رواية احفاد السيد : الثار ( بأجزائها الإثنين ) الفصل الثالث والعشرون 23 - بقلم ​رُقَـيَّـةُ الْأَكْـبَـرُ

لا تنسون التصويت قبل كلشي وتعليق حلو مثلكم ومتابعة لحسابي oo_ll13 لطفاً ツ

╯ رُقـــيــة الـأكبــر ╰
بقـلمها روايــة 人 أحـفـاد السيد : الثــآر

__ ثقل ميزانــك بذكــر الله

_ سبحان الله
_ الحــمد لله
_ لا اله الا الله
_ الله وأكـــبر
_ لا حول ولا قوة الا باالله
_ سُبحان الله العضيم
_ سُبحان الله وبحمدة
_ أستغفر الله واتوب اليه
_ اللهم صل على محمد وال محمد

⊂ والــأن لنـــشرب القلــيــل من المــاء المنــعش ونبلـــش ⊃

الــــبــارت 38

__ يا أبليس
أعُجبت بك، ولكن في حكاياتك، تتبّع الظلام .
أنا لا أتبع خطواتك، فأنا أختار نور الوجود .

┬──┬┬──┬┬──┬┬──┬┬──┬

;; مَــشهِــد من احد بقاع الارض ;;

"" مَـــنسـِــة ""

طلعت من غرفة امي وتوجهت لبيت اخوي لكيت الباب مفتوح كاعدتة دفعت الباب ودخلت واني اصيح بأسمة من اول ما توجهت الة .. ومجان يرد ولمن دخلت للغرفة لكيتة واكف على المراية ويتزين ( يرتب روحة ) ..

_ داسِم ؟؟ ويينك داسِمم !! داسِم
هاي انت هنا واني جاي اصيحلك من وانا برة مترد علية ولا تجاوب ؟؟

_ احجي شعندج ؟

_ امي ودتني حتى اذكرك

قاطع كلامي ورفع راسة لسقف وهوة مغمض صار يردد

_ اليوم هو يوم راس السنة الهجري والمفروض علينا اليوم موعد القربان تردين تكليلي هيج

ابتسمت رغم انا اعرف اخوي بس مدري ليش امي بعدهي ممتأكدة هو ميحتاج الى من يذكرة واردفت وياه ::

_ اييي صح

_ شكلج نسيتي شيء

_ شنوة ؟

_ منسة داسم ما ينسى لان انا مو بشر مخلوق نفسكم تمام

_ تمام

_ مماس وين ؟

_ مادري بس اكيد بغرفتهة

_ بوجهج كملي طريقج وروحي لـــ مماس خلها تتزين وترتب روحها وتجيني وبطريقج جمعي الناس وخلهم يرحون للساحة ..

_ راح تقدم اختـي قربان ؟؟!

_ شرأيج اقدمج انت ؟؟

_ داسم

_ منسة داسم ما ينسأل روحي نفذي الكتلج علية روححي ..

_ تمام تمام .

تركني وطلع قبلي داسم وانا طلعت وراه وانا براسي افكر معقول يقدم اختي قربان هاي المرة ؟!
ايي اكيد لان اذا مو هيج مطلب اخليها تتزين وتلبس
شنو هاي الحياة النحن بيها .

اخوي داسم اكثر شخص قريب لأبليس !
لا تنصدمون وصل مرحلة ابليس يتصور على هيئة بشر ويحجي وي اخوي وللعلم اخوي جان اسمة حيرام بس لمن وصل هاي المرحلة وي ابليس .

غير اسمة وحولة الى داسم ومعنى هذا الاسم احد ابناء الشيطان ..
ولمن وصل داسم لهاي المرحلة من الكفر والطغيان صار الحاكم علينة هنا

ومحد بينا يكدر يكول له لا لان عندة مسخر جن ينطونة اخبار التصير بوجودة وبغيابة يعرف كلشي حتى البيوت المقفول عليها بابها هوة يدري شنو موجود ورة هاذا الباب ما يخفى علية شي ..

رحت لاختي واول ما دخلت الها لكيتها كاعدة ترتب بفراشها رحت وكفت يمها وصرت اللعب بشعرها
باوعتلي وضحكت .. واردفت ..

مَماس :: شببيج تردين تموتين هههه

_ تعرفي اليوم هو موعد القربان

_ اي اعرف سمعت اثنين ولد يححون بي مرو منا

_ داسم ..

_ شبي ؟

_ طلب مني اجمع النـاس بالساحة واجي اخليج تتزينين وتجين وياي ..

بقت صافنة بوجهي وانا صرت اقرة معاني الخوف بعيونها ادري بختي عادي عدها تموت بس متريد متوتتها بهاي الطريقة البشعة كلنا نعرف قتل القربان بما يرضي الشيطان ..
كعدت على فراشها واردفت وي طيحة دمعتها ..

_ انا قريآن السنــة ؟؟

_ يمكن غير شي لا تتوقعين هيج يروحي يلا كومي خلي اعدل الج ونطلع لساحة

_ لاا منسة لاا ماكو الها تفسير غير هذا اختارووني الي انا راح اكون القربان انااا

_ لاااا مراح يصير هيج وامي مراح تقبل مماس كومي خلينا نسوي الطلبة داسِم لا يعصب علينا كوومي

سحبتها من ايدها وكعدتها على الكرسي بعد ما طلعت الها ملابس تليق بيها وخليتها تلبسهم رجعت وطلعتلي
وكعدت وكعدت كدامها ارسم عيونها كحل واحدد شفايفها ..

وطلعتها كأنها البدر حُسناً ..
وبقيت كاعدة انا وياها وهي ترجف لمن سمعنا صيحة داسم جاية من الوادي ..

كمنا انا ومماس ورحنا برجلينة رغم المسافة شوي بعيدة لمن وصلنا جانت الشمس قريب تغرب .
وداسم مجمع كل الجانو بالضيعة ..

واكفين واحد يم واحد وكل واحد بيهم يفكر ان الدور هو علية هو الراح يتقدم قربان ..
اتقدم اخوي داسم واخذ مماس بيدها ووكف كدام الكل و صـــاح ...

داسِم :: هاذي مَمــاس اختــي كلكم تعرفوهااا بــمثل هاذا اليـوم الي هو راس السنة الهجري
انا اتخذت قرار راح يغير مصير حياتها ..

جان داسم يحجي واباوع لامي ومجنت اشوف لا حزن ولا شي بعيونها باي لحضة داسم يلفظ ويكول مماس هي قربان السنة بس امي ما بدر منها ولا شي .
كمل كلامة داسم الوكع كلوبنا وكال :

داسِـم :: اليــوم بليـل وعساعة 12 راح يكون عرس اختـي مماس من صديقي ساتر ..

بقيت مصدمة للسمعتة وضحكت وبجيت حرفياً على كمية الرعب الي عشتها من خوفي على اختي يوم كال الليلة عرسها رف كلبي وركضت وحضنت مماس
الجانت هية الثانية ممصدكة وبقت ثابتة بمكانها تستوعب الي صارر !!

اخذتها ورجعنا وكفنة ورجع اتقدم داسِم واخذ بأيد شاسع الي هو اخونا الصغير عمرة بتقريب 13 سنة
واتقدم بي وكف كدامنا .. واردف :

داسِم :: اماا لموعد القربان اختاريت ان يكون قربان المرة هاي واحد من اهلي اوهبة في سبليهم حتى اثبت للكل والهم ان انا ماعندي عزيز ولا اني اعز احد على احد .. قربان اليوم هاذا هوة اخووي شاسع ..

عزززةة اخووييي لاااا طفلل هاذا شنو قربان شنو واحد من اهلك بقينا نباوع شلون ساتر انطة السجين وحطها بأيد داسِم

ما طلع اي رد فعل من شاسع وهذا انطاني اكبر دليل ان داسم قبل هذا الوقت رايح لاخوي وقاري براسة ومقنعة بالكلام هذا قربان وتنعم فوك بالجنة ..

طاح شاسع على ركبتة و داسم لزمة من شعرة ورفـع راسة وحط السجينة على ركبتـة .
وصاح داسم قبل لا ينحــر .. ::

داسم :: يا سلطاناً علياً تسلطت و سلطتني عليهم بذالك
تقبل منــي هذا القربباان .. ..

ومشت سجينة داسم على رقبة شاسع وقصت رقبتة قص وما رتاح الا لمن قطع راسة وفصلة عن جسدة ..
غمضت عيوني وحطيت راسي على متن مماس من

بشاعة اللحضة شلون داسم يطاوعة كلبة كلهم يكتلهم بهاي الطريقة وطرائق مختلفة حسب رغبة الشيطان ..
بعد دقايق حسينة بشي يهتز مثل الزلزال جان

والدنيا غيمت حيل وصارت مثل السحابة فوق رؤسنا
واعتبرنا هل اشياء دلائل على تقبل القربان ..
بينما الناس جانو ينزلون من التل للوادي ومن الوادي جانو يردون يرجعون للضيعة مالتنا ..

بقى داسم واكف يم جثة شاسع .
للعلم كل قربان نقدمة اول ما ننصرف عنة يبقى داسم يمة واكف ويتمتم ولمن نرجع بعد ساعات نلكي الجثة مختفية تماما عن وجه الارض .

والدم الجان على رمال التل مختفية وكأن مصار شي هنا وهذا مجرد تل عادي ..

ونحن ننزل والحزن مرسوم على معاني وجهنا ماكدرت تسيطر مماس على روحها وتتحمل الي شافته بنص الطريق وكعت علية ..

بقيت محتارة بيها وحضي حلو جان ساتر قريب علينة
ركض وشال مماس ورجعنا لمكانة ودخلنا للغرفة وحطاها على افراشها ..
وطبت حكيمة بسرعة الها بعد ما ساتر ضل يصيح عليها هو وشايل مماس ..

حكيـمة :: مابية شي يخوف بس فقدت الوعي طبيعي .

_ يعني حكيمة راح تكوم ؟

حكيمة :: لا تشيلون همها انطوها ساعة راح تشوفوها شلون راح تكوم وترجع الكم واذا مو هيج صيحو الي

_ شكرا تعبناج

تركتنا حكيـمة وطلعت وهاي مرة جبيرة بالعمر ثلاث اولاد الها و بنية عدها جانو بس من أيمانها بشيطان
قدمتهم كلهم قربان الة ..

نحن هيج نعيش بهاي القرية ناكرين وجود الله لابعد الحدود وعندنا الرب هو الشيطان بالمُقابل اذا ندعو الا او نطلب شي لازم نقدم له شي يرضي حتى ينفذ دعائنا ..
انا جنت ضدهم وممقتنعة ابد وجنت من كد خوفي اذا بمجرد اجيب اسم الله انقتل ..

جنت واصلة مرحلة اغلب صلاتي اقوم بيهن بالحمامات
حتى محد يشوفني ومحد يدري بية بس مماس لان هية هم على طريقي مستحيل نخسر رحمة رب الكون العضيم بمجرد سجودنا وطاعته لأبليس

وهوة ابليس لو بي خير ما عصة امر ربة وخلا يطردة من الجنة هيج شخصية شلون انا عندي عقل وأمن بيها ؟؟!
مجنت اعرف هذول الناس شلون يفكرون ..

كعدت يم اختي بس كدامها ولزمت ايدها
و ساتر كعد يم راسها وخله ايدة داير مداير راس مماس وصار يمشي بأيدة على خدها
وبقيت اباوع الة واردفت ..

منسة :: اليوم زواجك من مماس

ساتر :: ايي

_ اسألك سؤال

_ اسألي

_ زواجك من مماس انت تريدها ولا داسم يريدة ؟!

_ انا الي رحت وطلبت من داسم

_ يفرح كلبي من هيج مواضيع احب على روحي اشوف شخص يريد اختي وما مجبور عليها

_ انا احب مماس ليش حتى توقعتيني مجبور عليها ؟!

_ انت تعرف شي وانا اعرف شي ساتر .

_ مثل شنو تعرفين ؟

_ انسى اهم شي هسة مماس تكوم النا بخير وسلامة

_ مماس بيها شي ؟

_ ليش تسال

_ ليش فكرتي داسم جابرني عليها بيها شي هية ؟

_ لااا سالفة ضايعة انسى ساتر

_ منسة احجي شكو

_ ساتر اريدنك بعد زواجكم يعني باجر لو بعد يومين تاخذ مماس وتروح منا لاي مكان بس طلعها من هاي القوقعه العايشين بيها نحن . احسن الك والها ..

_ اتمنـى بس اكيد داسم مراح يرضى

_ ساتر اسمعنـي وافهمنـي اذا تبقى هنا انت ومماس مراح تعرفون لشوكت تضلون وي بعض انت جاي تفهمنـي موو ؟؟؟

_ صدكيني جاي افهمج بس

_ بس شنو ساتر

_ راح امس النبض مال داسم بخصوص هلموضوع

_ زين تسوي .. انا رايحة هسة

_ بالج لنفسج

_ انت انتبه لــ مماس اذا صار شي بس صيحني صوت

_ لا توصين بعيوني ميمي

_ تمام ..

عفت ساتـر بالغرفة وطلعت واني امشي ونضري وفكري وكلشي بية متوجة للــتل وانا امشي بخطوات ناشفة لاشوف شنو صار وي اخوي داسم
سمعت صوت من خلفي يصيح باسمي وكفت اتمعن بالصوت ..
والا هذا صوت أخيل اخ ساتـر ..
وكفت وما نداريت الة لابين اله عدم اهتمامي لحد ما خليته هوة يجي ويصير كدامي ويخلي عيونة بعيوني ..

أخيل :: مَنــسـة مَنــسة اوكفي دقيقة منسة ..

_ خير شتريد

_ وين رايحة

_ متشوف يعنييي اعمى حضرتك ؟

_ رايحة لتل ؟

_ اييي عندك شي

_ لا ترحين تعرفين هسة داسم وي القربان ف خلي هسة لا ترحين

_ داسم اخوي والقربان اخوي وخر

ردت اروح لزم ايدي ما نعني من تكميل طريقي انداريت الة ووخرت ايدي بقوة ونتر منة
وصحت بصووت

_ وخرررر شييل اييدك دير بالك تحط ايدك بعددد علييـة !!

أخيل ;; مجنت اقصد شبيج ؟؟ بس ردت احجي وياج ..

على صياحي طلع ساتــر واجاني يركض لمن شاف اخوة يمي واردف ويانة وانا عطت بوجهة ..

ساتــر :: شنوو صااير اصواتكم طلعت.

_ زين اجيت ساتـر الزم اخوك لا والله مقتلة على ايدي وخرو عني هسة ..

أخيـل :: انا لمصلحتك يالخبلة لا تصعدين لاخوج ..

_ موو شغلك موو شغلك ..

ساتـر :: روحي للمكان التردي خللص روحيي

_ وخر عني اخوة عارض بطريقي ويريدني اروح

أخيل :: روحي وانت منجعمة بدون مدردمين..

ساتر :: كافي انت الثاني اسكت ذيج مفضوحة وانت افضح منها ..

اخيل :: يبن الناس بس ردت اكللها وين رايحة

_ لا تكللها اخيل باع لنفسك باع للمكان الانت بي لا تدخل بعائلة داسِم اجفينة شرهم يجفيك شر جهنم ..

_ الي تريدة انت

_ وين مولي هسة انت

_ اكعد يم البحيرة شوية

_ تحجيلك وي واحد زمال هم يفهم عليك انت من يا صنف ..

_ اذا اجت منسة لهناك اعوفنها واكوم وعد ..

_ امششي امششي ..

"" منــسة ""

كملت طريقي ناح التل وصارت القرية مالتنا بظهري صرت المح داسم على نفس وكفتة مغمض ويتمتم شنو يكول ما نعرف ..
لمن حطيت رجلي على التل وانا امشي بخطوات هادئة وساكنة داسِم وهوة مغمض رفع ايدة باتجاهي وسولي هيج ✋ كأن يكلي لا تكملين ..
وكفت ولمن شفتة رجعت خطوتين لورة وثبتت بمكاني نزل ايدة هو ..
السر المحد فاهمة شلون عرف انا جاية لعندة وهوة جان منطيني ظهرة وجان مغمض وجان ملتهي اووف ..

لمن ركزت بالتل لكيت جثة اخوي شاسع مختفية .. والدم البلكاع رايح مختفي .
وحتى الدم الجان على ملابس داسم والدم الي طفر من شاسع لوجه داسم راييح كأن مصار هنا شي ابدا
وين راس اخوي وين جسمة وين راح .
انقطع تفكيري وانا احس بأيد سحلتني من قميصي من ظهري وجارتني حييل ناحها وطيحتني من المسافه الجنت قاطعتها من التل .. !!

↲ بَــــ غ ـــــداد ↳

"" وهـج الطــف ""

عصبت من يم عمتي كلبت الاغراض بعصبيتي وصعدت لفوك ابجي وضليت اهلوس بالحجي وياها ..
صعدت وراي ووكفت كدامي واني حاطة راسي ابين رجلية .. واردفت وياي

فاطمة الزهراء :: شنو اسمهاا السويتيها جوة ؟؟
من احجيي وياج ارفعي راسج ..
ليش صالج مدة هييج تتصرفين !؟ ليش كلما عصبتي صرتي تصيحي هيج منو راح يقتلج ومنو هذااا اليريد يأذيج ؟؟ احجيي ولج انا وياجج ومحد راح يمس شعرة منج ..

بقيت ابجيي حييل اجت ورفعتني من ايدي وحضنتي واردفت وياي .

_ احجيلي ولج شكوو شصاير وياج ؟؟
ليش هيج جاي تهلوسين شبيج ؟

وهج الطف :: راح يذبحني ..

_ ولج منو اليمس شعوة منج شمالج تهذرين هيجي ؟؟

اكتفيت بالسكوت وخرت عن حضنها وكعدت بمكاني
وبقت تباوع علية وهاي المرة اصرت وياي حيل
لان كثرت طفراتي عليهم هيج ومجنت اريد احسسهم اني انا ديصير وياي هيج على اثار الادوية الي احس روحي ادمنتهم وصارو يطلعو علية هيج مضاعفات مثل التخيل والهلوسة والانفعال ..

فاطمة الزهراء :: سولفي شبيــج ؟؟ منو يكدر يوصلج وانا يمج ؟ منو يأذيج وانا وياج مستحيل احد يتقرب منج.

بعد هذا كلامها حطيت وجهي ابين ادية مسحتة واردفت وياها واني اناضرها بطريقة جانت قوية نوعا ما ..

_ اهاا انت يمي .. خووش لعد وين وينج عن امي لمن انقتلت ؟؟ هاااا انت هسسة جااي تكولين انا يمج يلااا
ويينج عنيي يوم اخووج واولادج اخوج. سلبو مني طفولتي وخلوني محجوزة بالمخزن مربطة ومحد يدري عني ..
وينج عنيي يوم الي انا بعمر 8سنووات كضيت ليالي وليالي واني اصارع لوحدي وانا محبوسة وانواع الحشرات نامت وياي لج صرت نفس النبي سليمان تعلمت احجي وياهن من وراهم ..
وينج عني ؟؟ وينج عن طفولتي ؟؟ وينج عنن اميييي

كاافي كاافييي تمثلون تحبونييي لو تحبوني جان شفت امي وياي لو تحبوني جان شفت كبرها ..

كل هاذا السويتو الي مو شي والله لو ما حب امي الكم وانا حبيتكم على حبها
جان هسة انا صرت اكبر عدو الكم ..

لاتحجين بشي انت ما عشتي عمة انت عمرج كلة تحت جناح امج وابوج واخوانج ولمن طلعتي رحتي وتزوجتي وعشتي تحت اجناح زوجج ..
لا تحجين بية ولا تكولين انت يمي ..

بقت صافنة علية وانا سكتت ورحت كعدت وطلعت رسايل امي وحطيتهن كدامها لكن ما فتحتهن ..
ضلت مصدومة وسالتنـي ..

_ امج انقتلت ؟

_ اييي عمة امييي انقتلت .. وحتـى جثة ماعدها ..

_ وهج منو كالج هاي السالفة ؟

_ مو مهم بس المهم صدك

_ صدك شلوون امج بسمة ماات مقتولة ؟

_ يعني متعرفين ؟

_ ياا يمة وراس جهالي ماعرف ولج شنو نقتلت وهية جانت الروح لـصفاء الحسن ابوج. ؟ الي اعرفة ماتت موت طبيعي

_ وشلون عرفتـي بيها ماتت موت طبيعي ؟

_ يمــة انا من تزوجت لهسة كضيتها بالبصــرة ما طلعت منها وسمعت ان اخوي تزوج امج حتـى ما اجيت ولا باركت الهم لان مجان عندي الوقت ..
وبعد اسنين جمعتنـي وياها الاعياد والمناسبات
وتعرفت عليها وتدخلت بروحي
ونصدمت لمن اتصلت علية العلوية وكالتلي انها ماتت ..

_ ما سالتي شلون ؟

_ سالت وكالت موت الله وسكتت لان الحزن اخذ مني ما اخذ ما تعمقت واجيت للفاتحة وجانو مسوين لها جنازه واخذوها وراحو للنجف شلون ماعدها تابوت ..

_ اذا جانت اكو جنازة واخذوها للنجف وين كبرها لعد. ؟

_ منو كالج ماعدها قبر ترى قبرها موجود ..

_ منو يندلة ؟

_ الكل الولد كلهم الراحو يندلون ..

اخذت الضرف بصورة غير مباشرة عن عمتي لان مردتها تقراهن ..
ومسحت ادموعي وحضنتها .
واعتذرت منها علي السويتة واردفت وياي ..

_ انا هوواي اسفة

_ كافي لا تعتذري البسي الاسود يالله اليوم اول يوم محرم واليوم العلوية العصر عدها قراية خلينا نروح للقراية وبليل اطلعج للمواكب تشوفين الاجواء ..

_ اول مرة احضر ..

_ ادري بيج ومراح تكون اخر مرة راح تعشقين الاجواء اونسسج اليوم

_ تمام اروح اللبس

_ هاي انا جبت الج ملابس سود .. البسي منهن

_ تمام يروحي شكرا هواي

_ وهج ..

_ هاا

_ بعد العاشر نروح انا وياج ونزور امج تمام يروحي ؟

_ الله كريم ..

_ انتضرج جوة

_ تمام ..

تركتني وراحت واني اخذت اشوف الملابس الجابتهم الي واكلب بيهم ..
حسيت روحي جاي تلوب رحت لدولاب فتحتة وطلعت اللعلبة واخذت منها حبايتين وشربت ماي ..
من بعدهن حسيت الروح رجعتلي وصرت اضحك وابتسم بلا شعور اختاريت لبسة اكدر حتى هيج اطلع بيها بدون صاية لان مستورة حيل ..
ورحت لبستها وعدلت روحي ونزلت لكيتها مجهزة روحها ولابسة عبايتها ..
لمن شافتني حطت ايدها على وجهي واردفت ..

_ ليش وجهج هيج شاحب صاير وهم شنو السواد هذا الجوة عيونج ؟

_ ءءءء مو صايرة ما انام عدل ..

_ وليش متنامي عدل ؟

_ ما رجع خبر من المعتز باالله ؟

_ لا والله لهسة الاتصال مقطوع بيهم بس لا تخافين هاي هيج صاير بيج من ورة التفكير ب اعزيز ؟

_ لااا بس اجة على راسي وسالت ..

_ ايي ايي صح صدكت .. ههههههه امشي امشي

_ يعني هم بخير ..

_ والله يا بناتي ماعرف من مهد العرس راحو ونكطع الاتصال بيهم احجي وي عبد الحسن يكلي ..
مابيهم شي اكيد مطمن عليهم جان ما برد هيج عليهم

_ والله ما اثق. بعبد الحسن منا لهنا ماعنده كلب هذا تلكين هس هم بحلك السبع وهوة يكول مابيهم شي

_ ولج عمج ميصير تحجين هيجي علية

_ متشوفي قساوة كلبة؟

_ مو قاسي بس يتعامل وياهم ك زلم ويكدرون يحمون روحهم مو اطفال همة ..

_ لاا عمة لااا الموت ميعرف ولد لو طفل

_ المصطفى صارلة هواي منتضرنة خلينا نطلع الة ولاتفكرين بيهم هسة يرجعون بخير وسلامة ..

_ تمام

طلعنا اني وعمتي ورحنا وي المصطفى لبيت عمي عبد الحسن .
لان هم ناذرين اول عشر ليالي من محرم يسوون قراية ب 5 العصر ..
رحت و دخلت الهم ولكيت لينا كاعدة بالمطبخ سلمت عليها .. وعفت عمتي بالصالة يم العلوية ..

_ سلام ؟

ليــنا :: هههه هلا والله وعليكم السلام

_ شلونج

_ بخير يروحي انت شلونج شخبارج ؟

_ انا تمام اسال عليج

_ والله هاي انا كاعدة اجهز ما بقى شي ويجون النسوان والملا ..

_ الله يساعدج بعدج تعبانة ليش تشتغلين ؟

_ لا يمعودة اتمرضت من الكعده اريد اتحرك بالكوة قنعت خالتي اسوي هذول لا تسمعج هسة وتصعدني ..

_ هههههه لان صدك بعدج مصالج شهر من ولدتي

_ هوواي وهاي جني حصان ..

_ الله ينطيج الصحة. والعافية ..

_ منج لو من الذيب ؟

_ يخسي الذيب كولي

_ علي التقي و علي النقي عفتهم كاعدين فوك اصعدي الهم لا هسة يطلعون يبجون ومكعدين اختهم ..

_ ياااا مو تدلليين جنج على صعدة اصلا راح انام عدهم انسوني بعد ..

_ ههههههه حبيبة روحي الله يرزقج مثلهم واحلا

_ صاعدة الهم يروحي ..

تركت ليــنا وصعدت لفوك دخلت لغرفتهم لكيتهم بس كاعدين وساكتين لا يبجون ولا شي
واختهم نور الزهراء بسابع نومة ..
اخذت الطفل من الكاروك وانا ماعرف منو هذا علي التقي لو علي النقي ههههههه
لمن قريت بالكماط اسم علي التقي عرفتة ..
كعدت الاعبة وفكيت الكماط عنة حررتة واخذت علي النقي وهم فكيت الكماط مالتة وضليت الاعبهم بالكاع ..
بس علمود ما اتيهم لان شلت الكماط عنهم جبت صبغ مال اضافر من اصباغ لينــا لون احمر وصبغت الاصبع الخنصر لــ علي التقي حتى اميزة عن اخوة لان هم نفس الشكل ونفس اللبس هههههه
وبقيت وياهم ملتهية حيل وقت جانو الولد طالعين لتن يدرون الملا ونسوان راح يجون ...

"" غــديـر الله ""

خلص العرس الجنت اتوعد بية لانمار ان بس نخلص العرس نسافر صرت اتحجج الة بعد محرم ..
وهوة حيل ضاج منيي وجان بوقتها يومين ميحجي وياي بس شبيدي انااا
ماريد اسافر .. طنشتة وما اهتميت الة ابد
لان فكري جان يم اخواني صيوان و علي الباقر و المعتز بالله و اصفاد الحق المنعرف ارضهم وين !!

وبعد ما كملت شهري الرابع من الحمل وصرت بالخامس راح الهواي وضل القليل الحمدالله ..
وللعلم لهاي اللحضة مادري انا حامل بولد لو بنت لان مماخذة سونار ..

واني على المراية اعدل بروحي حتى اروح لهلي ..
اجاني انمار وهو مطنكر ما يحجي وياي فتح الكنتور
وطلع قميص وغير الابسة .
واني اباوع ومغلسة عليه .. ولمن كملت اخذت الكحل اريد احط اجة. وسحبة من ايدي وحط لعيونة ..
وحطة بجيبة
وخزرني واردف : ..

أنمار :: شكوو تردين تتكحلين رايحة لعرس ترى رايحة لعزاء الحُسين ..

_ وانت مرايح للموكب ؟

_ انا زلمة

_ وشلفرق يعني زلمة لو بنت

_ سؤال تاففه واليسأال هيج اتفه من السؤال ..

_ قصدك انا تافهة ؟

_ غديرة مريد اتعارك وياج وخري عني ..

_ انت اتحارشت بية هسة ..

_ اي هاي ههي

_ توصلني لهلي لو اروح بتكسي ؟

_ بس هاي باقية انتضرج بالسيارة ..

عافني وراح اخذت عبايتي لبستها عدل واخذت جنطتي ورحت لمن طلعت وياه ركبت بالسيارة على كيف وهوة اجة ورجع الكرسي مالتي لورة حتى ارتاح بي ..
وحرك السيارة وجان يمشي بطيئ لان يعرفني اخاف السرعة ..
وما حجيت وياه شي بس لعبتها صح لزمت بطني وسويت روحي اتوجع ..

_ اخخ يالله ..

_ شنننو شبيج ؟؟

_ ماعرف لوية اجتني

_ الف للمستشفى

_ لااا ميحتاج لويات عادية تعرف الطفل هسة بدة يتحرك ف يعورني

_ متأكدة غديرة اخذذج

_ لااا ميحتتاج ..

_ لا تكابرين

_ ما اكابر بموضوع يخص ابنـي

_ خووش

_ انمار

_ نعم

_ زعلان مني ؟

_ ههه ليش حتى ازعل

_ انمااار كتلك بعد محرم نسوي التريدة

_ وانا احلف الج هسة حتى ورة محرم مراح ترحين انت جاي تجاريني وهيج ههيج وياي

_ انماار انا هيج

_ اييي انت هيج اسكتي يلة

_ تمام اني هسة رايحة لهلي و ما راح ارجع بعد لمن تصفي نيتك اتجاهي ونرجع مثل قبل ماعاجبني الوضع حيل وجاي يأثر علية وانا حامل واهم شي نفسيتـي ..

_ لا والله ام نفسسية ولج انت دمرتي نفسيتي جاي اكلج نسافر لمصلحتي ومصلحتج وقبلها مصلحة الطفل الي ابطنج وانت راكبة راسج

_ لان ماريد اسافر ..

_ وليشش اشو ربع حياتكم انتم تسافرون من دولة لدولة ..

_ انمار لمن نسافر سياحة شي ولمن نسافر نستقر مثل ما انت تريد شي ثاني تماما

_ بس اريد افهم ليش رافضة ؟

_ لان ابوي رااح يرفض وابوي مراح يقبل لتتخلي سالفة الماضي ترجع وتتكرر عند ابوي

_ شنو سالفة الماضي ؟

_ باع انمار ابوي مستحيل يقبل ابتعد عنة لغير محافضة بيها باب وجواب بس لغير بلد ما احلم ..

_ بس انت متزوجة هسة يعني حياتج بيدييي مالة غرض ابوج ..

_ سالفة تعبانة هاي جرب تحجي وياه واذا وافق وعد اجي وياك وعددد هاي المرة صدك بعد الاربعينة حضر موعد طيارتنا

_ واذا خليتة يقتنع

_ هاي ههي اجي وياك

_ خووش

_ ضايج مني ؟

_ ما اضوج من روحي انا

_ حبيب عمرري انت الله لا يحرمني منك وعسى ما تبجيك عيني ..

_ ويخليج ياروحي انت عافيتي وستري ..

كمل أنمار طريقة ووصلت لبيت اهلي ودعتة ودخلت لجوة بعد السلام بيني وبين امي وعمتي دخلت للمطبخ لاشوف التحضيرات كاملة .. الماي والتوزيعات .. والثواب للرضيع لكن باسم علي التقي و علي النقي و نور الزهراء اولاد علي السجاد لان كملت شهر عليهم

لكيت ليــنا كاعدة وتسوي بالثواب . اجيت اشتغل وياها اخذتة عني واردفت وياي ..

ليــنا :: هذا ثواب وما يصلح يشتغلن بية اثنين ..

رجعتها الي لمن رادت تساعدني بفاتحة عمي وانا كتلها هيج .. خووش يا لينا انا غدير ..
ابتسمت الها وسحبت الصينية كلها الي وكعدت انا اشتغل بي لوحدي بقت صافنة علية وكتلها ..

_ طلع كلامج صحيح ما يصلح يشتغلن بية اثنين يلا كومي واتوكلي ..

_ انت شتردين مني متكليلي ثواب علمود اولادي انا الي اسوي شكو مدخلة روحج ؟

_ اولادج ؟؟؟ ترى اولاد اخووي ..

_ وليش اولاد اخوج اولاد الجيران بالنسبة الي انا امهم وانا الي جبتهم ..

_ تمام بس تبقين مجرد ام لا اكثر ولا اقل ويكدر علي السجاد يدفع الج فلوس مقابل تعب الحمل والرضاعة مالتج وبعد ماعندج شي يمة ترحين والله ومحمد وعلي وياج ..
الله يكول هيج مو انا لو انت تعترضين على حكم الله ؟؟

_ لو تموتيين لو تطلع نخلة براسج علي السجاد مراح اعوفة انا مرتة. وام بيتة وام اولادة وهذا البيت انا چنتة شأتي ام أبيتـي ..

_ تمام يم بيت ارتاحي لا يطكلج عرچ

_ تمام غدير يصير خير

_ يصير ليش لا منو ميحب الخير خلي يصير الخير هههه

عافتني وطلعت معصبة حيل ودخلت بعدها طيبة الزهراء كعدت يمي ودفعت الها الصينية كعدت تشتغل ابدالي لان ميصير اتعب روحي هلكد ..

_ ايي سولفيلي المن اجيتي الي ؟

طيبة الزهراء :: اجيتج اسولف شغلتيني

_ تقبليها يعني اشتغل انا ؟

_ لا عمي ما نقبل موضوعنا هسة اريدج بسالفة بس ماريد لا تنصدمين ولا تتفاجأين ولا تصيحين اسمعيني وانت هادئة وكان ماكو شي تمام حافضي على رد فعلج

_ انخمش كلبي شصاير ؟

_ ماكو شي يخوف اصلا يمكن تفرحين

_ تمام كولي شنو

_ اخوانج

_ ياهو منهم ؟

_ علـي الكاظــم و علـي الصـادق ..

بقيت صافنة بوجها شنو عرفها بيهم وهمة طلعو من حياتنا قبل لا هية توعى جان عمرها 5 سنين مدري 4
جاوبتها عليهم وضلت تسولفلي شلون التقت ب علي الصادق وصارت تشوفة صاللها اكثر من شهر هي على تواصل وياه وسولفت الي عن حياتهم وشلون عاشو وهسة رجعو ..

جنت مجرد مستمع الها وهية تحجي لمن خلصت الثواب خلينا على الكاونتر وصعدنا انا وياها للغرفة وكعدنا وكملت كلامها ولمن انتهت بقيت اباوع الها
محتارة ..

مهما صار اخواني ذولة !! علي الصادق يريد يشوفني ..
اكسر كلام ابوي واروح اخون ثقتــة .
اذا ما رحت اخسر اخوتي بس احافض على علاقتي باابوي

واذا رحت اخسر ابوي بس ارجع علاقتي باخوتي ..
جنت حيرانة والحيرة حيرة ..

غمضت عيوني ونزلن ادموعي لصعوبة الموقف النحطيت بي ..

ورجعت طيبات واردفت ..

_ ها غيمـــة ؟؟

_ مادري طيبات مادري ..

_ شلون يعنـي ما تدرين كليلي حتى هسة اتصل بية وهسة نشوفـة قبـل لا تجي الملا بعد الها ساعــة ..

_ كلبي يرجف حيل شوفي

_ لاا يمعوودة اهددي لا يروح يصير بيج شي ما يحتاج الها هلكثر غيمـةة تعاي وياي هسة والتقي ب علي الصادق وبعدين نشوف شلون تشوفي علي الكاظم ..

_ تمام اتصلــي ..

_ ثوانـــي ..

كامت طيبات عنـي واتصلت على اخوي الما شايفتة صار 10 سنين ..
لمن فاركت حضنة جان عمري 9 سنوات .
رجعت طيبات الي ولبست صايتها وحجابها واني بس حطيت العباية على راسي ..
ونزلنا انا وياها واتلكونا امي وعمتي بالهول انا امشي وطيبات ورايي ..

العلوية :: هاا خيرچن مكبعات ؟!

فاطمة الزهراء :: وين رايحات توچ طبيتي انتِ

حسيت طيبات تريد تحجي حطيت ايدي على ايدها واردفت ..

غديـر الله :: نسيـت شغلات هناك بالبيت واريد طبطب وياي اجيبة ونجي خاف ادوخ يصيرر شي بالطريق وياي هية ..

العلوية :: بالكم لنفسكم طيبات تلفونج وياج ؟

_ ايي عمة هاذيا عندي ..

فاطمة الزهراء :: لو هيج تشكن لو مجرد شك حيصير شي تتصلن خوش

غدير الله :: ان شاءالله . يلا مــع السـلامـة ..

اخذت طيبات وطلعنة ولمن تأكدنا ان الشارع فارغ صرنا نمشي بس واني كُل اعضاء جسمي تعورني وترجف ..
لمن وصلت لكيتهم يلتقون بنفس الخرابة الجنت اذا احتاج جَواد يجيني ينتضرني هنا !!
دخلت ولزمتني من ايدي صعدتني الدرج المتكسر ودخلنا لكيت رجال واكف وداير وجهة عننا ..
واردفت طيبات .

_ ءءءحم نحن اجينا ..

التفت النا وصرت انا وياه وجه بوجه !!
خلة عيونة بعيني بقيت صافنة عليه من كد ما متغير ماعرفتة ابد ..
راحت طيبات ووكفت على جهة واتقدم علي الصادق واني اشوفه شلون يرجف بخطواتة ولمن اتقرب منـي ..
حط ايديه على متني واني دنكت ابجي وهوة اردف ..

علي الصادق :: ما متعود على الهجران هيجي انا الجنت متعود على مناغااتج نسيتيني ؟؟!
لون بعدج تهوين اخيج وتعتبري هيج وااذاا الدنيا بعدهي بخير ارفعي راسج خلي وجهج بوجهي شوووفيني شوفي اخيج ..
غدير الله موو مرتاااح ابد طمنينــي ريحـي كلبي ...

رفعت راسي وانا صارت تردد براسي كلماتة الاخيرة وياي
لمن راد يسافر شنو كالي .
ابتسمت لهذا كلامة واردفت ..

غدير الله :: تذكر لمن كتلي راح اسافر يومين لو ثلاث ايام وارجعلج بوقتها رفرف كلبي وجنت خايفة واحجي وياك واكلك لاا تروح .. ما جنت مرتاحة ابد للوضع
انا المجنت افارك حضنك جفيتني فجأة ورحت رووح رووح أسأل حضن علي الباقر شكد بجيت بحضنة علمووودك كم عيد مرة علينا واني جنت اجهز وعدل واكول هسة يجي متعودة عليك عيدي ميكمل بدونك
كم يوم بيوم الچم كلبي واحتاجيتك وما لكيتك..
ماكلت اختي ما تتحمل اغيابي شلون هيج اتركها ؟؟!
ردتت رددتت حاولت اوصل الك اسنين وانيي ادورلك طريق اريد اوصل لشي يخصك مااكو لا انت ولا علي الكاظم ولمن كبرت وعرفت ميصير طاريكم ينجاب صرت ابجي سكتة اشتياق الكم ..
جانت المسافة بعيدة ومجنت اكدر لو مستعدة اكطعها واجيكم ..
كضيت وعشت وياك تسعة اسنين شلوون تنسانــي وتجافينـي هيچي شلوون كدرت تنام هناك كل هاي المدة بدون متجي وتشوفني ؟
ماجنت تعرف غدير الله ما تتحمل اغيابك ..

علي الصادق :: لا تجرحيني وتحسسيني بالندم فوك ما اني مييت من الندم ..

_ ماعندي كلام ويياك كل الكلام ضاع كدام عيونك كلشي نسيتة كلشي راح ..

_ لو جان اكو شي بخاطرج كولي ..

_ جنت اتمنى نتلاكة بس جنت خايفة خايفة لا اشوفك وتعتبر الاخيرة .. وماريد هسة تكون هاي الاخيرة متغاضية عن كلشي سويتة لان انت اعز واحد الي
والاخوة بيها تضحية وهاي انا ضحيت هسة بثقة ابوي لخاطرك ..
خلينـي اكبر كدامك لا تعوفنـي بعد كلبي خلص من الهجر ..

سكتت لان حسيت كلبي خلص !!
ودمعتي صارت بطرف رمشي ما اردف علي الصادق وياي بس اخذني لحضنة وبقى حاضني ويبجي ..

حسيت حضن علي الصادق شال اشتياقي لعلي الباقر كلة ماكدرت بعد اقاومة اكثر من هيج اخووي هذاا شلت ايدي وحضنتة وخليتهن خلف ظهرة ..

وكعدنا بالخرابة .. وصرنا نسولف ثلاثتنا ..
وصار الامل موجود بكلبـي بس جنت خايفة لا رجعلي علي الصادق و علي الباقر راح منــي لان صالي شهر مادري عنة ولا يرد علية ..
بعدين شفت نضرات علي الصادق لطيبات لمن تحجي .
صفت للوضعية ياا هذول الزووج جانو يلتقون هنا
شكوو شكوو شصاير هااا ههههههه
اخذت اتشاقى وياهم لان انا ادري طيبة الزهراء لعلي الباقر ..

غدير الله :: اي سولفولي شلونها لقائاتكم السـريــة ؟؟

علي الصادق :: تخمش الكلب انا خايف عليها لا تنكشف ومكدر ما اشوفها بس قللناهن ..

_ اممم قللتوهن زين يلا طيبات خلنا نروح اتاخرنا ..

طيبـة الزهراء :: تمام علي الصادق بالك لنفسك ..
وهسة من نطلع منا انت روح لدكتور لا تضل ساكت ..

غدير الله :: خيرر شبيك ليش يراجع دكتور ؟

علي الصادق :: صارلي يومين احس بوجع براسي وطيبة خابصتني روح و روح لدكتور ميحتاج بحبوب يتعالج

_ ها يعني لان خايفة عليك صرت خابصتك ؟؟! سهلة علي الصادق غديرة انتضرج برة ..

طلعت طيبة الزهراء وانا بقيت اباوع لعلي الصادق حطيت ايدي على خدة واردفت وياه ..
ورجع اخذ ايدي باسها ورد عليه ..

غدير الله :: بس كلام طيبات صحيح روح لتطمن اكثر تمام يروحي ..

_ تدللين من فص عيني راح اروح ..

_ حبيب روحي راح اشتاق الك

_ اخذي رقمي من طيبة

_ تمام يبعد روحي

_ بالج لروحج انت وهاي بطنج ..

_ لا تحشش على بطني مو زين راح اسويك خال

_ يابعد عمري من غير شي انا احس بالأبوبة لان انت بنتي
وهسة راح تخليني اصير خال ؟!

_ كلشي اخليك تصير يلا رايحة

_ طريقج سلام ..

عفتـة وطلعت اخذت طيبات وكعدنا نتمشى ..
ونحن بطريق ..

_ شكرا طبطب. .

_ على

_ خليتيني التقي بروح جانت ضايعة الي

_ اختج انا ماكو اخت تشكر اختهة

_ اممم صحيح .. زين شبيج ضجتي من علي الصادق

_ لا مضجت منة عادي والله بس

_ بس شنو سولفي اذا مضايجة من علي الصادق ليش كلبتي الخلقة

_ حيل مشتاقة لعلي الباقر مجنت اعرف اغيابة هيج قوي ويترك فراغ حتى المعتز باالله والله قابلة يتعارك. وياي بس خلي يجي خليني اشوفهم حييل مشاقة الهم

_ وانا نفس حالج والله بس ما بيدنا شي غير الانتضار ..

_ صدك غديرة ..

_ عيوني

_ شنو قصه رههف وليش متزوجها علي الباقر وشنو مجد الحسين ابنة ؟؟

بقيت صافنة بوجها بصدمة كلشش جبيرة هاي شعرفها بزواج علي الباقر لاااا خرربت وعلي ..
لاحضت صدمتي وملامح المتفاجئة بيه ورجعت واردفت وحسيت الغصة بصوتها...

_ من مهــد العرس وانا اعرف مو هسة عرفت ترى وادري بيج تعرفين لان علي الباقر ميضم عنج شي
غدير ماريد اعرف شي من حقة. يتزوج لا انا ولا غيري يمنعه لو يحاسبة بس اريد اعرف ليش بالسر ؟؟
كلنا منتضرين الفرحة بي ليش سوة هيج وعرس بالسر ؟

التزمت السكوت خفت تطلع مني كلمة وتخرب الي سواه علي الباقر كلة ..
منين اجتنا هاي السالفة كل عمرة علي الباقر يسوي كلشي لطيبات وهاي طيبات كدامي هسة
عرفت بكلشي ضماه علي الباقر لمصلحتها ..
رجعت واردفت وياي
وجانت مصرة حيل على قرارها ..

_ غدير جاي تسمعينـي اني مالي غرض ب علي الباقر بس جاي اسال ليش بالسر جاوبيني بس على هذا السؤال و لا مو بس متزوج صاير عندة ولد منها اسمة مجد الحسين !!! لي ما شارك هاي الفرحة ويانه ليش مكال النا عمتي راح تطير من الفرح ليش سلب مننا هذا الفرحة ..

انا هنا لمن شفت طيبة الزهراء مو مهتمة لزواج علي الباقر وعدها شي عادي بس متفاجئة ليش بالسر مادري انتابني شعور غريب حيل ..
يعنـي معقولـةة طيبة ماتحب علي الباقر لو تحبة جان ضاجت لزواجة هاي الطفلة الكدامي مضايجة هي تتسائل ليش ضم الزواج ليش مزوج بالعلن وفرحنة كلنا جميع !!
حجيت وياها ..

_ تردين تعرفين ليش اتزوج بالسر ؟

_ اييي ليش

_ لان مايحبها يالعووبة.

_ شهلعب هاذا واذا ميحبها شكو متزوجها من الاسااس

_ اسمعي جان عد علي الباقر صديق اسمة لهيب ( أمرين ) .
هذا انجسن بتهمة مدري شني جان وي داعش ماعرف شنو بس هوة مضلوم للاعرفة من علي الباقر
واخوي جان يركض بايدية ورجلية علمود يثبت برائته
وهذا جان بوقتها ب 2017 عندة اخت اسمها رههف ارملة شهيد وعدها طفل سجن لهيب ( امرين )
خلاه يشيل هم لاختة وشلون بدونة. وبالخصوص اذا عرفت بتهمتة لذالك وصـى اخوي عليهم ولان علي الباقر يخاف لا يوكع بالحرام وهوة جاي يودي احتياجاتهم عقد عليها ..
هلمود يحلل الدخلة والطلعة عليها وكذالك تصير تحت جناحة وعلى ذمتة لين يطلع اخوها ..

_ اهااا ومجد الحسين ؟

_ كتلج ابنهااا من زوجها الشهيد بس علي الباقر رباه ..

_ يعنـي مصاير شي ابين علي الباقر و رهف ؟

_ اششم ايدي ؟؟

_ احجي عدل شبيج

_ انت الي شبيج طيبات حجيت الي اعرفة تجيني بهيج سؤال شدراني اني صاير شي لو مصاير منايمة. وياهم بنفس الغرفة ..

_ عابتلج ..

_ اهه اريح كلبج اضن مصاير شي

_ ليش واثقه هلكد ترى رهف حلووة انا مكدرت اخزرها شلون اخوج العايش وياها من 2017 اصلا تلكي هسة عاشكها ..

_ الكلبة متعلق بمحبوب لو شيصير ما يتعلق بغيرة

_ ما فهـمــت ؟

_ علي الباقر يحب وكلبة وي شخص من اسنين ..
ومستحيل يتقرب لواحد غيرة لو يكدر يحب غيرة لان الكلب ما يشيل بس واحد وهوة منتضر يطلع اخوها حتـى يطلكها و كلمن يكمل طريقـة مثل ما جان عايش

_ كتيلي الكلب ميشيل بس شخص واحد ؟

_ ايي

_ اشو اني كلبي ياهو الاشوفة يشيلة ..

_ هههههههههه عابلتلجج انتي بعدج مراهقة باجر تتندمين على كل هاي سوالفج ..

_ والله العضيم صدك احجي ياهو اشوفة بالشارع ارجع للبيت احلم بي .. والمشكلة اضل ابجي من غيابة اشتاقيت اله ههههههه
خو اذا شفت واحد قياساتي وكاعد يمشي يححح غير بوديي اركض وراه واكضة ..

_ عزة بعينج والج ميصير هيييج لازم تسيطرين على مراهقتج انت هيج منطيتها كل الحرية غلطط بابة غلطط

_ مو بيدي والله حتى انا جاي اتأذة مشاعر مخربطة هرمونات مخربطة كلشي مخربط عندي مرات اكول شوكت اخلص منها شوكت اصير 18 حـتـى افتك ..

_ ترى بعدج 15 يعني انت بالبداية وهيج شسالفة طيبات
ومو شرط لمن تصيرين 18 تخلص المراهقة اكو ناس مراهقتهم تجي بالعشريات واكو لا بالأربعينات
مراهقة متأخرة .. بس اكو من يسيطر على نفسة واكو لاا وانت هسة بيدج مفتاح الخلاص منها اكضبـي مشاعرج تكدرين تسيطرين على مراهقتج لا تأذيج وتدزج لداهية متكدري تخلصي روحج منها عندذاك ..

_ والله كلامج صحيح وكلام رحمـة الزهراء صحيح هواي جاي تحجن وياي بس اني مشكلتي اذن تسمع واذن اطنش مااخذ الحجاية بس ان شاءالله راح الزم روحي هسة محرم يخلص وان شاءالله خير ..

_ محرم محررم ..

عاشور شهر المحرم ... ميعـاد انتصــار الدم
رفت راية العباس ... وصوت الغيرة يتقدم
عباس الوفي اتكلم ... بالانصار يتشيم
يوصف بعد عاشور يوم الملحمة الاعظم

جنت طفلة. ودوم اسمع هلشعر من حلك ابوي وما افهم من يمة شي بس هسسة هههههه

_ خليها سكتة يختي مصيبة الحسين ما تسولف سلام الله علية تلكين غصتة بالكلب الطفل قبل الواعي ..

_ اييي والله ..

كملنا طريقنا ودخلت البيت لكيت النسوان جايات طيبات كعدت على الدرج واني وكفت اباب المطبخ لان ما شاء الله الحضور دخلت الملاية .
وبدت تقرا ونحن نلطم وبعدها بدت تنعى .
الي صوته رد كلبـي وكلامات نعيها كسرنة

__ لچن ما طاح ابو الأيمة تربات الخدر يمة
~~~~
وحدة تسكب الدمعاات وحدة تنحني تضمة
~~~~
وحدة ناحت وصبغت هدمها من نزف دمة
~~~~
وحدة قبلت نحرة هبطت من رگبتة تشمة
~~~~
وحدة بالعويل تصيح وحدة كامت تحشمة
~~~~
غدن من الرعب والخوف حرمة تلوذ بالحرمة
~~~~
وزينب ناديتة يحسين وعليها احزانها مخيمة
~~~~
شسوي بدنيتي بعدك يا ابو الاكبر علية ضلمة
~~~~
منـي الروح كون تروح وعيني كون تعمى
~~~~
يخدري و هيبتي و دنياي و دلالي و زودي و الحشمة
~~~~
يا ابو گلب الچبير شلون يا ابو الطيبة والرحمة
~~~~
بناتك علية هذا اليوم واجب صارن وذمة .
~~~~
من بعدك عفت روحي بحبل الصبر ملتزمة
~~~~
وليالي الحزن من بعدك عليهن صرت متعلمة

شلون هيجي انزرع حب الحسين بداخلنا ونحن اطفال
صدق قول :
الرسول ( عليه وعلى اله افضل الصلاة واتم التسليم )
: ( سوف يخلق الله له شيعة تبكي علية وتحيي عزائة ) معناها انخلقنة من اجل الحسين فقط ..
بقينا نلطم صدورنا ونبجي على مصاب مر علية اكثر من الف وسبع مية سنة ولحد الان تارك اثر حزن وكسر بينة
رغم ما شفناه ولا عشنة وياه لكن بمجرد جنا صغار ونسمع اهالينة من يوكعون بشدة ينتخون بيهم
وتعتبر الشدة انكضت ونزاحت
ما بيوم اندعيت لأم البنين وردتني
ولا بيوم طلبت من العباس وخيبني
ولا توسلت بالحسين وخذلني

سادتي وائمتي الاثنا عشر فيهم النجاة من سقَر اذا قال فيهم الرسول : هم سفينة النجاه من ركب بها نجى ومن تخلف عنهم هلك

"" حامِد المتقين ""

علـى طول فترة غياب علي الباقر و المعتز باالله و اصفاد الحق و صيوان وكوني انا محامي
كلفني ان اصير محامي دفاع بغيابة والزم قضية صديقة لهيب بعد ما صارت المحكمة بعد العرس بيومين .
ولقلة الدلائل واختفاء الشهود كدرت اطعن القضية واطلب الاستئناف واجلها لمن يرجع المحقق بالقضية الي هوة علي الباقر ولحَسن حضي
وكف القاضي وياي وقبل على طلب الاسئناف .
وخليتهم يخلون لهيب بالانفرادي وميدخل علية احد لا ضابط ولا زاير
لان سولفلي اصفاد الحق و علي الباقر حزازية الموضوع ويمكن بغفلة مننا يودون ب لهيب للاخرى ..
ولان ملف لهيب مجان كامل اوراق ناقصة خيوط مخفية اكو شي بالقضية ممفهوم .
ولمن قريت اسم زُبير العاصي مذكور بالملف زارت حيرتي اكثر وتشتت ذهني
لهيب شجابة على زبير العاصي .

اخذت الملف وطلعت صعدت سيارتي وبوجهي لمكان عمل زبير ..
دخلت علية ولكيتة بمكتبة اول ما شافني بدة على وجهة الاستغراب شسوي عندة بس ما طول الا ومد ايدة وكالي تفضل ..
رحت وكعدت بالكرسي كدامة وحطيت الملف كدامي على الطبلة ..
هوة دب القلم من ايدة وسد السجل الجان يشتغل بية واردف ..

زُبيــر :: خيرك يا حامِد للمتقين صاير شـي

_ جايك بشغل واريدنك تساعدني بعيد عن الامور الصارت بحياتنا الشخصية هسة الموضوع يخص روح يمكن تنحكم اعداام ويضيع شبابة ..

_ دام الموضوع هيج بية روح ويتعلق بشخص بريئ فا انا انسى كلشي و انت اخوي وصديقي ومستعد للمساعدة كول شنو ؟

اخذت الملف وفتحتة كدامة وطلعت صورة لهيب وحطيتها كدامة على المكتب اخذها وصار يخزها ورجع باوع الي !!

زُبير :: شنوو

_ تعرف صاحب الصورة هاي .

_ مدري مو غريب علية بس ما اذكرة منو

_ هذا اسمة لهيب عبد الله انت القيت القبض علية وي الضابط سراج ..

_ اهاا تذكررتــة اربعة ارهاب جان بوقتها ..

_ عوفك من هذا الي دوهنـي ليشش من بعد مجنت انت ابو القضية فجأة جنت بوقتها انت ممترقي لنقيب صح

_ ايي بوقتها جنت ملازم اول ..

_ حلوو شنو يخلي الضابط الي برتبة ملازم اول زبيــر العاصي فجأة يترك القضيــة هاي وبدون سابق انذار ويبتعد عنها نهائياً .. ومو بس هيج بذاك الوقت انت اخطت اجازة من العرفتة واجازتك طولت ثلاث شهور كضيتهن انت بعيد عن الشغل ..
شنو الموضوع اتمنى تساعدني لا تضم عني ولا معلومة الثغرة تساعدني ..

_ انت صرت محامي دفاع لـــ لهيبب ؟

_ اييي

_ ههههه مراح تحصل شي صدكني واذا عبالك تكدر فاانت غلطان والموضوع ما يخص بس لهيب الموضوع اكبر بهوواي من الدولة بكبرها باع حامد لهيب بأمان دامة بالسجن لا تخلي يطلع وينذبح ..

_ ليش تكول هيج وانت نقيب دام تعرف هذا الحجي ليش ما تحمي ليش ما تلزم اليدين الجاي تهددة وتكسرهن مو انتم شغلتكم تحموون لو انا متوهم ؟

_ اكبررر مننا الموضوع اكبر منا كلنا اذا نحن لزمنا ايد وحدة راح تطلع النا مليون ايد وتكسرنا احنا وشغلنا
حامد بروح ابوك افهمنـي ..

_ انت الي افهمنـي انا محامي وانا قاسم ماكو بريئ ياخذ جزاء ما يستاهلة ولهيب وياك لو بدونك انا راح اطلعه برائة

_ يمووت

_ ما يمووت لان انا حطلعه برائة واحط ذولاك ابدالة

_ مصدك روحك ؟؟

_ اكيد اصدك روحي دامني على الحك ..

_ امشي بيها وشوف روحك عود ..

_ اسألك سؤال

_ جواب

_ ليش انسحبت من هاي القضية ؟؟

_ باع حامد بعيد عن كلشي خليني انطيها الك لكدام علمود لا تتتعب ..

_ وانا هاي الاريدها استرسل ..

_ استلمتها وانا القيت القبض على لهيب بس من تعمقت بالقضية وي سراج اكتشفت اكو اشياء مو صحيحه وعرفت ان لهيب بريئ وما بية كل من النحط بية .. ولمن صرت ادور بالاوراق اتلقيت تهديد لذالك اكلك اطلع منها ياا حامِد انتم ما عايزكم ..

بقيت صافن للوضع راجعت الملف ورجعت رفعت عيني الة واردفت وياه ..

_ هاي الاوراق عندي ناقصة تكدر تساعدني اجمعهن كلهن ؟؟!

_ حامِد ..

_ زُبيــر اجيتك بطلب صير رجال وياي وصير كدها ماريد شي منك بس هايي ..

_ بابة جاي اكلك الموضووع اكبر مني ومنك افهم بابة افهم ..

_ ماريد افهمم شيي الي اريدة لهيب يطلع وترجع سمعتة احلا من قبل

_ لا اله الا الله ولك ابوييي افهم لهيب خلللص ورقتة احتركتت عدهم حتى لو انت طلعته برائة رااح يكتلوه

_ ترى انت دولة تريد تقنعني ان هم اكبر منك ؟

_ اكبر مننا كلنا ..

_ شنو فائدتك اذا هيج الحجي

_ حامد

_ لا صدك دام كل واحد يسوي جماعة يصير اكبر من الدولة انتم شنو نفعكم دوراااات التدريب شنيي نفعها ..

_ اذا انت تكدر تخلصنة منهم روح شوف طريقك يلا

_ ايد وحدة متصفك ابد

_ خوش امشي بالطريق هذا ونحن نشد على ايدك اوعدك انطيك كل الدعم

_ ماريد، شي بس اريد نقص الاوراق

_ عندي نقصهن بس اذا سلمتهن الك الخطر يصير على لهيب وعليك .

_ وانا راضي بس سلمني ..

_ اللهم اني بالغت اللهم فأشهد ..

_ امرك باجر لهنا واجي اخذهن ..

_ الله وياك ..

تركـت زبير وطلعت افتريت بالسيارة وانا افكر اذا هاذا زبير الشايف ومتباهي بروحة وقوتة وذول هيج سوو بي
معقول ماكدر عليهم انا ؟؟
اول ما رجعت للبيت لكيت امي و وهج الطف مموجودات ابيت خالي بالقراية .
صعدت للغرفــة وطلعت الدشداشة مالتي السودة حطيتها على الجرباية جهزتها .
ورحت طلعت التلفون الثاني مالتي الي بي رقم مشفر
واخذت اتصلت على علي الباقر كامرة ..
وفتح الخط علية من موقع عملة .
ولكيت كاعد يمة المعتز باالله .. ثبتت التلفون كدامي وصرت احجي وياهم ..

حامِد المتقين :: ها يولد شلونكم ؟

المعتز باالله :: شتشوف باروع ما يكون حالنة بشرفك انا مال كعدة جوة الكاع ؟

_ انت مكانك السويد شجابك لهنا شوداك

المعتز باالله :: الدهر جابني الدهر دهرني ..

_ ههههههههه ابا الحسن شلونك ؟

علي الباقر :: بخير انت شلونك شخباركم كلكم

_ لا تخاف ولا تشيل هم كلنا بخير وهاي اليوم اول يوم محرم استلم اهلك قرايات ..

اصفاد الحق :: ولكم كل سنة نحن بالموكب بهيج يوم !

المعتز باالله :: هلسنة مجاهدين هههه

_ شوكت ترجعون ؟

علي الباقر :: يـم الله لهسة ما حددنا موقعهم ..

_ شسالفـة صدك تحجون ؟

صيوان ;; ولك خوية شيبو راسنا اول مرة اصفاد هلكد يتعب صالنا اسبوعين نركض وراهم ركض الفهود وما مملحكين عليهم .

_ هااا ولك اصفاد خلصت حيلتك ههاهااههههه

المعتز بالله :: وعلي على هذا التعب انا كلت ذول جيش كامل اتخيل اليوم وصلتنا معلومة هم بسس 6 اشخاص !!!!!

اصفاد الحق :: عمي ورمت ايدي بكد ما احرك بيهن وماجاي الحك المشكلة شبكتهم يشغلوها ثواني وتنغلغ اسبوع ..

_ هم مشكلة هاي ..

علي الباقر ;: انت هسة متصل صاير شي ؟

_ لا بس حبيت اطمن عليكم لان هنا كلهم بالهم يمكم .

صيوان ;; كللهم نحن بخير باذن الله واذا رجعنا شهداء هم الحمدالله ..

_ ان شاءالله ترجعون بسلامة ..

صيوان ;: اكلك ابو كرم ..

_ كول عيني ..

_ اهلي بعدهم هنانة ؟

_ لاا من ثاني يوم انا بيدي رجعتهم للعمارة مثل ما امرتني ..

_ اطمنت عليهم بعد اخوك ؟

_ شسالفة توصيني على اهلي كل يوم اتصل بدغار وهوة يزرك عليهم ..

_ والله ادريك متقصر وادري دغار و مكرم هناك بس كلبي ما مأمن لعمي اذا عرف بيه مموجود يكوم يلعب بذيلة يكرم طاري العباس ..

المعتز بالله :: بس دليني علية هذا عمك الا اكسر ظهرة بالعباس واخلي عاايب يمشي منحني كدام الخلك ..

صيوان :: ميفييد بيي يا كسرة ظهر لو اذبحة كدامي ما يشفى كلبي ..

علي الباقر :: هدو الوضع مو وقت هلسوالف ..

_ محتاجين شي ؟

علي الباقر ;; اييي اريدك تمر على ' أم مجد الحسين ' تاخذها وتوديها لبيت صيوان للعمارة .. راح تلكاها مجهزة اغراضها وصلها لهناك وهمة عدهم خبر ان راح تجيهم .

_ هاي ههي تدلل هية نفس بيتها مو ؟

_ ايي نفسة نفسة ..

_ خوش باجر امر عليها واخذها ..

_ الله ينطيك العافية ..

_ بعد الولد محتاجين شي ؟

اصفاد الحق :: سلامتك بالكم على الاهل ..

_ لا توصون بيهم بالكم لنفسكم يلا تضل يمكم العافية ..

صيوان :: الله وياك بعد اخوك

سديت التلفون ورجعت ضميتة ..
لبست دشداشتـي السودة و وكفت كدام المراية اعدل بروحي مشطت شعري ولحيتي
ولمن ردت اطلع سمعت صوت رسالة
فتحت تلفوني لكيت الساعة 56 : 7 م
والرسالة جايتنـي من شيخــة كلبي اقصد شيـخة العلويات رحمـة الزهراء فتحت الرسالة وجانت تكلي بيها ..

رحمة الزهراء :: حمدمد لا تنسى روحك بالمواكب وراك ابرة انسلين اليوم موعدها روح على اي صيدلية واضربها
لا تضل بدونها ترى اليوم موعدك روحح واضربها ..

قريت الرسالة وضحكت الوحيدة المهتمة هيج بية ..
رحت للجرار وطلعت الابرة وحطيتها بجيبـي ..
ورجعت اتصلت عليها . ولمن فتحت الخط جان صوت هوسة يمها عرفت بيها ابيت خالي لان صوت لطم نسوان وملاية ..

_ الوو ؟؟

_ هاا حامد ؟؟

_ ما اسمعج اطلعييي اطلعيي يمعودة ..

طلعت للحوش وكذالك جان اكو صوت بس مو نفس القبلة كدرت اسمعها نسطر راسي الله يساعدهن شلون كاعدات وراسهن ما يوجعهن ..
واردفت وياي ..

_ هاا حمدمد ..

_ ها شيخــة شلونج ؟

_ بخير الحمدالله انت شلونك

_ اني زين من قريت رسالتج

_ ايي ادري بيك تنسى حبيت اذكرك لا توكع من طولك مثل ذاك اليوم ..

_ لا لتخافين هاي اخذت الابرة امر عليج هسة تضربيها الي حتى ما انسى

_ خوش تعال حنتضرك بالباب حتى تفوت للبراني ..

_ ايي زين يلا جايج

_ تعال ..

سديت منها التلفون وطلعت بحماسي ..
لمن طلعت من البيت شفت رجال جبير بالعمر بس مرتب حلو يباوع لبيتنا شوي ليغاد واكف ويخز بيتنا ويتلفت يمين و شمال
استغربتة رحت واتقدمت يمة وسالتة ..
على بالي متيه كلت اساعدة اشوف شبي ما بية ..

_ عمي ؟

قصطير :: تفضل ابني ؟

_ خيرك تتلفت وواكف هيج متيه لان اول مره اشوف وجهك هنا ؟

_ لا ابني انا جاي ادور على بيت السيد صفاء الحسن

_ ايي عمي وصلت اتفضل ..

_ وين بيتة ؟

_ هذا البيت الي انا طلعت منة انا هوة بيت خالي صفاء

_ اريد التقي بصفاء وين الكي

صفنت بوجهة يا لقاء ب خالي و خالي صفاء الحسن صالة 6 سنوات ميت !!!!!
رفعت حاجبي ووجهي راحت منة التعابير ..

_ شنو عمي صالك شكد ما شايف خالي صفاء

_ مدري بس من الألفينات هيج قبل السقوط ..

_ عمي خالي صفاء انطاك عمرة صالة ست سنوات مودع الحياة ..

_ صددك تحجي ؟؟

_ صدك احجي اي

_ الله يرحمة ان شاءالله. زين ابنة محمد الصدر او مؤمل الصدر ؟

_ الاثنين ماتو ..

حجيت بوجها هيج وحسيتة نفس التفاجأ وصارت تعابير وجهة مصدوم وحجة وياي بلهفة مشكوف ..

_ الاثنيين مااتوو بسس شلوون ؟؟

_ محمد الصدر مات وي جدي بحادث و مؤمل الصدر مات بتضاهرات ..

_ لا حول ولا قوة الا بالله العلي العظيم ..

_ الله يرحمهم ..

_ زين وابنة بزر كعدتة تحرير ..

_ المووت اهون ولا نفارك غالي وجاي نحاول نتناسى منين طلعتلي انت فتحتلي الف جرح بجرح بهاي الثواني

_ شنيي همم ماااتت ؟؟

_ اييي ماات

_ الا اله الا الله شنو الله ذاب عذابة على اولاد صفاء يريد يكطع نسلة من الدنيا ؟

_ مينكطع نسل خالي عندة البشير قيصر و الفاروق الاعظم وعندة كريمتة ..

_ شنو اسمهة كريمتة ؟

_ شتريد عمي ؟

_ انا صديق قدديم لــ السيد صفاء الحسن وتكدر تسال خالك عبد الحسن لو هذا هم ماات ؟؟

_ لااا اسم الله علية بخير هوة

_ ايي اسالة عنـي وهوة راح يعرفني
بس مكتلي شنو اسم كريمة صفاء الحسن لان انا ادري خلفتة بي ولد ؟

_ صارت عندة بننت من تالي

_ شنو اسمهة ؟

_ كتلك كريمتة لا تلح بالاسم هيج كافي .. محتاج شي بعد عمي ؟ اريد اتوكل عندي شغل لراسي

_ لا عمي هاي ههي ما قصرت

عفتة وردت اروح واتذكرت انداريت اله وهتفت وياه

_ مكتليي شنو اسمك خليني اسال خالي عليك ؟

_ اسمي سائد جبران ..

_ تمام

كملت طريقي ورحت لسيارتي صعدت ورحت لبيت خالي عبد الحسن .
اول ما دكيت الباب فتحتة شيخـة كسرت طريقي وتوجهت للبراني دخلت انا وياها وسدينا الباب ..
وكعدت انا وكعدت هي كدامي
طلعت الها الأبرة وكفيت ارداني .
واخذت تحرك بالوريد مالتي لما شوي نفس الورم .
سحبت الأبــرة وضربتنــي بأيدي .
وخلصـت جانت ايدها حييل خفيفة رجعت نزلت ارداني
واردفت وياها ::

_ شنـو هاي الأيد التخبــل ست شيخــة ؟؟

_ ابرتك ناعمة ..

_ والله ايدج الناعمة ..

_ هههههه يلا هسة كافي مجاملة وتكدر تروح للمواكب مالتك لا تطلع النسوان وتنحصر هنانة

_ نسيتـي الباب هذا ؟

_ يااا والله صدك مدري تدوهنت بس هم اذا هيج رووح لا تضل هنا انا راح افوت جوة ..

_ تمام يروحي انتِ

_ يلة مــع السـلامة

عافتني شيــخة وراحت وانا طلعت من الباب الخلفي وانداريت لسيارتي صعدتها وطلعت لساحة الذ ضجت بالقصائد والمواكب احياء لذكرى عاشوراء
لمن وصلت موكبنا لكيت خالي عبد الحسن متحزم .
ويمة البشير قيصر ونجليه
والفاروق الأعظم و المرتضى الامير سلمت عليهم ورحت وكفت يم خالــي .
اردف وياي بســـؤال ..

عَبد الحَسـن :: تريــد تحجـي شيي اشوفنك ما مرتاح بوكفتك ؟

_ هوة ايي يمكن اكو ..

_ الي هوة سولف !!

_ طلعت من البيت والتقيت برجال ضل يسألنـي عن خالـي صفاء الحسن وصار يسمي الي اولادة الي ماتو وضل يدك وينوح يريد يعرف اسم وهج الطف .

_ انت كلتلة اسمها ؟؟

_ لاا انا بس كتلـة خالي عندة كريمة. وي الولد ضل ينوح من عرف صاير عندة بنت ضل يسالني شنو اسمها انا تركتة ورحت ..

_ شلون صاير شكلــة ؟؟

_ هو كالي اسال خالك عبد الحسن وهوة يعرفني

_ شنو أسمـــة ؟؟

_ ساائد...

قاطع كلامي سحبني من ايدي واخذني لورة الموكب ابتعدنا عن هوسة القصائد
واردف وياي بسؤال واول مرة اشوف ملامح الرعب بوجه خالـي ..

_ قصددك سائد ال جبران ؟؟

_ ايي هوة هذا

_ حامد كتلة اسم وهج ؟؟ شحجيت وويااه انطيني كلشي بالتفصيل

_ لاا خالي والله مكتلة شي بس من شفتة يلح تركتة واجيت لهنا ..

_ استغفر الله ..

_ منو هذا ؟!

_ اتذكر زين .

_ انطيتـة اسم وهج الطف معلومة عنها

_ شسالفة حال انا ابن اختك ما نطيتة شي .

_ خوش

_ بس مكتلي منو هذا ؟!

_ صديـق قديم ارجع انت للموكب يلا

عافاني خالــي وراح .. بقيت افكر دامــة هيجي صديق قديم ليش خايف منة هلكثر ؟؟؟
شسالفتة وشدخل وهج الطف بيـهم ؟؟!
بقت سالفة تجيبني سالفة توديني لين ما نسيت كلشي وتغاضيت عن كلشي ورحت اشوف الاحياء ..

"" المعـــتز باالله ""

علـي طول فترة كعدتي هنا وي الشباب جان بالي مزروع ومتفرع ومترعرع
يم وهج الطف . وبالخصوص لمن لمحت صورتها عند اصفاد الحق .
كعدت باالليل وحدي كدام الكامرات لان موعد المراقبة علية اليلة
جنت بس جسد كاعد يم الكامرات
بالي وفكري وكلشي بية جان يم بغدادي الي عفت روحي بيها واجيت هناية ..

ماعرف شوصف يا شعور منهن هواي تغيرت بالمدة الكضيتها بعيد عنهم حسيت روحي شكد احبهم وشكد انا متعلق بيهم من تكبري مجنت احس بهلشي بس هسه حسيت ومن ضمن هذا الشعور الراودني وهاذا الاحساس .

شعور تعلقي بهاي المخلوقة حسيت الله خلقها الي
انا المتكبر المتعالي الما اطخ راس
صرت وياها تحت الدرك السفلي
تنازلت عن روحي و كرامتي وكلشي يمها. ضحكتهة ردت عافيتي و ارويحتي
عيونها بثت النور بعيوني .
رب العالمين جل جلاله يتكلم بالقران الكريم عن الحور العين اليزرقنا بيهن في چنة الاخرى

بس الغريب بقصتـي ان انا
الحور العين نرزقت بيها بدنيتي وهج الطف 28 حرف من احرف اللغة العربية ماكدرو يوصفوها. .
كسرت افكاري وكلت ما بيها مجال انا 20 واهي 16
كلش كلش كاافي اخذت تلفوني المشفر واتصلت على عمي وجانت الساعة. 46 : 3 ص
ورد علية عرفتة ان هو لهسة بالموكب يعدل بغراض التشابيه ابتعد عن الهوسة اليمة
واردف وياي :

عبد الحسن :: هاا اعزيز خيرركم صاايرلكم شيي لا سامح الله ؟؟

_ لا عمي مابينة شي غير العافية

_ اشووة خرعتني جا شمالك متصل ؟

_ اريد احجي وياك حتى لو مو وقتها بس اريد ارتاح واضمن ..

_ شنو بوية احجي ؟

_ عمي اريدنك تخطب وهج الطف الي على سنة الله وسنة جدي رسولة .

_ صدك تحجي ؟

_ ايي عمي حيل احبها وحييل متعلق بيها واريدها هية لان هية بت عمي وانا احق بيها

_ اليوم اول يووم محرم ..

_ ايي عميي لفرحة الزهرة

_ منا لفرحة الزهرة الله كريم

_ اريد هسة تحجي بموضوعنا جتى منا للفرحة عرسنا

_ هلكد مستعجل

_ والله يا عمي كلش كلبـي خلص شوك

_ والله وكبرت يا اعزيز وصرو تعشك ؟؟

_ اهههههه

_ كمل شغلك هسة وتعالو لهنا بخير وسلامة والله كريم

_ دام انا قويت كلبي وسولفت الك وانطيتك علم انا اريدها هاي هي انا هسث مرتااح

_ عسى دوم تسود عليك الراحة ..

_ يلا عمي انا اخليك تكمل شغلك مال التشابية

_ انتبهو لنفسكم

_ لا توصي

_ استودعتكم الله يولدي

سديت التلفون من عمي وشمرتة وبقبت اراققب واني الأبتسامة شاكة حلكي ..

وأخيرا ياا علي اوووفف لو صدك وصارت الي والله نذر علية لأترس ضريح الامام علي شموع .
والأتكفل بتعليم 70يتيــم
وأساعد 100 محتاج مساعدة تسد حاجتة .

هاي الامور اعتيادية كل واحد بينا يسويها بكل يوم ك الصدقة او التزكية بس ذووللل بذااات حددتهم بالنذر مالتي الهم شي خاص ..

ردت افتح ذاك تلفوني حتى اشوف صور غزالتــي وطفلتــي بس ما كدرت كمـــت من الكامرات ورحت للغرفة الثانية لكيت علي الباقر نايم .
واصفاد الحق نايم على ايدة
وصيوان ومجموعة من الولد الي اجو ويانة بهاي المهمة
نايمين واحد على الثاني
حق والله احنا شكثرنا والغرفة عبالك كبر مدري شكد طولها يمكن بس 30 متر .

رحت لراس اصفاد الحق واخذت تلفونة بعد ما فتحتة بالبصمة مالتة
طلعت وكعدت بمكاني ولكيت امذخل التلكرام مالتة
دخلت علية لكيتة مراسل وهج كلبـي المشتعل

مصور وياها بالعرس وداز الها الصور كعدت اتمعن بيها
من الهوسة ذاك اليوم ما لحكت اشوفها
مدري شوكت لكطها اصفاد الحق شافها ومصور وياها فوكاها .
ضليت اشوف بعد ما رسلتهن لتلفوني المشفر ورجعت تلفون اصفاد لمكانة
ورجعت مچابل الكامرات والصور حك المعشوقة يلي شوقي تشقشق شوقا على رئيتها ..

افكر بالعرس وشلون راح نطلع .. اهههههه

ما جنت ادري الفرحة مرات متكمل والفرح مسوي ويانة ثار والدنيا بس تشوفنا فرحانين تلجمنا الف لجمة ..

اوووف والف اهه

هنيالة ومليون الف مبارك الة الي امة هلهلت بعرسة على وحدة يعشها وهاويها ..

______________________________

__ ينسونَ وجوهُهم في عيونِنا ، ويرحَلون

يَــــتبـــع ⇦⇦

لتواصل انستكرامي o.oll13

احبكم والســــلام