحي خطبيها

أمجد:: ليش مني هيه هاي سندريلا

اهنا إني ضحكت على أمجد شلون
رد رجعت عمه سناء تحاجي وتريد
اتقنعه يرجع حتى ازوجه وهو بطل
مايرضه يرجع بسببها

عمه سناء:: ولك يمه درجع هسه وفضها

أمجد:: أي ارجع ليش لا حتى الكاج
محضرتلي ياهن بالباب

أمي:: يايمه هيه وحده محضرتهن شنو

أمجد:: وحلوه هاي

عمه سناء:: غير تخبل

أمجد:: ايصير خير نجي ونشوف عود

سدته منه وإني الفضول ذبحني من
كالت وحده يعني لاكيه اله باوعت
عليها تاكل وتضحك

ليان:: عمه مني هاي البنيه

عمه سناء بستغراب:: يابنيه

ليان:: هاي الي تردينها ل أمجد

عمه سناء:: اهاااا هاي

ليان:: أي مني

سكتت ماحاجتني رجعت اني اكل
وجان هيه تفجرها وتكول

عمه سناء:: ميس بنت خالتج

الكمه وكفت بلعومي أريد احجي أريد
اكول شي ماكو اختنكت وصرت اكح
عيوني نطت وماعرف شعجب عمه سناء
من شافتني هيج كبل انطتني مي اشرب
شربت شويه ورفعت راسي ودموعي
تنزل على خدي

عمه سناء:: خايبه شمالج

ليان:: عمههه تردينن ميسس لامجد

عمه سناء:: أي شكو بيها

ليان:: بس عمه ترا ميس متوالم أمجد

عمه سناء:: ليش متوالمه

ليان:: طبقه أمجد تختلف عن ميس

عمه سناء:: ماعليج أنتِ أنا ادبرها

عافتني وكامت شنو هاي عمتي ماراحت
إلا على ميس كمت أني مامهتمه وغسلت
المواعين وخلصت صعدت للغرفه رجعت
نمت وي الجهال لحد لضهر كعدت على
صوت جمانه كمت من الجربايه اباوع
الها رافعه اديها وتصيح

جمانه:: اماما اماما

تصيح عليه عود تعالي نزليني رحت
عليها نزلتها وجود على نومته نزلتها
جوه وريكتها جاي وبسكت لأن ماتاكل
شي هيه رجعت غيرت الها ملابسها
وخليتها تلعب بملاعيبها ورحت حضرت
جنطه الهم كلت اليوم اخلي أسمر
يوديني الأهلي...

•~•~•~•~•~•~•~•~•~
فرح....

كعدت على صوت أمي وهيه بالغرفه
تصيح عليه فتحت عيوني لكيتها مخليه
جنطه بالكاع وطلع من كنتوري ملابس
وتخلي بيها حجيت وإني صافنه عليها

فرح:: يمهه شدتسوين

أمي بعصبيه:: كومييي لبسييي بسرعهههه

فرح:: يمه ليش

أمي:: جاي ياخذج حبيب كلبجج افرحييي
سويتي البراسج وهسههه جاي يصير
مثل ماتردين ورا ماسويتيلنه هالفضيحه

كبل بجيت لأن ما عندي شي غير البجي
كمت من الجربايه ورحت الها وهيه
تطلع من الكنتور وتخلي بالجنطه

فرح:: يمه بس اسمعيني ليش هيج تضلميني

باوعت عليه وكبل رفعت ايدها وضربتني
على راسي وصاحت بوجهي

أمي:: اضلمججج ليششش اضلمججج
هاييي جاي يصيرررر مثل ماتردينننن

فرح:: يمه والله ماكو شي ليش
ماتصدكين بيه خلي احجيلج

امي:: ولججج شتحجيلي شتحجيليييي
صخامممم وجهججج صخاممم وجههه
امججج

فرح ببجي:: يمه والله ياسمين ضحكت عليه

أمي:: شوف شوف بنتي شكد صلفه
تدور تطلع نفسها مضلومه وتذب
عمايلها على البنيه

فرح:: يمه والله هيه..

أمي:: بسججج كاافييي مامليتي يمه
ويمههههه كافيييي هاييي هيههه
راححح ترحيننن الهه

فرح:: ماريد اروح ماريددد

أمي:: لعددد شتريدين نايمهههه
بحضانههه وماتردين ترررحيننن اسمعي
لججج من اليوم ومثلل ماكال ابوج
علاقتج بينه هاي هيه انتهت ومثل
ماردتي راح يصير وخلاص بعد لا
احنه نريد نشوف وجهج ولا تشوفين
وجوهنه بعد

فرح:: فدوه لتكولين هيج يمهه شبيكممم وياي

امي بصيحه:: بينههه مرضضض بلكي
ميتين ولا شايفين بتنههه هيججج

خليت اديه على وجهي ونهاريت بالبجي
وامي اول ماكملت ضب الملابس طلعت
من الغرفه ولطخت الباب وراها حيل
ضليت انب كاعده واخذتني صفنه على
حياتي شلون جانت وشلون صارت خلال
كم ساعه مو اكثر وبسبب منو ياسمين
وليث حجيت بهمس بيني وبين نفسي

_حسبي الله ونعم الوكيل عليكم
أن شاء الله يبين كل شي عن قريب
وانتو تنكشفون

كمت واني هاي هيه إيست بعد اهلي
يرضون عليه وتأكدت بغلط صغير حتى
اهلك تتبره منك من خلاله رحت كملت
الجنطه وخليت بيها كل ملابسي جنت
لابسه كلاده وتراجي وذني جانن هديه
منهم نزعتهن وخليتهن بالكنتور مستحيل
أخذ شي منهم غير الملابس

سديت الجنطه وخليتها يم باب الغرفه
وكعدت على الجربايه صافنه على حالي
لحد ماورا نص ساعه انفتح الباب ودخلت
أمي باوعت عليه وكبل كالت بخزره

أمي:: كومي يله اجه حبيب كلبج

بلعت ريكي وكمت من الجربايه رحت
طلعت صايه وشال من الكنتور ولبستهم
تحت انظارها لامي بس هيه عافتني
ورجعت ركعت الباب مشيت اني وسحبت
الجنطه وياي

نزلت واني كوه شايله الجنطه ابوي
كاعد بالصاله ومخلي رجل على رجل
ماباوع ولا انتبه عليه اصلاً وبس أمي
واكفه باب المطبخ نزلت الجنطه بالكاع
ومشيت الابوي داريد احاجي

فرح:: بابا خلينه نحجي خليني افهمك.......

قاطع كلامي وهو يكول

ابوي:: يتانوج بالباب

غمضت عيوني ودرت وجهي منه مشيت
رجعت شلت الجنطه ومشيت من صف
امي عسه ولعل تحاجيني بس ماحاجتني
ولا كلمه طلعت برأ لكيت عمو يوسف
وحمزه واكفين بالطارمه انتبهو عليه
وحمزه انتبه على الجنطه بأيدي كبل
اجه عليها اخذها من أيدي ولزم أيدي
باوعت بعيونه واني عندي كومه حجي
أريد احجي بس هو غمض عيونه يحاول
يطمني

التفتت على امي تباوعلي بنظرات أبدا
ماكدرت افسرهن مشه حمزه ومشاني
ويا بس عمو يوسف ضل واكف وصلنه
الباب الشارع ردنه نطلع ونداريت ورايه
لكيت ابوي طالع وواكف وي عمو يوسف
وماعرف شنو يحجون

حمزه:: أمشي

اندرايت اله ورجعت كملت مشيتي واني
صرختي وغصتي كاتمتها وماريد اطلعها
يم أحد خله حمزه الجنطه بالسياره ورجع
فتحلي الباب الورا وصعدني بس هو بقه
واكف ويدخن خليت راسي على جامه
السياره واني صافنه على بيتنا شنو
يعني هاي هيه بعد مادخل هاذا البيت
واهلي هيج هاي هيه تخلو عليه

طلع عمو يوسف من البيت وورا ابوي
سلم عليه واجه صعد وابوي ضل يباوع
على حمزه بعصبيه إلا أن صعدو ومشت
السياره بينا ضلو حمزه وعمو يوسف
ماعرف شنو يحجون لأن بالي
وتفكيري كله مو يمهم

وصلنا البيت ونزلنا عمو يوسف نزل
كبل دخل البيت واني ماكدر ادخل
وحدي اريد حمزه وياي يكون لان أكيد
هسه مفكرين بيه غير تفكير إذا همه اهلي
فكرو اريد من اهل حمزه ميفكرون..

نزل حمزه الجنطه وتقرب عليه لزم أيدي
ودخلنا سوه البيت عمو يوسف كاعد على
القنفه وعمه صابرين يمه وثنينهم يباوعون
علينه بطريقه محلوه ذب حمزه الجنطه
بالكاع وباوع عليه حاجاني

حمزه:: فرح اصعدي الغرفتي
وأنا شويه وصاعد وراج

هزيت راسي بمعنى أي واني اباوع
عليهم كلهم عاف أيدي حمزه واني كبل
صعدت الفوك الغرفه حمزه دخلت
وسديت الباب كعدت على الجربايه
خايفه شويه وصرت اسمع صوت
صياحهم وصوت حمزه عالي

حمزه:: انااا اطلعععع من البيتتتت

ضلو ماعرف شكد يصايحون وماعرف
شنو حجو لأن ساده الباب وصوت
مينسمع أبدا شويه وجان ينفتح
الباب وظهر إلي حمزه كمت خايفه
اني ورحت إله

فرح:: حمزهه شكو

حمزه:: ماكو شي بس أنا طالع فدساعتين
وراجع

فرح:: حمزه لتعوفني والله أخاف

لزم وجهي بثنين اديه وهو يحاجيني
ويريد يطمني

حمزه:: من شنو تخافين وأنا وياج

فرح:: صرت اخاف من كل شي حمزه
لا تخليني اهنا اخذني وياك وين ماتروح

حمزه:: وين اخذج أنا رايح اريدن
اكمل البيت حتى نروح بي

فرح:: شنو يابيت

حمزه:: البيت الجنه بي راح نرجع
بي ونعيش بي

فرح:: حتى اهلك مامتقبليني مو

حضني وضمني الصدره وهو يكول

حمزه:: منين تجيبين هاذا الحجي
أنا تعاركت وياهم وماريد اضل
بعد بالبيت ونطلع منه احسن

فرح:: خلينه اهنا ماريد اروح اهناك

حمزه:: لا اهناك احسن

رجع وخرني من حضنه ولزم وجهي ويحجي

حمزه:: هسه انتِ ابقي اهنا وحتى لا
تنزلين جوه انا بالساعتين وتلكيني يمج

فرح:: بس لا تتاخر

حمزه:: ما تأخر ما تأخر بس سوي مثل ماكتلج

هزيت راسي بمعنى أي وهو تقرب اكثر
باس كصتي وبتعد راح الكنتور مالته طلع
فلوس من مجر وطلع من الغرفه رجعت
اني كعدت على الجربايه وضليت اتاني بي

بالربع ساعه لا اكثر ونفتح الباب ودخلت
عمه صابرين تلبكت اكيد هسه راح تصيح
عليه بس فاجئتني من كالت

عمه صابرين:: يمه يصير ادخل احجي وياج

فرح:: أي أي عمه اتفضلي ادخلي

عدلت كعدتي وهيه دخلت وسدت الباب
وراها وجتي كعدت يمي ابتسمت
ابتسامه حنونه وهي تكلي

عمه صابرين:: شصاير يمه احجيلي

فرح:: ها

عمه صابرين:: اعرف يمه حجولي بس
أنا اريدن اسمع منج

نزلت راسي ودموعي صارت تنزل
على خدي واني اكول الها

فرح:: عمه والله ماصاير شي

عمه صابرين:: ليش لعد هيج صار إذا
ماصاير شي مثل ماتكولين

باوعت عليها بل أول اترددت احجي
واكول شي بس بنظراتها وحنانها خلتني
كل شي احجيلها وكعدت حجيت كل شي
الها وهيه صافنه ومامستوعبه
إلي اني حجيته

عمه صابرين:: يمه شلون يصير كل هاذا وماحجيتي الامج

فرح ببجي:: عمه والله ردت وتوسلت
بس احجي الهم بس همه ماسمعو
مني أبدا

عمه صابرين:: تهون يمه تهون بحرگه كلب
كالو الج هيج هسه ماتهجسيهم إلا
واجو عليج

فرح:: مايجوني مايردوني بعد

عمه صابرين:: لا يمه لا تحجين هيج
ماكو أم وأب مايردون ابنهم لو بتهم
بالنهايه هاي قطعه من كلبهم ومايكدرون
عليها

فرح:: عمه هم يجي يوم ويرجعون
مثل قبل هم راح يجي يوم يسامحوني

عمه صابرين:: أن شاء الله يمه

هيه كاعده على الجربايه عدلت نفسي
وتمددت خليت راسي بحضنها واني اكللها

فرح:: عمه لعبي بشعري

عمه صابرين:: أخ يمه جنج ليان

فرح:: عمه هم تشتاقين الها

عمه صابرين:: شلون ماشتاق الها
هاي قطعه من كلبي لو بيدي اجيبها
هيه واسمر واخليهم يعيشون يمي

فرح:: عمه تحبيها هيه اكثر لو الجهال

عمه صابرين:: يمه كلماً ومعزته الخاصه
أنا مافرق بينهم وكلهم نفس لمحبه

ضليت اسئل عمه صابرين وهيه خطيه
تجاوب عليه لحد مانمت بحضنها واني
أصلاً مادري بنفسي احس أكو أصوات
صارت يم راسي بس اني غالبني النعاس ومافتحت عيني أبدا

•~•~•~•~•~•~•~•~

ليان......

حضرت الجهال وحضرت نفسي علمود
اروح لاهلي بس انتاني باسمر يجي
حتى نكله ويودينه

كاعده وامشط بشعر جمانه واريد اشدلها
ستوتات ثنين بس هيه ماتركد كدامي
وموديه راسها هيج ومرجعته هيج

ليان:: ماما كعدي

ماكعدت وضلت تحوس هيج وهيج
وشلعت كلبي يله كملت الها رجعت
رتبت شعرات جود وكعدت شويه
ودخل اسمر لا سلام ولا كلام كبل كال

اسمر:: من كسرت الموبايل شلتي الخط
لو لا

ليان:: شنو

اسمر:: سيمكارت سيمكارت ماطلعتي
من الموبايل

ليان:: امبله طلعته من موبايلك المكسر

اسمر:: خوش يله جيبي

تقرب ومدلي ايده باوعت بوجهه
ياشرلي بحواجبه على ايده وعود يله
جيبي كمت من الجربايه ورحت الكنتور
طلعته اله بس مانطيته إلا كتله

ليان:: بل أول لازم تكلي أي

أسمر بستغراب:: على شنو

ليان:: هسه دكول أي وإني بعدين اكلك
على شنو

اسمر:: أي أي يله بس جيبي السيمكارات

ليان:: كد كلمتك

اسمر:: لياااننننن

ليان:: خوش خوش.... هاك

انطيته الخط وهو بسرعه اخذه
وطلع جهاز من جيبه فتح صفحته
وخلاه بي

ليان:: ماشالله صايره عندك هواي فلوس

باوع عليه عاكد حواجبه

اسمر:: شكو

ليان:: ماكو بس اكول صايره عندك
هواي فلوس

اسمر:: تردين محتاجه فلوس انطيج

ليان:: لااا شكرا إلي انطيتني ياهن
هذاك اليوم بعدهن عندي

ضبط الموبايل وماعرف على منو اتصل
وضل يتعذر منه ويكله جهازي مكسور
والطرف الثاني جنه ممصدك وضل
يحجي ويا واول ماسده إني كبل كتله

ليان:: يله وصلنا لاهلي

اسمر:: شنو شسوون

ليان:: شنو شنسوي نشوفهم يعني شنسوي

اسمر:: خوش عود بأجر الصبح

ليان:: شنوووو والله ماضل الصبح

اسمر:: ليش شكو شعندج

ليان::مشتاقه الهم وصالي هواي مشايفه أمي

اسمر:: خوش اشوف

ليان:: شنوو تشوف اسمر ترا محضره الجهال

باوع على الجهال ورجع باوعلي
من فوك ليجوه وكال

اسمر:: خوش يله لعد هو انتِ متحضره
وبدون ماتكولين عندي نعل اسئله

سكتت ماعرف شنو أرد عليه
رحت الجود شلته وذكرت ماكتله
أني رجعت التفتت عليه وكتله

ليان:: ترا ابات

اسمر:: شكوو بايتههه

ليان:: غير صالي هواي مابايته

اسمر:: الصبر الصبرر... امشيي وخلصيني

طلع من الغرفه واني عدلت ملابس
جود وشلت الجنطه هيه صغيره
وخفيفه وكدرت اشيلها جمانه
تمشي كدامي

ليان:: على كيفج امشي لا تستعجلين

صارت تمشي خطوه خطوه واني
وراها باصبعي سديت باب الغرفه
ونزلنا جمانه تنزل بايه بايه واني
وراها وراها لحد ماكملنا الدرج عمتي
بغرفتها ماتدري بينا وين ماوين ولا
تدري طلعنه

طلعنه برأ البيت واسمر شال جمانه
لحد ماوصلنا الباب البيت

اسمر:: يله نوميهم اول ماتدخلين لا تخليهم
سهرانين

ليان:: شنو تعلمني بيهم

اسمر:: لا بس جاي اكلج... وها باعي

ليان:: باوعت

اسمر:: الصبح أنا جاي اخذكم فاكعدي
من وقت

ليان:: لا ليش ضال لصبح خو نص
اليل وتعال اخذنه

اسمر:: ليان بلا حجي زايد

ليان:: خوش.... لليل وتعال اخذنه

أسمر:: لا هواي لليل شعدج ضاله

ليان:: أسمر شبيك مسويها فدمره تره
ماجايه لبيت خالي لو عمي ترا بيت اهلي

أسمر:: للعصر وحضري نفسج..... بدوننن
حجي ماشي يله دخلي هوى بارد
وخطيه الجهال

ماخلاني احجي فتحلي باب بيت
اهلي وخلاني ادخل وهو راح البيت
رجع مشيت اني وفتحت باب المطبخ
لكيت امي وحمزه بالمطبخ ضحكت
وكلت الها

ليان:: شنهي يمه مشغله حمزه

امي:: يمه هلا عاش من شافج

حمزه:: ياعاش هيه غير هذاك الاسبوع يمنه

امي:: وينه جنها سنه ماجايتنه

بوست امي وسلمت على حمزه
وجمانه شمرت نفسها بحضن
حمزه تكيف عليه ودخلنا الصاله

ليان:: لعد ابويه وين

امي:: بالغرفه يمه

ليان:: شعجب بهيج وقت بالغرفه

باوعت امي على حمزه ورجعت باوعت
عليه ماردت شي وإني عرفت اكيد
حمزه مسوي شي

ليان:: اكو شي صاير!

امي:: يمه كولي شنو الماصار

ليان:: ليش شكو يمه احجي

سولفت الي كل شي مسولفته الها
فرح واباوع لحمزه شي عادي عنده
جان ماعنده رده فعل أبدا بس اني
كلش انصدمت يعني شنو الي صار
ووين وصلو مرحله اهلها هيج يسوون ومايسمعون لبتهم ماحجيت شي بس
انطيت جود لأمي وصعدت فوك الغرفه
حمزه

فتحت الباب على كيفي ودخلت
صوت ماكو غير صوت ونين ستغربت
شنو هاي باوعت لفرح نايمه ومتغطية
ببطانيه بس البطانيه جانت تهتز تقربت
ازيد عليها وحاجيته

ليان:: فروحه كاعده

ماكو صوت غير ونين خفت عليها
ليش جاي تون باوعت لوجهه أحمر

ليان:: فرح كاعدهه

هم ماحاجتني خليت اديه على كصتها نار ومشتعله بيها كبل وخرت الغطى من عدها

ليان:: كومي فرحح لتنامين

فتحت عيونها على كيفها وباوعت
الي واول ماشافتني كالت

فرح:: بردانه غطيني

ليان:: يااغطيج ولج كومي

رجعت نامت وهيه تون ماعندي غير
عالاخيار طلعت ومن الغرفه ووكفت
على المحجر وصحت على حمزه

ليان:: حمزهعه تعالللل فرحح...

ماكدرت اكمل حجايتي شركت
بالحجايه وضليت اكح بي حمزه
كبل أول ماسمعني طفر الفوك
وكبل الغرفه رحت اني ورا هو
لازم وجه فرح ويحاجيها

حمزه:: فرح... حبيبتي كعدي... فرح

رجعت فتحت عيونها وباوعت عليه
وابتسمت وكالت بصوت ناصي

فرح:: مو كلت ما تأخر ليش تاخرت

حمزه:: ماتأخرت هاي انا يمج كومي..... ليان جيبيلي مي وخاولي

ليان:: ماتفيدها الكمادات بعد

حمزه:: شنوو ليشش لعدد شسوي

ليان:: خلي نخليها جو المي

حمزه:: الدنيا بارده تردينهاا تتمرض

ليان:: لا لا تخاف بس خليها جوه المي

وخر الغطى من كل جسمها وخله ايد
جوه راسها وأيد جوه رجليها ومشه
بيها الحمام

حمزه:: شبيججج صنم تعاليي فتحي الباب

رحت بسرعه فتحت الباب اله دخلها
وخلاها على التخته الموجوده وفتح
الدوش عليها وهيه كبل فزت
مخترعه خطيه

فرح:: يمهه شنوو هايي

حمزه:: اصبري اصبري

فرح:: شنوو وخرر المي مني تخبلتتت

تبللت كل ملابسها رحت اني الكنتور
حمزه طلعت الها منشفه خطيه ورحت
الها سد حمزه المي وكومها واني لفيت
عليها المنشفه وطلعتها كعدناها على
الكرسي وباوعت لحمزه

حمزه:: خير شكو

ليان:: اطلع

حمزه:: شنو وليش

ليان:: داريد اغير البنيه

حمزه:: غيري الها احد لازمج

ليان:: بلا حمزه امشي اطلع برأ

باوع على فرح وحك راسه وطلع
برأ واني بدلت الها ورجع حمزه
دخل وقنعناها كوه عليها تنزل
تتعشه وتعشينه بس ابوي ماموجود
ويانه لأن حمزه متواجد بالبيت وحمزه
جاي يكمل أثاث البيت إلي انعرف البيت
الحمزه ويريد يكمله باسرع وكت
حتى ينزلون بي هو وفرح

ضلت اليل كله فرح تبجي على اهلها
وكل ساعه تحجي شي وتكعد تبجي
واني وامي نقنع بيها أن راح يجي
يوم ويعرفون كل شي واني هم
شكد شلت بكلبي على ياسمين
وتحسبت الها طلعت وحده ملعبه
وهسه يله عرفت مثل ماكالت ريم
هيه إلي اخذت من صوري
ونقلتهن الاخوها

رجعت اني وهيج مرت ايامنه عمتي
صارت يوميه تخابر على أمجد حتى
يرجع وتزوجه ميس واسمر ماراضي
عليها بهيج موضوع

سمعت باحمزه وفرح انتقلو البيت
ماكدرت اروح الهم لأن الجهال
ثنينهم تمرضو وكلت بس يتحسنون
اروحلهم ابويه بعده مايحجي وي
حمزه ولا حمزه يروح البيت أبدا

علاقتي باسمر هيه هيه يوم حبايب
يوم من الروس..

•~•~•~•~•~•~•~•~•

فرح....

ومن بعد ايام انتقلنا البيت نفسه بس
حمزه جان مرتبه لأفضل وجايب غرفه
نوم ومكمله تكمل مامخلي بي نقص أبدا

تممنه زواجنه لأن بالنهايه اني اله
شرعاً وقانوناً وبالظروف الاحنه بيها
مستحيل بعد نسوي عرس علاقتي
باحمزه كلش حلوه وهو يحاول
يضحكني دائما وأبدا ماخله شي بنفسي

اقاربه اجو باركولنه والي اعرفه محد
يعرف بالي صار أبدا ومن سئلت حمزه
كال السالفه إذا وصلت يم جدي عمران
كل احنه ننتهي واليأس مقدم بلاغ
بخصوص ليث ومايحجون اله إلا
يلكو والي عرفته عساس مسافر
ولحد لأن مالاكي وياسمين محد
يحجيلي بخصوصها ولا يردوني
اذكرها أبدا

اهلي أخ ياهلي لحد اليوم اباوع
للباب واكول هسه يدكو...

صبح..

حمزه رايح يجيب صمون واني
واكفه احضر بالريوك انفتح الباب
الباب ودخل حمزه باوع إلي وضحك

فرح:: شبيك تضحك

حمزه:: ليش يعني مايصير نضحك

فرح:: لا يصير بس أنتَ باوعت عليه وضحكت

تقرب عليه وباسني من خدي ونزل
على ركبتي كبل رفعت أيدي وخرته

فرح:: مو وقتك هسه

حمزه:: لعد شوكت وقتي

فرح:: اهووو وخر خلي اكمل

ضحكت ورجعت انداريت الطباخ
طكيت بيض فوك الطماطه وحمزه
راح كعد على الطبله يتانيني اخلص
واني خلصت ووديت الجاي صبيته
وكعدنه ناكل......

لليل وره العشه واكفه اغسل للمواعين
وحمزه عبر من يمي ديريد يفتح باب
المطبخ بس ريحته واصله العاشر بيت

فرح:: حمزه

حمزه:: ها حبيبي

فرح:: شنو هاي شدعوه هلكد عطر مخلي

صفن بيه ورجع رفع ملابسه بايده
شمهن ورجع عليه

حمزه:: ترا كل اسمه عطر مامخلي

فرح:: شنو ممخلي دشوف عطرك
ليومين واصله ريحته

حمزه:: ولج مامخلي

فرح:: شو تعال

غسلت أيدي وتقرب عليه لزمته من
ركبته وقربت راسي اله شميت عطره
أصلاً كلش قوي واني عجبني الوضع
مابتعدت ولا حجيت ويا وهو استغل
الوضع رفع اديه لخصري

حمزه:: شعدج ولج تتحارشين بيه

ماحاجيته بس مخليه راسي بركبته
واستنشق عطره

حمزه:: فرح أريد اطلع

فرح:: لا تطلع

حمزه:: ليش

فرح:: ضل يمي

حمزه:: ولج الولد بالباب هسه يتانوني

رفعت راسي اله وبرطمت شفايفي واني اكله

فرح:: تطلع وتخليني علمود الولد

حمزه بضحكه:: لا يابه ولد شنو واني
عندي فرحتي

ابتسمت ورجعت خليت رأسي بركبته
واستنشق عطره وهو رفعني من خصري
ومشه بيه بتجاه الغرفه....

{اتفضلو}

وهيج مر كم يوم ماخلي حمزه
يطلع ونهار كله متعلكه بي واشمشم
بعطره شكيت بنفسي حامل بس
مافاتحت حمزه بهل شي لأن كلت
شنو ماصار النا هواي شبسرعه
حبلت وشبسرعه بينت عليه
وشلت هاي السالفه من راسي

•~•~•~•~•~•~•~•~•~•~

ليان.....

جود منومته بس جمانه تلعب عمي
بعده لحد لأن ماراجع واسمر صار
يروح العياده الصبح يجي العصر
وإذا يروح العصر يجي بليل ماخله
اوقاته هواي فترا الشغل

واكفين اني وعمه سناء بالمطبخ وهيه تحجي

عمه سناء:: هسه إذا امشي عليها ينطوها

ليان:: عمه منيه

عمه سناء:: شبيج ميس

ليان:: هسه عمه هي مني ملكه جمال
العراق وماينطوها الج هو بس تروحين
وتمشين عليها حتى مهر ماكو كبل
يكلولج كبعي واخذي

باوعت على عمتي تباوع إلي صفح
ماعاجبها كلامي عشتوو واني هم
سكتت على شنو احجي اشو هيه
عمتي كاتله نفسها على الجكمه

ضليت اني اثرم زلاطه وهي واكفه
على الطباخ إلا أن اندك باب الشارع
جمانه بس سمعت الباب اندك كبل
طفرت تصفك

ليان:: شبيج يمه جاي عريس وتصفكين

عمه سناء:: امي ليان افتحي الباب
مابيه اطلع اني

هزيت راسي وكمت شلت الحاجات
خليتها على الكاونتر وطلعت البرا
وجمانه وراي وراي إلا أن فتحت
الباب ونصدمت بمكاني واني اشوفه...

يتبععع

•~•~•~•~•~•~•~•

الكاتبه ضحى اليوسف

أحفاد عمران

بارت واحد يفصلنا عن النهايه 💔

تابعوني انستا

ح

ساب الانستا